𑁧𑁬. 𑀲𑀫𑀸𑀭𑁄𑀧𑀦𑀳𑀸𑀭𑀯𑀺𑀪𑀗𑁆𑀕𑁄

𑁫𑁦. 𑀢𑀢𑁆𑀣 𑀓𑀢𑀫𑁄 𑀲𑀫𑀸𑀭𑁄𑀧𑀦𑁄 𑀳𑀸𑀭𑁄? ‘‘𑀬𑁂 𑀥𑀫𑁆𑀫𑀸 𑀬𑀁𑀫𑀽𑀮𑀸, 𑀬𑁂 𑀘𑁂𑀓𑀢𑁆𑀣𑀸 𑀧𑀓𑀸𑀲𑀺𑀢𑀸 𑀫𑀼𑀦𑀺𑀦𑀸’’𑀢𑀺.

𑀏𑀓𑀲𑁆𑀫𑀺𑀁 𑀧𑀤𑀝𑁆𑀞𑀸𑀦𑁂 𑀬𑀢𑁆𑀢𑀓𑀸𑀦𑀺 𑀧𑀤𑀝𑁆𑀞𑀸𑀦𑀸𑀦𑀺 𑀑𑀢𑀭𑀦𑁆𑀢𑀺, 𑀲𑀩𑁆𑀩𑀸𑀦𑀺 𑀢𑀸𑀦𑀺 𑀲𑀫𑀸𑀭𑁄𑀧𑀬𑀺𑀢𑀩𑁆𑀩𑀸𑀦𑀺. 𑀬𑀣𑀸 𑀆𑀯𑀝𑁆𑀝𑁂 𑀳𑀸𑀭𑁂 𑀩𑀳𑀼𑀓𑀸𑀦𑀺 𑀧𑀤𑀝𑁆𑀞𑀸𑀦𑀸𑀦𑀺 𑀑𑀢𑀭𑀦𑁆𑀢𑀻𑀢𑀺. 𑀢𑀢𑁆𑀣 𑀲𑀫𑀸𑀭𑁄𑀧𑀦𑀸 𑀘𑀢𑀼𑀩𑁆𑀩𑀺𑀥𑀸 𑀧𑀤𑀝𑁆𑀞𑀸𑀦𑀁, 𑀯𑁂𑀯𑀘𑀦𑀁, 𑀪𑀸𑀯𑀦𑀸, 𑀧𑀳𑀸𑀦𑀫𑀺𑀢𑀺.

𑀢𑀢𑁆𑀣 𑀓𑀢𑀫𑀸 𑀧𑀤𑀝𑁆𑀞𑀸𑀦𑁂𑀦 𑀲𑀫𑀸𑀭𑁄𑀧𑀦𑀸?

‘‘𑀲𑀩𑁆𑀩𑀧𑀸𑀧𑀲𑁆𑀲 𑀅𑀓𑀭𑀡𑀁, 𑀓𑀼𑀲𑀮𑀲𑁆𑀲 𑀉𑀧𑀲𑀫𑁆𑀧𑀤𑀸;

𑀲𑀘𑀺𑀢𑁆𑀢𑀧𑀭𑀺𑀬𑁄𑀤𑀧𑀦𑀁, 𑀏𑀢𑀁 𑀩𑀼𑀤𑁆𑀥𑀸𑀦 𑀲𑀸𑀲𑀦’’𑀦𑁆𑀢𑀺.

