𑁧𑁪. 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀦𑀺𑀤𑁆𑀤𑁂𑀲𑁄

𑁬𑁫. 𑀓𑀣𑀁 𑀢𑀤𑀸 𑀲𑀫𑀼𑀤𑀸𑀕𑀢𑁂 𑀥𑀫𑁆𑀫𑁂 𑀧𑀲𑁆𑀲𑀦𑁂 𑀧𑀜𑁆𑀜𑀸 𑀧𑀘𑁆𑀘𑀯𑁂𑀓𑁆𑀔𑀡𑁂 𑀜𑀸𑀡𑀁? 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀓𑁆𑀔𑀡𑁂 𑀤𑀲𑁆𑀲𑀦𑀝𑁆𑀞𑁂𑀦 𑀲𑀫𑁆𑀫𑀸𑀤𑀺𑀝𑁆𑀞𑀺 𑀢𑀤𑀸 𑀲𑀫𑀼𑀤𑀸𑀕𑀢𑀸. 𑀅𑀪𑀺𑀦𑀺𑀭𑁄𑀧𑀦𑀝𑁆𑀞𑁂𑀦 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀢𑀤𑀸 𑀲𑀫𑀼𑀤𑀸𑀕𑀢𑁄. 𑀧𑀭𑀺𑀕𑁆𑀕𑀳𑀝𑁆𑀞𑁂𑀦 𑀲𑀫𑁆𑀫𑀸𑀯𑀸𑀘𑀸 𑀢𑀤𑀸 𑀲𑀫𑀼𑀤𑀸𑀕𑀢𑀸. 𑀲𑀫𑀼𑀝𑁆𑀞𑀸𑀦𑀝𑁆𑀞𑁂𑀦 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀢𑀤𑀸 𑀲𑀫𑀼𑀤𑀸𑀕𑀢𑁄. 𑀯𑁄𑀤𑀸𑀦𑀝𑁆𑀞𑁂𑀦 𑀲𑀫𑁆𑀫𑀸𑀆𑀚𑀻𑀯𑁄 𑀢𑀤𑀸 𑀲𑀫𑀼𑀤𑀸𑀕𑀢𑁄. 𑀧𑀕𑁆𑀕𑀳𑀝𑁆𑀞𑁂𑀦 𑀲𑀫𑁆𑀫𑀸𑀯𑀸𑀬𑀸𑀫𑁄 𑀢𑀤𑀸 𑀲𑀫𑀼𑀤𑀸𑀕𑀢𑁄. 𑀉𑀧𑀝𑁆𑀞𑀸𑀦𑀝𑁆𑀞𑁂𑀦 𑀲𑀫𑁆𑀫𑀸𑀲𑀢𑀺 𑀢𑀤𑀸 𑀲𑀫𑀼𑀤𑀸𑀕𑀢𑀸. 𑀅𑀯𑀺𑀓𑁆𑀔𑁂𑀧𑀝𑁆𑀞𑁂𑀦 𑀲𑀫𑁆𑀫𑀸𑀲𑀫𑀸𑀥𑀺 𑀢𑀤𑀸 𑀲𑀫𑀼𑀤𑀸𑀕𑀢𑁄.

𑀉𑀧𑀝𑁆𑀞𑀸𑀦𑀝𑁆𑀞𑁂𑀦 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀢𑀤𑀸 𑀲𑀫𑀼𑀤𑀸𑀕𑀢𑁄. 𑀧𑀯𑀺𑀘𑀬𑀝𑁆𑀞𑁂𑀦 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀢𑀤𑀸 𑀲𑀫𑀼𑀤𑀸𑀕𑀢𑁄. 𑀧𑀕𑁆𑀕𑀳𑀝𑁆𑀞𑁂𑀦 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀢𑀤𑀸 𑀲𑀫𑀼𑀤𑀸𑀕𑀢𑁄. 𑀨𑀭𑀡𑀝𑁆𑀞𑁂𑀦 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀢𑀤𑀸 𑀲𑀫𑀼𑀤𑀸𑀕𑀢𑁄. 𑀉𑀧𑀲𑀫𑀝𑁆𑀞𑁂𑀦 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀢𑀤𑀸 𑀲𑀫𑀼𑀤𑀸𑀕𑀢𑁄. 𑀅𑀯𑀺𑀓𑁆𑀔𑁂𑀧𑀝𑁆𑀞𑁂𑀦 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀢𑀤𑀸 𑀲𑀫𑀼𑀤𑀸𑀕𑀢𑁄. 𑀧𑀝𑀺𑀲𑀗𑁆𑀔𑀸𑀦𑀝𑁆𑀞𑁂𑀦 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀢𑀤𑀸 𑀲𑀫𑀼𑀤𑀸𑀕𑀢𑁄.

