𑁮. 𑀧𑀲𑀽𑀭𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁄

𑀅𑀣 𑀧𑀲𑀽𑀭𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀁 𑀯𑀓𑁆𑀔𑀢𑀺 𑁋

𑁫𑁯. 𑀇𑀥𑁂𑀯 𑀲𑀼𑀤𑁆𑀥𑀺𑀁 𑀇𑀢𑀺 𑀯𑀸𑀤𑀬𑀦𑁆𑀢𑀺, 𑀦𑀸𑀜𑁆𑀜𑁂𑀲𑀼 𑀥𑀫𑁆𑀫𑁂𑀲𑀼 𑀯𑀺𑀲𑀼𑀤𑁆𑀥𑀺𑀫𑀸𑀳𑀼;

𑀬𑀁 𑀦𑀺𑀲𑁆𑀲𑀺𑀢𑀸 𑀢𑀢𑁆𑀣 𑀲𑀼𑀪𑀁 𑀯𑀤𑀸𑀦𑀸, 𑀧𑀘𑁆𑀘𑁂𑀓𑀲𑀘𑁆𑀘𑁂𑀲𑀼 𑀧𑀼𑀣𑀽 𑀦𑀺𑀯𑀺𑀝𑁆𑀞𑀸.

𑀇𑀥𑁂𑀯 𑀲𑀼𑀤𑁆𑀥𑀺𑀁 𑀇𑀢𑀺 𑀯𑀸𑀤𑀬𑀦𑁆𑀢𑀻𑀢𑀺. 𑀇𑀥𑁂𑀯 𑀲𑀼𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀁 𑀧𑀭𑀺𑀲𑀼𑀤𑁆𑀥𑀺𑀁 𑀫𑀼𑀢𑁆𑀢𑀺𑀁 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀫𑀼𑀢𑁆𑀢𑀺𑀁 𑀯𑀤𑀦𑁆𑀢𑀺 𑀓𑀣𑁂𑀦𑁆𑀢𑀺 𑀪𑀡𑀦𑁆𑀢𑀺 𑀤𑀻𑀧𑀬𑀦𑁆𑀢𑀺 𑀯𑁄𑀳𑀭𑀦𑁆𑀢𑀺. ‘‘𑀲𑀲𑁆𑀲𑀢𑁄 𑀮𑁄𑀓𑁄, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀲𑀼𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀁 𑀧𑀭𑀺𑀲𑀼𑀤𑁆𑀥𑀺𑀁 𑀫𑀼𑀢𑁆𑀢𑀺𑀁 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀫𑀼𑀢𑁆𑀢𑀺𑀁 𑀯𑀤𑀦𑁆𑀢𑀺 𑀓𑀣𑁂𑀦𑁆𑀢𑀺 𑀪𑀡𑀦𑁆𑀢𑀺 𑀤𑀻𑀧𑀬𑀦𑁆𑀢𑀺 𑀯𑁄𑀳𑀭𑀦𑁆𑀢𑀺. ‘‘𑀅𑀲𑀲𑁆𑀲𑀢𑁄 𑀮𑁄𑀓𑁄 … 𑀅𑀦𑁆𑀢𑀯𑀸 𑀮𑁄𑀓𑁄… 𑀅𑀦𑀦𑁆𑀢𑀯𑀸 𑀮𑁄𑀓𑁄… 𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭𑀁… 𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭𑀁… 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸… 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸… 𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸… 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀲𑀼𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀁 𑀧𑀭𑀺𑀲𑀼𑀤𑁆𑀥𑀺𑀁 𑀫𑀼𑀢𑁆𑀢𑀺𑀁 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀫𑀼𑀢𑁆𑀢𑀺𑀁 𑀯𑀤𑀦𑁆𑀢𑀺 𑀓𑀣𑁂𑀦𑁆𑀢𑀺 𑀪𑀡𑀦𑁆𑀢𑀺 𑀤𑀻𑀧𑀬𑀦𑁆𑀢𑀺 𑀯𑁄𑀳𑀭𑀦𑁆𑀢𑀻𑀢𑀺 𑁋 𑀇𑀥𑁂𑀯 𑀲𑀼𑀤𑁆𑀥𑀺𑀁 𑀇𑀢𑀺 𑀯𑀸𑀤𑀬𑀦𑁆𑀢𑀺.

𑀦𑀸𑀜𑁆𑀜𑁂𑀲𑀼 𑀥𑀫𑁆𑀫𑁂𑀲𑀼 𑀯𑀺𑀲𑀼𑀤𑁆𑀥𑀺𑀫𑀸𑀳𑀽𑀢𑀺. 𑀅𑀢𑁆𑀢𑀦𑁄 𑀲𑀢𑁆𑀣𑀸𑀭𑀁 𑀥𑀫𑁆𑀫𑀓𑁆𑀔𑀸𑀦𑀁 𑀕𑀡𑀁 𑀤𑀺𑀝𑁆𑀞𑀺𑀁 𑀧𑀝𑀺𑀧𑀤𑀁 𑀫𑀕𑁆𑀕𑀁 𑀞𑀧𑁂𑀢𑁆𑀯𑀸 𑀲𑀩𑁆𑀩𑁂 𑀧𑀭𑀯𑀸𑀤𑁂 𑀔𑀺𑀧𑀦𑁆𑀢𑀺 𑀉𑀓𑁆𑀔𑀺𑀧𑀦𑁆𑀢𑀺 𑀧𑀭𑀺𑀓𑁆𑀔𑀺𑀧𑀦𑁆𑀢𑀺. ‘‘𑀲𑁄 𑀲𑀢𑁆𑀣𑀸 𑀦 𑀲𑀩𑁆𑀩𑀜𑁆𑀜𑀽, 𑀥𑀫𑁆𑀫𑁄 𑀦 𑀲𑁆𑀯𑀸𑀓𑁆𑀔𑀸𑀢𑁄, 𑀕𑀡𑁄 𑀦 𑀲𑀼𑀧𑁆𑀧𑀝𑀺𑀧𑀦𑁆𑀦𑁄, 𑀤𑀺𑀝𑁆𑀞𑀺 𑀦 𑀪𑀤𑁆𑀤𑀺𑀓𑀸, 𑀧𑀝𑀺𑀧𑀤𑀸 𑀦 𑀲𑀼𑀧𑀜𑁆𑀜𑀢𑁆𑀢𑀸, 𑀫𑀕𑁆𑀕𑁄 𑀦 𑀦𑀺𑀬𑁆𑀬𑀸𑀦𑀺𑀓𑁄, 𑀦𑀢𑁆𑀣𑁂𑀢𑁆𑀣 𑀲𑀼𑀤𑁆𑀥𑀺 𑀯𑀸 𑀯𑀺𑀲𑀼𑀤𑁆𑀥𑀺 𑀯𑀸 𑀧𑀭𑀺𑀲𑀼𑀤𑁆𑀥𑀺 𑀯𑀸 𑀫𑀼𑀢𑁆𑀢𑀺 𑀯𑀸 𑀯𑀺𑀫𑀼𑀢𑁆𑀢𑀺 𑀯𑀸 𑀧𑀭𑀺𑀫𑀼𑀢𑁆𑀢𑀺 𑀯𑀸, 𑀦 𑀢𑀢𑁆𑀣 𑀲𑀼𑀚𑁆𑀛𑀦𑁆𑀢𑀺 𑀯𑀸 𑀯𑀺𑀲𑀼𑀚𑁆𑀛𑀦𑁆𑀢𑀺 𑀯𑀸 𑀧𑀭𑀺𑀲𑀼𑀚𑁆𑀛𑀦𑁆𑀢𑀺 𑀯𑀸 𑀫𑀼𑀘𑁆𑀘𑀦𑁆𑀢𑀺 𑀯𑀸 𑀯𑀺𑀫𑀼𑀘𑁆𑀘𑀦𑁆𑀢𑀺 𑀯𑀸 𑀧𑀭𑀺𑀫𑀼𑀘𑁆𑀘𑀦𑁆𑀢𑀺 𑀯𑀸, 𑀳𑀻𑀦𑀸 𑀦𑀺𑀳𑀻𑀦𑀸 𑀑𑀫𑀓𑀸 𑀮𑀸𑀫𑀓𑀸 𑀙𑀢𑀼𑀓𑁆𑀓𑀸 𑀧𑀭𑀺𑀢𑁆𑀢𑀸’’𑀢𑀺 𑁋 𑀏𑀯𑀫𑀸𑀳𑀁𑀲𑀼 𑀏𑀯𑀁 𑀯𑀤𑀦𑁆𑀢𑀺 𑀏𑀯𑀁 𑀓𑀣𑁂𑀦𑁆𑀢𑀺 𑀏𑀯𑀁 𑀪𑀡𑀦𑁆𑀢𑀺 𑀏𑀯𑀁 𑀤𑀻𑀧𑀬𑀦𑁆𑀢𑀺 𑀏𑀯𑀁 𑀯𑁄𑀳𑀭𑀦𑁆𑀢𑀻𑀢𑀺 𑁋 𑀦𑀸𑀜𑁆𑀜𑁂𑀲𑀼 𑀥𑀫𑁆𑀫𑁂𑀲𑀼 𑀯𑀺𑀲𑀼𑀤𑁆𑀥𑀺𑀫𑀸𑀳𑀼.

𑀬𑀁 𑀦𑀺𑀲𑁆𑀲𑀺𑀢𑀸 𑀢𑀢𑁆𑀣 𑀲𑀼𑀪𑀁 𑀯𑀤𑀸𑀦𑀸𑀢𑀺. 𑀬𑀁 𑀦𑀺𑀲𑁆𑀲𑀺𑀢𑀸𑀢𑀺 𑀬𑀁 𑀲𑀢𑁆𑀣𑀸𑀭𑀁 𑀥𑀫𑁆𑀫𑀓𑁆𑀔𑀸𑀦𑀁 𑀕𑀡𑀁 𑀤𑀺𑀝𑁆𑀞𑀺𑀁 𑀧𑀝𑀺𑀧𑀤𑀁 𑀫𑀕𑁆𑀕𑀁 𑀦𑀺𑀲𑁆𑀲𑀺𑀢𑀸 𑀆𑀦𑀺𑀲𑁆𑀲𑀺𑀢𑀸 [𑀧𑀢𑀺𑀝𑁆𑀞𑀺𑀢𑀸 (𑀲𑀻.), 𑀲𑀦𑁆𑀦𑀺𑀲𑁆𑀲𑀺𑀢𑀸 (𑀲𑁆𑀬𑀸.)] 𑀅𑀮𑁆𑀮𑀻𑀦𑀸 𑀉𑀧𑀕𑀢𑀸 𑀅𑀚𑁆𑀛𑁄𑀲𑀺𑀢𑀸 𑀅𑀥𑀺𑀫𑀼𑀢𑁆𑀢𑀸. 𑀢𑀢𑁆𑀣𑀸𑀢𑀺 𑀲𑀓𑀸𑀬 𑀤𑀺𑀝𑁆𑀞𑀺𑀬𑀸 𑀲𑀓𑀸𑀬 𑀔𑀦𑁆𑀢𑀺𑀬𑀸 𑀲𑀓𑀸𑀬 𑀭𑀼𑀘𑀺𑀬𑀸 𑀲𑀓𑀸𑀬 𑀮𑀤𑁆𑀥𑀺𑀬𑀸. 𑀲𑀼𑀪𑀁 𑀯𑀤𑀸𑀦𑀸𑀢𑀺 𑀲𑀼𑀪𑀯𑀸𑀤𑀸 𑀲𑁄𑀪𑀦𑀯𑀸𑀤𑀸 𑀧𑀡𑁆𑀟𑀺𑀢𑀯𑀸𑀤𑀸 𑀣𑀺𑀭𑀯𑀸𑀤𑀸 [𑀥𑀻𑀭𑀯𑀸𑀤𑀸 (𑀲𑁆𑀬𑀸.)] 𑀜𑀸𑀬𑀯𑀸𑀤𑀸 𑀳𑁂𑀢𑀼𑀯𑀸𑀤𑀸 𑀮𑀓𑁆𑀔𑀡𑀯𑀸𑀤𑀸 𑀓𑀸𑀭𑀡𑀯𑀸𑀤𑀸 𑀞𑀸𑀦𑀯𑀸𑀤𑀸 𑀲𑀓𑀸𑀬 𑀮𑀤𑁆𑀥𑀺𑀬𑀸𑀢𑀺 𑁋 𑀬𑀁 𑀦𑀺𑀲𑁆𑀲𑀺𑀢𑀸 𑀢𑀢𑁆𑀣 𑀲𑀼𑀪𑀁 𑀯𑀤𑀸𑀦𑀸.

𑀧𑀘𑁆𑀘𑁂𑀓𑀲𑀘𑁆𑀘𑁂𑀲𑀼 𑀧𑀼𑀣𑀽 𑀦𑀺𑀯𑀺𑀝𑁆𑀞𑀸𑀢𑀺. 𑀧𑀼𑀣𑀽 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀧𑀼𑀣𑀽 𑀧𑀘𑁆𑀘𑁂𑀓𑀲𑀘𑁆𑀘𑁂𑀲𑀼 𑀦𑀺𑀯𑀺𑀝𑁆𑀞𑀸 𑀧𑀢𑀺𑀝𑁆𑀞𑀺𑀢𑀸 𑀅𑀮𑁆𑀮𑀻𑀦𑀸 𑀉𑀧𑀕𑀢𑀸 𑀅𑀚𑁆𑀛𑁄𑀲𑀺𑀢𑀸 𑀅𑀥𑀺𑀫𑀼𑀢𑁆𑀢𑀸. ‘‘𑀲𑀲𑁆𑀲𑀢𑁄 𑀮𑁄𑀓𑁄, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀦𑀺𑀯𑀺𑀝𑁆𑀞𑀸 𑀧𑀢𑀺𑀝𑁆𑀞𑀺𑀢𑀸 𑀅𑀮𑁆𑀮𑀻𑀦𑀸 𑀉𑀧𑀕𑀢𑀸 𑀅𑀚𑁆𑀛𑁄𑀲𑀺𑀢𑀸 𑀅𑀥𑀺𑀫𑀼𑀢𑁆𑀢𑀸. ‘‘𑀅𑀲𑀲𑁆𑀲𑀢𑁄 𑀮𑁄𑀓𑁄…𑀧𑁂… 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀦𑀺𑀯𑀺𑀝𑁆𑀞𑀸 𑀧𑀢𑀺𑀝𑁆𑀞𑀺𑀢𑀸 𑀅𑀮𑁆𑀮𑀻𑀦𑀸 𑀉𑀧𑀕𑀢𑀸 𑀅𑀚𑁆𑀛𑁄𑀲𑀺𑀢𑀸 𑀅𑀥𑀺𑀫𑀼𑀢𑁆𑀢𑀸𑀢𑀺 𑁋 𑀧𑀘𑁆𑀘𑁂𑀓𑀲𑀘𑁆𑀘𑁂𑀲𑀼 𑀧𑀼𑀣𑀽 𑀦𑀺𑀯𑀺𑀝𑁆𑀞𑀸.

𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀇𑀥𑁂𑀯 𑀲𑀼𑀤𑁆𑀥𑀺𑀁 𑀇𑀢𑀺 𑀯𑀸𑀤𑀬𑀦𑁆𑀢𑀺, 𑀦𑀸𑀜𑁆𑀜𑁂𑀲𑀼 𑀥𑀫𑁆𑀫𑁂𑀲𑀼 𑀯𑀺𑀲𑀼𑀤𑁆𑀥𑀺𑀫𑀸𑀳𑀼;

𑀬𑀁 𑀦𑀺𑀲𑁆𑀲𑀺𑀢𑀸 𑀢𑀢𑁆𑀣 𑀲𑀼𑀪𑀁 𑀯𑀤𑀸𑀦𑀸, 𑀧𑀘𑁆𑀘𑁂𑀓𑀲𑀘𑁆𑀘𑁂𑀲𑀼 𑀧𑀼𑀣𑀽 𑀦𑀺𑀯𑀺𑀝𑁆𑀞𑀸’’𑀢𑀺.

𑁬𑁦. 𑀢𑁂 𑀯𑀸𑀤𑀓𑀸𑀫𑀸 𑀧𑀭𑀺𑀲𑀁 𑀯𑀺𑀕𑀬𑁆𑀳, 𑀩𑀸𑀮𑀁 𑀤𑀳𑀦𑁆𑀢𑀻 𑀫𑀺𑀣𑀼 𑀅𑀜𑁆𑀜𑀫𑀜𑁆𑀜𑀁;

𑀯𑀤𑀦𑁆𑀢𑀺 𑀢𑁂 𑀅𑀜𑁆𑀜𑀲𑀺𑀢𑀸 𑀓𑀣𑁄𑀚𑁆𑀚𑀁, 𑀧𑀲𑀁𑀲𑀓𑀸𑀫𑀸 𑀓𑀼𑀲𑀮𑀸𑀯𑀤𑀸𑀦𑀸.

𑀢𑁂 𑀯𑀸𑀤𑀓𑀸𑀫𑀸 𑀧𑀭𑀺𑀲𑀁 𑀯𑀺𑀕𑀬𑁆𑀳𑀸𑀢𑀺. 𑀢𑁂 𑀯𑀸𑀤𑀓𑀸𑀫𑀸𑀢𑀺 𑀢𑁂 𑀯𑀸𑀤𑀓𑀸𑀫𑀸 𑀯𑀸𑀤𑀢𑁆𑀣𑀺𑀓𑀸 𑀯𑀸𑀤𑀸𑀥𑀺𑀧𑁆𑀧𑀸𑀬𑀸 𑀯𑀸𑀤𑀧𑀼𑀭𑁂𑀓𑁆𑀔𑀸𑀭𑀸 𑀯𑀸𑀤𑀧𑀭𑀺𑀬𑁂𑀲𑀦𑀁 𑀘𑀭𑀦𑁆𑀢𑀸. 𑀧𑀭𑀺𑀲𑀁 𑀯𑀺𑀕𑀬𑁆𑀳𑀸𑀢𑀺 𑀔𑀢𑁆𑀢𑀺𑀬𑀧𑀭𑀺𑀲𑀁 𑀩𑁆𑀭𑀸𑀳𑁆𑀫𑀡𑀧𑀭𑀺𑀲𑀁 𑀕𑀳𑀧𑀢𑀺𑀧𑀭𑀺𑀲𑀁 𑀲𑀫𑀡𑀧𑀭𑀺𑀲𑀁 𑀯𑀺𑀕𑀬𑁆𑀳 𑀑𑀕𑀬𑁆𑀳 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀧𑀯𑀺𑀲𑀺𑀢𑁆𑀯𑀸𑀢𑀺 𑁋 𑀢𑁂 𑀯𑀸𑀤𑀓𑀸𑀫𑀸 𑀧𑀭𑀺𑀲𑀁 𑀯𑀺𑀕𑀬𑁆𑀳.

𑀩𑀸𑀮𑀁 𑀤𑀳𑀦𑁆𑀢𑀻 𑀫𑀺𑀣𑀼 𑀅𑀜𑁆𑀜𑀫𑀜𑁆𑀜𑀦𑁆𑀢𑀺. 𑀫𑀺𑀣𑀽𑀢𑀺 𑀤𑁆𑀯𑁂 𑀚𑀦𑀸 𑀤𑁆𑀯𑁂 𑀓𑀮𑀳𑀓𑀸𑀭𑀓𑀸 𑀤𑁆𑀯𑁂 𑀪𑀡𑁆𑀟𑀦𑀓𑀸𑀭𑀓𑀸 𑀤𑁆𑀯𑁂 𑀪𑀲𑁆𑀲𑀓𑀸𑀭𑀓𑀸 𑀤𑁆𑀯𑁂 𑀯𑀺𑀯𑀸𑀤𑀓𑀸𑀭𑀓𑀸 𑀤𑁆𑀯𑁂 𑀅𑀥𑀺𑀓𑀭𑀡𑀓𑀸𑀭𑀓𑀸 𑀤𑁆𑀯𑁂 𑀯𑀸𑀤𑀺𑀦𑁄 𑀤𑁆𑀯𑁂 𑀲𑀮𑁆𑀮𑀸𑀧𑀓𑀸; 𑀢𑁂 𑀅𑀜𑁆𑀜𑀫𑀜𑁆𑀜𑀁 𑀩𑀸𑀮𑀢𑁄 𑀳𑀻𑀦𑀢𑁄 𑀦𑀺𑀳𑀻𑀦𑀢𑁄 𑀑𑀫𑀓𑀢𑁄 𑀮𑀸𑀫𑀓𑀢𑁄 𑀙𑀢𑀼𑀓𑁆𑀓𑀢𑁄 𑀧𑀭𑀺𑀢𑁆𑀢𑀢𑁄 𑀤𑀳𑀦𑁆𑀢𑀺 𑀧𑀲𑁆𑀲𑀦𑁆𑀢𑀺 𑀤𑀓𑁆𑀔𑀦𑁆𑀢𑀺 𑀑𑀮𑁄𑀓𑁂𑀦𑁆𑀢𑀺 𑀦𑀺𑀚𑁆𑀛𑀸𑀬𑀦𑁆𑀢𑀺 𑀉𑀧𑀧𑀭𑀺𑀓𑁆𑀔𑀦𑁆𑀢𑀻𑀢𑀺 𑁋 𑀩𑀸𑀮𑀁 𑀤𑀳𑀦𑁆𑀢𑀻 𑀫𑀺𑀣𑀼 𑀅𑀜𑁆𑀜𑀫𑀜𑁆𑀜𑀁.

