𑁧𑁦. 𑀯𑁂𑀯𑀘𑀦𑀳𑀸𑀭𑀯𑀺𑀪𑀗𑁆𑀕𑁄

𑁩𑁭. 𑀢𑀢𑁆𑀣 𑀓𑀢𑀫𑁄 𑀯𑁂𑀯𑀘𑀦𑁄 𑀳𑀸𑀭𑁄? ‘‘𑀯𑁂𑀯𑀘𑀦𑀸𑀦𑀺 𑀩𑀳𑀽𑀦𑀻’’𑀢𑀺. 𑀬𑀣𑀸 𑀏𑀓𑀁 𑀪𑀕𑀯𑀸 𑀥𑀫𑁆𑀫𑀁 𑀅𑀜𑁆𑀜𑀫𑀜𑁆𑀜𑁂𑀳𑀺 𑀯𑁂𑀯𑀘𑀦𑁂𑀳𑀺 𑀦𑀺𑀤𑁆𑀤𑀺𑀲𑀢𑀺. 𑀬𑀣𑀸𑀳 𑀪𑀕𑀯𑀸 𑁋

‘‘𑀆𑀲𑀸 𑀘 𑀧𑀺𑀳𑀸 𑀅𑀪𑀺𑀦𑀦𑁆𑀤𑀦𑀸 𑀘, 𑀅𑀦𑁂𑀓𑀥𑀸𑀢𑀽𑀲𑀼 𑀲𑀭𑀸 𑀧𑀢𑀺𑀝𑁆𑀞𑀺𑀢𑀸;

𑀅𑀜𑁆𑀜𑀸𑀡𑀫𑀽𑀮𑀧𑁆𑀧𑀪𑀯𑀸 𑀧𑀚𑀧𑁆𑀧𑀺𑀢𑀸, 𑀲𑀩𑁆𑀩𑀸 𑀫𑀬𑀸 𑀩𑁆𑀬𑀦𑁆𑀢𑀺𑀓𑀢𑀸 𑀲𑀫𑀽𑀮𑀺𑀓𑀸’’𑀢𑀺.

𑀆𑀲𑀸 𑀦𑀸𑀫 𑀯𑀼𑀘𑁆𑀘𑀢𑀺 𑀬𑀸 𑀪𑀯𑀺𑀲𑁆𑀲𑀲𑁆𑀲 𑀅𑀢𑁆𑀣𑀲𑁆𑀲 𑀆𑀲𑀻𑀲𑀦𑀸 [𑀆𑀲𑀺𑀁𑀲𑀦𑀸 (𑀲𑀻.)] 𑀅𑀯𑀲𑁆𑀲𑀁 𑀆𑀕𑀫𑀺𑀲𑁆𑀲𑀢𑀻𑀢𑀺 𑀆𑀲𑀸𑀲𑁆𑀲 𑀉𑀧𑁆𑀧𑀚𑁆𑀚𑀢𑀺. 𑀧𑀺𑀳𑀸 𑀦𑀸𑀫 𑀬𑀸 𑀯𑀢𑁆𑀢𑀫𑀸𑀦𑀲𑁆𑀲 [𑀯𑀢𑁆𑀢𑀫𑀸𑀦𑀓𑀲𑁆𑀲 (𑀲𑀻.)] 𑀅𑀢𑁆𑀣𑀲𑁆𑀲 𑀧𑀢𑁆𑀣𑀦𑀸, 𑀲𑁂𑀬𑁆𑀬𑀢𑀭𑀁 𑀯𑀸 𑀤𑀺𑀲𑁆𑀯𑀸 ‘‘𑀏𑀤𑀺𑀲𑁄 𑀪𑀯𑁂𑀬𑁆𑀬’’𑀦𑁆𑀢𑀺 𑀧𑀺𑀳𑀸𑀲𑁆𑀲 𑀉𑀧𑁆𑀧𑀚𑁆𑀚𑀢𑀺. 𑀅𑀢𑁆𑀣𑀦𑀺𑀧𑁆𑀨𑀢𑁆𑀢𑀺𑀧𑀝𑀺𑀧𑀸𑀮𑀦𑀸 𑀅𑀪𑀺𑀦𑀦𑁆𑀤𑀦𑀸 𑀦𑀸𑀫, 𑀧𑀺𑀬𑀁 𑀯𑀸 𑀜𑀸𑀢𑀺𑀁 𑀅𑀪𑀺𑀦𑀦𑁆𑀤𑀢𑀺, 𑀧𑀺𑀬𑀁 𑀯𑀸 𑀥𑀫𑁆𑀫𑀁 𑀅𑀪𑀺𑀦𑀦𑁆𑀤𑀢𑀺, 𑀅𑀧𑁆𑀧𑀝𑀺𑀓𑀽𑀮𑀢𑁄 𑀯𑀸 𑀅𑀪𑀺𑀦𑀦𑁆𑀤𑀢𑀺.

