𑁪. 𑀲𑀼𑀤𑁆𑀥𑀝𑁆𑀞𑀓𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁄

𑀅𑀣 𑀲𑀼𑀤𑁆𑀥𑀝𑁆𑀞𑀓𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀁 𑀯𑀓𑁆𑀔𑀢𑀺 𑁋

𑁨𑁩. 𑀧𑀲𑁆𑀲𑀸𑀫𑀺 𑀲𑀼𑀤𑁆𑀥𑀁 𑀧𑀭𑀫𑀁 𑀅𑀭𑁄𑀕𑀁,𑀤𑀺𑀝𑁆𑀞𑁂𑀦 𑀲𑀁𑀲𑀼𑀤𑁆𑀥𑀺 𑀦𑀭𑀲𑁆𑀲 𑀳𑁄𑀢𑀺;

𑀏𑀯𑀸𑀪𑀺𑀚𑀸𑀦𑀁 𑀧𑀭𑀫𑀦𑁆𑀢𑀺 𑀜𑀢𑁆𑀯𑀸, 𑀲𑀼𑀤𑁆𑀥𑀸𑀦𑀼𑀧𑀲𑁆𑀲𑀻𑀢𑀺 𑀧𑀘𑁆𑀘𑁂𑀢𑀺 𑀜𑀸𑀡𑀁.

𑀧𑀲𑁆𑀲𑀸𑀫𑀺 𑀲𑀼𑀤𑁆𑀥𑀁 𑀧𑀭𑀫𑀁 𑀅𑀭𑁄𑀕𑀦𑁆𑀢𑀺. 𑀧𑀲𑁆𑀲𑀸𑀫𑀺 𑀲𑀼𑀤𑁆𑀥𑀦𑁆𑀢𑀺 𑀧𑀲𑁆𑀲𑀸𑀫𑀺 𑀲𑀼𑀤𑁆𑀥𑀁, 𑀤𑀓𑁆𑀔𑀸𑀫𑀺 𑀲𑀼𑀤𑁆𑀥𑀁, 𑀑𑀮𑁄𑀓𑁂𑀫𑀺 𑀲𑀼𑀤𑁆𑀥𑀁, 𑀦𑀺𑀚𑁆𑀛𑀸𑀬𑀸𑀫𑀺 𑀲𑀼𑀤𑁆𑀥𑀁, 𑀉𑀧𑀧𑀭𑀺𑀓𑁆𑀔𑀸𑀫𑀺 𑀲𑀼𑀤𑁆𑀥𑀁. 𑀧𑀭𑀫𑀁 𑀅𑀭𑁄𑀕𑀦𑁆𑀢𑀺 𑀧𑀭𑀫𑀁 𑀆𑀭𑁄𑀕𑁆𑀬𑀧𑁆𑀧𑀢𑁆𑀢𑀁 𑀢𑀸𑀡𑀧𑁆𑀧𑀢𑁆𑀢𑀁 𑀮𑁂𑀡𑀧𑁆𑀧𑀢𑁆𑀢𑀁 𑀲𑀭𑀡𑀧𑁆𑀧𑀢𑁆𑀢𑀁 𑀅𑀪𑀬𑀧𑁆𑀧𑀢𑁆𑀢𑀁 𑀅𑀘𑁆𑀘𑀼𑀢𑀧𑁆𑀧𑀢𑁆𑀢𑀁 𑀅𑀫𑀢𑀧𑁆𑀧𑀢𑁆𑀢𑀁 𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑀦𑁆𑀢𑀺 𑁋 𑀧𑀲𑁆𑀲𑀸𑀫𑀺 𑀲𑀼𑀤𑁆𑀥𑀁 𑀧𑀭𑀫𑀁 𑀅𑀭𑁄𑀕𑀁.

𑀤𑀺𑀝𑁆𑀞𑁂𑀦 𑀲𑀁𑀲𑀼𑀤𑁆𑀥𑀺 𑀦𑀭𑀲𑁆𑀲 𑀳𑁄𑀢𑀻𑀢𑀺. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 [𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 (𑀲𑀻. 𑀲𑁆𑀬𑀸.)] 𑀭𑀽𑀧𑀤𑀲𑁆𑀲𑀦𑁂𑀦 𑀦𑀭𑀲𑁆𑀲 𑀲𑀼𑀤𑁆𑀥𑀺 𑀯𑀺𑀲𑀼𑀤𑁆𑀥𑀺 𑀧𑀭𑀺𑀲𑀼𑀤𑁆𑀥𑀺, 𑀫𑀼𑀢𑁆𑀢𑀺 𑀯𑀺𑀫𑀼𑀢𑁆𑀢𑀺 𑀧𑀭𑀺𑀫𑀼𑀢𑁆𑀢𑀺 𑀳𑁄𑀢𑀺, 𑀦𑀭𑁄 𑀲𑀼𑀚𑁆𑀛𑀢𑀺 𑀯𑀺𑀲𑀼𑀚𑁆𑀛𑀢𑀺 𑀧𑀭𑀺𑀲𑀼𑀚𑁆𑀛𑀢𑀺, 𑀫𑀼𑀘𑁆𑀘𑀢𑀺 𑀯𑀺𑀫𑀼𑀘𑁆𑀘𑀢𑀺 𑀧𑀭𑀺𑀫𑀼𑀘𑁆𑀘𑀢𑀻𑀢𑀺 𑁋 𑀤𑀺𑀝𑁆𑀞𑁂𑀦 𑀲𑀁𑀲𑀼𑀤𑁆𑀥𑀺 𑀦𑀭𑀲𑁆𑀲 𑀳𑁄𑀢𑀺.

𑀏𑀯𑀸𑀪𑀺𑀚𑀸𑀦𑀁 𑀧𑀭𑀫𑀦𑁆𑀢𑀺 𑀜𑀢𑁆𑀯𑀸𑀢𑀺. 𑀏𑀯𑀁 𑀅𑀪𑀺𑀚𑀸𑀦𑀦𑁆𑀢𑁄 𑀆𑀚𑀸𑀦𑀦𑁆𑀢𑁄 𑀯𑀺𑀚𑀸𑀦𑀦𑁆𑀢𑁄 𑀧𑀝𑀺𑀯𑀺𑀚𑀸𑀦𑀦𑁆𑀢𑁄 𑀧𑀝𑀺𑀯𑀺𑀚𑁆𑀛𑀦𑁆𑀢𑁄. ‘‘𑀇𑀤𑀁 𑀧𑀭𑀫𑀁 𑀅𑀕𑁆𑀕𑀁 𑀲𑁂𑀝𑁆𑀞𑀁 𑀯𑀺𑀲𑀺𑀝𑁆𑀞𑀁 𑀧𑀸𑀫𑁄𑀓𑁆𑀔𑀁 𑀉𑀢𑁆𑀢𑀫𑀁 𑀧𑀯𑀭’’𑀦𑁆𑀢𑀺 𑀜𑀢𑁆𑀯𑀸 𑀚𑀸𑀦𑀺𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸𑀢𑀺 𑁋 𑀏𑀯𑀸𑀪𑀺𑀚𑀸𑀦𑀁 𑀧𑀭𑀫𑀦𑁆𑀢𑀺 𑀜𑀢𑁆𑀯𑀸.

𑀲𑀼𑀤𑁆𑀥𑀸𑀦𑀼𑀧𑀲𑁆𑀲𑀻𑀢𑀺 𑀧𑀘𑁆𑀘𑁂𑀢𑀺 𑀜𑀸𑀡𑀦𑁆𑀢𑀺. 𑀬𑁄 𑀲𑀼𑀤𑁆𑀥𑀁 𑀧𑀲𑁆𑀲𑀢𑀺, 𑀲𑁄 𑀲𑀼𑀤𑁆𑀥𑀸𑀦𑀼𑀧𑀲𑁆𑀲𑀻, 𑀧𑀘𑁆𑀘𑁂𑀢𑀺𑀜𑀸𑀡𑀦𑁆𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀭𑀽𑀧𑀤𑀲𑁆𑀲𑀦𑁂𑀦 𑀜𑀸𑀡𑀦𑁆𑀢𑀺 𑀧𑀘𑁆𑀘𑁂𑀢𑀺, 𑀫𑀕𑁆𑀕𑁄𑀢𑀺 𑀧𑀘𑁆𑀘𑁂𑀢𑀺, 𑀧𑀣𑁄𑀢𑀺 𑀧𑀘𑁆𑀘𑁂𑀢𑀺, 𑀦𑀺𑀬𑁆𑀬𑀸𑀦𑀦𑁆𑀢𑀺 𑀧𑀘𑁆𑀘𑁂𑀢𑀻𑀢𑀺 𑁋 𑀲𑀼𑀤𑁆𑀥𑀸𑀦𑀼𑀧𑀲𑁆𑀲𑀻 𑀧𑀘𑁆𑀘𑁂𑀢𑀺 𑀜𑀸𑀡𑀁.

𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀧𑀲𑁆𑀲𑀸𑀫𑀺 𑀲𑀼𑀤𑁆𑀥𑀁 𑀧𑀭𑀫𑀁 𑀅𑀭𑁄𑀕𑀁, 𑀤𑀺𑀝𑁆𑀞𑁂𑀦 𑀲𑀁𑀲𑀼𑀤𑁆𑀥𑀺 𑀦𑀭𑀲𑁆𑀲 𑀳𑁄𑀢𑀺;

𑀏𑀯𑀸𑀪𑀺𑀚𑀸𑀦𑀁 𑀧𑀭𑀫𑀦𑁆𑀢𑀺 𑀜𑀢𑁆𑀯𑀸, 𑀲𑀼𑀤𑁆𑀥𑀸𑀦𑀼𑀧𑀲𑁆𑀲𑀻𑀢𑀺 𑀧𑀘𑁆𑀘𑁂𑀢𑀺 𑀜𑀸𑀡’’𑀦𑁆𑀢𑀺.

𑁨𑁪. 𑀤𑀺𑀝𑁆𑀞𑁂𑀦 𑀘𑁂 𑀲𑀼𑀤𑁆𑀥𑀺 𑀦𑀭𑀲𑁆𑀲 𑀳𑁄𑀢𑀺,𑀜𑀸𑀡𑁂𑀦 𑀯𑀸 𑀲𑁄 𑀧𑀚𑀳𑀸𑀢𑀺 𑀤𑀼𑀓𑁆𑀔𑀁;

𑀅𑀜𑁆𑀜𑁂𑀦 𑀲𑁄 𑀲𑀼𑀚𑁆𑀛𑀢𑀺 𑀲𑁄𑀧𑀥𑀻𑀓𑁄, 𑀤𑀺𑀝𑁆𑀞𑀻 𑀳𑀺 𑀦𑀁 𑀧𑀸𑀯 𑀢𑀣𑀸 𑀯𑀤𑀸𑀦𑀁.

𑀤𑀺𑀝𑁆𑀞𑁂𑀦 𑀘𑁂 𑀲𑀼𑀤𑁆𑀥𑀺 𑀦𑀭𑀲𑁆𑀲 𑀳𑁄𑀢𑀻𑀢𑀺. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀭𑀽𑀧𑀤𑀲𑁆𑀲𑀦𑁂𑀦 𑀘𑁂 𑀦𑀭𑀲𑁆𑀲 𑀲𑀼𑀤𑁆𑀥𑀺 𑀯𑀺𑀲𑀼𑀤𑁆𑀥𑀺 𑀧𑀭𑀺𑀲𑀼𑀤𑁆𑀥𑀺, 𑀫𑀼𑀢𑁆𑀢𑀺 𑀯𑀺𑀫𑀼𑀢𑁆𑀢𑀺 𑀧𑀭𑀺𑀫𑀼𑀢𑁆𑀢𑀺 𑀳𑁄𑀢𑀺, 𑀦𑀭𑁄 𑀲𑀼𑀚𑁆𑀛𑀢𑀺 𑀯𑀺𑀲𑀼𑀚𑁆𑀛𑀢𑀺 𑀧𑀭𑀺𑀲𑀼𑀚𑁆𑀛𑀢𑀺, 𑀫𑀼𑀘𑁆𑀘𑀢𑀺 𑀯𑀺𑀫𑀼𑀘𑁆𑀘𑀢𑀺 𑀧𑀭𑀺𑀫𑀼𑀘𑁆𑀘𑀢𑀻𑀢𑀺 𑁋 𑀤𑀺𑀝𑁆𑀞𑁂𑀦 𑀘𑁂 𑀲𑀼𑀤𑁆𑀥𑀺 𑀦𑀭𑀲𑁆𑀲 𑀳𑁄𑀢𑀺.

𑀜𑀸𑀡𑁂𑀦 𑀯𑀸 𑀲𑁄 𑀧𑀚𑀳𑀸𑀢𑀺 𑀤𑀼𑀓𑁆𑀔𑀦𑁆𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀭𑀽𑀧𑀤𑀲𑁆𑀲𑀦𑁂𑀦 𑀘𑁂 𑀦𑀭𑁄 𑀚𑀸𑀢𑀺𑀤𑀼𑀓𑁆𑀔𑀁 𑀧𑀚𑀳𑀢𑀺, 𑀚𑀭𑀸𑀤𑀼𑀓𑁆𑀔𑀁 𑀧𑀚𑀳𑀢𑀺, 𑀩𑁆𑀬𑀸𑀥𑀺𑀤𑀼𑀓𑁆𑀔𑀁 𑀧𑀚𑀳𑀢𑀺, 𑀫𑀭𑀡𑀤𑀼𑀓𑁆𑀔𑀁 𑀧𑀚𑀳𑀢𑀺, 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀤𑀼𑀓𑁆𑀔𑀁 𑀧𑀚𑀳𑀢𑀻𑀢𑀺 𑁋 𑀜𑀸𑀡𑁂𑀦 𑀯𑀸 𑀲𑁄 𑀧𑀚𑀳𑀸𑀢𑀺 𑀤𑀼𑀓𑁆𑀔𑀁.

𑀅𑀜𑁆𑀜𑁂𑀦 𑀲𑁄 𑀲𑀼𑀚𑁆𑀛𑀢𑀺 𑀲𑁄𑀧𑀥𑀻𑀓𑁄𑀢𑀺. 𑀅𑀜𑁆𑀜𑁂𑀦 𑀅𑀲𑀼𑀤𑁆𑀥𑀺𑀫𑀕𑁆𑀕𑁂𑀦 𑀫𑀺𑀘𑁆𑀙𑀸𑀧𑀝𑀺𑀧𑀤𑀸𑀬 𑀅𑀦𑀺𑀬𑁆𑀬𑀸𑀦𑀺𑀓𑀧𑀣𑁂𑀦 𑀅𑀜𑁆𑀜𑀢𑁆𑀭 𑀲𑀢𑀺𑀧𑀝𑁆𑀞𑀸𑀦𑁂𑀳𑀺 𑀅𑀜𑁆𑀜𑀢𑁆𑀭 𑀲𑀫𑁆𑀫𑀧𑁆𑀧𑀥𑀸𑀦𑁂𑀳𑀺 𑀅𑀜𑁆𑀜𑀢𑁆𑀭 𑀇𑀤𑁆𑀥𑀺𑀧𑀸𑀤𑁂𑀳𑀺 𑀅𑀜𑁆𑀜𑀢𑁆𑀭 𑀇𑀦𑁆𑀤𑁆𑀭𑀺𑀬𑁂𑀳𑀺 𑀅𑀜𑁆𑀜𑀢𑁆𑀭 𑀩𑀮𑁂𑀳𑀺 𑀅𑀜𑁆𑀜𑀢𑁆𑀭 𑀩𑁄𑀚𑁆𑀛𑀗𑁆𑀕𑁂𑀳𑀺 𑀅𑀜𑁆𑀜𑀢𑁆𑀭 𑀅𑀭𑀺𑀬𑀸 𑀅𑀝𑁆𑀞𑀗𑁆𑀕𑀺𑀓𑀸 𑀫𑀕𑁆𑀕𑀸 𑀦𑀭𑁄 𑀲𑀼𑀚𑁆𑀛𑀢𑀺 𑀯𑀺𑀲𑀼𑀚𑁆𑀛𑀢𑀺 𑀧𑀭𑀺𑀲𑀼𑀚𑁆𑀛𑀢𑀺, 𑀫𑀼𑀘𑁆𑀘𑀢𑀺 𑀯𑀺𑀫𑀼𑀘𑁆𑀘𑀢𑀺 𑀧𑀭𑀺𑀫𑀼𑀘𑁆𑀘𑀢𑀺. 𑀲𑁄𑀧𑀥𑀻𑀓𑁄𑀢𑀺 𑀲𑀭𑀸𑀕𑁄 𑀲𑀤𑁄𑀲𑁄 𑀲𑀫𑁄𑀳𑁄 𑀲𑀫𑀸𑀦𑁄 𑀲𑀢𑀡𑁆𑀳𑁄 𑀲𑀤𑀺𑀝𑁆𑀞𑀺 𑀲𑀓𑀺𑀮𑁂𑀲𑁄 𑀲𑀉𑀧𑀸𑀤𑀸𑀦𑁄𑀢𑀺 𑁋 𑀅𑀜𑁆𑀜𑁂𑀦 𑀲𑁄 𑀲𑀼𑀚𑁆𑀛𑀢𑀺 𑀲𑁄𑀧𑀥𑀻𑀓𑁄.

𑀤𑀺𑀝𑁆𑀞𑀻 𑀳𑀺 𑀦𑀁 𑀧𑀸𑀯 𑀢𑀣𑀸 𑀯𑀤𑀸𑀦𑀦𑁆𑀢𑀺. 𑀲𑀸𑀯 𑀤𑀺𑀝𑁆𑀞𑀺 𑀢𑀁 𑀧𑀼𑀕𑁆𑀕𑀮𑀁 𑀧𑀸𑀯𑀤𑀢𑀺 𑁋 𑀇𑀢𑀺 𑀯𑀸𑀬𑀁 𑀧𑀼𑀕𑁆𑀕𑀮𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀯𑀺𑀧𑀭𑀻𑀢𑀤𑀲𑁆𑀲𑀦𑁄. 𑀢𑀣𑀸 𑀯𑀤𑀸𑀦𑀦𑁆𑀢𑀺 𑀢𑀣𑀸 𑀯𑀤𑀦𑁆𑀢𑀁 𑀓𑀣𑁂𑀦𑁆𑀢𑀁 𑀪𑀡𑀦𑁆𑀢𑀁 𑀤𑀻𑀧𑀬𑀦𑁆𑀢𑀁 𑀯𑁄𑀳𑀭𑀦𑁆𑀢𑀁. ‘‘𑀲𑀲𑁆𑀲𑀢𑁄 𑀮𑁄𑀓𑁄, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀢𑀣𑀸 𑀯𑀤𑀦𑁆𑀢𑀁 𑀓𑀣𑁂𑀦𑁆𑀢𑀁 𑀪𑀡𑀦𑁆𑀢𑀁 𑀤𑀻𑀧𑀬𑀦𑁆𑀢𑀁 𑀯𑁄𑀳𑀭𑀦𑁆𑀢𑀁. ‘‘𑀅𑀲𑀲𑁆𑀲𑀢𑁄 𑀮𑁄𑀓𑁄…𑀧𑁂… 𑀅𑀦𑁆𑀢𑀯𑀸 𑀮𑁄𑀓𑁄… 𑀅𑀦𑀦𑁆𑀢𑀯𑀸 𑀮𑁄𑀓𑁄… 𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭𑀁… 𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭𑀁… 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸… 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸… 𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸… 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀢𑀣𑀸 𑀯𑀤𑀦𑁆𑀢𑀁 𑀓𑀣𑁂𑀦𑁆𑀢𑀁 𑀪𑀡𑀦𑁆𑀢𑀁 𑀤𑀻𑀧𑀬𑀦𑁆𑀢𑀁 𑀯𑁄𑀳𑀭𑀦𑁆𑀢𑀦𑁆𑀢𑀺 𑁋 𑀤𑀺𑀝𑁆𑀞𑀻 𑀳𑀺 𑀦𑀁 𑀧𑀸𑀯 𑀢𑀣𑀸 𑀯𑀤𑀸𑀦𑀁.

𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀤𑀺𑀝𑁆𑀞𑁂𑀦 𑀘𑁂 𑀲𑀼𑀤𑁆𑀥𑀺 𑀦𑀭𑀲𑁆𑀲 𑀳𑁄𑀢𑀺, 𑀜𑀸𑀡𑁂𑀦 𑀯𑀸 𑀲𑁄 𑀧𑀚𑀳𑀸𑀢𑀺 𑀤𑀼𑀓𑁆𑀔𑀁;

𑀅𑀜𑁆𑀜𑁂𑀦 𑀲𑁄 𑀲𑀼𑀚𑁆𑀛𑀢𑀺 𑀲𑁄𑀧𑀥𑀻𑀓𑁄, 𑀤𑀺𑀝𑁆𑀞𑀻 𑀳𑀺 𑀦𑀁 𑀧𑀸𑀯 𑀢𑀣𑀸 𑀯𑀤𑀸𑀦’’𑀦𑁆𑀢𑀺.

𑁨𑁫. 𑀦 𑀩𑁆𑀭𑀸𑀳𑁆𑀫𑀡𑁄 𑀅𑀜𑁆𑀜𑀢𑁄 𑀲𑀼𑀤𑁆𑀥𑀺𑀫𑀸𑀳,𑀤𑀺𑀝𑁆𑀞𑁂 𑀲𑀼𑀢𑁂 𑀲𑀻𑀮𑀯𑀢𑁂 𑀫𑀼𑀢𑁂 𑀯𑀸;

𑀧𑀼𑀜𑁆𑀜𑁂 𑀘 𑀧𑀸𑀧𑁂 𑀘 𑀅𑀦𑀽𑀧𑀮𑀺𑀢𑁆𑀢𑁄, 𑀅𑀢𑁆𑀢𑀜𑁆𑀚𑀳𑁄 𑀦𑀬𑀺𑀥 𑀧𑀓𑀼𑀩𑁆𑀩𑀫𑀸𑀦𑁄.

𑀦 𑀩𑁆𑀭𑀸𑀳𑁆𑀫𑀡𑁄 𑀅𑀜𑁆𑀜𑀢𑁄 𑀲𑀼𑀤𑁆𑀥𑀺𑀫𑀸𑀳 𑀤𑀺𑀝𑁆𑀞𑁂 𑀲𑀼𑀢𑁂 𑀲𑀻𑀮𑀯𑀢𑁂 𑀫𑀼𑀢𑁂 𑀯𑀸𑀢𑀺. 𑀦𑀸𑀢𑀺 𑀧𑀝𑀺𑀓𑁆𑀔𑁂𑀧𑁄. 𑀩𑁆𑀭𑀸𑀳𑁆𑀫𑀡𑁄𑀢𑀺 𑀲𑀢𑁆𑀢𑀦𑁆𑀦𑀁 𑀥𑀫𑁆𑀫𑀸𑀦𑀁 𑀩𑀸𑀳𑀺𑀢𑀢𑁆𑀢𑀸 𑀩𑁆𑀭𑀸𑀳𑁆𑀫𑀡𑁄 𑁋 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀩𑀸𑀳𑀺𑀢𑀸 𑀳𑁄𑀢𑀺, 𑀯𑀺𑀘𑀺𑀓𑀺𑀘𑁆𑀙𑀸 𑀩𑀸𑀳𑀺𑀢𑀸 𑀳𑁄𑀢𑀺, 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄 𑀩𑀸𑀳𑀺𑀢𑁄 𑀳𑁄𑀢𑀺, 𑀭𑀸𑀕𑁄 𑀩𑀸𑀳𑀺𑀢𑁄 𑀳𑁄𑀢𑀺, 𑀤𑁄𑀲𑁄 𑀩𑀸𑀳𑀺𑀢𑁄 𑀳𑁄𑀢𑀺, 𑀫𑁄𑀳𑁄 𑀩𑀸𑀳𑀺𑀢𑁄 𑀳𑁄𑀢𑀺, 𑀫𑀸𑀦𑁄 𑀩𑀸𑀳𑀺𑀢𑁄 𑀳𑁄𑀢𑀺. 𑀩𑀸𑀳𑀺𑀢𑀸𑀲𑁆𑀲 𑀳𑁄𑀦𑁆𑀢𑀺 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀁𑀓𑀺𑀮𑁂𑀲𑀺𑀓𑀸 𑀧𑁄𑀦𑁄𑀪𑀯𑀺𑀓𑀸 𑀲𑀤𑀭𑀸 𑀤𑀼𑀓𑁆𑀔𑀯𑀺𑀧𑀸𑀓𑀸 𑀆𑀬𑀢𑀺𑀁 𑀚𑀸𑀢𑀺𑀚𑀭𑀸𑀫𑀭𑀡𑀺𑀬𑀸.

𑀩𑀸𑀳𑀺𑀢𑁆𑀯𑀸 𑀲𑀩𑁆𑀩𑀧𑀸𑀧𑀓𑀸𑀦𑀺, [𑀲𑀪𑀺𑀬𑀸𑀢𑀺 𑀪𑀕𑀯𑀸]

𑀯𑀺𑀫𑀮𑁄 𑀲𑀸𑀥𑀼𑀲𑀫𑀸𑀳𑀺𑀢𑁄 𑀞𑀺𑀢𑀢𑁆𑀢𑁄;

𑀲𑀁𑀲𑀸𑀭𑀫𑀢𑀺𑀘𑁆𑀘 𑀓𑁂𑀯𑀮𑀻 𑀲𑁄, 𑀅𑀲𑀺𑀢𑁄 [𑀅𑀦𑀺𑀲𑁆𑀲𑀺𑀢𑁄 (𑀲𑁆𑀬𑀸.)] 𑀢𑀸𑀤𑀺 𑀧𑀯𑀼𑀘𑁆𑀘𑀢𑁂 𑀲 𑀩𑁆𑀭𑀳𑁆𑀫𑀸.

𑀦 𑀩𑁆𑀭𑀸𑀳𑁆𑀫𑀡𑁄 𑀅𑀜𑁆𑀜𑀢𑁄 𑀲𑀼𑀤𑁆𑀥𑀺𑀫𑀸𑀳𑀸𑀢𑀺. 𑀩𑁆𑀭𑀸𑀳𑁆𑀫𑀡𑁄 𑀅𑀜𑁆𑀜𑁂𑀦 𑀅𑀲𑀼𑀤𑁆𑀥𑀺𑀫𑀕𑁆𑀕𑁂𑀦 𑀫𑀺𑀘𑁆𑀙𑀸𑀧𑀝𑀺𑀧𑀤𑀸𑀬 𑀅𑀦𑀺𑀬𑁆𑀬𑀸𑀦𑀺𑀓𑀧𑀣𑁂𑀦 𑀅𑀜𑁆𑀜𑀢𑁆𑀭 𑀲𑀢𑀺𑀧𑀝𑁆𑀞𑀸𑀦𑁂𑀳𑀺 𑀅𑀜𑁆𑀜𑀢𑁆𑀭 𑀲𑀫𑁆𑀫𑀧𑁆𑀧𑀥𑀸𑀦𑁂𑀳𑀺 𑀅𑀜𑁆𑀜𑀢𑁆𑀭 𑀇𑀤𑁆𑀥𑀺𑀧𑀸𑀤𑁂𑀳𑀺 𑀅𑀜𑁆𑀜𑀢𑁆𑀭 𑀇𑀦𑁆𑀤𑁆𑀭𑀺𑀬𑁂𑀳𑀺 𑀅𑀜𑁆𑀜𑀢𑁆𑀭 𑀩𑀮𑁂𑀳𑀺 𑀅𑀜𑁆𑀜𑀢𑁆𑀭 𑀩𑁄𑀚𑁆𑀛𑀗𑁆𑀕𑁂𑀳𑀺 𑀅𑀜𑁆𑀜𑀢𑁆𑀭 𑀅𑀭𑀺𑀬𑁂𑀦 𑀅𑀝𑁆𑀞𑀗𑁆𑀕𑀺𑀓𑁂𑀦 𑀫𑀕𑁆𑀕𑁂𑀦 𑀲𑀼𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀁 𑀧𑀭𑀺𑀲𑀼𑀤𑁆𑀥𑀺𑀁, 𑀫𑀼𑀢𑁆𑀢𑀺𑀁 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀫𑀼𑀢𑁆𑀢𑀺𑀁, 𑀦𑀸𑀳 𑀦 𑀓𑀣𑁂𑀢𑀺 𑀦 𑀪𑀡𑀢𑀺 𑀦 𑀤𑀻𑀧𑀬𑀢𑀺 𑀦 𑀯𑁄𑀳𑀭𑀢𑀻𑀢𑀺 𑁋 𑀦 𑀩𑁆𑀭𑀸𑀳𑁆𑀫𑀡𑁄 𑀅𑀜𑁆𑀜𑀢𑁄 𑀲𑀼𑀤𑁆𑀥𑀺𑀫𑀸𑀳.

𑀤𑀺𑀝𑁆𑀞𑁂 𑀲𑀼𑀢𑁂 𑀲𑀻𑀮𑀯𑀢𑁂 𑀫𑀼𑀢𑁂 𑀯𑀸𑀢𑀺. 𑀲𑀦𑁆𑀢𑁂𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀤𑀺𑀝𑁆𑀞𑀺𑀲𑀼𑀤𑁆𑀥𑀺𑀓𑀸. 𑀢𑁂 𑀏𑀓𑀘𑁆𑀘𑀸𑀦𑀁 𑀭𑀽𑀧𑀸𑀦𑀁 𑀤𑀲𑁆𑀲𑀦𑀁 𑀫𑀗𑁆𑀕𑀮𑀁 𑀧𑀘𑁆𑀘𑁂𑀦𑁆𑀢𑀺, 𑀏𑀓𑀘𑁆𑀘𑀸𑀦𑀁 𑀭𑀽𑀧𑀸𑀦𑀁 𑀤𑀲𑁆𑀲𑀦𑀁 𑀅𑀫𑀗𑁆𑀕𑀮𑀁 𑀧𑀘𑁆𑀘𑁂𑀦𑁆𑀢𑀺. 𑀓𑀢𑀫𑁂𑀲𑀁 𑀭𑀽𑀧𑀸𑀦𑀁 𑀤𑀲𑁆𑀲𑀦𑀁 𑀫𑀗𑁆𑀕𑀮𑀁 𑀧𑀘𑁆𑀘𑁂𑀦𑁆𑀢𑀺? 𑀢𑁂 𑀓𑀸𑀮𑀢𑁄 𑀯𑀼𑀝𑁆𑀞𑀳𑀺𑀢𑁆𑀯𑀸 𑀅𑀪𑀺𑀫𑀗𑁆𑀕𑀮𑀕𑀢𑀸𑀦𑀺 𑀭𑀽𑀧𑀸𑀦𑀺 𑀧𑀲𑁆𑀲𑀦𑁆𑀢𑀺 𑁋 𑀘𑀸𑀝𑀓𑀲𑀓𑀼𑀡𑀁 [𑀯𑀸𑀢𑀲𑀓𑀼𑀡𑀁 (𑀲𑁆𑀬𑀸.), 𑀘𑀸𑀧𑀲𑀓𑀼𑀡𑀁 (𑀓.)] 𑀧𑀲𑁆𑀲𑀦𑁆𑀢𑀺, 𑀨𑀼𑀲𑁆𑀲𑀯𑁂𑀴𑀼𑀯𑀮𑀝𑁆𑀞𑀺𑀁 𑀧𑀲𑁆𑀲𑀦𑁆𑀢𑀺, 𑀕𑀩𑁆𑀪𑀺𑀦𑀺𑀢𑁆𑀣𑀺𑀁 𑀧𑀲𑁆𑀲𑀦𑁆𑀢𑀺, 𑀓𑀼𑀫𑀸𑀭𑀓𑀁 𑀔𑀦𑁆𑀥𑁂 𑀆𑀭𑁄𑀧𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀁 𑀧𑀲𑁆𑀲𑀦𑁆𑀢𑀺, 𑀧𑀼𑀡𑁆𑀡𑀖𑀝𑀁 𑀧𑀲𑁆𑀲𑀦𑁆𑀢𑀺, 𑀭𑁄𑀳𑀺𑀢𑀫𑀘𑁆𑀙𑀁 𑀧𑀲𑁆𑀲𑀦𑁆𑀢𑀺, 𑀆𑀚𑀜𑁆𑀜𑀁 𑀧𑀲𑁆𑀲𑀦𑁆𑀢𑀺, 𑀆𑀚𑀜𑁆𑀜𑀭𑀣𑀁 𑀧𑀲𑁆𑀲𑀦𑁆𑀢𑀺, 𑀉𑀲𑀪𑀁 𑀧𑀲𑁆𑀲𑀦𑁆𑀢𑀺, 𑀕𑁄𑀓𑀧𑀺𑀮𑀁 𑀧𑀲𑁆𑀲𑀦𑁆𑀢𑀺. 𑀏𑀯𑀭𑀽𑀧𑀸𑀦𑀁 𑀭𑀽𑀧𑀸𑀦𑀁 𑀤𑀲𑁆𑀲𑀦𑀁 𑀫𑀗𑁆𑀕𑀮𑀁 𑀧𑀘𑁆𑀘𑁂𑀦𑁆𑀢𑀺. 𑀓𑀢𑀫𑁂𑀲𑀁 𑀭𑀽𑀧𑀸𑀦𑀁 𑀤𑀲𑁆𑀲𑀦𑀁 𑀅𑀫𑀗𑁆𑀕𑀮𑀁 𑀧𑀘𑁆𑀘𑁂𑀦𑁆𑀢𑀺? 𑀧𑀮𑀸𑀮𑀧𑀼𑀜𑁆𑀚𑀁 𑀧𑀲𑁆𑀲𑀦𑁆𑀢𑀺, 𑀢𑀓𑁆𑀓𑀖𑀝𑀁 𑀧𑀲𑁆𑀲𑀦𑁆𑀢𑀺, 𑀭𑀺𑀢𑁆𑀢𑀖𑀝𑀁 𑀧𑀲𑁆𑀲𑀦𑁆𑀢𑀺, 𑀦𑀝𑀁 𑀧𑀲𑁆𑀲𑀦𑁆𑀢𑀺, 𑀦𑀕𑁆𑀕𑀲𑀫𑀡𑀓𑀁 𑀧𑀲𑁆𑀲𑀦𑁆𑀢𑀺, 𑀔𑀭𑀁 𑀧𑀲𑁆𑀲𑀦𑁆𑀢𑀺, 𑀔𑀭𑀬𑀸𑀦𑀁 𑀧𑀲𑁆𑀲𑀦𑁆𑀢𑀺, 𑀏𑀓𑀬𑀼𑀢𑁆𑀢𑀬𑀸𑀦𑀁 𑀧𑀲𑁆𑀲𑀦𑁆𑀢𑀺, 𑀓𑀸𑀡𑀁 𑀧𑀲𑁆𑀲𑀦𑁆𑀢𑀺, 𑀓𑀼𑀡𑀺𑀁 𑀧𑀲𑁆𑀲𑀦𑁆𑀢𑀺, 𑀔𑀜𑁆𑀚𑀁 𑀧𑀲𑁆𑀲𑀦𑁆𑀢𑀺, 𑀧𑀓𑁆𑀔𑀳𑀢𑀁 [𑀧𑀓𑁆𑀔𑀧𑀸𑀤𑀁 (𑀓.)] 𑀧𑀲𑁆𑀲𑀦𑁆𑀢𑀺, 𑀚𑀺𑀡𑁆𑀡𑀓𑀁 𑀧𑀲𑁆𑀲𑀦𑁆𑀢𑀺, 𑀩𑁆𑀬𑀸𑀥𑀺𑀓𑀁 [𑀩𑁆𑀬𑀸𑀥𑀺𑀢𑀁 (𑀲𑀻.)] 𑀧𑀲𑁆𑀲𑀦𑁆𑀢𑀺. 𑀏𑀯𑀭𑀽𑀧𑀸𑀦𑀁 𑀭𑀽𑀧𑀸𑀦𑀁 𑀤𑀲𑁆𑀲𑀦𑀁 𑀅𑀫𑀗𑁆𑀕𑀮𑀁 𑀧𑀘𑁆𑀘𑁂𑀦𑁆𑀢𑀺. 𑀇𑀫𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀤𑀺𑀝𑁆𑀞𑀺𑀲𑀼𑀤𑁆𑀥𑀺𑀓𑀸. 𑀢𑁂 𑀤𑀺𑀝𑁆𑀞𑁂𑀦 𑀲𑀼𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀁 𑀧𑀭𑀺𑀲𑀼𑀤𑁆𑀥𑀺𑀁 𑀫𑀼𑀢𑁆𑀢𑀺𑀁 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀫𑀼𑀢𑁆𑀢𑀺𑀁 𑀧𑀘𑁆𑀘𑁂𑀦𑁆𑀢𑀺.

𑀲𑀦𑁆𑀢𑁂𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀼𑀢𑀲𑀼𑀤𑁆𑀥𑀺𑀓𑀸. 𑀢𑁂 𑀏𑀓𑀘𑁆𑀘𑀸𑀦𑀁 𑀲𑀤𑁆𑀤𑀸𑀦𑀁 𑀲𑀯𑀦𑀁 𑀫𑀗𑁆𑀕𑀮𑀁 𑀧𑀘𑁆𑀘𑁂𑀦𑁆𑀢𑀺, 𑀏𑀓𑀘𑁆𑀘𑀸𑀦𑀁 𑀲𑀤𑁆𑀤𑀸𑀦𑀁 𑀲𑀯𑀦𑀁 𑀅𑀫𑀗𑁆𑀕𑀮𑀁 𑀧𑀘𑁆𑀘𑁂𑀦𑁆𑀢𑀺. 𑀓𑀢𑀫𑁂𑀲𑀁 𑀲𑀤𑁆𑀤𑀸𑀦𑀁 𑀲𑀯𑀦𑀁 𑀫𑀗𑁆𑀕𑀮𑀁 𑀧𑀘𑁆𑀘𑁂𑀦𑁆𑀢𑀺? 𑀢𑁂 𑀓𑀸𑀮𑀢𑁄 𑀯𑀼𑀝𑁆𑀞𑀳𑀺𑀢𑁆𑀯𑀸 𑀅𑀪𑀺𑀫𑀗𑁆𑀕𑀮𑀕𑀢𑀸𑀦𑀺 𑀲𑀤𑁆𑀤𑀸𑀦𑀺 𑀲𑀼𑀡𑀦𑁆𑀢𑀺 𑁋 𑀯𑀟𑁆𑀠𑀸𑀢𑀺 𑀯𑀸 𑀯𑀟𑁆𑀠𑀫𑀸𑀦𑀸𑀢𑀺 𑀯𑀸 𑀧𑀼𑀡𑁆𑀡𑀸𑀢𑀺 𑀯𑀸 𑀨𑀼𑀲𑁆𑀲𑀸𑀢𑀺 𑀯𑀸 𑀅𑀲𑁄𑀓𑀸𑀢𑀺 𑀯𑀸 𑀲𑀼𑀫𑀦𑀸𑀢𑀺 𑀯𑀸 𑀲𑀼𑀦𑀓𑁆𑀔𑀢𑁆𑀢𑀸𑀢𑀺 𑀯𑀸 𑀲𑀼𑀫𑀗𑁆𑀕𑀮𑀸𑀢𑀺 𑀯𑀸 𑀲𑀺𑀭𑀻𑀢𑀺 𑀯𑀸 𑀲𑀺𑀭𑀻𑀯𑀟𑁆𑀠𑀸𑀢𑀺 𑀯𑀸. 𑀏𑀯𑀭𑀽𑀧𑀸𑀦𑀁 𑀲𑀤𑁆𑀤𑀸𑀦𑀁 𑀲𑀯𑀦𑀁 𑀫𑀗𑁆𑀕𑀮𑀁 𑀧𑀘𑁆𑀘𑁂𑀦𑁆𑀢𑀺. 𑀓𑀢𑀫𑁂𑀲𑀁 𑀲𑀤𑁆𑀤𑀸𑀦𑀁 𑀲𑀯𑀦𑀁 𑀅𑀫𑀗𑁆𑀕𑀮𑀁 𑀧𑀘𑁆𑀘𑁂𑀦𑁆𑀢𑀺? 𑀓𑀸𑀡𑁄𑀢𑀺 𑀯𑀸 𑀓𑀼𑀡𑀻𑀢𑀺 𑀯𑀸 𑀔𑀜𑁆𑀚𑁄𑀢𑀺 𑀯𑀸 𑀧𑀓𑁆𑀔𑀳𑀢𑁄𑀢𑀺 𑀯𑀸 𑀚𑀺𑀡𑁆𑀡𑀓𑁄𑀢𑀺 𑀯𑀸 𑀩𑁆𑀬𑀸𑀥𑀺𑀓𑁄𑀢𑀺 𑀯𑀸 𑀫𑀢𑁄𑀢𑀺 𑀯𑀸 𑀙𑀺𑀦𑁆𑀤𑀦𑁆𑀢𑀺 𑀯𑀸 𑀪𑀺𑀦𑁆𑀤𑀦𑁆𑀢𑀺 𑀯𑀸 𑀤𑀟𑁆𑀠𑀦𑁆𑀢𑀺 𑀯𑀸 𑀦𑀝𑁆𑀞𑀦𑁆𑀢𑀺 𑀯𑀸 𑀦𑀢𑁆𑀣𑀻𑀢𑀺 𑀯𑀸. 𑀏𑀯𑀭𑀽𑀧𑀸𑀦𑀁 𑀲𑀤𑁆𑀤𑀸𑀦𑀁 𑀲𑀯𑀦𑀁 𑀅𑀫𑀗𑁆𑀕𑀮𑀁 𑀧𑀘𑁆𑀘𑁂𑀦𑁆𑀢𑀺. 𑀇𑀫𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀼𑀢𑀲𑀼𑀤𑁆𑀥𑀺𑀓𑀸. 𑀢𑁂 𑀲𑀼𑀢𑁂𑀦 𑀲𑀼𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀁 𑀧𑀭𑀺𑀲𑀼𑀤𑁆𑀥𑀺𑀁 𑀫𑀼𑀢𑁆𑀢𑀺𑀁 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀫𑀼𑀢𑁆𑀢𑀺𑀁 𑀧𑀘𑁆𑀘𑁂𑀦𑁆𑀢𑀺.