𑀯𑀤𑀦𑁆𑀢𑀺 𑀢𑁂 𑀅𑀜𑁆𑀜𑀲𑀺𑀢𑀸 𑀓𑀣𑁄𑀚𑁆𑀚𑀦𑁆𑀢𑀺. 𑀅𑀜𑁆𑀜𑀁 𑀲𑀢𑁆𑀣𑀸𑀭𑀁 𑀥𑀫𑁆𑀫𑀓𑁆𑀔𑀸𑀦𑀁 𑀕𑀡𑀁 𑀤𑀺𑀝𑁆𑀞𑀺𑀁 𑀧𑀝𑀺𑀧𑀤𑀁 𑀫𑀕𑁆𑀕𑀁 𑀦𑀺𑀲𑁆𑀲𑀺𑀢𑀸 𑀆𑀦𑀺𑀲𑁆𑀲𑀺𑀢𑀸 𑀅𑀮𑁆𑀮𑀻𑀦𑀸 𑀉𑀧𑀕𑀢𑀸 𑀅𑀚𑁆𑀛𑁄𑀲𑀺𑀢𑀸 𑀅𑀥𑀺𑀫𑀼𑀢𑁆𑀢𑀸. 𑀓𑀣𑁄𑀚𑁆𑀚𑀁 𑀯𑀼𑀘𑁆𑀘𑀢𑀺 𑀓𑀮𑀳𑁄 𑀪𑀡𑁆𑀟𑀦𑀁 𑀯𑀺𑀕𑁆𑀕𑀳𑁄 𑀯𑀺𑀯𑀸𑀤𑁄 𑀫𑁂𑀥𑀕𑀁. 𑀅𑀣 𑀯𑀸 𑀓𑀣𑁄𑀚𑁆𑀚𑀦𑁆𑀢𑀺 𑀅𑀦𑁄𑀚𑀯𑀦𑁆𑀢𑀻 𑀦𑀺𑀲𑀸𑀓𑀣𑀸 𑀓𑀣𑁄𑀚𑁆𑀚𑀁 𑀯𑀤𑀦𑁆𑀢𑀺, 𑀓𑀮𑀳𑀁 𑀯𑀤𑀦𑁆𑀢𑀺, 𑀪𑀡𑁆𑀟𑀦𑀁 𑀯𑀤𑀦𑁆𑀢𑀺, 𑀯𑀺𑀕𑁆𑀕𑀳𑀁 𑀯𑀤𑀦𑁆𑀢𑀺, 𑀯𑀺𑀯𑀸𑀤𑀁 𑀯𑀤𑀦𑁆𑀢𑀺, 𑀫𑁂𑀥𑀕𑀁 𑀯𑀤𑀦𑁆𑀢𑀺 𑀓𑀣𑁂𑀦𑁆𑀢𑀺 𑀪𑀡𑀦𑁆𑀢𑀺 𑀤𑀻𑀧𑀬𑀦𑁆𑀢𑀺 𑀯𑁄𑀳𑀭𑀦𑁆𑀢𑀻𑀢𑀺 𑁋 𑀯𑀤𑀦𑁆𑀢𑀺 𑀢𑁂 𑀅𑀜𑁆𑀜𑀲𑀺𑀢𑀸 𑀓𑀣𑁄𑀚𑁆𑀚𑀁.

𑀧𑀲𑀁𑀲𑀓𑀸𑀫𑀸 𑀓𑀼𑀲𑀮𑀸𑀯𑀤𑀸𑀦𑀸𑀢𑀺. 𑀧𑀲𑀁𑀲𑀓𑀸𑀫𑀸𑀢𑀺 𑀧𑀲𑀁𑀲𑀓𑀸𑀫𑀸 𑀧𑀲𑀁𑀲𑀢𑁆𑀣𑀺𑀓𑀸 𑀧𑀲𑀁𑀲𑀸𑀥𑀺𑀧𑁆𑀧𑀸𑀬𑀸 𑀧𑀲𑀁𑀲𑀧𑀼𑀭𑁂𑀓𑁆𑀔𑀸𑀭𑀸 𑀧𑀲𑀁𑀲𑀧𑀭𑀺𑀬𑁂𑀲𑀦𑀁 𑀘𑀭𑀦𑁆𑀢𑀸. 𑀓𑀼𑀲𑀮𑀸𑀯𑀤𑀸𑀦𑀸𑀢𑀺 𑀓𑀼𑀲𑀮𑀯𑀸𑀤𑀸 𑀧𑀡𑁆𑀟𑀺𑀢𑀯𑀸𑀤𑀸 𑀣𑀺𑀭𑀯𑀸𑀤𑀸 𑀜𑀸𑀬𑀯𑀸𑀤𑀸 𑀳𑁂𑀢𑀼𑀯𑀸𑀤𑀸 𑀮𑀓𑁆𑀔𑀡𑀯𑀸𑀤𑀸 𑀓𑀸𑀭𑀡𑀯𑀸𑀤𑀸 𑀞𑀸𑀦𑀯𑀸𑀤𑀸 𑀲𑀓𑀸𑀬 𑀮𑀤𑁆𑀥𑀺𑀬𑀸𑀢𑀺 𑁋 𑀧𑀲𑀁𑀲𑀓𑀸𑀫𑀸 𑀓𑀼𑀲𑀮𑀸𑀯𑀤𑀸𑀦𑀸.

𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀢𑁂 𑀯𑀸𑀤𑀓𑀸𑀫𑀸 𑀧𑀭𑀺𑀲𑀁 𑀯𑀺𑀕𑀬𑁆𑀳, 𑀩𑀸𑀮𑀁 𑀤𑀳𑀦𑁆𑀢𑀻 𑀫𑀺𑀣𑀼 𑀅𑀜𑁆𑀜𑀫𑀜𑁆𑀜𑀁;

𑀯𑀤𑀦𑁆𑀢𑀺 𑀢𑁂 𑀅𑀜𑁆𑀜𑀲𑀺𑀢𑀸 𑀓𑀣𑁄𑀚𑁆𑀚𑀁, 𑀧𑀲𑀁𑀲𑀓𑀸𑀫𑀸 𑀓𑀼𑀲𑀮𑀸𑀯𑀤𑀸𑀦𑀸’’𑀢𑀺.

𑁬𑁧. 𑀬𑀼𑀢𑁆𑀢𑁄 𑀓𑀣𑀸𑀬𑀁 𑀧𑀭𑀺𑀲𑀸𑀬 𑀫𑀚𑁆𑀛𑁂, 𑀧𑀲𑀁𑀲𑀫𑀺𑀘𑁆𑀙𑀁 𑀯𑀺𑀦𑀺𑀖𑀸𑀢𑀺 𑀳𑁄𑀢𑀺;

𑀅𑀧𑀸𑀳𑀢𑀲𑁆𑀫𑀺𑀁 𑀧𑀦 𑀫𑀗𑁆𑀓𑀼 𑀳𑁄𑀢𑀺, 𑀦𑀺𑀦𑁆𑀤𑀸𑀬 𑀲𑁄 𑀓𑀼𑀧𑁆𑀧𑀢𑀺 𑀭𑀦𑁆𑀥𑀫𑁂𑀲𑀻.

𑀬𑀼𑀢𑁆𑀢𑁄 𑀓𑀣𑀸𑀬𑀁 𑀧𑀭𑀺𑀲𑀸𑀬 𑀫𑀚𑁆𑀛𑁂𑀢𑀺. 𑀔𑀢𑁆𑀢𑀺𑀬𑀧𑀭𑀺𑀲𑀸𑀬 𑀯𑀸 𑀩𑁆𑀭𑀸𑀳𑁆𑀫𑀡𑀧𑀭𑀺𑀲𑀸𑀬 𑀯𑀸 𑀕𑀳𑀧𑀢𑀺𑀧𑀭𑀺𑀲𑀸𑀬 𑀯𑀸 𑀲𑀫𑀡𑀧𑀭𑀺𑀲𑀸𑀬 𑀯𑀸 𑀫𑀚𑁆𑀛𑁂 𑀅𑀢𑁆𑀢𑀦𑁄 𑀓𑀣𑀸𑀬𑀁 𑀬𑀼𑀢𑁆𑀢𑁄 𑀧𑀬𑀼𑀢𑁆𑀢𑁄 𑀆𑀬𑀼𑀢𑁆𑀢𑁄 𑀲𑀫𑀸𑀬𑀼𑀢𑁆𑀢𑁄 𑀲𑀫𑁆𑀧𑀬𑀼𑀢𑁆𑀢𑁄 𑀓𑀣𑁂𑀢𑀼𑀦𑁆𑀢𑀺 𑁋 𑀬𑀼𑀢𑁆𑀢𑁄 𑀓𑀣𑀸𑀬𑀁 𑀧𑀭𑀺𑀲𑀸𑀬 𑀫𑀚𑁆𑀛𑁂.

𑀧𑀲𑀁𑀲𑀫𑀺𑀘𑁆𑀙𑀁 𑀯𑀺𑀦𑀺𑀖𑀸𑀢𑀺 𑀳𑁄𑀢𑀻𑀢𑀺. 𑀧𑀲𑀁𑀲𑀫𑀺𑀘𑁆𑀙𑀦𑁆𑀢𑀺 𑀧𑀲𑀁𑀲𑀁 𑀣𑁄𑀫𑀦𑀁 𑀓𑀺𑀢𑁆𑀢𑀺𑀁 𑀯𑀡𑁆𑀡𑀳𑀸𑀭𑀺𑀬𑀁 𑀇𑀘𑁆𑀙𑀦𑁆𑀢𑁄 𑀲𑀸𑀤𑀺𑀬𑀦𑁆𑀢𑁄 𑀧𑀢𑁆𑀣𑀬𑀦𑁆𑀢𑁄 𑀧𑀺𑀳𑀬𑀦𑁆𑀢𑁄 𑀅𑀪𑀺𑀚𑀧𑁆𑀧𑀦𑁆𑀢𑁄. 𑀯𑀺𑀦𑀺𑀖𑀸𑀢𑀺 𑀳𑁄𑀢𑀻𑀢𑀺 𑀧𑀼𑀩𑁆𑀩𑁂𑀯 𑀲𑀮𑁆𑀮𑀸𑀧𑀸 𑀓𑀣𑀁𑀓𑀣𑀻 𑀯𑀺𑀦𑀺𑀖𑀸𑀢𑀻 𑀳𑁄𑀢𑀺. ‘‘𑀚𑀬𑁄 𑀦𑀼 𑀔𑁄 𑀫𑁂 𑀪𑀯𑀺𑀲𑁆𑀲𑀢𑀺, 𑀧𑀭𑀸𑀚𑀬𑁄 𑀦𑀼 𑀔𑁄 𑀫𑁂 𑀪𑀯𑀺𑀲𑁆𑀲𑀢𑀺, 𑀓𑀣𑀁 𑀦𑀺𑀕𑁆𑀕𑀳𑀁 𑀓𑀭𑀺𑀲𑁆𑀲𑀸𑀫𑀺, 𑀓𑀣𑀁 𑀧𑀝𑀺𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀺, 𑀓𑀣𑀁 𑀯𑀺𑀲𑁂𑀲𑀁 𑀓𑀭𑀺𑀲𑁆𑀲𑀸𑀫𑀺, 𑀓𑀣𑀁 𑀧𑀝𑀺𑀯𑀺𑀲𑁂𑀲𑀁 𑀓𑀭𑀺𑀲𑁆𑀲𑀸𑀫𑀺, 𑀓𑀣𑀁 𑀆𑀯𑁂𑀞𑀺𑀬𑀁 [𑀆𑀯𑁂𑀥𑀺𑀬𑀁 (𑀲𑁆𑀬𑀸.)] 𑀓𑀭𑀺𑀲𑁆𑀲𑀸𑀫𑀺, 𑀓𑀣𑀁 𑀦𑀺𑀩𑁆𑀩𑁂𑀞𑀺𑀬𑀁 [𑀦𑀺𑀩𑁆𑀩𑁂𑀥𑀺𑀬𑀁 (𑀲𑁆𑀬𑀸. 𑀓.)] 𑀓𑀭𑀺𑀲𑁆𑀲𑀸𑀫𑀺, 𑀓𑀣𑀁 𑀙𑁂𑀤𑀁 𑀓𑀭𑀺𑀲𑁆𑀲𑀸𑀫𑀺, 𑀓𑀣𑀁 𑀫𑀡𑁆𑀟𑀮𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺, 𑀏𑀯𑀁 𑀧𑀼𑀩𑁆𑀩𑁂𑀯 𑀲𑀮𑁆𑀮𑀸𑀧𑀸 𑀓𑀣𑀁𑀓𑀣𑀻 𑀯𑀺𑀦𑀺𑀖𑀸𑀢𑀺 𑀳𑁄𑀢𑀻𑀢𑀺 𑁋 𑀧𑀲𑀁𑀲𑀫𑀺𑀘𑁆𑀙𑀁 𑀯𑀺𑀦𑀺𑀖𑀸𑀢𑀺 𑀳𑁄𑀢𑀺.

𑀅𑀧𑀸𑀳𑀢𑀲𑁆𑀫𑀺𑀁 𑀧𑀦 𑀫𑀗𑁆𑀓𑀼 𑀳𑁄𑀢𑀻𑀢𑀺. 𑀬𑁂 𑀢𑁂 𑀧𑀜𑁆𑀳𑀯𑀻𑀫𑀁𑀲𑀓𑀸 𑀧𑀭𑀺𑀲𑀸 𑀧𑀸𑀭𑀺𑀲𑀚𑁆𑀚𑀸 𑀧𑀸𑀲𑀸𑀭𑀺𑀓𑀸 [𑀧𑀸𑀲𑀦𑀺𑀓𑀸 (𑀲𑁆𑀬𑀸.)], 𑀢𑁂 𑀅𑀧𑀳𑀭𑀦𑁆𑀢𑀺. ‘‘𑀅𑀢𑁆𑀣𑀸𑀧𑀕𑀢𑀁 𑀪𑀡𑀺𑀢’’𑀦𑁆𑀢𑀺 𑀅𑀢𑁆𑀣𑀢𑁄 𑀅𑀧𑀳𑀭𑀦𑁆𑀢𑀺, ‘‘𑀩𑁆𑀬𑀜𑁆𑀚𑀦𑀸𑀧𑀕𑀢𑀁 𑀪𑀡𑀺𑀢’’𑀦𑁆𑀢𑀺 𑀩𑁆𑀬𑀜𑁆𑀚𑀦𑀢𑁄 𑀅𑀧𑀳𑀭𑀦𑁆𑀢𑀺, ‘‘𑀅𑀢𑁆𑀣𑀩𑁆𑀬𑀜𑁆𑀚𑀦𑀸𑀧𑀕𑀢𑀁 𑀪𑀡𑀺𑀢’’𑀦𑁆𑀢𑀺 𑀅𑀢𑁆𑀣𑀩𑁆𑀬𑀜𑁆𑀚𑀦𑀢𑁄 𑀅𑀧𑀳𑀭𑀦𑁆𑀢𑀺, ‘‘𑀅𑀢𑁆𑀣𑁄 𑀢𑁂 𑀤𑀼𑀦𑁆𑀦𑀻𑀢𑁄, 𑀩𑁆𑀬𑀜𑁆𑀚𑀦𑀁 𑀢𑁂 𑀤𑀼𑀭𑁄𑀧𑀺𑀢𑀁, 𑀅𑀢𑁆𑀣𑀩𑁆𑀬𑀜𑁆𑀚𑀦𑀁 𑀢𑁂 𑀤𑀼𑀦𑁆𑀦𑀻𑀢𑀁 𑀤𑀼𑀭𑁄𑀧𑀺𑀢𑀁, 𑀦𑀺𑀕𑁆𑀕𑀳𑁄 𑀢𑁂 𑀅𑀓𑀢𑁄, 𑀧𑀝𑀺𑀓𑀫𑁆𑀫𑀁 𑀢𑁂 𑀤𑀼𑀓𑁆𑀓𑀝𑀁, 𑀯𑀺𑀲𑁂𑀲𑁄 𑀢𑁂 𑀅𑀓𑀢𑁄, 𑀧𑀝𑀺𑀯𑀺𑀲𑁂𑀲𑁄 𑀢𑁂 𑀤𑀼𑀓𑁆𑀓𑀝𑁄, 𑀆𑀯𑁂𑀞𑀺𑀬𑀸 𑀢𑁂 𑀅𑀓𑀢𑀸, 𑀦𑀺𑀩𑁆𑀩𑁂𑀞𑀺𑀬𑀸 𑀢𑁂 𑀤𑀼𑀓𑁆𑀓𑀝𑀸, 𑀙𑁂𑀤𑁄 𑀢𑁂 𑀅𑀓𑀢𑁄, 𑀫𑀡𑁆𑀟𑀮𑀁 𑀢𑁂 𑀤𑀼𑀓𑁆𑀓𑀝𑀁 𑀯𑀺𑀲𑀫𑀓𑀣𑀁 𑀤𑀼𑀓𑁆𑀓𑀣𑀺𑀢𑀁 𑀤𑀼𑀩𑁆𑀪𑀡𑀺𑀢𑀁 𑀤𑀼𑀮𑁆𑀮𑀧𑀺𑀢𑀁 𑀤𑀼𑀭𑀼𑀢𑁆𑀢𑀁 𑀤𑀼𑀩𑁆𑀪𑀸𑀲𑀺𑀢’’𑀦𑁆𑀢𑀺 𑀅𑀧𑀳𑀭𑀦𑁆𑀢𑀺. 𑀅𑀧𑀸𑀳𑀢𑀲𑁆𑀫𑀺𑀁 𑀧𑀦 𑀫𑀗𑁆𑀓𑀼 𑀳𑁄𑀢𑀻𑀢𑀺. 𑀅𑀧𑀸𑀳𑀢𑀲𑁆𑀫𑀺𑀁 𑀫𑀗𑁆𑀓𑀼 𑀳𑁄𑀢𑀺 𑀧𑀻𑀴𑀺𑀢𑁄 𑀖𑀝𑁆𑀝𑀺𑀢𑁄 𑀩𑁆𑀬𑀸𑀥𑀺𑀢𑁄 𑀤𑁄𑀫𑀦𑀲𑁆𑀲𑀺𑀢𑁄 𑀳𑁄𑀢𑀻𑀢𑀺 𑁋 𑀅𑀧𑀸𑀳𑀢𑀲𑁆𑀫𑀺𑀁 𑀧𑀦 𑀫𑀗𑁆𑀓𑀼 𑀳𑁄𑀢𑀺.

𑀦𑀺𑀦𑁆𑀤𑀸𑀬 𑀲𑁄 𑀓𑀼𑀧𑁆𑀧𑀢𑀺 𑀭𑀦𑁆𑀥𑀫𑁂𑀲𑀻𑀢𑀺. 𑀦𑀺𑀦𑁆𑀤𑀸𑀬 𑀕𑀭𑀳𑀸𑀬 𑀅𑀓𑀺𑀢𑁆𑀢𑀺𑀬𑀸 𑀅𑀯𑀡𑁆𑀡𑀳𑀸𑀭𑀺𑀓𑀸𑀬 𑀓𑀼𑀧𑁆𑀧𑀢𑀺 𑀩𑁆𑀬𑀸𑀧𑀚𑁆𑀚𑀢𑀺 𑀧𑀢𑀺𑀝𑁆𑀞𑀻𑀬𑀢𑀺, 𑀓𑁄𑀧𑀜𑁆𑀘 𑀤𑁄𑀲𑀜𑁆𑀘 𑀅𑀧𑁆𑀧𑀘𑁆𑀘𑀬𑀜𑁆𑀘 𑀧𑀸𑀢𑀼𑀓𑀭𑁄𑀢𑀻𑀢𑀺 𑁋 𑀦𑀺𑀦𑁆𑀤𑀸𑀬 𑀲𑁄 𑀓𑀼𑀧𑁆𑀧𑀢𑀺. 𑀭𑀦𑁆𑀥𑀫𑁂𑀲𑀻𑀢𑀺 𑀯𑀺𑀭𑀦𑁆𑀥𑀫𑁂𑀲𑀻 𑀅𑀧𑀭𑀤𑁆𑀥𑀫𑁂𑀲𑀻 𑀔𑀮𑀺𑀢𑀫𑁂𑀲𑀻 𑀕𑀴𑀺𑀢𑀫𑁂𑀲𑀻 𑀯𑀺𑀯𑀭𑀫𑁂𑀲𑀻𑀢𑀺 𑁋 𑀦𑀺𑀦𑁆𑀤𑀸𑀬 𑀲𑁄 𑀓𑀼𑀧𑁆𑀧𑀢𑀺 𑀭𑀦𑁆𑀥𑀫𑁂𑀲𑀻.

𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀬𑀼𑀢𑁆𑀢𑁄 𑀓𑀣𑀸𑀬𑀁 𑀧𑀭𑀺𑀲𑀸𑀬 𑀫𑀚𑁆𑀛𑁂, 𑀧𑀲𑀁𑀲𑀫𑀺𑀘𑁆𑀙𑀁 𑀯𑀺𑀦𑀺𑀖𑀸𑀢𑀺 𑀳𑁄𑀢𑀺;

𑀅𑀧𑀸𑀳𑀢𑀲𑁆𑀫𑀺𑀁 𑀧𑀦 𑀫𑀗𑁆𑀓𑀼 𑀳𑁄𑀢𑀺, 𑀦𑀺𑀦𑁆𑀤𑀸𑀬 𑀲𑁄 𑀓𑀼𑀧𑁆𑀧𑀢𑀺 𑀭𑀦𑁆𑀥𑀫𑁂𑀲𑀻’’𑀢𑀺.

𑁬𑁨. 𑀬𑀫𑀲𑁆𑀲 𑀯𑀸𑀤𑀁 𑀧𑀭𑀺𑀳𑀻𑀦𑀫𑀸𑀳𑀼, 𑀅𑀧𑀸𑀳𑀢𑀁 𑀧𑀜𑁆𑀳𑀯𑀺𑀫𑀁𑀲𑀓𑀸𑀲𑁂 [𑀧𑀜𑁆𑀳𑀯𑀺𑀫𑀁𑀲𑀓𑀸 𑀬𑁂 (𑀲𑁆𑀬𑀸.)] ;

𑀧𑀭𑀺𑀤𑁂𑀯𑀢𑀺 𑀲𑁄𑀘𑀢𑀺 𑀳𑀻𑀦𑀯𑀸𑀤𑁄, 𑀉𑀧𑀘𑁆𑀘𑀕𑀸 𑀫𑀦𑁆𑀢𑀺 𑀅𑀦𑀼𑀢𑁆𑀣𑀼𑀦𑀸𑀢𑀺.

𑀬𑀫𑀲𑁆𑀲 𑀯𑀸𑀤𑀁 𑀧𑀭𑀺𑀳𑀻𑀦𑀫𑀸𑀳𑀽𑀢𑀺 𑀬𑀁 𑀢𑀲𑁆𑀲 𑀯𑀸𑀤𑀁 𑀳𑀻𑀦𑀁 𑀦𑀺𑀳𑀻𑀦𑀁 𑀧𑀭𑀺𑀳𑀻𑀦𑀁 𑀧𑀭𑀺𑀳𑀸𑀧𑀺𑀢𑀁 𑀦 𑀧𑀭𑀺𑀧𑀽𑀭𑀺𑀢𑀁, 𑀏𑀯𑀫𑀸𑀳𑀁𑀲𑀼 𑀏𑀯𑀁 𑀓𑀣𑁂𑀦𑁆𑀢𑀺 𑀏𑀯𑀁 𑀪𑀡𑀦𑁆𑀢𑀺 𑀏𑀯𑀁 𑀤𑀻𑀧𑀬𑀦𑁆𑀢𑀺 𑀏𑀯𑀁 𑀯𑁄𑀳𑀭𑀦𑁆𑀢𑀻𑀢𑀺 𑁋 𑀬𑀫𑀲𑁆𑀲 𑀯𑀸𑀤𑀁 𑀧𑀭𑀺𑀳𑀻𑀦𑀫𑀸𑀳𑀼.