𑀢𑀲𑁆𑀲 𑀓𑀺𑀁 𑀧𑀤𑀝𑁆𑀞𑀸𑀦𑀁? 𑀢𑀻𑀡𑀺 𑀲𑀼𑀘𑀭𑀺𑀢𑀸𑀦𑀺 𑁋 𑀓𑀸𑀬𑀲𑀼𑀘𑀭𑀺𑀢𑀁 𑀯𑀘𑀻𑀲𑀼𑀘𑀭𑀺𑀢𑀁 𑀫𑀦𑁄𑀲𑀼𑀘𑀭𑀺𑀢𑀁 𑁋 𑀇𑀤𑀁 𑀧𑀤𑀝𑁆𑀞𑀸𑀦𑀁; 𑀢𑀢𑁆𑀣 𑀬𑀁 𑀓𑀸𑀬𑀺𑀓𑀜𑁆𑀘 𑀯𑀸𑀘𑀲𑀺𑀓𑀜𑁆𑀘 𑀲𑀼𑀘𑀭𑀺𑀢𑀁, 𑀅𑀬𑀁 𑀲𑀻𑀮𑀓𑁆𑀔𑀦𑁆𑀥𑁄. 𑀫𑀦𑁄𑀲𑀼𑀘𑀭𑀺𑀢𑁂 𑀬𑀸 𑀅𑀦𑀪𑀺𑀚𑁆𑀛𑀸 𑀅𑀩𑁆𑀬𑀸𑀧𑀸𑀤𑁄 𑀘, 𑀅𑀬𑀁 𑀲𑀫𑀸𑀥𑀺𑀓𑁆𑀔𑀦𑁆𑀥𑁄. 𑀬𑀸 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀅𑀬𑀁 𑀧𑀜𑁆𑀜𑀸𑀓𑁆𑀔𑀦𑁆𑀥𑁄. 𑀇𑀤𑀁 𑀧𑀤𑀝𑁆𑀞𑀸𑀦𑀁, 𑀢𑀢𑁆𑀣 𑀲𑀻𑀮𑀓𑁆𑀔𑀦𑁆𑀥𑁄 𑀘 𑀲𑀫𑀸𑀥𑀺𑀓𑁆𑀔𑀦𑁆𑀥𑁄 𑀘 𑀲𑀫𑀣𑁄, 𑀧𑀜𑁆𑀜𑀸𑀓𑁆𑀔𑀦𑁆𑀥𑁄 𑀯𑀺𑀧𑀲𑁆𑀲𑀦𑀸. 𑀇𑀤𑀁 𑀧𑀤𑀝𑁆𑀞𑀸𑀦𑀁, 𑀢𑀢𑁆𑀣 𑀲𑀫𑀣𑀲𑁆𑀲 𑀨𑀮𑀁 𑀭𑀸𑀕𑀯𑀺𑀭𑀸𑀕𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺, 𑀯𑀺𑀧𑀲𑁆𑀲𑀦𑀸 𑀨𑀮𑀁 𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀸 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺. 𑀇𑀤𑀁 𑀧𑀤𑀝𑁆𑀞𑀸𑀦𑀁.

𑀯𑀦𑀁 𑀯𑀦𑀣𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀓𑀺𑀜𑁆𑀘 𑀯𑀦𑀁? 𑀓𑁄 𑀘 𑀯𑀦𑀣𑁄? 𑀯𑀦𑀁 𑀦𑀸𑀫 𑀧𑀜𑁆𑀘 𑀓𑀸𑀫𑀕𑀼𑀡𑀸, 𑀢𑀡𑁆𑀳𑀸 𑀯𑀦𑀣𑁄. 𑀇𑀤𑀁 𑀧𑀤𑀝𑁆𑀞𑀸𑀦𑀁. 𑀯𑀦𑀁 𑀦𑀸𑀫 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑁄 ‘‘𑀇𑀢𑁆𑀣𑀻’’𑀢𑀺 𑀯𑀸 ‘‘𑀧𑀼𑀭𑀺𑀲𑁄’’𑀢𑀺 𑀯𑀸. 𑀯𑀦𑀣𑁄 𑀦𑀸𑀫 𑀢𑁂𑀲𑀁 𑀢𑁂𑀲𑀁 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀁 𑀅𑀦𑀼𑀩𑁆𑀬𑀜𑁆𑀚𑀦𑀕𑁆𑀕𑀸𑀳𑁄 ‘‘𑀅𑀳𑁄 𑀘𑀓𑁆𑀔𑀼, 𑀅𑀳𑁄 𑀲𑁄𑀢𑀁, 𑀅𑀳𑁄 𑀖𑀸𑀦𑀁, 𑀅𑀳𑁄 𑀚𑀺𑀯𑁆𑀳𑀸, 𑀅𑀳𑁄 𑀓𑀸𑀬𑁄, 𑀇𑀢𑀺. 𑀇𑀤𑀁 𑀧𑀤𑀝𑁆𑀞𑀸𑀦𑀁. 𑀯𑀦𑀁 𑀦𑀸𑀫 𑀙 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀸𑀦𑀺 𑀆𑀬𑀢𑀦𑀸𑀦𑀺 𑀅𑀧𑀭𑀺𑀜𑁆𑀜𑀸𑀢𑀸𑀦𑀺. 𑀬𑀁 𑀢𑀤𑀼𑀪𑀬𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀲𑀁𑀬𑁄𑀚𑀦𑀁, 𑀅𑀬𑀁 𑀯𑀦𑀣𑁄. 𑀇𑀤𑀁 𑀧𑀤𑀝𑁆𑀞𑀸𑀦𑀁. 𑀯𑀦𑀁 𑀦𑀸𑀫 𑀅𑀦𑀼𑀲𑀬𑁄. 𑀯𑀦𑀣𑁄 𑀦𑀸𑀫 𑀧𑀭𑀺𑀬𑀼𑀝𑁆𑀞𑀸𑀦𑀁. 𑀇𑀤𑀁 𑀧𑀤𑀝𑁆𑀞𑀸𑀦𑀁. 𑀢𑁂𑀦𑀸𑀳 𑀪𑀕𑀯𑀸 ‘‘𑀙𑁂𑀢𑁆𑀯𑀸 𑀯𑀦𑀜𑁆𑀘 𑀯𑀦𑀣𑀜𑁆𑀘𑀸’’𑀢𑀺. 𑀅𑀬𑀁 𑀧𑀤𑀝𑁆𑀞𑀸𑀦𑁂𑀦 𑀲𑀫𑀸𑀭𑁄𑀧𑀦𑀸.

