𑁮. 𑀯𑀺𑀪𑀢𑁆𑀢𑀺𑀳𑀸𑀭𑀯𑀺𑀪𑀗𑁆𑀕𑁄

𑁩𑁩. 𑀢𑀢𑁆𑀣 𑀓𑀢𑀫𑁄 𑀯𑀺𑀪𑀢𑁆𑀢𑀺𑀳𑀸𑀭𑁄? ‘‘𑀥𑀫𑁆𑀫𑀜𑁆𑀘 𑀧𑀤𑀝𑁆𑀞𑀸𑀦𑀁 𑀪𑀽𑀫𑀺𑀜𑁆𑀘𑀸’’𑀢𑀺.

𑀤𑁆𑀯𑁂 𑀲𑀼𑀢𑁆𑀢𑀸𑀦𑀺 𑀯𑀸𑀲𑀦𑀸𑀪𑀸𑀕𑀺𑀬𑀜𑁆𑀘 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀜𑁆𑀘. 𑀤𑁆𑀯𑁂 𑀧𑀝𑀺𑀧𑀤𑀸 𑀧𑀼𑀜𑁆𑀜𑀪𑀸𑀕𑀺𑀬𑀸 𑀘 𑀨𑀮𑀪𑀸𑀕𑀺𑀬𑀸 𑀘. 𑀤𑁆𑀯𑁂 𑀲𑀻𑀮𑀸𑀦𑀺 𑀲𑀁𑀯𑀭𑀲𑀻𑀮𑀜𑁆𑀘 𑀧𑀳𑀸𑀦𑀲𑀻𑀮𑀜𑁆𑀘, 𑀢𑀢𑁆𑀣 𑀪𑀕𑀯𑀸 𑀯𑀸𑀲𑀦𑀸𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀧𑀼𑀜𑁆𑀜𑀪𑀸𑀕𑀺𑀬𑀸𑀬 𑀧𑀝𑀺𑀧𑀤𑀸𑀬 𑀤𑁂𑀲𑀬𑀢𑀺, 𑀲𑁄 𑀲𑀁𑀯𑀭𑀲𑀻𑀮𑁂 𑀞𑀺𑀢𑁄 𑀢𑁂𑀦 𑀩𑁆𑀭𑀳𑁆𑀫𑀘𑀭𑀺𑀬𑁂𑀦 𑀩𑁆𑀭𑀳𑁆𑀫𑀘𑀸𑀭𑀻 𑀪𑀯𑀢𑀺, 𑀢𑀢𑁆𑀣 𑀪𑀕𑀯𑀸 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀲𑀼𑀢𑁆𑀢𑀁 𑀨𑀮𑀪𑀸𑀕𑀺𑀬𑀸𑀬 𑀧𑀝𑀺𑀧𑀤𑀸𑀬 𑀤𑁂𑀲𑀬𑀢𑀺, 𑀲𑁄 𑀧𑀳𑀸𑀦𑀲𑀻𑀮𑁂 𑀞𑀺𑀢𑁄 𑀢𑁂𑀦 𑀩𑁆𑀭𑀳𑁆𑀫𑀘𑀭𑀺𑀬𑁂𑀦 𑀩𑁆𑀭𑀳𑁆𑀫𑀘𑀸𑀭𑀻 𑀪𑀯𑀢𑀺.

𑀢𑀢𑁆𑀣 𑀓𑀢𑀫𑀁 𑀯𑀸𑀲𑀦𑀸𑀪𑀸𑀕𑀺𑀬𑀁 𑀲𑀼𑀢𑁆𑀢𑀁? 𑀯𑀸𑀲𑀦𑀸𑀪𑀸𑀕𑀺𑀬𑀁 𑀦𑀸𑀫 𑀲𑀼𑀢𑁆𑀢𑀁 𑀤𑀸𑀦𑀓𑀣𑀸 𑀲𑀻𑀮𑀓𑀣𑀸 𑀲𑀕𑁆𑀕𑀓𑀣𑀸 𑀓𑀸𑀫𑀸𑀦𑀁 𑀆𑀤𑀻𑀦𑀯𑁄 𑀦𑁂𑀓𑁆𑀔𑀫𑁆𑀫𑁂 𑀆𑀦𑀺𑀲𑀁𑀲𑁄𑀢𑀺.

