𑁭. 𑀢𑀺𑀲𑁆𑀲𑀫𑁂𑀢𑁆𑀢𑁂𑀬𑁆𑀬𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁄

𑀅𑀣 𑀢𑀺𑀲𑁆𑀲𑀫𑁂𑀢𑁆𑀢𑁂𑀬𑁆𑀬𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀁 𑀯𑀓𑁆𑀔𑀢𑀺 𑁋

𑁪𑁯. 𑀫𑁂𑀣𑀼𑀦𑀫𑀦𑀼𑀬𑀼𑀢𑁆𑀢𑀲𑁆𑀲, [𑀇𑀘𑁆𑀘𑀸𑀬𑀲𑁆𑀫𑀸 𑀢𑀺𑀲𑁆𑀲𑁄 𑀫𑁂𑀢𑁆𑀢𑁂𑀬𑁆𑀬𑁄]

𑀯𑀺𑀖𑀸𑀢𑀁 𑀩𑁆𑀭𑀽𑀳𑀺 𑀫𑀸𑀭𑀺𑀲;

𑀲𑀼𑀢𑁆𑀯𑀸𑀦 𑀢𑀯 𑀲𑀸𑀲𑀦𑀁, 𑀯𑀺𑀯𑁂𑀓𑁂 𑀲𑀺𑀓𑁆𑀔𑀺𑀲𑁆𑀲𑀸𑀫𑀲𑁂.

𑀫𑁂𑀣𑀼𑀦𑀫𑀦𑀼𑀬𑀼𑀢𑁆𑀢𑀲𑁆𑀲𑀸𑀢𑀺. 𑀫𑁂𑀣𑀼𑀦𑀥𑀫𑁆𑀫𑁄 𑀦𑀸𑀫 𑀬𑁄 𑀲𑁄 𑀅𑀲𑀤𑁆𑀥𑀫𑁆𑀫𑁄 𑀕𑀸𑀫𑀥𑀫𑁆𑀫𑁄 𑀯𑀲𑀮𑀥𑀫𑁆𑀫𑁄 𑀤𑀼𑀝𑁆𑀞𑀼𑀮𑁆𑀮𑁄 𑀑𑀤𑀓𑀦𑁆𑀢𑀺𑀓𑁄 𑀭𑀳𑀲𑁆𑀲𑁄 𑀤𑁆𑀯𑀬𑀁𑀤𑁆𑀯𑀬𑀲𑀫𑀸𑀧𑀢𑁆𑀢𑀺. 𑀓𑀺𑀁𑀓𑀸𑀭𑀡𑀸 𑀯𑀼𑀘𑁆𑀘𑀢𑀺 𑀫𑁂𑀣𑀼𑀦𑀥𑀫𑁆𑀫𑁄? 𑀉𑀪𑀺𑀦𑁆𑀦𑀁 𑀭𑀢𑁆𑀢𑀸𑀦𑀁 𑀲𑀸𑀭𑀢𑁆𑀢𑀸𑀦𑀁 𑀅𑀯𑀲𑁆𑀲𑀼𑀢𑀸𑀦𑀁 𑀧𑀭𑀺𑀬𑀼𑀝𑁆𑀞𑀺𑀢𑀸𑀦𑀁 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑀸𑀦𑀁 𑀉𑀪𑀺𑀦𑁆𑀦𑀁 𑀲𑀤𑀺𑀲𑀸𑀦𑀁 𑀥𑀫𑁆𑀫𑁄𑀢𑀺 𑁋 𑀢𑀁𑀓𑀸𑀭𑀡𑀸 𑀯𑀼𑀘𑁆𑀘𑀢𑀺 𑀫𑁂𑀣𑀼𑀦𑀥𑀫𑁆𑀫𑁄. 𑀬𑀣𑀸 𑀉𑀪𑁄 𑀓𑀮𑀳𑀓𑀸𑀭𑀓𑀸 𑀫𑁂𑀣𑀼𑀦𑀓𑀸𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀉𑀪𑁄 𑀪𑀡𑁆𑀟𑀦𑀓𑀸𑀭𑀓𑀸 𑀫𑁂𑀣𑀼𑀦𑀓𑀸𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀉𑀪𑁄 𑀪𑀲𑁆𑀲𑀓𑀸𑀭𑀓𑀸 𑀫𑁂𑀣𑀼𑀦𑀓𑀸𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀉𑀪𑁄 𑀯𑀺𑀯𑀸𑀤𑀓𑀸𑀭𑀓𑀸 𑀫𑁂𑀣𑀼𑀦𑀓𑀸𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀉𑀪𑁄 𑀅𑀥𑀺𑀓𑀭𑀡𑀓𑀸𑀭𑀓𑀸 𑀫𑁂𑀣𑀼𑀦𑀓𑀸𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀉𑀪𑁄 𑀯𑀸𑀤𑀺𑀦𑁄 𑀫𑁂𑀣𑀼𑀦𑀓𑀸𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀉𑀪𑁄 𑀲𑀮𑁆𑀮𑀸𑀧𑀓𑀸 𑀫𑁂𑀣𑀼𑀦𑀓𑀸𑀢𑀺 𑀯𑀼𑀘𑁆𑀘𑀦𑁆𑀢𑀺; 𑀏𑀯𑀫𑁂𑀯𑀁 𑀉𑀪𑀺𑀦𑁆𑀦𑀁 𑀭𑀢𑁆𑀢𑀸𑀦𑀁 𑀲𑀸𑀭𑀢𑁆𑀢𑀸𑀦𑀁 𑀅𑀯𑀲𑁆𑀲𑀼𑀢𑀸𑀦𑀁 𑀧𑀭𑀺𑀬𑀼𑀝𑁆𑀞𑀺𑀢𑀸𑀦𑀁 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑀸𑀦𑀁 𑀉𑀪𑀺𑀦𑁆𑀦𑀁 𑀲𑀤𑀺𑀲𑀸𑀦𑀁 𑀥𑀫𑁆𑀫𑁄𑀢𑀺 𑁋 𑀢𑀁𑀓𑀸𑀭𑀡𑀸 𑀯𑀼𑀘𑁆𑀘𑀢𑀺 𑀫𑁂𑀣𑀼𑀦𑀥𑀫𑁆𑀫𑁄.

𑀫𑁂𑀣𑀼𑀦𑀫𑀦𑀼𑀬𑀼𑀢𑁆𑀢𑀲𑁆𑀲𑀸𑀢𑀺. 𑀫𑁂𑀣𑀼𑀦𑀥𑀫𑁆𑀫𑁂 𑀬𑀼𑀢𑁆𑀢𑀲𑁆𑀲 𑀧𑀬𑀼𑀢𑁆𑀢𑀲𑁆𑀲 𑀆𑀬𑀼𑀢𑁆𑀢𑀲𑁆𑀲 𑀲𑀫𑀸𑀬𑀼𑀢𑁆𑀢𑀲𑁆𑀲 𑀢𑀘𑁆𑀘𑀭𑀺𑀢𑀲𑁆𑀲 𑀢𑀩𑁆𑀩𑀳𑀼𑀮𑀲𑁆𑀲 𑀢𑀕𑁆𑀕𑀭𑀼𑀓𑀲𑁆𑀲 𑀢𑀦𑁆𑀦𑀺𑀦𑁆𑀦𑀲𑁆𑀲 𑀢𑀧𑁆𑀧𑁄𑀡𑀲𑁆𑀲 𑀢𑀧𑁆𑀧𑀩𑁆𑀪𑀸𑀭𑀲𑁆𑀲 𑀢𑀤𑀥𑀺𑀫𑀼𑀢𑁆𑀢𑀲𑁆𑀲 𑀢𑀤𑀥𑀺𑀧𑀢𑁂𑀬𑁆𑀬𑀲𑁆𑀲𑀸𑀢𑀺 𑁋 𑀫𑁂𑀣𑀼𑀦𑀫𑀦𑀼𑀬𑀼𑀢𑁆𑀢𑀲𑁆𑀲.

𑀇𑀘𑁆𑀘𑀸𑀬𑀲𑁆𑀫𑀸 𑀢𑀺𑀲𑁆𑀲𑁄 𑀫𑁂𑀢𑁆𑀢𑁂𑀬𑁆𑀬𑁄𑀢𑀺. 𑀇𑀘𑁆𑀘𑀸𑀢𑀺 𑀧𑀤𑀲𑀦𑁆𑀥𑀺 𑀧𑀤𑀲𑀁𑀲𑀕𑁆𑀕𑁄 𑀧𑀤𑀧𑀸𑀭𑀺𑀧𑀽𑀭𑀻 𑀅𑀓𑁆𑀔𑀭𑀲𑀫𑀯𑀸𑀬𑁄 𑀩𑁆𑀬𑀜𑁆𑀚𑀦𑀲𑀺𑀮𑀺𑀝𑁆𑀞𑀢𑀸 𑀧𑀤𑀸𑀦𑀼𑀧𑀼𑀩𑁆𑀩𑀢𑀸𑀧𑁂𑀢𑀁 𑁋 𑀇𑀘𑁆𑀘𑀸𑀢𑀺. 𑀆𑀬𑀲𑁆𑀫𑀸𑀢𑀺 𑀧𑀺𑀬𑀯𑀘𑀦𑀁 𑀕𑀭𑀼𑀯𑀘𑀦𑀁 𑀲𑀕𑀸𑀭𑀯𑀯𑀘𑀦𑀁 𑀲𑀧𑁆𑀧𑀢𑀺𑀲𑁆𑀲𑀯𑀘𑀦𑀫𑁂𑀢𑀁 𑁋 𑀆𑀬𑀲𑁆𑀫𑀸𑀢𑀺. 𑀢𑀺𑀲𑁆𑀲𑁄𑀢𑀺 𑀢𑀲𑁆𑀲 𑀣𑁂𑀭𑀲𑁆𑀲 𑀦𑀸𑀫𑀁 𑀲𑀗𑁆𑀔𑀸 𑀲𑀫𑀜𑁆𑀜𑀸 𑀧𑀜𑁆𑀜𑀢𑁆𑀢𑀺 𑀯𑁄𑀳𑀸𑀭𑁄 𑀦𑀸𑀫𑀁 𑀦𑀸𑀫𑀓𑀫𑁆𑀫𑀁 𑀦𑀸𑀫𑀥𑁂𑀬𑁆𑀬𑀁 𑀦𑀺𑀭𑀼𑀢𑁆𑀢𑀺 𑀩𑁆𑀬𑀜𑁆𑀚𑀦𑀁 𑀅𑀪𑀺𑀮𑀸𑀧𑁄. 𑀫𑁂𑀢𑁆𑀢𑁂𑀬𑁆𑀬𑁄𑀢𑀺 𑀢𑀲𑁆𑀲 𑀣𑁂𑀭𑀲𑁆𑀲 𑀕𑁄𑀢𑁆𑀢𑀁 𑀲𑀗𑁆𑀔𑀸 𑀲𑀫𑀜𑁆𑀜𑀸 𑀧𑀜𑁆𑀜𑀢𑁆𑀢𑀺 𑀯𑁄𑀳𑀸𑀭𑁄𑀢𑀺 𑁋 𑀇𑀘𑁆𑀘𑀸𑀬𑀲𑁆𑀫𑀸 𑀢𑀺𑀲𑁆𑀲𑁄 𑀫𑁂𑀢𑁆𑀢𑁂𑀬𑁆𑀬𑁄.

𑀯𑀺𑀖𑀸𑀢𑀁 𑀩𑁆𑀭𑀽𑀳𑀺 𑀫𑀸𑀭𑀺𑀲𑀸𑀢𑀺. 𑀯𑀺𑀖𑀸𑀢𑀦𑁆𑀢𑀺 𑀯𑀺𑀖𑀸𑀢𑀁 𑀉𑀧𑀖𑀸𑀢𑀁 𑀧𑀻𑀴𑀦𑀁 𑀖𑀝𑁆𑀝𑀦𑀁 𑀉𑀧𑀤𑁆𑀤𑀯𑀁 𑀉𑀧𑀲𑀕𑁆𑀕𑀁 𑀩𑁆𑀭𑀽𑀳𑀺 𑀆𑀘𑀺𑀓𑁆𑀔 𑀤𑁂𑀲𑁂𑀳𑀺 𑀧𑀜𑁆𑀜𑀧𑁂𑀳𑀺 𑀧𑀝𑁆𑀞𑀧𑁂𑀳𑀺 𑀯𑀺𑀯𑀭 𑀯𑀺𑀪𑀚 𑀉𑀢𑁆𑀢𑀸𑀦𑀻𑀓𑀭𑁄𑀳𑀺 [𑀉𑀢𑁆𑀢𑀸𑀦𑀺𑀁 𑀓𑀭𑁄𑀳𑀺 (𑀓.)] 𑀧𑀓𑀸𑀲𑁂𑀳𑀺. 𑀫𑀸𑀭𑀺𑀲𑀸𑀢𑀺 𑀧𑀺𑀬𑀯𑀘𑀦𑀁 𑀕𑀭𑀼𑀯𑀘𑀦𑀁 𑀲𑀕𑀸𑀭𑀯𑀯𑀘𑀦𑀁 𑀲𑀧𑁆𑀧𑀢𑀺𑀲𑁆𑀲𑀯𑀘𑀦𑀫𑁂𑀢𑀁 𑀫𑀸𑀭𑀺𑀲𑀸𑀢𑀺 𑁋 𑀯𑀺𑀖𑀸𑀢𑀁 𑀩𑁆𑀭𑀽𑀳𑀺 𑀫𑀸𑀭𑀺𑀲.

𑀲𑀼𑀢𑁆𑀯𑀸𑀦 𑀢𑀯 𑀲𑀸𑀲𑀦𑀦𑁆𑀢𑀺. 𑀢𑀼𑀬𑁆𑀳𑀁 𑀯𑀘𑀦𑀁 𑀩𑁆𑀬𑀧𑁆𑀧𑀣𑀁 𑀤𑁂𑀲𑀦𑀁 𑀅𑀦𑀼𑀲𑀸𑀲𑀦𑀁 𑀅𑀦𑀼𑀲𑀺𑀝𑁆𑀞𑀺𑀁 𑀲𑀼𑀢𑁆𑀯𑀸 𑀲𑀼𑀡𑀺𑀢𑁆𑀯𑀸 𑀉𑀕𑁆𑀕𑀳𑁂𑀢𑁆𑀯𑀸 𑀉𑀧𑀥𑀸𑀭𑀬𑀺𑀢𑁆𑀯𑀸 𑀉𑀧𑀮𑀓𑁆𑀔𑀬𑀺𑀢𑁆𑀯𑀸𑀢𑀺 𑁋 𑀲𑀼𑀢𑁆𑀯𑀸𑀦 𑀢𑀯 𑀲𑀸𑀲𑀦𑀁.

𑀯𑀺𑀯𑁂𑀓𑁂 𑀲𑀺𑀓𑁆𑀔𑀺𑀲𑁆𑀲𑀸𑀫𑀲𑁂𑀢𑀺. 𑀯𑀺𑀯𑁂𑀓𑁄𑀢𑀺 𑀢𑀬𑁄 𑀯𑀺𑀯𑁂𑀓𑀸 𑁋 𑀓𑀸𑀬𑀯𑀺𑀯𑁂𑀓𑁄, 𑀘𑀺𑀢𑁆𑀢𑀯𑀺𑀯𑁂𑀓𑁄, 𑀉𑀧𑀥𑀺𑀯𑀺𑀯𑁂𑀓𑁄. 𑀓𑀢𑀫𑁄 𑀓𑀸𑀬𑀯𑀺𑀯𑁂𑀓𑁄? 𑀇𑀥 𑀪𑀺𑀓𑁆𑀔𑀼 𑀯𑀺𑀯𑀺𑀢𑁆𑀢𑀁 𑀲𑁂𑀦𑀸𑀲𑀦𑀁 𑀪𑀚𑀢𑀺 𑀅𑀭𑀜𑁆𑀜𑀁 𑀭𑀼𑀓𑁆𑀔𑀫𑀽𑀮𑀁 𑀧𑀩𑁆𑀩𑀢𑀁 𑀓𑀦𑁆𑀤𑀭𑀁 𑀕𑀺𑀭𑀺𑀕𑀼𑀳𑀁 𑀲𑀼𑀲𑀸𑀦𑀁 𑀯𑀦𑀧𑀢𑁆𑀣𑀁 𑀅𑀩𑁆𑀪𑁄𑀓𑀸𑀲𑀁 𑀧𑀮𑀸𑀲𑀧𑀼𑀜𑁆𑀚𑀁, 𑀓𑀸𑀬𑁂𑀦 𑀯𑀺𑀯𑀺𑀢𑁆𑀢𑁄 𑀯𑀺𑀳𑀭𑀢𑀺. 𑀲𑁄 𑀏𑀓𑁄 𑀕𑀘𑁆𑀙𑀢𑀺, 𑀏𑀓𑁄 𑀢𑀺𑀝𑁆𑀞𑀢𑀺, 𑀏𑀓𑁄 𑀦𑀺𑀲𑀻𑀤𑀢𑀺, 𑀏𑀓𑁄 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺, 𑀏𑀓𑁄 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀢𑀺, 𑀏𑀓𑁄 𑀧𑀝𑀺𑀓𑁆𑀓𑀫𑀢𑀺, 𑀏𑀓𑁄 𑀭𑀳𑁄 𑀦𑀺𑀲𑀻𑀤𑀢𑀺, 𑀏𑀓𑁄 𑀘𑀗𑁆𑀓𑀫𑀁 𑀅𑀥𑀺𑀝𑁆𑀞𑀸𑀢𑀺, 𑀏𑀓𑁄 𑀘𑀭𑀢𑀺, 𑀏𑀓𑁄 𑀯𑀺𑀳𑀭𑀢𑀺 𑀇𑀭𑀺𑀬𑀢𑀺 𑀯𑀢𑁆𑀢𑀢𑀺 𑀧𑀸𑀮𑁂𑀢𑀺 𑀬𑀧𑁂𑀢𑀺 𑀬𑀸𑀧𑁂𑀢𑀺 𑁋 𑀅𑀬𑀁 𑀓𑀸𑀬𑀯𑀺𑀯𑁂𑀓𑁄.

𑀓𑀢𑀫𑁄 𑀘𑀺𑀢𑁆𑀢𑀯𑀺𑀯𑁂𑀓𑁄? 𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀦𑀻𑀯𑀭𑀡𑁂𑀳𑀺 𑀘𑀺𑀢𑁆𑀢𑀁 𑀯𑀺𑀯𑀺𑀢𑁆𑀢𑀁 𑀳𑁄𑀢𑀺, 𑀤𑀼𑀢𑀺𑀬𑀁 𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀯𑀺𑀢𑀓𑁆𑀓𑀯𑀺𑀘𑀸𑀭𑁂𑀳𑀺 𑀘𑀺𑀢𑁆𑀢𑀁 𑀯𑀺𑀯𑀺𑀢𑁆𑀢𑀁 𑀳𑁄𑀢𑀺, 𑀢𑀢𑀺𑀬𑀁 𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀧𑀻𑀢𑀺𑀬𑀸 𑀘𑀺𑀢𑁆𑀢𑀁 𑀯𑀺𑀯𑀺𑀢𑁆𑀢𑀁 𑀳𑁄𑀢𑀺, 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀲𑀼𑀔𑀤𑀼𑀓𑁆𑀔𑁂𑀳𑀺 𑀘𑀺𑀢𑁆𑀢𑀁 𑀯𑀺𑀯𑀺𑀢𑁆𑀢𑀁 𑀳𑁄𑀢𑀺, 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀭𑀽𑀧𑀲𑀜𑁆𑀜𑀸𑀬 𑀧𑀝𑀺𑀖𑀲𑀜𑁆𑀜𑀸𑀬 𑀦𑀸𑀦𑀢𑁆𑀢𑀲𑀜𑁆𑀜𑀸𑀬 𑀘𑀺𑀢𑁆𑀢𑀁 𑀯𑀺𑀯𑀺𑀢𑁆𑀢𑀁 𑀳𑁄𑀢𑀺, 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀜𑁆𑀜𑀸𑀬 𑀘𑀺𑀢𑁆𑀢𑀁 𑀯𑀺𑀯𑀺𑀢𑁆𑀢𑀁 𑀳𑁄𑀢𑀺, 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀜𑁆𑀜𑀸𑀬 𑀘𑀺𑀢𑁆𑀢𑀁 𑀯𑀺𑀯𑀺𑀢𑁆𑀢𑀁 𑀳𑁄𑀢𑀺, 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀜𑁆𑀜𑀸𑀬 𑀘𑀺𑀢𑁆𑀢𑀁 𑀯𑀺𑀯𑀺𑀢𑁆𑀢𑀁 𑀳𑁄𑀢𑀺, 𑀲𑁄𑀢𑀸𑀧𑀦𑁆𑀦𑀲𑁆𑀲 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸 𑀯𑀺𑀘𑀺𑀓𑀺𑀘𑁆𑀙𑀸𑀬 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀸 𑀤𑀺𑀝𑁆𑀞𑀸𑀦𑀼𑀲𑀬𑀸 𑀯𑀺𑀘𑀺𑀓𑀺𑀘𑁆𑀙𑀸𑀦𑀼𑀲𑀬𑀸 𑀢𑀤𑁂𑀓𑀝𑁆𑀞𑁂𑀳𑀺 𑀘 𑀓𑀺𑀮𑁂𑀲𑁂𑀳𑀺 𑀘𑀺𑀢𑁆𑀢𑀁 𑀯𑀺𑀯𑀺𑀢𑁆𑀢𑀁 𑀳𑁄𑀢𑀺, 𑀲𑀓𑀤𑀸𑀕𑀸𑀫𑀺𑀲𑁆𑀲 𑀑𑀴𑀸𑀭𑀺𑀓𑀸 𑀓𑀸𑀫𑀭𑀸𑀕𑀲𑀜𑁆𑀜𑁄𑀚𑀦𑀸 𑀧𑀝𑀺𑀖𑀲𑀜𑁆𑀜𑁄𑀚𑀦𑀸 𑀑𑀴𑀸𑀭𑀺𑀓𑀸 𑀓𑀸𑀫𑀭𑀸𑀕𑀸𑀦𑀼𑀲𑀬𑀸 𑀧𑀝𑀺𑀖𑀸𑀦𑀼𑀲𑀬𑀸 𑀢𑀤𑁂𑀓𑀝𑁆𑀞𑁂𑀳𑀺 𑀘 𑀓𑀺𑀮𑁂𑀲𑁂𑀳𑀺 𑀘𑀺𑀢𑁆𑀢𑀁 𑀯𑀺𑀯𑀺𑀢𑁆𑀢𑀁 𑀳𑁄𑀢𑀺, 𑀅𑀦𑀸𑀕𑀸𑀫𑀺𑀲𑁆𑀲 𑀅𑀦𑀼𑀲𑀳𑀕𑀢𑀸 𑀓𑀸𑀫𑀭𑀸𑀕𑀲𑀜𑁆𑀜𑁄𑀚𑀦𑀸 𑀧𑀝𑀺𑀖𑀲𑀜𑁆𑀜𑁄𑀚𑀦𑀸 𑀅𑀦𑀼𑀲𑀳𑀕𑀢𑀸 𑀓𑀸𑀫𑀭𑀸𑀕𑀸𑀦𑀼𑀲𑀬𑀸 𑀧𑀝𑀺𑀖𑀸𑀦𑀼𑀲𑀬𑀸 𑀢𑀤𑁂𑀓𑀝𑁆𑀞𑁂𑀳𑀺 𑀘 𑀓𑀺𑀮𑁂𑀲𑁂𑀳𑀺 𑀘𑀺𑀢𑁆𑀢𑀁 𑀯𑀺𑀯𑀺𑀢𑁆𑀢𑀁 𑀳𑁄𑀢𑀺, 𑀅𑀭𑀳𑀢𑁄 𑀭𑀽𑀧𑀭𑀸𑀕𑀸 𑀅𑀭𑀽𑀧𑀭𑀸𑀕𑀸 𑀫𑀸𑀦𑀸 𑀉𑀤𑁆𑀥𑀘𑁆𑀘𑀸 𑀅𑀯𑀺𑀚𑁆𑀚𑀸𑀬 𑀫𑀸𑀦𑀸𑀦𑀼𑀲𑀬𑀸 𑀪𑀯𑀭𑀸𑀕𑀸𑀦𑀼𑀲𑀬𑀸 𑀅𑀯𑀺𑀚𑁆𑀚𑀸𑀦𑀼𑀲𑀬𑀸 𑀢𑀤𑁂𑀓𑀝𑁆𑀞𑁂𑀳𑀺 𑀘 𑀓𑀺𑀮𑁂𑀲𑁂𑀳𑀺 𑀩𑀳𑀺𑀤𑁆𑀥𑀸 𑀘 𑀲𑀩𑁆𑀩𑀦𑀺𑀫𑀺𑀢𑁆𑀢𑁂𑀳𑀺 𑀘𑀺𑀢𑁆𑀢𑀁 𑀯𑀺𑀯𑀺𑀢𑁆𑀢𑀁 𑀳𑁄𑀢𑀺 𑁋 𑀅𑀬𑀁 𑀘𑀺𑀢𑁆𑀢𑀯𑀺𑀯𑁂𑀓𑁄.

