𑁨. 𑀯𑀺𑀘𑀬𑀳𑀸𑀭𑀲𑀫𑁆𑀧𑀸𑀢𑁄

𑁫𑁩. 𑀢𑀢𑁆𑀣 𑀓𑀢𑀫𑁄 𑀯𑀺𑀘𑀬𑁄 𑀳𑀸𑀭𑀲𑀫𑁆𑀧𑀸𑀢𑁄? 𑀢𑀢𑁆𑀣 𑀢𑀡𑁆𑀳𑀸 𑀤𑀼𑀯𑀺𑀥𑀸 𑀓𑀼𑀲𑀮𑀸𑀧𑀺 𑀅𑀓𑀼𑀲𑀮𑀸𑀧𑀺. 𑀅𑀓𑀼𑀲𑀮𑀸 𑀲𑀁𑀲𑀸𑀭𑀕𑀸𑀫𑀺𑀦𑀻, 𑀓𑀼𑀲𑀮𑀸 𑀅𑀧𑀘𑀬𑀕𑀸𑀫𑀺𑀦𑀻 𑀧𑀳𑀸𑀦𑀢𑀡𑁆𑀳𑀸. 𑀫𑀸𑀦𑁄𑀧𑀺 𑀤𑀼𑀯𑀺𑀥𑁄 𑀓𑀼𑀲𑀮𑁄𑀧𑀺 𑀅𑀓𑀼𑀲𑀮𑁄𑀧𑀺. 𑀬𑀁 𑀫𑀸𑀦𑀁 𑀦𑀺𑀲𑁆𑀲𑀸𑀬 𑀫𑀸𑀦𑀁 𑀧𑀚𑀳𑀢𑀺, 𑀅𑀬𑀁 𑀫𑀸𑀦𑁄 𑀓𑀼𑀲𑀮𑁄. 𑀬𑁄 𑀧𑀦 𑀫𑀸𑀦𑁄 𑀤𑀼𑀓𑁆𑀔𑀁 𑀦𑀺𑀩𑁆𑀩𑀢𑁆𑀢𑀬𑀢𑀺, 𑀅𑀬𑀁 𑀫𑀸𑀦𑁄 𑀅𑀓𑀼𑀲𑀮𑁄. 𑀢𑀢𑁆𑀣 𑀬𑀁 𑀦𑁂𑀓𑁆𑀔𑀫𑁆𑀫𑀲𑀺𑀢𑀁 𑀤𑁄𑀫𑀦𑀲𑁆𑀲𑀁 𑀓𑀼𑀤𑀸𑀲𑁆𑀲𑀼𑀦𑀸𑀫𑀸𑀳𑀁 𑀢𑀁 𑀆𑀬𑀢𑀦𑀁 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀲𑁆𑀲𑀁 𑀬𑀁 𑀅𑀭𑀺𑀬𑀸 𑀲𑀦𑁆𑀢𑀁 𑀆𑀬𑀢𑀦𑀁 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀦𑁆𑀢𑀻𑀢𑀺 𑀢𑀲𑁆𑀲 𑀉𑀧𑁆𑀧𑀚𑁆𑀚𑀢𑀺 𑀧𑀺𑀳𑀸, 𑀧𑀺𑀳𑀸𑀧𑀘𑁆𑀘𑀬𑀸 𑀤𑁄𑀫𑀦𑀲𑁆𑀲𑀁, 𑀅𑀬𑀁 𑀢𑀡𑁆𑀳𑀸 𑀓𑀼𑀲𑀮𑀸 𑀭𑀸𑀕𑀯𑀺𑀭𑀸𑀕𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺, 𑀢𑀤𑀸𑀭𑀫𑁆𑀫𑀡𑀸 𑀓𑀼𑀲𑀮𑀸 𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀸 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺.

𑀢𑀲𑁆𑀲𑀸 𑀓𑁄 𑀧𑀯𑀺𑀘𑀬𑁄? 𑀅𑀝𑁆𑀞 𑀫𑀕𑁆𑀕𑀗𑁆𑀕𑀸𑀦𑀺 𑀲𑀫𑁆𑀫𑀸𑀤𑀺𑀝𑁆𑀞𑀺 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀲𑀫𑁆𑀫𑀸𑀯𑀸𑀘𑀸 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀲𑀫𑁆𑀫𑀸𑀆𑀚𑀻𑀯𑁄 𑀲𑀫𑁆𑀫𑀸𑀯𑀸𑀬𑀸𑀫𑁄 𑀲𑀫𑁆𑀫𑀸𑀲𑀢𑀺 𑀲𑀫𑁆𑀫𑀸𑀲𑀫𑀸𑀥𑀺. 𑀲𑁄 𑀓𑀢𑁆𑀣 𑀤𑀝𑁆𑀞𑀩𑁆𑀩𑁄? 𑀘𑀢𑀼𑀢𑁆𑀣𑁂 𑀛𑀸𑀦𑁂 𑀧𑀸𑀭𑀫𑀺𑀢𑀸𑀬. 𑀘𑀢𑀼𑀢𑁆𑀣𑁂 𑀳𑀺 𑀛𑀸𑀦𑁂 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀘𑀺𑀢𑁆𑀢𑀁 𑀪𑀸𑀯𑀬𑀢𑀺 𑀧𑀭𑀺𑀲𑀼𑀤𑁆𑀥𑀁 𑀧𑀭𑀺𑀬𑁄𑀤𑀸𑀢𑀁 𑀅𑀦𑀗𑁆𑀕𑀡𑀁 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑀁 𑀫𑀼𑀤𑀼 𑀓𑀫𑁆𑀫𑀦𑀺𑀬𑀁 𑀞𑀺𑀢𑀁 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑀁. 𑀲𑁄 𑀢𑀢𑁆𑀣 𑀅𑀝𑁆𑀞𑀯𑀺𑀥𑀁 𑀅𑀥𑀺𑀕𑀘𑁆𑀙𑀢𑀺 𑀙 𑀅𑀪𑀺𑀜𑁆𑀜𑀸 𑀤𑁆𑀯𑁂 𑀘 𑀯𑀺𑀲𑁂𑀲𑁂, 𑀢𑀁 𑀘𑀺𑀢𑁆𑀢𑀁 𑀬𑀢𑁄 𑀧𑀭𑀺𑀲𑀼𑀤𑁆𑀥𑀁, 𑀢𑀢𑁄 𑀧𑀭𑀺𑀬𑁄𑀤𑀸𑀢𑀁, 𑀬𑀢𑁄 𑀧𑀭𑀺𑀬𑁄𑀤𑀸𑀢𑀁, 𑀢𑀢𑁄 𑀅𑀦𑀗𑁆𑀕𑀡𑀁, 𑀬𑀢𑁄 𑀅𑀦𑀗𑁆𑀕𑀡𑀁, 𑀢𑀢𑁄 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑀁, 𑀬𑀢𑁄 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑀁, 𑀢𑀢𑁄 𑀫𑀼𑀤𑀼, 𑀬𑀢𑁄 𑀫𑀼𑀤𑀼, 𑀢𑀢𑁄 𑀓𑀫𑁆𑀫𑀦𑀺𑀬𑀁, 𑀬𑀢𑁄 𑀓𑀫𑁆𑀫𑀦𑀺𑀬𑀁, 𑀢𑀢𑁄 𑀞𑀺𑀢𑀁, 𑀬𑀢𑁄 𑀞𑀺𑀢𑀁, 𑀢𑀢𑁄 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑀁. 𑀢𑀢𑁆𑀣 𑀅𑀗𑁆𑀕𑀡𑀸 𑀘 𑀉𑀧𑀓𑁆𑀓𑀺𑀮𑁂𑀲𑀸 𑀘 𑀢𑀤𑀼𑀪𑀬𑀁 𑀢𑀡𑁆𑀳𑀸𑀧𑀓𑁆𑀔𑁄. 𑀬𑀸 𑀘 𑀇𑀜𑁆𑀚𑀦𑀸 𑀬𑀸 𑀘 𑀘𑀺𑀢𑁆𑀢𑀲𑁆𑀲 𑀅𑀝𑁆𑀞𑀺𑀢𑀺, 𑀅𑀬𑀁 𑀤𑀺𑀝𑁆𑀞𑀺𑀧𑀓𑁆𑀔𑁄.

𑀘𑀢𑁆𑀢𑀸𑀭𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀲𑀼𑀔𑀺𑀦𑁆𑀤𑁆𑀭𑀺𑀬𑀁 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀜𑁆𑀘 𑀘𑀢𑀼𑀢𑁆𑀣𑀚𑁆𑀛𑀸𑀦𑁂 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀢𑀲𑁆𑀲 𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀅𑀯𑀲𑀺𑀝𑁆𑀞𑀁 𑀪𑀯𑀢𑀺. 𑀲𑁄 𑀉𑀧𑀭𑀺𑀫𑀁 𑀲𑀫𑀸𑀧𑀢𑁆𑀢𑀺𑀁 𑀲𑀦𑁆𑀢𑀢𑁄 𑀫𑀦𑀲𑀺𑀓𑀭𑁄𑀢𑀺, 𑀢𑀲𑁆𑀲 𑀉𑀧𑀭𑀺𑀫𑀁 𑀲𑀫𑀸𑀧𑀢𑁆𑀢𑀺𑀁 𑀲𑀦𑁆𑀢𑀢𑁄 𑀫𑀦𑀲𑀺𑀓𑀭𑁄𑀢𑁄 𑀘𑀢𑀼𑀢𑁆𑀣𑀚𑁆𑀛𑀸𑀦𑁂 𑀑𑀴𑀸𑀭𑀺𑀓𑀸 𑀲𑀜𑁆𑀜𑀸 𑀲𑀡𑁆𑀞𑀳𑀢𑀺 𑀉𑀓𑁆𑀓𑀡𑁆𑀞𑀸 𑀘 𑀧𑀝𑀺𑀖𑀲𑀜𑁆𑀜𑀸, 𑀲𑁄 𑀲𑀩𑁆𑀩𑀲𑁄 𑀭𑀽𑀧𑀲𑀜𑁆𑀜𑀸𑀦𑀁 𑀲𑀫𑀢𑀺𑀓𑁆𑀓𑀫𑀸 𑀧𑀝𑀺𑀖𑀲𑀜𑁆𑀜𑀸𑀦𑀁 𑀅𑀢𑁆𑀣𑀗𑁆𑀕𑀫𑀸 𑀦𑀸𑀦𑀢𑁆𑀢𑀲𑀜𑁆𑀜𑀸𑀦𑀁 𑀅𑀫𑀦𑀲𑀺𑀓𑀸𑀭𑀸 ‘‘𑀅𑀦𑀦𑁆𑀢𑀁 𑀆𑀓𑀸𑀲’’𑀦𑁆𑀢𑀺 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀁 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀅𑀪𑀺𑀜𑁆𑀜𑀸𑀪𑀺𑀦𑀻𑀳𑀸𑀭𑁄 𑀭𑀽𑀧𑀲𑀜𑁆𑀜𑀸 𑀯𑁄𑀓𑀸𑀭𑁄 𑀦𑀸𑀦𑀢𑁆𑀢𑀲𑀜𑁆𑀜𑀸 𑀲𑀫𑀢𑀺𑀓𑁆𑀓𑀫𑀢𑀺 𑀧𑀝𑀺𑀖𑀲𑀜𑁆𑀜𑀸 𑀘𑀲𑁆𑀲 𑀅𑀩𑁆𑀪𑀢𑁆𑀣𑀁 𑀕𑀘𑁆𑀙𑀢𑀺, 𑀏𑀯𑀁 𑀲𑀫𑀸𑀥𑀺 𑀢𑀲𑁆𑀲 𑀲𑀫𑀸𑀳𑀺𑀢𑀲𑁆𑀲 𑀑𑀪𑀸𑀲𑁄 𑀅𑀦𑁆𑀢𑀭𑀥𑀸𑀬𑀢𑀺 𑀤𑀲𑁆𑀲𑀦𑀜𑁆𑀘 𑀭𑀽𑀧𑀸𑀦𑀁, 𑀲𑁄 𑀲𑀫𑀸𑀥𑀺 𑀙𑀴𑀗𑁆𑀕𑀲𑀫𑀦𑁆𑀦𑀸𑀕𑀢𑁄 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑁄. 𑀅𑀦𑀪𑀺𑀚𑁆𑀛𑀸𑀲𑀳𑀕𑀢𑀁 𑀫𑁂 𑀫𑀸𑀦𑀲𑀁 𑀲𑀩𑁆𑀩𑀮𑁄𑀓𑁂, 𑀅𑀩𑁆𑀬𑀸𑀧𑀦𑁆𑀦𑀁 𑀫𑁂 𑀘𑀺𑀢𑁆𑀢𑀁 𑀲𑀩𑁆𑀩𑀲𑀢𑁆𑀢𑁂𑀲𑀼, 𑀆𑀭𑀤𑁆𑀥𑀁 𑀫𑁂 𑀯𑀻𑀭𑀺𑀬𑀁 𑀧𑀕𑁆𑀕𑀳𑀺𑀢𑀁, 𑀧𑀲𑁆𑀲𑀤𑁆𑀥𑁄 𑀫𑁂 𑀓𑀸𑀬𑁄 𑀅𑀲𑀸𑀭𑀤𑁆𑀥𑁄, 𑀲𑀫𑀸𑀳𑀺𑀢𑀁 𑀫𑁂 𑀘𑀺𑀢𑁆𑀢𑀁 𑀅𑀯𑀺𑀓𑁆𑀔𑀺𑀢𑁆𑀢𑀁, 𑀉𑀧𑀝𑁆𑀞𑀺𑀢𑀸 𑀫𑁂 𑀲𑀢𑀺 𑀅𑀲𑀫𑁆𑀫𑀼𑀝𑁆𑀞𑀸 [𑀅𑀧𑁆𑀧𑀫𑁆𑀫𑀼𑀝𑁆𑀞𑀸 (𑀲𑀻.)], 𑀢𑀢𑁆𑀣 𑀬𑀜𑁆𑀘 𑀅𑀦𑀪𑀺𑀚𑁆𑀛𑀸𑀲𑀳𑀕𑀢𑀁 𑀫𑀸𑀦𑀲𑀁 𑀲𑀩𑁆𑀩𑀮𑁄𑀓𑁂 𑀬𑀜𑁆𑀘 𑀅𑀩𑁆𑀬𑀸𑀧𑀦𑁆𑀦𑀁 𑀘𑀺𑀢𑁆𑀢𑀁 𑀲𑀩𑁆𑀩𑀲𑀢𑁆𑀢𑁂𑀲𑀼 𑀬𑀜𑁆𑀘 𑀆𑀭𑀤𑁆𑀥𑀁 𑀯𑀻𑀭𑀺𑀬𑀁 𑀧𑀕𑁆𑀕𑀳𑀺𑀢𑀁 𑀬𑀜𑁆𑀘 𑀲𑀫𑀸𑀳𑀺𑀢𑀁 𑀘𑀺𑀢𑁆𑀢𑀁 𑀅𑀯𑀺𑀓𑁆𑀔𑀺𑀢𑁆𑀢𑀁, 𑀅𑀬𑀁 𑀲𑀫𑀣𑁄. 𑀬𑁄 𑀧𑀲𑁆𑀲𑀤𑁆𑀥𑁄 𑀓𑀸𑀬𑁄 𑀅𑀲𑀸𑀭𑀤𑁆𑀥𑁄, 𑀅𑀬𑀁 𑀲𑀫𑀸𑀥𑀺𑀧𑀭𑀺𑀓𑁆𑀔𑀸𑀭𑁄. 𑀬𑀸 𑀉𑀧𑀝𑁆𑀞𑀺𑀢𑀸 𑀲𑀢𑀺 𑀅𑀲𑀫𑁆𑀫𑀼𑀝𑁆𑀞𑀸 𑀅𑀬𑀁 𑀯𑀺𑀧𑀲𑁆𑀲𑀦𑀸.