𑀅𑀧𑀸𑀳𑀢𑀁 𑀧𑀜𑁆𑀳𑀯𑀺𑀫𑀁𑀲𑀓𑀸𑀲𑁂𑀢𑀺. 𑀬𑁂 𑀢𑁂 𑀧𑀜𑁆𑀳𑀯𑀻𑀫𑀁𑀲𑀓𑀸 𑀧𑀭𑀺𑀲𑀸 𑀧𑀸𑀭𑀺𑀲𑀚𑁆𑀚𑀸 𑀧𑀸𑀲𑀸𑀭𑀺𑀓𑀸, 𑀢𑁂 𑀅𑀧𑀳𑀭𑀦𑁆𑀢𑀺. ‘‘𑀅𑀢𑁆𑀣𑀸𑀧𑀕𑀢𑀁 𑀪𑀡𑀺𑀢’’𑀦𑁆𑀢𑀺 𑀅𑀢𑁆𑀣𑀢𑁄 𑀅𑀧𑀳𑀭𑀦𑁆𑀢𑀺, ‘‘𑀩𑁆𑀬𑀜𑁆𑀚𑀦𑀸𑀧𑀕𑀢𑀁 𑀪𑀡𑀺𑀢’’𑀦𑁆𑀢𑀺 𑀩𑁆𑀬𑀜𑁆𑀚𑀦𑀢𑁄 𑀅𑀧𑀳𑀭𑀦𑁆𑀢𑀺, ‘‘𑀅𑀢𑁆𑀣𑀩𑁆𑀬𑀜𑁆𑀚𑀦𑀸𑀧𑀕𑀢𑀁 𑀪𑀡𑀺𑀢’’𑀦𑁆𑀢𑀺 𑀅𑀢𑁆𑀣𑀩𑁆𑀬𑀜𑁆𑀚𑀦𑀢𑁄 𑀅𑀧𑀳𑀭𑀦𑁆𑀢𑀺, ‘‘𑀅𑀢𑁆𑀣𑁄 𑀢𑁂 𑀤𑀼𑀦𑁆𑀦𑀻𑀢𑁄, 𑀩𑁆𑀬𑀜𑁆𑀚𑀦𑀁 𑀢𑁂 𑀤𑀼𑀭𑁄𑀧𑀺𑀢𑀁, 𑀅𑀢𑁆𑀣𑀩𑁆𑀬𑀜𑁆𑀚𑀦𑀁 𑀢𑁂 𑀤𑀼𑀦𑁆𑀦𑀻𑀢𑀁 𑀤𑀼𑀭𑁄𑀧𑀺𑀢𑀁, 𑀦𑀺𑀕𑁆𑀕𑀳𑁄 𑀢𑁂 𑀅𑀓𑀢𑁄, 𑀧𑀝𑀺𑀓𑀫𑁆𑀫𑀁 𑀢𑁂 𑀤𑀼𑀓𑁆𑀓𑀝𑀁, 𑀯𑀺𑀲𑁂𑀲𑁄 𑀢𑁂 𑀅𑀓𑀢𑁄, 𑀧𑀝𑀺𑀯𑀺𑀲𑁂𑀲𑁄 𑀢𑁂 𑀤𑀼𑀓𑁆𑀓𑀝𑁄, 𑀆𑀯𑁂𑀞𑀺𑀬𑀸 𑀢𑁂 𑀅𑀓𑀢𑀸, 𑀦𑀺𑀩𑁆𑀩𑁂𑀞𑀺𑀬𑀸 𑀢𑁂 𑀤𑀼𑀓𑁆𑀓𑀝𑀸, 𑀙𑁂𑀤𑁄 𑀢𑁂 𑀅𑀓𑀢𑁄, 𑀫𑀡𑁆𑀟𑀮𑀁 𑀢𑁂 𑀤𑀼𑀓𑁆𑀓𑀝𑀁 𑀯𑀺𑀲𑀫𑀓𑀣𑀁 𑀤𑀼𑀓𑁆𑀓𑀣𑀺𑀢𑀁 𑀤𑀼𑀩𑁆𑀪𑀡𑀺𑀢𑀁 𑀤𑀼𑀮𑁆𑀮𑀧𑀺𑀢𑀁 𑀤𑀼𑀭𑀼𑀢𑁆𑀢𑀁 𑀤𑀼𑀩𑁆𑀪𑀸𑀲𑀺𑀢’’𑀦𑁆𑀢𑀺, 𑀅𑀧𑀳𑀭𑀦𑁆𑀢𑀻𑀢𑀺 𑁋 𑀅𑀧𑀸𑀳𑀢𑀁 𑀧𑀜𑁆𑀳𑀯𑀺𑀫𑀁𑀲𑀓𑀸𑀲𑁂.

𑀧𑀭𑀺𑀤𑁂𑀯𑀢𑀺 𑀲𑁄𑀘𑀢𑀺 𑀳𑀻𑀦𑀯𑀸𑀤𑁄𑀢𑀺. 𑀧𑀭𑀺𑀤𑁂𑀯𑀢𑀻𑀢𑀺 ‘‘𑀅𑀜𑁆𑀜𑀁 𑀫𑀬𑀸 𑀆𑀯𑀚𑁆𑀚𑀺𑀢𑀁 𑀅𑀜𑁆𑀜𑀁 𑀘𑀺𑀦𑁆𑀢𑀺𑀢𑀁 𑀅𑀜𑁆𑀜𑀁 𑀉𑀧𑀥𑀸𑀭𑀺𑀢𑀁, 𑀅𑀜𑁆𑀜𑀁 𑀉𑀧𑀮𑀓𑁆𑀔𑀺𑀢𑀁 𑀲𑁄 𑀫𑀳𑀸𑀧𑀓𑁆𑀔𑁄 𑀫𑀳𑀸𑀧𑀭𑀺𑀲𑁄 𑀫𑀳𑀸𑀧𑀭𑀺𑀯𑀸𑀭𑁄; 𑀧𑀭𑀺𑀲𑀸 𑀘𑀸𑀬𑀁 𑀯𑀕𑁆𑀕𑀸, 𑀦 𑀲𑀫𑀕𑁆𑀕𑀸; 𑀲𑀫𑀕𑁆𑀕𑀸𑀬 𑀧𑀭𑀺𑀲𑀸𑀬 𑀳𑁂𑀢𑀼 𑀓𑀣𑀸𑀲𑀮𑁆𑀮𑀸𑀧𑁄 𑀧𑀼𑀦 𑀪𑀜𑁆𑀚𑀺𑀲𑁆𑀲𑀸𑀫𑀻’’𑀢𑀺, 𑀬𑀸 𑀏𑀯𑀭𑀽𑀧𑀸 [𑀬𑁄 𑀏𑀯𑀭𑀽𑀧𑁄 (𑀲𑁆𑀬𑀸.)] 𑀯𑀸𑀘𑀸 𑀧𑀮𑀸𑀧𑁄 𑀯𑀺𑀧𑁆𑀧𑀮𑀸𑀧𑁄 𑀮𑀸𑀮𑀧𑁆𑀧𑁄 𑀮𑀸𑀮𑀧𑁆𑀧𑀸𑀬𑀦𑀸 𑀮𑀸𑀮𑀧𑁆𑀧𑀸𑀬𑀺𑀢𑀢𑁆𑀢𑀦𑁆𑀢𑀺 𑁋 𑀧𑀭𑀺𑀤𑁂𑀯𑀢𑀺. 𑀲𑁄𑀘𑀢𑀻𑀢𑀺 ‘‘𑀢𑀲𑁆𑀲 𑀚𑀬𑁄’’𑀢𑀺 𑀲𑁄𑀘𑀢𑀺 ‘‘𑀫𑀬𑁆𑀳𑀁 𑀧𑀭𑀸𑀚𑀬𑁄’’𑀢𑀺 𑀲𑁄𑀘𑀢𑀺, ‘‘𑀢𑀲𑁆𑀲 𑀮𑀸𑀪𑁄’’𑀢𑀺 𑀲𑁄𑀘𑀢𑀺, ‘‘𑀫𑀬𑁆𑀳𑀁 𑀅𑀮𑀸𑀪𑁄’’𑀢𑀺 𑀲𑁄𑀘𑀢𑀺, ‘‘𑀢𑀲𑁆𑀲 𑀬𑀲𑁄’’𑀢𑀺 𑀲𑁄𑀘𑀢𑀺, ‘‘𑀫𑀬𑁆𑀳𑀁 𑀅𑀬𑀲𑁄’’𑀢𑀺 𑀲𑁄𑀘𑀢𑀺, ‘‘𑀢𑀲𑁆𑀲 𑀧𑀲𑀁𑀲𑀸’’𑀢𑀺 𑀲𑁄𑀘𑀢𑀺, ‘‘𑀫𑀬𑁆𑀳𑀁 𑀦𑀺𑀦𑁆𑀤𑀸’’𑀢𑀺 𑀲𑁄𑀘𑀢𑀺, ‘‘𑀢𑀲𑁆𑀲 𑀲𑀼𑀔’’𑀦𑁆𑀢𑀺 𑀲𑁄𑀘𑀢𑀺, ‘‘𑀫𑀬𑁆𑀳𑀁 𑀤𑀼𑀓𑁆𑀔’’𑀦𑁆𑀢𑀺 𑀲𑁄𑀘𑀢𑀺, ‘‘𑀲𑁄 𑀲𑀓𑁆𑀓𑀢𑁄 𑀕𑀭𑀼𑀓𑀢𑁄 𑀫𑀸𑀦𑀺𑀢𑁄 𑀧𑀽𑀚𑀺𑀢𑁄 𑀅𑀧𑀘𑀺𑀢𑁄 𑀮𑀸𑀪𑀻 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦𑀁, 𑀅𑀳𑀫𑀲𑁆𑀫𑀺 𑀅𑀲𑀓𑁆𑀓𑀢𑁄 𑀅𑀕𑀭𑀼𑀓𑀢𑁄 𑀅𑀫𑀸𑀦𑀺𑀢𑁄 𑀅𑀧𑀽𑀚𑀺𑀢𑁄 𑀅𑀦𑀧𑀘𑀺𑀢𑁄 𑀦 𑀮𑀸𑀪𑀻 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦’’𑀦𑁆𑀢𑀺 𑀲𑁄𑀘𑀢𑀺 𑀓𑀺𑀮𑀫𑀢𑀺 𑀧𑀭𑀺𑀤𑁂𑀯𑀢𑀺 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑀢𑀺 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀢𑀻𑀢𑀺 𑁋 𑀧𑀭𑀺𑀤𑁂𑀯𑀢𑀺 𑀲𑁄𑀘𑀢𑀺. 𑀳𑀻𑀦𑀯𑀸𑀤𑁄𑀢𑀺 𑀳𑀻𑀦𑀯𑀸𑀤𑁄 𑀦𑀺𑀳𑀻𑀦𑀯𑀸𑀤𑁄 𑀧𑀭𑀺𑀳𑀻𑀦𑀯𑀸𑀤𑁄 𑀧𑀭𑀺𑀳𑀸𑀧𑀺𑀢𑀯𑀸𑀤𑁄 𑀦 𑀧𑀭𑀺𑀧𑀽𑀭𑀯𑀸𑀤𑁄𑀢𑀺 𑁋 𑀧𑀭𑀺𑀤𑁂𑀯𑀢𑀺 𑀲𑁄𑀘𑀢𑀺 𑀳𑀻𑀦𑀯𑀸𑀤𑁄.

𑀉𑀧𑀘𑁆𑀘𑀕𑀸 𑀫𑀦𑁆𑀢𑀺 𑀅𑀦𑀼𑀢𑁆𑀣𑀼𑀦𑀸𑀢𑀻𑀢𑀺. 𑀲𑁄 𑀫𑀁 𑀯𑀸𑀤𑁂𑀦 𑀯𑀸𑀤𑀁 𑀅𑀘𑁆𑀘𑀕𑀸 𑀉𑀧𑀘𑁆𑀘𑀕𑀸 𑀅𑀢𑀺𑀓𑁆𑀓𑀦𑁆𑀢𑁄 𑀲𑀫𑀢𑀺𑀓𑁆𑀓𑀦𑁆𑀢𑁄 𑀯𑀻𑀢𑀺𑀯𑀢𑁆𑀢𑁄𑀢𑀺. 𑀏𑀯𑀫𑁆𑀧𑀺 𑀉𑀧𑀘𑁆𑀘𑀕𑀸 𑀫𑀦𑁆𑀢𑀺. 𑀅𑀣 𑀯𑀸 𑀫𑀁 𑀯𑀸𑀤𑁂𑀦 𑀯𑀸𑀤𑀁 𑀅𑀪𑀺𑀪𑀯𑀺𑀢𑁆𑀯𑀸 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀫𑀤𑁆𑀤𑀬𑀺𑀢𑁆𑀯𑀸 𑀘𑀭𑀢𑀺 𑀯𑀺𑀳𑀭𑀢𑀺 𑀇𑀭𑀺𑀬𑀢𑀺 𑀯𑀢𑁆𑀢𑀢𑀺 𑀧𑀸𑀮𑁂𑀢𑀺 𑀬𑀧𑁂𑀢𑀺 𑀬𑀸𑀧𑁂𑀢𑀻𑀢𑀺. 𑀏𑀯𑀫𑁆𑀧𑀺 𑀉𑀧𑀘𑁆𑀘𑀕𑀸 𑀫𑀦𑁆𑀢𑀺. 𑀅𑀦𑀼𑀢𑁆𑀣𑀼𑀦𑀸 𑀯𑀼𑀘𑁆𑀘𑀢𑀺 𑀯𑀸𑀘𑀸 𑀧𑀮𑀸𑀧𑁄 𑀯𑀺𑀧𑁆𑀧𑀮𑀸𑀧𑁄 𑀮𑀸𑀮𑀧𑁆𑀧𑁄 𑀮𑀸𑀮𑀧𑁆𑀧𑀸𑀬𑀦𑀸 𑀮𑀸𑀮𑀧𑁆𑀧𑀸𑀬𑀺𑀢𑀢𑁆𑀢𑀦𑁆𑀢𑀺 𑁋 𑀉𑀧𑀘𑁆𑀘𑀕𑀸 𑀫𑀦𑁆𑀢𑀺 𑀅𑀦𑀼𑀢𑁆𑀣𑀼𑀦𑀸𑀢𑀺.

𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀬𑀫𑀲𑁆𑀲 𑀯𑀸𑀤𑀁 𑀧𑀭𑀺𑀳𑀻𑀦𑀫𑀸𑀳𑀼, 𑀅𑀧𑀸𑀳𑀢𑀁 𑀧𑀜𑁆𑀳𑀯𑀺𑀫𑀁𑀲𑀓𑀸𑀲𑁂;

𑀧𑀭𑀺𑀤𑁂𑀯𑀢𑀺 𑀲𑁄𑀘𑀢𑀺 𑀳𑀻𑀦𑀯𑀸𑀤𑁄, 𑀉𑀧𑀘𑁆𑀘𑀕𑀸 𑀫𑀦𑁆𑀢𑀺 𑀅𑀦𑀼𑀢𑁆𑀣𑀼𑀦𑀸𑀢𑀻’’𑀢𑀺.

𑁬𑁩. 𑀏𑀢𑁂 𑀯𑀺𑀯𑀸𑀤𑀸 𑀲𑀫𑀡𑁂𑀲𑀼 𑀚𑀸𑀢𑀸, 𑀏𑀢𑁂𑀲𑀼 𑀉𑀕𑁆𑀖𑀸𑀢𑀺𑀦𑀺𑀖𑀸𑀢𑀺 𑀳𑁄𑀢𑀺;

𑀏𑀢𑀫𑁆𑀧𑀺 𑀤𑀺𑀲𑁆𑀯𑀸 𑀯𑀺𑀭𑀫𑁂 𑀓𑀣𑁄𑀚𑁆𑀚𑀁, 𑀦 𑀳𑀜𑁆𑀜𑀤𑀢𑁆𑀣𑀢𑁆𑀣𑀺 𑀧𑀲𑀁𑀲𑀮𑀸𑀪𑀸.

𑀏𑀢𑁂 𑀯𑀺𑀯𑀸𑀤𑀸 𑀲𑀫𑀡𑁂𑀲𑀼 𑀚𑀸𑀢𑀸𑀢𑀺. 𑀲𑀫𑀡𑀸𑀢𑀺 𑀬𑁂 𑀓𑁂𑀘𑀺 𑀇𑀢𑁄 𑀩𑀳𑀺𑀤𑁆𑀥𑀸 𑀧𑀭𑀺𑀩𑁆𑀩𑀚𑀽𑀧𑀕𑀢𑀸 𑀧𑀭𑀺𑀩𑁆𑀩𑀚𑀲𑀫𑀸𑀧𑀦𑁆𑀦𑀸. 𑀏𑀢𑁂 𑀤𑀺𑀝𑁆𑀞𑀺𑀓𑀮𑀳𑀸 𑀤𑀺𑀝𑁆𑀞𑀺𑀪𑀡𑁆𑀟𑀦𑀸 𑀤𑀺𑀝𑁆𑀞𑀺𑀯𑀺𑀕𑁆𑀕𑀳𑀸 𑀤𑀺𑀝𑁆𑀞𑀺𑀯𑀺𑀯𑀸𑀤𑀸 𑀤𑀺𑀝𑁆𑀞𑀺𑀫𑁂𑀥𑀕𑀸 𑀲𑀫𑀡𑁂𑀲𑀼 𑀚𑀸𑀢𑀸 𑀲𑀜𑁆𑀚𑀸𑀢𑀸 𑀦𑀺𑀩𑁆𑀩𑀢𑁆𑀢𑀸 𑀅𑀪𑀺𑀦𑀺𑀩𑁆𑀩𑀢𑁆𑀢𑀸 𑀧𑀸𑀢𑀼𑀪𑀽𑀢𑀸𑀢𑀺 𑁋 𑀏𑀢𑁂 𑀯𑀺𑀯𑀸𑀤𑀸 𑀲𑀫𑀡𑁂𑀲𑀼 𑀚𑀸𑀢𑀸.

𑀏𑀢𑁂𑀲𑀼 𑀉𑀕𑁆𑀖𑀸𑀢𑀺𑀦𑀺𑀖𑀸𑀢𑀺 𑀳𑁄𑀢𑀻𑀢𑀺. 𑀚𑀬𑀧𑀭𑀸𑀚𑀬𑁄 𑀳𑁄𑀢𑀺, 𑀮𑀸𑀪𑀸𑀮𑀸𑀪𑁄 𑀳𑁄𑀢𑀺, 𑀬𑀲𑀸𑀬𑀲𑁄 𑀳𑁄𑀢𑀺, 𑀦𑀺𑀦𑁆𑀤𑀸𑀧𑀲𑀁𑀲𑀸 𑀳𑁄𑀢𑀺, 𑀲𑀼𑀔𑀤𑀼𑀓𑁆𑀔𑀁 𑀳𑁄𑀢𑀺, 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀁 𑀳𑁄𑀢𑀺, 𑀇𑀝𑁆𑀞𑀸𑀦𑀺𑀝𑁆𑀞𑀁 𑀳𑁄𑀢𑀺, 𑀅𑀦𑀼𑀦𑀬𑀧𑀝𑀺𑀖𑀁 𑀳𑁄𑀢𑀺, 𑀉𑀕𑁆𑀖𑀸𑀢𑀺𑀢𑀦𑀺𑀕𑁆𑀖𑀸𑀢𑀺𑀢𑀁 𑀳𑁄𑀢𑀺, 𑀅𑀦𑀼𑀭𑁄𑀥𑀯𑀺𑀭𑁄𑀥𑁄 𑀳𑁄𑀢𑀺, 𑀚𑀬𑁂𑀦 𑀘𑀺𑀢𑁆𑀢𑀁 𑀉𑀕𑁆𑀖𑀸𑀢𑀺𑀢𑀁 𑀳𑁄𑀢𑀺 𑀧𑀭𑀸𑀚𑀬𑁂𑀦 𑀘𑀺𑀢𑁆𑀢𑀁 𑀦𑀺𑀕𑁆𑀖𑀸𑀢𑀺𑀢𑀁 𑀳𑁄𑀢𑀺, 𑀮𑀸𑀪𑁂𑀦 𑀘𑀺𑀢𑁆𑀢𑀁 𑀉𑀕𑁆𑀖𑀸𑀢𑀺𑀢𑀁 𑀳𑁄𑀢𑀺 𑀅𑀮𑀸𑀪𑁂𑀦 𑀘𑀺𑀢𑁆𑀢𑀁 𑀦𑀺𑀕𑁆𑀖𑀸𑀢𑀺𑀢𑀁 𑀳𑁄𑀢𑀺, 𑀬𑀲𑁂𑀦 𑀘𑀺𑀢𑁆𑀢𑀁 𑀉𑀕𑁆𑀖𑀸𑀢𑀺𑀢𑀁 𑀳𑁄𑀢𑀺 𑀅𑀬𑀲𑁂𑀦 𑀘𑀺𑀢𑁆𑀢𑀁 𑀦𑀺𑀕𑁆𑀖𑀸𑀢𑀺𑀢𑀁 𑀳𑁄𑀢𑀺, 𑀧𑀲𑀁𑀲𑀸𑀬 𑀘𑀺𑀢𑁆𑀢𑀁 𑀉𑀕𑁆𑀖𑀸𑀢𑀺𑀢𑀁 𑀳𑁄𑀢𑀺 𑀦𑀺𑀦𑁆𑀤𑀸𑀬 𑀘𑀺𑀢𑁆𑀢𑀁 𑀦𑀺𑀕𑁆𑀖𑀸𑀢𑀺𑀢𑀁 𑀳𑁄𑀢𑀺, 𑀲𑀼𑀔𑁂𑀦 𑀘𑀺𑀢𑁆𑀢𑀁 𑀉𑀕𑁆𑀖𑀸𑀢𑀺𑀢𑀁 𑀳𑁄𑀢𑀺 𑀤𑀼𑀓𑁆𑀔𑁂𑀦 𑀘𑀺𑀢𑁆𑀢𑀁 𑀦𑀺𑀕𑁆𑀖𑀸𑀢𑀺𑀢𑀁 𑀳𑁄𑀢𑀺, 𑀲𑁄𑀫𑀦𑀲𑁆𑀲𑁂𑀦 𑀘𑀺𑀢𑁆𑀢𑀁 𑀉𑀕𑁆𑀖𑀸𑀢𑀺𑀢𑀁 𑀳𑁄𑀢𑀺 𑀤𑁄𑀫𑀦𑀲𑁆𑀲𑁂𑀦 𑀘𑀺𑀢𑁆𑀢𑀁 𑀦𑀺𑀕𑁆𑀖𑀸𑀢𑀺𑀢𑀁 𑀳𑁄𑀢𑀺, 𑀉𑀦𑁆𑀦𑀢𑀺𑀬𑀸 [𑀉𑀡𑁆𑀡𑀢𑀺𑀬𑀸 (𑀲𑁆𑀬𑀸. 𑀓.)] 𑀘𑀺𑀢𑁆𑀢𑀁 𑀉𑀕𑁆𑀖𑀸𑀢𑀺𑀢𑀁 𑀳𑁄𑀢𑀺 𑀑𑀦𑀢𑀺𑀬𑀸 [𑀑𑀡𑀢𑀺𑀬𑀸 (𑀲𑁆𑀬𑀸. 𑀓.)] 𑀘𑀺𑀢𑁆𑀢𑀁 𑀦𑀺𑀕𑁆𑀖𑀸𑀢𑀺𑀢𑀁 𑀳𑁄𑀢𑀻𑀢𑀺 𑁋 𑀏𑀢𑁂𑀲𑀼 𑀉𑀕𑁆𑀖𑀸𑀢𑀺𑀦𑀺𑀖𑀸𑀢𑀺 𑀳𑁄𑀢𑀺.

