𑁧𑁬. 𑀲𑀸𑀭𑀺𑀧𑀼𑀢𑁆𑀢𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁄
𑀅𑀣 𑀲𑀸𑀭𑀺𑀧𑀼𑀢𑁆𑀢𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑀁 𑀯𑀓𑁆𑀔𑀢𑀺 𑁋
𑁧𑁯𑁦. 𑀦 𑀫𑁂 𑀤𑀺𑀝𑁆𑀞𑁄 𑀇𑀢𑁄 𑀧𑀼𑀩𑁆𑀩𑁂, [𑀇𑀘𑁆𑀘𑀸𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄]
𑀦 𑀲𑀼𑀢𑁄 𑀉𑀤 𑀓𑀲𑁆𑀲𑀘𑀺;
𑀏𑀯𑀁 𑀯𑀕𑁆𑀕𑀼𑀯𑀤𑁄 𑀲𑀢𑁆𑀣𑀸, 𑀢𑀼𑀲𑀺𑀢𑀸 𑀕𑀡𑀺𑀫𑀸𑀕𑀢𑁄.
𑀦 𑀫𑁂 𑀤𑀺𑀝𑁆𑀞𑁄 𑀇𑀢𑁄 𑀧𑀼𑀩𑁆𑀩𑁂𑀢𑀺. 𑀇𑀢𑁄 𑀧𑀼𑀩𑁆𑀩𑁂 𑀫𑁂 𑀫𑀬𑀸 𑀦 𑀤𑀺𑀝𑁆𑀞𑀧𑀼𑀩𑁆𑀩𑁄 𑀲𑁄 𑀪𑀕𑀯𑀸 𑀇𑀫𑀺𑀦𑀸 𑀘𑀓𑁆𑀔𑀼𑀦𑀸 𑀇𑀫𑀺𑀦𑀸 𑀅𑀢𑁆𑀢𑀪𑀸𑀯𑁂𑀦. 𑀬𑀤𑀸 𑀪𑀕𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀧𑀸𑀭𑀺𑀘𑁆𑀙𑀢𑁆𑀢𑀓𑀫𑀽𑀮𑁂 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸𑀬𑀁 𑀯𑀲𑁆𑀲𑀁𑀯𑀼𑀢𑁆𑀣𑁄 [𑀯𑀲𑁆𑀲𑀁𑀯𑀼𑀝𑁆𑀞𑁄 (𑀲𑁆𑀬𑀸.)] 𑀤𑁂𑀯𑀕𑀡𑀧𑀭𑀺𑀯𑀼𑀢𑁄 𑀫𑀚𑁆𑀛𑁂 𑀫𑀡𑀺𑀫𑀬𑁂𑀦 𑀲𑁄𑀧𑀸𑀡𑁂𑀦 𑀲𑀗𑁆𑀓𑀲𑁆𑀲𑀦𑀕𑀭𑀁 𑀑𑀢𑀺𑀡𑁆𑀡𑁄 𑀇𑀫𑀁 𑀤𑀲𑁆𑀲𑀦𑀁 𑀧𑀼𑀩𑁆𑀩𑁂 𑀦 𑀤𑀺𑀝𑁆𑀞𑁄𑀢𑀺 𑁋 𑀦 𑀫𑁂 𑀤𑀺𑀝𑁆𑀞𑁄 𑀇𑀢𑁄 𑀧𑀼𑀩𑁆𑀩𑁂.
𑀇𑀘𑁆𑀘𑀸𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄𑀢𑀺. 𑀇𑀘𑁆𑀘𑀸𑀢𑀺 𑀧𑀤𑀲𑀦𑁆𑀥𑀺 𑀧𑀤𑀲𑀁𑀲𑀕𑁆𑀕𑁄 𑀧𑀤𑀧𑀸𑀭𑀺𑀧𑀽𑀭𑀻 𑀅𑀓𑁆𑀔𑀭𑀲𑀫𑀯𑀸𑀬𑁄 𑀩𑁆𑀬𑀜𑁆𑀚𑀦𑀲𑀺𑀮𑀺𑀝𑁆𑀞𑀢𑀸 𑀧𑀤𑀸𑀦𑀼𑀧𑀼𑀩𑁆𑀩𑀢𑀸𑀧𑁂𑀢𑀁 𑁋 𑀇𑀘𑁆𑀘𑀸𑀢𑀺. 𑀆𑀬𑀲𑁆𑀫𑀸𑀢𑀺 𑀧𑀺𑀬𑀯𑀘𑀦𑀁 𑀕𑀭𑀼𑀯𑀘𑀦𑀁 𑀲𑀕𑀸𑀭𑀯𑀲𑀧𑁆𑀧𑀢𑀺𑀲𑁆𑀲𑀯𑀘𑀦𑀫𑁂𑀢𑀁 𑁋 𑀆𑀬𑀲𑁆𑀫𑀸𑀢𑀺. 𑀲𑀸𑀭𑀺𑀧𑀼𑀢𑁆𑀢𑁄𑀢𑀺 𑀢𑀲𑁆𑀲 𑀣𑁂𑀭𑀲𑁆𑀲 𑀦𑀸𑀫𑀁 𑀲𑀗𑁆𑀔𑀸 𑀲𑀫𑀜𑁆𑀜𑀸 𑀧𑀜𑁆𑀜𑀢𑁆𑀢𑀺 𑀯𑁄𑀳𑀸𑀭𑁄 𑀦𑀸𑀫𑀁 𑀦𑀸𑀫𑀓𑀫𑁆𑀫𑀁 𑀦𑀸𑀫𑀥𑁂𑀬𑁆𑀬𑀁 𑀦𑀺𑀭𑀼𑀢𑁆𑀢𑀺 𑀩𑁆𑀬𑀜𑁆𑀚𑀦𑀁 𑀅𑀪𑀺𑀮𑀸𑀧𑁄𑀢𑀺 𑁋 𑀇𑀘𑁆𑀘𑀸𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄.
𑀦 𑀲𑀼𑀢𑁄 𑀉𑀤 𑀓𑀲𑁆𑀲𑀘𑀻𑀢𑀺. 𑀦𑀸𑀢𑀺 𑀧𑀝𑀺𑀓𑁆𑀔𑁂𑀧𑁄. 𑀉𑀤𑀸𑀢𑀺 𑀧𑀤𑀲𑀦𑁆𑀥𑀺 𑀧𑀤𑀲𑀁𑀲𑀕𑁆𑀕𑁄 𑀧𑀤𑀧𑀸𑀭𑀺𑀧𑀽𑀭𑀻 𑀅𑀓𑁆𑀔𑀭𑀲𑀫𑀯𑀸𑀬𑁄 𑀩𑁆𑀬𑀜𑁆𑀚𑀦𑀲𑀺𑀮𑀺𑀝𑁆𑀞𑀢𑀸 𑀧𑀤𑀸𑀦𑀼𑀧𑀼𑀩𑁆𑀩𑀢𑀸𑀧𑁂𑀢𑀁 𑁋 𑀉𑀤𑀸𑀢𑀺. 𑀓𑀲𑁆𑀲𑀘𑀻𑀢𑀺 𑀔𑀢𑁆𑀢𑀺𑀬𑀲𑁆𑀲 𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀸 𑀯𑁂𑀲𑁆𑀲𑀲𑁆𑀲 𑀯𑀸 𑀲𑀼𑀤𑁆𑀤𑀲𑁆𑀲 𑀯𑀸 𑀕𑀳𑀝𑁆𑀞𑀲𑁆𑀲 𑀯𑀸 𑀧𑀩𑁆𑀩𑀚𑀺𑀢𑀲𑁆𑀲 𑀯𑀸 𑀤𑁂𑀯𑀲𑁆𑀲 𑀯𑀸 𑀫𑀦𑀼𑀲𑁆𑀲𑀲𑁆𑀲 𑀯𑀸𑀢𑀺 𑁋 𑀦 𑀲𑀼𑀢𑁄 𑀉𑀤 𑀓𑀲𑁆𑀲𑀘𑀺.
