𑁧𑁫. 𑀯𑀢𑁆𑀣𑀼𑀦𑀸𑀦𑀢𑁆𑀢𑀜𑀸𑀡𑀦𑀺𑀤𑁆𑀤𑁂𑀲𑁄

𑁬𑁬. 𑀓𑀣𑀁 𑀅𑀚𑁆𑀛𑀢𑁆𑀢𑀯𑀯𑀢𑁆𑀣𑀸𑀦𑁂 𑀧𑀜𑁆𑀜𑀸 𑀯𑀢𑁆𑀣𑀼𑀦𑀸𑀦𑀢𑁆𑀢𑁂 𑀜𑀸𑀡𑀁? 𑀓𑀣𑀁 𑀅𑀚𑁆𑀛𑀢𑁆𑀢𑀥𑀫𑁆𑀫𑁂 𑀯𑀯𑀢𑁆𑀣𑁂𑀢𑀺? 𑀘𑀓𑁆𑀔𑀼𑀁 𑀅𑀚𑁆𑀛𑀢𑁆𑀢𑀁 𑀯𑀯𑀢𑁆𑀣𑁂𑀢𑀺, 𑀲𑁄𑀢𑀁 𑀅𑀚𑁆𑀛𑀢𑁆𑀢𑀁 𑀯𑀯𑀢𑁆𑀣𑁂𑀢𑀺, 𑀖𑀸𑀦𑀁 𑀅𑀚𑁆𑀛𑀢𑁆𑀢𑀁 𑀯𑀯𑀢𑁆𑀣𑁂𑀢𑀺, 𑀚𑀺𑀯𑁆𑀳𑀁 𑀅𑀚𑁆𑀛𑀢𑁆𑀢𑀁 𑀯𑀯𑀢𑁆𑀣𑁂𑀢𑀺, 𑀓𑀸𑀬𑀁 𑀅𑀚𑁆𑀛𑀢𑁆𑀢𑀁 𑀯𑀯𑀢𑁆𑀣𑁂𑀢𑀺, 𑀫𑀦𑀁 𑀅𑀚𑁆𑀛𑀢𑁆𑀢𑀁 𑀯𑀯𑀢𑁆𑀣𑁂𑀢𑀺.

𑀓𑀣𑀁 𑀘𑀓𑁆𑀔𑀼𑀁 𑀅𑀚𑁆𑀛𑀢𑁆𑀢𑀁 𑀯𑀯𑀢𑁆𑀣𑁂𑀢𑀺? 𑀘𑀓𑁆𑀔𑀼 𑀅𑀯𑀺𑀚𑁆𑀚𑀸𑀲𑀫𑁆𑀪𑀽𑀢𑀦𑁆𑀢𑀺 𑀯𑀯𑀢𑁆𑀣𑁂𑀢𑀺, 𑀘𑀓𑁆𑀔𑀼 𑀢𑀡𑁆𑀳𑀸𑀲𑀫𑁆𑀪𑀽𑀢𑀦𑁆𑀢𑀺 𑀯𑀯𑀢𑁆𑀣𑁂𑀢𑀺, 𑀘𑀓𑁆𑀔𑀼 𑀓𑀫𑁆𑀫𑀲𑀫𑁆𑀪𑀽𑀢𑀦𑁆𑀢𑀺 𑀯𑀯𑀢𑁆𑀣𑁂𑀢𑀺, 𑀘𑀓𑁆𑀔𑀼 𑀆𑀳𑀸𑀭𑀲𑀫𑁆𑀪𑀽𑀢𑀦𑁆𑀢𑀺 𑀯𑀯𑀢𑁆𑀣𑁂𑀢𑀺, 𑀘𑀓𑁆𑀔𑀼 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬𑀸𑀢𑀺 𑀯𑀯𑀢𑁆𑀣𑁂𑀢𑀺, 𑀘𑀓𑁆𑀔𑀼 𑀉𑀧𑁆𑀧𑀦𑁆𑀦𑀦𑁆𑀢𑀺 𑀯𑀯𑀢𑁆𑀣𑁂𑀢𑀺, 𑀘𑀓𑁆𑀔𑀼 𑀲𑀫𑀼𑀤𑀸𑀕𑀢𑀦𑁆𑀢𑀺 𑀯𑀯𑀢𑁆𑀣𑁂𑀢𑀺. 𑀘𑀓𑁆𑀔𑀼 𑀅𑀳𑀼𑀢𑁆𑀯𑀸 𑀲𑀫𑁆𑀪𑀽𑀢𑀁, 𑀳𑀼𑀢𑁆𑀯𑀸 𑀦 𑀪𑀯𑀺𑀲𑁆𑀲𑀢𑀻𑀢𑀺 𑀯𑀯𑀢𑁆𑀣𑁂𑀢𑀺. 