𑀢𑀢𑁆𑀣 𑀓𑀢𑀫𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀲𑀼𑀢𑁆𑀢𑀁? 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀦𑀸𑀫 𑀲𑀼𑀢𑁆𑀢𑀁 𑀬𑀸 𑀘𑀢𑀼𑀲𑀘𑁆𑀘𑀧𑁆𑀧𑀓𑀸𑀲𑀦𑀸, 𑀯𑀸𑀲𑀦𑀸𑀪𑀸𑀕𑀺𑀬𑁂 𑀲𑀼𑀢𑁆𑀢𑁂 𑀦𑀢𑁆𑀣𑀺 𑀧𑀚𑀸𑀦𑀦𑀸, 𑀦𑀢𑁆𑀣𑀺 𑀫𑀕𑁆𑀕𑁄, 𑀦𑀢𑁆𑀣𑀺 𑀨𑀮𑀁. 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑁂 𑀲𑀼𑀢𑁆𑀢𑁂 𑀅𑀢𑁆𑀣𑀺 𑀧𑀚𑀸𑀦𑀦𑀸, 𑀅𑀢𑁆𑀣𑀺 𑀫𑀕𑁆𑀕𑁄, 𑀅𑀢𑁆𑀣𑀺 𑀨𑀮𑀁. 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀲𑀼𑀢𑁆𑀢𑀸𑀦𑀺. 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀲𑀼𑀢𑁆𑀢𑀸𑀦𑀁 𑀤𑁂𑀲𑀦𑀸𑀬 𑀨𑀮𑁂𑀦 𑀲𑀻𑀮𑁂𑀦 𑀩𑁆𑀭𑀳𑁆𑀫𑀘𑀭𑀺𑀬𑁂𑀦 𑀲𑀩𑁆𑀩𑀢𑁄 𑀯𑀺𑀘𑀬𑁂𑀦 𑀳𑀸𑀭𑁂𑀦 𑀯𑀺𑀘𑀺𑀦𑀺𑀢𑁆𑀯𑀸 𑀬𑀼𑀢𑁆𑀢𑀺𑀳𑀸𑀭𑁂𑀦 𑀬𑁄𑀚𑀬𑀺𑀢𑀩𑁆𑀩𑀸 𑀬𑀸𑀯𑀢𑀺𑀓𑀸 𑀜𑀸𑀡𑀲𑁆𑀲 𑀪𑀽𑀫𑀺.