𑀅𑀦𑁂𑀓𑀥𑀸𑀢𑀽𑀢𑀺 𑀘𑀓𑁆𑀔𑀼𑀥𑀸𑀢𑀼 𑀭𑀽𑀧𑀥𑀸𑀢𑀼 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼, 𑀲𑁄𑀢𑀥𑀸𑀢𑀼 𑀲𑀤𑁆𑀤𑀥𑀸𑀢𑀼 𑀲𑁄𑀢𑀯𑀺𑀜𑁆𑀜𑀸𑀡𑀥𑀸𑀢𑀼, 𑀖𑀸𑀦𑀥𑀸𑀢𑀼 𑀕𑀦𑁆𑀥𑀥𑀸𑀢𑀼 𑀖𑀸𑀦𑀯𑀺𑀜𑁆𑀜𑀸𑀡𑀥𑀸𑀢𑀼, 𑀚𑀺𑀯𑁆𑀳𑀸𑀥𑀸𑀢𑀼 𑀭𑀲𑀥𑀸𑀢𑀼 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀥𑀸𑀢𑀼, 𑀓𑀸𑀬𑀥𑀸𑀢𑀼 𑀨𑁄𑀝𑁆𑀞𑀩𑁆𑀩𑀥𑀸𑀢𑀼 𑀓𑀸𑀬𑀯𑀺𑀜𑁆𑀜𑀸𑀡𑀥𑀸𑀢𑀼, 𑀫𑀦𑁄𑀥𑀸𑀢𑀼 𑀥𑀫𑁆𑀫𑀥𑀸𑀢𑀼 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼.

𑀲𑀭𑀸𑀢𑀺 𑀓𑁂𑀘𑀺 𑀭𑀽𑀧𑀸𑀥𑀺𑀫𑀼𑀢𑁆𑀢𑀸 𑀓𑁂𑀘𑀺 𑀲𑀤𑁆𑀤𑀸𑀥𑀺𑀫𑀼𑀢𑁆𑀢𑀸 𑀓𑁂𑀘𑀺 𑀕𑀦𑁆𑀥𑀸𑀥𑀺𑀫𑀼𑀢𑁆𑀢𑀸 𑀓𑁂𑀘𑀺 𑀭𑀲𑀸𑀥𑀺𑀫𑀼𑀢𑁆𑀢𑀸 𑀓𑁂𑀘𑀺 𑀨𑁄𑀝𑁆𑀞𑀩𑁆𑀩𑀸𑀥𑀺𑀫𑀼𑀢𑁆𑀢𑀸 𑀓𑁂𑀘𑀺 𑀥𑀫𑁆𑀫𑀸𑀥𑀺𑀫𑀼𑀢𑁆𑀢𑀸. 𑀢𑀢𑁆𑀣 𑀬𑀸𑀦𑀺 𑀙 𑀕𑁂𑀳𑀲𑀺𑀢𑀸𑀦𑀺 𑀤𑁄𑀫𑀦𑀲𑁆𑀲𑀸𑀦𑀺 𑀬𑀸𑀦𑀺 𑀘 𑀙 𑀕𑁂𑀳𑀲𑀺𑀢𑀸𑀦𑀺 𑀲𑁄𑀫𑀦𑀲𑁆𑀲𑀸𑀦𑀺 𑀬𑀸𑀦𑀺 𑀘 𑀙 𑀦𑁂𑀓𑁆𑀔𑀫𑁆𑀫𑀲𑀺𑀢𑀸𑀦𑀺 𑀤𑁄𑀫𑀦𑀲𑁆𑀲𑀸𑀦𑀺 𑀬𑀸𑀦𑀺 𑀘 𑀙 𑀦𑁂𑀓𑁆𑀔𑀫𑁆𑀫𑀲𑀺𑀢𑀸𑀦𑀺 𑀲𑁄𑀫𑀦𑀲𑁆𑀲𑀸𑀦𑀺, 𑀇𑀫𑀸𑀦𑀺 𑀘𑀢𑀼𑀯𑀻𑀲𑀧𑀤𑀸𑀦𑀺 𑀢𑀡𑁆𑀳𑀸𑀧𑀓𑁆𑀔𑁄, 𑀢𑀡𑁆𑀳𑀸𑀬 𑀏𑀢𑀁 𑀯𑁂𑀯𑀘𑀦𑀁. 𑀬𑀸 𑀙 𑀉𑀧𑁂𑀓𑁆𑀔𑀸 𑀕𑁂𑀳𑀲𑀺𑀢𑀸, 𑀅𑀬𑀁 𑀤𑀺𑀝𑁆𑀞𑀺𑀧𑀓𑁆𑀔𑁄.

