𑁬. 𑀚𑀭𑀸𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁄

𑀅𑀣 𑀚𑀭𑀸𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀁 𑀯𑀓𑁆𑀔𑀢𑀺 𑁋

𑁩𑁯. 𑀅𑀧𑁆𑀧𑀁 𑀯𑀢 𑀚𑀻𑀯𑀺𑀢𑀁 𑀇𑀤𑀁, 𑀑𑀭𑀁 𑀯𑀲𑁆𑀲𑀲𑀢𑀸𑀧𑀺 𑀫𑀺𑀬𑁆𑀬𑀢𑀺 [𑀫𑀻𑀬𑀢𑀺 (𑀲𑀻.)] ;

𑀬𑁄 𑀘𑁂𑀧𑀺 𑀅𑀢𑀺𑀘𑁆𑀘 𑀚𑀻𑀯𑀢𑀺, 𑀅𑀣 𑀔𑁄 𑀲𑁄 𑀚𑀭𑀲𑀸𑀧𑀺 𑀫𑀺𑀬𑁆𑀬𑀢𑀺.

𑀅𑀧𑁆𑀧𑀁 𑀯𑀢 𑀚𑀻𑀯𑀺𑀢𑀁 𑀇𑀤𑀦𑁆𑀢𑀺. 𑀚𑀻𑀯𑀺𑀢𑀦𑁆𑀢𑀺 𑀆𑀬𑀼 𑀞𑀺𑀢𑀺 𑀬𑀧𑀦𑀸 𑀬𑀸𑀧𑀦𑀸 𑀇𑀭𑀺𑀬𑀦𑀸 𑀯𑀢𑁆𑀢𑀦𑀸 𑀧𑀸𑀮𑀦𑀸 𑀚𑀻𑀯𑀺𑀢𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁. 𑀅𑀧𑀺 𑀘, 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀅𑀧𑁆𑀧𑀓𑀁 𑀚𑀻𑀯𑀺𑀢𑀁 𑀣𑁄𑀓𑀁 𑀚𑀻𑀯𑀺𑀢𑀁 𑁋 𑀞𑀺𑀢𑀺𑀧𑀭𑀺𑀢𑁆𑀢𑀢𑀸𑀬 𑀯𑀸 𑀅𑀧𑁆𑀧𑀓𑀁 𑀚𑀻𑀯𑀺𑀢𑀁, 𑀲𑀭𑀲𑀧𑀭𑀺𑀢𑁆𑀢𑀢𑀸𑀬 𑀯𑀸 𑀅𑀧𑁆𑀧𑀓𑀁 𑀚𑀻𑀯𑀺𑀢𑀁. 𑀓𑀣𑀁 𑀞𑀺𑀢𑀺𑀧𑀭𑀺𑀢𑁆𑀢𑀢𑀸𑀬 𑀯𑀸 𑀅𑀧𑁆𑀧𑀓𑀁 𑀚𑀻𑀯𑀺𑀢𑀁? 𑀅𑀢𑀻𑀢𑁂 𑀘𑀺𑀢𑁆𑀢𑀓𑁆𑀔𑀡𑁂 𑀚𑀻𑀯𑀺𑀢𑁆𑀣, 𑀦 𑀚𑀻𑀯𑀢𑀺 𑀦 𑀚𑀻𑀯𑀺𑀲𑁆𑀲𑀢𑀺; 𑀅𑀦𑀸𑀕𑀢𑁂 𑀘𑀺𑀢𑁆𑀢𑀓𑁆𑀔𑀡𑁂 𑀚𑀻𑀯𑀺𑀲𑁆𑀲𑀢𑀺, 𑀦 𑀚𑀻𑀯𑀢𑀺 𑀦 𑀚𑀻𑀯𑀺𑀢𑁆𑀣; 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀘𑀺𑀢𑁆𑀢𑀓𑁆𑀔𑀡𑁂 𑀚𑀻𑀯𑀢𑀺, 𑀦 𑀚𑀻𑀯𑀺𑀢𑁆𑀣 𑀦 𑀚𑀻𑀯𑀺𑀲𑁆𑀲𑀢𑀺.

‘‘𑀚𑀻𑀯𑀺𑀢𑀁 𑀅𑀢𑁆𑀢𑀪𑀸𑀯𑁄 𑀘, 𑀲𑀼𑀔𑀤𑀼𑀓𑁆𑀔𑀸 𑀘 𑀓𑁂𑀯𑀮𑀸;

𑀏𑀓𑀘𑀺𑀢𑁆𑀢𑀲𑀫𑀸𑀬𑀼𑀢𑁆𑀢𑀸, 𑀮𑀳𑀼𑀲𑁄 𑀯𑀢𑁆𑀢𑀢𑁂 𑀔𑀡𑁄.

‘‘𑀘𑀼𑀮𑁆𑀮𑀸𑀲𑀻𑀢𑀺𑀲𑀳𑀲𑁆𑀲𑀸𑀦𑀺, 𑀓𑀧𑁆𑀧𑀸 𑀢𑀺𑀝𑁆𑀞𑀦𑁆𑀢𑀺 𑀬𑁂 𑀫𑀭𑀽;

𑀦 𑀢𑁆𑀯𑁂𑀯 𑀢𑁂𑀧𑀺 𑀚𑀻𑀯𑀦𑁆𑀢𑀺, 𑀤𑁆𑀯𑀻𑀳𑀺 𑀘𑀺𑀢𑁆𑀢𑁂𑀳𑀺 𑀲𑀁𑀬𑀼𑀢𑀸 [𑀲𑀫𑁄𑀳𑀺𑀢𑀸 (𑀲𑀻. 𑀲𑁆𑀬𑀸. 𑀓.)].

‘‘𑀬𑁂 𑀦𑀺𑀭𑀼𑀤𑁆𑀥𑀸 𑀫𑀭𑀦𑁆𑀢𑀲𑁆𑀲, 𑀢𑀺𑀝𑁆𑀞𑀫𑀸𑀦𑀲𑁆𑀲 𑀯𑀸 𑀇𑀥;

𑀲𑀩𑁆𑀩𑁂𑀧𑀺 𑀲𑀤𑀺𑀲𑀸 𑀔𑀦𑁆𑀥𑀸, 𑀕𑀢𑀸 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀸.

‘‘𑀅𑀦𑀦𑁆𑀢𑀭𑀸 𑀘 𑀬𑁂 𑀪𑀕𑁆𑀕𑀸, 𑀬𑁂 𑀘 𑀪𑀕𑁆𑀕𑀸 𑀅𑀦𑀸𑀕𑀢𑀸;

𑀢𑀤𑀦𑁆𑀢𑀭𑁂 𑀦𑀺𑀭𑀼𑀤𑁆𑀥𑀸𑀦𑀁, 𑀯𑁂𑀲𑀫𑀁 𑀦𑀢𑁆𑀣𑀺 𑀮𑀓𑁆𑀔𑀡𑁂.

‘‘𑀅𑀦𑀺𑀩𑁆𑀩𑀢𑁆𑀢𑁂𑀦 𑀦 𑀚𑀸𑀢𑁄, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀦 𑀚𑀻𑀯𑀢𑀺;

𑀘𑀺𑀢𑁆𑀢𑀪𑀕𑁆𑀕𑀸 𑀫𑀢𑁄 𑀮𑁄𑀓𑁄, 𑀧𑀜𑁆𑀜𑀢𑁆𑀢𑀺 𑀧𑀭𑀫𑀢𑁆𑀣𑀺𑀬𑀸.

‘‘𑀬𑀣𑀸 𑀦𑀺𑀦𑁆𑀦𑀸 𑀧𑀯𑀢𑁆𑀢𑀦𑁆𑀢𑀺, 𑀙𑀦𑁆𑀤𑁂𑀦 𑀧𑀭𑀺𑀡𑀸𑀫𑀺𑀢𑀸;

𑀅𑀘𑁆𑀙𑀺𑀦𑁆𑀦𑀥𑀸𑀭𑀸 𑀯𑀢𑁆𑀢𑀦𑁆𑀢𑀺, 𑀲𑀴𑀸𑀬𑀢𑀦𑀧𑀘𑁆𑀘𑀬𑀸.

‘‘𑀅𑀦𑀺𑀥𑀸𑀦𑀕𑀢𑀸 𑀪𑀕𑁆𑀕𑀸, 𑀧𑀼𑀜𑁆𑀚𑁄 𑀦𑀢𑁆𑀣𑀺 𑀅𑀦𑀸𑀕𑀢𑁂;

𑀦𑀺𑀩𑁆𑀩𑀢𑁆𑀢𑀸 𑀬𑁂 𑀘 𑀢𑀺𑀝𑁆𑀞𑀦𑁆𑀢𑀺, 𑀆𑀭𑀕𑁆𑀕𑁂 𑀲𑀸𑀲𑀧𑀽𑀧𑀫𑀸.

‘‘𑀦𑀺𑀩𑁆𑀩𑀢𑁆𑀢𑀸𑀦𑀜𑁆𑀘 𑀥𑀫𑁆𑀫𑀸𑀦𑀁, 𑀪𑀗𑁆𑀕𑁄 𑀦𑁂𑀲𑀁 𑀧𑀼𑀭𑀓𑁆𑀔𑀢𑁄;

𑀧𑀮𑁄𑀓𑀥𑀫𑁆𑀫𑀸 𑀢𑀺𑀝𑁆𑀞𑀦𑁆𑀢𑀺, 𑀧𑀼𑀭𑀸𑀡𑁂𑀳𑀺 𑀅𑀫𑀺𑀲𑁆𑀲𑀺𑀢𑀸.

‘‘𑀅𑀤𑀲𑁆𑀲𑀦𑀢𑁄 𑀆𑀬𑀦𑁆𑀢𑀺, 𑀪𑀗𑁆𑀕𑀸 𑀕𑀘𑁆𑀙𑀦𑁆𑀢𑀺 𑀤𑀲𑁆𑀲𑀦𑀁;

𑀯𑀺𑀚𑁆𑀚𑀼𑀧𑁆𑀧𑀸𑀤𑁄𑀯 𑀆𑀓𑀸𑀲𑁂, 𑀉𑀧𑁆𑀧𑀚𑁆𑀚𑀦𑁆𑀢𑀺 𑀯𑀬𑀦𑁆𑀢𑀺 𑀘𑀸’’𑀢𑀺.

𑀏𑀯𑀁 𑀞𑀺𑀢𑀺𑀧𑀭𑀺𑀢𑁆𑀢𑀢𑀸𑀬 𑀅𑀧𑁆𑀧𑀓𑀁 𑀚𑀻𑀯𑀺𑀢𑀁.

𑀓𑀣𑀁 𑀲𑀭𑀲𑀧𑀭𑀺𑀢𑁆𑀢𑀢𑀸𑀬 𑀅𑀧𑁆𑀧𑀓𑀁 𑀚𑀻𑀯𑀺𑀢𑀁? 𑀅𑀲𑁆𑀲𑀸𑀲𑀽𑀧𑀦𑀺𑀩𑀤𑁆𑀥𑀁 [𑀅𑀲𑁆𑀲𑀸𑀲𑀽𑀧𑀦𑀺𑀩𑀦𑁆𑀥𑀁 (𑀓.)] 𑀚𑀻𑀯𑀺𑀢𑀁, 𑀧𑀲𑁆𑀲𑀸𑀲𑀽𑀧𑀦𑀺𑀩𑀤𑁆𑀥𑀁 𑀚𑀻𑀯𑀺𑀢𑀁, 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀽𑀧𑀦𑀺𑀩𑀤𑁆𑀥𑀁 𑀚𑀻𑀯𑀺𑀢𑀁, 𑀫𑀳𑀸𑀪𑀽𑀢𑀽𑀧𑀦𑀺𑀩𑀤𑁆𑀥𑀁 𑀚𑀻𑀯𑀺𑀢𑀁, 𑀓𑀩𑀴𑀻𑀓𑀸𑀭𑀸𑀳𑀸𑀭𑀽𑀧𑀦𑀺𑀩𑀤𑁆𑀥𑀁 𑀚𑀻𑀯𑀺𑀢𑀁, 𑀉𑀲𑁆𑀫𑀽𑀧𑀦𑀺𑀩𑀤𑁆𑀥𑀁 𑀚𑀻𑀯𑀺𑀢𑀁, 𑀯𑀺𑀜𑁆𑀜𑀸𑀡𑀽𑀧𑀦𑀺𑀩𑀤𑁆𑀥𑀁 𑀚𑀻𑀯𑀺𑀢𑀁. 𑀫𑀽𑀮𑀫𑁆𑀧𑀺 𑀇𑀫𑁂𑀲𑀁 𑀤𑀼𑀩𑁆𑀩𑀮𑀁, 𑀧𑀼𑀩𑁆𑀩𑀳𑁂𑀢𑀽𑀧𑀺 𑀇𑀫𑁂𑀲𑀁 𑀤𑀼𑀩𑁆𑀩𑀮𑀸, 𑀬𑁂 𑀧𑀘𑁆𑀘𑀬𑀸 𑀢𑁂𑀧𑀺 𑀤𑀼𑀩𑁆𑀩𑀮𑀸, 𑀬𑁂𑀧𑀺 𑀧𑀪𑀸𑀯𑀺𑀓𑀸 𑀢𑁂𑀧𑀺 𑀤𑀼𑀩𑁆𑀩𑀮𑀸, 𑀲𑀳𑀪𑀽𑀧𑀺 𑀇𑀫𑁂𑀲𑀁 𑀤𑀼𑀩𑁆𑀩𑀮𑀸, 𑀲𑀫𑁆𑀧𑀬𑁄𑀕𑀸𑀧𑀺 𑀇𑀫𑁂𑀲𑀁 𑀤𑀼𑀩𑁆𑀩𑀮𑀸, 𑀲𑀳𑀚𑀸𑀧𑀺 𑀇𑀫𑁂𑀲𑀁 𑀤𑀼𑀩𑁆𑀩𑀮𑀸, 𑀬𑀸𑀧𑀺 𑀧𑀬𑁄𑀚𑀺𑀓𑀸 𑀲𑀸𑀧𑀺 𑀤𑀼𑀩𑁆𑀩𑀮𑀸. 𑀅𑀜𑁆𑀜𑀫𑀜𑁆𑀜𑀁 𑀇𑀫𑁂 𑀦𑀺𑀘𑁆𑀘𑀤𑀼𑀩𑁆𑀩𑀮𑀸, 𑀅𑀜𑁆𑀜𑀫𑀜𑁆𑀜𑀁 𑀅𑀦𑀯𑀝𑁆𑀞𑀺𑀢𑀸 𑀇𑀫𑁂. 𑀅𑀜𑁆𑀜𑀫𑀜𑁆𑀜𑀁 𑀧𑀭𑀺𑀧𑀸𑀢𑀬𑀦𑁆𑀢𑀺 𑀇𑀫𑁂, 𑀅𑀜𑁆𑀜𑀫𑀜𑁆𑀜𑀲𑁆𑀲 𑀳𑀺 𑀦𑀢𑁆𑀣𑀺 𑀢𑀸𑀬𑀺𑀢𑀸, 𑀦 𑀘𑀸𑀧𑀺 𑀞𑀧𑁂𑀦𑁆𑀢𑀺 𑀅𑀜𑁆𑀜𑀫𑀜𑁆𑀜𑀁 𑀇𑀫𑁂. 𑀬𑁄𑀧𑀺 𑀦𑀺𑀩𑁆𑀩𑀢𑁆𑀢𑀓𑁄 𑀲𑁄 𑀦 𑀯𑀺𑀚𑁆𑀚𑀢𑀺.

‘‘𑀦 𑀘 𑀓𑁂𑀦𑀘𑀺 𑀓𑁄𑀘𑀺 𑀳𑀸𑀬𑀢𑀺, 𑀕𑀦𑁆𑀥𑀩𑁆𑀩𑀸 𑀘 𑀇𑀫𑁂 𑀳𑀺 𑀲𑀩𑁆𑀩𑀲𑁄;

𑀧𑀼𑀭𑀺𑀫𑁂𑀳𑀺 𑀧𑀪𑀸𑀯𑀺𑀓𑀸 𑀇𑀫𑁂, 𑀬𑁂𑀧𑀺 𑀧𑀪𑀸𑀯𑀺𑀓𑀸 𑀢𑁂 𑀧𑀼𑀭𑁂 𑀫𑀢𑀸;

𑀧𑀼𑀭𑀺𑀫𑀸𑀧𑀺 𑀘 𑀧𑀘𑁆𑀙𑀺𑀫𑀸𑀧𑀺 𑀘, 𑀅𑀜𑁆𑀜𑀫𑀜𑁆𑀜𑀁 𑀦 𑀓𑀤𑀸𑀘𑀺 𑀫𑀤𑁆𑀤𑀲𑀁𑀲𑀽’’𑀢𑀺.

𑀏𑀯𑀁 𑀲𑀭𑀲𑀧𑀭𑀺𑀢𑁆𑀢𑀢𑀸𑀬 𑀅𑀧𑁆𑀧𑀓𑀁 𑀚𑀻𑀯𑀺𑀢𑀁.

𑀅𑀧𑀺 𑀘, 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀁 [𑀘𑀸𑀢𑀼𑀫𑁆𑀫𑀳𑀸𑀭𑀸𑀚𑀺𑀓𑀸𑀦𑀁 (𑀲𑀻. 𑀲𑁆𑀬𑀸.)] 𑀤𑁂𑀯𑀸𑀦𑀁 𑀚𑀻𑀯𑀺𑀢𑀁 𑀉𑀧𑀸𑀤𑀸𑀬 𑀫𑀦𑀼𑀲𑁆𑀲𑀸𑀦𑀁 𑀅𑀧𑁆𑀧𑀓𑀁 𑀚𑀻𑀯𑀺𑀢𑀁 𑀧𑀭𑀺𑀢𑁆𑀢𑀁 𑀚𑀻𑀯𑀺𑀢𑀁 𑀣𑁄𑀓𑀁 𑀚𑀻𑀯𑀺𑀢𑀁 𑀔𑀡𑀺𑀓𑀁 𑀚𑀻𑀯𑀺𑀢𑀁 𑀮𑀳𑀼𑀓𑀁 𑀚𑀻𑀯𑀺𑀢𑀁 𑀇𑀢𑁆𑀢𑀭𑀁 𑀚𑀻𑀯𑀺𑀢𑀁 𑀅𑀦𑀤𑁆𑀥𑀦𑀻𑀬𑀁 𑀚𑀻𑀯𑀺𑀢𑀁 𑀦𑀘𑀺𑀭𑀝𑁆𑀞𑀺𑀢𑀺𑀓𑀁 𑀚𑀻𑀯𑀺𑀢𑀁. 𑀢𑀸𑀯𑀢𑀺𑀁𑀲𑀸𑀦𑀁 𑀤𑁂𑀯𑀸𑀦𑀁…𑀧𑁂… 𑀬𑀸𑀫𑀸𑀦𑀁 𑀤𑁂𑀯𑀸𑀦𑀁… 𑀢𑀼𑀲𑀺𑀢𑀸𑀦𑀁 𑀤𑁂𑀯𑀸𑀦𑀁… 𑀦𑀺𑀫𑁆𑀫𑀸𑀦𑀭𑀢𑀻𑀦𑀁 𑀤𑁂𑀯𑀸𑀦𑀁… 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻𑀦𑀁 𑀤𑁂𑀯𑀸𑀦𑀁… 𑀩𑁆𑀭𑀳𑁆𑀫𑀓𑀸𑀬𑀺𑀓𑀸𑀦𑀁 𑀤𑁂𑀯𑀸𑀦𑀁 𑀚𑀻𑀯𑀺𑀢𑀁 𑀉𑀧𑀸𑀤𑀸𑀬 𑀫𑀦𑀼𑀲𑁆𑀲𑀸𑀦𑀁 𑀅𑀧𑁆𑀧𑀓𑀁 𑀚𑀻𑀯𑀺𑀢𑀁 𑀧𑀭𑀺𑀢𑁆𑀢𑀁 𑀚𑀻𑀯𑀺𑀢𑀁 𑀣𑁄𑀓𑀁 𑀚𑀻𑀯𑀺𑀢𑀁 𑀔𑀡𑀺𑀓𑀁 𑀚𑀻𑀯𑀺𑀢𑀁 𑀮𑀳𑀼𑀓𑀁 𑀚𑀻𑀯𑀺𑀢𑀁 𑀇𑀢𑁆𑀢𑀭𑀁 𑀚𑀻𑀯𑀺𑀢𑀁 𑀅𑀦𑀤𑁆𑀥𑀦𑀻𑀬𑀁 𑀚𑀻𑀯𑀺𑀢𑀁 𑀦𑀘𑀺𑀭𑀝𑁆𑀞𑀺𑀢𑀺𑀓𑀁 𑀚𑀻𑀯𑀺𑀢𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀅𑀧𑁆𑀧𑀫𑀺𑀤𑀁, 𑀪𑀺𑀓𑁆𑀔𑀯𑁂, 𑀫𑀦𑀼𑀲𑁆𑀲𑀸𑀦𑀁 𑀆𑀬𑀼, 𑀕𑀫𑀦𑀺𑀬𑁄 𑀲𑀫𑁆𑀧𑀭𑀸𑀬𑁄, 𑀫𑀦𑁆𑀢𑀸𑀬 𑀩𑁄𑀤𑁆𑀥𑀩𑁆𑀩𑀁, 𑀓𑀢𑁆𑀢𑀩𑁆𑀩𑀁 𑀓𑀼𑀲𑀮𑀁, 𑀘𑀭𑀺𑀢𑀩𑁆𑀩𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀦𑀢𑁆𑀣𑀺 𑀚𑀸𑀢𑀲𑁆𑀲 𑀅𑀫𑀭𑀡𑀁. 𑀬𑁄, 𑀪𑀺𑀓𑁆𑀔𑀯𑁂, 𑀘𑀺𑀭𑀁 𑀚𑀻𑀯𑀢𑀺, 𑀲𑁄 𑀯𑀲𑁆𑀲𑀲𑀢𑀁 𑀅𑀧𑁆𑀧𑀁 𑀯𑀸 𑀪𑀺𑀬𑁆𑀬𑁄.

‘‘𑀅𑀧𑁆𑀧𑀫𑀸𑀬𑀼 𑀫𑀦𑀼𑀲𑁆𑀲𑀸𑀦𑀁, 𑀳𑀻𑀴𑁂𑀬𑁆𑀬 𑀦𑀁 𑀲𑀼𑀧𑁄𑀭𑀺𑀲𑁄;

𑀘𑀭𑁂𑀬𑁆𑀬𑀸𑀤𑀺𑀢𑁆𑀢𑀲𑀻𑀲𑁄𑀯 𑀦𑀢𑁆𑀣𑀺 𑀫𑀘𑁆𑀘𑀼𑀲𑁆𑀲𑀦𑀸𑀕𑀫𑁄.

‘‘𑀅𑀘𑁆𑀘𑀬𑀦𑁆𑀢𑀺 𑀅𑀳𑁄𑀭𑀢𑁆𑀢𑀸, 𑀚𑀻𑀯𑀺𑀢𑀁 𑀉𑀧𑀭𑀼𑀚𑁆𑀛𑀢𑀺;

𑀆𑀬𑀼 𑀔𑀺𑀬𑁆𑀬𑀢𑀺 𑀫𑀘𑁆𑀘𑀸𑀦𑀁, 𑀓𑀼𑀦𑁆𑀦𑀤𑀻𑀦𑀁𑀯 𑀑𑀤𑀓’’𑀦𑁆𑀢𑀺.

𑀅𑀧𑁆𑀧𑀁 𑀯𑀢 𑀚𑀻𑀯𑀺𑀢𑀁 𑀇𑀤𑀁.