𑀲𑀦𑁆𑀢𑁂𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀻𑀮𑀲𑀼𑀤𑁆𑀥𑀺𑀓𑀸. 𑀢𑁂 𑀲𑀻𑀮𑀫𑀢𑁆𑀢𑁂𑀦 𑀲𑀁𑀬𑀫𑀫𑀢𑁆𑀢𑁂𑀦 𑀲𑀁𑀯𑀭𑀫𑀢𑁆𑀢𑁂𑀦 𑀅𑀯𑀻𑀢𑀺𑀓𑁆𑀓𑀫𑀫𑀢𑁆𑀢𑁂𑀦 𑀲𑀼𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀁 𑀧𑀭𑀺𑀲𑀼𑀤𑁆𑀥𑀺𑀁 𑀫𑀼𑀢𑁆𑀢𑀺𑀁 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀫𑀼𑀢𑁆𑀢𑀺𑀁 𑀧𑀘𑁆𑀘𑁂𑀦𑁆𑀢𑀺. 𑀲𑀫𑀡𑁄𑀫𑀼𑀡𑁆𑀟𑀺𑀓𑀸𑀧𑀼𑀢𑁆𑀢𑁄 [𑀲𑀫𑀡𑁄 𑀫𑀡𑁆𑀟𑀺𑀓𑀸𑀧𑀼𑀢𑁆𑀢𑁄 (𑀲𑀻.), 𑀲𑀫𑀡𑀫𑀼𑀡𑁆𑀟𑀺𑀓𑀸𑀧𑀼𑀢𑁆𑀢𑁄 (𑀲𑁆𑀬𑀸.)] 𑀏𑀯𑀫𑀸𑀳 𑁋 ‘‘𑀘𑀢𑀽𑀳𑀺 𑀔𑁄 𑀅𑀳𑀁, 𑀕𑀳𑀧𑀢𑀺 [𑀣𑀧𑀢𑀺 (𑀲𑀻. 𑀲𑁆𑀬𑀸.) 𑀏𑀯𑀫𑀼𑀧𑀭𑀺𑀧𑀺], 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀧𑀼𑀭𑀺𑀲𑀧𑀼𑀕𑁆𑀕𑀮𑀁 𑀧𑀜𑁆𑀜𑀸𑀧𑁂𑀫𑀺 𑀲𑀫𑁆𑀧𑀦𑁆𑀦𑀓𑀼𑀲𑀮𑀁 𑀧𑀭𑀫𑀓𑀼𑀲𑀮𑀁 𑀉𑀢𑁆𑀢𑀫𑀧𑀢𑁆𑀢𑀺𑀧𑁆𑀧𑀢𑁆𑀢𑀁 𑀲𑀫𑀡𑀁 𑀅𑀬𑁄𑀚𑁆𑀚𑀁. 𑀓𑀢𑀫𑁂𑀳𑀺 𑀘𑀢𑀽𑀳𑀺? 𑀇𑀥, 𑀕𑀳𑀧𑀢𑀺, 𑀦 𑀓𑀸𑀬𑁂𑀦 𑀧𑀸𑀧𑀓𑀁 𑀓𑀫𑁆𑀫𑀁 𑀓𑀭𑁄𑀢𑀺, 𑀦 𑀧𑀸𑀧𑀓𑀁 𑀯𑀸𑀘𑀁 𑀪𑀸𑀲𑀢𑀺, 𑀦 𑀧𑀸𑀧𑀓𑀁 𑀲𑀗𑁆𑀓𑀧𑁆𑀧𑀁 𑀲𑀗𑁆𑀓𑀧𑁆𑀧𑀢𑀺, 𑀦 𑀧𑀸𑀧𑀓𑀁 𑀆𑀚𑀻𑀯𑀁 𑀆𑀚𑀻𑀯𑀢𑀺. 𑀇𑀫𑁂𑀳𑀺 𑀔𑁄 𑀅𑀳𑀁, 𑀕𑀳𑀧𑀢𑀺, 𑀘𑀢𑀽𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀧𑀼𑀭𑀺𑀲𑀧𑀼𑀕𑁆𑀕𑀮𑀁 𑀧𑀜𑁆𑀜𑀸𑀧𑁂𑀫𑀺 𑀲𑀫𑁆𑀧𑀦𑁆𑀦𑀓𑀼𑀲𑀮𑀁 𑀧𑀭𑀫𑀓𑀼𑀲𑀮𑀁 𑀉𑀢𑁆𑀢𑀫𑀧𑀢𑁆𑀢𑀺𑀧𑁆𑀧𑀢𑁆𑀢𑀁 𑀲𑀫𑀡𑀁 𑀅𑀬𑁄𑀚𑁆𑀚𑀁’’. 𑀏𑀯𑀫𑁂𑀯 𑀲𑀦𑁆𑀢𑁂𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀻𑀮𑀲𑀼𑀤𑁆𑀥𑀺𑀓𑀸, 𑀢𑁂 𑀲𑀻𑀮𑀫𑀢𑁆𑀢𑁂𑀦 𑀲𑀁𑀬𑀫𑀫𑀢𑁆𑀢𑁂𑀦 𑀲𑀁𑀯𑀭𑀫𑀢𑁆𑀢𑁂𑀦 𑀅𑀯𑀻𑀢𑀺𑀓𑁆𑀓𑀫𑀫𑀢𑁆𑀢𑁂𑀦 𑀲𑀼𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀁 𑀧𑀭𑀺𑀲𑀼𑀤𑁆𑀥𑀺𑀁 𑀫𑀼𑀢𑁆𑀢𑀺𑀁 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀫𑀼𑀢𑁆𑀢𑀺𑀁 𑀧𑀘𑁆𑀘𑁂𑀦𑁆𑀢𑀺.

𑀲𑀦𑁆𑀢𑁂𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀯𑀢𑀲𑀼𑀤𑁆𑀥𑀺𑀓𑀸. 𑀢𑁂 𑀳𑀢𑁆𑀣𑀺𑀯𑀢𑀺𑀓𑀸 𑀯𑀸 𑀳𑁄𑀦𑁆𑀢𑀺, 𑀅𑀲𑁆𑀲𑀯𑀢𑀺𑀓𑀸 𑀯𑀸 𑀳𑁄𑀦𑁆𑀢𑀺, 𑀕𑁄𑀯𑀢𑀺𑀓𑀸 𑀯𑀸 𑀳𑁄𑀦𑁆𑀢𑀺, 𑀓𑀼𑀓𑁆𑀓𑀼𑀭𑀯𑀢𑀺𑀓𑀸 𑀯𑀸 𑀳𑁄𑀦𑁆𑀢𑀺, 𑀓𑀸𑀓𑀯𑀢𑀺𑀓𑀸 𑀯𑀸 𑀳𑁄𑀦𑁆𑀢𑀺, 𑀯𑀸𑀲𑀼𑀤𑁂𑀯𑀯𑀢𑀺𑀓𑀸 𑀯𑀸 𑀳𑁄𑀦𑁆𑀢𑀺, 𑀩𑀮𑀤𑁂𑀯𑀯𑀢𑀺𑀓𑀸 𑀯𑀸 𑀳𑁄𑀦𑁆𑀢𑀺, 𑀧𑀼𑀡𑁆𑀡𑀪𑀤𑁆𑀤𑀯𑀢𑀺𑀓𑀸 𑀯𑀸 𑀳𑁄𑀦𑁆𑀢𑀺, 𑀫𑀡𑀺𑀪𑀤𑁆𑀤𑀯𑀢𑀺𑀓𑀸 𑀯𑀸 𑀳𑁄𑀦𑁆𑀢𑀺, 𑀅𑀕𑁆𑀕𑀺𑀯𑀢𑀺𑀓𑀸 𑀯𑀸 𑀳𑁄𑀦𑁆𑀢𑀺, 𑀦𑀸𑀕𑀯𑀢𑀺𑀓𑀸 𑀯𑀸 𑀳𑁄𑀦𑁆𑀢𑀺, 𑀲𑀼𑀧𑀡𑁆𑀡𑀯𑀢𑀺𑀓𑀸 𑀯𑀸 𑀳𑁄𑀦𑁆𑀢𑀺, 𑀬𑀓𑁆𑀔𑀯𑀢𑀺𑀓𑀸 𑀯𑀸 𑀳𑁄𑀦𑁆𑀢𑀺, 𑀅𑀲𑀼𑀭𑀯𑀢𑀺𑀓𑀸 𑀯𑀸 𑀳𑁄𑀦𑁆𑀢𑀺, 𑀕𑀦𑁆𑀥𑀩𑁆𑀩𑀯𑀢𑀺𑀓𑀸 𑀯𑀸 𑀳𑁄𑀦𑁆𑀢𑀺, 𑀫𑀳𑀸𑀭𑀸𑀚𑀯𑀢𑀺𑀓𑀸 𑀯𑀸 𑀳𑁄𑀦𑁆𑀢𑀺, 𑀘𑀦𑁆𑀤𑀯𑀢𑀺𑀓𑀸 𑀯𑀸 𑀳𑁄𑀦𑁆𑀢𑀺, 𑀲𑀽𑀭𑀺𑀬𑀯𑀢𑀺𑀓𑀸 𑀯𑀸 𑀳𑁄𑀦𑁆𑀢𑀺, 𑀇𑀦𑁆𑀤𑀯𑀢𑀺𑀓𑀸 𑀯𑀸 𑀳𑁄𑀦𑁆𑀢𑀺, 𑀩𑁆𑀭𑀳𑁆𑀫𑀯𑀢𑀺𑀓𑀸 𑀯𑀸 𑀳𑁄𑀦𑁆𑀢𑀺, 𑀤𑁂𑀯𑀯𑀢𑀺𑀓𑀸 𑀯𑀸 𑀳𑁄𑀦𑁆𑀢𑀺, 𑀤𑀺𑀲𑀸𑀯𑀢𑀺𑀓𑀸 𑀯𑀸 𑀳𑁄𑀦𑁆𑀢𑀺. 𑀇𑀫𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀯𑀢𑀲𑀼𑀤𑁆𑀥𑀺𑀓𑀸. 𑀢𑁂 𑀯𑀢𑁂𑀦 𑀲𑀼𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀁 𑀧𑀭𑀺𑀲𑀼𑀤𑁆𑀥𑀺𑀁 𑀫𑀼𑀢𑁆𑀢𑀺𑀁 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀫𑀼𑀢𑁆𑀢𑀺𑀁 𑀧𑀘𑁆𑀘𑁂𑀦𑁆𑀢𑀺.

𑀲𑀦𑁆𑀢𑁂𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀫𑀼𑀢𑀲𑀼𑀤𑁆𑀥𑀺𑀓𑀸. 𑀢𑁂 𑀓𑀸𑀮𑀢𑁄 𑀉𑀝𑁆𑀞𑀳𑀺𑀢𑁆𑀯𑀸 𑀧𑀣𑀯𑀺𑀁 𑀆𑀫𑀲𑀦𑁆𑀢𑀺, 𑀳𑀭𑀺𑀢𑀁 𑀆𑀫𑀲𑀦𑁆𑀢𑀺, 𑀕𑁄𑀫𑀬𑀁 𑀆𑀫𑀲𑀦𑁆𑀢𑀺, 𑀓𑀘𑁆𑀙𑀧𑀁 𑀆𑀫𑀲𑀦𑁆𑀢𑀺, 𑀨𑀸𑀮𑀁 𑀅𑀓𑁆𑀓𑀫𑀦𑁆𑀢𑀺, 𑀢𑀺𑀮𑀯𑀸𑀳𑀁 𑀆𑀫𑀲𑀦𑁆𑀢𑀺, 𑀨𑀼𑀲𑁆𑀲𑀢𑀺𑀮𑀁 𑀔𑀸𑀤𑀦𑁆𑀢𑀺, 𑀨𑀼𑀲𑁆𑀲𑀢𑁂𑀮𑀁 𑀫𑀓𑁆𑀔𑁂𑀦𑁆𑀢𑀺, 𑀨𑀼𑀲𑁆𑀲𑀤𑀦𑁆𑀢𑀓𑀝𑁆𑀞𑀁 𑀔𑀸𑀤𑀦𑁆𑀢𑀺, 𑀨𑀼𑀲𑁆𑀲𑀫𑀢𑁆𑀢𑀺𑀓𑀸𑀬 𑀦𑁆𑀳𑀸𑀬𑀦𑁆𑀢𑀺, 𑀨𑀼𑀲𑁆𑀲𑀲𑀸𑀝𑀓𑀁 𑀦𑀺𑀯𑀸𑀲𑁂𑀦𑁆𑀢𑀺, 𑀨𑀼𑀲𑁆𑀲𑀯𑁂𑀞𑀦𑀁 𑀯𑁂𑀞𑁂𑀦𑁆𑀢𑀺. 𑀇𑀫𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀫𑀼𑀢𑀲𑀼𑀤𑁆𑀥𑀺𑀓𑀸. 𑀢𑁂 𑀫𑀼𑀢𑁂𑀦 𑀲𑀼𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀁 𑀧𑀭𑀺𑀲𑀼𑀤𑁆𑀥𑀺𑀁 𑀫𑀼𑀢𑁆𑀢𑀺𑀁 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀫𑀼𑀢𑁆𑀢𑀺𑀁 𑀧𑀘𑁆𑀘𑁂𑀦𑁆𑀢𑀺. 𑀦 𑀩𑁆𑀭𑀸𑀳𑁆𑀫𑀡𑁄 𑀅𑀜𑁆𑀜𑀢𑁄 𑀲𑀼𑀤𑁆𑀥𑀺𑀫𑀸𑀳.

𑀤𑀺𑀝𑁆𑀞𑁂 𑀲𑀼𑀢𑁂 𑀲𑀻𑀮𑀯𑀢𑁂 𑀫𑀼𑀢𑁂 𑀯𑀸𑀢𑀺. 𑀩𑁆𑀭𑀸𑀳𑁆𑀫𑀡𑁄 𑀤𑀺𑀝𑁆𑀞𑀲𑀼𑀤𑁆𑀥𑀺𑀬𑀸𑀧𑀺 𑀲𑀼𑀤𑁆𑀥𑀺𑀁 𑀦𑀸𑀳, 𑀲𑀼𑀢𑀲𑀼𑀤𑁆𑀥𑀺𑀬𑀸𑀧𑀺 𑀲𑀼𑀤𑁆𑀥𑀺𑀁 𑀦𑀸𑀳, 𑀲𑀻𑀮𑀲𑀼𑀤𑁆𑀥𑀺𑀬𑀸𑀧𑀺 𑀲𑀼𑀤𑁆𑀥𑀺𑀁 𑀦𑀸𑀳, 𑀯𑀢𑀲𑀼𑀤𑁆𑀥𑀺𑀬𑀸𑀧𑀺 𑀲𑀼𑀤𑁆𑀥𑀺𑀁 𑀦𑀸𑀳, 𑀫𑀼𑀢𑀲𑀼𑀤𑁆𑀥𑀺𑀬𑀸𑀧𑀺 𑀲𑀼𑀤𑁆𑀥𑀺𑀁 𑀦𑀸𑀳 𑀦 𑀓𑀣𑁂𑀢𑀺 𑀦 𑀪𑀡𑀢𑀺 𑀦 𑀤𑀻𑀧𑀬𑀢𑀺 𑀦 𑀯𑁄𑀳𑀭𑀢𑀻𑀢𑀺 𑁋 𑀦 𑀩𑁆𑀭𑀸𑀳𑁆𑀫𑀡𑁄 𑀅𑀜𑁆𑀜𑀢𑁄 𑀲𑀼𑀤𑁆𑀥𑀺𑀫𑀸𑀳 𑀤𑀺𑀝𑁆𑀞𑁂 𑀲𑀼𑀢𑁂 𑀲𑀻𑀮𑀯𑀢𑁂 𑀫𑀼𑀢𑁂 𑀯𑀸.

𑀧𑀼𑀜𑁆𑀜𑁂 𑀘 𑀧𑀸𑀧𑁂 𑀘 𑀅𑀦𑀽𑀧𑀮𑀺𑀢𑁆𑀢𑁄𑀢𑀺. 𑀧𑀼𑀜𑁆𑀜𑀁 𑀯𑀼𑀘𑁆𑀘𑀢𑀺 𑀬𑀁 𑀓𑀺𑀜𑁆𑀘𑀺 𑀢𑁂𑀥𑀸𑀢𑀼𑀓𑀁 𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀁, 𑀅𑀧𑀼𑀜𑁆𑀜𑀁 𑀯𑀼𑀘𑁆𑀘𑀢𑀺 𑀲𑀩𑁆𑀩𑀁 𑀅𑀓𑀼𑀲𑀮𑀁. 𑀬𑀢𑁄 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀘 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀘 𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑁄 𑀘 𑀧𑀳𑀻𑀦𑀸 𑀳𑁄𑀦𑁆𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸; 𑀏𑀢𑁆𑀢𑀸𑀯𑀢𑀸 𑀧𑀼𑀜𑁆𑀜𑁂 𑀘 𑀧𑀸𑀧𑁂 𑀘 𑀦 𑀮𑀺𑀫𑁆𑀧𑀢𑀺 𑀦 𑀧𑀮𑀺𑀫𑁆𑀧𑀢𑀺 𑀦 𑀉𑀧𑀮𑀺𑀫𑁆𑀧𑀢𑀺 𑀅𑀮𑀺𑀢𑁆𑀢𑁄 𑀅𑀧𑀮𑀺𑀢𑁆𑀢𑁄 𑀅𑀦𑀽𑀧𑀮𑀺𑀢𑁆𑀢𑁄 𑀦𑀺𑀓𑁆𑀔𑀦𑁆𑀢𑁄 𑀦𑀺𑀲𑁆𑀲𑀝𑁄 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀻𑀢𑀺 𑁋 𑀧𑀼𑀜𑁆𑀜𑁂 𑀘 𑀧𑀸𑀧𑁂 𑀘 𑀅𑀦𑀽𑀧𑀮𑀺𑀢𑁆𑀢𑁄.

