𑁫. 𑀧𑀭𑀫𑀝𑁆𑀞𑀓𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁄

𑀅𑀣 𑀧𑀭𑀫𑀝𑁆𑀞𑀓𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀁 𑀯𑀓𑁆𑀔𑀢𑀺 𑁋

𑁩𑁧. 𑀧𑀭𑀫𑀦𑁆𑀢𑀺 𑀤𑀺𑀝𑁆𑀞𑀻𑀲𑀼 𑀧𑀭𑀺𑀩𑁆𑀩𑀲𑀸𑀦𑁄, 𑀬𑀤𑀼𑀢𑁆𑀢𑀭𑀺𑀁 𑀓𑀼𑀭𑀼𑀢𑁂 𑀚𑀦𑁆𑀢𑀼 𑀮𑁄𑀓𑁂;

𑀳𑀻𑀦𑀸𑀢𑀺 𑀅𑀜𑁆𑀜𑁂 𑀢𑀢𑁄 𑀲𑀩𑁆𑀩𑀫𑀸𑀳, 𑀢𑀲𑁆𑀫𑀸 𑀯𑀺𑀯𑀸𑀤𑀸𑀦𑀺 𑀅𑀯𑀻𑀢𑀺𑀯𑀢𑁆𑀢𑁄.

𑀧𑀭𑀫𑀦𑁆𑀢𑀺 𑀤𑀺𑀝𑁆𑀞𑀻𑀲𑀼 𑀧𑀭𑀺𑀩𑁆𑀩𑀲𑀸𑀦𑁄𑀢𑀺. 𑀲𑀦𑁆𑀢𑁂𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀤𑀺𑀝𑁆𑀞𑀺𑀕𑀢𑀺𑀓𑀸. 𑀢𑁂 𑀤𑁆𑀯𑀸𑀲𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀕𑀢𑀸𑀦𑀁 𑀅𑀜𑁆𑀜𑀢𑀭𑀜𑁆𑀜𑀢𑀭𑀁 𑀤𑀺𑀝𑁆𑀞𑀺𑀕𑀢𑀁 ‘‘𑀇𑀤𑀁 𑀧𑀭𑀫𑀁 𑀅𑀕𑁆𑀕𑀁 𑀲𑁂𑀝𑁆𑀞𑀁 𑀯𑀺𑀲𑀺𑀝𑁆𑀞𑀁 𑀧𑀸𑀫𑁄𑀓𑁆𑀔𑀁 𑀉𑀢𑁆𑀢𑀫𑀁 𑀧𑀯𑀭’’𑀦𑁆𑀢𑀺 𑀕𑀳𑁂𑀢𑁆𑀯𑀸 𑀉𑀕𑁆𑀕𑀳𑁂𑀢𑁆𑀯𑀸 𑀕𑀡𑁆𑀳𑀺𑀢𑁆𑀯𑀸 𑀧𑀭𑀸𑀫𑀲𑀺𑀢𑁆𑀯𑀸 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀲𑀓𑀸𑀬 𑀲𑀓𑀸𑀬 𑀤𑀺𑀝𑁆𑀞𑀺𑀬𑀸 𑀯𑀲𑀦𑁆𑀢𑀺 𑀧𑀯𑀲𑀦𑁆𑀢𑀺 𑀆𑀯𑀲𑀦𑁆𑀢𑀺 𑀧𑀭𑀺𑀯𑀲𑀦𑁆𑀢𑀺. 𑀬𑀣𑀸 𑀆𑀕𑀸𑀭𑀺𑀓𑀸 𑀯𑀸 𑀖𑀭𑁂𑀲𑀼 𑀯𑀲𑀦𑁆𑀢𑀺, 𑀲𑀸𑀧𑀢𑁆𑀢𑀺𑀓𑀸 𑀯𑀸 𑀆𑀧𑀢𑁆𑀢𑀻𑀲𑀼 𑀯𑀲𑀦𑁆𑀢𑀺, 𑀲𑀓𑀺𑀮𑁂𑀲𑀸 𑀯𑀸 𑀓𑀺𑀮𑁂𑀲𑁂𑀲𑀼 𑀯𑀲𑀦𑁆𑀢𑀺; 𑀏𑀯𑀫𑁂𑀯 𑀲𑀦𑁆𑀢𑁂𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀤𑀺𑀝𑁆𑀞𑀺𑀕𑀢𑀺𑀓𑀸. 𑀢𑁂 𑀤𑁆𑀯𑀸𑀲𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀕𑀢𑀸𑀦𑀁 𑀅𑀜𑁆𑀜𑀢𑀭𑀜𑁆𑀜𑀢𑀭𑀁 𑀤𑀺𑀝𑁆𑀞𑀺𑀕𑀢𑀁 ‘‘𑀇𑀤𑀁 𑀧𑀭𑀫𑀁 𑀅𑀕𑁆𑀕𑀁 𑀲𑁂𑀝𑁆𑀞𑀁 𑀯𑀺𑀲𑀺𑀝𑁆𑀞𑀁 𑀧𑀸𑀫𑁄𑀓𑁆𑀔𑀁 𑀉𑀢𑁆𑀢𑀫𑀁 𑀧𑀯𑀭’’𑀦𑁆𑀢𑀺 𑀕𑀳𑁂𑀢𑁆𑀯𑀸 𑀉𑀕𑁆𑀕𑀳𑁂𑀢𑁆𑀯𑀸 𑀕𑀡𑁆𑀳𑀺𑀢𑁆𑀯𑀸 𑀧𑀭𑀸𑀫𑀲𑀺𑀢𑁆𑀯𑀸 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀲𑀓𑀸𑀬 𑀲𑀓𑀸𑀬 𑀤𑀺𑀝𑁆𑀞𑀺𑀬𑀸 𑀯𑀲𑀦𑁆𑀢𑀺 𑀧𑀯𑀲𑀦𑁆𑀢𑀺 [𑀲𑀁𑀯𑀲𑀦𑁆𑀢𑀺 (𑀲𑁆𑀬𑀸.) 𑀦𑀢𑁆𑀣𑀺 𑀲𑀻𑀳𑀴𑀧𑁄𑀢𑁆𑀣𑀓𑁂] 𑀆𑀯𑀲𑀦𑁆𑀢𑀺 𑀧𑀭𑀺𑀯𑀲𑀦𑁆𑀢𑀻𑀢𑀺 𑁋 𑀧𑀭𑀫𑀦𑁆𑀢𑀺 𑀤𑀺𑀝𑁆𑀞𑀻𑀲𑀼 𑀧𑀭𑀺𑀩𑁆𑀩𑀲𑀸𑀦𑁄.

𑀬𑀤𑀼𑀢𑁆𑀢𑀭𑀺𑀁 𑀓𑀼𑀭𑀼𑀢𑁂 𑀚𑀦𑁆𑀢𑀼 𑀮𑁄𑀓𑁂𑀢𑀺. 𑀬𑀤𑀦𑁆𑀢𑀺 𑀬𑀁. 𑀉𑀢𑁆𑀢𑀭𑀺𑀁 𑀓𑀼𑀭𑀼𑀢𑁂𑀢𑀺 𑀉𑀢𑁆𑀢𑀭𑀺𑀁 𑀓𑀭𑁄𑀢𑀺, 𑀅𑀕𑁆𑀕𑀁 𑀲𑁂𑀝𑁆𑀞𑀁 𑀯𑀺𑀲𑀺𑀝𑁆𑀞𑀁 𑀧𑀸𑀫𑁄𑀓𑁆𑀔𑀁 𑀉𑀢𑁆𑀢𑀫𑀁 𑀧𑀯𑀭𑀁 𑀓𑀭𑁄𑀢𑀺 ‘‘𑀅𑀬𑀁 𑀲𑀢𑁆𑀣𑀸 𑀲𑀩𑁆𑀩𑀜𑁆𑀜𑀽’’𑀢𑀺 𑀉𑀢𑁆𑀢𑀭𑀺𑀁 𑀓𑀭𑁄𑀢𑀺, 𑀅𑀕𑁆𑀕𑀁 𑀲𑁂𑀝𑁆𑀞𑀁 𑀯𑀺𑀲𑀺𑀝𑁆𑀞𑀁 𑀧𑀸𑀫𑁄𑀓𑁆𑀔𑀁 𑀉𑀢𑁆𑀢𑀫𑀁 𑀧𑀯𑀭𑀁 𑀓𑀭𑁄𑀢𑀺. ‘‘𑀅𑀬𑀁 𑀥𑀫𑁆𑀫𑁄 𑀲𑁆𑀯𑀸𑀓𑁆𑀔𑀸𑀢𑁄…, 𑀅𑀬𑀁 𑀕𑀡𑁄 𑀲𑀼𑀧𑁆𑀧𑀝𑀺𑀧𑀦𑁆𑀦𑁄…, 𑀅𑀬𑀁 𑀤𑀺𑀝𑁆𑀞𑀺 𑀪𑀤𑁆𑀤𑀺𑀓𑀸…, 𑀅𑀬𑀁 𑀧𑀝𑀺𑀧𑀤𑀸 𑀲𑀼𑀧𑀜𑁆𑀜𑀢𑁆𑀢𑀸…, 𑀅𑀬𑀁 𑀫𑀕𑁆𑀕𑁄 𑀦𑀺𑀬𑁆𑀬𑀸𑀦𑀺𑀓𑁄’’𑀢𑀺 𑀉𑀢𑁆𑀢𑀭𑀺𑀁 𑀓𑀭𑁄𑀢𑀺, 𑀅𑀕𑁆𑀕𑀁 𑀲𑁂𑀝𑁆𑀞𑀁 𑀯𑀺𑀲𑀺𑀝𑁆𑀞𑀁 𑀧𑀸𑀫𑁄𑀓𑁆𑀔𑀁 𑀉𑀢𑁆𑀢𑀫𑀁 𑀧𑀯𑀭𑀁 𑀓𑀭𑁄𑀢𑀺 𑀦𑀺𑀩𑁆𑀩𑀢𑁆𑀢𑁂𑀢𑀺 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀢𑀺. 𑀚𑀦𑁆𑀢𑀽𑀢𑀺 𑀲𑀢𑁆𑀢𑁄 𑀦𑀭𑁄…𑀧𑁂… 𑀫𑀦𑀼𑀚𑁄. 𑀮𑁄𑀓𑁂𑀢𑀺 𑀅𑀧𑀸𑀬𑀮𑁄𑀓𑁂…𑀧𑁂… 𑀆𑀬𑀢𑀦𑀮𑁄𑀓𑁂𑀢𑀺 𑁋 𑀬𑀤𑀼𑀢𑁆𑀢𑀭𑀺𑀁 𑀓𑀼𑀭𑀼𑀢𑁂 𑀚𑀦𑁆𑀢𑀼 𑀮𑁄𑀓𑁂.

𑀳𑀻𑀦𑀸𑀢𑀺 𑀅𑀜𑁆𑀜𑁂 𑀢𑀢𑁄 𑀲𑀩𑁆𑀩𑀫𑀸𑀳𑀸𑀢𑀺 𑀅𑀢𑁆𑀢𑀦𑁄 𑀲𑀢𑁆𑀣𑀸𑀭𑀁 𑀥𑀫𑁆𑀫𑀓𑁆𑀔𑀸𑀦𑀁 𑀕𑀡𑀁 𑀤𑀺𑀝𑁆𑀞𑀺𑀁 𑀧𑀝𑀺𑀧𑀤𑀁 𑀫𑀕𑁆𑀕𑀁 𑀞𑀧𑁂𑀢𑁆𑀯𑀸 𑀲𑀩𑁆𑀩𑁂 𑀧𑀭𑀧𑁆𑀧𑀯𑀸𑀤𑁂 𑀔𑀺𑀧𑀢𑀺 𑀉𑀓𑁆𑀔𑀺𑀧𑀢𑀺 𑀧𑀭𑀺𑀓𑁆𑀔𑀺𑀧𑀢𑀺. ‘‘𑀲𑁄 𑀲𑀢𑁆𑀣𑀸 𑀦 𑀲𑀩𑁆𑀩𑀜𑁆𑀜𑀽, 𑀥𑀫𑁆𑀫𑁄 𑀦 𑀲𑁆𑀯𑀸𑀓𑁆𑀔𑀸𑀢𑁄, 𑀕𑀡𑁄 𑀦 𑀲𑀼𑀧𑁆𑀧𑀝𑀺𑀧𑀦𑁆𑀦𑁄, 𑀤𑀺𑀝𑁆𑀞𑀺 𑀦 𑀪𑀤𑁆𑀤𑀺𑀓𑀸, 𑀧𑀝𑀺𑀧𑀤𑀸 𑀦 𑀲𑀼𑀧𑀜𑁆𑀜𑀢𑁆𑀢𑀸, 𑀫𑀕𑁆𑀕𑁄 𑀦 𑀦𑀺𑀬𑁆𑀬𑀸𑀦𑀺𑀓𑁄, 𑀦𑀢𑁆𑀣𑁂𑀢𑁆𑀣 𑀲𑀼𑀤𑁆𑀥𑀺 𑀯𑀸 𑀯𑀺𑀲𑀼𑀤𑁆𑀥𑀺 𑀯𑀸 𑀧𑀭𑀺𑀲𑀼𑀤𑁆𑀥𑀺 𑀯𑀸 𑀫𑀼𑀢𑁆𑀢𑀺 𑀯𑀸 𑀯𑀺𑀫𑀼𑀢𑁆𑀢𑀺 𑀯𑀸 𑀧𑀭𑀺𑀫𑀼𑀢𑁆𑀢𑀺 𑀯𑀸, 𑀦𑀢𑁆𑀣𑁂𑀢𑁆𑀣 𑀲𑀼𑀚𑁆𑀛𑀦𑁆𑀢𑀺 𑀯𑀸 𑀯𑀺𑀲𑀼𑀚𑁆𑀛𑀦𑁆𑀢𑀺 𑀯𑀸 𑀧𑀭𑀺𑀲𑀼𑀚𑁆𑀛𑀦𑁆𑀢𑀺 𑀯𑀸 𑀫𑀼𑀘𑁆𑀘𑀦𑁆𑀢𑀺 𑀯𑀸 𑀯𑀺𑀫𑀼𑀘𑁆𑀘𑀦𑁆𑀢𑀺 𑀯𑀸 𑀧𑀭𑀺𑀫𑀼𑀘𑁆𑀘𑀦𑁆𑀢𑀺 𑀯𑀸, 𑀳𑀻𑀦𑀸 𑀦𑀺𑀳𑀻𑀦𑀸 𑀑𑀫𑀓𑀸 𑀮𑀸𑀫𑀓𑀸 𑀙𑀢𑀼𑀓𑁆𑀓𑀸 𑀧𑀭𑀺𑀢𑁆𑀢𑀸’’𑀢𑀺 𑀏𑀯𑀫𑀸𑀳 𑀏𑀯𑀁 𑀓𑀣𑁂𑀢𑀺 𑀏𑀯𑀁 𑀪𑀡𑀢𑀺 𑀏𑀯𑀁 𑀤𑀻𑀧𑀬𑀢𑀺 𑀏𑀯𑀁 𑀯𑁄𑀳𑀭𑀢𑀻𑀢𑀺 𑁋 𑀳𑀻𑀦𑀸𑀢𑀺 𑀅𑀜𑁆𑀜𑁂 𑀢𑀢𑁄 𑀲𑀩𑁆𑀩𑀫𑀸𑀳.

𑀢𑀲𑁆𑀫𑀸 𑀯𑀺𑀯𑀸𑀤𑀸𑀦𑀺 𑀅𑀯𑀻𑀢𑀺𑀯𑀢𑁆𑀢𑁄𑀢𑀺. 𑀢𑀲𑁆𑀫𑀸𑀢𑀺 𑀢𑀁𑀓𑀸𑀭𑀡𑀸 𑀢𑀁𑀳𑁂𑀢𑀼 𑀢𑀧𑁆𑀧𑀘𑁆𑀘𑀬𑀸 𑀢𑀁𑀦𑀺𑀤𑀸𑀦𑀸. 𑀯𑀺𑀯𑀸𑀤𑀸𑀦𑀻𑀢𑀺 𑀤𑀺𑀝𑁆𑀞𑀺𑀓𑀮𑀳𑀸𑀦𑀺 𑀤𑀺𑀝𑁆𑀞𑀺𑀪𑀡𑁆𑀟𑀦𑀸𑀦𑀺 𑀤𑀺𑀝𑁆𑀞𑀺𑀯𑀺𑀕𑁆𑀕𑀳𑀸𑀦𑀺 𑀤𑀺𑀝𑁆𑀞𑀺𑀯𑀺𑀯𑀸𑀤𑀸𑀦𑀺 𑀤𑀺𑀝𑁆𑀞𑀺𑀫𑁂𑀥𑀕𑀸𑀦𑀺 𑀘. 𑀅𑀯𑀻𑀢𑀺𑀯𑀢𑁆𑀢𑁄𑀢𑀺 𑀅𑀦𑀢𑀺𑀓𑁆𑀓𑀦𑁆𑀢𑁄 𑀅𑀲𑀫𑀢𑀺𑀓𑁆𑀓𑀦𑁆𑀢𑁄 𑀅𑀯𑀻𑀢𑀺𑀯𑀢𑁆𑀢𑁄𑀢𑀺 𑁋 𑀢𑀲𑁆𑀫𑀸 𑀯𑀺𑀯𑀸𑀤𑀸𑀦𑀺 𑀅𑀯𑀻𑀢𑀺𑀯𑀢𑁆𑀢𑁄.

𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀧𑀭𑀫𑀦𑁆𑀢𑀺 𑀤𑀺𑀝𑁆𑀞𑀻𑀲𑀼 𑀧𑀭𑀺𑀩𑁆𑀩𑀲𑀸𑀦𑁄, 𑀬𑀤𑀼𑀢𑁆𑀢𑀭𑀺𑀁 𑀓𑀼𑀭𑀼𑀢𑁂 𑀚𑀦𑁆𑀢𑀼 𑀮𑁄𑀓𑁂;

𑀳𑀻𑀦𑀸𑀢𑀺 𑀅𑀜𑁆𑀜𑁂 𑀢𑀢𑁄 𑀲𑀩𑁆𑀩𑀫𑀸𑀳, 𑀢𑀲𑁆𑀫𑀸 𑀯𑀺𑀯𑀸𑀤𑀸𑀦𑀺 𑀅𑀯𑀻𑀢𑀺𑀯𑀢𑁆𑀢𑁄’’𑀢𑀺.

𑁩𑁨. 𑀬𑀤𑀢𑁆𑀢𑀦𑀻 𑀧𑀲𑁆𑀲𑀢𑀺 𑀆𑀦𑀺𑀲𑀁𑀲𑀁, 𑀤𑀺𑀝𑁆𑀞𑁂 𑀲𑀼𑀢𑁂 𑀲𑀻𑀮𑀯𑀢𑁂 𑀫𑀼𑀢𑁂 𑀯𑀸;

𑀢𑀤𑁂𑀯 𑀲𑁄 𑀢𑀢𑁆𑀣 𑀲𑀫𑀼𑀕𑁆𑀕𑀳𑀸𑀬, 𑀦𑀺𑀳𑀻𑀦𑀢𑁄 𑀧𑀲𑁆𑀲𑀢𑀺 𑀲𑀩𑁆𑀩𑀫𑀜𑁆𑀜𑀁.

𑀬𑀤𑀢𑁆𑀢𑀦𑀻 𑀧𑀲𑁆𑀲𑀢𑀺 𑀆𑀦𑀺𑀲𑀁𑀲𑀁, 𑀤𑀺𑀝𑁆𑀞𑁂 𑀲𑀼𑀢𑁂 𑀲𑀻𑀮𑀯𑀢𑁂 𑀫𑀼𑀢𑁂 𑀯𑀸𑀢𑀺. 𑀬𑀤𑀢𑁆𑀢𑀦𑀻𑀢𑀺 𑀬𑀁 𑀅𑀢𑁆𑀢𑀦𑀺. 𑀅𑀢𑁆𑀢𑀸 𑀯𑀼𑀘𑁆𑀘𑀢𑀺 𑀤𑀺𑀝𑁆𑀞𑀺𑀕𑀢𑀁. 𑀅𑀢𑁆𑀢𑀦𑁄 𑀤𑀺𑀝𑁆𑀞𑀺𑀬𑀸 𑀤𑁆𑀯𑁂 𑀆𑀦𑀺𑀲𑀁𑀲𑁂 𑀧𑀲𑁆𑀲𑀢𑀺 𑁋 𑀤𑀺𑀝𑁆𑀞𑀥𑀫𑁆𑀫𑀺𑀓𑀜𑁆𑀘 𑀆𑀦𑀺𑀲𑀁𑀲𑀁, 𑀲𑀫𑁆𑀧𑀭𑀸𑀬𑀺𑀓𑀜𑁆𑀘 𑀆𑀦𑀺𑀲𑀁𑀲𑀁. 𑀓𑀢𑀫𑁄 𑀤𑀺𑀝𑁆𑀞𑀺𑀬𑀸 𑀤𑀺𑀝𑁆𑀞𑀥𑀫𑁆𑀫𑀺𑀓𑁄 𑀆𑀦𑀺𑀲𑀁𑀲𑁄? 𑀬𑀁𑀤𑀺𑀝𑁆𑀞𑀺𑀓𑁄 𑀲𑀢𑁆𑀣𑀸 𑀳𑁄𑀢𑀺, 𑀢𑀁𑀤𑀺𑀝𑁆𑀞𑀺𑀓𑀸 𑀲𑀸𑀯𑀓𑀸 𑀳𑁄𑀦𑁆𑀢𑀺. 𑀢𑀁𑀤𑀺𑀝𑁆𑀞𑀺𑀓𑀁 𑀲𑀢𑁆𑀣𑀸𑀭𑀁 𑀲𑀸𑀯𑀓𑀸 𑀲𑀓𑁆𑀓𑀭𑁄𑀦𑁆𑀢𑀺 𑀕𑀭𑀼𑀁 𑀓𑀭𑁄𑀦𑁆𑀢𑀺 𑀫𑀸𑀦𑁂𑀦𑁆𑀢𑀺 𑀧𑀽𑀚𑁂𑀦𑁆𑀢𑀺, 𑀮𑀪𑀢𑀺 𑀘 𑀢𑀢𑁄𑀦𑀺𑀤𑀸𑀦𑀁 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁. 𑀅𑀬𑀁 𑀤𑀺𑀝𑁆𑀞𑀺𑀬𑀸 𑀤𑀺𑀝𑁆𑀞𑀥𑀫𑁆𑀫𑀺𑀓𑁄 𑀆𑀦𑀺𑀲𑀁𑀲𑁄. 𑀓𑀢𑀫𑁄 𑀤𑀺𑀝𑁆𑀞𑀺𑀬𑀸 𑀲𑀫𑁆𑀧𑀭𑀸𑀬𑀺𑀓𑁄 𑀆𑀦𑀺𑀲𑀁𑀲𑁄? 𑀅𑀬𑀁 𑀤𑀺𑀝𑁆𑀞𑀺 𑀅𑀮𑀁 𑀦𑀸𑀕𑀢𑁆𑀢𑀸𑀬 𑀯𑀸 𑀲𑀼𑀧𑀡𑁆𑀡𑀢𑁆𑀢𑀸𑀬 𑀯𑀸 𑀬𑀓𑁆𑀔𑀢𑁆𑀢𑀸𑀬 𑀯𑀸 𑀅𑀲𑀼𑀭𑀢𑁆𑀢𑀸𑀬 𑀯𑀸 𑀕𑀦𑁆𑀥𑀩𑁆𑀩𑀢𑁆𑀢𑀸𑀬 𑀯𑀸 𑀫𑀳𑀸𑀭𑀸𑀚𑀢𑁆𑀢𑀸𑀬 𑀯𑀸 𑀇𑀦𑁆𑀤𑀢𑁆𑀢𑀸𑀬 𑀯𑀸 𑀩𑁆𑀭𑀳𑁆𑀫𑀢𑁆𑀢𑀸𑀬 𑀯𑀸 𑀤𑁂𑀯𑀢𑁆𑀢𑀸𑀬 𑀯𑀸; 𑀅𑀬𑀁 𑀤𑀺𑀝𑁆𑀞𑀺 𑀅𑀮𑀁 𑀲𑀼𑀤𑁆𑀥𑀺𑀬𑀸 𑀯𑀺𑀲𑀼𑀤𑁆𑀥𑀺𑀬𑀸 𑀧𑀭𑀺𑀲𑀼𑀤𑁆𑀥𑀺𑀬𑀸 𑀫𑀼𑀢𑁆𑀢𑀺𑀬𑀸 𑀯𑀺𑀫𑀼𑀢𑁆𑀢𑀺𑀬𑀸 𑀧𑀭𑀺𑀫𑀼𑀢𑁆𑀢𑀺𑀬𑀸; 𑀇𑀫𑀸𑀬 𑀤𑀺𑀝𑁆𑀞𑀺𑀬𑀸 𑀲𑀼𑀚𑁆𑀛𑀦𑁆𑀢𑀺 𑀯𑀺𑀲𑀼𑀚𑁆𑀛𑀦𑁆𑀢𑀺 𑀧𑀭𑀺𑀲𑀼𑀚𑁆𑀛𑀦𑁆𑀢𑀺 𑀫𑀼𑀘𑁆𑀘𑀦𑁆𑀢𑀺 𑀯𑀺𑀫𑀼𑀘𑁆𑀘𑀦𑁆𑀢𑀺 𑀧𑀭𑀺𑀫𑀼𑀘𑁆𑀘𑀦𑁆𑀢𑀺; 𑀇𑀫𑀸𑀬 𑀤𑀺𑀝𑁆𑀞𑀺𑀬𑀸 𑀲𑀼𑀚𑁆𑀛𑀺𑀲𑁆𑀲𑀸𑀫𑀺 𑀯𑀺𑀲𑀼𑀚𑁆𑀛𑀺𑀲𑁆𑀲𑀸𑀫𑀺 𑀧𑀭𑀺𑀲𑀼𑀚𑁆𑀛𑀺𑀲𑁆𑀲𑀸𑀫𑀺 𑀫𑀼𑀘𑁆𑀘𑀺𑀲𑁆𑀲𑀸𑀫𑀺 𑀯𑀺𑀫𑀼𑀘𑁆𑀘𑀺𑀲𑁆𑀲𑀸𑀫𑀺 𑀧𑀭𑀺𑀫𑀼𑀘𑁆𑀘𑀺𑀲𑁆𑀲𑀸𑀫𑀺 𑀆𑀬𑀢𑀺𑀁 𑀨𑀮𑀧𑀸𑀝𑀺𑀓𑀗𑁆𑀔𑀻 𑀳𑁄𑀢𑀺. 𑀅𑀬𑀁 𑀤𑀺𑀝𑁆𑀞𑀺𑀬𑀸 𑀲𑀫𑁆𑀧𑀭𑀸𑀬𑀺𑀓𑁄 𑀆𑀦𑀺𑀲𑀁𑀲𑁄. 𑀅𑀢𑁆𑀢𑀦𑁄 𑀤𑀺𑀝𑁆𑀞𑀺𑀬𑀸 𑀇𑀫𑁂 𑀤𑁆𑀯𑁂 𑀆𑀦𑀺𑀲𑀁𑀲𑁂 𑀧𑀲𑁆𑀲𑀢𑀺, 𑀤𑀺𑀝𑁆𑀞𑀲𑀼𑀤𑁆𑀥𑀺𑀬𑀸𑀧𑀺 𑀤𑁆𑀯𑁂 𑀆𑀦𑀺𑀲𑀁𑀲𑁂 𑀧𑀲𑁆𑀲𑀢𑀺, 𑀲𑀼𑀢𑀲𑀼𑀤𑁆𑀥𑀺𑀬𑀸𑀧𑀺 𑀤𑁆𑀯𑁂 𑀆𑀦𑀺𑀲𑀁𑀲𑁂 𑀧𑀲𑁆𑀲𑀢𑀺, 𑀲𑀻𑀮𑀲𑀼𑀤𑁆𑀥𑀺𑀬𑀸𑀧𑀺 𑀤𑁆𑀯𑁂 𑀆𑀦𑀺𑀲𑀁𑀲𑁂 𑀧𑀲𑁆𑀲𑀢𑀺, 𑀯𑀢𑀲𑀼𑀤𑁆𑀥𑀺𑀬𑀸𑀧𑀺 𑀤𑁆𑀯𑁂 𑀆𑀦𑀺𑀲𑀁𑀲𑁂 𑀧𑀲𑁆𑀲𑀢𑀺, 𑀫𑀼𑀢𑀲𑀼𑀤𑁆𑀥𑀺𑀬𑀸𑀧𑀺 𑀤𑁆𑀯𑁂 𑀆𑀦𑀺𑀲𑀁𑀲𑁂 𑀧𑀲𑁆𑀲𑀢𑀺 𑁋 𑀤𑀺𑀝𑁆𑀞𑀥𑀫𑁆𑀫𑀺𑀓𑀜𑁆𑀘 𑀆𑀦𑀺𑀲𑀁𑀲𑀁 𑀲𑀫𑁆𑀧𑀭𑀸𑀬𑀺𑀓𑀜𑁆𑀘 𑀆𑀦𑀺𑀲𑀁𑀲𑀁. 𑀓𑀢𑀫𑁄 𑀫𑀼𑀢𑀲𑀼𑀤𑁆𑀥𑀺𑀬𑀸 𑀤𑀺𑀝𑁆𑀞𑀥𑀫𑁆𑀫𑀺𑀓𑁄 𑀆𑀦𑀺𑀲𑀁𑀲𑁄? 𑀬𑀁𑀤𑀺𑀝𑁆𑀞𑀺𑀓𑁄 𑀲𑀢𑁆𑀣𑀸 𑀳𑁄𑀢𑀺 𑀢𑀁𑀤𑀺𑀝𑁆𑀞𑀺𑀓𑀸 𑀲𑀸𑀯𑀓𑀸 𑀳𑁄𑀦𑁆𑀢𑀺…𑀧𑁂… 𑀅𑀬𑀁 𑀫𑀼𑀢𑀲𑀼𑀤𑁆𑀥𑀺𑀬𑀸 𑀤𑀺𑀝𑁆𑀞𑀥𑀫𑁆𑀫𑀺𑀓𑁄 𑀆𑀦𑀺𑀲𑀁𑀲𑁄. 𑀓𑀢𑀫𑁄 𑀫𑀼𑀢𑀲𑀼𑀤𑁆𑀥𑀺𑀬𑀸 𑀲𑀫𑁆𑀧𑀭𑀸𑀬𑀺𑀓𑁄 𑀆𑀦𑀺𑀲𑀁𑀲𑁄? 𑀅𑀬𑀁 𑀤𑀺𑀝𑁆𑀞𑀺 𑀅𑀮𑀁 𑀦𑀸𑀕𑀢𑁆𑀢𑀸𑀬 𑀯𑀸…𑀧𑁂… 𑀅𑀬𑀁 𑀫𑀼𑀢𑀲𑀼𑀤𑁆𑀥𑀺𑀬𑀸 𑀲𑀫𑁆𑀧𑀭𑀸𑀬𑀺𑀓𑁄 𑀆𑀦𑀺𑀲𑀁𑀲𑁄. 𑀫𑀼𑀢𑀲𑀼𑀤𑁆𑀥𑀺𑀬𑀸𑀧𑀺 𑀇𑀫𑁂 𑀤𑁆𑀯𑁂 𑀆𑀦𑀺𑀲𑀁𑀲𑁂 𑀧𑀲𑁆𑀲𑀢𑀺 𑀤𑀓𑁆𑀔𑀢𑀺 𑀑𑀮𑁄𑀓𑁂𑀢𑀺 𑀦𑀺𑀚𑁆𑀛𑀸𑀬𑀢𑀺 𑀉𑀧𑀧𑀭𑀺𑀓𑁆𑀔𑀢𑀻𑀢𑀺 𑁋 𑀬𑀤𑀢𑁆𑀢𑀦𑀻 𑀧𑀲𑁆𑀲𑀢𑀺 𑀆𑀦𑀺𑀲𑀁𑀲𑀁 𑀤𑀺𑀝𑁆𑀞𑁂 𑀲𑀼𑀢𑁂 𑀲𑀻𑀮𑀯𑀢𑁂 𑀫𑀼𑀢𑁂 𑀯𑀸.

𑀢𑀤𑁂𑀯 𑀲𑁄 𑀢𑀢𑁆𑀣 𑀲𑀫𑀼𑀕𑁆𑀕𑀳𑀸𑀬𑀸𑀢𑀺. 𑀢𑀤𑁂𑀯𑀸𑀢𑀺 𑀢𑀁 𑀤𑀺𑀝𑁆𑀞𑀺𑀕𑀢𑀁. 𑀢𑀢𑁆𑀣𑀸𑀢𑀺 𑀲𑀓𑀸𑀬 𑀤𑀺𑀝𑁆𑀞𑀺𑀬𑀸 𑀲𑀓𑀸𑀬 𑀔𑀦𑁆𑀢𑀺𑀬𑀸 𑀲𑀓𑀸𑀬 𑀭𑀼𑀘𑀺𑀬𑀸 𑀲𑀓𑀸𑀬 𑀮𑀤𑁆𑀥𑀺𑀬𑀸. 𑀲𑀫𑀼𑀕𑁆𑀕𑀳𑀸𑀬𑀸𑀢𑀺 𑀇𑀤𑀁 𑀧𑀭𑀫𑀁 𑀅𑀕𑁆𑀕𑀁 𑀲𑁂𑀝𑁆𑀞𑀁 𑀯𑀺𑀲𑀺𑀝𑁆𑀞𑀁 𑀧𑀸𑀫𑁄𑀓𑁆𑀔𑀁 𑀉𑀢𑁆𑀢𑀫𑀁 𑀧𑀯𑀭𑀦𑁆𑀢𑀺 𑀕𑀳𑁂𑀢𑁆𑀯𑀸 𑀉𑀕𑁆𑀕𑀳𑁂𑀢𑁆𑀯𑀸 𑀕𑀡𑁆𑀳𑀺𑀢𑁆𑀯𑀸 𑀧𑀭𑀸𑀫𑀲𑀺𑀢𑁆𑀯𑀸 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸𑀢𑀺 𑁋 𑀢𑀤𑁂𑀯 𑀲𑁄 𑀢𑀢𑁆𑀣 𑀲𑀫𑀼𑀕𑁆𑀕𑀳𑀸𑀬.