𑀏𑀢𑀫𑁆𑀧𑀺 𑀤𑀺𑀲𑁆𑀯𑀸 𑀯𑀺𑀭𑀫𑁂 𑀓𑀣𑁄𑀚𑁆𑀚𑀦𑁆𑀢𑀺. 𑀏𑀢𑀫𑁆𑀧𑀺 𑀤𑀺𑀲𑁆𑀯𑀸𑀢𑀺 𑀏𑀢𑀁 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀧𑀲𑁆𑀲𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸 𑀤𑀺𑀝𑁆𑀞𑀺𑀓𑀮𑀳𑁂𑀲𑀼 𑀤𑀺𑀝𑁆𑀞𑀺𑀪𑀡𑁆𑀟𑀦𑁂𑀲𑀼 𑀤𑀺𑀝𑁆𑀞𑀺𑀯𑀺𑀕𑁆𑀕𑀳𑁂𑀲𑀼 𑀤𑀺𑀝𑁆𑀞𑀺𑀯𑀺𑀯𑀸𑀤𑁂𑀲𑀼 𑀤𑀺𑀝𑁆𑀞𑀺𑀫𑁂𑀥𑀕𑁂𑀲𑀽𑀢𑀺 𑁋 𑀏𑀢𑀫𑁆𑀧𑀺 𑀤𑀺𑀲𑁆𑀯𑀸 𑀯𑀺𑀭𑀫𑁂 𑀓𑀣𑁄𑀚𑁆𑀚𑀦𑁆𑀢𑀺. 𑀓𑀣𑁄𑀚𑁆𑀚𑀁 𑀯𑀼𑀘𑁆𑀘𑀢𑀺 𑀓𑀮𑀳𑁄 𑀪𑀡𑁆𑀟𑀦𑀁 𑀯𑀺𑀕𑁆𑀕𑀳𑁄 𑀯𑀺𑀯𑀸𑀤𑁄 𑀫𑁂𑀥𑀕𑀁. 𑀅𑀣 𑀯𑀸 𑀓𑀣𑁄𑀚𑁆𑀚𑀦𑁆𑀢𑀺 𑀅𑀦𑁄𑀚𑀯𑀦𑁆𑀢𑀻 𑀦𑀺𑀲𑀸𑀓𑀣𑀸 𑀓𑀣𑁄𑀚𑁆𑀚𑀁 𑀦 𑀓𑀭𑁂𑀬𑁆𑀬, 𑀓𑀮𑀳𑀁 𑀦 𑀓𑀭𑁂𑀬𑁆𑀬, 𑀪𑀡𑁆𑀟𑀦𑀁 𑀦 𑀓𑀭𑁂𑀬𑁆𑀬, 𑀯𑀺𑀕𑁆𑀕𑀳𑀁 𑀦 𑀓𑀭𑁂𑀬𑁆𑀬, 𑀯𑀺𑀯𑀸𑀤𑀁 𑀦 𑀓𑀭𑁂𑀬𑁆𑀬, 𑀫𑁂𑀥𑀕𑀁 𑀦 𑀓𑀭𑁂𑀬𑁆𑀬, 𑀓𑀮𑀳𑀪𑀡𑁆𑀟𑀦𑀯𑀺𑀕𑁆𑀕𑀳𑀯𑀺𑀯𑀸𑀤𑀫𑁂𑀥𑀕𑀁 𑀧𑀚𑀳𑁂𑀬𑁆𑀬 𑀯𑀺𑀦𑁄𑀤𑁂𑀬𑁆𑀬 𑀩𑁆𑀬𑀦𑁆𑀢𑀺𑀁 𑀓𑀭𑁂𑀬𑁆𑀬 𑀅𑀦𑀪𑀸𑀯𑀁 𑀕𑀫𑁂𑀬𑁆𑀬, 𑀓𑀮𑀳𑀪𑀡𑁆𑀟𑀦𑀯𑀺𑀕𑁆𑀕𑀳𑀯𑀺𑀯𑀸𑀤𑀫𑁂𑀥𑀕𑀸 𑀆𑀭𑀢𑁄 𑀅𑀲𑁆𑀲 𑀯𑀺𑀭𑀢𑁄 𑀧𑀝𑀺𑀯𑀺𑀭𑀢𑁄 𑀦𑀺𑀓𑁆𑀔𑀦𑁆𑀢𑁄 𑀦𑀺𑀲𑁆𑀲𑀝𑁄 𑀯𑀺𑀧𑁆𑀧𑀬𑀼𑀢𑁆𑀢𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑁂𑀬𑁆𑀬𑀸𑀢𑀺 𑁋 𑀏𑀢𑀫𑁆𑀧𑀺 𑀤𑀺𑀲𑁆𑀯𑀸 𑀯𑀺𑀭𑀫𑁂 𑀓𑀣𑁄𑀚𑁆𑀚𑀁.

𑀦 𑀳𑀜𑁆𑀜𑀤𑀢𑁆𑀣𑀢𑁆𑀣𑀺 𑀧𑀲𑀁𑀲𑀮𑀸𑀪𑀸𑀢𑀺. 𑀧𑀲𑀁𑀲𑀮𑀸𑀪𑀸 𑀅𑀜𑁆𑀜𑁄 𑀅𑀢𑁆𑀣𑁄 𑀦𑀢𑁆𑀣𑀺 𑀅𑀢𑁆𑀢𑀢𑁆𑀣𑁄 𑀯𑀸 𑀧𑀭𑀢𑁆𑀣𑁄 𑀯𑀸 𑀉𑀪𑀬𑀢𑁆𑀣𑁄 𑀯𑀸 𑀤𑀺𑀝𑁆𑀞𑀥𑀫𑁆𑀫𑀺𑀓𑁄 𑀯𑀸 𑀅𑀢𑁆𑀣𑁄, 𑀲𑀫𑁆𑀧𑀭𑀸𑀬𑀺𑀓𑁄 𑀯𑀸 𑀅𑀢𑁆𑀣𑁄, 𑀉𑀢𑁆𑀢𑀸𑀦𑁄 𑀯𑀸 𑀅𑀢𑁆𑀣𑁄, 𑀕𑀫𑁆𑀪𑀻𑀭𑁄 𑀯𑀸 𑀅𑀢𑁆𑀣𑁄, 𑀕𑀽𑀴𑁆𑀳𑁄 𑀯𑀸 𑀅𑀢𑁆𑀣𑁄, 𑀧𑀝𑀺𑀘𑁆𑀙𑀦𑁆𑀦𑁄 𑀯𑀸 𑀅𑀢𑁆𑀣𑁄, 𑀦𑁂𑀬𑁆𑀬𑁄 𑀯𑀸 𑀅𑀢𑁆𑀣𑁄, 𑀦𑀻𑀢𑁄 𑀯𑀸 𑀅𑀢𑁆𑀣𑁄, 𑀅𑀦𑀯𑀚𑁆𑀚𑁄 𑀯𑀸 𑀅𑀢𑁆𑀣𑁄, 𑀦𑀺𑀓𑁆𑀓𑀺𑀮𑁂𑀲𑁄 𑀯𑀸 𑀅𑀢𑁆𑀣𑁄, 𑀯𑁄𑀤𑀸𑀦𑁄 𑀯𑀸 𑀅𑀢𑁆𑀣𑁄, 𑀧𑀭𑀫𑀢𑁆𑀣𑁄 𑀯𑀸 𑀅𑀢𑁆𑀣𑁄 𑀦𑀢𑁆𑀣𑀺 𑀦 𑀲𑀦𑁆𑀢𑀺 𑀦 𑀲𑀁𑀯𑀺𑀚𑁆𑀚𑀦𑁆𑀢𑀺 𑀦𑀼𑀧𑀮𑀩𑁆𑀪𑀦𑁆𑀢𑀻𑀢𑀺 𑁋 𑀦 𑀳𑀜𑁆𑀜𑀤𑀢𑁆𑀣𑀢𑁆𑀣𑀺 𑀧𑀲𑀁𑀲𑀮𑀸𑀪𑀸.

𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀏𑀢𑁂 𑀯𑀺𑀯𑀸𑀤𑀸 𑀲𑀫𑀡𑁂𑀲𑀼 𑀚𑀸𑀢𑀸, 𑀏𑀢𑁂𑀲𑀼 𑀉𑀕𑁆𑀖𑀸𑀢𑀺𑀦𑀺𑀖𑀸𑀢𑀺 𑀳𑁄𑀢𑀺;

𑀏𑀢𑀫𑁆𑀧𑀺 𑀤𑀺𑀲𑁆𑀯𑀸 𑀯𑀺𑀭𑀫𑁂 𑀓𑀣𑁄𑀚𑁆𑀚𑀁, 𑀦 𑀳𑀜𑁆𑀜𑀤𑀢𑁆𑀣𑀢𑁆𑀣𑀺 𑀧𑀲𑀁𑀲𑀮𑀸𑀪𑀸’’𑀢𑀺.

𑁬𑁪. 𑀧𑀲𑀁𑀲𑀺𑀢𑁄 𑀯𑀸 𑀧𑀦 𑀢𑀢𑁆𑀣 𑀳𑁄𑀢𑀺, 𑀅𑀓𑁆𑀔𑀸𑀬 𑀯𑀸𑀤𑀁 𑀧𑀭𑀺𑀲𑀸𑀬 𑀫𑀚𑁆𑀛𑁂;

𑀲𑁄 [𑀲𑁄 𑀢𑀁 (𑀲𑀻.)] 𑀳𑀲𑁆𑀲𑀢𑀻 𑀉𑀦𑁆𑀦𑀫𑀢𑀻 [𑀉𑀡𑁆𑀡𑀫𑀢𑀻 (𑀲𑁆𑀬𑀸. 𑀓.)] 𑀘 𑀢𑁂𑀦, 𑀧𑀧𑁆𑀧𑀼𑀬𑁆𑀬 𑀢𑀫𑀢𑁆𑀣𑀁 𑀬𑀣𑀸 𑀫𑀦𑁄 𑀅𑀳𑀼.

𑀧𑀲𑀁𑀲𑀺𑀢𑁄 𑀯𑀸 𑀧𑀦 𑀢𑀢𑁆𑀣 𑀳𑁄𑀢𑀻𑀢𑀺. 𑀢𑀢𑁆𑀣𑀸𑀢𑀺 𑀲𑀓𑀸𑀬 𑀤𑀺𑀝𑁆𑀞𑀺𑀬𑀸 𑀲𑀓𑀸𑀬 𑀔𑀦𑁆𑀢𑀺𑀬𑀸 𑀲𑀓𑀸𑀬 𑀭𑀼𑀘𑀺𑀬𑀸 𑀲𑀓𑀸𑀬 𑀮𑀤𑁆𑀥𑀺𑀬𑀸 𑀧𑀲𑀁𑀲𑀺𑀢𑁄 𑀣𑁄𑀫𑀺𑀢𑁄 𑀓𑀺𑀢𑁆𑀢𑀺𑀢𑁄 𑀯𑀡𑁆𑀡𑀺𑀢𑁄 𑀳𑁄𑀢𑀻𑀢𑀺 𑁋 𑀧𑀲𑀁𑀲𑀺𑀢𑁄 𑀯𑀸 𑀧𑀦 𑀢𑀢𑁆𑀣 𑀳𑁄𑀢𑀺.

𑀅𑀓𑁆𑀔𑀸𑀬 𑀯𑀸𑀤𑀁 𑀧𑀭𑀺𑀲𑀸𑀬 𑀫𑀚𑁆𑀛𑁂𑀢𑀺. 𑀔𑀢𑁆𑀢𑀺𑀬𑀧𑀭𑀺𑀲𑀸𑀬 𑀯𑀸 𑀩𑁆𑀭𑀸𑀳𑁆𑀫𑀡𑀧𑀭𑀺𑀲𑀸𑀬 𑀯𑀸 𑀕𑀳𑀧𑀢𑀺𑀧𑀭𑀺𑀲𑀸𑀬 𑀯𑀸 𑀲𑀫𑀡𑀧𑀭𑀺𑀲𑀸𑀬 𑀯𑀸 𑀫𑀚𑁆𑀛𑁂 𑀅𑀢𑁆𑀢𑀦𑁄 𑀯𑀸𑀤𑀁 𑀅𑀓𑁆𑀔𑀸𑀬 𑀆𑀘𑀺𑀓𑁆𑀔𑀺𑀢𑁆𑀯𑀸 𑀅𑀦𑀼𑀯𑀸𑀤𑀁 𑀅𑀓𑁆𑀔𑀸𑀬 𑀆𑀘𑀺𑀓𑁆𑀔𑀺𑀢𑁆𑀯𑀸 𑀣𑀫𑁆𑀪𑀬𑀺𑀢𑁆𑀯𑀸 𑀩𑁆𑀭𑀽𑀳𑀬𑀺𑀢𑁆𑀯𑀸 𑀤𑀻𑀧𑀬𑀺𑀢𑁆𑀯𑀸 𑀚𑁄𑀢𑀬𑀺𑀢𑁆𑀯𑀸 𑀯𑁄𑀳𑀭𑀺𑀢𑁆𑀯𑀸 𑀧𑀭𑀺𑀕𑁆𑀕𑀡𑁆𑀳𑀺𑀢𑁆𑀯𑀸𑀢𑀺 𑁋 𑀅𑀓𑁆𑀔𑀸𑀬 𑀯𑀸𑀤𑀁 𑀧𑀭𑀺𑀲𑀸𑀬 𑀫𑀚𑁆𑀛𑁂.

𑀲𑁄 𑀳𑀲𑁆𑀲𑀢𑀻 𑀉𑀦𑁆𑀦𑀫𑀢𑀻 𑀘 𑀢𑁂𑀦𑀸𑀢𑀺. 𑀲𑁄 𑀢𑁂𑀦 𑀚𑀬𑀢𑁆𑀣𑁂𑀦 𑀢𑀼𑀝𑁆𑀞𑁄 𑀳𑁄𑀢𑀺 𑀳𑀝𑁆𑀞𑁄 𑀧𑀳𑀝𑁆𑀞𑁄 𑀅𑀢𑁆𑀢𑀫𑀦𑁄 𑀧𑀭𑀺𑀧𑀼𑀡𑁆𑀡𑀲𑀗𑁆𑀓𑀧𑁆𑀧𑁄. 𑀅𑀣 𑀯𑀸 𑀤𑀦𑁆𑀢𑀯𑀺𑀤𑀁𑀲𑀓𑀁 𑀳𑀲𑀫𑀸𑀦𑁄. 𑀲𑁄 𑀳𑀲𑁆𑀲𑀢𑀻 𑀉𑀦𑁆𑀦𑀫𑀢𑀻 𑀘 𑀢𑁂𑀦𑀸𑀢𑀺 𑀲𑁄 𑀢𑁂𑀦 𑀚𑀬𑀢𑁆𑀣𑁂𑀦 𑀉𑀦𑁆𑀦𑀢𑁄 𑀳𑁄𑀢𑀺 𑀉𑀦𑁆𑀦𑀫𑁄 𑀥𑀚𑁄 𑀲𑀫𑁆𑀧𑀕𑁆𑀕𑀸𑀳𑁄 𑀓𑁂𑀢𑀼𑀓𑀫𑁆𑀬𑀢𑀸 𑀘𑀺𑀢𑁆𑀢𑀲𑁆𑀲𑀸𑀢𑀺 𑁋 𑀲𑁄 𑀳𑀲𑁆𑀲𑀢𑀻 𑀉𑀦𑁆𑀦𑀫𑀢𑀻 𑀘 𑀢𑁂𑀦.

𑀧𑀧𑁆𑀧𑀼𑀬𑁆𑀬 𑀢𑀫𑀢𑁆𑀣𑀁 𑀬𑀣𑀸 𑀫𑀦𑁄 𑀅𑀳𑀽𑀢𑀺. 𑀢𑀁 𑀚𑀬𑀢𑁆𑀣𑀁 𑀧𑀧𑁆𑀧𑀼𑀬𑁆𑀬 𑀧𑀸𑀧𑀼𑀡𑀺𑀢𑁆𑀯𑀸 𑀅𑀥𑀺𑀕𑀦𑁆𑀢𑁆𑀯𑀸 𑀯𑀺𑀦𑁆𑀤𑀺𑀢𑁆𑀯𑀸 𑀧𑀝𑀺𑀮𑀪𑀺𑀢𑁆𑀯𑀸. 𑀬𑀣𑀸 𑀫𑀦𑁄 𑀅𑀳𑀽𑀢𑀺 𑀬𑀣𑀸 𑀫𑀦𑁄 𑀅𑀳𑀼, 𑀬𑀣𑀸 𑀘𑀺𑀢𑁆𑀢𑁄 𑀅𑀳𑀼, 𑀬𑀣𑀸 𑀲𑀗𑁆𑀓𑀧𑁆𑀧𑁄 𑀅𑀳𑀼, 𑀬𑀣𑀸 𑀯𑀺𑀜𑁆𑀜𑀸𑀡𑁄 𑀅𑀳𑀽𑀢𑀺 𑁋 𑀧𑀧𑁆𑀧𑀼𑀬𑁆𑀬 𑀢𑀫𑀢𑁆𑀣𑀁 𑀬𑀣𑀸 𑀫𑀦𑁄 𑀅𑀳𑀼.

𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀧𑀲𑀁𑀲𑀺𑀢𑁄 𑀯𑀸 𑀧𑀦 𑀢𑀢𑁆𑀣 𑀳𑁄𑀢𑀺, 𑀅𑀓𑁆𑀔𑀸𑀬 𑀯𑀸𑀤𑀁 𑀧𑀭𑀺𑀲𑀸𑀬 𑀫𑀚𑁆𑀛𑁂;

𑀲𑁄 𑀳𑀲𑁆𑀲𑀢𑀻 𑀉𑀦𑁆𑀦𑀫𑀢𑀻 𑀘 𑀢𑁂𑀦, 𑀧𑀧𑁆𑀧𑀼𑀬𑁆𑀬 𑀢𑀫𑀢𑁆𑀣𑀁 𑀬𑀣𑀸 𑀫𑀦𑁄 𑀅𑀳𑀽’’𑀢𑀺.

𑁬𑁫. 𑀬𑀸 𑀉𑀦𑁆𑀦𑀢𑀻 𑀲𑀸𑀲𑁆𑀲 𑀯𑀺𑀖𑀸𑀢𑀪𑀽𑀫𑀺, 𑀫𑀸𑀦𑀸𑀢𑀺𑀫𑀸𑀦𑀁 𑀯𑀤𑀢𑁂 𑀧𑀦𑁂𑀲𑁄;

𑀏𑀢𑀫𑁆𑀧𑀺 𑀤𑀺𑀲𑁆𑀯𑀸 𑀦 𑀯𑀺𑀯𑀸𑀤𑀬𑁂𑀣, 𑀦 𑀳𑀺 𑀢𑁂𑀦 𑀲𑀼𑀤𑁆𑀥𑀺𑀁 𑀓𑀼𑀲𑀮𑀸 𑀯𑀤𑀦𑁆𑀢𑀺.

𑀬𑀸 𑀉𑀦𑁆𑀦𑀢𑀻 𑀲𑀸𑀲𑁆𑀲 𑀯𑀺𑀖𑀸𑀢𑀪𑀽𑀫𑀻𑀢𑀺. 𑀬𑀸 𑀉𑀦𑁆𑀦𑀢𑀺 𑀉𑀦𑁆𑀦𑀫𑁄 𑀥𑀚𑁄 𑀲𑀫𑁆𑀧𑀕𑁆𑀕𑀸𑀳𑁄 𑀓𑁂𑀢𑀼𑀓𑀫𑁆𑀬𑀢𑀸 𑀘𑀺𑀢𑁆𑀢𑀲𑁆𑀲𑀸𑀢𑀺 𑁋 𑀬𑀸 𑀉𑀦𑁆𑀦𑀢𑀺. 𑀲𑀸𑀲𑁆𑀲 𑀯𑀺𑀖𑀸𑀢𑀪𑀽𑀫𑀻𑀢𑀺 𑀲𑀸 𑀢𑀲𑁆𑀲 𑀯𑀺𑀖𑀸𑀢𑀪𑀽𑀫𑀺 𑀉𑀧𑀖𑀸𑀢𑀪𑀽𑀫𑀺 𑀧𑀻𑀴𑀦𑀪𑀽𑀫𑀺 𑀖𑀝𑁆𑀝𑀦𑀪𑀽𑀫𑀺 𑀉𑀧𑀤𑁆𑀤𑀯𑀪𑀽𑀫𑀺 𑀉𑀧𑀲𑀕𑁆𑀕𑀪𑀽𑀫𑀻𑀢𑀺 𑁋 𑀬𑀸 𑀉𑀦𑁆𑀦𑀢𑀻 𑀲𑀸𑀲𑁆𑀲 𑀯𑀺𑀖𑀸𑀢𑀪𑀽𑀫𑀺.

𑀫𑀸𑀦𑀸𑀢𑀺𑀫𑀸𑀦𑀁 𑀯𑀤𑀢𑁂 𑀧𑀦𑁂𑀲𑁄𑀢𑀺. 𑀲𑁄 𑀧𑀼𑀕𑁆𑀕𑀮𑁄 𑀫𑀸𑀦𑀜𑁆𑀘 𑀯𑀤𑀢𑀺 𑀅𑀢𑀺𑀫𑀸𑀦𑀜𑁆𑀘 𑀯𑀤𑀢𑀻𑀢𑀺 𑁋 𑀫𑀸𑀦𑀸𑀢𑀺𑀫𑀸𑀦𑀁 𑀯𑀤𑀢𑁂 𑀧𑀦𑁂𑀲𑁄.