𑀓𑀢𑀫𑁄 𑀉𑀧𑀥𑀺𑀯𑀺𑀯𑁂𑀓𑁄? 𑀉𑀧𑀥𑀺 𑀯𑀼𑀘𑁆𑀘𑀦𑁆𑀢𑀺 𑀓𑀺𑀮𑁂𑀲𑀸 𑀘 𑀔𑀦𑁆𑀥𑀸 𑀘 𑀅𑀪𑀺𑀲𑀗𑁆𑀔𑀸𑀭𑀸 𑀘. 𑀉𑀧𑀥𑀺𑀯𑀺𑀯𑁂𑀓𑁄 𑀯𑀼𑀘𑁆𑀘𑀢𑀺 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁. 𑀬𑁄 𑀲𑁄 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀢𑀡𑁆𑀳𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁 𑁋 𑀅𑀬𑀁 𑀉𑀧𑀥𑀺𑀯𑀺𑀯𑁂𑀓𑁄. 𑀓𑀸𑀬𑀯𑀺𑀯𑁂𑀓𑁄 𑀘 𑀯𑀺𑀯𑁂𑀓𑀝𑁆𑀞𑀓𑀸𑀬𑀸𑀦𑀁 𑀦𑁂𑀓𑁆𑀔𑀫𑁆𑀫𑀸𑀪𑀺𑀭𑀢𑀸𑀦𑀁; 𑀘𑀺𑀢𑁆𑀢𑀯𑀺𑀯𑁂𑀓𑁄 𑀘 𑀧𑀭𑀺𑀲𑀼𑀤𑁆𑀥𑀘𑀺𑀢𑁆𑀢𑀸𑀦𑀁 𑀧𑀭𑀫𑀯𑁄𑀤𑀸𑀦𑀧𑀢𑁆𑀢𑀸𑀦𑀁; 𑀉𑀧𑀥𑀺𑀯𑀺𑀯𑁂𑀓𑁄 𑀘 𑀦𑀺𑀭𑀽𑀧𑀥𑀻𑀦𑀁 𑀧𑀼𑀕𑁆𑀕𑀮𑀸𑀦𑀁 𑀯𑀺𑀲𑀗𑁆𑀔𑀸𑀭𑀕𑀢𑀸𑀦𑀁. 𑀯𑀺𑀯𑁂𑀓𑁂 𑀲𑀺𑀓𑁆𑀔𑀺𑀲𑁆𑀲𑀸𑀫𑀲𑁂𑀢𑀺. 𑀲𑁄 𑀣𑁂𑀭𑁄 𑀧𑀓𑀢𑀺𑀬𑀸 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑁄. 𑀅𑀧𑀺 𑀘 𑀥𑀫𑁆𑀫𑀤𑁂𑀲𑀦𑀁 𑀉𑀧𑀸𑀤𑀸𑀬 𑀥𑀫𑁆𑀫𑀤𑁂𑀲𑀦𑀁 𑀲𑀸𑀯𑁂𑀦𑁆𑀢𑁄 [𑀬𑀸𑀘𑀦𑁆𑀢𑁄 (𑀲𑀻. 𑀲𑁆𑀬𑀸.)] 𑀏𑀯𑀫𑀸𑀳 𑁋 𑀯𑀺𑀯𑁂𑀓𑁂 𑀲𑀺𑀓𑁆𑀔𑀺𑀲𑁆𑀲𑀸𑀫𑀲𑁂𑀢𑀺.

𑀢𑁂𑀦𑀸𑀳 𑀣𑁂𑀭𑁄 𑀢𑀺𑀲𑁆𑀲𑀫𑁂𑀢𑁆𑀢𑁂𑀬𑁆𑀬𑁄 𑁋

‘‘𑀫𑁂𑀣𑀼𑀦𑀫𑀦𑀼𑀬𑀼𑀢𑁆𑀢𑀲𑁆𑀲, [𑀇𑀘𑁆𑀘𑀸𑀬𑀲𑁆𑀫𑀸 𑀢𑀺𑀲𑁆𑀲𑁄 𑀫𑁂𑀢𑁆𑀢𑁂𑀬𑁆𑀬𑁄]

𑀯𑀺𑀖𑀸𑀢𑀁 𑀩𑁆𑀭𑀽𑀳𑀺 𑀫𑀸𑀭𑀺𑀲;

𑀲𑀼𑀢𑁆𑀯𑀸𑀦 𑀢𑀯 𑀲𑀸𑀲𑀦𑀁, 𑀯𑀺𑀯𑁂𑀓𑁂 𑀲𑀺𑀓𑁆𑀔𑀺𑀲𑁆𑀲𑀸𑀫𑀲𑁂’’𑀢𑀺.

𑁫𑁦. 𑀫𑁂𑀣𑀼𑀦𑀫𑀦𑀼𑀬𑀼𑀢𑁆𑀢𑀲𑁆𑀲, [𑀫𑁂𑀢𑁆𑀢𑁂𑀬𑁆𑀬𑀸𑀢𑀺 𑀪𑀕𑀯𑀸]

𑀫𑀼𑀲𑁆𑀲𑀢𑁂 𑀯𑀸𑀧𑀺 𑀲𑀸𑀲𑀦𑀁;

𑀫𑀺𑀘𑁆𑀙𑀸 𑀘 𑀧𑀝𑀺𑀧𑀚𑁆𑀚𑀢𑀺, 𑀏𑀢𑀁 𑀢𑀲𑁆𑀫𑀺𑀁 𑀅𑀦𑀸𑀭𑀺𑀬𑀁.

𑀫𑁂𑀣𑀼𑀦𑀫𑀦𑀼𑀬𑀼𑀢𑁆𑀢𑀲𑁆𑀲𑀸𑀢𑀺. 𑀫𑁂𑀣𑀼𑀦𑀥𑀫𑁆𑀫𑁄 𑀦𑀸𑀫 𑀬𑁄 𑀲𑁄 𑀅𑀲𑀤𑁆𑀥𑀫𑁆𑀫𑁄 𑀕𑀸𑀫𑀥𑀫𑁆𑀫𑁄 𑀯𑀲𑀮𑀥𑀫𑁆𑀫𑁄 𑀤𑀼𑀝𑁆𑀞𑀼𑀮𑁆𑀮𑁄 𑀑𑀤𑀓𑀦𑁆𑀢𑀺𑀓𑁄 𑀭𑀳𑀲𑁆𑀲𑁄 𑀤𑁆𑀯𑀬𑀁𑀤𑁆𑀯𑀬𑀲𑀫𑀸𑀧𑀢𑁆𑀢𑀺. 𑀓𑀺𑀁𑀓𑀸𑀭𑀡𑀸 𑀯𑀼𑀘𑁆𑀘𑀢𑀺 𑀫𑁂𑀣𑀼𑀦𑀥𑀫𑁆𑀫𑁄? 𑀉𑀪𑀺𑀦𑁆𑀦𑀁 𑀭𑀢𑁆𑀢𑀸𑀦𑀁 𑀲𑀸𑀭𑀢𑁆𑀢𑀸𑀦𑀁 𑀅𑀯𑀲𑁆𑀲𑀼𑀢𑀸𑀦𑀁 𑀧𑀭𑀺𑀬𑀼𑀝𑁆𑀞𑀺𑀢𑀸𑀦𑀁 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑀸𑀦𑀁 𑀉𑀪𑀺𑀦𑁆𑀦𑀁 𑀲𑀤𑀺𑀲𑀸𑀦𑀁 𑀥𑀫𑁆𑀫𑁄𑀢𑀺 𑁋 𑀢𑀁𑀓𑀸𑀭𑀡𑀸 𑀯𑀼𑀘𑁆𑀘𑀢𑀺 𑀫𑁂𑀣𑀼𑀦𑀥𑀫𑁆𑀫𑁄. 𑀬𑀣𑀸 𑀉𑀪𑁄 𑀓𑀮𑀳𑀓𑀸𑀭𑀓𑀸 𑀫𑁂𑀣𑀼𑀦𑀓𑀸𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀉𑀪𑁄 𑀪𑀡𑁆𑀟𑀦𑀓𑀸𑀭𑀓𑀸 𑀫𑁂𑀣𑀼𑀦𑀓𑀸𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀉𑀪𑁄 𑀪𑀲𑁆𑀲𑀓𑀸𑀭𑀓𑀸 𑀫𑁂𑀣𑀼𑀦𑀓𑀸𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀉𑀪𑁄 𑀯𑀺𑀯𑀸𑀤𑀓𑀸𑀭𑀓𑀸 𑀫𑁂𑀣𑀼𑀦𑀓𑀸𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀉𑀪𑁄 𑀅𑀥𑀺𑀓𑀭𑀡𑀓𑀸𑀭𑀓𑀸 𑀫𑁂𑀣𑀼𑀦𑀓𑀸𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀉𑀪𑁄 𑀯𑀸𑀤𑀺𑀦𑁄 𑀫𑁂𑀣𑀼𑀦𑀓𑀸𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀉𑀪𑁄 𑀲𑀮𑁆𑀮𑀸𑀧𑀓𑀸 𑀫𑁂𑀣𑀼𑀦𑀓𑀸𑀢𑀺 𑀯𑀼𑀘𑁆𑀘𑀦𑁆𑀢𑀺; 𑀏𑀯𑀫𑁂𑀯𑀁 𑀉𑀪𑀺𑀦𑁆𑀦𑀁 𑀭𑀢𑁆𑀢𑀸𑀦𑀁 𑀲𑀸𑀭𑀢𑁆𑀢𑀸𑀦𑀁 𑀅𑀯𑀲𑁆𑀲𑀼𑀢𑀸𑀦𑀁 𑀧𑀭𑀺𑀬𑀼𑀝𑁆𑀞𑀺𑀢𑀸𑀦𑀁 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑀸𑀦𑀁 𑀉𑀪𑀺𑀦𑁆𑀦𑀁 𑀲𑀤𑀺𑀲𑀸𑀦𑀁 𑀥𑀫𑁆𑀫𑁄𑀢𑀺 𑁋 𑀢𑀁𑀓𑀸𑀭𑀡𑀸 𑀯𑀼𑀘𑁆𑀘𑀢𑀺 𑀫𑁂𑀣𑀼𑀦𑀥𑀫𑁆𑀫𑁄.

𑀫𑁂𑀣𑀼𑀦𑀫𑀦𑀼𑀬𑀼𑀢𑁆𑀢𑀲𑁆𑀲𑀸𑀢𑀺. 𑀫𑁂𑀣𑀼𑀦𑀥𑀫𑁆𑀫𑁂 𑀬𑀼𑀢𑁆𑀢𑀲𑁆𑀲 𑀧𑀬𑀼𑀢𑁆𑀢𑀲𑁆𑀲 𑀆𑀬𑀼𑀢𑁆𑀢𑀲𑁆𑀲 𑀲𑀫𑀸𑀬𑀼𑀢𑁆𑀢𑀲𑁆𑀲 𑀢𑀘𑁆𑀘𑀭𑀺𑀢𑀲𑁆𑀲 𑀢𑀩𑁆𑀩𑀳𑀼𑀮𑀲𑁆𑀲 𑀢𑀕𑁆𑀕𑀭𑀼𑀓𑀲𑁆𑀲 𑀢𑀦𑁆𑀦𑀺𑀦𑁆𑀦𑀲𑁆𑀲 𑀢𑀧𑁆𑀧𑁄𑀡𑀲𑁆𑀲 𑀢𑀧𑁆𑀧𑀩𑁆𑀪𑀸𑀭𑀲𑁆𑀲 𑀢𑀤𑀥𑀺𑀫𑀼𑀢𑁆𑀢𑀲𑁆𑀲 𑀢𑀤𑀥𑀺𑀧𑀢𑁂𑀬𑁆𑀬𑀲𑁆𑀲𑀸𑀢𑀺 𑁋 𑀫𑁂𑀣𑀼𑀦𑀫𑀦𑀼𑀬𑀼𑀢𑁆𑀢𑀲𑁆𑀲.

𑀫𑁂𑀢𑁆𑀢𑁂𑀬𑁆𑀬𑀸𑀢𑀺 𑀪𑀕𑀯𑀸 𑀢𑀁 𑀣𑁂𑀭𑀁 𑀕𑁄𑀢𑁆𑀢𑁂𑀦 𑀆𑀮𑀧𑀢𑀺. 𑀪𑀕𑀯𑀸𑀢𑀺 𑀕𑀸𑀭𑀯𑀸𑀥𑀺𑀯𑀘𑀦𑀁. 𑀅𑀧𑀺 𑀘 𑀪𑀕𑁆𑀕𑀭𑀸𑀕𑁄𑀢𑀺 𑀪𑀕𑀯𑀸, 𑀪𑀕𑁆𑀕𑀤𑁄𑀲𑁄𑀢𑀺 𑀪𑀕𑀯𑀸, 𑀪𑀕𑁆𑀕𑀫𑁄𑀳𑁄𑀢𑀺 𑀪𑀕𑀯𑀸, 𑀪𑀕𑁆𑀕𑀫𑀸𑀦𑁄𑀢𑀺 𑀪𑀕𑀯𑀸, 𑀪𑀕𑁆𑀕𑀤𑀺𑀝𑁆𑀞𑀻𑀢𑀺 𑀪𑀕𑀯𑀸, 𑀪𑀕𑁆𑀕𑀓𑀡𑁆𑀟𑀓𑁄𑀢𑀺 [𑀪𑀕𑁆𑀕𑀓𑀡𑁆𑀟𑀓𑁄𑀢𑀺 (𑀲𑀻. 𑀲𑁆𑀬𑀸.)] 𑀪𑀕𑀯𑀸, 𑀪𑀕𑁆𑀕𑀓𑀺𑀮𑁂𑀲𑁄𑀢𑀺 𑀪𑀕𑀯𑀸, 𑀪𑀚𑀺 𑀯𑀺𑀪𑀚𑀺 𑀧𑀯𑀺𑀪𑀚𑀺 𑀥𑀫𑁆𑀫𑀭𑀢𑀦𑀦𑁆𑀢𑀺 𑀪𑀕𑀯𑀸, 𑀪𑀯𑀸𑀦𑀁 𑀅𑀦𑁆𑀢𑀓𑀭𑁄𑀢𑀺 𑀪𑀕𑀯𑀸, 𑀪𑀸𑀯𑀺𑀢𑀓𑀸𑀬𑁄 𑀪𑀸𑀯𑀺𑀢𑀲𑀻𑀮𑁄 𑀪𑀸𑀯𑀺𑀢𑀘𑀺𑀢𑁆𑀢𑁄 𑀪𑀸𑀯𑀺𑀢𑀧𑀜𑁆𑀜𑁄𑀢𑀺 𑀪𑀕𑀯𑀸, 𑀪𑀚𑀺 𑀯𑀸 𑀪𑀕𑀯𑀸 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 [𑀅𑀭𑀜𑁆𑀜𑁂 𑀯𑀦𑀧𑀢𑁆𑀣𑀸𑀦𑀺 (𑀲𑀻.)] 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀅𑀧𑁆𑀧𑀲𑀤𑁆𑀤𑀸𑀦𑀺 𑀅𑀧𑁆𑀧𑀦𑀺𑀕𑁆𑀖𑁄𑀲𑀸𑀦𑀺 𑀯𑀺𑀚𑀦𑀯𑀸𑀢𑀸𑀦𑀺 𑀫𑀦𑀼𑀲𑁆𑀲𑀭𑀸𑀳𑀲𑁆𑀲𑁂𑀬𑁆𑀬𑀓𑀸𑀦𑀺 [𑀫𑀦𑀼𑀲𑁆𑀲𑀭𑀸𑀳𑀲𑁂𑀬𑁆𑀬𑀓𑀸𑀦𑀺 (𑀲𑀻. 𑀲𑁆𑀬𑀸.)] 𑀧𑀝𑀺𑀲𑀮𑁆𑀮𑀸𑀦𑀲𑀸𑀭𑀼𑀧𑁆𑀧𑀸𑀦𑀻𑀢𑀺 𑀪𑀕𑀯𑀸, 𑀪𑀸𑀕𑀻 𑀯𑀸 𑀪𑀕𑀯𑀸 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦𑀦𑁆𑀢𑀺 𑀪𑀕𑀯𑀸, 𑀪𑀸𑀕𑀻 𑀯𑀸 𑀪𑀕𑀯𑀸 𑀅𑀢𑁆𑀣𑀭𑀲𑀲𑁆𑀲 𑀥𑀫𑁆𑀫𑀭𑀲𑀲𑁆𑀲 𑀯𑀺𑀫𑀼𑀢𑁆𑀢𑀺𑀭𑀲𑀲𑁆𑀲 𑀅𑀥𑀺𑀲𑀻𑀮𑀲𑁆𑀲 𑀅𑀥𑀺𑀘𑀺𑀢𑁆𑀢𑀲𑁆𑀲 𑀅𑀥𑀺𑀧𑀜𑁆𑀜𑀸𑀬𑀸𑀢𑀺 𑀪𑀕𑀯𑀸, 𑀪𑀸𑀕𑀻 𑀯𑀸 𑀪𑀕𑀯𑀸 𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀁 𑀘𑀢𑀼𑀦𑁆𑀦𑀁 𑀅𑀧𑁆𑀧𑀫𑀜𑁆𑀜𑀸𑀦𑀁 𑀘𑀢𑀼𑀦𑁆𑀦𑀁 𑀅𑀭𑀽𑀧𑀲𑀫𑀸𑀧𑀢𑁆𑀢𑀻𑀦𑀦𑁆𑀢𑀺 𑀪𑀕𑀯𑀸, 𑀪𑀸𑀕𑀻 𑀯𑀸 𑀪𑀕𑀯𑀸 𑀅𑀝𑁆𑀞𑀦𑁆𑀦𑀁 𑀯𑀺𑀫𑁄𑀓𑁆𑀔𑀸𑀦𑀁 𑀅𑀝𑁆𑀞𑀦𑁆𑀦𑀁 𑀅𑀪𑀺𑀪𑀸𑀬𑀢𑀦𑀸𑀦𑀁 𑀦𑀯𑀦𑁆𑀦𑀁 𑀅𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀻𑀦𑀦𑁆𑀢𑀺 𑀪𑀕𑀯𑀸, 𑀪𑀸𑀕𑀻 𑀯𑀸 𑀪𑀕𑀯𑀸 𑀤𑀲𑀦𑁆𑀦𑀁 𑀲𑀜𑁆𑀜𑀸𑀪𑀸𑀯𑀦𑀸𑀦𑀁 𑀤𑀲𑀦𑁆𑀦𑀁 𑀓𑀲𑀺𑀡𑀲𑀫𑀸𑀧𑀢𑁆𑀢𑀻𑀦𑀁 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺𑀲𑁆𑀲 𑀅𑀲𑀼𑀪𑀲𑀫𑀸𑀧𑀢𑁆𑀢𑀺𑀬𑀸𑀢𑀺 𑀪𑀕𑀯𑀸, 𑀪𑀸𑀕𑀻 𑀯𑀸 𑀪𑀕𑀯𑀸 𑀘𑀢𑀼𑀦𑁆𑀦𑀁 𑀲𑀢𑀺𑀧𑀝𑁆𑀞𑀸𑀦𑀸𑀦𑀁 𑀘𑀢𑀼𑀦𑁆𑀦𑀁 𑀲𑀫𑁆𑀫𑀧𑁆𑀧𑀥𑀸𑀦𑀸𑀦𑀁 𑀘𑀢𑀼𑀦𑁆𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁 𑀧𑀜𑁆𑀘𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀜𑁆𑀘𑀦𑁆𑀦𑀁 𑀩𑀮𑀸𑀦𑀁 𑀲𑀢𑁆𑀢𑀦𑁆𑀦𑀁 𑀩𑁄𑀚𑁆𑀛𑀗𑁆𑀕𑀸𑀦𑀁 𑀅𑀭𑀺𑀬𑀲𑁆𑀲 𑀅𑀝𑁆𑀞𑀗𑁆𑀕𑀺𑀓𑀲𑁆𑀲 𑀫𑀕𑁆𑀕𑀲𑁆𑀲𑀸𑀢𑀺 𑀪𑀕𑀯𑀸, 𑀪𑀸𑀕𑀻 𑀯𑀸 𑀪𑀕𑀯𑀸 𑀤𑀲𑀦𑁆𑀦𑀁 𑀢𑀣𑀸𑀕𑀢𑀩𑀮𑀸𑀦𑀁 𑀘𑀢𑀼𑀦𑁆𑀦𑀁 𑀯𑁂𑀲𑀸𑀭𑀚𑁆𑀚𑀸𑀦𑀁 𑀘𑀢𑀼𑀦𑁆𑀦𑀁 𑀧𑀝𑀺𑀲𑀫𑁆𑀪𑀺𑀤𑀸𑀦𑀁 𑀙𑀦𑁆𑀦𑀁 𑀅𑀪𑀺𑀜𑁆𑀜𑀸𑀦𑀁 [𑀅𑀪𑀺𑀜𑁆𑀜𑀸𑀡𑀸𑀦𑀁 (𑀲𑀻.)] 𑀙𑀦𑁆𑀦𑀁 𑀩𑀼𑀤𑁆𑀥𑀥𑀫𑁆𑀫𑀸𑀦𑀦𑁆𑀢𑀺 𑀪𑀕𑀯𑀸. 𑀪𑀕𑀯𑀸𑀢𑀺 𑀦𑁂𑀢𑀁 𑀦𑀸𑀫𑀁 𑀫𑀸𑀢𑀭𑀸 𑀓𑀢𑀁, 𑀦 𑀧𑀺𑀢𑀭𑀸 𑀓𑀢𑀁, 𑀦 𑀪𑀸𑀢𑀭𑀸 𑀓𑀢𑀁, 𑀦 𑀪𑀕𑀺𑀦𑀺𑀬𑀸 𑀓𑀢𑀁, 𑀦 𑀫𑀺𑀢𑁆𑀢𑀸𑀫𑀘𑁆𑀘𑁂𑀳𑀺 𑀓𑀢𑀁, 𑀦 𑀜𑀸𑀢𑀺𑀲𑀸𑀮𑁄𑀳𑀺𑀢𑁂𑀳𑀺 𑀓𑀢𑀁 𑀦 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀳𑀺 𑀓𑀢𑀁, 𑀦 𑀤𑁂𑀯𑀢𑀸𑀳𑀺 𑀓𑀢𑀁. 𑀯𑀺𑀫𑁄𑀓𑁆𑀔𑀦𑁆𑀢𑀺𑀓𑀫𑁂𑀢𑀁 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀩𑁄𑀥𑀺𑀬𑀸 𑀫𑀽𑀮𑁂 𑀲𑀳 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀧𑀝𑀺𑀮𑀸𑀪𑀸 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺 𑀬𑀤𑀺𑀤𑀁 𑀪𑀕𑀯𑀸𑀢𑀺 𑁋 𑀫𑁂𑀢𑁆𑀢𑁂𑀬𑁆𑀬𑀸𑀢𑀺 𑀪𑀕𑀯𑀸.

𑀫𑀼𑀲𑁆𑀲𑀢𑁂 𑀯𑀸𑀧𑀺 𑀲𑀸𑀲𑀦𑀦𑁆𑀢𑀺. 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀲𑀸𑀲𑀦𑀁 𑀫𑀼𑀲𑁆𑀲𑀢𑀺 𑁋 𑀧𑀭𑀺𑀬𑀢𑁆𑀢𑀺𑀲𑀸𑀲𑀦𑀫𑁆𑀧𑀺 𑀫𑀼𑀲𑁆𑀲𑀢𑀺, 𑀧𑀝𑀺𑀧𑀢𑁆𑀢𑀺𑀲𑀸𑀲𑀦𑀫𑁆𑀧𑀺 𑀫𑀼𑀲𑁆𑀲𑀢𑀺. 𑀓𑀢𑀫𑀁 𑀧𑀭𑀺𑀬𑀢𑁆𑀢𑀺𑀲𑀸𑀲𑀦𑀁? 𑀬𑀁 𑀢𑀲𑁆𑀲 𑀧𑀭𑀺𑀬𑀸𑀧𑀼𑀝𑀁 𑁋 𑀲𑀼𑀢𑁆𑀢𑀁 𑀕𑁂𑀬𑁆𑀬𑀁 𑀯𑁂𑀬𑁆𑀬𑀸𑀓𑀭𑀡𑀁 𑀕𑀸𑀣𑀸 𑀉𑀤𑀸𑀦𑀁 𑀇𑀢𑀺𑀯𑀼𑀢𑁆𑀢𑀓𑀁 𑀚𑀸𑀢𑀓𑀁 𑀅𑀩𑁆𑀪𑀼𑀢𑀥𑀫𑁆𑀫𑀁 𑀯𑁂𑀤𑀮𑁆𑀮𑀁 𑁋 𑀇𑀤𑀁 𑀧𑀭𑀺𑀬𑀢𑁆𑀢𑀺𑀲𑀸𑀲𑀦𑀁. 𑀢𑀫𑁆𑀧𑀺 𑀫𑀼𑀲𑁆𑀲𑀢𑀺 𑀲𑀫𑁆𑀫𑀼𑀲𑁆𑀲𑀢𑀺 𑀧𑀫𑀼𑀲𑁆𑀲𑀢𑀺 𑀲𑀫𑁆𑀧𑀫𑀼𑀲𑁆𑀲𑀢𑀺 𑀧𑀭𑀺𑀩𑀸𑀳𑀺𑀭𑁄 𑀳𑁄𑀢𑀻𑀢𑀺 𑁋 𑀏𑀯𑀫𑁆𑀧𑀺 𑀫𑀼𑀲𑁆𑀲𑀢𑁂 𑀯𑀸𑀧𑀺 𑀲𑀸𑀲𑀦𑀁.