𑀅𑀲𑁆𑀲𑀤𑁆𑀥𑀺𑀬𑁂 𑀅𑀓𑀫𑁆𑀧𑀺𑀬𑀝𑁆𑀞𑁂𑀦 𑀲𑀤𑁆𑀥𑀸𑀩𑀮𑀁 𑀢𑀤𑀸 𑀲𑀫𑀼𑀤𑀸𑀕𑀢𑀁. 𑀓𑁄𑀲𑀚𑁆𑀚𑁂 𑀅𑀓𑀫𑁆𑀧𑀺𑀬𑀝𑁆𑀞𑁂𑀦 𑀯𑀻𑀭𑀺𑀬𑀩𑀮𑀁 𑀢𑀤𑀸 𑀲𑀫𑀼𑀤𑀸𑀕𑀢𑀁. 𑀧𑀫𑀸𑀤𑁂 𑀅𑀓𑀫𑁆𑀧𑀺𑀬𑀝𑁆𑀞𑁂𑀦 𑀲𑀢𑀺𑀩𑀮𑀁 𑀢𑀤𑀸 𑀲𑀫𑀼𑀤𑀸𑀕𑀢𑀁. 𑀉𑀤𑁆𑀥𑀘𑁆𑀘𑁂 𑀅𑀓𑀫𑁆𑀧𑀺𑀬𑀝𑁆𑀞𑁂𑀦 𑀲𑀫𑀸𑀥𑀺𑀩𑀮𑀁 𑀢𑀤𑀸 𑀲𑀫𑀼𑀤𑀸𑀕𑀢𑀁. 𑀅𑀯𑀺𑀚𑁆𑀚𑀸𑀬 𑀅𑀓𑀫𑁆𑀧𑀺𑀬𑀝𑁆𑀞𑁂𑀦 𑀧𑀜𑁆𑀜𑀸𑀩𑀮𑀁 𑀢𑀤𑀸 𑀲𑀫𑀼𑀤𑀸𑀕𑀢𑀁.

𑀅𑀥𑀺𑀫𑁄𑀓𑁆𑀔𑀝𑁆𑀞𑁂𑀦 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀢𑀤𑀸 𑀲𑀫𑀼𑀤𑀸𑀕𑀢𑀁. 𑀧𑀕𑁆𑀕𑀳𑀝𑁆𑀞𑁂𑀦 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀢𑀤𑀸 𑀲𑀫𑀼𑀤𑀸𑀕𑀢𑀁. 𑀉𑀧𑀝𑁆𑀞𑀸𑀦𑀝𑁆𑀞𑁂𑀦 𑀲𑀢𑀺𑀦𑁆𑀤𑁆𑀭𑀺𑀬𑀁 𑀢𑀤𑀸 𑀲𑀫𑀼𑀤𑀸𑀕𑀢𑀁. 𑀅𑀯𑀺𑀓𑁆𑀔𑁂𑀧𑀝𑁆𑀞𑁂𑀦 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀢𑀤𑀸 𑀲𑀫𑀼𑀤𑀸𑀕𑀢𑀁. 𑀤𑀲𑁆𑀲𑀦𑀝𑁆𑀞𑁂𑀦 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀢𑀤𑀸 𑀲𑀫𑀼𑀤𑀸𑀕𑀢𑀁.