𑀏𑀢𑀫𑁆𑀧𑀺 𑀤𑀺𑀲𑁆𑀯𑀸 𑀦 𑀯𑀺𑀯𑀸𑀤𑀬𑁂𑀣𑀸𑀢𑀺. 𑀏𑀢𑀁 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀧𑀲𑁆𑀲𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸 𑀤𑀺𑀝𑁆𑀞𑀺𑀓𑀮𑀳𑁂𑀲𑀼 𑀤𑀺𑀝𑁆𑀞𑀺𑀪𑀡𑁆𑀟𑀦𑁂𑀲𑀼 𑀤𑀺𑀝𑁆𑀞𑀺𑀯𑀺𑀕𑁆𑀕𑀳𑁂𑀲𑀼 𑀤𑀺𑀝𑁆𑀞𑀺𑀯𑀺𑀯𑀸𑀤𑁂𑀲𑀼 𑀤𑀺𑀝𑁆𑀞𑀺𑀫𑁂𑀥𑀕𑁂𑀲𑀽𑀢𑀺 𑁋 𑀏𑀢𑀫𑁆𑀧𑀺 𑀤𑀺𑀲𑁆𑀯𑀸. 𑀦 𑀯𑀺𑀯𑀸𑀤𑀬𑁂𑀣𑀸𑀢𑀺 𑀦 𑀓𑀮𑀳𑀁 𑀓𑀭𑁂𑀬𑁆𑀬 𑀦 𑀪𑀡𑁆𑀟𑀦𑀁 𑀓𑀭𑁂𑀬𑁆𑀬 𑀦 𑀯𑀺𑀕𑁆𑀕𑀳𑀁 𑀓𑀭𑁂𑀬𑁆𑀬 𑀦 𑀯𑀺𑀯𑀸𑀤𑀁 𑀓𑀭𑁂𑀬𑁆𑀬, 𑀦 𑀫𑁂𑀥𑀕𑀁 𑀓𑀭𑁂𑀬𑁆𑀬, 𑀓𑀮𑀳𑀪𑀡𑁆𑀟𑀦𑀯𑀺𑀕𑁆𑀕𑀳𑀯𑀺𑀯𑀸𑀤𑀫𑁂𑀥𑀕𑀁 𑀧𑀚𑀳𑁂𑀬𑁆𑀬 𑀯𑀺𑀦𑁄𑀤𑁂𑀬𑁆𑀬 𑀩𑁆𑀬𑀦𑁆𑀢𑀺𑀁 𑀓𑀭𑁂𑀬𑁆𑀬 𑀅𑀦𑀪𑀸𑀯𑀁 𑀕𑀫𑁂𑀬𑁆𑀬, 𑀓𑀮𑀳𑀪𑀡𑁆𑀟𑀦𑀯𑀺𑀕𑁆𑀕𑀳𑀯𑀺𑀯𑀸𑀤𑀫𑁂𑀥𑀕𑀸 𑀆𑀭𑀢𑁄 𑀅𑀲𑁆𑀲 𑀯𑀺𑀭𑀢𑁄 𑀧𑀝𑀺𑀯𑀺𑀭𑀢𑁄 𑀦𑀺𑀓𑁆𑀔𑀦𑁆𑀢𑁄 𑀦𑀺𑀲𑁆𑀲𑀝𑁄 𑀯𑀺𑀧𑁆𑀧𑀬𑀼𑀢𑁆𑀢𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑁂𑀬𑁆𑀬𑀸𑀢𑀺 𑁋 𑀏𑀢𑀫𑁆𑀧𑀺 𑀤𑀺𑀲𑁆𑀯𑀸 𑀦 𑀯𑀺𑀯𑀸𑀤𑀬𑁂𑀣.

𑀦 𑀳𑀺 𑀢𑁂𑀦 𑀲𑀼𑀤𑁆𑀥𑀺𑀁 𑀓𑀼𑀲𑀮𑀸 𑀯𑀤𑀦𑁆𑀢𑀻𑀢𑀺. 𑀓𑀼𑀲𑀮𑀸𑀢𑀺 𑀬𑁂 𑀢𑁂 𑀔𑀦𑁆𑀥𑀓𑀼𑀲𑀮𑀸 𑀥𑀸𑀢𑀼𑀓𑀼𑀲𑀮𑀸 𑀆𑀬𑀢𑀦𑀓𑀼𑀲𑀮𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀓𑀼𑀲𑀮𑀸 𑀲𑀢𑀺𑀧𑀝𑁆𑀞𑀸𑀦𑀓𑀼𑀲𑀮𑀸 𑀲𑀫𑁆𑀫𑀧𑁆𑀧𑀥𑀸𑀦𑀓𑀼𑀲𑀮𑀸 𑀇𑀤𑁆𑀥𑀺𑀧𑀸𑀤𑀓𑀼𑀲𑀮𑀸 𑀇𑀦𑁆𑀤𑁆𑀭𑀺𑀬𑀓𑀼𑀲𑀮𑀸 𑀩𑀮𑀓𑀼𑀲𑀮𑀸 𑀩𑁄𑀚𑁆𑀛𑀗𑁆𑀕𑀓𑀼𑀲𑀮𑀸 𑀫𑀕𑁆𑀕𑀓𑀼𑀲𑀮𑀸 𑀨𑀮𑀓𑀼𑀲𑀮𑀸 𑀦𑀺𑀩𑁆𑀩𑀸𑀦𑀓𑀼𑀲𑀮𑀸, 𑀢𑁂 𑀓𑀼𑀲𑀮𑀸 𑀤𑀺𑀝𑁆𑀞𑀺𑀓𑀮𑀳𑁂𑀦 𑀤𑀺𑀝𑁆𑀞𑀺𑀪𑀡𑁆𑀟𑀦𑁂𑀦 𑀤𑀺𑀝𑁆𑀞𑀺𑀯𑀺𑀕𑁆𑀕𑀳𑁂𑀦 𑀤𑀺𑀝𑁆𑀞𑀺𑀯𑀺𑀯𑀸𑀤𑁂𑀦 𑀤𑀺𑀝𑁆𑀞𑀺𑀫𑁂𑀥𑀕𑁂𑀦 𑀲𑀼𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀁 𑀧𑀭𑀺𑀲𑀼𑀤𑁆𑀥𑀺𑀁, 𑀫𑀼𑀢𑁆𑀢𑀺𑀁 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀫𑀼𑀢𑁆𑀢𑀺𑀁 𑀦 𑀯𑀤𑀦𑁆𑀢𑀺 𑀦 𑀓𑀣𑁂𑀦𑁆𑀢𑀺 𑀦 𑀪𑀡𑀦𑁆𑀢𑀺 𑀦 𑀤𑀻𑀧𑀬𑀦𑁆𑀢𑀺 𑀦 𑀯𑁄𑀳𑀭𑀦𑁆𑀢𑀻𑀢𑀺 𑁋 𑀦 𑀳𑀺 𑀢𑁂𑀦 𑀲𑀼𑀤𑁆𑀥𑀺𑀁 𑀓𑀼𑀲𑀮𑀸 𑀯𑀤𑀦𑁆𑀢𑀺.

𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀬𑀸 𑀉𑀦𑁆𑀦𑀢𑀻 𑀲𑀸𑀲𑁆𑀲 𑀯𑀺𑀖𑀸𑀢𑀪𑀽𑀫𑀺, 𑀫𑀸𑀦𑀸𑀢𑀺𑀫𑀸𑀦𑀁 𑀯𑀤𑀢𑁂 𑀧𑀦𑁂𑀲𑁄;

𑀏𑀢𑀫𑁆𑀧𑀺 𑀤𑀺𑀲𑁆𑀯𑀸 𑀦 𑀯𑀺𑀯𑀸𑀤𑀬𑁂𑀣, 𑀦 𑀳𑀺 𑀢𑁂𑀦 𑀲𑀼𑀤𑁆𑀥𑀺𑀁 𑀓𑀼𑀲𑀮𑀸 𑀯𑀤𑀦𑁆𑀢𑀻’’𑀢𑀺.

𑁬𑁬. 𑀲𑀽𑀭𑁄 𑀬𑀣𑀸 𑀭𑀸𑀚𑀔𑀸𑀤𑀸𑀬 𑀧𑀼𑀝𑁆𑀞𑁄, 𑀅𑀪𑀺𑀕𑀚𑁆𑀚𑀫𑁂𑀢𑀺 𑀧𑀝𑀺𑀲𑀽𑀭𑀫𑀺𑀘𑁆𑀙𑀁;

𑀬𑁂𑀦𑁂𑀯 𑀲𑁄 𑀢𑁂𑀦 𑀧𑀮𑁂𑀳𑀺 𑀲𑀽𑀭, 𑀧𑀼𑀩𑁆𑀩𑁂𑀯 𑀦𑀢𑁆𑀣𑀺 𑀬𑀤𑀺𑀤𑀁 𑀬𑀼𑀥𑀸𑀬.

𑀲𑀽𑀭𑁄 𑀬𑀣𑀸 𑀭𑀸𑀚𑀔𑀸𑀤𑀸𑀬 𑀧𑀼𑀝𑁆𑀞𑁄𑀢𑀺. 𑀲𑀽𑀭𑁄𑀢𑀺 𑀲𑀽𑀭𑁄 𑀯𑀻𑀭𑁄 𑀯𑀺𑀓𑁆𑀓𑀦𑁆𑀢𑁄 𑀅𑀪𑀻𑀭𑀽 𑀅𑀙𑀫𑁆𑀪𑀻 𑀅𑀦𑀼𑀢𑁆𑀭𑀸𑀲𑀻 𑀅𑀧𑀮𑀸𑀬𑀻. 𑀭𑀸𑀚𑀔𑀸𑀤𑀸𑀬 𑀧𑀼𑀝𑁆𑀞𑁄𑀢𑀺 𑀭𑀸𑀚𑀔𑀸𑀤𑀦𑀻𑀬𑁂𑀦 𑀭𑀸𑀚𑀪𑁄𑀚𑀦𑀻𑀬𑁂𑀦 𑀧𑀼𑀝𑁆𑀞𑁄 𑀧𑁄𑀲𑀺𑀢𑁄 𑀅𑀧𑀸𑀤𑀺𑀢𑁄 𑀯𑀟𑁆𑀠𑀺𑀢𑁄𑀢𑀺 𑁋 𑀲𑀽𑀭𑁄 𑀬𑀣𑀸 𑀭𑀸𑀚𑀔𑀸𑀤𑀸𑀬 𑀧𑀼𑀝𑁆𑀞𑁄.

𑀅𑀪𑀺𑀕𑀚𑁆𑀚𑀫𑁂𑀢𑀺 𑀧𑀝𑀺𑀲𑀽𑀭𑀫𑀺𑀘𑁆𑀙𑀦𑁆𑀢𑀺. 𑀲𑁄 𑀕𑀚𑁆𑀚𑀦𑁆𑀢𑁄 𑀉𑀕𑁆𑀕𑀚𑁆𑀚𑀦𑁆𑀢𑁄 𑀅𑀪𑀺𑀕𑀚𑁆𑀚𑀦𑁆𑀢𑁄 𑀏𑀢𑀺 𑀉𑀧𑁂𑀢𑀺 𑀉𑀧𑀕𑀘𑁆𑀙𑀢𑀺 𑀧𑀝𑀺𑀲𑀽𑀭𑀁 𑀧𑀝𑀺𑀧𑀼𑀭𑀺𑀲𑀁 𑀧𑀝𑀺𑀲𑀢𑁆𑀢𑀼𑀁 𑀧𑀝𑀺𑀫𑀮𑁆𑀮𑀁 𑀇𑀘𑁆𑀙𑀦𑁆𑀢𑁄 𑀲𑀸𑀤𑀺𑀬𑀦𑁆𑀢𑁄 𑀧𑀢𑁆𑀣𑀬𑀦𑁆𑀢𑁄 𑀧𑀺𑀳𑀬𑀦𑁆𑀢𑁄 𑀅𑀪𑀺𑀚𑀧𑁆𑀧𑀦𑁆𑀢𑁄𑀢𑀺 𑁋 𑀅𑀪𑀺𑀕𑀚𑁆𑀚𑀫𑁂𑀢𑀺 𑀧𑀝𑀺𑀲𑀽𑀭𑀫𑀺𑀘𑁆𑀙𑀁.

𑀬𑁂𑀦𑁂𑀯 𑀲𑁄 𑀢𑁂𑀦 𑀧𑀮𑁂𑀳𑀺 𑀲𑀽𑀭𑀸𑀢𑀺. 𑀬𑁂𑀦𑁂𑀯 𑀲𑁄 𑀤𑀺𑀝𑁆𑀞𑀺𑀕𑀢𑀺𑀓𑁄 𑀢𑁂𑀦 𑀧𑀮𑁂𑀳𑀺, 𑀢𑁂𑀦 𑀯𑀚, 𑀢𑁂𑀦 𑀕𑀘𑁆𑀙, 𑀢𑁂𑀦 𑀅𑀢𑀺𑀓𑁆𑀓𑀫, 𑀲𑁄 𑀢𑀼𑀬𑁆𑀳𑀁 𑀧𑀝𑀺𑀲𑀽𑀭𑁄 𑀧𑀝𑀺𑀧𑀼𑀭𑀺𑀲𑁄 𑀧𑀝𑀺𑀲𑀢𑁆𑀢𑀼 𑀧𑀝𑀺𑀫𑀮𑁆𑀮𑁄𑀢𑀺 𑁋 𑀬𑁂𑀦𑁂𑀯 𑀲𑁄 𑀢𑁂𑀦 𑀧𑀮𑁂𑀳𑀺 𑀲𑀽𑀭.

𑀧𑀼𑀩𑁆𑀩𑁂𑀯 𑀦𑀢𑁆𑀣𑀺 𑀬𑀤𑀺𑀤𑀁 𑀬𑀼𑀥𑀸𑀬𑀸𑀢𑀺. 𑀧𑀼𑀩𑁆𑀩𑁂𑀯 𑀩𑁄𑀥𑀺𑀬𑀸 𑀫𑀽𑀮𑁂 𑀬𑁂 𑀧𑀝𑀺𑀲𑁂𑀦𑀺𑀓𑀭𑀸 𑀓𑀺𑀮𑁂𑀲𑀸 𑀧𑀝𑀺𑀮𑁄𑀫𑀓𑀭𑀸 𑀧𑀝𑀺𑀓𑀡𑁆𑀟𑀓𑀓𑀭𑀸 𑀧𑀝𑀺𑀧𑀓𑁆𑀔𑀓𑀭𑀸 𑀢𑁂 𑀦𑀢𑁆𑀣𑀺 𑀦 𑀲𑀦𑁆𑀢𑀺 𑀦 𑀲𑀁𑀯𑀺𑀚𑁆𑀚𑀦𑁆𑀢𑀺 𑀦𑀼𑀧𑀮𑀩𑁆𑀪𑀦𑁆𑀢𑀺, 𑀧𑀳𑀻𑀦𑀸 𑀲𑀫𑀼𑀘𑁆𑀙𑀺𑀦𑁆𑀦𑀸 𑀯𑀽𑀧𑀲𑀦𑁆𑀢𑀸 𑀧𑀝𑀺𑀧𑀲𑁆𑀲𑀤𑁆𑀥𑀸 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸. 𑀬𑀤𑀺𑀤𑀁 𑀬𑀼𑀥𑀸𑀬𑀸𑀢𑀺 𑀬𑀤𑀺𑀤𑀁 𑀬𑀼𑀤𑁆𑀥𑀢𑁆𑀣𑀸𑀬 𑀓𑀮𑀳𑀢𑁆𑀣𑀸𑀬 𑀪𑀡𑁆𑀟𑀦𑀢𑁆𑀣𑀸𑀬 𑀯𑀺𑀕𑁆𑀕𑀳𑀢𑁆𑀣𑀸𑀬 𑀯𑀺𑀯𑀸𑀤𑀢𑁆𑀣𑀸𑀬 𑀫𑁂𑀥𑀕𑀢𑁆𑀣𑀸𑀬𑀸𑀢𑀺 𑁋 𑀧𑀼𑀩𑁆𑀩𑁂𑀯 𑀦𑀢𑁆𑀣𑀺 𑀬𑀤𑀺𑀤𑀁 𑀬𑀼𑀥𑀸𑀬.

𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀲𑀽𑀭𑁄 𑀬𑀣𑀸 𑀭𑀸𑀚𑀔𑀸𑀤𑀸𑀬 𑀧𑀼𑀝𑁆𑀞𑁄, 𑀅𑀪𑀺𑀕𑀚𑁆𑀚𑀫𑁂𑀢𑀺 𑀧𑀝𑀺𑀲𑀽𑀭𑀫𑀺𑀘𑁆𑀙𑀁;

𑀬𑁂𑀦𑁂𑀯 𑀲𑁄 𑀢𑁂𑀦 𑀧𑀮𑁂𑀳𑀺 𑀲𑀽𑀭, 𑀧𑀼𑀩𑁆𑀩𑁂𑀯 𑀦𑀢𑁆𑀣𑀺 𑀬𑀤𑀺𑀤𑀁 𑀬𑀼𑀥𑀸𑀬𑀸’’𑀢𑀺.

𑁬𑁭. 𑀬𑁂 𑀤𑀺𑀝𑁆𑀞𑀺𑀫𑀼𑀕𑁆𑀕𑀬𑁆𑀳 𑀯𑀺𑀯𑀸𑀤𑀬𑀦𑁆𑀢𑀺, 𑀇𑀤𑀫𑁂𑀯 𑀲𑀘𑁆𑀘𑀦𑁆𑀢𑀺 𑀘 𑀯𑀸𑀤𑀬𑀦𑁆𑀢𑀺;

𑀢𑁂 𑀢𑁆𑀯𑀁 𑀯𑀤𑀲𑁆𑀲𑀽 𑀦 𑀳𑀺 𑀢𑁂𑀥 𑀅𑀢𑁆𑀣𑀺, 𑀯𑀸𑀤𑀫𑁆𑀳𑀺 𑀚𑀸𑀢𑁂 𑀧𑀝𑀺𑀲𑁂𑀦𑀺𑀓𑀢𑁆𑀢𑀸.

𑀬𑁂 𑀤𑀺𑀝𑁆𑀞𑀺𑀫𑀼𑀕𑁆𑀕𑀬𑁆𑀳 𑀯𑀺𑀯𑀸𑀤𑀬𑀦𑁆𑀢𑀻𑀢𑀺 𑀬𑁂 𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀕𑀢𑀸𑀦𑀁 𑀅𑀜𑁆𑀜𑀢𑀭𑀜𑁆𑀜𑀢𑀭𑀁 𑀤𑀺𑀝𑁆𑀞𑀺𑀕𑀢𑀁 𑀕𑀳𑁂𑀢𑁆𑀯𑀸 𑀕𑀡𑁆𑀳𑀺𑀢𑁆𑀯𑀸 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀧𑀭𑀸𑀫𑀲𑀺𑀢𑁆𑀯𑀸 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀯𑀺𑀯𑀸𑀤𑀬𑀦𑁆𑀢𑀺 𑀓𑀮𑀳𑀁 𑀓𑀭𑁄𑀦𑁆𑀢𑀺 𑀪𑀡𑁆𑀟𑀦𑀁 𑀓𑀭𑁄𑀦𑁆𑀢𑀺 ‘𑀯𑀺𑀕𑁆𑀕𑀳𑀁 𑀓𑀭𑁄𑀦𑁆𑀢𑀺 𑀯𑀺𑀯𑀸𑀤𑀁 𑀓𑀭𑁄𑀦𑁆𑀢𑀺, 𑀫𑁂𑀥𑀕𑀁 𑀓𑀭𑁄𑀦𑁆𑀢𑀺 𑁋 ‘‘𑀦 𑀢𑁆𑀯𑀁 𑀇𑀫𑀁 𑀥𑀫𑁆𑀫𑀯𑀺𑀦𑀬𑀁 𑀆𑀚𑀸𑀦𑀸𑀲𑀺, 𑀅𑀳𑀁 𑀇𑀫𑀁 𑀥𑀫𑁆𑀫𑀯𑀺𑀦𑀬𑀁 𑀆𑀚𑀸𑀦𑀸𑀫𑀺, 𑀓𑀺𑀁 𑀢𑁆𑀯𑀁 𑀇𑀫𑀁 𑀥𑀫𑁆𑀫𑀯𑀺𑀦𑀬𑀁 𑀆𑀚𑀸𑀦𑀺𑀲𑁆𑀲𑀲𑀺, 𑀫𑀺𑀘𑁆𑀙𑀸𑀧𑀝𑀺𑀧𑀦𑁆𑀦𑁄 𑀢𑁆𑀯𑀫𑀲𑀺, 𑀅𑀳𑀫𑀲𑁆𑀫𑀺 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑁄, 𑀲𑀳𑀺𑀢𑀁 𑀫𑁂, 𑀅𑀲𑀳𑀺𑀢𑀁 𑀢𑁂, 𑀧𑀼𑀭𑁂 𑀯𑀘𑀦𑀻𑀬𑀁 𑀧𑀘𑁆𑀙𑀸 𑀅𑀯𑀘, 𑀧𑀘𑁆𑀙𑀸 𑀯𑀘𑀦𑀻𑀬𑀁 𑀧𑀼𑀭𑁂 𑀅𑀯𑀘, 𑀅𑀥𑀺𑀘𑀺𑀡𑁆𑀡𑀁 𑀢𑁂 𑀯𑀺𑀧𑀭𑀸𑀯𑀢𑁆𑀢𑀁, 𑀆𑀭𑁄𑀧𑀺𑀢𑁄 𑀢𑁂 𑀯𑀸𑀤𑁄, 𑀦𑀺𑀕𑁆𑀕𑀳𑀺𑀢𑁄 𑀢𑁆𑀯𑀫𑀲𑀺, 𑀘𑀭 𑀯𑀸𑀤𑀧𑁆𑀧𑀫𑁄𑀓𑁆𑀔𑀸𑀬, 𑀦𑀺𑀩𑁆𑀩𑁂𑀞𑁂𑀳𑀺 𑀯𑀸 𑀲𑀘𑁂 𑀧𑀳𑁄𑀲𑀻’’𑀢𑀺 𑁋 𑀬𑁂 𑀤𑀺𑀝𑁆𑀞𑀺𑀫𑀼𑀕𑁆𑀕𑀬𑁆𑀳 𑀯𑀺𑀯𑀸𑀤𑀬𑀦𑁆𑀢𑀺.

