𑁬. 𑀘𑀢𑀼𑀩𑁆𑀬𑀽𑀳𑀳𑀸𑀭𑀯𑀺𑀪𑀗𑁆𑀕𑁄

𑁨𑁫. 𑀢𑀢𑁆𑀣 𑀓𑀢𑀫𑁄 𑀘𑀢𑀼𑀩𑁆𑀬𑀽𑀳𑁄 𑀳𑀸𑀭𑁄? ‘‘𑀦𑁂𑀭𑀼𑀢𑁆𑀢𑀫𑀥𑀺𑀧𑁆𑀧𑀸𑀬𑁄’’𑀢𑀺 𑀅𑀬𑀁. 𑀩𑁆𑀬𑀜𑁆𑀚𑀦𑁂𑀦 𑀲𑀼𑀢𑁆𑀢𑀲𑁆𑀲 𑀦𑁂𑀭𑀼𑀢𑁆𑀢𑀜𑁆𑀘 𑀅𑀥𑀺𑀧𑁆𑀧𑀸𑀬𑁄 𑀘 𑀦𑀺𑀤𑀸𑀦𑀜𑁆𑀘 𑀧𑀼𑀩𑁆𑀩𑀸𑀧𑀭𑀲𑀦𑁆𑀥𑀺 𑀘 𑀕𑀯𑁂𑀲𑀺𑀢𑀩𑁆𑀩𑁄. 𑀢𑀢𑁆𑀣 𑀓𑀢𑀫𑀁 𑀦𑁂𑀭𑀼𑀢𑁆𑀢𑀁, 𑀬𑀸 𑀦𑀺𑀭𑀼𑀢𑁆𑀢𑀺𑀧𑀤𑀲𑀁𑀳𑀺𑀢𑀸, 𑀬𑀁 𑀥𑀫𑁆𑀫𑀸𑀦𑀁 𑀦𑀸𑀫𑀲𑁄 𑀜𑀸𑀡𑀁. 𑀬𑀤𑀸 𑀳𑀺 𑀪𑀺𑀓𑁆𑀔𑀼 𑀅𑀢𑁆𑀣𑀲𑁆𑀲 𑀘 𑀦𑀸𑀫𑀁 𑀚𑀸𑀦𑀸𑀢𑀺, 𑀥𑀫𑁆𑀫𑀲𑁆𑀲 𑀘 𑀦𑀸𑀫𑀁 𑀚𑀸𑀦𑀸𑀢𑀺, 𑀢𑀣𑀸 𑀢𑀣𑀸 𑀦𑀁 𑀅𑀪𑀺𑀦𑀺𑀭𑁄𑀧𑁂𑀢𑀺. 𑀅𑀬𑀜𑁆𑀘 𑀯𑀼𑀘𑁆𑀘𑀢𑀺 𑀅𑀢𑁆𑀣𑀓𑀼𑀲𑀮𑁄 𑀥𑀫𑁆𑀫𑀓𑀼𑀲𑀮𑁄 𑀩𑁆𑀬𑀜𑁆𑀚𑀦𑀓𑀼𑀲𑀮𑁄 𑀦𑀺𑀭𑀼𑀢𑁆𑀢𑀺𑀓𑀼𑀲𑀮𑁄 𑀧𑀼𑀩𑁆𑀩𑀸𑀧𑀭𑀓𑀼𑀲𑀮𑁄 𑀤𑁂𑀲𑀦𑀸𑀓𑀼𑀲𑀮𑁄 𑀅𑀢𑀻𑀢𑀸𑀥𑀺𑀯𑀘𑀦𑀓𑀼𑀲𑀮𑁄 𑀅𑀦𑀸𑀕𑀢𑀸𑀥𑀺𑀯𑀘𑀦𑀓𑀼𑀲𑀮𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀥𑀺𑀯𑀘𑀦𑀓𑀼𑀲𑀮𑁄 𑀇𑀢𑁆𑀣𑀸𑀥𑀺𑀯𑀘𑀦𑀓𑀼𑀲𑀮𑁄 𑀧𑀼𑀭𑀺𑀲𑀸𑀥𑀺𑀯𑀘𑀦𑀓𑀼𑀲𑀮𑁄 𑀦𑀧𑀼𑀁𑀲𑀓𑀸𑀥𑀺𑀯𑀘𑀦𑀓𑀼𑀲𑀮𑁄 𑀏𑀓𑀸𑀥𑀺𑀯𑀘𑀦𑀓𑀼𑀲𑀮𑁄 𑀅𑀦𑁂𑀓𑀸𑀥𑀺𑀯𑀘𑀦𑀓𑀼𑀲𑀮𑁄, 𑀏𑀯𑀁 𑀲𑀩𑁆𑀩𑀸𑀦𑀺 𑀓𑀸𑀢𑀩𑁆𑀩𑀸𑀦𑀺 𑀚𑀦𑀧𑀤𑀦𑀺𑀭𑀼𑀢𑁆𑀢𑀸𑀦𑀺 𑀲𑀩𑁆𑀩𑀸 𑀘 𑀚𑀦𑀧𑀤𑀦𑀺𑀭𑀼𑀢𑁆𑀢𑀺𑀬𑁄. 𑀅𑀬𑀁 𑀦𑀺𑀭𑀼𑀢𑁆𑀢𑀺𑀧𑀤𑀲𑀁𑀳𑀺𑀢𑀸.

𑁨𑁬. 𑀢𑀢𑁆𑀣 𑀓𑀢𑀫𑁄 𑀅𑀥𑀺𑀧𑁆𑀧𑀸𑀬𑁄?

‘‘𑀥𑀫𑁆𑀫𑁄 𑀳𑀯𑁂 𑀭𑀓𑁆𑀔𑀢𑀺 𑀥𑀫𑁆𑀫𑀘𑀸𑀭𑀺𑀁, 𑀙𑀢𑁆𑀢𑀁 𑀫𑀳𑀦𑁆𑀢𑀁 𑀬𑀣 𑀯𑀲𑁆𑀲𑀓𑀸𑀮𑁂 [𑀯𑀺𑀬 𑀯𑀲𑁆𑀲𑀓𑀸𑀮𑁂 𑀚𑀸. 𑁧.𑁧𑁦.𑁧𑁦𑁩];

𑀏𑀲𑀸𑀦𑀺𑀲𑀁𑀲𑁄 𑀥𑀫𑁆𑀫𑁂 𑀲𑀼𑀘𑀺𑀡𑁆𑀡𑁂, 𑀦 𑀤𑀼𑀕𑁆𑀕𑀢𑀺𑀁 𑀕𑀘𑁆𑀙𑀢𑀺 𑀥𑀫𑁆𑀫𑀘𑀸𑀭𑀻’’𑀢𑀺.

𑀇𑀥 𑀪𑀕𑀯𑀢𑁄 𑀓𑁄 𑀅𑀥𑀺𑀧𑁆𑀧𑀸𑀬𑁄? 𑀬𑁂 𑀅𑀧𑀸𑀬𑁂𑀳𑀺 𑀧𑀭𑀺𑀫𑀼𑀘𑁆𑀘𑀺𑀢𑀼𑀓𑀸𑀫𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀢𑁂 𑀥𑀫𑁆𑀫𑀘𑀸𑀭𑀺𑀦𑁄 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀅𑀬𑀁 𑀏𑀢𑁆𑀣 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑁄.

‘‘𑀘𑁄𑀭𑁄 𑀬𑀣𑀸 𑀲𑀦𑁆𑀥𑀺𑀫𑀼𑀔𑁂 𑀕𑀳𑀻𑀢𑁄, 𑀲𑀓𑀫𑁆𑀫𑀼𑀦𑀸 𑀳𑀜𑁆𑀜𑀢𑀺 [𑀳𑀜𑁆𑀜𑀢𑁂 (𑀲𑀻.)] 𑀩𑀚𑁆𑀛𑀢𑁂 𑀘;

𑀏𑀯𑀁 𑀅𑀬𑀁 𑀧𑁂𑀘𑁆𑀘 𑀧𑀚𑀸 𑀧𑀭𑀢𑁆𑀣, 𑀲𑀓𑀫𑁆𑀫𑀼𑀦𑀸 𑀳𑀜𑁆𑀜𑀢𑀺 [𑀳𑀜𑁆𑀜𑀢𑁂 (𑀲𑀻.)] 𑀩𑀚𑁆𑀛𑀢𑁂 𑀘𑀸’’𑀢𑀺.