𑀏𑀯𑀁 𑀯𑀕𑁆𑀕𑀼𑀯𑀤𑁄 𑀲𑀢𑁆𑀣𑀸𑀢𑀺. 𑀏𑀯𑀁 𑀯𑀕𑁆𑀕𑀼𑀯𑀤𑁄 𑀫𑀥𑀼𑀭𑀯𑀤𑁄 𑀧𑁂𑀫𑀦𑀻𑀬𑀯𑀤𑁄 𑀳𑀤𑀬𑀗𑁆𑀕𑀫𑀯𑀤𑁄 𑀓𑀭𑀯𑀻𑀓𑀭𑀼𑀢𑀫𑀜𑁆𑀚𑀼𑀖𑁄𑀲𑁄 [𑀓𑀭𑀯𑀺𑀓𑀭𑀼𑀤𑀫𑀜𑁆𑀚𑀼𑀲𑁆𑀲𑀭𑁄 (𑀲𑁆𑀬𑀸.)]. 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑁄 𑀔𑁄 𑀧𑀦 𑀢𑀲𑁆𑀲 𑀪𑀕𑀯𑀢𑁄 𑀫𑀼𑀔𑀢𑁄 𑀖𑁄𑀲𑁄 𑀦𑀺𑀘𑁆𑀙𑀭𑀢𑀺 𑁋 𑀯𑀺𑀲𑀝𑁆𑀞𑁄 𑀘 𑀯𑀺𑀜𑁆𑀜𑁂𑀬𑁆𑀬𑁄 𑀘 𑀫𑀜𑁆𑀚𑀼 𑀘 𑀲𑀯𑀦𑀻𑀬𑁄 𑀘 𑀩𑀺𑀦𑁆𑀤𑀼 𑀘 𑀅𑀯𑀺𑀲𑀸𑀭𑀻 𑀘 𑀕𑀫𑁆𑀪𑀻𑀭𑁄 𑀘 𑀦𑀺𑀦𑁆𑀦𑀸𑀤𑀺 𑀘. 𑀬𑀣𑀸 𑀧𑀭𑀺𑀲𑀁 𑀔𑁄 𑀧𑀦 𑀲𑁄 𑀪𑀕𑀯𑀸 𑀲𑀭𑁂𑀦 𑀯𑀺𑀜𑁆𑀜𑀸𑀧𑁂𑀢𑀺, 𑀦 𑀅𑀲𑁆𑀲 𑀩𑀳𑀺𑀤𑁆𑀥𑀸 𑀧𑀭𑀺𑀲𑀸𑀬 𑀖𑁄𑀲𑁄 𑀦𑀺𑀘𑁆𑀙𑀭𑀢𑀺, 𑀩𑁆𑀭𑀳𑁆𑀫𑀲𑁆𑀲𑀭𑁄 𑀔𑁄 𑀧𑀦 𑀲𑁄 𑀪𑀕𑀯𑀸 𑀓𑀭𑀯𑀻𑀓𑀪𑀸𑀡𑀻𑀢𑀺 𑁋 𑀏𑀯𑀁 𑀯𑀕𑁆𑀕𑀼𑀯𑀤𑁄.
𑀲𑀢𑁆𑀣𑀸𑀢𑀺 𑀲𑀢𑁆𑀣𑀸 𑀪𑀕𑀯𑀸 𑀲𑀢𑁆𑀣𑀯𑀸𑀳𑁄. 𑀬𑀣𑀸 𑀲𑀢𑁆𑀣𑀯𑀸𑀳𑁄 𑀲𑀢𑁆𑀢𑁂 𑀓𑀦𑁆𑀢𑀸𑀭𑀁 𑀢𑀸𑀭𑁂𑀢𑀺, 𑀘𑁄𑀭𑀓𑀦𑁆𑀢𑀸𑀭𑀁 𑀢𑀸𑀭𑁂𑀢𑀺, 𑀯𑀸𑀴𑀓𑀦𑁆𑀢𑀸𑀭𑀁 𑀢𑀸𑀭𑁂𑀢𑀺, 𑀤𑀼𑀩𑁆𑀪𑀺𑀓𑁆𑀔𑀓𑀦𑁆𑀢𑀸𑀭𑀁 𑀢𑀸𑀭𑁂𑀢𑀺, 𑀦𑀺𑀭𑀼𑀤𑀓𑀓𑀦𑁆𑀢𑀸𑀭𑀁 𑀢𑀸𑀭𑁂𑀢𑀺 𑀉𑀢𑁆𑀢𑀸𑀭𑁂𑀢𑀺 𑀦𑀺𑀢𑁆𑀢𑀸𑀭𑁂𑀢𑀺 𑀧𑀢𑀸𑀭𑁂𑀢𑀺 𑀔𑁂𑀫𑀦𑁆𑀢𑀪𑀽𑀫𑀺𑀁 𑀲𑀫𑁆𑀧𑀸𑀧𑁂𑀢𑀺; 𑀏𑀯𑀫𑁂𑀯 𑀪𑀕𑀯𑀸 𑀲𑀢𑁆𑀣𑀯𑀸𑀳𑁄 𑀲𑀢𑁆𑀢𑁂 𑀓𑀦𑁆𑀢𑀸𑀭𑀁 𑀢𑀸𑀭𑁂𑀢𑀺, 𑀚𑀸𑀢𑀺𑀓𑀦𑁆𑀢𑀸𑀭𑀁 𑀢𑀸𑀭𑁂𑀢𑀺, 𑀚𑀭𑀸𑀓𑀦𑁆𑀢𑀸𑀭𑀁 𑀢𑀸𑀭𑁂𑀢𑀺, 𑀩𑁆𑀬𑀸𑀥𑀺𑀓𑀦𑁆𑀢𑀸𑀭𑀁…𑀧𑁂… 𑀫𑀭𑀡𑀓𑀦𑁆𑀢𑀸𑀭𑀁… 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀓𑀦𑁆𑀢𑀸𑀭𑀁 𑀢𑀸𑀭𑁂𑀢𑀺 𑀭𑀸𑀕𑀓𑀦𑁆𑀢𑀸𑀭𑀁 𑀢𑀸𑀭𑁂𑀢𑀺 𑀤𑁄𑀲𑀓𑀦𑁆𑀢𑀸𑀭𑀁… 𑀫𑁄𑀳𑀓𑀦𑁆𑀢𑀸𑀭𑀁… 𑀫𑀸𑀦𑀓𑀦𑁆𑀢𑀸𑀭𑀁… 𑀤𑀺𑀝𑁆𑀞𑀺𑀓𑀦𑁆𑀢𑀸𑀭𑀁… 𑀓𑀺𑀮𑁂𑀲𑀓𑀦𑁆𑀢𑀸𑀭𑀁… 𑀤𑀼𑀘𑁆𑀘𑀭𑀺𑀢𑀓𑀦𑁆𑀢𑀸𑀭𑀁 𑀢𑀸𑀭𑁂𑀢𑀺, 𑀭𑀸𑀕𑀕𑀳𑀦𑀁 𑀢𑀸𑀭𑁂𑀢𑀺, 𑀤𑁄𑀲𑀕𑀳𑀦𑀁… 𑀫𑁄𑀳𑀕𑀳𑀦𑀁… 𑀫𑀸𑀦𑀕𑀳𑀦𑀁… 𑀤𑀺𑀝𑁆𑀞𑀺𑀕𑀳𑀦𑀁… 𑀓𑀺𑀮𑁂𑀲𑀕𑀳𑀦𑀁… 𑀤𑀼𑀘𑁆𑀘𑀭𑀺𑀢𑀕𑀳𑀦𑀁 𑀢𑀸𑀭𑁂𑀢𑀺 𑀉𑀢𑁆𑀢𑀸𑀭𑁂𑀢𑀺 𑀦𑀺𑀢𑁆𑀢𑀸𑀭𑁂𑀢𑀺 𑀧𑀢𑀸𑀭𑁂𑀢𑀺 𑀔𑁂𑀫𑀦𑁆𑀢𑀁 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁 𑀲𑀫𑁆𑀧𑀸𑀧𑁂𑀢𑀻𑀢𑀺. 𑀏𑀯𑀫𑁆𑀧𑀺 𑀪𑀕𑀯𑀸 𑀲𑀢𑁆𑀣𑀯𑀸𑀳𑁄.
𑀅𑀣 𑀯𑀸 𑀪𑀕𑀯𑀸 𑀦𑁂𑀢𑀸 𑀯𑀺𑀦𑁂𑀢𑀸 𑀅𑀦𑀼𑀦𑁂𑀢𑀸 𑀧𑀜𑁆𑀜𑀧𑁂𑀢𑀸 𑀦𑀺𑀚𑁆𑀛𑀸𑀧𑁂𑀢𑀸 𑀧𑁂𑀓𑁆𑀔𑁂𑀢𑀸 𑀧𑀲𑀸𑀤𑁂𑀢𑀸𑀢𑀺. 𑀏𑀯𑀫𑁆𑀧𑀺 𑀪𑀕𑀯𑀸 𑀲𑀢𑁆𑀣𑀯𑀸𑀳𑁄.