𑀇𑀤𑀫𑁂𑀯 𑀲𑀘𑁆𑀘𑀦𑁆𑀢𑀺 𑀘 𑀯𑀸𑀤𑀬𑀦𑁆𑀢𑀻𑀢𑀺. ‘‘𑀲𑀲𑁆𑀲𑀢𑁄 𑀮𑁄𑀓𑁄, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀯𑀸𑀤𑀬𑀦𑁆𑀢𑀺 𑀓𑀣𑁂𑀦𑁆𑀢𑀺 𑀪𑀡𑀦𑁆𑀢𑀺 𑀤𑀻𑀧𑀬𑀦𑁆𑀢𑀺 𑀯𑁄𑀳𑀭𑀦𑁆𑀢𑀺. ‘‘𑀅𑀲𑀲𑁆𑀲𑀢𑁄 𑀮𑁄𑀓𑁄…𑀧𑁂… 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀯𑀸𑀤𑀬𑀦𑁆𑀢𑀺 𑀓𑀣𑁂𑀦𑁆𑀢𑀺 𑀪𑀡𑀦𑁆𑀢𑀺 𑀤𑀻𑀧𑀬𑀦𑁆𑀢𑀺 𑀯𑁄𑀳𑀭𑀦𑁆𑀢𑀻𑀢𑀺 𑁋 𑀇𑀤𑀫𑁂𑀯 𑀲𑀘𑁆𑀘𑀦𑁆𑀢𑀺 𑀘 𑀯𑀸𑀤𑀬𑀦𑁆𑀢𑀺.

𑀢𑁂 𑀢𑁆𑀯𑀁 𑀯𑀤𑀲𑁆𑀲𑀽 𑀦 𑀳𑀺 𑀢𑁂𑀥 𑀅𑀢𑁆𑀣𑀺, 𑀯𑀸𑀤𑀫𑁆𑀳𑀺 𑀚𑀸𑀢𑁂 𑀧𑀝𑀺𑀲𑁂𑀦𑀺𑀓𑀢𑁆𑀢𑀸𑀢𑀺. 𑀢𑁂 𑀢𑁆𑀯𑀁 𑀤𑀺𑀝𑁆𑀞𑀺𑀕𑀢𑀺𑀓𑁂 𑀯𑀤𑀲𑁆𑀲𑀼 𑀯𑀸𑀤𑁂𑀦 𑀯𑀸𑀤𑀁, 𑀦𑀺𑀕𑁆𑀕𑀳𑁂𑀦 𑀦𑀺𑀕𑁆𑀕𑀳𑀁, 𑀧𑀝𑀺𑀓𑀫𑁆𑀫𑁂𑀦 𑀧𑀝𑀺𑀓𑀫𑁆𑀫𑀁, 𑀯𑀺𑀲𑁂𑀲𑁂𑀦 𑀯𑀺𑀲𑁂𑀲𑀁, 𑀧𑀝𑀺𑀯𑀺𑀲𑁂𑀲𑁂𑀦 𑀧𑀝𑀺𑀯𑀺𑀲𑁂𑀲𑀁, 𑀆𑀯𑁂𑀞𑀺𑀬𑀸𑀬 𑀆𑀯𑁂𑀞𑀺𑀬𑀁, 𑀦𑀺𑀩𑁆𑀩𑁂𑀞𑀺𑀬𑀸𑀬 𑀦𑀺𑀩𑁆𑀩𑁂𑀞𑀺𑀬𑀁, 𑀙𑁂𑀤𑁂𑀦 𑀙𑁂𑀤𑀁, 𑀫𑀡𑁆𑀟𑀮𑁂𑀦 𑀫𑀡𑁆𑀟𑀮𑀁, 𑀢𑁂 𑀢𑀼𑀬𑁆𑀳𑀁 𑀧𑀝𑀺𑀲𑀽𑀭𑀸 𑀧𑀝𑀺𑀧𑀼𑀭𑀺𑀲𑀸 𑀧𑀝𑀺𑀲𑀢𑁆𑀢𑀽 𑀧𑀝𑀺𑀫𑀮𑁆𑀮𑀸𑀢𑀺 𑁋 𑀢𑁂 𑀢𑁆𑀯𑀁 𑀯𑀤𑀲𑁆𑀲𑀽 𑀦 𑀳𑀺 𑀢𑁂𑀥 𑀅𑀢𑁆𑀣𑀺. 𑀯𑀸𑀤𑀫𑁆𑀳𑀺 𑀚𑀸𑀢𑁂 𑀧𑀝𑀺𑀲𑁂𑀦𑀺𑀓𑀢𑁆𑀢𑀸𑀢𑀺. 𑀯𑀸𑀤𑁂 𑀚𑀸𑀢𑁂 𑀲𑀜𑁆𑀚𑀸𑀢𑁂 𑀦𑀺𑀩𑁆𑀩𑀢𑁆𑀢𑁂 𑀅𑀪𑀺𑀦𑀺𑀩𑁆𑀩𑀢𑁆𑀢𑁂 𑀧𑀸𑀢𑀼𑀪𑀽𑀢𑁂𑀬𑁂𑀯 𑀧𑀝𑀺𑀲𑁂𑀦𑀺𑀓𑀢𑁆𑀢𑀸 [𑀧𑀝𑀺𑀲𑁂𑀦𑀺𑀓𑀢𑀸 (𑀓.), 𑀏𑀯𑀁 𑀲𑁂𑀲𑁂𑀲𑀼 𑀢𑀻𑀲𑀼 𑀧𑀤𑁂𑀲𑀼𑀧𑀺] 𑀧𑀝𑀺𑀮𑁄𑀫𑀓𑀢𑁆𑀢𑀸 𑀧𑀝𑀺𑀪𑀡𑁆𑀟𑀓𑀢𑁆𑀢𑀸 𑀧𑀝𑀺𑀧𑀓𑁆𑀔𑀓𑀢𑁆𑀢𑀸 𑀓𑀮𑀳𑀁 𑀓𑀭𑁂𑀬𑁆𑀬𑀼𑀁 𑀪𑀡𑁆𑀟𑀦𑀁 𑀓𑀭𑁂𑀬𑁆𑀬𑀼𑀁 𑀯𑀺𑀕𑁆𑀕𑀳𑀁 𑀓𑀭𑁂𑀬𑁆𑀬𑀼𑀁 𑀯𑀺𑀯𑀸𑀤𑀁 𑀓𑀭𑁂𑀬𑁆𑀬𑀼𑀁 𑀫𑁂𑀥𑀕𑀁 𑀓𑀭𑁂𑀬𑁆𑀬𑀼𑀁, 𑀢𑁂 𑀦𑀢𑁆𑀣𑀺 𑀦 𑀲𑀦𑁆𑀢𑀺 𑀦 𑀲𑀁𑀯𑀺𑀚𑁆𑀚𑀦𑁆𑀢𑀺 𑀦𑀼𑀧𑀮𑀩𑁆𑀪𑀦𑁆𑀢𑀺, 𑀧𑀳𑀻𑀦𑀸…𑀧𑁂… 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸𑀢𑀺 𑁋 𑀢𑁂 𑀢𑁆𑀯𑀁 𑀯𑀤𑀲𑁆𑀲𑀽 𑀦 𑀳𑀺 𑀢𑁂𑀥 𑀅𑀢𑁆𑀣𑀺 𑀯𑀸𑀤𑀫𑁆𑀳𑀺 𑀚𑀸𑀢𑁂 𑀧𑀝𑀺𑀲𑁂𑀦𑀺𑀓𑀢𑁆𑀢𑀸.

𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀬𑁂 𑀤𑀺𑀝𑁆𑀞𑀺𑀫𑀼𑀕𑁆𑀕𑀬𑁆𑀳 𑀯𑀺𑀯𑀸𑀤𑀬𑀦𑁆𑀢𑀺, 𑀇𑀤𑀫𑁂𑀯 𑀲𑀘𑁆𑀘𑀦𑁆𑀢𑀺 𑀘 𑀯𑀸𑀤𑀬𑀦𑁆𑀢𑀺;

𑀢𑁂 𑀢𑁆𑀯𑀁 𑀯𑀤𑀲𑁆𑀲𑀽 𑀦 𑀳𑀺 𑀢𑁂𑀥 𑀅𑀢𑁆𑀣𑀺, 𑀯𑀸𑀤𑀫𑁆𑀳𑀺 𑀚𑀸𑀢𑁂 𑀧𑀝𑀺𑀲𑁂𑀦𑀺𑀓𑀢𑁆𑀢𑀸’’𑀢𑀺.

𑁬𑁮. 𑀯𑀺𑀲𑁂𑀦𑀺𑀓𑀢𑁆𑀯𑀸 𑀧𑀦 𑀬𑁂 𑀘𑀭𑀦𑁆𑀢𑀺, 𑀤𑀺𑀝𑁆𑀞𑀻𑀳𑀺 𑀤𑀺𑀝𑁆𑀞𑀺𑀁 𑀅𑀯𑀺𑀭𑀼𑀚𑁆𑀛𑀫𑀸𑀦𑀸;

𑀢𑁂𑀲𑀼 𑀢𑁆𑀯𑀁 𑀓𑀺𑀁 𑀮𑀪𑁂𑀣 𑀧𑀲𑀽𑀭, 𑀬𑁂𑀲𑀻𑀥 𑀦𑀢𑁆𑀣𑀺 𑀧𑀭𑀫𑀼𑀕𑁆𑀕𑀳𑀻𑀢𑀁.

𑀯𑀺𑀲𑁂𑀦𑀺𑀓𑀢𑁆𑀯𑀸 𑀧𑀦 𑀬𑁂 𑀘𑀭𑀦𑁆𑀢𑀻𑀢𑀺. 𑀲𑁂𑀦𑀸 𑀯𑀼𑀘𑁆𑀘𑀢𑀺 𑀫𑀸𑀭𑀲𑁂𑀦𑀸. 𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀫𑀸𑀭𑀲𑁂𑀦𑀸, 𑀯𑀘𑀻𑀤𑀼𑀘𑁆𑀘𑀭𑀺𑀢𑀁 𑀫𑀸𑀭𑀲𑁂𑀦𑀸, 𑀫𑀦𑁄𑀤𑀼𑀘𑁆𑀘𑀭𑀺𑀢𑀁 𑀫𑀸𑀭𑀲𑁂𑀦𑀸, 𑀮𑁄𑀪𑁄 𑀫𑀸𑀭𑀲𑁂𑀦𑀸, 𑀤𑁄𑀲𑁄 𑀫𑀸𑀭𑀲𑁂𑀦𑀸, 𑀫𑁄𑀳𑁄 𑀫𑀸𑀭𑀲𑁂𑀦𑀸, 𑀓𑁄𑀥𑁄… 𑀉𑀧𑀦𑀸𑀳𑁄… 𑀫𑀓𑁆𑀔𑁄… 𑀧𑀴𑀸𑀲𑁄… 𑀇𑀲𑁆𑀲𑀸… 𑀫𑀘𑁆𑀙𑀭𑀺𑀬𑀁… 𑀫𑀸𑀬𑀸… 𑀲𑀸𑀞𑁂𑀬𑁆𑀬𑀁… 𑀣𑀫𑁆𑀪𑁄… 𑀲𑀸𑀭𑀫𑁆𑀪𑁄… 𑀫𑀸𑀦𑁄… 𑀅𑀢𑀺𑀫𑀸𑀦𑁄… 𑀫𑀤𑁄… 𑀧𑀫𑀸𑀤𑁄… 𑀲𑀩𑁆𑀩𑁂 𑀓𑀺𑀮𑁂𑀲𑀸… 𑀲𑀩𑁆𑀩𑁂 𑀤𑀼𑀘𑁆𑀘𑀭𑀺𑀢𑀸… 𑀲𑀩𑁆𑀩𑁂 𑀤𑀭𑀣𑀸… 𑀲𑀩𑁆𑀩𑁂 𑀧𑀭𑀺𑀴𑀸𑀳𑀸… 𑀲𑀩𑁆𑀩𑁂 𑀲𑀦𑁆𑀢𑀸𑀧𑀸… 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀸 𑀫𑀸𑀭𑀲𑁂𑀦𑀸.

𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋

‘‘𑀓𑀸𑀫𑀸 𑀢𑁂 𑀧𑀞𑀫𑀸 𑀲𑁂𑀦𑀸, 𑀤𑀼𑀢𑀺𑀬𑀸 𑀅𑀭𑀢𑀺 𑀯𑀼𑀘𑁆𑀘𑀢𑀺…𑀧𑁂…;

𑀦 𑀦𑀁 𑀅𑀲𑀼𑀭𑁄 𑀚𑀺𑀦𑀸𑀢𑀺, 𑀚𑁂𑀢𑁆𑀯𑀸𑀯 𑀮𑀪𑀢𑁂 𑀲𑀼𑀔’’𑀦𑁆𑀢𑀺.

𑀬𑀢𑁄 𑀘𑀢𑀽𑀳𑀺 𑀅𑀭𑀺𑀬𑀫𑀕𑁆𑀕𑁂𑀳𑀺 𑀲𑀩𑁆𑀩𑀸 𑀘 𑀫𑀸𑀭𑀲𑁂𑀦𑀸 𑀲𑀩𑁆𑀩𑁂 𑀘 𑀧𑀝𑀺𑀲𑁂𑀦𑀺𑀓𑀭𑀸 𑀓𑀺𑀮𑁂𑀲𑀸 𑀚𑀺𑀢𑀸 𑀘 𑀧𑀭𑀸𑀚𑀺𑀢𑀸 𑀘 𑀪𑀕𑁆𑀕𑀸 𑀯𑀺𑀧𑁆𑀧𑀮𑀼𑀕𑁆𑀕𑀸 𑀧𑀭𑀫𑁆𑀫𑀼𑀔𑀸, 𑀢𑁂𑀦 𑀯𑀼𑀘𑁆𑀘𑀢𑀺 𑀯𑀺𑀲𑁂𑀦𑀺𑀓𑀢𑁆𑀯𑀸𑀢𑀺. 𑀬𑁂𑀢𑀺 𑀅𑀭𑀳𑀦𑁆𑀢𑁄 𑀔𑀻𑀡𑀸𑀲𑀯𑀸. 𑀘𑀭𑀦𑁆𑀢𑀻𑀢𑀺 𑀘𑀭𑀦𑁆𑀢𑀺 𑀯𑀺𑀳𑀭𑀦𑁆𑀢𑀺 𑀇𑀭𑀺𑀬𑀦𑁆𑀢𑀺 𑀯𑀢𑁆𑀢𑁂𑀦𑁆𑀢𑀺 𑀧𑀸𑀮𑁂𑀦𑁆𑀢𑀺 𑀬𑀧𑁂𑀦𑁆𑀢𑀺 𑀬𑀸𑀧𑁂𑀦𑁆𑀢𑀻𑀢𑀺 𑁋 𑀯𑀺𑀲𑁂𑀦𑀺𑀓𑀢𑁆𑀯𑀸 𑀧𑀦 𑀬𑁂 𑀘𑀭𑀦𑁆𑀢𑀺.

𑀤𑀺𑀝𑁆𑀞𑀻𑀳𑀺 𑀤𑀺𑀝𑁆𑀞𑀺𑀁 𑀅𑀯𑀺𑀭𑀼𑀚𑁆𑀛𑀫𑀸𑀦𑀸𑀢𑀺. 𑀬𑁂𑀲𑀁 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀧𑀳𑀻𑀦𑀸𑀦𑀺 𑀲𑀫𑀼𑀘𑁆𑀙𑀺𑀦𑁆𑀦𑀸𑀦𑀺 𑀯𑀽𑀧𑀲𑀦𑁆𑀢𑀸𑀦𑀺 𑀧𑀝𑀺𑀧𑀲𑁆𑀲𑀤𑁆𑀥𑀸𑀦𑀺 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸𑀦𑀺 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸𑀦𑀺, 𑀢𑁂 𑀤𑀺𑀝𑁆𑀞𑀻𑀳𑀺 𑀤𑀺𑀝𑁆𑀞𑀺𑀁 𑀅𑀯𑀺𑀭𑀼𑀚𑁆𑀛𑀫𑀸𑀦𑀸 𑀅𑀧𑁆𑀧𑀝𑀺𑀯𑀺𑀭𑀼𑀚𑁆𑀛𑀫𑀸𑀦𑀸 𑀅𑀧𑁆𑀧𑀳𑀻𑀬𑀫𑀸𑀦𑀸 𑀅𑀧𑁆𑀧𑀝𑀺𑀳𑀜𑁆𑀜𑀫𑀸𑀦𑀸 𑀅𑀧𑁆𑀧𑀝𑀺𑀳𑀢𑀫𑀸𑀦𑀸𑀢𑀺 𑁋 𑀤𑀺𑀝𑁆𑀞𑀻𑀳𑀺 𑀤𑀺𑀝𑁆𑀞𑀺𑀁 𑀅𑀯𑀺𑀭𑀼𑀚𑁆𑀛𑀫𑀸𑀦𑀸.

𑀢𑁂𑀲𑀼 𑀢𑁆𑀯𑀁 𑀓𑀺𑀁 𑀮𑀪𑁂𑀣 𑀧𑀲𑀽𑀭𑀸𑀢𑀺. 𑀢𑁂𑀲𑀼 𑀅𑀭𑀳𑀦𑁆𑀢𑁂𑀲𑀼 𑀔𑀻𑀡𑀸𑀲𑀯𑁂𑀲𑀼 𑀓𑀺𑀁 𑀮𑀪𑁂𑀣 𑀧𑀝𑀺𑀲𑀽𑀭𑀁 𑀧𑀝𑀺𑀧𑀼𑀭𑀺𑀲𑀁 𑀧𑀝𑀺𑀲𑀢𑁆𑀢𑀼𑀁 𑀧𑀝𑀺𑀫𑀮𑁆𑀮𑀦𑁆𑀢𑀺 𑁋 𑀢𑁂𑀲𑀼 𑀢𑁆𑀯𑀁 𑀓𑀺𑀁 𑀮𑀪𑁂𑀣 𑀧𑀲𑀽𑀭.

𑀬𑁂𑀲𑀻𑀥 𑀦𑀢𑁆𑀣𑀺 𑀧𑀭𑀫𑀼𑀕𑁆𑀕𑀳𑀻𑀢𑀦𑁆𑀢𑀺. 𑀬𑁂𑀲𑀁 𑀅𑀭𑀳𑀦𑁆𑀢𑀸𑀦𑀁 𑀔𑀻𑀡𑀸𑀲𑀯𑀸𑀦𑀁 ‘‘𑀇𑀤𑀁 𑀧𑀭𑀫𑀁 𑀅𑀕𑁆𑀕𑀁 𑀲𑁂𑀝𑁆𑀞𑀁 𑀯𑀺𑀲𑀺𑀝𑁆𑀞𑀁 𑀧𑀸𑀫𑁄𑀓𑁆𑀔𑀁 𑀉𑀢𑁆𑀢𑀫𑀁 𑀧𑀯𑀭’’𑀦𑁆𑀢𑀺 𑀕𑀳𑀺𑀢𑀁 𑀧𑀭𑀸𑀫𑀝𑁆𑀞𑀁 𑀅𑀪𑀺𑀦𑀺𑀯𑀺𑀝𑁆𑀞𑀁 𑀅𑀚𑁆𑀛𑁄𑀲𑀺𑀢𑀁 𑀅𑀥𑀺𑀫𑀼𑀢𑁆𑀢𑀁, 𑀦𑀢𑁆𑀣𑀺 𑀦 𑀲𑀦𑁆𑀢𑀺 𑀦 𑀲𑀁𑀯𑀺𑀚𑁆𑀚𑀦𑁆𑀢𑀺 𑀦𑀼𑀧𑀮𑀩𑁆𑀪𑀦𑁆𑀢𑀺, 𑀧𑀳𑀻𑀦𑀁 𑀲𑀫𑀼𑀘𑁆𑀙𑀺𑀦𑁆𑀦𑀁 𑀯𑀽𑀧𑀲𑀦𑁆𑀢𑀁 𑀧𑀝𑀺𑀧𑀲𑁆𑀲𑀤𑁆𑀥𑀁 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀁 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀦𑁆𑀢𑀺 𑁋 𑀬𑁂𑀲𑀻𑀥 𑀦𑀢𑁆𑀣𑀺 𑀧𑀭𑀫𑀼𑀕𑁆𑀕𑀳𑀻𑀢𑀁.

𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀯𑀺𑀲𑁂𑀦𑀺𑀓𑀢𑁆𑀯𑀸 𑀧𑀦 𑀬𑁂 𑀘𑀭𑀦𑁆𑀢𑀺, 𑀤𑀺𑀝𑁆𑀞𑀻𑀳𑀺 𑀤𑀺𑀝𑁆𑀞𑀺𑀁 𑀅𑀯𑀺𑀭𑀼𑀚𑁆𑀛𑀫𑀸𑀦𑀸;

𑀢𑁂𑀲𑀼 𑀢𑁆𑀯𑀁 𑀓𑀺𑀁 𑀮𑀪𑁂𑀣 𑀧𑀲𑀽𑀭, 𑀬𑁂𑀲𑀻𑀥 𑀦𑀢𑁆𑀣𑀺 𑀧𑀭𑀫𑀼𑀕𑁆𑀕𑀳𑀻𑀢’’𑀦𑁆𑀢𑀺.

𑁬𑁯. 𑀅𑀣 𑀢𑁆𑀯𑀁 𑀧𑀯𑀺𑀢𑀓𑁆𑀓𑀫𑀸𑀕𑀫𑀸, [𑀧𑀯𑀺𑀢𑀓𑁆𑀓𑀫𑀸𑀕𑀫 (𑀲𑀻.), 𑀲𑀯𑀺𑀢𑀓𑁆𑀓𑀫𑀸𑀕𑀫𑀸 (𑀓.)] 𑀫𑀦𑀲𑀸 𑀤𑀺𑀝𑁆𑀞𑀺𑀕𑀢𑀸𑀦𑀺 𑀘𑀺𑀦𑁆𑀢𑀬𑀦𑁆𑀢𑁄;

𑀥𑁄𑀦𑁂𑀦 𑀬𑀼𑀕𑀁 𑀲𑀫𑀸𑀕𑀫𑀸, 𑀦 𑀳𑀺 𑀢𑁆𑀯𑀁 𑀲𑀓𑁆𑀔𑀲𑀺 𑀲𑀫𑁆𑀧𑀬𑀸𑀢𑀯𑁂.