𑀆𑀥𑀺𑀧𑀢𑁂𑀬𑁆𑀬𑀝𑁆𑀞𑁂𑀦 𑀇𑀦𑁆𑀤𑁆𑀭𑀺𑀬𑀸 𑀢𑀤𑀸 𑀲𑀫𑀼𑀤𑀸𑀕𑀢𑀸. 𑀅𑀓𑀫𑁆𑀧𑀺𑀬𑀝𑁆𑀞𑁂𑀦 𑀩𑀮𑀸 𑀢𑀤𑀸 𑀲𑀫𑀼𑀤𑀸𑀕𑀢𑀸. 𑀦𑀺𑀬𑁆𑀬𑀸𑀦𑀝𑁆𑀞𑁂𑀦 𑀲𑀫𑁆𑀩𑁄𑀚𑁆𑀛𑀗𑁆𑀕𑀸 𑀢𑀤𑀸 𑀲𑀫𑀼𑀤𑀸𑀕𑀢𑀸. 𑀳𑁂𑀢𑀼𑀝𑁆𑀞𑁂𑀦 𑀫𑀕𑁆𑀕𑁄 𑀢𑀤𑀸 𑀲𑀫𑀼𑀤𑀸𑀕𑀢𑁄. 𑀉𑀧𑀝𑁆𑀞𑀸𑀦𑀝𑁆𑀞𑁂𑀦 𑀲𑀢𑀺𑀧𑀝𑁆𑀞𑀸𑀦𑀸 𑀢𑀤𑀸 𑀲𑀫𑀼𑀤𑀸𑀕𑀢𑀸. 𑀧𑀤𑀳𑀦𑀝𑁆𑀞𑁂𑀦 𑀲𑀫𑁆𑀫𑀧𑁆𑀧𑀥𑀸𑀦𑀸 𑀢𑀤𑀸 𑀲𑀫𑀼𑀤𑀸𑀕𑀢𑀸. 𑀇𑀚𑁆𑀛𑀦𑀝𑁆𑀞𑁂𑀦 𑀇𑀤𑁆𑀥𑀺𑀧𑀸𑀤𑀸 𑀢𑀤𑀸 𑀲𑀫𑀼𑀤𑀸𑀕𑀢𑀸. 𑀢𑀣𑀝𑁆𑀞𑁂𑀦 𑀲𑀘𑁆𑀘𑀸 𑀢𑀤𑀸 𑀲𑀫𑀼𑀤𑀸𑀕𑀢𑀸. 𑀅𑀯𑀺𑀓𑁆𑀔𑁂𑀧𑀝𑁆𑀞𑁂𑀦 𑀲𑀫𑀣𑁄 𑀢𑀤𑀸 𑀲𑀫𑀼𑀤𑀸𑀕𑀢𑁄. 𑀅𑀦𑀼𑀧𑀲𑁆𑀲𑀦𑀝𑁆𑀞𑁂𑀦 𑀯𑀺𑀧𑀲𑁆𑀲𑀦𑀸 𑀢𑀤𑀸 𑀲𑀫𑀼𑀤𑀸𑀕𑀢𑀸. 𑀏𑀓𑀭𑀲𑀝𑁆𑀞𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀸 𑀢𑀤𑀸 𑀲𑀫𑀼𑀤𑀸𑀕𑀢𑀸. 𑀅𑀦𑀢𑀺𑀯𑀢𑁆𑀢𑀦𑀝𑁆𑀞𑁂𑀦 𑀬𑀼𑀕𑀦𑀤𑁆𑀥𑀁 𑀢𑀤𑀸 𑀲𑀫𑀼𑀤𑀸𑀕𑀢𑀁. 𑀲𑀁𑀯𑀭𑀝𑁆𑀞𑁂𑀦 𑀲𑀻𑀮𑀯𑀺𑀲𑀼𑀤𑁆𑀥𑀺 𑀢𑀤𑀸 𑀲𑀫𑀼𑀤𑀸𑀕𑀢𑀸. 𑀅𑀯𑀺𑀓𑁆𑀔𑁂𑀧𑀝𑁆𑀞𑁂𑀦 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺 𑀢𑀤𑀸 𑀲𑀫𑀼𑀤𑀸𑀕𑀢𑀸. 𑀤𑀲𑁆𑀲𑀦𑀝𑁆𑀞𑁂𑀦 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺 𑀢𑀤𑀸 𑀲𑀫𑀼𑀤𑀸𑀕𑀢𑀸. 𑀯𑀺𑀫𑀼𑀢𑁆𑀢𑀝𑁆𑀞𑁂𑀦 𑀯𑀺𑀫𑁄𑀓𑁆𑀔𑁄 𑀢𑀤𑀸 𑀲𑀫𑀼𑀤𑀸𑀕𑀢𑁄. 𑀧𑀝𑀺𑀯𑁂𑀥𑀝𑁆𑀞𑁂𑀦 𑀯𑀺𑀚𑁆𑀚𑀸 𑀢𑀤𑀸 𑀲𑀫𑀼𑀤𑀸𑀕𑀢𑀸. 𑀧𑀭𑀺𑀘𑁆𑀘𑀸𑀕𑀝𑁆𑀞𑁂𑀦 𑀯𑀺𑀫𑀼𑀢𑁆𑀢𑀺 𑀢𑀤𑀸 𑀲𑀫𑀼𑀤𑀸𑀕𑀢𑀸. 𑀲𑀫𑀼𑀘𑁆𑀙𑁂𑀤𑀝𑁆𑀞𑁂𑀦 𑀔𑀬𑁂 𑀜𑀸𑀡𑀁 𑀢𑀤𑀸 𑀲𑀫𑀼𑀤𑀸𑀕𑀢𑀁.