𑀅𑀢𑁆𑀢𑀜𑁆𑀚𑀳𑁄 𑀦𑀬𑀺𑀥 𑀧𑀓𑀼𑀩𑁆𑀩𑀫𑀸𑀦𑁄𑀢𑀺. 𑀅𑀢𑁆𑀢𑀜𑁆𑀚𑀳𑁄𑀢𑀺 𑀅𑀢𑁆𑀢𑀤𑀺𑀝𑁆𑀞𑀺𑀚𑀳𑁄. 𑀅𑀢𑁆𑀢𑀜𑁆𑀚𑀳𑁄𑀢𑀺 𑀕𑀸𑀳𑀁 𑀚𑀳𑁄 [𑀕𑀸𑀳𑀚𑀳𑁄 (𑀲𑀻. 𑀲𑁆𑀬𑀸.), 𑀅𑀢𑁆𑀢𑀕𑀸𑀳𑀁 𑀚𑀳𑁄 (𑀓.)]. 𑀅𑀢𑁆𑀢𑀜𑁆𑀚𑀳𑁄𑀢𑀺 𑀢𑀡𑁆𑀳𑀸𑀯𑀲𑁂𑀦 𑀤𑀺𑀝𑁆𑀞𑀺𑀯𑀲𑁂𑀦 𑀕𑀳𑀺𑀢𑀁 𑀧𑀭𑀸𑀫𑀝𑁆𑀞𑀁 𑀅𑀪𑀺𑀦𑀺𑀯𑀺𑀝𑁆𑀞𑀁 𑀅𑀚𑁆𑀛𑁄𑀲𑀺𑀢𑀁 𑀅𑀥𑀺𑀫𑀼𑀢𑁆𑀢𑀁, 𑀲𑀩𑁆𑀩𑀁 𑀢𑀁 𑀘𑀢𑁆𑀢𑀁 𑀳𑁄𑀢𑀺 𑀯𑀦𑁆𑀢𑀁 𑀫𑀼𑀢𑁆𑀢𑀁 𑀧𑀳𑀻𑀦𑀁 𑀧𑀝𑀺𑀦𑀺𑀲𑁆𑀲𑀝𑁆𑀞𑀁. 𑀦𑀬𑀺𑀥 𑀧𑀓𑀼𑀩𑁆𑀩𑀫𑀸𑀦𑁄𑀢𑀺 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀁 𑀯𑀸 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀁 𑀯𑀸 𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑀁 𑀯𑀸 𑀅𑀧𑀓𑀼𑀩𑁆𑀩𑀫𑀸𑀦𑁄 𑀅𑀚𑀦𑀬𑀫𑀸𑀦𑁄 𑀅𑀲𑀜𑁆𑀚𑀦𑀬𑀫𑀸𑀦𑁄 𑀅𑀦𑀺𑀩𑁆𑀩𑀢𑁆𑀢𑀬𑀫𑀸𑀦𑁄 𑀅𑀦𑀪𑀺𑀦𑀺𑀩𑁆𑀩𑀢𑁆𑀢𑀬𑀫𑀸𑀦𑁄𑀢𑀺 𑁋 𑀅𑀢𑁆𑀢𑀜𑁆𑀚𑀳𑁄 𑀦𑀬𑀺𑀥 𑀧𑀓𑀼𑀩𑁆𑀩𑀫𑀸𑀦𑁄.

𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀦 𑀩𑁆𑀭𑀸𑀳𑁆𑀫𑀡𑁄 𑀅𑀜𑁆𑀜𑀢𑁄 𑀲𑀼𑀤𑁆𑀥𑀺𑀫𑀸𑀳, 𑀤𑀺𑀝𑁆𑀞𑁂 𑀲𑀼𑀢𑁂 𑀲𑀻𑀮𑀯𑀢𑁂 𑀫𑀼𑀢𑁂 𑀯𑀸;

𑀧𑀼𑀜𑁆𑀜𑁂 𑀘 𑀧𑀸𑀧𑁂 𑀘 𑀅𑀦𑀽𑀧𑀮𑀺𑀢𑁆𑀢𑁄, 𑀅𑀢𑁆𑀢𑀜𑁆𑀚𑀳𑁄 𑀦𑀬𑀺𑀥 𑀧𑀓𑀼𑀩𑁆𑀩𑀫𑀸𑀦𑁄’’𑀢𑀺.

𑁨𑁬. 𑀧𑀼𑀭𑀺𑀫𑀁 𑀧𑀳𑀸𑀬 𑀅𑀧𑀭𑀁 𑀲𑀺𑀢𑀸𑀲𑁂,𑀏𑀚𑀸𑀦𑀼𑀕𑀸 𑀢𑁂 𑀦 𑀢𑀭𑀦𑁆𑀢𑀺 𑀲𑀗𑁆𑀕𑀁;

𑀢𑁂 𑀉𑀕𑁆𑀕𑀳𑀸𑀬𑀦𑁆𑀢𑀺 𑀦𑀺𑀭𑀲𑁆𑀲𑀚𑀦𑁆𑀢𑀺, 𑀓𑀧𑀻𑀯 𑀲𑀸𑀔𑀁 𑀧𑀫𑀼𑀜𑁆𑀘𑀁 [𑀧𑀫𑀼𑀔𑀁 (𑀲𑀻. 𑀲𑁆𑀬𑀸.)] 𑀕𑀳𑀸𑀬.

𑀧𑀼𑀭𑀺𑀫𑀁 𑀧𑀳𑀸𑀬 𑀅𑀧𑀭𑀁 𑀲𑀺𑀢𑀸𑀲𑁂𑀢𑀺. 𑀧𑀼𑀭𑀺𑀫𑀁 𑀲𑀢𑁆𑀣𑀸𑀭𑀁 𑀧𑀳𑀸𑀬 𑀧𑀭𑀁 𑀲𑀢𑁆𑀣𑀸𑀭𑀁 𑀦𑀺𑀲𑁆𑀲𑀺𑀢𑀸; 𑀧𑀼𑀭𑀺𑀫𑀁 𑀥𑀫𑁆𑀫𑀓𑁆𑀔𑀸𑀦𑀁 𑀧𑀳𑀸𑀬 𑀅𑀧𑀭𑀁 𑀥𑀫𑁆𑀫𑀓𑁆𑀔𑀸𑀦𑀁 𑀦𑀺𑀲𑁆𑀲𑀺𑀢𑀸; 𑀧𑀼𑀭𑀺𑀫𑀁 𑀕𑀡𑀁 𑀧𑀳𑀸𑀬 𑀅𑀧𑀭𑀁 𑀕𑀡𑀁 𑀦𑀺𑀲𑁆𑀲𑀺𑀢𑀸; 𑀧𑀼𑀭𑀺𑀫𑀁 𑀤𑀺𑀝𑁆𑀞𑀺𑀁 𑀧𑀳𑀸𑀬 𑀅𑀧𑀭𑀁 𑀤𑀺𑀝𑁆𑀞𑀺𑀁 𑀦𑀺𑀲𑁆𑀲𑀺𑀢𑀸; 𑀧𑀼𑀭𑀺𑀫𑀁 𑀧𑀝𑀺𑀧𑀤𑀁 𑀧𑀳𑀸𑀬 𑀅𑀧𑀭𑀁 𑀧𑀝𑀺𑀧𑀤𑀁 𑀦𑀺𑀲𑁆𑀲𑀺𑀢𑀸; 𑀧𑀼𑀭𑀺𑀫𑀁 𑀫𑀕𑁆𑀕𑀁 𑀧𑀳𑀸𑀬 𑀅𑀧𑀭𑀁 𑀫𑀕𑁆𑀕𑀁 𑀦𑀺𑀲𑁆𑀲𑀺𑀢𑀸 𑀲𑀦𑁆𑀦𑀺𑀲𑁆𑀲𑀺𑀢𑀸 𑀅𑀮𑁆𑀮𑀻𑀦𑀸 𑀉𑀧𑀕𑀢𑀸 𑀅𑀚𑁆𑀛𑁄𑀲𑀺𑀢𑀸 𑀅𑀥𑀺𑀫𑀼𑀢𑁆𑀢𑀸𑀢𑀺 𑁋 𑀧𑀼𑀭𑀺𑀫𑀁 𑀧𑀳𑀸𑀬 𑀅𑀧𑀭𑀁 𑀲𑀺𑀢𑀸𑀲𑁂.

𑀏𑀚𑀸𑀦𑀼𑀕𑀸 𑀢𑁂 𑀦 𑀢𑀭𑀦𑁆𑀢𑀺 𑀲𑀗𑁆𑀕𑀦𑁆𑀢𑀺. 𑀏𑀚𑀸 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸. 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄…𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁. 𑀏𑀚𑀸𑀦𑀼𑀕𑀸𑀢𑀺 𑀏𑀚𑀸𑀦𑀼𑀕𑀸 𑀏𑀚𑀸𑀦𑀼𑀕𑀢𑀸 𑀏𑀚𑀸𑀦𑀼𑀲𑀝𑀸 𑀏𑀚𑀸𑀬 𑀧𑀦𑁆𑀦𑀸 𑀧𑀢𑀺𑀢𑀸 𑀅𑀪𑀺𑀪𑀽𑀢𑀸 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑀸. 𑀢𑁂 𑀦 𑀢𑀭𑀦𑁆𑀢𑀺 𑀲𑀗𑁆𑀕𑀦𑁆𑀢𑀺 𑀭𑀸𑀕𑀲𑀗𑁆𑀕𑀁 𑀤𑁄𑀲𑀲𑀗𑁆𑀕𑀁 𑀫𑁄𑀳𑀲𑀗𑁆𑀕𑀁 𑀫𑀸𑀦𑀲𑀗𑁆𑀕𑀁 𑀤𑀺𑀝𑁆𑀞𑀺𑀲𑀗𑁆𑀕𑀁 𑀓𑀺𑀮𑁂𑀲𑀲𑀗𑁆𑀕𑀁 𑀤𑀼𑀘𑁆𑀘𑀭𑀺𑀢𑀲𑀗𑁆𑀕𑀁 𑀦 𑀢𑀭𑀦𑁆𑀢𑀺 𑀦 𑀉𑀢𑁆𑀢𑀭𑀦𑁆𑀢𑀺 𑀦 𑀧𑀢𑀭𑀦𑁆𑀢𑀺 𑀦 𑀲𑀫𑀢𑀺𑀓𑁆𑀓𑀫𑀦𑁆𑀢𑀺 𑀦 𑀯𑀻𑀢𑀺𑀯𑀢𑁆𑀢𑀦𑁆𑀢𑀻𑀢𑀺 𑁋 𑀏𑀚𑀸𑀦𑀼𑀕𑀸 𑀢𑁂 𑀦 𑀢𑀭𑀦𑁆𑀢𑀺 𑀲𑀗𑁆𑀕𑀁.

𑀢𑁂 𑀉𑀕𑁆𑀕𑀳𑀸𑀬𑀦𑁆𑀢𑀺 𑀦𑀺𑀭𑀲𑁆𑀲𑀚𑀦𑁆𑀢𑀻𑀢𑀺 𑀲𑀢𑁆𑀣𑀸𑀭𑀁 𑀕𑀡𑁆𑀳𑀦𑁆𑀢𑀺, 𑀢𑀁 𑀫𑀼𑀜𑁆𑀘𑀺𑀢𑁆𑀯𑀸 𑀅𑀜𑁆𑀜𑀁 𑀲𑀢𑁆𑀣𑀸𑀭𑀁 𑀕𑀡𑁆𑀳𑀦𑁆𑀢𑀺; 𑀥𑀫𑁆𑀫𑀓𑁆𑀔𑀸𑀦𑀁 𑀕𑀡𑁆𑀳𑀦𑁆𑀢𑀺, 𑀢𑀁 𑀫𑀼𑀜𑁆𑀘𑀺𑀢𑁆𑀯𑀸 𑀅𑀜𑁆𑀜𑀁 𑀥𑀫𑁆𑀫𑀓𑁆𑀔𑀸𑀦𑀁 𑀕𑀡𑁆𑀳𑀦𑁆𑀢𑀺; 𑀕𑀡𑀁 𑀕𑀡𑁆𑀳𑀦𑁆𑀢𑀺, 𑀢𑀁 𑀫𑀼𑀜𑁆𑀘𑀺𑀢𑁆𑀯𑀸 𑀅𑀜𑁆𑀜𑀁 𑀕𑀡𑀁 𑀕𑀡𑁆𑀳𑀦𑁆𑀢𑀺; 𑀤𑀺𑀝𑁆𑀞𑀺𑀁 𑀕𑀡𑁆𑀳𑀦𑁆𑀢𑀺, 𑀢𑀁 𑀫𑀼𑀜𑁆𑀘𑀺𑀢𑁆𑀯𑀸 𑀅𑀜𑁆𑀜𑀁 𑀤𑀺𑀝𑁆𑀞𑀺𑀁 𑀕𑀡𑁆𑀳𑀦𑁆𑀢𑀺; 𑀧𑀝𑀺𑀧𑀤𑀁 𑀕𑀡𑁆𑀳𑀦𑁆𑀢𑀺, 𑀢𑀁 𑀫𑀼𑀜𑁆𑀘𑀺𑀢𑁆𑀯𑀸 𑀅𑀜𑁆𑀜𑀁 𑀧𑀝𑀺𑀧𑀤𑀁 𑀕𑀡𑁆𑀳𑀦𑁆𑀢𑀺; 𑀫𑀕𑁆𑀕𑀁 𑀕𑀡𑁆𑀳𑀦𑁆𑀢𑀺, 𑀢𑀁 𑀫𑀼𑀜𑁆𑀘𑀺𑀢𑁆𑀯𑀸 𑀅𑀜𑁆𑀜𑀁 𑀫𑀕𑁆𑀕𑀁 𑀕𑀡𑁆𑀳𑀦𑁆𑀢𑀺; 𑀕𑀡𑁆𑀳𑀦𑁆𑀢𑀺 𑀘 𑀫𑀼𑀜𑁆𑀘𑀦𑁆𑀢𑀺 𑀘 𑀆𑀤𑀺𑀬𑀦𑁆𑀢𑀺 𑀘 𑀦𑀺𑀭𑀲𑁆𑀲𑀚𑀦𑁆𑀢𑀺 𑀘𑀸𑀢𑀺 𑁋 𑀢𑁂 𑀉𑀕𑁆𑀕𑀳𑀸𑀬𑀦𑁆𑀢𑀺 𑀦𑀺𑀭𑀲𑁆𑀲𑀚𑀦𑁆𑀢𑀺.

𑀓𑀧𑀻𑀯 𑀲𑀸𑀔𑀁 𑀧𑀫𑀼𑀜𑁆𑀘𑀁 𑀕𑀳𑀸𑀬𑀸𑀢𑀺. 𑀬𑀣𑀸 𑀫𑀓𑁆𑀓𑀝𑁄 𑀅𑀭𑀜𑁆𑀜𑁂 𑀧𑀯𑀦𑁂 𑀘𑀭𑀫𑀸𑀦𑁄 𑀲𑀸𑀔𑀁 𑀕𑀡𑁆𑀳𑀸𑀢𑀺, 𑀢𑀁 𑀫𑀼𑀜𑁆𑀘𑀺𑀢𑁆𑀯𑀸 𑀅𑀜𑁆𑀜𑀁 𑀲𑀸𑀔𑀁 𑀕𑀡𑁆𑀳𑀸𑀢𑀺. 𑀏𑀯𑀫𑁂𑀯 𑀧𑀼𑀣𑀼𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀧𑀼𑀣𑀼𑀤𑀺𑀝𑁆𑀞𑀺𑀕𑀢𑀸𑀦𑀺 𑀕𑀡𑁆𑀳𑀦𑁆𑀢𑀺 𑀘 𑀫𑀼𑀜𑁆𑀘𑀦𑁆𑀢𑀺 𑀘 𑀆𑀤𑀺𑀬𑀦𑁆𑀢𑀺 𑀘 𑀦𑀺𑀭𑀲𑁆𑀲𑀚𑀦𑁆𑀢𑀺 𑀘𑀸𑀢𑀺 𑁋 𑀓𑀧𑀻𑀯 𑀲𑀸𑀔𑀁 𑀧𑀫𑀼𑀜𑁆𑀘𑀁 𑀕𑀳𑀸𑀬.

𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀧𑀼𑀭𑀺𑀫𑀁 𑀧𑀳𑀸𑀬 𑀅𑀧𑀭𑀁 𑀲𑀺𑀢𑀸𑀲𑁂, 𑀏𑀚𑀸𑀦𑀼𑀕𑀸 𑀢𑁂 𑀦 𑀢𑀭𑀦𑁆𑀢𑀺 𑀲𑀗𑁆𑀕𑀁;

𑀢𑁂 𑀉𑀕𑁆𑀕𑀳𑀸𑀬𑀦𑁆𑀢𑀺 𑀦𑀺𑀭𑀲𑁆𑀲𑀚𑀦𑁆𑀢𑀺, 𑀓𑀧𑀻𑀯 𑀲𑀸𑀔𑀁 𑀧𑀫𑀼𑀜𑁆𑀘𑀁 𑀕𑀳𑀸𑀬𑀸’’𑀢𑀺.

𑁨𑁭. 𑀲𑀬𑀁 𑀲𑀫𑀸𑀤𑀸𑀬 𑀯𑀢𑀸𑀦𑀺 𑀚𑀦𑁆𑀢𑀼, 𑀉𑀘𑁆𑀘𑀸𑀯𑀘𑀁 𑀕𑀘𑁆𑀙𑀢𑀺 𑀲𑀜𑁆𑀜𑀲𑀢𑁆𑀢𑁄;

𑀯𑀺𑀤𑁆𑀯𑀸 𑀘 𑀯𑁂𑀤𑁂𑀳𑀺 𑀲𑀫𑁂𑀘𑁆𑀘 𑀥𑀫𑁆𑀫𑀁, 𑀦 𑀉𑀘𑁆𑀘𑀸𑀯𑀘𑀁 𑀕𑀘𑁆𑀙𑀢𑀺 𑀪𑀽𑀭𑀺𑀧𑀜𑁆𑀜𑁄.

𑀲𑀬𑀁 𑀲𑀫𑀸𑀤𑀸𑀬 𑀯𑀢𑀸𑀦𑀺 𑀚𑀦𑁆𑀢𑀽𑀢𑀺. 𑀲𑀬𑀁 𑀲𑀫𑀸𑀤𑀸𑀬𑀸𑀢𑀺 𑀲𑀸𑀫𑀁 𑀲𑀫𑀸𑀤𑀸𑀬. 𑀯𑀢𑀸𑀦𑀻𑀢𑀺 𑀳𑀢𑁆𑀣𑀺𑀯𑀢𑀁 𑀯𑀸 𑀅𑀲𑁆𑀲𑀯𑀢𑀁 𑀯𑀸 𑀕𑁄𑀯𑀢𑀁 𑀯𑀸 𑀓𑀼𑀓𑁆𑀓𑀽𑀭𑀯𑀢𑀁 𑀯𑀸 𑀓𑀸𑀓𑀯𑀢𑀁 𑀯𑀸 𑀯𑀸𑀲𑀼𑀤𑁂𑀯𑀯𑀢𑀁 𑀯𑀸 𑀩𑀮𑀤𑁂𑀯𑀯𑀢𑀁 𑀯𑀸 𑀧𑀼𑀡𑁆𑀡𑀪𑀤𑁆𑀤𑀯𑀢𑀁 𑀯𑀸 𑀫𑀡𑀺𑀪𑀤𑁆𑀤𑀯𑀢𑀁 𑀯𑀸 𑀅𑀕𑁆𑀕𑀺𑀯𑀢𑀁 𑀯𑀸 𑀦𑀸𑀕𑀯𑀢𑀁 𑀯𑀸 𑀲𑀼𑀧𑀡𑁆𑀡𑀯𑀢𑀁 𑀯𑀸 𑀬𑀓𑁆𑀔𑀯𑀢𑀁 𑀯𑀸 𑀅𑀲𑀼𑀭𑀯𑀢𑀁 𑀯𑀸…𑀧𑁂… 𑀤𑀺𑀲𑀸𑀯𑀢𑀁 𑀯𑀸 𑀆𑀤𑀸𑀬 𑀲𑀫𑀸𑀤𑀸𑀬 𑀆𑀤𑀺𑀬𑀺𑀢𑁆𑀯𑀸 𑀲𑀫𑀸𑀤𑀺𑀬𑀺𑀢𑁆𑀯𑀸 𑀕𑀡𑁆𑀳𑀺𑀢𑁆𑀯𑀸 𑀧𑀭𑀸𑀫𑀲𑀺𑀢𑁆𑀯𑀸 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸. 𑀚𑀦𑁆𑀢𑀽𑀢𑀺 𑀲𑀢𑁆𑀢𑁄 𑀦𑀭𑁄 …𑀧𑁂… 𑀫𑀦𑀼𑀚𑁄𑀢𑀺 𑁋 𑀲𑀬𑀁 𑀲𑀫𑀸𑀤𑀸𑀬 𑀯𑀢𑀸𑀦𑀺 𑀚𑀦𑁆𑀢𑀼.