𑀅𑀣 𑀯𑀸 𑀪𑀕𑀯𑀸 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀫𑀕𑁆𑀕𑀲𑁆𑀲 𑀉𑀧𑁆𑀧𑀸𑀤𑁂𑀢𑀸, 𑀅𑀲𑀜𑁆𑀚𑀸𑀢𑀲𑁆𑀲 𑀫𑀕𑁆𑀕𑀲𑁆𑀲 𑀲𑀜𑁆𑀚𑀦𑁂𑀢𑀸, 𑀅𑀦𑀓𑁆𑀔𑀸𑀢𑀲𑁆𑀲 𑀫𑀕𑁆𑀕𑀲𑁆𑀲 𑀅𑀓𑁆𑀔𑀸𑀢𑀸, 𑀫𑀕𑁆𑀕𑀜𑁆𑀜𑀽 𑀫𑀕𑁆𑀕𑀯𑀺𑀤𑀽 𑀫𑀕𑁆𑀕𑀓𑁄𑀯𑀺𑀤𑁄 𑀫𑀕𑁆𑀕𑀸𑀦𑀼𑀕𑀸 𑀘 𑀧𑀦 𑀏𑀢𑀭𑀳𑀺 𑀲𑀸𑀯𑀓𑀸 𑀯𑀺𑀳𑀭𑀦𑁆𑀢𑀺 𑀧𑀘𑁆𑀙𑀸 𑀲𑀫𑀦𑁆𑀦𑀸𑀕𑀢𑀸𑀢𑀺. 𑀏𑀯𑀫𑁆𑀧𑀺 𑀪𑀕𑀯𑀸 𑀲𑀢𑁆𑀣𑀯𑀸𑀳𑁄𑀢𑀺 𑁋 𑀏𑀯𑀁 𑀯𑀕𑁆𑀕𑀼𑀯𑀤𑁄 𑀲𑀢𑁆𑀣𑀸.
𑀢𑀼𑀲𑀺𑀢𑀸 𑀕𑀡𑀺𑀫𑀸𑀕𑀢𑁄𑀢𑀺. 𑀪𑀕𑀯𑀸 𑀢𑀼𑀲𑀺𑀢𑀓𑀸𑀬𑀸 𑀘𑀯𑀺𑀢𑁆𑀯𑀸 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀫𑀸𑀢𑀼𑀓𑀼𑀘𑁆𑀙𑀺𑀁 𑀑𑀓𑁆𑀓𑀦𑁆𑀢𑁄𑀢𑀺. 𑀏𑀯𑀫𑁆𑀧𑀺 𑀢𑀼𑀲𑀺𑀢𑀸 𑀕𑀡𑀺𑀫𑀸𑀕𑀢𑁄.
𑀅𑀣 𑀯𑀸 𑀤𑁂𑀯𑀸 𑀯𑀼𑀘𑁆𑀘𑀦𑁆𑀢𑀺 𑀢𑀼𑀲𑀺𑀢𑀸. 𑀢𑁂 𑀢𑀼𑀝𑁆𑀞𑀸 𑀲𑀦𑁆𑀢𑀼𑀝𑁆𑀞𑀸 𑀅𑀢𑁆𑀢𑀫𑀦𑀸 𑀧𑀫𑀼𑀤𑀺𑀢𑀸 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑀸 𑀤𑁂𑀯𑀮𑁄𑀓𑀢𑁄 𑀕𑀡𑀺𑀁 𑀆𑀕𑀢𑁄𑀢𑀺. 𑀏𑀯𑀫𑁆𑀧𑀺 𑀢𑀼𑀲𑀺𑀢𑀸 𑀕𑀡𑀺𑀫𑀸𑀕𑀢𑁄. 𑀅𑀣 𑀯𑀸 𑀅𑀭𑀳𑀦𑁆𑀢𑁄 𑀯𑀼𑀘𑁆𑀘𑀦𑁆𑀢𑀺 𑀢𑀼𑀲𑀺𑀢𑀸. 𑀢𑁂 𑀢𑀼𑀝𑁆𑀞𑀸 𑀲𑀦𑁆𑀢𑀼𑀝𑁆𑀞𑀸 𑀅𑀢𑁆𑀢𑀫𑀦𑀸 𑀧𑀭𑀺𑀧𑀼𑀡𑁆𑀡𑀲𑀗𑁆𑀓𑀧𑁆𑀧𑀸 𑀅𑀭𑀳𑀦𑁆𑀢𑀸𑀦𑀁 𑀕𑀡𑀺𑀁 𑀆𑀕𑀢𑁄𑀢𑀺. 𑀏𑀯𑀫𑁆𑀧𑀺 𑀢𑀼𑀲𑀺𑀢𑀸 𑀕𑀡𑀺𑀫𑀸𑀕𑀢𑁄. 𑀕𑀡𑀻𑀢𑀺 𑀕𑀡𑀻 𑀪𑀕𑀯𑀸. 𑀕𑀡𑀸𑀘𑀭𑀺𑀬𑁄𑀢𑀺 𑀕𑀡𑀻, 𑀕𑀡𑀲𑁆𑀲 𑀲𑀢𑁆𑀣𑀸𑀢𑀺 𑀕𑀡𑀻, 𑀕𑀡𑀁 𑀧𑀭𑀺𑀳𑀭𑀢𑀻𑀢𑀺 𑀕𑀡𑀻, 𑀕𑀡𑀁 𑀑𑀯𑀤𑀢𑀻𑀢𑀺 𑀕𑀡𑀻, 𑀕𑀡𑀫𑀦𑀼𑀲𑀸𑀲𑀢𑀻𑀢𑀺 𑀕𑀡𑀻, 𑀯𑀺𑀲𑀸𑀭𑀤𑁄 𑀕𑀡𑀁 𑀉𑀧𑀲𑀗𑁆𑀓𑀫𑀢𑀻𑀢𑀺 𑀕𑀡𑀻, 𑀕𑀡𑀲𑁆𑀲 [𑀕𑀡𑁄𑀲𑁆𑀲 (𑀲𑀻.)] 𑀲𑀼𑀲𑁆𑀲𑀽𑀲𑀢𑀺 𑀲𑁄𑀢𑀁 𑀑𑀤𑀳𑀢𑀺 𑀅𑀜𑁆𑀜𑀸 𑀘𑀺𑀢𑁆𑀢𑀁 𑀉𑀧𑀝𑁆𑀞𑀧𑁂𑀢𑀻𑀢𑀺 𑀕𑀡𑀻, 𑀕𑀡𑀁 𑀅𑀓𑀼𑀲𑀮𑀸 𑀯𑀼𑀝𑁆𑀞𑀸𑀧𑁂𑀢𑁆𑀯𑀸 𑀓𑀼𑀲𑀮𑁂 𑀧𑀢𑀺𑀝𑁆𑀞𑀸𑀧𑁂𑀢𑀻𑀢𑀺 𑀕𑀡𑀻, 𑀪𑀺𑀓𑁆𑀔𑀼𑀕𑀡𑀲𑁆𑀲 𑀕𑀡𑀻, 𑀪𑀺𑀓𑁆𑀔𑀼𑀦𑀺𑀕𑀡𑀲𑁆𑀲 𑀕𑀡𑀻, 𑀉𑀧𑀸𑀲𑀓𑀕𑀡𑀲𑁆𑀲 𑀕𑀡𑀻, 𑀉𑀧𑀸𑀲𑀺𑀓𑀸𑀕𑀡𑀲𑁆𑀲 𑀕𑀡𑀻, 𑀭𑀸𑀚𑀕𑀡𑀲𑁆𑀲 𑀕𑀡𑀻, 𑀔𑀢𑁆𑀢𑀺𑀬𑀕𑀡𑀲𑁆𑀲… 𑀩𑁆𑀭𑀸𑀳𑁆𑀫𑀡𑀕𑀡𑀲𑁆𑀲… 𑀯𑁂𑀲𑁆𑀲𑀕𑀡𑀲𑁆𑀲… 𑀲𑀼𑀤𑁆𑀤𑀕𑀡𑀲𑁆𑀲… 𑀤𑁂𑀯𑀕𑀡𑀲𑁆𑀲… 𑀩𑁆𑀭𑀳𑁆𑀫𑀕𑀡𑀲𑁆𑀲 𑀕𑀡𑀻, 𑀲𑀗𑁆𑀖𑀻 𑀕𑀡𑀻 𑀕𑀡𑀸𑀘𑀭𑀺𑀬𑁄. 𑀆𑀕𑀢𑁄𑀢𑀺 𑀉𑀧𑀕𑀢𑁄 𑀲𑀫𑀼𑀧𑀕𑀢𑁄 𑀲𑀫𑀼𑀧𑀧𑀦𑁆𑀦𑁄 [𑀲𑀫𑁆𑀧𑀢𑁆𑀢𑁄 (𑀲𑁆𑀬𑀸. 𑀓.)] 𑀲𑀗𑁆𑀓𑀲𑁆𑀲𑀦𑀕𑀭𑀦𑁆𑀢𑀺 𑁋 𑀢𑀼𑀲𑀺𑀢𑀸 𑀕𑀡𑀺𑀫𑀸𑀕𑀢𑁄.