𑀦𑀺𑀳𑀻𑀦𑀢𑁄 𑀧𑀲𑁆𑀲𑀢𑀺 𑀲𑀩𑁆𑀩𑀫𑀜𑁆𑀜𑀦𑁆𑀢𑀺. 𑀅𑀜𑁆𑀜𑀁 𑀲𑀢𑁆𑀣𑀸𑀭𑀁 𑀥𑀫𑁆𑀫𑀓𑁆𑀔𑀸𑀦𑀁 𑀕𑀡𑀁 𑀤𑀺𑀝𑁆𑀞𑀺𑀁 𑀧𑀝𑀺𑀧𑀤𑀁 𑀫𑀕𑁆𑀕𑀁 𑀳𑀻𑀦𑀢𑁄 𑀦𑀺𑀳𑀻𑀦𑀢𑁄 𑀑𑀫𑀓𑀢𑁄 𑀮𑀸𑀫𑀓𑀢𑁄 𑀙𑀢𑀼𑀓𑁆𑀓𑀢𑁄 𑀧𑀭𑀺𑀢𑁆𑀢𑀢𑁄 𑀤𑀺𑀲𑁆𑀲𑀢𑀺 𑀧𑀲𑁆𑀲𑀢𑀺 𑀤𑀓𑁆𑀔𑀢𑀺 𑀑𑀮𑁄𑀓𑁂𑀢𑀺 𑀦𑀺𑀚𑁆𑀛𑀸𑀬𑀢𑀺 𑀉𑀧𑀧𑀭𑀺𑀓𑁆𑀔𑀢𑀻𑀢𑀺 𑁋 𑀦𑀺𑀳𑀻𑀦𑀢𑁄 𑀧𑀲𑁆𑀲𑀢𑀺 𑀲𑀩𑁆𑀩𑀫𑀜𑁆𑀜𑀁.

𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀬𑀤𑀢𑁆𑀢𑀦𑀻 𑀧𑀲𑁆𑀲𑀢𑀺 𑀆𑀦𑀺𑀲𑀁𑀲𑀁, 𑀤𑀺𑀝𑁆𑀞𑁂 𑀲𑀼𑀢𑁂 𑀲𑀻𑀮𑀯𑀢𑁂 𑀫𑀼𑀢𑁂 𑀯𑀸;

𑀢𑀤𑁂𑀯 𑀲𑁄 𑀢𑀢𑁆𑀣 𑀲𑀫𑀼𑀕𑁆𑀕𑀳𑀸𑀬, 𑀦𑀺𑀳𑀻𑀦𑀢𑁄 𑀧𑀲𑁆𑀲𑀢𑀺 𑀲𑀩𑁆𑀩𑀫𑀜𑁆𑀜’’𑀦𑁆𑀢𑀺.

𑁩𑁩. 𑀢𑀁 𑀯𑀸𑀧𑀺 [𑀘𑀸𑀧𑀺 (𑀲𑀻.)] 𑀕𑀦𑁆𑀣𑀁 𑀓𑀼𑀲𑀮𑀸 𑀯𑀤𑀦𑁆𑀢𑀺, 𑀬𑀁 𑀦𑀺𑀲𑁆𑀲𑀺𑀢𑁄 𑀧𑀲𑁆𑀲𑀢𑀺 𑀳𑀻𑀦𑀫𑀜𑁆𑀜𑀁;

𑀢𑀲𑁆𑀫𑀸 𑀳𑀺 𑀤𑀺𑀝𑁆𑀞𑀁 𑀯 𑀲𑀼𑀢𑀁 𑀫𑀼𑀢𑀁 𑀯𑀸, 𑀲𑀻𑀮𑀩𑁆𑀩𑀢𑀁 𑀪𑀺𑀓𑁆𑀔𑀼 𑀦 𑀦𑀺𑀲𑁆𑀲𑀬𑁂𑀬𑁆𑀬.

𑀢𑀁 𑀯𑀸𑀧𑀺 𑀕𑀦𑁆𑀣𑀁 𑀓𑀼𑀲𑀮𑀸 𑀯𑀤𑀦𑁆𑀢𑀻𑀢𑀺. 𑀓𑀼𑀲𑀮𑀸𑀢𑀺 𑀬𑁂 𑀢𑁂 𑀔𑀦𑁆𑀥𑀓𑀼𑀲𑀮𑀸 𑀥𑀸𑀢𑀼𑀓𑀼𑀲𑀮𑀸 𑀆𑀬𑀢𑀦𑀓𑀼𑀲𑀮𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀓𑀼𑀲𑀮𑀸 𑀲𑀢𑀺𑀧𑀝𑁆𑀞𑀸𑀦𑀓𑀼𑀲𑀮𑀸 𑀲𑀫𑁆𑀫𑀧𑁆𑀧𑀥𑀸𑀦𑀓𑀼𑀲𑀮𑀸 𑀇𑀤𑁆𑀥𑀺𑀧𑀸𑀤𑀓𑀼𑀲𑀮𑀸 𑀇𑀦𑁆𑀤𑁆𑀭𑀺𑀬𑀓𑀼𑀲𑀮𑀸 𑀩𑀮𑀓𑀼𑀲𑀮𑀸 𑀩𑁄𑀚𑁆𑀛𑀗𑁆𑀕𑀓𑀼𑀲𑀮𑀸 𑀫𑀕𑁆𑀕𑀓𑀼𑀲𑀮𑀸 𑀨𑀮𑀓𑀼𑀲𑀮𑀸 𑀦𑀺𑀩𑁆𑀩𑀸𑀦𑀓𑀼𑀲𑀮𑀸, 𑀢𑁂 𑀓𑀼𑀲𑀮𑀸 𑀏𑀯𑀁 𑀯𑀤𑀦𑁆𑀢𑀺 𑁋 ‘‘𑀕𑀦𑁆𑀣𑁄 𑀏𑀲𑁄, 𑀮𑀕𑁆𑀕𑀦𑀁 𑀏𑀢𑀁, 𑀩𑀦𑁆𑀥𑀦𑀁 𑀏𑀢𑀁, 𑀧𑀮𑀺𑀩𑁄𑀥𑁄 𑀏𑀲𑁄’’𑀢𑀺. 𑀏𑀯𑀁 𑀯𑀤𑀦𑁆𑀢𑀺 𑀏𑀯𑀁 𑀓𑀣𑁂𑀦𑁆𑀢𑀺 𑀏𑀯𑀁 𑀪𑀡𑀦𑁆𑀢𑀺 𑀏𑀯𑀁 𑀤𑀻𑀧𑀬𑀦𑁆𑀢𑀺 𑀏𑀯𑀁 𑀯𑁄𑀳𑀭𑀦𑁆𑀢𑀻𑀢𑀺 𑁋 𑀢𑀁 𑀯𑀸𑀧𑀺 𑀕𑀦𑁆𑀣𑀁 𑀓𑀼𑀲𑀮𑀸 𑀯𑀤𑀦𑁆𑀢𑀺.

𑀬𑀁 𑀦𑀺𑀲𑁆𑀲𑀺𑀢𑁄 𑀧𑀲𑁆𑀲𑀢𑀺 𑀳𑀻𑀦𑀫𑀜𑁆𑀜𑀦𑁆𑀢𑀺. 𑀬𑀁 𑀦𑀺𑀲𑁆𑀲𑀺𑀢𑁄𑀢𑀺 𑀬𑀁 𑀲𑀢𑁆𑀣𑀸𑀭𑀁 𑀥𑀫𑁆𑀫𑀓𑁆𑀔𑀸𑀦𑀁 𑀕𑀡𑀁 𑀤𑀺𑀝𑁆𑀞𑀺𑀁 𑀧𑀝𑀺𑀧𑀤𑀁 𑀫𑀕𑁆𑀕𑀁 𑀦𑀺𑀲𑁆𑀲𑀺𑀢𑁄 𑀲𑀦𑁆𑀦𑀺𑀲𑁆𑀲𑀺𑀢𑁄 𑀅𑀮𑁆𑀮𑀻𑀦𑁄 𑀉𑀧𑀕𑀢𑁄 𑀅𑀚𑁆𑀛𑁄𑀲𑀺𑀢𑁄 𑀅𑀥𑀺𑀫𑀼𑀢𑁆𑀢𑁄. 𑀧𑀲𑁆𑀲𑀢𑀺 𑀳𑀻𑀦𑀫𑀜𑁆𑀜𑀦𑁆𑀢𑀺 𑀅𑀜𑁆𑀜𑀁 𑀲𑀢𑁆𑀣𑀸𑀭𑀁 𑀥𑀫𑁆𑀫𑀓𑁆𑀔𑀸𑀦𑀁 𑀕𑀡𑀁 𑀤𑀺𑀝𑁆𑀞𑀺𑀁 𑀧𑀝𑀺𑀧𑀤𑀁 𑀫𑀕𑁆𑀕𑀁 𑀳𑀻𑀦𑀢𑁄 𑀦𑀺𑀳𑀻𑀦𑀢𑁄 𑀑𑀫𑀓𑀢𑁄 𑀮𑀸𑀫𑀓𑀢𑁄 𑀙𑀢𑀼𑀓𑁆𑀓𑀢𑁄 𑀧𑀭𑀺𑀢𑁆𑀢𑀢𑁄 𑀤𑀺𑀲𑁆𑀲𑀢𑀺 𑀧𑀲𑁆𑀲𑀢𑀺 𑀤𑀓𑁆𑀔𑀢𑀺 𑀑𑀮𑁄𑀓𑁂𑀢𑀺 𑀦𑀺𑀚𑁆𑀛𑀸𑀬𑀢𑀺 𑀉𑀧𑀦𑀺𑀚𑁆𑀛𑀸𑀬𑀢𑀺 𑀉𑀧𑀧𑀭𑀺𑀓𑁆𑀔𑀢𑀻𑀢𑀺 𑁋 𑀬𑀁 𑀦𑀺𑀲𑁆𑀲𑀺𑀢𑁄 𑀧𑀲𑁆𑀲𑀢𑀺 𑀳𑀻𑀦𑀫𑀜𑁆𑀜𑀁.

𑀢𑀲𑁆𑀫𑀸 𑀳𑀺 𑀤𑀺𑀝𑁆𑀞𑀁 𑀯 𑀲𑀼𑀢𑀁 𑀫𑀼𑀢𑀁 𑀯𑀸, 𑀲𑀻𑀮𑀩𑁆𑀩𑀢𑀁 𑀪𑀺𑀓𑁆𑀔𑀼 𑀦 𑀦𑀺𑀲𑁆𑀲𑀬𑁂𑀬𑁆𑀬𑀸𑀢𑀺. 𑀢𑀲𑁆𑀫𑀸𑀢𑀺 𑀢𑀲𑁆𑀫𑀸 𑀢𑀁𑀓𑀸𑀭𑀡𑀸 𑀢𑀁𑀳𑁂𑀢𑀼 𑀢𑀧𑁆𑀧𑀘𑁆𑀘𑀬𑀸 𑀢𑀁𑀦𑀺𑀤𑀸𑀦𑀸 𑀤𑀺𑀝𑁆𑀞𑀁 𑀯𑀸 𑀤𑀺𑀝𑁆𑀞𑀲𑀼𑀤𑁆𑀥𑀺𑀁 𑀯𑀸 𑀲𑀼𑀢𑀁 𑀯𑀸 𑀲𑀼𑀢𑀲𑀼𑀤𑁆𑀥𑀺𑀁 𑀯𑀸 𑀫𑀼𑀢𑀁 𑀯𑀸 𑀫𑀼𑀢𑀲𑀼𑀤𑁆𑀥𑀺𑀁 𑀯𑀸 𑀲𑀻𑀮𑀁 𑀯𑀸 𑀲𑀻𑀮𑀲𑀼𑀤𑁆𑀥𑀺𑀁 𑀯𑀸 𑀯𑀢𑀁 𑀯𑀸 𑀯𑀢𑀲𑀼𑀤𑁆𑀥𑀺𑀁 𑀯𑀸 𑀦 𑀦𑀺𑀲𑁆𑀲𑀬𑁂𑀬𑁆𑀬 𑀦 𑀕𑀡𑁆𑀳𑁂𑀬𑁆𑀬 𑀦 𑀧𑀭𑀸𑀫𑀲𑁂𑀬𑁆𑀬 𑀦𑀸𑀪𑀺𑀦𑀺𑀯𑁂𑀲𑁂𑀬𑁆𑀬𑀸𑀢𑀺 𑁋 𑀢𑀲𑁆𑀫𑀸 𑀳𑀺 𑀤𑀺𑀝𑁆𑀞𑀁 𑀯 𑀲𑀼𑀢𑀁 𑀫𑀼𑀢𑀁 𑀯𑀸 𑀲𑀻𑀮𑀩𑁆𑀩𑀢𑀁 𑀪𑀺𑀓𑁆𑀔𑀼 𑀦 𑀦𑀺𑀲𑁆𑀲𑀬𑁂𑀬𑁆𑀬.

𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀢𑀁 𑀯𑀸𑀧𑀺 𑀕𑀦𑁆𑀣𑀁 𑀓𑀼𑀲𑀮𑀸 𑀯𑀤𑀦𑁆𑀢𑀺, 𑀬𑀁 𑀦𑀺𑀲𑁆𑀲𑀺𑀢𑁄 𑀧𑀲𑁆𑀲𑀢𑀺 𑀳𑀻𑀦𑀫𑀜𑁆𑀜𑀁;

𑀢𑀲𑁆𑀫𑀸 𑀳𑀺 𑀤𑀺𑀝𑁆𑀞𑀁 𑀯 𑀲𑀼𑀢𑀁 𑀫𑀼𑀢𑀁 𑀯𑀸, 𑀲𑀻𑀮𑀩𑁆𑀩𑀢𑀁 𑀪𑀺𑀓𑁆𑀔𑀼 𑀦 𑀦𑀺𑀲𑁆𑀲𑀬𑁂𑀬𑁆𑀬𑀸’’𑀢𑀺.

𑁩𑁪. 𑀤𑀺𑀝𑁆𑀞𑀺𑀫𑁆𑀧𑀺 𑀮𑁄𑀓𑀲𑁆𑀫𑀺𑀁 𑀦 𑀓𑀧𑁆𑀧𑀬𑁂𑀬𑁆𑀬, 𑀜𑀸𑀡𑁂𑀦 𑀯𑀸 𑀲𑀻𑀮𑀯𑀢𑁂𑀦 𑀯𑀸𑀧𑀺;

𑀲𑀫𑁄𑀢𑀺 𑀅𑀢𑁆𑀢𑀸𑀦𑀫𑀦𑀽𑀧𑀦𑁂𑀬𑁆𑀬, 𑀳𑀻𑀦𑁄 𑀦 𑀫𑀜𑁆𑀜𑁂𑀣 𑀯𑀺𑀲𑁂𑀲𑀺 𑀯𑀸𑀧𑀺.

𑀤𑀺𑀝𑁆𑀞𑀺𑀫𑁆𑀧𑀺 𑀮𑁄𑀓𑀲𑁆𑀫𑀺𑀁 𑀦 𑀓𑀧𑁆𑀧𑀬𑁂𑀬𑁆𑀬, 𑀜𑀸𑀡𑁂𑀦 𑀯𑀸 𑀲𑀻𑀮𑀯𑀢𑁂𑀦 𑀯𑀸𑀧𑀻𑀢𑀺. 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀜𑀸𑀡𑁂𑀦 𑀯𑀸 𑀧𑀜𑁆𑀘𑀸𑀪𑀺𑀜𑁆𑀜𑀸𑀜𑀸𑀡𑁂𑀦 𑀯𑀸 𑀫𑀺𑀘𑁆𑀙𑀸𑀜𑀸𑀡𑁂𑀦 𑀯𑀸, 𑀲𑀻𑀮𑁂𑀦 𑀯𑀸 𑀯𑀢𑁂𑀦 𑀯𑀸 𑀲𑀻𑀮𑀩𑁆𑀩𑀢𑁂𑀦 𑀯𑀸, 𑀤𑀺𑀝𑁆𑀞𑀺𑀁 𑀦 𑀓𑀧𑁆𑀧𑀬𑁂𑀬𑁆𑀬 𑀦 𑀚𑀦𑁂𑀬𑁆𑀬 𑀦 𑀲𑀜𑁆𑀚𑀦𑁂𑀬𑁆𑀬 𑀦 𑀦𑀺𑀩𑁆𑀩𑀢𑁆𑀢𑁂𑀬𑁆𑀬 𑀦 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀬𑁆𑀬. 𑀮𑁄𑀓𑀲𑁆𑀫𑀺𑀦𑁆𑀢𑀺 𑀅𑀧𑀸𑀬𑀮𑁄𑀓𑁂…𑀧𑁂… 𑀆𑀬𑀢𑀦𑀮𑁄𑀓𑁂𑀢𑀺 𑁋 𑀤𑀺𑀝𑁆𑀞𑀺𑀫𑁆𑀧𑀺 𑀮𑁄𑀓𑀲𑁆𑀫𑀺𑀁 𑀦 𑀓𑀧𑁆𑀧𑀬𑁂𑀬𑁆𑀬 𑀜𑀸𑀡𑁂𑀦 𑀯𑀸 𑀲𑀻𑀮𑀯𑀢𑁂𑀦 𑀯𑀸𑀧𑀺.