𑀉𑀘𑁆𑀘𑀸𑀯𑀘𑀁 𑀕𑀘𑁆𑀙𑀢𑀺 𑀲𑀜𑁆𑀜𑀲𑀢𑁆𑀢𑁄𑀢𑀺 𑀲𑀢𑁆𑀣𑀸𑀭𑀢𑁄 𑀲𑀢𑁆𑀣𑀸𑀭𑀁 𑀕𑀘𑁆𑀙𑀢𑀺; 𑀥𑀫𑁆𑀫𑀓𑁆𑀔𑀸𑀦𑀢𑁄 𑀥𑀫𑁆𑀫𑀓𑁆𑀔𑀸𑀦𑀁 𑀕𑀘𑁆𑀙𑀢𑀺; 𑀕𑀡𑀢𑁄 𑀕𑀡𑀁 𑀕𑀘𑁆𑀙𑀢𑀺; 𑀤𑀺𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀁 𑀕𑀘𑁆𑀙𑀢𑀺; 𑀧𑀝𑀺𑀧𑀤𑀸𑀬 𑀧𑀝𑀺𑀧𑀤𑀁 𑀕𑀘𑁆𑀙𑀢𑀺; 𑀫𑀕𑁆𑀕𑀢𑁄 𑀫𑀕𑁆𑀕𑀁 𑀕𑀘𑁆𑀙𑀢𑀺. 𑀲𑀜𑁆𑀜𑀲𑀢𑁆𑀢𑁄𑀢𑀺 𑀓𑀸𑀫𑀲𑀜𑁆𑀜𑀸𑀬 𑀩𑁆𑀬𑀸𑀧𑀸𑀤𑀲𑀜𑁆𑀜𑀸𑀬 𑀯𑀺𑀳𑀺𑀁𑀲𑀸𑀲𑀜𑁆𑀜𑀸𑀬 𑀤𑀺𑀝𑁆𑀞𑀺𑀲𑀜𑁆𑀜𑀸𑀬 𑀲𑀢𑁆𑀢𑁄 𑀯𑀺𑀲𑀢𑁆𑀢𑁄 𑀆𑀲𑀢𑁆𑀢𑁄 𑀮𑀕𑁆𑀕𑁄 𑀮𑀕𑁆𑀕𑀺𑀢𑁄 𑀧𑀮𑀺𑀩𑀼𑀤𑁆𑀥𑁄. 𑀬𑀣𑀸 𑀪𑀺𑀢𑁆𑀢𑀺𑀔𑀺𑀮𑁂 𑀯𑀸 𑀦𑀸𑀕𑀤𑀦𑁆𑀢𑁂 𑀯𑀸 𑀪𑀡𑁆𑀟𑀁 𑀲𑀢𑁆𑀢𑀁 𑀯𑀺𑀲𑀢𑁆𑀢𑀁 𑀆𑀲𑀢𑁆𑀢𑀁 𑀮𑀕𑁆𑀕𑀁 𑀮𑀕𑁆𑀕𑀺𑀢𑀁 𑀧𑀮𑀺𑀩𑀼𑀤𑁆𑀥𑀁, 𑀏𑀯𑀫𑁂𑀯 𑀓𑀸𑀫𑀲𑀜𑁆𑀜𑀸𑀬 𑀩𑁆𑀬𑀸𑀧𑀸𑀤𑀲𑀜𑁆𑀜𑀸𑀬 𑀯𑀺𑀳𑀺𑀁𑀲𑀸𑀲𑀜𑁆𑀜𑀸𑀬 𑀤𑀺𑀝𑁆𑀞𑀺𑀲𑀜𑁆𑀜𑀸𑀬 𑀲𑀢𑁆𑀢𑁄 𑀯𑀺𑀲𑀢𑁆𑀢𑁄 𑀆𑀲𑀢𑁆𑀢𑁄 𑀮𑀕𑁆𑀕𑁄 𑀮𑀕𑁆𑀕𑀺𑀢𑁄 𑀧𑀮𑀺𑀩𑀼𑀤𑁆𑀥𑁄𑀢𑀺 𑁋 𑀉𑀘𑁆𑀘𑀸𑀯𑀘𑀁 𑀕𑀘𑁆𑀙𑀢𑀺 𑀲𑀜𑁆𑀜𑀲𑀢𑁆𑀢𑁄.

𑀯𑀺𑀤𑁆𑀯𑀸 𑀘 𑀯𑁂𑀤𑁂𑀳𑀺 𑀲𑀫𑁂𑀘𑁆𑀘 𑀥𑀫𑁆𑀫𑀦𑁆𑀢𑀺. 𑀯𑀺𑀤𑁆𑀯𑀸𑀢𑀺 𑀯𑀺𑀤𑁆𑀯𑀸 𑀯𑀺𑀚𑁆𑀚𑀸𑀕𑀢𑁄 𑀜𑀸𑀡𑀻 𑀯𑀺𑀪𑀸𑀯𑀻 𑀫𑁂𑀥𑀸𑀯𑀻. 𑀯𑁂𑀤𑁂𑀳𑀻𑀢𑀺 𑀯𑁂𑀤𑀸 𑀯𑀼𑀘𑁆𑀘𑀦𑁆𑀢𑀺 𑀘𑀢𑀽𑀲𑀼 𑀫𑀕𑁆𑀕𑁂𑀲𑀼 𑀜𑀸𑀡𑀁 𑀧𑀜𑁆𑀜𑀸 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀧𑀜𑁆𑀜𑀸𑀩𑀮𑀁 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀯𑀻𑀫𑀁𑀲𑀸 𑀯𑀺𑀧𑀲𑁆𑀲𑀦𑀸 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀢𑁂𑀳𑀺 𑀯𑁂𑀤𑁂𑀳𑀺 𑀚𑀸𑀢𑀺𑀚𑀭𑀸𑀫𑀭𑀡𑀲𑁆𑀲 𑀅𑀦𑁆𑀢𑀕𑀢𑁄 𑀅𑀦𑁆𑀢𑀧𑁆𑀧𑀢𑁆𑀢𑁄, 𑀓𑁄𑀝𑀺𑀕𑀢𑁄 𑀓𑁄𑀝𑀺𑀧𑁆𑀧𑀢𑁆𑀢𑁄, 𑀧𑀭𑀺𑀬𑀦𑁆𑀢𑀕𑀢𑁄 𑀧𑀭𑀺𑀬𑀦𑁆𑀢𑀧𑁆𑀧𑀢𑁆𑀢𑁄, 𑀯𑁄𑀲𑀸𑀦𑀕𑀢𑁄 𑀯𑁄𑀲𑀸𑀦𑀧𑁆𑀧𑀢𑁆𑀢𑁄, 𑀢𑀸𑀡𑀕𑀢𑁄 𑀢𑀸𑀡𑀧𑁆𑀧𑀢𑁆𑀢𑁄, 𑀮𑁂𑀡𑀕𑀢𑁄 𑀮𑁂𑀡𑀧𑁆𑀧𑀢𑁆𑀢𑁄, 𑀲𑀭𑀡𑀕𑀢𑁄 𑀲𑀭𑀡𑀧𑁆𑀧𑀢𑁆𑀢𑁄, 𑀅𑀪𑀬𑀕𑀢𑁄 𑀅𑀪𑀬𑀧𑁆𑀧𑀢𑁆𑀢𑁄, 𑀅𑀘𑁆𑀘𑀼𑀢𑀕𑀢𑁄 𑀅𑀘𑁆𑀘𑀼𑀢𑀧𑁆𑀧𑀢𑁆𑀢𑁄, 𑀅𑀫𑀢𑀕𑀢𑁄 𑀅𑀫𑀢𑀧𑁆𑀧𑀢𑁆𑀢𑁄, 𑀦𑀺𑀩𑁆𑀩𑀸𑀦𑀕𑀢𑁄 𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑁄. 𑀯𑁂𑀤𑀸𑀦𑀁 𑀯𑀸 𑀅𑀦𑁆𑀢𑀕𑀢𑁄𑀢𑀺 𑀯𑁂𑀤𑀕𑀽, 𑀯𑁂𑀤𑁂𑀳𑀺 𑀯𑀸 𑀅𑀦𑁆𑀢𑀕𑀢𑁄𑀢𑀺 𑀯𑁂𑀤𑀕𑀽, 𑀲𑀢𑁆𑀢𑀦𑁆𑀦𑀁 𑀯𑀸 𑀥𑀫𑁆𑀫𑀸𑀦𑀁 𑀯𑀺𑀤𑀺𑀢𑀢𑁆𑀢𑀸 𑀯𑁂𑀤𑀕𑀽. 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀯𑀺𑀤𑀺𑀢𑀸 𑀳𑁄𑀢𑀺, 𑀯𑀺𑀘𑀺𑀓𑀺𑀘𑁆𑀙𑀸 𑀯𑀺𑀤𑀺𑀢𑀸 𑀳𑁄𑀢𑀺, 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄 𑀯𑀺𑀤𑀺𑀢𑁄 𑀳𑁄𑀢𑀺, 𑀭𑀸𑀕𑁄 𑀯𑀺𑀤𑀺𑀢𑁄 𑀳𑁄𑀢𑀺, 𑀤𑁄𑀲𑁄 𑀯𑀺𑀤𑀺𑀢𑁄 𑀳𑁄𑀢𑀺, 𑀫𑁄𑀳𑁄 𑀯𑀺𑀤𑀺𑀢𑁄 𑀳𑁄𑀢𑀺, 𑀫𑀸𑀦𑁄 𑀯𑀺𑀤𑀺𑀢𑁄 𑀳𑁄𑀢𑀺, 𑀯𑀺𑀤𑀺𑀢𑀸𑀲𑁆𑀲 𑀳𑁄𑀦𑁆𑀢𑀺 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀁𑀓𑀺𑀮𑁂𑀲𑀺𑀓𑀸 𑀧𑁄𑀦𑁄𑀪𑀯𑀺𑀓𑀸 𑀲𑀤𑀭𑀸 𑀤𑀼𑀓𑁆𑀔𑀯𑀺𑀧𑀸𑀓𑀸 𑀆𑀬𑀢𑀺𑀁 𑀚𑀸𑀢𑀺𑀚𑀭𑀸𑀫𑀭𑀡𑀺𑀬𑀸.

𑀯𑁂𑀤𑀸𑀦𑀺 𑀯𑀺𑀘𑁂𑀬𑁆𑀬 𑀓𑁂𑀯𑀮𑀸𑀦𑀺, [𑀲𑀪𑀺𑀬𑀸𑀢𑀺 𑀪𑀕𑀯𑀸]

𑀲𑀫𑀡𑀸𑀦𑀁 𑀬𑀸𑀦𑀻𑀥𑀢𑁆𑀣𑀺 [𑀬𑀸𑀦𑀺𑀧𑀢𑁆𑀣𑀺 (𑀲𑀻. 𑀲𑁆𑀬𑀸.) 𑀲𑀼. 𑀦𑀺. 𑁫𑁩𑁪] 𑀩𑁆𑀭𑀸𑀳𑁆𑀫𑀡𑀸𑀦𑀁;

𑀲𑀩𑁆𑀩𑀯𑁂𑀤𑀦𑀸𑀲𑀼 𑀯𑀻𑀢𑀭𑀸𑀕𑁄, 𑀲𑀩𑁆𑀩𑀁 𑀯𑁂𑀤𑀫𑀢𑀺𑀘𑁆𑀘 𑀯𑁂𑀤𑀕𑀽 𑀲𑁄𑀢𑀺.

𑀯𑀺𑀤𑁆𑀯𑀸 𑀘 𑀯𑁂𑀤𑁂𑀳𑀺 𑀲𑀫𑁂𑀘𑁆𑀘 𑀥𑀫𑁆𑀫𑀦𑁆𑀢𑀺. 𑀲𑀫𑁂𑀘𑁆𑀘 𑀅𑀪𑀺𑀲𑀫𑁂𑀘𑁆𑀘 𑀥𑀫𑁆𑀫𑀁. 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸𑀢𑀺 𑀲𑀫𑁂𑀘𑁆𑀘 𑀅𑀪𑀺𑀲𑀫𑁂𑀘𑁆𑀘 𑀥𑀫𑁆𑀫𑀁; 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀸𑀢𑀺 𑀲𑀫𑁂𑀘𑁆𑀘 𑀅𑀪𑀺𑀲𑀫𑁂𑀘𑁆𑀘 𑀥𑀫𑁆𑀫𑀁; 𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸𑀢𑀺 𑀲𑀫𑁂𑀘𑁆𑀘 𑀅𑀪𑀺𑀲𑀫𑁂𑀘𑁆𑀘 𑀥𑀫𑁆𑀫𑀁; 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸𑀢𑀺 𑀲𑀫𑁂𑀘𑁆𑀘 𑀅𑀪𑀺𑀲𑀫𑁂𑀘𑁆𑀘 𑀥𑀫𑁆𑀫𑀁; 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀦𑁆𑀢𑀺 𑀲𑀫𑁂𑀘𑁆𑀘 𑀅𑀪𑀺𑀲𑀫𑁂𑀘𑁆𑀘 𑀥𑀫𑁆𑀫𑀁; 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀦𑁆𑀢𑀺…𑀧𑁂… 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦𑀦𑁆𑀢𑀺… 𑀲𑀴𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄𑀢𑀺… 𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸𑀢𑀺… 𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸𑀢𑀺… 𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦𑀦𑁆𑀢𑀺… 𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄𑀢𑀺… 𑀪𑀯𑀧𑀘𑁆𑀘𑀬𑀸 𑀚𑀸𑀢𑀻𑀢𑀺… 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀦𑁆𑀢𑀺 𑀲𑀫𑁂𑀘𑁆𑀘 𑀅𑀪𑀺𑀲𑀫𑁂𑀘𑁆𑀘 𑀥𑀫𑁆𑀫𑀁; 𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑀸 𑀲𑀗𑁆𑀔𑀸𑀭𑀦𑀺𑀭𑁄𑀥𑁄𑀢𑀺 𑀲𑀫𑁂𑀘𑁆𑀘 𑀅𑀪𑀺𑀲𑀫𑁂𑀘𑁆𑀘 𑀥𑀫𑁆𑀫𑀁; 𑀲𑀗𑁆𑀔𑀸𑀭𑀦𑀺𑀭𑁄𑀥𑀸 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑁄𑀢𑀺 𑀲𑀫𑁂𑀘𑁆𑀘 𑀅𑀪𑀺𑀲𑀫𑁂𑀘𑁆𑀘 𑀥𑀫𑁆𑀫𑀁; 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑀸 𑀦𑀸𑀫𑀭𑀽𑀧𑀦𑀺𑀭𑁄𑀥𑁄𑀢𑀺… 𑀦𑀸𑀫𑀭𑀽𑀧𑀦𑀺𑀭𑁄𑀥𑀸 𑀲𑀴𑀸𑀬𑀢𑀦𑀦𑀺𑀭𑁄𑀥𑁄𑀢𑀺… 𑀲𑀴𑀸𑀬𑀢𑀦𑀦𑀺𑀭𑁄𑀥𑀸 𑀨𑀲𑁆𑀲𑀦𑀺𑀭𑁄𑀥𑁄𑀢𑀺… 𑀨𑀲𑁆𑀲𑀦𑀺𑀭𑁄𑀥𑀸 𑀯𑁂𑀤𑀦𑀸𑀦𑀺𑀭𑁄𑀥𑁄𑀢𑀺… 𑀯𑁂𑀤𑀦𑀸𑀦𑀺𑀭𑁄𑀥𑀸 𑀢𑀡𑁆𑀳𑀸𑀦𑀺𑀭𑁄𑀥𑁄𑀢𑀺… 𑀢𑀡𑁆𑀳𑀸𑀦𑀺𑀭𑁄𑀥𑀸 𑀉𑀧𑀸𑀤𑀸𑀦𑀦𑀺𑀭𑁄𑀥𑁄𑀢𑀺… 𑀉𑀧𑀸𑀤𑀸𑀦𑀦𑀺𑀭𑁄𑀥𑀸 𑀪𑀯𑀦𑀺𑀭𑁄𑀥𑁄𑀢𑀺… 𑀪𑀯𑀦𑀺𑀭𑁄𑀥𑀸 𑀚𑀸𑀢𑀺𑀦𑀺𑀭𑁄𑀥𑁄𑀢𑀺… 𑀚𑀸𑀢𑀺𑀦𑀺𑀭𑁄𑀥𑀸 𑀚𑀭𑀸𑀫𑀭𑀡𑀦𑀺𑀭𑁄𑀥𑁄𑀢𑀺 𑀲𑀫𑁂𑀘𑁆𑀘 𑀅𑀪𑀺𑀲𑀫𑁂𑀘𑁆𑀘 𑀥𑀫𑁆𑀫𑀁; 𑀇𑀤𑀁 𑀤𑀼𑀓𑁆𑀔𑀦𑁆𑀢𑀺 𑀲𑀫𑁂𑀘𑁆𑀘 𑀅𑀪𑀺𑀲𑀫𑁂𑀘𑁆𑀘 𑀥𑀫𑁆𑀫𑀁; 𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄𑀢𑀺… 𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑁄𑀢𑀺… 𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸𑀢𑀺 𑀲𑀫𑁂𑀘𑁆𑀘 𑀅𑀪𑀺𑀲𑀫𑁂𑀘𑁆𑀘 𑀥𑀫𑁆𑀫𑀁; 𑀇𑀫𑁂 𑀆𑀲𑀯𑀸𑀢𑀺 𑀲𑀫𑁂𑀘𑁆𑀘 𑀅𑀪𑀺𑀲𑀫𑁂𑀘𑁆𑀘 𑀥𑀫𑁆𑀫𑀁; 𑀅𑀬𑀁 𑀆𑀲𑀯𑀲𑀫𑀼𑀤𑀬𑁄𑀢𑀺… 𑀅𑀬𑀁 𑀆𑀲𑀯𑀦𑀺𑀭𑁄𑀥𑁄𑀢𑀺… 𑀅𑀬𑀁 𑀆𑀲𑀯𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸𑀢𑀺 𑀲𑀫𑁂𑀘𑁆𑀘 𑀅𑀪𑀺𑀲𑀫𑁂𑀘𑁆𑀘 𑀥𑀫𑁆𑀫𑀁; 𑀇𑀫𑁂 𑀥𑀫𑁆𑀫𑀸 𑀅𑀪𑀺𑀜𑁆𑀜𑁂𑀬𑁆𑀬𑀸𑀢𑀺 𑀲𑀫𑁂𑀘𑁆𑀘 𑀅𑀪𑀺𑀲𑀫𑁂𑀘𑁆𑀘 𑀥𑀫𑁆𑀫𑀁; 𑀇𑀫𑁂 𑀥𑀫𑁆𑀫𑀸 𑀧𑀭𑀺𑀜𑁆𑀜𑁂𑀬𑁆𑀬𑀸𑀢𑀺… 𑀇𑀫𑁂 𑀥𑀫𑁆𑀫𑀸 𑀧𑀳𑀸𑀢𑀩𑁆𑀩𑀸𑀢𑀺… 𑀇𑀫𑁂 𑀥𑀫𑁆𑀫𑀸 𑀪𑀸𑀯𑁂𑀢𑀩𑁆𑀩𑀸𑀢𑀺 … 𑀇𑀫𑁂 𑀥𑀫𑁆𑀫𑀸 𑀲𑀘𑁆𑀙𑀺𑀓𑀸𑀢𑀩𑁆𑀩𑀸𑀢𑀺 𑀲𑀫𑁂𑀘𑁆𑀘 𑀅𑀪𑀺𑀲𑀫𑁂𑀘𑁆𑀘 𑀥𑀫𑁆𑀫𑀁. 𑀙𑀦𑁆𑀦𑀁 𑀨𑀲𑁆𑀲𑀸𑀬𑀢𑀦𑀸𑀦𑀁 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀲𑀫𑁂𑀘𑁆𑀘 𑀅𑀪𑀺𑀲𑀫𑁂𑀘𑁆𑀘 𑀥𑀫𑁆𑀫𑀁. 𑀧𑀜𑁆𑀘𑀦𑁆𑀦𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀲𑀫𑁂𑀘𑁆𑀘 𑀅𑀪𑀺𑀲𑀫𑁂𑀘𑁆𑀘 𑀥𑀫𑁆𑀫𑀁. 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀲𑀫𑁂𑀘𑁆𑀘 𑀅𑀪𑀺𑀲𑀫𑁂𑀘𑁆𑀘 𑀥𑀫𑁆𑀫𑀁. 𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫𑀦𑁆𑀢𑀺 𑀲𑀫𑁂𑀘𑁆𑀘 𑀅𑀪𑀺𑀲𑀫𑁂𑀘𑁆𑀘 𑀥𑀫𑁆𑀫𑀦𑁆𑀢𑀺 𑁋 𑀯𑀺𑀤𑁆𑀯𑀸 𑀘 𑀯𑁂𑀤𑁂𑀳𑀺 𑀲𑀫𑁂𑀘𑁆𑀘 𑀥𑀫𑁆𑀫𑀁.