𑀘𑀓𑁆𑀔𑀼𑀁 𑀅𑀦𑁆𑀢𑀯𑀦𑁆𑀢𑀢𑁄 𑀯𑀯𑀢𑁆𑀣𑁂𑀢𑀺, 𑀘𑀓𑁆𑀔𑀼 𑀅𑀤𑁆𑀥𑀼𑀯𑀁 𑀅𑀲𑀲𑁆𑀲𑀢𑀁 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀦𑁆𑀢𑀺 𑀯𑀯𑀢𑁆𑀣𑁂𑀢𑀺, 𑀘𑀓𑁆𑀔𑀼 𑀅𑀦𑀺𑀘𑁆𑀘𑀁 𑀲𑀗𑁆𑀔𑀢𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀔𑀬𑀥𑀫𑁆𑀫𑀁 𑀯𑀬𑀥𑀫𑁆𑀫𑀁 𑀯𑀺𑀭𑀸𑀕𑀥𑀫𑁆𑀫𑀁 𑀦𑀺𑀭𑁄𑀥𑀥𑀫𑁆𑀫𑀦𑁆𑀢𑀺 𑀯𑀯𑀢𑁆𑀣𑁂𑀢𑀺. 𑀘𑀓𑁆𑀔𑀼𑀁 𑀅𑀦𑀺𑀘𑁆𑀘𑀢𑁄 𑀯𑀯𑀢𑁆𑀣𑁂𑀢𑀺, 𑀦𑁄 𑀦𑀺𑀘𑁆𑀘𑀢𑁄; 𑀤𑀼𑀓𑁆𑀔𑀢𑁄 𑀯𑀯𑀢𑁆𑀣𑁂𑀢𑀺, 𑀦𑁄 𑀲𑀼𑀔𑀢𑁄; 𑀅𑀦𑀢𑁆𑀢𑀢𑁄 𑀯𑀯𑀢𑁆𑀣𑁂𑀢𑀺, 𑀦𑁄 𑀅𑀢𑁆𑀢𑀢𑁄; 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀦𑁄 𑀦𑀦𑁆𑀤𑀢𑀺; 𑀯𑀺𑀭𑀚𑁆𑀚𑀢𑀺, 𑀦𑁄 𑀭𑀚𑁆𑀚𑀢𑀺; 𑀦𑀺𑀭𑁄𑀥𑁂𑀢𑀺, 𑀦𑁄 𑀲𑀫𑀼𑀤𑁂𑀢𑀺; 𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀺, 𑀦𑁄 𑀆𑀤𑀺𑀬𑀢𑀺. 𑀅𑀦𑀺𑀘𑁆𑀘𑀢𑁄 𑀯𑀯𑀢𑁆𑀣𑁂𑀦𑁆𑀢𑁄 𑀦𑀺𑀘𑁆𑀘𑀲𑀜𑁆𑀜𑀁 𑀧𑀚𑀳𑀢𑀺, 𑀤𑀼𑀓𑁆𑀔𑀢𑁄 𑀯𑀯𑀢𑁆𑀣𑁂𑀦𑁆𑀢𑁄 𑀲𑀼𑀔𑀲𑀜𑁆𑀜𑀁 𑀧𑀚𑀳𑀢𑀺, 𑀅𑀦𑀢𑁆𑀢𑀢𑁄 𑀯𑀯𑀢𑁆𑀣𑁂𑀦𑁆𑀢𑁄 𑀅𑀢𑁆𑀢𑀲𑀜𑁆𑀜𑀁 𑀧𑀚𑀳𑀢𑀺, 𑀦𑀺𑀩𑁆𑀩𑀺𑀦𑁆𑀤𑀦𑁆𑀢𑁄 𑀦𑀦𑁆𑀤𑀺𑀁 𑀧𑀚𑀳𑀢𑀺, 𑀯𑀺𑀭𑀚𑁆𑀚𑀦𑁆𑀢𑁄 𑀭𑀸𑀕𑀁 𑀧𑀚𑀳𑀢𑀺, 𑀦𑀺𑀭𑁄𑀥𑁂𑀦𑁆𑀢𑁄 𑀲𑀫𑀼𑀤𑀬𑀁 𑀧𑀚𑀳𑀢𑀺, 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑁄 𑀆𑀤𑀸𑀦𑀁 𑀧𑀚𑀳𑀢𑀺. 𑀏𑀯𑀁 𑀘𑀓𑁆𑀔𑀼𑀁 𑀅𑀚𑁆𑀛𑀢𑁆𑀢𑀁 𑀯𑀯𑀢𑁆𑀣𑁂𑀢𑀺.