𑀓𑀢𑀫𑀁 𑀧𑀝𑀺𑀧𑀢𑁆𑀢𑀺𑀲𑀸𑀲𑀦𑀁? 𑀲𑀫𑁆𑀫𑀸𑀧𑀝𑀺𑀧𑀤𑀸 𑀅𑀦𑀼𑀮𑁄𑀫𑀧𑀝𑀺𑀧𑀤𑀸 𑀅𑀧𑀘𑁆𑀘𑀦𑀻𑀓𑀧𑀝𑀺𑀧𑀤𑀸 𑀅𑀦𑁆𑀯𑀢𑁆𑀣𑀧𑀝𑀺𑀧𑀤𑀸 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀤𑀸 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀺𑀢𑀸 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀢𑀸 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀸 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑁄 𑀲𑀢𑀺𑀲𑀫𑁆𑀧𑀚𑀜𑁆𑀜𑀁 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀧𑀜𑁆𑀘 𑀩𑀮𑀸𑀦𑀺 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑁋 𑀇𑀤𑀁 𑀧𑀝𑀺𑀧𑀢𑁆𑀢𑀺𑀲𑀸𑀲𑀦𑀁. 𑀢𑀫𑁆𑀧𑀺 𑀫𑀼𑀲𑁆𑀲𑀢𑀺 𑀲𑀫𑁆𑀫𑀼𑀲𑁆𑀲𑀢𑀺 𑀧𑀫𑀼𑀲𑁆𑀲𑀢𑀺 𑀲𑀫𑁆𑀧𑀫𑀼𑀲𑁆𑀲𑀢𑀺 𑀧𑀭𑀺𑀩𑀸𑀳𑀺𑀭𑁄 𑀳𑁄𑀢𑀻𑀢𑀺. 𑀏𑀯𑀫𑁆𑀧𑀺 𑀫𑀼𑀲𑁆𑀲𑀢𑁂 𑀯𑀸𑀧𑀺 𑀲𑀸𑀲𑀦𑀁.

𑀫𑀺𑀘𑁆𑀙𑀸 𑀘 𑀧𑀝𑀺𑀧𑀚𑁆𑀚𑀢𑀻𑀢𑀺. 𑀧𑀸𑀡𑀫𑁆𑀧𑀺 𑀳𑀦𑀢𑀺, 𑀅𑀤𑀺𑀦𑁆𑀦𑀫𑁆𑀧𑀺 𑀆𑀤𑀺𑀬𑀢𑀺, 𑀲𑀦𑁆𑀥𑀺𑀫𑁆𑀧𑀺 𑀙𑀺𑀦𑁆𑀤𑀢𑀺, 𑀦𑀺𑀮𑁆𑀮𑁄𑀧𑀫𑁆𑀧𑀺 𑀳𑀭𑀢𑀺, 𑀏𑀓𑀸𑀕𑀸𑀭𑀺𑀓𑀫𑁆𑀧𑀺 𑀓𑀭𑁄𑀢𑀺, 𑀧𑀭𑀺𑀧𑀦𑁆𑀣𑁂𑀧𑀺 𑀢𑀺𑀝𑁆𑀞𑀢𑀺, 𑀧𑀭𑀤𑀸𑀭𑀫𑁆𑀧𑀺 𑀕𑀘𑁆𑀙𑀢𑀺, 𑀫𑀼𑀲𑀸𑀧𑀺 𑀪𑀡𑀢𑀻𑀢𑀺 𑁋 𑀫𑀺𑀘𑁆𑀙𑀸 𑀘 𑀧𑀝𑀺𑀧𑀚𑁆𑀚𑀢𑀺.

𑀏𑀢𑀁 𑀢𑀲𑁆𑀫𑀺𑀁 𑀅𑀦𑀸𑀭𑀺𑀬𑀦𑁆𑀢𑀺. 𑀏𑀢𑀁 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀅𑀦𑀭𑀺𑀬𑀥𑀫𑁆𑀫𑁄 𑀩𑀸𑀮𑀥𑀫𑁆𑀫𑁄 𑀫𑀽𑀴𑁆𑀳𑀥𑀫𑁆𑀫𑁄 𑀅𑀜𑁆𑀜𑀸𑀡𑀥𑀫𑁆𑀫𑁄 𑀅𑀫𑀭𑀸𑀯𑀺𑀓𑁆𑀔𑁂𑀧𑀥𑀫𑁆𑀫𑁄, 𑀬𑀤𑀺𑀤𑀁 𑀫𑀺𑀘𑁆𑀙𑀸𑀧𑀝𑀺𑀧𑀤𑀸𑀢𑀺 𑁋 𑀏𑀢𑀁 𑀢𑀲𑁆𑀫𑀺𑀁 𑀅𑀦𑀸𑀭𑀺𑀬𑀁.

𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀫𑁂𑀣𑀼𑀦𑀫𑀦𑀼𑀬𑀼𑀢𑁆𑀢𑀲𑁆𑀲, [𑀫𑁂𑀢𑁆𑀢𑁂𑀬𑁆𑀬𑀸𑀢𑀺 𑀪𑀕𑀯𑀸]

𑀫𑀼𑀲𑁆𑀲𑀢𑁂 𑀯𑀸𑀧𑀺 𑀲𑀸𑀲𑀦𑀁;

𑀫𑀺𑀘𑁆𑀙𑀸 𑀘 𑀧𑀝𑀺𑀧𑀚𑁆𑀚𑀢𑀺, 𑀏𑀢𑀁 𑀢𑀲𑁆𑀫𑀺𑀁 𑀅𑀦𑀸𑀭𑀺𑀬’’𑀦𑁆𑀢𑀺.

𑁫𑁧. 𑀏𑀓𑁄 𑀧𑀼𑀩𑁆𑀩𑁂 𑀘𑀭𑀺𑀢𑁆𑀯𑀸𑀦, 𑀫𑁂𑀣𑀼𑀦𑀁 𑀬𑁄 𑀦𑀺𑀲𑁂𑀯𑀢𑀺;

𑀬𑀸𑀦𑀁 𑀪𑀦𑁆𑀢𑀁𑀯 𑀢𑀁 𑀮𑁄𑀓𑁂, 𑀳𑀻𑀦𑀫𑀸𑀳𑀼 𑀧𑀼𑀣𑀼𑀚𑁆𑀚𑀦𑀁.

𑀏𑀓𑁄 𑀧𑀼𑀩𑁆𑀩𑁂 𑀘𑀭𑀺𑀢𑁆𑀯𑀸𑀦𑀸𑀢𑀺. 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀏𑀓𑁄 𑀧𑀼𑀩𑁆𑀩𑁂 𑀘𑀭𑀺𑀢𑁆𑀯𑀸𑀦 𑁋 𑀧𑀩𑁆𑀩𑀚𑁆𑀚𑀸𑀲𑀗𑁆𑀔𑀸𑀢𑁂𑀦 𑀯𑀸 𑀕𑀡𑀸𑀯𑀯𑀲𑁆𑀲𑀕𑁆𑀕𑀝𑁆𑀞𑁂𑀦 𑀯𑀸. 𑀓𑀣𑀁 𑀧𑀩𑁆𑀩𑀚𑁆𑀚𑀸𑀲𑀗𑁆𑀔𑀸𑀢𑁂𑀦 𑀏𑀓𑁄 𑀧𑀼𑀩𑁆𑀩𑁂 𑀘𑀭𑀺𑀢𑁆𑀯𑀸𑀦? 𑀲𑀩𑁆𑀩𑀁 𑀖𑀭𑀸𑀯𑀸𑀲𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀢𑁆𑀯𑀸 𑀧𑀼𑀢𑁆𑀢𑀤𑀸𑀭𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀢𑁆𑀯𑀸 𑀜𑀸𑀢𑀺𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀢𑁆𑀯𑀸 𑀫𑀺𑀢𑁆𑀢𑀸𑀫𑀘𑁆𑀘𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀢𑁆𑀯𑀸 𑀲𑀦𑁆𑀦𑀺𑀥𑀺𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀢𑁆𑀯𑀸 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀓𑀺𑀜𑁆𑀘𑀦𑀪𑀸𑀯𑀁 𑀉𑀧𑀕𑀦𑁆𑀢𑁆𑀯𑀸 𑀏𑀓𑁄 𑀘𑀭𑀢𑀺 𑀯𑀺𑀳𑀭𑀢𑀺 𑀇𑀭𑀺𑀬𑀢𑀺 𑀯𑀢𑁆𑀢𑀢𑀺 𑀧𑀸𑀮𑁂𑀢𑀺 𑀬𑀧𑁂𑀢𑀺 𑀬𑀸𑀧𑁂𑀢𑀺. 𑀏𑀯𑀁 𑀧𑀩𑁆𑀩𑀚𑁆𑀚𑀸𑀲𑀗𑁆𑀔𑀸𑀢𑁂𑀦 𑀏𑀓𑁄 𑀧𑀼𑀩𑁆𑀩𑁂 𑀘𑀭𑀺𑀢𑁆𑀯𑀸𑀦.

𑀓𑀣𑀁 𑀕𑀡𑀸𑀯𑀯𑀲𑁆𑀲𑀕𑁆𑀕𑀝𑁆𑀞𑁂𑀦 𑀏𑀓𑁄 𑀧𑀼𑀩𑁆𑀩𑁂 𑀘𑀭𑀺𑀢𑁆𑀯𑀸𑀦? 𑀲𑁄 𑀏𑀯𑀁 𑀧𑀩𑁆𑀩𑀚𑀺𑀢𑁄 𑀲𑀫𑀸𑀦𑁄 𑀏𑀓𑁄 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀢𑀺 𑀅𑀧𑁆𑀧𑀲𑀤𑁆𑀤𑀸𑀦𑀺 𑀅𑀧𑁆𑀧𑀦𑀺𑀕𑁆𑀖𑁄𑀲𑀸𑀦𑀺 𑀯𑀺𑀚𑀦𑀯𑀸𑀢𑀸𑀦𑀺 𑀫𑀦𑀼𑀲𑁆𑀲𑀭𑀸𑀳𑀲𑁆𑀲𑁂𑀬𑁆𑀬𑀓𑀸𑀦𑀺 𑀧𑀝𑀺𑀲𑀮𑁆𑀮𑀸𑀦𑀲𑀸𑀭𑀼𑀧𑁆𑀧𑀸𑀦𑀺. 𑀲𑁄 𑀏𑀓𑁄 𑀕𑀘𑁆𑀙𑀢𑀺, 𑀏𑀓𑁄 𑀢𑀺𑀝𑁆𑀞𑀢𑀺, 𑀏𑀓𑁄 𑀦𑀺𑀲𑀻𑀤𑀢𑀺, 𑀏𑀓𑁄 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺, 𑀏𑀓𑁄 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀢𑀺, 𑀏𑀓𑁄 𑀧𑀝𑀺𑀓𑁆𑀓𑀫𑀢𑀺, 𑀏𑀓𑁄 𑀭𑀳𑁄 𑀦𑀺𑀲𑀻𑀤𑀢𑀺, 𑀏𑀓𑁄 𑀘𑀗𑁆𑀓𑀫𑀁 𑀅𑀥𑀺𑀝𑁆𑀞𑀸𑀢𑀺, 𑀏𑀓𑁄 𑀘𑀭𑀢𑀺 𑀯𑀺𑀳𑀭𑀢𑀺 𑀇𑀭𑀺𑀬𑀢𑀺 𑀯𑀢𑁆𑀢𑀢𑀺 𑀧𑀸𑀮𑁂𑀢𑀺 𑀬𑀧𑁂𑀢𑀺 𑀬𑀸𑀧𑁂𑀢𑀺. 𑀏𑀯𑀁 𑀕𑀡𑀸𑀯𑀯𑀲𑁆𑀲𑀕𑁆𑀕𑀝𑁆𑀞𑁂𑀦 𑀏𑀓𑁄 𑀧𑀼𑀩𑁆𑀩𑁂 𑀘𑀭𑀺𑀢𑁆𑀯𑀸𑀦.

𑀫𑁂𑀣𑀼𑀦𑀁 𑀬𑁄 𑀦𑀺𑀲𑁂𑀯𑀢𑀻𑀢𑀺. 𑀫𑁂𑀣𑀼𑀦𑀥𑀫𑁆𑀫𑁄 𑀦𑀸𑀫 𑀬𑁄 𑀲𑁄 𑀅𑀲𑀤𑁆𑀥𑀫𑁆𑀫𑁄…𑀧𑁂… 𑀢𑀁𑀓𑀸𑀭𑀡𑀸 𑀯𑀼𑀘𑁆𑀘𑀢𑀺 𑀫𑁂𑀣𑀼𑀦𑀥𑀫𑁆𑀫𑁄. 𑀫𑁂𑀣𑀼𑀦𑀁 𑀬𑁄 𑀦𑀺𑀲𑁂𑀯𑀢𑀻𑀢𑀺. 𑀬𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑀁 𑀥𑀫𑁆𑀫𑀁 𑀲𑀗𑁆𑀖𑀁 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀺𑀢𑁆𑀯𑀸 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀲𑁂𑀯𑀢𑀺 𑀦𑀺𑀲𑁂𑀯𑀢𑀺 𑀲𑀁𑀲𑁂𑀯𑀢𑀺 𑀧𑀝𑀺𑀲𑁂𑀯𑀢𑀻𑀢𑀺 𑁋 𑀫𑁂𑀣𑀼𑀦𑀁 𑀬𑁄 𑀦𑀺𑀲𑁂𑀯𑀢𑀺.

𑀬𑀸𑀦𑀁 𑀪𑀦𑁆𑀢𑀁𑀯 𑀢𑀁 𑀮𑁄𑀓𑁂𑀢𑀺. 𑀬𑀸𑀦𑀦𑁆𑀢𑀺 𑀳𑀢𑁆𑀣𑀺𑀬𑀸𑀦𑀁 𑀅𑀲𑁆𑀲𑀬𑀸𑀦𑀁 𑀕𑁄𑀬𑀸𑀦𑀁 𑀅𑀚𑀬𑀸𑀦𑀁 𑀫𑁂𑀡𑁆𑀟𑀬𑀸𑀦𑀁 𑀑𑀝𑁆𑀞𑀬𑀸𑀦𑀁 𑀔𑀭𑀬𑀸𑀦𑀁 𑀪𑀦𑁆𑀢𑀁 𑀅𑀤𑀦𑁆𑀢𑀁 𑀅𑀓𑀸𑀭𑀺𑀢𑀁 𑀅𑀯𑀺𑀦𑀻𑀢𑀁 𑀉𑀧𑁆𑀧𑀣𑀁 𑀕𑀡𑁆𑀳𑀸𑀢𑀺, 𑀯𑀺𑀲𑀫𑀁 𑀔𑀸𑀡𑀼𑀫𑁆𑀧𑀺 𑀧𑀸𑀲𑀸𑀡𑀫𑁆𑀧𑀺 𑀅𑀪𑀺𑀭𑀼𑀳𑀢𑀺, 𑀬𑀸𑀦𑀫𑁆𑀧𑀺 𑀆𑀭𑁄𑀳𑀦𑀓𑀫𑁆𑀧𑀺 𑀪𑀜𑁆𑀚𑀢𑀺, 𑀧𑀧𑀸𑀢𑁂𑀧𑀺 𑀧𑀧𑀢𑀢𑀺. 𑀬𑀣𑀸 𑀢𑀁 𑀪𑀦𑁆𑀢𑀁 𑀬𑀸𑀦𑀁 𑀅𑀤𑀦𑁆𑀢𑀁 𑀅𑀓𑀸𑀭𑀺𑀢𑀁 𑀅𑀯𑀺𑀦𑀻𑀢𑀁 𑀉𑀧𑁆𑀧𑀣𑀁 𑀕𑀡𑁆𑀳𑀸𑀢𑀺; 𑀏𑀯𑀫𑁂𑀯𑀁 𑀲𑁄 𑀯𑀺𑀩𑁆𑀪𑀦𑁆𑀢𑀓𑁄 𑀪𑀦𑁆𑀢𑀬𑀸𑀦𑀧𑀝𑀺𑀪𑀸𑀕𑁄 𑀉𑀧𑁆𑀧𑀣𑀁 𑀕𑀡𑁆𑀳𑀸𑀢𑀺, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀕𑀡𑁆𑀳𑀸𑀢𑀺…𑀧𑁂… 𑀫𑀺𑀘𑁆𑀙𑀸𑀲𑀫𑀸𑀥𑀺𑀁 𑀕𑀡𑁆𑀳𑀸𑀢𑀺. 𑀬𑀣𑀸 𑀢𑀁 𑀪𑀦𑁆𑀢𑀁 𑀬𑀸𑀦𑀁 𑀅𑀤𑀦𑁆𑀢𑀁 𑀅𑀓𑀸𑀭𑀺𑀢𑀁 𑀅𑀯𑀺𑀦𑀻𑀢𑀁 𑀯𑀺𑀲𑀫𑀁 𑀔𑀸𑀡𑀼𑀫𑁆𑀧𑀺 𑀧𑀸𑀲𑀸𑀡𑀫𑁆𑀧𑀺 𑀅𑀪𑀺𑀭𑀼𑀳𑀢𑀺; 𑀏𑀯𑀫𑁂𑀯𑀁 𑀲𑁄 𑀯𑀺𑀩𑁆𑀪𑀦𑁆𑀢𑀓𑁄 𑀪𑀦𑁆𑀢𑀬𑀸𑀦𑀧𑀝𑀺𑀪𑀸𑀕𑁄 𑀯𑀺𑀲𑀫𑀁 𑀓𑀸𑀬𑀓𑀫𑁆𑀫𑀁 𑀅𑀪𑀺𑀭𑀼𑀳𑀢𑀺, 𑀯𑀺𑀲𑀫𑀁 𑀯𑀘𑀻𑀓𑀫𑁆𑀫𑀁 𑀅𑀪𑀺𑀭𑀼𑀳𑀢𑀺, 𑀯𑀺𑀲𑀫𑀁 𑀫𑀦𑁄𑀓𑀫𑁆𑀫𑀁 𑀅𑀪𑀺𑀭𑀼𑀳𑀢𑀺, 𑀯𑀺𑀲𑀫𑀁 𑀧𑀸𑀡𑀸𑀢𑀺𑀧𑀸𑀢𑀁 𑀅𑀪𑀺𑀭𑀼𑀳𑀢𑀺, 𑀯𑀺𑀲𑀫𑀁 𑀅𑀤𑀺𑀦𑁆𑀦𑀸𑀤𑀸𑀦𑀁 𑀅𑀪𑀺𑀭𑀼𑀳𑀢𑀺, 𑀯𑀺𑀲𑀫𑀁 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀁 𑀅𑀪𑀺𑀭𑀼𑀳𑀢𑀺, 𑀯𑀺𑀲𑀫𑀁 𑀫𑀼𑀲𑀸𑀯𑀸𑀤𑀁 𑀅𑀪𑀺𑀭𑀼𑀳𑀢𑀺, 𑀯𑀺𑀲𑀫𑀁 𑀧𑀺𑀲𑀼𑀡𑀯𑀸𑀘𑀁 𑀅𑀪𑀺𑀭𑀼𑀳𑀢𑀺, 𑀯𑀺𑀲𑀫𑀁 𑀨𑀭𑀼𑀲𑀯𑀸𑀘𑀁 𑀅𑀪𑀺𑀭𑀼𑀳𑀢𑀺, 𑀯𑀺𑀲𑀫𑀁 𑀲𑀫𑁆𑀨𑀧𑁆𑀧𑀮𑀸𑀧𑀁 𑀅𑀪𑀺𑀭𑀼𑀳𑀢𑀺, 𑀯𑀺𑀲𑀫𑀁 𑀅𑀪𑀺𑀚𑁆𑀛𑀁 𑀅𑀪𑀺𑀭𑀼𑀳𑀢𑀺, 𑀯𑀺𑀲𑀫𑀁 𑀩𑁆𑀬𑀸𑀧𑀸𑀤𑀁 𑀅𑀪𑀺𑀭𑀼𑀳𑀢𑀺, 𑀯𑀺𑀲𑀫𑀁 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀅𑀪𑀺𑀭𑀼𑀳𑀢𑀺, 𑀯𑀺𑀲𑀫𑁂 𑀲𑀗𑁆𑀔𑀸𑀭𑁂 𑀅𑀪𑀺𑀭𑀼𑀳𑀢𑀺, 𑀯𑀺𑀲𑀫𑁂 𑀧𑀜𑁆𑀘 𑀓𑀸𑀫𑀕𑀼𑀡𑁂 𑀅𑀪𑀺𑀭𑀼𑀳𑀢𑀺, 𑀯𑀺𑀲𑀫𑁂 𑀦𑀻𑀯𑀭𑀡𑁂 𑀅𑀪𑀺𑀭𑀼𑀳𑀢𑀺. 𑀬𑀣𑀸 𑀢𑀁 𑀪𑀦𑁆𑀢𑀁 𑀬𑀸𑀦𑀁 𑀅𑀤𑀦𑁆𑀢𑀁 𑀅𑀓𑀸𑀭𑀺𑀢𑀁 𑀅𑀯𑀺𑀦𑀻𑀢𑀁 𑀬𑀸𑀦𑀫𑁆𑀧𑀺 𑀆𑀭𑁄𑀳𑀦𑀓𑀫𑁆𑀧𑀺 𑀪𑀜𑁆𑀚𑀢𑀺; 𑀏𑀯𑀫𑁂𑀯𑀁 𑀲𑁄 𑀯𑀺𑀩𑁆𑀪𑀦𑁆𑀢𑀓𑁄 𑀪𑀦𑁆𑀢𑀬𑀸𑀦𑀧𑀝𑀺𑀪𑀸𑀕𑁄 𑀦𑀺𑀭𑀬𑁂 𑀅𑀢𑁆𑀢𑀸𑀦𑀁 𑀪𑀜𑁆𑀚𑀢𑀺, 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀁 𑀅𑀢𑁆𑀢𑀸𑀦𑀁 𑀪𑀜𑁆𑀚𑀢𑀺, 𑀧𑁂𑀢𑁆𑀢𑀺𑀯𑀺𑀲𑀬𑁂 𑀅𑀢𑁆𑀢𑀸𑀦𑀁 𑀪𑀜𑁆𑀚𑀢𑀺, 𑀫𑀦𑀼𑀲𑁆𑀲𑀮𑁄𑀓𑁂 𑀅𑀢𑁆𑀢𑀸𑀦𑀁 𑀪𑀜𑁆𑀚𑀢𑀺, 𑀤𑁂𑀯𑀮𑁄𑀓𑁂 𑀅𑀢𑁆𑀢𑀸𑀦𑀁 𑀪𑀜𑁆𑀚𑀢𑀺. 𑀬𑀣𑀸 𑀢𑀁 𑀪𑀦𑁆𑀢𑀁 𑀬𑀸𑀦𑀁 𑀅𑀤𑀦𑁆𑀢𑀁 𑀅𑀓𑀸𑀭𑀺𑀢𑀁 𑀅𑀯𑀺𑀦𑀻𑀢𑀁 𑀧𑀧𑀸𑀢𑁂 𑀧𑀧𑀢𑀢𑀺; 𑀏𑀯𑀫𑁂𑀯𑀁 𑀲𑁄 𑀯𑀺𑀩𑁆𑀪𑀦𑁆𑀢𑀓𑁄 𑀪𑀦𑁆𑀢𑀬𑀸𑀦𑀧𑀝𑀺𑀪𑀸𑀕𑁄 𑀚𑀸𑀢𑀺𑀧𑀧𑀸𑀢𑀫𑁆𑀧𑀺 𑀧𑀧𑀢𑀢𑀺, 𑀚𑀭𑀸𑀧𑀧𑀸𑀢𑀫𑁆𑀧𑀺 𑀧𑀧𑀢𑀢𑀺, 𑀩𑁆𑀬𑀸𑀥𑀺𑀧𑀧𑀸𑀢𑀫𑁆𑀧𑀺 𑀧𑀧𑀢𑀢𑀺, 𑀫𑀭𑀡𑀧𑀧𑀸𑀢𑀫𑁆𑀧𑀺 𑀧𑀧𑀢𑀢𑀺, 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀧𑀧𑀸𑀢𑀫𑁆𑀧𑀺 𑀧𑀧𑀢𑀢𑀺. 𑀮𑁄𑀓𑁂𑀢𑀺 𑀅𑀧𑀸𑀬𑀮𑁄𑀓𑁂 𑀫𑀦𑀼𑀲𑁆𑀲𑀮𑁄𑀓𑁂𑀢𑀺 𑁋 𑀬𑀸𑀦𑀁 𑀪𑀦𑁆𑀢𑀁𑀯 𑀢𑀁 𑀮𑁄𑀓𑁂.