𑁩𑁪. 𑀢𑀢𑁆𑀣 𑀓𑀢𑀫𑁂 𑀥𑀫𑁆𑀫𑀸 𑀲𑀸𑀥𑀸𑀭𑀡𑀸? 𑀤𑁆𑀯𑁂 𑀥𑀫𑁆𑀫𑀸 𑀲𑀸𑀥𑀸𑀭𑀡𑀸 𑀦𑀸𑀫𑀲𑀸𑀥𑀸𑀭𑀡𑀸 𑀯𑀢𑁆𑀣𑀼𑀲𑀸𑀥𑀸𑀭𑀡𑀸 𑀘. 𑀬𑀁 𑀯𑀸 𑀧𑀦 𑀓𑀺𑀜𑁆𑀘𑀺 𑀅𑀜𑁆𑀜𑀫𑁆𑀧𑀺 𑀏𑀯𑀁 𑀚𑀸𑀢𑀺𑀬𑀁, 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀸𑀦𑀁 𑀲𑀢𑁆𑀢𑀸𑀦𑀁 𑀅𑀦𑀺𑀬𑀢𑀸𑀦𑀜𑁆𑀘 𑀲𑀢𑁆𑀢𑀸𑀦𑀁 𑀤𑀲𑁆𑀲𑀦𑀧𑁆𑀧𑀳𑀸𑀢𑀩𑁆𑀩𑀸 𑀓𑀺𑀮𑁂𑀲𑀸 𑀲𑀸𑀥𑀸𑀭𑀡𑀸, 𑀧𑀼𑀣𑀼𑀚𑁆𑀚𑀦𑀲𑁆𑀲 𑀲𑁄𑀢𑀸𑀧𑀦𑁆𑀦𑀲𑁆𑀲 𑀘 𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀸 𑀲𑀸𑀥𑀸𑀭𑀡𑀸, 𑀧𑀼𑀣𑀼𑀚𑁆𑀚𑀦𑀲𑁆𑀲 𑀅𑀦𑀸𑀕𑀸𑀫𑀺𑀲𑁆𑀲 𑀘 𑀉𑀤𑁆𑀥𑀁𑀪𑀸𑀕𑀺𑀬𑀸 𑀲𑀁𑀬𑁄𑀚𑀦𑀸 𑀲𑀸𑀥𑀸𑀭𑀡𑀸, 𑀬𑀁 𑀓𑀺𑀜𑁆𑀘𑀺 𑀅𑀭𑀺𑀬𑀲𑀸𑀯𑀓𑁄 𑀮𑁄𑀓𑀺𑀬𑀁 𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀢𑀺, 𑀲𑀩𑁆𑀩𑀸 𑀲𑀸 𑀅𑀯𑀻𑀢𑀭𑀸𑀕𑁂𑀳𑀺 [𑀅𑀯𑀺𑀕𑀢𑀭𑀸𑀕𑁂𑀳𑀺 (𑀓.)] 𑀲𑀸𑀥𑀸𑀭𑀡𑀸, 𑀲𑀸𑀥𑀸𑀭𑀡𑀸 𑀳𑀺 𑀥𑀫𑁆𑀫𑀸 𑀏𑀯𑀁 𑀅𑀜𑁆𑀜𑀫𑀜𑁆𑀜𑀁 𑀧𑀭𑀁 𑀧𑀭𑀁 𑀲𑀓𑀁 𑀲𑀓𑀁 𑀯𑀺𑀲𑀬𑀁 𑀦𑀸𑀢𑀺𑀯𑀢𑁆𑀢𑀦𑁆𑀢𑀺. 𑀬𑁄𑀧𑀺 𑀇𑀫𑁂𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀦 𑀲𑁄 𑀢𑀁 𑀥𑀫𑁆𑀫𑀁 𑀉𑀧𑀸𑀢𑀺𑀯𑀢𑁆𑀢𑀢𑀺. 𑀇𑀫𑁂 𑀥𑀫𑁆𑀫𑀸 𑀲𑀸𑀥𑀸𑀭𑀡𑀸.