𑀑𑀭𑀁 𑀯𑀲𑁆𑀲𑀲𑀢𑀸𑀧𑀺 𑀫𑀺𑀬𑁆𑀬𑀢𑀻𑀢𑀺. 𑀓𑀮𑀮𑀓𑀸𑀮𑁂𑀧𑀺 𑀘𑀯𑀢𑀺 𑀫𑀭𑀢𑀺 𑀅𑀦𑁆𑀢𑀭𑀥𑀸𑀬𑀢𑀺 𑀯𑀺𑀧𑁆𑀧𑀮𑀼𑀚𑁆𑀚𑀢𑀺, 𑀅𑀩𑁆𑀩𑀼𑀤𑀓𑀸𑀮𑁂𑀧𑀺 𑀘𑀯𑀢𑀺 𑀫𑀭𑀢𑀺 𑀅𑀦𑁆𑀢𑀭𑀥𑀸𑀬𑀢𑀺 𑀯𑀺𑀧𑁆𑀧𑀮𑀼𑀚𑁆𑀚𑀢𑀺, 𑀧𑁂𑀲𑀺𑀓𑀸𑀮𑁂𑀧𑀺 𑀘𑀯𑀢𑀺 𑀫𑀭𑀢𑀺 𑀅𑀦𑁆𑀢𑀭𑀥𑀸𑀬𑀢𑀺 𑀯𑀺𑀧𑁆𑀧𑀮𑀼𑀚𑁆𑀚𑀢𑀺, 𑀖𑀦𑀓𑀸𑀮𑁂𑀧𑀺 𑀘𑀯𑀢𑀺 𑀫𑀭𑀢𑀺 𑀅𑀦𑁆𑀢𑀭𑀥𑀸𑀬𑀢𑀺 𑀯𑀺𑀧𑁆𑀧𑀮𑀼𑀚𑁆𑀚𑀢𑀺, 𑀧𑀲𑀸𑀔𑀓𑀸𑀮𑁂𑀧𑀺 𑀘𑀯𑀢𑀺 𑀫𑀭𑀢𑀺 𑀅𑀦𑁆𑀢𑀭𑀥𑀸𑀬𑀢𑀺 𑀯𑀺𑀧𑁆𑀧𑀮𑀼𑀚𑁆𑀚𑀢𑀺, 𑀚𑀸𑀢𑀫𑀢𑁆𑀢𑁄𑀧𑀺 𑀘𑀯𑀢𑀺 𑀫𑀭𑀢𑀺 𑀅𑀦𑁆𑀢𑀭𑀥𑀸𑀬𑀢𑀺 𑀯𑀺𑀧𑁆𑀧𑀮𑀼𑀚𑁆𑀚𑀢𑀺, 𑀲𑀽𑀢𑀺𑀖𑀭𑁂𑀧𑀺 [𑀧𑀲𑀽𑀢𑀺𑀖𑀭𑁂 (𑀲𑁆𑀬𑀸.), 𑀲𑀽𑀢𑀺𑀓𑀖𑀭𑁂 (𑀓.)] 𑀘𑀯𑀢𑀺 𑀫𑀭𑀢𑀺 𑀅𑀦𑁆𑀢𑀭𑀥𑀸𑀬𑀢𑀺 𑀯𑀺𑀧𑁆𑀧𑀮𑀼𑀚𑁆𑀚𑀢𑀺, 𑀅𑀤𑁆𑀥𑀫𑀸𑀲𑀺𑀓𑁄𑀧𑀺 𑀘𑀯𑀢𑀺 𑀫𑀭𑀢𑀺 𑀅𑀦𑁆𑀢𑀭𑀥𑀸𑀬𑀢𑀺 𑀯𑀺𑀧𑁆𑀧𑀮𑀼𑀚𑁆𑀚𑀢𑀺, 𑀫𑀸𑀲𑀺𑀓𑁄𑀧𑀺 𑀘𑀯𑀢𑀺 𑀫𑀭𑀢𑀺 𑀅𑀦𑁆𑀢𑀭𑀥𑀸𑀬𑀢𑀺 𑀯𑀺𑀧𑁆𑀧𑀮𑀼𑀚𑁆𑀚𑀢𑀺, 𑀤𑁆𑀯𑁂𑀫𑀸𑀲𑀺𑀓𑁄𑀧𑀺…𑀧𑁂… 𑀢𑁂𑀫𑀸𑀲𑀺𑀓𑁄𑀧𑀺… 𑀘𑀢𑀼𑀫𑀸𑀲𑀺𑀓𑁄𑀧𑀺… 𑀧𑀜𑁆𑀘𑀫𑀸𑀲𑀺𑀓𑁄𑀧𑀺 𑀘𑀯𑀢𑀺 𑀫𑀭𑀢𑀺 𑀅𑀦𑁆𑀢𑀭𑀥𑀸𑀬𑀢𑀺 𑀯𑀺𑀧𑁆𑀧𑀮𑀼𑀚𑁆𑀚𑀢𑀺, 𑀙𑀫𑀸𑀲𑀺𑀓𑁄𑀧𑀺… 𑀲𑀢𑁆𑀢𑀫𑀸𑀲𑀺𑀓𑁄𑀧𑀺… 𑀅𑀝𑁆𑀞𑀫𑀸𑀲𑀺𑀓𑁄𑀧𑀺… 𑀦𑀯𑀫𑀸𑀲𑀺𑀓𑁄𑀧𑀺… 𑀤𑀲𑀫𑀸𑀲𑀺𑀓𑁄𑀧𑀺… 𑀲𑀁𑀯𑀘𑁆𑀙𑀭𑀺𑀓𑁄𑀧𑀺 𑀘𑀯𑀢𑀺 𑀫𑀭𑀢𑀺 𑀅𑀦𑁆𑀢𑀭𑀥𑀸𑀬𑀢𑀺 𑀯𑀺𑀧𑁆𑀧𑀮𑀼𑀚𑁆𑀚𑀢𑀺, 𑀤𑁆𑀯𑁂𑀯𑀲𑁆𑀲𑀺𑀓𑁄𑀧𑀺… 𑀢𑀺𑀯𑀲𑁆𑀲𑀺𑀓𑁄𑀧𑀺… 𑀘𑀢𑀼𑀯𑀲𑁆𑀲𑀺𑀓𑁄𑀧𑀺… 𑀧𑀜𑁆𑀘𑀯𑀲𑁆𑀲𑀺𑀓𑁄𑀧𑀺 … 𑀙𑀯𑀲𑁆𑀲𑀺𑀓𑁄𑀧𑀺… 𑀲𑀢𑁆𑀢𑀯𑀲𑁆𑀲𑀺𑀓𑁄𑀧𑀺… 𑀅𑀝𑁆𑀞𑀯𑀲𑁆𑀲𑀺𑀓𑁄𑀧𑀺… 𑀦𑀯𑀯𑀲𑁆𑀲𑀺𑀓𑁄𑀧𑀺… 𑀤𑀲𑀯𑀲𑁆𑀲𑀺𑀓𑁄𑀧𑀺… 𑀯𑀻𑀲𑀢𑀺𑀯𑀲𑁆𑀲𑀺𑀓𑁄𑀧𑀺… 𑀢𑀺𑀁𑀲𑀯𑀲𑁆𑀲𑀺𑀓𑁄𑀧𑀺… 𑀘𑀢𑁆𑀢𑀸𑀭𑀻𑀲𑀯𑀲𑁆𑀲𑀺𑀓𑁄𑀧𑀺… 𑀧𑀜𑁆𑀜𑀸𑀲𑀯𑀲𑁆𑀲𑀺𑀓𑁄𑀧𑀺… 𑀲𑀝𑁆𑀞𑀺𑀯𑀲𑁆𑀲𑀺𑀓𑁄𑀧𑀺… 𑀲𑀢𑁆𑀢𑀢𑀺𑀯𑀲𑁆𑀲𑀺𑀓𑁄𑀧𑀺… 𑀅𑀲𑀻𑀢𑀺𑀯𑀲𑁆𑀲𑀺𑀓𑁄𑀧𑀺… 𑀦𑀯𑀼𑀢𑀺𑀯𑀲𑁆𑀲𑀺𑀓𑁄𑀧𑀺 𑀘𑀯𑀢𑀺 𑀫𑀭𑀢𑀺 𑀅𑀦𑁆𑀢𑀭𑀥𑀸𑀬𑀢𑀺 𑀯𑀺𑀧𑁆𑀧𑀮𑀼𑀚𑁆𑀚𑀢𑀻𑀢𑀺 𑁋 𑀑𑀭𑀁 𑀯𑀲𑁆𑀲𑀲𑀢𑀸𑀧𑀺 𑀫𑀺𑀬𑁆𑀬𑀢𑀺.

𑀬𑁄 𑀘𑁂𑀧𑀺 𑀅𑀢𑀺𑀘𑁆𑀘 𑀚𑀻𑀯𑀢𑀻𑀢𑀺. 𑀬𑁄 𑀯𑀲𑁆𑀲𑀲𑀢𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀚𑀻𑀯𑀢𑀺 𑀲𑁄 𑀏𑀓𑀁 𑀯𑀸 𑀯𑀲𑁆𑀲𑀁 𑀚𑀻𑀯𑀢𑀺, 𑀤𑁆𑀯𑁂 𑀯𑀸 𑀯𑀲𑁆𑀲𑀸𑀦𑀺 𑀚𑀻𑀯𑀢𑀺, 𑀢𑀻𑀡𑀺 𑀯𑀸 𑀯𑀲𑁆𑀲𑀸𑀦𑀺 𑀚𑀻𑀯𑀢𑀺, 𑀘𑀢𑁆𑀢𑀸𑀭𑀺 𑀯𑀸 𑀯𑀲𑁆𑀲𑀸𑀦𑀺 𑀚𑀻𑀯𑀢𑀺, 𑀧𑀜𑁆𑀘 𑀯𑀸 𑀯𑀲𑁆𑀲𑀸𑀦𑀺 𑀚𑀻𑀯𑀢𑀺…𑀧𑁂… 𑀤𑀲 𑀯𑀸 𑀯𑀲𑁆𑀲𑀸𑀦𑀺 𑀚𑀻𑀯𑀢𑀺, 𑀯𑀻𑀲𑀢𑀺 𑀯𑀸 𑀯𑀲𑁆𑀲𑀸𑀦𑀺 𑀚𑀻𑀯𑀢𑀺, 𑀢𑀺𑀁𑀲𑀁 𑀯𑀸 𑀯𑀲𑁆𑀲𑀸𑀦𑀺 𑀚𑀻𑀯𑀢𑀺, 𑀘𑀢𑁆𑀢𑀸𑀭𑀻𑀲𑀁 𑀯𑀸 𑀯𑀲𑁆𑀲𑀸𑀦𑀺 𑀚𑀻𑀯𑀢𑀻𑀢𑀺 𑁋 𑀬𑁄 𑀘𑁂𑀧𑀺 𑀅𑀢𑀺𑀘𑁆𑀘 𑀚𑀻𑀯𑀢𑀺. 𑀅𑀣 𑀔𑁄 𑀲𑁄 𑀚𑀭𑀲𑀸𑀧𑀺 𑀫𑀺𑀬𑁆𑀬𑀢𑀻𑀢𑀺. 𑀬𑀤𑀸 𑀚𑀺𑀡𑁆𑀡𑁄 𑀳𑁄𑀢𑀺 𑀯𑀼𑀤𑁆𑀥𑁄 𑀫𑀳𑀮𑁆𑀮𑀓𑁄 𑀅𑀤𑁆𑀥𑀕𑀢𑁄 𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑁄 𑀔𑀡𑁆𑀟𑀤𑀦𑁆𑀢𑁄 𑀧𑀮𑀺𑀢𑀓𑁂𑀲𑁄 𑀯𑀺𑀮𑀽𑀦𑀁 𑀔𑀮𑀺𑀢𑀲𑀺𑀭𑁄 [𑀔𑀮𑀺𑀢𑀁 𑀲𑀺𑀭𑁄 (𑀲𑀻.)] 𑀯𑀮𑀺𑀦𑀁 𑀢𑀺𑀮𑀓𑀸𑀳𑀢𑀕𑀢𑁆𑀢𑁄 𑀯𑀗𑁆𑀓𑁄 𑀪𑁄𑀕𑁆𑀕𑁄 𑀤𑀡𑁆𑀟𑀧𑀭𑀸𑀬𑀦𑁄, 𑀲𑁄 𑀚𑀭𑀸𑀬𑀧𑀺 𑀘𑀯𑀢𑀺 𑀫𑀭𑀢𑀺 𑀅𑀦𑁆𑀢𑀭𑀥𑀸𑀬𑀢𑀺 𑀯𑀺𑀧𑁆𑀧𑀮𑀼𑀚𑁆𑀚𑀢𑀺, 𑀦𑀢𑁆𑀣𑀺 𑀫𑀭𑀡𑀫𑁆𑀳𑀸 𑀫𑁄𑀓𑁆𑀔𑁄.

‘‘𑀨𑀮𑀸𑀦𑀫𑀺𑀯 𑀧𑀓𑁆𑀓𑀸𑀦𑀁, 𑀧𑀸𑀢𑁄 𑀧𑀢𑀦𑀢𑁄 [𑀧𑀧𑀢𑀢𑁄 (𑀲𑀻.)] 𑀪𑀬𑀁;

𑀏𑀯𑀁 𑀚𑀸𑀢𑀸𑀦 𑀫𑀘𑁆𑀘𑀸𑀦𑀁, 𑀦𑀺𑀘𑁆𑀘𑀁 𑀫𑀭𑀡𑀢𑁄 𑀪𑀬𑀁.

‘‘𑀬𑀣𑀸𑀧𑀺 𑀓𑀼𑀫𑁆𑀪𑀓𑀸𑀭𑀲𑁆𑀲, 𑀓𑀢𑀸 𑀫𑀢𑁆𑀢𑀺𑀓𑀪𑀸𑀚𑀦𑀸;

𑀲𑀩𑁆𑀩𑁂 𑀪𑁂𑀤𑀦𑀧𑀭𑀺𑀬𑀦𑁆𑀢𑀸, 𑀏𑀯𑀁 𑀫𑀘𑁆𑀘𑀸𑀦 𑀚𑀻𑀯𑀺𑀢𑀁.

‘‘𑀤𑀳𑀭𑀸 𑀘 𑀫𑀳𑀦𑁆𑀢𑀸 𑀘, 𑀬𑁂 𑀩𑀸𑀮𑀸 𑀬𑁂 𑀘 𑀧𑀡𑁆𑀟𑀺𑀢𑀸;

𑀲𑀩𑁆𑀩𑁂 𑀫𑀘𑁆𑀘𑀼𑀯𑀲𑀁 𑀬𑀦𑁆𑀢𑀺, 𑀲𑀩𑁆𑀩𑁂 𑀫𑀘𑁆𑀘𑀼𑀧𑀭𑀸𑀬𑀦𑀸.

‘‘𑀢𑁂𑀲𑀁 𑀫𑀘𑁆𑀘𑀼𑀧𑀭𑁂𑀢𑀸𑀦𑀁, 𑀕𑀘𑁆𑀙𑀢𑀁 𑀧𑀭𑀮𑁄𑀓𑀢𑁄;

𑀦 𑀧𑀺𑀢𑀸 𑀢𑀸𑀬𑀢𑁂 𑀧𑀼𑀢𑁆𑀢𑀁, 𑀜𑀸𑀢𑀻 𑀯𑀸 𑀧𑀦 𑀜𑀸𑀢𑀓𑁂.

‘‘𑀧𑁂𑀓𑁆𑀔𑀢𑀜𑁆𑀜𑁂𑀯 𑀜𑀸𑀢𑀻𑀦𑀁, 𑀧𑀲𑁆𑀲 𑀮𑀸𑀮𑀧𑁆𑀧𑀢𑀁 𑀧𑀼𑀣𑀼;

𑀏𑀓𑀫𑁂𑀓𑁄𑀯 𑀫𑀘𑁆𑀘𑀸𑀦𑀁, 𑀕𑁄𑀯𑀚𑁆𑀛𑁄 𑀯𑀺𑀬 𑀦𑀺𑀬𑁆𑀬𑀢𑀺;

𑀏𑀯𑀫𑀩𑁆𑀪𑀸𑀳𑀢𑁄 𑀮𑁄𑀓𑁄, 𑀫𑀘𑁆𑀘𑀼𑀦𑀸 𑀘 𑀚𑀭𑀸𑀬 𑀘𑀸’’𑀢𑀺.

𑀅𑀣 𑀔𑁄 𑀲𑁄 𑀚𑀭𑀲𑀸𑀧𑀺 𑀫𑀺𑀬𑁆𑀬𑀢𑀺.

𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀅𑀧𑁆𑀧𑀁 𑀯𑀢 𑀚𑀻𑀯𑀺𑀢𑀁 𑀇𑀤𑀁, 𑀑𑀭𑀁 𑀯𑀲𑁆𑀲𑀲𑀢𑀸𑀧𑀺 𑀫𑀺𑀬𑁆𑀬𑀢𑀺;

𑀬𑁄 𑀘𑁂𑀧𑀺 𑀅𑀢𑀺𑀘𑁆𑀘 𑀚𑀻𑀯𑀢𑀺, 𑀅𑀣 𑀔𑁄 𑀲𑁄 𑀚𑀭𑀲𑀸𑀧𑀺 𑀫𑀺𑀬𑁆𑀬𑀢𑀻’’𑀢𑀺.

𑁪𑁦. 𑀲𑁄𑀘𑀦𑁆𑀢𑀺 𑀚𑀦𑀸 𑀫𑀫𑀸𑀬𑀺𑀢𑁂, 𑀦 𑀳𑀺 𑀲𑀦𑁆𑀢𑀺 𑀦𑀺𑀘𑁆𑀘𑀸 𑀧𑀭𑀺𑀕𑁆𑀕𑀳𑀸;

𑀯𑀺𑀦𑀸𑀪𑀸𑀯𑀁 𑀲𑀦𑁆𑀢𑀫𑁂𑀯𑀺𑀤𑀁, 𑀇𑀢𑀺 𑀤𑀺𑀲𑁆𑀯𑀸 𑀦𑀸𑀕𑀸𑀭𑀫𑀸𑀯𑀲𑁂.

𑀲𑁄𑀘𑀦𑁆𑀢𑀺 𑀚𑀦𑀸 𑀫𑀫𑀸𑀬𑀺𑀢𑁂𑀢𑀺. 𑀚𑀦𑀸𑀢𑀺 𑀔𑀢𑁆𑀢𑀺𑀬𑀸 𑀘 𑀩𑁆𑀭𑀸𑀳𑁆𑀫𑀡𑀸 𑀘 𑀯𑁂𑀲𑁆𑀲𑀸 𑀘 𑀲𑀼𑀤𑁆𑀤𑀸 𑀘 𑀕𑀳𑀝𑁆𑀞𑀸 𑀘 𑀧𑀩𑁆𑀩𑀚𑀺𑀢𑀸 𑀘 𑀤𑁂𑀯𑀸 𑀘 𑀫𑀦𑀼𑀲𑁆𑀲𑀸 𑀘. 𑀫𑀫𑀢𑁆𑀢𑀸𑀢𑀺 𑀤𑁆𑀯𑁂 𑀫𑀫𑀢𑁆𑀢𑀸 𑁋 𑀢𑀡𑁆𑀳𑀸𑀫𑀫𑀢𑁆𑀢𑀜𑁆𑀘 𑀤𑀺𑀝𑁆𑀞𑀺𑀫𑀫𑀢𑁆𑀢𑀜𑁆𑀘…𑀧𑁂… 𑀇𑀤𑀁 𑀢𑀡𑁆𑀳𑀸𑀫𑀫𑀢𑁆𑀢𑀁…𑀧𑁂… 𑀇𑀤𑀁 𑀤𑀺𑀝𑁆𑀞𑀺𑀫𑀫𑀢𑁆𑀢𑀁. 𑀫𑀫𑀸𑀬𑀺𑀢𑀁 𑀯𑀢𑁆𑀣𑀼𑀁 𑀅𑀘𑁆𑀙𑁂𑀤𑀲𑀗𑁆𑀓𑀺𑀦𑁄𑀧𑀺 𑀲𑁄𑀘𑀦𑁆𑀢𑀺, 𑀅𑀘𑁆𑀙𑀺𑀚𑁆𑀚𑀦𑁆𑀢𑁂𑀧𑀺 𑀲𑁄𑀘𑀦𑁆𑀢𑀺, 𑀅𑀘𑁆𑀙𑀺𑀦𑁆𑀦𑁂𑀧𑀺 𑀲𑁄𑀘𑀦𑁆𑀢𑀺. 𑀫𑀫𑀸𑀬𑀺𑀢𑀁 𑀯𑀢𑁆𑀣𑀼𑀁 𑀯𑀺𑀧𑀭𑀺𑀡𑀸𑀫𑀲𑀗𑁆𑀓𑀺𑀦𑁄𑀧𑀺 𑀲𑁄𑀘𑀦𑁆𑀢𑀺, 𑀯𑀺𑀧𑀭𑀺𑀡𑀸𑀫𑀦𑁆𑀢𑁂𑀧𑀺 𑀲𑁄𑀘𑀦𑁆𑀢𑀺, 𑀯𑀺𑀧𑀭𑀺𑀡𑀢𑁂𑀧𑀺 𑀲𑁄𑀘𑀦𑁆𑀢𑀺 𑀓𑀺𑀮𑀫𑀦𑁆𑀢𑀺 𑀧𑀭𑀺𑀤𑁂𑀯𑀦𑁆𑀢𑀺 𑀉𑀭𑀢𑁆𑀢𑀸𑀴𑀺𑀁 𑀓𑀦𑁆𑀤𑀦𑁆𑀢𑀺 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀦𑁆𑀢𑀻𑀢𑀺 𑁋 𑀲𑁄𑀘𑀦𑁆𑀢𑀺 𑀚𑀦𑀸 𑀫𑀫𑀸𑀬𑀺𑀢𑁂.

𑀦 𑀳𑀺 𑀲𑀦𑁆𑀢𑀺 𑀦𑀺𑀘𑁆𑀘𑀸 𑀧𑀭𑀺𑀕𑁆𑀕𑀳𑀸𑀢𑀺. 𑀤𑁆𑀯𑁂 𑀧𑀭𑀺𑀕𑁆𑀕𑀳𑀸 𑁋 𑀢𑀡𑁆𑀳𑀸𑀧𑀭𑀺𑀕𑁆𑀕𑀳𑁄 𑀘 𑀤𑀺𑀝𑁆𑀞𑀺𑀧𑀭𑀺𑀕𑁆𑀕𑀳𑁄 𑀘…𑀧𑁂… 𑀅𑀬𑀁 𑀢𑀡𑁆𑀳𑀸𑀧𑀭𑀺𑀕𑁆𑀕𑀳𑁄…𑀧𑁂… 𑀅𑀬𑀁 𑀤𑀺𑀝𑁆𑀞𑀺𑀧𑀭𑀺𑀕𑁆𑀕𑀳𑁄. 𑀢𑀡𑁆𑀳𑀸𑀧𑀭𑀺𑀕𑁆𑀕𑀳𑁄 𑀅𑀦𑀺𑀘𑁆𑀘𑁄 𑀲𑀗𑁆𑀔𑀢𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁄 𑀔𑀬𑀥𑀫𑁆𑀫𑁄 𑀯𑀬𑀥𑀫𑁆𑀫𑁄 𑀯𑀺𑀭𑀸𑀕𑀥𑀫𑁆𑀫𑁄 𑀦𑀺𑀭𑁄𑀥𑀥𑀫𑁆𑀫𑁄 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁄. 𑀤𑀺𑀝𑁆𑀞𑀺𑀧𑀭𑀺𑀕𑁆𑀕𑀳𑁄𑀧𑀺 𑀅𑀦𑀺𑀘𑁆𑀘𑁄 𑀲𑀗𑁆𑀔𑀢𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁄 𑀔𑀬𑀥𑀫𑁆𑀫𑁄 𑀯𑀬𑀥𑀫𑁆𑀫𑁄 𑀯𑀺𑀭𑀸𑀕𑀥𑀫𑁆𑀫𑁄 𑀦𑀺𑀭𑁄𑀥𑀥𑀫𑁆𑀫𑁄 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀧𑀲𑁆𑀲𑀣 𑀦𑁄 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀢𑀁 𑀧𑀭𑀺𑀕𑁆𑀕𑀳𑀁 𑀬𑁆𑀯𑀸𑀬𑀁 𑀧𑀭𑀺𑀕𑁆𑀕𑀳𑁄 𑀦𑀺𑀘𑁆𑀘𑁄 𑀥𑀼𑀯𑁄 𑀲𑀲𑁆𑀲𑀢𑁄 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁄 𑀲𑀲𑁆𑀲𑀢𑀺𑀲𑀫𑀁 𑀢𑀣𑁂𑀯 𑀞𑀲𑁆𑀲𑀢𑀻’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀲𑀸𑀥𑀼, 𑀪𑀺𑀓𑁆𑀔𑀯𑁂! 𑀅𑀳𑀫𑁆𑀧𑀺 𑀔𑁄 𑀏𑀢𑀁, 𑀪𑀺𑀓𑁆𑀔𑀯𑁂, 𑀧𑀭𑀺𑀕𑁆𑀕𑀳𑀁 𑀦 𑀲𑀫𑀦𑀼𑀧𑀲𑁆𑀲𑀸𑀫𑀺, 𑀬𑁆𑀯𑀸𑀬𑀁 𑀧𑀭𑀺𑀕𑁆𑀕𑀳𑁄 𑀦𑀺𑀘𑁆𑀘𑁄 𑀥𑀼𑀯𑁄 𑀲𑀲𑁆𑀲𑀢𑁄 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁄 𑀲𑀲𑁆𑀲𑀢𑀺𑀲𑀫𑀁 𑀢𑀣𑁂𑀯 𑀞𑀲𑁆𑀲𑀢𑀻’’𑀢𑀺. 𑀧𑀭𑀺𑀕𑁆𑀕𑀳𑀸 𑀦𑀺𑀘𑁆𑀘𑀸 𑀥𑀼𑀯𑀸 𑀲𑀲𑁆𑀲𑀢𑀸 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸 𑀦𑀢𑁆𑀣𑀺 𑀦 𑀲𑀦𑁆𑀢𑀺 𑀦 𑀲𑀁𑀯𑀺𑀚𑁆𑀚𑀦𑁆𑀢𑀺 𑀦 𑀮𑀩𑁆𑀪𑀦𑁆𑀢𑀻𑀢𑀺 𑁋 𑀦 𑀳𑀺 𑀲𑀦𑁆𑀢𑀺 𑀦𑀺𑀘𑁆𑀘𑀸 𑀧𑀭𑀺𑀕𑁆𑀕𑀳𑀸.