𑀢𑁂𑀦𑀸𑀳 𑀣𑁂𑀭𑁄 𑀲𑀸𑀭𑀺𑀧𑀼𑀢𑁆𑀢𑁄 𑁋
‘‘𑀦 𑀫𑁂 𑀤𑀺𑀝𑁆𑀞𑁄 𑀇𑀢𑁄 𑀧𑀼𑀩𑁆𑀩𑁂, [𑀇𑀘𑁆𑀘𑀸𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄]
𑀦 𑀲𑀼𑀢𑁄 𑀉𑀤 𑀓𑀲𑁆𑀲𑀘𑀺;
𑀏𑀯𑀁 𑀯𑀕𑁆𑀕𑀼𑀯𑀤𑁄 𑀲𑀢𑁆𑀣𑀸, 𑀢𑀼𑀲𑀺𑀢𑀸 𑀕𑀡𑀺𑀫𑀸𑀕𑀢𑁄’’𑀢𑀺.
𑁧𑁯𑁧. 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲, 𑀬𑀣𑀸 𑀤𑀺𑀲𑁆𑀲𑀢𑀺 𑀘𑀓𑁆𑀔𑀼𑀫𑀸;
𑀲𑀩𑁆𑀩𑀁 𑀢𑀫𑀁 𑀯𑀺𑀦𑁄𑀤𑁂𑀢𑁆𑀯𑀸, 𑀏𑀓𑁄𑀯 𑀭𑀢𑀺𑀫𑀚𑁆𑀛𑀕𑀸.
𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲𑀸𑀢𑀺 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀲𑀫𑀸𑀭𑀓𑀲𑁆𑀲 𑀲𑀩𑁆𑀭𑀳𑁆𑀫𑀓𑀲𑁆𑀲 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬 𑀲𑀤𑁂𑀯𑀫𑀦𑀼𑀲𑁆𑀲𑀸𑀬𑀸𑀢𑀺 𑁋 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲.
𑀬𑀣𑀸 𑀤𑀺𑀲𑁆𑀲𑀢𑀺 𑀘𑀓𑁆𑀔𑀼𑀫𑀸𑀢𑀺 𑀬𑀣𑀸 𑀪𑀕𑀯𑀦𑁆𑀢𑀁 𑀢𑀸𑀯𑀢𑀺𑀁𑀲𑀪𑀯𑀦𑁂 𑀧𑀸𑀭𑀺𑀘𑁆𑀙𑀢𑁆𑀢𑀓𑀫𑀽𑀮𑁂 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸𑀬𑀁 𑀦𑀺𑀲𑀺𑀦𑁆𑀦𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀁 𑀤𑁂𑀯𑀢𑀸 𑀧𑀲𑁆𑀲𑀦𑁆𑀢𑀺 𑀢𑀣𑀸 𑀫𑀦𑀼𑀲𑁆𑀲𑀸 𑀧𑀲𑁆𑀲𑀦𑁆𑀢𑀺. 𑀬𑀣𑀸 𑀫𑀦𑀼𑀲𑁆𑀲𑀸 𑀧𑀲𑁆𑀲𑀦𑁆𑀢𑀺 𑀢𑀣𑀸 𑀤𑁂𑀯𑀢𑀸 𑀧𑀲𑁆𑀲𑀦𑁆𑀢𑀺. 𑀬𑀣𑀸 𑀤𑁂𑀯𑀸𑀦𑀁 𑀤𑀺𑀲𑁆𑀲𑀢𑀺 𑀢𑀣𑀸 𑀫𑀦𑀼𑀲𑁆𑀲𑀸𑀦𑀁 𑀤𑀺𑀲𑁆𑀲𑀢𑀺. 𑀬𑀣𑀸 𑀫𑀦𑀼𑀲𑁆𑀲𑀸𑀦𑀁 𑀤𑀺𑀲𑁆𑀲𑀢𑀺 𑀢𑀣𑀸 𑀤𑁂𑀯𑀸𑀦𑀁 𑀤𑀺𑀲𑁆𑀲𑀢𑀻𑀢𑀺. 𑀏𑀯𑀫𑁆𑀧𑀺 𑀬𑀣𑀸 𑀤𑀺𑀲𑁆𑀲𑀢𑀺 𑀘𑀓𑁆𑀔𑀼𑀫𑀸. 𑀬𑀣𑀸 𑀯𑀸 𑀧𑀦𑁂𑀓𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀤𑀦𑁆𑀢𑀸 𑀤𑀦𑁆𑀢𑀯𑀡𑁆𑀡𑁂𑀦 𑀤𑀺𑀲𑁆𑀲𑀦𑁆𑀢𑀺, 𑀅𑀲𑀦𑁆𑀢𑀸 𑀲𑀦𑁆𑀢𑀯𑀡𑁆𑀡𑁂𑀦 𑀤𑀺𑀲𑁆𑀲𑀦𑁆𑀢𑀺, 𑀅𑀦𑀼𑀧𑀲𑀦𑁆𑀢𑀸 𑀉𑀧𑀲𑀦𑁆𑀢𑀯𑀡𑁆𑀡𑁂𑀦 𑀤𑀺𑀲𑁆𑀲𑀦𑁆𑀢𑀺, 𑀅𑀦𑀺𑀩𑁆𑀩𑀼𑀢𑀸 𑀦𑀺𑀩𑁆𑀩𑀼𑀢𑀯𑀡𑁆𑀡𑁂𑀦 𑀤𑀺𑀲𑁆𑀲𑀦𑁆𑀢𑀺.
‘‘𑀧𑀢𑀺𑀭𑀽𑀧𑀓𑁄 𑀫𑀢𑁆𑀢𑀺𑀓𑀸𑀓𑀼𑀡𑁆𑀟𑀮𑁄𑀯, 𑀮𑁄𑀳𑀟𑁆𑀠𑀫𑀸𑀲𑁄𑀯 [𑀮𑁄𑀳𑀫𑀸𑀲𑁄𑀯 (𑀲𑁆𑀬𑀸.)] 𑀲𑀼𑀯𑀡𑁆𑀡𑀙𑀦𑁆𑀦𑁄;
𑀘𑀭𑀦𑁆𑀢𑀺 𑀮𑁄𑀓𑁂 𑀧𑀭𑀺𑀯𑀸𑀭𑀙𑀦𑁆𑀦𑀸, 𑀅𑀦𑁆𑀢𑁄 𑀅𑀲𑀼𑀤𑁆𑀥𑀸 𑀩𑀳𑀺 𑀲𑁄𑀪𑀫𑀸𑀦𑀸’’𑀢𑀺 [𑀅𑀬𑀁 𑀕𑀸𑀣𑀸 𑀲𑀁. 𑀦𑀺. 𑁧.𑁧𑁨𑁨 𑀤𑀺𑀲𑁆𑀲𑀢𑀺].
𑀦 𑀪𑀕𑀯𑀸 𑀏𑀯𑀁 𑀤𑀺𑀲𑁆𑀲𑀢𑀺. 𑀪𑀕𑀯𑀸 𑀪𑀽𑀢𑁂𑀦 𑀢𑀘𑁆𑀙𑁂𑀦 𑀢𑀣𑁂𑀦 𑀬𑀸𑀣𑀸𑀯𑁂𑀦 𑀅𑀯𑀺𑀧𑀭𑀻𑀢𑁂𑀦 𑀲𑀪𑀸𑀯𑁂𑀦 𑀤𑀦𑁆𑀢𑁄 𑀤𑀦𑁆𑀢𑀯𑀡𑁆𑀡𑁂𑀦 𑀤𑀺𑀲𑁆𑀲𑀢𑀺, 𑀲𑀦𑁆𑀢𑁄 𑀲𑀦𑁆𑀢𑀯𑀡𑁆𑀡𑁂𑀦 𑀤𑀺𑀲𑁆𑀲𑀢𑀺, 𑀉𑀧𑀲𑀦𑁆𑀢𑁄 𑀉𑀧𑀲𑀦𑁆𑀢𑀯𑀡𑁆𑀡𑁂𑀦 𑀤𑀺𑀲𑁆𑀲𑀢𑀺, 𑀦𑀺𑀩𑁆𑀩𑀼𑀢𑁄 𑀦𑀺𑀩𑁆𑀩𑀼𑀢𑀯𑀡𑁆𑀡𑁂𑀦 𑀤𑀺𑀲𑁆𑀲𑀢𑀺, 𑀅𑀓𑀧𑁆𑀧𑀺𑀢𑀇𑀭𑀺𑀬𑀸𑀧𑀣𑀸 𑀘 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄 𑀧𑀡𑀺𑀥𑀺𑀲𑀫𑁆𑀧𑀦𑁆𑀦𑀸𑀢𑀺. 𑀏𑀯𑀫𑁆𑀧𑀺 𑀬𑀣𑀸 𑀤𑀺𑀲𑁆𑀲𑀢𑀺 𑀘𑀓𑁆𑀔𑀼𑀫𑀸.