𑁫𑁧. 𑀢𑀢𑁆𑀣 𑀓𑀢𑀫𑀸 𑀯𑁂𑀯𑀘𑀦𑁂𑀦 𑀲𑀫𑀸𑀭𑁄𑀧𑀦𑀸? 𑀭𑀸𑀕𑀯𑀺𑀭𑀸𑀕𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀲𑁂𑀓𑁆𑀔𑀨𑀮𑀁; 𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀸 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺 𑀅𑀲𑁂𑀓𑁆𑀔𑀨𑀮𑀁. 𑀇𑀤𑀁 𑀯𑁂𑀯𑀘𑀦𑀁. 𑀭𑀸𑀕𑀯𑀺𑀭𑀸𑀕𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀅𑀦𑀸𑀕𑀸𑀫𑀺𑀨𑀮𑀁; 𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀸 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺 𑀅𑀕𑁆𑀕𑀨𑀮𑀁 𑀅𑀭𑀳𑀢𑁆𑀢𑀁. 𑀇𑀤𑀁 𑀯𑁂𑀯𑀘𑀦𑀁. 𑀭𑀸𑀕𑀯𑀺𑀭𑀸𑀕𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀓𑀸𑀫𑀥𑀸𑀢𑀼𑀲𑀫𑀢𑀺𑀓𑁆𑀓𑀫𑀦𑀁; 𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀸 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺 𑀢𑁂𑀥𑀸𑀢𑀼𑀲𑀫𑀢𑀺𑀓𑁆𑀓𑀫𑀦𑀁. 𑀇𑀤𑀁 𑀯𑁂𑀯𑀘𑀦𑀁. 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁, 𑀧𑀜𑁆𑀜𑀸𑀩𑀮𑀁, 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸, 𑀧𑀜𑁆𑀜𑀸𑀓𑁆𑀔𑀦𑁆𑀥𑁄, 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀜𑀸𑀡𑀁, 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀢𑀻𑀭𑀡𑀸, 𑀲𑀦𑁆𑀢𑀻𑀭𑀡𑀸, 𑀳𑀺𑀭𑀻, 𑀯𑀺𑀧𑀲𑁆𑀲𑀦𑀸, 𑀥𑀫𑁆𑀫𑁂 𑀜𑀸𑀡𑀁, 𑀲𑀩𑁆𑀩𑀁, 𑀇𑀤𑀁 𑀯𑁂𑀯𑀘𑀦𑀁. 𑀅𑀬𑀁 𑀯𑁂𑀯𑀘𑀦𑁂𑀦 𑀲𑀫𑀸𑀭𑁄𑀧𑀦𑀸.