𑀢𑀢𑁆𑀣 𑀓𑀢𑀫𑁂 𑀥𑀫𑁆𑀫𑀸 𑀅𑀲𑀸𑀥𑀸𑀭𑀡𑀸? 𑀬𑀸𑀯 𑀤𑁂𑀲𑀦𑀁 𑀉𑀧𑀸𑀤𑀸𑀬 𑀕𑀯𑁂𑀲𑀺𑀢𑀩𑁆𑀩𑀸 𑀲𑁂𑀓𑁆𑀔𑀸𑀲𑁂𑀓𑁆𑀔𑀸 𑀪𑀩𑁆𑀩𑀸𑀪𑀩𑁆𑀩𑀸𑀢𑀺, 𑀅𑀝𑁆𑀞𑀫𑀓𑀲𑁆𑀲 𑀲𑁄𑀢𑀸𑀧𑀦𑁆𑀦𑀲𑁆𑀲 𑀘 𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀸 𑀲𑀸𑀥𑀸𑀭𑀡𑀸 𑀥𑀫𑁆𑀫𑀢𑀸 𑀅𑀲𑀸𑀥𑀸𑀭𑀡𑀸, 𑀅𑀝𑁆𑀞𑀫𑀓𑀲𑁆𑀲 𑀅𑀦𑀸𑀕𑀸𑀫𑀺𑀲𑁆𑀲 𑀘 𑀉𑀤𑁆𑀥𑀫𑁆𑀪𑀸𑀕𑀺𑀬𑀸 𑀲𑀁𑀬𑁄𑀚𑀦𑀸 𑀲𑀸𑀥𑀸𑀭𑀡𑀸 𑀥𑀫𑁆𑀫𑀢𑀸 𑀅𑀲𑀸𑀥𑀸𑀭𑀡𑀸. 𑀲𑀩𑁆𑀩𑁂𑀲𑀁 𑀲𑁂𑀓𑁆𑀔𑀸𑀦𑀁 𑀦𑀸𑀫𑀁 𑀲𑀸𑀥𑀸𑀭𑀡𑀁 𑀥𑀫𑁆𑀫𑀢𑀸 𑀅𑀲𑀸𑀥𑀸𑀭𑀡𑀸. 𑀲𑀩𑁆𑀩𑁂𑀲𑀁 𑀧𑀝𑀺𑀧𑀦𑁆𑀦𑀓𑀸𑀦𑀁 𑀦𑀸𑀫𑀁 𑀲𑀸𑀥𑀸𑀭𑀡𑀁 𑀥𑀫𑁆𑀫𑀢𑀸 𑀅𑀲𑀸𑀥𑀸𑀭𑀡𑀸. 𑀲𑀩𑁆𑀩𑁂𑀲𑀁 𑀲𑁂𑀓𑁆𑀔𑀸𑀦𑀁 𑀲𑁂𑀓𑁆𑀔𑀲𑀻𑀮𑀁 𑀲𑀸𑀥𑀸𑀭𑀡𑀁 𑀥𑀫𑁆𑀫𑀢𑀸 𑀅𑀲𑀸𑀥𑀸𑀭𑀡𑀸. 𑀏𑀯𑀁 𑀯𑀺𑀲𑁂𑀲𑀸𑀦𑀼𑀧𑀲𑁆𑀲𑀺𑀦𑀸 𑀳𑀻𑀦𑀼𑀓𑁆𑀓𑀝𑁆𑀞𑀫𑀚𑁆𑀛𑀺𑀫𑀁 𑀉𑀧𑀸𑀤𑀸𑀬 𑀕𑀯𑁂𑀲𑀺𑀢𑀩𑁆𑀩𑀁.

𑀤𑀲𑁆𑀲𑀦𑀪𑀽𑀫𑀺 𑀦𑀺𑀬𑀸𑀫𑀸𑀯𑀓𑁆𑀓𑀦𑁆𑀢𑀺𑀬𑀸 𑀧𑀤𑀝𑁆𑀞𑀸𑀦𑀁, 𑀪𑀸𑀯𑀦𑀸𑀪𑀽𑀫𑀺 𑀉𑀢𑁆𑀢𑀭𑀺𑀓𑀸𑀦𑀁 𑀨𑀮𑀸𑀦𑀁 𑀧𑀢𑁆𑀢𑀺𑀬𑀸 𑀧𑀤𑀝𑁆𑀞𑀸𑀦𑀁, 𑀤𑀼𑀓𑁆𑀔𑀸 𑀧𑀝𑀺𑀧𑀤𑀸 𑀤𑀦𑁆𑀥𑀸𑀪𑀺𑀜𑁆𑀜𑀸 𑀲𑀫𑀣𑀲𑁆𑀲 𑀧𑀤𑀝𑁆𑀞𑀸𑀦𑀁, 𑀲𑀼𑀔𑀸 𑀧𑀝𑀺𑀧𑀤𑀸 𑀔𑀺𑀧𑁆𑀧𑀸𑀪𑀺𑀜𑁆𑀜𑀸 𑀯𑀺𑀧𑀲𑁆𑀲𑀦𑀸𑀬 𑀧𑀤𑀝𑁆𑀞𑀸𑀦𑀁, 𑀤𑀸𑀦𑀫𑀬𑀁 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼 𑀧𑀭𑀢𑁄 𑀖𑁄𑀲𑀲𑁆𑀲 