𑀇𑀥 𑀪𑀕𑀯𑀢𑁄 𑀓𑁄 𑀅𑀥𑀺𑀧𑁆𑀧𑀸𑀬𑁄? 𑀲𑀜𑁆𑀘𑁂𑀢𑀦𑀺𑀓𑀸𑀦𑀁 𑀓𑀢𑀸𑀦𑀁 𑀓𑀫𑁆𑀫𑀸𑀦𑀁 𑀉𑀧𑀘𑀺𑀢𑀸𑀦𑀁 𑀤𑀼𑀓𑁆𑀔𑀯𑁂𑀤𑀦𑀻𑀬𑀸𑀦𑀁 𑀅𑀦𑀺𑀝𑁆𑀞𑀁 𑀅𑀲𑀸𑀢𑀁 𑀯𑀺𑀧𑀸𑀓𑀁 𑀧𑀘𑁆𑀘𑀦𑀼𑀪𑀯𑀺𑀲𑁆𑀲𑀢𑀻𑀢𑀺 𑀅𑀬𑀁 𑀏𑀢𑁆𑀣 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑁄.

‘‘𑀲𑀼𑀔𑀓𑀸𑀫𑀸𑀦𑀺 [𑀧𑀲𑁆𑀲 𑀥. 𑀧. 𑁧𑁩𑁧-𑁧𑁩𑁨] 𑀪𑀽𑀢𑀸𑀦𑀺, 𑀬𑁄 𑀤𑀡𑁆𑀟𑁂𑀦 𑀯𑀺𑀳𑀺𑀁𑀲𑀢𑀺;

𑀅𑀢𑁆𑀢𑀦𑁄 𑀲𑀼𑀔𑀫𑁂𑀲𑀸𑀦𑁄, 𑀧𑁂𑀘𑁆𑀘 𑀲𑁄 𑀦 𑀮𑀪𑀢𑁂 𑀲𑀼𑀔’’𑀦𑁆𑀢𑀺.

𑀇𑀥 𑀪𑀕𑀯𑀢𑁄 𑀓𑁄 𑀅𑀥𑀺𑀧𑁆𑀧𑀸𑀬𑁄? 𑀬𑁂 𑀲𑀼𑀔𑁂𑀦 𑀅𑀢𑁆𑀣𑀺𑀓𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀢𑁂 𑀧𑀸𑀧𑀓𑀫𑁆𑀫𑀁 [𑀧𑀸𑀧𑀓𑀁 𑀓𑀫𑁆𑀫𑀁 (𑀓.)] 𑀦 𑀓𑀭𑀺𑀲𑁆𑀲𑀦𑁆𑀢𑀻𑀢𑀺 𑀅𑀬𑀁 𑀏𑀢𑁆𑀣 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑁄.

‘‘𑀫𑀺𑀤𑁆𑀥𑀻 [𑀧𑀲𑁆𑀲 𑀥. 𑀧. 𑁩𑁨𑁫] 𑀬𑀤𑀸 𑀳𑁄𑀢𑀺 𑀫𑀳𑀕𑁆𑀖𑀲𑁄 𑀘, 𑀦𑀺𑀤𑁆𑀤𑀸𑀬𑀺𑀢𑀸 𑀲𑀫𑁆𑀧𑀭𑀺𑀯𑀢𑁆𑀢𑀲𑀸𑀬𑀻;

𑀫𑀳𑀸𑀯𑀭𑀸𑀳𑁄𑀯 𑀦𑀺𑀯𑀸𑀧𑀧𑀼𑀝𑁆𑀞𑁄, 𑀧𑀼𑀦𑀧𑁆𑀧𑀼𑀦𑀁 𑀕𑀩𑁆𑀪𑀫𑀼𑀧𑁂𑀢𑀺 𑀫𑀦𑁆𑀤𑁄’’𑀢𑀺.

𑀇𑀥 𑀪𑀕𑀯𑀢𑁄 𑀓𑁄 𑀅𑀥𑀺𑀧𑁆𑀧𑀸𑀬𑁄? 𑀬𑁂 𑀚𑀭𑀸𑀫𑀭𑀡𑁂𑀦 𑀅𑀝𑁆𑀝𑀺𑀬𑀺𑀢𑀼𑀓𑀸𑀫𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀢𑁂 𑀪𑀯𑀺𑀲𑁆𑀲𑀦𑁆𑀢𑀺 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀦𑁄 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀸 𑀧𑀼𑀩𑁆𑀩𑀭𑀢𑁆𑀢𑀸𑀧𑀭𑀭𑀢𑁆𑀢𑀁 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑀸 𑀯𑀺𑀧𑀲𑁆𑀲𑀓𑀸 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀲𑀕𑀸𑀭𑀯𑀸 𑀘 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼 𑀣𑁂𑀭𑁂𑀲𑀼 𑀦𑀯𑁂𑀲𑀼 𑀫𑀚𑁆𑀛𑀺𑀫𑁂𑀲𑀽𑀢𑀺 𑀅𑀬𑀁 𑀏𑀢𑁆𑀣 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑁄.

‘‘𑀅𑀧𑁆𑀧𑀫𑀸𑀤𑁄 𑀅𑀫𑀢𑀧𑀤𑀁 [𑀅𑀫𑀢𑀁 𑀧𑀤𑀁 (𑀓.) 𑀧𑀲𑁆𑀲 𑀥. 𑀧. 𑁨𑁧], 𑀧𑀫𑀸𑀤𑁄 𑀫𑀘𑁆𑀘𑀼𑀦𑁄 𑀧𑀤𑀁;

𑀅𑀧𑁆𑀧𑀫𑀢𑁆𑀢𑀸 𑀦 𑀫𑀻𑀬𑀦𑁆𑀢𑀺, 𑀬𑁂 𑀧𑀫𑀢𑁆𑀢𑀸 𑀬𑀣𑀸 𑀫𑀢𑀸’’𑀢𑀺.

𑀇𑀥 𑀪𑀕𑀯𑀢𑁄 𑀓𑁄 𑀅𑀥𑀺𑀧𑁆𑀧𑀸𑀬𑁄? 𑀬𑁂 𑀅𑀫𑀢𑀧𑀭𑀺𑀬𑁂𑀲𑀦𑀁 𑀧𑀭𑀺𑀬𑁂𑀲𑀺𑀢𑀼𑀓𑀸𑀫𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀢𑁂 𑀅𑀧𑁆𑀧𑀫𑀢𑁆𑀢𑀸 𑀯𑀺𑀳𑀭𑀺𑀲𑁆𑀲𑀦𑁆𑀢𑀻𑀢𑀺 𑀅𑀬𑀁 𑀏𑀢𑁆𑀣 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑁄. 𑀅𑀬𑀁 𑀅𑀥𑀺𑀧𑁆𑀧𑀸𑀬𑁄.