𑀲𑀫𑁄𑀢𑀺 𑀅𑀢𑁆𑀢𑀸𑀦𑀫𑀦𑀽𑀧𑀦𑁂𑀬𑁆𑀬𑀸𑀢𑀺. 𑀲𑀤𑀺𑀲𑁄𑀳𑀫𑀲𑁆𑀫𑀻𑀢𑀺 𑀅𑀢𑁆𑀢𑀸𑀦𑀁 𑀦 𑀉𑀧𑀦𑁂𑀬𑁆𑀬 𑀚𑀸𑀢𑀺𑀬𑀸 𑀯𑀸 𑀕𑁄𑀢𑁆𑀢𑁂𑀦 𑀯𑀸 𑀓𑁄𑀮𑀧𑀼𑀢𑁆𑀢𑀺𑀬𑁂𑀦 𑀯𑀸 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀯𑀸 𑀥𑀦𑁂𑀦 𑀯𑀸 𑀅𑀚𑁆𑀛𑁂𑀦𑁂𑀦 𑀯𑀸 𑀓𑀫𑁆𑀫𑀸𑀬𑀢𑀦𑁂𑀦 𑀯𑀸 𑀲𑀺𑀧𑁆𑀧𑀸𑀬𑀢𑀦𑁂𑀦 𑀯𑀸 𑀯𑀺𑀚𑁆𑀚𑀸𑀝𑁆𑀞𑀸𑀦𑁂𑀦 𑀯𑀸 𑀲𑀼𑀢𑁂𑀦 𑀯𑀸 𑀧𑀝𑀺𑀪𑀸𑀦𑁂𑀦 𑀯𑀸 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀯𑀸 𑀯𑀢𑁆𑀣𑀼𑀦𑀸𑀢𑀺 𑁋 𑀲𑀫𑁄𑀢𑀺 𑀅𑀢𑁆𑀢𑀸𑀦𑀫𑀦𑀽𑀧𑀦𑁂𑀬𑁆𑀬.

𑀳𑀻𑀦𑁄 𑀦 𑀫𑀜𑁆𑀜𑁂𑀣 𑀯𑀺𑀲𑁂𑀲𑀺 𑀯𑀸𑀧𑀻𑀢𑀺. 𑀳𑀻𑀦𑁄𑀳𑀫𑀲𑁆𑀫𑀻𑀢𑀺 𑀅𑀢𑁆𑀢𑀸𑀦𑀁 𑀦 𑀉𑀧𑀦𑁂𑀬𑁆𑀬 𑀚𑀸𑀢𑀺𑀬𑀸 𑀯𑀸 𑀕𑁄𑀢𑁆𑀢𑁂𑀦 𑀯𑀸…𑀧𑁂… 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀯𑀸 𑀯𑀢𑁆𑀣𑀼𑀦𑀸. 𑀲𑁂𑀬𑁆𑀬𑁄𑀳𑀫𑀲𑁆𑀫𑀻𑀢𑀺 𑀅𑀢𑁆𑀢𑀸𑀦𑀁 𑀦 𑀉𑀧𑀦𑁂𑀬𑁆𑀬 𑀚𑀸𑀢𑀺𑀬𑀸 𑀯𑀸 𑀕𑁄𑀢𑁆𑀢𑁂𑀦 𑀯𑀸…𑀧𑁂… 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀯𑀸 𑀯𑀢𑁆𑀣𑀼𑀦𑀸𑀢𑀺 𑁋 𑀳𑀻𑀦𑁄 𑀦 𑀫𑀜𑁆𑀜𑁂𑀣 𑀯𑀺𑀲𑁂𑀲𑀺 𑀯𑀸𑀧𑀺.

𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀤𑀺𑀝𑁆𑀞𑀺𑀫𑁆𑀧𑀺 𑀮𑁄𑀓𑀲𑁆𑀫𑀺𑀁 𑀦 𑀓𑀧𑁆𑀧𑀬𑁂𑀬𑁆𑀬, 𑀜𑀸𑀡𑁂𑀦 𑀯𑀸 𑀲𑀻𑀮𑀯𑀢𑁂𑀦 𑀯𑀸𑀧𑀺;

𑀲𑀫𑁄𑀢𑀺 𑀅𑀢𑁆𑀢𑀸𑀦𑀫𑀦𑀽𑀧𑀦𑁂𑀬𑁆𑀬, 𑀳𑀻𑀦𑁄 𑀦 𑀫𑀜𑁆𑀜𑁂𑀣 𑀯𑀺𑀲𑁂𑀲𑀺 𑀯𑀸𑀧𑀻’’𑀢𑀺.

𑁩𑁫. 𑀅𑀢𑁆𑀢𑀁 𑀧𑀳𑀸𑀬 𑀅𑀦𑀼𑀧𑀸𑀤𑀺𑀬𑀸𑀦𑁄, 𑀜𑀸𑀡𑁂𑀦𑀧𑀺 𑀲𑁄 𑀦𑀺𑀲𑁆𑀲𑀬𑀁 𑀦𑁄 𑀓𑀭𑁄𑀢𑀺;

𑀲 𑀯𑁂 𑀯𑀺𑀬𑀢𑁆𑀢𑁂𑀲𑀼 𑀦 𑀯𑀕𑁆𑀕𑀲𑀸𑀭𑀻, 𑀤𑀺𑀝𑁆𑀞𑀺𑀫𑁆𑀧𑀺 𑀲𑁄 𑀦 𑀧𑀘𑁆𑀘𑁂𑀢𑀺 𑀓𑀺𑀜𑁆𑀘𑀺.

𑀅𑀢𑁆𑀢𑀁 𑀧𑀳𑀸𑀬 𑀅𑀦𑀼𑀧𑀸𑀤𑀺𑀬𑀸𑀦𑁄𑀢𑀺. 𑀅𑀢𑁆𑀢𑀁 𑀧𑀳𑀸𑀬𑀸𑀢𑀺 𑀅𑀢𑁆𑀢𑀤𑀺𑀝𑁆𑀞𑀺𑀁 𑀧𑀳𑀸𑀬. 𑀅𑀢𑁆𑀢𑀁 𑀧𑀳𑀸𑀬𑀸𑀢𑀺 𑀕𑀸𑀳𑀁 [𑀅𑀢𑁆𑀢𑀕𑀸𑀳𑀁 (𑀲𑀻. 𑀓.)] 𑀧𑀳𑀸𑀬. 𑀅𑀢𑁆𑀢𑀁 𑀧𑀳𑀸𑀬𑀸𑀢𑀺 𑀢𑀡𑁆𑀳𑀸𑀯𑀲𑁂𑀦 𑀤𑀺𑀝𑁆𑀞𑀺𑀯𑀲𑁂𑀦 𑀕𑀳𑀺𑀢𑀁 𑀧𑀭𑀸𑀫𑀝𑁆𑀞𑀁 𑀅𑀪𑀺𑀦𑀺𑀯𑀺𑀝𑁆𑀞𑀁 𑀅𑀚𑁆𑀛𑁄𑀲𑀺𑀢𑀁 𑀅𑀥𑀺𑀫𑀼𑀢𑁆𑀢𑀁 𑀧𑀳𑀸𑀬 𑀧𑀚𑀳𑀺𑀢𑁆𑀯𑀸 𑀯𑀺𑀦𑁄𑀤𑁂𑀢𑁆𑀯𑀸 𑀩𑁆𑀬𑀦𑁆𑀢𑀺𑀁 𑀓𑀭𑀺𑀢𑁆𑀯𑀸 𑀅𑀦𑀪𑀸𑀯𑀁 𑀕𑀫𑁂𑀢𑁆𑀯𑀸𑀢𑀺 𑁋 𑀅𑀢𑁆𑀢𑀁 𑀧𑀳𑀸𑀬. 𑀅𑀦𑀼𑀧𑀸𑀤𑀺𑀬𑀸𑀦𑁄𑀢𑀺 𑀘𑀢𑀽𑀳𑀺 𑀉𑀧𑀸𑀤𑀸𑀦𑁂𑀳𑀺 𑀅𑀦𑀼𑀧𑀸𑀤𑀺𑀬𑀫𑀸𑀦𑁄 𑀅𑀕𑀡𑁆𑀳𑀫𑀸𑀦𑁄 𑀅𑀧𑀭𑀸𑀫𑀸𑀲𑀫𑀸𑀦𑁄 𑀅𑀦𑀪𑀺𑀦𑀺𑀯𑀺𑀲𑀫𑀸𑀦𑁄𑀢𑀺 𑁋 𑀅𑀢𑁆𑀢𑀁 𑀧𑀳𑀸𑀬 𑀅𑀦𑀼𑀧𑀸𑀤𑀺𑀬𑀸𑀦𑁄.

𑀜𑀸𑀡𑁂𑀦𑀧𑀺 𑀲𑁄 𑀦𑀺𑀲𑁆𑀲𑀬𑀁 𑀦𑁄 𑀓𑀭𑁄𑀢𑀻𑀢𑀺 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀜𑀸𑀡𑁂𑀦 𑀯𑀸 𑀧𑀜𑁆𑀘𑀸𑀪𑀺𑀜𑁆𑀜𑀸𑀜𑀸𑀡𑁂𑀦 𑀯𑀸 𑀫𑀺𑀘𑁆𑀙𑀸𑀜𑀸𑀡𑁂𑀦 𑀯𑀸 𑀢𑀡𑁆𑀳𑀸𑀦𑀺𑀲𑁆𑀲𑀬𑀁 𑀯𑀸 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑀁 𑀯𑀸 𑀦 𑀓𑀭𑁄𑀢𑀺 𑀦 𑀚𑀦𑁂𑀢𑀺 𑀦 𑀲𑀜𑁆𑀚𑀦𑁂𑀢𑀺 𑀦 𑀦𑀺𑀩𑁆𑀩𑀢𑁆𑀢𑁂𑀢𑀺 𑀦 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺 𑁋 𑀜𑀸𑀡𑁂𑀦𑀧𑀺 𑀲𑁄 𑀦𑀺𑀲𑁆𑀲𑀬𑀁 𑀦𑁄 𑀓𑀭𑁄𑀢𑀺.

𑀲 𑀯𑁂 𑀯𑀺𑀬𑀢𑁆𑀢𑁂𑀲𑀼 𑀦 𑀯𑀕𑁆𑀕𑀲𑀸𑀭𑀻𑀢𑀺 𑀲 𑀯𑁂 𑀯𑀺𑀬𑀢𑁆𑀢𑁂𑀲𑀼 𑀪𑀺𑀦𑁆𑀦𑁂𑀲𑀼 𑀤𑁆𑀯𑁂𑀚𑁆𑀛𑀸𑀧𑀦𑁆𑀦𑁂𑀲𑀼 𑀤𑁆𑀯𑁂𑀴𑁆𑀳𑀓𑀚𑀸𑀢𑁂𑀲𑀼 𑀦𑀸𑀦𑀸𑀤𑀺𑀝𑁆𑀞𑀺𑀓𑁂𑀲𑀼 𑀦𑀸𑀦𑀸𑀔𑀦𑁆𑀢𑀺𑀓𑁂𑀲𑀼 𑀦𑀸𑀦𑀸𑀭𑀼𑀘𑀺𑀓𑁂𑀲𑀼 𑀦𑀸𑀦𑀸𑀮𑀤𑁆𑀥𑀺𑀓𑁂𑀲𑀼 𑀦𑀸𑀦𑀸𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑀁 𑀦𑀺𑀲𑁆𑀲𑀺𑀢𑁂𑀲𑀼 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀦𑁆𑀢𑁂𑀲𑀼 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑀦𑁆𑀢𑁂𑀲𑀼 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑀦𑁆𑀢𑁂𑀲𑀼 𑀪𑀬𑀸𑀕𑀢𑀺𑀁 𑀕𑀘𑁆𑀙𑀦𑁆𑀢𑁂𑀲𑀼 𑀦 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀺 𑀦 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑀢𑀺 𑀦 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑀢𑀺 𑀦 𑀪𑀬𑀸𑀕𑀢𑀺𑀁 𑀕𑀘𑁆𑀙𑀢𑀺 𑀦 𑀭𑀸𑀕𑀯𑀲𑁂𑀦 𑀕𑀘𑁆𑀙𑀢𑀺 𑀦 𑀤𑁄𑀲𑀯𑀲𑁂𑀦 𑀕𑀘𑁆𑀙𑀢𑀺 𑀦 𑀫𑁄𑀳𑀯𑀲𑁂𑀦 𑀕𑀘𑁆𑀙𑀢𑀺 𑀦 𑀫𑀸𑀦𑀯𑀲𑁂𑀦 𑀕𑀘𑁆𑀙𑀢𑀺 𑀦 𑀤𑀺𑀝𑁆𑀞𑀺𑀯𑀲𑁂𑀦 𑀕𑀘𑁆𑀙𑀢𑀺 𑀦 𑀉𑀤𑁆𑀥𑀘𑁆𑀘𑀯𑀲𑁂𑀦 𑀕𑀘𑁆𑀙𑀢𑀺 𑀦 𑀯𑀺𑀘𑀺𑀓𑀺𑀘𑁆𑀙𑀸𑀯𑀲𑁂𑀦 𑀕𑀘𑁆𑀙𑀢𑀺 𑀦 𑀅𑀦𑀼𑀲𑀬𑀯𑀲𑁂𑀦 𑀕𑀘𑁆𑀙𑀢𑀺 𑀦 𑀯𑀕𑁆𑀕𑁂𑀳𑀺 𑀥𑀫𑁆𑀫𑁂𑀳𑀺 𑀬𑀸𑀬𑀢𑀺 𑀦𑀺𑀬𑁆𑀬𑀢𑀺 𑀯𑀼𑀬𑁆𑀳𑀢𑀺 𑀲𑀁𑀳𑀭𑀻𑀬𑀢𑀻𑀢𑀺 𑁋 𑀲 𑀯𑁂 𑀯𑀺𑀬𑀢𑁆𑀢𑁂𑀲𑀼 𑀦 𑀯𑀕𑁆𑀕𑀲𑀸𑀭𑀻.

𑀤𑀺𑀝𑁆𑀞𑀺𑀫𑁆𑀧𑀺 𑀲𑁄 𑀦 𑀧𑀘𑁆𑀘𑁂𑀢𑀺 𑀓𑀺𑀜𑁆𑀘𑀻𑀢𑀺. 𑀢𑀲𑁆𑀲 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀧𑀳𑀻𑀦𑀸𑀦𑀺 𑀲𑀫𑀼𑀘𑁆𑀙𑀺𑀦𑁆𑀦𑀸𑀦𑀺 𑀯𑀽𑀧𑀲𑀦𑁆𑀢𑀸𑀦𑀺 𑀧𑀝𑀺𑀧𑀲𑁆𑀲𑀤𑁆𑀥𑀸𑀦𑀺 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸𑀦𑀺 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸𑀦𑀺. 𑀲𑁄 𑀓𑀺𑀜𑁆𑀘𑀺 𑀤𑀺𑀝𑁆𑀞𑀺𑀕𑀢𑀁 𑀦 𑀧𑀘𑁆𑀘𑁂𑀢𑀺 𑀦 𑀧𑀘𑁆𑀘𑀸𑀕𑀘𑁆𑀙𑀢𑀻𑀢𑀺 𑁋 𑀤𑀺𑀝𑁆𑀞𑀺𑀫𑁆𑀧𑀺 𑀲𑁄 𑀦 𑀧𑀘𑁆𑀘𑁂𑀢𑀺 𑀓𑀺𑀜𑁆𑀘𑀺.

𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀅𑀢𑁆𑀢𑀁 𑀧𑀳𑀸𑀬 𑀅𑀦𑀼𑀧𑀸𑀤𑀺𑀬𑀸𑀦𑁄, 𑀜𑀸𑀡𑁂𑀦𑀧𑀺 𑀲𑁄 𑀦𑀺𑀲𑁆𑀲𑀬𑀁 𑀦𑁄 𑀓𑀭𑁄𑀢𑀺;

𑀲 𑀯𑁂 𑀯𑀺𑀬𑀢𑁆𑀢𑁂𑀲𑀼 𑀦 𑀯𑀕𑁆𑀕𑀲𑀸𑀭𑀻, 𑀤𑀺𑀝𑁆𑀞𑀺𑀫𑁆𑀧𑀺 𑀲𑁄 𑀦 𑀧𑀘𑁆𑀘𑁂𑀢𑀺 𑀓𑀺𑀜𑁆𑀘𑀻’’𑀢𑀺.

𑁩𑁬. 𑀬𑀲𑁆𑀲𑀽𑀪𑀬𑀦𑁆𑀢𑁂 𑀧𑀡𑀺𑀥𑀻𑀥 𑀦𑀢𑁆𑀣𑀺, 𑀪𑀯𑀸𑀪𑀯𑀸𑀬 𑀇𑀥 𑀯𑀸 𑀳𑀼𑀭𑀁 𑀯𑀸;

𑀦𑀺𑀯𑁂𑀲𑀦𑀸 𑀢𑀲𑁆𑀲 𑀦 𑀲𑀦𑁆𑀢𑀺 𑀓𑁂𑀘𑀺, 𑀥𑀫𑁆𑀫𑁂𑀲𑀼 𑀦𑀺𑀘𑁆𑀙𑁂𑀬𑁆𑀬 𑀲𑀫𑀼𑀕𑁆𑀕𑀳𑀻𑀢𑀁.