𑀳𑀻𑀦𑀫𑀸𑀳𑀼 𑀧𑀼𑀣𑀼𑀚𑁆𑀚𑀦𑀦𑁆𑀢𑀺. 𑀧𑀼𑀣𑀼𑀚𑁆𑀚𑀦𑀸𑀢𑀺 𑀓𑁂𑀦𑀝𑁆𑀞𑁂𑀦 𑀧𑀼𑀣𑀼𑀚𑁆𑀚𑀦𑀸? 𑀧𑀼𑀣𑀼 𑀓𑀺𑀮𑁂𑀲𑁂 𑀚𑀦𑁂𑀦𑁆𑀢𑀻𑀢𑀺 𑀧𑀼𑀣𑀼𑀚𑁆𑀚𑀦𑀸, 𑀧𑀼𑀣𑀼 𑀅𑀯𑀺𑀳𑀢𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀓𑀸𑀢𑀺 𑀧𑀼𑀣𑀼𑀚𑁆𑀚𑀦𑀸, 𑀧𑀼𑀣𑀼 𑀲𑀢𑁆𑀣𑀸𑀭𑀸𑀦𑀁 𑀫𑀼𑀔𑀼𑀮𑁆𑀮𑁄𑀓𑀺𑀓𑀸𑀢𑀺 𑀧𑀼𑀣𑀼𑀚𑁆𑀚𑀦𑀸, 𑀧𑀼𑀣𑀼 𑀲𑀩𑁆𑀩𑀕𑀢𑀻𑀳𑀺 𑀅𑀯𑀼𑀝𑁆𑀞𑀺𑀢𑀸𑀢𑀺 𑀧𑀼𑀣𑀼𑀚𑁆𑀚𑀦𑀸, 𑀧𑀼𑀣𑀼 𑀦𑀸𑀦𑀸𑀪𑀺𑀲𑀗𑁆𑀔𑀸𑀭𑁂 [𑀦𑀸𑀦𑀸𑀪𑀺𑀲𑀗𑁆𑀔𑀸𑀭𑁂𑀳𑀺 (𑀲𑁆𑀬𑀸.)] 𑀅𑀪𑀺𑀲𑀗𑁆𑀔𑀭𑁄𑀦𑁆𑀢𑀻𑀢𑀺 𑀧𑀼𑀣𑀼𑀚𑁆𑀚𑀦𑀸, 𑀧𑀼𑀣𑀼 𑀦𑀸𑀦𑀸𑀑𑀖𑁂𑀳𑀺 𑀯𑀼𑀬𑁆𑀳𑀦𑁆𑀢𑀻𑀢𑀺 𑀧𑀼𑀣𑀼𑀚𑁆𑀚𑀦𑀸, 𑀧𑀼𑀣𑀼 𑀦𑀸𑀦𑀸𑀲𑀦𑁆𑀢𑀸𑀧𑁂𑀳𑀺 𑀲𑀦𑁆𑀢𑀧𑀦𑁆𑀢𑀻𑀢𑀺 𑀧𑀼𑀣𑀼𑀚𑁆𑀚𑀦𑀸, 𑀧𑀼𑀣𑀼 𑀦𑀸𑀦𑀸𑀧𑀭𑀺𑀴𑀸𑀳𑁂𑀳𑀺 𑀧𑀭𑀺𑀤𑀬𑁆𑀳𑀦𑁆𑀢𑀻𑀢𑀺 𑀧𑀼𑀣𑀼𑀚𑁆𑀚𑀦𑀸, 𑀧𑀼𑀣𑀼 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀭𑀢𑁆𑀢𑀸 𑀕𑀺𑀤𑁆𑀥𑀸 𑀕𑀥𑀺𑀢𑀸 𑀫𑀼𑀘𑁆𑀙𑀺𑀢𑀸 𑀅𑀚𑁆𑀛𑁄𑀲𑀦𑁆𑀦𑀸 [𑀅𑀚𑁆𑀛𑁄𑀧𑀦𑁆𑀦𑀸 (𑀲𑀻. 𑀲𑁆𑀬𑀸.)] 𑀮𑀕𑁆𑀕𑀸 𑀮𑀕𑁆𑀕𑀺𑀢𑀸 𑀧𑀮𑀺𑀩𑀼𑀤𑁆𑀥𑀸𑀢𑀺 𑀧𑀼𑀣𑀼𑀚𑁆𑀚𑀦𑀸, 𑀧𑀼𑀣𑀼 𑀧𑀜𑁆𑀘𑀳𑀺 𑀦𑀻𑀯𑀭𑀡𑁂𑀳𑀺 𑀆𑀯𑀼𑀢𑀸 𑀦𑀺𑀯𑀼𑀢𑀸 𑀑𑀯𑀼𑀢𑀸 𑀧𑀺𑀳𑀺𑀢𑀸 𑀧𑀝𑀺𑀘𑁆𑀙𑀦𑁆𑀦𑀸 𑀧𑀝𑀺𑀓𑀼𑀚𑁆𑀚𑀺𑀢𑀸𑀢𑀺 𑀧𑀼𑀣𑀼𑀚𑁆𑀚𑀦𑀸. 𑀳𑀻𑀦𑀫𑀸𑀳𑀼 𑀧𑀼𑀣𑀼𑀚𑁆𑀚𑀦𑀦𑁆𑀢𑀺. 𑀧𑀼𑀣𑀼𑀚𑁆𑀚𑀦𑀁 𑀳𑀻𑀦𑀁 𑀦𑀺𑀳𑀻𑀦𑀁 𑀑𑀫𑀓𑀁 𑀮𑀸𑀫𑀓𑀁 𑀙𑀢𑀼𑀓𑁆𑀓𑀁 𑀧𑀭𑀺𑀢𑁆𑀢𑀦𑁆𑀢𑀺 𑀏𑀯𑀫𑀸𑀳𑀁𑀲𑀼 𑀏𑀯𑀁 𑀓𑀣𑁂𑀦𑁆𑀢𑀺 𑀏𑀯𑀁 𑀪𑀡𑀦𑁆𑀢𑀺 𑀏𑀯𑀁 𑀤𑀻𑀧𑀬𑀦𑁆𑀢𑀺 𑀏𑀯𑀁 𑀯𑁄𑀳𑀭𑀦𑁆𑀢𑀻𑀢𑀺 𑁋 𑀳𑀻𑀦𑀫𑀸𑀳𑀼 𑀧𑀼𑀣𑀼𑀚𑁆𑀚𑀦𑀁.

𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀏𑀓𑁄 𑀧𑀼𑀩𑁆𑀩𑁂 𑀘𑀭𑀺𑀢𑁆𑀯𑀸𑀦, 𑀫𑁂𑀣𑀼𑀦𑀁 𑀬𑁄 𑀦𑀺𑀲𑁂𑀯𑀢𑀺;

𑀬𑀸𑀦𑀁 𑀪𑀦𑁆𑀢𑀁𑀯 𑀢𑀁 𑀮𑁄𑀓𑁂, 𑀳𑀻𑀦𑀫𑀸𑀳𑀼 𑀧𑀼𑀣𑀼𑀚𑁆𑀚𑀦’’𑀦𑁆𑀢𑀺.

𑁫𑁨. 𑀬𑀲𑁄 𑀓𑀺𑀢𑁆𑀢𑀺 𑀘 𑀬𑀸 𑀧𑀼𑀩𑁆𑀩𑁂, 𑀳𑀸𑀬𑀢𑁂 𑀯𑀸𑀧𑀺 𑀢𑀲𑁆𑀲 𑀲𑀸;

𑀏𑀢𑀫𑁆𑀧𑀺 𑀤𑀺𑀲𑁆𑀯𑀸 𑀲𑀺𑀓𑁆𑀔𑁂𑀣, 𑀫𑁂𑀣𑀼𑀦𑀁 𑀯𑀺𑀧𑁆𑀧𑀳𑀸𑀢𑀯𑁂.

𑀬𑀲𑁄 𑀓𑀺𑀢𑁆𑀢𑀺 𑀘 𑀬𑀸 𑀧𑀼𑀩𑁆𑀩𑁂, 𑀳𑀸𑀬𑀢𑁂 𑀯𑀸𑀧𑀺 𑀢𑀲𑁆𑀲 𑀲𑀸𑀢𑀺. 𑀓𑀢𑀫𑁄 𑀬𑀲𑁄? 𑀇𑀥𑁂𑀓𑀘𑁆𑀘𑁄 𑀧𑀼𑀩𑁆𑀩𑁂 𑀲𑀫𑀡𑀪𑀸𑀯𑁂 𑀲𑀓𑁆𑀓𑀢𑁄 𑀳𑁄𑀢𑀺 𑀕𑀭𑀼𑀓𑀢𑁄 𑀫𑀸𑀦𑀺𑀢𑁄 𑀧𑀽𑀚𑀺𑀢𑁄 𑀅𑀧𑀘𑀺𑀢𑁄 𑀮𑀸𑀪𑀻 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦𑀁 𑁋 𑀅𑀬𑀁 𑀬𑀲𑁄. 𑀓𑀢𑀫𑀸 𑀓𑀺𑀢𑁆𑀢𑀺? 𑀇𑀥𑁂𑀓𑀘𑁆𑀘𑁄 𑀧𑀼𑀩𑁆𑀩𑁂 𑀲𑀫𑀡𑀪𑀸𑀯𑁂 𑀓𑀺𑀢𑁆𑀢𑀺𑀯𑀡𑁆𑀡𑀕𑀢𑁄 𑀳𑁄𑀢𑀺 𑀧𑀡𑁆𑀟𑀺𑀢𑁄 𑀯𑀺𑀬𑀢𑁆𑀢𑁄 𑀫𑁂𑀥𑀸𑀯𑀻 𑀩𑀳𑀼𑀲𑁆𑀲𑀼𑀢𑁄 𑀘𑀺𑀢𑁆𑀢𑀓𑀣𑀻 𑀓𑀮𑁆𑀬𑀸𑀡𑀧𑀝𑀺𑀪𑀸𑀦𑁄 𑁋 𑀲𑀼𑀢𑁆𑀢𑀦𑁆𑀢𑀺𑀓𑁄𑀢𑀺 𑀯𑀸 𑀯𑀺𑀦𑀬𑀥𑀭𑁄𑀢𑀺 𑀯𑀸 𑀥𑀫𑁆𑀫𑀓𑀣𑀺𑀓𑁄𑀢𑀺 𑀯𑀸 𑀆𑀭𑀜𑁆𑀜𑀺𑀓𑁄𑀢𑀺 𑀯𑀸 𑀧𑀺𑀡𑁆𑀟𑀧𑀸𑀢𑀺𑀓𑁄𑀢𑀺 𑀯𑀸 𑀧𑀁𑀲𑀼𑀓𑀽𑀮𑀺𑀓𑁄𑀢𑀺 𑀯𑀸 𑀢𑁂𑀘𑀻𑀯𑀭𑀺𑀓𑁄𑀢𑀺 𑀯𑀸 𑀲𑀧𑀤𑀸𑀦𑀘𑀸𑀭𑀺𑀓𑁄𑀢𑀺 𑀯𑀸 𑀔𑀮𑀼𑀧𑀘𑁆𑀙𑀸𑀪𑀢𑁆𑀢𑀺𑀓𑁄𑀢𑀺 𑀯𑀸 𑀦𑁂𑀲𑀚𑁆𑀚𑀺𑀓𑁄𑀢𑀺 𑀯𑀸 𑀬𑀣𑀸𑀲𑀦𑁆𑀣𑀢𑀺𑀓𑁄𑀢𑀺 𑀯𑀸 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀻𑀢𑀺 𑀯𑀸 𑀤𑀼𑀢𑀺𑀬𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀻𑀢𑀺 𑀯𑀸 𑀢𑀢𑀺𑀬𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀻𑀢𑀺 𑀯𑀸 𑀘𑀢𑀼𑀢𑁆𑀣𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀻𑀢𑀺 𑀯𑀸 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀮𑀸𑀪𑀻𑀢𑀺 𑀯𑀸 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀮𑀸𑀪𑀻𑀢𑀺 𑀯𑀸 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀮𑀸𑀪𑀻𑀢𑀺 𑀯𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀮𑀸𑀪𑀻𑀢𑀺 𑀯𑀸, 𑀅𑀬𑀁 𑀓𑀺𑀢𑁆𑀢𑀻𑀢𑀺 𑁋 𑀬𑀲𑁄 𑀓𑀺𑀢𑁆𑀢𑀺 𑀘 𑀬𑀸 𑀧𑀼𑀩𑁆𑀩𑁂.

𑀳𑀸𑀬𑀢𑁂 𑀯𑀸𑀧𑀺 𑀢𑀲𑁆𑀲 𑀲𑀸𑀢𑀺. 𑀢𑀲𑁆𑀲 𑀅𑀧𑀭𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑀁 𑀥𑀫𑁆𑀫𑀁 𑀲𑀗𑁆𑀖𑀁 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀲𑁆𑀲 𑀲𑁄 𑀘 𑀬𑀲𑁄 𑀲𑀸 𑀘 𑀓𑀺𑀢𑁆𑀢𑀺 𑀳𑀸𑀬𑀢𑀺 𑀧𑀭𑀺𑀳𑀸𑀬𑀢𑀺 𑀧𑀭𑀺𑀥𑀁𑀲𑀢𑀺 𑀧𑀭𑀺𑀧𑀢𑀢𑀺 𑀅𑀦𑁆𑀢𑀭𑀥𑀸𑀬𑀢𑀺 𑀯𑀺𑀧𑁆𑀧𑀮𑀼𑀚𑁆𑀚𑀢𑀻𑀢𑀺 𑁋 𑀬𑀲𑁄 𑀓𑀺𑀢𑁆𑀢𑀺 𑀘 𑀬𑀸 𑀧𑀼𑀩𑁆𑀩𑁂 𑀳𑀸𑀬𑀢𑁂 𑀯𑀸𑀧𑀺 𑀢𑀲𑁆𑀲 𑀲𑀸.

𑀏𑀢𑀫𑁆𑀧𑀺 𑀤𑀺𑀲𑁆𑀯𑀸 𑀲𑀺𑀓𑁆𑀔𑁂𑀣 𑀫𑁂𑀣𑀼𑀦𑀁 𑀯𑀺𑀧𑁆𑀧𑀳𑀸𑀢𑀯𑁂𑀢𑀺. 𑀏𑀢𑀦𑁆𑀢𑀺 𑀧𑀼𑀩𑁆𑀩𑁂 𑀲𑀫𑀡𑀪𑀸𑀯𑁂 𑀬𑀲𑁄 𑀓𑀺𑀢𑁆𑀢𑀺 𑀘, 𑀅𑀧𑀭𑀪𑀸𑀕𑁂 𑀩𑀼𑀤𑁆𑀥𑀁 𑀥𑀫𑁆𑀫𑀁 𑀲𑀗𑁆𑀖𑀁 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀲𑁆𑀲 𑀅𑀬𑀲𑁄 𑀘 𑀅𑀓𑀺𑀢𑁆𑀢𑀺 𑀘; 𑀏𑀢𑀁 𑀲𑀫𑁆𑀧𑀢𑁆𑀢𑀺𑀁 𑀯𑀺𑀧𑀢𑁆𑀢𑀺𑀁. 𑀤𑀺𑀲𑁆𑀯𑀸𑀢𑀺 𑀧𑀲𑁆𑀲𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸𑀢𑀺 𑁋 𑀏𑀢𑀫𑁆𑀧𑀺 𑀤𑀺𑀲𑁆𑀯𑀸. 𑀲𑀺𑀓𑁆𑀔𑁂𑀣𑀸𑀢𑀺 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑁋 𑀅𑀥𑀺𑀲𑀻𑀮𑀲𑀺𑀓𑁆𑀔𑀸, 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸, 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸. 𑀓𑀢𑀫𑀸 𑀅𑀥𑀺𑀲𑀻𑀮𑀲𑀺𑀓𑁆𑀔𑀸? 𑀇𑀥 𑀪𑀺𑀓𑁆𑀔𑀼 𑀲𑀻𑀮𑀯𑀸 𑀳𑁄𑀢𑀺, 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄 𑀯𑀺𑀳𑀭𑀢𑀺 𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄 𑀅𑀡𑀼𑀫𑀢𑁆𑀢𑁂𑀲𑀼 𑀯𑀚𑁆𑀚𑁂𑀲𑀼 𑀪𑀬𑀤𑀲𑁆𑀲𑀸𑀯𑀻, 𑀲𑀫𑀸𑀤𑀸𑀬 𑀲𑀺𑀓𑁆𑀔𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀼. 𑀔𑀼𑀤𑁆𑀤𑀓𑁄 𑀲𑀻𑀮𑀓𑁆𑀔𑀦𑁆𑀥𑁄, 𑀫𑀳𑀦𑁆𑀢𑁄 𑀲𑀻𑀮𑀓𑁆𑀔𑀦𑁆𑀥𑁄. 𑀲𑀻𑀮𑀁 𑀧𑀢𑀺𑀝𑁆𑀞𑀸 𑀆𑀤𑀺 𑀘𑀭𑀡𑀁 𑀲𑀁𑀬𑀫𑁄 𑀲𑀁𑀯𑀭𑁄 𑀫𑀼𑀔𑀁 𑀧𑀫𑀼𑀔𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀲𑀫𑀸𑀧𑀢𑁆𑀢𑀺𑀬𑀸 𑁋 𑀅𑀬𑀁 𑀅𑀥𑀺𑀲𑀻𑀮𑀲𑀺𑀓𑁆𑀔𑀸.

𑀓𑀢𑀫𑀸 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸? 𑀇𑀥 𑀪𑀺𑀓𑁆𑀔𑀼 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀁 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺…𑀧𑁂… 𑀤𑀼𑀢𑀺𑀬𑀁 𑀛𑀸𑀦𑀁… 𑀢𑀢𑀺𑀬𑀁 𑀛𑀸𑀦𑀁… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑁋 𑀅𑀬𑀁 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸.

𑀓𑀢𑀫𑀸 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸? 𑀇𑀥 𑀪𑀺𑀓𑁆𑀔𑀼 𑀧𑀜𑁆𑀜𑀯𑀸 𑀳𑁄𑀢𑀺 𑀉𑀤𑀬𑀢𑁆𑀣𑀕𑀸𑀫𑀺𑀦𑀺𑀬𑀸 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄 𑀅𑀭𑀺𑀬𑀸𑀬 𑀦𑀺𑀩𑁆𑀩𑁂𑀥𑀺𑀓𑀸𑀬 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀕𑀸𑀫𑀺𑀦𑀺𑀬𑀸. 𑀲𑁄 𑀇𑀤𑀁 𑀤𑀼𑀓𑁆𑀔𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑁄𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀇𑀫𑁂 𑀆𑀲𑀯𑀸𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀅𑀬𑀁 𑀆𑀲𑀯𑀲𑀫𑀼𑀤𑀬𑁄𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀅𑀬𑀁 𑀆𑀲𑀯𑀦𑀺𑀭𑁄𑀥𑁄𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀅𑀬𑀁 𑀆𑀲𑀯𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺 𑁋 𑀅𑀬𑀁 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸. 𑀫𑁂𑀣𑀼𑀦𑀥𑀫𑁆𑀫𑁄 𑀦𑀸𑀫 𑀬𑁄 𑀲𑁄 𑀅𑀲𑀤𑁆𑀥𑀫𑁆𑀫𑁄…𑀧𑁂… 𑀢𑀁𑀓𑀸𑀭𑀡𑀸 𑀯𑀼𑀘𑁆𑀘𑀢𑀺 𑀫𑁂𑀣𑀼𑀦𑀥𑀫𑁆𑀫𑁄.

𑀏𑀢𑀫𑁆𑀧𑀺 𑀤𑀺𑀲𑁆𑀯𑀸 𑀲𑀺𑀓𑁆𑀔𑁂𑀣, 𑀫𑁂𑀣𑀼𑀦𑀁 𑀯𑀺𑀧𑁆𑀧𑀳𑀸𑀢𑀯𑁂𑀢𑀺. 𑀫𑁂𑀣𑀼𑀦𑀥𑀫𑁆𑀫𑀲𑁆𑀲 𑀧𑀳𑀸𑀦𑀸𑀬 𑀯𑀽𑀧𑀲𑀫𑀸𑀬 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀬 𑀧𑀝𑀺𑀧𑀲𑁆𑀲𑀤𑁆𑀥𑀺𑀬𑀸 𑀅𑀥𑀺𑀲𑀻𑀮𑀫𑁆𑀧𑀺 𑀲𑀺𑀓𑁆𑀔𑁂𑀬𑁆𑀬, 𑀅𑀥𑀺𑀘𑀺𑀢𑁆𑀢𑀫𑁆𑀧𑀺 𑀲𑀺𑀓𑁆𑀔𑁂𑀬𑁆𑀬, 𑀅𑀥𑀺𑀧𑀜𑁆𑀜𑀫𑁆𑀧𑀺 𑀲𑀺𑀓𑁆𑀔𑁂𑀬𑁆𑀬. 𑀇𑀫𑀸 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸𑀬𑁄 𑀆𑀯𑀚𑁆𑀚𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀚𑀸𑀦𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀧𑀲𑁆𑀲𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀘𑀺𑀢𑁆𑀢𑀁 𑀅𑀥𑀺𑀝𑁆𑀞𑀳𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀲𑀤𑁆𑀥𑀸𑀬 𑀅𑀥𑀺𑀫𑀼𑀘𑁆𑀘𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀯𑀻𑀭𑀺𑀬𑀁 𑀧𑀕𑁆𑀕𑀡𑁆𑀳𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀲𑀢𑀺𑀁 𑀉𑀧𑀝𑁆𑀞𑀧𑁂𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀘𑀺𑀢𑁆𑀢𑀁 𑀲𑀫𑀸𑀤𑀳𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀧𑀜𑁆𑀜𑀸𑀬 𑀧𑀚𑀸𑀦𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀅𑀪𑀺𑀜𑁆𑀜𑁂𑀬𑁆𑀬𑀁 𑀅𑀪𑀺𑀚𑀸𑀦𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀧𑀭𑀺𑀜𑁆𑀜𑁂𑀬𑁆𑀬𑀁 𑀧𑀭𑀺𑀚𑀸𑀦𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀧𑀳𑀸𑀢𑀩𑁆𑀩𑀁 𑀧𑀚𑀳𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀪𑀸𑀯𑁂𑀢𑀩𑁆𑀩𑀁 𑀪𑀸𑀯𑁂𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬, 𑀲𑀘𑁆𑀙𑀺𑀓𑀸𑀢𑀩𑁆𑀩𑀁 𑀲𑀘𑁆𑀙𑀺𑀓𑀭𑁄𑀦𑁆𑀢𑁄 𑀲𑀺𑀓𑁆𑀔𑁂𑀬𑁆𑀬 𑀆𑀘𑀭𑁂𑀬𑁆𑀬 𑀲𑀫𑀸𑀘𑀭𑁂𑀬𑁆𑀬 𑀲𑀫𑀸𑀤𑀸𑀬 𑀯𑀢𑁆𑀢𑁂𑀬𑁆𑀬𑀸𑀢𑀺 𑁋 𑀏𑀢𑀫𑁆𑀧𑀺 𑀤𑀺𑀲𑁆𑀯𑀸 𑀲𑀺𑀓𑁆𑀔𑁂𑀣, 𑀫𑁂𑀣𑀼𑀦𑀁 𑀯𑀺𑀧𑁆𑀧𑀳𑀸𑀢𑀯𑁂.

𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀬𑀲𑁄 𑀓𑀺𑀢𑁆𑀢𑀺 𑀘 𑀬𑀸 𑀧𑀼𑀩𑁆𑀩𑁂, 𑀳𑀸𑀬𑀢𑁂 𑀯𑀸𑀧𑀺 𑀢𑀲𑁆𑀲 𑀲𑀸;

𑀏𑀢𑀫𑁆𑀧𑀺 𑀤𑀺𑀲𑁆𑀯𑀸 𑀲𑀺𑀓𑁆𑀔𑁂𑀣, 𑀫𑁂𑀣𑀼𑀦𑀁 𑀯𑀺𑀧𑁆𑀧𑀳𑀸𑀢𑀯𑁂’’𑀢𑀺.

𑁫𑁩. 𑀲𑀗𑁆𑀓𑀧𑁆𑀧𑁂𑀳𑀺 𑀧𑀭𑁂𑀢𑁄 𑀲𑁄, 𑀓𑀧𑀡𑁄 𑀯𑀺𑀬 𑀛𑀸𑀬𑀢𑀺;

𑀲𑀼𑀢𑁆𑀯𑀸 𑀧𑀭𑁂𑀲𑀁 𑀦𑀺𑀕𑁆𑀖𑁄𑀲𑀁, 𑀫𑀗𑁆𑀓𑀼 𑀳𑁄𑀢𑀺 𑀢𑀣𑀸𑀯𑀺𑀥𑁄.