𑀙𑀦𑁆𑀤𑁄 𑀫𑀽𑀮𑀝𑁆𑀞𑁂𑀦 𑀢𑀤𑀸 𑀲𑀫𑀼𑀤𑀸𑀕𑀢𑁄. 𑀫𑀦𑀲𑀺𑀓𑀸𑀭𑁄 𑀲𑀫𑀼𑀝𑁆𑀞𑀸𑀦𑀝𑁆𑀞𑁂𑀦 𑀢𑀤𑀸 𑀲𑀫𑀼𑀤𑀸𑀕𑀢𑁄. 𑀨𑀲𑁆𑀲𑁄 𑀲𑀫𑁄𑀥𑀸𑀦𑀝𑁆𑀞𑁂𑀦 𑀢𑀤𑀸 𑀲𑀫𑀼𑀤𑀸𑀕𑀢𑁄. 𑀯𑁂𑀤𑀦𑀸 𑀲𑀫𑁄𑀲𑀭𑀡𑀝𑁆𑀞𑁂𑀦 𑀢𑀤𑀸 𑀲𑀫𑀼𑀤𑀸𑀕𑀢𑀸. 𑀲𑀫𑀸𑀥𑀺 𑀧𑀫𑀼𑀔𑀝𑁆𑀞𑁂𑀦 𑀢𑀤𑀸 𑀲𑀫𑀼𑀤𑀸𑀕𑀢𑁄. 𑀲𑀢𑀺 𑀆𑀥𑀺𑀧𑀢𑁂𑀬𑁆𑀬𑀝𑁆𑀞𑁂𑀦 𑀢𑀤𑀸 𑀲𑀫𑀼𑀤𑀸𑀕𑀢𑀸. 𑀧𑀜𑁆𑀜𑀸 𑀢𑀤𑀼𑀢𑁆𑀢𑀭𑀝𑁆𑀞𑁂𑀦 𑀢𑀤𑀸 𑀲𑀫𑀼𑀤𑀸𑀕𑀢𑀸. 𑀯𑀺𑀫𑀼𑀢𑁆𑀢𑀺 𑀲𑀸𑀭𑀝𑁆𑀞𑁂𑀦 𑀢𑀤𑀸 𑀲𑀫𑀼𑀤𑀸𑀕𑀢𑀸. 𑀅𑀫𑀢𑁄𑀕𑀥𑀁 𑀦𑀺𑀩𑁆𑀩𑀸𑀦𑀁 𑀧𑀭𑀺𑀬𑁄𑀲𑀸𑀦𑀝𑁆𑀞𑁂𑀦 𑀢𑀤𑀸 𑀲𑀫𑀼𑀤𑀸𑀕𑀢𑀁. 𑀯𑀼𑀝𑁆𑀞𑀳𑀺𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀢𑀺, 𑀇𑀫𑁂 𑀥𑀫𑁆𑀫𑀸 𑀢𑀤𑀸 𑀲𑀫𑀼𑀤𑀸𑀕𑀢𑀸.