𑀬𑀲𑁆𑀲𑀽𑀪𑀬𑀦𑁆𑀢𑁂 𑀧𑀡𑀺𑀥𑀻𑀥 𑀦𑀢𑁆𑀣𑀺, 𑀪𑀯𑀸𑀪𑀯𑀸𑀬 𑀇𑀥 𑀯𑀸 𑀳𑀼𑀭𑀁 𑀯𑀸𑀢𑀺 𑀬𑀲𑁆𑀲𑀸𑀢𑀺 𑀅𑀭𑀳𑀢𑁄 𑀔𑀻𑀡𑀸𑀲𑀯𑀲𑁆𑀲. 𑀅𑀦𑁆𑀢𑁄𑀢𑀺 [𑀅𑀦𑁆𑀢𑀸𑀢𑀺 (𑀲𑁆𑀬𑀸.)] 𑀨𑀲𑁆𑀲𑁄 𑀏𑀓𑁄 𑀅𑀦𑁆𑀢𑁄, 𑀨𑀲𑁆𑀲𑀲𑀫𑀼𑀤𑀬𑁄 𑀤𑀼𑀢𑀺𑀬𑁄 𑀅𑀦𑁆𑀢𑁄; 𑀅𑀢𑀻𑀢𑁄 𑀏𑀓𑁄 𑀅𑀦𑁆𑀢𑁄, 𑀅𑀦𑀸𑀕𑀢𑁄 𑀤𑀼𑀢𑀺𑀬𑁄 𑀅𑀦𑁆𑀢𑁄; 𑀲𑀼𑀔𑀸 𑀯𑁂𑀤𑀦𑀸 𑀏𑀓𑁄 𑀅𑀦𑁆𑀢𑁄, 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀤𑀼𑀢𑀺𑀬𑁄 𑀅𑀦𑁆𑀢𑁄; 𑀦𑀸𑀫𑀁 𑀏𑀓𑁄 𑀅𑀦𑁆𑀢𑁄, 𑀭𑀽𑀧𑀁 𑀤𑀼𑀢𑀺𑀬𑁄 𑀅𑀦𑁆𑀢𑁄; 𑀙 𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀆𑀬𑀢𑀦𑀸𑀦𑀺 𑀏𑀓𑁄 𑀅𑀦𑁆𑀢𑁄, 𑀙 𑀩𑀸𑀳𑀺𑀭𑀸𑀦𑀺 𑀆𑀬𑀢𑀦𑀸𑀦𑀺 𑀤𑀼𑀢𑀺𑀬𑁄 𑀅𑀦𑁆𑀢𑁄; 𑀲𑀓𑁆𑀓𑀸𑀬𑁄 𑀏𑀓𑁄 𑀅𑀦𑁆𑀢𑁄, 𑀲𑀓𑁆𑀓𑀸𑀬𑀲𑀫𑀼𑀤𑀬𑁄 𑀤𑀼𑀢𑀺𑀬𑁄 𑀅𑀦𑁆𑀢𑁄. 𑀧𑀡𑀺𑀥𑀺 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄…𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁.

𑀪𑀯𑀸𑀪𑀯𑀸𑀬𑀸𑀢𑀺 𑀪𑀯𑀸𑀪𑀯𑀸𑀬 𑀓𑀫𑁆𑀫𑀪𑀯𑀸𑀬 𑀧𑀼𑀦𑀩𑁆𑀪𑀯𑀸𑀬 𑀓𑀸𑀫𑀪𑀯𑀸𑀬, 𑀓𑀫𑁆𑀫𑀪𑀯𑀸𑀬 𑀓𑀸𑀫𑀪𑀯𑀸𑀬 𑀧𑀼𑀦𑀩𑁆𑀪𑀯𑀸𑀬 𑀭𑀽𑀧𑀪𑀯𑀸𑀬, 𑀓𑀫𑁆𑀫𑀪𑀯𑀸𑀬 𑀭𑀽𑀧𑀪𑀯𑀸𑀬 𑀧𑀼𑀦𑀩𑁆𑀪𑀯𑀸𑀬 𑀅𑀭𑀽𑀧𑀪𑀯𑀸𑀬, 𑀓𑀫𑁆𑀫𑀪𑀯𑀸𑀬 𑀅𑀭𑀽𑀧𑀪𑀯𑀸𑀬 𑀧𑀼𑀦𑀩𑁆𑀪𑀯𑀸𑀬 𑀧𑀼𑀦𑀧𑁆𑀧𑀼𑀦𑀪𑀯𑀸𑀬 𑀧𑀼𑀦𑀧𑁆𑀧𑀼𑀦𑀕𑀢𑀺𑀬𑀸 𑀧𑀼𑀦𑀧𑁆𑀧𑀼𑀦𑀉𑀧𑀧𑀢𑁆𑀢𑀺𑀬𑀸 𑀧𑀼𑀦𑀧𑁆𑀧𑀼𑀦𑀧𑀝𑀺𑀲𑀦𑁆𑀥𑀺𑀬𑀸 𑀧𑀼𑀦𑀧𑁆𑀧𑀼𑀦𑀅𑀢𑁆𑀢𑀪𑀸𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺𑀬𑀸. 𑀇𑀥𑀸𑀢𑀺 𑀲𑀓𑀢𑁆𑀢𑀪𑀸𑀯𑁄, 𑀳𑀼𑀭𑀸𑀢𑀺 𑀧𑀭𑀢𑁆𑀢𑀪𑀸𑀯𑁄; 𑀇𑀥𑀸𑀢𑀺 𑀲𑀓𑀭𑀽𑀧𑀯𑁂𑀤𑀦𑀸𑀲𑀜𑁆𑀜𑀸𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀁, 𑀳𑀼𑀭𑀸𑀢𑀺 𑀧𑀭𑀭𑀽𑀧𑀯𑁂𑀤𑀦𑀸𑀲𑀜𑁆𑀜𑀸𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀁; 𑀇𑀥𑀸𑀢𑀺 𑀙 𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀆𑀬𑀢𑀦𑀸𑀦𑀺, 𑀳𑀼𑀭𑀸𑀢𑀺 𑀙 𑀩𑀸𑀳𑀺𑀭𑀸𑀦𑀺 𑀆𑀬𑀢𑀦𑀸𑀦𑀺; 𑀇𑀥𑀸𑀢𑀺 𑀫𑀦𑀼𑀲𑁆𑀲𑀮𑁄𑀓𑁄, 𑀳𑀼𑀭𑀸𑀢𑀺 𑀤𑁂𑀯𑀮𑁄𑀓𑁄; 𑀇𑀥𑀸𑀢𑀺 𑀓𑀸𑀫𑀥𑀸𑀢𑀼, 𑀳𑀼𑀭𑀸𑀢𑀺 𑀭𑀽𑀧𑀥𑀸𑀢𑀼 𑀅𑀭𑀽𑀧𑀥𑀸𑀢𑀼; 𑀇𑀥𑀸𑀢𑀺 𑀓𑀸𑀫𑀥𑀸𑀢𑀼 𑀭𑀽𑀧𑀥𑀸𑀢𑀼. 𑀳𑀼𑀭𑀸𑀢𑀺 𑀅𑀭𑀽𑀧𑀥𑀸𑀢𑀼. 𑀬𑀲𑁆𑀲𑀽𑀪𑀬𑀦𑁆𑀢𑁂 𑀧𑀡𑀺𑀥𑀻𑀥 𑀦𑀢𑁆𑀣𑀺 𑀪𑀯𑀸𑀪𑀯𑀸𑀬 𑀇𑀥 𑀯𑀸 𑀳𑀼𑀭𑀁 𑀯𑀸𑀢𑀺. 𑀬𑀲𑁆𑀲 𑀉𑀪𑁄 𑀅𑀦𑁆𑀢𑁂 𑀘 𑀪𑀯𑀸𑀪𑀯𑀸𑀬 𑀘 𑀇𑀥 𑀳𑀼𑀭𑀜𑁆𑀘 𑀧𑀡𑀺𑀥𑀺 𑀢𑀡𑁆𑀳𑀸 𑀦𑀢𑁆𑀣𑀺 𑀦 𑀲𑀦𑁆𑀢𑀺 𑀦 𑀲𑀁𑀯𑀺𑀚𑁆𑀚𑀦𑁆𑀢𑀺 𑀦𑀼𑀧𑀮𑀩𑁆𑀪𑀦𑁆𑀢𑀺, 𑀧𑀳𑀻𑀦𑀸 𑀲𑀫𑀼𑀘𑁆𑀙𑀺𑀦𑁆𑀦𑀸 𑀯𑀽𑀧𑀲𑀦𑁆𑀢𑀸 𑀧𑀝𑀺𑀧𑀲𑁆𑀲𑀤𑁆𑀥𑀸 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸𑀢𑀺 𑁋 𑀬𑀲𑁆𑀲𑀽𑀪𑀬𑀦𑁆𑀢𑁂 𑀧𑀡𑀺𑀥𑀻𑀥 𑀦𑀢𑁆𑀣𑀺 𑀪𑀯𑀸𑀪𑀯𑀸𑀬 𑀇𑀥 𑀯𑀸 𑀳𑀼𑀭𑀁 𑀯𑀸.

𑀦𑀺𑀯𑁂𑀲𑀦𑀸 𑀢𑀲𑁆𑀲 𑀦 𑀲𑀦𑁆𑀢𑀺 𑀓𑁂𑀘𑀻𑀢𑀺. 𑀦𑀺𑀯𑁂𑀲𑀦𑀸𑀢𑀺 𑀤𑁆𑀯𑁂 𑀦𑀺𑀯𑁂𑀲𑀦𑀸 𑁋 𑀢𑀡𑁆𑀳𑀸𑀦𑀺𑀯𑁂𑀲𑀦𑀸 𑀘 𑀤𑀺𑀝𑁆𑀞𑀺𑀦𑀺𑀯𑁂𑀲𑀦𑀸 𑀘…𑀧𑁂… 𑀅𑀬𑀁 𑀢𑀡𑁆𑀳𑀸𑀦𑀺𑀯𑁂𑀲𑀦𑀸…𑀧𑁂… 𑀅𑀬𑀁 𑀤𑀺𑀝𑁆𑀞𑀺𑀦𑀺𑀯𑁂𑀲𑀦𑀸. 𑀢𑀲𑁆𑀲𑀸𑀢𑀺 𑀅𑀭𑀳𑀢𑁄 𑀔𑀻𑀡𑀸𑀲𑀯𑀲𑁆𑀲. 𑀦𑀺𑀯𑁂𑀲𑀦𑀸 𑀢𑀲𑁆𑀲 𑀦 𑀲𑀦𑁆𑀢𑀺 𑀓𑁂𑀘𑀻𑀢𑀺 𑀦𑀺𑀯𑁂𑀲𑀦𑀸 𑀢𑀲𑁆𑀲 𑀦 𑀲𑀦𑁆𑀢𑀺 𑀓𑁂𑀘𑀺 𑀦𑀢𑁆𑀣𑀺 𑀦 𑀲𑀦𑁆𑀢𑀺 𑀦 𑀲𑀁𑀯𑀺𑀚𑁆𑀚𑀦𑁆𑀢𑀺 𑀦𑀼𑀧𑀮𑀩𑁆𑀪𑀦𑁆𑀢𑀺, 𑀧𑀳𑀻𑀦𑀸 𑀲𑀫𑀼𑀘𑁆𑀙𑀺𑀦𑁆𑀦𑀸 𑀯𑀽𑀧𑀲𑀦𑁆𑀢𑀸 𑀧𑀝𑀺𑀧𑀲𑁆𑀲𑀤𑁆𑀥𑀸 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸𑀢𑀺 𑁋 𑀦𑀺𑀯𑁂𑀲𑀦𑀸 𑀢𑀲𑁆𑀲 𑀦 𑀲𑀦𑁆𑀢𑀺 𑀓𑁂𑀘𑀺.

𑀥𑀫𑁆𑀫𑁂𑀲𑀼 𑀦𑀺𑀘𑁆𑀙𑁂𑀬𑁆𑀬 𑀲𑀫𑀼𑀕𑁆𑀕𑀳𑀻𑀢𑀦𑁆𑀢𑀺. 𑀥𑀫𑁆𑀫𑁂𑀲𑀽𑀢𑀺 𑀤𑁆𑀯𑀸𑀲𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀕𑀢𑁂𑀲𑀼. 𑀦𑀺𑀘𑁆𑀙𑁂𑀬𑁆𑀬𑀸𑀢𑀺 𑀦𑀺𑀘𑁆𑀙𑀺𑀦𑀺𑀢𑁆𑀯𑀸 𑀯𑀺𑀦𑀺𑀘𑁆𑀙𑀺𑀦𑀺𑀢𑁆𑀯𑀸 𑀯𑀺𑀘𑀺𑀦𑀺𑀢𑁆𑀯𑀸 𑀧𑀯𑀺𑀘𑀺𑀦𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸. 𑀲𑀫𑀼𑀕𑁆𑀕𑀳𑀻𑀢𑀦𑁆𑀢𑀺 𑀑𑀥𑀺𑀕𑁆𑀕𑀸𑀳𑁄 𑀩𑀺𑀮𑀕𑁆𑀕𑀸𑀳𑁄 𑀯𑀭𑀕𑁆𑀕𑀸𑀳𑁄 𑀓𑁄𑀝𑁆𑀞𑀸𑀲𑀕𑁆𑀕𑀸𑀳𑁄 𑀉𑀘𑁆𑀘𑀬𑀕𑁆𑀕𑀸𑀳𑁄 𑀲𑀫𑀼𑀘𑁆𑀘𑀬𑀕𑁆𑀕𑀸𑀳𑁄, ‘‘𑀇𑀤𑀁 𑀲𑀘𑁆𑀘𑀁 𑀢𑀘𑁆𑀙𑀁 𑀢𑀣𑀁 𑀪𑀽𑀢𑀁 𑀬𑀸𑀣𑀸𑀯𑀁 𑀅𑀯𑀺𑀧𑀭𑀻𑀢’’𑀦𑁆𑀢𑀺 𑀕𑀳𑀺𑀢𑀁 𑀧𑀭𑀸𑀫𑀝𑁆𑀞𑀁 𑀅𑀪𑀺𑀦𑀺𑀯𑀺𑀝𑁆𑀞𑀁 𑀅𑀚𑁆𑀛𑁄𑀲𑀺𑀢𑀁 𑀅𑀥𑀺𑀫𑀼𑀢𑁆𑀢𑀁 𑀦𑀢𑁆𑀣𑀺 𑀦 𑀲𑀦𑁆𑀢𑀺 𑀦 𑀲𑀁𑀯𑀺𑀚𑁆𑀚𑀦𑁆𑀢𑀺 𑀦𑀼𑀧𑀮𑀩𑁆𑀪𑀦𑁆𑀢𑀺, 𑀧𑀳𑀻𑀦𑀁 𑀲𑀫𑀼𑀘𑁆𑀙𑀺𑀦𑁆𑀦𑀁 𑀯𑀽𑀧𑀲𑀦𑁆𑀢𑀁 𑀧𑀝𑀺𑀧𑀲𑁆𑀲𑀤𑁆𑀥𑀁 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀁 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀦𑁆𑀢𑀺 𑁋 𑀥𑀫𑁆𑀫𑁂𑀲𑀼 𑀦𑀺𑀘𑁆𑀙𑁂𑀬𑁆𑀬 𑀲𑀫𑀼𑀕𑁆𑀕𑀳𑀻𑀢𑀁.

𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀬𑀲𑁆𑀲𑀽𑀪𑀬𑀦𑁆𑀢𑁂 𑀧𑀡𑀺𑀥𑀻𑀥 𑀦𑀢𑁆𑀣𑀺, 𑀪𑀯𑀸𑀪𑀯𑀸𑀬 𑀇𑀥 𑀯𑀸 𑀳𑀼𑀭𑀁 𑀯𑀸;

𑀦𑀺𑀯𑁂𑀲𑀦𑀸 𑀢𑀲𑁆𑀲 𑀦 𑀲𑀦𑁆𑀢𑀺 𑀓𑁂𑀘𑀺, 𑀥𑀫𑁆𑀫𑁂𑀲𑀼 𑀦𑀺𑀘𑁆𑀙𑁂𑀬𑁆𑀬 𑀲𑀫𑀼𑀕𑁆𑀕𑀳𑀻𑀢’’𑀦𑁆𑀢𑀺.

𑁩𑁭. 𑀢𑀲𑁆𑀲𑀻𑀥 𑀤𑀺𑀝𑁆𑀞𑁂 𑀯 𑀲𑀼𑀢𑁂 𑀫𑀼𑀢𑁂 𑀯𑀸, 𑀧𑀓𑀧𑁆𑀧𑀺𑀢𑀸 𑀦𑀢𑁆𑀣𑀺 𑀅𑀡𑀽𑀧𑀺 𑀲𑀜𑁆𑀜𑀸;

𑀢𑀁 𑀩𑁆𑀭𑀸𑀳𑁆𑀫𑀡𑀁 𑀤𑀺𑀝𑁆𑀞𑀺𑀫𑀦𑀸𑀤𑀺𑀬𑀸𑀦𑀁, 𑀓𑁂𑀦𑀻𑀥 𑀮𑁄𑀓𑀲𑁆𑀫𑀺𑀁 𑀯𑀺𑀓𑀧𑁆𑀧𑀬𑁂𑀬𑁆𑀬.