𑀲𑀗𑁆𑀓𑀧𑁆𑀧𑁂𑀳𑀺 𑀧𑀭𑁂𑀢𑁄 𑀲𑁄, 𑀓𑀧𑀡𑁄 𑀯𑀺𑀬 𑀛𑀸𑀬𑀢𑀻𑀢𑀺. 𑀓𑀸𑀫𑀲𑀗𑁆𑀓𑀧𑁆𑀧𑁂𑀦 𑀩𑁆𑀬𑀸𑀧𑀸𑀤𑀲𑀗𑁆𑀓𑀧𑁆𑀧𑁂𑀦 𑀯𑀺𑀳𑀺𑀁𑀲𑀸𑀲𑀗𑁆𑀓𑀧𑁆𑀧𑁂𑀦 𑀤𑀺𑀝𑁆𑀞𑀺𑀲𑀗𑁆𑀓𑀧𑁆𑀧𑁂𑀦 𑀨𑀼𑀝𑁆𑀞𑁄 𑀧𑀭𑁂𑀢𑁄 𑀲𑀫𑁄𑀳𑀺𑀢𑁄 𑀲𑀫𑀦𑁆𑀦𑀸𑀕𑀢𑁄 𑀧𑀺𑀳𑀺𑀢𑁄 𑀓𑀧𑀡𑁄 𑀯𑀺𑀬 𑀫𑀦𑁆𑀤𑁄 𑀯𑀺𑀬 𑀫𑁄𑀫𑀽𑀳𑁄 𑀯𑀺𑀬 𑀛𑀸𑀬𑀢𑀺 𑀧𑀚𑁆𑀛𑀸𑀬𑀢𑀺 𑀦𑀺𑀚𑁆𑀛𑀸𑀬𑀢𑀺 𑀅𑀧𑀚𑁆𑀛𑀸𑀬𑀢𑀺 [𑀅𑀯𑀚𑁆𑀛𑀸𑀬𑀢𑀺 (𑀲𑁆𑀬𑀸.)]. 𑀬𑀣𑀸 𑀉𑀮𑀽𑀓𑁄 𑀭𑀼𑀓𑁆𑀔𑀲𑀸𑀔𑀸𑀬𑀁 𑀫𑀽𑀲𑀺𑀓𑀁 𑀫𑀕𑀬𑀫𑀸𑀦𑁄 𑀛𑀸𑀬𑀢𑀺 𑀧𑀚𑁆𑀛𑀸𑀬𑀢𑀺 𑀦𑀺𑀚𑁆𑀛𑀸𑀬𑀢𑀺 𑀅𑀧𑀚𑁆𑀛𑀸𑀬𑀢𑀺, 𑀬𑀣𑀸 𑀓𑁄𑀢𑁆𑀣𑀼 𑀦𑀤𑀻𑀢𑀻𑀭𑁂 𑀫𑀘𑁆𑀙𑁂 𑀫𑀕𑀬𑀫𑀸𑀦𑁄 𑀛𑀸𑀬𑀢𑀺 𑀧𑀚𑁆𑀛𑀸𑀬𑀢𑀺 𑀦𑀺𑀚𑁆𑀛𑀸𑀬𑀢𑀺 𑀅𑀧𑀚𑁆𑀛𑀸𑀬𑀢𑀺, 𑀬𑀣𑀸 𑀩𑀺𑀴𑀸𑀭𑁄 𑀲𑀦𑁆𑀥𑀺𑀲𑀫𑀮𑀲𑀗𑁆𑀓𑀝𑀺𑀭𑁂 𑀫𑀽𑀲𑀺𑀓𑀁 𑀫𑀕𑀬𑀫𑀸𑀦𑁄 𑀛𑀸𑀬𑀢𑀺 𑀧𑀚𑁆𑀛𑀸𑀬𑀢𑀺 𑀦𑀺𑀚𑁆𑀛𑀸𑀬𑀢𑀺 𑀅𑀧𑀚𑁆𑀛𑀸𑀬𑀢𑀺, 𑀬𑀣𑀸 𑀕𑀤𑁆𑀭𑀪𑁄 𑀯𑀳𑀘𑁆𑀙𑀺𑀦𑁆𑀦𑁄 𑀲𑀦𑁆𑀥𑀺𑀲𑀫𑀮𑀲𑀗𑁆𑀓𑀝𑀺𑀭𑁂 𑀛𑀸𑀬𑀢𑀺 𑀧𑀚𑁆𑀛𑀸𑀬𑀢𑀺 𑀦𑀺𑀚𑁆𑀛𑀸𑀬𑀢𑀺 𑀅𑀧𑀚𑁆𑀛𑀸𑀬𑀢𑀺; 𑀏𑀯𑀫𑁂𑀯𑀁 𑀲𑁄 𑀯𑀺𑀩𑁆𑀪𑀦𑁆𑀢𑀓𑁄 𑀓𑀸𑀫𑀲𑀗𑁆𑀓𑀧𑁆𑀧𑁂𑀦 𑀩𑁆𑀬𑀸𑀧𑀸𑀤𑀲𑀗𑁆𑀓𑀧𑁆𑀧𑁂𑀦 𑀯𑀺𑀳𑀺𑀁𑀲𑀸𑀲𑀗𑁆𑀓𑀧𑁆𑀧𑁂𑀦 𑀤𑀺𑀝𑁆𑀞𑀺𑀲𑀗𑁆𑀓𑀧𑁆𑀧𑁂𑀦 𑀨𑀼𑀝𑁆𑀞𑁄 𑀧𑀭𑁂𑀢𑁄 𑀲𑀫𑁄𑀳𑀺𑀢𑁄 𑀲𑀫𑀦𑁆𑀦𑀸𑀕𑀢𑁄 𑀧𑀺𑀳𑀺𑀢𑁄 𑀓𑀧𑀡𑁄 𑀯𑀺𑀬 𑀫𑀦𑁆𑀤𑁄 𑀯𑀺𑀬 𑀫𑁄𑀫𑀽𑀳𑁄 𑀯𑀺𑀬 𑀛𑀸𑀬𑀢𑀺 𑀧𑀚𑁆𑀛𑀸𑀬𑀢𑀺 𑀦𑀺𑀚𑁆𑀛𑀸𑀬𑀢𑀺 𑀅𑀧𑀚𑁆𑀛𑀸𑀬𑀢𑀻𑀢𑀺 𑁋 𑀲𑀗𑁆𑀓𑀧𑁆𑀧𑁂𑀳𑀺 𑀧𑀭𑁂𑀢𑁄 𑀲𑁄 𑀓𑀧𑀡𑁄 𑀯𑀺𑀬 𑀛𑀸𑀬𑀢𑀺.

𑀲𑀼𑀢𑁆𑀯𑀸 𑀧𑀭𑁂𑀲𑀁 𑀦𑀺𑀕𑁆𑀖𑁄𑀲𑀁, 𑀫𑀗𑁆𑀓𑀼 𑀳𑁄𑀢𑀺 𑀢𑀣𑀸𑀯𑀺𑀥𑁄𑀢𑀺. 𑀧𑀭𑁂𑀲𑀦𑁆𑀢𑀺 𑀉𑀧𑀚𑁆𑀛𑀸𑀬𑀸 𑀯𑀸 𑀆𑀘𑀭𑀺𑀬𑀸 𑀯𑀸 𑀲𑀫𑀸𑀦𑀼𑀧𑀚𑁆𑀛𑀸𑀬𑀓𑀸 𑀯𑀸 𑀲𑀫𑀸𑀦𑀸𑀘𑀭𑀺𑀬𑀓𑀸 𑀯𑀸 𑀫𑀺𑀢𑁆𑀢𑀸 𑀯𑀸 𑀲𑀦𑁆𑀤𑀺𑀝𑁆𑀞𑀸 𑀯𑀸 𑀲𑀫𑁆𑀪𑀢𑁆𑀢𑀸 𑀯𑀸 𑀲𑀳𑀸𑀬𑀸 𑀯𑀸 𑀘𑁄𑀤𑁂𑀦𑁆𑀢𑀺 𑁋 ‘‘𑀢𑀲𑁆𑀲 𑀢𑁂, 𑀆𑀯𑀼𑀲𑁄, 𑀅𑀮𑀸𑀪𑀸, 𑀢𑀲𑁆𑀲 𑀢𑁂 𑀤𑀼𑀮𑁆𑀮𑀤𑁆𑀥𑀁, 𑀬𑀁 𑀢𑁆𑀯𑀁 𑀏𑀯𑀭𑀽𑀧𑀁 𑀉𑀴𑀸𑀭𑀁 𑀲𑀢𑁆𑀣𑀸𑀭𑀁 𑀮𑀪𑀺𑀢𑁆𑀯𑀸 𑀏𑀯𑀁 𑀲𑁆𑀯𑀸𑀓𑁆𑀔𑀸𑀢𑁂 𑀥𑀫𑁆𑀫𑀯𑀺𑀦𑀬𑁂 𑀧𑀩𑁆𑀩𑀚𑀺𑀢𑁆𑀯𑀸 𑀏𑀯𑀭𑀽𑀧𑀁 𑀅𑀭𑀺𑀬𑀕𑀡𑀁 𑀮𑀪𑀺𑀢𑁆𑀯𑀸 𑀳𑀻𑀦𑀲𑁆𑀲 𑀫𑁂𑀣𑀼𑀦𑀥𑀫𑁆𑀫𑀲𑁆𑀲 𑀓𑀸𑀭𑀡𑀸 𑀩𑀼𑀤𑁆𑀥𑀁 𑀥𑀫𑁆𑀫𑀁 𑀲𑀗𑁆𑀖𑀁 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑁄𑀲𑀺. 𑀲𑀤𑁆𑀥𑀸𑀧𑀺 𑀦𑀸𑀫 𑀢𑁂 𑀦𑀸𑀳𑁄𑀲𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀳𑀺𑀭𑀻𑀧𑀺 𑀦𑀸𑀫 𑀢𑁂 𑀦𑀸𑀳𑁄𑀲𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀑𑀢𑁆𑀢𑀧𑁆𑀧𑀫𑁆𑀧𑀺 𑀦𑀸𑀫 𑀢𑁂 𑀦𑀸𑀳𑁄𑀲𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀯𑀻𑀭𑀺𑀬𑀫𑁆𑀧𑀺 𑀦𑀸𑀫 𑀢𑁂 𑀦𑀸𑀳𑁄𑀲𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀲𑀢𑀺𑀧𑀺 𑀦𑀸𑀫 𑀢𑁂 𑀦𑀸𑀳𑁄𑀲𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀧𑀜𑁆𑀜𑀸𑀧𑀺 𑀦𑀸𑀫 𑀢𑁂 𑀦𑀸𑀳𑁄𑀲𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀽’’𑀢𑀺. 𑀢𑁂𑀲𑀁 𑀯𑀘𑀦𑀁 𑀩𑁆𑀬𑀧𑁆𑀧𑀣𑀁 𑀤𑁂𑀲𑀦𑀁 𑀅𑀦𑀼𑀲𑀸𑀲𑀦𑀁 𑀅𑀦𑀼𑀲𑀺𑀝𑁆𑀞𑀺𑀁 𑀲𑀼𑀢𑁆𑀯𑀸 𑀲𑀼𑀡𑀺𑀢𑁆𑀯𑀸 𑀉𑀕𑁆𑀕𑀳𑁂𑀢𑁆𑀯𑀸 𑀉𑀧𑀥𑀸𑀭𑀬𑀺𑀢𑁆𑀯𑀸 𑀉𑀧𑀮𑀓𑁆𑀔𑀬𑀺𑀢𑁆𑀯𑀸 𑀫𑀗𑁆𑀓𑀼 𑀳𑁄𑀢𑀺, 𑀧𑀻𑀴𑀺𑀢𑁄 𑀖𑀝𑁆𑀝𑀺𑀢𑁄 𑀩𑁆𑀬𑀸𑀥𑀺𑀢𑁄 𑀤𑁄𑀫𑀦𑀲𑁆𑀲𑀺𑀢𑁄 𑀳𑁄𑀢𑀺. 𑀢𑀣𑀸𑀯𑀺𑀥𑁄𑀢𑀺 𑀢𑀣𑀸𑀯𑀺𑀥𑁄 𑀢𑀸𑀤𑀺𑀲𑁄 𑀢𑀲𑁆𑀲𑀡𑁆𑀞𑀺𑀢𑁄 𑀢𑀧𑁆𑀧𑀓𑀸𑀭𑁄 𑀢𑀧𑁆𑀧𑀝𑀺𑀪𑀸𑀕𑁄. 𑀬𑁄 𑀲𑁄 𑀯𑀺𑀩𑁆𑀪𑀦𑁆𑀢𑀓𑁄𑀢𑀺 𑁋 𑀲𑀼𑀢𑁆𑀯𑀸 𑀧𑀭𑁂𑀲𑀁 𑀦𑀺𑀕𑁆𑀖𑁄𑀲𑀁 𑀫𑀗𑁆𑀓𑀼 𑀳𑁄𑀢𑀺 𑀢𑀣𑀸𑀯𑀺𑀥𑁄.

𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀲𑀗𑁆𑀓𑀧𑁆𑀧𑁂𑀳𑀺 𑀧𑀭𑁂𑀢𑁄 𑀲𑁄, 𑀓𑀧𑀡𑁄 𑀯𑀺𑀬 𑀛𑀸𑀬𑀢𑀺;

𑀲𑀼𑀢𑁆𑀯𑀸 𑀧𑀭𑁂𑀲𑀁 𑀦𑀺𑀕𑁆𑀖𑁄𑀲𑀁, 𑀫𑀗𑁆𑀓𑀼 𑀳𑁄𑀢𑀺 𑀢𑀣𑀸𑀯𑀺𑀥𑁄’’𑀢𑀺.

𑁫𑁪. 𑀅𑀣 𑀲𑀢𑁆𑀣𑀸𑀦𑀺 𑀓𑀼𑀭𑀼𑀢𑁂, 𑀧𑀭𑀯𑀸𑀤𑁂𑀳𑀺 𑀘𑁄𑀤𑀺𑀢𑁄;

𑀏𑀲 𑀔𑁆𑀯𑀲𑁆𑀲 𑀫𑀳𑀸𑀕𑁂𑀥𑁄, 𑀫𑁄𑀲𑀯𑀚𑁆𑀚𑀁 𑀧𑀕𑀸𑀳𑀢𑀺 [𑀲𑀁𑀕𑀸𑀳𑀢𑀺 (𑀓.)] .

𑀅𑀣 𑀲𑀢𑁆𑀣𑀸𑀦𑀺 𑀓𑀼𑀭𑀼𑀢𑁂, 𑀧𑀭𑀯𑀸𑀤𑁂𑀳𑀺 𑀘𑁄𑀤𑀺𑀢𑁄𑀢𑀺. 𑀅𑀣𑀸𑀢𑀺 𑀧𑀤𑀲𑀦𑁆𑀥𑀺 𑀧𑀤𑀲𑀁𑀲𑀕𑁆𑀕𑁄 𑀧𑀤𑀧𑀸𑀭𑀺𑀧𑀽𑀭𑀻 𑀅𑀓𑁆𑀔𑀭𑀲𑀫𑀯𑀸𑀬𑁄 𑀩𑁆𑀬𑀜𑁆𑀚𑀦𑀲𑀺𑀮𑀺𑀝𑁆𑀞𑀢𑀸 𑀧𑀤𑀸𑀦𑀼𑀧𑀼𑀩𑁆𑀩𑀢𑀸𑀧𑁂𑀢𑀁 𑁋 𑀅𑀣𑀸𑀢𑀺. 𑀲𑀢𑁆𑀣𑀸𑀦𑀻𑀢𑀺 𑀢𑀻𑀡𑀺 𑀲𑀢𑁆𑀣𑀸𑀦𑀺 𑁋 𑀓𑀸𑀬𑀲𑀢𑁆𑀣𑀁, 𑀯𑀘𑀻𑀲𑀢𑁆𑀣𑀁, 𑀫𑀦𑁄𑀲𑀢𑁆𑀣𑀁. 𑀢𑀺𑀯𑀺𑀥𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀓𑀸𑀬𑀲𑀢𑁆𑀣𑀁, 𑀘𑀢𑀼𑀩𑁆𑀩𑀺𑀥𑀁 𑀯𑀘𑀻𑀤𑀼𑀘𑁆𑀘𑀭𑀺𑀢𑀁 𑀯𑀘𑀻𑀲𑀢𑁆𑀣𑀁, 𑀢𑀺𑀯𑀺𑀥𑀁 𑀫𑀦𑁄𑀤𑀼𑀘𑁆𑀘𑀭𑀺𑀢𑀁 𑀫𑀦𑁄𑀲𑀢𑁆𑀣𑀁. 𑀧𑀭𑀯𑀸𑀤𑁂𑀳𑀺 𑀘𑁄𑀤𑀺𑀢𑁄𑀢𑀺. 𑀉𑀧𑀚𑁆𑀛𑀸𑀬𑁂𑀳𑀺 𑀯𑀸 𑀆𑀘𑀭𑀺𑀬𑁂𑀳𑀺 𑀯𑀸 𑀲𑀫𑀸𑀦𑀼𑀧𑀚𑁆𑀛𑀸𑀬𑀓𑁂𑀳𑀺 𑀯𑀸 𑀲𑀫𑀸𑀦𑀸𑀘𑀭𑀺𑀬𑀓𑁂𑀳𑀺 𑀯𑀸 𑀫𑀺𑀢𑁆𑀢𑁂𑀳𑀺 𑀯𑀸 𑀲𑀦𑁆𑀤𑀺𑀝𑁆𑀞𑁂𑀳𑀺 𑀯𑀸 𑀲𑀫𑁆𑀪𑀢𑁆𑀢𑁂𑀳𑀺 𑀯𑀸 𑀲𑀳𑀸𑀬𑁂𑀳𑀺 𑀯𑀸 𑀘𑁄𑀤𑀺𑀢𑁄 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀸𑀲𑀢𑀺. ‘‘𑀅𑀪𑀺𑀭𑀢𑁄 𑀅𑀳𑀁, 𑀪𑀦𑁆𑀢𑁂, 𑀅𑀳𑁄𑀲𑀺𑀁 𑀧𑀩𑁆𑀩𑀚𑁆𑀚𑀸𑀬. 𑀫𑀸𑀢𑀸 𑀫𑁂 𑀧𑁄𑀲𑁂𑀢𑀩𑁆𑀩𑀸, 𑀢𑁂𑀦𑀫𑁆𑀳𑀺 𑀯𑀺𑀩𑁆𑀪𑀦𑁆𑀢𑁄’’𑀢𑀺 𑀪𑀡𑀢𑀺. ‘‘𑀧𑀺𑀢𑀸 𑀫𑁂 𑀧𑁄𑀲𑁂𑀢𑀩𑁆𑀩𑁄, 𑀢𑁂𑀦𑀫𑁆𑀳𑀺 𑀯𑀺𑀩𑁆𑀪𑀦𑁆𑀢𑁄’’𑀢𑀺 𑀪𑀡𑀢𑀺. ‘‘𑀪𑀸𑀢𑀸 𑀫𑁂 𑀧𑁄𑀲𑁂𑀢𑀩𑁆𑀩𑁄… 𑀪𑀕𑀺𑀦𑀻 𑀫𑁂 𑀧𑁄𑀲𑁂𑀢𑀩𑁆𑀩𑀸… 𑀧𑀼𑀢𑁆𑀢𑁄 𑀫𑁂 𑀧𑁄𑀲𑁂𑀢𑀩𑁆𑀩𑁄… 𑀥𑀻𑀢𑀸 𑀫𑁂 𑀧𑁄𑀲𑁂𑀢𑀩𑁆𑀩𑀸… 𑀫𑀺𑀢𑁆𑀢𑀸 𑀫𑁂 𑀧𑁄𑀲𑁂𑀢𑀩𑁆𑀩𑀸… 𑀅𑀫𑀘𑁆𑀘𑀸 𑀫𑁂 𑀧𑁄𑀲𑁂𑀢𑀩𑁆𑀩𑀸… 𑀜𑀸𑀢𑀓𑀸 𑀫𑁂 𑀧𑁄𑀲𑁂𑀢𑀩𑁆𑀩𑀸… 𑀲𑀸𑀮𑁄𑀳𑀺𑀢𑀸 𑀫𑁂 𑀧𑁄𑀲𑁂𑀢𑀩𑁆𑀩𑀸, 𑀢𑁂𑀦𑀫𑁆𑀳𑀺 𑀯𑀺𑀩𑁆𑀪𑀦𑁆𑀢𑁄’’𑀢𑀺 𑀪𑀡𑀢𑀺. 𑀯𑀘𑀻𑀲𑀢𑁆𑀣𑀁 𑀓𑀭𑁄𑀢𑀺 𑀲𑀗𑁆𑀓𑀭𑁄𑀢𑀺 𑀚𑀦𑁂𑀢𑀺 𑀲𑀜𑁆𑀚𑀦𑁂𑀢𑀺 𑀦𑀺𑀩𑁆𑀩𑀢𑁆𑀢𑁂𑀢𑀺 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺 𑁋 𑀅𑀣 𑀲𑀢𑁆𑀣𑀸𑀦𑀺 𑀓𑀼𑀭𑀼𑀢𑁂, 𑀧𑀭𑀯𑀸𑀤𑁂𑀳𑀺 𑀘𑁄𑀤𑀺𑀢𑁄.

𑀏𑀲 𑀔𑁆𑀯𑀲𑁆𑀲 𑀫𑀳𑀸𑀕𑁂𑀥𑁄𑀢𑀺. 𑀏𑀲𑁄 𑀢𑀲𑁆𑀲 𑀫𑀳𑀸𑀕𑁂𑀥𑁄 𑀫𑀳𑀸𑀯𑀦𑀁 𑀫𑀳𑀸𑀕𑀳𑀦𑀁 𑀫𑀳𑀸𑀓𑀦𑁆𑀢𑀸𑀭𑁄 𑀫𑀳𑀸𑀯𑀺𑀲𑀫𑁄 𑀫𑀳𑀸𑀓𑀼𑀝𑀺𑀮𑁄 𑀫𑀳𑀸𑀧𑀗𑁆𑀓𑁄 𑀫𑀳𑀸𑀧𑀮𑀺𑀧𑁄 𑀫𑀳𑀸𑀧𑀮𑀺𑀩𑁄𑀥𑁄 𑀫𑀳𑀸𑀩𑀦𑁆𑀥𑀦𑀁, 𑀬𑀤𑀺𑀤𑀁 𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑁄𑀢𑀺 𑁋 𑀏𑀲 𑀔𑁆𑀯𑀲𑁆𑀲 𑀫𑀳𑀸𑀕𑁂𑀥𑁄.

𑀫𑁄𑀲𑀯𑀚𑁆𑀚𑀁 𑀧𑀕𑀸𑀳𑀢𑀻𑀢𑀺. 𑀫𑁄𑀲𑀯𑀚𑁆𑀚𑀁 𑀯𑀼𑀘𑁆𑀘𑀢𑀺 𑀫𑀼𑀲𑀸𑀯𑀸𑀤𑁄. 𑀇𑀥𑁂𑀓𑀘𑁆𑀘𑁄 𑀲𑀪𑀕𑁆𑀕𑀢𑁄 𑀯𑀸 𑀧𑀭𑀺𑀲𑀕𑁆𑀕𑀢𑁄 𑀯𑀸 𑀜𑀸𑀢𑀺𑀫𑀚𑁆𑀛𑀕𑀢𑁄 𑀯𑀸 𑀧𑀽𑀕𑀫𑀚𑁆𑀛𑀕𑀢𑁄 𑀯𑀸 𑀭𑀸𑀚𑀓𑀼𑀮𑀫𑀚𑁆𑀛𑀕𑀢𑁄 𑀯𑀸 𑀅𑀪𑀺𑀦𑀻𑀢𑁄 𑀲𑀓𑁆𑀔𑀺𑀧𑀼𑀝𑁆𑀞𑁄 𑁋 ‘‘𑀏𑀳𑀫𑁆𑀪𑁄 𑀧𑀼𑀭𑀺𑀲, 𑀬𑀁 𑀚𑀸𑀦𑀸𑀲𑀺 𑀢𑀁 𑀯𑀤𑁂𑀳𑀻’’𑀢𑀺, 𑀲𑁄 𑀅𑀚𑀸𑀦𑀁 𑀯𑀸 𑀆𑀳 𑁋 ‘‘𑀚𑀸𑀦𑀸𑀫𑀻’’𑀢𑀺, ‘‘𑀚𑀸𑀦𑀁’’ 𑀯𑀸 𑀆𑀳 𑁋 ‘‘𑀦 𑀚𑀸𑀦𑀸𑀫𑀻’’𑀢𑀺, 𑀅𑀧𑀲𑁆𑀲𑀁 𑀯𑀸 𑀆𑀳 𑁋 ‘‘𑀧𑀲𑁆𑀲𑀸𑀫𑀻’’𑀢𑀺, 𑀧𑀲𑁆𑀲𑀁 𑀯𑀸 𑀆𑀳 𑁋 ‘‘𑀦 𑀧𑀲𑁆𑀲𑀸𑀫𑀻’’𑀢𑀺. 𑀇𑀢𑀺 𑀅𑀢𑁆𑀢𑀳𑁂𑀢𑀼 𑀯𑀸 𑀧𑀭𑀳𑁂𑀢𑀼 𑀯𑀸 𑀆𑀫𑀺𑀲𑀓𑀺𑀜𑁆𑀘𑀺𑀓𑁆𑀔𑀳𑁂𑀢𑀼 𑀯𑀸 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀸𑀲𑀢𑀺 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀫𑁄𑀲𑀯𑀚𑁆𑀚𑀁.