𑀓𑀣𑀁 𑀲𑁄𑀢𑀁 𑀅𑀚𑁆𑀛𑀢𑁆𑀢𑀁 𑀯𑀯𑀢𑁆𑀣𑁂𑀢𑀺? 𑀲𑁄𑀢𑀁 𑀅𑀯𑀺𑀚𑁆𑀚𑀸𑀲𑀫𑁆𑀪𑀽𑀢𑀦𑁆𑀢𑀺 𑀯𑀯𑀢𑁆𑀣𑁂𑀢𑀺…𑀧𑁂… 𑀏𑀯𑀁 𑀲𑁄𑀢𑀁 𑀅𑀚𑁆𑀛𑀢𑁆𑀢𑀁 𑀯𑀯𑀢𑁆𑀣𑁂𑀢𑀺. 𑀓𑀣𑀁 𑀖𑀸𑀦𑀁 𑀅𑀚𑁆𑀛𑀢𑁆𑀢𑀁 𑀯𑀯𑀢𑁆𑀣𑁂𑀢𑀺? 𑀖𑀸𑀦𑀁 𑀅𑀯𑀺𑀚𑁆𑀚𑀸𑀲𑀫𑁆𑀪𑀽𑀢𑀦𑁆𑀢𑀺 𑀯𑀯𑀢𑁆𑀣𑁂𑀢𑀺…𑀧𑁂… 𑀏𑀯𑀁 𑀖𑀸𑀦𑀁 𑀅𑀚𑁆𑀛𑀢𑁆𑀢𑀁 𑀯𑀯𑀢𑁆𑀣𑁂𑀢𑀺. 𑀓𑀣𑀁 𑀚𑀺𑀯𑁆𑀳𑀁 𑀅𑀚𑁆𑀛𑀢𑁆𑀢𑀁 𑀯𑀯𑀢𑁆𑀣𑁂𑀢𑀺? 𑀚𑀺𑀯𑁆𑀳𑀸 𑀅𑀯𑀺𑀚𑁆𑀚𑀸𑀲𑀫𑁆𑀪𑀽𑀢𑀸𑀢𑀺 𑀯𑀯𑀢𑁆𑀣𑁂𑀢𑀺, 𑀚𑀺𑀯𑁆𑀳𑀸 𑀢𑀡𑁆𑀳𑀸𑀲𑀫𑁆𑀪𑀽𑀢𑀸𑀢𑀺 𑀯𑀯𑀢𑁆𑀣𑁂𑀢𑀺, 𑀚𑀺𑀯𑁆𑀳𑀸 𑀓𑀫𑁆𑀫𑀲𑀫𑁆𑀪𑀽𑀢𑀸𑀢𑀺 𑀯𑀯𑀢𑁆𑀣𑁂𑀢𑀺, 𑀚𑀺𑀯𑁆𑀳𑀸 𑀆𑀳𑀸𑀭𑀲𑀫𑁆𑀪𑀽𑀢𑀸𑀢𑀺 𑀯𑀯𑀢𑁆𑀣𑁂𑀢𑀺, 𑀚𑀺𑀯𑁆𑀳𑀸 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬𑀸𑀢𑀺 𑀯𑀯𑀢𑁆𑀣𑁂𑀢𑀺, 𑀚𑀺𑀯𑁆𑀳𑀸 𑀉𑀧𑁆𑀧𑀦𑁆𑀦𑀸𑀢𑀺 𑀯𑀯𑀢𑁆𑀣𑁂𑀢𑀺 𑀚𑀺𑀯𑁆𑀳𑀸 𑀲𑀫𑀼𑀤𑀸𑀕𑀢𑀸𑀢𑀺 𑀯𑀯𑀢𑁆𑀣𑁂𑀢𑀺. 𑀚𑀺𑀯𑁆𑀳𑀸 𑀅𑀳𑀼𑀢𑁆𑀯𑀸 𑀲𑀫𑁆𑀪𑀽𑀢𑀸, 𑀳𑀼𑀢𑁆𑀯𑀸 𑀦 𑀪𑀯𑀺𑀲𑁆𑀲𑀢𑀻𑀢𑀺 𑀯𑀯𑀢𑁆𑀣𑁂𑀢𑀺. 