𑀲𑀸𑀥𑀸𑀭𑀡𑀁 𑀧𑀤𑀝𑁆𑀞𑀸𑀦𑀁, 𑀲𑀻𑀮𑀫𑀬𑀁 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼 𑀘𑀺𑀦𑁆𑀢𑀸𑀫𑀬𑀺𑀬𑀸 𑀧𑀜𑁆𑀜𑀸𑀬 𑀲𑀸𑀥𑀸𑀭𑀡𑀁 𑀧𑀤𑀝𑁆𑀞𑀸𑀦𑀁, 𑀪𑀸𑀯𑀦𑀸𑀫𑀬𑀁 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼 𑀪𑀸𑀯𑀦𑀸𑀫𑀬𑀺𑀬𑀸 𑀧𑀜𑁆𑀜𑀸𑀬 𑀲𑀸𑀥𑀸𑀭𑀡𑀁 𑀧𑀤𑀝𑁆𑀞𑀸𑀦𑀁. 𑀤𑀸𑀦𑀫𑀬𑀁 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼 𑀧𑀭𑀢𑁄 𑀘 𑀖𑁄𑀲𑀲𑁆𑀲 𑀲𑀼𑀢𑀫𑀬𑀺𑀬𑀸 𑀘 𑀧𑀜𑁆𑀜𑀸𑀬 𑀲𑀸𑀥𑀸𑀭𑀡𑀁 𑀧𑀤𑀝𑁆𑀞𑀸𑀦𑀁 𑀲𑀻𑀮𑀫𑀬𑀁 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼 𑀘𑀺𑀦𑁆𑀢𑀸𑀫𑀬𑀺𑀬𑀸 𑀘 𑀧𑀜𑁆𑀜𑀸𑀬 𑀬𑁄𑀦𑀺𑀲𑁄 𑀘 𑀫𑀦𑀲𑀺𑀓𑀸𑀭𑀲𑁆𑀲 𑀲𑀸𑀥𑀸𑀭𑀡𑀁 𑀧𑀤𑀝𑁆𑀞𑀸𑀦𑀁, 𑀪𑀸𑀯𑀦𑀸𑀫𑀬𑀁 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼 𑀪𑀸𑀯𑀦𑀸𑀫𑀬𑀺𑀬𑀸 𑀘 𑀧𑀜𑁆𑀜𑀸𑀬 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀘 𑀲𑀸𑀥𑀸𑀭𑀡𑀁 𑀧𑀤𑀝𑁆𑀞𑀸𑀦𑀁. 