𑀢𑀢𑁆𑀣 𑀓𑀢𑀫𑀸 𑀪𑀸𑀯𑀦𑀸𑀬 𑀲𑀫𑀸𑀭𑁄𑀧𑀦𑀸? 𑀬𑀣𑀸𑀳 𑀪𑀕𑀯𑀸 ‘‘𑀢𑀲𑁆𑀫𑀸𑀢𑀺𑀳 𑀢𑁆𑀯𑀁 𑀪𑀺𑀓𑁆𑀔𑀼 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀸𑀳𑀺, 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁’’. 𑀆𑀢𑀸𑀧𑀻𑀢𑀺 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁. 𑀲𑀫𑁆𑀧𑀚𑀸𑀦𑁄𑀢𑀺 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁. 𑀲𑀢𑀺𑀫𑀸𑀢𑀺 𑀲𑀢𑀺𑀦𑁆𑀤𑁆𑀭𑀺𑀬𑀁. 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀦𑁆𑀢𑀺 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁. 𑀏𑀯𑀁 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀺𑀦𑁄 𑀯𑀺𑀳𑀭𑀢𑁄 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺. 𑀓𑁂𑀦 𑀓𑀸𑀭𑀡𑁂𑀦? 𑀏𑀓𑀮𑀓𑁆𑀔𑀡𑀢𑁆𑀢𑀸 𑀘𑀢𑀼𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁. 𑀘𑀢𑀽𑀲𑀼 𑀲𑀢𑀺𑀧𑀝𑁆𑀞𑀸𑀦𑁂𑀲𑀼 𑀪𑀸𑀯𑀺𑀬𑀫𑀸𑀦𑁂𑀲𑀼 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺. 𑀘𑀢𑀽𑀲𑀼 𑀲𑀫𑁆𑀫𑀧𑁆𑀧𑀥𑀸𑀦𑁂𑀲𑀼 𑀪𑀸𑀯𑀺𑀬𑀫𑀸𑀦𑁂𑀲𑀼 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺. 𑀘𑀢𑀽𑀲𑀼 𑀇𑀤𑁆𑀥𑀺𑀧𑀸𑀤𑁂𑀲𑀼 𑀪𑀸𑀯𑀺𑀬𑀫𑀸𑀦𑁂𑀲𑀼 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺. 𑀏𑀯𑀁 𑀲𑀩𑁆𑀩𑁂. 𑀓𑁂𑀦 𑀓𑀸𑀭𑀡𑁂𑀦? 𑀲𑀩𑁆𑀩𑁂 𑀳𑀺 𑀩𑁄𑀥𑀗𑁆𑀕𑀫𑀸 𑀥𑀫𑁆𑀫𑀸 𑀩𑁄𑀥𑀺𑀧𑀓𑁆𑀔𑀺𑀬𑀸 𑀦𑀺𑀬𑁆𑀬𑀸𑀦𑀺𑀓𑀮𑀓𑁆𑀔𑀡𑁂𑀦 𑀏𑀓𑀮𑀓𑁆𑀔𑀡𑀸, 𑀢𑁂 𑀏𑀓𑀮𑀓𑁆𑀔𑀡𑀢𑁆𑀢𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺. 𑀅𑀬𑀁 𑀪𑀸𑀯𑀦𑀸𑀬 𑀲𑀫𑀸𑀭𑁄𑀧𑀦𑀸.