𑀦 𑀉𑀘𑁆𑀘𑀸𑀯𑀘𑀁 𑀕𑀘𑁆𑀙𑀢𑀺 𑀪𑀽𑀭𑀺𑀧𑀜𑁆𑀜𑁄𑀢𑀺 𑀦 𑀲𑀢𑁆𑀣𑀸𑀭𑀢𑁄 𑀲𑀢𑁆𑀣𑀸𑀭𑀁 𑀕𑀘𑁆𑀙𑀢𑀺, 𑀦 𑀥𑀫𑁆𑀫𑀓𑁆𑀔𑀸𑀦𑀢𑁄 𑀥𑀫𑁆𑀫𑀓𑁆𑀔𑀸𑀦𑀁 𑀕𑀘𑁆𑀙𑀢𑀺, 𑀦 𑀕𑀡𑀢𑁄 𑀕𑀡𑀁 𑀕𑀘𑁆𑀙𑀢𑀺, 𑀦 𑀤𑀺𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀁 𑀕𑀘𑁆𑀙𑀢𑀺, 𑀦 𑀧𑀝𑀺𑀧𑀤𑀸𑀬 𑀧𑀝𑀺𑀧𑀤𑀁 𑀕𑀘𑁆𑀙𑀢𑀺, 𑀦 𑀫𑀕𑁆𑀕𑀢𑁄 𑀫𑀕𑁆𑀕𑀁 𑀕𑀘𑁆𑀙𑀢𑀺. 𑀪𑀽𑀭𑀺𑀧𑀜𑁆𑀜𑁄𑀢𑀺 𑀪𑀽𑀭𑀺𑀧𑀜𑁆𑀜𑁄 𑀫𑀳𑀸𑀧𑀜𑁆𑀜𑁄 𑀧𑀼𑀣𑀼𑀧𑀜𑁆𑀜𑁄 𑀳𑀸𑀲𑀧𑀜𑁆𑀜𑁄 𑀚𑀯𑀦𑀧𑀜𑁆𑀜𑁄 𑀢𑀺𑀓𑁆𑀔𑀧𑀜𑁆𑀜𑁄 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑁄. 𑀪𑀽𑀭𑀺 𑀯𑀼𑀘𑁆𑀘𑀢𑀺 𑀧𑀣𑀯𑀻. 𑀢𑀸𑀬 𑀧𑀣𑀯𑀺𑀲𑀫𑀸𑀬 𑀧𑀜𑁆𑀜𑀸𑀬 𑀯𑀺𑀧𑀼𑀮𑀸𑀬 𑀯𑀺𑀢𑁆𑀣𑀢𑀸𑀬 𑀲𑀫𑀦𑁆𑀦𑀸𑀕𑀢𑁄𑀢𑀺 𑁋 𑀦 𑀉𑀘𑁆𑀘𑀸𑀯𑀘𑀁 𑀕𑀘𑁆𑀙𑀢𑀺 𑀪𑀽𑀭𑀺𑀧𑀜𑁆𑀜𑁄.

𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀲𑀬𑀁 𑀲𑀫𑀸𑀤𑀸𑀬 𑀯𑀢𑀸𑀦𑀺 𑀚𑀦𑁆𑀢𑀼, 𑀉𑀘𑁆𑀘𑀸𑀯𑀘𑀁 𑀕𑀘𑁆𑀙𑀢𑀺 𑀲𑀜𑁆𑀜𑀲𑀢𑁆𑀢𑁄;

𑀯𑀺𑀤𑁆𑀯𑀸 𑀘 𑀯𑁂𑀤𑁂𑀳𑀺 𑀲𑀫𑁂𑀘𑁆𑀘 𑀥𑀫𑁆𑀫𑀁, 𑀦 𑀉𑀘𑁆𑀘𑀸𑀯𑀘𑀁 𑀕𑀘𑁆𑀙𑀢𑀺 𑀪𑀽𑀭𑀺𑀧𑀜𑁆𑀜𑁄’’𑀢𑀺.

𑁨𑁮. 𑀲 𑀲𑀩𑁆𑀩𑀥𑀫𑁆𑀫𑁂𑀲𑀼 𑀯𑀺𑀲𑁂𑀦𑀺𑀪𑀽𑀢𑁄,𑀬𑀁 𑀓𑀺𑀜𑁆𑀘𑀺 𑀤𑀺𑀝𑁆𑀞𑀁 𑀯 𑀲𑀼𑀢𑀁 𑀫𑀼𑀢𑀁 𑀯𑀸;

𑀢𑀫𑁂𑀯 𑀤𑀲𑁆𑀲𑀺𑀁 𑀯𑀺𑀯𑀝𑀁 𑀘𑀭𑀦𑁆𑀢𑀁, 𑀓𑁂𑀦𑀻𑀥 𑀮𑁄𑀓𑀲𑁆𑀫𑀺 𑀯𑀺𑀓𑀧𑁆𑀧𑀬𑁂𑀬𑁆𑀬.

𑀲 𑀲𑀩𑁆𑀩𑀥𑀫𑁆𑀫𑁂𑀲𑀼 𑀯𑀺𑀲𑁂𑀦𑀺𑀪𑀽𑀢𑁄 𑀬𑀁 𑀓𑀺𑀜𑁆𑀘𑀺 𑀤𑀺𑀝𑁆𑀞𑀁 𑀯 𑀲𑀼𑀢𑀁 𑀫𑀼𑀢𑀁 𑀯𑀸𑀢𑀺. 𑀲𑁂𑀦𑀸 𑀯𑀼𑀘𑁆𑀘𑀢𑀺 𑀫𑀸𑀭𑀲𑁂𑀦𑀸. 𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀫𑀸𑀭𑀲𑁂𑀦𑀸, 𑀯𑀘𑀻𑀤𑀼𑀘𑁆𑀘𑀭𑀺𑀢𑀁 𑀫𑀸𑀭𑀲𑁂𑀦𑀸, 𑀫𑀦𑁄𑀤𑀼𑀘𑁆𑀘𑀭𑀺𑀢𑀁 𑀫𑀸𑀭𑀲𑁂𑀦𑀸, 𑀭𑀸𑀕𑁄 𑀫𑀸𑀭𑀲𑁂𑀦𑀸, 𑀤𑁄𑀲𑁄 𑀫𑀸𑀭𑀲𑁂𑀦𑀸, 𑀫𑁄𑀳𑁄 𑀫𑀸𑀭𑀲𑁂𑀦𑀸, 𑀓𑁄𑀥𑁄 𑀫𑀸𑀭𑀲𑁂𑀦𑀸, 𑀉𑀧𑀦𑀸𑀳𑁄…𑀧𑁂… 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀸 𑀫𑀸𑀭𑀲𑁂𑀦𑀸.

𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋

‘‘𑀓𑀸𑀫𑀸 𑀢𑁂 𑀧𑀞𑀫𑀸 𑀲𑁂𑀦𑀸, 𑀤𑀼𑀢𑀺𑀬𑀸 𑀅𑀭𑀢𑀺 𑀯𑀼𑀘𑁆𑀘𑀢𑀺;

𑀢𑀢𑀺𑀬𑀸 𑀔𑀼𑀧𑁆𑀧𑀺𑀧𑀸𑀲𑀸 𑀢𑁂, 𑀘𑀢𑀼𑀢𑁆𑀣𑀻 𑀢𑀡𑁆𑀳𑀸 𑀯𑀼𑀘𑁆𑀘𑀢𑀺.

‘‘𑀧𑀜𑁆𑀘𑀫𑀻 𑀣𑀺𑀦𑀫𑀺𑀤𑁆𑀥𑀁 𑀢𑁂, 𑀙𑀝𑁆𑀞𑀸 𑀪𑀻𑀭𑀽 𑀧𑀯𑀼𑀘𑁆𑀘𑀢𑀺;

𑀲𑀢𑁆𑀢𑀫𑀻 𑀯𑀺𑀘𑀺𑀓𑀺𑀘𑁆𑀙𑀸 𑀢𑁂, 𑀫𑀓𑁆𑀔𑁄 𑀣𑀫𑁆𑀪𑁄 𑀢𑁂 𑀅𑀝𑁆𑀞𑀫𑁄.

‘‘𑀮𑀸𑀪𑁄 𑀲𑀺𑀮𑁄𑀓𑁄 𑀲𑀓𑁆𑀓𑀸𑀭𑁄, 𑀫𑀺𑀘𑁆𑀙𑀸𑀮𑀤𑁆𑀥𑁄 𑀘 𑀬𑁄 𑀬𑀲𑁄;

𑀬𑁄 𑀘𑀢𑁆𑀢𑀸𑀦𑀁 𑀲𑀫𑀼𑀓𑁆𑀓𑀁𑀲𑁂, 𑀧𑀭𑁂 𑀘 𑀅𑀯𑀚𑀸𑀦𑀢𑀺.

‘‘𑀏𑀲𑀸 𑀦𑀫𑀼𑀘𑀺 𑀢𑁂 𑀲𑁂𑀦𑀸, 𑀓𑀡𑁆𑀳𑀲𑁆𑀲𑀸𑀪𑀺𑀧𑁆𑀧𑀳𑀸𑀭𑀺𑀦𑀻;

𑀦 𑀦𑀁 𑀅𑀲𑀼𑀭𑁄 𑀚𑀺𑀦𑀸𑀢𑀺, 𑀚𑁂𑀢𑁆𑀯𑀸𑀯 𑀮𑀪𑀢𑁂 𑀲𑀼𑀔’’𑀦𑁆𑀢𑀺.

𑀬𑀢𑁄 𑀘𑀢𑀽𑀳𑀺 𑀅𑀭𑀺𑀬𑀫𑀕𑁆𑀕𑁂𑀳𑀺 𑀲𑀩𑁆𑀩𑀸 𑀘 𑀫𑀸𑀭𑀲𑁂𑀦𑀸 𑀲𑀩𑁆𑀩𑁂 𑀘 𑀧𑀝𑀺𑀲𑁂𑀦𑀺𑀓𑀭𑀸 𑀓𑀺𑀮𑁂𑀲𑀸 𑀚𑀺𑀢𑀸 𑀘 𑀧𑀭𑀸𑀚𑀺𑀢𑀸 𑀘 𑀪𑀕𑁆𑀕𑀸 𑀯𑀺𑀧𑁆𑀧𑀮𑀼𑀕𑁆𑀕𑀸 𑀧𑀭𑀫𑁆𑀫𑀼𑀔𑀸, 𑀲𑁄 𑀯𑀼𑀘𑁆𑀘𑀢𑀺 𑀯𑀺𑀲𑁂𑀦𑀺𑀪𑀽𑀢𑁄. 𑀲𑁄 𑀤𑀺𑀝𑁆𑀞𑁂 𑀯𑀺𑀲𑁂𑀦𑀺𑀪𑀽𑀢𑁄, 𑀲𑀼𑀢𑁂 𑀯𑀺𑀲𑁂𑀦𑀺𑀪𑀽𑀢𑁄, 𑀫𑀼𑀢𑁂 𑀯𑀺𑀲𑁂𑀦𑀺𑀪𑀽𑀢𑁄, 𑀯𑀺𑀜𑁆𑀜𑀸𑀢𑁂 𑀯𑀺𑀲𑁂𑀦𑀺𑀪𑀽𑀢𑁄𑀢𑀺 𑁋 𑀲 𑀲𑀩𑁆𑀩𑀥𑀫𑁆𑀫𑁂𑀲𑀼 𑀯𑀺𑀲𑁂𑀦𑀺𑀪𑀽𑀢𑁄 𑀬𑀁 𑀓𑀺𑀜𑁆𑀘𑀺 𑀤𑀺𑀝𑁆𑀞𑀁 𑀯 𑀲𑀼𑀢𑀁 𑀫𑀼𑀢𑀁 𑀯𑀸.

𑀢𑀫𑁂𑀯 𑀤𑀲𑁆𑀲𑀺𑀁 𑀯𑀺𑀯𑀝𑀁 𑀘𑀭𑀦𑁆𑀢𑀦𑁆𑀢𑀺. 𑀢𑀫𑁂𑀯 𑀲𑀼𑀤𑁆𑀥𑀤𑀲𑁆𑀲𑀺𑀁 𑀯𑀺𑀲𑀼𑀤𑁆𑀥𑀤𑀲𑁆𑀲𑀺𑀁 𑀧𑀭𑀺𑀲𑀼𑀤𑁆𑀥𑀤𑀲𑁆𑀲𑀺𑀁 𑀯𑁄𑀤𑀸𑀢𑀤𑀲𑁆𑀲𑀺𑀁 𑀧𑀭𑀺𑀬𑁄𑀤𑀸𑀢𑀤𑀲𑁆𑀲𑀺𑀁. 𑀅𑀣 𑀯𑀸, 𑀲𑀼𑀤𑁆𑀥𑀤𑀲𑁆𑀲𑀦𑀁 𑀯𑀺𑀲𑀼𑀤𑁆𑀥𑀤𑀲𑁆𑀲𑀦𑀁 𑀧𑀭𑀺𑀲𑀼𑀤𑁆𑀥𑀤𑀲𑁆𑀲𑀦𑀁 𑀯𑁄𑀤𑀸𑀢𑀤𑀲𑁆𑀲𑀦𑀁 𑀧𑀭𑀺𑀬𑁄𑀤𑀸𑀢𑀤𑀲𑁆𑀲𑀦𑀁. 𑀯𑀺𑀯𑀝𑀦𑁆𑀢𑀺 𑀢𑀡𑁆𑀳𑀸𑀙𑀤𑀦𑀁 𑀤𑀺𑀝𑁆𑀞𑀺𑀙𑀤𑀦𑀁 𑀓𑀺𑀮𑁂𑀲𑀙𑀤𑀦𑀁 𑀤𑀼𑀘𑁆𑀘𑀭𑀺𑀢𑀙𑀤𑀦𑀁 𑀅𑀯𑀺𑀚𑁆𑀚𑀸𑀙𑀤𑀦𑀁. 𑀢𑀸𑀦𑀺 𑀙𑀤𑀦𑀸𑀦𑀺 𑀯𑀺𑀯𑀝𑀸𑀦𑀺 𑀳𑁄𑀦𑁆𑀢𑀺 𑀯𑀺𑀤𑁆𑀥𑀁𑀲𑀺𑀢𑀸𑀦𑀺 𑀉𑀕𑁆𑀖𑀸𑀝𑀺𑀢𑀸𑀦𑀺 𑀲𑀫𑀼𑀕𑁆𑀖𑀸𑀝𑀺𑀢𑀸𑀦𑀺 𑀧𑀳𑀻𑀦𑀸𑀦𑀺 𑀲𑀫𑀼𑀘𑁆𑀙𑀺𑀦𑁆𑀦𑀸𑀦𑀺 𑀯𑀽𑀧𑀲𑀦𑁆𑀢𑀸𑀦𑀺 𑀧𑀝𑀺𑀧𑀲𑁆𑀲𑀤𑁆𑀥𑀸𑀦𑀺 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸𑀦𑀺 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸𑀦𑀺. 𑀘𑀭𑀦𑁆𑀢𑀦𑁆𑀢𑀺 𑀘𑀭𑀦𑁆𑀢𑀁 𑀯𑀺𑀘𑀭𑀦𑁆𑀢𑀁 𑀯𑀺𑀳𑀭𑀦𑁆𑀢𑀁 𑀇𑀭𑀺𑀬𑀦𑁆𑀢𑀁 𑀯𑀢𑁆𑀢𑁂𑀦𑁆𑀢𑀁 𑀧𑀸𑀮𑁂𑀦𑁆𑀢𑀁 𑀬𑀧𑁂𑀦𑁆𑀢𑀁 𑀬𑀸𑀧𑁂𑀦𑁆𑀢𑀦𑁆𑀢𑀺 𑁋 𑀢𑀫𑁂𑀯 𑀤𑀲𑁆𑀲𑀺𑀁 𑀯𑀺𑀯𑀝𑀁 𑀘𑀭𑀦𑁆𑀢𑀁.

𑀓𑁂𑀦𑀻𑀥 𑀮𑁄𑀓𑀲𑁆𑀫𑀺 𑀯𑀺𑀓𑀧𑁆𑀧𑀬𑁂𑀬𑁆𑀬𑀸𑀢𑀺. 𑀓𑀧𑁆𑀧𑀸𑀢𑀺 𑀤𑁆𑀯𑁂 𑀓𑀧𑁆𑀧𑀸 𑁋 𑀢𑀡𑁆𑀳𑀸𑀓𑀧𑁆𑀧𑁄 𑀘 𑀤𑀺𑀝𑁆𑀞𑀺𑀓𑀧𑁆𑀧𑁄 𑀘…𑀧𑁂… 𑀅𑀬𑀁 𑀢𑀡𑁆𑀳𑀸𑀓𑀧𑁆𑀧𑁄…𑀧𑁂… 𑀅𑀬𑀁 𑀤𑀺𑀝𑁆𑀞𑀺𑀓𑀧𑁆𑀧𑁄. 𑀢𑀲𑁆𑀲 𑀢𑀡𑁆𑀳𑀸𑀓𑀧𑁆𑀧𑁄 𑀧𑀳𑀻𑀦𑁄, 𑀤𑀺𑀝𑁆𑀞𑀺𑀓𑀧𑁆𑀧𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑁄. 𑀢𑀡𑁆𑀳𑀸𑀓𑀧𑁆𑀧𑀲𑁆𑀲 𑀧𑀳𑀻𑀦𑀢𑁆𑀢𑀸 𑀤𑀺𑀝𑁆𑀞𑀺𑀓𑀧𑁆𑀧𑀲𑁆𑀲 𑀧𑀝𑀺𑀦𑀺𑀲𑁆𑀲𑀝𑁆𑀞𑀢𑁆𑀢𑀸 𑀓𑁂𑀦 𑀭𑀸𑀕𑁂𑀦 𑀓𑀧𑁆𑀧𑁂𑀬𑁆𑀬, 𑀓𑁂𑀦 𑀤𑁄𑀲𑁂𑀦 𑀓𑀧𑁆𑀧𑁂𑀬𑁆𑀬, 𑀓𑁂𑀦 𑀫𑁄𑀳𑁂𑀦 𑀓𑀧𑁆𑀧𑁂𑀬𑁆𑀬, 𑀓𑁂𑀦 𑀫𑀸𑀦𑁂𑀦 𑀓𑀧𑁆𑀧𑁂𑀬𑁆𑀬, 𑀓𑀸𑀬 𑀤𑀺𑀝𑁆𑀞𑀺𑀬𑀸 𑀓𑀧𑁆𑀧𑁂𑀬𑁆𑀬, 𑀓𑁂𑀦 𑀉𑀤𑁆𑀥𑀘𑁆𑀘𑁂𑀦 𑀓𑀧𑁆𑀧𑁂𑀬𑁆𑀬, 𑀓𑀸𑀬 𑀯𑀺𑀘𑀺𑀓𑀺𑀘𑁆𑀙𑀸𑀬 𑀓𑀧𑁆𑀧𑁂𑀬𑁆𑀬, 𑀓𑁂𑀳𑀺 𑀅𑀦𑀼𑀲𑀬𑁂𑀳𑀺 𑀓𑀧𑁆𑀧𑁂𑀬𑁆𑀬 𑁋 𑀭𑀢𑁆𑀢𑁄𑀢𑀺 𑀯𑀸 𑀤𑀼𑀝𑁆𑀞𑁄𑀢𑀺 𑀯𑀸 𑀫𑀽𑀴𑁆𑀳𑁄𑀢𑀺 𑀯𑀸 𑀯𑀺𑀦𑀺𑀩𑀤𑁆𑀥𑁄𑀢𑀺 𑀯𑀸 𑀧𑀭𑀸𑀫𑀝𑁆𑀞𑁄𑀢𑀺 𑀯𑀸 𑀯𑀺𑀓𑁆𑀔𑁂𑀧𑀕𑀢𑁄𑀢𑀺 𑀯𑀸 𑀅𑀦𑀺𑀝𑁆𑀞𑀗𑁆𑀕𑀢𑁄𑀢𑀺 𑀯𑀸 𑀣𑀸𑀫𑀕𑀢𑁄𑀢𑀺 𑀯𑀸. 𑀢𑁂 𑀅𑀪𑀺𑀲𑀗𑁆𑀔𑀸𑀭𑀸 𑀧𑀳𑀻𑀦𑀸. 𑀅𑀪𑀺𑀲𑀗𑁆𑀔𑀸𑀭𑀸𑀦𑀁 𑀧𑀳𑀻𑀦𑀢𑁆𑀢𑀸 𑀕𑀢𑀺𑀬𑁄 𑀓𑁂𑀦 𑀓𑀧𑁆𑀧𑁂𑀬𑁆𑀬 𑁋 𑀦𑁂𑀭𑀬𑀺𑀓𑁄𑀢𑀺 𑀯𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀓𑁄𑀢𑀺 𑀯𑀸 𑀧𑁂𑀢𑁆𑀢𑀺𑀯𑀺𑀲𑀬𑀺𑀓𑁄𑀢𑀺 𑀯𑀸 𑀫𑀦𑀼𑀲𑁆𑀲𑁄𑀢𑀺 𑀯𑀸 𑀤𑁂𑀯𑁄𑀢𑀺 𑀯𑀸 𑀭𑀽𑀧𑀻𑀢𑀺 𑀯𑀸 𑀅𑀭𑀽𑀧𑀻𑀢𑀺 𑀯𑀸 𑀲𑀜𑁆𑀜𑀻𑀢𑀺 𑀯𑀸 𑀅𑀲𑀜𑁆𑀜𑀻𑀢𑀺 𑀯𑀸 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻𑀢𑀺 𑀯𑀸. 𑀲𑁄 𑀳𑁂𑀢𑀼 𑀦𑀢𑁆𑀣𑀺, 𑀧𑀘𑁆𑀘𑀬𑁄 𑀦𑀢𑁆𑀣𑀺, 𑀓𑀸𑀭𑀡𑀁 𑀦𑀢𑁆𑀣𑀺, 𑀬𑁂𑀦 𑀓𑀧𑁆𑀧𑁂𑀬𑁆𑀬 𑀯𑀺𑀓𑀧𑁆𑀧𑁂𑀬𑁆𑀬 𑀯𑀺𑀓𑀧𑁆𑀧𑀁 𑀆𑀧𑀚𑁆𑀚𑁂𑀬𑁆𑀬. 𑀮𑁄𑀓𑀲𑁆𑀫𑀺𑀦𑁆𑀢𑀺 𑀅𑀧𑀸𑀬𑀮𑁄𑀓𑁂 𑀫𑀦𑀼𑀲𑁆𑀲𑀮𑁄𑀓𑁂 𑀤𑁂𑀯𑀮𑁄𑀓𑁂 𑀔𑀦𑁆𑀥𑀮𑁄𑀓𑁂 𑀥𑀸𑀢𑀼𑀮𑁄𑀓𑁂 𑀆𑀬𑀢𑀦𑀮𑁄𑀓𑁂𑀢𑀺 𑁋 𑀓𑁂𑀦𑀻𑀥 𑀮𑁄𑀓𑀲𑁆𑀫𑀺𑀁 𑀯𑀺𑀓𑀧𑁆𑀧𑀬𑁂𑀬𑁆𑀬.

𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀲 𑀲𑀩𑁆𑀩𑀥𑀫𑁆𑀫𑁂𑀲𑀼 𑀯𑀺𑀲𑁂𑀦𑀺𑀪𑀽𑀢𑁄, 𑀬𑀁 𑀓𑀺𑀜𑁆𑀘𑀺 𑀤𑀺𑀝𑁆𑀞𑀁 𑀯 𑀲𑀼𑀢𑀁 𑀫𑀼𑀢𑀁 𑀯𑀸;

𑀢𑀫𑁂𑀯 𑀤𑀲𑁆𑀲𑀺𑀁 𑀯𑀺𑀯𑀝𑀁 𑀘𑀭𑀦𑁆𑀢𑀁, 𑀓𑁂𑀦𑀻𑀥 𑀮𑁄𑀓𑀲𑁆𑀫𑀺 𑀯𑀺𑀓𑀧𑁆𑀧𑀬𑁂𑀬𑁆𑀬𑀸’’𑀢𑀺.

𑁨𑁯. 𑀦 𑀓𑀧𑁆𑀧𑀬𑀦𑁆𑀢𑀺 𑀦 𑀧𑀼𑀭𑁂𑀓𑁆𑀔𑀭𑁄𑀦𑁆𑀢𑀺, 𑀅𑀘𑁆𑀘𑀦𑁆𑀢𑀲𑀼𑀤𑁆𑀥𑀻𑀢𑀺 𑀦 𑀢𑁂 𑀯𑀤𑀦𑁆𑀢𑀺;

𑀆𑀤𑀸𑀦𑀕𑀦𑁆𑀣𑀁 𑀕𑀣𑀺𑀢𑀁 𑀯𑀺𑀲𑀚𑁆𑀚, 𑀆𑀲𑀁 𑀦 𑀓𑀼𑀩𑁆𑀩𑀦𑁆𑀢𑀺 𑀓𑀼𑀳𑀺𑀜𑁆𑀘𑀺 𑀮𑁄𑀓𑁂.

𑀦 𑀓𑀧𑁆𑀧𑀬𑀦𑁆𑀢𑀺 𑀦 𑀧𑀼𑀭𑁂𑀓𑁆𑀔𑀭𑁄𑀦𑁆𑀢𑀻𑀢𑀺. 𑀓𑀧𑁆𑀧𑀸𑀢𑀺 𑀤𑁆𑀯𑁂 𑀓𑀧𑁆𑀧𑀸 𑁋 𑀢𑀡𑁆𑀳𑀸𑀓𑀧𑁆𑀧𑁄 𑀘 𑀤𑀺𑀝𑁆𑀞𑀺𑀓𑀧𑁆𑀧𑁄 𑀘…𑀧𑁂… 𑀅𑀬𑀁 𑀢𑀡𑁆𑀳𑀸𑀓𑀧𑁆𑀧𑁄…𑀧𑁂… 𑀅𑀬𑀁 𑀤𑀺𑀝𑁆𑀞𑀺𑀓𑀧𑁆𑀧𑁄. 𑀢𑁂𑀲𑀁 𑀢𑀡𑁆𑀳𑀸𑀓𑀧𑁆𑀧𑁄 𑀧𑀳𑀻𑀦𑁄, 𑀤𑀺𑀝𑁆𑀞𑀺𑀓𑀧𑁆𑀧𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑁄. 𑀢𑀡𑁆𑀳𑀸𑀓𑀧𑁆𑀧𑀲𑁆𑀲 𑀧𑀳𑀻𑀦𑀢𑁆𑀢𑀸, 𑀤𑀺𑀝𑁆𑀞𑀺𑀓𑀧𑁆𑀧𑀲𑁆𑀲 𑀧𑀝𑀺𑀦𑀺𑀲𑁆𑀲𑀝𑁆𑀞𑀢𑁆𑀢𑀸 𑀢𑀡𑁆𑀳𑀸𑀓𑀧𑁆𑀧𑀁 𑀯𑀸 𑀤𑀺𑀝𑁆𑀞𑀺𑀓𑀧𑁆𑀧𑀁 𑀯𑀸 𑀦 𑀓𑀧𑁆𑀧𑁂𑀦𑁆𑀢𑀺 𑀦 𑀚𑀦𑁂𑀦𑁆𑀢𑀺 𑀦 𑀲𑀜𑁆𑀚𑀦𑁂𑀦𑁆𑀢𑀺 𑀦 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺 𑀦𑀸𑀪𑀺𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀻𑀢𑀺 𑁋 𑀦 𑀓𑀧𑁆𑀧𑀬𑀦𑁆𑀢𑀺. 𑀦 𑀧𑀼𑀭𑁂𑀓𑁆𑀔𑀭𑁄𑀦𑁆𑀢𑀻𑀢𑀺. 𑀧𑀼𑀭𑁂𑀓𑁆𑀔𑀸𑀭𑀸𑀢𑀺 𑀤𑁆𑀯𑁂 𑀧𑀼𑀭𑁂𑀓𑁆𑀔𑀸𑀭𑀸 𑁋 𑀢𑀡𑁆𑀳𑀸𑀧𑀼𑀭𑁂𑀓𑁆𑀔𑀸𑀭𑁄 𑀘 𑀤𑀺𑀝𑁆𑀞𑀺𑀧𑀼𑀭𑁂𑀓𑁆𑀔𑀸𑀭𑁄 𑀘…𑀧𑁂… 𑀅𑀬𑀁 𑀢𑀡𑁆𑀳𑀸𑀧𑀼𑀭𑁂𑀓𑁆𑀔𑀸𑀭𑁄…𑀧𑁂… 𑀅𑀬𑀁 𑀤𑀺𑀝𑁆𑀞𑀺𑀧𑀼𑀭𑁂𑀓𑁆𑀔𑀸𑀭𑁄. 𑀢𑁂𑀲𑀁 𑀢𑀡𑁆𑀳𑀸𑀧𑀼𑀭𑁂𑀓𑁆𑀔𑀸𑀭𑁄 𑀧𑀳𑀻𑀦𑁄, 𑀤𑀺𑀝𑁆𑀞𑀺𑀧𑀼𑀭𑁂𑀓𑁆𑀔𑀸𑀭𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑁄. 𑀢𑀡𑁆𑀳𑀸𑀧𑀼𑀭𑁂𑀓𑁆𑀔𑀸𑀭𑀲𑁆𑀲 𑀧𑀳𑀻𑀦𑀢𑁆𑀢𑀸, 𑀤𑀺𑀝𑁆𑀞𑀺𑀧𑀼𑀭𑁂𑀓𑁆𑀔𑀸𑀭𑀲𑁆𑀲 𑀧𑀝𑀺𑀦𑀺𑀲𑁆𑀲𑀝𑁆𑀞𑀢𑁆𑀢𑀸 𑀦 𑀢𑀡𑁆𑀳𑀁 𑀯𑀸 𑀦 𑀤𑀺𑀝𑁆𑀞𑀺𑀁 𑀯𑀸 𑀧𑀼𑀭𑀢𑁄 𑀓𑀢𑁆𑀯𑀸 𑀘𑀭𑀦𑁆𑀢𑀺, 𑀦 𑀢𑀡𑁆𑀳𑀸𑀥𑀚𑀸 𑀦 𑀢𑀡𑁆𑀳𑀸𑀓𑁂𑀢𑀽 𑀦 𑀢𑀡𑁆𑀳𑀸𑀥𑀺𑀧𑀢𑁂𑀬𑁆𑀬𑀸, 𑀦 𑀤𑀺𑀝𑁆𑀞𑀺𑀥𑀚𑀸 𑀦 𑀤𑀺𑀝𑁆𑀞𑀺𑀓𑁂𑀢𑀽 𑀦 𑀤𑀺𑀝𑁆𑀞𑀸𑀥𑀺𑀧𑀢𑁂𑀬𑁆𑀬𑀸, 𑀦 𑀢𑀡𑁆𑀳𑀸𑀬 𑀯𑀸 𑀦 𑀤𑀺𑀝𑁆𑀞𑀺𑀬𑀸 𑀯𑀸 𑀧𑀭𑀺𑀯𑀸𑀭𑀺𑀢𑀸 𑀘𑀭𑀦𑁆𑀢𑀻𑀢𑀺 𑁋 𑀦 𑀓𑀧𑁆𑀧𑀬𑀦𑁆𑀢𑀺 𑀦 𑀧𑀼𑀭𑁂𑀓𑁆𑀔𑀭𑁄𑀦𑁆𑀢𑀺.

𑀅𑀘𑁆𑀘𑀦𑁆𑀢𑀲𑀼𑀤𑁆𑀥𑀻𑀢𑀺 𑀦 𑀢𑁂 𑀯𑀤𑀦𑁆𑀢𑀻𑀢𑀺 𑀅𑀘𑁆𑀘𑀦𑁆𑀢𑀲𑀼𑀤𑁆𑀥𑀺𑀁 𑀲𑀁𑀲𑀸𑀭𑀲𑀼𑀤𑁆𑀥𑀺𑀁 𑀅𑀓𑀺𑀭𑀺𑀬𑀤𑀺𑀝𑁆𑀞𑀺𑀁 𑀲𑀲𑁆𑀲𑀢𑀯𑀸𑀤𑀁 𑀦 𑀯𑀤𑀦𑁆𑀢𑀺 𑀦 𑀓𑀣𑁂𑀦𑁆𑀢𑀺 𑀦 𑀪𑀡𑀦𑁆𑀢𑀺 𑀦 𑀤𑀻𑀧𑀬𑀦𑁆𑀢𑀺 𑀦 𑀯𑁄𑀳𑀭𑀦𑁆𑀢𑀻𑀢𑀺 𑁋 𑀅𑀘𑁆𑀘𑀦𑁆𑀢𑀲𑀼𑀤𑁆𑀥𑀻𑀢𑀺 𑀦 𑀢𑁂 𑀯𑀤𑀦𑁆𑀢𑀺.

𑀆𑀤𑀸𑀦𑀕𑀦𑁆𑀣𑀁 𑀕𑀣𑀺𑀢𑀁 𑀯𑀺𑀲𑀚𑁆𑀚𑀸𑀢𑀺. 𑀕𑀦𑁆𑀣𑀸𑀢𑀺 𑀘𑀢𑁆𑀢𑀸𑀭𑁄 𑀕𑀦𑁆𑀣𑀸 𑁋 𑀅𑀪𑀺𑀚𑁆𑀛𑀸 𑀓𑀸𑀬𑀕𑀦𑁆𑀣𑁄, 𑀩𑁆𑀬𑀸𑀧𑀸𑀤𑁄 𑀓𑀸𑀬𑀕𑀦𑁆𑀣𑁄, 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄 𑀓𑀸𑀬𑀕𑀦𑁆𑀣𑁄, 𑀇𑀤𑀁𑀲𑀘𑁆𑀘𑀸𑀪𑀺𑀦𑀺𑀯𑁂𑀲𑁄 𑀓𑀸𑀬𑀕𑀦𑁆𑀣𑁄. 𑀅𑀢𑁆𑀢𑀦𑁄 𑀤𑀺𑀝𑁆𑀞𑀺𑀬𑀸 𑀭𑀸𑀕𑁄 𑀅𑀪𑀺𑀚𑁆𑀛𑀸 𑀓𑀸𑀬𑀕𑀦𑁆𑀣𑁄; 𑀧𑀭𑀯𑀸𑀤𑁂𑀲𑀼 𑀆𑀖𑀸𑀢𑁄 𑀅𑀧𑁆𑀧𑀘𑁆𑀘𑀬𑁄 𑀩𑁆𑀬𑀸𑀧𑀸𑀤𑁄 𑀓𑀸𑀬𑀕𑀦𑁆𑀣𑁄; 𑀅𑀢𑁆𑀢𑀦𑁄 𑀲𑀻𑀮𑀁 𑀯𑀸 𑀯𑀢𑀁 𑀯𑀸 𑀲𑀻𑀮𑀯𑀢𑀁 𑀯𑀸 𑀧𑀭𑀸𑀫𑀲𑀦𑁆𑀢𑀻𑀢𑀺 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄 𑀓𑀸𑀬𑀕𑀦𑁆𑀣𑁄, 𑀅𑀢𑁆𑀢𑀦𑁄 𑀤𑀺𑀝𑁆𑀞𑀺 𑀇𑀤𑀁𑀲𑀘𑁆𑀘𑀸𑀪𑀺𑀦𑀺𑀯𑁂𑀲𑁄 𑀓𑀸𑀬𑀕𑀦𑁆𑀣𑁄. 𑀓𑀺𑀁𑀓𑀸𑀭𑀡𑀸 𑀯𑀼𑀘𑁆𑀘𑀢𑀺 𑀆𑀤𑀸𑀦𑀕𑀦𑁆𑀣𑁄? 𑀢𑁂𑀳𑀺 𑀕𑀦𑁆𑀣𑁂𑀳𑀺 𑀭𑀽𑀧𑀁 𑀆𑀤𑀺𑀬𑀦𑁆𑀢𑀺 𑀉𑀧𑀸𑀤𑀺𑀬𑀦𑁆𑀢𑀺 𑀕𑀡𑁆𑀳𑀦𑁆𑀢𑀺 𑀧𑀭𑀸𑀫𑀲𑀦𑁆𑀢𑀺 𑀅𑀪𑀺𑀦𑀺𑀯𑀺𑀲𑀦𑁆𑀢𑀺; 𑀯𑁂𑀤𑀦𑀁…𑀧𑁂… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁… 𑀕𑀢𑀺𑀁 … 𑀉𑀧𑀧𑀢𑁆𑀢𑀺𑀁… 𑀧𑀝𑀺𑀲𑀦𑁆𑀥𑀺𑀁… 𑀪𑀯𑀁… 𑀲𑀁𑀲𑀸𑀭𑀯𑀝𑁆𑀝𑀁 𑀆𑀤𑀺𑀬𑀦𑁆𑀢𑀺 𑀉𑀧𑀸𑀤𑀺𑀬𑀦𑁆𑀢𑀺 𑀕𑀡𑁆𑀳𑀦𑁆𑀢𑀺 𑀧𑀭𑀸𑀫𑀲𑀦𑁆𑀢𑀺 𑀅𑀪𑀺𑀦𑀺𑀯𑀺𑀲𑀦𑁆𑀢𑀺. 𑀢𑀁𑀓𑀸𑀭𑀡𑀸 𑀯𑀼𑀘𑁆𑀘𑀢𑀺 𑀆𑀤𑀸𑀦𑀕𑀦𑁆𑀣𑁄. 𑀯𑀺𑀲𑀚𑁆𑀚𑀸𑀢𑀺 𑀕𑀦𑁆𑀣𑁂 𑀯𑁄𑀲𑀚𑁆𑀚𑀺𑀢𑁆𑀯𑀸 𑀯𑀸 𑁋 𑀯𑀺𑀲𑀚𑁆𑀚. 𑀅𑀣 𑀯𑀸 𑀕𑀦𑁆𑀣𑁂 𑀕𑀥𑀺𑀢𑁂 𑀕𑀦𑁆𑀣𑀺𑀢𑁂 𑀩𑀦𑁆𑀥𑁂 𑀯𑀺𑀩𑀦𑁆𑀥𑁂 𑀆𑀩𑀦𑁆𑀥𑁂 𑀮𑀕𑁆𑀕𑁂 𑀮𑀕𑁆𑀕𑀺𑀢𑁂 𑀧𑀮𑀺𑀩𑀼𑀤𑁆𑀥𑁂 𑀩𑀦𑁆𑀥𑀦𑁂 𑀧𑁄𑀝𑀬𑀺𑀢𑁆𑀯𑀸 𑁋 [𑀨𑁄𑀝𑀬𑀺𑀢𑁆𑀯𑀸 (𑀲𑁆𑀬𑀸.)] 𑀯𑀺𑀲𑀚𑁆𑀚. 𑀬𑀣𑀸 𑀯𑀬𑁆𑀳𑀁 𑀯𑀸 𑀭𑀣𑀁 𑀯𑀸 𑀲𑀓𑀝𑀁 𑀯𑀸 𑀲𑀦𑁆𑀤𑀫𑀸𑀦𑀺𑀓𑀁 𑀯𑀸 𑀲𑀚𑁆𑀚𑀁 𑀯𑀺𑀲𑀚𑁆𑀚𑀁 𑀓𑀭𑁄𑀦𑁆𑀢𑀺 𑀯𑀺𑀓𑁄𑀧𑁂𑀦𑁆𑀢𑀺; 𑀏𑀯𑀫𑁂𑀯 𑀕𑀦𑁆𑀣𑁂 𑀯𑁄𑀲𑀚𑁆𑀚𑀺𑀢𑁆𑀯𑀸 𑁋 𑀯𑀺𑀲𑀚𑁆𑀚. 𑀅𑀣 𑀯𑀸 𑀕𑀦𑁆𑀣𑁂 𑀕𑀥𑀺𑀢𑁂 𑀕𑀦𑁆𑀣𑀺𑀢𑁂 𑀩𑀦𑁆𑀥𑁂 𑀯𑀺𑀩𑀦𑁆𑀥𑁂 𑀆𑀩𑀦𑁆𑀥𑁂 𑀮𑀕𑁆𑀕𑁂 𑀮𑀕𑁆𑀕𑀺𑀢𑁂 𑀧𑀮𑀺𑀩𑀼𑀤𑁆𑀥𑁂 𑀩𑀦𑁆𑀥𑀦𑁂 𑀧𑁄𑀝𑀬𑀺𑀢𑁆𑀯𑀸 𑀯𑀺𑀲𑀚𑁆𑀚𑀸𑀢𑀺 𑁋 𑀆𑀤𑀸𑀦𑀕𑀦𑁆𑀣𑀁 𑀕𑀣𑀺𑀢𑀁 𑀯𑀺𑀲𑀚𑁆𑀚.