𑀧𑀢𑀺𑀭𑀽𑀧𑀤𑁂𑀲𑀯𑀸𑀲𑁄 𑀯𑀺𑀯𑁂𑀓𑀲𑁆𑀲 𑀘 𑀲𑀫𑀸𑀥𑀺𑀲𑁆𑀲 𑀘 𑀲𑀸𑀥𑀸𑀭𑀡𑀁 𑀧𑀤𑀝𑁆𑀞𑀸𑀦𑀁, 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑁄 𑀢𑀺𑀡𑁆𑀡𑀜𑁆𑀘 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑀸𑀦𑀁 𑀲𑀫𑀣𑀲𑁆𑀲 𑀘 𑀲𑀸𑀥𑀸𑀭𑀡𑀁 𑀧𑀤𑀝𑁆𑀞𑀸𑀦𑀁, 𑀅𑀢𑁆𑀢𑀲𑀫𑁆𑀫𑀸𑀧𑀡𑀺𑀥𑀸𑀦𑀁 𑀳𑀺𑀭𑀺𑀬𑀸 𑀘 𑀯𑀺𑀧𑀲𑁆𑀲𑀦𑀸𑀬 𑀘 𑀲𑀸𑀥𑀸𑀭𑀡𑀁 𑀧𑀤𑀝𑁆𑀞𑀸𑀦𑀁, 𑀅𑀓𑀼𑀲𑀮𑀧𑀭𑀺𑀘𑁆𑀘𑀸𑀕𑁄 𑀓𑀼𑀲𑀮𑀯𑀻𑀫𑀁𑀲𑀸𑀬 𑀘 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀘 𑀲𑀸𑀥𑀸𑀭𑀡𑀁 𑀧𑀤𑀝𑁆𑀞𑀸𑀦𑀁, 𑀥𑀫𑁆𑀫𑀲𑁆𑀯𑀸𑀓𑁆𑀔𑀸𑀢𑀢𑀸 𑀓𑀼𑀲𑀮𑀫𑀽𑀮𑀭𑁄𑀧𑀦𑀸𑀬 𑀘 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀘 𑀲𑀸𑀥𑀸𑀭𑀡𑀁 𑀧𑀤𑀝𑁆𑀞𑀸𑀦𑀁, 𑀲𑀗𑁆𑀖𑀲𑀼𑀧𑁆𑀧𑀝𑀺𑀧𑀦𑁆𑀦𑀢𑀸 𑀲𑀗𑁆𑀖𑀲𑀼𑀝𑁆𑀞𑀼𑀢𑀸𑀬 𑀲𑀸𑀥𑀸𑀭𑀡𑀁 𑀧𑀤𑀝𑁆𑀞𑀸𑀦𑀁, 𑀲𑀢𑁆𑀣𑀼𑀲𑀫𑁆𑀧𑀤𑀸 𑀅𑀧𑁆𑀧𑀲𑀦𑁆𑀦𑀸𑀦𑀜𑁆𑀘 𑀧𑀲𑀸𑀤𑀸𑀬 𑀧𑀲𑀦𑁆𑀦𑀸𑀦𑀜𑁆𑀘 𑀪𑀺𑀬𑁆𑀬𑁄𑀪𑀸𑀯𑀸𑀬 𑀲𑀸𑀥𑀸𑀭𑀡𑀁 𑀧𑀤𑀝𑁆𑀞𑀸𑀦𑀁, 𑀅𑀧𑁆𑀧𑀝𑀺𑀳𑀢𑀧𑀸𑀢𑀺𑀫𑁄𑀓𑁆𑀔𑀢𑀸 𑀤𑀼𑀫𑁆𑀫𑀗𑁆𑀓𑀽𑀦𑀜𑁆𑀘 𑀧𑀼𑀕𑁆𑀕𑀮𑀸𑀦𑀁 𑀦𑀺𑀕𑁆𑀕𑀳𑀸𑀬 𑀧𑁂𑀲𑀮𑀸𑀦𑀜𑁆𑀘 𑀧𑀼𑀕𑁆𑀕𑀮𑀸𑀦𑀁 𑀨𑀸𑀲𑀼𑀯𑀺𑀳𑀸𑀭𑀸𑀬 𑀲𑀸𑀥𑀸𑀭𑀡𑀁 𑀧𑀤𑀝𑁆𑀞𑀸𑀦𑀁. 𑀢𑁂𑀦𑀸𑀳 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀬𑀦𑁄 ‘‘𑀥𑀫𑁆𑀫𑀜𑁆𑀘 𑀧𑀤𑀝𑁆𑀞𑀸𑀦’’𑀦𑁆𑀢𑀺.

𑀦𑀺𑀬𑀼𑀢𑁆𑀢𑁄 𑀯𑀺𑀪𑀢𑁆𑀢𑀺 𑀳𑀸𑀭𑁄.