𑀅𑀧𑀺 𑀘 𑀢𑀻𑀳𑀸𑀓𑀸𑀭𑁂𑀳𑀺 𑀫𑀼𑀲𑀸𑀯𑀸𑀤𑁄 𑀳𑁄𑀢𑀺. 𑀧𑀼𑀩𑁆𑀩𑁂𑀯𑀲𑁆𑀲 𑀳𑁄𑀢𑀺 𑁋 ‘‘𑀫𑀼𑀲𑀸 𑀪𑀡𑀺𑀲𑁆𑀲’’𑀦𑁆𑀢𑀺, 𑀪𑀡𑀦𑁆𑀢𑀲𑁆𑀲 𑀳𑁄𑀢𑀺 𑁋 ‘‘𑀫𑀼𑀲𑀸 𑀪𑀡𑀸𑀫𑀻’’𑀢𑀺, 𑀪𑀡𑀺𑀢𑀲𑁆𑀲 𑀳𑁄𑀢𑀺 𑁋 ‘‘𑀫𑀼𑀲𑀸 𑀫𑀬𑀸 𑀪𑀡𑀺𑀢’’𑀦𑁆𑀢𑀺. 𑀇𑀫𑁂𑀳𑀺 𑀢𑀻𑀳𑀸𑀓𑀸𑀭𑁂𑀳𑀺 𑀫𑀼𑀲𑀸𑀯𑀸𑀤𑁄 𑀳𑁄𑀢𑀺. 𑀅𑀧𑀺 𑀘 𑀘𑀢𑀽𑀳𑀸𑀓𑀸𑀭𑁂𑀳𑀺 𑀫𑀼𑀲𑀸𑀯𑀸𑀤𑁄 𑀳𑁄𑀢𑀺. 𑀧𑀼𑀩𑁆𑀩𑁂𑀯𑀲𑁆𑀲 𑀳𑁄𑀢𑀺 𑁋 ‘‘𑀫𑀼𑀲𑀸 𑀪𑀡𑀺𑀲𑁆𑀲’’𑀦𑁆𑀢𑀺, 𑀪𑀡𑀦𑁆𑀢𑀲𑁆𑀲 𑀳𑁄𑀢𑀺 𑁋 ‘‘𑀫𑀼𑀲𑀸 𑀪𑀡𑀸𑀫𑀻’’𑀢𑀺, 𑀪𑀡𑀺𑀢𑀲𑁆𑀲 𑀳𑁄𑀢𑀺 𑁋 ‘‘𑀫𑀼𑀲𑀸 𑀫𑀬𑀸 𑀪𑀡𑀺𑀢’’𑀦𑁆𑀢𑀺, 𑀯𑀺𑀦𑀺𑀥𑀸𑀬 𑀤𑀺𑀝𑁆𑀞𑀺𑀁. 𑀇𑀫𑁂𑀳𑀺 𑀘𑀢𑀽𑀳𑀸𑀓𑀸𑀭𑁂𑀳𑀺 𑀫𑀼𑀲𑀸𑀯𑀸𑀤𑁄 𑀳𑁄𑀢𑀺. 𑀅𑀧𑀺 𑀘 𑀧𑀜𑁆𑀘𑀳𑀸𑀓𑀸𑀭𑁂𑀳𑀺… 𑀙𑀳𑀸𑀓𑀸𑀭𑁂𑀳𑀺… 𑀲𑀢𑁆𑀢𑀳𑀸𑀓𑀸𑀭𑁂𑀳𑀺… 𑀅𑀝𑁆𑀞𑀳𑀸𑀓𑀸𑀭𑁂𑀳𑀺 𑀫𑀼𑀲𑀸𑀯𑀸𑀤𑁄 𑀳𑁄𑀢𑀺. 𑀧𑀼𑀩𑁆𑀩𑁂𑀯𑀲𑁆𑀲 𑀳𑁄𑀢𑀺 𑁋 ‘‘𑀫𑀼𑀲𑀸 𑀪𑀡𑀺𑀲𑁆𑀲’’𑀦𑁆𑀢𑀺, 𑀪𑀡𑀦𑁆𑀢𑀲𑁆𑀲 𑀳𑁄𑀢𑀺 𑁋 ‘‘𑀫𑀼𑀲𑀸 𑀪𑀡𑀸𑀫𑀻’’𑀢𑀺, 𑀪𑀡𑀺𑀢𑀲𑁆𑀲 𑀳𑁄𑀢𑀺 𑁋 ‘‘𑀫𑀼𑀲𑀸 𑀫𑀬𑀸 𑀪𑀡𑀺𑀢’’𑀦𑁆𑀢𑀺, 𑀯𑀺𑀦𑀺𑀥𑀸𑀬 𑀤𑀺𑀝𑁆𑀞𑀺𑀁, 𑀯𑀺𑀦𑀺𑀥𑀸𑀬 𑀔𑀦𑁆𑀢𑀺𑀁, 𑀯𑀺𑀦𑀺𑀥𑀸𑀬 𑀭𑀼𑀘𑀺𑀁, 𑀯𑀺𑀦𑀺𑀥𑀸𑀬 𑀲𑀜𑁆𑀜𑀁, 𑀯𑀺𑀦𑀺𑀥𑀸𑀬 𑀪𑀸𑀯𑀁. 𑀇𑀫𑁂𑀳𑀺 𑀅𑀝𑁆𑀞𑀳𑀸𑀓𑀸𑀭𑁂𑀳𑀺 𑀫𑀼𑀲𑀸𑀯𑀸𑀤𑁄 𑀳𑁄𑀢𑀺. 𑀫𑁄𑀲𑀯𑀚𑁆𑀚𑀁 𑀧𑀕𑀸𑀳𑀢𑀻𑀢𑀺. 𑀫𑁄𑀲𑀯𑀚𑁆𑀚𑀁 𑀧𑀕𑀸𑀳𑀢𑀺 𑀑𑀕𑀸𑀳𑀢𑀺 𑀅𑀚𑁆𑀛𑁄𑀕𑀸𑀳𑀢𑀺 𑀧𑀯𑀺𑀲𑀢𑀻𑀢𑀺 𑁋 𑀫𑁄𑀲𑀯𑀚𑁆𑀚𑀁 𑀧𑀕𑀸𑀳𑀢𑀺.

𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀅𑀣 𑀲𑀢𑁆𑀣𑀸𑀦𑀺 𑀓𑀼𑀭𑀼𑀢𑁂, 𑀧𑀭𑀯𑀸𑀤𑁂𑀳𑀺 𑀘𑁄𑀤𑀺𑀢𑁄;

𑀏𑀲 𑀔𑁆𑀯𑀲𑁆𑀲 𑀫𑀳𑀸𑀕𑁂𑀥𑁄, 𑀫𑁄𑀲𑀯𑀚𑁆𑀚𑀁 𑀧𑀕𑀸𑀳𑀢𑀻’’𑀢𑀺.

𑁫𑁫. 𑀧𑀡𑁆𑀟𑀺𑀢𑁄𑀢𑀺 𑀲𑀫𑀜𑁆𑀜𑀸𑀢𑁄, 𑀏𑀓𑀘𑁆𑀘𑀭𑀺𑀬𑀁 [𑀏𑀓𑀘𑀭𑀺𑀬𑀁 (𑀲𑀻. 𑀲𑁆𑀬𑀸.)] 𑀅𑀥𑀺𑀝𑁆𑀞𑀺𑀢𑁄;

𑀲 𑀘𑀸𑀧𑀺 𑀫𑁂𑀣𑀼𑀦𑁂 𑀬𑀼𑀢𑁆𑀢𑁄, 𑀫𑀦𑁆𑀤𑁄𑀯 𑀧𑀭𑀺𑀓𑀺𑀲𑁆𑀲𑀢𑀺.

𑀧𑀡𑁆𑀟𑀺𑀢𑁄𑀢𑀺 𑀲𑀫𑀜𑁆𑀜𑀸𑀢𑁄𑀢𑀺. 𑀇𑀥𑁂𑀓𑀘𑁆𑀘𑁄 𑀧𑀼𑀩𑁆𑀩𑁂 𑀲𑀫𑀡𑀪𑀸𑀯𑁂 𑀓𑀺𑀢𑁆𑀢𑀺 𑀯𑀡𑁆𑀡𑀕𑀢𑁄 𑀳𑁄𑀢𑀺 𑁋 ‘‘𑀧𑀡𑁆𑀟𑀺𑀢𑁄 𑀯𑀺𑀬𑀢𑁆𑀢𑁄 𑀫𑁂𑀥𑀸𑀯𑀻 𑀩𑀳𑀼𑀲𑁆𑀲𑀼𑀢𑁄 𑀘𑀺𑀢𑁆𑀢𑀓𑀣𑀻 𑀓𑀮𑁆𑀬𑀸𑀡𑀧𑀝𑀺𑀪𑀸𑀦𑁄 𑀲𑀼𑀢𑁆𑀢𑀦𑁆𑀢𑀺𑀓𑁄𑀢𑀺 𑀯𑀸 𑀯𑀺𑀦𑀬𑀥𑀭𑁄𑀢𑀺 𑀯𑀸 𑀥𑀫𑁆𑀫𑀓𑀣𑀺𑀓𑁄𑀢𑀺 𑀯𑀸…𑀧𑁂… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀮𑀸𑀪𑀻’’𑀢𑀺 𑀯𑀸. 𑀏𑀯𑀁 𑀜𑀸𑀢𑁄 𑀳𑁄𑀢𑀺 𑀧𑀜𑁆𑀜𑀸𑀢𑁄 𑀲𑀫𑀜𑁆𑀜𑀸𑀢𑁄 𑀳𑁄𑀢𑀻𑀢𑀺 𑁋 𑀧𑀡𑁆𑀟𑀺𑀢𑁄𑀢𑀺 𑀲𑀫𑀜𑁆𑀜𑀸𑀢𑁄.

𑀏𑀓𑀘𑁆𑀘𑀭𑀺𑀬𑀁 𑀅𑀥𑀺𑀝𑁆𑀞𑀺𑀢𑁄𑀢𑀺. 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀏𑀓𑀘𑁆𑀘𑀭𑀺𑀬𑀁 𑀅𑀥𑀺𑀝𑁆𑀞𑀺𑀢𑁄 𑁋 𑀧𑀩𑁆𑀩𑀚𑁆𑀚𑀸𑀲𑀗𑁆𑀔𑀸𑀢𑁂𑀦 𑀯𑀸 𑀕𑀡𑀸𑀯𑀯𑀲𑁆𑀲𑀕𑁆𑀕𑀝𑁆𑀞𑁂𑀦 𑀯𑀸. 𑀓𑀣𑀁 𑀧𑀩𑁆𑀩𑀚𑁆𑀚𑀸𑀲𑀗𑁆𑀔𑀸𑀢𑁂𑀦 𑀏𑀓𑀘𑁆𑀘𑀭𑀺𑀬𑀁 𑀅𑀥𑀺𑀝𑁆𑀞𑀺𑀢𑁄? 𑀲𑀩𑁆𑀩𑀁 𑀖𑀭𑀸𑀯𑀸𑀲𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀢𑁆𑀯𑀸…𑀧𑁂… 𑀏𑀯𑀁 𑀧𑀩𑁆𑀩𑀚𑁆𑀚𑀸𑀲𑀗𑁆𑀔𑀸𑀢𑁂𑀦 𑀏𑀓𑀘𑁆𑀘𑀭𑀺𑀬𑀁 𑀅𑀥𑀺𑀝𑁆𑀞𑀺𑀢𑁄. 𑀓𑀣𑀁 𑀕𑀡𑀸𑀯𑀯𑀲𑁆𑀲𑀕𑁆𑀕𑀝𑁆𑀞𑁂𑀦 𑀏𑀓𑀘𑁆𑀘𑀭𑀺𑀬𑀁 𑀅𑀥𑀺𑀝𑁆𑀞𑀺𑀢𑁄? 𑀲𑁄 𑀏𑀯𑀁 𑀧𑀩𑁆𑀩𑀚𑀺𑀢𑁄 𑀲𑀫𑀸𑀦𑁄 𑀏𑀓𑁄 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺…𑀧𑁂… 𑀏𑀯𑀁 𑀕𑀡𑀸𑀯𑀯𑀲𑁆𑀲𑀕𑁆𑀕𑀝𑁆𑀞𑁂𑀦 𑀏𑀓𑀘𑁆𑀘𑀭𑀺𑀬𑀁 𑀅𑀥𑀺𑀝𑁆𑀞𑀺𑀢𑁄𑀢𑀺 𑁋 𑀏𑀓𑀘𑁆𑀘𑀭𑀺𑀬𑀁 𑀅𑀥𑀺𑀝𑁆𑀞𑀺𑀢𑁄.

𑀲 𑀘𑀸𑀧𑀺 𑀫𑁂𑀣𑀼𑀦𑁂 𑀬𑀼𑀢𑁆𑀢𑁄𑀢𑀺. 𑀫𑁂𑀣𑀼𑀦𑀥𑀫𑁆𑀫𑁄 𑀦𑀸𑀫 𑀬𑁄 𑀲𑁄 𑀅𑀲𑀤𑁆𑀥𑀫𑁆𑀫𑁄 𑀕𑀸𑀫𑀥𑀫𑁆𑀫𑁄…𑀧𑁂… 𑀢𑀁𑀓𑀸𑀭𑀡𑀸 𑀯𑀼𑀘𑁆𑀘𑀢𑀺 𑀫𑁂𑀣𑀼𑀦𑀥𑀫𑁆𑀫𑁄. 𑀲 𑀘𑀸𑀧𑀺 𑀫𑁂𑀣𑀼𑀦𑁂 𑀬𑀼𑀢𑁆𑀢𑁄𑀢𑀺. 𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑀁 𑀥𑀫𑁆𑀫𑀁 𑀲𑀗𑁆𑀖𑀁 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀺𑀢𑁆𑀯𑀸 𑀫𑁂𑀣𑀼𑀦𑀥𑀫𑁆𑀫𑁂 𑀬𑀼𑀢𑁆𑀢𑁄 [𑀬𑀼𑀢𑁆𑀢𑁄 𑀲𑀁𑀬𑀼𑀢𑁆𑀢𑁄 (𑀲𑀻.)] 𑀧𑀬𑀼𑀢𑁆𑀢𑁄 𑀆𑀬𑀼𑀢𑁆𑀢𑁄 𑀲𑀫𑀸𑀬𑀼𑀢𑁆𑀢𑁄𑀢𑀺 𑁋 𑀲 𑀘𑀸𑀧𑀺 𑀫𑁂𑀣𑀼𑀦𑁂 𑀬𑀼𑀢𑁆𑀢𑁄.

𑀫𑀦𑁆𑀤𑁄𑀯 𑀧𑀭𑀺𑀓𑀺𑀲𑁆𑀲𑀢𑀻𑀢𑀺. 𑀓𑀧𑀡𑁄 𑀯𑀺𑀬 𑀫𑀦𑁆𑀤𑁄 𑀯𑀺𑀬 𑀫𑁄𑀫𑀽𑀳𑁄 𑀯𑀺𑀬 𑀓𑀺𑀲𑁆𑀲𑀢𑀺 𑀧𑀭𑀺𑀓𑀺𑀲𑁆𑀲𑀢𑀺 𑀧𑀭𑀺𑀓𑀺𑀮𑀺𑀲𑁆𑀲𑀢𑀺. 𑀧𑀸𑀡𑀫𑁆𑀧𑀺 𑀳𑀦𑀢𑀺, 𑀅𑀤𑀺𑀦𑁆𑀦𑀫𑁆𑀧𑀺 𑀆𑀤𑀺𑀬𑀢𑀺, 𑀲𑀦𑁆𑀥𑀺𑀫𑁆𑀧𑀺 𑀙𑀺𑀦𑁆𑀤𑀢𑀺, 𑀦𑀺𑀮𑁆𑀮𑁄𑀧𑀫𑁆𑀧𑀺 𑀳𑀭𑀢𑀺, 𑀏𑀓𑀸𑀕𑀸𑀭𑀺𑀓𑀫𑁆𑀧𑀺 𑀓𑀭𑁄𑀢𑀺, 𑀧𑀭𑀺𑀧𑀦𑁆𑀣𑁂𑀧𑀺 𑀢𑀺𑀝𑁆𑀞𑀢𑀺, 𑀧𑀭𑀤𑀸𑀭𑀫𑁆𑀧𑀺 𑀕𑀘𑁆𑀙𑀢𑀺, 𑀫𑀼𑀲𑀸𑀧𑀺 𑀪𑀡𑀢𑀺. 𑀏𑀯𑀫𑁆𑀧𑀺 𑀓𑀺𑀲𑁆𑀲𑀢𑀺 𑀧𑀭𑀺𑀓𑀺𑀲𑁆𑀲𑀢𑀺 𑀧𑀭𑀺𑀓𑀺𑀮𑀺𑀲𑁆𑀲𑀢𑀺. 𑀢𑀫𑁂𑀦𑀁 𑀭𑀸𑀚𑀸𑀦𑁄 𑀕𑀳𑁂𑀢𑁆𑀯𑀸 𑀯𑀺𑀯𑀺𑀥𑀸 𑀓𑀫𑁆𑀫𑀓𑀸𑀭𑀡𑀸 𑀓𑀸𑀭𑁂𑀦𑁆𑀢𑀺 𑁋 𑀓𑀲𑀸𑀳𑀺𑀧𑀺 𑀢𑀸𑀴𑁂𑀦𑁆𑀢𑀺, 𑀯𑁂𑀢𑁆𑀢𑁂𑀳𑀺𑀧𑀺 𑀢𑀸𑀴𑁂𑀦𑁆𑀢𑀺, 𑀅𑀤𑁆𑀥𑀤𑀡𑁆𑀟𑀓𑁂𑀳𑀺𑀧𑀺 𑀢𑀸𑀴𑁂𑀦𑁆𑀢𑀺, 𑀳𑀢𑁆𑀣𑀫𑁆𑀧𑀺 𑀙𑀺𑀦𑁆𑀤𑀦𑁆𑀢𑀺, 𑀧𑀸𑀤𑀫𑁆𑀧𑀺 𑀙𑀺𑀦𑁆𑀤𑀦𑁆𑀢𑀺, 𑀳𑀢𑁆𑀣𑀧𑀸𑀤𑀫𑁆𑀧𑀺 𑀙𑀺𑀦𑁆𑀤𑀦𑁆𑀢𑀺, 𑀓𑀡𑁆𑀡𑀫𑁆𑀧𑀺 𑀙𑀺𑀦𑁆𑀤𑀦𑁆𑀢𑀺, 𑀦𑀸𑀲𑀫𑁆𑀧𑀺 𑀙𑀺𑀦𑁆𑀤𑀦𑁆𑀢𑀺, 𑀓𑀡𑁆𑀡𑀦𑀸𑀲𑀫𑁆𑀧𑀺 𑀙𑀺𑀦𑁆𑀤𑀦𑁆𑀢𑀺, 𑀩𑀺𑀮𑀗𑁆𑀕𑀣𑀸𑀮𑀺𑀓𑀫𑁆𑀧𑀺 𑀓𑀭𑁄𑀦𑁆𑀢𑀺, 𑀲𑀗𑁆𑀔𑀫𑀼𑀡𑁆𑀟𑀺𑀓𑀫𑁆𑀧𑀺 𑀓𑀭𑁄𑀦𑁆𑀢𑀺, 𑀭𑀸𑀳𑀼𑀫𑀼𑀔𑀫𑁆𑀧𑀺 𑀓𑀭𑁄𑀦𑁆𑀢𑀺, 𑀚𑁄𑀢𑀺𑀫𑀸𑀮𑀺𑀓𑀫𑁆𑀧𑀺 𑀓𑀭𑁄𑀦𑁆𑀢𑀺, 𑀳𑀢𑁆𑀣𑀧𑀚𑁆𑀚𑁄𑀢𑀺𑀓𑀫𑁆𑀧𑀺 𑀓𑀭𑁄𑀦𑁆𑀢𑀺, 𑀏𑀭𑀓𑀯𑀢𑁆𑀢𑀺𑀓𑀫𑁆𑀧𑀺 𑀓𑀭𑁄𑀦𑁆𑀢𑀺, 𑀘𑀺𑀭𑀓𑀯𑀸𑀲𑀺𑀓𑀫𑁆𑀧𑀺 𑀓𑀭𑁄𑀦𑁆𑀢𑀺, 𑀏𑀡𑁂𑀬𑁆𑀬𑀓𑀫𑁆𑀧𑀺 𑀓𑀭𑁄𑀦𑁆𑀢𑀺, 𑀩𑀴𑀺𑀲𑀫𑀁𑀲𑀺𑀓𑀫𑁆𑀧𑀺 𑀓𑀭𑁄𑀦𑁆𑀢𑀺, 𑀓𑀳𑀸𑀧𑀡𑀺𑀓𑀫𑁆𑀧𑀺 𑀓𑀭𑁄𑀦𑁆𑀢𑀺, 𑀔𑀸𑀭𑀸𑀧𑀢𑀘𑁆𑀙𑀺𑀓𑀫𑁆𑀧𑀺 [𑀔𑀸𑀭𑀸𑀧𑀝𑀺𑀘𑁆𑀙𑀓𑀫𑁆𑀧𑀺 (𑀓.)] 𑀓𑀭𑁄𑀦𑁆𑀢𑀺, 𑀧𑀮𑀺𑀖𑀧𑀭𑀺𑀯𑀢𑁆𑀢𑀺𑀓𑀫𑁆𑀧𑀺 𑀓𑀭𑁄𑀦𑁆𑀢𑀺, 𑀧𑀮𑀸𑀮𑀧𑀻𑀞𑀓𑀫𑁆𑀧𑀺 𑀓𑀭𑁄𑀦𑁆𑀢𑀺, 𑀢𑀢𑁆𑀢𑁂𑀦𑀧𑀺 𑀢𑁂𑀮𑁂𑀦 𑀑𑀲𑀺𑀜𑁆𑀘𑀦𑁆𑀢𑀺, 𑀲𑀼𑀦𑀔𑁂𑀳𑀺𑀧𑀺 𑀔𑀸𑀤𑀸𑀧𑁂𑀦𑁆𑀢𑀺, 𑀚𑀻𑀯𑀦𑁆𑀢𑀫𑁆𑀧𑀺 𑀲𑀽𑀮𑁂 𑀉𑀢𑁆𑀢𑀸𑀲𑁂𑀦𑁆𑀢𑀺, 𑀅𑀲𑀺𑀦𑀸𑀧𑀺 𑀲𑀻𑀲𑀁 𑀙𑀺𑀦𑁆𑀤𑀦𑁆𑀢𑀺. 𑀏𑀯𑀫𑁆𑀧𑀺 𑀓𑀺𑀲𑁆𑀲𑀢𑀺 𑀧𑀭𑀺𑀓𑀺𑀲𑁆𑀲𑀢𑀺 𑀧𑀭𑀺𑀓𑀺𑀮𑀺𑀲𑁆𑀲𑀢𑀺.