𑁫𑁪. 𑀲𑁄 𑀲𑀫𑀸𑀥𑀺 𑀧𑀜𑁆𑀘𑀯𑀺𑀥𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀁 𑀲𑀫𑀸𑀥𑀺 ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀼𑀔𑁄’’𑀢𑀺 𑀇𑀢𑀺𑀲𑁆𑀲 𑀧𑀘𑁆𑀘𑀢𑁆𑀢𑀫𑁂𑀯 𑀜𑀸𑀡𑀤𑀲𑁆𑀲𑀦𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀪𑀯𑀢𑀺, 𑀅𑀬𑀁 𑀲𑀫𑀸𑀥𑀺 ‘‘𑀆𑀬𑀢𑀺𑀁 𑀲𑀼𑀔𑀯𑀺𑀧𑀸𑀓𑁄’’𑀢𑀺 𑀇𑀢𑀺𑀲𑁆𑀲 𑀧𑀘𑁆𑀘𑀢𑁆𑀢𑀫𑁂𑀯 𑀜𑀸𑀡𑀤𑀲𑁆𑀲𑀦𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀪𑀯𑀢𑀺, 𑀅𑀬𑀁 𑀲𑀫𑀸𑀥𑀺 ‘‘𑀅𑀭𑀺𑀬𑁄 𑀦𑀺𑀭𑀸𑀫𑀺𑀲𑁄’’𑀢𑀺 𑀇𑀢𑀺𑀲𑁆𑀲 𑀧𑀘𑁆𑀘𑀢𑁆𑀢𑀫𑁂𑀯 𑀜𑀸𑀡𑀤𑀲𑁆𑀲𑀦𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀪𑀯𑀢𑀺, 𑀅𑀬𑀁 𑀲𑀫𑀸𑀥𑀺 ‘‘𑀅𑀓𑀸𑀧𑀼𑀭𑀺𑀲𑀲𑁂𑀯𑀺𑀢𑁄’’𑀢𑀺 𑀇𑀢𑀺𑀲𑁆𑀲 𑀧𑀘𑁆𑀘𑀢𑁆𑀢𑀫𑁂𑀯 𑀜𑀸𑀡𑀤𑀲𑁆𑀲𑀦𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀪𑀯𑀢𑀺, 𑀅𑀬𑀁 𑀲𑀫𑀸𑀥𑀺 ‘‘𑀲𑀦𑁆𑀢𑁄 𑀘𑁂𑀯 𑀧𑀡𑀻𑀢𑁄 𑀘 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀮𑀤𑁆𑀥𑁄 𑀘 𑀏𑀓𑁄𑀤𑀺𑀪𑀸𑀯𑀸𑀥𑀺𑀕𑀢𑁄 𑀘 𑀦 𑀲𑀲𑀗𑁆𑀔𑀸𑀭𑀦𑀺𑀕𑁆𑀕𑀬𑁆𑀳𑀯𑀸𑀭𑀺𑀢𑀕𑀢𑁄 [𑀲𑀲𑀗𑁆𑀔𑀸𑀭𑀦𑀺𑀕𑁆𑀕𑀬𑁆𑀳𑀯𑀸𑀭𑀺𑀢𑀯𑀢𑁄 (𑀲𑀻.), 𑀲𑀲𑀗𑁆𑀔𑀸𑀭𑀦𑀺𑀕𑁆𑀕𑀬𑁆𑀳𑀯𑀸𑀭𑀺𑀯𑀸𑀯𑀝𑁄 (𑀓.)] 𑀘𑀸’’𑀢𑀺 𑀇𑀢𑀺𑀲𑁆𑀲 𑀧𑀘𑁆𑀘𑀢𑁆𑀢𑀫𑁂𑀯 𑀜𑀸𑀡𑀤𑀲𑁆𑀲𑀦𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀪𑀯𑀢𑀺. 𑀢𑀁 𑀔𑁄 𑀧𑀦𑀺𑀫𑀁 𑀲𑀫𑀸𑀥𑀺𑀁 ‘‘𑀲𑀢𑁄 𑀲𑀫𑀸𑀧𑀚𑁆𑀚𑀸𑀫𑀺 𑀲𑀢𑁄 𑀯𑀼𑀝𑁆𑀞𑀳𑀸𑀫𑀻’’𑀢𑀺 𑀇𑀢𑀺𑀲𑁆𑀲 𑀧𑀘𑁆𑀘𑀢𑁆𑀢𑀫𑁂𑀯 𑀜𑀸𑀡𑀤𑀲𑁆𑀲𑀦𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀪𑀯𑀢𑀺. 𑀢𑀢𑁆𑀣 𑀬𑁄 𑀘 𑀲𑀫𑀸𑀥𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀼𑀔𑁄 𑀬𑁄 𑀘 𑀲𑀫𑀸𑀥𑀺 𑀆𑀬𑀢𑀺𑀁 𑀲𑀼𑀔𑀯𑀺𑀧𑀸𑀓𑁄 𑀅𑀬𑀁 𑀲𑀫𑀣𑁄. 𑀬𑁄 𑀘 𑀲𑀫𑀸𑀥𑀺 𑀅𑀭𑀺𑀬𑁄 𑀦𑀺𑀭𑀸𑀫𑀺𑀲𑁄, 𑀬𑁄 𑀘 𑀲𑀫𑀸𑀥𑀺 𑀅𑀓𑀸𑀧𑀼𑀭𑀺𑀲𑀲𑁂𑀯𑀺𑀢𑁄, 𑀬𑁄 𑀘 𑀲𑀫𑀸𑀥𑀺 𑀲𑀦𑁆𑀢𑁄 𑀘𑁂𑀯 𑀧𑀡𑀻𑀢𑁄 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀮𑀤𑁆𑀥𑁄 𑀘 𑀏𑀓𑁄𑀤𑀺𑀪𑀸𑀯𑀸𑀥𑀺𑀕𑀢𑁄 𑀘 𑀦 𑀲𑀲𑀗𑁆𑀔𑀸𑀭𑀦𑀺𑀕𑁆𑀕𑀬𑁆𑀳𑀯𑀸𑀭𑀺𑀢𑀕𑀢𑁄 𑀘 𑀬𑀜𑁆𑀘𑀸𑀳𑀁 𑀢𑀁 𑀔𑁄 𑀧𑀦𑀺𑀫𑀁 𑀲𑀫𑀸𑀥𑀺𑀁 𑀲𑀢𑁄 𑀲𑀫𑀸𑀧𑀚𑁆𑀚𑀸𑀫𑀺 𑀲𑀢𑁄 𑀯𑀼𑀝𑁆𑀞𑀳𑀸𑀫𑀻𑀢𑀺, 𑀅𑀬𑀁 𑀯𑀺𑀧𑀲𑁆𑀲𑀦𑀸.

𑀲𑁄 𑀲𑀫𑀸𑀥𑀺 𑀧𑀜𑁆𑀘𑀯𑀺𑀥𑁂𑀦 𑀯𑁂𑀤𑀺𑀢𑀩𑁆𑀩𑁄 𑀧𑀻𑀢𑀺𑀨𑀭𑀡𑀢𑀸 𑀲𑀼𑀔𑀨𑀭𑀡𑀢𑀸 𑀘𑁂𑀢𑁄𑀨𑀭𑀡𑀢𑀸 𑀆𑀮𑁄𑀓𑀨𑀭𑀡𑀢𑀸 𑀧𑀘𑁆𑀘𑀯𑁂𑀓𑁆𑀔𑀡𑀸𑀦𑀺𑀫𑀺𑀢𑁆𑀢𑀁. 𑀢𑀢𑁆𑀣 𑀬𑁄 𑀘 𑀧𑀻𑀢𑀺𑀨𑀭𑀡𑁄 𑀬𑁄 𑀘 𑀲𑀼𑀔𑀨𑀭𑀡𑁄 𑀬𑁄 𑀘 𑀘𑁂𑀢𑁄𑀨𑀭𑀡𑁄, 𑀅𑀬𑀁 𑀲𑀫𑀣𑁄. 𑀬𑁄 𑀘 𑀆𑀮𑁄𑀓𑀨𑀭𑀡𑁄 𑀬𑀜𑁆𑀘 𑀧𑀘𑁆𑀘𑀯𑁂𑀓𑁆𑀔𑀡𑀸𑀦𑀺𑀫𑀺𑀢𑁆𑀢𑀁. 𑀅𑀬𑀁 𑀯𑀺𑀧𑀲𑁆𑀲𑀦𑀸.

𑁫𑁫. 𑀤𑀲 𑀓𑀲𑀺𑀡𑀸𑀬𑀢𑀦𑀸𑀦𑀺 𑀧𑀣𑀯𑀻𑀓𑀲𑀺𑀡𑀁 𑀆𑀧𑁄𑀓𑀲𑀺𑀡𑀁 𑀢𑁂𑀚𑁄𑀓𑀲𑀺𑀡𑀁 𑀯𑀸𑀬𑁄𑀓𑀲𑀺𑀡𑀁 𑀦𑀻𑀮𑀓𑀲𑀺𑀡𑀁 𑀧𑀻𑀢𑀓𑀲𑀺𑀡𑀁 𑀮𑁄𑀳𑀺𑀢𑀓𑀲𑀺𑀡𑀁 𑀑𑀤𑀸𑀢𑀓𑀲𑀺𑀡𑀁 𑀆𑀓𑀸𑀲𑀓𑀲𑀺𑀡𑀁 𑀯𑀺𑀜𑁆𑀜𑀸𑀡𑀓𑀲𑀺𑀡𑀁. 𑀢𑀢𑁆𑀣 𑀬𑀜𑁆𑀘 𑀧𑀣𑀯𑀻𑀓𑀲𑀺𑀡𑀁 𑀬𑀜𑁆𑀘 𑀆𑀧𑁄𑀓𑀲𑀺𑀡𑀁 𑀏𑀯𑀁 𑀲𑀩𑁆𑀩𑀁, 𑀬𑀜𑁆𑀘 𑀑𑀤𑀸𑀢𑀓𑀲𑀺𑀡𑀁. 𑀇𑀫𑀸𑀦𑀺 𑀅𑀝𑁆𑀞 𑀓𑀲𑀺𑀡𑀸𑀦𑀺 𑀲𑀫𑀣𑁄. 𑀬𑀜𑁆𑀘 𑀆𑀓𑀸𑀲𑀓𑀲𑀺𑀡𑀁 𑀬𑀜𑁆𑀘 𑀯𑀺𑀜𑁆𑀜𑀸𑀡𑀓𑀲𑀺𑀡𑀁, 𑀅𑀬𑀁 𑀯𑀺𑀧𑀲𑁆𑀲𑀦𑀸. 𑀏𑀯𑀁 𑀲𑀩𑁆𑀩𑁄 𑀅𑀭𑀺𑀬𑁄 𑀫𑀕𑁆𑀕𑁄 𑀬𑁂𑀦 𑀬𑁂𑀦 𑀆𑀓𑀸𑀭𑁂𑀦 𑀯𑀼𑀢𑁆𑀢𑁄, 𑀢𑁂𑀦 𑀢𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑁂𑀦 𑀬𑁄𑀚𑀬𑀺𑀢𑀩𑁆𑀩𑁄. 𑀢𑁂 𑀢𑀻𑀳𑀺 𑀥𑀫𑁆𑀫𑁂𑀳𑀺 𑀲𑀗𑁆𑀕𑀳𑀺𑀢𑀸 𑀅𑀦𑀺𑀘𑁆𑀘𑀢𑀸𑀬 𑀤𑀼𑀓𑁆𑀔𑀢𑀸𑀬 𑀅𑀦𑀢𑁆𑀢𑀢𑀸𑀬. 𑀲𑁄 𑀲𑀫𑀣𑀯𑀺𑀧𑀲𑁆𑀲𑀦𑀁 𑀪𑀸𑀯𑀬𑀫𑀸𑀦𑁄 𑀢𑀻𑀡𑀺 𑀯𑀺𑀫𑁄𑀓𑁆𑀔𑀫𑀼𑀔𑀸𑀦𑀺 𑀪𑀸𑀯𑀬𑀢𑀺. 𑀢𑀻𑀡𑀺 𑀯𑀺𑀫𑁄𑀓𑁆𑀔𑀫𑀼𑀔𑀸𑀦𑀺 𑀪𑀸𑀯𑀬𑀦𑁆𑀢𑁄 𑀢𑀬𑁄 𑀔𑀦𑁆𑀥𑁂 𑀪𑀸𑀯𑀬𑀢𑀺. 𑀢𑀬𑁄 𑀔𑀦𑁆𑀥𑁂 𑀪𑀸𑀯𑀬𑀦𑁆𑀢𑁄 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀪𑀸𑀯𑀬𑀢𑀺.

𑀭𑀸𑀕𑀘𑀭𑀺𑀢𑁄 𑀧𑀼𑀕𑁆𑀕𑀮𑁄 𑀅𑀦𑀺𑀫𑀺𑀢𑁆𑀢𑁂𑀦 𑀯𑀺𑀫𑁄𑀓𑁆𑀔𑀫𑀼𑀔𑁂𑀦 𑀦𑀺𑀬𑁆𑀬𑀸𑀢𑀺 [𑀦𑀻𑀬𑀸𑀢𑀺 (𑀲𑀻.)] 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸𑀬 𑀲𑀺𑀓𑁆𑀔𑀦𑁆𑀢𑁄 𑀮𑁄𑀪𑀁 𑀅𑀓𑀼𑀲𑀮𑀫𑀽𑀮𑀁 𑀧𑀚𑀳𑀦𑁆𑀢𑁄 𑀲𑀼𑀔𑀯𑁂𑀤𑀦𑀻𑀬𑀁 𑀨𑀲𑁆𑀲𑀁 𑀅𑀦𑀼𑀧𑀕𑀘𑁆𑀙𑀦𑁆𑀢𑁄 𑀲𑀼𑀔𑀁 𑀯𑁂𑀤𑀦𑀁 𑀧𑀭𑀺𑀚𑀸𑀦𑀦𑁆𑀢𑁄 𑀭𑀸𑀕𑀫𑀮𑀁 𑀧𑀯𑀸𑀳𑁂𑀦𑁆𑀢𑁄 𑀭𑀸𑀕𑀭𑀚𑀁 𑀦𑀺𑀤𑁆𑀥𑀼𑀦𑀦𑁆𑀢𑁄 𑀭𑀸𑀕𑀯𑀺𑀲𑀁 𑀯𑀫𑁂𑀦𑁆𑀢𑁄 𑀭𑀸𑀕𑀕𑁆𑀕𑀺𑀁 𑀦𑀺𑀩𑁆𑀩𑀸𑀧𑁂𑀦𑁆𑀢𑁄 𑀭𑀸𑀕𑀲𑀮𑁆𑀮𑀁 𑀉𑀧𑁆𑀧𑀸𑀝𑁂𑀦𑁆𑀢𑁄 𑀭𑀸𑀕𑀚𑀝𑀁 𑀯𑀺𑀚𑀝𑁂𑀦𑁆𑀢𑁄. 𑀤𑁄𑀲𑀘𑀭𑀺𑀢𑁄 𑀧𑀼𑀕𑁆𑀕𑀮𑁄 𑀅𑀧𑁆𑀧𑀡𑀺𑀳𑀺𑀢𑁂𑀦 𑀯𑀺𑀫𑁄𑀓𑁆𑀔𑀫𑀼𑀔𑁂𑀦 𑀦𑀺𑀬𑁆𑀬𑀸𑀢𑀺 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀬 𑀲𑀺𑀓𑁆𑀔𑀦𑁆𑀢𑁄 𑀤𑁄𑀲𑀁 𑀅𑀓𑀼𑀲𑀮𑀫𑀽𑀮𑀁 𑀧𑀚𑀳𑀦𑁆𑀢𑁄 𑀤𑀼𑀓𑁆𑀔𑀯𑁂𑀤𑀦𑀻𑀬𑀁 𑀨𑀲𑁆𑀲𑀁 𑀅𑀦𑀼𑀧𑀕𑀘𑁆𑀙𑀦𑁆𑀢𑁄 𑀤𑀼𑀓𑁆𑀔𑀯𑁂𑀤𑀦𑀁 𑀧𑀭𑀺𑀚𑀸𑀦𑀦𑁆𑀢𑁄 𑀤𑁄𑀲𑀫𑀮𑀁 𑀧𑀯𑀸𑀳𑁂𑀦𑁆𑀢𑁄 𑀤𑁄𑀲𑀭𑀚𑀁 𑀦𑀺𑀤𑁆𑀥𑀼𑀦𑀦𑁆𑀢𑁄 𑀤𑁄𑀲𑀯𑀺𑀲𑀁 𑀯𑀫𑁂𑀦𑁆𑀢𑁄 𑀤𑁄𑀲𑀕𑁆𑀕𑀺𑀁 𑀦𑀺𑀩𑁆𑀩𑀸𑀧𑁂𑀦𑁆𑀢𑁄 𑀤𑁄𑀲𑀲𑀮𑁆𑀮𑀁 𑀉𑀧𑁆𑀧𑀸𑀝𑁂𑀦𑁆𑀢𑁄 𑀤𑁄𑀲𑀚𑀝𑀁 𑀯𑀺𑀚𑀝𑁂𑀦𑁆𑀢𑁄. 𑀫𑁄𑀳𑀘𑀭𑀺𑀢𑁄 𑀧𑀼𑀕𑁆𑀕𑀮𑁄 𑀲𑀼𑀜𑁆𑀜𑀢𑀯𑀺𑀫𑁄𑀓𑁆𑀔𑀫𑀼𑀔𑁂𑀦 𑀦𑀺𑀬𑁆𑀬𑀸𑀢𑀺 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸𑀬 𑀲𑀺𑀓𑁆𑀔𑀦𑁆𑀢𑁄 𑀫𑁄𑀳𑀁 𑀅𑀓𑀼𑀲𑀮𑀫𑀽𑀮𑀁 𑀧𑀚𑀳𑀦𑁆𑀢𑁄 𑀅𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀻𑀬𑀁 𑀨𑀲𑁆𑀲𑀁 𑀅𑀦𑀼𑀧𑀕𑀘𑁆𑀙𑀦𑁆𑀢𑁄 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑁂𑀤𑀦𑀁 𑀧𑀭𑀺𑀚𑀸𑀦𑀦𑁆𑀢𑁄 𑀫𑁄𑀳𑀫𑀮𑀁 𑀧𑀯𑀸𑀳𑁂𑀦𑁆𑀢𑁄 𑀫𑁄𑀳𑀭𑀚𑀁 𑀦𑀺𑀤𑁆𑀥𑀼𑀦𑀦𑁆𑀢𑁄 𑀫𑁄𑀳𑀯𑀺𑀲𑀁 𑀯𑀫𑁂𑀦𑁆𑀢𑁄 𑀫𑁄𑀳𑀕𑁆𑀕𑀺𑀁 𑀦𑀺𑀩𑁆𑀩𑀸𑀧𑁂𑀦𑁆𑀢𑁄 𑀫𑁄𑀳𑀲𑀮𑁆𑀮𑀁 𑀉𑀧𑁆𑀧𑀸𑀝𑁂𑀦𑁆𑀢𑁄 𑀫𑁄𑀳𑀚𑀝𑀁 𑀯𑀺𑀚𑀝𑁂𑀦𑁆𑀢𑁄.

𑀢𑀢𑁆𑀣 𑀲𑀼𑀜𑁆𑀜𑀢𑀯𑀺𑀫𑁄𑀓𑁆𑀔𑀫𑀼𑀔𑀁 𑀧𑀜𑁆𑀜𑀸𑀓𑁆𑀔𑀦𑁆𑀥𑁄, 𑀅𑀦𑀺𑀫𑀺𑀢𑁆𑀢𑀯𑀺𑀫𑁄𑀓𑁆𑀔𑀫𑀼𑀔𑀁 𑀲𑀫𑀸𑀥𑀺𑀓𑁆𑀔𑀦𑁆𑀥𑁄, 𑀅𑀧𑁆𑀧𑀡𑀺𑀳𑀺𑀢𑀯𑀺𑀫𑁄𑀓𑁆𑀔𑀫𑀼𑀔𑀁 𑀲𑀻𑀮𑀓𑁆𑀔𑀦𑁆𑀥𑁄. 𑀲𑁄 𑀢𑀻𑀡𑀺 𑀯𑀺𑀫𑁄𑀓𑁆𑀔𑀫𑀼𑀔𑀸𑀦𑀺 𑀪𑀸𑀯𑀬𑀦𑁆𑀢𑁄 𑀢𑀬𑁄 𑀔𑀦𑁆𑀥𑁂 𑀪𑀸𑀯𑀬𑀢𑀺, 𑀢𑀬𑁄 𑀔𑀦𑁆𑀥𑁂 𑀪𑀸𑀯𑀬𑀦𑁆𑀢𑁄 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀪𑀸𑀯𑀬𑀢𑀺. 𑀢𑀢𑁆𑀣 𑀬𑀸 𑀘 𑀲𑀫𑁆𑀫𑀸𑀯𑀸𑀘𑀸 𑀬𑁄 𑀘 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀬𑁄 𑀘 𑀲𑀫𑁆𑀫𑀸𑀆𑀚𑀻𑀯𑁄, 𑀅𑀬𑀁 𑀲𑀻𑀮𑀓𑁆𑀔𑀦𑁆𑀥𑁄, 𑀬𑁄 𑀘 𑀲𑀫𑁆𑀫𑀸𑀯𑀸𑀬𑀸𑀫𑁄 𑀬𑀸 𑀘 𑀲𑀫𑁆𑀫𑀸𑀲𑀢𑀺 𑀬𑁄 𑀘 𑀲𑀫𑁆𑀫𑀸𑀲𑀫𑀸𑀥𑀺, 𑀅𑀬𑀁 𑀲𑀫𑀸𑀥𑀺𑀓𑁆𑀔𑀦𑁆𑀥𑁄, 𑀬𑀸 𑀘 𑀲𑀫𑁆𑀫𑀸𑀤𑀺𑀝𑁆𑀞𑀺 𑀬𑁄 𑀘 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄, 𑀅𑀬𑀁 𑀧𑀜𑁆𑀜𑀸𑀓𑁆𑀔𑀦𑁆𑀥𑁄.