𑀢𑀢𑁆𑀣 𑀓𑀢𑀫𑀸 𑀧𑀳𑀸𑀦𑁂𑀦 𑀲𑀫𑀸𑀭𑁄𑀧𑀦𑀸? 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀦𑁆𑀢𑁄 ‘‘𑀅𑀲𑀼𑀪𑁂 𑀲𑀼𑀪’’𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑀁 𑀧𑀚𑀳𑀢𑀺, 𑀓𑀩𑀴𑀻𑀓𑀸𑀭𑁄 𑀘𑀲𑁆𑀲 𑀆𑀳𑀸𑀭𑁄 𑀧𑀭𑀺𑀜𑁆𑀜𑀁 𑀕𑀘𑁆𑀙𑀢𑀺, 𑀓𑀸𑀫𑀼𑀧𑀸𑀤𑀸𑀦𑁂𑀦 𑀘 𑀅𑀦𑀼𑀧𑀸𑀤𑀸𑀦𑁄 𑀪𑀯𑀢𑀺, 𑀓𑀸𑀫𑀬𑁄𑀕𑁂𑀦 𑀘 𑀯𑀺𑀲𑀁𑀬𑀼𑀢𑁆𑀢𑁄 𑀪𑀯𑀢𑀺, 𑀅𑀪𑀺𑀚𑁆𑀛𑀸𑀓𑀸𑀬𑀕𑀦𑁆𑀣𑁂𑀦 𑀘 𑀯𑀺𑀧𑁆𑀧𑀬𑀼𑀚𑁆𑀚𑀢𑀺, 𑀓𑀸𑀫𑀸𑀲𑀯𑁂𑀦 𑀘 𑀅𑀦𑀸𑀲𑀯𑁄 𑀪𑀯𑀢𑀺, 𑀓𑀸𑀫𑁄𑀖𑀜𑁆𑀘 𑀉𑀢𑁆𑀢𑀺𑀡𑁆𑀡𑁄 𑀪𑀯𑀢𑀺, 𑀭𑀸𑀕𑀲𑀮𑁆𑀮𑁂𑀦 𑀘 𑀯𑀺𑀲𑀮𑁆𑀮𑁄 𑀪𑀯𑀢𑀺, 𑀭𑀽𑀧𑀽𑀧𑀺𑀓𑀸 [𑀭𑀽𑀧𑀼𑀧𑀺𑀓𑀸 (𑀓.) 𑀏𑀯𑀫𑀼𑀧𑀭𑀺𑀧𑀺] 𑀘𑀲𑁆𑀲 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺 𑀧𑀭𑀺𑀜𑁆𑀜𑀁 𑀕𑀘𑁆𑀙𑀢𑀺, 𑀭𑀽𑀧𑀥𑀸𑀢𑀼𑀬𑀁 𑀘𑀲𑁆𑀲 𑀭𑀸𑀕𑁄 𑀧𑀳𑀻𑀦𑁄 𑀪𑀯𑀢𑀺, 𑀦 𑀘 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀺.

𑀯𑁂𑀤𑀦𑀸𑀲𑀼 𑀯𑁂𑀤𑀦𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀦𑁆𑀢𑁄 ‘‘𑀤𑀼𑀓𑁆𑀔𑁂 𑀲𑀼𑀔’’𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑀁 𑀧𑀚𑀳𑀢𑀺, 𑀨𑀲𑁆𑀲𑁄 𑀘𑀲𑁆𑀲 𑀆𑀳𑀸𑀭𑁄 𑀧𑀭𑀺𑀜𑁆𑀜𑀁 𑀕𑀘𑁆𑀙𑀢𑀺, 𑀪𑀯𑀽𑀧𑀸𑀤𑀸𑀦𑁂𑀦 𑀘 𑀅𑀦𑀼𑀧𑀸𑀤𑀸𑀦𑁄 𑀪𑀯𑀢𑀺, 𑀪𑀯𑀬𑁄𑀕𑁂𑀦 𑀘 𑀯𑀺𑀲𑀁𑀬𑀼𑀢𑁆𑀢𑁄 𑀪𑀯𑀢𑀺, 𑀩𑁆𑀬𑀸𑀧𑀸𑀤𑀓𑀸𑀬𑀕𑀦𑁆𑀣𑁂𑀦 𑀘 𑀯𑀺𑀧𑁆𑀧𑀬𑀼𑀚𑁆𑀚𑀢𑀺, 𑀪𑀯𑀸𑀲𑀯𑁂𑀦 𑀘 𑀅𑀦𑀸𑀲𑀯𑁄 𑀪𑀯𑀢𑀺, 𑀪𑀯𑁄𑀖𑀜𑁆𑀘 𑀉𑀢𑁆𑀢𑀺𑀡𑁆𑀡𑁄 𑀪𑀯𑀢𑀺, 𑀤𑁄𑀲𑀲𑀮𑁆𑀮𑁂𑀦 𑀘 𑀯𑀺𑀲𑀮𑁆𑀮𑁄 𑀪𑀯𑀢𑀺, 𑀯𑁂𑀤𑀦𑀽𑀧𑀺𑀓𑀸 𑀘𑀲𑁆𑀲 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺 𑀧𑀭𑀺𑀜𑁆𑀜𑀁 𑀕𑀘𑁆𑀙𑀢𑀺, 𑀯𑁂𑀤𑀦𑀸𑀥𑀸𑀢𑀼𑀬𑀁 𑀘𑀲𑁆𑀲 𑀭𑀸𑀕𑁄 𑀧𑀳𑀻𑀦𑁄 𑀪𑀯𑀢𑀺, 𑀦 𑀘 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑀢𑀺.