𑁨𑁭. 𑀢𑀢𑁆𑀣 𑀓𑀢𑀫𑀁 𑀦𑀺𑀤𑀸𑀦𑀁? 𑀬𑀣𑀸 𑀲𑁄 𑀥𑀦𑀺𑀬𑁄 𑀕𑁄𑀧𑀸𑀮𑀓𑁄 𑀪𑀕𑀯𑀦𑁆𑀢𑀁 𑀆𑀳 𑁋

‘‘𑀦𑀦𑁆𑀤𑀢𑀺 𑀧𑀼𑀢𑁆𑀢𑁂𑀳𑀺 𑀧𑀼𑀢𑁆𑀢𑀺𑀫𑀸, 𑀕𑁄𑀫𑀸 [𑀕𑁄𑀫𑀺𑀓𑁄 (𑀲𑀻.), 𑀕𑁄𑀧𑀺𑀓𑁄 (𑀓.) 𑀲𑀼. 𑀦𑀺. 𑁩𑁩; 𑀲𑀁. 𑀦𑀺. 𑁧.𑁧𑁪𑁪 𑀧𑀲𑁆𑀲𑀺𑀢𑀩𑁆𑀩𑀁] 𑀕𑁄𑀳𑀺 𑀢𑀣𑁂𑀯 𑀦𑀦𑁆𑀤𑀢𑀺;

𑀉𑀧𑀥𑀻 𑀳𑀺 𑀦𑀭𑀲𑁆𑀲 𑀦𑀦𑁆𑀤𑀦𑀸, 𑀦 𑀳𑀺 𑀲𑁄 𑀦𑀦𑁆𑀤𑀢𑀺 𑀬𑁄 𑀦𑀺𑀭𑀽𑀧𑀥𑀻’’𑀢𑀺.

𑀪𑀕𑀯𑀸 𑀆𑀳 𑁋

‘‘𑀲𑁄𑀘𑀢𑀺 𑀧𑀼𑀢𑁆𑀢𑁂𑀳𑀺 𑀧𑀼𑀢𑁆𑀢𑀺𑀫𑀸, 𑀕𑁄𑀧𑀺𑀓𑁄 [𑀕𑁄𑀫𑀺𑀓𑁄 (𑀲𑀻.)] 𑀕𑁄𑀳𑀺 𑀢𑀣𑁂𑀯 𑀲𑁄𑀘𑀢𑀺;

𑀉𑀧𑀥𑀻 𑀳𑀺 𑀦𑀭𑀲𑁆𑀲 𑀲𑁄𑀘𑀦𑀸, 𑀦 𑀳𑀺 𑀲𑁄 𑀲𑁄𑀘𑀢𑀺 𑀬𑁄 𑀦𑀺𑀭𑀽𑀧𑀥𑀻’’𑀢𑀺.

𑀇𑀫𑀺𑀦𑀸 𑀯𑀢𑁆𑀣𑀼𑀦𑀸 𑀇𑀫𑀺𑀦𑀸 𑀦𑀺𑀤𑀸𑀦𑁂𑀦 𑀏𑀯𑀁 𑀜𑀸𑀬𑀢𑀺 ‘‘𑀇𑀥 𑀪𑀕𑀯𑀸 𑀩𑀸𑀳𑀺𑀭𑀁 𑀧𑀭𑀺𑀕𑁆𑀕𑀳𑀁 𑀉𑀧𑀥𑀺 𑀆𑀳𑀸’’𑀢𑀺. 𑀬𑀣𑀸 𑀘 𑀫𑀸𑀭𑁄 𑀧𑀸𑀧𑀺𑀫𑀸 𑀕𑀺𑀚𑁆𑀛𑀓𑀽𑀝𑀸 𑀧𑀩𑁆𑀩𑀢𑀸 𑀧𑀼𑀣𑀼𑀲𑀺𑀮𑀁 𑀧𑀸𑀢𑁂𑀲𑀺, 𑀪𑀕𑀯𑀸 𑀆𑀳 𑁋

‘‘𑀲𑀘𑁂𑀧𑀺 𑀓𑁂𑀯𑀮𑀁 𑀲𑀩𑁆𑀩𑀁, 𑀕𑀺𑀚𑁆𑀛𑀓𑀽𑀝𑀁 𑀘𑀮𑁂𑀲𑁆𑀲𑀲𑀺 [𑀘𑀮𑁂𑀬𑁆𑀬𑀸𑀲𑀺 (𑀓.) 𑀧𑀲𑁆𑀲 𑀲𑀁. 𑀦𑀺. 𑁧.𑁧𑁪𑁭];

𑀦𑁂𑀯 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀸𑀦𑀁, 𑀩𑀼𑀤𑁆𑀥𑀸𑀦𑀁 𑀅𑀢𑁆𑀣𑀺 𑀇𑀜𑁆𑀚𑀺𑀢𑀁.

𑀦𑀪𑀁 𑀨𑀮𑁂𑀬𑁆𑀬𑀧𑁆𑀧𑀣𑀯𑀻 𑀘𑀮𑁂𑀬𑁆𑀬, 𑀲𑀩𑁆𑀩𑁂𑀯 𑀧𑀸𑀡𑀸 𑀉𑀤 𑀲𑀦𑁆𑀢𑀲𑁂𑀬𑁆𑀬𑀼𑀁;

𑀲𑀮𑁆𑀮𑀫𑁆𑀧𑀺 𑀘𑁂 𑀉𑀭𑀲𑀺 𑀓𑀫𑁆𑀧𑀬𑁂𑀬𑁆𑀬𑀼𑀁 [𑀧𑀓𑀫𑁆𑀧𑀬𑁂𑀬𑁆𑀬𑀼𑀁 (𑀲𑀻.), 𑀓𑀧𑁆𑀧𑀬𑁂𑀬𑁆𑀬𑀼𑀁 (𑀓.)], 𑀉𑀧𑀥𑀻𑀲𑀼 𑀢𑀸𑀡𑀁 𑀦 𑀓𑀭𑁄𑀦𑁆𑀢𑀺 𑀩𑀼𑀤𑁆𑀥𑀸’’𑀢𑀺.

𑀇𑀫𑀺𑀦𑀸 𑀯𑀢𑁆𑀣𑀼𑀦𑀸 𑀇𑀫𑀺𑀦𑀸 𑀦𑀺𑀤𑀸𑀦𑁂𑀦 𑀏𑀯𑀁 𑀜𑀸𑀬𑀢𑀺 ‘‘𑀇𑀥 𑀪𑀕𑀯𑀸 𑀓𑀸𑀬𑀁 𑀉𑀧𑀥𑀺𑀁 𑀆𑀳𑀸’’𑀢𑀺. 𑀬𑀣𑀸 𑀘𑀸𑀳 𑁋

‘‘𑀦 𑀢𑀁 𑀤𑀴𑁆𑀳𑀁 𑀩𑀦𑁆𑀥𑀦𑀫𑀸𑀳𑀼 𑀥𑀻𑀭𑀸, 𑀬𑀤𑀸𑀬𑀲𑀁 𑀤𑀸𑀭𑀼𑀚𑀧𑀩𑁆𑀩𑀚𑀜𑁆𑀘 [𑀤𑀸𑀭𑀼𑀚𑀁 𑀩𑀩𑁆𑀩𑀚𑀜𑁆𑀘 (𑀲𑀻.) 𑀧𑀲𑁆𑀲 𑀥. 𑀧. 𑁩𑁪𑁫];

𑀲𑀸𑀭𑀢𑁆𑀢𑀭𑀢𑁆𑀢𑀸 𑀫𑀡𑀺𑀓𑀼𑀡𑁆𑀟𑀮𑁂𑀲𑀼, 𑀧𑀼𑀢𑁆𑀢𑁂𑀲𑀼 𑀤𑀸𑀭𑁂𑀲𑀼 𑀘 𑀬𑀸 𑀅𑀧𑁂𑀓𑁆𑀔𑀸’’𑀢𑀺.