𑁩𑁮. 𑀲𑀸𑀬𑁂𑀯 𑀧𑀢𑁆𑀣𑀦𑀸𑀓𑀸𑀭𑁂𑀦 𑀥𑀫𑁆𑀫𑀦𑀦𑁆𑀤𑀻 𑀥𑀫𑁆𑀫𑀧𑁂𑀫𑀁 𑀥𑀫𑁆𑀫𑀚𑁆𑀛𑁄𑀲𑀸𑀦𑀦𑁆𑀢𑀺 𑀢𑀡𑁆𑀳𑀸𑀬 𑀏𑀢𑀁 𑀯𑁂𑀯𑀘𑀦𑀁. 𑀘𑀺𑀢𑁆𑀢𑀁 𑀫𑀦𑁄 𑀯𑀺𑀜𑁆𑀜𑀸𑀡𑀦𑁆𑀢𑀺 𑀘𑀺𑀢𑁆𑀢𑀲𑁆𑀲 𑀏𑀢𑀁 𑀯𑁂𑀯𑀘𑀦𑀁. 𑀫𑀦𑀺𑀦𑁆𑀤𑁆𑀭𑀺𑀬𑀁 𑀫𑀦𑁄𑀥𑀸𑀢𑀼 𑀫𑀦𑀸𑀬𑀢𑀦𑀁 𑀯𑀺𑀚𑀸𑀦𑀦𑀸𑀢𑀺 𑀫𑀦𑀲𑁆𑀲𑁂𑀢𑀁 𑀯𑁂𑀯𑀘𑀦𑀁. 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀧𑀜𑁆𑀜𑀸𑀩𑀮𑀁 𑀅𑀥𑀺𑀧𑀜𑁆𑀜𑀸 𑀲𑀺𑀓𑁆𑀔𑀸 𑀧𑀜𑁆𑀜𑀸 𑀧𑀜𑁆𑀜𑀸𑀓𑁆𑀔𑀦𑁆𑀥𑁄 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀜𑀸𑀡𑀁 𑀲𑀫𑁆𑀫𑀸𑀤𑀺𑀝𑁆𑀞𑀺 𑀢𑀻𑀭𑀡𑀸 𑀯𑀺𑀧𑀲𑁆𑀲𑀦𑀸 𑀥𑀫𑁆𑀫𑁂 𑀜𑀸𑀡𑀁 𑀅𑀢𑁆𑀣𑁂 𑀜𑀸𑀡𑀁 𑀅𑀦𑁆𑀯𑀬𑁂 𑀜𑀸𑀡𑀁 𑀔𑀬𑁂 𑀜𑀸𑀡𑀁 𑀅𑀦𑀼𑀧𑁆𑀧𑀸𑀤𑁂 𑀜𑀸𑀡𑀁 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀁 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀁 𑀘𑀓𑁆𑀔𑀼 𑀯𑀺𑀚𑁆𑀚𑀸 𑀩𑀼𑀤𑁆𑀥𑀺 𑀪𑀽𑀭𑀺 𑀫𑁂𑀥𑀸 𑀆𑀮𑁄𑀓𑁄, 𑀬𑀁 𑀯𑀸 𑀧𑀦 𑀬𑀁 𑀓𑀺𑀜𑁆𑀘𑀺 𑀅𑀜𑁆𑀜𑀁𑀧𑀺 𑀏𑀯𑀁 𑀚𑀸𑀢𑀺𑀬𑀁, 𑀧𑀜𑁆𑀜𑀸𑀬 𑀏𑀢𑀁 𑀯𑁂𑀯𑀘𑀦𑀁. 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀮𑁄𑀓𑀼𑀢𑁆𑀢𑀭𑀸𑀦𑀺, 𑀲𑀩𑁆𑀩𑀸 𑀧𑀜𑁆𑀜𑀸. 𑀅𑀧𑀺 𑀘 𑀆𑀥𑀺𑀧𑀢𑁂𑀬𑁆𑀬𑀝𑁆𑀞𑁂𑀦 𑀲𑀤𑁆𑀥𑀸, 𑀆𑀭𑀫𑁆𑀪𑀝𑁆𑀞𑁂𑀦 𑀯𑀻𑀭𑀺𑀬𑀁, 𑀅𑀧𑀺𑀮𑀸𑀧𑀦𑀝𑁆𑀞𑁂𑀦 𑀲𑀢𑀺, 𑀅𑀯𑀺𑀓𑁆𑀔𑁂𑀧𑀝𑁆𑀞𑁂𑀦 𑀲𑀫𑀸𑀥𑀺, 𑀧𑀚𑀸𑀦𑀦𑀝𑁆𑀞𑁂𑀦 𑀧𑀜𑁆𑀜𑀸.