𑀆𑀲𑀁 𑀦 𑀓𑀼𑀩𑁆𑀩𑀦𑁆𑀢𑀺 𑀓𑀼𑀳𑀺𑀜𑁆𑀘𑀺 𑀮𑁄𑀓𑁂𑀢𑀺. 𑀆𑀲𑀸 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄…𑀧𑁂… 𑀅𑀪𑀺𑀚𑁆𑀛𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁. 𑀆𑀲𑀁 𑀦 𑀓𑀼𑀩𑁆𑀩𑀦𑁆𑀢𑀻𑀢𑀺 𑀆𑀲𑀁 𑀦 𑀓𑀼𑀩𑁆𑀩𑀦𑁆𑀢𑀺 𑀦 𑀚𑀦𑁂𑀦𑁆𑀢𑀺 𑀦 𑀲𑀜𑁆𑀚𑀦𑁂𑀦𑁆𑀢𑀺 𑀦 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺 𑀦 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺. 𑀓𑀼𑀳𑀺𑀜𑁆𑀘𑀻𑀢𑀺 𑀓𑀼𑀳𑀺𑀜𑁆𑀘𑀺 𑀓𑀺𑀫𑁆𑀳𑀺𑀘𑀺 𑀓𑀢𑁆𑀣𑀘𑀺 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀯𑀸. 𑀮𑁄𑀓𑁂𑀢𑀺 𑀅𑀧𑀸𑀬𑀮𑁄𑀓𑁂…𑀧𑁂… 𑀆𑀬𑀢𑀦𑀮𑁄𑀓𑁂𑀢𑀺 𑁋 𑀆𑀲𑀁 𑀦 𑀓𑀼𑀩𑁆𑀩𑀦𑁆𑀢𑀺 𑀓𑀼𑀳𑀺𑀜𑁆𑀘𑀺 𑀮𑁄𑀓𑁂.

𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀦 𑀓𑀧𑁆𑀧𑀬𑀦𑁆𑀢𑀺 𑀦 𑀧𑀼𑀭𑁂𑀓𑁆𑀔𑀭𑁄𑀦𑁆𑀢𑀺, 𑀅𑀘𑁆𑀘𑀦𑁆𑀢𑀲𑀼𑀤𑁆𑀥𑀻𑀢𑀺 𑀦 𑀢𑁂 𑀯𑀤𑀦𑁆𑀢𑀺;

𑀆𑀤𑀸𑀦𑀕𑀦𑁆𑀣𑀁 𑀕𑀣𑀺𑀢𑀁 𑀯𑀺𑀲𑀚𑁆𑀚, 𑀆𑀲𑀁 𑀦 𑀓𑀼𑀩𑁆𑀩𑀦𑁆𑀢𑀺 𑀓𑀼𑀳𑀺𑀜𑁆𑀘𑀺 𑀮𑁄𑀓𑁂’’𑀢𑀺.

𑁩𑁦. 𑀲𑀻𑀫𑀸𑀢𑀺𑀕𑁄 𑀩𑁆𑀭𑀸𑀳𑁆𑀫𑀡𑁄 𑀢𑀲𑁆𑀲 𑀦𑀢𑁆𑀣𑀺, 𑀜𑀢𑁆𑀯𑀸 𑀘 𑀤𑀺𑀲𑁆𑀯𑀸 𑀘 𑀲𑀫𑀼𑀕𑁆𑀕𑀳𑀻𑀢𑀁;

𑀦 𑀭𑀸𑀕𑀭𑀸𑀕𑀻 𑀦 𑀯𑀺𑀭𑀸𑀕𑀭𑀢𑁆𑀢𑁄, 𑀢𑀲𑁆𑀲𑀻𑀥 𑀦𑀢𑁆𑀣𑀺 𑀧𑀭𑀫𑀼𑀕𑁆𑀕𑀳𑀻𑀢𑀁.

𑀲𑀻𑀫𑀸𑀢𑀺𑀕𑁄 𑀩𑁆𑀭𑀸𑀳𑁆𑀫𑀡𑁄 𑀢𑀲𑁆𑀲 𑀦𑀢𑁆𑀣𑀺, 𑀜𑀢𑁆𑀯𑀸 𑀘 𑀤𑀺𑀲𑁆𑀯𑀸 𑀘 𑀲𑀫𑀼𑀕𑁆𑀕𑀳𑀻𑀢𑀦𑁆𑀢𑀺. 𑀲𑀻𑀫𑀸𑀢𑀺 𑀘𑀢𑀲𑁆𑀲𑁄 𑀲𑀻𑀫𑀸𑀬𑁄 𑁋 𑀲𑀓𑁆𑀓𑀸𑀬𑀤𑀺𑀝𑁆𑀞𑀺, 𑀯𑀺𑀘𑀺𑀓𑀺𑀘𑁆𑀙𑀸, 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄, 𑀤𑀺𑀝𑁆𑀞𑀸𑀦𑀼𑀲𑀬𑁄, 𑀯𑀺𑀘𑀺𑀓𑀺𑀘𑁆𑀙𑀸𑀦𑀼𑀲𑀬𑁄, 𑀢𑀤𑁂𑀓𑀝𑁆𑀞𑀸 𑀘 𑀓𑀺𑀮𑁂𑀲𑀸 𑁋 𑀅𑀬𑀁 𑀧𑀞𑀫𑀸 𑀲𑀻𑀫𑀸. 𑀑𑀴𑀸𑀭𑀺𑀓𑀁 𑀓𑀸𑀫𑀭𑀸𑀕𑀲𑀜𑁆𑀜𑁄𑀚𑀦𑀁, 𑀧𑀝𑀺𑀖𑀲𑀜𑁆𑀜𑁄𑀚𑀦𑀁, 𑀑𑀴𑀸𑀭𑀺𑀓𑁄 𑀓𑀸𑀫𑀭𑀸𑀕𑀸𑀦𑀼𑀲𑀬𑁄, 𑀧𑀝𑀺𑀖𑀸𑀦𑀼𑀲𑀬𑁄, 𑀢𑀤𑁂𑀓𑀝𑁆𑀞𑀸 𑀘 𑀓𑀺𑀮𑁂𑀲𑀸 𑁋 𑀅𑀬𑀁 𑀤𑀼𑀢𑀺𑀬𑀸 𑀲𑀻𑀫𑀸. 𑀅𑀦𑀼𑀲𑀳𑀕𑀢𑀁 𑀓𑀸𑀫𑀭𑀸𑀕𑀲𑀜𑁆𑀜𑁄𑀚𑀦𑀁, 𑀧𑀝𑀺𑀖𑀲𑀜𑁆𑀜𑁄𑀚𑀦𑀁, 𑀅𑀦𑀼𑀲𑀳𑀕𑀢𑁄 𑀓𑀸𑀫𑀭𑀸𑀕𑀸𑀦𑀼𑀲𑀬𑁄, 𑀧𑀝𑀺𑀖𑀸𑀦𑀼𑀲𑀬𑁄, 𑀢𑀤𑁂𑀓𑀝𑁆𑀞𑀸 𑀘 𑀓𑀺𑀮𑁂𑀲𑀸 𑁋 𑀅𑀬𑀁 𑀢𑀢𑀺𑀬𑀸 𑀲𑀻𑀫𑀸. 𑀭𑀽𑀧𑀭𑀸𑀕𑁄 𑀅𑀭𑀽𑀧𑀭𑀸𑀕𑁄 𑀫𑀸𑀦𑁄 𑀉𑀤𑁆𑀥𑀘𑁆𑀘𑀁 𑀅𑀯𑀺𑀚𑁆𑀚𑀸, 𑀫𑀸𑀦𑀸𑀦𑀼𑀲𑀬𑁄 𑀪𑀯𑀭𑀸𑀕𑀸𑀦𑀼𑀲𑀬𑁄 𑀅𑀯𑀺𑀚𑁆𑀚𑀸𑀦𑀼𑀲𑀬𑁄, 𑀢𑀤𑁂𑀓𑀝𑁆𑀞𑀸 𑀘 𑀓𑀺𑀮𑁂𑀲𑀸 𑁋 𑀅𑀬𑀁 𑀘𑀢𑀼𑀢𑁆𑀣𑀸 𑀲𑀻𑀫𑀸. 𑀬𑀢𑁄 𑀘 𑀘𑀢𑀽𑀳𑀺 𑀅𑀭𑀺𑀬𑀫𑀕𑁆𑀕𑁂𑀳𑀺 𑀇𑀫𑀸 𑀘𑀢𑀲𑁆𑀲𑁄 𑀲𑀻𑀫𑀸𑀬𑁄 𑀅𑀢𑀺𑀓𑁆𑀓𑀦𑁆𑀢𑁄 𑀳𑁄𑀢𑀺 𑀲𑀫𑀢𑀺𑀓𑁆𑀓𑀦𑁆𑀢𑁄 𑀯𑀻𑀢𑀺𑀯𑀢𑁆𑀢𑁄, 𑀲𑁄 𑀯𑀼𑀘𑁆𑀘𑀢𑀺 𑀲𑀻𑀫𑀸𑀢𑀺𑀕𑁄. 𑀩𑁆𑀭𑀸𑀳𑁆𑀫𑀡𑁄𑀢𑀺 𑀲𑀢𑁆𑀢𑀦𑁆𑀦𑀁 𑀥𑀫𑁆𑀫𑀸𑀦𑀁 𑀩𑀸𑀳𑀺𑀢𑀢𑁆𑀢𑀸 𑀩𑁆𑀭𑀸𑀳𑁆𑀫𑀡𑁄 𑁋 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀩𑀸𑀳𑀺𑀢𑀸 𑀳𑁄𑀢𑀺, 𑀯𑀺𑀘𑀺𑀓𑀺𑀘𑁆𑀙𑀸 𑀩𑀸𑀳𑀺𑀢𑀸 𑀳𑁄𑀢𑀺, 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄 𑀩𑀸𑀳𑀺𑀢𑁄 𑀳𑁄𑀢𑀺…𑀧𑁂… 𑀅𑀲𑀺𑀢𑁄 𑀢𑀸𑀤𑀺 𑀧𑀯𑀼𑀘𑁆𑀘𑀢𑁂 𑀲 𑀩𑁆𑀭𑀳𑁆𑀫𑀸. 𑀢𑀲𑁆𑀲𑀸𑀢𑀺 𑀅𑀭𑀳𑀢𑁄 𑀔𑀻𑀡𑀸𑀲𑀯𑀲𑁆𑀲.

𑀜𑀢𑁆𑀯𑀸𑀢𑀺 𑀧𑀭𑀘𑀺𑀢𑁆𑀢𑀜𑀸𑀡𑁂𑀦 𑀯𑀸 𑀜𑀢𑁆𑀯𑀸 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑁂𑀦 𑀯𑀸 𑀜𑀢𑁆𑀯𑀸. 𑀤𑀺𑀲𑁆𑀯𑀸𑀢𑀺 𑀫𑀁𑀲𑀘𑀓𑁆𑀔𑀼𑀦𑀸 𑀯𑀸 𑀤𑀺𑀲𑁆𑀯𑀸 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀯𑀸 𑀤𑀺𑀲𑁆𑀯𑀸. 𑀲𑀻𑀫𑀸𑀢𑀺𑀕𑁄 𑀩𑁆𑀭𑀸𑀳𑁆𑀫𑀡𑁄 𑀢𑀲𑁆𑀲 𑀦𑀢𑁆𑀣𑀺, 𑀜𑀢𑁆𑀯𑀸 𑀘 𑀤𑀺𑀲𑁆𑀯𑀸 𑀘 𑀲𑀫𑀼𑀕𑁆𑀕𑀳𑀻𑀢𑀦𑁆𑀢𑀺. 𑀢𑀲𑁆𑀲 𑀇𑀤𑀁 𑀧𑀭𑀫𑀁 𑀅𑀕𑁆𑀕𑀁 𑀲𑁂𑀝𑁆𑀞𑀁 𑀯𑀺𑀲𑀺𑀝𑁆𑀞𑀁 [𑀯𑀺𑀲𑁂𑀝𑁆𑀞𑀁 (𑀲𑀻. 𑀲𑁆𑀬𑀸.)] 𑀧𑀸𑀫𑁄𑀓𑁆𑀔𑀁 𑀉𑀢𑁆𑀢𑀫𑀁 𑀧𑀯𑀭𑀦𑁆𑀢𑀺 𑀕𑀳𑀺𑀢𑀁 𑀧𑀭𑀸𑀫𑀝𑁆𑀞𑀁 𑀅𑀪𑀺𑀦𑀺𑀯𑀺𑀝𑁆𑀞𑀁 𑀅𑀚𑁆𑀛𑁄𑀲𑀺𑀢𑀁 𑀅𑀥𑀺𑀫𑀼𑀢𑁆𑀢𑀁 𑀦𑀢𑁆𑀣𑀺 𑀦 𑀲𑀦𑁆𑀢𑀺 𑀦 𑀲𑀁𑀯𑀺𑀚𑁆𑀚𑀢𑀺 𑀦𑀼𑀧𑀮𑀩𑁆𑀪𑀢𑀺, 𑀧𑀳𑀻𑀦𑀁 𑀲𑀫𑀼𑀘𑁆𑀙𑀺𑀦𑁆𑀦𑀁 𑀯𑀽𑀧𑀲𑀦𑁆𑀢𑀁 𑀧𑀝𑀺𑀧𑀲𑁆𑀲𑀤𑁆𑀥𑀁 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀁 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀦𑁆𑀢𑀺 𑁋 𑀲𑀻𑀫𑀸𑀢𑀺𑀕𑁄 𑀩𑁆𑀭𑀸𑀳𑁆𑀫𑀡𑁄 𑀢𑀲𑁆𑀲 𑀦𑀢𑁆𑀣𑀺 𑀜𑀢𑁆𑀯𑀸 𑀘 𑀤𑀺𑀲𑁆𑀯𑀸 𑀘 𑀲𑀫𑀼𑀕𑁆𑀕𑀳𑀻𑀢𑀁.

𑀦 𑀭𑀸𑀕𑀭𑀸𑀕𑀻 𑀦 𑀯𑀺𑀭𑀸𑀕𑀭𑀢𑁆𑀢𑁄𑀢𑀺. 𑀭𑀸𑀕𑀭𑀢𑁆𑀢𑀸 𑀯𑀼𑀘𑁆𑀘𑀦𑁆𑀢𑀺 𑀬𑁂 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀭𑀢𑁆𑀢𑀸 𑀕𑀺𑀤𑁆𑀥𑀸 𑀕𑀥𑀺𑀢𑀸 𑀫𑀼𑀘𑁆𑀙𑀺𑀢𑀸 𑀅𑀚𑁆𑀛𑁄𑀲𑀦𑁆𑀦𑀸 𑀮𑀕𑁆𑀕𑀸 𑀮𑀕𑁆𑀕𑀺𑀢𑀸 𑀧𑀮𑀺𑀩𑀼𑀤𑁆𑀥𑀸. 𑀯𑀺𑀭𑀸𑀕𑀭𑀢𑁆𑀢𑀸 𑀯𑀼𑀘𑁆𑀘𑀦𑁆𑀢𑀺 𑀬𑁂 𑀭𑀽𑀧𑀸𑀯𑀘𑀭𑀅𑀭𑀽𑀧𑀸𑀯𑀘𑀭𑀲𑀫𑀸𑀧𑀢𑁆𑀢𑀻𑀲𑀼 𑀭𑀢𑁆𑀢𑀸 𑀕𑀺𑀤𑁆𑀥𑀸 𑀕𑀥𑀺𑀢𑀸 𑀫𑀼𑀘𑁆𑀙𑀺𑀢𑀸 𑀅𑀚𑁆𑀛𑁄𑀲𑀦𑁆𑀦𑀸 𑀮𑀕𑁆𑀕𑀸 𑀮𑀕𑁆𑀕𑀺𑀢𑀸 𑀧𑀮𑀺𑀩𑀼𑀤𑁆𑀥𑀸. 𑀦 𑀭𑀸𑀕𑀭𑀸𑀕𑀻 𑀦 𑀯𑀺𑀭𑀸𑀕𑀭𑀢𑁆𑀢𑁄𑀢𑀺 𑀬𑀢𑁄 𑀓𑀸𑀫𑀭𑀸𑀕𑁄 𑀘 𑀭𑀽𑀧𑀭𑀸𑀕𑁄 𑀘 𑀅𑀭𑀽𑀧𑀭𑀸𑀕𑁄 𑀘 𑀧𑀳𑀻𑀦𑀸 𑀳𑁄𑀦𑁆𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 [𑀅𑀦𑀪𑀸𑀯𑀓𑀢𑀸 (𑀲𑀻.), 𑀅𑀦𑀪𑀸𑀯𑀁𑀕𑀢𑀸 (𑀲𑁆𑀬𑀸.)] 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸. 𑀏𑀢𑁆𑀢𑀸𑀯𑀢𑀸 𑀦 𑀭𑀸𑀕𑀭𑀸𑀕𑀻 𑀦 𑀯𑀺𑀭𑀸𑀕𑀭𑀢𑁆𑀢𑁄.

𑀢𑀲𑁆𑀲𑀻𑀥 𑀦𑀢𑁆𑀣𑀺 𑀧𑀭𑀫𑀼𑀕𑁆𑀕𑀳𑀻𑀢𑀦𑁆𑀢𑀺. 𑀢𑀲𑁆𑀲𑀸𑀢𑀺 𑀅𑀭𑀳𑀢𑁄 𑀔𑀻𑀡𑀸𑀲𑀯𑀲𑁆𑀲. 𑀢𑀲𑁆𑀲 𑀇𑀤𑀁 𑀧𑀭𑀫𑀁 𑀅𑀕𑁆𑀕𑀁 𑀲𑁂𑀝𑁆𑀞𑀁 𑀯𑀺𑀲𑀺𑀝𑁆𑀞𑀁 𑀧𑀸𑀫𑁄𑀓𑁆𑀔𑀁 𑀉𑀢𑁆𑀢𑀫𑀁 𑀧𑀯𑀭𑀦𑁆𑀢𑀺 𑀕𑀳𑀺𑀢𑀁 𑀧𑀭𑀸𑀫𑀝𑁆𑀞𑀁 𑀅𑀪𑀺𑀦𑀺𑀯𑀺𑀝𑁆𑀞𑀁 𑀅𑀚𑁆𑀛𑁄𑀲𑀺𑀢𑀁 𑀅𑀥𑀺𑀫𑀼𑀢𑁆𑀢𑀁 𑀦𑀢𑁆𑀣𑀺 𑀦 𑀲𑀦𑁆𑀢𑀺 𑀦 𑀲𑀁𑀯𑀺𑀚𑁆𑀚𑀢𑀺 𑀦𑀼𑀧𑀮𑀩𑁆𑀪𑀢𑀺, 𑀧𑀳𑀻𑀦𑀁 𑀲𑀫𑀼𑀘𑁆𑀙𑀺𑀦𑁆𑀦𑀁 𑀯𑀽𑀧𑀲𑀦𑁆𑀢𑀁 𑀧𑀝𑀺𑀧𑀲𑁆𑀲𑀤𑁆𑀥𑀁 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀁 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀦𑁆𑀢𑀺 𑁋 𑀢𑀲𑁆𑀲𑀻𑀥 𑀦𑀢𑁆𑀣𑀺 𑀧𑀭𑀫𑀼𑀕𑁆𑀕𑀳𑀻𑀢𑀁.

𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀲𑀻𑀫𑀸𑀢𑀺𑀕𑁄 𑀩𑁆𑀭𑀸𑀳𑁆𑀫𑀡𑁄 𑀢𑀲𑁆𑀲 𑀦𑀢𑁆𑀣𑀺, 𑀜𑀢𑁆𑀯𑀸 𑀘 𑀤𑀺𑀲𑁆𑀯𑀸 𑀘 𑀲𑀫𑀼𑀕𑁆𑀕𑀳𑀻𑀢𑀁;

𑀦 𑀭𑀸𑀕𑀭𑀸𑀕𑀻 𑀦 𑀯𑀺𑀭𑀸𑀕𑀭𑀢𑁆𑀢𑁄, 𑀢𑀲𑁆𑀲𑀻𑀥 𑀦𑀢𑁆𑀣𑀺 𑀧𑀭𑀫𑀼𑀕𑁆𑀕𑀳𑀻𑀢’’𑀦𑁆𑀢𑀺.

𑀲𑀼𑀤𑁆𑀥𑀝𑁆𑀞𑀓𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁄 𑀘𑀢𑀼𑀢𑁆𑀣𑁄.