𑀇𑀫𑀺𑀦𑀸 𑀯𑀢𑁆𑀣𑀼𑀦𑀸 𑀇𑀫𑀺𑀦𑀸 𑀦𑀺𑀤𑀸𑀦𑁂𑀦 𑀏𑀯𑀁 𑀜𑀸𑀬𑀢𑀺 ‘‘𑀇𑀥 𑀪𑀕𑀯𑀸 𑀩𑀸𑀳𑀺𑀭𑁂𑀲𑀼 𑀯𑀢𑁆𑀣𑀽𑀲𑀼 𑀢𑀡𑁆𑀳𑀁 𑀆𑀳𑀸’’𑀢𑀺. 𑀬𑀣𑀸 𑀘𑀸𑀳 𑁋

‘‘𑀏𑀢𑀁 𑀤𑀴𑁆𑀳𑀁 𑀩𑀦𑁆𑀥𑀦𑀫𑀸𑀳𑀼 𑀥𑀻𑀭𑀸, 𑀑𑀳𑀸𑀭𑀺𑀦𑀁 𑀲𑀺𑀣𑀺𑀮𑀁 𑀤𑀼𑀧𑁆𑀧𑀫𑀼𑀜𑁆𑀘𑀁;

𑀏𑀢𑀫𑁆𑀧𑀺 𑀙𑁂𑀢𑁆𑀯𑀸𑀦 𑀧𑀭𑀺𑀩𑁆𑀩𑀚𑀦𑁆𑀢𑀺, 𑀅𑀦𑀧𑁂𑀓𑁆𑀔𑀺𑀦𑁄 𑀓𑀸𑀫𑀲𑀼𑀔𑀁 𑀧𑀳𑀸𑀬𑀸’’𑀢𑀺.

𑀇𑀫𑀺𑀦𑀸 𑀯𑀢𑁆𑀣𑀼𑀦𑀸 𑀇𑀫𑀺𑀦𑀸 𑀦𑀺𑀤𑀸𑀦𑁂𑀦 𑀏𑀯𑀁 𑀜𑀸𑀬𑀢𑀺 ‘‘𑀇𑀥 𑀪𑀕𑀯𑀸 𑀩𑀸𑀳𑀺𑀭𑀯𑀢𑁆𑀣𑀼𑀓𑀸𑀬 𑀢𑀡𑁆𑀳𑀸𑀬 𑀧𑀳𑀸𑀦𑀁 𑀆𑀳𑀸’’𑀢𑀺. 𑀬𑀣𑀸 𑀘𑀸𑀳 𑁋

‘‘𑀆𑀢𑀼𑀭𑀁 𑀅𑀲𑀼𑀘𑀺𑀁 𑀧𑀽𑀢𑀺𑀁, 𑀤𑀼𑀕𑁆𑀕𑀦𑁆𑀥𑀁 𑀤𑁂𑀳𑀦𑀺𑀲𑁆𑀲𑀺𑀢𑀁;

𑀧𑀕𑁆𑀖𑀭𑀦𑁆𑀢𑀁 𑀤𑀺𑀯𑀸 𑀭𑀢𑁆𑀢𑀺𑀁, 𑀩𑀸𑀮𑀸𑀦𑀁 𑀅𑀪𑀺𑀦𑀦𑁆𑀤𑀺𑀢’’𑀦𑁆𑀢𑀺.

𑀇𑀫𑀺𑀦𑀸 𑀯𑀢𑁆𑀣𑀼𑀦𑀸 𑀇𑀫𑀺𑀦𑀸 𑀦𑀺𑀤𑀸𑀦𑁂𑀦 𑀏𑀯𑀁 𑀜𑀸𑀬𑀢𑀺 ‘‘𑀇𑀥 𑀪𑀕𑀯𑀸 𑀅𑀚𑁆𑀛𑀢𑁆𑀢𑀺𑀓𑀯𑀢𑁆𑀣𑀼𑀓𑀸𑀬 𑀢𑀡𑁆𑀳𑀸𑀬 𑀧𑀳𑀸𑀦𑀁 𑀆𑀳𑀸’’𑀢𑀺. 𑀬𑀣𑀸 𑀘𑀸𑀳 𑁋

‘‘𑀉𑀘𑁆𑀙𑀺𑀦𑁆𑀤 [𑀧𑀲𑁆𑀲 𑀥. 𑀧. 𑁨𑁮𑁫] 𑀲𑀺𑀦𑁂𑀳𑀫𑀢𑁆𑀢𑀦𑁄, 𑀓𑀼𑀫𑀼𑀤𑀁 𑀲𑀸𑀭𑀤𑀺𑀓𑀁𑀯 𑀧𑀸𑀡𑀺𑀦𑀸;

𑀲𑀦𑁆𑀢𑀺𑀫𑀕𑁆𑀕𑀫𑁂𑀯 𑀩𑁆𑀭𑀽𑀳𑀬, 𑀦𑀺𑀩𑁆𑀩𑀸𑀦𑀁 𑀲𑀼𑀕𑀢𑁂𑀦 𑀤𑁂𑀲𑀺𑀢’’𑀦𑁆𑀢𑀺.

𑀇𑀫𑀺𑀦𑀸 𑀯𑀢𑁆𑀣𑀼𑀦𑀸 𑀇𑀫𑀺𑀦𑀸 𑀦𑀺𑀤𑀸𑀦𑁂𑀦 𑀏𑀯𑀁 𑀜𑀸𑀬𑀢𑀺 ‘‘𑀇𑀥 𑀪𑀕𑀯𑀸 𑀅𑀚𑁆𑀛𑀢𑁆𑀢𑀺𑀓𑀯𑀢𑁆𑀣𑀼𑀓𑀸𑀬 𑀢𑀡𑁆𑀳𑀸𑀬 𑀧𑀳𑀸𑀦𑀁 𑀆𑀳𑀸’’𑀢𑀺. 𑀇𑀤𑀁 𑀦𑀺𑀤𑀸𑀦𑀁.

𑀢𑀢𑁆𑀣 𑀓𑀢𑀫𑁄 𑀧𑀼𑀩𑁆𑀩𑀸𑀧𑀭𑀲𑀦𑁆𑀥𑀺. 𑀬𑀣𑀸𑀳 𑁋

‘‘𑀓𑀸𑀫𑀦𑁆𑀥𑀸 𑀚𑀸𑀮𑀲𑀜𑁆𑀙𑀦𑁆𑀦𑀸, 𑀢𑀡𑁆𑀳𑀸𑀙𑀤𑀦𑀙𑀸𑀤𑀺𑀢𑀸;

𑀧𑀫𑀢𑁆𑀢𑀩𑀦𑁆𑀥𑀦𑀸 [𑀧𑀫𑀢𑁆𑀢𑀩𑀦𑁆𑀥𑀼𑀦𑀸 𑀉𑀤𑀸. 𑁬𑁪] 𑀩𑀤𑁆𑀥𑀸 [𑀩𑀦𑁆𑀥𑀸 (𑀓.) 𑀧𑀲𑁆𑀲 𑀉𑀤𑀸. 𑁬𑁪], 𑀫𑀘𑁆𑀙𑀸𑀯 𑀓𑀼𑀫𑀺𑀦𑀸𑀫𑀼𑀔𑁂;

𑀚𑀭𑀸𑀫𑀭𑀡𑀫𑀦𑁆𑀯𑁂𑀦𑁆𑀢𑀺, 𑀯𑀘𑁆𑀙𑁄 𑀔𑀻𑀭𑀧𑀓𑁄𑀯 𑀫𑀸𑀢𑀭’’𑀦𑁆𑀢𑀺.

𑀅𑀬𑀁 𑀓𑀸𑀫𑀢𑀡𑁆𑀳𑀸 𑀯𑀼𑀢𑁆𑀢𑀸. 𑀲𑀸 𑀓𑀢𑀫𑁂𑀦 𑀧𑀼𑀩𑁆𑀩𑀸𑀧𑀭𑁂𑀦 𑀬𑀼𑀚𑁆𑀚𑀢𑀺? 𑀬𑀣𑀸𑀳 𑁋

‘‘𑀭𑀢𑁆𑀢𑁄 𑀅𑀢𑁆𑀣𑀁 𑀦 𑀚𑀸𑀦𑀸𑀢𑀺, 𑀭𑀢𑁆𑀢𑁄 𑀥𑀫𑁆𑀫𑀁 𑀦 𑀧𑀲𑁆𑀲𑀢𑀺;

𑀅𑀦𑁆𑀥𑀦𑁆𑀢𑀫𑀁 𑀢𑀤𑀸 𑀳𑁄𑀢𑀺, 𑀬𑀁 𑀭𑀸𑀕𑁄 𑀲𑀳𑀢𑁂 𑀦𑀭’’𑀦𑁆𑀢𑀺.