𑀅𑀣 𑀯𑀸 𑀪𑀕𑀯𑀸 𑀯𑀺𑀲𑀼𑀤𑁆𑀥𑀲𑀤𑁆𑀤𑁄 𑀕𑀢𑀓𑀺𑀢𑁆𑀢𑀺𑀲𑀤𑁆𑀤𑀲𑀺𑀮𑁄𑀓𑁄 [𑀪𑀝𑀓𑀺𑀢𑁆𑀢𑀺𑀲𑀤𑁆𑀤𑀲𑀺𑀮𑁄𑀓𑁄 (𑀲𑁆𑀬𑀸.)] 𑀦𑀸𑀕𑀪𑀯𑀦𑁂 𑀘 𑀲𑀼𑀧𑀡𑁆𑀡𑀪𑀯𑀦𑁂 𑀘 𑀬𑀓𑁆𑀔𑀪𑀯𑀦𑁂 𑀘 𑀅𑀲𑀼𑀭𑀪𑀯𑀦𑁂 𑀘 𑀕𑀦𑁆𑀥𑀩𑁆𑀩𑀪𑀯𑀦𑁂 𑀘 𑀫𑀳𑀸𑀭𑀸𑀚𑀪𑀯𑀦𑁂 𑀘 𑀇𑀦𑁆𑀤𑀪𑀯𑀦𑁂 𑀘 𑀩𑁆𑀭𑀳𑁆𑀫𑀪𑀯𑀦𑁂 𑀘 𑀤𑁂𑀯𑀪𑀯𑀦𑁂 𑀘 𑀏𑀤𑀺𑀲𑁄 𑀘 𑀢𑀸𑀤𑀺𑀲𑁄 𑀘 𑀢𑀢𑁄 𑀘 𑀪𑀺𑀬𑁆𑀬𑁄𑀢𑀺. 𑀏𑀯𑀫𑁆𑀧𑀺 𑀬𑀣𑀸 𑀤𑀺𑀲𑁆𑀲𑀢𑀺 𑀘𑀓𑁆𑀔𑀼𑀫𑀸.
𑀅𑀣 𑀯𑀸 𑀪𑀕𑀯𑀸 𑀤𑀲𑀳𑀺 𑀩𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄, 𑀘𑀢𑀽𑀳𑀺 𑀯𑁂𑀲𑀸𑀭𑀚𑁆𑀚𑁂𑀳𑀺, 𑀘𑀢𑀽𑀳𑀺 𑀧𑀝𑀺𑀲𑀫𑁆𑀪𑀺𑀤𑀸𑀳𑀺, 𑀙𑀳𑀺 𑀅𑀪𑀺𑀜𑁆𑀜𑀸𑀳𑀺, 𑀙𑀳𑀺 𑀩𑀼𑀤𑁆𑀥𑀥𑀫𑁆𑀫𑁂𑀳𑀺, 𑀢𑁂𑀚𑁂𑀦 𑀘 𑀩𑀮𑁂𑀦 𑀘 𑀕𑀼𑀡𑁂𑀦 𑀘 𑀯𑀻𑀭𑀺𑀬𑁂𑀦 𑀘 𑀧𑀜𑁆𑀜𑀸𑀬 𑀘 𑀤𑀺𑀲𑁆𑀲𑀢𑀺 𑀜𑀸𑀬𑀢𑀺 𑀧𑀜𑁆𑀜𑀸𑀬𑀢𑀺.
‘‘𑀤𑀽𑀭𑁂 𑀲𑀦𑁆𑀢𑁄 𑀧𑀓𑀸𑀲𑁂𑀦𑁆𑀢𑀺, 𑀳𑀺𑀫𑀯𑀦𑁆𑀢𑁄𑀯 𑀧𑀩𑁆𑀩𑀢𑁄;
𑀅𑀲𑀦𑁆𑀢𑁂𑀢𑁆𑀣 𑀦 𑀤𑀺𑀲𑁆𑀲𑀦𑁆𑀢𑀺, 𑀭𑀢𑁆𑀢𑀺𑀁 𑀔𑀺𑀢𑁆𑀢𑀸 [𑀭𑀢𑁆𑀢𑀺𑀔𑀺𑀢𑁆𑀢𑀸 (𑀲𑀻.) 𑀥. 𑀧. 𑁩𑁦𑁪] 𑀬𑀣𑀸 𑀲𑀭𑀸’’𑀢𑀺.
𑀏𑀯𑀫𑁆𑀧𑀺 𑀬𑀣𑀸 𑀤𑀺𑀲𑁆𑀲𑀢𑀺 𑀘𑀓𑁆𑀔𑀼𑀫𑀸.
𑀘𑀓𑁆𑀔𑀼𑀫𑀸𑀢𑀺 𑀪𑀕𑀯𑀸 𑀧𑀜𑁆𑀘𑀳𑀺 𑀘𑀓𑁆𑀔𑀽𑀳𑀺 𑀘𑀓𑁆𑀔𑀼𑀫𑀸 𑁋 𑀫𑀁𑀲𑀘𑀓𑁆𑀔𑀼𑀦𑀸𑀧𑀺 𑀘𑀓𑁆𑀔𑀼𑀫𑀸, 𑀤𑀺𑀩𑁆𑀩𑀘𑀓𑁆𑀔𑀼𑀦𑀸𑀧𑀺 𑀘𑀓𑁆𑀔𑀼𑀫𑀸, 𑀧𑀜𑁆𑀜𑀸𑀘𑀓𑁆𑀔𑀼𑀦𑀸𑀧𑀺 𑀘𑀓𑁆𑀔𑀼𑀫𑀸, 𑀩𑀼𑀤𑁆𑀥𑀘𑀓𑁆𑀔𑀼𑀦𑀸𑀧𑀺 𑀘𑀓𑁆𑀔𑀼𑀫𑀸, 𑀲𑀫𑀦𑁆𑀢𑀘𑀓𑁆𑀔𑀼𑀦𑀸𑀧𑀺 𑀘𑀓𑁆𑀔𑀼𑀫𑀸.
𑀓𑀣𑀁 𑀪𑀕𑀯𑀸 𑀫𑀁𑀲𑀘𑀓𑁆𑀔𑀼𑀦𑀸𑀧𑀺 𑀘𑀓𑁆𑀔𑀼𑀫𑀸? 𑀫𑀁𑀲𑀘𑀓𑁆𑀔𑀼𑀫𑁆𑀳𑀺 𑀪𑀕𑀯𑀢𑁄 𑀧𑀜𑁆𑀘 𑀯𑀡𑁆𑀡𑀸 𑀲𑀁𑀯𑀺𑀚𑁆𑀚𑀦𑁆𑀢𑀺 𑁋 𑀦𑀻𑀮𑁄 𑀘 𑀯𑀡𑁆𑀡𑁄, 𑀧𑀻𑀢𑀓𑁄 𑀘 𑀯𑀡𑁆𑀡𑁄, 𑀮𑁄𑀳𑀺𑀢𑀓𑁄 𑀘 𑀯𑀡𑁆𑀡𑁄, 𑀓𑀡𑁆𑀳𑁄 𑀘 𑀯𑀡𑁆𑀡𑁄, 𑀑𑀤𑀸𑀢𑁄 𑀘 𑀯𑀡𑁆𑀡𑁄. 𑀅𑀓𑁆𑀔𑀺𑀮𑁄𑀫𑀸𑀦𑀺 𑀘 𑀪𑀕𑀯𑀢𑁄. 𑀬𑀢𑁆𑀣 𑀘 𑀅𑀓𑁆𑀔𑀺𑀮𑁄𑀫𑀸𑀦𑀺 𑀧𑀢𑀺𑀝𑁆𑀞𑀺𑀢𑀸𑀦𑀺 𑀢𑀁 𑀦𑀻𑀮𑀁 𑀳𑁄𑀢𑀺 𑀲𑀼𑀦𑀻𑀮𑀁 𑀧𑀸𑀲𑀸𑀤𑀺𑀓𑀁 𑀤𑀲𑁆𑀲𑀦𑁂𑀬𑁆𑀬𑀁 𑀉𑀫𑀸𑀧𑀼𑀧𑁆𑀨𑀲𑀫𑀸𑀦𑀁. 𑀢𑀲𑁆𑀲 𑀧𑀭𑀢𑁄 𑀧𑀻𑀢𑀓𑀁 𑀳𑁄𑀢𑀺 𑀲𑀼𑀧𑀻𑀢𑀓𑀁 𑀲𑀼𑀯𑀡𑁆𑀡𑀯𑀡𑁆𑀡𑀁 𑀧𑀸𑀲𑀸𑀤𑀺𑀓𑀁 𑀤𑀲𑁆𑀲𑀦𑁂𑀬𑁆𑀬𑀁 𑀓𑀡𑀺𑀓𑀸𑀭𑀧𑀼𑀧𑁆𑀨𑀲𑀫𑀸𑀦𑀁. 𑀉𑀪𑀢𑁄 𑀅𑀓𑁆𑀔𑀺𑀓𑀽𑀝𑀸𑀦𑀺 𑀪𑀕𑀯𑀢𑁄 𑀮𑁄𑀳𑀺𑀢𑀓𑀸𑀦𑀺 𑀳𑁄𑀦𑁆𑀢𑀺 𑀲𑀼𑀮𑁄𑀳𑀺𑀢𑀓𑀸𑀦𑀺 𑀧𑀸𑀲𑀸𑀤𑀺𑀓𑀸𑀦𑀺 𑀤𑀲𑁆𑀲𑀦𑁂𑀬𑁆𑀬𑀸𑀦𑀺 𑀇𑀦𑁆𑀤𑀕𑁄𑀧𑀓𑀲𑀫𑀸𑀦𑀸𑀦𑀺. 𑀫𑀚𑁆𑀛𑁂 𑀓𑀡𑁆𑀳𑀁 𑀳𑁄𑀢𑀺 𑀲𑀼𑀓𑀡𑁆𑀳𑀁 𑀅𑀮𑀽𑀔𑀁 𑀲𑀼𑀤𑁆𑀥𑀁 𑀧𑀸𑀲𑀸𑀤𑀺𑀓𑀁 𑀤𑀲𑁆𑀲𑀦𑁂𑀬𑁆𑀬𑀁 𑀅𑀤𑁆𑀤𑀸𑀭𑀺𑀝𑁆𑀞𑀓𑀲𑀫𑀸𑀦𑀁. 𑀢𑀲𑁆𑀲 𑀧𑀭𑀢𑁄 𑀑𑀤𑀸𑀢𑀁 𑀳𑁄𑀢𑀺 𑀲𑀼𑀑𑀤𑀸𑀢𑀁 𑀲𑁂𑀢𑀁 𑀧𑀡𑁆𑀟𑀭𑀁 𑀧𑀸𑀲𑀸𑀤𑀺𑀓𑀁 𑀤𑀲𑁆𑀲𑀦𑁂𑀬𑁆𑀬𑀁 𑀑𑀲𑀥𑀺𑀢𑀸𑀭𑀓𑀲𑀫𑀸𑀦𑀁. 𑀢𑁂𑀦 𑀪𑀕𑀯𑀸 𑀧𑀸𑀓𑀢𑀺𑀓𑁂𑀦 𑀫𑀁𑀲𑀘𑀓𑁆𑀔𑀼𑀦𑀸 𑀅𑀢𑁆𑀢𑀪𑀸𑀯𑀧𑀭𑀺𑀬𑀸𑀧𑀦𑁆𑀦𑁂𑀦 𑀧𑀼𑀭𑀺𑀫𑀲𑀼𑀘𑀭𑀺𑀢𑀓𑀫𑁆𑀫𑀸𑀪𑀺𑀦𑀺𑀩𑁆𑀩𑀢𑁆𑀢𑁂𑀦 𑀲𑀫𑀦𑁆𑀢𑀸 𑀬𑁄𑀚𑀦𑀁 𑀧𑀲𑁆𑀲𑀢𑀺 𑀤𑀺𑀯𑀸 𑀘𑁂𑀯 𑀭𑀢𑁆𑀢𑀺𑀜𑁆𑀘. 