𑀅𑀣 𑀢𑁆𑀯𑀁 𑀧𑀯𑀺𑀢𑀓𑁆𑀓𑀫𑀸𑀕𑀫𑀸𑀢𑀺. 𑀅𑀣𑀸𑀢𑀺 𑀧𑀤𑀲𑀦𑁆𑀥𑀺 𑀧𑀤𑀲𑀁𑀲𑀕𑁆𑀕𑁄 𑀧𑀤𑀧𑀸𑀭𑀺𑀧𑀽𑀭𑀻 𑀅𑀓𑁆𑀔𑀭𑀲𑀫𑀯𑀸𑀬𑁄 𑀩𑁆𑀬𑀜𑁆𑀚𑀦𑀲𑀺𑀮𑀺𑀝𑁆𑀞𑀢𑀸 𑀧𑀤𑀸𑀦𑀼𑀧𑀼𑀩𑁆𑀩𑀢𑀸𑀧𑁂𑀢𑀁 𑁋 𑀅𑀣𑀸𑀢𑀺. 𑀧𑀯𑀺𑀢𑀓𑁆𑀓𑀫𑀸𑀕𑀫𑀸𑀢𑀺 𑀢𑀓𑁆𑀓𑁂𑀦𑁆𑀢𑁄 𑀯𑀺𑀢𑀓𑁆𑀓𑁂𑀦𑁆𑀢𑁄 𑀲𑀗𑁆𑀓𑀧𑁆𑀧𑁂𑀦𑁆𑀢𑁄 ‘‘𑀚𑀬𑁄 𑀦𑀼 𑀔𑁄 𑀫𑁂 𑀪𑀯𑀺𑀲𑁆𑀲𑀢𑀺, 𑀧𑀭𑀸𑀚𑀬𑁄 𑀦𑀼 𑀔𑁄 𑀫𑁂 𑀪𑀯𑀺𑀲𑁆𑀲𑀢𑀺, 𑀓𑀣𑀁 𑀦𑀺𑀕𑁆𑀕𑀳𑀁 𑀓𑀭𑀺𑀲𑁆𑀲𑀸𑀫𑀺, 𑀓𑀣𑀁 𑀧𑀝𑀺𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀺, 𑀓𑀣𑀁 𑀯𑀺𑀲𑁂𑀲𑀁 𑀓𑀭𑀺𑀲𑁆𑀲𑀸𑀫𑀺, 𑀓𑀣𑀁 𑀧𑀝𑀺𑀯𑀺𑀲𑁂𑀲𑀁 𑀓𑀭𑀺𑀲𑁆𑀲𑀸𑀫𑀺, 𑀓𑀣𑀁 𑀆𑀯𑁂𑀞𑀺𑀬𑀁 𑀓𑀭𑀺𑀲𑁆𑀲𑀸𑀫𑀺, 𑀓𑀣𑀁 𑀦𑀺𑀩𑁆𑀩𑁂𑀞𑀺𑀬𑀁 𑀓𑀭𑀺𑀲𑁆𑀲𑀸𑀫𑀺, 𑀓𑀣𑀁 𑀙𑁂𑀤𑀁 𑀓𑀭𑀺𑀲𑁆𑀲𑀸𑀫𑀺, 𑀓𑀣𑀁 𑀫𑀡𑁆𑀟𑀮𑀁 𑀓𑀭𑀺𑀲𑁆𑀲𑀸𑀫𑀺’’ 𑀏𑀯𑀁 𑀢𑀓𑁆𑀓𑁂𑀦𑁆𑀢𑁄 𑀯𑀺𑀢𑀓𑁆𑀓𑁂𑀦𑁆𑀢𑁄 𑀲𑀗𑁆𑀓𑀧𑁆𑀧𑁂𑀦𑁆𑀢𑁄 𑀆𑀕𑀢𑁄𑀲𑀺 𑀉𑀧𑀕𑀢𑁄𑀲𑀺 𑀲𑀫𑁆𑀧𑀢𑁆𑀢𑁄𑀲𑀺 𑀫𑀬𑀸 𑀲𑀤𑁆𑀥𑀺𑀁 𑀲𑀫𑀸𑀕𑀢𑁄𑀲𑀻𑀢𑀺 𑁋 𑀅𑀣 𑀢𑁆𑀯𑀁 𑀧𑀯𑀺𑀢𑀓𑁆𑀓𑀫𑀸𑀕𑀫𑀸.

𑀫𑀦𑀲𑀸 𑀤𑀺𑀝𑁆𑀞𑀺𑀕𑀢𑀸𑀦𑀺 𑀘𑀺𑀦𑁆𑀢𑀬𑀦𑁆𑀢𑁄𑀢𑀺. 𑀫𑀦𑁄𑀢𑀺 𑀬𑀁 𑀘𑀺𑀢𑁆𑀢𑀁 𑀫𑀦𑁄 𑀫𑀸𑀦𑀲𑀁 𑀳𑀤𑀬𑀁 𑀧𑀡𑁆𑀟𑀭𑀁, 𑀫𑀦𑁄 𑀫𑀦𑀸𑀬𑀢𑀦𑀁 𑀫𑀦𑀺𑀦𑁆𑀤𑁆𑀭𑀺𑀬𑀁 𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑀢𑀚𑁆𑀚𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼. 𑀘𑀺𑀢𑁆𑀢𑁂𑀦 𑀤𑀺𑀝𑁆𑀞𑀺𑀁 𑀘𑀺𑀦𑁆𑀢𑁂𑀦𑁆𑀢𑁄 𑀯𑀺𑀘𑀺𑀦𑁆𑀢𑁂𑀦𑁆𑀢𑁄 ‘‘𑀲𑀲𑁆𑀲𑀢𑁄 𑀮𑁄𑀓𑁄’’𑀢𑀺 𑀯𑀸, ‘‘𑀅𑀲𑀲𑁆𑀲𑀢𑁄 𑀮𑁄𑀓𑁄’’𑀢𑀺 𑀯𑀸…𑀧𑁂… ‘‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’𑀢𑀺 𑀯𑀸𑀢𑀺 𑁋 𑀫𑀦𑀲𑀸 𑀤𑀺𑀝𑁆𑀞𑀺𑀕𑀢𑀸𑀦𑀺 𑀘𑀺𑀦𑁆𑀢𑀬𑀦𑁆𑀢𑁄.

𑀥𑁄𑀦𑁂𑀦 𑀬𑀼𑀕𑀁 𑀲𑀫𑀸𑀕𑀫𑀸, 𑀦 𑀳𑀺 𑀢𑁆𑀯𑀁 𑀲𑀓𑁆𑀔𑀲𑀺 𑀲𑀫𑁆𑀧𑀬𑀸𑀢𑀯𑁂𑀢𑀺. 𑀥𑁄𑀦𑀸 𑀯𑀼𑀘𑁆𑀘𑀢𑀺 𑀧𑀜𑁆𑀜𑀸. 𑀬𑀸 𑀧𑀜𑁆𑀜𑀸 𑀧𑀚𑀸𑀦𑀦𑀸…𑀧𑁂… 𑀅𑀫𑁄𑀳𑁄 𑀥𑀫𑁆𑀫𑀯𑀺𑀘𑀬𑁄 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀓𑀺𑀁𑀓𑀸𑀭𑀡𑀸 𑀥𑁄𑀦𑀸 𑀯𑀼𑀘𑁆𑀘𑀢𑀺 𑀧𑀜𑁆𑀜𑀸? 𑀢𑀸𑀬 𑀧𑀜𑁆𑀜𑀸𑀬 𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀥𑀼𑀢𑀜𑁆𑀘 𑀥𑁄𑀢𑀜𑁆𑀘 𑀲𑀦𑁆𑀥𑁄𑀢𑀜𑁆𑀘 𑀦𑀺𑀤𑁆𑀥𑁄𑀢𑀜𑁆𑀘, 𑀯𑀘𑀻𑀤𑀼𑀘𑁆𑀘𑀭𑀺𑀢𑀁…𑀧𑁂… 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀸 𑀥𑀼𑀢𑀸 𑀘 𑀥𑁄𑀢𑀸 𑀘 𑀲𑀦𑁆𑀥𑁄𑀢𑀸 𑀘 𑀦𑀺𑀤𑁆𑀥𑁄𑀢𑀸 𑀘. 𑀅𑀣 𑀯𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺… 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁂𑀦 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑁄…𑀧𑁂… 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺𑀬𑀸 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀺 𑀥𑀼𑀢𑀸 𑀘 𑀥𑁄𑀢𑀸 𑀘 𑀲𑀦𑁆𑀥𑁄𑀢𑀸 𑀘 𑀦𑀺𑀤𑁆𑀥𑁄𑀢𑀸 𑀘. 𑀅𑀣 𑀯𑀸 𑀅𑀭𑀺𑀬𑁂𑀦 𑀅𑀝𑁆𑀞𑀗𑁆𑀕𑀺𑀓𑁂𑀦 𑀫𑀕𑁆𑀕𑁂𑀦 𑀲𑀩𑁆𑀩𑁂 𑀓𑀺𑀮𑁂𑀲𑀸… 𑀲𑀩𑁆𑀩𑁂 𑀤𑀼𑀘𑁆𑀘𑀭𑀺𑀢𑀸… 𑀲𑀩𑁆𑀩𑁂 𑀤𑀭𑀣𑀸… 𑀲𑀩𑁆𑀩𑁂 𑀧𑀭𑀺𑀴𑀸𑀳𑀸… 𑀲𑀩𑁆𑀩𑁂 𑀲𑀦𑁆𑀢𑀸𑀧𑀸… 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀸 𑀥𑀼𑀢𑀸 𑀘 𑀥𑁄𑀢𑀸 𑀘 𑀲𑀦𑁆𑀥𑁄𑀢𑀸 𑀘 𑀦𑀺𑀤𑁆𑀥𑁄𑀢𑀸 𑀘. 𑀪𑀕𑀯𑀸 𑀇𑀫𑁂𑀳𑀺 𑀥𑁄𑀦𑁂𑀬𑁆𑀬𑁂𑀳𑀺 𑀥𑀫𑁆𑀫𑁂𑀳𑀺 𑀉𑀧𑁂𑀢𑁄 𑀲𑀫𑀼𑀧𑁂𑀢𑁄 𑀉𑀧𑀕𑀢𑁄 𑀲𑀫𑀼𑀧𑀕𑀢𑁄 𑀉𑀧𑀧𑀦𑁆𑀦𑁄 𑀲𑀫𑀼𑀧𑀧𑀦𑁆𑀦𑁄 𑀲𑀫𑀦𑁆𑀦𑀸𑀕𑀢𑁄, 𑀢𑀲𑁆𑀫𑀸 𑀪𑀕𑀯𑀸 𑀥𑁄𑀦𑁄. 𑀲𑁄 𑀥𑀼𑀢𑀭𑀸𑀕𑁄 𑀥𑀼𑀢𑀧𑀸𑀧𑁄 𑀥𑀼𑀢𑀓𑀺𑀮𑁂𑀲𑁄 𑀥𑀼𑀢𑀧𑀭𑀺𑀴𑀸𑀳𑁄𑀢𑀺 𑁋 𑀥𑁄𑀦𑁄𑀢𑀺.

𑀥𑁄𑀦𑁂𑀦 𑀬𑀼𑀕𑀁 𑀲𑀫𑀸𑀕𑀫𑀸, 𑀦 𑀳𑀺 𑀢𑁆𑀯𑀁 𑀲𑀓𑁆𑀔𑀲𑀺 𑀲𑀫𑁆𑀧𑀬𑀸𑀢𑀯𑁂𑀢𑀺. 𑀧𑀲𑀽𑀭𑁄 𑀧𑀭𑀺𑀩𑁆𑀩𑀸𑀚𑀓𑁄 𑀦 𑀧𑀝𑀺𑀩𑀮𑁄 𑀥𑁄𑀦𑁂𑀦 𑀩𑀼𑀤𑁆𑀥𑁂𑀦 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀬𑀼𑀕𑀁 𑀲𑀫𑀸𑀕𑀫𑀁 𑀲𑀫𑀸𑀕𑀦𑁆𑀢𑁆𑀯𑀸 𑀬𑀼𑀕𑀕𑁆𑀕𑀸𑀳𑀁 𑀕𑀡𑁆𑀳𑀺𑀢𑁆𑀯𑀸 𑀲𑀸𑀓𑀘𑁆𑀙𑁂𑀢𑀼𑀁 𑀲𑀮𑁆𑀮𑀧𑀺𑀢𑀼𑀁 𑀲𑀸𑀓𑀘𑁆𑀙𑀁 𑀲𑀫𑀸𑀧𑀚𑁆𑀚𑀺𑀢𑀼𑀁. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀧𑀲𑀽𑀭𑁄 𑀧𑀭𑀺𑀩𑁆𑀩𑀸𑀚𑀓𑁄 𑀳𑀻𑀦𑁄 𑀦𑀺𑀳𑀻𑀦𑁄 𑀑𑀫𑀓𑁄 𑀮𑀸𑀫𑀓𑁄 𑀙𑀢𑀼𑀓𑁆𑀓𑁄 𑀧𑀭𑀺𑀢𑁆𑀢𑁄. 𑀲𑁄 𑀳𑀺 𑀪𑀕𑀯𑀸 𑀅𑀕𑁆𑀕𑁄 𑀘 𑀲𑁂𑀝𑁆𑀞𑁄 𑀘 𑀯𑀺𑀲𑀺𑀝𑁆𑀞𑁄 𑀘 𑀧𑀸𑀫𑁄𑀓𑁆𑀔𑁄 𑀘 𑀉𑀢𑁆𑀢𑀫𑁄 𑀘 𑀧𑀯𑀭𑁄 𑀘. 𑀬𑀣𑀸 𑀲𑀲𑁄 𑀦 𑀧𑀝𑀺𑀩𑀮𑁄 𑀫𑀢𑁆𑀢𑁂𑀦 𑀫𑀸𑀢𑀗𑁆𑀕𑁂𑀦 𑀲𑀤𑁆𑀥𑀺𑀁 𑀬𑀼𑀕𑀁 𑀲𑀫𑀸𑀕𑀫𑀁 𑀲𑀫𑀸𑀕𑀦𑁆𑀢𑁆𑀯𑀸 𑀬𑀼𑀕𑀕𑁆𑀕𑀸𑀳𑀁 𑀕𑀡𑁆𑀳𑀺𑀢𑀼𑀁; 𑀬𑀣𑀸 𑀓𑁄𑀢𑁆𑀣𑀼𑀓𑁄 𑀦 𑀧𑀝𑀺𑀩𑀮𑁄 𑀲𑀻𑀳𑁂𑀦 𑀫𑀺𑀕𑀭𑀜𑁆𑀜𑀸 𑀲𑀤𑁆𑀥𑀺𑀁 𑀬𑀼𑀕𑀁 𑀲𑀫𑀸𑀕𑀫𑀁 𑀲𑀫𑀸𑀕𑀦𑁆𑀢𑁆𑀯𑀸 𑀬𑀼𑀕𑀕𑁆𑀕𑀸𑀳𑀁 𑀕𑀡𑁆𑀳𑀺𑀢𑀼𑀁; 𑀬𑀣𑀸 𑀯𑀘𑁆𑀙𑀓𑁄 𑀢𑀭𑀼𑀡𑀓𑁄 𑀥𑁂𑀦𑀼𑀧𑀓𑁄 𑀦 𑀧𑀝𑀺𑀩𑀮𑁄 𑀉𑀲𑀪𑁂𑀦 𑀘𑀮𑀓𑀓𑀼𑀦𑀸 [𑀩𑀮𑀓𑁆𑀓𑀓𑀼𑀦𑀸 (𑀲𑁆𑀬𑀸.)] 𑀲𑀤𑁆𑀥𑀺𑀁 𑀬𑀼𑀕𑀁 𑀲𑀫𑀸𑀕𑀫𑀁 𑀲𑀫𑀸𑀕𑀦𑁆𑀢𑁆𑀯𑀸 𑀬𑀼𑀕𑀕𑁆𑀕𑀸𑀳𑀁 𑀕𑀡𑁆𑀳𑀺𑀢𑀼𑀁; 𑀬𑀣𑀸 𑀥𑀗𑁆𑀓𑁄 𑀦 𑀧𑀝𑀺𑀩𑀮𑁄 𑀕𑀭𑀼𑀴𑁂𑀦 𑀯𑁂𑀦𑀢𑁂𑀬𑁆𑀬𑁂𑀦 𑀲𑀤𑁆𑀥𑀺𑀁 𑀬𑀼𑀕𑀁 𑀲𑀫𑀸𑀕𑀫𑀁 𑀲𑀫𑀸𑀕𑀦𑁆𑀢𑁆𑀯𑀸 𑀬𑀼𑀕𑀕𑁆𑀕𑀸𑀳𑀁 𑀕𑀡𑁆𑀳𑀺𑀢𑀼𑀁; 𑀬𑀣𑀸 𑀘𑀡𑁆𑀟𑀸𑀮𑁄 𑀦 𑀧𑀝𑀺𑀩𑀮𑁄 𑀭𑀜𑁆𑀜𑀸 𑀘𑀓𑁆𑀓𑀯𑀢𑁆𑀢𑀺𑀦𑀸 𑀲𑀤𑁆𑀥𑀺𑀁 𑀬𑀼𑀕𑀁 𑀲𑀫𑀸𑀕𑀫𑀁 𑀲𑀫𑀸𑀕𑀦𑁆𑀢𑁆𑀯𑀸 𑀬𑀼𑀕𑀕𑁆𑀕𑀸𑀳𑀁 𑀕𑀡𑁆𑀳𑀺𑀢𑀼𑀁; 𑀬𑀣𑀸 𑀧𑀁𑀲𑀼𑀧𑀺𑀲𑀸𑀘𑀓𑁄 𑀦 𑀧𑀝𑀺𑀩𑀮𑁄 𑀇𑀦𑁆𑀤𑁂𑀦 𑀤𑁂𑀯𑀭𑀜𑁆𑀜𑀸 𑀲𑀤𑁆𑀥𑀺𑀁 𑀬𑀼𑀕𑀁 𑀲𑀫𑀸𑀕𑀫𑀁 𑀲𑀫𑀸𑀕𑀦𑁆𑀢𑁆𑀯𑀸 𑀬𑀼𑀕𑀕𑁆𑀕𑀸𑀳𑀁 𑀕𑀡𑁆𑀳𑀺𑀢𑀼𑀁; 𑀏𑀯𑀫𑁂𑀯 𑀧𑀲𑀽𑀭𑁄 𑀧𑀭𑀺𑀩𑁆𑀩𑀸𑀚𑀓𑁄 𑀦 𑀧𑀝𑀺𑀩𑀮𑁄 𑀥𑁄𑀦𑁂𑀦 𑀩𑀼𑀤𑁆𑀥𑁂𑀦 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀬𑀼𑀕𑀁 𑀲𑀫𑀸𑀕𑀫𑀁 𑀲𑀫𑀸𑀕𑀦𑁆𑀢𑁆𑀯𑀸 𑀬𑀼𑀕𑀕𑁆𑀕𑀸𑀳𑀁 𑀕𑀡𑁆𑀳𑀺𑀢𑁆𑀯𑀸 𑀲𑀸𑀓𑀘𑁆𑀙𑁂𑀢𑀼𑀁 𑀲𑀮𑁆𑀮𑀧𑀺𑀢𑀼𑀁 𑀲𑀸𑀓𑀘𑁆𑀙𑀁 𑀲𑀫𑀸𑀧𑀚𑁆𑀚𑀺𑀢𑀼𑀁. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀧𑀲𑀽𑀭𑁄 𑀧𑀭𑀺𑀩𑁆𑀩𑀸𑀚𑀓𑁄 𑀳𑀻𑀦𑀧𑀜𑁆𑀜𑁄 𑀦𑀺𑀳𑀻𑀦𑀧𑀜𑁆𑀜𑁄 𑀑𑀫𑀓𑀧𑀜𑁆𑀜𑁄 𑀮𑀸𑀫𑀓𑀧𑀜𑁆𑀜𑁄 𑀙𑀢𑀼𑀓𑁆𑀓𑀧𑀜𑁆𑀜𑁄 𑀧𑀭𑀺𑀢𑁆𑀢𑀧𑀜𑁆𑀜𑁄. 𑀲𑁄 𑀳𑀺 𑀪𑀕𑀯𑀸 𑀫𑀳𑀸𑀧𑀜𑁆𑀜𑁄 𑀧𑀼𑀣𑀼𑀧𑀜𑁆𑀜𑁄 𑀳𑀸𑀲𑀧𑀜𑁆𑀜𑁄 𑀚𑀯𑀦𑀧𑀜𑁆𑀜𑁄 𑀢𑀺𑀓𑁆𑀔𑀧𑀜𑁆𑀜𑁄 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑁄, 𑀧𑀜𑁆𑀜𑀸𑀧𑀪𑁂𑀤𑀓𑀼𑀲𑀮𑁄 𑀧𑀪𑀺𑀦𑁆𑀦𑀜𑀸𑀡𑁄 𑀅𑀥𑀺𑀕𑀢𑀧𑀝𑀺𑀲𑀫𑁆𑀪𑀺𑀤𑁄, 𑀘𑀢𑀼𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑁄 𑀤𑀲𑀩𑀮𑀥𑀸𑀭𑀻, 𑀧𑀼𑀭𑀺𑀲𑀸𑀲𑀪𑁄 𑀧𑀼𑀭𑀺𑀲𑀲𑀻𑀳𑁄 𑀧𑀼𑀭𑀺𑀲𑀦𑀸𑀕𑁄 𑀧𑀼𑀭𑀺𑀲𑀸𑀚𑀜𑁆𑀜𑁄 𑀧𑀼𑀭𑀺𑀲𑀥𑁄𑀭𑀬𑁆𑀳𑁄, 𑀅𑀦𑀦𑁆𑀢𑀜𑀸𑀡𑁄 𑀅𑀦𑀦𑁆𑀢𑀢𑁂𑀚𑁄 𑀅𑀦𑀦𑁆𑀢𑀬𑀲𑁄 𑀅𑀟𑁆𑀠𑁄 𑀫𑀳𑀤𑁆𑀥𑀦𑁄 𑀥𑀦𑀯𑀸, 𑀦𑁂𑀢𑀸 𑀯𑀺𑀦𑁂𑀢𑀸 𑀅𑀦𑀼𑀦𑁂𑀢𑀸, 𑀧𑀜𑁆𑀜𑀸𑀧𑁂𑀢𑀸 𑀦𑀺𑀚𑁆𑀛𑀸𑀧𑁂𑀢𑀸 𑀧𑁂𑀓𑁆𑀔𑁂𑀢𑀸 𑀧𑀲𑀸𑀤𑁂𑀢𑀸. 𑀲𑁄 𑀳𑀺 𑀪𑀕𑀯𑀸 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀫𑀕𑁆𑀕𑀲𑁆𑀲 𑀉𑀧𑁆𑀧𑀸𑀤𑁂𑀢𑀸, 𑀅𑀲𑀜𑁆𑀚𑀸𑀢𑀲𑁆𑀲 𑀫𑀕𑁆𑀕𑀲𑁆𑀲 𑀲𑀜𑁆𑀚𑀦𑁂𑀢𑀸, 𑀅𑀦𑀓𑁆𑀔𑀸𑀢𑀲𑁆𑀲 𑀫𑀕𑁆𑀕𑀲𑁆𑀲 𑀅𑀓𑁆𑀔𑀸𑀢𑀸, 𑀫𑀕𑁆𑀕𑀜𑁆𑀜𑀽 𑀫𑀕𑁆𑀕𑀯𑀺𑀤𑀽 𑀫𑀕𑁆𑀕𑀓𑁄𑀯𑀺𑀤𑁄 𑀫𑀕𑁆𑀕𑀸𑀦𑀼𑀕𑀸 𑀘 𑀧𑀦𑀲𑁆𑀲 𑀏𑀢𑀭𑀳𑀺 𑀲𑀸𑀯𑀓𑀸 𑀯𑀺𑀳𑀭𑀦𑁆𑀢𑀺 𑀧𑀘𑁆𑀙𑀸 𑀲𑀫𑀦𑁆𑀦𑀸𑀕𑀢𑀸.