𑀅𑀣 𑀯𑀸 𑀓𑀸𑀫𑀢𑀡𑁆𑀳𑀸𑀬 𑀅𑀪𑀺𑀪𑀽𑀢𑁄 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑁄 𑀪𑁄𑀕𑁂 𑀧𑀭𑀺𑀬𑁂𑀲𑀦𑁆𑀢𑁄 𑀦𑀸𑀯𑀸𑀬 𑀫𑀳𑀸𑀲𑀫𑀼𑀤𑁆𑀤𑀁 𑀧𑀓𑁆𑀔𑀦𑁆𑀤𑀢𑀺, 𑀲𑀻𑀢𑀲𑁆𑀲 𑀧𑀼𑀭𑀓𑁆𑀔𑀢𑁄 𑀉𑀡𑁆𑀳𑀲𑁆𑀲 𑀧𑀼𑀭𑀓𑁆𑀔𑀢𑁄 𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀻𑀲𑀧𑀲𑀫𑁆𑀨𑀲𑁆𑀲𑁂𑀳𑀺 𑀧𑀻𑀴𑀺𑀬𑀫𑀸𑀦𑁄 𑀔𑀼𑀧𑁆𑀧𑀺𑀧𑀸𑀲𑀸𑀬 𑀫𑀺𑀬𑁆𑀬𑀫𑀸𑀦𑁄 𑀢𑀺𑀕𑀼𑀫𑁆𑀩𑀁 𑀕𑀘𑁆𑀙𑀢𑀺, 𑀢𑀓𑁆𑀓𑁄𑀮𑀁 𑀕𑀘𑁆𑀙𑀢𑀺, 𑀢𑀓𑁆𑀓𑀲𑀻𑀮𑀁 𑀕𑀘𑁆𑀙𑀢𑀺, 𑀓𑀸𑀮𑀫𑀼𑀔𑀁 𑀕𑀘𑁆𑀙𑀢𑀺, 𑀧𑀼𑀭𑀧𑀽𑀭𑀁 𑀕𑀘𑁆𑀙𑀢𑀺, 𑀯𑁂𑀲𑀼𑀗𑁆𑀕𑀁 𑀕𑀘𑁆𑀙𑀢𑀺, 𑀯𑁂𑀭𑀸𑀧𑀣𑀁 𑀕𑀘𑁆𑀙𑀢𑀺, 𑀚𑀯𑀁 𑀕𑀘𑁆𑀙𑀢𑀺, 𑀢𑀸𑀫𑀮𑀺𑀁 [𑀓𑀫𑀮𑀺𑀁 (𑀲𑁆𑀬𑀸.), 𑀢𑀁𑀫𑀮𑀺𑀁 (𑀓.)] 𑀕𑀘𑁆𑀙𑀢𑀺, 𑀯𑀗𑁆𑀕𑀁 𑀕𑀘𑁆𑀙𑀢𑀺, 𑀏𑀴𑀩𑀦𑁆𑀥𑀦𑀁 𑀕𑀘𑁆𑀙𑀢𑀺, 𑀲𑀼𑀯𑀡𑁆𑀡𑀓𑀽𑀝𑀁 𑀕𑀘𑁆𑀙𑀢𑀺, 𑀲𑀼𑀯𑀡𑁆𑀡𑀪𑀽𑀫𑀺𑀁 𑀕𑀘𑁆𑀙𑀢𑀺, 𑀢𑀫𑁆𑀩𑀧𑀸𑀡𑀺𑀁 𑀕𑀘𑁆𑀙𑀢𑀺, 𑀲𑀼𑀧𑁆𑀧𑀸𑀤𑀓𑀁 𑀕𑀘𑁆𑀙𑀢𑀺, 𑀪𑀸𑀭𑀼𑀓𑀘𑁆𑀙𑀁 𑀕𑀘𑁆𑀙𑀢𑀺, 𑀲𑀼𑀭𑀝𑁆𑀞𑀁 𑀕𑀘𑁆𑀙𑀢𑀺, 𑀪𑀗𑁆𑀕𑀮𑁄𑀓𑀁 𑀕𑀘𑁆𑀙𑀢𑀺, 𑀪𑀗𑁆𑀕𑀡𑀁 𑀕𑀘𑁆𑀙𑀢𑀺, 𑀲𑀭𑀫𑀢𑀁 𑀕𑀡𑀁 𑀕𑀘𑁆𑀙𑀢𑀺, 𑀬𑁄𑀦𑀁 𑀕𑀘𑁆𑀙𑀢𑀺, 𑀧𑀭𑀫𑀬𑁄𑀦𑀁 [𑀧𑀻𑀦𑀁 (𑀲𑁆𑀬𑀸.)] 𑀕𑀘𑁆𑀙𑀢𑀺, 𑀯𑀺𑀦𑀓𑀁 [𑀦𑀯𑀓𑀁 (𑀲𑀻.)] 𑀕𑀘𑁆𑀙𑀢𑀺, 𑀫𑀽𑀮𑀧𑀤𑀁 𑀕𑀘𑁆𑀙𑀢𑀺, 𑀫𑀭𑀼𑀓𑀦𑁆𑀢𑀸𑀭𑀁 𑀕𑀘𑁆𑀙𑀢𑀺, 𑀚𑀡𑁆𑀡𑀼𑀧𑀣𑀁 𑀕𑀘𑁆𑀙𑀢𑀺, 𑀅𑀚𑀧𑀣𑀁 𑀕𑀘𑁆𑀙𑀢𑀺, 𑀫𑁂𑀡𑁆𑀟𑀧𑀣𑀁 𑀕𑀘𑁆𑀙𑀢𑀺, 𑀲𑀗𑁆𑀓𑀼𑀧𑀣𑀁 𑀕𑀘𑁆𑀙𑀢𑀺, 𑀙𑀢𑁆𑀢𑀧𑀣𑀁 𑀕𑀘𑁆𑀙𑀢𑀺, 𑀯𑀁𑀲𑀧𑀣𑀁 𑀕𑀘𑁆𑀙𑀢𑀺, 𑀲𑀓𑀼𑀡𑀧𑀣𑀁 𑀕𑀘𑁆𑀙𑀢𑀺, 𑀫𑀽𑀲𑀺𑀓𑀧𑀣𑀁 𑀕𑀘𑁆𑀙𑀢𑀺, 𑀤𑀭𑀺𑀧𑀣𑀁 𑀕𑀘𑁆𑀙𑀢𑀺, 𑀯𑁂𑀢𑁆𑀢𑀸𑀘𑀸𑀭𑀁 𑀕𑀘𑁆𑀙𑀢𑀺. 𑀏𑀯𑀫𑁆𑀧𑀺 𑀓𑀺𑀲𑁆𑀲𑀢𑀺 𑀧𑀭𑀺𑀓𑀺𑀲𑁆𑀲𑀢𑀺 𑀧𑀭𑀺𑀓𑀺𑀮𑀺𑀲𑁆𑀲𑀢𑀺.

𑀕𑀯𑁂𑀲𑀦𑁆𑀢𑁄 𑀦 𑀯𑀺𑀦𑁆𑀤𑀢𑀺, 𑀅𑀮𑀸𑀪𑀫𑀽𑀮𑀓𑀫𑁆𑀧𑀺 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀢𑀺. 𑀏𑀯𑀫𑁆𑀧𑀺 𑀓𑀺𑀲𑁆𑀲𑀢𑀺 𑀧𑀭𑀺𑀓𑀺𑀲𑁆𑀲𑀢𑀺 𑀧𑀭𑀺𑀓𑀺𑀮𑀺𑀲𑁆𑀲𑀢𑀺.

𑀕𑀯𑁂𑀲𑀦𑁆𑀢𑁄 𑀯𑀺𑀦𑁆𑀤𑀢𑀺, 𑀮𑀤𑁆𑀥𑀸𑀧𑀺 𑀆𑀭𑀓𑁆𑀔𑀫𑀽𑀮𑀓𑀫𑁆𑀧𑀺 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀢𑀺 𑁋 ‘‘𑀓𑀺𑀦𑁆𑀢𑀺 𑀫𑁂 𑀪𑁄𑀕𑁂 𑀦𑁂𑀯 𑀭𑀸𑀚𑀸𑀦𑁄 𑀳𑀭𑁂𑀬𑁆𑀬𑀼𑀁, 𑀦 𑀘𑁄𑀭𑀸 𑀳𑀭𑁂𑀬𑁆𑀬𑀼𑀁, 𑀦 𑀅𑀕𑁆𑀕𑀻 𑀤𑀳𑁂𑀬𑁆𑀬𑀼𑀁, 𑀦 𑀉𑀤𑀓𑀁 𑀯𑀳𑁂𑀬𑁆𑀬, 𑀦 𑀅𑀧𑀺𑀬𑀸 𑀤𑀸𑀬𑀸𑀤𑀸 𑀳𑀭𑁂𑀬𑁆𑀬𑀼’’𑀦𑁆𑀢𑀺. 𑀢𑀲𑁆𑀲 𑀏𑀯𑀁 𑀆𑀭𑀓𑁆𑀔𑀢𑁄 𑀕𑁄𑀧𑀬𑀢𑁄 𑀢𑁂 𑀪𑁄𑀕𑀸 𑀯𑀺𑀧𑁆𑀧𑀮𑀼𑀚𑁆𑀚𑀦𑁆𑀢𑀺. 𑀲𑁄 𑀯𑀺𑀧𑁆𑀧𑀬𑁄𑀕𑀫𑀽𑀮𑀓𑀫𑁆𑀧𑀺 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀢𑀺. 𑀏𑀯𑀫𑁆𑀧𑀺 𑀓𑀺𑀲𑁆𑀲𑀢𑀺 𑀧𑀭𑀺𑀓𑀺𑀲𑁆𑀲𑀢𑀺 𑀧𑀭𑀺𑀓𑀺𑀮𑀺𑀲𑁆𑀲𑀢𑀻𑀢𑀺 𑁋 𑀲 𑀘𑀸𑀧𑀺 𑀫𑁂𑀣𑀼𑀦𑁂 𑀬𑀼𑀢𑁆𑀢𑁄, 𑀫𑀦𑁆𑀤𑁄𑀯 𑀧𑀭𑀺𑀓𑀺𑀲𑁆𑀲𑀢𑀺.

𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀧𑀡𑁆𑀟𑀺𑀢𑁄𑀢𑀺 𑀲𑀫𑀜𑁆𑀜𑀸𑀢𑁄, 𑀏𑀓𑀘𑁆𑀘𑀭𑀺𑀬𑀁 𑀅𑀥𑀺𑀝𑁆𑀞𑀺𑀢𑁄;

𑀲 𑀘𑀸𑀧𑀺 𑀫𑁂𑀣𑀼𑀦𑁂 𑀬𑀼𑀢𑁆𑀢𑁄, 𑀫𑀦𑁆𑀤𑁄𑀯 𑀧𑀭𑀺𑀓𑀺𑀲𑁆𑀲𑀢𑀻’’𑀢𑀺.

𑁫𑁬. 𑀏𑀢𑀫𑀸𑀤𑀻𑀦𑀯𑀁 𑀜𑀢𑁆𑀯𑀸, 𑀫𑀼𑀦𑀺𑀁 𑀧𑀼𑀩𑁆𑀩𑀸𑀧𑀭𑁂 𑀇𑀥;

𑀏𑀓𑀘𑁆𑀘𑀭𑀺𑀬𑀁 𑀤𑀴𑁆𑀳𑀁 𑀓𑀬𑀺𑀭𑀸, 𑀦 𑀦𑀺𑀲𑁂𑀯𑁂𑀣 𑀫𑁂𑀣𑀼𑀦𑀁.

𑀏𑀢𑀫𑀸𑀤𑀻𑀦𑀯𑀁 𑀜𑀢𑁆𑀯𑀸, 𑀫𑀼𑀦𑀺 𑀧𑀼𑀩𑁆𑀩𑀸𑀧𑀭𑁂 𑀇𑀥𑀸𑀢𑀺. 𑀏𑀢𑀦𑁆𑀢𑀺 𑀧𑀼𑀩𑁆𑀩𑁂 𑀲𑀫𑀡𑀪𑀸𑀯𑁂 𑀬𑀲𑁄 𑀘 𑀓𑀺𑀢𑁆𑀢𑀺 𑀘, 𑀅𑀧𑀭𑀪𑀸𑀕𑁂 𑀩𑀼𑀤𑁆𑀥𑀁 𑀥𑀫𑁆𑀫𑀁 𑀲𑀗𑁆𑀖𑀁 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀲𑁆𑀲 𑀅𑀬𑀲𑁄 𑀘 𑀅𑀓𑀺𑀢𑁆𑀢𑀺 𑀘; 𑀏𑀢𑀁 𑀲𑀫𑁆𑀧𑀢𑁆𑀢𑀺𑀁 𑀯𑀺𑀧𑀢𑁆𑀢𑀺𑀜𑁆𑀘. 𑀜𑀢𑁆𑀯𑀸𑀢𑀺 𑀚𑀸𑀦𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸. 𑀫𑀼𑀦𑀻𑀢𑀺. 𑀫𑁄𑀦𑀁 𑀯𑀼𑀘𑁆𑀘𑀢𑀺 𑀜𑀸𑀡𑀁. 𑀬𑀸 𑀧𑀜𑁆𑀜𑀸 𑀧𑀚𑀸𑀦𑀦𑀸…𑀧𑁂… 𑀲𑀗𑁆𑀕𑀚𑀸𑀮𑀫𑀢𑀺𑀘𑁆𑀘 𑀲𑁄 𑀫𑀼𑀦𑀺. 𑀇𑀥𑀸𑀢𑀺 𑀇𑀫𑀺𑀲𑁆𑀲𑀸 𑀤𑀺𑀝𑁆𑀞𑀺𑀬𑀸 𑀇𑀫𑀺𑀲𑁆𑀲𑀸 𑀔𑀦𑁆𑀢𑀺𑀬𑀸 𑀇𑀫𑀺𑀲𑁆𑀲𑀸 𑀭𑀼𑀘𑀺𑀬𑀸 𑀇𑀫𑀲𑁆𑀫𑀺𑀁 𑀆𑀤𑀸𑀬𑁂 𑀇𑀫𑀲𑁆𑀫𑀺𑀁 𑀥𑀫𑁆𑀫𑁂 𑀇𑀫𑀲𑁆𑀫𑀺𑀁 𑀯𑀺𑀦𑀬𑁂 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀇𑀫𑀲𑁆𑀫𑀺𑀁 𑀧𑀸𑀯𑀘𑀦𑁂 𑀇𑀫𑀲𑁆𑀫𑀺𑀁 𑀩𑁆𑀭𑀳𑁆𑀫𑀘𑀭𑀺𑀬𑁂 𑀇𑀫𑀲𑁆𑀫𑀺𑀁 𑀲𑀢𑁆𑀣𑀼𑀲𑀸𑀲𑀦𑁂 𑀇𑀫𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀇𑀫𑀲𑁆𑀫𑀺𑀁 𑀫𑀦𑀼𑀲𑁆𑀲𑀮𑁄𑀓𑁂𑀢𑀺 𑁋 𑀏𑀢𑀫𑀸𑀤𑀻𑀦𑀯𑀁 𑀜𑀢𑁆𑀯𑀸 𑀫𑀼𑀦𑀺 𑀧𑀼𑀩𑁆𑀩𑀸𑀧𑀭𑁂 𑀇𑀥.

𑀏𑀓𑀘𑁆𑀘𑀭𑀺𑀬𑀁 𑀤𑀴𑁆𑀳𑀁 𑀓𑀬𑀺𑀭𑀸𑀢𑀺. 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀏𑀓𑀘𑁆𑀘𑀭𑀺𑀬𑀁 𑀤𑀴𑀳𑀁 𑀓𑀭𑁂𑀬𑁆𑀬 𑁋 𑀧𑀩𑁆𑀩𑀚𑁆𑀚𑀸𑀲𑀗𑁆𑀔𑀸𑀢𑁂𑀦 𑀯𑀸 𑀕𑀡𑀸𑀯𑀯𑀲𑁆𑀲𑀕𑁆𑀕𑀝𑁆𑀞𑁂𑀦 𑀯𑀸. 𑀓𑀣𑀁 𑀧𑀩𑁆𑀩𑀚𑁆𑀚𑀸𑀲𑀗𑁆𑀔𑀸𑀢𑁂𑀦 𑀏𑀓𑀘𑁆𑀘𑀭𑀺𑀬𑀁 𑀤𑀴𑁆𑀳𑀁 𑀓𑀭𑁂𑀬𑁆𑀬? 𑀲𑀩𑁆𑀩𑀁 𑀖𑀭𑀸𑀯𑀸𑀲𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀢𑁆𑀯𑀸 𑀧𑀼𑀢𑁆𑀢𑀤𑀸𑀭𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀢𑁆𑀯𑀸 𑀜𑀸𑀢𑀺𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀢𑁆𑀯𑀸 𑀫𑀺𑀢𑁆𑀢𑀸𑀫𑀘𑁆𑀘𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀢𑁆𑀯𑀸 𑀲𑀦𑁆𑀦𑀺𑀥𑀺𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀢𑁆𑀯𑀸 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀓𑀺𑀜𑁆𑀘𑀦𑀪𑀸𑀯𑀁 𑀉𑀧𑀕𑀦𑁆𑀢𑁆𑀯𑀸 𑀏𑀓𑁄 𑀘𑀭𑁂𑀬𑁆𑀬 𑀯𑀺𑀳𑀭𑁂𑀬𑁆𑀬 𑀇𑀭𑀺𑀬𑁂𑀬𑁆𑀬 𑀯𑀢𑁆𑀢𑁂𑀬𑁆𑀬 𑀧𑀸𑀮𑁂𑀬𑁆𑀬 𑀬𑀧𑁂𑀬𑁆𑀬 𑀬𑀸𑀧𑁂𑀬𑁆𑀬. 𑀏𑀯𑀁 𑀧𑀩𑁆𑀩𑀚𑁆𑀚𑀸𑀲𑀗𑁆𑀔𑀸𑀢𑁂𑀦 𑀏𑀓𑀘𑁆𑀘𑀭𑀺𑀬𑀁 𑀤𑀴𑁆𑀳𑀁 𑀓𑀭𑁂𑀬𑁆𑀬.

𑀓𑀣𑀁 𑀕𑀡𑀸𑀯𑀯𑀲𑁆𑀲𑀕𑁆𑀕𑀝𑁆𑀞𑁂𑀦 𑀏𑀓𑀘𑁆𑀘𑀭𑀺𑀬𑀁 𑀤𑀴𑁆𑀳𑀁 𑀓𑀭𑁂𑀬𑁆𑀬? 𑀲𑁄 𑀏𑀯𑀁 𑀧𑀩𑁆𑀩𑀚𑀺𑀢𑁄 𑀲𑀫𑀸𑀦𑁄 𑀏𑀓𑁄 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑁂𑀬𑁆𑀬 𑀅𑀧𑁆𑀧𑀲𑀤𑁆𑀤𑀸𑀦𑀺 𑀅𑀧𑁆𑀧𑀦𑀺𑀕𑁆𑀖𑁄𑀲𑀸𑀦𑀺 𑀯𑀺𑀚𑀦𑀯𑀸𑀢𑀸𑀦𑀺 𑀫𑀦𑀼𑀲𑁆𑀲𑀭𑀸𑀳𑀲𑁆𑀲𑁂𑀬𑁆𑀬𑀓𑀸𑀦𑀺 𑀧𑀝𑀺𑀲𑀮𑁆𑀮𑀸𑀦𑀲𑀸𑀭𑀼𑀧𑁆𑀧𑀸𑀦𑀺. 𑀲𑁄 𑀏𑀓𑁄 𑀕𑀘𑁆𑀙𑁂𑀬𑁆𑀬, 𑀏𑀓𑁄 𑀢𑀺𑀝𑁆𑀞𑁂𑀬𑁆𑀬, 𑀏𑀓𑁄 𑀦𑀺𑀲𑀻𑀤𑁂𑀬𑁆𑀬, 𑀏𑀓𑁄 𑀲𑁂𑀬𑁆𑀬𑀁 𑀓𑀧𑁆𑀧𑁂𑀬𑁆𑀬, 𑀏𑀓𑁄 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑁂𑀬𑁆𑀬, 𑀏𑀓𑁄 𑀧𑀝𑀺𑀓𑁆𑀓𑀫𑁂𑀬𑁆𑀬, 𑀏𑀓𑁄 𑀭𑀳𑁄 𑀦𑀺𑀲𑀻𑀤𑁂𑀬𑁆𑀬, 𑀏𑀓𑁄 𑀘𑀗𑁆𑀓𑀫𑀁 𑀅𑀥𑀺𑀝𑁆𑀞𑁂𑀬𑁆𑀬, 𑀏𑀓𑁄 𑀘𑀭𑁂𑀬𑁆𑀬 𑀯𑀺𑀳𑀭𑁂𑀬𑁆𑀬 𑀇𑀭𑀺𑀬𑁂𑀬𑁆𑀬 𑀯𑀢𑁆𑀢𑁂𑀬𑁆𑀬 𑀧𑀸𑀮𑁂𑀬𑁆𑀬 𑀬𑀧𑁂𑀬𑁆𑀬 𑀬𑀸𑀧𑁂𑀬𑁆𑀬. 𑀏𑀯𑀁 𑀕𑀡𑀸𑀯𑀯𑀲𑁆𑀲𑀕𑁆𑀕𑀝𑁆𑀞𑁂𑀦 𑀏𑀓𑀘𑁆𑀘𑀭𑀺𑀬𑀁 𑀤𑀴𑁆𑀳𑀁 𑀓𑀭𑁂𑀬𑁆𑀬𑀸𑀢𑀺 𑁋 𑀏𑀓𑀘𑁆𑀘𑀭𑀺𑀬𑀁 𑀤𑀴𑁆𑀳𑀁 𑀓𑀭𑁂𑀬𑁆𑀬, 𑀣𑀺𑀭𑀁 𑀓𑀭𑁂𑀬𑁆𑀬, 𑀤𑀴𑁆𑀳𑀁 𑀲𑀫𑀸𑀤𑀸𑀦𑁄 𑀅𑀲𑁆𑀲, 𑀅𑀯𑀝𑁆𑀞𑀺𑀢𑀲𑀫𑀸𑀤𑀸𑀦𑁄 𑀅𑀲𑁆𑀲 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑁋 𑀏𑀓𑀘𑁆𑀘𑀭𑀺𑀬𑀁 𑀤𑀴𑁆𑀳𑀁 𑀓𑀬𑀺𑀭𑀸.

𑀦 𑀦𑀺𑀲𑁂𑀯𑁂𑀣 𑀫𑁂𑀣𑀼𑀦𑀦𑁆𑀢𑀺. 𑀫𑁂𑀣𑀼𑀦𑀥𑀫𑁆𑀫𑁄 𑀦𑀸𑀫 𑀬𑁄 𑀲𑁄 𑀅𑀲𑀤𑁆𑀥𑀫𑁆𑀫𑁄 𑀕𑀸𑀫𑀥𑀫𑁆𑀫𑁄…𑀧𑁂… 𑀢𑀁𑀓𑀸𑀭𑀡𑀸 𑀯𑀼𑀘𑁆𑀘𑀢𑀺 𑀫𑁂𑀣𑀼𑀦𑀥𑀫𑁆𑀫𑁄. 𑀫𑁂𑀣𑀼𑀦𑀥𑀫𑁆𑀫𑀁 𑀦 𑀲𑁂𑀯𑁂𑀬𑁆𑀬 𑀦 𑀦𑀺𑀲𑁂𑀯𑁂𑀬𑁆𑀬 𑀦 𑀲𑀁𑀲𑁂𑀯𑁂𑀬𑁆𑀬 𑀦 𑀧𑀝𑀺𑀲𑁂𑀯𑁂𑀬𑁆𑀬 𑀦 𑀘𑀭𑁂𑀬𑁆𑀬 𑀦 𑀲𑀫𑀸𑀘𑀭𑁂𑀬𑁆𑀬 𑀦 𑀲𑀫𑀸𑀤𑀸𑀬 𑀯𑀢𑁆𑀢𑁂𑀬𑁆𑀬𑀸𑀢𑀺 𑁋 𑀦 𑀦𑀺𑀲𑁂𑀯𑁂𑀣 𑀫𑁂𑀣𑀼𑀦𑀁.

𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀏𑀢𑀫𑀸𑀤𑀻𑀦𑀯𑀁 𑀜𑀢𑁆𑀯𑀸, 𑀫𑀼𑀦𑀺 𑀧𑀼𑀩𑁆𑀩𑀸𑀧𑀭𑁂 𑀇𑀥;

𑀏𑀓𑀘𑁆𑀘𑀭𑀺𑀬𑀁 𑀤𑀴𑁆𑀳𑀁 𑀓𑀬𑀺𑀭𑀸, 𑀦 𑀦𑀺𑀲𑁂𑀯𑁂𑀣 𑀫𑁂𑀣𑀼𑀦’’𑀦𑁆𑀢𑀺.

𑁫𑁭. 𑀯𑀺𑀯𑁂𑀓𑀜𑁆𑀜𑁂𑀯 𑀲𑀺𑀓𑁆𑀔𑁂𑀣, 𑀏𑀢𑀁 𑀅𑀭𑀺𑀬𑀸𑀦𑀫𑀼𑀢𑁆𑀢𑀫𑀁;

𑀦 𑀢𑁂𑀦 𑀲𑁂𑀝𑁆𑀞𑁄 𑀫𑀜𑁆𑀜𑁂𑀣, 𑀲 𑀯𑁂 𑀦𑀺𑀩𑁆𑀩𑀸𑀦𑀲𑀦𑁆𑀢𑀺𑀓𑁂.

𑀯𑀺𑀯𑁂𑀓𑀜𑁆𑀜𑁂𑀯 𑀲𑀺𑀓𑁆𑀔𑁂𑀣𑀸𑀢𑀺. 𑀯𑀺𑀯𑁂𑀓𑁄𑀢𑀺 𑀢𑀬𑁄 𑀯𑀺𑀯𑁂𑀓𑀸 𑁋 𑀓𑀸𑀬𑀯𑀺𑀯𑁂𑀓𑁄, 𑀘𑀺𑀢𑁆𑀢𑀯𑀺𑀯𑁂𑀓𑁄, 𑀉𑀧𑀥𑀺𑀯𑀺𑀯𑁂𑀓𑁄. 𑀓𑀢𑀫𑁄 𑀓𑀸𑀬𑀯𑀺𑀯𑁂𑀓𑁄…𑀧𑁂… 𑀅𑀬𑀁 𑀉𑀧𑀥𑀺𑀯𑀺𑀯𑁂𑀓𑁄. 𑀓𑀸𑀬𑀯𑀺𑀯𑁂𑀓𑁄 𑀘 𑀯𑀺𑀯𑁂𑀓𑀝𑁆𑀞𑀓𑀸𑀬𑀸𑀦𑀁 𑀦𑁂𑀓𑁆𑀔𑀫𑁆𑀫𑀸𑀪𑀺𑀭𑀢𑀸𑀦𑀁. 𑀘𑀺𑀢𑁆𑀢𑀯𑀺𑀯𑁂𑀓𑁄 𑀘 𑀧𑀭𑀺𑀲𑀼𑀤𑁆𑀥𑀘𑀺𑀢𑁆𑀢𑀸𑀦𑀁 𑀧𑀭𑀫𑀯𑁄𑀤𑀸𑀦𑀧𑁆𑀧𑀢𑁆𑀢𑀸𑀦𑀁. 𑀉𑀧𑀥𑀺𑀯𑀺𑀯𑁂𑀓𑁄 𑀘 𑀦𑀺𑀭𑀽𑀧𑀥𑀻𑀦𑀁 𑀧𑀼𑀕𑁆𑀕𑀮𑀸𑀦𑀁 𑀯𑀺𑀲𑀗𑁆𑀔𑀸𑀭𑀕𑀢𑀸𑀦𑀁. 𑀲𑀺𑀓𑁆𑀔𑀸𑀢𑀺 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑁋 𑀅𑀥𑀺𑀲𑀻𑀮𑀲𑀺𑀓𑁆𑀔𑀸, 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸, 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸…𑀧𑁂… 𑀅𑀬𑀁 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸. 𑀯𑀺𑀯𑁂𑀓𑀜𑁆𑀜𑁂𑀯 𑀲𑀺𑀓𑁆𑀔𑁂𑀣𑀸𑀢𑀺 𑀯𑀺𑀯𑁂𑀓𑀜𑁆𑀜𑁂𑀯 𑀲𑀺𑀓𑁆𑀔𑁂𑀬𑁆𑀬 𑀆𑀘𑀭𑁂𑀬𑁆𑀬 𑀲𑀫𑀸𑀘𑀭𑁂𑀬𑁆𑀬 𑀲𑀫𑀸𑀤𑀸𑀬 𑀯𑀢𑁆𑀢𑁂𑀬𑁆𑀬𑀸𑀢𑀺 𑁋 𑀯𑀺𑀯𑁂𑀓𑀜𑁆𑀜𑁂𑀯 𑀲𑀺𑀓𑁆𑀔𑁂𑀣.