𑀇𑀢𑀺 𑀅𑀦𑁆𑀥𑀢𑀸𑀬 𑀘 𑀲𑀜𑁆𑀙𑀦𑁆𑀦𑀢𑀸𑀬 𑀘 𑀲𑀸𑀬𑁂𑀯 𑀢𑀡𑁆𑀳𑀸 𑀅𑀪𑀺𑀮𑀧𑀺𑀢𑀸. 𑀬𑀜𑁆𑀘𑀸𑀳 𑀓𑀸𑀫𑀦𑁆𑀥𑀸 𑀚𑀸𑀮𑀲𑀜𑁆𑀙𑀦𑁆𑀦𑀸, 𑀢𑀡𑁆𑀳𑀸𑀙𑀤𑀦𑀙𑀸𑀤𑀺𑀢𑀸𑀢𑀺. 𑀬𑀜𑁆𑀘𑀸𑀳 𑀭𑀢𑁆𑀢𑁄 𑀅𑀢𑁆𑀣𑀁 𑀦 𑀚𑀸𑀦𑀸𑀢𑀺, 𑀭𑀢𑁆𑀢𑁄 𑀥𑀫𑁆𑀫𑀁 𑀦 𑀧𑀲𑁆𑀲𑀢𑀻𑀢𑀺, 𑀇𑀫𑁂𑀳𑀺 𑀧𑀤𑁂𑀳𑀺 𑀧𑀭𑀺𑀬𑀼𑀝𑁆𑀞𑀸𑀦𑁂𑀳𑀺 𑀲𑀸𑀬𑁂𑀯 𑀢𑀡𑁆𑀳𑀸 𑀅𑀪𑀺𑀮𑀧𑀺𑀢𑀸. 𑀬𑀁 𑀅𑀦𑁆𑀥𑀓𑀸𑀭𑀁, 𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄, 𑀬𑀸 𑀘 𑀢𑀡𑁆𑀳𑀸 𑀧𑁄𑀦𑁄𑀪𑀯𑀺𑀓𑀸, 𑀬𑀜𑁆𑀘𑀸𑀳 𑀓𑀸𑀫𑀸𑀢𑀺 𑀇𑀫𑁂 𑀓𑀺𑀮𑁂𑀲𑀓𑀸𑀫𑀸. 𑀬𑀜𑁆𑀘𑀸𑀳 𑀚𑀸𑀮𑀲𑀜𑁆𑀙𑀦𑁆𑀦𑀸𑀢𑀺 𑀢𑁂𑀲𑀁 𑀬𑁂𑀯 𑀓𑀸𑀫𑀸𑀦𑀁 𑀧𑀬𑁄𑀕𑁂𑀦 𑀧𑀭𑀺𑀬𑀼𑀝𑁆𑀞𑀸𑀦𑀁 𑀤𑀲𑁆𑀲𑁂𑀢𑀺, 𑀢𑀲𑁆𑀫𑀸 𑀓𑀺𑀮𑁂𑀲𑀯𑀲𑁂𑀦 𑀘 𑀧𑀭𑀺𑀬𑀼𑀝𑁆𑀞𑀸𑀦𑀯𑀲𑁂𑀦 𑀘 𑀢𑀡𑁆𑀳𑀸𑀩𑀦𑁆𑀥𑀦𑀁 𑀯𑀼𑀢𑁆𑀢𑀁. 𑀬𑁂 𑀏𑀤𑀺𑀲𑀺𑀓𑀸, 𑀢𑁂 𑀚𑀭𑀸𑀫𑀭𑀡𑀁 𑀅𑀦𑁆𑀯𑁂𑀦𑁆𑀢𑀺, 𑀅𑀬𑀁 𑀪𑀕𑀯𑀢𑀸 𑀬𑀣𑀸𑀦𑀺𑀓𑁆𑀔𑀺𑀢𑁆𑀢𑀕𑀸𑀣𑀸𑀩𑀮𑁂𑀦 𑀤𑀲𑁆𑀲𑀺𑀢𑀸 𑀚𑀭𑀸𑀫𑀭𑀡𑀫𑀦𑁆𑀯𑁂𑀦𑁆𑀢𑀻𑀢𑀺.

‘‘𑀬𑀲𑁆𑀲 𑀧𑀧𑀜𑁆𑀘𑀸 𑀞𑀺𑀢𑀻 𑀘 𑀦𑀢𑁆𑀣𑀺, 𑀲𑀦𑁆𑀤𑀸𑀦𑀁 𑀧𑀮𑀺𑀖𑀜𑁆𑀘 [𑀧𑀴𑀺𑀖𑀜𑁆𑀘 (𑀲𑀻.) 𑀧𑀲𑁆𑀲 𑀉𑀤𑀸. 𑁬𑁭] 𑀯𑀻𑀢𑀺𑀯𑀢𑁆𑀢𑁄;

𑀢𑀁 𑀦𑀺𑀢𑁆𑀢𑀡𑁆𑀳𑀁 𑀫𑀼𑀦𑀺𑀁 𑀘𑀭𑀦𑁆𑀢𑀁, 𑀦 𑀯𑀺𑀚𑀸𑀦𑀸𑀢𑀺 𑀲𑀤𑁂𑀯𑀓𑁄𑀧𑀺 𑀮𑁄𑀓𑁄’’𑀢𑀺.

𑀧𑀧𑀜𑁆𑀘𑀸 𑀦𑀸𑀫 𑀢𑀡𑁆𑀳𑀸𑀤𑀺𑀝𑁆𑀞𑀺𑀫𑀸𑀦𑀸, 𑀢𑀤𑀪𑀺𑀲𑀗𑁆𑀔𑀢𑀸 𑀘 𑀲𑀗𑁆𑀔𑀸𑀭𑀸. 𑀞𑀺𑀢𑀺 𑀦𑀸𑀫 𑀅𑀦𑀼𑀲𑀬𑀸. 𑀲𑀦𑁆𑀤𑀸𑀦𑀁 𑀦𑀸𑀫 𑀢𑀡𑁆𑀳𑀸𑀬 𑀧𑀭𑀺𑀬𑀼𑀝𑁆𑀞𑀸𑀦𑀁, 𑀬𑀸𑀦𑀺 𑀙𑀢𑁆𑀢𑀺𑀁𑀲𑀢𑀡𑁆𑀳𑀸𑀬 𑀚𑀸𑀮𑀺𑀦𑀺𑀬𑀸 𑀯𑀺𑀘𑀭𑀺𑀢𑀸𑀦𑀺. 𑀧𑀮𑀺𑀖𑁄 𑀦𑀸𑀫 𑀫𑁄𑀳𑁄. 𑀬𑁂 𑀘 𑀧𑀧𑀜𑁆𑀘𑀸 𑀲𑀗𑁆𑀔𑀸𑀭𑀸 𑀬𑀸 𑀘 𑀞𑀺𑀢𑀺 𑀬𑀁 𑀲𑀦𑁆𑀤𑀸𑀦𑀜𑁆𑀘 𑀬𑀁 𑀧𑀮𑀺𑀖𑀜𑁆𑀘 𑀬𑁄 𑀏𑀢𑀁 𑀲𑀩𑁆𑀩𑀁 𑀲𑀫𑀢𑀺𑀓𑁆𑀓𑀦𑁆𑀢𑁄, 𑀅𑀬𑀁 𑀯𑀼𑀘𑁆𑀘𑀢𑀺 𑀦𑀺𑀢𑁆𑀢𑀡𑁆𑀳𑁄 𑀇𑀢𑀺.