𑀬𑀤𑀸𑀧𑀺 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑁄 𑀅𑀦𑁆𑀥𑀓𑀸𑀭𑁄 𑀳𑁄𑀢𑀺 𑀲𑀽𑀭𑀺𑀬𑁄 𑀘 𑀅𑀢𑁆𑀣𑀗𑁆𑀕𑀢𑁄 𑀳𑁄𑀢𑀺; 𑀓𑀸𑀴𑀧𑀓𑁆𑀔𑁄 𑀘 𑀉𑀧𑁄𑀲𑀣𑁄 𑀳𑁄𑀢𑀺, 𑀢𑀺𑀩𑁆𑀩𑁄 𑀘 𑀯𑀦𑀲𑀡𑁆𑀟𑁄 𑀳𑁄𑀢𑀺, 𑀫𑀳𑀸 𑀘 𑀓𑀸𑀴𑀫𑁂𑀖𑁄 𑀅𑀩𑁆𑀪𑀼𑀝𑁆𑀞𑀺𑀢𑁄 𑀳𑁄𑀢𑀺. 𑀏𑀯𑀭𑀽𑀧𑁂𑀧𑀺 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑁂 𑀅𑀦𑁆𑀥𑀓𑀸𑀭𑁂 𑀲𑀫𑀦𑁆𑀢𑀸 𑀬𑁄𑀚𑀦𑀁 𑀧𑀲𑁆𑀲𑀢𑀺. 𑀦𑀢𑁆𑀣𑀺 𑀲𑁄 𑀓𑀼𑀝𑁆𑀝𑁄 𑀯𑀸 𑀓𑀯𑀸𑀝𑀁 𑀯𑀸 𑀧𑀸𑀓𑀸𑀭𑁄 𑀯𑀸 𑀧𑀩𑁆𑀩𑀢𑁄 𑀯𑀸 𑀕𑀘𑁆𑀙𑁄 𑀯𑀸 𑀮𑀢𑀸 𑀯𑀸 𑀆𑀯𑀭𑀡𑀁 𑀭𑀽𑀧𑀸𑀦𑀁 𑀤𑀲𑁆𑀲𑀦𑀸𑀬. 𑀏𑀓𑀜𑁆𑀘𑁂 𑀢𑀺𑀮𑀨𑀮𑀁 𑀦𑀺𑀫𑀺𑀢𑁆𑀢𑀁 𑀓𑀢𑁆𑀯𑀸 𑀢𑀺𑀮𑀯𑀸𑀳𑁂 𑀧𑀓𑁆𑀔𑀺𑀧𑁂𑀬𑁆𑀬, 𑀢𑀜𑁆𑀜𑁂𑀯 𑀢𑀺𑀮𑀨𑀮𑀁 𑀉𑀤𑁆𑀥𑀭𑁂𑀬𑁆𑀬. 𑀏𑀯𑀁 𑀧𑀭𑀺𑀲𑀼𑀤𑁆𑀥𑀁 𑀪𑀕𑀯𑀢𑁄 𑀧𑀸𑀓𑀢𑀺𑀓𑀫𑀁𑀲𑀘𑀓𑁆𑀔𑀼. 𑀏𑀯𑀁 𑀪𑀕𑀯𑀸 𑀫𑀁𑀲𑀘𑀓𑁆𑀔𑀼𑀦𑀸𑀧𑀺 𑀘𑀓𑁆𑀔𑀼𑀫𑀸.
𑀓𑀣𑀁 𑀪𑀕𑀯𑀸 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸𑀧𑀺 𑀘𑀓𑁆𑀔𑀼𑀫𑀸? 𑀪𑀕𑀯𑀸 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀲𑀢𑁆𑀢𑁂 𑀧𑀲𑁆𑀲𑀢𑀺 𑀘𑀯𑀫𑀸𑀦𑁂 𑀉𑀧𑀧𑀚𑁆𑀚𑀫𑀸𑀦𑁂 𑀳𑀻𑀦𑁂 𑀧𑀡𑀻𑀢𑁂 𑀲𑀼𑀯𑀡𑁆𑀡𑁂 𑀤𑀼𑀩𑁆𑀩𑀡𑁆𑀡𑁂 𑀲𑀼𑀕𑀢𑁂 𑀤𑀼𑀕𑁆𑀕𑀢𑁂; 𑀬𑀣𑀸𑀓𑀫𑁆𑀫𑀽𑀧𑀕𑁂 𑀲𑀢𑁆𑀢𑁂 𑀧𑀚𑀸𑀦𑀸𑀢𑀺 𑁋 ‘‘𑀇𑀫𑁂 𑀯𑀢 𑀪𑁄𑀦𑁆𑀢𑁄 𑀲𑀢𑁆𑀢𑀸 𑀓𑀸𑀬𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀯𑀘𑀻𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀫𑀦𑁄𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀅𑀭𑀺𑀬𑀸𑀦𑀁 𑀉𑀧𑀯𑀸𑀤𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀸, 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀦𑁆𑀦𑀸; 𑀇𑀫𑁂 𑀯𑀸 𑀧𑀦 𑀪𑁄𑀦𑁆𑀢𑁄 𑀲𑀢𑁆𑀢𑀸 𑀓𑀸𑀬𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀯𑀘𑀻𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀫𑀦𑁄𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀅𑀭𑀺𑀬𑀸𑀦𑀁 𑀅𑀦𑀼𑀧𑀯𑀸𑀤𑀓𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀸, 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀦𑁆𑀦𑀸’’𑀢𑀺. 