𑀢𑀢𑁆𑀣 𑀲𑀻𑀮𑀓𑁆𑀔𑀦𑁆𑀥𑁄 𑀘 𑀲𑀫𑀸𑀥𑀺𑀓𑁆𑀔𑀦𑁆𑀥𑁄 𑀘 𑀲𑀫𑀣𑁄, 𑀧𑀜𑁆𑀜𑀸𑀓𑁆𑀔𑀦𑁆𑀥𑁄 𑀯𑀺𑀧𑀲𑁆𑀲𑀦𑀸. 𑀬𑁄 𑀲𑀫𑀣𑀯𑀺𑀧𑀲𑁆𑀲𑀦𑀁 𑀪𑀸𑀯𑁂𑀢𑀺, 𑀢𑀲𑁆𑀲 𑀤𑁆𑀯𑁂 𑀪𑀯𑀗𑁆𑀕𑀸𑀦𑀺 𑀪𑀸𑀯𑀦𑀁 𑀕𑀘𑁆𑀙𑀦𑁆𑀢𑀺 𑀓𑀸𑀬𑁄 𑀘𑀺𑀢𑁆𑀢𑀜𑁆𑀘, 𑀪𑀯𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀤𑁆𑀯𑁂 𑀧𑀤𑀸𑀦𑀺 𑀲𑀻𑀮𑀁 𑀲𑀫𑀸𑀥𑀺 𑀘. 𑀲𑁄 𑀳𑁄𑀢𑀺 𑀪𑀺𑀓𑁆𑀔𑀼 𑀪𑀸𑀯𑀺𑀢𑀓𑀸𑀬𑁄 𑀪𑀸𑀯𑀺𑀢𑀲𑀻𑀮𑁄 𑀪𑀸𑀯𑀺𑀢𑀘𑀺𑀢𑁆𑀢𑁄 𑀪𑀸𑀯𑀺𑀢𑀧𑀜𑁆𑀜𑁄. 𑀓𑀸𑀬𑁂 𑀪𑀸𑀯𑀺𑀬𑀫𑀸𑀦𑁂 𑀤𑁆𑀯𑁂 𑀥𑀫𑁆𑀫𑀸 𑀪𑀸𑀯𑀦𑀁 𑀕𑀘𑁆𑀙𑀦𑁆𑀢𑀺 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀲𑀫𑁆𑀫𑀸𑀯𑀸𑀬𑀸𑀫𑁄 𑀘, 𑀲𑀻𑀮𑁂 𑀪𑀸𑀯𑀺𑀬𑀫𑀸𑀦𑁂 𑀤𑁆𑀯𑁂 𑀥𑀫𑁆𑀫𑀸 𑀪𑀸𑀯𑀦𑀁 𑀕𑀘𑁆𑀙𑀦𑁆𑀢𑀺 𑀲𑀫𑁆𑀫𑀸𑀯𑀸𑀘𑀸 𑀲𑀫𑁆𑀫𑀸𑀆𑀚𑀻𑀯𑁄 𑀘, 𑀘𑀺𑀢𑁆𑀢𑁂 𑀪𑀸𑀯𑀺𑀬𑀫𑀸𑀦𑁂 𑀤𑁆𑀯𑁂 𑀥𑀫𑁆𑀫𑀸 𑀪𑀸𑀯𑀦𑀁 𑀕𑀘𑁆𑀙𑀦𑁆𑀢𑀺 𑀲𑀫𑁆𑀫𑀸𑀲𑀢𑀺 𑀲𑀫𑁆𑀫𑀸𑀲𑀫𑀸𑀥𑀺 𑀘, 𑀧𑀜𑁆𑀜𑀸𑀬 𑀪𑀸𑀯𑀺𑀬𑀫𑀸𑀦𑀸𑀬 𑀤𑁆𑀯𑁂 𑀥𑀫𑁆𑀫𑀸 𑀪𑀸𑀯𑀦𑀁 𑀕𑀘𑁆𑀙𑀦𑁆𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀘.

𑀢𑀢𑁆𑀣 𑀬𑁄 𑀘 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀬𑁄 𑀘 𑀲𑀫𑁆𑀫𑀸𑀯𑀸𑀬𑀸𑀫𑁄 𑀲𑀺𑀬𑀸 𑀓𑀸𑀬𑀺𑀓𑁄 𑀲𑀺𑀬𑀸 𑀘𑁂𑀢𑀲𑀺𑀓𑁄, 𑀢𑀢𑁆𑀣 𑀬𑁄 𑀓𑀸𑀬𑀲𑀗𑁆𑀕𑀳𑁄, 𑀲𑁄 𑀓𑀸𑀬𑁂 𑀪𑀸𑀯𑀺𑀢𑁂 𑀪𑀸𑀯𑀦𑀁 𑀕𑀘𑁆𑀙𑀢𑀺, 𑀬𑁄 𑀘𑀺𑀢𑁆𑀢𑀲𑀗𑁆𑀕𑀳𑁄, 𑀲𑁄 𑀘𑀺𑀢𑁆𑀢𑁂 𑀪𑀸𑀯𑀺𑀢𑁂 𑀪𑀸𑀯𑀦𑀁 𑀕𑀘𑁆𑀙𑀢𑀺. 𑀲𑁄 𑀲𑀫𑀣𑀯𑀺𑀧𑀲𑁆𑀲𑀦𑀁 𑀪𑀸𑀯𑀬𑀦𑁆𑀢𑁄 𑀧𑀜𑁆𑀘𑀯𑀺𑀥𑀁 𑀅𑀥𑀺𑀕𑀫𑀁 𑀕𑀘𑁆𑀙𑀢𑀺 [𑀅𑀥𑀺𑀕𑀘𑁆𑀙𑀢𑀺 (𑀲𑀻.)] 𑀔𑀺𑀧𑁆𑀧𑀸𑀥𑀺𑀕𑀫𑁄 𑀘 𑀳𑁄𑀢𑀺, 𑀯𑀺𑀫𑀼𑀢𑁆𑀢𑀸𑀥𑀺𑀕𑀫𑁄 𑀘 𑀳𑁄𑀢𑀺, 𑀫𑀳𑀸𑀥𑀺𑀕𑀫𑁄 𑀘 𑀳𑁄𑀢𑀺, 𑀯𑀺𑀧𑀼𑀮𑀸𑀥𑀺𑀕𑀫𑁄 𑀘 𑀳𑁄𑀢𑀺, 𑀅𑀦𑀯𑀲𑁂𑀲𑀸𑀥𑀺𑀕𑀫𑁄 𑀘 𑀳𑁄𑀢𑀺. 𑀢𑀢𑁆𑀣 𑀲𑀫𑀣𑁂𑀦 𑀔𑀺𑀧𑁆𑀧𑀸𑀥𑀺𑀕𑀫𑁄 𑀘 𑀫𑀳𑀸𑀥𑀺𑀕𑀫𑁄 𑀘 𑀯𑀺𑀧𑀼𑀮𑀸𑀥𑀺𑀕𑀫𑁄 𑀘 𑀳𑁄𑀢𑀺, 𑀯𑀺𑀧𑀲𑁆𑀲𑀦𑀸𑀬 𑀯𑀺𑀫𑀼𑀢𑁆𑀢𑀸𑀥𑀺𑀕𑀫𑁄 𑀘 𑀅𑀦𑀯𑀲𑁂𑀲𑀸𑀥𑀺𑀕𑀫𑁄 𑀘 𑀳𑁄𑀢𑀺.

𑁫𑁬. 𑀢𑀢𑁆𑀣 𑀬𑁄 𑀤𑁂𑀲𑀬𑀢𑀺, 𑀲𑁄 𑀤𑀲𑀩𑀮𑀲𑀫𑀦𑁆𑀦𑀸𑀕𑀢𑁄 𑀲𑀢𑁆𑀣𑀸 𑀑𑀯𑀸𑀤𑁂𑀦 𑀲𑀸𑀯𑀓𑁂 𑀦 𑀯𑀺𑀲𑀁𑀯𑀸𑀤𑀬𑀢𑀺. 𑀲𑁄 𑀢𑀺𑀯𑀺𑀥𑀁 𑀇𑀤𑀁 𑀓𑀭𑁄𑀣 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀓𑀭𑁄𑀣 𑀇𑀤𑀁 𑀯𑁄 𑀓𑀼𑀭𑀼𑀫𑀸𑀦𑀸𑀦𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀢𑀺, 𑀲𑁄 𑀢𑀣𑀸 𑀑𑀯𑀤𑀺𑀢𑁄 𑀢𑀣𑀸𑀦𑀼𑀲𑀺𑀝𑁆𑀞𑁄 𑀢𑀣𑀸𑀓𑀭𑁄𑀦𑁆𑀢𑁄 𑀢𑀣𑀸𑀧𑀝𑀺𑀧𑀚𑁆𑀚𑀦𑁆𑀢𑁄 𑀢𑀁 𑀪𑀽𑀫𑀺𑀁 𑀦 𑀧𑀸𑀧𑀼𑀡𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀲𑁄 𑀢𑀣𑀸 𑀑𑀯𑀤𑀺𑀢𑁄 𑀢𑀣𑀸𑀦𑀼𑀲𑀺𑀝𑁆𑀞𑁄 𑀲𑀻𑀮𑀓𑁆𑀔𑀦𑁆𑀥𑀁 𑀅𑀧𑀭𑀺𑀧𑀽𑀭𑀬𑀦𑁆𑀢𑁄 𑀢𑀁 𑀪𑀽𑀫𑀺𑀁 𑀅𑀦𑀼𑀧𑀸𑀧𑀼𑀡𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀲𑁄 𑀢𑀣𑀸 𑀑𑀯𑀤𑀺𑀢𑁄 𑀢𑀣𑀸𑀦𑀼𑀲𑀺𑀝𑁆𑀞𑁄 𑀲𑀻𑀮𑀓𑁆𑀔𑀦𑁆𑀥𑀁 𑀧𑀭𑀺𑀧𑀽𑀭𑀬𑀦𑁆𑀢𑁄 𑀢𑀁 𑀪𑀽𑀫𑀺𑀁 𑀅𑀦𑀼𑀧𑀸𑀧𑀼𑀡𑀺𑀲𑁆𑀲𑀢𑀻𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺.

𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀢𑁂 𑀲𑀢𑁄 𑀇𑀫𑁂 𑀥𑀫𑁆𑀫𑀸 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑀸𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀲𑀩𑁆𑀩𑀸𑀲𑀯𑀧𑀭𑀺𑀓𑁆𑀔𑀻𑀡𑀲𑁆𑀲 𑀢𑁂 𑀲𑀢𑁄 𑀇𑀫𑁂 𑀆𑀲𑀯𑀸 𑀅𑀧𑀭𑀺𑀓𑁆𑀔𑀻𑀡𑀸𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀬𑀲𑁆𑀲 𑀢𑁂 𑀅𑀢𑁆𑀣𑀸𑀬 𑀥𑀫𑁆𑀫𑁄 𑀤𑁂𑀲𑀺𑀢𑁄, 𑀲𑁄 𑀦 𑀦𑀺𑀬𑁆𑀬𑀸𑀢𑀺 𑀢𑀓𑁆𑀓𑀭𑀲𑁆𑀲 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀸𑀬𑀸𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀲𑀸𑀯𑀓𑁄 𑀔𑁄 𑀧𑀦 𑀢𑁂 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑁄 𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀦𑁆𑀦𑁄 𑀅𑀦𑀼𑀥𑀫𑁆𑀫𑀘𑀸𑀭𑀻 𑀲𑁄 𑀧𑀼𑀩𑁆𑀩𑁂𑀦 𑀅𑀧𑀭𑀁 𑀉𑀴𑀸𑀭𑀁 𑀯𑀺𑀲𑁂𑀲𑀸𑀥𑀺𑀕𑀫𑀁 𑀦 𑀲𑀘𑁆𑀙𑀺𑀓𑀭𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺.

𑀬𑁂 𑀔𑁄 𑀧𑀦 𑀥𑀫𑁆𑀫𑀸 𑀅𑀦𑁆𑀢𑀭𑀸𑀬𑀺𑀓𑀸, 𑀢𑁂 𑀧𑀝𑀺𑀲𑁂𑀯𑀢𑁄 𑀦𑀸𑀮𑀁 𑀅𑀦𑁆𑀢𑀭𑀸𑀬𑀸𑀬𑀸𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀬𑁂 𑀔𑁄 𑀧𑀦 𑀥𑀫𑁆𑀫𑀸 𑀅𑀦𑀺𑀬𑁆𑀬𑀸𑀦𑀺𑀓𑀸, 𑀢𑁂 𑀦𑀺𑀬𑁆𑀬𑀦𑁆𑀢𑀺 𑀢𑀓𑁆𑀓𑀭𑀲𑁆𑀲 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀸𑀬𑀸𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀬𑁂 𑀔𑁄 𑀧𑀦 𑀥𑀫𑁆𑀫𑀸 𑀦𑀺𑀬𑁆𑀬𑀸𑀦𑀺𑀓𑀸, 𑀢𑁂 𑀦𑀺𑀬𑁆𑀬𑀦𑁆𑀢𑀺 𑀢𑀓𑁆𑀓𑀭𑀲𑁆𑀲 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀸𑀬𑀸𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺. 𑀲𑀸𑀯𑀓𑁄 𑀔𑁄 𑀧𑀦 𑀢𑁂 𑀲𑀉𑀧𑀸𑀤𑀺𑀲𑁂𑀲𑁄 𑀅𑀦𑀼𑀧𑀸𑀤𑀺𑀲𑁂𑀲𑀁 𑀦𑀺𑀩𑁆𑀩𑀸𑀦𑀥𑀸𑀢𑀼𑀁 𑀅𑀦𑀼𑀧𑀸𑀧𑀼𑀡𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺.

𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑁄 𑀫𑀸𑀢𑀭𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬 𑀳𑀢𑁆𑀣𑁂𑀳𑀺 𑀯𑀸 𑀧𑀸𑀤𑁂𑀳𑀺 𑀯𑀸 𑀲𑀼𑀳𑀢𑀁 𑀓𑀭𑁂𑀬𑁆𑀬𑀸𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺, 𑀧𑀼𑀣𑀼𑀚𑁆𑀚𑀦𑁄 𑀫𑀸𑀢𑀭𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬 𑀳𑀢𑁆𑀣𑁂𑀳𑀺 𑀯𑀸 𑀧𑀸𑀤𑁂𑀳𑀺 𑀯𑀸 𑀲𑀼𑀳𑀢𑀁 𑀓𑀭𑁂𑀬𑁆𑀬𑀸𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺. 𑀏𑀯𑀁 𑀧𑀺𑀢𑀭𑀁, 𑀅𑀭𑀳𑀦𑁆𑀢𑀁, 𑀪𑀺𑀓𑁆𑀔𑀼𑀁. 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑁄 𑀧𑀼𑀕𑁆𑀕𑀮𑁄 𑀲𑀗𑁆𑀖𑀁 𑀪𑀺𑀦𑁆𑀤𑁂𑀬𑁆𑀬 𑀲𑀗𑁆𑀖𑁂 𑀯𑀸 𑀲𑀗𑁆𑀖𑀭𑀸𑀚𑀺𑀁 𑀚𑀦𑁂𑀬𑁆𑀬𑀸𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺, 𑀧𑀼𑀣𑀼𑀚𑁆𑀚𑀦𑁄 𑀲𑀗𑁆𑀖𑀁 𑀪𑀺𑀦𑁆𑀤𑁂𑀬𑁆𑀬 𑀲𑀗𑁆𑀖𑁂 𑀯𑀸 𑀲𑀗𑁆𑀖𑀭𑀸𑀚𑀺𑀁 𑀚𑀦𑁂𑀬𑁆𑀬𑀸𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺, 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑁄 𑀢𑀣𑀸𑀕𑀢𑀲𑁆𑀲 𑀤𑀼𑀝𑁆𑀞𑀘𑀺𑀢𑁆𑀢𑁄 𑀮𑁄𑀳𑀺𑀢𑀁 𑀉𑀧𑁆𑀧𑀸𑀤𑁂𑀬𑁆𑀬, 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲 𑀯𑀸 𑀢𑀣𑀸𑀕𑀢𑀲𑁆𑀲 𑀤𑀼𑀝𑁆𑀞𑀘𑀺𑀢𑁆𑀢𑁄 𑀣𑀽𑀧𑀁 𑀪𑀺𑀦𑁆𑀤𑁂𑀬𑁆𑀬𑀸𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀧𑀼𑀣𑀼𑀚𑁆𑀚𑀦𑁄 𑀢𑀣𑀸𑀕𑀢𑀲𑁆𑀲 𑀤𑀼𑀝𑁆𑀞𑀘𑀺𑀢𑁆𑀢𑁄 𑀮𑁄𑀳𑀺𑀢𑀁 𑀉𑀧𑁆𑀧𑀸𑀤𑁂𑀬𑁆𑀬, 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲 𑀯𑀸 𑀢𑀣𑀸𑀕𑀢𑀲𑁆𑀲 𑀤𑀼𑀝𑁆𑀞𑀘𑀺𑀢𑁆𑀢𑁄 𑀣𑀽𑀧𑀁 𑀪𑀺𑀦𑁆𑀤𑁂𑀬𑁆𑀬𑀸𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺. 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑁄 𑀅𑀜𑁆𑀜𑀁 𑀲𑀢𑁆𑀣𑀸𑀭𑀁 𑀅𑀧𑀤𑀺𑀲𑁂𑀬𑁆𑀬 𑀅𑀧𑀺 𑀚𑀻𑀯𑀺𑀢𑀳𑁂𑀢𑀽𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺, 𑀧𑀼𑀣𑀼𑀚𑁆𑀚𑀦𑁄 𑀅𑀜𑁆𑀜𑀁 𑀲𑀢𑁆𑀣𑀸𑀭𑀁 𑀅𑀧𑀤𑀺𑀲𑁂𑀬𑁆𑀬𑀸𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺. 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑁄 𑀇𑀢𑁄 𑀩𑀳𑀺𑀤𑁆𑀥𑀸 𑀅𑀜𑁆𑀜𑀁 𑀤𑀓𑁆𑀔𑀺𑀡𑁂𑀬𑁆𑀬𑀁 𑀧𑀭𑀺𑀬𑁂𑀲𑁂𑀬𑁆𑀬𑀸𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺, 𑀧𑀼𑀣𑀼𑀚𑁆𑀚𑀦𑁄 𑀇𑀢𑁄 𑀩𑀳𑀺𑀤𑁆𑀥𑀸 𑀅𑀜𑁆𑀜𑀁 𑀤𑀓𑁆𑀔𑀺𑀡𑁂𑀬𑁆𑀬𑀁 𑀧𑀭𑀺𑀬𑁂𑀲𑁂𑀬𑁆𑀬𑀸𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺, 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑁄 𑀓𑀼𑀢𑀽𑀳𑀮𑀫𑀗𑁆𑀕𑀮𑁂𑀦 𑀲𑀼𑀤𑁆𑀥𑀺𑀁 𑀧𑀘𑁆𑀘𑁂𑀬𑁆𑀬𑀸𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀧𑀼𑀣𑀼𑀚𑁆𑀚𑀦𑁄 𑀓𑀼𑀢𑀽𑀳𑀮𑀫𑀗𑁆𑀕𑀮𑁂𑀦 𑀲𑀼𑀤𑁆𑀥𑀺𑀁 𑀧𑀘𑁆𑀘𑁂𑀬𑁆𑀬𑀸𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺.