𑀬𑀣𑀸 𑀘 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀬𑀁 𑀯𑀼𑀢𑁆𑀢𑀁 𑀇𑀢𑀺𑀧𑀺 𑀲𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄 𑀲𑀼𑀕𑀢𑁄 𑀮𑁄𑀓𑀯𑀺𑀤𑀽 𑀅𑀦𑀼𑀢𑁆𑀢𑀭𑁄 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀺 𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀩𑀼𑀤𑁆𑀥𑁄 𑀪𑀕𑀯𑀸. 𑀩𑀮𑀦𑀺𑀧𑁆𑀨𑀢𑁆𑀢𑀺𑀕𑀢𑁄 𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑁄 𑀅𑀥𑀺𑀕𑀢𑀧𑁆𑀧𑀝𑀺𑀲𑀫𑁆𑀪𑀺𑀤𑁄 𑀘𑀢𑀼𑀬𑁄𑀕𑀯𑀺𑀧𑁆𑀧𑀳𑀻𑀦𑁄 𑀅𑀕𑀢𑀺𑀕𑀫𑀦𑀯𑀻𑀢𑀺𑀯𑀢𑁆𑀢𑁄 𑀉𑀤𑁆𑀥𑀝𑀲𑀮𑁆𑀮𑁄 𑀦𑀺𑀭𑀽𑀴𑁆𑀳𑀯𑀡𑁄 𑀫𑀤𑁆𑀤𑀺𑀢𑀓𑀡𑁆𑀟𑀓𑁄 𑀦𑀺𑀩𑁆𑀩𑀸𑀧𑀺𑀢𑀧𑀭𑀺𑀬𑀼𑀝𑁆𑀞𑀸𑀦𑁄 [𑀦𑀺𑀩𑁆𑀩𑀸𑀳𑀺𑀢 … (𑀓.)] 𑀩𑀦𑁆𑀥𑀦𑀸𑀢𑀻𑀢𑁄 𑀕𑀦𑁆𑀣𑀯𑀺𑀦𑀺𑀯𑁂𑀞𑀦𑁄 𑀅𑀚𑁆𑀛𑀸𑀲𑀬𑀯𑀻𑀢𑀺𑀯𑀢𑁆𑀢𑁄 𑀪𑀺𑀦𑁆𑀦𑀦𑁆𑀥𑀓𑀸𑀭𑁄 𑀘𑀓𑁆𑀔𑀼𑀫𑀸 𑀮𑁄𑀓𑀥𑀫𑁆𑀫𑀲𑀫𑀢𑀺𑀓𑁆𑀓𑀦𑁆𑀢𑁄 𑀅𑀦𑀼𑀭𑁄𑀥𑀯𑀺𑀭𑁄𑀥𑀯𑀺𑀧𑁆𑀧𑀬𑀼𑀢𑁆𑀢𑁄 𑀇𑀝𑁆𑀞𑀸𑀦𑀺𑀝𑁆𑀞𑁂𑀲𑀼 𑀥𑀫𑁆𑀫𑁂𑀲𑀼 𑀅𑀲𑀗𑁆𑀔𑁂𑀧𑀕𑀢𑁄 𑀩𑀦𑁆𑀥𑀦𑀸𑀢𑀺𑀯𑀢𑁆𑀢𑁄 𑀞𑀧𑀺𑀢𑀲𑀗𑁆𑀕𑀸𑀫𑁄 𑀅𑀪𑀺𑀓𑁆𑀓𑀦𑁆𑀢𑀢𑀭𑁄 𑀉𑀓𑁆𑀓𑀸𑀥𑀭𑁄 𑀆𑀮𑁄𑀓𑀓𑀭𑁄 𑀧𑀚𑁆𑀚𑁄𑀢𑀓𑀭𑁄 𑀢𑀫𑁄𑀦𑀼𑀤𑁄 𑀭𑀡𑀜𑁆𑀚𑀳𑁄 𑀅𑀧𑀭𑀺𑀫𑀸𑀡𑀯𑀡𑁆𑀡𑁄 𑀅𑀧𑁆𑀧𑀫𑁂𑀬𑁆𑀬𑀯𑀡𑁆𑀡𑁄 𑀅𑀲𑀗𑁆𑀔𑁂𑀬𑁆𑀬𑀯𑀡𑁆𑀡𑁄 𑀆𑀪𑀁𑀓𑀭𑁄 𑀧𑀪𑀁𑀓𑀭𑁄 𑀥𑀫𑁆𑀫𑁄𑀪𑀸𑀲𑀧𑀚𑁆𑀚𑁄𑀢𑀓𑀭𑁄𑀢𑀺 𑀘 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄𑀢𑀺 𑀘 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀬𑀸 𑀏𑀢𑀁 𑀯𑁂𑀯𑀘𑀦𑀁.