𑀚𑀺𑀯𑁆𑀳𑀁 𑀅𑀦𑁆𑀢𑀯𑀦𑁆𑀢𑀢𑁄 𑀯𑀯𑀢𑁆𑀣𑁂𑀢𑀺, 𑀚𑀺𑀯𑁆𑀳𑀸 𑀅𑀤𑁆𑀥𑀼𑀯𑀸 𑀅𑀲𑀲𑁆𑀲𑀢𑀸 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸𑀢𑀺 𑀯𑀯𑀢𑁆𑀣𑁂𑀢𑀺, 𑀚𑀺𑀯𑁆𑀳𑀸 𑀅𑀦𑀺𑀘𑁆𑀘𑀸 𑀲𑀗𑁆𑀔𑀢𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 𑀔𑀬𑀥𑀫𑁆𑀫𑀸 𑀯𑀬𑀥𑀫𑁆𑀫𑀸 𑀯𑀺𑀭𑀸𑀕𑀥𑀫𑁆𑀫𑀸 𑀦𑀺𑀭𑁄𑀥𑀥𑀫𑁆𑀫𑀸𑀢𑀺 𑀯𑀯𑀢𑁆𑀣𑁂𑀢𑀺. 𑀚𑀺𑀯𑁆𑀳𑀁 𑀅𑀦𑀺𑀘𑁆𑀘𑀢𑁄 𑀯𑀯𑀢𑁆𑀣𑁂𑀢𑀺, 𑀦𑁄 𑀦𑀺𑀘𑁆𑀘𑀢𑁄…𑀧𑁂… 𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀺, 𑀦𑁄 𑀆𑀤𑀺𑀬𑀢𑀺. 𑀅𑀦𑀺𑀘𑁆𑀘𑀢𑁄 𑀯𑀯𑀢𑁆𑀣𑁂𑀦𑁆𑀢𑁄 𑀦𑀺𑀘𑁆𑀘𑀲𑀜𑁆𑀜𑀁 𑀧𑀚𑀳𑀢𑀺…𑀧𑁂… 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑁄 𑀆𑀤𑀸𑀦𑀁 𑀧𑀚𑀳𑀢𑀺. 𑀏𑀯𑀁 𑀚𑀺𑀯𑁆𑀳𑀁 𑀅𑀚𑁆𑀛𑀢𑁆𑀢𑀁 𑀯𑀯𑀢𑁆𑀣𑁂𑀢𑀺.