𑁫𑁭. 𑀇𑀢𑁆𑀣𑀻 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀲𑀺𑀬𑀸𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺, 𑀧𑀼𑀭𑀺𑀲𑁄 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀲𑀺𑀬𑀸𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺; 𑀇𑀢𑁆𑀣𑀻 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀲𑀺𑀬𑀸𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺, 𑀧𑀼𑀭𑀺𑀲𑁄 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀲𑀺𑀬𑀸𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺; 𑀇𑀢𑁆𑀣𑀻 𑀫𑀸𑀭𑁄 𑀧𑀸𑀧𑀺𑀫𑀸 𑀲𑀺𑀬𑀸𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺, 𑀧𑀼𑀭𑀺𑀲𑁄 𑀫𑀸𑀭𑁄 𑀧𑀸𑀧𑀺𑀫𑀸 𑀲𑀺𑀬𑀸𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺; 𑀇𑀢𑁆𑀣𑀻 𑀫𑀳𑀸𑀩𑁆𑀭𑀳𑁆𑀫𑀸 𑀲𑀺𑀬𑀸𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺, 𑀧𑀼𑀭𑀺𑀲𑁄 𑀫𑀳𑀸𑀩𑁆𑀭𑀳𑁆𑀫𑀸 𑀲𑀺𑀬𑀸𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺; 𑀇𑀢𑁆𑀣𑀻 𑀢𑀣𑀸𑀕𑀢𑁄 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀲𑀺𑀬𑀸𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺, 𑀧𑀼𑀭𑀺𑀲𑁄 𑀢𑀣𑀸𑀕𑀢𑁄 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀲𑀺𑀬𑀸𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺.

𑀤𑁆𑀯𑁂 𑀢𑀣𑀸𑀕𑀢𑀸 𑀅𑀭𑀳𑀦𑁆𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀏𑀓𑀺𑀲𑁆𑀲𑀸 𑀮𑁄𑀓𑀥𑀸𑀢𑀼𑀬𑀸 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀯𑀸 𑀥𑀫𑁆𑀫𑀁 𑀯𑀸 𑀤𑁂𑀲𑁂𑀬𑁆𑀬𑀼𑀦𑁆𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺, 𑀏𑀓𑁄𑀯 𑀢𑀣𑀸𑀕𑀢𑁄 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀏𑀓𑀺𑀲𑁆𑀲𑀸 𑀮𑁄𑀓𑀥𑀸𑀢𑀼𑀬𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 𑀯𑀸 𑀥𑀫𑁆𑀫𑀁 𑀯𑀸 𑀤𑁂𑀲𑁂𑀲𑁆𑀲𑀢𑀻𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺.

𑀢𑀺𑀡𑁆𑀡𑀁 𑀤𑀼𑀘𑁆𑀘𑀭𑀺𑀢𑀸𑀦𑀁 𑀇𑀝𑁆𑀞𑁄 𑀓𑀦𑁆𑀢𑁄 𑀧𑀺𑀬𑁄 𑀫𑀦𑀸𑀧𑁄 𑀯𑀺𑀧𑀸𑀓𑁄 𑀪𑀯𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺, 𑀢𑀺𑀡𑁆𑀡𑀁 𑀤𑀼𑀘𑁆𑀘𑀭𑀺𑀢𑀸𑀦𑀁 𑀅𑀦𑀺𑀝𑁆𑀞𑁄 𑀅𑀓𑀦𑁆𑀢𑁄 𑀅𑀧𑁆𑀧𑀺𑀬𑁄 𑀅𑀫𑀦𑀸𑀧𑁄 𑀯𑀺𑀧𑀸𑀓𑁄 𑀪𑀯𑀺𑀲𑁆𑀲𑀢𑀻𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺. 𑀢𑀺𑀡𑁆𑀡𑀁 𑀲𑀼𑀘𑀭𑀺𑀢𑀸𑀦𑀁 𑀅𑀦𑀺𑀝𑁆𑀞𑁄 𑀅𑀓𑀦𑁆𑀢𑁄 𑀅𑀧𑁆𑀧𑀺𑀬𑁄 𑀅𑀫𑀦𑀸𑀧𑁄 𑀯𑀺𑀧𑀸𑀓𑁄 𑀪𑀯𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺, 𑀢𑀺𑀡𑁆𑀡𑀁 𑀲𑀼𑀘𑀭𑀺𑀢𑀸𑀦𑀁 𑀇𑀝𑁆𑀞𑁄 𑀓𑀦𑁆𑀢𑁄 𑀧𑀺𑀬𑁄 𑀫𑀦𑀸𑀧𑁄 𑀯𑀺𑀧𑀸𑀓𑁄 𑀪𑀯𑀺𑀲𑁆𑀲𑀢𑀻𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺.

𑀅𑀜𑁆𑀜𑀢𑀭𑁄 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀓𑀼𑀳𑀓𑁄 𑀮𑀧𑀓𑁄 𑀦𑁂𑀫𑀺𑀢𑁆𑀢𑀓𑁄 𑀓𑀼𑀳𑀦𑀮𑀧𑀦𑀦𑁂𑀫𑀺𑀢𑁆𑀢𑀓𑀢𑁆𑀢𑀁 𑀧𑀼𑀩𑁆𑀩𑀗𑁆𑀕𑀫𑀁 𑀓𑀢𑁆𑀯𑀸 𑀧𑀜𑁆𑀘 𑀦𑀻𑀯𑀭𑀡𑁂 𑀅𑀧𑁆𑀧𑀳𑀸𑀬 𑀘𑁂𑀢𑀲𑁄 𑀉𑀧𑀓𑁆𑀓𑀺𑀮𑁂𑀲𑁂 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑁂 𑀘𑀢𑀽𑀲𑀼 𑀲𑀢𑀺𑀧𑀝𑁆𑀞𑀸𑀦𑁂𑀲𑀼 𑀅𑀦𑀼𑀧𑀝𑁆𑀞𑀺𑀢𑀲𑁆𑀲𑀢𑀺 [𑀅𑀦𑀼𑀧𑀝𑁆𑀞𑀺𑀢𑀲𑀢𑀺 (𑀲𑀻.)] 𑀯𑀺𑀳𑀭𑀦𑁆𑀢𑁄 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂 𑀅𑀪𑀸𑀯𑀬𑀺𑀢𑁆𑀯𑀸 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀚𑁆𑀛𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺, 𑀅𑀜𑁆𑀜𑀢𑀭𑁄 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀲𑀩𑁆𑀩𑀤𑁄𑀲𑀸𑀧𑀕𑀢𑁄 𑀧𑀜𑁆𑀘 𑀦𑀻𑀯𑀭𑀡𑁂 𑀧𑀳𑀸𑀬 𑀘𑁂𑀢𑀲𑁄 𑀉𑀧𑀓𑁆𑀓𑀺𑀮𑁂𑀲𑁂 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑁂 𑀘𑀢𑀽𑀲𑀼 𑀲𑀢𑀺𑀧𑀝𑁆𑀞𑀸𑀦𑁂𑀲𑀼 𑀉𑀧𑀝𑁆𑀞𑀺𑀢𑀲𑁆𑀲𑀢𑀺 𑀯𑀺𑀳𑀭𑀦𑁆𑀢𑁄 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂 𑀪𑀸𑀯𑀬𑀺𑀢𑁆𑀯𑀸 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀚𑁆𑀛𑀺𑀲𑁆𑀲𑀢𑀻𑀢𑀺 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺. 𑀬𑀁 𑀏𑀢𑁆𑀣 𑀜𑀸𑀡𑀁 𑀳𑁂𑀢𑀼𑀲𑁄 𑀞𑀸𑀦𑀲𑁄 𑀅𑀦𑁄𑀥𑀺𑀲𑁄 𑀇𑀤𑀁 𑀯𑀼𑀘𑁆𑀘𑀢𑀺 𑀞𑀸𑀦𑀸𑀝𑁆𑀞𑀸𑀦𑀜𑀸𑀡𑀁 𑀧𑀞𑀫𑀁 𑀢𑀣𑀸𑀕𑀢𑀩𑀮𑀁.

𑀇𑀢𑀺 𑀞𑀸𑀦𑀸𑀝𑁆𑀞𑀸𑀦𑀕𑀢𑀸 𑀲𑀩𑁆𑀩𑁂 𑀔𑀬𑀥𑀫𑁆𑀫𑀸 𑀯𑀬𑀥𑀫𑁆𑀫𑀸 𑀯𑀺𑀭𑀸𑀕𑀥𑀫𑁆𑀫𑀸 𑀦𑀺𑀭𑁄𑀥𑀥𑀫𑁆𑀫𑀸 𑀓𑁂𑀘𑀺 𑀲𑀕𑁆𑀕𑀽𑀧𑀕𑀸 𑀓𑁂𑀘𑀺 𑀅𑀧𑀸𑀬𑀽𑀧𑀕𑀸 𑀓𑁂𑀘𑀺 𑀦𑀺𑀩𑁆𑀩𑀸𑀦𑀽𑀧𑀕𑀸, 𑀏𑀯𑀁 𑀪𑀕𑀯𑀸 𑀆𑀳 𑁋

𑁫𑁮. 𑀲𑀩𑁆𑀩𑁂 𑀲𑀢𑁆𑀢𑀸 [𑀧𑀲𑁆𑀲 𑀲𑀁. 𑀦𑀺. 𑁧.𑁧𑁩𑁩] 𑀫𑀭𑀺𑀲𑁆𑀲𑀦𑁆𑀢𑀺, 𑀫𑀭𑀡𑀦𑁆𑀢𑀁 𑀳𑀺 𑀚𑀻𑀯𑀺𑀢𑀁;

𑀬𑀣𑀸𑀓𑀫𑁆𑀫𑀁 𑀕𑀫𑀺𑀲𑁆𑀲𑀦𑁆𑀢𑀺, 𑀧𑀼𑀜𑁆𑀜𑀧𑀸𑀧𑀨𑀮𑀽𑀧𑀕𑀸;

𑀦𑀺𑀭𑀬𑀁 𑀧𑀸𑀧𑀓𑀫𑁆𑀫𑀦𑁆𑀢𑀸, 𑀧𑀼𑀜𑁆𑀜𑀓𑀫𑁆𑀫𑀸 𑀘 𑀲𑀼𑀕𑁆𑀕𑀢𑀺𑀁;

𑀅𑀧𑀭𑁂 𑀘 𑀫𑀕𑁆𑀕𑀁 𑀪𑀸𑀯𑁂𑀢𑁆𑀯𑀸, 𑀧𑀭𑀺𑀦𑀺𑀩𑁆𑀩𑀦𑁆𑀢𑀺𑀦𑀸𑀲𑀯𑀸𑀢𑀺 [𑀧𑀭𑀺𑀦𑀺𑀩𑁆𑀩𑀦𑁆𑀢𑀺 𑀅𑀦𑀸𑀲𑀯𑀸𑀢𑀺 (𑀲𑀻. 𑀓.)].

𑀲𑀩𑁆𑀩𑁂 𑀲𑀢𑁆𑀢𑀸𑀢𑀺 𑀅𑀭𑀺𑀬𑀸 𑀘 𑀅𑀦𑀭𑀺𑀬𑀸 𑀘 𑀲𑀓𑁆𑀓𑀸𑀬𑀧𑀭𑀺𑀬𑀸𑀧𑀦𑁆𑀦𑀸 𑀘 𑀲𑀓𑁆𑀓𑀸𑀬𑀯𑀻𑀢𑀺𑀯𑀢𑁆𑀢𑀸 𑀘. 𑀫𑀭𑀺𑀲𑁆𑀲𑀦𑁆𑀢𑀻𑀢𑀺 𑀤𑁆𑀯𑀻𑀳𑀺 𑀫𑀭𑀡𑁂𑀳𑀺 𑀤𑀦𑁆𑀥𑀫𑀭𑀡𑁂𑀦 𑀘 𑀅𑀤𑀦𑁆𑀥𑀫𑀭𑀡𑁂𑀦 𑀘, 𑀲𑀓𑁆𑀓𑀸𑀬𑀧𑀭𑀺𑀬𑀸𑀧𑀦𑁆𑀦𑀸𑀦𑀁 𑀅𑀤𑀦𑁆𑀥𑀫𑀭𑀡𑀁 𑀲𑀓𑁆𑀓𑀸𑀬𑀯𑀻𑀢𑀺𑀯𑀢𑁆𑀢𑀸𑀦𑀁 𑀤𑀦𑁆𑀥𑀫𑀭𑀡𑀁. 𑀫𑀭𑀡𑀦𑁆𑀢𑀁 𑀳𑀺 𑀚𑀻𑀯𑀺𑀢𑀦𑁆𑀢𑀺 𑀔𑀬𑀸 𑀆𑀬𑀼𑀲𑁆𑀲 𑀇𑀦𑁆𑀤𑁆𑀭𑀺𑀬𑀸𑀦𑀁 𑀉𑀧𑀭𑁄𑀥𑀸 𑀚𑀻𑀯𑀺𑀢𑀧𑀭𑀺𑀬𑀦𑁆𑀢𑁄 𑀫𑀭𑀡𑀧𑀭𑀺𑀬𑀦𑁆𑀢𑁄. 𑀬𑀣𑀸𑀓𑀫𑁆𑀫𑀁 𑀕𑀫𑀺𑀲𑁆𑀲𑀦𑁆𑀢𑀻𑀢𑀺 𑀓𑀫𑁆𑀫𑀲𑁆𑀲𑀓𑀢𑀸. 𑀧𑀼𑀜𑁆𑀜𑀧𑀸𑀧𑀨𑀮𑀽𑀧𑀕𑀸𑀢𑀺 𑀓𑀫𑁆𑀫𑀸𑀦𑀁 𑀨𑀮𑀤𑀲𑁆𑀲𑀸𑀯𑀺𑀢𑀸 𑀘 𑀅𑀯𑀺𑀧𑁆𑀧𑀯𑀸𑀲𑁄 𑀘.

𑀦𑀺𑀭𑀬𑀁 𑀧𑀸𑀧𑀓𑀫𑁆𑀫𑀦𑁆𑀢𑀸𑀢𑀺 𑀅𑀧𑀼𑀜𑁆𑀜𑀲𑀗𑁆𑀔𑀸𑀭𑀸. 𑀧𑀼𑀜𑁆𑀜𑀓𑀫𑁆𑀫𑀸 𑀘 𑀲𑀼𑀕𑁆𑀕𑀢𑀺𑀦𑁆𑀢𑀺 𑀧𑀼𑀜𑁆𑀜𑀲𑀗𑁆𑀔𑀸𑀭𑀸 𑀲𑀼𑀕𑀢𑀺𑀁 𑀕𑀫𑀺𑀲𑁆𑀲𑀦𑁆𑀢𑀺. 𑀅𑀧𑀭𑁂 𑀘 𑀫𑀕𑁆𑀕𑀁 𑀪𑀸𑀯𑁂𑀢𑁆𑀯𑀸, 𑀧𑀭𑀺𑀦𑀺𑀩𑁆𑀩𑀦𑁆𑀢𑀺𑀦𑀸𑀲𑀯𑀸𑀢𑀺 𑀲𑀩𑁆𑀩𑀲𑀗𑁆𑀔𑀸𑀭𑀸𑀦𑀁 𑀲𑀫𑀢𑀺𑀓𑁆𑀓𑀫𑀦𑀁. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀲𑀩𑁆𑀩𑁂…𑀧𑁂… 𑀦𑀸𑀲𑀯𑀸’’𑀢𑀺.