𑀬𑀣𑀸 𑀘 𑀥𑀫𑁆𑀫𑀸𑀦𑀼𑀲𑁆𑀲𑀢𑀺𑀬𑀁 𑀯𑀼𑀢𑁆𑀢𑀁 𑀲𑁆𑀯𑀸𑀓𑁆𑀔𑀸𑀢𑁄 𑀪𑀕𑀯𑀢𑀸 𑀥𑀫𑁆𑀫𑁄 𑀲𑀦𑁆𑀤𑀺𑀝𑁆𑀞𑀺𑀓𑁄 𑀅𑀓𑀸𑀮𑀺𑀓𑁄 𑀏𑀳𑀺𑀧𑀲𑁆𑀲𑀺𑀓𑁄 𑀑𑀧𑀦𑁂𑀬𑁆𑀬𑀺𑀓𑁄 [𑀑𑀧𑀦𑀬𑀺𑀓𑁄 (𑀲𑀻.)] 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑁄 𑀯𑀺𑀜𑁆𑀜𑀽𑀳𑀺. 𑀬𑀤𑀺𑀤𑀁 𑀫𑀤𑀦𑀺𑀫𑁆𑀫𑀤𑀦𑁄 𑀧𑀺𑀧𑀸𑀲𑀯𑀺𑀦𑀬𑁄 𑀆𑀮𑀬𑀲𑀫𑀼𑀕𑁆𑀖𑀸𑀝𑁄 𑀯𑀝𑁆𑀝𑀽𑀧𑀘𑁆𑀙𑁂𑀤𑁄 𑀲𑀼𑀜𑁆𑀜𑀢𑁄 𑀅𑀢𑀺𑀤𑀼𑀮𑁆𑀮𑀪𑁄 𑀢𑀡𑁆𑀳𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁.

‘‘𑀅𑀲𑀗𑁆𑀔𑀢𑀁 𑀅𑀦𑀢𑀁 [𑀅𑀲𑀗𑁆𑀔𑀢𑀁 𑀦𑀦𑁆𑀢 … (𑀲𑀻.) 𑀧𑀲𑁆𑀲 𑀲𑀁. 𑀦𑀺. 𑁪.𑁪𑁦𑁯] 𑀅𑀦𑀸𑀲𑀯𑀜𑁆𑀘, 𑀲𑀘𑁆𑀘𑀜𑁆𑀘 𑀧𑀸𑀭𑀁 𑀦𑀺𑀧𑀼𑀡𑀁 𑀲𑀼𑀤𑀼𑀤𑁆𑀤𑀲𑀁;

𑀅𑀚𑀚𑁆𑀚𑀭𑀁 𑀥𑀼𑀯𑀁 𑀅𑀧𑀮𑁄𑀓𑀺𑀢𑀁 [𑀅𑀧𑀮𑁄𑀓𑀺𑀬𑀁 (𑀲𑀻. 𑀓.)], 𑀅𑀦𑀺𑀤𑀲𑁆𑀲𑀦𑀁 𑀦𑀺𑀧𑁆𑀧𑀧𑀜𑁆𑀘 𑀲𑀦𑁆𑀢𑀁.