𑁨𑁮. 𑀢𑀢𑁆𑀣 𑀧𑀭𑀺𑀬𑀼𑀝𑁆𑀞𑀸𑀦𑀲𑀗𑁆𑀔𑀸𑀭𑀸 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀸 𑀯𑀸 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀸 𑀯𑀸 𑀅𑀧𑀭𑀸𑀧𑀭𑀺𑀬𑀯𑁂𑀤𑀦𑀻𑀬𑀸 𑀯𑀸, 𑀏𑀯𑀁 𑀢𑀡𑁆𑀳𑀸 𑀢𑀺𑀯𑀺𑀥𑀁 𑀨𑀮𑀁 𑀤𑁂𑀢𑀺 𑀤𑀺𑀝𑁆𑀞𑁂 𑀯𑀸 𑀥𑀫𑁆𑀫𑁂 𑀉𑀧𑀧𑀚𑁆𑀚𑁂 𑀯𑀸 𑀅𑀧𑀭𑁂 𑀯𑀸 𑀧𑀭𑀺𑀬𑀸𑀬𑁂. 𑀏𑀯𑀁 𑀪𑀕𑀯𑀸 𑀆𑀳 ‘‘𑀬𑀁 𑀮𑁄𑀪𑀧𑀓𑀢𑀁 𑀓𑀫𑁆𑀫𑀁 𑀓𑀭𑁄𑀢𑀺 𑀓𑀸𑀬𑁂𑀦 𑀯𑀸 𑀯𑀸𑀘𑀸𑀬 𑀯𑀸 𑀫𑀦𑀲𑀸 𑀯𑀸, 𑀢𑀲𑁆𑀲 𑀯𑀺𑀧𑀸𑀓𑀁 𑀅𑀦𑀼𑀪𑁄𑀢𑀺 𑀤𑀺𑀝𑁆𑀞𑁂 𑀯𑀸 𑀥𑀫𑁆𑀫𑁂 𑀉𑀧𑀧𑀚𑁆𑀚𑁂 𑀯𑀸 𑀅𑀧𑀭𑁂 𑀯𑀸 𑀧𑀭𑀺𑀬𑀸𑀬𑁂’’𑀢𑀺. 𑀇𑀤𑀁 𑀪𑀕𑀯𑀢𑁄 𑀧𑀼𑀩𑁆𑀩𑀸𑀧𑀭𑁂𑀦 𑀬𑀼𑀚𑁆𑀚𑀢𑀺. 𑀢𑀢𑁆𑀣 𑀧𑀭𑀺𑀬𑀼𑀝𑁆𑀞𑀸𑀦𑀁 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁 𑀯𑀸 𑀓𑀫𑁆𑀫𑀁 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀁 𑀯𑀸 𑀓𑀫𑁆𑀫𑀁 𑀅𑀧𑀭𑀸𑀧𑀭𑀺𑀬𑀸𑀬𑀯𑁂𑀤𑀦𑀻𑀬𑀁 [𑀅𑀧𑀭𑀸𑀧𑀭𑀺𑀬𑀯𑁂𑀤𑀦𑀻𑀬𑀁 (𑀲𑀻.)] 𑀯𑀸 𑀓𑀫𑁆𑀫𑀁, 𑀏𑀯𑀁 𑀓𑀫𑁆𑀫𑀁 𑀢𑀺𑀥𑀸 𑀯𑀺𑀧𑀘𑁆𑀘𑀢𑀺 𑀤𑀺𑀝𑁆𑀞𑁂 𑀯𑀸 𑀥𑀫𑁆𑀫𑁂 𑀉𑀧𑀧𑀚𑁆𑀚𑁂 𑀯𑀸 𑀅𑀧𑀭𑁂 𑀯𑀸 𑀧𑀭𑀺𑀬𑀸𑀬𑁂. 𑀬𑀣𑀸𑀳 𑁋

‘‘𑀬𑀜𑁆𑀘𑁂 𑀩𑀸𑀮𑁄 𑀇𑀥 𑀧𑀸𑀡𑀸𑀢𑀺𑀧𑀸𑀢𑀻 𑀳𑁄𑀢𑀺…𑀧𑁂… 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀳𑁄𑀢𑀺, 𑀢𑀲𑁆𑀲 𑀤𑀺𑀝𑁆𑀞𑁂 𑀯𑀸 𑀥𑀫𑁆𑀫𑁂 𑀯𑀺𑀧𑀸𑀓𑀁 𑀧𑀝𑀺𑀲𑀁𑀯𑁂𑀤𑁂𑀢𑀺 𑀉𑀧𑀧𑀚𑁆𑀚𑁂 𑀯𑀸 𑀅𑀧𑀭𑁂 𑀯𑀸 𑀧𑀭𑀺𑀬𑀸𑀬𑁂’’𑀢𑀺. 𑀇𑀤𑀁 𑀪𑀕𑀯𑀢𑁄 𑀧𑀼𑀩𑁆𑀩𑀸𑀧𑀭𑁂𑀦 𑀬𑀼𑀚𑁆𑀚𑀢𑀺. 𑀢𑀢𑁆𑀣 𑀧𑀭𑀺𑀬𑀼𑀝𑁆𑀞𑀸𑀦𑀁 𑀧𑀝𑀺𑀲𑀗𑁆𑀔𑀸𑀦𑀩𑀮𑁂𑀦 𑀧𑀳𑀸𑀢𑀩𑁆𑀩𑀁, 𑀲𑀗𑁆𑀔𑀸𑀭𑀸 𑀤𑀲𑁆𑀲𑀦𑀩𑀮𑁂𑀦, 𑀙𑀢𑁆𑀢𑀺𑀁𑀲 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀺 𑀪𑀸𑀯𑀦𑀸𑀩𑀮𑁂𑀦 𑀧𑀳𑀸𑀢𑀩𑁆𑀩𑀸𑀦𑀻𑀢𑀺 𑀏𑀯𑀁 𑀢𑀡𑁆𑀳𑀸𑀧𑀺 𑀢𑀺𑀥𑀸 𑀧𑀳𑀻𑀬𑀢𑀺. 𑀬𑀸 𑀦𑀺𑀢𑁆𑀢𑀡𑁆𑀳𑀸𑀢𑀸 𑀅𑀬𑀁 𑀲𑀉𑀧𑀸𑀤𑀺𑀲𑁂𑀲𑀸 𑀦𑀺𑀩𑁆𑀩𑀸𑀦𑀥𑀸𑀢𑀼. 𑀪𑁂𑀤𑀸 𑀓𑀸𑀬𑀲𑁆𑀲 𑀅𑀬𑀁 𑀅𑀦𑀼𑀧𑀸𑀤𑀺𑀲𑁂𑀲𑀸 𑀦𑀺𑀩𑁆𑀩𑀸𑀦𑀥𑀸𑀢𑀼.