‘‘𑀲𑀩𑁆𑀩𑁂 𑀲𑀢𑁆𑀢𑀸 𑀫𑀭𑀺𑀲𑁆𑀲𑀦𑁆𑀢𑀺, 𑀫𑀭𑀡𑀦𑁆𑀢𑀁 𑀳𑀺 𑀚𑀻𑀯𑀺𑀢𑀁. 𑀬𑀣𑀸𑀓𑀫𑁆𑀫𑀁 𑀕𑀫𑀺𑀲𑁆𑀲𑀦𑁆𑀢𑀺, 𑀧𑀼𑀜𑁆𑀜𑀧𑀸𑀧𑀨𑀮𑀽𑀧𑀕𑀸. 𑀦𑀺𑀭𑀬𑀁 𑀧𑀸𑀧𑀓𑀫𑁆𑀫𑀦𑁆𑀢𑀸’’𑀢𑀺 𑀆𑀕𑀸𑀴𑁆𑀳𑀸 𑀘 𑀦𑀺𑀚𑁆𑀛𑀸𑀫𑀸 𑀘 𑀧𑀝𑀺𑀧𑀤𑀸. ‘‘𑀅𑀧𑀭𑁂 𑀘 𑀫𑀕𑁆𑀕𑀁 𑀪𑀸𑀯𑁂𑀢𑁆𑀯𑀸, 𑀧𑀭𑀺𑀦𑀺𑀩𑁆𑀩𑀦𑁆𑀢𑀺𑀦𑀸𑀲𑀯𑀸’’𑀢𑀺 𑀫𑀚𑁆𑀛𑀺𑀫𑀸 𑀧𑀝𑀺𑀧𑀤𑀸. ‘‘𑀲𑀩𑁆𑀩𑁂 𑀲𑀢𑁆𑀢𑀸 𑀫𑀭𑀺𑀲𑁆𑀲𑀦𑁆𑀢𑀺, 𑀫𑀭𑀡𑀦𑁆𑀢𑀁 𑀳𑀺 𑀚𑀻𑀯𑀺𑀢𑀁, 𑀬𑀣𑀸𑀓𑀫𑁆𑀫𑀁 𑀕𑀫𑀺𑀲𑁆𑀲𑀦𑁆𑀢𑀺, 𑀧𑀼𑀜𑁆𑀜𑀧𑀸𑀧𑀨𑀮𑀽𑀧𑀕𑀸, 𑀦𑀺𑀭𑀬𑀁 𑀧𑀸𑀧𑀓𑀫𑁆𑀫𑀦𑁆𑀢𑀸’’𑀢𑀺 𑀅𑀬𑀁 𑀲𑀁𑀓𑀺𑀮𑁂𑀲𑁄. 𑀏𑀯𑀁 𑀲𑀁𑀲𑀸𑀭𑀁 𑀦𑀺𑀩𑁆𑀩𑀢𑁆𑀢𑀬𑀢𑀺. ‘‘𑀲𑀩𑁆𑀩𑁂 𑀲𑀢𑁆𑀢𑀸 𑀫𑀭𑀺𑀲𑁆𑀲𑀦𑁆𑀢𑀺…𑀧𑁂… 𑀦𑀺𑀭𑀬𑀁 𑀧𑀸𑀧𑀓𑀫𑁆𑀫𑀦𑁆𑀢𑀸’’𑀢𑀺 𑀇𑀫𑁂 𑀢𑀬𑁄 𑀯𑀝𑁆𑀝𑀸 𑀤𑀼𑀓𑁆𑀔𑀯𑀝𑁆𑀝𑁄 𑀓𑀫𑁆𑀫𑀯𑀝𑁆𑀝𑁄 𑀓𑀺𑀮𑁂𑀲𑀯𑀝𑁆𑀝𑁄. ‘‘𑀅𑀧𑀭𑁂 𑀘 𑀫𑀕𑁆𑀕𑀁 𑀪𑀸𑀯𑁂𑀢𑁆𑀯𑀸, 𑀧𑀭𑀺𑀦𑀺𑀩𑁆𑀩𑀦𑁆𑀢𑀺𑀦𑀸𑀲𑀯𑀸’’𑀢𑀺 𑀢𑀺𑀡𑁆𑀡𑀁 𑀯𑀝𑁆𑀝𑀸𑀦𑀁 𑀯𑀺𑀯𑀝𑁆𑀝𑀦𑀸. ‘‘𑀲𑀩𑁆𑀩𑁂 𑀲𑀢𑁆𑀢𑀸 𑀫𑀭𑀺𑀲𑁆𑀲𑀦𑁆𑀢𑀺…𑀧𑁂… 𑀦𑀺𑀭𑀬𑀁 𑀧𑀸𑀧𑀓𑀫𑁆𑀫𑀦𑁆𑀢𑀸’’𑀢𑀺 𑀆𑀤𑀻𑀦𑀯𑁄, ‘‘𑀧𑀼𑀜𑁆𑀜𑀓𑀫𑁆𑀫𑀸 𑀘 𑀲𑀼𑀕𑁆𑀕𑀢𑀺’’𑀦𑁆𑀢𑀺 𑀅𑀲𑁆𑀲𑀸𑀤𑁄, ‘‘𑀅𑀧𑀭𑁂 𑀘 𑀫𑀕𑁆𑀕𑀁 𑀪𑀸𑀯𑁂𑀢𑁆𑀯𑀸, 𑀧𑀭𑀺𑀦𑀺𑀩𑁆𑀩𑀦𑁆𑀢𑀺𑀦𑀸𑀲𑀯𑀸’’𑀢𑀺 𑀦𑀺𑀲𑁆𑀲𑀭𑀡𑀁. ‘‘𑀲𑀩𑁆𑀩𑁂 𑀲𑀢𑁆𑀢𑀸 𑀫𑀭𑀺𑀲𑁆𑀲𑀦𑁆𑀢𑀺…𑀧𑁂… 𑀦𑀺𑀭𑀬𑀁 𑀧𑀸𑀧𑀓𑀫𑁆𑀫𑀦𑁆𑀢𑀸’’𑀢𑀺 𑀳𑁂𑀢𑀼 𑀘 𑀨𑀮𑀜𑁆𑀘, 𑀧𑀜𑁆𑀘𑀓𑁆𑀔𑀦𑁆𑀥𑀸 𑀨𑀮𑀁, 𑀢𑀡𑁆𑀳𑀸 𑀳𑁂𑀢𑀼, ‘‘𑀅𑀧𑀭𑁂 𑀘 𑀫𑀕𑁆𑀕𑀁 𑀪𑀸𑀯𑁂𑀢𑁆𑀯𑀸, 𑀧𑀭𑀺𑀦𑀺𑀩𑁆𑀩𑀦𑁆𑀢𑀺𑀦𑀸𑀲𑀯𑀸’’𑀢𑀺 𑀫𑀕𑁆𑀕𑁄 𑀘 𑀨𑀮𑀜𑁆𑀘. ‘‘𑀲𑀩𑁆𑀩𑁂 𑀲𑀢𑁆𑀢𑀸 𑀫𑀭𑀺𑀲𑁆𑀲𑀦𑁆𑀢𑀺, 𑀫𑀭𑀡𑀦𑁆𑀢𑀁 𑀳𑀺 𑀚𑀻𑀯𑀺𑀢𑀁. 𑀬𑀣𑀸𑀓𑀫𑁆𑀫𑀁 𑀕𑀫𑀺𑀲𑁆𑀲𑀦𑁆𑀢𑀺, 𑀧𑀼𑀜𑁆𑀜𑀧𑀸𑀧𑀨𑀮𑀽𑀧𑀕𑀸, 𑀦𑀺𑀭𑀬𑀁 𑀧𑀸𑀧𑀓𑀫𑁆𑀫𑀦𑁆𑀢𑀸’’𑀢𑀺 𑀅𑀬𑀁 𑀲𑀁𑀓𑀺𑀮𑁂𑀲𑁄, 𑀲𑁄 𑀲𑀁𑀓𑀺𑀮𑁂𑀲𑁄 𑀢𑀺𑀯𑀺𑀥𑁄 𑀢𑀡𑁆𑀳𑀸𑀲𑀁𑀓𑀺𑀮𑁂𑀲𑁄 𑀤𑀺𑀝𑁆𑀞𑀺𑀲𑀁𑀓𑀺𑀮𑁂𑀲𑁄 𑀤𑀼𑀘𑁆𑀘𑀭𑀺𑀢𑀲𑀁𑀓𑀺𑀮𑁂𑀲𑁄𑀢𑀺.

𑁫𑁯. 𑀢𑀢𑁆𑀣 𑀢𑀡𑁆𑀳𑀸𑀲𑀁𑀓𑀺𑀮𑁂𑀲𑁄 𑀢𑀻𑀳𑀺 𑀢𑀡𑁆𑀳𑀸𑀳𑀺 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑁄 𑁋 𑀓𑀸𑀫𑀢𑀡𑁆𑀳𑀸𑀬 𑀪𑀯𑀢𑀡𑁆𑀳𑀸𑀬 𑀯𑀺𑀪𑀯𑀢𑀡𑁆𑀳𑀸𑀬. 𑀬𑁂𑀦 𑀬𑁂𑀦 𑀯𑀸 𑀧𑀦 𑀯𑀢𑁆𑀣𑀼𑀦𑀸 𑀅𑀚𑁆𑀛𑁄𑀲𑀺𑀢𑁄, 𑀢𑁂𑀦 𑀢𑁂𑀦𑁂𑀯 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑁄, 𑀢𑀲𑁆𑀲𑀸 𑀯𑀺𑀢𑁆𑀣𑀸𑀭𑁄 𑀙𑀢𑁆𑀢𑀺𑀁𑀲𑀸𑀬 𑀢𑀡𑁆𑀳𑀸𑀬 𑀚𑀸𑀮𑀺𑀦𑀺𑀬𑀸 𑀯𑀺𑀘𑀭𑀺𑀢𑀸𑀦𑀺. 𑀢𑀢𑁆𑀣 𑀤𑀺𑀝𑁆𑀞𑀺𑀲𑀁𑀓𑀺𑀮𑁂𑀲𑁄 𑀉𑀘𑁆𑀙𑁂𑀤𑀲𑀲𑁆𑀲𑀢𑁂𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑁄, 𑀬𑁂𑀦 𑀬𑁂𑀦 𑀯𑀸 𑀧𑀦 𑀯𑀢𑁆𑀣𑀼𑀦𑀸 𑀤𑀺𑀝𑁆𑀞𑀺𑀯𑀲𑁂𑀦 𑀅𑀪𑀺𑀦𑀺𑀯𑀺𑀲𑀢𑀺, ‘‘𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀢𑁂𑀦 𑀢𑁂𑀦𑁂𑀯 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑁄, 𑀢𑀲𑁆𑀲𑀸 𑀯𑀺𑀢𑁆𑀣𑀸𑀭𑁄 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀺. 𑀢𑀢𑁆𑀣 𑀤𑀼𑀘𑁆𑀘𑀭𑀺𑀢𑀲𑀁𑀓𑀺𑀮𑁂𑀲𑁄 𑀘𑁂𑀢𑀦𑀸 𑀘𑁂𑀢𑀲𑀺𑀓𑀓𑀫𑁆𑀫𑁂𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑁄, 𑀢𑀻𑀳𑀺 𑀤𑀼𑀘𑁆𑀘𑀭𑀺𑀢𑁂𑀳𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑁂𑀦 𑀯𑀘𑀻𑀤𑀼𑀘𑁆𑀘𑀭𑀺𑀢𑁂𑀦 𑀫𑀦𑁄𑀤𑀼𑀘𑁆𑀘𑀭𑀺𑀢𑁂𑀦, 𑀢𑀲𑁆𑀲𑀸 𑀯𑀺𑀢𑁆𑀣𑀸𑀭𑁄 𑀤𑀲 𑀅𑀓𑀼𑀲𑀮𑀓𑀫𑁆𑀫𑀧𑀣𑀸. 𑀅𑀧𑀭𑁂 𑀘 𑀫𑀕𑁆𑀕𑀁 𑀪𑀸𑀯𑁂𑀢𑁆𑀯𑀸, 𑀧𑀭𑀺𑀦𑀺𑀩𑁆𑀩𑀦𑁆𑀢𑀺𑀦𑀸𑀲𑀯𑀸𑀢𑀺 𑀇𑀤𑀁 𑀯𑁄𑀤𑀸𑀦𑀁.

𑀢𑀬𑀺𑀤𑀁 𑀯𑁄𑀤𑀸𑀦𑀁 𑀢𑀺𑀯𑀺𑀥𑀁; 𑀢𑀡𑁆𑀳𑀸𑀲𑀁𑀓𑀺𑀮𑁂𑀲𑁄 𑀲𑀫𑀣𑁂𑀦 𑀯𑀺𑀲𑀼𑀚𑁆𑀛𑀢𑀺, 𑀲𑁄 𑀲𑀫𑀣𑁄 𑀲𑀫𑀸𑀥𑀺𑀓𑁆𑀔𑀦𑁆𑀥𑁄, 𑀤𑀺𑀝𑁆𑀞𑀺𑀲𑀁𑀓𑀺𑀮𑁂𑀲𑁄 𑀯𑀺𑀧𑀲𑁆𑀲𑀦𑀸𑀬 𑀯𑀺𑀲𑀼𑀚𑁆𑀛𑀢𑀺, 𑀲𑀸 𑀯𑀺𑀧𑀲𑁆𑀲𑀦𑀸 𑀧𑀜𑁆𑀜𑀸𑀓𑁆𑀔𑀦𑁆𑀥𑁄, 𑀤𑀼𑀘𑁆𑀘𑀭𑀺𑀢𑀲𑀁𑀓𑀺𑀮𑁂𑀲𑁄 𑀲𑀼𑀘𑀭𑀺𑀢𑁂𑀦 𑀯𑀺𑀲𑀼𑀚𑁆𑀛𑀢𑀺, 𑀢𑀁 𑀲𑀼𑀘𑀭𑀺𑀢𑀁 𑀲𑀻𑀮𑀓𑁆𑀔𑀦𑁆𑀥𑁄.

‘‘𑀲𑀩𑁆𑀩𑁂 𑀲𑀢𑁆𑀢𑀸 𑀫𑀭𑀺𑀲𑁆𑀲𑀦𑁆𑀢𑀺, 𑀫𑀭𑀡𑀦𑁆𑀢𑀁 𑀳𑀺 𑀚𑀻𑀯𑀺𑀢𑀁, 𑀬𑀣𑀸𑀓𑀫𑁆𑀫𑀁 𑀕𑀫𑀺𑀲𑁆𑀲𑀦𑁆𑀢𑀺, 𑀧𑀼𑀜𑁆𑀜𑀧𑀸𑀧𑀨𑀮𑀽𑀧𑀕𑀸, 𑀦𑀺𑀭𑀬𑀁 𑀧𑀸𑀧𑀓𑀫𑁆𑀫𑀦𑁆𑀢𑀸’’𑀢𑀺 𑀅𑀧𑀼𑀜𑁆𑀜𑀧𑁆𑀧𑀝𑀺𑀧𑀤𑀸, ‘‘𑀧𑀼𑀜𑁆𑀜𑀓𑀫𑁆𑀫𑀸 𑀘 𑀲𑀼𑀕𑁆𑀕𑀢𑀺’’𑀦𑁆𑀢𑀺 𑀧𑀼𑀜𑁆𑀜𑀧𑁆𑀧𑀝𑀺𑀧𑀤𑀸, ‘‘𑀅𑀧𑀭𑁂 𑀘 𑀫𑀕𑁆𑀕𑀁 𑀪𑀸𑀯𑁂𑀢𑁆𑀯𑀸, 𑀧𑀭𑀺𑀦𑀺𑀩𑁆𑀩𑀦𑁆𑀢𑀺𑀦𑀸𑀲𑀯𑀸’’𑀢𑀺 𑀧𑀼𑀜𑁆𑀜𑀧𑀸𑀧𑀲𑀫𑀢𑀺𑀓𑁆𑀓𑀫𑀧𑁆𑀧𑀝𑀺𑀧𑀤𑀸, 𑀢𑀢𑁆𑀣 𑀬𑀸 𑀘 𑀧𑀼𑀜𑁆𑀜𑀧𑁆𑀧𑀝𑀺𑀧𑀤𑀸 𑀬𑀸 𑀘 𑀅𑀧𑀼𑀜𑁆𑀜𑀧𑁆𑀧𑀝𑀺𑀧𑀤𑀸, 𑀅𑀬𑀁 𑀏𑀓𑀸 𑀧𑀝𑀺𑀧𑀤𑀸 𑀲𑀩𑁆𑀩𑀢𑁆𑀣𑀕𑀸𑀫𑀺𑀦𑀻 𑀏𑀓𑀸 𑀅𑀧𑀸𑀬𑁂𑀲𑀼, 𑀏𑀓𑀸 𑀤𑁂𑀯𑁂𑀲𑀼, 𑀬𑀸 𑀘 𑀧𑀼𑀜𑁆𑀜𑀧𑀸𑀧𑀲𑀫𑀢𑀺𑀓𑁆𑀓𑀫𑀸 𑀧𑀝𑀺𑀧𑀤𑀸 𑀅𑀬𑀁 𑀢𑀢𑁆𑀣 𑀢𑀢𑁆𑀣 𑀕𑀸𑀫𑀺𑀦𑀻 𑀧𑀝𑀺𑀧𑀤𑀸.

𑀢𑀬𑁄 𑀭𑀸𑀲𑀻 𑁋 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑁄 𑀭𑀸𑀲𑀺, 𑀲𑀫𑁆𑀫𑀢𑁆𑀢𑀦𑀺𑀬𑀢𑁄 𑀭𑀸𑀲𑀺, 𑀅𑀦𑀺𑀬𑀢𑁄 𑀭𑀸𑀲𑀺, 𑀢𑀢𑁆𑀣 𑀬𑁄 𑀘 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑁄 𑀭𑀸𑀲𑀺 𑀬𑁄 𑀘 𑀲𑀫𑁆𑀫𑀢𑁆𑀢𑀦𑀺𑀬𑀢𑁄 𑀭𑀸𑀲𑀺 𑀏𑀓𑀸 𑀧𑀝𑀺𑀧𑀤𑀸 𑀢𑀢𑁆𑀣 𑀢𑀢𑁆𑀣 𑀕𑀸𑀫𑀺𑀦𑀻, 𑀢𑀢𑁆𑀣 𑀬𑁄 𑀅𑀦𑀺𑀬𑀢𑁄 𑀭𑀸𑀲𑀺, 𑀅𑀬𑀁 𑀲𑀩𑁆𑀩𑀢𑁆𑀣𑀕𑀸𑀫𑀺𑀦𑀻 𑀧𑀝𑀺𑀧𑀤𑀸. 𑀓𑁂𑀦 𑀓𑀸𑀭𑀡𑁂𑀦? 𑀧𑀘𑁆𑀘𑀬𑀁 𑀮𑀪𑀦𑁆𑀢𑁄 𑀦𑀺𑀭𑀬𑁂 𑀉𑀧𑀧𑀚𑁆𑀚𑁂𑀬𑁆𑀬, 𑀧𑀘𑁆𑀘𑀬𑀁 𑀮𑀪𑀦𑁆𑀢𑁄 𑀢𑀺𑀭𑀘𑁆𑀙𑀸𑀦𑀬𑁄𑀦𑀻𑀲𑀼 𑀉𑀧𑀧𑀚𑁆𑀚𑁂𑀬𑁆𑀬, 𑀧𑀘𑁆𑀘𑀬𑀁 𑀮𑀪𑀦𑁆𑀢𑁄 𑀧𑁂𑀢𑁆𑀢𑀺𑀯𑀺𑀲𑀬𑁂𑀲𑀼 𑀉𑀧𑀧𑀚𑁆𑀚𑁂𑀬𑁆𑀬, 𑀧𑀘𑁆𑀘𑀬𑀁 𑀮𑀪𑀦𑁆𑀢𑁄 𑀅𑀲𑀼𑀭𑁂𑀲𑀼 𑀉𑀧𑀧𑀚𑁆𑀚𑁂𑀬𑁆𑀬, 𑀧𑀘𑁆𑀘𑀬𑀁 𑀮𑀪𑀦𑁆𑀢𑁄 𑀤𑁂𑀯𑁂𑀲𑀼 𑀉𑀧𑀧𑀚𑁆𑀚𑁂𑀬𑁆𑀬, 𑀧𑀘𑁆𑀘𑀬𑀁 𑀮𑀪𑀦𑁆𑀢𑁄 𑀫𑀦𑀼𑀲𑁆𑀲𑁂𑀲𑀼 𑀉𑀧𑀧𑀚𑁆𑀚𑁂𑀬𑁆𑀬, 𑀧𑀘𑁆𑀘𑀬𑀁 𑀮𑀪𑀦𑁆𑀢𑁄 𑀧𑀭𑀺𑀦𑀺𑀩𑁆𑀩𑀸𑀬𑁂𑀬𑁆𑀬, 𑀢𑀲𑁆𑀫𑀸𑀬𑀁 𑀲𑀩𑁆𑀩𑀢𑁆𑀣𑀕𑀸𑀫𑀺𑀦𑀻 𑀧𑀝𑀺𑀧𑀤𑀸, 𑀬𑀁 𑀏𑀢𑁆𑀣 𑀜𑀸𑀡𑀁 𑀳𑁂𑀢𑀼𑀲𑁄 𑀞𑀸𑀦𑀲𑁄 𑀅𑀦𑁄𑀥𑀺𑀲𑁄, 𑀇𑀤𑀁 𑀯𑀼𑀘𑁆𑀘𑀢𑀺 𑀲𑀩𑁆𑀩𑀢𑁆𑀣𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀜𑀸𑀡𑀁 𑀤𑀼𑀢𑀺𑀬𑀁 𑀢𑀣𑀸𑀕𑀢𑀩𑀮𑀁.