‘‘𑀅𑀫𑀢𑀁 𑀧𑀡𑀻𑀢𑀜𑁆𑀘 𑀲𑀺𑀯𑀜𑁆𑀘 𑀔𑁂𑀫𑀁, 𑀢𑀡𑁆𑀳𑀸𑀓𑁆𑀔𑀬𑁄 𑀅𑀘𑁆𑀙𑀭𑀺𑀬𑀜𑁆𑀘 𑀅𑀩𑁆𑀪𑀼𑀢𑀁;

𑀅𑀦𑀻𑀢𑀺𑀓𑀁 𑀅𑀦𑀻𑀢𑀺𑀓𑀥𑀫𑁆𑀫𑀁 [𑀦𑀻𑀢𑀺𑀓𑀥𑀫𑁆𑀫𑀫𑁂𑀯 𑀯𑀸 (𑀲𑀻. 𑀓.) 𑀧𑀲𑁆𑀲 𑀲𑀁. 𑀦𑀺. 𑁪.𑁪𑁦𑁯], 𑀦𑀺𑀩𑁆𑀩𑀸𑀦𑀫𑁂𑀢𑀁 𑀲𑀼𑀕𑀢𑁂𑀦 𑀤𑁂𑀲𑀺𑀢𑀁.

‘‘𑀅𑀚𑀸𑀢𑀁 𑀅𑀪𑀽𑀢𑀁 𑀅𑀦𑀼𑀧𑀤𑁆𑀤𑀯𑀜𑁆𑀘, 𑀅𑀓𑀢𑀁 𑀅𑀲𑁄𑀓𑀜𑁆𑀘 𑀅𑀣𑁄 𑀯𑀺𑀲𑁄𑀓𑀁;

𑀅𑀦𑀽𑀧𑀲𑀕𑁆𑀕𑀁𑀦𑀼𑀧𑀲𑀕𑁆𑀕𑀥𑀫𑁆𑀫𑀁, 𑀦𑀺𑀩𑁆𑀩𑀸𑀦𑀫𑁂𑀢𑀁 𑀲𑀼𑀕𑀢𑁂𑀦 𑀤𑁂𑀲𑀺𑀢𑀁.

‘‘𑀕𑀫𑁆𑀪𑀻𑀭𑀜𑁆𑀘𑁂𑀯 𑀤𑀼𑀧𑁆𑀧𑀲𑁆𑀲𑀁, 𑀉𑀢𑁆𑀢𑀭𑀜𑁆𑀘 𑀅𑀦𑀼𑀢𑁆𑀢𑀭𑀁;

𑀅𑀲𑀫𑀁 𑀅𑀧𑁆𑀧𑀝𑀺𑀲𑀫𑀁, 𑀚𑁂𑀝𑁆𑀞𑀁 𑀲𑁂𑀝𑁆𑀞𑀦𑁆𑀢𑀺 𑀯𑀼𑀘𑁆𑀘𑀢𑀺.

‘‘𑀮𑁂𑀡𑀜𑁆𑀘 𑀢𑀸𑀡𑀁 𑀅𑀭𑀡𑀁 𑀅𑀦𑀗𑁆𑀕𑀡𑀁, 𑀅𑀓𑀸𑀘 𑀫𑁂𑀢𑀁 𑀯𑀺𑀫𑀮𑀦𑁆𑀢𑀺 𑀯𑀼𑀘𑁆𑀘𑀢𑀺;

𑀤𑀻𑀧𑁄 𑀲𑀼𑀔𑀁 𑀅𑀧𑁆𑀧𑀫𑀸𑀡𑀁 𑀧𑀢𑀺𑀝𑁆𑀞𑀸, 𑀅𑀓𑀺𑀜𑁆𑀘𑀦𑀁 𑀅𑀧𑁆𑀧𑀧𑀜𑁆𑀘𑀦𑁆𑀢𑀺 𑀯𑀼𑀢𑁆𑀢’’𑀦𑁆𑀢𑀺.

𑀥𑀫𑁆𑀫𑀸𑀦𑀼𑀲𑁆𑀲𑀢𑀺𑀬𑀸 𑀏𑀢𑀁 𑀯𑁂𑀯𑀘𑀦𑀁.