𑀧𑀧𑀜𑁆𑀘𑁄 𑀦𑀸𑀫 𑀯𑀼𑀘𑁆𑀘𑀢𑀺 𑀅𑀦𑀼𑀩𑀦𑁆𑀥𑁄. 𑀬𑀜𑁆𑀘𑀸𑀳 𑀪𑀕𑀯𑀸 ‘‘𑀧𑀧𑀜𑁆𑀘𑁂𑀢𑀺 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀁 𑀭𑀽𑀧𑀁 𑀆𑀭𑀩𑁆𑀪𑀸’’𑀢𑀺. 𑀬𑀜𑁆𑀘𑀸𑀳 𑀪𑀕𑀯𑀸 𑁋 ‘‘𑀅𑀢𑀻𑀢𑁂, 𑀭𑀸𑀥, 𑀭𑀽𑀧𑁂 𑀅𑀦𑀧𑁂𑀓𑁆𑀔𑁄 𑀳𑁄𑀳𑀺, 𑀅𑀦𑀸𑀕𑀢𑀁 𑀭𑀽𑀧𑀁 𑀫𑀸 𑀅𑀪𑀺𑀦𑀦𑁆𑀤𑀺, 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲 𑀭𑀽𑀧𑀲𑁆𑀲 𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀬 𑀧𑀝𑀺𑀧𑀚𑁆𑀚𑀸’’𑀢𑀺. 𑀇𑀤𑀁 𑀪𑀕𑀯𑀢𑁄 𑀧𑀼𑀩𑁆𑀩𑀸𑀧𑀭𑁂𑀦 𑀬𑀼𑀚𑁆𑀚𑀢𑀺. 𑀬𑁄 𑀘𑀸𑀧𑀺 𑀧𑀧𑀜𑁆𑀘𑁄 𑀬𑁂 𑀘 𑀲𑀗𑁆𑀔𑀸𑀭𑀸 𑀬𑀸 𑀘 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲 𑀅𑀪𑀺𑀦𑀦𑁆𑀤𑀦𑀸, 𑀇𑀤𑀁 𑀏𑀓𑀢𑁆𑀣𑀁. 𑀅𑀧𑀺 𑀘 𑀅𑀜𑁆𑀜𑀫𑀜𑁆𑀜𑁂𑀳𑀺 𑀧𑀤𑁂𑀳𑀺 𑀅𑀜𑁆𑀜𑀫𑀜𑁆𑀜𑁂𑀳𑀺 𑀅𑀓𑁆𑀔𑀭𑁂𑀳𑀺 𑀅𑀜𑁆𑀜𑀫𑀜𑁆𑀜𑁂𑀳𑀺 𑀩𑁆𑀬𑀜𑁆𑀚𑀦𑁂𑀳𑀺 𑀅𑀧𑀭𑀺𑀫𑀸𑀡𑀸 𑀥𑀫𑁆𑀫𑀤𑁂𑀲𑀦𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸. 𑀏𑀯𑀁 𑀲𑀼𑀢𑁆𑀢𑁂𑀦 𑀲𑀼𑀢𑁆𑀢𑀁 𑀲𑀁𑀲𑀦𑁆𑀤𑀬𑀺𑀢𑁆𑀯𑀸 𑀧𑀼𑀩𑁆𑀩𑀸𑀧𑀭𑁂𑀦 𑀲𑀤𑁆𑀥𑀺𑀁 𑀬𑁄𑀚𑀬𑀺𑀢𑁆𑀯𑀸 𑀲𑀼𑀢𑁆𑀢𑀁 𑀦𑀺𑀤𑁆𑀤𑀺𑀝𑁆𑀞𑀁 𑀪𑀯𑀢𑀺.

𑀲𑁄 𑀘𑀸𑀬𑀁 [𑀲 𑀘𑀸𑀬𑀁 (𑀲𑀻.)] 𑀧𑀼𑀩𑁆𑀩𑀸𑀧𑀭𑁄 𑀲𑀦𑁆𑀥𑀺 𑀘𑀢𑀼𑀩𑁆𑀩𑀺𑀥𑁄 𑀅𑀢𑁆𑀣𑀲𑀦𑁆𑀥𑀺 𑀩𑁆𑀬𑀜𑁆𑀚𑀦𑀲𑀦𑁆𑀥𑀺 𑀤𑁂𑀲𑀦𑀸𑀲𑀦𑁆𑀥𑀺 𑀦𑀺𑀤𑁆𑀤𑁂𑀲𑀲𑀦𑁆𑀥𑀻𑀢𑀺.

𑀢𑀢𑁆𑀣 𑀅𑀢𑁆𑀣𑀲𑀦𑁆𑀥𑀺 𑀙𑀧𑁆𑀧𑀤𑀸𑀦𑀺 𑀲𑀗𑁆𑀓𑀸𑀲𑀦𑀸 𑀧𑀓𑀸𑀲𑀦𑀸 𑀯𑀺𑀯𑀭𑀡𑀸 𑀯𑀺𑀪𑀚𑀦𑀸 𑀉𑀢𑁆𑀢𑀸𑀦𑀻𑀓𑀫𑁆𑀫𑀢𑀸 𑀧𑀜𑁆𑀜𑀢𑁆𑀢𑀻𑀢𑀺.

𑀩𑁆𑀬𑀜𑁆𑀚𑀦𑀲𑀦𑁆𑀥𑀺 𑀙𑀧𑁆𑀧𑀤𑀸𑀦𑀺 𑀅𑀓𑁆𑀔𑀭𑀁 𑀧𑀤𑀁 𑀩𑁆𑀬𑀜𑁆𑀚𑀦𑀁 𑀆𑀓𑀸𑀭𑁄 𑀦𑀺𑀭𑀼𑀢𑁆𑀢𑀺 𑀦𑀺𑀤𑁆𑀤𑁂𑀲𑁄𑀢𑀺.

𑀤𑁂𑀲𑀦𑀸𑀲𑀦𑁆𑀥𑀺 𑀦 𑀘 𑀧𑀣𑀯𑀺𑀁 𑀦𑀺𑀲𑁆𑀲𑀸𑀬 𑀛𑀸𑀬𑀢𑀺 𑀛𑀸𑀬𑀻 𑀛𑀸𑀬𑀢𑀺 𑀘. 𑀦 𑀘 𑀆𑀧𑀁 𑀦𑀺𑀲𑁆𑀲𑀸𑀬 𑀛𑀸𑀬𑀢𑀺 𑀛𑀸𑀬𑀻 𑀛𑀸𑀬𑀢𑀺 𑀘, 𑀦 𑀘 𑀢𑁂𑀚𑀁 𑀦𑀺𑀲𑁆𑀲𑀸𑀬 𑀛𑀸𑀬𑀢𑀺 𑀛𑀸𑀬𑀻 𑀛𑀸𑀬𑀢𑀺 𑀘, 𑀦 𑀘 𑀯𑀸𑀬𑀼𑀁 𑀦𑀺𑀲𑁆𑀲𑀸𑀬 𑀛𑀸𑀬𑀢𑀺 𑀛𑀸𑀬𑀻 𑀛𑀸𑀬𑀢𑀺 𑀘. 𑀦 𑀘 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀦𑀺𑀲𑁆𑀲𑀸𑀬…𑀧𑁂… 𑀦 𑀘 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀦𑀺𑀲𑁆𑀲𑀸𑀬…𑀧𑁂… 𑀦 𑀘 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀦𑀺𑀲𑁆𑀲𑀸𑀬…𑀧𑁂… 𑀦 𑀘 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀦𑀺𑀲𑁆𑀲𑀸𑀬…𑀧𑁂… 𑀦 𑀘 𑀇𑀫𑀁 𑀮𑁄𑀓𑀁 𑀦𑀺𑀲𑁆𑀲𑀸𑀬…𑀧𑁂… 𑀦 𑀘 𑀧𑀭𑀮𑁄𑀓𑀁 𑀦𑀺𑀲𑁆𑀲𑀸𑀬 𑀛𑀸𑀬𑀢𑀺 𑀛𑀸𑀬𑀻 𑀛𑀸𑀬𑀢𑀺 𑀘. 𑀬𑀫𑀺𑀤𑀁 𑀉𑀪𑀬𑀫𑀦𑁆𑀢𑀭𑁂𑀦 𑀤𑀺𑀝𑁆𑀞𑀁 𑀲𑀼𑀢𑀁 𑀫𑀼𑀢𑀁 𑀯𑀺𑀜𑁆𑀜𑀸𑀢𑀁 𑀧𑀢𑁆𑀢𑀁 𑀧𑀭𑀺𑀬𑁂𑀲𑀺𑀢𑀁 𑀯𑀺𑀢𑀓𑁆𑀓𑀺𑀢𑀁 𑀯𑀺𑀘𑀸𑀭𑀺𑀢𑀁 𑀫𑀦𑀲𑀸𑀦𑀼𑀘𑀺𑀦𑁆𑀢𑀺𑀢𑀁, 𑀢𑀫𑁆𑀧𑀺 𑀦𑀺𑀲𑁆𑀲𑀸𑀬 𑀦 𑀛𑀸𑀬𑀢𑀺 𑀛𑀸𑀬𑀻 𑀛𑀸𑀬𑀢𑀺 𑀘. 𑀅𑀬𑀁 𑀲𑀤𑁂𑀯𑀓𑁂 𑀮𑁄𑀓𑁂 𑀲𑀫𑀸𑀭𑀓𑁂 𑀲𑀩𑁆𑀭𑀳𑁆𑀫𑀓𑁂 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀅𑀦𑀺𑀲𑁆𑀲𑀺𑀢𑁂𑀦 𑀘𑀺𑀢𑁆𑀢𑁂𑀦 𑀦 𑀜𑀸𑀬𑀢𑀺 𑀛𑀸𑀬𑀦𑁆𑀢𑁄.