𑀇𑀢𑀺 𑀲𑀩𑁆𑀩𑀢𑁆𑀣𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀅𑀦𑁂𑀓𑀥𑀸𑀢𑀼𑀮𑁄𑀓𑁄, 𑀢𑀢𑁆𑀣 𑀢𑀢𑁆𑀣 𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀦𑀸𑀦𑀸𑀥𑀸𑀢𑀼𑀮𑁄𑀓𑁄. 𑀢𑀢𑁆𑀣 𑀓𑀢𑀫𑁄 𑀅𑀦𑁂𑀓𑀥𑀸𑀢𑀼𑀮𑁄𑀓𑁄? 𑀘𑀓𑁆𑀔𑀼𑀥𑀸𑀢𑀼 𑀭𑀽𑀧𑀥𑀸𑀢𑀼 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼, 𑀲𑁄𑀢𑀥𑀸𑀢𑀼 𑀲𑀤𑁆𑀤𑀥𑀸𑀢𑀼 𑀲𑁄𑀢𑀯𑀺𑀜𑁆𑀜𑀸𑀡𑀥𑀸𑀢𑀼, 𑀖𑀸𑀦𑀥𑀸𑀢𑀼 𑀕𑀦𑁆𑀥𑀥𑀸𑀢𑀼 𑀖𑀸𑀦𑀯𑀺𑀜𑁆𑀜𑀸𑀡𑀥𑀸𑀢𑀼, 𑀚𑀺𑀯𑁆𑀳𑀸𑀥𑀸𑀢𑀼 𑀭𑀲𑀥𑀸𑀢𑀼 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀥𑀸𑀢𑀼, 𑀓𑀸𑀬𑀥𑀸𑀢𑀼 𑀨𑁄𑀝𑁆𑀞𑀩𑁆𑀩𑀥𑀸𑀢𑀼 𑀓𑀸𑀬𑀯𑀺𑀜𑁆𑀜𑀸𑀡𑀥𑀸𑀢𑀼, 𑀫𑀦𑁄𑀥𑀸𑀢𑀼 𑀥𑀫𑁆𑀫𑀥𑀸𑀢𑀼 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼, 𑀧𑀣𑀯𑀻𑀥𑀸𑀢𑀼, 𑀆𑀧𑁄𑀥𑀸𑀢𑀼, 𑀢𑁂𑀚𑁄𑀥𑀸𑀢𑀼, 𑀯𑀸𑀬𑁄𑀥𑀸𑀢𑀼, 𑀆𑀓𑀸𑀲𑀥𑀸𑀢𑀼, 𑀯𑀺𑀜𑁆𑀜𑀸𑀡𑀥𑀸𑀢𑀼, 𑀓𑀸𑀫𑀥𑀸𑀢𑀼, 𑀩𑁆𑀬𑀸𑀧𑀸𑀤𑀥𑀸𑀢𑀼, 𑀯𑀺𑀳𑀺𑀁𑀲𑀸𑀥𑀸𑀢𑀼, 𑀦𑁂𑀓𑁆𑀔𑀫𑁆𑀫𑀥𑀸𑀢𑀼, 𑀅𑀩𑁆𑀬𑀸𑀧𑀸𑀤𑀥𑀸𑀢𑀼, 𑀅𑀯𑀺𑀳𑀺𑀁𑀲𑀸𑀥𑀸𑀢𑀼, 𑀤𑀼𑀓𑁆𑀔𑀥𑀸𑀢𑀼, 𑀤𑁄𑀫𑀦𑀲𑁆𑀲𑀥𑀸𑀢𑀼, 𑀅𑀯𑀺𑀚𑁆𑀚𑀸𑀥𑀸𑀢𑀼, 𑀲𑀼𑀔𑀥𑀸𑀢𑀼, 𑀲𑁄𑀫𑀦𑀲𑁆𑀲𑀥𑀸𑀢𑀼, 𑀉𑀧𑁂𑀓𑁆𑀔𑀸𑀥𑀸𑀢𑀼, 𑀭𑀽𑀧𑀥𑀸𑀢𑀼, 𑀅𑀭𑀽𑀧𑀥𑀸𑀢𑀼, 𑀦𑀺𑀭𑁄𑀥𑀥𑀸𑀢𑀼, 𑀲𑀗𑁆𑀔𑀸𑀭𑀥𑀸𑀢𑀼, 𑀦𑀺𑀩𑁆𑀩𑀸𑀦𑀥𑀸𑀢𑀼, 𑀅𑀬𑀁 𑀅𑀦𑁂𑀓𑀥𑀸𑀢𑀼𑀮𑁄𑀓𑁄.

𑀢𑀢𑁆𑀣 𑀓𑀢𑀫𑁄 𑀦𑀸𑀦𑀸𑀥𑀸𑀢𑀼𑀮𑁄𑀓𑁄? 𑀅𑀜𑁆𑀜𑀸 𑀘𑀓𑁆𑀔𑀼𑀥𑀸𑀢𑀼, 𑀅𑀜𑁆𑀜𑀸 𑀭𑀽𑀧𑀥𑀸𑀢𑀼, 𑀅𑀜𑁆𑀜𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼. 𑀏𑀯𑀁 𑀲𑀩𑁆𑀩𑀸. 𑀅𑀜𑁆𑀜𑀸 𑀦𑀺𑀩𑁆𑀩𑀸𑀦𑀥𑀸𑀢𑀼. 𑀬𑀁 𑀏𑀢𑁆𑀣 𑀜𑀸𑀡𑀁 𑀳𑁂𑀢𑀼𑀲𑁄 𑀞𑀸𑀦𑀲𑁄 𑀅𑀦𑁄𑀥𑀺𑀲𑁄, 𑀇𑀤𑀁 𑀯𑀼𑀘𑁆𑀘𑀢𑀺 𑀅𑀦𑁂𑀓𑀥𑀸𑀢𑀼 𑀦𑀸𑀦𑀸𑀥𑀸𑀢𑀼 𑀜𑀸𑀡𑀁 𑀢𑀢𑀺𑀬𑀁 𑀢𑀣𑀸𑀕𑀢𑀩𑀮𑀁.

𑁬𑁦. 𑀇𑀢𑀺 𑀅𑀦𑁂𑀓𑀥𑀸𑀢𑀼 𑀦𑀸𑀦𑀸𑀥𑀸𑀢𑀼𑀓𑀲𑁆𑀲 𑀮𑁄𑀓𑀲𑁆𑀲 𑀬𑀁 𑀬𑀤𑁂𑀯 𑀥𑀸𑀢𑀼𑀁 𑀲𑀢𑁆𑀢𑀸 𑀅𑀥𑀺𑀫𑀼𑀘𑁆𑀘𑀦𑁆𑀢𑀺, 𑀢𑀁 𑀢𑀤𑁂𑀯 𑀅𑀥𑀺𑀝𑁆𑀞𑀳𑀦𑁆𑀢𑀺 𑀅𑀪𑀺𑀦𑀺𑀯𑀺𑀲𑀦𑁆𑀢𑀺, 𑀓𑁂𑀘𑀺 𑀭𑀽𑀧𑀸𑀥𑀺𑀫𑀼𑀢𑁆𑀢𑀸, 𑀓𑁂𑀘𑀺 𑀲𑀤𑁆𑀤𑀸𑀥𑀺𑀫𑀼𑀢𑁆𑀢𑀸, 𑀓𑁂𑀘𑀺 𑀕𑀦𑁆𑀥𑀸𑀥𑀺𑀫𑀼𑀢𑁆𑀢𑀸, 𑀓𑁂𑀘𑀺 𑀭𑀲𑀸𑀥𑀺𑀫𑀼𑀢𑁆𑀢𑀸, 𑀓𑁂𑀘𑀺 𑀨𑁄𑀝𑁆𑀞𑀩𑁆𑀩𑀸𑀥𑀺𑀫𑀼𑀢𑁆𑀢𑀸, 𑀓𑁂𑀘𑀺 𑀥𑀫𑁆𑀫𑀸𑀥𑀺𑀫𑀼𑀢𑁆𑀢𑀸, 𑀓𑁂𑀘𑀺 𑀇𑀢𑁆𑀣𑀸𑀥𑀺𑀫𑀼𑀢𑁆𑀢𑀸, 𑀓𑁂𑀘𑀺 𑀧𑀼𑀭𑀺𑀲𑀸𑀥𑀺𑀫𑀼𑀢𑁆𑀢𑀸, 𑀓𑁂𑀘𑀺 𑀘𑀸𑀕𑀸𑀥𑀺𑀫𑀼𑀢𑁆𑀢𑀸, 𑀓𑁂𑀘𑀺 𑀳𑀻𑀦𑀸𑀥𑀺𑀫𑀼𑀢𑁆𑀢𑀸, 𑀓𑁂𑀘𑀺 𑀧𑀡𑀻𑀢𑀸𑀥𑀺𑀫𑀼𑀢𑁆𑀢𑀸, 𑀓𑁂𑀘𑀺 𑀤𑁂𑀯𑀸𑀥𑀺𑀫𑀼𑀢𑁆𑀢𑀸, 𑀓𑁂𑀘𑀺 𑀫𑀦𑀼𑀲𑁆𑀲𑀸𑀥𑀺𑀫𑀼𑀢𑁆𑀢𑀸, 𑀓𑁂𑀘𑀺 𑀦𑀺𑀩𑁆𑀩𑀸𑀦𑀸𑀥𑀺𑀫𑀼𑀢𑁆𑀢𑀸. 𑀬𑀁 𑀏𑀢𑁆𑀣 𑀜𑀸𑀡𑀁 𑀳𑁂𑀢𑀼𑀲𑁄 𑀞𑀸𑀦𑀲𑁄 𑀅𑀦𑁄𑀥𑀺𑀲𑁄, 𑀅𑀬𑀁 𑀯𑁂𑀦𑁂𑀬𑁆𑀬𑁄, 𑀅𑀬𑀁 𑀦 𑀯𑁂𑀦𑁂𑀬𑁆𑀬𑁄, 𑀅𑀬𑀁 𑀲𑀕𑁆𑀕𑀕𑀸𑀫𑀻, 𑀅𑀬𑀁 𑀤𑀼𑀕𑁆𑀕𑀢𑀺𑀕𑀸𑀫𑀻𑀢𑀺, 𑀇𑀤𑀁 𑀯𑀼𑀘𑁆𑀘𑀢𑀺 𑀲𑀢𑁆𑀢𑀸𑀦𑀁 𑀦𑀸𑀦𑀸𑀥𑀺𑀫𑀼𑀢𑁆𑀢𑀺𑀓𑀢𑀸 𑀜𑀸𑀡𑀁 𑀘𑀢𑀼𑀢𑁆𑀣𑀁 𑀢𑀣𑀸𑀕𑀢𑀩𑀮𑀁.

𑀇𑀢𑀺 𑀢𑁂 𑀬𑀣𑀸𑀥𑀺𑀫𑀼𑀢𑁆𑀢𑀸 𑀘 𑀪𑀯𑀦𑁆𑀢𑀺, 𑀢𑀁 𑀢𑀁 𑀓𑀫𑁆𑀫𑀲𑀫𑀸𑀤𑀸𑀦𑀁 𑀲𑀫𑀸𑀤𑀺𑀬𑀦𑁆𑀢𑀺. 𑀢𑁂 𑀙𑀩𑁆𑀩𑀺𑀥𑀁 𑀓𑀫𑁆𑀫𑀁 𑀲𑀫𑀸𑀤𑀺𑀬𑀦𑁆𑀢𑀺 𑁋 𑀓𑁂𑀘𑀺 𑀮𑁄𑀪𑀯𑀲𑁂𑀦, 𑀓𑁂𑀘𑀺 𑀤𑁄𑀲𑀯𑀲𑁂𑀦, 𑀓𑁂𑀘𑀺 𑀫𑁄𑀳𑀯𑀲𑁂𑀦, 𑀓𑁂𑀘𑀺 𑀲𑀤𑁆𑀥𑀸𑀯𑀲𑁂𑀦, 𑀓𑁂𑀘𑀺 𑀯𑀻𑀭𑀺𑀬𑀯𑀲𑁂𑀦, 𑀓𑁂𑀘𑀺 𑀧𑀜𑁆𑀜𑀸𑀯𑀲𑁂𑀦. 𑀢𑀁 𑀯𑀺𑀪𑀚𑁆𑀚𑀫𑀸𑀦𑀁 𑀤𑀼𑀯𑀺𑀥𑀁 𑁋 𑀲𑀁𑀲𑀸𑀭𑀕𑀸𑀫𑀺 𑀘 𑀦𑀺𑀩𑁆𑀩𑀸𑀦𑀕𑀸𑀫𑀺 𑀘.

𑀢𑀢𑁆𑀣 𑀬𑀁 𑀮𑁄𑀪𑀯𑀲𑁂𑀦 𑀤𑁄𑀲𑀯𑀲𑁂𑀦 𑀫𑁄𑀳𑀯𑀲𑁂𑀦 𑀘 𑀓𑀫𑁆𑀫𑀁 𑀓𑀭𑁄𑀢𑀺, 𑀇𑀤𑀁 𑀓𑀫𑁆𑀫𑀁 𑀓𑀡𑁆𑀳𑀁 𑀓𑀡𑁆𑀳𑀯𑀺𑀧𑀸𑀓𑀁. 𑀢𑀢𑁆𑀣 𑀬𑀁 𑀲𑀤𑁆𑀥𑀸𑀯𑀲𑁂𑀦 𑀓𑀫𑁆𑀫𑀁 𑀓𑀭𑁄𑀢𑀺, 𑀇𑀤𑀁 𑀓𑀫𑁆𑀫𑀁 𑀲𑀼𑀓𑁆𑀓𑀁 𑀲𑀼𑀓𑁆𑀓𑀯𑀺𑀧𑀸𑀓𑀁. 𑀢𑀢𑁆𑀣 𑀬𑀁 𑀮𑁄𑀪𑀯𑀲𑁂𑀦 𑀤𑁄𑀲𑀯𑀲𑁂𑀦 𑀫𑁄𑀳𑀯𑀲𑁂𑀦 𑀲𑀤𑁆𑀥𑀸𑀯𑀲𑁂𑀦 𑀘 𑀓𑀫𑁆𑀫𑀁 𑀓𑀭𑁄𑀢𑀺, 𑀇𑀤𑀁 𑀓𑀫𑁆𑀫𑀁 𑀓𑀡𑁆𑀳𑀲𑀼𑀓𑁆𑀓𑀁 𑀓𑀡𑁆𑀳𑀲𑀼𑀓𑁆𑀓𑀯𑀺𑀧𑀸𑀓𑀁. 𑀢𑀢𑁆𑀣 𑀬𑀁 𑀯𑀻𑀭𑀺𑀬𑀯𑀲𑁂𑀦 𑀧𑀜𑁆𑀜𑀸𑀯𑀲𑁂𑀦 𑀘 𑀓𑀫𑁆𑀫𑀁 𑀓𑀭𑁄𑀢𑀺, 𑀇𑀤𑀁 𑀓𑀫𑁆𑀫𑀁 𑀅𑀓𑀡𑁆𑀳𑀁 𑀅𑀲𑀼𑀓𑁆𑀓𑀁 𑀅𑀓𑀡𑁆𑀳𑀅𑀲𑀼𑀓𑁆𑀓𑀯𑀺𑀧𑀸𑀓𑀁 𑀓𑀫𑁆𑀫𑀼𑀢𑁆𑀢𑀫𑀁 𑀓𑀫𑁆𑀫𑀲𑁂𑀝𑁆𑀞𑀁 𑀓𑀫𑁆𑀫𑀓𑁆𑀔𑀬𑀸𑀬 𑀲𑀁𑀯𑀢𑁆𑀢𑀢𑀺.

𑀘𑀢𑁆𑀢𑀸𑀭𑀺 𑀓𑀫𑁆𑀫𑀲𑀫𑀸𑀤𑀸𑀦𑀸𑀦𑀺. 𑀅𑀢𑁆𑀣𑀺 𑀓𑀫𑁆𑀫𑀲𑀫𑀸𑀤𑀸𑀦𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀼𑀔𑀁 𑀆𑀬𑀢𑀺𑀁 𑀤𑀼𑀓𑁆𑀔𑀯𑀺𑀧𑀸𑀓𑀁, 𑀅𑀢𑁆𑀣𑀺 𑀓𑀫𑁆𑀫𑀲𑀫𑀸𑀤𑀸𑀦𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀤𑀼𑀓𑁆𑀔𑀁 𑀆𑀬𑀢𑀺𑀁 𑀲𑀼𑀔𑀯𑀺𑀧𑀸𑀓𑀁, 𑀅𑀢𑁆𑀣𑀺 𑀓𑀫𑁆𑀫𑀲𑀫𑀸𑀤𑀸𑀦𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀤𑀼𑀓𑁆𑀔𑀜𑁆𑀘𑁂𑀯 𑀆𑀬𑀢𑀺𑀁 𑀘 𑀤𑀼𑀓𑁆𑀔𑀯𑀺𑀧𑀸𑀓𑀁, 𑀅𑀢𑁆𑀣𑀺 𑀓𑀫𑁆𑀫𑀲𑀫𑀸𑀤𑀸𑀦𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀼𑀔𑀜𑁆𑀘𑁂𑀯 𑀆𑀬𑀢𑀺𑀁 𑀘 𑀲𑀼𑀔𑀯𑀺𑀧𑀸𑀓𑀁. 𑀬𑀁 𑀏𑀯𑀁 𑀚𑀸𑀢𑀺𑀬𑀁 𑀓𑀫𑁆𑀫𑀲𑀫𑀸𑀤𑀸𑀦𑀁, 𑀇𑀫𑀺𑀦𑀸 𑀧𑀼𑀕𑁆𑀕𑀮𑁂𑀦 𑀅𑀓𑀼𑀲𑀮𑀓𑀫𑁆𑀫𑀲𑀫𑀸𑀤𑀸𑀦𑀁 𑀉𑀧𑀘𑀺𑀢𑀁 𑀅𑀯𑀺𑀧𑀓𑁆𑀓𑀁 𑀯𑀺𑀧𑀸𑀓𑀸𑀬 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀦 𑀘 𑀪𑀩𑁆𑀩𑁄 𑀅𑀪𑀺𑀦𑀺𑀩𑁆𑀩𑀺𑀥𑀸 𑀕𑀦𑁆𑀢𑀼𑀦𑁆𑀢𑀺 𑀢𑀁 𑀪𑀕𑀯𑀸 𑀦 𑀑𑀯𑀤𑀢𑀺. 𑀬𑀣𑀸 𑀤𑁂𑀯𑀤𑀢𑁆𑀢𑀁 𑀓𑁄𑀓𑀸𑀮𑀺𑀓𑀁 𑀲𑀼𑀦𑀓𑁆𑀔𑀢𑁆𑀢𑀁 𑀮𑀺𑀘𑁆𑀙𑀯𑀺𑀧𑀼𑀢𑁆𑀢𑀁, 𑀬𑁂 𑀯𑀸 𑀧𑀦𑀜𑁆𑀜𑁂𑀧𑀺 𑀲𑀢𑁆𑀢𑀸 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀸 𑀇𑀫𑁂𑀲𑀜𑁆𑀘 𑀧𑀼𑀕𑁆𑀕𑀮𑀸𑀦𑀁 𑀉𑀧𑀘𑀺𑀢𑀁 𑀅𑀓𑀼𑀲𑀮𑀁 𑀦 𑀘 𑀢𑀸𑀯 𑀧𑀸𑀭𑀺𑀧𑀽𑀭𑀺𑀁 𑀕𑀢𑀁, 𑀧𑀼𑀭𑀸 𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀺. 𑀧𑀼𑀭𑀸 𑀨𑀮𑀁 𑀦𑀺𑀩𑁆𑀩𑀢𑁆𑀢𑀬𑀢𑀺, 𑀧𑀼𑀭𑀸 𑀫𑀕𑁆𑀕𑀫𑀸𑀯𑀸𑀭𑀬𑀢𑀺, 𑀧𑀼𑀭𑀸 𑀯𑁂𑀦𑁂𑀬𑁆𑀬𑀢𑁆𑀢𑀁 𑀲𑀫𑀢𑀺𑀓𑁆𑀓𑀫𑀢𑀻𑀢𑀺 𑀢𑁂 𑀪𑀕𑀯𑀸 𑀅𑀲𑀫𑀢𑁆𑀢𑁂 𑀑𑀯𑀤𑀢𑀺. 𑀬𑀣𑀸 𑀧𑀼𑀡𑁆𑀡𑀜𑁆𑀘 𑀕𑁄𑀯𑀢𑀺𑀓𑀁 𑀅𑀘𑁂𑀮𑀜𑁆𑀘 𑀓𑀼𑀓𑁆𑀓𑀼𑀭𑀯𑀢𑀺𑀓𑀁.