𑀬𑀣𑀸 𑀘 𑀲𑀗𑁆𑀖𑀸𑀦𑀼𑀲𑁆𑀲𑀢𑀺𑀬𑀁 𑀯𑀼𑀢𑁆𑀢𑀁 𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀉𑀚𑀼𑀧𑁆𑀧𑀝𑀺𑀧𑀦𑁆𑀦𑁄 𑀜𑀸𑀬𑀧𑁆𑀧𑀝𑀺𑀧𑀦𑁆𑀦𑁄 𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀦𑁆𑀦𑁄 𑀬𑀤𑀺𑀤𑀁 𑀘𑀢𑁆𑀢𑀸𑀭𑀺 𑀧𑀼𑀭𑀺𑀲𑀬𑀼𑀕𑀸𑀦𑀺 𑀅𑀝𑁆𑀞 𑀧𑀼𑀭𑀺𑀲𑀧𑀼𑀕𑁆𑀕𑀮𑀸 𑀏𑀲 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄 𑀆𑀳𑀼𑀦𑁂𑀬𑁆𑀬𑁄 𑀧𑀸𑀳𑀼𑀦𑁂𑀬𑁆𑀬𑁄 𑀤𑀓𑁆𑀔𑀺𑀡𑁂𑀬𑁆𑀬𑁄 𑀅𑀜𑁆𑀚𑀮𑀺𑀓𑀭𑀡𑀻𑀬𑁄 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲, 𑀲𑀻𑀮𑀲𑀫𑁆𑀧𑀦𑁆𑀦𑁄 𑀲𑀫𑀸𑀥𑀺𑀲𑀫𑁆𑀧𑀦𑁆𑀦𑁄 𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑁄 𑀯𑀺𑀫𑀼𑀢𑁆𑀢𑀺𑀲𑀫𑁆𑀧𑀦𑁆𑀦𑁄 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀲𑀫𑁆𑀧𑀦𑁆𑀦𑁄 𑀲𑀢𑁆𑀢𑀸𑀦𑀁 𑀲𑀸𑀭𑁄 𑀲𑀢𑁆𑀢𑀸𑀦𑀁 𑀫𑀡𑁆𑀟𑁄 𑀲𑀢𑁆𑀢𑀸𑀦𑀁 𑀉𑀤𑁆𑀥𑀸𑀭𑁄 𑀲𑀢𑁆𑀢𑀸𑀦𑀁 𑀏𑀲𑀺𑀓𑀸 [𑀏𑀲𑀺𑀓𑁄 (𑀓.)] 𑀲𑀢𑁆𑀢𑀸𑀦𑀁 𑀲𑀼𑀭𑀪𑀺𑀧𑀲𑀽𑀦𑀁 𑀧𑀼𑀚𑁆𑀚𑁄 𑀤𑁂𑀯𑀸𑀦𑀜𑁆𑀘 𑀫𑀦𑀼𑀲𑁆𑀲𑀸𑀦𑀜𑁆𑀘𑀸𑀢𑀺 𑀲𑀗𑁆𑀖𑀸𑀦𑀼𑀲𑁆𑀲𑀢𑀺𑀬𑀸 𑀏𑀢𑀁 𑀯𑁂𑀯𑀘𑀦𑀁.