𑀓𑀣𑀁 𑀓𑀸𑀬𑀁 𑀅𑀚𑁆𑀛𑀢𑁆𑀢𑀁 𑀯𑀯𑀢𑁆𑀣𑁂𑀢𑀺? 𑀓𑀸𑀬𑁄 𑀅𑀯𑀺𑀚𑁆𑀚𑀸𑀲𑀫𑁆𑀪𑀽𑀢𑁄𑀢𑀺 𑀯𑀯𑀢𑁆𑀣𑁂𑀢𑀺, 𑀓𑀸𑀬𑁄 𑀢𑀡𑁆𑀳𑀸𑀲𑀫𑁆𑀪𑀽𑀢𑁄𑀢𑀺 𑀯𑀯𑀢𑁆𑀣𑁂𑀢𑀺, 𑀓𑀸𑀬𑁄 𑀓𑀫𑁆𑀫𑀲𑀫𑁆𑀪𑀽𑀢𑁄𑀢𑀺 𑀯𑀯𑀢𑁆𑀣𑁂𑀢𑀺, 𑀓𑀸𑀬𑁄 𑀆𑀳𑀸𑀭𑀲𑀫𑁆𑀪𑀽𑀢𑁄𑀢𑀺 𑀯𑀯𑀢𑁆𑀣𑁂𑀢𑀺, 𑀓𑀸𑀬𑁄 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬𑀸𑀢𑀺 𑀯𑀯𑀢𑁆𑀣𑁂𑀢𑀺, 𑀓𑀸𑀬𑁄 𑀉𑀧𑁆𑀧𑀦𑁆𑀦𑁄𑀢𑀺 𑀯𑀯𑀢𑁆𑀣𑁂𑀢𑀺, 𑀓𑀸𑀬𑁄 𑀲𑀫𑀼𑀤𑀸𑀕𑀢𑁄𑀢𑀺 𑀯𑀯𑀢𑁆𑀣𑁂𑀢𑀺. 𑀓𑀸𑀬𑁄 𑀅𑀳𑀼𑀢𑁆𑀯𑀸 𑀲𑀫𑁆𑀪𑀽𑀢𑁄, 𑀳𑀼𑀢𑁆𑀯𑀸 𑀦 𑀪𑀯𑀺𑀲𑁆𑀲𑀢𑀻𑀢𑀺 𑀯𑀯𑀢𑁆𑀣𑁂𑀢𑀺. 𑀓𑀸𑀬𑀁 𑀅𑀦𑁆𑀢𑀯𑀦𑁆𑀢𑀢𑁄 𑀯𑀯𑀢𑁆𑀣𑁂𑀢𑀺, 𑀓𑀸𑀬𑁄 𑀅𑀤𑁆𑀥𑀼𑀯𑁄 𑀅𑀲𑀲𑁆𑀲𑀢𑁄 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁄𑀢𑀺 𑀯𑀯𑀢𑁆𑀣𑁂𑀢𑀺, 𑀓𑀸𑀬𑁄 𑀅𑀦𑀺𑀘𑁆𑀘𑁄 𑀲𑀗𑁆𑀔𑀢𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁄 𑀔𑀬𑀥𑀫𑁆𑀫𑁄 𑀯𑀬𑀥𑀫𑁆𑀫𑁄 𑀯𑀺𑀭𑀸𑀕𑀥𑀫𑁆𑀫𑁄 𑀦𑀺𑀭𑁄𑀥𑀥𑀫𑁆𑀫𑁄𑀢𑀺 𑀯𑀯𑀢𑁆𑀣𑁂𑀢𑀺. 𑀓𑀸𑀬𑀁 𑀅𑀦𑀺𑀘𑁆𑀘𑀢𑁄 𑀯𑀯𑀢𑁆𑀣𑁂𑀢𑀺, 𑀦𑁄 𑀦𑀺𑀘𑁆𑀘𑀢𑁄; 𑀤𑀼𑀓𑁆𑀔𑀢𑁄 𑀯𑀯𑀢𑁆𑀣𑁂𑀢𑀺, 𑀦𑁄 𑀲𑀼𑀔𑀢𑁄…𑀧𑁂… 𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀺, 𑀦𑁄 𑀆𑀤𑀺𑀬𑀢𑀺. 𑀅𑀦𑀺𑀘𑁆𑀘𑀢𑁄 𑀯𑀯𑀢𑁆𑀣𑁂𑀦𑁆𑀢𑁄 𑀦𑀺𑀘𑁆𑀘𑀲𑀜𑁆𑀜𑀁 𑀧𑀚𑀳𑀢𑀺, 𑀤𑀼𑀓𑁆𑀔𑀢𑁄 𑀯𑀯𑀢𑁆𑀣𑁂𑀦𑁆𑀢𑁄 𑀲𑀼𑀔𑀲𑀜𑁆𑀜𑀁 𑀧𑀚𑀳𑀢𑀺…𑀧𑁂… 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑁄 𑀆𑀤𑀸𑀦𑀁 𑀧𑀚𑀳𑀢𑀺. 𑀏𑀯𑀁 𑀓𑀸𑀬𑀁 𑀅𑀚𑁆𑀛𑀢𑁆𑀢𑀁 𑀯𑀯𑀢𑁆𑀣𑁂𑀢𑀺.