𑁬𑁧. 𑀇𑀫𑀲𑁆𑀲 𑀘 𑀧𑀼𑀕𑁆𑀕𑀮𑀲𑁆𑀲 𑀅𑀓𑀼𑀲𑀮𑀓𑀫𑁆𑀫𑀲𑀫𑀸𑀤𑀸𑀦𑀁 𑀧𑀭𑀺𑀧𑀽𑀭𑀫𑀸𑀦𑀁 𑀫𑀕𑁆𑀕𑀁 𑀆𑀯𑀸𑀭𑀬𑀺𑀲𑁆𑀲𑀢𑀺 𑀧𑀼𑀭𑀸 𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀺, 𑀧𑀼𑀭𑀸 𑀨𑀮𑀁 𑀦𑀺𑀩𑁆𑀩𑀢𑁆𑀢𑀬𑀢𑀺, 𑀧𑀼𑀭𑀸 𑀫𑀕𑁆𑀕𑀫𑀸𑀯𑀸𑀭𑀬𑀢𑀺, 𑀧𑀼𑀭𑀸 𑀯𑁂𑀦𑁂𑀬𑁆𑀬𑀢𑁆𑀢𑀁 𑀲𑀫𑀢𑀺𑀓𑁆𑀓𑀫𑀢𑀻𑀢𑀺 𑀢𑀁 𑀪𑀕𑀯𑀸 𑀅𑀲𑀫𑀢𑁆𑀢𑀁 𑀑𑀯𑀤𑀢𑀺. 𑀬𑀣𑀸 𑀆𑀬𑀲𑁆𑀫𑀦𑁆𑀢𑀁 𑀅𑀗𑁆𑀕𑀼𑀮𑀺𑀫𑀸𑀮𑀁.

𑀲𑀩𑁆𑀩𑁂𑀲𑀁 𑀫𑀼𑀤𑀼𑀫𑀚𑁆𑀛𑀸𑀥𑀺𑀫𑀢𑁆𑀢𑀢𑀸. 𑀢𑀢𑁆𑀣 𑀫𑀼𑀤𑀼 𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑀸 𑀫𑀚𑁆𑀛𑀁 𑀅𑀯𑀲𑁂𑀲𑀓𑀼𑀲𑀮𑀲𑀗𑁆𑀔𑀸𑀭𑀸, 𑀅𑀥𑀺𑀫𑀢𑁆𑀢𑀁 𑀅𑀓𑀼𑀲𑀮𑀲𑀗𑁆𑀔𑀸𑀭𑀸, 𑀬𑀁 𑀏𑀢𑁆𑀣 𑀜𑀸𑀡𑀁 𑀳𑁂𑀢𑀼𑀲𑁄 𑀞𑀸𑀦𑀲𑁄 𑀅𑀦𑁄𑀥𑀺𑀲𑁄, 𑀇𑀤𑀁 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁, 𑀇𑀤𑀁 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀁, 𑀇𑀤𑀁 𑀅𑀧𑀭𑀸𑀧𑀭𑀺𑀬𑀯𑁂𑀤𑀦𑀻𑀬𑀁, 𑀇𑀤𑀁 𑀦𑀺𑀭𑀬𑀯𑁂𑀤𑀦𑀻𑀬𑀁, 𑀇𑀤𑀁 𑀢𑀺𑀭𑀘𑁆𑀙𑀸𑀦𑀯𑁂𑀤𑀦𑀻𑀬𑀁, 𑀇𑀤𑀁 𑀧𑁂𑀢𑁆𑀢𑀺𑀯𑀺𑀲𑀬𑀯𑁂𑀤𑀦𑀻𑀬𑀁, 𑀇𑀤𑀁 𑀅𑀲𑀼𑀭𑀯𑁂𑀤𑀦𑀻𑀬𑀁, 𑀇𑀤𑀁 𑀤𑁂𑀯𑀯𑁂𑀤𑀦𑀻𑀬𑀁, 𑀇𑀤𑀁 𑀫𑀦𑀼𑀲𑁆𑀲𑀯𑁂𑀤𑀦𑀻𑀬𑀦𑁆𑀢𑀺, 𑀇𑀤𑀁 𑀯𑀼𑀘𑁆𑀘𑀢𑀺 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀁 𑀓𑀫𑁆𑀫𑀲𑀫𑀸𑀤𑀸𑀦𑀸𑀦𑀁 𑀳𑁂𑀢𑀼𑀲𑁄 𑀞𑀸𑀦𑀲𑁄 𑀅𑀦𑁄𑀥𑀺𑀲𑁄 𑀯𑀺𑀧𑀸𑀓𑀯𑁂𑀫𑀢𑁆𑀢𑀢𑀸 𑀜𑀸𑀡𑀁 𑀧𑀜𑁆𑀘𑀫𑀁 𑀢𑀣𑀸𑀕𑀢𑀩𑀮𑀁.

𑁬𑁨. 𑀇𑀢𑀺 𑀢𑀣𑀸 𑀲𑀫𑀸𑀤𑀺𑀦𑁆𑀦𑀸𑀦𑀁 𑀓𑀫𑁆𑀫𑀸𑀦𑀁 𑀲𑀫𑀸𑀤𑀺𑀦𑁆𑀦𑀸𑀦𑀁 𑀛𑀸𑀦𑀸𑀦𑀁 𑀯𑀺𑀫𑁄𑀓𑁆𑀔𑀸𑀦𑀁 𑀲𑀫𑀸𑀥𑀻𑀦𑀁 𑀲𑀫𑀸𑀧𑀢𑁆𑀢𑀻𑀦𑀁 𑀅𑀬𑀁 𑀲𑀁𑀓𑀺𑀮𑁂𑀲𑁄, 𑀇𑀤𑀁 𑀯𑁄𑀤𑀸𑀦𑀁, 𑀇𑀤𑀁 𑀯𑀼𑀝𑁆𑀞𑀸𑀦𑀁, 𑀏𑀯𑀁 𑀲𑀁𑀓𑀺𑀮𑀺𑀲𑁆𑀲𑀢𑀺, 𑀏𑀯𑀁 𑀯𑁄𑀤𑀸𑀬𑀢𑀺, 𑀏𑀯𑀁 𑀯𑀼𑀝𑁆𑀞𑀳𑀢𑀻𑀢𑀺 𑀜𑀸𑀡𑀁 𑀅𑀦𑀸𑀯𑀭𑀡𑀁.

𑀢𑀢𑁆𑀣 𑀓𑀢𑀺 𑀛𑀸𑀦𑀸𑀦𑀺? 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀺. 𑀓𑀢𑀺 𑀯𑀺𑀫𑁄𑀓𑁆𑀔𑀸? 𑀏𑀓𑀸𑀤𑀲 𑀘 𑀅𑀝𑁆𑀞 𑀘 𑀲𑀢𑁆𑀢 𑀘 𑀢𑀬𑁄 𑀘 𑀤𑁆𑀯𑁂 𑀘. 𑀓𑀢𑀺 𑀲𑀫𑀸𑀥𑀻? 𑀢𑀬𑁄 𑀲𑀫𑀸𑀥𑀻 𑁋 𑀲𑀯𑀺𑀢𑀓𑁆𑀓𑁄 𑀲𑀯𑀺𑀘𑀸𑀭𑁄 𑀲𑀫𑀸𑀥𑀺, 𑀅𑀯𑀺𑀢𑀓𑁆𑀓𑁄 𑀯𑀺𑀘𑀸𑀭𑀫𑀢𑁆𑀢𑁄 𑀲𑀫𑀸𑀥𑀺, 𑀅𑀯𑀺𑀢𑀓𑁆𑀓𑁄 𑀅𑀯𑀺𑀘𑀸𑀭𑁄 𑀲𑀫𑀸𑀥𑀺. 𑀓𑀢𑀺 𑀲𑀫𑀸𑀧𑀢𑁆𑀢𑀺𑀬𑁄? 𑀧𑀜𑁆𑀘 𑀲𑀫𑀸𑀧𑀢𑁆𑀢𑀺𑀬𑁄 𑁋 𑀲𑀜𑁆𑀜𑀸𑀲𑀫𑀸𑀧𑀢𑁆𑀢𑀺 𑀅𑀲𑀜𑁆𑀜𑀸𑀲𑀫𑀸𑀧𑀢𑁆𑀢𑀺 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀲𑀫𑀸𑀧𑀢𑁆𑀢𑀺 𑀯𑀺𑀪𑀽𑀢𑀲𑀜𑁆𑀜𑀸𑀲𑀫𑀸𑀧𑀢𑁆𑀢𑀺 [𑀯𑀺𑀪𑀽𑀢𑀲𑀫𑀸𑀧𑀢𑁆𑀢𑀺 (𑀲𑀻. 𑀓.)] 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺.

𑀢𑀢𑁆𑀣 𑀓𑀢𑀫𑁄 𑀲𑀁𑀓𑀺𑀮𑁂𑀲𑁄? 𑀧𑀞𑀫𑀚𑁆𑀛𑀸𑀦𑀲𑁆𑀲 𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀸 𑀲𑀁𑀓𑀺𑀮𑁂𑀲𑁄. 𑀬𑁂 𑀘 𑀓𑀼𑀓𑁆𑀓𑀼𑀝𑀛𑀸𑀬𑀻 𑀤𑁆𑀯𑁂 𑀧𑀞𑀫𑀓𑀸 𑀬𑁄 𑀯𑀸 𑀧𑀦 𑀓𑁄𑀘𑀺 𑀳𑀸𑀦𑀪𑀸𑀕𑀺𑀬𑁄 𑀲𑀫𑀸𑀥𑀺, 𑀅𑀬𑀁 𑀲𑀁𑀓𑀺𑀮𑁂𑀲𑁄. 𑀢𑀢𑁆𑀣 𑀓𑀢𑀫𑀁 𑀯𑁄𑀤𑀸𑀦𑀁, 𑀦𑀻𑀯𑀭𑀡𑀧𑀸𑀭𑀺𑀲𑀼𑀤𑁆𑀥𑀺, 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀬𑁂 𑀘 𑀓𑀼𑀓𑁆𑀓𑀼𑀝𑀛𑀸𑀬𑀻 𑀤𑁆𑀯𑁂 𑀧𑀘𑁆𑀙𑀺𑀫𑀓𑀸 𑀬𑁄 𑀯𑀸 𑀧𑀦 𑀓𑁄𑀘𑀺 𑀯𑀺𑀲𑁂𑀲𑀪𑀸𑀕𑀺𑀬𑁄 𑀲𑀫𑀸𑀥𑀺, 𑀇𑀤𑀁 𑀯𑁄𑀤𑀸𑀦𑀁. 𑀢𑀢𑁆𑀣 𑀓𑀢𑀫𑀁 𑀯𑀼𑀝𑁆𑀞𑀸𑀦𑀁? 𑀬𑀁 𑀲𑀫𑀸𑀧𑀢𑁆𑀢𑀺𑀯𑀼𑀝𑁆𑀞𑀸𑀦𑀓𑁄𑀲𑀮𑁆𑀮𑀁, 𑀇𑀤𑀁 𑀯𑀼𑀝𑁆𑀞𑀸𑀦𑀁. 𑀬𑀁 𑀏𑀢𑁆𑀣 𑀜𑀸𑀡𑀁 𑀳𑁂𑀢𑀼𑀲𑁄 𑀞𑀸𑀦𑀲𑁄 𑀅𑀦𑁄𑀥𑀺𑀲𑁄, 𑀇𑀤𑀁 𑀯𑀼𑀘𑁆𑀘𑀢𑀺 𑀲𑀩𑁆𑀩𑁂𑀲𑀁 𑀛𑀸𑀦𑀯𑀺𑀫𑁄𑀓𑁆𑀔𑀲𑀫𑀸𑀥𑀺𑀲𑀫𑀸𑀧𑀢𑁆𑀢𑀻𑀦𑀁 𑀲𑀁𑀓𑀺𑀮𑁂𑀲𑀯𑁄𑀤𑀸𑀦𑀯𑀼𑀝𑁆𑀞𑀸𑀦𑀜𑀸𑀡𑀁 𑀙𑀝𑁆𑀞𑀁 𑀢𑀣𑀸𑀕𑀢𑀩𑀮𑀁.

𑁬𑁩. 𑀇𑀢𑀺 𑀢𑀲𑁆𑀲𑁂𑀯 𑀲𑀫𑀸𑀥𑀺𑀲𑁆𑀲 𑀢𑀬𑁄 𑀥𑀫𑁆𑀫𑀸 𑀧𑀭𑀺𑀯𑀸𑀭𑀸 𑀇𑀦𑁆𑀤𑁆𑀭𑀺𑀬𑀸𑀦𑀺 𑀩𑀮𑀸𑀦𑀺 𑀯𑀻𑀭𑀺𑀬𑀫𑀺𑀢𑀺, 𑀢𑀸𑀦𑀺𑀬𑁂𑀯 𑀇𑀦𑁆𑀤𑁆𑀭𑀺𑀬𑀸𑀦𑀺 𑀯𑀻𑀭𑀺𑀬𑀯𑀲𑁂𑀦 𑀩𑀮𑀸𑀦𑀺 𑀪𑀯𑀦𑁆𑀢𑀺, 𑀆𑀥𑀺𑀧𑀢𑁂𑀬𑁆𑀬𑀝𑁆𑀞𑁂𑀦 𑀇𑀦𑁆𑀤𑁆𑀭𑀺𑀬𑀸𑀦𑀺, 𑀅𑀓𑀫𑁆𑀧𑀺𑀬𑀝𑁆𑀞𑁂𑀦 𑀩𑀮𑀸𑀦𑀺, 𑀇𑀢𑀺 𑀢𑁂𑀲𑀁 𑀫𑀼𑀤𑀼𑀫𑀚𑁆𑀛𑀸𑀥𑀺𑀫𑀢𑁆𑀢𑀢𑀸 𑀅𑀬𑀁 𑀫𑀼𑀤𑀺𑀦𑁆𑀤𑁆𑀭𑀺𑀬𑁄 𑀅𑀬𑀁 𑀫𑀚𑁆𑀛𑀺𑀦𑁆𑀤𑁆𑀭𑀺𑀬𑁄 𑀅𑀬𑀁 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁄𑀢𑀺. 𑀢𑀢𑁆𑀣 𑀪𑀕𑀯𑀸 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀲𑀁𑀔𑀺𑀢𑁆𑀢𑁂𑀦 𑀑𑀯𑀸𑀤𑁂𑀦 𑀑𑀯𑀤𑀢𑀺, 𑀫𑀚𑁆𑀛𑀺𑀦𑁆𑀤𑁆𑀭𑀺𑀬𑀁 𑀪𑀕𑀯𑀸 𑀲𑀁𑀔𑀺𑀢𑁆𑀢𑀯𑀺𑀢𑁆𑀣𑀸𑀭𑁂𑀦 𑀑𑀯𑀤𑀢𑀺, 𑀫𑀼𑀤𑀺𑀦𑁆𑀤𑁆𑀭𑀺𑀬𑀁 𑀪𑀕𑀯𑀸 𑀯𑀺𑀢𑁆𑀣𑀸𑀭𑁂𑀦 𑀑𑀯𑀤𑀢𑀺. 𑀢𑀢𑁆𑀣 𑀪𑀕𑀯𑀸 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀲𑁆𑀲 𑀫𑀼𑀤𑀼𑀓𑀁 𑀥𑀫𑁆𑀫𑀤𑁂𑀲𑀦𑀁 𑀉𑀧𑀤𑀺𑀲𑀢𑀺, 𑀫𑀚𑁆𑀛𑀺𑀦𑁆𑀤𑁆𑀭𑀺𑀬𑀲𑁆𑀲 𑀪𑀕𑀯𑀸 𑀫𑀼𑀤𑀼𑀢𑀺𑀓𑁆𑀔𑀥𑀫𑁆𑀫𑀤𑁂𑀲𑀦𑀁 𑀉𑀧𑀤𑀺𑀲𑀢𑀺, 𑀫𑀼𑀤𑀺𑀦𑁆𑀤𑁆𑀭𑀺𑀬𑀲𑁆𑀲 𑀪𑀕𑀯𑀸 𑀢𑀺𑀓𑁆𑀔𑀁 𑀥𑀫𑁆𑀫𑀤𑁂𑀲𑀦𑀁 𑀉𑀧𑀤𑀺𑀲𑀢𑀺. 𑀢𑀢𑁆𑀣 𑀪𑀕𑀯𑀸 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀲𑁆𑀲 𑀲𑀫𑀣𑀁 𑀉𑀧𑀤𑀺𑀲𑀢𑀺, 𑀫𑀚𑁆𑀛𑀺𑀦𑁆𑀤𑁆𑀭𑀺𑀬𑀲𑁆𑀲 𑀪𑀕𑀯𑀸 𑀲𑀫𑀣𑀯𑀺𑀧𑀲𑁆𑀲𑀦𑀁 𑀉𑀧𑀤𑀺𑀲𑀢𑀺, 𑀫𑀼𑀤𑀺𑀦𑁆𑀤𑁆𑀭𑀺𑀬𑀲𑁆𑀲 𑀪𑀕𑀯𑀸 𑀯𑀺𑀧𑀲𑁆𑀲𑀦𑀁 𑀉𑀧𑀤𑀺𑀲𑀢𑀺. 𑀢𑀢𑁆𑀣 𑀪𑀕𑀯𑀸 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀲𑁆𑀲 𑀦𑀺𑀲𑁆𑀲𑀭𑀡𑀁 𑀉𑀧𑀤𑀺𑀲𑀢𑀺, 𑀫𑀚𑁆𑀛𑀺𑀦𑁆𑀤𑁆𑀭𑀺𑀬𑀲𑁆𑀲 𑀪𑀕𑀯𑀸 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀉𑀧𑀤𑀺𑀲𑀢𑀺, 𑀫𑀼𑀤𑀺𑀦𑁆𑀤𑁆𑀭𑀺𑀬𑀲𑁆𑀲 𑀪𑀕𑀯𑀸 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀉𑀧𑀤𑀺𑀲𑀢𑀺. 𑀢𑀢𑁆𑀣 𑀪𑀕𑀯𑀸 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀲𑁆𑀲 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸𑀬 𑀧𑀜𑁆𑀜𑀸𑀧𑀬𑀢𑀺, 𑀫𑀚𑁆𑀛𑀺𑀦𑁆𑀤𑁆𑀭𑀺𑀬𑀲𑁆𑀲 𑀪𑀕𑀯𑀸 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸𑀬 𑀧𑀜𑁆𑀜𑀸𑀧𑀬𑀢𑀺, 𑀫𑀼𑀤𑀺𑀦𑁆𑀤𑁆𑀭𑀺𑀬𑀲𑁆𑀲 𑀪𑀕𑀯𑀸 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀬 𑀧𑀜𑁆𑀜𑀸𑀧𑀬𑀢𑀺.