𑀬𑀣𑀸 𑀘 𑀲𑀻𑀮𑀸𑀦𑀼𑀲𑁆𑀲𑀢𑀺𑀬𑀁 𑀯𑀼𑀢𑁆𑀢𑀁 𑀬𑀸𑀦𑀺 𑀢𑀸𑀦𑀺 𑀲𑀻𑀮𑀸𑀦𑀺 𑀅𑀔𑀡𑁆𑀟𑀸𑀦𑀺 𑀅𑀘𑁆𑀙𑀺𑀤𑁆𑀤𑀸𑀦𑀺 𑀅𑀲𑀩𑀮𑀸𑀦𑀺 𑀅𑀓𑀫𑁆𑀫𑀸𑀲𑀸𑀦𑀺 𑀅𑀭𑀺𑀬𑀸𑀦𑀺 𑀅𑀭𑀺𑀬𑀓𑀦𑁆𑀢𑀸𑀦𑀺 𑀪𑀼𑀚𑀺𑀲𑁆𑀲𑀸𑀦𑀺 𑀯𑀺𑀜𑁆𑀜𑀼𑀧𑁆𑀧𑀲𑀢𑁆𑀣𑀸𑀦𑀺 𑀅𑀧𑀭𑀸𑀫𑀝𑁆𑀞𑀸𑀦𑀺 𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀓𑀸𑀦𑀺, 𑀅𑀮𑀗𑁆𑀓𑀸𑀭𑁄 𑀘 𑀲𑀻𑀮𑀁 𑀉𑀢𑁆𑀢𑀫𑀗𑁆𑀕𑁄𑀧𑀲𑁄𑀪𑀡𑀢𑀸𑀬, 𑀦𑀺𑀥𑀸𑀦𑀜𑁆𑀘 𑀲𑀻𑀮𑀁 𑀲𑀩𑁆𑀩𑀤𑁄𑀪𑀕𑁆𑀕𑀲𑀫𑀢𑀺𑀓𑁆𑀓𑀫𑀦𑀝𑁆𑀞𑁂𑀦, 𑀲𑀺𑀧𑁆𑀧𑀜𑁆𑀘 𑀲𑀻𑀮𑀁 𑀅𑀓𑁆𑀔𑀡𑀯𑁂𑀥𑀺𑀢𑀸𑀬, 𑀯𑁂𑀮𑀸 𑀘 𑀲𑀻𑀮𑀁 𑀅𑀦𑀢𑀺𑀓𑁆𑀓𑀫𑀦𑀝𑁆𑀞𑁂𑀦, 𑀥𑀜𑁆𑀜𑀜𑁆𑀘 𑀲𑀻𑀮𑀁 𑀤𑀮𑀺𑀤𑁆𑀤𑁄𑀧𑀘𑁆𑀙𑁂𑀤𑀦𑀝𑁆𑀞𑁂𑀦 [𑀤𑀴𑀺𑀤𑁆𑀤𑁄… (𑀲𑀻.)], 𑀆𑀤𑀸𑀲𑁄 𑀘 𑀲𑀻𑀮𑀁 𑀥𑀫𑁆𑀫𑀯𑁄𑀮𑁄𑀓𑀦𑀢𑀸𑀬, 𑀧𑀸𑀲𑀸𑀤𑁄 𑀘 𑀲𑀻𑀮𑀁 𑀯𑁄𑀮𑁄𑀓𑀦𑀝𑁆𑀞𑁂𑀦, 𑀲𑀩𑁆𑀩𑀪𑀽𑀫𑀸𑀦𑀼𑀧𑀭𑀺𑀯𑀢𑁆𑀢𑀺 𑀘 𑀲𑀻𑀮𑀁 𑀅𑀫𑀢𑀧𑀭𑀺𑀬𑁄𑀲𑀸𑀦𑀦𑁆𑀢𑀺 𑀲𑀻𑀮𑀸𑀦𑀼𑀲𑁆𑀲𑀢𑀺𑀬𑀸 𑀏𑀢𑀁 𑀯𑁂𑀯𑀘𑀦𑀁.

𑀬𑀣𑀸 𑀘 𑀘𑀸𑀕𑀸𑀦𑀼𑀲𑁆𑀲𑀢𑀺𑀬𑀁 𑀯𑀼𑀢𑁆𑀢𑀁 𑀬𑀲𑁆𑀫𑀺𑀁 𑀲𑀫𑀬𑁂 𑀅𑀭𑀺𑀬𑀲𑀸𑀯𑀓𑁄 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀺 𑀫𑀼𑀢𑁆𑀢𑀘𑀸𑀕𑁄 𑀧𑀬𑀢𑀧𑀸𑀡𑀺 𑀯𑁄𑀲𑁆𑀲𑀕𑁆𑀕𑀭𑀢𑁄 𑀬𑀸𑀘𑀬𑁄𑀕𑁄 𑀤𑀸𑀦𑀲𑀁𑀯𑀺𑀪𑀸𑀕𑀭𑀢𑁄𑀢𑀺 𑀘𑀸𑀕𑀸𑀦𑀼𑀲𑁆𑀲𑀢𑀺𑀬𑀸 𑀏𑀢𑀁 𑀯𑁂𑀯𑀘𑀦𑀁. 𑀢𑁂𑀦𑀸𑀳 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀬𑀦𑁄 ‘‘𑀯𑁂𑀯𑀘𑀦𑀸𑀦𑀺 𑀩𑀳𑀽𑀦𑀻’’𑀢𑀺.

𑀦𑀺𑀬𑀼𑀢𑁆𑀢𑁄 𑀯𑁂𑀯𑀘𑀦𑁄 𑀳𑀸𑀭𑁄.