𑀯𑀺𑀦𑀸𑀪𑀸𑀯𑀁 𑀲𑀦𑁆𑀢𑀫𑁂𑀯𑀺𑀤𑀦𑁆𑀢𑀺. 𑀦𑀸𑀦𑀸𑀪𑀸𑀯𑁂 𑀯𑀺𑀦𑀸𑀪𑀸𑀯𑁂 𑀅𑀜𑁆𑀜𑀣𑀸𑀪𑀸𑀯𑁂 𑀲𑀦𑁆𑀢𑁂 𑀲𑀁𑀯𑀺𑀚𑁆𑀚𑀫𑀸𑀦𑁂 𑀉𑀧𑀮𑀩𑁆𑀪𑀺𑀬𑀫𑀸𑀦𑁂. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀅𑀮𑀁, 𑀆𑀦𑀦𑁆𑀤! 𑀫𑀸 𑀲𑁄𑀘𑀺 𑀫𑀸 𑀧𑀭𑀺𑀤𑁂𑀯𑀺. 𑀦𑀦𑀼 𑀏𑀢𑀁, 𑀆𑀦𑀦𑁆𑀤, 𑀫𑀬𑀸 𑀧𑀝𑀺𑀓𑀘𑁆𑀘𑁂𑀯 [𑀧𑀝𑀺𑀕𑀘𑁆𑀘𑁂𑀯 (𑀲𑀻.)] 𑀅𑀓𑁆𑀔𑀸𑀢𑀁 𑁋 ‘𑀲𑀩𑁆𑀩𑁂𑀳𑁂𑀯 𑀧𑀺𑀬𑁂𑀳𑀺 𑀫𑀦𑀸𑀧𑁂𑀳𑀺 𑀦𑀸𑀦𑀸𑀪𑀸𑀯𑁄 𑀯𑀺𑀦𑀸𑀪𑀸𑀯𑁄 𑀅𑀜𑁆𑀜𑀣𑀸𑀪𑀸𑀯𑁄. 𑀢𑀁 𑀓𑀼𑀢𑁂𑀢𑁆𑀣, 𑀆𑀦𑀦𑁆𑀤, 𑀮𑀩𑁆𑀪𑀸 𑁋 𑀬𑀁 𑀢𑀁 𑀚𑀸𑀢𑀁 𑀪𑀽𑀢𑀁 𑀲𑀗𑁆𑀔𑀢𑀁 𑀧𑀮𑁄𑀓𑀥𑀫𑁆𑀫𑀁 𑀢𑀁 𑀯𑀢 𑀫𑀸 𑀧𑀮𑀼𑀚𑁆𑀚𑀻’𑀢𑀺! 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀧𑀼𑀭𑀺𑀫𑀸𑀦𑀁 𑀧𑀼𑀭𑀺𑀫𑀸𑀦𑀁 𑀔𑀦𑁆𑀥𑀸𑀦𑀁 𑀥𑀸𑀢𑀽𑀦𑀁 𑀆𑀬𑀢𑀦𑀸𑀦𑀁 𑀯𑀺𑀧𑀭𑀺𑀡𑀸𑀫𑀜𑁆𑀜𑀣𑀸𑀪𑀸𑀯𑀸 𑀧𑀘𑁆𑀙𑀺𑀫𑀸 𑀧𑀘𑁆𑀙𑀺𑀫𑀸 𑀔𑀦𑁆𑀥𑀸 𑀘 𑀥𑀸𑀢𑀼𑀬𑁄 𑀘 𑀆𑀬𑀢𑀦𑀸𑀦𑀺 𑀘 𑀧𑀯𑀢𑁆𑀢𑀦𑁆𑀢𑀻’’𑀢𑀺 𑁋 𑀯𑀺𑀦𑀸𑀪𑀸𑀯𑀁 𑀲𑀦𑁆𑀢𑀫𑁂𑀯𑀺𑀤𑀁.

𑀇𑀢𑀺 𑀤𑀺𑀲𑁆𑀯𑀸 𑀦𑀸𑀕𑀸𑀭𑀫𑀸𑀯𑀲𑁂𑀢𑀺. 𑀇𑀢𑀻𑀢𑀺 𑀧𑀤𑀲𑀦𑁆𑀥𑀺 𑀧𑀤𑀲𑀁𑀲𑀕𑁆𑀕𑁄 𑀧𑀤𑀧𑀸𑀭𑀺𑀧𑀽𑀭𑀻 𑀅𑀓𑁆𑀔𑀭𑀲𑀫𑀯𑀸𑀬𑁄 𑀩𑁆𑀬𑀜𑁆𑀚𑀦𑀲𑀺𑀮𑀺𑀝𑁆𑀞𑀢𑀸 𑀧𑀤𑀸𑀦𑀼𑀧𑀼𑀩𑁆𑀩𑀢𑀸𑀧𑁂𑀢𑀁. 𑀇𑀢𑀻𑀢𑀺 𑀇𑀢𑀺 𑀤𑀺𑀲𑁆𑀯𑀸 𑀧𑀲𑁆𑀲𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸 𑀫𑀫𑀢𑁆𑀢𑁂𑀲𑀽𑀢𑀺 𑁋 𑀇𑀢𑀺 𑀤𑀺𑀲𑁆𑀯𑀸. 𑀦𑀸𑀕𑀸𑀭𑀫𑀸𑀯𑀲𑁂𑀢𑀺 𑀲𑀩𑁆𑀩𑀁 𑀖𑀭𑀸𑀯𑀸𑀲𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀢𑁆𑀯𑀸 𑀧𑀼𑀢𑁆𑀢𑀤𑀸𑀭𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀢𑁆𑀯𑀸 𑀜𑀸𑀢𑀺𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀢𑁆𑀯𑀸 𑀫𑀺𑀢𑁆𑀢𑀸𑀫𑀘𑁆𑀘𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀢𑁆𑀯𑀸 𑀲𑀦𑁆𑀦𑀺𑀥𑀺𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀢𑁆𑀯𑀸 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀓𑀺𑀜𑁆𑀘𑀦𑀪𑀸𑀯𑀁 𑀉𑀧𑀕𑀦𑁆𑀢𑁆𑀯𑀸 𑀏𑀓𑁄 𑀘𑀭𑁂𑀬𑁆𑀬 𑀯𑀺𑀳𑀭𑁂𑀬𑁆𑀬 𑀇𑀭𑀺𑀬𑁂𑀬𑁆𑀬 𑀯𑀢𑁆𑀢𑁂𑀬𑁆𑀬 𑀧𑀸𑀮𑁂𑀬𑁆𑀬 𑀬𑀧𑁂𑀬𑁆𑀬 𑀬𑀸𑀧𑁂𑀬𑁆𑀬𑀸𑀢𑀺 𑁋 𑀇𑀢𑀺 𑀤𑀺𑀲𑁆𑀯𑀸 𑀦𑀸𑀕𑀸𑀭𑀫𑀸𑀯𑀲𑁂.

𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀲𑁄𑀘𑀦𑁆𑀢𑀺 𑀚𑀦𑀸 𑀫𑀫𑀸𑀬𑀺𑀢𑁂, 𑀦 𑀳𑀺 𑀲𑀦𑁆𑀢𑀺 𑀦𑀺𑀘𑁆𑀘𑀸 𑀧𑀭𑀺𑀕𑁆𑀕𑀳𑀸;

𑀯𑀺𑀦𑀸𑀪𑀸𑀯𑀁 𑀲𑀦𑁆𑀢𑀫𑁂𑀯𑀺𑀤𑀁, 𑀇𑀢𑀺 𑀤𑀺𑀲𑁆𑀯𑀸 𑀦𑀸𑀕𑀸𑀭𑀫𑀸𑀯𑀲𑁂’’𑀢𑀺.

𑁪𑁧. 𑀫𑀭𑀡𑁂𑀦𑀧𑀺 𑀢𑀁 𑀧𑀳𑀻𑀬𑀢𑀺 [𑀧𑀳𑀺𑀬𑁆𑀬𑀢𑀺 (𑀓.)] 𑀬𑀁 𑀧𑀼𑀭𑀺𑀲𑁄 𑀫𑀫𑀺𑀤𑀦𑁆𑀢𑀺 𑀫𑀜𑁆𑀜𑀢𑀺;

𑀏𑀢𑀫𑁆𑀧𑀺 𑀯𑀺𑀤𑀺𑀢𑁆𑀯𑀸𑀦 [𑀏𑀢𑀁 𑀤𑀺𑀲𑁆𑀯𑀸𑀦 (𑀲𑀻. 𑀓.)] 𑀧𑀡𑁆𑀟𑀺𑀢𑁄, 𑀦 𑀫𑀫𑀢𑁆𑀢𑀸𑀬 𑀦𑀫𑁂𑀣 𑀫𑀸𑀫𑀓𑁄.

𑀫𑀭𑀡𑁂𑀦𑀧𑀺 𑀢𑀁 𑀧𑀳𑀻𑀬𑀢𑀻𑀢𑀺. 𑀫𑀭𑀡𑀦𑁆𑀢𑀺 𑀬𑀸 𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀢𑀫𑁆𑀳𑀸 𑀢𑀫𑁆𑀳𑀸 𑀲𑀢𑁆𑀢𑀦𑀺𑀓𑀸𑀬𑀸 𑀘𑀼𑀢𑀺 𑀘𑀯𑀦𑀢𑀸 𑀪𑁂𑀤𑁄 𑀅𑀦𑁆𑀢𑀭𑀥𑀸𑀦𑀁 𑀫𑀘𑁆𑀘𑀼𑀫𑀭𑀡𑀁 𑀓𑀸𑀮𑀁𑀓𑀺𑀭𑀺𑀬𑀸 𑀔𑀦𑁆𑀥𑀸𑀦𑀁 𑀪𑁂𑀤𑁄 𑀓𑀴𑁂𑀯𑀭𑀲𑁆𑀲 𑀦𑀺𑀓𑁆𑀔𑁂𑀧𑁄 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲𑀼𑀧𑀘𑁆𑀙𑁂𑀤𑁄. 𑀢𑀦𑁆𑀢𑀺 𑀭𑀽𑀧𑀕𑀢𑀁 𑀯𑁂𑀤𑀦𑀸𑀕𑀢𑀁 𑀲𑀜𑁆𑀜𑀸𑀕𑀢𑀁 𑀲𑀗𑁆𑀔𑀸𑀭𑀕𑀢𑀁 𑀯𑀺𑀜𑁆𑀜𑀸𑀡𑀕𑀢𑀁. 𑀧𑀳𑀻𑀬𑀢𑀻𑀢𑀺 𑀧𑀳𑀻𑀬𑀢𑀺 𑀚𑀳𑀻𑀬𑀢𑀺 𑀯𑀺𑀚𑀳𑀻𑀬𑀢𑀺 𑀅𑀦𑁆𑀢𑀭𑀥𑀸𑀬𑀢𑀺 𑀯𑀺𑀧𑁆𑀧𑀮𑀼𑀚𑁆𑀚𑀢𑀺. 𑀪𑀸𑀲𑀺𑀢𑀫𑁆𑀧𑀺 𑀳𑁂𑀢𑀁 𑁋

‘‘𑀧𑀼𑀩𑁆𑀩𑁂𑀯 𑀫𑀘𑁆𑀘𑀁 𑀯𑀺𑀚𑀳𑀦𑁆𑀢𑀺 𑀪𑁄𑀕𑀸, 𑀫𑀘𑁆𑀘𑁄𑀯 𑀦𑁂 𑀧𑀼𑀩𑁆𑀩𑀢𑀭𑀁 𑀚𑀳𑀸𑀢𑀺;

𑀅𑀲𑀲𑁆𑀲𑀢𑀸 𑀪𑁄𑀕𑀺𑀦𑁄 𑀓𑀸𑀫𑀓𑀸𑀫𑀻, 𑀢𑀲𑁆𑀫𑀸 𑀦 𑀲𑁄𑀘𑀸𑀫𑀳𑀁 𑀲𑁄𑀓𑀓𑀸𑀮𑁂.

‘‘𑀉𑀤𑁂𑀢𑀺 𑀆𑀧𑀽𑀭𑀢𑀺 𑀯𑁂𑀢𑀺 𑀘𑀦𑁆𑀤𑁄, 𑀅𑀢𑁆𑀢𑀁 𑀕𑀫𑁂𑀢𑁆𑀯𑀸𑀦 𑀧𑀮𑁂𑀢𑀺 𑀲𑀽𑀭𑀺𑀬𑁄;

𑀯𑀺𑀤𑀺𑀢𑀸 𑀫𑀬𑀸 𑀲𑀢𑁆𑀢𑀼𑀓 𑀮𑁄𑀓𑀥𑀫𑁆𑀫𑀸, 𑀢𑀲𑁆𑀫𑀸 𑀦 𑀲𑁄𑀘𑀸𑀫𑀳𑀁 𑀲𑁄𑀓𑀓𑀸𑀮𑁂’’𑀢𑀺.

𑀫𑀭𑀡𑁂𑀦𑀧𑀺 𑀢𑀁 𑀧𑀳𑀻𑀬𑀢𑀺. 𑀬𑀁 𑀧𑀼𑀭𑀺𑀲𑁄 𑀫𑀫𑀺𑀤𑀦𑁆𑀢𑀺 𑀫𑀜𑁆𑀜𑀢𑀻𑀢𑀺. 𑀬𑀦𑁆𑀢𑀺 𑀭𑀽𑀧𑀕𑀢𑀁 𑀯𑁂𑀤𑀦𑀸𑀕𑀢𑀁 𑀲𑀜𑁆𑀜𑀸𑀕𑀢𑀁 𑀲𑀗𑁆𑀔𑀸𑀭𑀕𑀢𑀁 𑀯𑀺𑀜𑁆𑀜𑀸𑀡𑀕𑀢𑀁. 𑀧𑀼𑀭𑀺𑀲𑁄𑀢𑀺 𑀲𑀗𑁆𑀔𑀸 𑀲𑀫𑀜𑁆𑀜𑀸 𑀧𑀜𑁆𑀜𑀢𑁆𑀢𑀺 𑀯𑁄𑀳𑀸𑀭𑁄 [𑀮𑁄𑀓𑀯𑁄𑀳𑀸𑀭𑁄 (𑀲𑁆𑀬𑀸.)] 𑀦𑀸𑀫𑀁 𑀦𑀸𑀫𑀓𑀫𑁆𑀫𑀁 𑀦𑀸𑀫𑀥𑁂𑀬𑁆𑀬𑀁 𑀦𑀺𑀭𑀼𑀢𑁆𑀢𑀺 𑀩𑁆𑀬𑀜𑁆𑀚𑀦𑀁 𑀅𑀪𑀺𑀮𑀸𑀧𑁄. 𑀫𑀫𑀺𑀤𑀦𑁆𑀢𑀺 𑀫𑀜𑁆𑀜𑀢𑀻𑀢𑀺 𑀢𑀡𑁆𑀳𑀸𑀫𑀜𑁆𑀜𑀦𑀸𑀬 𑀫𑀜𑁆𑀜𑀢𑀺, 𑀤𑀺𑀝𑁆𑀞𑀺𑀫𑀜𑁆𑀜𑀦𑀸𑀬 𑀫𑀜𑁆𑀜𑀢𑀺, 𑀫𑀸𑀦𑀫𑀜𑁆𑀜𑀦𑀸𑀬 𑀫𑀜𑁆𑀜𑀢𑀺, 𑀓𑀺𑀮𑁂𑀲𑀫𑀜𑁆𑀜𑀦𑀸𑀬 𑀫𑀜𑁆𑀜𑀢𑀺, 𑀤𑀼𑀘𑁆𑀘𑀭𑀺𑀢𑀫𑀜𑁆𑀜𑀦𑀸𑀬 𑀫𑀜𑁆𑀜𑀢𑀺, 𑀧𑀬𑁄𑀕𑀫𑀜𑁆𑀜𑀦𑀸𑀬 𑀫𑀜𑁆𑀜𑀢𑀺, 𑀯𑀺𑀧𑀸𑀓𑀫𑀜𑁆𑀜𑀦𑀸𑀬 𑀫𑀜𑁆𑀜𑀢𑀻𑀢𑀺 𑁋 𑀬𑀁 𑀧𑀼𑀭𑀺𑀲𑁄 𑀫𑀫𑀺𑀤𑀦𑁆𑀢𑀺 𑀫𑀜𑁆𑀜𑀢𑀺.

𑀏𑀢𑀫𑁆𑀧𑀺 𑀯𑀺𑀤𑀺𑀢𑁆𑀯𑀸𑀦 𑀧𑀡𑁆𑀟𑀺𑀢𑁄𑀢𑀺. 𑀏𑀢𑀁 𑀆𑀤𑀻𑀦𑀯𑀁 𑀜𑀢𑁆𑀯𑀸 𑀚𑀸𑀦𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸 𑀫𑀫𑀢𑁆𑀢𑁂𑀲𑀽𑀢𑀺, 𑀏𑀢𑀫𑁆𑀧𑀺 𑀯𑀺𑀤𑀺𑀢𑁆𑀯𑀸 𑀧𑀡𑁆𑀟𑀺𑀢𑁄 𑀥𑀻𑀭𑁄 𑀧𑀡𑁆𑀟𑀺𑀢𑁄 𑀧𑀜𑁆𑀜𑀯𑀸 𑀩𑀼𑀤𑁆𑀥𑀺𑀫𑀸 𑀜𑀸𑀡𑀻 𑀯𑀺𑀪𑀸𑀯𑀻 𑀫𑁂𑀥𑀸𑀯𑀻𑀢𑀺 𑁋 𑀏𑀢𑀫𑁆𑀧𑀺 𑀯𑀺𑀤𑀺𑀢𑁆𑀯𑀸𑀦 𑀧𑀡𑁆𑀟𑀺𑀢𑁄.

𑀦 𑀫𑀫𑀢𑁆𑀢𑀸𑀬 𑀦𑀫𑁂𑀣 𑀫𑀸𑀫𑀓𑁄𑀢𑀺. 𑀫𑀫𑀢𑁆𑀢𑀸𑀢𑀺 𑀤𑁆𑀯𑁂 𑀫𑀫𑀢𑁆𑀢𑀸 𑁋 𑀢𑀡𑁆𑀳𑀸𑀫𑀫𑀢𑁆𑀢𑀜𑁆𑀘 𑀤𑀺𑀝𑁆𑀞𑀺𑀫𑀫𑀢𑁆𑀢𑀜𑁆𑀘…𑀧𑁂… 𑀇𑀤𑀁 𑀢𑀡𑁆𑀳𑀸𑀫𑀫𑀢𑁆𑀢𑀁…𑀧𑁂… 𑀇𑀤𑀁 𑀤𑀺𑀝𑁆𑀞𑀺𑀫𑀫𑀢𑁆𑀢𑀁. 𑀫𑀸𑀫𑀓𑁄𑀢𑀺 𑀩𑀼𑀤𑁆𑀥𑀫𑀸𑀫𑀓𑁄 𑀥𑀫𑁆𑀫𑀫𑀸𑀫𑀓𑁄 𑀲𑀗𑁆𑀖𑀫𑀸𑀫𑀓𑁄. 𑀲𑁄 𑀪𑀕𑀯𑀦𑁆𑀢𑀁 𑀫𑀫𑀸𑀬𑀢𑀺, 𑀪𑀕𑀯𑀸 𑀢𑀁 𑀧𑀼𑀕𑁆𑀕𑀮𑀁 𑀧𑀭𑀺𑀕𑁆𑀕𑀡𑁆𑀳𑀸𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀬𑁂 𑀢𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀓𑀼𑀳𑀸 𑀣𑀤𑁆𑀥𑀸 [𑀩𑀤𑁆𑀥𑀸 (𑀓.) 𑀇𑀢𑀺𑀯𑀼. 𑁧𑁦𑁮] 𑀮𑀧𑀸 𑀲𑀺𑀗𑁆𑀕𑀻 𑀉𑀦𑁆𑀦𑀴𑀸 𑀅𑀲𑀫𑀸𑀳𑀺𑀢𑀸, 𑀦 𑀫𑁂 𑀢𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀫𑀸𑀫𑀓𑀸; 𑀅𑀧𑀕𑀢𑀸 𑀘 𑀢𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀇𑀫𑀲𑁆𑀫𑀸 𑀥𑀫𑁆𑀫𑀯𑀺𑀦𑀬𑀸. 𑀦 𑀘 𑀢𑁂 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀦𑁆𑀢𑀺. 𑀬𑁂 𑀘 𑀔𑁄 𑀢𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀦𑀺𑀓𑁆𑀓𑀼𑀳𑀸 𑀦𑀺𑀮𑁆𑀮𑀧𑀸 𑀥𑀻𑀭𑀸 𑀅𑀢𑁆𑀣𑀤𑁆𑀥𑀸 𑀲𑀼𑀲𑀫𑀸𑀳𑀺𑀢𑀸, 𑀢𑁂 𑀔𑁄 𑀫𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀫𑀸𑀫𑀓𑀸; 𑀅𑀦𑀧𑀕𑀢𑀸 𑀘 𑀢𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀇𑀫𑀲𑁆𑀫𑀸 𑀥𑀫𑁆𑀫𑀯𑀺𑀦𑀬𑀸. 𑀢𑁂 𑀘 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀦𑁆𑀢𑀺’’.

‘‘𑀓𑀼𑀳𑀸 𑀣𑀤𑁆𑀥𑀸 𑀮𑀧𑀸 𑀲𑀺𑀗𑁆𑀕𑀻, 𑀉𑀦𑁆𑀦𑀴𑀸 𑀅𑀲𑀫𑀸𑀳𑀺𑀢𑀸;

𑀦 𑀢𑁂 𑀥𑀫𑁆𑀫𑁂 𑀯𑀺𑀭𑀽𑀳𑀦𑁆𑀢𑀺, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀤𑁂𑀲𑀺𑀢𑁂.

‘‘𑀦𑀺𑀓𑁆𑀓𑀼𑀳𑀸 𑀦𑀺𑀮𑁆𑀮𑀧𑀸 𑀥𑀻𑀭𑀸, 𑀅𑀢𑁆𑀣𑀤𑁆𑀥𑀸 𑀲𑀼𑀲𑀫𑀸𑀳𑀺𑀢𑀸;

𑀢𑁂 𑀯𑁂 𑀥𑀫𑁆𑀫𑁂 𑀯𑀺𑀭𑀽𑀳𑀦𑁆𑀢𑀺, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀤𑁂𑀲𑀺𑀢𑁂’’.

𑀦 𑀫𑀫𑀢𑁆𑀢𑀸𑀬 𑀦𑀫𑁂𑀣 𑀫𑀸𑀫𑀓𑁄𑀢𑀺. 𑀫𑀸𑀫𑀓𑁄 𑀢𑀡𑁆𑀳𑀸𑀫𑀫𑀢𑁆𑀢𑀁 𑀧𑀳𑀸𑀬 𑀤𑀺𑀝𑁆𑀞𑀺𑀫𑀫𑀢𑁆𑀢𑀁 𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀫𑀫𑀢𑁆𑀢𑀸𑀬 𑀦 𑀦𑀫𑁂𑀬𑁆𑀬 𑀦 𑀑𑀦𑀫𑁂𑀬𑁆𑀬, 𑀦 𑀢𑀁𑀦𑀺𑀦𑁆𑀦𑁄 𑀅𑀲𑁆𑀲 𑀦 𑀢𑀧𑁆𑀧𑁄𑀡𑁄 𑀦 𑀢𑀧𑁆𑀧𑀩𑁆𑀪𑀸𑀭𑁄 𑀦 𑀢𑀤𑀥𑀺𑀫𑀼𑀢𑁆𑀢𑁄 𑀦 𑀢𑀤𑀥𑀺𑀧𑀢𑁂𑀬𑁆𑀬𑁄𑀢𑀺 𑁋 𑀦 𑀫𑀫𑀢𑁆𑀢𑀸𑀬 𑀦𑀫𑁂𑀣 𑀫𑀸𑀫𑀓𑁄.

𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀫𑀭𑀡𑁂𑀦𑀧𑀺 𑀢𑀁 𑀧𑀳𑀻𑀬𑀢𑀺, 𑀬𑀁 𑀧𑀼𑀭𑀺𑀲𑁄 𑀫𑀫𑀺𑀤𑀦𑁆𑀢𑀺 𑀫𑀜𑁆𑀜𑀢𑀺;

𑀏𑀢𑀫𑁆𑀧𑀺 𑀯𑀺𑀤𑀺𑀢𑁆𑀯𑀸𑀦 𑀧𑀡𑁆𑀟𑀺𑀢𑁄, 𑀦 𑀫𑀫𑀢𑁆𑀢𑀸𑀬 𑀦𑀫𑁂𑀣 𑀫𑀸𑀫𑀓𑁄’’𑀢𑀺.

𑁪𑁨. 𑀲𑀼𑀧𑀺𑀦𑁂𑀦 𑀬𑀣𑀸𑀧𑀺 𑀲𑀗𑁆𑀕𑀢𑀁, 𑀧𑀝𑀺𑀩𑀼𑀤𑁆𑀥𑁄 𑀧𑀼𑀭𑀺𑀲𑁄 𑀦 𑀧𑀲𑁆𑀲𑀢𑀺;

𑀏𑀯𑀫𑁆𑀧𑀺 𑀧𑀺𑀬𑀸𑀬𑀺𑀢𑀁 𑀚𑀦𑀁, 𑀧𑁂𑀢𑀁 𑀓𑀸𑀮𑀗𑁆𑀓𑀢𑀁 [𑀓𑀸𑀮𑀓𑀢𑀁 (𑀲𑀻. 𑀲𑁆𑀬𑀸.)] 𑀦 𑀧𑀲𑁆𑀲𑀢𑀺.

𑀲𑀼𑀧𑀺𑀦𑁂𑀦 𑀬𑀣𑀸𑀧𑀺 𑀲𑀗𑁆𑀕𑀢𑀦𑁆𑀢𑀺. 𑀲𑀗𑁆𑀕𑀢𑀁 𑀲𑀫𑀸𑀕𑀢𑀁 𑀲𑀫𑀸𑀳𑀺𑀢𑀁 𑀲𑀦𑁆𑀦𑀺𑀧𑀢𑀺𑀢𑀦𑁆𑀢𑀺 𑁋 𑀲𑀼𑀧𑀺𑀦𑁂𑀦 𑀬𑀣𑀸𑀧𑀺 𑀲𑀗𑁆𑀕𑀢𑀁. 𑀧𑀝𑀺𑀩𑀼𑀤𑁆𑀥𑁄 𑀧𑀼𑀭𑀺𑀲𑁄 𑀦 𑀧𑀲𑁆𑀲𑀢𑀻𑀢𑀺 𑀬𑀣𑀸 𑀧𑀼𑀭𑀺𑀲𑁄 𑀲𑀼𑀧𑀺𑀦𑀕𑀢𑁄 𑀘𑀦𑁆𑀤𑀁 𑀧𑀲𑁆𑀲𑀢𑀺, 𑀲𑀽𑀭𑀺𑀬𑀁 𑀧𑀲𑁆𑀲𑀢𑀺, 𑀫𑀳𑀸𑀲𑀫𑀼𑀤𑁆𑀤𑀁 𑀧𑀲𑁆𑀲𑀢𑀺, 𑀲𑀺𑀦𑁂𑀭𑀼𑀁 𑀧𑀩𑁆𑀩𑀢𑀭𑀸𑀚𑀸𑀦𑀁 𑀧𑀲𑁆𑀲𑀢𑀺, 𑀳𑀢𑁆𑀣𑀺𑀁 𑀧𑀲𑁆𑀲𑀢𑀺, 𑀅𑀲𑁆𑀲𑀁 𑀧𑀲𑁆𑀲𑀢𑀺, 𑀭𑀣𑀁 𑀧𑀲𑁆𑀲𑀢𑀺, 𑀧𑀢𑁆𑀢𑀺𑀁 𑀧𑀲𑁆𑀲𑀢𑀺, 𑀲𑁂𑀦𑀸𑀩𑁆𑀬𑀽𑀳𑀁 𑀧𑀲𑁆𑀲𑀢𑀺, 𑀆𑀭𑀸𑀫𑀭𑀸𑀫𑀡𑁂𑀬𑁆𑀬𑀓𑀁 𑀧𑀲𑁆𑀲𑀢𑀺, 𑀯𑀦𑀭𑀸𑀫𑀡𑁂𑀬𑁆𑀬𑀓𑀁…𑀧𑁂… 𑀪𑀽𑀫𑀺𑀭𑀸𑀫𑀡𑁂𑀬𑁆𑀬𑀓𑀁… 𑀧𑁄𑀓𑁆𑀔𑀭𑀡𑀻𑀭𑀸𑀫𑀡𑁂𑀬𑁆𑀬𑀓𑀁 𑀧𑀲𑁆𑀲𑀢𑀺; 𑀧𑀝𑀺𑀩𑀼𑀤𑁆𑀥𑁄 𑀦 𑀓𑀺𑀜𑁆𑀘𑀺 𑀧𑀲𑁆𑀲𑀢𑀻𑀢𑀺 𑁋 𑀧𑀝𑀺𑀩𑀼𑀤𑁆𑀥𑁄 𑀧𑀼𑀭𑀺𑀲𑁄 𑀦 𑀧𑀲𑁆𑀲𑀢𑀺.

𑀏𑀯𑀫𑁆𑀧𑀺 𑀧𑀺𑀬𑀸𑀬𑀺𑀢𑀁 𑀚𑀦𑀦𑁆𑀢𑀺. 𑀏𑀯𑀦𑁆𑀢𑀺 𑀑𑀧𑀫𑁆𑀫𑀲𑀫𑁆𑀧𑀝𑀺𑀧𑀸𑀤𑀦𑀁. 𑀧𑀺𑀬𑀸𑀬𑀺𑀢𑀁 𑀚𑀦𑀦𑁆𑀢𑀺 𑀫𑀫𑀸𑀬𑀺𑀢𑀁 𑀚𑀦𑀁 𑀫𑀸𑀢𑀭𑀁 𑀯𑀸 𑀧𑀺𑀢𑀭𑀁 𑀯𑀸 𑀪𑀸𑀢𑀭𑀁 𑀯𑀸 𑀪𑀕𑀺𑀦𑀺𑀁 𑀯𑀸 𑀧𑀼𑀢𑁆𑀢𑀁 𑀯𑀸 𑀥𑀻𑀢𑀭𑀁 𑀯𑀸 𑀫𑀺𑀢𑁆𑀢𑀁 𑀯𑀸 𑀅𑀫𑀘𑁆𑀘𑀁 𑀯𑀸 𑀜𑀸𑀢𑀺𑀁 𑀯𑀸 𑀲𑀸𑀮𑁄𑀳𑀺𑀢𑀁 𑀯𑀸𑀢𑀺 𑁋 𑀏𑀯𑀫𑁆𑀧𑀺 𑀧𑀺𑀬𑀸𑀬𑀺𑀢𑀁 𑀚𑀦𑀁.

𑀧𑁂𑀢𑀁 𑀓𑀸𑀮𑀗𑁆𑀓𑀢𑀁 𑀦 𑀧𑀲𑁆𑀲𑀢𑀻𑀢𑀺. 𑀧𑁂𑀢𑁄 𑀯𑀼𑀘𑁆𑀘𑀢𑀺 𑀫𑀢𑁄. 𑀓𑀸𑀮𑀗𑁆𑀓𑀢𑀁 𑀦 𑀧𑀲𑁆𑀲𑀢𑀺 𑀦 𑀤𑀓𑁆𑀔𑀢𑀺 𑀦𑀸𑀥𑀺𑀕𑀘𑁆𑀙𑀢𑀺 𑀦 𑀯𑀺𑀦𑁆𑀤𑀢𑀺 𑀦 𑀧𑀝𑀺𑀮𑀪𑀢𑀻𑀢𑀺 𑁋 𑀧𑁂𑀢𑀁 𑀓𑀸𑀮𑀗𑁆𑀓𑀢𑀁 𑀦 𑀧𑀲𑁆𑀲𑀢𑀺.

𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀲𑀼𑀧𑀺𑀦𑁂𑀦 𑀬𑀣𑀸𑀧𑀺 𑀲𑀗𑁆𑀕𑀢𑀁, 𑀧𑀝𑀺𑀩𑀼𑀤𑁆𑀥𑁄 𑀧𑀼𑀭𑀺𑀲𑁄 𑀦 𑀧𑀲𑁆𑀲𑀢𑀺;

𑀏𑀯𑀫𑁆𑀧𑀺 𑀧𑀺𑀬𑀸𑀬𑀺𑀢𑀁 𑀚𑀦𑀁, 𑀧𑁂𑀢𑀁 𑀓𑀸𑀮𑀗𑁆𑀓𑀢𑀁 𑀦 𑀧𑀲𑁆𑀲𑀢𑀻’’𑀢𑀺.

𑁪𑁩. 𑀤𑀺𑀝𑁆𑀞𑀸𑀧𑀺 𑀲𑀼𑀢𑀸𑀧𑀺 𑀢𑁂 𑀚𑀦𑀸, 𑀬𑁂𑀲𑀁 𑀦𑀸𑀫𑀫𑀺𑀤𑀁 𑀧𑀯𑀼𑀘𑁆𑀘𑀢𑀺;

𑀦𑀸𑀫𑀁𑀬𑁂𑀯𑀸𑀯𑀲𑀺𑀲𑁆𑀲𑀢𑀺, [𑀦𑀸𑀫𑀫𑁂𑀯𑀸’𑀯𑀲𑀺𑀲𑁆𑀲𑀢𑀺 (𑀲𑀻. 𑀲𑁆𑀬𑀸.)] 𑀅𑀓𑁆𑀔𑁂𑀬𑁆𑀬𑀁 𑀧𑁂𑀢𑀲𑁆𑀲 𑀚𑀦𑁆𑀢𑀼𑀦𑁄.

𑀤𑀺𑀝𑁆𑀞𑀸𑀧𑀺 𑀲𑀼𑀢𑀸𑀧𑀺 𑀢𑁂 𑀚𑀦𑀸𑀢𑀺. 𑀤𑀺𑀝𑁆𑀞𑀸𑀢𑀺 𑀬𑁂 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀪𑀺𑀲𑀫𑁆𑀪𑀽𑀢𑀸. 𑀲𑀼𑀢𑀸𑀢𑀺 𑀬𑁂 𑀲𑁄𑀢𑀯𑀺𑀜𑁆𑀜𑀸𑀡𑀸𑀪𑀺𑀲𑀫𑁆𑀪𑀽𑀢𑀸. 𑀢𑁂 𑀚𑀦𑀸𑀢𑀺 𑀔𑀢𑁆𑀢𑀺𑀬𑀸 𑀘 𑀩𑁆𑀭𑀸𑀳𑁆𑀫𑀡𑀸 𑀘 𑀯𑁂𑀲𑁆𑀲𑀸 𑀘 𑀲𑀼𑀤𑁆𑀤𑀸 𑀘 𑀕𑀳𑀝𑁆𑀞𑀸 𑀘 𑀧𑀩𑁆𑀩𑀚𑀺𑀢𑀸 𑀘 𑀤𑁂𑀯𑀸 𑀘 𑀫𑀦𑀼𑀲𑁆𑀲𑀸 𑀘𑀸𑀢𑀺 𑁋 𑀤𑀺𑀝𑁆𑀞𑀸𑀧𑀺 𑀲𑀼𑀢𑀸𑀧𑀺 𑀢𑁂 𑀚𑀦𑀸.

𑀬𑁂𑀲𑀁 𑀦𑀸𑀫𑀫𑀺𑀤𑀁 𑀧𑀯𑀼𑀘𑁆𑀘𑀢𑀻𑀢𑀺. 𑀬𑁂𑀲𑀦𑁆𑀢𑀺 𑀬𑁂𑀲𑀁 𑀔𑀢𑁆𑀢𑀺𑀬𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀯𑁂𑀲𑁆𑀲𑀸𑀦𑀁 𑀲𑀼𑀤𑁆𑀤𑀸𑀦𑀁 𑀕𑀳𑀝𑁆𑀞𑀸𑀦𑀁 𑀧𑀩𑁆𑀩𑀚𑀺𑀢𑀸𑀦𑀁 𑀤𑁂𑀯𑀸𑀦𑀁 𑀫𑀦𑀼𑀲𑁆𑀲𑀸𑀦𑀁. 𑀦𑀸𑀫𑀦𑁆𑀢𑀺 𑀲𑀗𑁆𑀔𑀸 𑀲𑀫𑀜𑁆𑀜𑀸 𑀧𑀜𑁆𑀜𑀢𑁆𑀢𑀺 𑀯𑁄𑀳𑀸𑀭𑁄 𑀦𑀸𑀫𑀁 𑀦𑀸𑀫𑀓𑀫𑁆𑀫𑀁 𑀦𑀸𑀫𑀥𑁂𑀬𑁆𑀬𑀁 𑀦𑀺𑀭𑀼𑀢𑁆𑀢𑀺 𑀩𑁆𑀬𑀜𑁆𑀚𑀦𑀁 𑀅𑀪𑀺𑀮𑀸𑀧𑁄. 𑀧𑀯𑀼𑀘𑁆𑀘𑀢𑀻𑀢𑀺 𑀯𑀼𑀘𑁆𑀘𑀢𑀺 𑀧𑀯𑀼𑀘𑁆𑀘𑀢𑀺 𑀓𑀣𑀻𑀬𑀢𑀺 𑀪𑀡𑀻𑀬𑀢𑀺 𑀤𑀻𑀧𑀻𑀬𑀢𑀺 𑀯𑁄𑀳𑀭𑀻𑀬𑀢𑀻𑀢𑀺 𑁋 𑀬𑁂𑀲𑀁 𑀦𑀸𑀫𑀫𑀺𑀤𑀁 𑀧𑀯𑀼𑀘𑁆𑀘𑀢𑀺.

𑀦𑀸𑀫𑀁𑀬𑁂𑀯𑀸𑀯𑀲𑀺𑀲𑁆𑀲𑀢𑀺 𑀅𑀓𑁆𑀔𑁂𑀬𑁆𑀬𑀦𑁆𑀢𑀺. 𑀭𑀽𑀧𑀕𑀢𑀁 𑀯𑁂𑀤𑀦𑀸𑀕𑀢𑀁 𑀲𑀜𑁆𑀜𑀸𑀕𑀢𑀁 𑀲𑀗𑁆𑀔𑀸𑀭𑀕𑀢𑀁 𑀯𑀺𑀜𑁆𑀜𑀸𑀡𑀕𑀢𑀁 𑀧𑀳𑀻𑀬𑀢𑀺 𑀚𑀳𑀻𑀬𑀢𑀺 𑀯𑀺𑀚𑀳𑀻𑀬𑀢𑀺 𑀅𑀦𑁆𑀢𑀭𑀥𑀸𑀬𑀢𑀺 𑀯𑀺𑀧𑁆𑀧𑀮𑀼𑀚𑁆𑀚𑀢𑀺, 𑀦𑀸𑀫𑀁𑀬𑁂𑀯𑀸𑀯𑀲𑀺𑀲𑁆𑀲𑀢𑀺. 𑀅𑀓𑁆𑀔𑁂𑀬𑁆𑀬𑀦𑁆𑀢𑀺. 𑀅𑀓𑁆𑀔𑀸𑀢𑀼𑀁 𑀓𑀣𑁂𑀢𑀼𑀁 𑀪𑀡𑀺𑀢𑀼𑀁 𑀤𑀻𑀧𑀬𑀺𑀢𑀼𑀁 𑀯𑁄𑀳𑀭𑀺𑀢𑀼𑀦𑁆𑀢𑀺 𑁋 𑀦𑀸𑀫𑀁 𑀏𑀯𑀸𑀯𑀲𑀺𑀲𑁆𑀲𑀢𑀺 𑀅𑀓𑁆𑀔𑁂𑀬𑁆𑀬𑀁. 𑀧𑁂𑀢𑀲𑁆𑀲 𑀚𑀦𑁆𑀢𑀼𑀦𑁄𑀢𑀺. 𑀧𑁂𑀢𑀲𑁆𑀲𑀸𑀢𑀺 𑀫𑀢𑀲𑁆𑀲 𑀓𑀸𑀮𑀗𑁆𑀓𑀢𑀲𑁆𑀲. 𑀚𑀦𑁆𑀢𑀼𑀦𑁄𑀢𑀺 𑀲𑀢𑁆𑀢𑀲𑁆𑀲 𑀦𑀭𑀲𑁆𑀲 𑀫𑀸𑀦𑀯𑀲𑁆𑀲 𑀧𑁄𑀲𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀚𑀻𑀯𑀲𑁆𑀲 𑀚𑀸𑀕𑀼𑀲𑁆𑀲 𑀚𑀦𑁆𑀢𑀼𑀲𑁆𑀲 𑀇𑀦𑁆𑀤𑀕𑀼𑀲𑁆𑀲 𑀫𑀦𑀼𑀚𑀲𑁆𑀲𑀸𑀢𑀺 𑁋 𑀧𑁂𑀢𑀲𑁆𑀲 𑀚𑀦𑁆𑀢𑀼𑀦𑁄.

𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀤𑀺𑀝𑁆𑀞𑀸𑀧𑀺 𑀲𑀼𑀢𑀸𑀧𑀺 𑀢𑁂 𑀚𑀦𑀸, 𑀬𑁂𑀲𑀁 𑀦𑀸𑀫𑀫𑀺𑀤𑀁 𑀧𑀯𑀼𑀘𑁆𑀘𑀢𑀺;

𑀦𑀸𑀫𑀁𑀬𑁂𑀯𑀸𑀯𑀲𑀺𑀲𑁆𑀲𑀢𑀺, 𑀅𑀓𑁆𑀔𑁂𑀬𑁆𑀬𑀁 𑀧𑁂𑀢𑀲𑁆𑀲 𑀚𑀦𑁆𑀢𑀼𑀦𑁄’’𑀢𑀺.

𑁪𑁪. 𑀲𑁄𑀓𑀧𑁆𑀧𑀭𑀺𑀤𑁂𑀯𑀫𑀘𑁆𑀙𑀭𑀁, 𑀦 𑀧𑀚𑀳𑀦𑁆𑀢𑀺 𑀕𑀺𑀤𑁆𑀥𑀸 𑀫𑀫𑀸𑀬𑀺𑀢𑁂;

𑀢𑀲𑁆𑀫𑀸 𑀫𑀼𑀦𑀬𑁄 𑀧𑀭𑀺𑀕𑁆𑀕𑀳𑀁, 𑀳𑀺𑀢𑁆𑀯𑀸 𑀅𑀘𑀭𑀺𑀁𑀲𑀼 𑀔𑁂𑀫𑀤𑀲𑁆𑀲𑀺𑀦𑁄.