𑀬𑀁 𑀏𑀢𑁆𑀣 𑀜𑀸𑀡𑀁 𑀳𑁂𑀢𑀼𑀲𑁄 𑀞𑀸𑀦𑀲𑁄 𑀅𑀦𑁄𑀥𑀺𑀲𑁄 𑀅𑀬𑀁 𑀇𑀫𑀁 𑀪𑀽𑀫𑀺𑀁 𑀪𑀸𑀯𑀦𑀜𑁆𑀘 𑀕𑀢𑁄, 𑀇𑀫𑀸𑀬 𑀯𑁂𑀮𑀸𑀬 𑀇𑀫𑀸𑀬 𑀅𑀦𑀼𑀲𑀸𑀲𑀦𑀺𑀬𑀸 𑀏𑀯𑀁 𑀥𑀸𑀢𑀼𑀓𑁄 𑀘𑀸𑀬𑀁 𑀅𑀬𑀁 𑀘𑀲𑁆𑀲 𑀆𑀲𑀬𑁄 𑀅𑀬𑀜𑁆𑀘 𑀅𑀦𑀼𑀲𑀬𑁄 𑀇𑀢𑀺, 𑀇𑀤𑀁 𑀯𑀼𑀘𑁆𑀘𑀢𑀺 𑀧𑀭𑀲𑀢𑁆𑀢𑀸𑀦𑀁 𑀧𑀭𑀧𑀼𑀕𑁆𑀕𑀮𑀸𑀦𑀁 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀯𑁂𑀫𑀢𑁆𑀢𑀢𑀸 𑀜𑀸𑀡𑀁 𑀲𑀢𑁆𑀢𑀫𑀁 𑀢𑀣𑀸𑀕𑀢𑀩𑀮𑀁.

𑀇𑀢𑀺 𑀢𑀢𑁆𑀣 𑀬𑀁 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺. 𑀲𑁂𑀬𑁆𑀬𑀣𑀺𑀤𑀁, 𑀏𑀓𑀫𑁆𑀧𑀺 𑀚𑀸𑀢𑀺𑀁 𑀤𑁆𑀯𑁂𑀧𑀺 𑀚𑀸𑀢𑀺𑀬𑁄 𑀢𑀺𑀲𑁆𑀲𑁄𑀧𑀺 𑀚𑀸𑀢𑀺𑀬𑁄 𑀘𑀢𑀲𑁆𑀲𑁄𑀧𑀺 𑀚𑀸𑀢𑀺𑀬𑁄 𑀧𑀜𑁆𑀘𑀧𑀺 𑀚𑀸𑀢𑀺𑀬𑁄 𑀤𑀲𑀧𑀺 𑀚𑀸𑀢𑀺𑀬𑁄 𑀯𑀻𑀲𑀫𑁆𑀧𑀺 𑀚𑀸𑀢𑀺𑀬𑁄 𑀢𑀺𑀁𑀲𑀫𑁆𑀧𑀺 𑀚𑀸𑀢𑀺𑀬𑁄 𑀘𑀢𑁆𑀢𑀸𑀭𑀻𑀲𑀫𑁆𑀧𑀺 𑀚𑀸𑀢𑀺𑀬𑁄 𑀧𑀜𑁆𑀜𑀸𑀲𑀫𑁆𑀧𑀺 𑀚𑀸𑀢𑀺𑀬𑁄 𑀚𑀸𑀢𑀺𑀲𑀢𑀫𑁆𑀧𑀺 𑀚𑀸𑀢𑀺𑀲𑀳𑀲𑁆𑀲𑀫𑁆𑀧𑀺 𑀚𑀸𑀢𑀺𑀲𑀢𑀲𑀳𑀲𑁆𑀲𑀫𑁆𑀧𑀺 𑀅𑀦𑁂𑀓𑀸𑀦𑀺𑀧𑀺 𑀚𑀸𑀢𑀺𑀲𑀢𑀸𑀦𑀺 𑀅𑀦𑁂𑀓𑀸𑀦𑀺𑀧𑀺 𑀚𑀸𑀢𑀺𑀲𑀳𑀲𑁆𑀲𑀸𑀦𑀺 𑀅𑀦𑁂𑀓𑀸𑀦𑀺𑀧𑀺 𑀚𑀸𑀢𑀺𑀲𑀢𑀲𑀳𑀲𑁆𑀲𑀸𑀦𑀺 𑀅𑀦𑁂𑀓𑁂𑀧𑀺 𑀲𑀁𑀯𑀝𑁆𑀝𑀓𑀧𑁆𑀧𑁂 𑀅𑀦𑁂𑀓𑁂𑀧𑀺 𑀯𑀺𑀯𑀝𑁆𑀝𑀓𑀧𑁆𑀧𑁂 𑀅𑀦𑁂𑀓𑁂𑀧𑀺 𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑀓𑀧𑁆𑀧𑁂. 𑀅𑀫𑀼𑀢𑁆𑀭𑀸𑀲𑀺𑀁 𑀏𑀯𑀁𑀦𑀸𑀫𑁄 𑀏𑀯𑀁𑀕𑁄𑀢𑁆𑀢𑁄 𑀏𑀯𑀁𑀯𑀡𑁆𑀡𑁄 𑀏𑀯𑀫𑀸𑀳𑀸𑀭𑁄 𑀏𑀯𑀁𑀲𑀼𑀔𑀤𑀼𑀓𑁆𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀏𑀯𑀫𑀸𑀬𑀼𑀧𑀭𑀺𑀬𑀦𑁆𑀢𑁄, 𑀲𑁄 𑀢𑀢𑁄 𑀘𑀼𑀢𑁄 𑀅𑀫𑀼𑀢𑁆𑀭 𑀉𑀤𑀧𑀸𑀤𑀺𑀁. 𑀢𑀢𑁆𑀭𑀸𑀧𑀸𑀲𑀺𑀁 𑀏𑀯𑀁𑀦𑀸𑀫𑁄 𑀏𑀯𑀁𑀕𑁄𑀢𑁆𑀢𑁄 𑀏𑀯𑀁𑀯𑀡𑁆𑀡𑁄 𑀏𑀯𑀫𑀸𑀳𑀸𑀭𑁄 𑀏𑀯𑀁𑀲𑀼𑀔𑀤𑀼𑀓𑁆𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀏𑀯𑀫𑀸𑀬𑀼𑀧𑀭𑀺𑀬𑀦𑁆𑀢𑁄, 𑀲𑁄 𑀢𑀢𑁄 𑀘𑀼𑀢𑁄 𑀇𑀥𑀽𑀧𑀧𑀦𑁆𑀦𑁄𑀢𑀺, 𑀇𑀢𑀺 𑀲𑀸𑀓𑀸𑀭𑀁 𑀲𑀉𑀤𑁆𑀤𑁂𑀲𑀁 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺.

𑁬𑁪. 𑀢𑀢𑁆𑀣 𑀲𑀕𑁆𑀕𑀽𑀧𑀕𑁂𑀲𑀼 𑀘 𑀲𑀢𑁆𑀢𑁂𑀲𑀼 𑀫𑀦𑀼𑀲𑁆𑀲𑀽𑀧𑀕𑁂𑀲𑀼 𑀘 𑀲𑀢𑁆𑀢𑁂𑀲𑀼 𑀅𑀧𑀸𑀬𑀽𑀧𑀕𑁂𑀲𑀼 𑀘 𑀲𑀢𑁆𑀢𑁂𑀲𑀼 𑀇𑀫𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀮𑁄𑀪𑀸𑀤𑀬𑁄 𑀉𑀲𑁆𑀲𑀦𑁆𑀦𑀸 𑀅𑀮𑁄𑀪𑀸𑀤𑀬𑁄 𑀫𑀦𑁆𑀤𑀸, 𑀇𑀫𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀮𑁄𑀪𑀸𑀤𑀬𑁄 𑀉𑀲𑁆𑀲𑀦𑁆𑀦𑀸 𑀮𑁄𑀪𑀸𑀤𑀬𑁄 𑀫𑀦𑁆𑀤𑀸, 𑀬𑁂 𑀯𑀸 𑀧𑀦 𑀉𑀲𑁆𑀲𑀦𑁆𑀦𑀸 𑀬𑁂 𑀯𑀸 𑀧𑀦 𑀫𑀦𑁆𑀤𑀸 𑀇𑀫𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀇𑀫𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀉𑀧𑀘𑀺𑀢𑀸𑀦𑀺 𑀇𑀫𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀇𑀫𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀅𑀦𑀼𑀧𑀘𑀺𑀢𑀸𑀦𑀺 𑀅𑀫𑀼𑀓𑀸𑀬 𑀯𑀸 𑀓𑀧𑁆𑀧𑀓𑁄𑀝𑀺𑀬𑀁 𑀓𑀧𑁆𑀧𑀲𑀢𑀲𑀳𑀲𑁆𑀲𑁂 𑀯𑀸 𑀓𑀧𑁆𑀧𑀲𑀳𑀲𑁆𑀲𑁂 𑀯𑀸 𑀓𑀧𑁆𑀧𑀲𑀢𑁂 𑀯𑀸 𑀓𑀧𑁆𑀧𑁂 𑀯𑀸 𑀅𑀦𑁆𑀢𑀭𑀓𑀧𑁆𑀧𑁂 𑀯𑀸 𑀉𑀧𑀟𑁆𑀠𑀓𑀧𑁆𑀧𑁂 𑀯𑀸 𑀲𑀁𑀯𑀘𑁆𑀙𑀭𑁂 𑀯𑀸 𑀉𑀧𑀟𑁆𑀠𑀲𑀁𑀯𑀘𑁆𑀙𑀭𑁂 𑀯𑀸 𑀫𑀸𑀲𑁂 𑀯𑀸 𑀧𑀓𑁆𑀔𑁂 𑀯𑀸 𑀤𑀺𑀯𑀲𑁂 𑀯𑀸 𑀫𑀼𑀳𑀼𑀢𑁆𑀢𑁂 𑀯𑀸 𑀇𑀫𑀺𑀦𑀸 𑀧𑀫𑀸𑀤𑁂𑀦 𑀯𑀸 𑀧𑀲𑀸𑀤𑁂𑀦 𑀯𑀸𑀢𑀺. 𑀢𑀁 𑀢𑀁 𑀪𑀯𑀁 𑀪𑀕𑀯𑀸 𑀅𑀦𑀼𑀲𑁆𑀲𑀭𑀦𑁆𑀢𑁄 𑀅𑀲𑁂𑀲𑀁 𑀚𑀸𑀦𑀸𑀢𑀺, 𑀢𑀢𑁆𑀣 𑀬𑀁 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀲𑀢𑁆𑀢𑁂 𑀧𑀲𑁆𑀲𑀢𑀺 𑀘𑀯𑀫𑀸𑀦𑁂 𑀉𑀧𑀧𑀚𑁆𑀚𑀫𑀸𑀦𑁂 𑀳𑀻𑀦𑁂 𑀧𑀡𑀻𑀢𑁂 𑀲𑀼𑀯𑀡𑁆𑀡𑁂 𑀤𑀼𑀩𑁆𑀩𑀡𑁆𑀡𑁂 𑀲𑀼𑀕𑀢𑁂 𑀤𑀼𑀕𑁆𑀕𑀢𑁂 𑀬𑀣𑀸𑀓𑀫𑁆𑀫𑀽𑀧𑀕𑁂 𑀲𑀢𑁆𑀢𑁂 𑀧𑀚𑀸𑀦𑀸𑀢𑀺 𑀇𑀫𑁂 𑀯𑀢 𑀪𑁄𑀦𑁆𑀢𑁄 𑀲𑀢𑁆𑀢𑀸 𑀓𑀸𑀬𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀯𑀘𑀻𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀫𑀦𑁄𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀅𑀭𑀺𑀬𑀸𑀦𑀁 𑀉𑀧𑀯𑀸𑀤𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀸, 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀦𑁆𑀦𑀸.

𑀇𑀫𑁂 𑀯𑀸 𑀧𑀦 𑀪𑁄𑀦𑁆𑀢𑁄 𑀲𑀢𑁆𑀢𑀸 𑀓𑀸𑀬𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀯𑀘𑀻𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀫𑀦𑁄𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀅𑀭𑀺𑀬𑀸𑀦𑀁 𑀅𑀦𑀼𑀧𑀯𑀸𑀤𑀓𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀸, 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀦𑁆𑀦𑀸, 𑀢𑀢𑁆𑀣 𑀲𑀕𑁆𑀕𑀽𑀧𑀕𑁂𑀲𑀼 𑀘 𑀲𑀢𑁆𑀢𑁂𑀲𑀼 𑀫𑀦𑀼𑀲𑁆𑀲𑀽𑀧𑀕𑁂𑀲𑀼 𑀘 𑀲𑀢𑁆𑀢𑁂𑀲𑀼 𑀅𑀧𑀸𑀬𑀽𑀧𑀕𑁂𑀲𑀼 𑀘 𑀲𑀢𑁆𑀢𑁂𑀲𑀼 𑀇𑀫𑀺𑀦𑀸 𑀧𑀼𑀕𑁆𑀕𑀮𑁂𑀦 𑀏𑀯𑀭𑀽𑀧𑀁 𑀓𑀫𑁆𑀫𑀁 𑀅𑀫𑀼𑀓𑀸𑀬 𑀓𑀧𑁆𑀧𑀓𑁄𑀝𑀺𑀬𑀁 𑀉𑀧𑀘𑀺𑀢𑀁 𑀓𑀧𑁆𑀧𑀲𑀢𑀲𑀳𑀲𑁆𑀲𑁂 𑀯𑀸 𑀓𑀧𑁆𑀧𑀲𑀳𑀲𑁆𑀲𑁂 𑀯𑀸 𑀓𑀧𑁆𑀧𑀲𑀢𑁂 𑀯𑀸 𑀓𑀧𑁆𑀧𑁂 𑀯𑀸 𑀅𑀦𑁆𑀢𑀭𑀓𑀧𑁆𑀧𑁂 𑀯𑀸 𑀉𑀧𑀟𑁆𑀠𑀓𑀧𑁆𑀧𑁂 𑀯𑀸 𑀲𑀁𑀯𑀘𑁆𑀙𑀭𑁂 𑀯𑀸 𑀉𑀧𑀟𑁆𑀠𑀲𑀁𑀯𑀘𑁆𑀙𑀭𑁂 𑀯𑀸 𑀫𑀸𑀲𑁂 𑀯𑀸 𑀧𑀓𑁆𑀔𑁂 𑀯𑀸 𑀤𑀺𑀯𑀲𑁂 𑀯𑀸 𑀫𑀼𑀳𑀼𑀢𑁆𑀢𑁂 𑀯𑀸 𑀇𑀫𑀺𑀦𑀸 𑀧𑀫𑀸𑀤𑁂𑀦 𑀯𑀸 𑀧𑀲𑀸𑀤𑁂𑀦 𑀯𑀸𑀢𑀺. 𑀇𑀫𑀸𑀦𑀺 𑀪𑀕𑀯𑀢𑁄 𑀤𑁆𑀯𑁂 𑀜𑀸𑀡𑀸𑀦𑀺 𑁋 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀜𑁆𑀘 𑀤𑀺𑀩𑁆𑀩𑀘𑀓𑁆𑀔𑀼 𑀘 𑀅𑀝𑁆𑀞𑀫𑀁 𑀦𑀯𑀫𑀁 𑀢𑀣𑀸𑀕𑀢𑀩𑀮𑀁.

𑀇𑀢𑀺 𑀢𑀢𑁆𑀣 𑀬𑀁 𑀲𑀩𑁆𑀩𑀜𑁆𑀜𑀼𑀢𑀸 𑀧𑀢𑁆𑀢𑀸 𑀯𑀺𑀤𑀺𑀢𑀸 𑀲𑀩𑁆𑀩𑀥𑀫𑁆𑀫𑀸 𑀯𑀺𑀭𑀚𑀁 𑀯𑀻𑀢𑀫𑀮𑀁 𑀉𑀧𑁆𑀧𑀦𑁆𑀦𑀁 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁 𑀦𑀺𑀳𑀢𑁄 𑀫𑀸𑀭𑁄 𑀩𑁄𑀥𑀺𑀫𑀽𑀮𑁂, 𑀇𑀤𑀁 𑀪𑀕𑀯𑀢𑁄 𑀤𑀲𑀫𑀁 𑀩𑀮𑀁 𑀲𑀩𑁆𑀩𑀸𑀲𑀯𑀧𑀭𑀺𑀓𑁆𑀔𑀬𑀁 𑀜𑀸𑀡𑀁. 𑀤𑀲𑀩𑀮𑀲𑀫𑀦𑁆𑀦𑀸𑀕𑀢𑀸 𑀳𑀺 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄𑀢𑀺.

𑀦𑀺𑀬𑀼𑀢𑁆𑀢𑁄 𑀯𑀺𑀘𑀬𑁄 𑀳𑀸𑀭𑀲𑀫𑁆𑀧𑀸𑀢𑁄.