𑀲𑁄 𑀳𑀺 𑀪𑀕𑀯𑀸 𑀚𑀸𑀦𑀁 𑀚𑀸𑀦𑀸𑀢𑀺 𑀧𑀲𑁆𑀲𑀁 𑀧𑀲𑁆𑀲𑀢𑀺, 𑀘𑀓𑁆𑀔𑀼𑀪𑀽𑀢𑁄 𑀜𑀸𑀡𑀪𑀽𑀢𑁄 𑀥𑀫𑁆𑀫𑀪𑀽𑀢𑁄 𑀩𑁆𑀭𑀳𑁆𑀫𑀪𑀽𑀢𑁄, 𑀯𑀢𑁆𑀢𑀸 𑀧𑀯𑀢𑁆𑀢𑀸 𑀅𑀢𑁆𑀣𑀲𑁆𑀲 𑀦𑀺𑀦𑁆𑀦𑁂𑀢𑀸 𑀅𑀫𑀢𑀲𑁆𑀲 𑀤𑀸𑀢𑀸 𑀥𑀫𑁆𑀫𑀲𑁆𑀲𑀸𑀫𑀻 𑀢𑀣𑀸𑀕𑀢𑁄; 𑀦𑀢𑁆𑀣𑀺 𑀢𑀲𑁆𑀲 𑀪𑀕𑀯𑀢𑁄 𑀅𑀜𑁆𑀜𑀸𑀢𑀁 𑀅𑀤𑀺𑀝𑁆𑀞𑀁 𑀅𑀯𑀺𑀤𑀺𑀢𑀁 𑀅𑀲𑀘𑁆𑀙𑀺𑀓𑀢𑀁 𑀅𑀨𑀲𑁆𑀲𑀺𑀢𑀁 [𑀅𑀨𑀼𑀲𑀺𑀢𑀁 (𑀲𑁆𑀬𑀸.)] 𑀧𑀜𑁆𑀜𑀸𑀬. 𑀅𑀢𑀻𑀢𑀁 𑀅𑀦𑀸𑀕𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀉𑀧𑀸𑀤𑀸𑀬 𑀲𑀩𑁆𑀩𑁂 𑀥𑀫𑁆𑀫𑀸 𑀲𑀩𑁆𑀩𑀸𑀓𑀸𑀭𑁂𑀦 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀜𑀸𑀡𑀫𑀼𑀔𑁂 𑀆𑀧𑀸𑀣𑀁 𑀆𑀕𑀘𑁆𑀙𑀦𑁆𑀢𑀺. 𑀬𑀁 𑀓𑀺𑀜𑁆𑀘𑀺 𑀦𑁂𑀬𑁆𑀬𑀁 𑀦𑀸𑀫 𑀅𑀢𑁆𑀣𑀺 𑀥𑀫𑁆𑀫𑀁 𑀚𑀸𑀦𑀺𑀢𑀩𑁆𑀩𑀁. 𑀅𑀢𑁆𑀢𑀢𑁆𑀣𑁄 𑀯𑀸 𑀧𑀭𑀢𑁆𑀣𑁄 𑀯𑀸 𑀉𑀪𑀬𑀢𑁆𑀣𑁄 𑀯𑀸 𑀤𑀺𑀝𑁆𑀞𑀥𑀫𑁆𑀫𑀺𑀓𑁄 𑀯𑀸 𑀅𑀢𑁆𑀣𑁄, 𑀲𑀫𑁆𑀧𑀭𑀸𑀬𑀺𑀓𑁄 𑀯𑀸 𑀅𑀢𑁆𑀣𑁄, 𑀉𑀢𑁆𑀢𑀸𑀦𑁄 𑀯𑀸 𑀅𑀢𑁆𑀣𑁄, 𑀕𑀫𑁆𑀪𑀻𑀭𑁄 𑀯𑀸 𑀅𑀢𑁆𑀣𑁄, 𑀕𑀽𑀴𑁆𑀳𑁄 𑀯𑀸 𑀅𑀢𑁆𑀣𑁄, 𑀧𑀝𑀺𑀘𑁆𑀙𑀦𑁆𑀦𑁄 𑀯𑀸 𑀅𑀢𑁆𑀣𑁄, 𑀦𑁂𑀬𑁆𑀬𑁄 𑀯𑀸 𑀅𑀢𑁆𑀣𑁄, 𑀦𑀻𑀢𑁄 𑀯𑀸 𑀅𑀢𑁆𑀣𑁄, 𑀅𑀦𑀯𑀚𑁆𑀚𑁄 𑀯𑀸 𑀅𑀢𑁆𑀣𑁄, 𑀦𑀺𑀓𑁆𑀓𑀺𑀮𑁂𑀲𑁄 𑀯𑀸 𑀅𑀢𑁆𑀣𑁄, 𑀯𑁄𑀤𑀸𑀦𑁄 𑀯𑀸 𑀅𑀢𑁆𑀣𑁄, 𑀧𑀭𑀫𑀢𑁆𑀣𑁄 𑀯𑀸 𑀅𑀢𑁆𑀣𑁄, 𑀲𑀩𑁆𑀩𑀁 𑀢𑀁 𑀅𑀦𑁆𑀢𑁄𑀩𑀼𑀤𑁆𑀥𑀜𑀸𑀡𑁂 𑀧𑀭𑀺𑀯𑀢𑁆𑀢𑀢𑀺.

𑀲𑀩𑁆𑀩𑀁 𑀓𑀸𑀬𑀓𑀫𑁆𑀫𑀁 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀺, 𑀲𑀩𑁆𑀩𑀁 𑀯𑀘𑀻𑀓𑀫𑁆𑀫𑀁 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀺, 𑀲𑀩𑁆𑀩𑀁 𑀫𑀦𑁄𑀓𑀫𑁆𑀫𑀁 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀺. 𑀅𑀢𑀻𑀢𑁂 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀅𑀧𑁆𑀧𑀝𑀺𑀳𑀢𑀁 𑀜𑀸𑀡𑀁, 𑀅𑀦𑀸𑀕𑀢𑁂 𑀅𑀧𑁆𑀧𑀝𑀺𑀳𑀢𑀁 𑀜𑀸𑀡𑀁, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀅𑀧𑁆𑀧𑀝𑀺𑀳𑀢𑀁 𑀜𑀸𑀡𑀁, 𑀬𑀸𑀯𑀢𑀓𑀁 𑀦𑁂𑀬𑁆𑀬𑀁 𑀢𑀸𑀯𑀢𑀓𑀁 𑀜𑀸𑀡𑀁, 𑀬𑀸𑀯𑀢𑀓𑀁 𑀜𑀸𑀡𑀁 𑀢𑀸𑀯𑀢𑀓𑀁 𑀦𑁂𑀬𑁆𑀬𑀁, 𑀦𑁂𑀬𑁆𑀬𑀧𑀭𑀺𑀬𑀦𑁆𑀢𑀺𑀓𑀁 𑀜𑀸𑀡𑀁, 𑀜𑀸𑀡𑀧𑀭𑀺𑀬𑀦𑁆𑀢𑀺𑀓𑀁 𑀦𑁂𑀬𑁆𑀬𑀁, 𑀦𑁂𑀬𑁆𑀬𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀜𑀸𑀡𑀁 𑀦𑀧𑁆𑀧𑀯𑀢𑁆𑀢𑀢𑀺, 𑀜𑀸𑀡𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀦𑁂𑀬𑁆𑀬𑀧𑀣𑁄 𑀦𑀢𑁆𑀣𑀺. 𑀅𑀜𑁆𑀜𑀫𑀜𑁆𑀜𑀧𑀭𑀺𑀬𑀦𑁆𑀢𑀝𑁆𑀞𑀸𑀬𑀺𑀦𑁄 𑀢𑁂 𑀥𑀫𑁆𑀫𑀸. 𑀬𑀣𑀸 𑀤𑁆𑀯𑀺𑀦𑁆𑀦𑀁 𑀲𑀫𑀼𑀕𑁆𑀕𑀧𑀝𑀮𑀸𑀦𑀁 𑀲𑀫𑁆𑀫𑀸 𑀨𑀼𑀲𑀺𑀢𑀸𑀦𑀁 𑀳𑁂𑀝𑁆𑀞𑀺𑀫𑀁 𑀲𑀫𑀼𑀕𑁆𑀕𑀧𑀝𑀮𑀁 𑀉𑀧𑀭𑀺𑀫𑀁 𑀦𑀸𑀢𑀺𑀯𑀢𑁆𑀢𑀢𑀺, 𑀉𑀧𑀭𑀺𑀫𑀁 𑀲𑀫𑀼𑀕𑁆𑀕𑀧𑀝𑀮𑀁 𑀳𑁂𑀝𑁆𑀞𑀺𑀫𑀁 𑀦𑀸𑀢𑀺𑀯𑀢𑁆𑀢𑀢𑀺 𑀅𑀜𑁆𑀜𑀫𑀜𑁆𑀜𑀧𑀭𑀺𑀬𑀦𑁆𑀢𑀝𑁆𑀞𑀸𑀬𑀺𑀦𑁄; 𑀏𑀯𑀫𑁂𑀯 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀦𑁂𑀬𑁆𑀬𑀜𑁆𑀘 𑀜𑀸𑀡𑀜𑁆𑀘 𑀅𑀜𑁆𑀜𑀫𑀜𑁆𑀜𑀧𑀭𑀺𑀬𑀦𑁆𑀢𑀝𑁆𑀞𑀸𑀬𑀺𑀦𑁄; 𑀬𑀸𑀯𑀢𑀓𑀁 𑀦𑁂𑀬𑁆𑀬𑀁 𑀢𑀸𑀯𑀢𑀓𑀁 𑀜𑀸𑀡𑀁, 𑀬𑀸𑀯𑀢𑀓𑀁 𑀜𑀸𑀡𑀁 𑀢𑀸𑀯𑀢𑀓𑀁 𑀦𑁂𑀬𑁆𑀬𑀁, 𑀦𑁂𑀬𑁆𑀬𑀧𑀭𑀺𑀬𑀦𑁆𑀢𑀺𑀓𑀁 𑀜𑀸𑀡𑀁, 𑀜𑀸𑀡𑀧𑀭𑀺𑀬𑀦𑁆𑀢𑀺𑀓𑀁 𑀦𑁂𑀬𑁆𑀬𑀁, 𑀦𑁂𑀬𑁆𑀬𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀜𑀸𑀡𑀁 𑀦𑀧𑁆𑀧𑀯𑀢𑁆𑀢𑀢𑀺, 𑀜𑀸𑀡𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀦𑁂𑀬𑁆𑀬𑀧𑀣𑁄 𑀦𑀢𑁆𑀣𑀺. 𑀅𑀜𑁆𑀜𑀫𑀜𑁆𑀜𑀧𑀭𑀺𑀬𑀦𑁆𑀢𑀝𑁆𑀞𑀸𑀬𑀺𑀦𑁄 𑀢𑁂 𑀥𑀫𑁆𑀫𑀸 𑀲𑀩𑁆𑀩𑀥𑀫𑁆𑀫𑁂𑀲𑀼 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀜𑀸𑀡𑀁 𑀧𑀯𑀢𑁆𑀢𑀢𑀺.

𑀲𑀩𑁆𑀩𑁂 𑀥𑀫𑁆𑀫𑀸 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀆𑀯𑀚𑁆𑀚𑀦𑀧𑀝𑀺𑀩𑀤𑁆𑀥𑀸 𑀆𑀓𑀗𑁆𑀔𑀧𑀝𑀺𑀩𑀤𑁆𑀥𑀸 𑀫𑀦𑀲𑀺𑀓𑀸𑀭𑀧𑀝𑀺𑀩𑀤𑁆𑀥𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀧𑀝𑀺𑀩𑀤𑁆𑀥𑀸. 𑀲𑀩𑁆𑀩𑀲𑀢𑁆𑀢𑁂𑀲𑀼 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀜𑀸𑀡𑀁 𑀧𑀯𑀢𑁆𑀢𑀢𑀺, 𑀲𑀩𑁆𑀩𑁂𑀲𑀜𑁆𑀘 𑀲𑀢𑁆𑀢𑀸𑀦𑀁 𑀪𑀕𑀯𑀸 𑀆𑀲𑀬𑀁 𑀚𑀸𑀦𑀸𑀢𑀺 𑀅𑀦𑀼𑀲𑀬𑀁 𑀚𑀸𑀦𑀸𑀢𑀺 𑀘𑀭𑀺𑀢𑀁 𑀚𑀸𑀦𑀸𑀢𑀺 𑀅𑀥𑀺𑀫𑀼𑀢𑁆𑀢𑀺𑀁 𑀚𑀸𑀦𑀸𑀢𑀺. 𑀅𑀧𑁆𑀧𑀭𑀚𑀓𑁆𑀔𑁂 𑀫𑀳𑀸𑀭𑀚𑀓𑁆𑀔𑁂 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁂 𑀫𑀼𑀤𑀺𑀦𑁆𑀤𑁆𑀭𑀺𑀬𑁂 𑀲𑁆𑀯𑀸𑀓𑀸𑀭𑁂 𑀤𑁆𑀯𑀸𑀓𑀸𑀭𑁂 𑀲𑀼𑀯𑀺𑀜𑁆𑀜𑀸𑀧𑀬𑁂 𑀤𑀼𑀯𑀺𑀜𑁆𑀜𑀸𑀧𑀬𑁂 𑀪𑀩𑁆𑀩𑀸𑀪𑀩𑁆𑀩𑁂 𑀲𑀢𑁆𑀢𑁂 𑀧𑀚𑀸𑀦𑀸𑀢𑀺. 𑀲𑀤𑁂𑀯𑀓𑁄 𑀮𑁄𑀓𑁄 𑀲𑀫𑀸𑀭𑀓𑁄 𑀲𑀩𑁆𑀭𑀳𑁆𑀫𑀓𑁄 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀻 𑀧𑀚𑀸 𑀲𑀤𑁂𑀯𑀫𑀦𑀼𑀲𑁆𑀲𑀸 𑀅𑀦𑁆𑀢𑁄𑀩𑀼𑀤𑁆𑀥𑀜𑀸𑀡𑁂 𑀧𑀭𑀺𑀯𑀢𑁆𑀢𑀢𑀺.

𑀬𑀣𑀸 𑀬𑁂 𑀓𑁂𑀘𑀺 𑀫𑀘𑁆𑀙𑀓𑀘𑁆𑀙𑀧𑀸 𑀅𑀦𑁆𑀢𑀫𑀲𑁄 𑀢𑀺𑀫𑀺𑀢𑀺𑀫𑀺𑀗𑁆𑀕𑀮𑀁 𑀉𑀧𑀸𑀤𑀸𑀬 𑀅𑀦𑁆𑀢𑁄𑀫𑀳𑀸𑀲𑀫𑀼𑀤𑁆𑀤𑁂 𑀧𑀭𑀺𑀯𑀢𑁆𑀢𑀦𑁆𑀢𑀺; 𑀏𑀯𑀫𑁂𑀯 𑀲𑀤𑁂𑀯𑀓𑁄 𑀮𑁄𑀓𑁄 𑀲𑀫𑀸𑀭𑀓𑁄 𑀲𑀩𑁆𑀭𑀳𑁆𑀫𑀓𑁄 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀻 𑀧𑀚𑀸 𑀲𑀤𑁂𑀯𑀫𑀦𑀼𑀲𑁆𑀲𑀸 𑀅𑀦𑁆𑀢𑁄𑀩𑀼𑀤𑁆𑀥𑀜𑀸𑀡𑁂 𑀧𑀭𑀺𑀯𑀢𑁆𑀢𑀢𑀺. 𑀬𑀣𑀸 𑀬𑁂 𑀓𑁂𑀘𑀺 𑀧𑀓𑁆𑀔𑀻 𑀅𑀦𑁆𑀢𑀫𑀲𑁄 𑀕𑀭𑀼𑀴𑀁 𑀯𑁂𑀦𑀢𑁂𑀬𑁆𑀬𑀁 𑀉𑀧𑀸𑀤𑀸𑀬 𑀆𑀓𑀸𑀲𑀲𑁆𑀲 𑀧𑀤𑁂𑀲𑁂 𑀧𑀭𑀺𑀯𑀢𑁆𑀢𑀦𑁆𑀢𑀺; 𑀏𑀯𑀫𑁂𑀯 𑀬𑁂𑀧𑀺 𑀢𑁂 𑀲𑀸𑀭𑀺𑀧𑀼𑀢𑁆𑀢𑀲𑀫𑀸 𑀧𑀜𑁆𑀜𑀸𑀬 𑀢𑁂𑀧𑀺 𑀩𑀼𑀤𑁆𑀥𑀜𑀸𑀡𑀲𑁆𑀲 𑀧𑀤𑁂𑀲𑁂 𑀧𑀭𑀺𑀯𑀢𑁆𑀢𑀦𑁆𑀢𑀺. 𑀩𑀼𑀤𑁆𑀥𑀜𑀸𑀡𑀁 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀧𑀜𑁆𑀜𑀁 𑀨𑀭𑀺𑀢𑁆𑀯𑀸 𑀅𑀪𑀺𑀪𑀯𑀺𑀢𑁆𑀯𑀸 𑀢𑀺𑀝𑁆𑀞𑀢𑀺𑀬𑁂𑀯.

𑀬𑁂𑀧𑀺 𑀢𑁂 𑀔𑀢𑁆𑀢𑀺𑀬𑀧𑀡𑁆𑀟𑀺𑀢𑀸 𑀩𑁆𑀭𑀸𑀳𑁆𑀫𑀡𑀧𑀡𑁆𑀟𑀺𑀢𑀸 𑀕𑀳𑀧𑀢𑀺𑀧𑀡𑁆𑀟𑀺𑀢𑀸 𑀲𑀫𑀡𑀧𑀡𑁆𑀟𑀺𑀢𑀸 𑀦𑀺𑀧𑀼𑀡𑀸 𑀓𑀢𑀧𑀭𑀧𑁆𑀧𑀯𑀸𑀤𑀸 𑀯𑀸𑀮𑀯𑁂𑀥𑀺𑀭𑀽𑀧𑀸. 𑀯𑁄𑀪𑀺𑀦𑁆𑀤𑀦𑁆𑀢𑀸 [𑀢𑁂 𑀪𑀺𑀦𑁆𑀤𑀦𑁆𑀢𑀸 (𑀓.)] 𑀫𑀜𑁆𑀜𑁂 𑀘𑀭𑀦𑁆𑀢𑀺 𑀧𑀜𑁆𑀜𑀸𑀕𑀢𑁂𑀦 𑀤𑀺𑀝𑁆𑀞𑀺𑀕𑀢𑀸𑀦𑀺. 𑀢𑁂 𑀧𑀜𑁆𑀳𑁂 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀢𑀣𑀸𑀕𑀢𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀦𑁆𑀢𑀺 𑀕𑀽𑀴𑁆𑀳𑀸𑀦𑀺 𑀘 𑀧𑀝𑀺𑀘𑁆𑀙𑀦𑁆𑀦𑀸𑀦𑀺 𑀘. 𑀓𑀣𑀺𑀢𑀸 𑀯𑀺𑀲𑀚𑁆𑀚𑀺𑀢𑀸𑀯 𑀢𑁂 𑀧𑀜𑁆𑀳𑀸 𑀪𑀕𑀯𑀢𑀸 𑀳𑁄𑀦𑁆𑀢𑀺 𑀦𑀺𑀤𑁆𑀤𑀺𑀝𑁆𑀞𑀓𑀸𑀭𑀡𑀸 𑀉𑀧𑀓𑁆𑀔𑀺𑀢𑁆𑀢𑀓𑀸 𑀘. 𑀢𑁂 𑀪𑀕𑀯𑀢𑁄 𑀲𑀫𑁆𑀧𑀚𑁆𑀚𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸𑀯 𑀢𑀢𑁆𑀣 𑀅𑀢𑀺𑀭𑁄𑀘𑀢𑀺 𑀬𑀤𑀺𑀤𑀁 𑀧𑀜𑁆𑀜𑀸𑀬𑀸𑀢𑀺 𑁋 𑀥𑁄𑀦𑁂𑀦 𑀬𑀼𑀕𑀁 𑀲𑀫𑀸𑀕𑀫𑀸, 𑀦 𑀳𑀺 𑀢𑁆𑀯𑀁 𑀲𑀓𑁆𑀔𑀲𑀺 𑀲𑀫𑁆𑀧𑀬𑀸𑀢𑀯𑁂.

𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀅𑀣 𑀢𑁆𑀯𑀁 𑀧𑀯𑀺𑀢𑀓𑁆𑀓𑀫𑀸𑀕𑀫𑀸, 𑀫𑀦𑀲𑀸 𑀤𑀺𑀝𑁆𑀞𑀺𑀕𑀢𑀸𑀦𑀺 𑀘𑀺𑀦𑁆𑀢𑀬𑀦𑁆𑀢𑁄;

𑀥𑁄𑀦𑁂𑀦 𑀬𑀼𑀕𑀁 𑀲𑀫𑀸𑀕𑀫𑀸, 𑀦 𑀳𑀺 𑀢𑁆𑀯𑀁 𑀲𑀓𑁆𑀔𑀲𑀺 𑀲𑀫𑁆𑀧𑀬𑀸𑀢𑀯𑁂’’𑀢𑀺.

𑀧𑀲𑀽𑀭𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁄 𑀅𑀝𑁆𑀞𑀫𑁄.