𑀏𑀢𑀁 𑀅𑀭𑀺𑀬𑀸𑀦𑀫𑀼𑀢𑁆𑀢𑀫𑀦𑁆𑀢𑀺. 𑀅𑀭𑀺𑀬𑀸 𑀯𑀼𑀘𑁆𑀘𑀦𑁆𑀢𑀺 𑀩𑀼𑀤𑁆𑀥𑀸 𑀘 𑀩𑀼𑀤𑁆𑀥𑀲𑀸𑀯𑀓𑀸 𑀘 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀘. 𑀅𑀭𑀺𑀬𑀸𑀦𑀁 𑀏𑀢𑀁 𑀅𑀕𑁆𑀕𑀁 𑀲𑁂𑀝𑁆𑀞𑀁 𑀯𑀺𑀲𑀺𑀝𑁆𑀞𑀁 𑀧𑀸𑀫𑁄𑀓𑁆𑀔𑀁 𑀉𑀢𑁆𑀢𑀫𑀁 𑀧𑀯𑀭𑀁 𑀬𑀤𑀺𑀤𑀁 𑀯𑀺𑀯𑁂𑀓𑀘𑀭𑀺𑀬𑀸𑀢𑀺 𑁋 𑀏𑀢𑀁 𑀅𑀭𑀺𑀬𑀸𑀦𑀫𑀼𑀢𑁆𑀢𑀫𑀁.

𑀦 𑀢𑁂𑀦 𑀲𑁂𑀝𑁆𑀞𑁄 𑀫𑀜𑁆𑀜𑁂𑀣𑀸𑀢𑀺. 𑀓𑀸𑀬𑀯𑀺𑀯𑁂𑀓𑀘𑀭𑀺𑀬𑀸𑀬 𑀉𑀦𑁆𑀦𑀢𑀺𑀁 𑀦 𑀓𑀭𑁂𑀬𑁆𑀬, 𑀉𑀦𑁆𑀦𑀫𑀁 𑀦 𑀓𑀭𑁂𑀬𑁆𑀬, 𑀫𑀸𑀦𑀁 𑀦 𑀓𑀭𑁂𑀬𑁆𑀬, 𑀣𑀸𑀫𑀁 𑀦 𑀓𑀭𑁂𑀬𑁆𑀬, 𑀣𑀫𑁆𑀪𑀁 𑀦 𑀓𑀭𑁂𑀬𑁆𑀬, 𑀦 𑀢𑁂𑀦 𑀫𑀸𑀦𑀁 𑀚𑀦𑁂𑀬𑁆𑀬, 𑀦 𑀢𑁂𑀦 𑀣𑀤𑁆𑀥𑁄 𑀅𑀲𑁆𑀲 𑀧𑀢𑁆𑀣𑀤𑁆𑀥𑁄 𑀧𑀕𑁆𑀕𑀳𑀺𑀢𑀲𑀺𑀭𑁄𑀢𑀺 𑁋 𑀢𑁂𑀦 𑀲𑁂𑀝𑁆𑀞𑁄 𑀦 𑀫𑀜𑁆𑀜𑁂𑀣.

𑀲 𑀯𑁂 𑀦𑀺𑀩𑁆𑀩𑀸𑀦𑀲𑀦𑁆𑀢𑀺𑀓𑁂𑀢𑀺. 𑀲𑁄 𑀦𑀺𑀩𑁆𑀩𑀸𑀦𑀲𑁆𑀲 𑀲𑀦𑁆𑀢𑀺𑀓𑁂 𑀲𑀸𑀫𑀦𑁆𑀢𑀸 𑀆𑀲𑀦𑁆𑀦𑁂 𑀅𑀯𑀺𑀤𑀽𑀭𑁂 𑀉𑀧𑀓𑀝𑁆𑀞𑁂𑀢𑀺 𑁋 𑀲 𑀯𑁂 𑀦𑀺𑀩𑁆𑀩𑀸𑀦𑀲𑀦𑁆𑀢𑀺𑀓𑁂.

𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀯𑀺𑀯𑁂𑀓𑀜𑁆𑀜𑁂𑀯 𑀲𑀺𑀓𑁆𑀔𑁂𑀣, 𑀏𑀢𑀁 𑀅𑀭𑀺𑀬𑀸𑀦𑀫𑀼𑀢𑁆𑀢𑀫𑀁;

𑀦 𑀢𑁂𑀦 𑀲𑁂𑀝𑁆𑀞𑁄 𑀫𑀜𑁆𑀜𑁂𑀣, 𑀲 𑀯𑁂 𑀦𑀺𑀩𑁆𑀩𑀸𑀦𑀲𑀦𑁆𑀢𑀺𑀓𑁂’’𑀢𑀺.

𑁫𑁮. 𑀭𑀺𑀢𑁆𑀢𑀲𑁆𑀲 𑀫𑀼𑀦𑀺𑀦𑁄 𑀘𑀭𑀢𑁄, 𑀓𑀸𑀫𑁂𑀲𑀼 𑀅𑀦𑀧𑁂𑀓𑁆𑀔𑀺𑀦𑁄;

𑀑𑀖𑀢𑀺𑀡𑁆𑀡𑀲𑁆𑀲 𑀧𑀺𑀳𑀬𑀦𑁆𑀢𑀺, 𑀓𑀸𑀫𑁂𑀲𑀼 𑀕𑀥𑀺𑀢𑀸 𑀧𑀚𑀸.

𑀭𑀺𑀢𑁆𑀢𑀲𑁆𑀲 𑀫𑀼𑀦𑀺𑀦𑁄 𑀘𑀭𑀢𑁄𑀢𑀺. 𑀭𑀺𑀢𑁆𑀢𑀲𑁆𑀲 𑀯𑀺𑀯𑀺𑀢𑁆𑀢𑀲𑁆𑀲 𑀧𑀯𑀺𑀯𑀺𑀢𑁆𑀢𑀲𑁆𑀲, 𑀓𑀸𑀬𑀤𑀼𑀘𑁆𑀘𑀭𑀺𑀢𑁂𑀦 𑀭𑀺𑀢𑁆𑀢𑀲𑁆𑀲 𑀯𑀺𑀯𑀺𑀢𑁆𑀢𑀲𑁆𑀲 𑀧𑀯𑀺𑀯𑀺𑀢𑁆𑀢𑀲𑁆𑀲. 𑀯𑀘𑀻𑀤𑀼𑀘𑁆𑀘𑀭𑀺𑀢𑁂𑀦…𑀧𑁂… 𑀫𑀦𑁄𑀤𑀼𑀘𑁆𑀘𑀭𑀺𑀢𑁂𑀦… 𑀭𑀸𑀕𑁂𑀦… 𑀤𑁄𑀲𑁂𑀦… 𑀫𑁄𑀳𑁂𑀦… 𑀓𑁄𑀥𑁂𑀦… 𑀉𑀧𑀦𑀸𑀳𑁂𑀦… 𑀫𑀓𑁆𑀔𑁂𑀦… 𑀧𑀴𑀸𑀲𑁂𑀦… 𑀇𑀲𑁆𑀲𑀸𑀬… 𑀫𑀘𑁆𑀙𑀭𑀺𑀬𑁂𑀦… 𑀫𑀸𑀬𑀸𑀬… 𑀲𑀸𑀞𑁂𑀬𑁆𑀬𑁂𑀦… 𑀣𑀫𑁆𑀪𑁂𑀦… 𑀲𑀸𑀭𑀫𑁆𑀪𑁂𑀦… 𑀫𑀸𑀦𑁂𑀦… 𑀅𑀢𑀺𑀫𑀸𑀦𑁂𑀦… 𑀫𑀤𑁂𑀦… 𑀧𑀫𑀸𑀤𑁂𑀦… 𑀲𑀩𑁆𑀩𑀓𑀺𑀮𑁂𑀲𑁂𑀳𑀺… 𑀲𑀩𑁆𑀩𑀤𑀼𑀘𑁆𑀘𑀭𑀺𑀢𑁂𑀳𑀺… 𑀲𑀩𑁆𑀩𑀤𑀭𑀣𑁂𑀳𑀺… 𑀲𑀩𑁆𑀩𑀧𑀭𑀺𑀴𑀸𑀳𑁂𑀳𑀺… 𑀲𑀩𑁆𑀩𑀲𑀦𑁆𑀢𑀸𑀧𑁂𑀳𑀺… 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑁂𑀳𑀺 𑀭𑀺𑀢𑁆𑀢𑀲𑁆𑀲 𑀯𑀺𑀯𑀺𑀢𑁆𑀢𑀲𑁆𑀲 𑀧𑀯𑀺𑀯𑀺𑀢𑁆𑀢𑀲𑁆𑀲. 𑀫𑀼𑀦𑀺𑀦𑁄𑀢𑀺. 𑀫𑁄𑀦𑀁 𑀯𑀼𑀘𑁆𑀘𑀢𑀺 𑀜𑀸𑀡𑀁…𑀧𑁂… 𑀲𑀗𑁆𑀕𑀚𑀸𑀮𑀫𑀢𑀺𑀘𑁆𑀘 𑀲𑁄 𑀫𑀼𑀦𑀺. 𑀘𑀭𑀢𑁄𑀢𑀺 𑀘𑀭𑀢𑁄 𑀯𑀺𑀳𑀭𑀢𑁄 𑀇𑀭𑀺𑀬𑀢𑁄 𑀯𑀢𑁆𑀢𑀢𑁄 𑀧𑀸𑀮𑀬𑀢𑁄 𑀬𑀧𑀬𑀢𑁄 𑀬𑀸𑀧𑀬𑀢𑁄𑀢𑀺 𑁋 𑀭𑀺𑀢𑁆𑀢𑀲𑁆𑀲 𑀫𑀼𑀦𑀺𑀦𑁄 𑀘𑀭𑀢𑁄.

𑀓𑀸𑀫𑁂𑀲𑀼 𑀅𑀦𑀧𑁂𑀓𑁆𑀔𑀺𑀦𑁄𑀢𑀺. 𑀓𑀸𑀫𑀸𑀢𑀺 𑀉𑀤𑁆𑀤𑀸𑀦𑀢𑁄 𑀤𑁆𑀯𑁂 𑀓𑀸𑀫𑀸 𑁋 𑀯𑀢𑁆𑀣𑀼𑀓𑀸𑀫𑀸 𑀘 𑀓𑀺𑀮𑁂𑀲𑀓𑀸𑀫𑀸 𑀘…𑀧𑁂… 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀯𑀢𑁆𑀣𑀼𑀓𑀸𑀫𑀸…𑀧𑁂… 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀓𑀺𑀮𑁂𑀲𑀓𑀸𑀫𑀸. 𑀯𑀢𑁆𑀣𑀼𑀓𑀸𑀫𑁂 𑀧𑀭𑀺𑀚𑀸𑀦𑀺𑀢𑁆𑀯𑀸 𑀓𑀺𑀮𑁂𑀲𑀓𑀸𑀫𑁂 𑀧𑀳𑀸𑀬 𑀧𑀚𑀳𑀺𑀢𑁆𑀯𑀸 𑀯𑀺𑀦𑁄𑀤𑁂𑀢𑁆𑀯𑀸 𑀩𑁆𑀬𑀦𑁆𑀢𑀺𑀁 𑀓𑀭𑀺𑀢𑁆𑀯𑀸 𑀅𑀦𑀪𑀸𑀯𑀁 𑀕𑀫𑁂𑀢𑁆𑀯𑀸 𑀓𑀸𑀫𑁂𑀲𑀼 𑀅𑀦𑀧𑁂𑀓𑁆𑀔𑀫𑀸𑀦𑁄 𑀘𑀢𑁆𑀢𑀓𑀸𑀫𑁄 𑀯𑀦𑁆𑀢𑀓𑀸𑀫𑁄 𑀫𑀼𑀢𑁆𑀢𑀓𑀸𑀫𑁄 𑀧𑀳𑀻𑀦𑀓𑀸𑀫𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑀓𑀸𑀫𑁄, 𑀯𑀻𑀢𑀭𑀸𑀕𑁄 𑀘𑀢𑁆𑀢𑀭𑀸𑀕𑁄 𑀯𑀦𑁆𑀢𑀭𑀸𑀕𑁄 𑀫𑀼𑀢𑁆𑀢𑀭𑀸𑀕𑁄 𑀧𑀳𑀻𑀦𑀭𑀸𑀕𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑀭𑀸𑀕𑁄 𑀦𑀺𑀘𑁆𑀙𑀸𑀢𑁄 𑀦𑀺𑀩𑁆𑀩𑀼𑀢𑁄 𑀲𑀻𑀢𑀺𑀪𑀽𑀢𑁄 [𑀲𑀻𑀢𑀻𑀪𑀽𑀢𑁄 (𑀲𑀻.)] 𑀲𑀼𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀩𑁆𑀭𑀳𑁆𑀫𑀪𑀽𑀢𑁂𑀦 𑀅𑀢𑁆𑀢𑀦𑀸 𑀯𑀺𑀳𑀭𑀢𑀻𑀢𑀺 𑁋 𑀓𑀸𑀫𑁂𑀲𑀼 𑀅𑀦𑀧𑁂𑀓𑁆𑀔𑀺𑀦𑁄.

𑀑𑀖𑀢𑀺𑀡𑁆𑀡𑀲𑁆𑀲 𑀧𑀺𑀳𑀬𑀦𑁆𑀢𑀺, 𑀓𑀸𑀫𑁂𑀲𑀼 𑀕𑀥𑀺𑀢𑀸 𑀧𑀚𑀸𑀢𑀺. 𑀧𑀚𑀸𑀢𑀺 𑀲𑀢𑁆𑀢𑀸𑀥𑀺𑀯𑀘𑀦𑀁 𑀧𑀚𑀸 𑀓𑀸𑀫𑁂𑀲𑀼 𑀭𑀢𑁆𑀢𑀸 𑀕𑀺𑀤𑁆𑀥𑀸 𑀕𑀥𑀺𑀢𑀸 𑀫𑀼𑀘𑁆𑀙𑀺𑀢𑀸 𑀅𑀚𑁆𑀛𑁄𑀲𑀦𑁆𑀦𑀸 𑀮𑀕𑁆𑀕𑀸 𑀮𑀕𑁆𑀕𑀺𑀢𑀸 𑀧𑀮𑀺𑀩𑀼𑀤𑁆𑀥𑀸. 𑀢𑁂 𑀓𑀸𑀫𑁄𑀖𑀁 𑀢𑀺𑀡𑁆𑀡𑀲𑁆𑀲 𑀪𑀯𑁄𑀖𑀁 𑀢𑀺𑀡𑁆𑀡𑀲𑁆𑀲 𑀤𑀺𑀝𑁆𑀞𑁄𑀖𑀁 𑀢𑀺𑀡𑁆𑀡𑀲𑁆𑀲 𑀅𑀯𑀺𑀚𑁆𑀚𑁄𑀖𑀁 𑀢𑀺𑀡𑁆𑀡𑀲𑁆𑀲 𑀲𑀩𑁆𑀩𑀲𑀗𑁆𑀔𑀸𑀭𑀧𑀣𑀁 𑀢𑀺𑀡𑁆𑀡𑀲𑁆𑀲 𑀉𑀢𑁆𑀢𑀺𑀡𑁆𑀡𑀲𑁆𑀲 𑀦𑀺𑀢𑁆𑀢𑀺𑀡𑁆𑀡𑀲𑁆𑀲 𑀅𑀢𑀺𑀓𑁆𑀓𑀦𑁆𑀢𑀲𑁆𑀲 𑀲𑀫𑀢𑀺𑀓𑁆𑀓𑀦𑁆𑀢𑀲𑁆𑀲 𑀯𑀻𑀢𑀺𑀯𑀢𑁆𑀢𑀲𑁆𑀲 𑀧𑀸𑀭𑀁 𑀕𑀢𑀲𑁆𑀲 𑀧𑀸𑀭𑀁 𑀧𑀢𑁆𑀢𑀲𑁆𑀲 𑀅𑀦𑁆𑀢𑀁 𑀕𑀢𑀲𑁆𑀲 𑀅𑀦𑁆𑀢𑀁 𑀧𑀢𑁆𑀢𑀲𑁆𑀲 𑀓𑁄𑀝𑀺𑀁 𑀕𑀢𑀲𑁆𑀲 𑀓𑁄𑀝𑀺𑀁 𑀧𑀢𑁆𑀢𑀲𑁆𑀲 𑀧𑀭𑀺𑀬𑀦𑁆𑀢𑀁 𑀕𑀢𑀲𑁆𑀲 𑀧𑀭𑀺𑀬𑀦𑁆𑀢𑀁 𑀧𑀢𑁆𑀢𑀲𑁆𑀲 𑀯𑁄𑀲𑀸𑀦𑀁 𑀕𑀢𑀲𑁆𑀲 𑀯𑁄𑀲𑀸𑀦𑀁 𑀧𑀢𑁆𑀢𑀲𑁆𑀲 𑀢𑀸𑀡𑀁 𑀕𑀢𑀲𑁆𑀲 𑀢𑀸𑀡𑀁 𑀧𑀢𑁆𑀢𑀲𑁆𑀲 𑀮𑁂𑀡𑀁 𑀕𑀢𑀲𑁆𑀲 𑀮𑁂𑀡𑀁 𑀧𑀢𑁆𑀢𑀲𑁆𑀲 𑀲𑀭𑀡𑀁 𑀕𑀢𑀲𑁆𑀲 𑀲𑀭𑀡𑀁 𑀧𑀢𑁆𑀢𑀲𑁆𑀲 𑀅𑀪𑀬𑀁 𑀕𑀢𑀲𑁆𑀲 𑀅𑀪𑀬𑀁 𑀧𑀢𑁆𑀢𑀲𑁆𑀲 𑀅𑀘𑁆𑀘𑀼𑀢𑀁 𑀕𑀢𑀲𑁆𑀲 𑀅𑀘𑁆𑀘𑀼𑀢𑀁 𑀧𑀢𑁆𑀢𑀲𑁆𑀲 𑀅𑀫𑀢𑀁 𑀕𑀢𑀲𑁆𑀲 𑀅𑀫𑀢𑀁 𑀧𑀢𑁆𑀢𑀲𑁆𑀲 𑀦𑀺𑀩𑁆𑀩𑀸𑀦𑀁 𑀕𑀢𑀲𑁆𑀲 𑀦𑀺𑀩𑁆𑀩𑀸𑀦𑀁 𑀧𑀢𑁆𑀢𑀲𑁆𑀲 𑀇𑀘𑁆𑀙𑀦𑁆𑀢𑀺 𑀲𑀸𑀤𑀺𑀬𑀦𑁆𑀢𑀺 𑀧𑀢𑁆𑀣𑀬𑀦𑁆𑀢𑀺 𑀧𑀺𑀳𑀬𑀦𑁆𑀢𑀺 𑀅𑀪𑀺𑀚𑀧𑁆𑀧𑀦𑁆𑀢𑀺. 𑀬𑀣𑀸 𑀇𑀡𑀸𑀬𑀺𑀓𑀸 𑀆𑀦𑀡𑁆𑀬𑀁 [𑀆𑀡𑀡𑁆𑀬𑀁 (𑀅𑀝𑁆𑀞.)] 𑀧𑀢𑁆𑀣𑁂𑀦𑁆𑀢𑀺 𑀧𑀺𑀳𑀬𑀦𑁆𑀢𑀺, 𑀬𑀣𑀸 𑀆𑀩𑀸𑀥𑀺𑀓𑀸 𑀆𑀭𑁄𑀕𑁆𑀬𑀁 𑀧𑀢𑁆𑀣𑁂𑀦𑁆𑀢𑀺 𑀧𑀺𑀳𑀬𑀦𑁆𑀢𑀺, 𑀬𑀣𑀸 𑀩𑀦𑁆𑀥𑀦𑀩𑀤𑁆𑀥𑀸 𑀩𑀦𑁆𑀥𑀦𑀫𑁄𑀓𑁆𑀔𑀁 𑀧𑀢𑁆𑀣𑁂𑀦𑁆𑀢𑀺 𑀧𑀺𑀳𑀬𑀦𑁆𑀢𑀺, 𑀬𑀣𑀸 𑀤𑀸𑀲𑀸 𑀪𑀼𑀚𑀺𑀲𑁆𑀲𑀁 𑀧𑀢𑁆𑀣𑁂𑀦𑁆𑀢𑀺 𑀧𑀺𑀳𑀬𑀦𑁆𑀢𑀺, 𑀬𑀣𑀸 𑀓𑀦𑁆𑀢𑀸𑀭𑀤𑁆𑀥𑀸𑀦𑀧𑀓𑁆𑀔𑀦𑁆𑀤𑀸 [𑀓𑀦𑁆𑀢𑀸𑀭𑀤𑁆𑀥𑀸𑀦𑀧𑀓𑁆𑀔𑀦𑁆𑀢𑀸 (𑀲𑀻.), 𑀓𑀦𑁆𑀢𑀸𑀭𑀤𑁆𑀥𑀸𑀦𑀧𑀓𑁆𑀔𑀦𑁆𑀦𑀸 (𑀲𑁆𑀬𑀸.)] 𑀔𑁂𑀫𑀦𑁆𑀢𑀪𑀽𑀫𑀺𑀁 𑀧𑀢𑁆𑀣𑁂𑀦𑁆𑀢𑀺 𑀧𑀺𑀳𑀬𑀦𑁆𑀢𑀺; 𑀏𑀯𑀫𑁂𑀯𑀁 𑀧𑀚𑀸 𑀓𑀸𑀫𑁂𑀲𑀼 𑀭𑀢𑁆𑀢𑀸 𑀕𑀺𑀤𑁆𑀥𑀸 𑀕𑀥𑀺𑀢𑀸 𑀫𑀼𑀘𑁆𑀙𑀺𑀢𑀸 𑀅𑀚𑁆𑀛𑁄𑀲𑀦𑁆𑀦𑀸 𑀮𑀕𑁆𑀕𑀸 𑀮𑀕𑁆𑀕𑀺𑀢𑀸 𑀧𑀮𑀺𑀩𑀼𑀤𑁆𑀥𑀸 𑀢𑁂 𑀓𑀸𑀫𑁄𑀖𑀁 𑀢𑀺𑀡𑁆𑀡𑀲𑁆𑀲 𑀪𑀯𑁄𑀖𑀁 𑀢𑀺𑀡𑁆𑀡𑀲𑁆𑀲…𑀧𑁂… 𑀦𑀺𑀩𑁆𑀩𑀸𑀦𑀁 𑀕𑀢𑀲𑁆𑀲 𑀦𑀺𑀩𑁆𑀩𑀸𑀦𑀁 𑀧𑀢𑁆𑀢𑀲𑁆𑀲 𑀇𑀘𑁆𑀙𑀦𑁆𑀢𑀺 𑀲𑀸𑀤𑀺𑀬𑀦𑁆𑀢𑀺 𑀧𑀢𑁆𑀣𑀬𑀦𑁆𑀢𑀺 𑀧𑀺𑀳𑀬𑀦𑁆𑀢𑀺 𑀅𑀪𑀺𑀚𑀧𑁆𑀧𑀦𑁆𑀢𑀻𑀢𑀺 𑁋 𑀑𑀖𑀢𑀺𑀡𑁆𑀡𑀲𑁆𑀲 𑀧𑀺𑀳𑀬𑀦𑁆𑀢𑀺, 𑀓𑀸𑀫𑁂𑀲𑀼 𑀕𑀥𑀺𑀢𑀸 𑀧𑀚𑀸.

𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀭𑀺𑀢𑁆𑀢𑀲𑁆𑀲 𑀫𑀼𑀦𑀺𑀦𑁄 𑀘𑀭𑀢𑁄, 𑀓𑀸𑀫𑁂𑀲𑀼 𑀅𑀦𑀧𑁂𑀓𑁆𑀔𑀺𑀦𑁄;

𑀑𑀖𑀢𑀺𑀡𑁆𑀡𑀲𑁆𑀲 𑀧𑀺𑀳𑀬𑀦𑁆𑀢𑀺, 𑀓𑀸𑀫𑁂𑀲𑀼 𑀕𑀥𑀺𑀢𑀸 𑀧𑀚𑀸’’𑀢𑀺.

𑀢𑀺𑀲𑁆𑀲𑀫𑁂𑀢𑁆𑀢𑁂𑀬𑁆𑀬𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁄 𑀲𑀢𑁆𑀢𑀫𑁄.