𑀲𑁄𑀓𑀧𑁆𑀧𑀭𑀺𑀤𑁂𑀯𑀫𑀘𑁆𑀙𑀭𑀁 𑀦 𑀧𑀚𑀳𑀦𑁆𑀢𑀺 𑀕𑀺𑀤𑁆𑀥𑀸 𑀫𑀫𑀸𑀬𑀺𑀢𑁂𑀢𑀺. 𑀲𑁄𑀓𑁄𑀢𑀺 𑀜𑀸𑀢𑀺𑀩𑁆𑀬𑀲𑀦𑁂𑀦 𑀯𑀸 𑀨𑀼𑀝𑁆𑀞𑀲𑁆𑀲 𑀪𑁄𑀕𑀩𑁆𑀬𑀲𑀦𑁂𑀦 𑀯𑀸 𑀨𑀼𑀝𑁆𑀞𑀲𑁆𑀲 𑀭𑁄𑀕𑀩𑁆𑀬𑀲𑀦𑁂𑀦 𑀯𑀸 𑀨𑀼𑀝𑁆𑀞𑀲𑁆𑀲 𑀲𑀻𑀮𑀩𑁆𑀬𑀲𑀦𑁂𑀦 𑀯𑀸 𑀨𑀼𑀝𑁆𑀞𑀲𑁆𑀲 𑀤𑀺𑀝𑁆𑀞𑀺𑀩𑁆𑀬𑀲𑀦𑁂𑀦 𑀯𑀸 𑀨𑀼𑀝𑁆𑀞𑀲𑁆𑀲 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀩𑁆𑀬𑀲𑀦𑁂𑀦 𑀲𑀫𑀦𑁆𑀦𑀸𑀕𑀢𑀲𑁆𑀲 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀤𑀼𑀓𑁆𑀔𑀥𑀫𑁆𑀫𑁂𑀦 𑀨𑀼𑀝𑁆𑀞𑀲𑁆𑀲 𑀲𑁄𑀓𑁄 𑀲𑁄𑀘𑀦𑀸 𑀲𑁄𑀘𑀺𑀢𑀢𑁆𑀢𑀁 𑀅𑀦𑁆𑀢𑁄𑀲𑁄𑀓𑁄 𑀅𑀦𑁆𑀢𑁄𑀧𑀭𑀺𑀲𑁄𑀓𑁄 𑀅𑀦𑁆𑀢𑁄𑀤𑀸𑀳𑁄 𑀅𑀦𑁆𑀢𑁄𑀧𑀭𑀺𑀤𑀸𑀳𑁄 [𑀅𑀦𑁆𑀢𑁄𑀟𑀸𑀳𑁄 𑀅𑀦𑁆𑀢𑁄𑀧𑀭𑀺𑀟𑀸𑀳𑁄 (𑀲𑁆𑀬𑀸.)] 𑀘𑁂𑀢𑀲𑁄 𑀧𑀭𑀺𑀚𑁆𑀛𑀸𑀬𑀦𑀸 𑀤𑁄𑀫𑀦𑀲𑁆𑀲𑀁 𑀲𑁄𑀓𑀲𑀮𑁆𑀮𑀁. 𑀧𑀭𑀺𑀤𑁂𑀯𑁄𑀢𑀺 𑀜𑀸𑀢𑀺𑀩𑁆𑀬𑀲𑀦𑁂𑀦 𑀯𑀸 𑀨𑀼𑀝𑁆𑀞𑀲𑁆𑀲…𑀧𑁂… 𑀤𑀺𑀝𑁆𑀞𑀺𑀩𑁆𑀬𑀲𑀦𑁂𑀦 𑀯𑀸 𑀨𑀼𑀝𑁆𑀞𑀲𑁆𑀲 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀩𑁆𑀬𑀲𑀦𑁂𑀦 𑀲𑀫𑀦𑁆𑀦𑀸𑀕𑀢𑀲𑁆𑀲 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀤𑀼𑀓𑁆𑀔𑀥𑀫𑁆𑀫𑁂𑀦 𑀨𑀼𑀝𑁆𑀞𑀲𑁆𑀲 𑀆𑀤𑁂𑀯𑁄 𑀧𑀭𑀺𑀤𑁂𑀯𑁄 𑀆𑀤𑁂𑀯𑀦𑀸 𑀧𑀭𑀺𑀤𑁂𑀯𑀦𑀸 𑀆𑀤𑁂𑀯𑀺𑀢𑀢𑁆𑀢𑀁 𑀧𑀭𑀺𑀤𑁂𑀯𑀺𑀢𑀢𑁆𑀢𑀁 𑀯𑀸𑀘𑀸 𑀧𑀮𑀸𑀧𑁄 𑀯𑀺𑀧𑁆𑀧𑀮𑀸𑀧𑁄 𑀮𑀸𑀮𑀧𑁆𑀧𑁄 𑀮𑀸𑀮𑀧𑁆𑀧𑀸𑀬𑀦𑀸 𑀮𑀸𑀮𑀧𑁆𑀧𑀸𑀬𑀺𑀢𑀢𑁆𑀢𑀁. 𑀫𑀘𑁆𑀙𑀭𑀺𑀬𑀦𑁆𑀢𑀺 𑀧𑀜𑁆𑀘 𑀫𑀘𑁆𑀙𑀭𑀺𑀬𑀸𑀦𑀺 𑁋 𑀆𑀯𑀸𑀲𑀫𑀘𑁆𑀙𑀭𑀺𑀬𑀁, 𑀓𑀼𑀮𑀫𑀘𑁆𑀙𑀭𑀺𑀬𑀁, 𑀮𑀸𑀪𑀫𑀘𑁆𑀙𑀭𑀺𑀬𑀁, 𑀯𑀡𑁆𑀡𑀫𑀘𑁆𑀙𑀭𑀺𑀬𑀁, 𑀥𑀫𑁆𑀫𑀫𑀘𑁆𑀙𑀭𑀺𑀬𑀁. 𑀬𑀁 𑀏𑀯𑀭𑀽𑀧𑀁 𑀫𑀘𑁆𑀙𑀭𑀺𑀬𑀁 𑀫𑀘𑁆𑀙𑀭𑀸𑀬𑀦𑀸 𑀫𑀘𑁆𑀙𑀭𑀸𑀬𑀺𑀢𑀢𑁆𑀢𑀁 𑀯𑁂𑀯𑀺𑀘𑁆𑀙𑀁 𑀓𑀤𑀭𑀺𑀬𑀁 𑀓𑀝𑀼𑀓𑀜𑁆𑀘𑀼𑀓𑀢𑀸 𑀅𑀕𑁆𑀕𑀳𑀺𑀢𑀢𑁆𑀢𑀁 𑀘𑀺𑀢𑁆𑀢𑀲𑁆𑀲 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀫𑀘𑁆𑀙𑀭𑀺𑀬𑀁. 𑀅𑀧𑀺 𑀘 𑀔𑀦𑁆𑀥𑀫𑀘𑁆𑀙𑀭𑀺𑀬𑀫𑁆𑀧𑀺 𑀫𑀘𑁆𑀙𑀭𑀺𑀬𑀁, 𑀥𑀸𑀢𑀼𑀫𑀘𑁆𑀙𑀭𑀺𑀬𑀫𑁆𑀧𑀺 𑀫𑀘𑁆𑀙𑀭𑀺𑀬𑀁, 𑀆𑀬𑀢𑀦𑀫𑀘𑁆𑀙𑀭𑀺𑀬𑀫𑁆𑀧𑀺 𑀫𑀘𑁆𑀙𑀭𑀺𑀬𑀁 𑀕𑀸𑀳𑁄 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀫𑀘𑁆𑀙𑀭𑀺𑀬𑀁. 𑀕𑁂𑀥𑁄 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄…𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁. 𑀫𑀫𑀢𑁆𑀢𑀸𑀢𑀺 𑀤𑁆𑀯𑁂 𑀫𑀫𑀢𑁆𑀢𑀸 𑁋 𑀢𑀡𑁆𑀳𑀸𑀫𑀫𑀢𑁆𑀢𑀜𑁆𑀘 𑀤𑀺𑀝𑁆𑀞𑀺𑀫𑀫𑀢𑁆𑀢𑀜𑁆𑀘 …𑀧𑁂… 𑀇𑀤𑀁 𑀢𑀡𑁆𑀳𑀸𑀫𑀫𑀢𑁆𑀢𑀁…𑀧𑁂… 𑀇𑀤𑀁 𑀤𑀺𑀝𑁆𑀞𑀺𑀫𑀫𑀢𑁆𑀢𑀁. 𑀫𑀫𑀸𑀬𑀺𑀢𑀁 𑀯𑀢𑁆𑀣𑀼𑀁 𑀅𑀘𑁆𑀙𑁂𑀤𑀲𑀗𑁆𑀓𑀺𑀦𑁄𑀧𑀺 𑀲𑁄𑀘𑀦𑁆𑀢𑀺, 𑀅𑀘𑁆𑀙𑀺𑀚𑁆𑀚𑀦𑁆𑀢𑁂𑀧𑀺 𑀲𑁄𑀘𑀦𑁆𑀢𑀺, 𑀅𑀘𑁆𑀙𑀺𑀦𑁆𑀦𑁂𑀧𑀺 𑀲𑁄𑀘𑀦𑁆𑀢𑀺, 𑀫𑀫𑀸𑀬𑀺𑀢𑀁 𑀯𑀢𑁆𑀣𑀼𑀁 𑀯𑀺𑀧𑀭𑀺𑀡𑀸𑀫𑀲𑀗𑁆𑀓𑀺𑀦𑁄𑀧𑀺 𑀲𑁄𑀘𑀦𑁆𑀢𑀺, 𑀯𑀺𑀧𑀭𑀺𑀡𑀸𑀫𑀦𑁆𑀢𑁂𑀧𑀺 𑀲𑁄𑀘𑀦𑁆𑀢𑀺, 𑀯𑀺𑀧𑀭𑀺𑀡𑀢𑁂𑀧𑀺 𑀲𑁄𑀘𑀦𑁆𑀢𑀺, 𑀫𑀫𑀸𑀬𑀺𑀢𑀁 𑀯𑀢𑁆𑀣𑀼𑀁 𑀅𑀘𑁆𑀙𑁂𑀤𑀲𑀗𑁆𑀓𑀺𑀦𑁄𑀧𑀺 𑀧𑀭𑀺𑀤𑁂𑀯𑀦𑁆𑀢𑀺, 𑀅𑀘𑁆𑀙𑀺𑀚𑁆𑀚𑀦𑁆𑀢𑁂𑀧𑀺 𑀧𑀭𑀺𑀤𑁂𑀯𑀦𑁆𑀢𑀺, 𑀅𑀘𑁆𑀙𑀺𑀦𑁆𑀦𑁂𑀧𑀺 𑀧𑀭𑀺𑀤𑁂𑀯𑀦𑁆𑀢𑀺. 𑀫𑀫𑀸𑀬𑀺𑀢𑀁 𑀯𑀢𑁆𑀣𑀼𑀁 𑀯𑀺𑀧𑀭𑀺𑀡𑀸𑀫𑀲𑀗𑁆𑀓𑀺𑀦𑁄𑀧𑀺 𑀧𑀭𑀺𑀤𑁂𑀯𑀦𑁆𑀢𑀺, 𑀯𑀺𑀧𑀭𑀺𑀡𑀸𑀫𑀦𑁆𑀢𑁂𑀧𑀺 𑀧𑀭𑀺𑀤𑁂𑀯𑀦𑁆𑀢𑀺, 𑀯𑀺𑀧𑀭𑀺𑀡𑀢𑁂𑀧𑀺 𑀧𑀭𑀺𑀤𑁂𑀯𑀦𑁆𑀢𑀺. 𑀫𑀫𑀸𑀬𑀺𑀢𑀁 𑀯𑀢𑁆𑀣𑀼𑀁 𑀭𑀓𑁆𑀔𑀦𑁆𑀢𑀺 𑀕𑁄𑀧𑁂𑀦𑁆𑀢𑀺 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀺 𑀫𑀫𑀸𑀬𑀦𑁆𑀢𑀺 𑀫𑀘𑁆𑀙𑀭𑀸𑀬𑀦𑁆𑀢𑀺; 𑀫𑀫𑀸𑀬𑀺𑀢𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀲𑁄𑀓𑀁 𑀦 𑀚𑀳𑀦𑁆𑀢𑀺, 𑀧𑀭𑀺𑀤𑁂𑀯𑀁 𑀦 𑀚𑀳𑀦𑁆𑀢𑀺, 𑀫𑀘𑁆𑀙𑀭𑀺𑀬𑀁 𑀦 𑀚𑀳𑀦𑁆𑀢𑀺, 𑀕𑁂𑀥𑀁 𑀦 𑀚𑀳𑀦𑁆𑀢𑀺 𑀦𑀧𑁆𑀧𑀚𑀳𑀦𑁆𑀢𑀺 𑀦 𑀯𑀺𑀦𑁄𑀤𑁂𑀦𑁆𑀢𑀺 𑀦 𑀩𑁆𑀬𑀦𑁆𑀢𑀺𑀁 𑀓𑀭𑁄𑀦𑁆𑀢𑀺 𑀦 𑀅𑀦𑀪𑀸𑀯𑀁 𑀕𑀫𑁂𑀦𑁆𑀢𑀻𑀢𑀺 𑁋 𑀲𑁄𑀓𑀧𑁆𑀧𑀭𑀺𑀤𑁂𑀯𑀫𑀘𑁆𑀙𑀭𑀁 𑀦𑀧𑁆𑀧𑀚𑀳𑀦𑁆𑀢𑀺 𑀕𑀺𑀤𑁆𑀥𑀸 𑀫𑀫𑀸𑀬𑀺𑀢𑁂.

𑀢𑀲𑁆𑀫𑀸 𑀫𑀼𑀦𑀬𑁄 𑀧𑀭𑀺𑀕𑁆𑀕𑀳𑀁, 𑀳𑀺𑀢𑁆𑀯𑀸 𑀅𑀘𑀭𑀺𑀁𑀲𑀼 𑀔𑁂𑀫𑀤𑀲𑁆𑀲𑀺𑀦𑁄𑀢𑀺. 𑀢𑀲𑁆𑀫𑀸𑀢𑀺 𑀢𑀲𑁆𑀫𑀸 𑀢𑀁𑀓𑀸𑀭𑀡𑀸 𑀢𑀁𑀳𑁂𑀢𑀼 𑀢𑀧𑁆𑀧𑀘𑁆𑀘𑀬𑀸 𑀢𑀁𑀦𑀺𑀤𑀸𑀦𑀸 𑀏𑀢𑀁 𑀆𑀤𑀻𑀦𑀯𑀁 𑀲𑀫𑁆𑀧𑀲𑁆𑀲𑀫𑀸𑀦𑀸 𑀫𑀫𑀢𑁆𑀢𑁂𑀲𑀽𑀢𑀺 𑁋 𑀢𑀲𑁆𑀫𑀸. 𑀫𑀼𑀦𑀬𑁄𑀢𑀺 𑀫𑁄𑀦𑀁 𑀯𑀼𑀘𑁆𑀘𑀢𑀺 𑀜𑀸𑀡𑀁. 𑀬𑀸 𑀧𑀜𑁆𑀜𑀸 𑀧𑀚𑀸𑀦𑀦𑀸…𑀧𑁂… 𑀅𑀫𑁄𑀳𑁄 𑀥𑀫𑁆𑀫𑀯𑀺𑀘𑀬𑁄 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀢𑁂𑀦 𑀜𑀸𑀡𑁂𑀦 𑀲𑀫𑀦𑁆𑀦𑀸𑀕𑀢𑀸 𑀫𑀼𑀦𑀬𑁄 𑀫𑁄𑀦𑀧𑁆𑀧𑀢𑁆𑀢𑀸. 𑀢𑀻𑀡𑀺 𑀫𑁄𑀦𑁂𑀬𑁆𑀬𑀸𑀦𑀺 𑁋 𑀓𑀸𑀬𑀫𑁄𑀦𑁂𑀬𑁆𑀬𑀁, 𑀯𑀘𑀻𑀫𑁄𑀦𑁂𑀬𑁆𑀬𑀁, 𑀫𑀦𑁄𑀫𑁄𑀦𑁂𑀬𑁆𑀬𑀁…𑀧𑁂… 𑀲𑀗𑁆𑀕𑀚𑀸𑀮𑀫𑀢𑀺𑀘𑁆𑀘 𑀲𑁄 𑀫𑀼𑀦𑀺. 𑀧𑀭𑀺𑀕𑁆𑀕𑀳𑁄𑀢𑀺 𑀤𑁆𑀯𑁂 𑀧𑀭𑀺𑀕𑁆𑀕𑀳𑀸 𑁋 𑀢𑀡𑁆𑀳𑀸𑀧𑀭𑀺𑀕𑁆𑀕𑀳𑁄 𑀘 𑀤𑀺𑀝𑁆𑀞𑀺𑀧𑀭𑀺𑀕𑁆𑀕𑀳𑁄 𑀘…𑀧𑁂… 𑀅𑀬𑀁 𑀢𑀡𑁆𑀳𑀸𑀧𑀭𑀺𑀕𑁆𑀕𑀳𑁄…𑀧𑁂… 𑀅𑀬𑀁 𑀤𑀺𑀝𑁆𑀞𑀺𑀧𑀭𑀺𑀕𑁆𑀕𑀳𑁄. 𑀫𑀼𑀦𑀬𑁄 𑀢𑀡𑁆𑀳𑀸𑀧𑀭𑀺𑀕𑁆𑀕𑀳𑀁 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀤𑀺𑀝𑁆𑀞𑀺𑀧𑀭𑀺𑀕𑁆𑀕𑀳𑀁 𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀘𑀚𑀺𑀢𑁆𑀯𑀸 𑀧𑀚𑀳𑀺𑀢𑁆𑀯𑀸 𑀯𑀺𑀦𑁄𑀤𑁂𑀢𑁆𑀯𑀸 𑀩𑁆𑀬𑀦𑁆𑀢𑀺𑀁 𑀓𑀭𑀺𑀢𑁆𑀯𑀸 𑀅𑀦𑀪𑀸𑀯𑀁 𑀕𑀫𑁂𑀢𑁆𑀯𑀸 𑀅𑀘𑀭𑀺𑀁𑀲𑀼 𑀯𑀺𑀳𑀭𑀺𑀁𑀲𑀼 𑀇𑀭𑀺𑀬𑀺𑀁𑀲𑀼 𑀯𑀢𑁆𑀢𑀺𑀁𑀲𑀼 𑀧𑀸𑀮𑀺𑀁𑀲𑀼 𑀬𑀧𑀺𑀁𑀲𑀼 𑀬𑀸𑀧𑀺𑀁𑀲𑀼. 𑀔𑁂𑀫𑀤𑀲𑁆𑀲𑀺𑀦𑁄𑀢𑀺 𑀔𑁂𑀫𑀁 𑀯𑀼𑀘𑁆𑀘𑀢𑀺 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁. 𑀬𑁄 𑀲𑁄 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀢𑀡𑁆𑀳𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁. 𑀔𑁂𑀫𑀤𑀲𑁆𑀲𑀺𑀦𑁄𑀢𑀺 𑀔𑁂𑀫𑀤𑀲𑁆𑀲𑀺𑀦𑁄 𑀢𑀸𑀡𑀤𑀲𑁆𑀲𑀺𑀦𑁄 𑀮𑁂𑀡𑀤𑀲𑁆𑀲𑀺𑀦𑁄 𑀲𑀭𑀡𑀤𑀲𑁆𑀲𑀺𑀦𑁄 𑀅𑀪𑀬𑀤𑀲𑁆𑀲𑀺𑀦𑁄 𑀅𑀘𑁆𑀘𑀼𑀢𑀤𑀲𑁆𑀲𑀺𑀦𑁄 𑀅𑀫𑀢𑀤𑀲𑁆𑀲𑀺𑀦𑁄 𑀦𑀺𑀩𑁆𑀩𑀸𑀦𑀤𑀲𑁆𑀲𑀺𑀦𑁄𑀢𑀺 𑁋 𑀢𑀲𑁆𑀫𑀸 𑀫𑀼𑀦𑀬𑁄 𑀧𑀭𑀺𑀕𑁆𑀕𑀳𑀁 𑀳𑀺𑀢𑁆𑀯𑀸 𑀅𑀘𑀭𑀺𑀁𑀲𑀼 𑀔𑁂𑀫𑀤𑀲𑁆𑀲𑀺𑀦𑁄.

𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀲𑁄𑀓𑀧𑁆𑀧𑀭𑀺𑀤𑁂𑀯𑀫𑀘𑁆𑀙𑀭𑀁, 𑀦 𑀚𑀳𑀦𑁆𑀢𑀺 𑀕𑀺𑀤𑁆𑀥𑀸 𑀫𑀫𑀸𑀬𑀺𑀢𑁂;

𑀢𑀲𑁆𑀫𑀸 𑀫𑀼𑀦𑀬𑁄 𑀧𑀭𑀺𑀕𑁆𑀕𑀳𑀁, 𑀳𑀺𑀢𑁆𑀯𑀸 𑀅𑀘𑀭𑀺𑀁𑀲𑀼 𑀔𑁂𑀫𑀤𑀲𑁆𑀲𑀺𑀦𑁄’’𑀢𑀺.

𑁪𑁫. 𑀧𑀢𑀺𑀮𑀻𑀦𑀘𑀭𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀪𑀚𑀫𑀸𑀦𑀲𑁆𑀲 𑀯𑀺𑀯𑀺𑀢𑁆𑀢𑀫𑀸𑀲𑀦𑀁;

𑀲𑀸𑀫𑀕𑁆𑀕𑀺𑀬𑀫𑀸𑀳𑀼 𑀢𑀲𑁆𑀲 𑀢𑀁, 𑀬𑁄 𑀅𑀢𑁆𑀢𑀸𑀦𑀁 𑀪𑀯𑀦𑁂 𑀦 𑀤𑀲𑁆𑀲𑀬𑁂.

𑀧𑀢𑀺𑀮𑀻𑀦𑀘𑀭𑀲𑁆𑀲 𑀪𑀺𑀓𑁆𑀔𑀼𑀦𑁄𑀢𑀺. 𑀧𑀢𑀺𑀮𑀻𑀦𑀘𑀭𑀸 𑀯𑀼𑀘𑁆𑀘𑀦𑁆𑀢𑀺 𑀲𑀢𑁆𑀢 𑀲𑁂𑀓𑁆𑀔𑀸 [𑀲𑁂𑀔𑀸 (𑀲𑀻. 𑀲𑁆𑀬𑀸.)]. 𑀅𑀭𑀳𑀸 𑀧𑀢𑀺𑀮𑀻𑀦𑁄. 𑀓𑀺𑀁𑀓𑀸𑀭𑀡𑀸 𑀧𑀢𑀺𑀮𑀻𑀦𑀘𑀭𑀸 𑀯𑀼𑀘𑁆𑀘𑀦𑁆𑀢𑀺 𑀲𑀢𑁆𑀢 𑀲𑁂𑀓𑁆𑀔𑀸? 𑀢𑁂 𑀢𑀢𑁄 𑀢𑀢𑁄 𑀘𑀺𑀢𑁆𑀢𑀁 𑀧𑀢𑀺𑀮𑀻𑀦𑁂𑀦𑁆𑀢𑀸 𑀧𑀢𑀺𑀓𑀼𑀝𑁂𑀦𑁆𑀢𑀸 𑀧𑀢𑀺𑀯𑀝𑁆𑀝𑁂𑀦𑁆𑀢𑀸 𑀲𑀦𑁆𑀦𑀺𑀭𑀼𑀤𑁆𑀥𑀦𑁆𑀢𑀸 [𑀲𑀦𑁆𑀦𑀺𑀭𑀼𑀫𑁆𑀪𑁂𑀦𑁆𑀢𑀸 (𑀲𑀻.)] 𑀲𑀦𑁆𑀦𑀺𑀕𑁆𑀕𑀡𑁆𑀳𑀦𑁆𑀢𑀸 𑀲𑀦𑁆𑀦𑀺𑀯𑀸𑀭𑁂𑀦𑁆𑀢𑀸 𑀭𑀓𑁆𑀔𑀦𑁆𑀢𑀸 𑀕𑁄𑀧𑁂𑀦𑁆𑀢𑀸 𑀘𑀭𑀦𑁆𑀢𑀺 𑀯𑀺𑀘𑀭𑀦𑁆𑀢𑀺 𑀯𑀺𑀳𑀭𑀦𑁆𑀢𑀺 𑀇𑀭𑀺𑀬𑀦𑁆𑀢𑀺 𑀯𑀢𑁆𑀢𑁂𑀦𑁆𑀢𑀺 𑀧𑀸𑀮𑁂𑀦𑁆𑀢𑀺 𑀬𑀧𑁂𑀦𑁆𑀢𑀺 𑀬𑀸𑀧𑁂𑀦𑁆𑀢𑀺, 𑀘𑀓𑁆𑀔𑀼𑀤𑁆𑀯𑀸𑀭𑁂 𑀘𑀺𑀢𑁆𑀢𑀁 𑀧𑀢𑀺𑀮𑀻𑀦𑁂𑀦𑁆𑀢𑀸 𑀧𑀢𑀺𑀓𑀼𑀝𑁂𑀦𑁆𑀢𑀸 𑀧𑀢𑀺𑀯𑀝𑁆𑀝𑁂𑀦𑁆𑀢𑀸 𑀲𑀦𑁆𑀦𑀺𑀭𑀼𑀤𑁆𑀥𑀦𑁆𑀢𑀸 𑀲𑀦𑁆𑀦𑀺𑀕𑁆𑀕𑀡𑁆𑀳𑀦𑁆𑀢𑀸 𑀲𑀦𑁆𑀦𑀺𑀯𑀸𑀭𑁂𑀦𑁆𑀢𑀸 𑀭𑀓𑁆𑀔𑀦𑁆𑀢𑀸 𑀕𑁄𑀧𑁂𑀦𑁆𑀢𑀸 𑀘𑀭𑀦𑁆𑀢𑀺 𑀯𑀺𑀘𑀭𑀦𑁆𑀢𑀺 𑀯𑀺𑀳𑀭𑀦𑁆𑀢𑀺 𑀇𑀭𑀺𑀬𑀦𑁆𑀢𑀺 𑀯𑀢𑁆𑀢𑁂𑀦𑁆𑀢𑀺 𑀧𑀸𑀮𑁂𑀦𑁆𑀢𑀺 𑀬𑀧𑁂𑀦𑁆𑀢𑀺 𑀬𑀸𑀧𑁂𑀦𑁆𑀢𑀺, 𑀲𑁄𑀢𑀤𑁆𑀯𑀸𑀭𑁂 𑀘𑀺𑀢𑁆𑀢𑀁…𑀧𑁂… 𑀖𑀸𑀦𑀤𑁆𑀯𑀸𑀭𑁂 𑀘𑀺𑀢𑁆𑀢𑀁… 𑀚𑀺𑀯𑁆𑀳𑀸𑀤𑁆𑀯𑀸𑀭𑁂 𑀘𑀺𑀢𑁆𑀢𑀁… 𑀓𑀸𑀬𑀤𑁆𑀯𑀸𑀭𑁂 𑀘𑀺𑀢𑁆𑀢𑀁… 𑀫𑀦𑁄𑀤𑁆𑀯𑀸𑀭𑁂 𑀘𑀺𑀢𑁆𑀢𑀁 𑀧𑀢𑀺𑀮𑀻𑀦𑁂𑀦𑁆𑀢𑀸 𑀧𑀢𑀺𑀓𑀼𑀝𑁂𑀦𑁆𑀢𑀸 𑀧𑀢𑀺𑀯𑀝𑁆𑀝𑁂𑀦𑁆𑀢𑀸 𑀲𑀦𑁆𑀦𑀺𑀭𑀼𑀤𑁆𑀥𑀦𑁆𑀢𑀸 𑀲𑀦𑁆𑀦𑀺𑀕𑁆𑀕𑀡𑁆𑀳𑀦𑁆𑀢𑀸 𑀲𑀦𑁆𑀦𑀺𑀯𑀸𑀭𑁂𑀦𑁆𑀢𑀸 𑀭𑀓𑁆𑀔𑀦𑁆𑀢𑀸 𑀕𑁄𑀧𑁂𑀦𑁆𑀢𑀸 𑀘𑀭𑀦𑁆𑀢𑀺 𑀯𑀺𑀘𑀭𑀦𑁆𑀢𑀺 𑀯𑀺𑀳𑀭𑀦𑁆𑀢𑀺 𑀇𑀭𑀺𑀬𑀦𑁆𑀢𑀺 𑀯𑀢𑁆𑀢𑁂𑀦𑁆𑀢𑀺 𑀧𑀸𑀮𑁂𑀦𑁆𑀢𑀺 𑀬𑀧𑁂𑀦𑁆𑀢𑀺 𑀬𑀸𑀧𑁂𑀦𑁆𑀢𑀺. 𑀬𑀣𑀸 𑀓𑀼𑀓𑁆𑀓𑀼𑀝𑀧𑀢𑁆𑀢𑀁 𑀯𑀸 𑀦𑁆𑀳𑀸𑀭𑀼𑀤𑀤𑁆𑀤𑀼𑀮𑀁 𑀯𑀸 𑀅𑀕𑁆𑀕𑀺𑀫𑁆𑀳𑀺 𑀧𑀓𑁆𑀔𑀺𑀢𑁆𑀢𑀁 𑀧𑀢𑀺𑀮𑀻𑀬𑀢𑀺 𑀧𑀢𑀺𑀓𑀼𑀝𑀢𑀺 𑀧𑀢𑀺𑀯𑀝𑁆𑀝𑀢𑀺 𑀦 𑀲𑀫𑁆𑀧𑀲𑀸𑀭𑀺𑀬𑀢𑀺; 𑀏𑀯𑀫𑁂𑀯 𑀢𑀢𑁄 𑀢𑀢𑁄 𑀘𑀺𑀢𑁆𑀢𑀁 𑀧𑀢𑀺𑀮𑀻𑀦𑁂𑀦𑁆𑀢𑀸 𑀧𑀢𑀺𑀓𑀼𑀝𑁂𑀦𑁆𑀢𑀸 𑀧𑀢𑀺𑀯𑀝𑁆𑀝𑁂𑀦𑁆𑀢𑀸 𑀲𑀦𑁆𑀦𑀺𑀭𑀼𑀤𑁆𑀥𑀦𑁆𑀢𑀸 𑀲𑀦𑁆𑀦𑀺𑀕𑁆𑀕𑀡𑁆𑀳𑀦𑁆𑀢𑀸 𑀲𑀦𑁆𑀦𑀺𑀯𑀸𑀭𑁂𑀦𑁆𑀢𑀸 𑀭𑀓𑁆𑀔𑀦𑁆𑀢𑀸 𑀕𑁄𑀧𑁂𑀦𑁆𑀢𑀸 𑀘𑀭𑀦𑁆𑀢𑀺 𑀯𑀺𑀘𑀭𑀦𑁆𑀢𑀺 𑀯𑀺𑀳𑀭𑀦𑁆𑀢𑀺 𑀇𑀭𑀺𑀬𑀦𑁆𑀢𑀺 𑀯𑀢𑁆𑀢𑁂𑀦𑁆𑀢𑀺 𑀧𑀸𑀮𑁂𑀦𑁆𑀢𑀺 𑀬𑀧𑁂𑀦𑁆𑀢𑀺 𑀬𑀸𑀧𑁂𑀦𑁆𑀢𑀺, 𑀘𑀓𑁆𑀔𑀼𑀤𑁆𑀯𑀸𑀭𑁂 𑀘𑀺𑀢𑁆𑀢𑀁…𑀧𑁂… 𑀲𑁄𑀢𑀤𑁆𑀯𑀸𑀭𑁂 𑀘𑀺𑀢𑁆𑀢𑀁… 𑀖𑀸𑀦𑀤𑁆𑀯𑀸𑀭𑁂 𑀘𑀺𑀢𑁆𑀢𑀁… 𑀚𑀺𑀯𑁆𑀳𑀸𑀤𑁆𑀯𑀸𑀭𑁂 𑀘𑀺𑀢𑁆𑀢𑀁… 𑀓𑀸𑀬𑀤𑁆𑀯𑀸𑀭𑁂 𑀘𑀺𑀢𑁆𑀢𑀁… 𑀫𑀦𑁄𑀤𑁆𑀯𑀸𑀭𑁂 𑀘𑀺𑀢𑁆𑀢𑀁 𑀧𑀢𑀺𑀮𑀻𑀦𑁂𑀦𑁆𑀢𑀸 𑀧𑀢𑀺𑀓𑀼𑀝𑁂𑀦𑁆𑀢𑀸 𑀧𑀢𑀺𑀯𑀝𑁆𑀝𑁂𑀦𑁆𑀢𑀸 𑀲𑀦𑁆𑀦𑀺𑀭𑀼𑀤𑁆𑀥𑀦𑁆𑀢𑀸 𑀲𑀦𑁆𑀦𑀺𑀕𑁆𑀕𑀡𑁆𑀳𑀦𑁆𑀢𑀸 𑀲𑀦𑁆𑀦𑀺𑀯𑀸𑀭𑁂𑀦𑁆𑀢𑀸 𑀭𑀓𑁆𑀔𑀦𑁆𑀢𑀸 𑀕𑁄𑀧𑁂𑀦𑁆𑀢𑀸 𑀘𑀭𑀦𑁆𑀢𑀺 𑀯𑀺𑀘𑀭𑀦𑁆𑀢𑀺 𑀯𑀺𑀳𑀭𑀦𑁆𑀢𑀺 𑀇𑀭𑀺𑀬𑀦𑁆𑀢𑀺 𑀯𑀢𑁆𑀢𑁂𑀦𑁆𑀢𑀺 𑀧𑀸𑀮𑁂𑀦𑁆𑀢𑀺 𑀬𑀧𑁂𑀦𑁆𑀢𑀺 𑀬𑀸𑀧𑁂𑀦𑁆𑀢𑀺. 𑀢𑀁𑀓𑀸𑀭𑀡𑀸 𑀧𑀢𑀺𑀮𑀻𑀦𑀘𑀭𑀸 𑀯𑀼𑀘𑁆𑀘𑀦𑁆𑀢𑀺 𑀲𑀢𑁆𑀢 𑀲𑁂𑀓𑁆𑀔𑀸. 𑀪𑀺𑀓𑁆𑀔𑀼𑀦𑁄𑀢𑀺 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀓𑀲𑁆𑀲 𑀯𑀸 𑀪𑀺𑀓𑁆𑀔𑀼𑀦𑁄 𑀲𑁂𑀓𑁆𑀔𑀲𑁆𑀲 𑀯𑀸 𑀪𑀺𑀓𑁆𑀔𑀼𑀦𑁄𑀢𑀺 𑁋 𑀧𑀢𑀺𑀮𑀻𑀦𑀘𑀭𑀲𑁆𑀲 𑀪𑀺𑀓𑁆𑀔𑀼𑀦𑁄.