𑀓𑀣𑀁 𑀫𑀦𑀁 𑀅𑀚𑁆𑀛𑀢𑁆𑀢𑀁 𑀯𑀯𑀢𑁆𑀣𑁂𑀢𑀺? 𑀫𑀦𑁄 𑀅𑀯𑀺𑀚𑁆𑀚𑀸𑀲𑀫𑁆𑀪𑀽𑀢𑁄𑀢𑀺 𑀯𑀯𑀢𑁆𑀣𑁂𑀢𑀺, 𑀫𑀦𑁄 𑀢𑀡𑁆𑀳𑀸𑀲𑀫𑁆𑀪𑀽𑀢𑁄𑀢𑀺 𑀯𑀯𑀢𑁆𑀣𑁂𑀢𑀺, 𑀫𑀦𑁄 𑀓𑀫𑁆𑀫𑀲𑀫𑁆𑀪𑀽𑀢𑁄𑀢𑀺 𑀯𑀯𑀢𑁆𑀣𑁂𑀢𑀺, 𑀫𑀦𑁄 𑀆𑀳𑀸𑀭𑀲𑀫𑁆𑀪𑀽𑀢𑁄𑀢𑀺 𑀯𑀯𑀢𑁆𑀣𑁂𑀢𑀺, 𑀫𑀦𑁄 𑀉𑀧𑁆𑀧𑀦𑁆𑀦𑁄𑀢𑀺 𑀯𑀯𑀢𑁆𑀣𑁂𑀢𑀺, 𑀫𑀦𑁄 𑀲𑀫𑀼𑀤𑀸𑀕𑀢𑁄𑀢𑀺 𑀯𑀯𑀢𑁆𑀣𑁂𑀢𑀺. 𑀫𑀦𑁄 𑀅𑀳𑀼𑀢𑁆𑀯𑀸 𑀲𑀫𑁆𑀪𑀽𑀢𑁄, 𑀳𑀼𑀢𑁆𑀯𑀸 𑀦 𑀪𑀯𑀺𑀲𑁆𑀲𑀢𑀻𑀢𑀺 𑀯𑀯𑀢𑁆𑀣𑁂𑀢𑀺. 𑀫𑀦𑀁 𑀅𑀦𑁆𑀢𑀯𑀦𑁆𑀢𑀢𑁄 𑀯𑀯𑀢𑁆𑀣𑁂𑀢𑀺, 𑀫𑀦𑁄 𑀅𑀤𑁆𑀥𑀼𑀯𑁄 𑀅𑀲𑀲𑁆𑀲𑀢𑁄 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁄𑀢𑀺 𑀯𑀯𑀢𑁆𑀣𑁂𑀢𑀺, 𑀫𑀦𑁄 𑀅𑀦𑀺𑀘𑁆𑀘𑁄 𑀲𑀗𑁆𑀔𑀢𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁄 𑀔𑀬𑀥𑀫𑁆𑀫𑁄 𑀯𑀬𑀥𑀫𑁆𑀫𑁄 𑀯𑀺𑀭𑀸𑀕𑀥𑀫𑁆𑀫𑁄 𑀦𑀺𑀭𑁄𑀥𑀥𑀫𑁆𑀫𑁄𑀢𑀺 𑀯𑀯𑀢𑁆𑀣𑁂𑀢𑀺. 𑀫𑀦𑀁 𑀅𑀦𑀺𑀘𑁆𑀘𑀢𑁄 𑀯𑀯𑀢𑁆𑀣𑁂𑀢𑀺, 𑀦𑁄 𑀦𑀺𑀘𑁆𑀘𑀢𑁄; 𑀤𑀼𑀓𑁆𑀔𑀢𑁄 𑀯𑀯𑀢𑁆𑀣𑁂𑀢𑀺, 𑀦𑁄 𑀲𑀼𑀔𑀢𑁄; 𑀅𑀦𑀢𑁆𑀢𑀢𑁄 𑀯𑀯𑀢𑁆𑀣𑁂𑀢𑀺, 𑀦𑁄 𑀅𑀢𑁆𑀢𑀢𑁄; 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀦𑁄 𑀦𑀦𑁆𑀤𑀢𑀺; 𑀯𑀺𑀭𑀚𑁆𑀚𑀢𑀺, 𑀦𑁄 𑀭𑀚𑁆𑀚𑀢𑀺; 𑀦𑀺𑀭𑁄𑀥𑁂𑀢𑀺, 𑀦𑁄 𑀲𑀫𑀼𑀤𑁂𑀢𑀺; 𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀺, 𑀦𑁄 𑀆𑀤𑀺𑀬𑀢𑀺. 𑀅𑀦𑀺𑀘𑁆𑀘𑀢𑁄 𑀯𑀯𑀢𑁆𑀣𑁂𑀦𑁆𑀢𑁄 𑀦𑀺𑀘𑁆𑀘𑀲𑀜𑁆𑀜𑀁 𑀧𑀚𑀳𑀢𑀺, 𑀤𑀼𑀓𑁆𑀔𑀢𑁄 𑀯𑀯𑀢𑁆𑀣𑁂𑀦𑁆𑀢𑁄 𑀲𑀼𑀔𑀲𑀜𑁆𑀜𑀁 𑀧𑀚𑀳𑀢𑀺, 𑀅𑀦𑀢𑁆𑀢𑀢𑁄 𑀯𑀯𑀢𑁆𑀣𑁂𑀦𑁆𑀢𑁄 𑀅𑀢𑁆𑀢𑀲𑀜𑁆𑀜𑀁 𑀧𑀚𑀳𑀢𑀺, 𑀦𑀺𑀩𑁆𑀩𑀺𑀦𑁆𑀤𑀦𑁆𑀢𑁄 𑀦𑀦𑁆𑀤𑀺𑀁 𑀧𑀚𑀳𑀢𑀺, 𑀯𑀺𑀭𑀚𑁆𑀚𑀦𑁆𑀢𑁄 𑀭𑀸𑀕𑀁 𑀧𑀚𑀳𑀢𑀺, 𑀦𑀺𑀭𑁄𑀥𑁂𑀦𑁆𑀢𑁄 𑀲𑀫𑀼𑀤𑀬𑀁 𑀧𑀚𑀳𑀢𑀺, 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑁄 𑀆𑀤𑀸𑀦𑀁 𑀧𑀚𑀳𑀢𑀺. 𑀏𑀯𑀁 𑀫𑀦𑀁 𑀅𑀚𑁆𑀛𑀢𑁆𑀢𑀁 𑀯𑀯𑀢𑁆𑀣𑁂𑀢𑀺. 𑀏𑀯𑀁 𑀅𑀚𑁆𑀛𑀢𑁆𑀢𑀥𑀫𑁆𑀫𑁂 𑀯𑀯𑀢𑁆𑀣𑁂𑀢𑀺. 𑀢𑀁 𑀜𑀸𑀢𑀝𑁆𑀞𑁂𑀦 𑀜𑀸𑀡𑀁, 𑀧𑀚𑀸𑀦𑀦𑀝𑁆𑀞𑁂𑀦 𑀧𑀜𑁆𑀜𑀸. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀅𑀚𑁆𑀛𑀢𑁆𑀢𑀯𑀯𑀢𑁆𑀣𑀸𑀦𑁂 𑀧𑀜𑁆𑀜𑀸 𑀯𑀢𑁆𑀣𑀼𑀦𑀸𑀦𑀢𑁆𑀢𑁂 𑀜𑀸𑀡𑀁’’.

𑀯𑀢𑁆𑀣𑀼𑀦𑀸𑀦𑀢𑁆𑀢𑀜𑀸𑀡𑀦𑀺𑀤𑁆𑀤𑁂𑀲𑁄 𑀧𑀦𑁆𑀦𑀭𑀲𑀫𑁄.