𑀢𑀲𑁆𑀲𑀻𑀥 𑀤𑀺𑀝𑁆𑀞𑁂 𑀯 𑀲𑀼𑀢𑁂 𑀫𑀼𑀢𑁂 𑀯𑀸, 𑀧𑀓𑀧𑁆𑀧𑀺𑀢𑀸 𑀦𑀢𑁆𑀣𑀺 𑀅𑀡𑀽𑀧𑀺 𑀲𑀜𑁆𑀜𑀸𑀢𑀺. 𑀢𑀲𑁆𑀲𑀸𑀢𑀺 𑀅𑀭𑀳𑀢𑁄 𑀔𑀻𑀡𑀸𑀲𑀯𑀲𑁆𑀲. 𑀢𑀲𑁆𑀲 𑀤𑀺𑀝𑁆𑀞𑁂 𑀯𑀸 𑀤𑀺𑀝𑁆𑀞𑀲𑀼𑀤𑁆𑀥𑀺𑀬𑀸 𑀯𑀸 𑀲𑀼𑀢𑁂 𑀯𑀸 𑀲𑀼𑀢𑀲𑀼𑀤𑁆𑀥𑀺𑀬𑀸 𑀯𑀸 𑀫𑀼𑀢𑁂 𑀯𑀸 𑀫𑀼𑀢𑀲𑀼𑀤𑁆𑀥𑀺𑀬𑀸 𑀯𑀸 𑀲𑀜𑁆𑀜𑀸𑀧𑀼𑀩𑁆𑀩𑀗𑁆𑀕𑀫𑀢𑀸 𑀲𑀜𑁆𑀜𑀸𑀯𑀺𑀓𑀧𑁆𑀧𑀬𑁂𑀬𑁆𑀬𑀢𑀸 𑀲𑀜𑁆𑀜𑀸𑀯𑀺𑀕𑁆𑀕𑀳𑁂𑀦 𑀲𑀜𑁆𑀜𑀸𑀬 𑀉𑀝𑁆𑀞𑀧𑀺𑀢𑀸 𑀲𑀫𑀼𑀝𑁆𑀞𑀧𑀺𑀢𑀸 𑀓𑀧𑁆𑀧𑀺𑀢𑀸 𑀧𑀓𑀧𑁆𑀧𑀺𑀢𑀸 𑀲𑀗𑁆𑀔𑀢𑀸 𑀅𑀪𑀺𑀲𑀗𑁆𑀔𑀢𑀸 𑀲𑀡𑁆𑀞𑀧𑀺𑀢𑀸, 𑀤𑀺𑀝𑁆𑀞𑀺 𑀦𑀢𑁆𑀣𑀺 𑀦 𑀲𑀦𑁆𑀢𑀺 𑀦 𑀲𑀁𑀯𑀺𑀚𑁆𑀚𑀦𑁆𑀢𑀺 𑀦𑀼𑀧𑀮𑀩𑁆𑀪𑀦𑁆𑀢𑀺, 𑀧𑀳𑀻𑀦𑀸 𑀲𑀫𑀼𑀘𑁆𑀙𑀺𑀦𑁆𑀦𑀸 𑀯𑀽𑀧𑀲𑀦𑁆𑀢𑀸 𑀧𑀝𑀺𑀧𑀲𑁆𑀲𑀤𑁆𑀥𑀸 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸𑀢𑀺 𑁋 𑀢𑀲𑁆𑀲𑀻𑀥 𑀤𑀺𑀝𑁆𑀞𑁂 𑀯 𑀲𑀼𑀢𑁂 𑀫𑀼𑀢𑁂 𑀯𑀸 𑀧𑀓𑀧𑁆𑀧𑀺𑀢𑀸 𑀦𑀢𑁆𑀣𑀺 𑀅𑀡𑀽𑀧𑀺 𑀲𑀜𑁆𑀜𑀸.

𑀢𑀁 𑀩𑁆𑀭𑀸𑀳𑁆𑀫𑀡𑀁 𑀤𑀺𑀝𑁆𑀞𑀺𑀫𑀦𑀸𑀤𑀺𑀬𑀸𑀦𑀦𑁆𑀢𑀺. 𑀩𑁆𑀭𑀸𑀳𑁆𑀫𑀡𑁄𑀢𑀺 𑀲𑀢𑁆𑀢𑀦𑁆𑀦𑀁 𑀥𑀫𑁆𑀫𑀸𑀦𑀁 𑀩𑀸𑀳𑀺𑀢𑀢𑁆𑀢𑀸 𑀩𑁆𑀭𑀸𑀳𑁆𑀫𑀡𑁄 𑁋 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀩𑀸𑀳𑀺𑀢𑀸 𑀳𑁄𑀢𑀺…𑀧𑁂… 𑀅𑀲𑀺𑀢𑁄 𑀢𑀸𑀤𑀺 𑀧𑀯𑀼𑀘𑁆𑀘𑀢𑁂 𑀲 𑀩𑁆𑀭𑀳𑁆𑀫𑀸. 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀤𑀺𑀝𑁆𑀞𑀺𑀫𑀦𑀸𑀤𑀺𑀬𑀸𑀦𑀦𑁆𑀢𑀺. 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀤𑀺𑀝𑁆𑀞𑀺𑀫𑀦𑀸𑀤𑀺𑀬𑀦𑁆𑀢𑀁 𑀅𑀕𑀡𑁆𑀳𑀦𑁆𑀢𑀁 𑀅𑀧𑀭𑀸𑀫𑀲𑀦𑁆𑀢𑀁 𑀅𑀦𑀪𑀺𑀦𑀺𑀯𑁂𑀲𑀦𑁆𑀢𑀦𑁆𑀢𑀺 𑁋 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀤𑀺𑀝𑁆𑀞𑀺𑀫𑀦𑀸𑀤𑀺𑀬𑀸𑀦𑀁.

𑀓𑁂𑀦𑀻𑀥 𑀮𑁄𑀓𑀲𑁆𑀫𑀺𑀁 𑀯𑀺𑀓𑀧𑁆𑀧𑀬𑁂𑀬𑁆𑀬𑀸𑀢𑀺. 𑀓𑀧𑁆𑀧𑀸𑀢𑀺 𑀤𑁆𑀯𑁂 𑀓𑀧𑁆𑀧𑀸 𑁋 𑀢𑀡𑁆𑀳𑀸𑀓𑀧𑁆𑀧𑁄 𑀘 𑀤𑀺𑀝𑁆𑀞𑀺𑀓𑀧𑁆𑀧𑁄 𑀘…𑀧𑁂… 𑀅𑀬𑀁 𑀢𑀡𑁆𑀳𑀸𑀓𑀧𑁆𑀧𑁄…𑀧𑁂… 𑀅𑀬𑀁 𑀤𑀺𑀝𑁆𑀞𑀺𑀓𑀧𑁆𑀧𑁄. 𑀢𑀲𑁆𑀲 𑀢𑀡𑁆𑀳𑀸𑀓𑀧𑁆𑀧𑁄 𑀧𑀳𑀻𑀦𑁄, 𑀤𑀺𑀝𑁆𑀞𑀺𑀓𑀧𑁆𑀧𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑁄. 𑀢𑀡𑁆𑀳𑀸𑀓𑀧𑁆𑀧𑀲𑁆𑀲 𑀧𑀳𑀻𑀦𑀢𑁆𑀢𑀸, 𑀤𑀺𑀝𑁆𑀞𑀺𑀓𑀧𑁆𑀧𑀲𑁆𑀲 𑀧𑀝𑀺𑀦𑀺𑀲𑁆𑀲𑀝𑁆𑀞𑀢𑁆𑀢𑀸 𑀓𑁂𑀦 𑀭𑀸𑀕𑁂𑀦 𑀓𑀧𑁆𑀧𑁂𑀬𑁆𑀬 𑀓𑁂𑀦 𑀤𑁄𑀲𑁂𑀦 𑀓𑀧𑁆𑀧𑁂𑀬𑁆𑀬 𑀓𑁂𑀦 𑀫𑁄𑀳𑁂𑀦 𑀓𑀧𑁆𑀧𑁂𑀬𑁆𑀬 𑀓𑁂𑀦 𑀫𑀸𑀦𑁂𑀦 𑀓𑀧𑁆𑀧𑁂𑀬𑁆𑀬 𑀓𑀸𑀬 𑀤𑀺𑀝𑁆𑀞𑀺𑀬𑀸 𑀓𑀧𑁆𑀧𑁂𑀬𑁆𑀬 𑀓𑁂𑀦 𑀉𑀤𑁆𑀥𑀘𑁆𑀘𑁂𑀦 𑀓𑀧𑁆𑀧𑁂𑀬𑁆𑀬 𑀓𑀸𑀬 𑀯𑀺𑀘𑀺𑀓𑀺𑀘𑁆𑀙𑀸𑀬 𑀓𑀧𑁆𑀧𑁂𑀬𑁆𑀬 𑀓𑁂𑀳𑀺 𑀅𑀦𑀼𑀲𑀬𑁂𑀳𑀺 𑀓𑀧𑁆𑀧𑁂𑀬𑁆𑀬 𑁋 𑀭𑀢𑁆𑀢𑁄𑀢𑀺 𑀯𑀸 𑀤𑀼𑀝𑁆𑀞𑁄𑀢𑀺 𑀯𑀸 𑀫𑀽𑀴𑁆𑀳𑁄𑀢𑀺 𑀯𑀸 𑀯𑀺𑀦𑀺𑀩𑀤𑁆𑀥𑁄𑀢𑀺 𑀯𑀸 𑀧𑀭𑀸𑀫𑀝𑁆𑀞𑁄𑀢𑀺 𑀯𑀸 𑀯𑀺𑀓𑁆𑀔𑁂𑀧𑀕𑀢𑁄𑀢𑀺 𑀯𑀸 𑀅𑀦𑀺𑀝𑁆𑀞𑀗𑁆𑀕𑀢𑁄𑀢𑀺 𑀯𑀸 𑀣𑀸𑀫𑀕𑀢𑁄𑀢𑀺 𑀯𑀸. 𑀢𑁂 𑀅𑀪𑀺𑀲𑀗𑁆𑀔𑀸𑀭𑀸 𑀧𑀳𑀻𑀦𑀸. 𑀅𑀪𑀺𑀲𑀗𑁆𑀔𑀸𑀭𑀸𑀦𑀁 𑀧𑀳𑀻𑀦𑀢𑁆𑀢𑀸 𑀕𑀢𑀺𑀬𑁄 𑀓𑁂𑀦 𑀓𑀧𑁆𑀧𑁂𑀬𑁆𑀬 𑁋 𑀦𑁂𑀭𑀬𑀺𑀓𑁄𑀢𑀺 𑀯𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀓𑁄𑀢𑀺 𑀯𑀸 𑀧𑁂𑀢𑁆𑀢𑀺𑀯𑀺𑀲𑀬𑀺𑀓𑁄𑀢𑀺 𑀯𑀸 𑀫𑀦𑀼𑀲𑁆𑀲𑁄𑀢𑀺 𑀯𑀸 𑀤𑁂𑀯𑁄𑀢𑀺 𑀯𑀸 𑀭𑀽𑀧𑀻𑀢𑀺 𑀯𑀸 𑀅𑀭𑀽𑀧𑀻𑀢𑀺 𑀯𑀸 𑀲𑀜𑁆𑀜𑀻𑀢𑀺 𑀯𑀸 𑀅𑀲𑀜𑁆𑀜𑀻𑀢𑀺 𑀯𑀸 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻𑀢𑀺 𑀯𑀸. 𑀲𑁄 𑀳𑁂𑀢𑀼 𑀦𑀢𑁆𑀣𑀺 𑀧𑀘𑁆𑀘𑀬𑁄 𑀦𑀢𑁆𑀣𑀺 𑀓𑀸𑀭𑀡𑀁 𑀦𑀢𑁆𑀣𑀺, 𑀬𑁂𑀦 𑀓𑀧𑁆𑀧𑁂𑀬𑁆𑀬 𑀯𑀺𑀓𑀧𑁆𑀧𑁂𑀬𑁆𑀬 𑀯𑀺𑀓𑀧𑁆𑀧𑀁 𑀆𑀧𑀚𑁆𑀚𑁂𑀬𑁆𑀬. 𑀮𑁄𑀓𑀲𑁆𑀫𑀺𑀦𑁆𑀢𑀺 𑀅𑀧𑀸𑀬𑀮𑁄𑀓𑁂…𑀧𑁂… 𑀆𑀬𑀢𑀦𑀮𑁄𑀓𑁂𑀢𑀺 𑁋 𑀓𑁂𑀦𑀻𑀥 𑀮𑁄𑀓𑀲𑁆𑀫𑀺𑀁 𑀯𑀺𑀓𑀧𑁆𑀧𑀬𑁂𑀬𑁆𑀬.

𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀢𑀲𑁆𑀲𑀻𑀥 𑀤𑀺𑀝𑁆𑀞𑁂 𑀯 𑀲𑀼𑀢𑁂 𑀫𑀼𑀢𑁂 𑀯𑀸, 𑀧𑀓𑀧𑁆𑀧𑀺𑀢𑀸 𑀦𑀢𑁆𑀣𑀺 𑀅𑀡𑀽𑀧𑀺 𑀲𑀜𑁆𑀜𑀸;

𑀢𑀁 𑀩𑁆𑀭𑀸𑀳𑁆𑀫𑀡𑀁 𑀤𑀺𑀝𑁆𑀞𑀺𑀫𑀦𑀸𑀤𑀺𑀬𑀸𑀦𑀁, 𑀓𑁂𑀦𑀻𑀥 𑀮𑁄𑀓𑀲𑁆𑀫𑀺𑀁 𑀯𑀺𑀓𑀧𑁆𑀧𑀬𑁂𑀬𑁆𑀬𑀸’’𑀢𑀺.

𑁩𑁮. 𑀦 𑀓𑀧𑁆𑀧𑀬𑀦𑁆𑀢𑀺 𑀦 𑀧𑀼𑀭𑁂𑀓𑁆𑀔𑀭𑁄𑀦𑁆𑀢𑀺, 𑀥𑀫𑁆𑀫𑀸𑀧𑀺 𑀢𑁂𑀲𑀁 𑀦 𑀧𑀝𑀺𑀘𑁆𑀙𑀺𑀢𑀸𑀲𑁂;

𑀦 𑀩𑁆𑀭𑀸𑀳𑁆𑀫𑀡𑁄 𑀲𑀻𑀮𑀯𑀢𑁂𑀦 𑀦𑁂𑀬𑁆𑀬𑁄, 𑀧𑀸𑀭𑀗𑁆𑀕𑀢𑁄 𑀦 𑀧𑀘𑁆𑀘𑁂𑀢𑀺 𑀢𑀸𑀤𑀻.