𑀪𑀚𑀫𑀸𑀦𑀲𑁆𑀲 𑀯𑀺𑀯𑀺𑀢𑁆𑀢𑀫𑀸𑀲𑀦𑀦𑁆𑀢𑀺 𑀆𑀲𑀦𑀁 𑀯𑀼𑀘𑁆𑀘𑀢𑀺 𑀬𑀢𑁆𑀣 𑀦𑀺𑀲𑀻𑀤𑀦𑁆𑀢𑀺 𑁋 𑀫𑀜𑁆𑀘𑁄 𑀧𑀻𑀞𑀁 𑀪𑀺𑀲𑀺 𑀢𑀝𑁆𑀝𑀺𑀓𑀸 𑀘𑀫𑁆𑀫𑀔𑀡𑁆𑀟𑁄 𑀢𑀺𑀡𑀲𑀦𑁆𑀣𑀸𑀭𑁄 𑀧𑀡𑁆𑀡𑀲𑀦𑁆𑀣𑀸𑀭𑁄 𑀧𑀮𑀸𑀮𑀲𑀦𑁆𑀣𑀸𑀭𑁄. 𑀢𑀁 𑀆𑀲𑀦𑀁 𑀅𑀲𑀧𑁆𑀧𑀸𑀬𑀭𑀽𑀧𑀤𑀲𑁆𑀲𑀦𑁂𑀦 𑀭𑀺𑀢𑁆𑀢𑀁 𑀯𑀺𑀯𑀺𑀢𑁆𑀢𑀁 𑀧𑀯𑀺𑀯𑀺𑀢𑁆𑀢𑀁, 𑀅𑀲𑀧𑁆𑀧𑀸𑀬𑀲𑀤𑁆𑀤𑀲𑁆𑀲𑀯𑀦𑁂𑀦 𑀭𑀺𑀢𑁆𑀢𑀁 𑀯𑀺𑀯𑀺𑀢𑁆𑀢𑀁 𑀧𑀯𑀺𑀯𑀺𑀢𑁆𑀢𑀁, 𑀅𑀲𑀧𑁆𑀧𑀸𑀬𑀕𑀦𑁆𑀥𑀖𑀸𑀬𑀦𑁂𑀦… 𑀅𑀲𑀧𑁆𑀧𑀸𑀬𑀭𑀲𑀲𑀸𑀬𑀦𑁂𑀦… 𑀅𑀲𑀧𑁆𑀧𑀸𑀬𑀨𑁄𑀝𑁆𑀞𑀩𑁆𑀩𑀨𑀼𑀲𑀦𑁂𑀦… 𑀅𑀲𑀧𑁆𑀧𑀸𑀬𑁂𑀳𑀺 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀭𑀺𑀢𑁆𑀢𑀁 𑀯𑀺𑀯𑀺𑀢𑁆𑀢𑀁 𑀧𑀯𑀺𑀯𑀺𑀢𑁆𑀢𑀁. 𑀢𑀁 𑀯𑀺𑀯𑀺𑀢𑁆𑀢𑀁 𑀆𑀲𑀦𑀁 𑀪𑀚𑀢𑁄 𑀲𑀫𑁆𑀪𑀚𑀢𑁄 𑀲𑁂𑀯𑀢𑁄 𑀦𑀺𑀲𑁂𑀯𑀢𑁄 𑀲𑀁𑀲𑁂𑀯𑀢𑁄 𑀧𑀝𑀺𑀲𑁂𑀯𑀢𑁄𑀢𑀺 𑁋 𑀪𑀚𑀫𑀸𑀦𑀲𑁆𑀲 𑀯𑀺𑀯𑀺𑀢𑁆𑀢𑀫𑀸𑀲𑀦𑀁.

𑀲𑀸𑀫𑀕𑁆𑀕𑀺𑀬𑀫𑀸𑀳𑀼 𑀢𑀲𑁆𑀲 𑀢𑀁, 𑀬𑁄 𑀅𑀢𑁆𑀢𑀸𑀦𑀁 𑀪𑀯𑀦𑁂 𑀦 𑀤𑀲𑁆𑀲𑀬𑁂𑀢𑀺. 𑀲𑀸𑀫𑀕𑁆𑀕𑀺𑀬𑁄𑀢𑀺 𑀢𑀺𑀲𑁆𑀲𑁄 𑀲𑀸𑀫𑀕𑁆𑀕𑀺𑀬𑁄 𑁋 𑀕𑀡𑀲𑀸𑀫𑀕𑁆𑀕𑀻, 𑀥𑀫𑁆𑀫𑀲𑀸𑀫𑀕𑁆𑀕𑀻, 𑀅𑀦𑀪𑀺𑀦𑀺𑀩𑁆𑀩𑀢𑁆𑀢𑀺𑀲𑀸𑀫𑀕𑁆𑀕𑀻. 𑀓𑀢𑀫𑀸 𑀕𑀡𑀲𑀸𑀫𑀕𑁆𑀕𑀻? 𑀩𑀳𑀼 𑀘𑁂𑀧𑀺 𑀪𑀺𑀓𑁆𑀔𑀽 𑀲𑀫𑀕𑁆𑀕𑀸 𑀲𑀫𑁆𑀫𑁄𑀤𑀫𑀸𑀦𑀸 𑀅𑀯𑀺𑀯𑀤𑀫𑀸𑀦𑀸 𑀔𑀻𑀭𑁄𑀤𑀓𑀻𑀪𑀽𑀢𑀸 𑀅𑀜𑁆𑀜𑀫𑀜𑁆𑀜𑀁 𑀧𑀺𑀬𑀘𑀓𑁆𑀔𑀽𑀳𑀺 𑀲𑀫𑁆𑀧𑀲𑁆𑀲𑀦𑁆𑀢𑀸 𑀯𑀺𑀳𑀭𑀦𑁆𑀢𑀺 𑁋 𑀅𑀬𑀁 𑀕𑀡𑀲𑀸𑀫𑀕𑁆𑀕𑀻. 𑀓𑀢𑀫𑀸 𑀥𑀫𑁆𑀫𑀲𑀸𑀫𑀕𑁆𑀕𑀻? 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸, 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸, 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺, 𑀧𑀜𑁆𑀘 𑀩𑀮𑀸𑀦𑀺, 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸, 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄. 𑀢𑁂 𑀏𑀓𑀢𑁄 𑀧𑀓𑁆𑀔𑀦𑁆𑀤𑀦𑁆𑀢𑀺 𑀧𑀲𑀻𑀤𑀦𑁆𑀢𑀺 𑀲𑀫𑁆𑀧𑀢𑀺𑀝𑁆𑀞𑀦𑁆𑀢𑀺 𑀯𑀺𑀫𑀼𑀘𑁆𑀘𑀦𑁆𑀢𑀺; 𑀦 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀯𑀺𑀯𑀸𑀤𑁄 𑀧𑀯𑀺𑀯𑀸𑀤𑁄 𑀅𑀢𑁆𑀣𑀺 𑁋 𑀅𑀬𑀁 𑀥𑀫𑁆𑀫𑀲𑀸𑀫𑀕𑁆𑀕𑀻. 𑀓𑀢𑀫𑀸 𑀅𑀦𑀪𑀺𑀦𑀺𑀩𑁆𑀩𑀢𑁆𑀢𑀺𑀲𑀸𑀫𑀕𑁆𑀕𑀻? 𑀩𑀳𑀼 𑀘𑁂𑀧𑀺 𑀪𑀺𑀓𑁆𑀔𑀽 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀦𑁆𑀢𑀺; 𑀦 𑀢𑁂𑀲𑀁 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 [𑀢𑁂𑀦 (𑀲𑀻.)] 𑀊𑀦𑀢𑁆𑀢𑀁 𑀯𑀸 𑀧𑀼𑀡𑁆𑀡𑀢𑁆𑀢𑀁 𑀯𑀸 𑀧𑀜𑁆𑀜𑀸𑀬𑀢𑀺 𑁋 𑀅𑀬𑀁 𑀅𑀦𑀪𑀺𑀦𑀺𑀩𑁆𑀩𑀢𑁆𑀢𑀺𑀲𑀸𑀫𑀕𑁆𑀕𑀻. 𑀪𑀯𑀦𑁂𑀢𑀺 𑀦𑁂𑀭𑀬𑀺𑀓𑀸𑀦𑀁 𑀦𑀺𑀭𑀬𑁄 𑀪𑀯𑀦𑀁, 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀓𑀸𑀦𑀁 𑀢𑀺𑀭𑀘𑁆𑀙𑀸𑀦𑀬𑁄𑀦𑀺 𑀪𑀯𑀦𑀁, 𑀧𑁂𑀢𑁆𑀢𑀺𑀯𑀺𑀲𑀬𑀺𑀓𑀸𑀦𑀁 𑀧𑁂𑀢𑁆𑀢𑀺𑀯𑀺𑀲𑀬𑁄 𑀪𑀯𑀦𑀁, 𑀫𑀦𑀼𑀲𑁆𑀲𑀸𑀦𑀁 𑀫𑀦𑀼𑀲𑁆𑀲𑀮𑁄𑀓𑁄 𑀪𑀯𑀦𑀁, 𑀤𑁂𑀯𑀸𑀦𑀁 𑀤𑁂𑀯𑀮𑁄𑀓𑁄 𑀪𑀯𑀦𑀦𑁆𑀢𑀺. 𑀲𑀸𑀫𑀕𑁆𑀕𑀺𑀬𑀫𑀸𑀳𑀼 𑀢𑀲𑁆𑀲 𑀢𑀁, 𑀬𑁄 𑀅𑀢𑁆𑀢𑀸𑀦𑀁 𑀪𑀯𑀦𑁂 𑀦 𑀤𑀲𑁆𑀲𑀬𑁂𑀢𑀺. 𑀢𑀲𑁆𑀲𑁂𑀲𑀸 𑀲𑀸𑀫𑀕𑁆𑀕𑀻 𑀏𑀢𑀁 𑀙𑀦𑁆𑀦𑀁 𑀏𑀢𑀁 𑀧𑀢𑀺𑀭𑀽𑀧𑀁 𑀏𑀢𑀁 𑀅𑀦𑀼𑀘𑁆𑀙𑀯𑀺𑀓𑀁 𑀏𑀢𑀁 𑀅𑀦𑀼𑀮𑁄𑀫𑀁, 𑀬𑁄 𑀏𑀯𑀁 𑀧𑀝𑀺𑀘𑁆𑀙𑀦𑁆𑀦𑁂 𑀦𑀺𑀭𑀬𑁂 𑀅𑀢𑁆𑀢𑀸𑀦𑀁 𑀦 𑀤𑀲𑁆𑀲𑁂𑀬𑁆𑀬, 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀁 𑀅𑀢𑁆𑀢𑀸𑀦𑀁 𑀦 𑀤𑀲𑁆𑀲𑁂𑀬𑁆𑀬, 𑀧𑁂𑀢𑁆𑀢𑀺𑀯𑀺𑀲𑀬𑁂 𑀅𑀢𑁆𑀢𑀸𑀦𑀁 𑀦 𑀤𑀲𑁆𑀲𑁂𑀬𑁆𑀬, 𑀫𑀦𑀼𑀲𑁆𑀲𑀮𑁄𑀓𑁂 𑀅𑀢𑁆𑀢𑀸𑀦𑀁 𑀦 𑀤𑀲𑁆𑀲𑁂𑀬𑁆𑀬, 𑀤𑁂𑀯𑀮𑁄𑀓𑁂 𑀅𑀢𑁆𑀢𑀸𑀦𑀁 𑀦 𑀤𑀲𑁆𑀲𑁂𑀬𑁆𑀬𑀸𑀢𑀺 𑀏𑀯𑀫𑀸𑀳𑀁𑀲𑀼 𑀏𑀯𑀁 𑀓𑀣𑁂𑀦𑁆𑀢𑀺 𑀏𑀯𑀁 𑀪𑀡𑀦𑁆𑀢𑀺 𑀏𑀯𑀁 𑀤𑀻𑀧𑀬𑀦𑁆𑀢𑀺 𑀏𑀯𑀁 𑀯𑁄𑀳𑀭𑀦𑁆𑀢𑀻𑀢𑀺 𑁋 𑀲𑀸𑀫𑀕𑁆𑀕𑀺𑀬𑀫𑀸𑀳𑀼 𑀢𑀲𑁆𑀲 𑀢𑀁, 𑀬𑁄 𑀅𑀢𑁆𑀢𑀸𑀦𑀁 𑀪𑀯𑀦𑁂 𑀦 𑀤𑀲𑁆𑀲𑀬𑁂.

𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀧𑀢𑀺𑀮𑀻𑀦𑀘𑀭𑀲𑁆𑀲 𑀪𑀺𑀓𑁆𑀔𑀼𑀦𑁄, 𑀪𑀚𑀫𑀸𑀦𑀲𑁆𑀲 𑀯𑀺𑀯𑀺𑀢𑁆𑀢𑀫𑀸𑀲𑀦𑀁;

𑀲𑀸𑀫𑀕𑁆𑀕𑀺𑀬𑀫𑀸𑀳𑀼 𑀢𑀲𑁆𑀲 𑀢𑀁, 𑀬𑁄 𑀅𑀢𑁆𑀢𑀸𑀦𑀁 𑀪𑀯𑀦𑁂 𑀦 𑀤𑀲𑁆𑀲𑀬𑁂’’𑀢𑀺.

𑁪𑁬. 𑀲𑀩𑁆𑀩𑀢𑁆𑀣 𑀫𑀼𑀦𑀻 𑀅𑀦𑀺𑀲𑁆𑀲𑀺𑀢𑁄, 𑀦 𑀧𑀺𑀬𑀁 𑀓𑀼𑀩𑁆𑀩𑀢𑀺 𑀦𑁄𑀧𑀺 𑀅𑀧𑁆𑀧𑀺𑀬𑀁;

𑀢𑀲𑁆𑀫𑀺𑀁 𑀧𑀭𑀺𑀤𑁂𑀯𑀫𑀘𑁆𑀙𑀭𑀁, 𑀧𑀡𑁆𑀡𑁂 𑀯𑀸𑀭𑀺 𑀬𑀣𑀸 𑀦 𑀮𑀺𑀫𑁆𑀧𑀢𑀺.

𑀲𑀩𑁆𑀩𑀢𑁆𑀣 𑀫𑀼𑀦𑀻 𑀅𑀦𑀺𑀲𑁆𑀲𑀺𑀢𑁄𑀢𑀺. 𑀲𑀩𑁆𑀩𑀁 𑀯𑀼𑀘𑁆𑀘𑀢𑀺 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺 𑁋 𑀘𑀓𑁆𑀔𑀼𑀜𑁆𑀘𑁂𑀯 𑀭𑀽𑀧𑀸 𑀘, 𑀲𑁄𑀢𑀜𑁆𑀘 𑀲𑀤𑁆𑀤𑀸 𑀘, 𑀖𑀸𑀦𑀜𑁆𑀘 𑀕𑀦𑁆𑀥𑀸 𑀘, 𑀚𑀺𑀯𑁆𑀳𑀸 𑀘 𑀭𑀲𑀸 𑀘, 𑀓𑀸𑀬𑁄 𑀘 𑀨𑁄𑀝𑁆𑀞𑀩𑁆𑀩𑀸 𑀘, 𑀫𑀦𑁄 𑀘 𑀥𑀫𑁆𑀫𑀸 𑀘. 𑀫𑀼𑀦𑀻𑀢𑀺. 𑀫𑁄𑀦𑀁 𑀯𑀼𑀘𑁆𑀘𑀢𑀺 𑀜𑀸𑀡𑀁…𑀧𑁂… 𑀲𑀗𑁆𑀕𑀚𑀸𑀮𑀫𑀢𑀺𑀘𑁆𑀘 𑀲𑁄 𑀫𑀼𑀦𑀺. 𑀅𑀦𑀺𑀲𑁆𑀲𑀺𑀢𑁄𑀢𑀺. 𑀤𑁆𑀯𑁂 𑀦𑀺𑀲𑁆𑀲𑀬𑀸 𑁋 𑀢𑀡𑁆𑀳𑀸𑀦𑀺𑀲𑁆𑀲𑀬𑁄 𑀘 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑁄 𑀘…𑀧𑁂… 𑀅𑀬𑀁 𑀢𑀡𑁆𑀳𑀸𑀦𑀺𑀲𑁆𑀲𑀬𑁄…𑀧𑁂… 𑀅𑀬𑀁 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑁄. 𑀫𑀼𑀦𑀺 𑀢𑀡𑁆𑀳𑀸𑀦𑀺𑀲𑁆𑀲𑀬𑀁 𑀧𑀳𑀸𑀬 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑀁 𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀘𑀓𑁆𑀔𑀼𑀁 𑀅𑀦𑀺𑀲𑁆𑀲𑀺𑀢𑁄 𑀲𑁄𑀢𑀁 𑀅𑀦𑀺𑀲𑁆𑀲𑀺𑀢𑁄 𑀖𑀸𑀦𑀁 𑀅𑀦𑀺𑀲𑁆𑀲𑀺𑀢𑁄 𑀚𑀺𑀯𑁆𑀳𑀁 𑀅𑀦𑀺𑀲𑁆𑀲𑀺𑀢𑁄 𑀓𑀸𑀬𑀁 𑀅𑀦𑀺𑀲𑁆𑀲𑀺𑀢𑁄 𑀫𑀦𑀁 𑀅𑀦𑀺𑀲𑁆𑀲𑀺𑀢𑁄 𑀭𑀽𑀧𑁂… 𑀲𑀤𑁆𑀤𑁂… 𑀕𑀦𑁆𑀥𑁂… 𑀭𑀲𑁂… 𑀨𑁄𑀝𑁆𑀞𑀩𑁆𑀩𑁂… 𑀥𑀫𑁆𑀫𑁂… 𑀓𑀼𑀮𑀁… 𑀕𑀡𑀁… 𑀆𑀯𑀸𑀲𑀁… 𑀮𑀸𑀪𑀁… 𑀬𑀲𑀁… 𑀧𑀲𑀁𑀲𑀁… 𑀲𑀼𑀔𑀁… 𑀘𑀻𑀯𑀭𑀁… 𑀧𑀺𑀡𑁆𑀟𑀧𑀸𑀢𑀁… 𑀲𑁂𑀦𑀸𑀲𑀦𑀁… 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁… 𑀓𑀸𑀫𑀥𑀸𑀢𑀼𑀁… 𑀭𑀽𑀧𑀥𑀸𑀢𑀼𑀁… 𑀅𑀭𑀽𑀧𑀥𑀸𑀢𑀼𑀁… 𑀓𑀸𑀫𑀪𑀯𑀁… 𑀭𑀽𑀧𑀪𑀯𑀁… 𑀅𑀭𑀽𑀧𑀪𑀯𑀁… 𑀲𑀜𑁆𑀜𑀸𑀪𑀯𑀁… 𑀅𑀲𑀜𑁆𑀜𑀸𑀪𑀯𑀁 … 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀪𑀯𑀁… 𑀏𑀓𑀯𑁄𑀓𑀸𑀭𑀪𑀯𑀁… 𑀘𑀢𑀼𑀯𑁄𑀓𑀸𑀭𑀪𑀯𑀁… 𑀧𑀜𑁆𑀘𑀯𑁄𑀓𑀸𑀭𑀪𑀯𑀁… 𑀅𑀢𑀻𑀢𑀁… 𑀅𑀦𑀸𑀕𑀢𑀁… 𑀧𑀘𑁆𑀘𑀼𑀧𑁆𑀧𑀦𑁆𑀦𑀁… 𑀤𑀺𑀝𑁆𑀞𑀁… 𑀲𑀼𑀢𑀁… 𑀫𑀼𑀢𑀁… 𑀯𑀺𑀜𑁆𑀜𑀸𑀢𑀁… 𑀲𑀩𑁆𑀩𑁂 𑀥𑀫𑁆𑀫𑁂 𑀅𑀦𑀺𑀲𑁆𑀲𑀺𑀢𑁄 𑀅𑀦𑀮𑁆𑀮𑀻𑀦𑁄 𑀅𑀦𑀼𑀧𑀕𑀢𑁄 𑀅𑀦𑀚𑁆𑀛𑁄𑀲𑀺𑀢𑁄 𑀅𑀦𑀥𑀺𑀫𑀼𑀢𑁆𑀢𑁄 𑀦𑀺𑀓𑁆𑀔𑀦𑁆𑀢𑁄 𑀦𑀺𑀲𑁆𑀲𑀝𑁄 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀻𑀢𑀺 𑁋 𑀲𑀩𑁆𑀩𑀢𑁆𑀣 𑀫𑀼𑀦𑀺 𑀅𑀦𑀺𑀲𑁆𑀲𑀺𑀢𑁄.