𑀘𑀺𑀢𑁆𑀢𑁂 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀦𑁆𑀢𑁄 ‘‘𑀅𑀦𑀺𑀘𑁆𑀘𑁂 𑀦𑀺𑀘𑁆𑀘’’𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑀁 𑀧𑀚𑀳𑀢𑀺, 𑀯𑀺𑀜𑁆𑀜𑀸𑀡𑀁 𑀘𑀲𑁆𑀲 𑀆𑀳𑀸𑀭𑁄 𑀧𑀭𑀺𑀜𑁆𑀜𑀁 𑀕𑀘𑁆𑀙𑀢𑀺, 𑀤𑀺𑀝𑁆𑀞𑀼𑀧𑀸𑀤𑀸𑀦𑁂𑀦 𑀘 𑀅𑀦𑀼𑀧𑀸𑀤𑀸𑀦𑁄 𑀪𑀯𑀢𑀺, 𑀤𑀺𑀝𑁆𑀞𑀺𑀬𑁄𑀕𑁂𑀦 𑀘 𑀯𑀺𑀲𑀁𑀬𑀼𑀢𑁆𑀢𑁄 𑀪𑀯𑀢𑀺, 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀓𑀸𑀬𑀕𑀦𑁆𑀣𑁂𑀦 𑀘 𑀯𑀺𑀧𑁆𑀧𑀬𑀼𑀚𑁆𑀚𑀢𑀺, 𑀤𑀺𑀝𑁆𑀞𑀸𑀲𑀯𑁂𑀦 𑀘 𑀅𑀦𑀸𑀲𑀯𑁄 𑀪𑀯𑀢𑀺, 𑀤𑀺𑀝𑁆𑀞𑁄𑀖𑀜𑁆𑀘 𑀉𑀢𑁆𑀢𑀺𑀡𑁆𑀡𑁄 𑀪𑀯𑀢𑀺, 𑀫𑀸𑀦𑀲𑀮𑁆𑀮𑁂𑀦 𑀘 𑀯𑀺𑀲𑀮𑁆𑀮𑁄 𑀪𑀯𑀢𑀺, 𑀲𑀜𑁆𑀜𑀽𑀧𑀺𑀓𑀸 𑀘𑀲𑁆𑀲 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺 𑀧𑀭𑀺𑀜𑁆𑀜𑀁 𑀕𑀘𑁆𑀙𑀢𑀺, 𑀲𑀜𑁆𑀜𑀸𑀥𑀸𑀢𑀼𑀬𑀁 𑀘𑀲𑁆𑀲 𑀭𑀸𑀕𑁄 𑀧𑀳𑀻𑀦𑁄 𑀪𑀯𑀢𑀺, 𑀦 𑀘 𑀪𑀬𑀸𑀕𑀢𑀺𑀁 𑀕𑀘𑁆𑀙𑀢𑀺.

𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀦𑁆𑀢𑁄 ‘‘𑀅𑀦𑀢𑁆𑀢𑀦𑀺 [𑀅𑀦𑀢𑁆𑀢𑀦𑀺𑀬𑁂 (𑀲𑀻.) 𑀧𑀲𑁆𑀲 𑀅. 𑀦𑀺. 𑁪.𑁪𑁯] 𑀅𑀢𑁆𑀢𑀸’’𑀢𑀺 𑀯𑀺𑀧𑀮𑁆𑀮𑀸𑀲𑀁 𑀧𑀚𑀳𑀢𑀺, 𑀫𑀦𑁄𑀲𑀜𑁆𑀘𑁂𑀢𑀦𑀸 𑀘𑀲𑁆𑀲 𑀆𑀳𑀸𑀭𑁄 𑀧𑀭𑀺𑀜𑁆𑀜𑀁 𑀕𑀘𑁆𑀙𑀢𑀺, 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑁂𑀦 𑀘 𑀅𑀦𑀼𑀧𑀸𑀤𑀸𑀦𑁄 𑀪𑀯𑀢𑀺, 𑀅𑀯𑀺𑀚𑁆𑀚𑀸𑀬𑁄𑀕𑁂𑀦 𑀘 𑀯𑀺𑀲𑀁𑀬𑀼𑀢𑁆𑀢𑁄 𑀪𑀯𑀢𑀺, 𑀇𑀤𑀁𑀲𑀘𑁆𑀘𑀸𑀪𑀺𑀦𑀺𑀯𑁂𑀲𑀓𑀸𑀬𑀕𑀦𑁆𑀣𑁂𑀦 𑀘 𑀯𑀺𑀧𑁆𑀧𑀬𑀼𑀚𑁆𑀚𑀢𑀺, 𑀅𑀯𑀺𑀚𑁆𑀚𑀸𑀲𑀯𑁂𑀦 𑀘 𑀅𑀦𑀸𑀲𑀯𑁄 𑀪𑀯𑀢𑀺, 𑀅𑀯𑀺𑀚𑁆𑀚𑁄𑀖𑀜𑁆𑀘 𑀉𑀢𑁆𑀢𑀺𑀡𑁆𑀡𑁄 𑀪𑀯𑀢𑀺, 𑀫𑁄𑀳𑀲𑀮𑁆𑀮𑁂𑀦 𑀘 𑀯𑀺𑀲𑀮𑁆𑀮𑁄 𑀪𑀯𑀢𑀺, 𑀲𑀗𑁆𑀔𑀸𑀭𑀽𑀧𑀺𑀓𑀸 𑀘𑀲𑁆𑀲 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺 𑀧𑀭𑀺𑀜𑁆𑀜𑀁 𑀕𑀘𑁆𑀙𑀢𑀺, 𑀲𑀗𑁆𑀔𑀸𑀭𑀥𑀸𑀢𑀼𑀬𑀁 𑀘𑀲𑁆𑀲 𑀭𑀸𑀕𑁄 𑀧𑀳𑀻𑀦𑁄 𑀪𑀯𑀢𑀺, 𑀦 𑀘 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑀢𑀺. 𑀅𑀬𑀁 𑀧𑀳𑀸𑀦𑁂𑀦 𑀲𑀫𑀸𑀭𑁄𑀧𑀦𑀸.

𑀢𑁂𑀦𑀸𑀳 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀬𑀦𑁄 𑁋

‘‘𑀬𑁂 𑀥𑀫𑁆𑀫𑀸 𑀬𑀁 𑀫𑀽𑀮𑀸, 𑀬𑁂 𑀘𑁂𑀓𑀢𑁆𑀣𑀸 𑀧𑀓𑀸𑀲𑀺𑀢𑀸 𑀫𑀼𑀦𑀺𑀦𑀸;

𑀢𑁂 𑀲𑀫𑀸𑀭𑁄𑀧𑀬𑀺𑀢𑀩𑁆𑀩𑀸, 𑀏𑀲 𑀲𑀫𑀸𑀭𑁄𑀧𑀦𑁄 𑀳𑀸𑀭𑁄’’𑀢𑀺.

𑀦𑀺𑀬𑀼𑀢𑁆𑀢𑁄 𑀲𑀫𑀸𑀭𑁄𑀧𑀦𑁄 𑀳𑀸𑀭𑁄.

𑀦𑀺𑀝𑁆𑀞𑀺𑀢𑁄 𑀘 𑀳𑀸𑀭𑀯𑀺𑀪𑀗𑁆𑀕𑁄.