𑀦 𑀓𑀧𑁆𑀧𑀬𑀦𑁆𑀢𑀺 𑀦 𑀧𑀼𑀭𑁂𑀓𑁆𑀔𑀭𑁄𑀦𑁆𑀢𑀻𑀢𑀺. 𑀓𑀧𑁆𑀧𑀸𑀢𑀺 𑀤𑁆𑀯𑁂 𑀓𑀧𑁆𑀧𑀸 𑁋 𑀢𑀡𑁆𑀳𑀸𑀓𑀧𑁆𑀧𑁄 𑀘 𑀤𑀺𑀝𑁆𑀞𑀺𑀓𑀧𑁆𑀧𑁄 𑀘. 𑀓𑀢𑀫𑁄 𑀢𑀡𑁆𑀳𑀸𑀓𑀧𑁆𑀧𑁄? 𑀬𑀸𑀯𑀢𑀸 𑀢𑀡𑁆𑀳𑀸𑀲𑀗𑁆𑀔𑀸𑀢𑁂𑀦 𑀲𑀻𑀫𑀓𑀢𑀁 𑀫𑀭𑀺𑀬𑀸𑀤𑀺𑀓𑀢𑀁 𑀑𑀥𑀺𑀓𑀢𑀁 𑀧𑀭𑀺𑀬𑀦𑁆𑀢𑀓𑀢𑀁 𑀧𑀭𑀺𑀕𑁆𑀕𑀳𑀺𑀢𑀁 𑀫𑀫𑀸𑀬𑀺𑀢𑀁 𑁋 ‘‘𑀇𑀤𑀁 𑀫𑀫𑀁, 𑀏𑀢𑀁 𑀫𑀫𑀁, 𑀏𑀢𑁆𑀢𑀓𑀁 𑀫𑀫𑀁, 𑀏𑀢𑁆𑀢𑀸𑀯𑀢𑀸 𑀫𑀫𑀁, 𑀫𑀫 𑀭𑀽𑀧𑀸 𑀲𑀤𑁆𑀤𑀸 𑀕𑀦𑁆𑀥𑀸 𑀭𑀲𑀸 𑀨𑁄𑀝𑁆𑀞𑀩𑁆𑀩𑀸, 𑀅𑀢𑁆𑀣𑀭𑀡𑀸 𑀧𑀸𑀯𑀼𑀭𑀡𑀸 𑀤𑀸𑀲𑀺𑀤𑀸𑀲𑀸 [𑀤𑀸𑀲𑀻𑀤𑀸𑀲𑀸 (𑀲𑁆𑀬𑀸. 𑀓.)] 𑀅𑀚𑁂𑀴𑀓𑀸 𑀓𑀼𑀓𑁆𑀓𑀼𑀝𑀲𑀽𑀓𑀭𑀸 𑀳𑀢𑁆𑀣𑀺𑀕𑀯𑀸𑀲𑁆𑀲𑀯𑀴𑀯𑀸 𑀔𑁂𑀢𑁆𑀢𑀁 𑀯𑀢𑁆𑀣𑀼 𑀳𑀺𑀭𑀜𑁆𑀜𑀁 𑀲𑀼𑀯𑀡𑁆𑀡𑀁 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀺𑀬𑁄 𑀭𑀝𑁆𑀞𑀜𑁆𑀘 𑀚𑀦𑀧𑀤𑁄 𑀘 𑀓𑁄𑀲𑁄 𑀘 𑀓𑁄𑀝𑁆𑀞𑀸𑀕𑀸𑀭𑀜𑁆𑀘, 𑀓𑁂𑀯𑀮𑀫𑁆𑀧𑀺 𑀫𑀳𑀸𑀧𑀣𑀯𑀺𑀁 𑀢𑀡𑁆𑀳𑀸𑀯𑀲𑁂𑀦 𑀫𑀫𑀸𑀬𑀢𑀺, 𑀬𑀸𑀯𑀢𑀸 𑀅𑀝𑁆𑀞𑀲𑀢𑀢𑀡𑁆𑀳𑀸𑀯𑀺𑀘𑀭𑀺𑀢𑀁 𑁋 𑀅𑀬𑀁 𑀢𑀡𑁆𑀳𑀸𑀓𑀧𑁆𑀧𑁄. 𑀓𑀢𑀫𑁄 𑀤𑀺𑀝𑁆𑀞𑀺𑀓𑀧𑁆𑀧𑁄? 𑀯𑀻𑀲𑀢𑀺𑀯𑀢𑁆𑀣𑀼𑀓𑀸 𑀲𑀓𑁆𑀓𑀸𑀬𑀤𑀺𑀝𑁆𑀞𑀺, 𑀤𑀲𑀯𑀢𑁆𑀣𑀼𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺, 𑀤𑀲𑀯𑀢𑁆𑀣𑀼𑀓𑀸 𑀅𑀦𑁆𑀢𑀕𑁆𑀕𑀸𑀳𑀺𑀓𑀸𑀤𑀺𑀝𑁆𑀞𑀺, 𑀬𑀸 𑀏𑀯𑀭𑀽𑀧𑀸 𑀤𑀺𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀁 𑀤𑀺𑀝𑁆𑀞𑀺𑀕𑀳𑀦𑀁 𑀤𑀺𑀝𑁆𑀞𑀺𑀓𑀦𑁆𑀢𑀸𑀭𑀁 𑀤𑀺𑀝𑁆𑀞𑀺𑀯𑀺𑀲𑀽𑀓𑀸𑀬𑀺𑀓𑀁 𑀤𑀺𑀝𑁆𑀞𑀺𑀯𑀺𑀧𑁆𑀨𑀦𑁆𑀤𑀺𑀢𑀁 𑀤𑀺𑀝𑁆𑀞𑀺𑀲𑀜𑁆𑀜𑁄𑀚𑀦𑀁 𑀕𑀸𑀳𑁄 𑀧𑀝𑀺𑀕𑁆𑀕𑀸𑀳𑁄 𑀅𑀪𑀺𑀦𑀺𑀯𑁂𑀲𑁄 𑀧𑀭𑀸𑀫𑀸𑀲𑁄 𑀓𑀼𑀫𑁆𑀫𑀕𑁆𑀕𑁄 𑀫𑀺𑀘𑁆𑀙𑀸𑀧𑀣𑁄 𑀫𑀺𑀘𑁆𑀙𑀢𑁆𑀢𑀁 𑀢𑀺𑀢𑁆𑀣𑀸𑀬𑀢𑀦𑀁 𑀯𑀺𑀧𑀭𑀺𑀬𑀸𑀲𑀕𑁆𑀕𑀸𑀳𑁄 [𑀯𑀺𑀧𑀭𑀺𑀬𑁂𑀲𑀕𑁆𑀕𑀸𑀳𑁄 (𑀲𑀻. 𑀲𑁆𑀬𑀸. 𑀓.)] 𑀯𑀺𑀧𑀭𑀻𑀢𑀕𑁆𑀕𑀸𑀳𑁄 𑀯𑀺𑀧𑀮𑁆𑀮𑀸𑀲𑀕𑁆𑀕𑀸𑀳𑁄 𑀫𑀺𑀘𑁆𑀙𑀸𑀕𑀸𑀳𑁄, 𑀅𑀬𑀸𑀣𑀸𑀯𑀓𑀲𑁆𑀫𑀺𑀁 𑀬𑀸𑀣𑀸𑀯𑀓𑀦𑁆𑀢𑀺 𑀕𑀸𑀳𑁄, 𑀬𑀸𑀯𑀢𑀸 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑁋 𑀅𑀬𑀁 𑀤𑀺𑀝𑁆𑀞𑀺𑀓𑀧𑁆𑀧𑁄. 𑀢𑁂𑀲𑀁 𑀢𑀡𑁆𑀳𑀸𑀓𑀧𑁆𑀧𑁄 𑀧𑀳𑀻𑀦𑁄, 𑀤𑀺𑀝𑁆𑀞𑀺𑀓𑀧𑁆𑀧𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑁄. 𑀢𑀡𑁆𑀳𑀸𑀓𑀧𑁆𑀧𑀲𑁆𑀲 𑀧𑀳𑀻𑀦𑀢𑁆𑀢𑀸, 𑀤𑀺𑀝𑁆𑀞𑀺𑀓𑀧𑁆𑀧𑀲𑁆𑀲 𑀧𑀝𑀺𑀦𑀺𑀲𑁆𑀲𑀝𑁆𑀞𑀢𑁆𑀢𑀸 𑀢𑀡𑁆𑀳𑀸𑀓𑀧𑁆𑀧𑀁 𑀯𑀸 𑀤𑀺𑀝𑁆𑀞𑀺𑀓𑀧𑁆𑀧𑀁 𑀯𑀸 𑀦 𑀓𑀧𑁆𑀧𑁂𑀦𑁆𑀢𑀺 𑀦 𑀚𑀦𑁂𑀦𑁆𑀢𑀺 𑀦 𑀲𑀜𑁆𑀚𑀦𑁂𑀦𑁆𑀢𑀺 𑀦 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺 𑀦 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀻𑀢𑀺 𑁋 𑀦 𑀓𑀧𑁆𑀧𑀬𑀦𑁆𑀢𑀺.

𑀦 𑀧𑀼𑀭𑁂𑀓𑁆𑀔𑀭𑁄𑀦𑁆𑀢𑀻𑀢𑀺. 𑀧𑀼𑀭𑁂𑀓𑁆𑀔𑀸𑀭𑀸𑀢𑀺 𑀤𑁆𑀯𑁂 𑀧𑀼𑀭𑁂𑀓𑁆𑀔𑀸𑀭𑀸 𑁋 𑀢𑀡𑁆𑀳𑀸𑀧𑀼𑀭𑁂𑀓𑁆𑀔𑀸𑀭𑁄 𑀘 𑀤𑀺𑀝𑁆𑀞𑀺𑀧𑀼𑀭𑁂𑀓𑁆𑀔𑀸𑀭𑁄 𑀘…𑀧𑁂… 𑀅𑀬𑀁 𑀢𑀡𑁆𑀳𑀸𑀧𑀼𑀭𑁂𑀓𑁆𑀔𑀸𑀭𑁄…𑀧𑁂… 𑀅𑀬𑀁 𑀤𑀺𑀝𑁆𑀞𑀺𑀧𑀼𑀭𑁂𑀓𑁆𑀔𑀸𑀭𑁄. 𑀢𑁂𑀲𑀁 𑀢𑀡𑁆𑀳𑀸𑀧𑀼𑀭𑁂𑀓𑁆𑀔𑀸𑀭𑁄 𑀧𑀳𑀻𑀦𑁄, 𑀤𑀺𑀝𑁆𑀞𑀺𑀧𑀼𑀭𑁂𑀓𑁆𑀔𑀸𑀭𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑁄. 𑀢𑀡𑁆𑀳𑀸𑀧𑀼𑀭𑁂𑀓𑁆𑀔𑀸𑀭𑀲𑁆𑀲 𑀧𑀳𑀻𑀦𑀢𑁆𑀢𑀸, 𑀤𑀺𑀝𑁆𑀞𑀺𑀧𑀼𑀭𑁂𑀓𑁆𑀔𑀸𑀭𑀲𑁆𑀲 𑀧𑀝𑀺𑀦𑀺𑀲𑁆𑀲𑀝𑁆𑀞𑀢𑁆𑀢𑀸 𑀦 𑀢𑀡𑁆𑀳𑀁 𑀯𑀸 𑀦 𑀤𑀺𑀝𑁆𑀞𑀺𑀁 𑀯𑀸 𑀧𑀼𑀭𑀢𑁄 𑀓𑀢𑁆𑀯𑀸 𑀘𑀭𑀦𑁆𑀢𑀺 𑀦 𑀢𑀡𑁆𑀳𑀸𑀥𑀚𑀸 𑀦 𑀢𑀡𑁆𑀳𑀸𑀓𑁂𑀢𑀽 𑀦 𑀢𑀡𑁆𑀳𑀸𑀥𑀺𑀧𑀢𑁂𑀬𑁆𑀬𑀸 𑀦 𑀤𑀺𑀝𑁆𑀞𑀺𑀥𑀚𑀸 𑀦 𑀤𑀺𑀝𑁆𑀞𑀺𑀓𑁂𑀢𑀽 𑀦 𑀤𑀺𑀝𑁆𑀞𑀸𑀥𑀺𑀧𑀢𑁂𑀬𑁆𑀬𑀸. 𑀦 𑀢𑀡𑁆𑀳𑀸𑀬 𑀯𑀸 𑀦 𑀤𑀺𑀝𑁆𑀞𑀺𑀬𑀸 𑀯𑀸 𑀧𑀭𑀺𑀯𑀸𑀭𑁂𑀢𑁆𑀯𑀸 𑀘𑀭𑀦𑁆𑀢𑀻𑀢𑀺 𑁋 𑀦 𑀓𑀧𑁆𑀧𑀬𑀦𑁆𑀢𑀺 𑀦 𑀧𑀼𑀭𑁂𑀓𑁆𑀔𑀭𑁄𑀦𑁆𑀢𑀺.

𑀥𑀫𑁆𑀫𑀸𑀧𑀺 𑀢𑁂𑀲𑀁 𑀦 𑀧𑀝𑀺𑀘𑁆𑀙𑀺𑀢𑀸𑀲𑁂𑀢𑀺. 𑀥𑀫𑁆𑀫𑀸 𑀯𑀼𑀘𑁆𑀘𑀦𑁆𑀢𑀺 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀺. 𑀢𑁂𑀲𑀦𑁆𑀢𑀺 𑀢𑁂𑀲𑀁 𑀅𑀭𑀳𑀦𑁆𑀢𑀸𑀦𑀁 𑀔𑀻𑀡𑀸𑀲𑀯𑀸𑀦𑀁. 𑀦 𑀧𑀝𑀺𑀘𑁆𑀙𑀺𑀢𑀸𑀲𑁂𑀢𑀺 ‘‘𑀲𑀲𑁆𑀲𑀢𑁄 𑀮𑁄𑀓𑁄, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀦 𑀧𑀝𑀺𑀘𑁆𑀙𑀺𑀢𑀸𑀲𑁂. ‘‘𑀅𑀲𑀲𑁆𑀲𑀢𑁄 𑀮𑁄𑀓𑁄… 𑀅𑀦𑁆𑀢𑀯𑀸 𑀮𑁄𑀓𑁄… 𑀅𑀦𑀦𑁆𑀢𑀯𑀸 𑀮𑁄𑀓𑁄… 𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭𑀁… 𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭𑀁… 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸… 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸… 𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸… 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀦 𑀧𑀝𑀺𑀘𑁆𑀙𑀺𑀢𑀸𑀲𑁂𑀢𑀺 𑁋 𑀥𑀫𑁆𑀫𑀸𑀧𑀺 𑀢𑁂𑀲𑀁 𑀦 𑀧𑀝𑀺𑀘𑁆𑀙𑀺𑀢𑀸𑀲𑁂.

𑀦 𑀩𑁆𑀭𑀸𑀳𑁆𑀫𑀡𑁄 𑀲𑀻𑀮𑀯𑀢𑁂𑀦 𑀦𑁂𑀬𑁆𑀬𑁄𑀢𑀺. 𑀦𑀸𑀢𑀺 𑀧𑀝𑀺𑀓𑁆𑀔𑁂𑀧𑁄. 𑀩𑁆𑀭𑀸𑀳𑁆𑀫𑀡𑁄𑀢𑀺 𑀲𑀢𑁆𑀢𑀦𑁆𑀦𑀁 𑀥𑀫𑁆𑀫𑀸𑀦𑀁 𑀩𑀸𑀳𑀺𑀢𑀢𑁆𑀢𑀸 𑀩𑁆𑀭𑀸𑀳𑁆𑀫𑀡𑁄 𑁋 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀩𑀸𑀳𑀺𑀢𑀸 𑀳𑁄𑀢𑀺…𑀧𑁂… 𑀅𑀲𑀺𑀢𑁄 𑀢𑀸𑀤𑀺 𑀯𑀼𑀘𑁆𑀘𑀢𑁂 𑀲 𑀩𑁆𑀭𑀳𑁆𑀫𑀸. 𑀦 𑀩𑁆𑀭𑀸𑀳𑁆𑀫𑀡𑁄 𑀲𑀻𑀮𑀯𑀢𑁂𑀦 𑀦𑁂𑀬𑁆𑀬𑁄𑀢𑀺. 𑀩𑁆𑀭𑀸𑀳𑁆𑀫𑀡𑁄 𑀲𑀻𑀮𑁂𑀦 𑀯𑀸 𑀯𑀢𑁂𑀦 𑀯𑀸 𑀲𑀻𑀮𑀩𑁆𑀩𑀢𑁂𑀦 𑀯𑀸 𑀦 𑀬𑀸𑀬𑀢𑀺 𑀦 𑀦𑀺𑀬𑁆𑀬𑀢𑀺 𑀦 𑀯𑀼𑀬𑁆𑀳𑀢𑀺 𑀦 𑀲𑀁𑀳𑀭𑀻𑀬𑀢𑀻𑀢𑀺 𑁋 𑀦 𑀩𑁆𑀭𑀸𑀳𑁆𑀫𑀡𑁄 𑀲𑀻𑀮𑀯𑀢𑁂𑀦 𑀦𑁂𑀬𑁆𑀬𑁄.

𑀧𑀸𑀭𑀗𑁆𑀕𑀢𑁄 𑀦 𑀧𑀘𑁆𑀘𑁂𑀢𑀺 𑀢𑀸𑀤𑀻𑀢𑀺. 𑀧𑀸𑀭𑀁 𑀯𑀼𑀘𑁆𑀘𑀢𑀺 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁. 𑀬𑁄 𑀲𑁄 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀢𑀡𑁆𑀳𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁. 𑀲𑁄 𑀧𑀸𑀭𑀗𑁆𑀕𑀢𑁄 𑀧𑀸𑀭𑀧𑁆𑀧𑀢𑁆𑀢𑁄 𑀅𑀦𑁆𑀢𑀕𑀢𑁄 𑀅𑀦𑁆𑀢𑀧𑁆𑀧𑀢𑁆𑀢𑁄 𑀓𑁄𑀝𑀺𑀕𑀢𑁄 𑀓𑁄𑀝𑀺𑀧𑁆𑀧𑀢𑁆𑀢𑁄 [𑀯𑀺𑀢𑁆𑀣𑀸𑀭𑁄] 𑀚𑀸𑀢𑀺𑀫𑀭𑀡𑀲𑀁𑀲𑀸𑀭𑁄, 𑀦𑀢𑁆𑀣𑀺 𑀢𑀲𑁆𑀲 𑀧𑀼𑀦𑀩𑁆𑀪𑀯𑁄𑀢𑀺 𑁋 𑀧𑀸𑀭𑀗𑁆𑀕𑀢𑁄. 𑀦 𑀧𑀘𑁆𑀘𑁂𑀢𑀻𑀢𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀬𑁂 𑀓𑀺𑀮𑁂𑀲𑀸 𑀧𑀳𑀻𑀦𑀸, 𑀢𑁂 𑀓𑀺𑀮𑁂𑀲𑁂 𑀦 𑀧𑀼𑀦𑁂𑀢𑀺 𑀦 𑀧𑀘𑁆𑀘𑁂𑀢𑀺 𑀦 𑀧𑀘𑁆𑀘𑀸𑀕𑀘𑁆𑀙𑀢𑀺. 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁂𑀦 𑀬𑁂 𑀓𑀺𑀮𑁂𑀲𑀸 𑀧𑀳𑀻𑀦𑀸, 𑀢𑁂 𑀓𑀺𑀮𑁂𑀲𑁂 𑀦 𑀧𑀼𑀦𑁂𑀢𑀺 𑀦 𑀧𑀘𑁆𑀘𑁂𑀢𑀺 𑀦 𑀧𑀘𑁆𑀘𑀸𑀕𑀘𑁆𑀙𑀢𑀺. 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀬𑁂 𑀓𑀺𑀮𑁂𑀲𑀸 𑀧𑀳𑀻𑀦𑀸, 𑀢𑁂 𑀓𑀺𑀮𑁂𑀲𑁂 𑀦 𑀧𑀼𑀦𑁂𑀢𑀺 𑀦 𑀧𑀘𑁆𑀘𑁂𑀢𑀺 𑀦 𑀧𑀘𑁆𑀘𑀸𑀕𑀘𑁆𑀙𑀢𑀺. 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀬𑁂 𑀓𑀺𑀮𑁂𑀲𑀸 𑀧𑀳𑀻𑀦𑀸, 𑀢𑁂 𑀓𑀺𑀮𑁂𑀲𑁂 𑀦 𑀧𑀼𑀦𑁂𑀢𑀺 𑀦 𑀧𑀘𑁆𑀘𑁂𑀢𑀺 𑀦 𑀧𑀘𑁆𑀘𑀸𑀕𑀘𑁆𑀙𑀢𑀻𑀢𑀺 𑁋 𑀧𑀸𑀭𑀗𑁆𑀕𑀢𑁄 𑀦 𑀧𑀘𑁆𑀘𑁂𑀢𑀺. 𑀢𑀸𑀤𑀻𑀢𑀺 𑀅𑀭𑀳𑀸 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀢𑀸𑀤𑀻 𑁋 𑀇𑀝𑁆𑀞𑀸𑀦𑀺𑀝𑁆𑀞𑁂 𑀢𑀸𑀤𑀻, 𑀘𑀢𑁆𑀢𑀸𑀯𑀻𑀢𑀺 𑀢𑀸𑀤𑀻, 𑀢𑀺𑀡𑁆𑀡𑀸𑀯𑀻𑀢𑀺 𑀢𑀸𑀤𑀻, 𑀫𑀼𑀢𑁆𑀢𑀸𑀯𑀻𑀢𑀺 𑀢𑀸𑀤𑀻, 𑀢𑀁𑀦𑀺𑀤𑁆𑀤𑁂𑀲𑀸 𑀢𑀸𑀤𑀻.