𑀇𑀢𑀺 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀲𑀢𑁆𑀢𑁂 𑀧𑀲𑁆𑀲𑀢𑀺 𑀘𑀯𑀫𑀸𑀦𑁂 𑀉𑀧𑀧𑀚𑁆𑀚𑀫𑀸𑀦𑁂 𑀳𑀻𑀦𑁂 𑀧𑀡𑀻𑀢𑁂 𑀲𑀼𑀯𑀡𑁆𑀡𑁂 𑀤𑀼𑀩𑁆𑀩𑀡𑁆𑀡𑁂 𑀲𑀼𑀕𑀢𑁂 𑀤𑀼𑀕𑁆𑀕𑀢𑁂; 𑀬𑀣𑀸𑀓𑀫𑁆𑀫𑀽𑀧𑀕𑁂 𑀲𑀢𑁆𑀢𑁂 𑀧𑀚𑀸𑀦𑀸𑀢𑀺. 𑀆𑀓𑀗𑁆𑀔𑀫𑀸𑀦𑁄 𑀘 𑀪𑀕𑀯𑀸 𑀏𑀓𑀫𑁆𑀧𑀺 𑀮𑁄𑀓𑀥𑀸𑀢𑀼𑀁 𑀧𑀲𑁆𑀲𑁂𑀬𑁆𑀬, 𑀤𑁆𑀯𑁂𑀧𑀺 𑀮𑁄𑀓𑀥𑀸𑀢𑀼𑀬𑁄 𑀧𑀲𑁆𑀲𑁂𑀬𑁆𑀬, 𑀢𑀺𑀲𑁆𑀲𑁄𑀧𑀺 𑀮𑁄𑀓𑀥𑀸𑀢𑀼𑀬𑁄 𑀧𑀲𑁆𑀲𑁂𑀬𑁆𑀬, 𑀘𑀢𑀲𑁆𑀲𑁄𑀧𑀺 𑀮𑁄𑀓𑀥𑀸𑀢𑀼𑀬𑁄 𑀧𑀲𑁆𑀲𑁂𑀬𑁆𑀬, 𑀧𑀜𑁆𑀘𑀧𑀺 𑀮𑁄𑀓𑀥𑀸𑀢𑀼𑀬𑁄 𑀧𑀲𑁆𑀲𑁂𑀬𑁆𑀬, 𑀤𑀲𑀧𑀺 𑀮𑁄𑀓𑀥𑀸𑀢𑀼𑀬𑁄 𑀧𑀲𑁆𑀲𑁂𑀬𑁆𑀬, 𑀯𑀻𑀲𑀫𑁆𑀧𑀺 [𑀯𑀻𑀲𑀢𑀺𑀫𑁆𑀧𑀺 (𑀲𑀻.)] 𑀮𑁄𑀓𑀥𑀸𑀢𑀼𑀬𑁄 𑀧𑀲𑁆𑀲𑁂𑀬𑁆𑀬, 𑀢𑀺𑀁𑀲𑀫𑁆𑀧𑀺 𑀮𑁄𑀓𑀥𑀸𑀢𑀼𑀬𑁄 𑀧𑀲𑁆𑀲𑁂𑀬𑁆𑀬, 𑀘𑀢𑁆𑀢𑀸𑀮𑀻𑀲𑀫𑁆𑀧𑀺 𑀮𑁄𑀓𑀥𑀸𑀢𑀼𑀬𑁄 𑀧𑀲𑁆𑀲𑁂𑀬𑁆𑀬, 𑀧𑀜𑁆𑀜𑀸𑀲𑀫𑁆𑀧𑀺 𑀮𑁄𑀓𑀥𑀸𑀢𑀼𑀬𑁄 𑀧𑀲𑁆𑀲𑁂𑀬𑁆𑀬, 𑀲𑀢𑀫𑁆𑀧𑀺 𑀮𑁄𑀓𑀥𑀸𑀢𑀼𑀁 𑀧𑀲𑁆𑀲𑁂𑀬𑁆𑀬, 𑀲𑀳𑀲𑁆𑀲𑀺𑀫𑁆𑀧𑀺 𑀘𑀽𑀴𑀦𑀺𑀓𑀁 𑀮𑁄𑀓𑀥𑀸𑀢𑀼𑀁 𑀧𑀲𑁆𑀲𑁂𑀬𑁆𑀬, 𑀤𑁆𑀯𑀺𑀲𑀳𑀲𑁆𑀲𑀺𑀫𑁆𑀧𑀺 𑀫𑀚𑁆𑀛𑀺𑀫𑀺𑀓𑀁 𑀮𑁄𑀓𑀥𑀸𑀢𑀼𑀁 𑀧𑀲𑁆𑀲𑁂𑀬𑁆𑀬, 𑀢𑀺𑀲𑀳𑀲𑁆𑀲𑀺𑀫𑁆𑀧𑀺 𑀮𑁄𑀓𑀥𑀸𑀢𑀼𑀁 𑀧𑀲𑁆𑀲𑁂𑀬𑁆𑀬, 𑀫𑀳𑀸𑀲𑀳𑀲𑁆𑀲𑀺𑀫𑁆𑀧𑀺 𑀮𑁄𑀓𑀥𑀸𑀢𑀼𑀁 𑀧𑀲𑁆𑀲𑁂𑀬𑁆𑀬, 𑀬𑀸𑀯𑀢𑀓𑀁 𑀧𑀦 𑀆𑀓𑀗𑁆𑀔𑁂𑀬𑁆𑀬 𑀢𑀸𑀯𑀢𑀓𑀁 𑀧𑀲𑁆𑀲𑁂𑀬𑁆𑀬. 𑀏𑀯𑀁 𑀧𑀭𑀺𑀲𑀼𑀤𑁆𑀥𑀁 𑀪𑀕𑀯𑀢𑁄 𑀤𑀺𑀩𑁆𑀩𑀘𑀓𑁆𑀔𑀼. 𑀏𑀯𑀁 𑀪𑀕𑀯𑀸 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸𑀧𑀺 𑀘𑀓𑁆𑀔𑀼𑀫𑀸.
𑀓𑀣𑀁 𑀪𑀕𑀯𑀸 𑀧𑀜𑁆𑀜𑀸𑀘𑀓𑁆𑀔𑀼𑀦𑀸𑀧𑀺 𑀘𑀓𑁆𑀔𑀼𑀫𑀸? 𑀪𑀕𑀯𑀸 𑀫𑀳𑀸𑀧𑀜𑁆𑀜𑁄 𑀧𑀼𑀣𑀼𑀧𑀜𑁆𑀜𑁄 𑀳𑀸𑀲𑀧𑀜𑁆𑀜𑁄 𑀚𑀯𑀦𑀧𑀜𑁆𑀜𑁄 𑀢𑀺𑀓𑁆𑀔𑀧𑀜𑁆𑀜𑁄 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑁄 𑀧𑀜𑁆𑀜𑀸𑀧𑀪𑁂𑀤𑀓𑀼𑀲𑀮𑁄 𑀧𑀪𑀺𑀦𑁆𑀦𑀜𑀸𑀡𑁄 𑀅𑀥𑀺𑀕𑀢𑀧𑀝𑀺𑀲𑀫𑁆𑀪𑀺𑀤𑁄 𑀘𑀢𑀼𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑁄 𑀤𑀲𑀩𑀮𑀥𑀸𑀭𑀻 𑀧𑀼𑀭𑀺𑀲𑀸𑀲𑀪𑁄 𑀧𑀼𑀭𑀺𑀲𑀲𑀻𑀳𑁄 𑀧𑀼𑀭𑀺𑀲𑀦𑀸𑀕𑁄 𑀧𑀼𑀭𑀺𑀲𑀸𑀚𑀜𑁆𑀜𑁄 𑀧𑀼𑀭𑀺𑀲𑀥𑁄𑀭𑀬𑁆𑀳𑁄 𑀅𑀦𑀦𑁆𑀢𑀜𑀸𑀡𑁄 𑀅𑀦𑀦𑁆𑀢𑀢𑁂𑀚𑁄 𑀅𑀦𑀦𑁆𑀢𑀬𑀲𑁄 𑀅𑀟𑁆𑀠𑁄 𑀫𑀳𑀤𑁆𑀥𑀦𑁄 𑀥𑀦𑀯𑀸 𑀦𑁂𑀢𑀸 𑀯𑀺𑀦𑁂𑀢𑀸 𑀅𑀦𑀼𑀦𑁂𑀢𑀸 𑀧𑀜𑁆𑀜𑀧𑁂𑀢𑀸 𑀦𑀺𑀚𑁆𑀛𑀸𑀧𑁂𑀢𑀸 𑀧𑁂𑀓𑁆𑀔𑁂𑀢𑀸 𑀧𑀲𑀸𑀤𑁂𑀢𑀸. 𑀲𑁄 𑀳𑀺 𑀪𑀕𑀯𑀸 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀫𑀕𑁆𑀕𑀲𑁆𑀲 𑀉𑀧𑁆𑀧𑀸𑀤𑁂𑀢𑀸, 𑀅𑀲𑀜𑁆𑀚𑀸𑀢𑀲𑁆𑀲 𑀫𑀕𑁆𑀕𑀲𑁆𑀲 𑀲𑀜𑁆𑀚𑀦𑁂𑀢𑀸, 𑀅𑀦𑀓𑁆𑀔𑀸𑀢𑀲𑁆𑀲 𑀫𑀕𑁆𑀕𑀲𑁆𑀲 𑀅𑀓𑁆𑀔𑀸𑀢𑀸, 𑀫𑀕𑁆𑀕𑀜𑁆𑀜𑀽 𑀫𑀕𑁆𑀕𑀯𑀺𑀤𑀽 𑀫𑀕𑁆𑀕𑀓𑁄𑀯𑀺𑀤𑁄 𑀫𑀕𑁆𑀕𑀸𑀦𑀼𑀕𑀸 𑀘 𑀧𑀦 𑀏𑀢𑀭𑀳𑀺 𑀲𑀸𑀯𑀓𑀸 𑀯𑀺𑀳𑀭𑀦𑁆𑀢𑀺 𑀧𑀘𑁆𑀙𑀸 𑀲𑀫𑀦𑁆𑀦𑀸𑀕𑀢𑀸.