𑀲𑁄𑀢𑀸𑀧𑀢𑁆𑀢𑀺𑀨𑀮𑀓𑁆𑀔𑀡𑁂 𑀤𑀲𑁆𑀲𑀦𑀝𑁆𑀞𑁂𑀦 𑀲𑀫𑁆𑀫𑀸𑀤𑀺𑀝𑁆𑀞𑀺 𑀢𑀤𑀸 𑀲𑀫𑀼𑀤𑀸𑀕𑀢𑀸. 𑀅𑀪𑀺𑀦𑀺𑀭𑁄𑀧𑀦𑀝𑁆𑀞𑁂𑀦 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀢𑀤𑀸 𑀲𑀫𑀼𑀤𑀸𑀕𑀢𑁄…𑀧𑁂… 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀝𑁆𑀞𑁂𑀦 𑀅𑀦𑀼𑀧𑁆𑀧𑀸𑀤𑁂 𑀜𑀸𑀡𑀁 𑀢𑀤𑀸 𑀲𑀫𑀼𑀤𑀸𑀕𑀢𑀁. 𑀙𑀦𑁆𑀤𑁄 𑀫𑀽𑀮𑀝𑁆𑀞𑁂𑀦 𑀢𑀤𑀸 𑀲𑀫𑀼𑀤𑀸𑀕𑀢𑁄. 𑀫𑀦𑀲𑀺𑀓𑀸𑀭𑁄 𑀲𑀫𑀼𑀝𑁆𑀞𑀸𑀦𑀝𑁆𑀞𑁂𑀦 𑀢𑀤𑀸 𑀲𑀫𑀼𑀤𑀸𑀕𑀢𑁄. 𑀨𑀲𑁆𑀲𑁄 𑀲𑀫𑁄𑀥𑀸𑀦𑀝𑁆𑀞𑁂𑀦 𑀢𑀤𑀸 𑀲𑀫𑀼𑀤𑀸𑀕𑀢𑁄. 𑀯𑁂𑀤𑀦𑀸 𑀲𑀫𑁄𑀲𑀭𑀡𑀝𑁆𑀞𑁂𑀦 𑀢𑀤𑀸 𑀲𑀫𑀼𑀤𑀸𑀕𑀢𑀸. 𑀲𑀫𑀸𑀥𑀺 𑀧𑀫𑀼𑀔𑀝𑁆𑀞𑁂𑀦 𑀢𑀤𑀸 𑀲𑀫𑀼𑀤𑀸𑀕𑀢𑁄. 𑀲𑀢𑀺 𑀆𑀥𑀺𑀧𑀢𑁂𑀬𑁆𑀬𑀝𑁆𑀞𑁂𑀦 𑀢𑀤𑀸 𑀲𑀫𑀼𑀤𑀸𑀕𑀢𑀸. 𑀧𑀜𑁆𑀜𑀸 𑀢𑀤𑀼𑀢𑁆𑀢𑀭𑀝𑁆𑀞𑁂𑀦 𑀢𑀤𑀸 𑀲𑀫𑀼𑀤𑀸𑀕𑀢𑀸. 𑀯𑀺𑀫𑀼𑀢𑁆𑀢𑀺 𑀲𑀸𑀭𑀝𑁆𑀞𑁂𑀦 𑀢𑀤𑀸 𑀲𑀫𑀼𑀤𑀸𑀕𑀢𑀸. 𑀅𑀫𑀢𑁄𑀕𑀥𑀁 𑀦𑀺𑀩𑁆𑀩𑀸𑀦𑀁 𑀧𑀭𑀺𑀬𑁄𑀲𑀸𑀦𑀝𑁆𑀞𑁂𑀦 𑀢𑀤𑀸 𑀲𑀫𑀼𑀤𑀸𑀕𑀢𑀁. 𑀯𑀼𑀝𑁆𑀞𑀳𑀺𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀢𑀺, 𑀇𑀫𑁂 𑀥𑀫𑁆𑀫𑀸 𑀢𑀤𑀸 𑀲𑀫𑀼𑀤𑀸𑀕𑀢𑀸.

𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀓𑁆𑀔𑀡𑁂…𑀧𑁂… 𑀲𑀓𑀤𑀸𑀕𑀸𑀫𑀺𑀨𑀮𑀓𑁆𑀔𑀡𑁂…𑀧𑁂… 𑀅𑀦𑀸𑀕𑀸𑀫𑀺𑀫𑀕𑁆𑀕𑀓𑁆𑀔𑀡𑁂…𑀧𑁂… 𑀅𑀦𑀸𑀕𑀸𑀫𑀺𑀨𑀮𑀓𑁆𑀔𑀡𑁂…𑀧𑁂… 𑀅𑀭𑀳𑀢𑁆𑀢𑀫𑀕𑁆𑀕𑀓𑁆𑀔𑀡𑁂 𑀤𑀲𑁆𑀲𑀦𑀝𑁆𑀞𑁂𑀦 𑀲𑀫𑁆𑀫𑀸𑀤𑀺𑀝𑁆𑀞𑀺 𑀢𑀤𑀸 𑀲𑀫𑀼𑀤𑀸𑀕𑀢𑀸…𑀧𑁂… 𑀲𑀫𑀼𑀘𑁆𑀙𑁂𑀤𑀝𑁆𑀞𑁂𑀦 𑀔𑀬𑁂 𑀜𑀸𑀡𑀁 𑀢𑀤𑀸 𑀲𑀫𑀼𑀤𑀸𑀕𑀢𑀁. 𑀙𑀦𑁆𑀤𑁄 𑀫𑀽𑀮𑀝𑁆𑀞𑁂𑀦 𑀢𑀤𑀸 𑀲𑀫𑀼𑀤𑀸𑀕𑀢𑁄…𑀧𑁂… 𑀅𑀫𑀢𑁄𑀕𑀥𑀁 𑀦𑀺𑀩𑁆𑀩𑀸𑀦𑀁 𑀧𑀭𑀺𑀬𑁄𑀲𑀸𑀦𑀝𑁆𑀞𑁂𑀦 𑀢𑀤𑀸 𑀲𑀫𑀼𑀤𑀸𑀕𑀢𑀁. 𑀯𑀼𑀝𑁆𑀞𑀳𑀺𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀢𑀺, 𑀇𑀫𑁂 𑀥𑀫𑁆𑀫𑀸 𑀢𑀤𑀸 𑀲𑀫𑀼𑀤𑀸𑀕𑀢𑀸.

𑀅𑀭𑀳𑀢𑁆𑀢𑀨𑀮𑀓𑁆𑀔𑀡𑁂 𑀤𑀲𑁆𑀲𑀦𑀝𑁆𑀞𑁂𑀦 𑀲𑀫𑁆𑀫𑀸𑀤𑀺𑀝𑁆𑀞𑀺 𑀢𑀤𑀸 𑀲𑀫𑀼𑀤𑀸𑀕𑀢𑀸 …𑀧𑁂… 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀝𑁆𑀞𑁂𑀦 𑀅𑀦𑀼𑀧𑁆𑀧𑀸𑀤𑁂 𑀜𑀸𑀡𑀁 𑀢𑀤𑀸 𑀲𑀫𑀼𑀤𑀸𑀕𑀢𑀁. 𑀙𑀦𑁆𑀤𑁄 𑀫𑀽𑀮𑀝𑁆𑀞𑁂𑀦 𑀢𑀤𑀸 𑀲𑀫𑀼𑀤𑀸𑀕𑀢𑁄 …𑀧𑁂… 𑀅𑀫𑀢𑁄𑀕𑀥𑀁 𑀦𑀺𑀩𑁆𑀩𑀸𑀦𑀁 𑀧𑀭𑀺𑀬𑁄𑀲𑀸𑀦𑀝𑁆𑀞𑁂𑀦 𑀢𑀤𑀸 𑀲𑀫𑀼𑀤𑀸𑀕𑀢𑀁. 𑀯𑀼𑀝𑁆𑀞𑀳𑀺𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀢𑀺, 𑀇𑀫𑁂 𑀥𑀫𑁆𑀫𑀸 𑀢𑀤𑀸 𑀲𑀫𑀼𑀤𑀸𑀕𑀢𑀸. 𑀢𑀁 𑀜𑀸𑀢𑀝𑁆𑀞𑁂𑀦 𑀜𑀸𑀡𑀁, 𑀧𑀚𑀸𑀦𑀦𑀝𑁆𑀞𑁂𑀦 𑀧𑀜𑁆𑀜𑀸. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀢𑀤𑀸 𑀲𑀫𑀼𑀤𑀸𑀕𑀢𑁂 𑀥𑀫𑁆𑀫𑁂 𑀧𑀲𑁆𑀲𑀦𑁂 𑀧𑀜𑁆𑀜𑀸 𑀧𑀘𑁆𑀘𑀯𑁂𑀓𑁆𑀔𑀡𑁂 𑀜𑀸𑀡𑀁’’.

𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀦𑀺𑀤𑁆𑀤𑁂𑀲𑁄 𑀘𑀼𑀤𑁆𑀤𑀲𑀫𑁄.