𑁫. 𑀥𑁄𑀢𑀓𑀫𑀸𑀡𑀯𑀧𑀼𑀘𑁆𑀙𑀸

𑁮𑁬. ‘‘𑀧𑀼𑀘𑁆𑀙𑀸𑀫𑀺 𑀢𑀁 𑀪𑀕𑀯𑀸 𑀩𑁆𑀭𑀽𑀳𑀺 𑀫𑁂𑀢𑀁, [𑀇𑀘𑁆𑀘𑀸𑀬𑀲𑁆𑀫𑀸 𑀥𑁄𑀢𑀓𑁄]

𑀯𑀸𑀘𑀸𑀪𑀺𑀓𑀗𑁆𑀔𑀸𑀫𑀺 𑀫𑀳𑁂𑀲𑀺 𑀢𑀼𑀬𑁆𑀳𑀁;

𑀢𑀯 𑀲𑀼𑀢𑁆𑀯𑀸𑀦 𑀦𑀺𑀕𑁆𑀖𑁄𑀲𑀁, 𑀲𑀺𑀓𑁆𑀔𑁂 𑀦𑀺𑀩𑁆𑀩𑀸𑀦𑀫𑀢𑁆𑀢𑀦𑁄’’.

𑁮𑁭. ‘‘𑀢𑁂𑀦𑀳𑀸𑀢𑀧𑁆𑀧𑀁 𑀓𑀭𑁄𑀳𑀺, [𑀥𑁄𑀢𑀓𑀸𑀢𑀺 𑀪𑀕𑀯𑀸]

𑀇𑀥𑁂𑀯 𑀦𑀺𑀧𑀓𑁄 𑀲𑀢𑁄;

𑀇𑀢𑁄 𑀲𑀼𑀢𑁆𑀯𑀸𑀦 𑀦𑀺𑀕𑁆𑀖𑁄𑀲𑀁, 𑀲𑀺𑀓𑁆𑀔𑁂 𑀦𑀺𑀩𑁆𑀩𑀸𑀦𑀫𑀢𑁆𑀢𑀦𑁄’’.

𑁮𑁮. ‘‘𑀧𑀲𑁆𑀲𑀸𑀫𑀳𑀁 𑀤𑁂𑀯𑀫𑀦𑀼𑀲𑁆𑀲𑀮𑁄𑀓𑁂, 𑀅𑀓𑀺𑀜𑁆𑀘𑀦𑀁 𑀩𑁆𑀭𑀸𑀳𑁆𑀫𑀡𑀫𑀺𑀭𑀺𑀬𑀫𑀸𑀦𑀁;

𑀢𑀁 𑀢𑀁 𑀦𑀫𑀲𑁆𑀲𑀸𑀫𑀺 𑀲𑀫𑀦𑁆𑀢𑀘𑀓𑁆𑀔𑀼, 𑀧𑀫𑀼𑀜𑁆𑀘 𑀫𑀁 𑀲𑀓𑁆𑀓 𑀓𑀣𑀁𑀓𑀣𑀸𑀳𑀺’’.

𑁮𑁯. ‘‘𑀦𑀸𑀳𑀁 𑀲𑀳𑀺𑀲𑁆𑀲𑀸𑀫𑀺 𑀧𑀫𑁄𑀘𑀦𑀸𑀬, 𑀓𑀣𑀁𑀓𑀣𑀺𑀁 𑀥𑁄𑀢𑀓 𑀓𑀜𑁆𑀘𑀺 𑀮𑁄𑀓𑁂;

𑀥𑀫𑁆𑀫𑀜𑁆𑀘 𑀲𑁂𑀝𑁆𑀞𑀁 𑀅𑀪𑀺𑀚𑀸𑀦𑀫𑀸𑀦𑁄 [𑀆𑀚𑀸𑀦𑀫𑀸𑀦𑁄 (𑀲𑀻. 𑀲𑁆𑀬𑀸. 𑀧𑀻.)], 𑀏𑀯𑀁 𑀢𑀼𑀯𑀁 𑀑𑀖𑀫𑀺𑀫𑀁 𑀢𑀭𑁂𑀲𑀺’’.

𑁯𑁦. ‘‘𑀅𑀦𑀼𑀲𑀸𑀲 𑀩𑁆𑀭𑀳𑁆𑀫𑁂 𑀓𑀭𑀼𑀡𑀸𑀬𑀫𑀸𑀦𑁄, 𑀯𑀺𑀯𑁂𑀓𑀥𑀫𑁆𑀫𑀁 𑀬𑀫𑀳𑀁 𑀯𑀺𑀚𑀜𑁆𑀜𑀁;

𑀬𑀣𑀸𑀳𑀁 𑀆𑀓𑀸𑀲𑁄𑀯 𑀅𑀩𑁆𑀬𑀸𑀧𑀚𑁆𑀚𑀫𑀸𑀦𑁄, 𑀇𑀥𑁂𑀯 𑀲𑀦𑁆𑀢𑁄 𑀅𑀲𑀺𑀢𑁄 𑀘𑀭𑁂𑀬𑁆𑀬𑀁’’.

𑁯𑁧. ‘‘𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺 𑀢𑁂 𑀲𑀦𑁆𑀢𑀺𑀁, [𑀥𑁄𑀢𑀓𑀸𑀢𑀺 𑀪𑀕𑀯𑀸]

𑀤𑀺𑀝𑁆𑀞𑁂 𑀥𑀫𑁆𑀫𑁂 𑀅𑀦𑀻𑀢𑀺𑀳𑀁;

𑀬𑀁 𑀯𑀺𑀤𑀺𑀢𑁆𑀯𑀸 𑀲𑀢𑁄 𑀘𑀭𑀁, 𑀢𑀭𑁂 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓𑀁’’.

𑁯𑁨. ‘‘𑀢𑀜𑁆𑀘𑀸𑀳𑀁 𑀅𑀪𑀺𑀦𑀦𑁆𑀤𑀸𑀫𑀺, 𑀫𑀳𑁂𑀲𑀺 𑀲𑀦𑁆𑀢𑀺𑀫𑀼𑀢𑁆𑀢𑀫𑀁;

𑀬𑀁 𑀯𑀺𑀤𑀺𑀢𑁆𑀯𑀸 𑀲𑀢𑁄 𑀘𑀭𑀁, 𑀢𑀭𑁂 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓𑀁’’.

𑁯𑁩. ‘‘𑀬𑀁 𑀓𑀺𑀜𑁆𑀘𑀺 𑀲𑀫𑁆𑀧𑀚𑀸𑀦𑀸𑀲𑀺, [𑀥𑁄𑀢𑀓𑀸𑀢𑀺 𑀪𑀕𑀯𑀸]

𑀉𑀤𑁆𑀥𑀁 𑀅𑀥𑁄 𑀢𑀺𑀭𑀺𑀬𑀜𑁆𑀘𑀸𑀧𑀺 𑀫𑀚𑁆𑀛𑁂;

𑀏𑀢𑀁 𑀯𑀺𑀤𑀺𑀢𑁆𑀯𑀸 𑀲𑀗𑁆𑀕𑁄𑀢𑀺 𑀮𑁄𑀓𑁂, 𑀪𑀯𑀸𑀪𑀯𑀸𑀬 𑀫𑀸𑀓𑀸𑀲𑀺 𑀢𑀡𑁆𑀳’’𑀦𑁆𑀢𑀺.

𑀥𑁄𑀢𑀓𑀫𑀸𑀡𑀯𑀧𑀼𑀘𑁆𑀙𑀸 𑀧𑀜𑁆𑀘𑀫𑀻.