𑀦 𑀧𑀺𑀬𑀁 𑀓𑀼𑀩𑁆𑀩𑀢𑀺 𑀦𑁄𑀧𑀺 𑀅𑀧𑁆𑀧𑀺𑀬𑀦𑁆𑀢𑀺. 𑀧𑀺𑀬𑀸𑀢𑀺 𑀤𑁆𑀯𑁂 𑀧𑀺𑀬𑀸 𑁋 𑀲𑀢𑁆𑀢𑀸 𑀯𑀸 𑀲𑀗𑁆𑀔𑀸𑀭𑀸 𑀯𑀸. 𑀓𑀢𑀫𑁂 𑀲𑀢𑁆𑀢𑀸 𑀧𑀺𑀬𑀸? 𑀇𑀥 𑀬𑀲𑁆𑀲 𑀢𑁂 𑀳𑁄𑀦𑁆𑀢𑀺 𑀅𑀢𑁆𑀣𑀓𑀸𑀫𑀸 𑀳𑀺𑀢𑀓𑀸𑀫𑀸 𑀨𑀸𑀲𑀼𑀓𑀸𑀫𑀸 𑀬𑁄𑀕𑀓𑁆𑀔𑁂𑀫𑀓𑀸𑀫𑀸 𑀫𑀸𑀢𑀸 𑀯𑀸 𑀧𑀺𑀢𑀸 𑀯𑀸 𑀪𑀸𑀢𑀸 𑀯𑀸 𑀪𑀕𑀺𑀦𑀻 𑀯𑀸 𑀧𑀼𑀢𑁆𑀢𑀸 𑀯𑀸 𑀥𑀻𑀢𑀭𑀸 𑀯𑀸 𑀫𑀺𑀢𑁆𑀢𑀸 𑀯𑀸 𑀅𑀫𑀘𑁆𑀘𑀸 𑀯𑀸 𑀜𑀸𑀢𑀻 𑀯𑀸 𑀲𑀸𑀮𑁄𑀳𑀺𑀢𑀸 𑀯𑀸 𑁋 𑀇𑀫𑁂 𑀲𑀢𑁆𑀢𑀸 𑀧𑀺𑀬𑀸. 𑀓𑀢𑀫𑁂 𑀲𑀗𑁆𑀔𑀸𑀭𑀸 𑀧𑀺𑀬𑀸? 𑀫𑀦𑀸𑀧𑀺𑀓𑀸 𑀭𑀽𑀧𑀸 𑀫𑀦𑀸𑀧𑀺𑀓𑀸 𑀲𑀤𑁆𑀤𑀸 𑀫𑀦𑀸𑀧𑀺𑀓𑀸 𑀕𑀦𑁆𑀥𑀸 𑀫𑀦𑀸𑀧𑀺𑀓𑀸 𑀭𑀲𑀸 𑀫𑀦𑀸𑀧𑀺𑀓𑀸 𑀨𑁄𑀝𑁆𑀞𑀩𑁆𑀩𑀸 𑁋 𑀇𑀫𑁂 𑀲𑀗𑁆𑀔𑀸𑀭𑀸 𑀧𑀺𑀬𑀸. 𑀅𑀧𑁆𑀧𑀺𑀬𑀸𑀢𑀺 𑀤𑁆𑀯𑁂 𑀅𑀧𑁆𑀧𑀺𑀬𑀸 𑁋 𑀲𑀢𑁆𑀢𑀸 𑀯𑀸 𑀲𑀗𑁆𑀔𑀸𑀭𑀸 𑀯𑀸. 𑀓𑀢𑀫𑁂 𑀲𑀢𑁆𑀢𑀸 𑀅𑀧𑁆𑀧𑀺𑀬𑀸? 𑀇𑀥 𑀬𑀲𑁆𑀲 𑀢𑁂 𑀳𑁄𑀦𑁆𑀢𑀺 𑀅𑀦𑀢𑁆𑀣𑀓𑀸𑀫𑀸 𑀅𑀳𑀺𑀢𑀓𑀸𑀫𑀸 𑀅𑀨𑀸𑀲𑀼𑀓𑀸𑀫𑀸 𑀅𑀬𑁄𑀕𑀓𑁆𑀔𑁂𑀫𑀓𑀸𑀫𑀸 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀼𑀓𑀸𑀫𑀸 𑁋 𑀇𑀫𑁂 𑀲𑀢𑁆𑀢𑀸 𑀅𑀧𑁆𑀧𑀺𑀬𑀸. 𑀓𑀢𑀫𑁂 𑀲𑀗𑁆𑀔𑀸𑀭𑀸 𑀅𑀧𑁆𑀧𑀺𑀬𑀸? 𑀅𑀫𑀦𑀸𑀧𑀺𑀓𑀸 𑀭𑀽𑀧𑀸 𑀅𑀫𑀦𑀸𑀧𑀺𑀓𑀸 𑀲𑀤𑁆𑀤𑀸 𑀅𑀫𑀦𑀸𑀧𑀺𑀓𑀸 𑀕𑀦𑁆𑀥𑀸 𑀅𑀫𑀦𑀸𑀧𑀺𑀓𑀸 𑀭𑀲𑀸 𑀅𑀫𑀦𑀸𑀧𑀺𑀓𑀸 𑀨𑁄𑀝𑁆𑀞𑀩𑁆𑀩𑀸 𑁋 𑀇𑀫𑁂 𑀲𑀗𑁆𑀔𑀸𑀭𑀸 𑀅𑀧𑁆𑀧𑀺𑀬𑀸. 𑀦 𑀧𑀺𑀬𑀁 𑀓𑀼𑀩𑁆𑀩𑀢𑀺 𑀦𑁄𑀧𑀺 𑀅𑀧𑁆𑀧𑀺𑀬𑀦𑁆𑀢𑀺. ‘‘𑀅𑀬𑀁 𑀫𑁂 𑀲𑀢𑁆𑀢𑁄 𑀧𑀺𑀬𑁄, 𑀇𑀫𑁂 𑀘 𑀲𑀗𑁆𑀔𑀸𑀭𑀸 𑀫𑀦𑀸𑀧𑀸’’𑀢𑀺 𑀭𑀸𑀕𑀯𑀲𑁂𑀦 𑀧𑀺𑀬𑀁 𑀦 𑀓𑀭𑁄𑀢𑀺; ‘‘𑀅𑀬𑀁 𑀫𑁂 𑀲𑀢𑁆𑀢𑁄 𑀅𑀧𑁆𑀧𑀺𑀬𑁄, 𑀇𑀫𑁂 𑀘 𑀲𑀗𑁆𑀔𑀸𑀭𑀸 𑀅𑀫𑀦𑀸𑀧𑀸’’𑀢𑀺 𑀧𑀝𑀺𑀖𑀯𑀲𑁂𑀦 𑀅𑀧𑁆𑀧𑀺𑀬𑀁 𑀦 𑀓𑀭𑁄𑀢𑀺 𑀦 𑀚𑀦𑁂𑀢𑀺 𑀦 𑀲𑀜𑁆𑀚𑀦𑁂𑀢𑀺 𑀦 𑀦𑀺𑀩𑁆𑀩𑀢𑁆𑀢𑁂𑀢𑀺 𑀦𑀸𑀪𑀺𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺 𑁋 𑀦 𑀧𑀺𑀬𑀁 𑀓𑀼𑀩𑁆𑀩𑀢𑀺 𑀦𑁄𑀧𑀺 𑀅𑀧𑁆𑀧𑀺𑀬𑀁.

𑀢𑀲𑁆𑀫𑀺𑀁 𑀧𑀭𑀺𑀤𑁂𑀯𑀫𑀘𑁆𑀙𑀭𑀁 𑀧𑀡𑁆𑀡𑁂 𑀯𑀸𑀭𑀺 𑀬𑀣𑀸 𑀦 𑀮𑀺𑀫𑁆𑀧𑀢𑀻𑀢𑀺. 𑀢𑀲𑁆𑀫𑀺𑀦𑁆𑀢𑀺 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀅𑀭𑀳𑀦𑁆𑀢𑁂 𑀔𑀻𑀡𑀸𑀲𑀯𑁂. 𑀧𑀭𑀺𑀤𑁂𑀯𑁄𑀢𑀺 𑀜𑀸𑀢𑀺𑀩𑁆𑀬𑀲𑀦𑁂𑀦 𑀯𑀸 𑀨𑀼𑀝𑁆𑀞𑀲𑁆𑀲 𑀪𑁄𑀕𑀩𑁆𑀬𑀲𑀦𑁂𑀦 𑀯𑀸 𑀨𑀼𑀝𑁆𑀞𑀲𑁆𑀲 𑀭𑁄𑀕𑀩𑁆𑀬𑀲𑀦𑁂𑀦 𑀯𑀸 𑀨𑀼𑀝𑁆𑀞𑀲𑁆𑀲 𑀲𑀻𑀮𑀩𑁆𑀬𑀲𑀦𑁂𑀦 𑀯𑀸 𑀨𑀼𑀝𑁆𑀞𑀲𑁆𑀲 𑀤𑀺𑀝𑁆𑀞𑀺𑀩𑁆𑀬𑀲𑀦𑁂𑀦 𑀯𑀸 𑀨𑀼𑀝𑁆𑀞𑀲𑁆𑀲 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀩𑁆𑀬𑀲𑀦𑁂𑀦 𑀲𑀫𑀦𑁆𑀦𑀸𑀕𑀢𑀲𑁆𑀲 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀤𑀼𑀓𑁆𑀔𑀥𑀫𑁆𑀫𑁂𑀦 𑀨𑀼𑀝𑁆𑀞𑀲𑁆𑀲 𑀆𑀤𑁂𑀯𑁄 𑀧𑀭𑀺𑀤𑁂𑀯𑁄 𑀆𑀤𑁂𑀯𑀦𑀸 𑀧𑀭𑀺𑀤𑁂𑀯𑀦𑀸 𑀆𑀤𑁂𑀯𑀺𑀢𑀢𑁆𑀢𑀁 𑀧𑀭𑀺𑀤𑁂𑀯𑀺𑀢𑀢𑁆𑀢𑀁 𑀯𑀸𑀘𑀸 𑀧𑀮𑀸𑀧𑁄 𑀯𑀺𑀧𑁆𑀧𑀮𑀸𑀧𑁄 𑀮𑀸𑀮𑀧𑁆𑀧𑁄 𑀮𑀸𑀮𑀧𑁆𑀧𑀸𑀬𑀦𑀸 𑀮𑀸𑀮𑀧𑁆𑀧𑀸𑀬𑀺𑀢𑀢𑁆𑀢𑀁. 𑀫𑀘𑁆𑀙𑀭𑀺𑀬𑀦𑁆𑀢𑀺 𑀧𑀜𑁆𑀘 𑀫𑀘𑁆𑀙𑀭𑀺𑀬𑀸𑀦𑀺 𑁋 𑀆𑀯𑀸𑀲𑀫𑀘𑁆𑀙𑀭𑀺𑀬𑀁, 𑀓𑀼𑀮𑀫𑀘𑁆𑀙𑀭𑀺𑀬𑀁, 𑀮𑀸𑀪𑀫𑀘𑁆𑀙𑀭𑀺𑀬𑀁, 𑀯𑀡𑁆𑀡𑀫𑀘𑁆𑀙𑀭𑀺𑀬𑀁, 𑀥𑀫𑁆𑀫𑀫𑀘𑁆𑀙𑀭𑀺𑀬𑀁. 𑀬𑀁 𑀏𑀯𑀭𑀽𑀧𑀁 𑀫𑀘𑁆𑀙𑀭𑀺𑀬𑀁 𑀫𑀘𑁆𑀙𑀭𑀸𑀬𑀦𑀸 𑀫𑀘𑁆𑀙𑀭𑀸𑀬𑀺𑀢𑀢𑁆𑀢𑀁 𑀯𑁂𑀯𑀺𑀘𑁆𑀙𑀁 𑀓𑀤𑀭𑀺𑀬𑀁 𑀓𑀝𑀼𑀓𑀜𑁆𑀘𑀼𑀓𑀢𑀸 𑀅𑀕𑁆𑀕𑀳𑀺𑀢𑀢𑁆𑀢𑀁 𑀘𑀺𑀢𑁆𑀢𑀲𑁆𑀲 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀫𑀘𑁆𑀙𑀭𑀺𑀬𑀁. 𑀅𑀧𑀺 𑀘 𑀔𑀦𑁆𑀥𑀫𑀘𑁆𑀙𑀭𑀺𑀬𑀫𑁆𑀧𑀺 𑀫𑀘𑁆𑀙𑀭𑀺𑀬𑀁, 𑀥𑀸𑀢𑀼𑀫𑀘𑁆𑀙𑀭𑀺𑀬𑀫𑁆𑀧𑀺 𑀫𑀘𑁆𑀙𑀭𑀺𑀬𑀁, 𑀆𑀬𑀢𑀦𑀫𑀘𑁆𑀙𑀭𑀺𑀬𑀫𑁆𑀧𑀺 𑀫𑀘𑁆𑀙𑀭𑀺𑀬𑀁 𑀕𑀸𑀳𑁄 𑁋 𑀇𑀤𑀁 𑀯𑀼𑀘𑁆𑀘𑀢𑀺 𑀫𑀘𑁆𑀙𑀭𑀺𑀬𑀁.

𑀧𑀡𑁆𑀡𑁂 𑀯𑀸𑀭𑀺 𑀬𑀣𑀸 𑀦 𑀮𑀺𑀫𑁆𑀧𑀢𑀻𑀢𑀺. 𑀧𑀡𑁆𑀡𑀁 𑀯𑀼𑀘𑁆𑀘𑀢𑀺 𑀧𑀤𑀼𑀫𑀧𑀢𑁆𑀢𑀁. 𑀯𑀸𑀭𑀺 𑀯𑀼𑀘𑁆𑀘𑀢𑀺 𑀉𑀤𑀓𑀁. 𑀬𑀣𑀸 𑀯𑀸𑀭𑀺 𑀧𑀤𑀼𑀫𑀧𑀢𑁆𑀢𑀁 𑀦 𑀮𑀺𑀫𑁆𑀧𑀢𑀺 𑀦 𑀧𑀮𑀺𑀫𑁆𑀧𑀢𑀺 𑀦 𑀉𑀧𑀮𑀺𑀫𑁆𑀧𑀢𑀺 𑀅𑀮𑀺𑀢𑁆𑀢𑀁 𑀅𑀧𑀮𑀺𑀢𑁆𑀢𑀁 𑀅𑀦𑀼𑀧𑀮𑀺𑀢𑁆𑀢𑀁, 𑀏𑀯𑀫𑁂𑀯 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀅𑀭𑀳𑀦𑁆𑀢𑁂 𑀔𑀻𑀡𑀸𑀲𑀯𑁂 𑀧𑀭𑀺𑀤𑁂𑀯𑁄 𑀫𑀘𑁆𑀙𑀭𑀺𑀬𑀜𑁆𑀘 𑀦 𑀮𑀺𑀫𑁆𑀧𑀢𑀺 𑀦 𑀧𑀮𑀺𑀫𑁆𑀧𑀢𑀺 𑀦 𑀉𑀧𑀮𑀺𑀫𑁆𑀧𑀢𑀺 𑀅𑀮𑀺𑀢𑁆𑀢𑀸 𑀅𑀧𑀮𑀺𑀢𑁆𑀢𑀸 𑀅𑀦𑀼𑀧𑀮𑀺𑀢𑁆𑀢𑀸. 𑀲𑁄 𑀘 𑀧𑀼𑀕𑁆𑀕𑀮𑁄 𑀅𑀭𑀳𑀦𑁆𑀢𑁄 𑀢𑁂𑀳𑀺 𑀓𑀺𑀮𑁂𑀲𑁂𑀳𑀺 𑀦 𑀮𑀺𑀫𑁆𑀧𑀢𑀺 𑀦 𑀧𑀮𑀺𑀫𑁆𑀧𑀢𑀺 𑀦 𑀉𑀧𑀮𑀺𑀫𑁆𑀧𑀢𑀺 𑀅𑀮𑀺𑀢𑁆𑀢𑁄 𑀅𑀧𑀮𑀺𑀢𑁆𑀢𑁄 𑀅𑀦𑀼𑀧𑀮𑀺𑀢𑁆𑀢𑁄 𑀦𑀺𑀓𑁆𑀔𑀦𑁆𑀢𑁄 𑀦𑀺𑀲𑁆𑀲𑀝𑁄 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀻𑀢𑀺 𑁋 𑀢𑀲𑁆𑀫𑀺𑀁 𑀧𑀭𑀺𑀤𑁂𑀯𑀫𑀘𑁆𑀙𑀭𑀁 𑀧𑀡𑁆𑀡𑁂 𑀯𑀸𑀭𑀺 𑀬𑀣𑀸 𑀦 𑀮𑀺𑀫𑁆𑀧𑀢𑀺.

𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀲𑀩𑁆𑀩𑀢𑁆𑀣 𑀫𑀼𑀦𑀻 𑀅𑀦𑀺𑀲𑁆𑀲𑀺𑀢𑁄, 𑀦 𑀧𑀺𑀬𑀁 𑀓𑀼𑀩𑁆𑀩𑀢𑀺 𑀦𑁄𑀧𑀺 𑀅𑀧𑁆𑀧𑀺𑀬𑀁;

𑀢𑀲𑁆𑀫𑀺𑀁 𑀧𑀭𑀺𑀤𑁂𑀯𑀫𑀘𑁆𑀙𑀭𑀁, 𑀧𑀡𑁆𑀡𑁂 𑀯𑀸𑀭𑀺 𑀬𑀣𑀸 𑀦 𑀮𑀺𑀫𑁆𑀧𑀢𑀻’’𑀢𑀺.

𑁪𑁭. 𑀉𑀤𑀩𑀺𑀦𑁆𑀤𑀼 𑀬𑀣𑀸𑀧𑀺 𑀧𑁄𑀓𑁆𑀔𑀭𑁂, 𑀧𑀤𑀼𑀫𑁂 𑀯𑀸𑀭𑀺 𑀬𑀣𑀸 𑀦 𑀮𑀺𑀫𑁆𑀧𑀢𑀺;

𑀏𑀯𑀁 𑀫𑀼𑀦𑀺 𑀦𑁄𑀧𑀮𑀺𑀫𑁆𑀧𑀢𑀺, 𑀬𑀤𑀺𑀤𑀁 𑀤𑀺𑀝𑁆𑀞𑀲𑀼𑀢𑀫𑀼𑀢𑁂𑀲𑀼 [𑀤𑀺𑀝𑁆𑀞𑀲𑀼𑀢𑁂 𑀫𑀼𑀢𑁂𑀲𑀼 (𑀲𑀻.), 𑀤𑀺𑀝𑁆𑀞𑀲𑀼𑀢𑀁 𑀫𑀼𑀢𑁂𑀲𑀼 (𑀲𑁆𑀬𑀸. 𑀓.)] 𑀯𑀸.

𑀉𑀤𑀩𑀺𑀦𑁆𑀤𑀼 𑀬𑀣𑀸𑀧𑀺 𑀧𑁄𑀓𑁆𑀔𑀭𑁂𑀢𑀺. 𑀉𑀤𑀩𑀺𑀦𑁆𑀤𑀼 𑀯𑀼𑀘𑁆𑀘𑀢𑀺 𑀉𑀤𑀓𑀣𑁂𑀯𑁄. 𑀧𑁄𑀓𑁆𑀔𑀭𑀁 𑀯𑀼𑀘𑁆𑀘𑀢𑀺 𑀧𑀤𑀼𑀫𑀧𑀢𑁆𑀢𑀁. 𑀬𑀣𑀸 𑀉𑀤𑀩𑀺𑀦𑁆𑀤𑀼 𑀧𑀤𑀼𑀫𑀧𑀢𑁆𑀢𑁂 𑀦 𑀮𑀺𑀫𑁆𑀧𑀢𑀺 𑀦 𑀧𑀮𑀺𑀫𑁆𑀧𑀢𑀺 𑀦 𑀉𑀧𑀮𑀺𑀫𑁆𑀧𑀢𑀺 𑀅𑀮𑀺𑀢𑁆𑀢𑀁 𑀅𑀧𑀮𑀺𑀢𑁆𑀢𑀁 𑀅𑀦𑀼𑀧𑀮𑀺𑀢𑁆𑀢𑀦𑁆𑀢𑀺 𑁋 𑀉𑀤𑀩𑀺𑀦𑁆𑀤𑀼 𑀬𑀣𑀸𑀧𑀺 𑀧𑁄𑀓𑁆𑀔𑀭𑁂. 𑀧𑀤𑀼𑀫𑁂 𑀯𑀸𑀭𑀺 𑀬𑀣𑀸 𑀦 𑀮𑀺𑀫𑁆𑀧𑀢𑀻𑀢𑀺. 𑀧𑀤𑀼𑀫𑀁 𑀯𑀼𑀘𑁆𑀘𑀢𑀺 𑀧𑀤𑀼𑀫𑀧𑀼𑀧𑁆𑀨𑀁. 𑀯𑀸𑀭𑀺 𑀯𑀼𑀘𑁆𑀘𑀢𑀺 𑀉𑀤𑀓𑀁. 𑀬𑀣𑀸 𑀯𑀸𑀭𑀺 𑀧𑀤𑀼𑀫𑀧𑀼𑀧𑁆𑀨𑀁 𑀦 𑀮𑀺𑀫𑁆𑀧𑀢𑀺 𑀦 𑀧𑀮𑀺𑀫𑁆𑀧𑀢𑀺 𑀦 𑀉𑀧𑀮𑀺𑀫𑁆𑀧𑀢𑀺 𑀅𑀮𑀺𑀢𑁆𑀢𑀁 𑀅𑀧𑀮𑀺𑀢𑁆𑀢𑀁 𑀅𑀦𑀼𑀧𑀮𑀺𑀢𑁆𑀢𑀦𑁆𑀢𑀺 𑁋 𑀧𑀤𑀼𑀫𑁂 𑀯𑀸𑀭𑀺 𑀬𑀣𑀸 𑀦 𑀮𑀺𑀫𑁆𑀧𑀢𑀺.

𑀏𑀯𑀁 𑀫𑀼𑀦𑀺 𑀦𑁄𑀧𑀮𑀺𑀫𑁆𑀧𑀢𑀺, 𑀬𑀤𑀺𑀤𑀁 𑀤𑀺𑀝𑁆𑀞𑀲𑀼𑀢𑀫𑀼𑀢𑁂𑀲𑀼 𑀯𑀸𑀢𑀺. 𑀏𑀯𑀦𑁆𑀢𑀺 𑀑𑀧𑀫𑁆𑀫𑀲𑀫𑁆𑀧𑀝𑀺𑀧𑀸𑀤𑀦𑀁. 𑀫𑀼𑀦𑀻𑀢𑀺. 𑀫𑁄𑀦𑀁 𑀯𑀼𑀘𑁆𑀘𑀢𑀺 𑀜𑀸𑀡𑀁…𑀧𑁂… 𑀲𑀗𑁆𑀕𑀚𑀸𑀮𑀫𑀢𑀺𑀘𑁆𑀘 𑀲𑁄 𑀫𑀼𑀦𑀺. 𑀮𑁂𑀧𑀸𑀢𑀺 𑀤𑁆𑀯𑁂 𑀮𑁂𑀧𑀸 𑁋 𑀢𑀡𑁆𑀳𑀸𑀮𑁂𑀧𑁄 𑀘 𑀤𑀺𑀝𑁆𑀞𑀺𑀮𑁂𑀧𑁄 𑀘…𑀧𑁂… 𑀅𑀬𑀁 𑀢𑀡𑁆𑀳𑀸𑀮𑁂𑀧𑁄…𑀧𑁂… 𑀅𑀬𑀁 𑀤𑀺𑀝𑁆𑀞𑀺𑀮𑁂𑀧𑁄. 𑀫𑀼𑀦𑀺 𑀢𑀡𑁆𑀳𑀸𑀮𑁂𑀧𑀁 𑀧𑀳𑀸𑀬 𑀤𑀺𑀝𑁆𑀞𑀺𑀮𑁂𑀧𑀁 𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀤𑀺𑀝𑁆𑀞𑁂 𑀦 𑀮𑀺𑀫𑁆𑀧𑀢𑀺, 𑀲𑀼𑀢𑁂 𑀦 𑀮𑀺𑀫𑁆𑀧𑀢𑀺, 𑀫𑀼𑀢𑁂 𑀦 𑀮𑀺𑀫𑁆𑀧𑀢𑀺, 𑀯𑀺𑀜𑁆𑀜𑀸𑀢𑁂 𑀦 𑀮𑀺𑀫𑁆𑀧𑀢𑀺 𑀦 𑀧𑀮𑀺𑀫𑁆𑀧𑀢𑀺 𑀦 𑀉𑀧𑀮𑀺𑀫𑁆𑀧𑀢𑀺 𑀅𑀮𑀺𑀢𑁆𑀢𑁄 𑀅𑀧𑀮𑀺𑀢𑁆𑀢𑁄 𑀅𑀦𑀼𑀧𑀮𑀺𑀢𑁆𑀢𑁄 𑀦𑀺𑀓𑁆𑀔𑀦𑁆𑀢𑁄 𑀦𑀺𑀲𑁆𑀲𑀝𑁄 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀻𑀢𑀺 𑁋 𑀏𑀯𑀁 𑀫𑀼𑀦𑀺 𑀦𑁄𑀧𑀮𑀺𑀫𑁆𑀧𑀢𑀺, 𑀬𑀤𑀺𑀤𑀁 𑀤𑀺𑀝𑁆𑀞𑀲𑀼𑀢𑀫𑀼𑀢𑁂𑀲𑀼 𑀯𑀸.

𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀉𑀤𑀩𑀺𑀦𑁆𑀤𑀼 𑀬𑀣𑀸𑀧𑀺 𑀧𑁄𑀓𑁆𑀔𑀭𑁂, 𑀧𑀤𑀼𑀫𑁂 𑀯𑀸𑀭𑀺 𑀬𑀣𑀸 𑀦 𑀮𑀺𑀫𑁆𑀧𑀢𑀺;

𑀏𑀯𑀁 𑀫𑀼𑀦𑀺 𑀦𑁄𑀧𑀮𑀺𑀫𑁆𑀧𑀢𑀺, 𑀬𑀤𑀺𑀤𑀁 𑀤𑀺𑀝𑁆𑀞𑀲𑀼𑀢𑀫𑀼𑀢𑁂𑀲𑀼 𑀯𑀸’’𑀢𑀺.

𑁪𑁮. 𑀥𑁄𑀦𑁄 𑀦 𑀳𑀺 𑀢𑁂𑀦 𑀫𑀜𑁆𑀜𑀢𑀺, 𑀬𑀤𑀺𑀤𑀁 𑀤𑀺𑀝𑁆𑀞𑀲𑀼𑀢𑀫𑀼𑀢𑁂𑀲𑀼 𑀯𑀸;

𑀦𑀸𑀜𑁆𑀜𑁂𑀦 𑀯𑀺𑀲𑀼𑀤𑁆𑀥𑀺𑀫𑀺𑀘𑁆𑀙𑀢𑀺, 𑀦 𑀳𑀺 𑀲𑁄 𑀭𑀚𑁆𑀚𑀢𑀺 𑀦𑁄 𑀯𑀺𑀭𑀚𑁆𑀚𑀢𑀺.

𑀥𑁄𑀦𑁄 𑀦 𑀳𑀺 𑀢𑁂𑀦 𑀫𑀜𑁆𑀜𑀢𑀺, 𑀬𑀤𑀺𑀤𑀁 𑀤𑀺𑀝𑁆𑀞𑀲𑀼𑀢𑀫𑀼𑀢𑁂𑀲𑀼 𑀯𑀸𑀢𑀺. 𑀥𑁄𑀦𑁄𑀢𑀺 𑀥𑁄𑀦𑀸 𑀯𑀼𑀘𑁆𑀘𑀢𑀺 𑀧𑀜𑁆𑀜𑀸. 𑀬𑀸 𑀧𑀜𑁆𑀜𑀸 𑀧𑀚𑀸𑀦𑀦𑀸…𑀧𑁂… 𑀅𑀫𑁄𑀳𑁄 𑀥𑀫𑁆𑀫𑀯𑀺𑀘𑀬𑁄 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀓𑀺𑀁𑀓𑀸𑀭𑀡𑀸 𑀥𑁄𑀦𑀸 𑀯𑀼𑀘𑁆𑀘𑀢𑀺 𑀧𑀜𑁆𑀜𑀸? 𑀢𑀸𑀬 𑀧𑀜𑁆𑀜𑀸𑀬 𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀥𑀼𑀢𑀜𑁆𑀘 𑀥𑁄𑀢 𑀘 𑀲𑀦𑁆𑀥𑁄𑀢𑀜𑁆𑀘 𑀦𑀺𑀤𑁆𑀥𑁄𑀢𑀜𑁆𑀘, 𑀯𑀘𑀻𑀤𑀼𑀘𑁆𑀘𑀭𑀺𑀢𑀁…𑀧𑁂… 𑀫𑀦𑁄𑀤𑀼𑀘𑁆𑀘𑀭𑀺𑀢𑀁 𑀥𑀼𑀢𑀜𑁆𑀘 𑀥𑁄𑀢𑀜𑁆𑀘 𑀲𑀦𑁆𑀥𑁄𑀢𑀜𑁆𑀘 𑀦𑀺𑀤𑁆𑀥𑁄𑀢𑀜𑁆𑀘, 𑀭𑀸𑀕𑁄 𑀥𑀼𑀢𑁄 𑀘 𑀥𑁄𑀢𑁄 𑀘 𑀲𑀦𑁆𑀥𑁄𑀢𑁄 𑀘 𑀦𑀺𑀤𑁆𑀥𑁄𑀢𑁄 𑀘, 𑀤𑁄𑀲𑁄… 𑀫𑁄𑀳𑁄… 𑀓𑁄𑀥𑁄… 𑀉𑀧𑀦𑀸𑀳𑁄… 𑀫𑀓𑁆𑀔𑁄… 𑀧𑀴𑀸𑀲𑁄… 𑀇𑀲𑁆𑀲𑀸… 𑀫𑀘𑁆𑀙𑀭𑀺𑀬𑀁… 𑀫𑀸𑀬𑀸… 𑀲𑀸𑀞𑁂𑀬𑁆𑀬𑀁… 𑀣𑀫𑁆𑀪𑁄… 𑀲𑀸𑀭𑀫𑁆𑀪𑁄… 𑀫𑀸𑀦𑁄… 𑀅𑀢𑀺𑀫𑀸𑀦𑁄… 𑀫𑀤𑁄… 𑀧𑀫𑀸𑀤𑁄… 𑀲𑀩𑁆𑀩𑁂 𑀓𑀺𑀮𑁂𑀲𑀸… 𑀲𑀩𑁆𑀩𑁂 𑀤𑀼𑀘𑁆𑀘𑀭𑀺𑀢𑀸… 𑀲𑀩𑁆𑀩𑁂 𑀤𑀭𑀣𑀸… 𑀲𑀩𑁆𑀩𑁂 𑀧𑀭𑀺𑀴𑀸𑀳𑀸… 𑀲𑀩𑁆𑀩𑁂 𑀲𑀦𑁆𑀢𑀸𑀧𑀸… 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀸 𑀥𑀼𑀢𑀸 𑀘 𑀥𑁄𑀢𑀸 𑀘 𑀲𑀦𑁆𑀥𑁄𑀢𑀸 𑀘 𑀦𑀺𑀤𑁆𑀥𑁄𑀢𑀸 𑀘. 𑀢𑀁𑀓𑀸𑀭𑀡𑀸 𑀥𑁄𑀦𑀸 𑀯𑀼𑀘𑁆𑀘𑀢𑀺 𑀧𑀜𑁆𑀜𑀸.

𑀅𑀣 𑀯𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀥𑀼𑀢𑀸 𑀘 𑀥𑁄𑀢𑀸 𑀘 𑀲𑀦𑁆𑀥𑁄𑀢𑀸 𑀘 𑀦𑀺𑀤𑁆𑀥𑁄𑀢𑀸 𑀘, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁂𑀦 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑁄 𑀥𑀼𑀢𑁄 𑀘 𑀥𑁄𑀢𑁄 𑀘 𑀲𑀦𑁆𑀥𑁄𑀢𑁄 𑀘 𑀦𑀺𑀤𑁆𑀥𑁄𑀢𑁄 𑀘, 𑀲𑀫𑁆𑀫𑀸𑀯𑀸𑀘𑀸𑀬 𑀫𑀺𑀘𑁆𑀙𑀸𑀯𑀸𑀘𑀸 𑀥𑀼𑀢𑀸 𑀘… 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁂𑀦 𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑁄 𑀥𑀼𑀢𑁄 𑀘… 𑀲𑀫𑁆𑀫𑀸𑀆𑀚𑀻𑀯𑁂𑀦 𑀫𑀺𑀘𑁆𑀙𑀸𑀆𑀚𑀻𑀯𑁄 𑀥𑀼𑀢𑁄 𑀘… 𑀲𑀫𑁆𑀫𑀸𑀯𑀸𑀬𑀸𑀫𑁂𑀦 𑀫𑀺𑀘𑁆𑀙𑀸𑀯𑀸𑀬𑀸𑀫𑁄 𑀥𑀼𑀢𑁄 𑀘… 𑀲𑀫𑁆𑀫𑀸𑀲𑀢𑀺𑀬𑀸 𑀫𑀺𑀘𑁆𑀙𑀸𑀲𑀢𑀺 𑀥𑀼𑀢𑀸 𑀘… 𑀲𑀫𑁆𑀫𑀸𑀲𑀫𑀸𑀥𑀺𑀦𑀸 𑀫𑀺𑀘𑁆𑀙𑀸𑀲𑀫𑀸𑀥𑀺 𑀥𑀼𑀢𑁄 𑀘… 𑀲𑀫𑁆𑀫𑀸𑀜𑀸𑀡𑁂𑀦 𑀫𑀺𑀘𑁆𑀙𑀸𑀜𑀸𑀡𑀁 𑀥𑀼𑀢𑀜𑁆𑀘… 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺𑀬𑀸 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀺 𑀥𑀼𑀢𑀸 𑀘 𑀥𑁄𑀢𑀸 𑀘 𑀲𑀦𑁆𑀥𑁄𑀢𑀸 𑀘 𑀦𑀺𑀤𑁆𑀥𑁄𑀢𑀸 𑀘.

𑀅𑀣 𑀯𑀸 𑀅𑀭𑀺𑀬𑁂𑀦 𑀅𑀝𑁆𑀞𑀗𑁆𑀕𑀺𑀓𑁂𑀦 𑀫𑀕𑁆𑀕𑁂𑀦 𑀲𑀩𑁆𑀩𑁂 𑀓𑀺𑀮𑁂𑀲𑀸… 𑀲𑀩𑁆𑀩𑁂 𑀤𑀼𑀘𑁆𑀘𑀭𑀺𑀢𑀸… 𑀲𑀩𑁆𑀩𑁂 𑀤𑀭𑀣𑀸… 𑀲𑀩𑁆𑀩𑁂 𑀧𑀭𑀺𑀴𑀸𑀳𑀸… 𑀲𑀩𑁆𑀩𑁂 𑀲𑀦𑁆𑀢𑀸𑀧𑀸… 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀸 𑀥𑀼𑀢𑀸 𑀘 𑀥𑁄𑀢𑀸 𑀘 𑀲𑀦𑁆𑀥𑁄𑀢𑀸 𑀘 𑀦𑀺𑀤𑁆𑀥𑁄𑀢𑀸 𑀘. 𑀅𑀭𑀳𑀸 𑀇𑀫𑁂𑀳𑀺 𑀥𑁄𑀦𑁂𑀳𑀺 𑀥𑀫𑁆𑀫𑁂𑀳𑀺 𑀉𑀧𑁂𑀢𑁄 𑀲𑀫𑀼𑀧𑁂𑀢𑁄 𑀉𑀧𑀕𑀢𑁄 𑀲𑀫𑀼𑀧𑀕𑀢𑁄 𑀉𑀧𑀧𑀦𑁆𑀦𑁄 𑀲𑀫𑀼𑀧𑀧𑀦𑁆𑀦𑁄 𑀲𑀫𑀦𑁆𑀦𑀸𑀕𑀢𑁄. 𑀢𑀲𑁆𑀫𑀸 𑀅𑀭𑀳𑀸 𑀥𑁄𑀦𑁄. 𑀲𑁄 𑀥𑀼𑀢𑀭𑀸𑀕𑁄 𑀥𑀼𑀢𑀧𑀸𑀧𑁄 𑀥𑀼𑀢𑀓𑀺𑀮𑁂𑀲𑁄 𑀥𑀼𑀢𑀧𑀭𑀺𑀴𑀸𑀳𑁄𑀢𑀺 𑁋 𑀥𑁄𑀦𑁄.

𑀥𑁄𑀦𑁄 𑀦 𑀳𑀺 𑀢𑁂𑀦 𑀫𑀜𑁆𑀜𑀢𑀺, 𑀬𑀤𑀺𑀤𑀁 𑀤𑀺𑀝𑁆𑀞𑀲𑀼𑀢𑀫𑀼𑀢𑁂𑀲𑀼 𑀯𑀸𑀢𑀺. 𑀥𑁄𑀦𑁄 𑀤𑀺𑀝𑁆𑀞𑀁 𑀦 𑀫𑀜𑁆𑀜𑀢𑀺, 𑀤𑀺𑀝𑁆𑀞𑀲𑁆𑀫𑀺𑀁 𑀦 𑀫𑀜𑁆𑀜𑀢𑀺, 𑀤𑀺𑀝𑁆𑀞𑀢𑁄 𑀦 𑀫𑀜𑁆𑀜𑀢𑀺, 𑀤𑀺𑀝𑁆𑀞𑀸 𑀫𑁂𑀢𑀺 𑀦 𑀫𑀜𑁆𑀜𑀢𑀺; 𑀲𑀼𑀢𑀁 𑀦 𑀫𑀜𑁆𑀜𑀢𑀺, 𑀲𑀼𑀢𑀲𑁆𑀫𑀺𑀁 𑀦 𑀫𑀜𑁆𑀜𑀢𑀺, 𑀲𑀼𑀢𑀢𑁄 𑀦 𑀫𑀜𑁆𑀜𑀢𑀺, 𑀲𑀼𑀢𑀁 𑀫𑁂𑀢𑀺 𑀦 𑀫𑀜𑁆𑀜𑀢𑀺; 𑀫𑀼𑀢𑀁 𑀦 𑀫𑀜𑁆𑀜𑀢𑀺, 𑀫𑀼𑀢𑀲𑁆𑀫𑀺𑀁 𑀦 𑀫𑀜𑁆𑀜𑀢𑀺, 𑀫𑀼𑀢𑀢𑁄 𑀦 𑀫𑀜𑁆𑀜𑀢𑀺, 𑀫𑀼𑀢𑀁 𑀫𑁂𑀢𑀺 𑀦 𑀫𑀜𑁆𑀜𑀢𑀺; 𑀯𑀺𑀜𑁆𑀜𑀸𑀢𑀁 𑀦 𑀫𑀜𑁆𑀜𑀢𑀺, 𑀯𑀺𑀜𑁆𑀜𑀸𑀢𑀲𑁆𑀫𑀺𑀁 𑀦 𑀫𑀜𑁆𑀜𑀢𑀺, 𑀯𑀺𑀜𑁆𑀜𑀸𑀢𑀢𑁄 𑀦 𑀫𑀜𑁆𑀜𑀢𑀺, 𑀯𑀺𑀜𑁆𑀜𑀸𑀢𑀁 𑀫𑁂𑀢𑀺 𑀦 𑀫𑀜𑁆𑀜𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀅𑀲𑁆𑀫𑀻𑀢𑀺, 𑀪𑀺𑀓𑁆𑀔𑀯𑁂, 𑀫𑀜𑁆𑀜𑀺𑀢𑀫𑁂𑀢𑀁, 𑀅𑀬𑀫𑀳𑀫𑀲𑁆𑀫𑀻𑀢𑀺 𑀫𑀜𑁆𑀜𑀺𑀢𑀫𑁂𑀢𑀁, 𑀪𑀯𑀺𑀲𑁆𑀲𑀦𑁆𑀢𑀺 𑀫𑀜𑁆𑀜𑀺𑀢𑀫𑁂𑀢𑀁, 𑀦 𑀪𑀯𑀺𑀲𑁆𑀲𑀦𑁆𑀢𑀺 𑀫𑀜𑁆𑀜𑀺𑀢𑀫𑁂𑀢𑀁, 𑀭𑀽𑀧𑀻 𑀪𑀯𑀺𑀲𑁆𑀲𑀦𑁆𑀢𑀺 𑀫𑀜𑁆𑀜𑀺𑀢𑀫𑁂𑀢𑀁, 𑀅𑀭𑀽𑀧𑀻 𑀪𑀯𑀺𑀲𑁆𑀲𑀦𑁆𑀢𑀺 𑀫𑀜𑁆𑀜𑀺𑀢𑀫𑁂𑀢𑀁, 𑀲𑀜𑁆𑀜𑀻 𑀪𑀯𑀺𑀲𑁆𑀲𑀦𑁆𑀢𑀺 𑀫𑀜𑁆𑀜𑀺𑀢𑀫𑁂𑀢𑀁, 𑀅𑀲𑀜𑁆𑀜𑀻 𑀪𑀯𑀺𑀲𑁆𑀲𑀦𑁆𑀢𑀺 𑀫𑀜𑁆𑀜𑀺𑀢𑀫𑁂𑀢𑀁, 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻 𑀪𑀯𑀺𑀲𑁆𑀲𑀦𑁆𑀢𑀺 𑀫𑀜𑁆𑀜𑀺𑀢𑀫𑁂𑀢𑀁. 𑀫𑀜𑁆𑀜𑀺𑀢𑀁 [𑀫𑀜𑁆𑀜𑀺𑀢𑀁 𑀳𑀺 (𑀲𑀻.)], 𑀪𑀺𑀓𑁆𑀔𑀯𑁂, 𑀭𑁄𑀕𑁄, 𑀫𑀜𑁆𑀜𑀺𑀢𑀁 𑀕𑀡𑁆𑀟𑁄, 𑀫𑀜𑁆𑀜𑀺𑀢𑀁 𑀲𑀮𑁆𑀮𑀁, 𑀫𑀜𑁆𑀜𑀺𑀢𑀁 𑀉𑀧𑀤𑁆𑀤𑀯𑁄. 𑀢𑀲𑁆𑀫𑀸𑀢𑀺𑀳, 𑀪𑀺𑀓𑁆𑀔𑀯𑁂, 𑀅𑀫𑀜𑁆𑀜𑀫𑀸𑀦𑁂𑀦 𑀘𑁂𑀢𑀲𑀸 𑀯𑀺𑀳𑀭𑀺𑀲𑁆𑀲𑀸𑀫𑀸𑀢𑀺, 𑀏𑀯𑀜𑁆𑀳𑀺 𑀯𑁄, 𑀪𑀺𑀓𑁆𑀔𑀯𑁂, 𑀲𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺 𑁋 𑀥𑁄𑀦𑁄 𑀦 𑀳𑀺 𑀢𑁂𑀦 𑀫𑀜𑁆𑀜𑀢𑀺 𑀬𑀤𑀺𑀤𑀁 𑀤𑀺𑀝𑁆𑀞𑀲𑀼𑀢𑀫𑀼𑀢𑁂𑀲𑀼 𑀯𑀸.

𑀦𑀸𑀜𑁆𑀜𑁂𑀦 𑀯𑀺𑀲𑀼𑀤𑁆𑀥𑀺𑀫𑀺𑀘𑁆𑀙𑀢𑀻𑀢𑀺. 𑀥𑁄𑀦𑁄 𑀅𑀜𑁆𑀜𑁂𑀦 𑀅𑀲𑀼𑀤𑁆𑀥𑀺𑀫𑀕𑁆𑀕𑁂𑀦 𑀫𑀺𑀘𑁆𑀙𑀸𑀧𑀝𑀺𑀧𑀤𑀸𑀬 𑀅𑀦𑀺𑀬𑁆𑀬𑀸𑀦𑀺𑀓𑀧𑀣𑁂𑀦 𑀅𑀜𑁆𑀜𑀢𑁆𑀭 𑀲𑀢𑀺𑀧𑀝𑁆𑀞𑀸𑀦𑁂𑀳𑀺 𑀅𑀜𑁆𑀜𑀢𑁆𑀭 𑀲𑀫𑁆𑀫𑀧𑁆𑀧𑀥𑀸𑀦𑁂𑀳𑀺 𑀅𑀜𑁆𑀜𑀢𑁆𑀭 𑀇𑀤𑁆𑀥𑀺𑀧𑀸𑀤𑁂𑀳𑀺 𑀅𑀜𑁆𑀜𑀢𑁆𑀭 𑀇𑀦𑁆𑀤𑁆𑀭𑀺𑀬𑁂𑀳𑀺 𑀅𑀜𑁆𑀜𑀢𑁆𑀭 𑀩𑀮𑁂𑀳𑀺 𑀅𑀜𑁆𑀜𑀢𑁆𑀭 𑀩𑁄𑀚𑁆𑀛𑀗𑁆𑀕𑁂𑀳𑀺 𑀅𑀜𑁆𑀜𑀢𑁆𑀭 𑀅𑀭𑀺𑀬𑀸 𑀅𑀝𑁆𑀞𑀗𑁆𑀕𑀺𑀓𑀸 𑀫𑀕𑁆𑀕𑀸 𑀲𑀼𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀁 𑀧𑀭𑀺𑀲𑀼𑀤𑁆𑀥𑀺𑀁 𑀫𑀼𑀢𑁆𑀢𑀺𑀁 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀫𑀼𑀢𑁆𑀢𑀺𑀁 𑀦 𑀇𑀘𑁆𑀙𑀢𑀺 𑀦 𑀲𑀸𑀤𑀺𑀬𑀢𑀺 𑀦 𑀧𑀢𑁆𑀣𑁂𑀢𑀺 𑀦 𑀧𑀺𑀳𑁂𑀢𑀺 𑀦𑀸𑀪𑀺𑀚𑀧𑁆𑀧𑀢𑀻𑀢𑀺 𑁋 𑀦𑀸𑀜𑁆𑀜𑁂𑀦 𑀯𑀺𑀲𑀼𑀤𑁆𑀥𑀺𑀫𑀺𑀘𑁆𑀙𑀢𑀺.

𑀦 𑀳𑀺 𑀲𑁄 𑀭𑀚𑁆𑀚𑀢𑀺 𑀦𑁄 𑀯𑀺𑀭𑀚𑁆𑀚𑀢𑀻𑀢𑀺. 𑀲𑀩𑁆𑀩𑁂 𑀩𑀸𑀮𑀧𑀼𑀣𑀼𑀚𑁆𑀚𑀦𑀸 𑀭𑀚𑁆𑀚𑀦𑁆𑀢𑀺, 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀓𑀁 𑀉𑀧𑀸𑀤𑀸𑀬 𑀲𑀢𑁆𑀢 𑀲𑁂𑀓𑁆𑀔𑀸 𑀯𑀺𑀭𑀚𑁆𑀚𑀦𑁆𑀢𑀺; 𑀅𑀭𑀳𑀸 𑀦𑁂𑀯 𑀭𑀚𑁆𑀚𑀢𑀺 𑀦𑁄 𑀯𑀺𑀭𑀚𑁆𑀚𑀢𑀺. 𑀯𑀺𑀭𑀢𑁆𑀢𑁄 𑀲𑁄 𑀔𑀬𑀸 𑀭𑀸𑀕𑀲𑁆𑀲 𑀯𑀻𑀢𑀭𑀸𑀕𑀢𑁆𑀢𑀸, 𑀔𑀬𑀸 𑀤𑁄𑀲𑀲𑁆𑀲 𑀯𑀻𑀢𑀤𑁄𑀲𑀢𑁆𑀢𑀸, 𑀔𑀬𑀸 𑀫𑁄𑀳𑀲𑁆𑀲 𑀯𑀻𑀢𑀫𑁄𑀳𑀢𑁆𑀢𑀸. 𑀲𑁄 𑀯𑀼𑀝𑁆𑀞𑀯𑀸𑀲𑁄 𑀘𑀺𑀡𑁆𑀡𑀘𑀭𑀡𑁄…𑀧𑁂… 𑀚𑀸𑀢𑀺𑀚𑀭𑀸𑀫𑀭𑀡𑀲𑀁𑀲𑀸𑀭𑁄, 𑀦𑀢𑁆𑀣𑀺 𑀢𑀲𑁆𑀲 𑀧𑀼𑀦𑀩𑁆𑀪𑀯𑁄𑀢𑀺 𑁋 𑀦 𑀳𑀺 𑀲𑁄 𑀭𑀚𑁆𑀚𑀢𑀺 𑀦𑁄 𑀯𑀺𑀭𑀚𑁆𑀚𑀢𑀺.

𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀥𑁄𑀦𑁄 𑀦 𑀳𑀺 𑀢𑁂𑀦 𑀫𑀜𑁆𑀜𑀢𑀺, 𑀬𑀤𑀺𑀤𑀁 𑀤𑀺𑀝𑁆𑀞𑀲𑀼𑀢𑀫𑀼𑀢𑁂𑀲𑀼 𑀯𑀸;

𑀦𑀸𑀜𑁆𑀜𑁂𑀦 𑀯𑀺𑀲𑀼𑀤𑁆𑀥𑀺𑀫𑀺𑀘𑁆𑀙𑀢𑀺, 𑀦 𑀳𑀺 𑀲𑁄 𑀭𑀚𑁆𑀚𑀢𑀺 𑀦𑁄 𑀯𑀺𑀭𑀚𑁆𑀚𑀢𑀻’’𑀢𑀺.

𑀚𑀭𑀸𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁄 𑀙𑀝𑁆𑀞𑁄.