𑀓𑀣𑀁 𑀅𑀭𑀳𑀸 𑀇𑀝𑁆𑀞𑀸𑀦𑀺𑀝𑁆𑀞𑁂 𑀢𑀸𑀤𑀻? 𑀅𑀭𑀳𑀸 𑀮𑀸𑀪𑁂𑀧𑀺 𑀢𑀸𑀤𑀻, 𑀅𑀮𑀸𑀪𑁂𑀧𑀺 𑀢𑀸𑀤𑀻, 𑀬𑀲𑁂𑀧𑀺 𑀢𑀸𑀤𑀻, 𑀅𑀬𑀲𑁂𑀧𑀺 𑀢𑀸𑀤𑀻, 𑀧𑀲𑀁𑀲𑀸𑀬𑀧𑀺 𑀢𑀸𑀤𑀻, 𑀦𑀺𑀦𑁆𑀤𑀸𑀬𑀧𑀺 𑀢𑀸𑀤𑀻, 𑀲𑀼𑀔𑁂𑀧𑀺 𑀢𑀸𑀤𑀻, 𑀤𑀼𑀓𑁆𑀔𑁂𑀧𑀺 𑀢𑀸𑀤𑀻. 𑀏𑀓𑀘𑁆𑀘𑁂 𑀩𑀸𑀳𑀁 [𑀅𑀗𑁆𑀕𑀁 (𑀲𑀻.)] 𑀕𑀦𑁆𑀥𑁂𑀦 𑀮𑀺𑀫𑁆𑀧𑁂𑀬𑁆𑀬𑀼𑀁, 𑀏𑀓𑀘𑁆𑀘𑁂 𑀩𑀸𑀳𑀁 [𑀅𑀗𑁆𑀕𑀁 (𑀲𑀻.)] 𑀯𑀸𑀲𑀺𑀬𑀸 𑀢𑀘𑁆𑀙𑁂𑀬𑁆𑀬𑀼𑀁 𑁋 𑀅𑀫𑀼𑀲𑁆𑀫𑀺𑀁 𑀦𑀢𑁆𑀣𑀺 𑀭𑀸𑀕𑁄, 𑀅𑀫𑀼𑀲𑁆𑀫𑀺𑀁 𑀦𑀢𑁆𑀣𑀺 𑀧𑀝𑀺𑀖𑀁, 𑀅𑀦𑀼𑀦𑀬𑀧𑀝𑀺𑀖𑀯𑀺𑀧𑁆𑀧𑀳𑀻𑀦𑁄 𑀉𑀕𑁆𑀖𑀸𑀢𑀺𑀦𑀺𑀖𑀸𑀢𑀺𑀯𑀻𑀢𑀺𑀯𑀢𑁆𑀢𑁄 𑀅𑀦𑀼𑀭𑁄𑀥𑀯𑀺𑀭𑁄𑀥𑀲𑀫𑀢𑀺𑀓𑁆𑀓𑀦𑁆𑀢𑁄. 𑀏𑀯𑀁 𑀅𑀭𑀳𑀸 𑀇𑀝𑁆𑀞𑀸𑀦𑀺𑀝𑁆𑀞𑁂 𑀢𑀸𑀤𑀻.

𑀓𑀣𑀁 𑀅𑀭𑀳𑀸 𑀘𑀢𑁆𑀢𑀸𑀯𑀻𑀢𑀺 𑀢𑀸𑀤𑀻? 𑀅𑀭𑀳𑀢𑁄 𑀭𑀸𑀕𑁄 𑀘𑀢𑁆𑀢𑁄 𑀯𑀦𑁆𑀢𑁄 𑀫𑀼𑀢𑁆𑀢𑁄 𑀧𑀳𑀻𑀦𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑁄. 𑀤𑁄𑀲𑁄…𑀧𑁂… 𑀫𑁄𑀳𑁄… 𑀓𑁄𑀥𑁄… 𑀉𑀧𑀦𑀸𑀳𑁄… 𑀫𑀓𑁆𑀔𑁄… 𑀧𑀴𑀸𑀲𑁄… 𑀇𑀲𑁆𑀲𑀸… 𑀫𑀘𑁆𑀙𑀭𑀺𑀬𑀁… 𑀫𑀸𑀬𑀸… 𑀲𑀸𑀞𑁂𑀬𑁆𑀬𑀁… 𑀣𑀫𑁆𑀪𑁄… 𑀲𑀸𑀭𑀫𑁆𑀪𑁄… 𑀫𑀸𑀦𑁄… 𑀅𑀢𑀺𑀫𑀸𑀦𑁄… 𑀫𑀤𑁄… 𑀧𑀫𑀸𑀤𑁄… 𑀲𑀩𑁆𑀩𑁂 𑀓𑀺𑀮𑁂𑀲𑀸… 𑀲𑀩𑁆𑀩𑁂 𑀤𑀼𑀘𑁆𑀘𑀭𑀺𑀢𑀸… 𑀲𑀩𑁆𑀩𑁂 𑀤𑀭𑀣𑀸… 𑀲𑀩𑁆𑀩𑁂 𑀧𑀭𑀺𑀴𑀸𑀳𑀸… 𑀲𑀩𑁆𑀩𑁂 𑀲𑀦𑁆𑀢𑀸𑀧𑀸… 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀸 𑀘𑀢𑁆𑀢𑀸 𑀯𑀦𑁆𑀢𑀸 𑀫𑀼𑀢𑁆𑀢𑀸 𑀧𑀳𑀻𑀦𑀸 𑀧𑀝𑀺𑀦𑀺𑀲𑁆𑀲𑀝𑁆𑀞𑀸. 𑀏𑀯𑀁 𑀅𑀭𑀳𑀸 𑀘𑀢𑁆𑀢𑀸𑀯𑀻𑀢𑀺 𑀢𑀸𑀤𑀻.

𑀓𑀣𑀁 𑀅𑀭𑀳𑀸 𑀢𑀺𑀡𑁆𑀡𑀸𑀯𑀻𑀢𑀺 𑀢𑀸𑀤𑀻? 𑀅𑀭𑀳𑀸 𑀓𑀸𑀫𑁄𑀖𑀁 𑀢𑀺𑀡𑁆𑀡𑁄 𑀪𑀯𑁄𑀖𑀁 𑀢𑀺𑀡𑁆𑀡𑁄 𑀤𑀺𑀝𑁆𑀞𑁄𑀖𑀁 𑀢𑀺𑀡𑁆𑀡𑁄 𑀅𑀯𑀺𑀚𑁆𑀚𑁄𑀖𑀁 𑀢𑀺𑀡𑁆𑀡𑁄 𑀲𑀩𑁆𑀩𑀁 𑀲𑀁𑀲𑀸𑀭𑀧𑀣𑀁 𑀢𑀺𑀡𑁆𑀡𑁄 𑀉𑀢𑁆𑀢𑀺𑀡𑁆𑀡𑁄 𑀦𑀺𑀢𑁆𑀢𑀺𑀡𑁆𑀡𑁄 𑀅𑀢𑀺𑀓𑁆𑀓𑀦𑁆𑀢𑁄 𑀲𑀫𑀢𑀺𑀓𑁆𑀓𑀦𑁆𑀢𑁄 𑀯𑀻𑀢𑀺𑀯𑀢𑁆𑀢𑁄. 𑀲𑁄 𑀯𑀼𑀝𑁆𑀞𑀯𑀸𑀲𑁄 𑀘𑀺𑀡𑁆𑀡𑀘𑀭𑀡𑁄 𑀚𑀸𑀢𑀺𑀫𑀭𑀡𑀲𑀁𑀲𑀸𑀭𑁄, 𑀦𑀢𑁆𑀣𑀺 𑀢𑀲𑁆𑀲 𑀧𑀼𑀦𑀩𑁆𑀪𑀯𑁄𑀢𑀺. 𑀏𑀯𑀁 𑀅𑀭𑀳𑀸 𑀢𑀺𑀡𑁆𑀡𑀸𑀯𑀻𑀢𑀺 𑀢𑀸𑀤𑀻.

𑀓𑀣𑀁 𑀅𑀭𑀳𑀸 𑀫𑀼𑀢𑁆𑀢𑀸𑀯𑀻𑀢𑀺 𑀢𑀸𑀤𑀻? 𑀅𑀭𑀳𑀢𑁄 𑀭𑀸𑀕𑀸 𑀘𑀺𑀢𑁆𑀢𑀁 𑀫𑀼𑀢𑁆𑀢𑀁 𑀯𑀺𑀫𑀼𑀢𑁆𑀢𑀁 𑀲𑀼𑀯𑀺𑀫𑀼𑀢𑁆𑀢𑀁, 𑀤𑁄𑀲𑀸 𑀘𑀺𑀢𑁆𑀢𑀁 𑀫𑀼𑀢𑁆𑀢𑀁 𑀯𑀺𑀫𑀼𑀢𑁆𑀢𑀁 𑀲𑀼𑀯𑀺𑀫𑀼𑀢𑁆𑀢𑀁, 𑀫𑁄𑀳𑀸 𑀘𑀺𑀢𑁆𑀢𑀁 𑀫𑀼𑀢𑁆𑀢𑀁 𑀯𑀺𑀫𑀼𑀢𑁆𑀢𑀁 𑀲𑀼𑀯𑀺𑀫𑀼𑀢𑁆𑀢𑀁, 𑀓𑁄𑀥𑀸…𑀧𑁂… 𑀉𑀧𑀦𑀸𑀳𑀸… 𑀫𑀓𑁆𑀔𑀸… 𑀧𑀴𑀸𑀲𑀸… 𑀇𑀲𑁆𑀲𑀸𑀬… 𑀫𑀘𑁆𑀙𑀭𑀺𑀬𑀸… 𑀫𑀸𑀬𑀸𑀬… 𑀲𑀸𑀞𑁂𑀬𑁆𑀬𑀸… 𑀣𑀫𑁆𑀪𑀸… 𑀲𑀸𑀭𑀫𑁆𑀪𑀸… 𑀫𑀸𑀦𑀸… 𑀅𑀢𑀺𑀫𑀸𑀦𑀸… 𑀫𑀤𑀸… 𑀧𑀫𑀸𑀤𑀸… 𑀲𑀩𑁆𑀩𑀓𑀺𑀮𑁂𑀲𑁂𑀳𑀺… 𑀲𑀩𑁆𑀩𑀤𑀼𑀘𑁆𑀘𑀭𑀺𑀢𑁂𑀳𑀺… 𑀲𑀩𑁆𑀩𑀤𑀭𑀣𑁂𑀳𑀺… 𑀲𑀩𑁆𑀩𑀧𑀭𑀺𑀴𑀸𑀳𑁂𑀳𑀺… 𑀲𑀩𑁆𑀩𑀲𑀦𑁆𑀢𑀸𑀧𑁂𑀳𑀺… 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑁂𑀳𑀺 𑀘𑀺𑀢𑁆𑀢𑀁 𑀫𑀼𑀢𑁆𑀢𑀁 𑀯𑀺𑀫𑀼𑀢𑁆𑀢𑀁 𑀲𑀼𑀯𑀺𑀫𑀼𑀢𑁆𑀢𑀁. 𑀏𑀯𑀁 𑀅𑀭𑀳𑀸 𑀫𑀼𑀢𑁆𑀢𑀸𑀯𑀻𑀢𑀺 𑀢𑀸𑀤𑀻.

𑀓𑀣𑀁 𑀅𑀭𑀳𑀸 𑀢𑀁𑀦𑀺𑀤𑁆𑀤𑁂𑀲𑀸 𑀢𑀸𑀤𑀻? 𑀅𑀭𑀳𑀸 𑀲𑀻𑀮𑁂 𑀲𑀢𑀺 𑀲𑀻𑀮𑀯𑀸𑀢𑀺 𑀢𑀁𑀦𑀺𑀤𑁆𑀤𑁂𑀲𑀸 𑀢𑀸𑀤𑀻; 𑀲𑀤𑁆𑀥𑀸𑀬 𑀲𑀢𑀺 𑀲𑀤𑁆𑀥𑁄𑀢𑀺 𑀢𑀁𑀦𑀺𑀤𑁆𑀤𑁂𑀲𑀸 𑀢𑀸𑀤𑀻; 𑀯𑀻𑀭𑀺𑀬𑁂 𑀲𑀢𑀺 𑀯𑀻𑀭𑀺𑀬𑀯𑀸𑀢𑀺 𑀢𑀁𑀦𑀺𑀤𑁆𑀤𑁂𑀲𑀸 𑀢𑀸𑀤𑀻; 𑀲𑀢𑀺𑀬𑀸 𑀲𑀢𑀺 𑀲𑀢𑀺𑀫𑀸𑀢𑀺 𑀢𑀁𑀦𑀺𑀤𑁆𑀤𑁂𑀲𑀸 𑀢𑀸𑀤𑀻; 𑀲𑀫𑀸𑀥𑀺𑀫𑁆𑀳𑀺 𑀲𑀢𑀺 𑀲𑀫𑀸𑀳𑀺𑀢𑁄𑀢𑀺 𑀢𑀁𑀦𑀺𑀤𑁆𑀤𑁂𑀲𑀸 𑀢𑀸𑀤𑀻; 𑀧𑀜𑁆𑀜𑀸𑀬 𑀲𑀢𑀺 𑀧𑀜𑁆𑀜𑀯𑀸𑀢𑀺 𑀢𑀁𑀦𑀺𑀤𑁆𑀤𑁂𑀲𑀸 𑀢𑀸𑀤𑀻; 𑀯𑀺𑀚𑁆𑀚𑀸𑀬 𑀲𑀢𑀺 𑀢𑁂𑀯𑀺𑀚𑁆𑀚𑁄𑀢𑀺 𑀢𑀁𑀦𑀺𑀤𑁆𑀤𑁂𑀲𑀸 𑀢𑀸𑀤𑀻; 𑀅𑀪𑀺𑀜𑁆𑀜𑀸𑀬 𑀲𑀢𑀺 𑀙𑀴𑀪𑀺𑀜𑁆𑀜𑁄𑀢𑀺 𑀢𑀁𑀦𑀺𑀤𑁆𑀤𑁂𑀲𑀸 𑀢𑀸𑀤𑀻. 𑀏𑀯𑀁 𑀅𑀭𑀳𑀸 𑀢𑀁𑀦𑀺𑀤𑁆𑀤𑁂𑀲𑀸 𑀢𑀸𑀤𑀻𑀢𑀺 𑁋 𑀧𑀸𑀭𑀗𑁆𑀕𑀢𑁄 𑀦 𑀧𑀘𑁆𑀘𑁂𑀢𑀺 𑀢𑀸𑀤𑀻.

𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀦 𑀓𑀧𑁆𑀧𑀬𑀦𑁆𑀢𑀺 𑀦 𑀧𑀼𑀭𑁂𑀓𑁆𑀔𑀭𑁄𑀦𑁆𑀢𑀺, 𑀥𑀫𑁆𑀫𑀸𑀧𑀺 𑀢𑁂𑀲𑀁 𑀦 𑀧𑀝𑀺𑀘𑁆𑀙𑀺𑀢𑀸𑀲𑁂;

𑀦 𑀩𑁆𑀭𑀸𑀳𑁆𑀫𑀡𑁄 𑀲𑀻𑀮𑀯𑀢𑁂𑀦 𑀦𑁂𑀬𑁆𑀬𑁄, 𑀧𑀸𑀭𑀗𑁆𑀕𑀢𑁄 𑀦 𑀧𑀘𑁆𑀘𑁂𑀢𑀺 𑀢𑀸𑀤𑀻’’𑀢𑀺.

𑀧𑀭𑀫𑀝𑁆𑀞𑀓𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁄 𑀧𑀜𑁆𑀘𑀫𑁄.