𑀬𑀣𑀸 𑀫𑀸𑀭𑁄 𑀧𑀸𑀧𑀺𑀫𑀸 𑀕𑁄𑀥𑀺𑀓𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 [𑀧𑀲𑁆𑀲 𑀲𑀁. 𑀦𑀺. 𑁧.𑁧𑁫𑁯] 𑀯𑀺𑀜𑁆𑀜𑀸𑀡𑀁 𑀲𑀫𑀦𑁆𑀯𑁂𑀲𑀦𑁆𑀢𑁄 𑀦 𑀚𑀸𑀦𑀸𑀢𑀺 𑀦 𑀧𑀲𑁆𑀲𑀢𑀺. 𑀲𑁄 𑀳𑀺 𑀧𑀧𑀜𑁆𑀘𑀸𑀢𑀻𑀢𑁄 𑀢𑀡𑁆𑀳𑀸𑀧𑀳𑀸𑀦𑁂𑀦 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑁄𑀧𑀺𑀲𑁆𑀲 𑀦𑀢𑁆𑀣𑀺. 𑀬𑀣𑀸 𑀘 𑀕𑁄𑀥𑀺𑀓𑀲𑁆𑀲, 𑀏𑀯𑀁 𑀯𑀓𑁆𑀓𑀮𑀺𑀲𑁆𑀲 𑀲𑀤𑁂𑀯𑀓𑁂𑀦 𑀮𑁄𑀓𑁂𑀦 𑀲𑀫𑀸𑀭𑀓𑁂𑀦 𑀲𑀩𑁆𑀭𑀳𑁆𑀫𑀓𑁂𑀦 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀅𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀸 𑀦 𑀜𑀸𑀬𑀦𑁆𑀢𑀺 𑀛𑀸𑀬𑀫𑀸𑀦𑀸. 𑀅𑀬𑀁 𑀤𑁂𑀲𑀦𑀸𑀲𑀦𑁆𑀥𑀺.

𑀢𑀢𑁆𑀣 𑀓𑀢𑀫𑀸 𑀦𑀺𑀤𑁆𑀤𑁂𑀲𑀲𑀦𑁆𑀥𑀺? 𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀸 𑀅𑀓𑀼𑀲𑀮𑀧𑀓𑁆𑀔𑁂𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸, 𑀅𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀸 𑀓𑀼𑀲𑀮𑀧𑀓𑁆𑀔𑁂𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸. 𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀸 𑀓𑀺𑀮𑁂𑀲𑁂𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸, 𑀅𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀸 𑀯𑁄𑀤𑀸𑀦𑁂𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸. 𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀸 𑀲𑀁𑀲𑀸𑀭𑀧𑁆𑀧𑀯𑀢𑁆𑀢𑀺𑀬𑀸 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸, 𑀅𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀸 𑀲𑀁𑀲𑀸𑀭𑀦𑀺𑀯𑀢𑁆𑀢𑀺𑀬𑀸 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸. 𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀸 𑀢𑀡𑁆𑀳𑀸𑀬 𑀘 𑀅𑀯𑀺𑀚𑁆𑀚𑀸𑀬 𑀘 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸, 𑀅𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀸 𑀲𑀫𑀣𑁂𑀦 𑀘 𑀯𑀺𑀧𑀲𑁆𑀲𑀦𑀸𑀬 𑀘 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸. 𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀸 𑀅𑀳𑀺𑀭𑀺𑀓𑁂𑀦 𑀘 𑀅𑀦𑁄𑀢𑁆𑀢𑀧𑁆𑀧𑁂𑀦 𑀘 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸, 𑀅𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀸 𑀳𑀺𑀭𑀺𑀬𑀸 𑀘 𑀑𑀢𑁆𑀢𑀧𑁆𑀧𑁂𑀦 𑀘 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸. 𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀸 𑀅𑀲𑀢𑀺𑀬𑀸 𑀘 𑀅𑀲𑀫𑁆𑀧𑀚𑀜𑁆𑀜𑁂𑀦 𑀘 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸, 𑀅𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀸 𑀲𑀢𑀺𑀬𑀸 𑀘 𑀲𑀫𑁆𑀧𑀚𑀜𑁆𑀜𑁂𑀦 𑀘 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸. 𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀸 𑀅𑀬𑁄𑀦𑀺𑀬𑀸 𑀘 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦 𑀘 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸, 𑀅𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀸 𑀬𑁄𑀦𑀺𑀬𑀸 𑀘 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦 𑀘 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸. 𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀸 𑀓𑁄𑀲𑀚𑁆𑀚𑁂𑀦 𑀘 𑀤𑁄𑀯𑀘𑀲𑁆𑀲𑁂𑀦 𑀘 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸, 𑀅𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀸 𑀯𑀻𑀭𑀺𑀬𑀸𑀭𑀫𑁆𑀪𑁂𑀦 𑀘 𑀲𑁄𑀯𑀘𑀲𑁆𑀲𑁂𑀦 𑀘 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸. 𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀸 𑀅𑀲𑁆𑀲𑀤𑁆𑀥𑀺𑀬𑁂𑀦 𑀘 𑀧𑀫𑀸𑀤𑁂𑀦 𑀘 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸, 𑀅𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀸 𑀲𑀤𑁆𑀥𑀸𑀬 𑀘 𑀅𑀧𑁆𑀧𑀫𑀸𑀤𑁂𑀦 𑀘 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸. 𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀸 𑀅𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑁂𑀦 𑀘 𑀅𑀲𑀁𑀯𑀭𑀡𑁂𑀦 𑀘 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸, 𑀅𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀸 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑁂𑀦 𑀘 𑀲𑀁𑀯𑀭𑁂𑀦 𑀘 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸. 𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀸 𑀅𑀪𑀺𑀚𑁆𑀛𑀸𑀬 𑀘 𑀩𑁆𑀬𑀸𑀧𑀸𑀤𑁂𑀦 𑀘 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸, 𑀅𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀸 𑀅𑀦𑀪𑀺𑀚𑁆𑀛𑀸𑀬 𑀘 𑀅𑀩𑁆𑀬𑀸𑀧𑀸𑀤𑁂𑀦 𑀘 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸. 𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀸 𑀦𑀻𑀯𑀭𑀡𑁂𑀳𑀺 𑀘 𑀲𑀁𑀬𑁄𑀚𑀦𑀺𑀬𑁂𑀳𑀺 𑀘 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸, 𑀅𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀸 𑀭𑀸𑀕𑀯𑀺𑀭𑀸𑀕𑀸𑀬 𑀘 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀸𑀬 𑀘 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀬𑀸 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸. 𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀸 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑀸 𑀘 𑀲𑀲𑁆𑀲𑀢𑀤𑀺𑀝𑁆𑀞𑀺𑀬𑀸 𑀘 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸, 𑀅𑀦𑀺𑀲𑁆𑀲𑀺𑀢𑀘𑀺𑀢𑁆𑀢𑀸 𑀲𑀉𑀧𑀸𑀤𑀺𑀲𑁂𑀲𑀸𑀬 𑀘 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀘 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸. 𑀅𑀬𑀁 𑀦𑀺𑀤𑁆𑀤𑁂𑀲𑀲𑀦𑁆𑀥𑀺. 𑀢𑁂𑀦𑀸𑀳 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀬𑀦𑁄 ‘‘𑀦𑁂𑀭𑀼𑀢𑁆𑀢𑀫𑀥𑀺𑀧𑁆𑀧𑀸𑀬𑁄’’𑀢𑀺.

𑀦𑀺𑀬𑀼𑀢𑁆𑀢𑁄 𑀘𑀢𑀼𑀩𑁆𑀬𑀽𑀳𑁄 𑀳𑀸𑀭𑁄.