𑀲𑁄 𑀳𑀺 𑀪𑀕𑀯𑀸 𑀚𑀸𑀦𑀁 𑀚𑀸𑀦𑀸𑀢𑀺, 𑀧𑀲𑁆𑀲𑀁 𑀧𑀲𑁆𑀲𑀢𑀺, 𑀘𑀓𑁆𑀔𑀼𑀪𑀽𑀢𑁄 𑀜𑀸𑀡𑀪𑀽𑀢𑁄 𑀥𑀫𑁆𑀫𑀪𑀽𑀢𑁄 𑀩𑁆𑀭𑀳𑁆𑀫𑀪𑀽𑀢𑁄 𑀯𑀢𑁆𑀢𑀸 𑀧𑀯𑀢𑁆𑀢𑀸 𑀅𑀢𑁆𑀣𑀲𑁆𑀲 𑀦𑀺𑀦𑁆𑀦𑁂𑀢𑀸 𑀅𑀫𑀢𑀲𑁆𑀲 𑀤𑀸𑀢𑀸 𑀥𑀫𑁆𑀫𑀲𑁆𑀲𑀸𑀫𑀻 𑀢𑀣𑀸𑀕𑀢𑁄. 𑀦𑀢𑁆𑀣𑀺 𑀢𑀲𑁆𑀲 𑀪𑀕𑀯𑀢𑁄 𑀅𑀜𑁆𑀜𑀸𑀢𑀁 𑀅𑀤𑀺𑀝𑁆𑀞𑀁 𑀅𑀯𑀺𑀤𑀺𑀢𑀁 𑀅𑀲𑀘𑁆𑀙𑀺𑀓𑀢𑀁 𑀅𑀨𑀲𑁆𑀲𑀺𑀢𑀁 𑀧𑀜𑁆𑀜𑀸𑀬. 𑀅𑀢𑀻𑀢𑀁 𑀅𑀦𑀸𑀕𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀉𑀧𑀸𑀤𑀸𑀬 𑀲𑀩𑁆𑀩𑁂 𑀥𑀫𑁆𑀫𑀸 𑀲𑀩𑁆𑀩𑀸𑀓𑀸𑀭𑁂𑀦 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀜𑀸𑀡𑀫𑀼𑀔𑁂 𑀆𑀧𑀸𑀣𑀁 𑀆𑀕𑀘𑁆𑀙𑀦𑁆𑀢𑀺. 𑀬𑀁 𑀓𑀺𑀜𑁆𑀘𑀺 𑀦𑁂𑀬𑁆𑀬𑀁 𑀦𑀸𑀫 𑀅𑀢𑁆𑀣𑀺 𑀚𑀸𑀦𑀺𑀢𑀩𑁆𑀩𑀁 [𑀅𑀢𑁆𑀣𑀺 𑀥𑀫𑁆𑀫𑀁 𑀚𑀸𑀦𑀺𑀢𑀩𑁆𑀩𑀁 (𑀓.) 𑀫𑀳𑀸𑀦𑀺. 𑁧𑁫𑁬] 𑀅𑀢𑁆𑀢𑀢𑁆𑀣𑁄 𑀯𑀸, 𑀧𑀭𑀢𑁆𑀣𑁄 𑀯𑀸, 𑀉𑀪𑀬𑀢𑁆𑀣𑁄 𑀯𑀸, 𑀤𑀺𑀝𑁆𑀞𑀥𑀫𑁆𑀫𑀺𑀓𑁄 𑀯𑀸 𑀅𑀢𑁆𑀣𑁄, 𑀲𑀫𑁆𑀧𑀭𑀸𑀬𑀺𑀓𑁄 𑀯𑀸 𑀅𑀢𑁆𑀣𑁄, 𑀉𑀢𑁆𑀢𑀸𑀦𑁄 𑀯𑀸 𑀅𑀢𑁆𑀣𑁄, 𑀕𑀫𑁆𑀪𑀻𑀭𑁄 𑀯𑀸 𑀅𑀢𑁆𑀣𑁄, 𑀕𑀽𑀴𑁆𑀳𑁄 𑀯𑀸 𑀅𑀢𑁆𑀣𑁄, 𑀧𑀝𑀺𑀘𑁆𑀙𑀦𑁆𑀦𑁄 𑀯𑀸 𑀅𑀢𑁆𑀣𑁄, 𑀦𑁂𑀬𑁆𑀬𑁄 𑀯𑀸 𑀅𑀢𑁆𑀣𑁄, 𑀦𑀻𑀢𑁄 𑀯𑀸 𑀅𑀢𑁆𑀣𑁄, 𑀅𑀦𑀯𑀚𑁆𑀚𑁄 𑀯𑀸 𑀅𑀢𑁆𑀣𑁄, 𑀦𑀺𑀓𑁆𑀓𑀺𑀮𑁂𑀲𑁄 𑀯𑀸 𑀅𑀢𑁆𑀣𑁄, 𑀯𑁄𑀤𑀸𑀦𑁄 𑀯𑀸 𑀅𑀢𑁆𑀣𑁄, 𑀧𑀭𑀫𑀢𑁆𑀣𑁄 𑀯𑀸 𑀅𑀢𑁆𑀣𑁄, 𑀲𑀩𑁆𑀩𑀁 𑀢𑀁 𑀅𑀦𑁆𑀢𑁄𑀩𑀼𑀤𑁆𑀥𑀜𑀸𑀡𑁂 𑀧𑀭𑀺𑀯𑀢𑁆𑀢𑀢𑀺.
𑀅𑀢𑀻𑀢𑁂 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀅𑀧𑁆𑀧𑀝𑀺𑀳𑀢𑀁 𑀜𑀸𑀡𑀁, 𑀅𑀦𑀸𑀕𑀢𑁂 𑀅𑀧𑁆𑀧𑀝𑀺𑀳𑀢𑀁 𑀜𑀸𑀡𑀁, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀅𑀧𑁆𑀧𑀝𑀺𑀳𑀢𑀁 𑀜𑀸𑀡𑀁. 𑀲𑀩𑁆𑀩𑀁 𑀓𑀸𑀬𑀓𑀫𑁆𑀫𑀁 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀺. 𑀲𑀩𑁆𑀩𑀁 𑀯𑀘𑀻𑀓𑀫𑁆𑀫𑀁… 𑀲𑀩𑁆𑀩𑀁 𑀫𑀦𑁄𑀓𑀫𑁆𑀫𑀁 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀺. 𑀬𑀸𑀯𑀢𑀓𑀁 𑀦𑁂𑀬𑁆𑀬𑀁 𑀢𑀸𑀯𑀢𑀓𑀁 𑀜𑀸𑀡𑀁, 𑀬𑀸𑀯𑀢𑀓𑀁 𑀜𑀸𑀡𑀁 𑀢𑀸𑀯𑀢𑀓𑀁 𑀦𑁂𑀬𑁆𑀬𑀁; 𑀦𑁂𑀬𑁆𑀬𑀧𑀭𑀺𑀬𑀦𑁆𑀢𑀺𑀓𑀁 𑀜𑀸𑀡𑀁, 𑀜𑀸𑀡𑀧𑀭𑀺𑀬𑀦𑁆𑀢𑀺𑀓𑀁 𑀦𑁂𑀬𑁆𑀬𑀁; 𑀦𑁂𑀬𑁆𑀬𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀜𑀸𑀡𑀁 𑀦𑀧𑁆𑀧𑀯𑀢𑁆𑀢𑀢𑀺, 𑀜𑀸𑀡𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀦𑁂𑀬𑁆𑀬𑀧𑀣𑁄 𑀦𑀢𑁆𑀣𑀺; 𑀅𑀜𑁆𑀜𑀫𑀜𑁆𑀜𑀧𑀭𑀺𑀬𑀦𑁆𑀢𑀝𑁆𑀞𑀸𑀬𑀺𑀦𑁄 𑀢𑁂 𑀥𑀫𑁆𑀫𑀸. 𑀬𑀣𑀸 𑀤𑁆𑀯𑀺𑀦𑁆𑀦𑀁 𑀲𑀫𑀼𑀕𑁆𑀕𑀧𑀝𑀮𑀸𑀦𑀁 𑀲𑀫𑁆𑀫𑀸𑀨𑀼𑀲𑀺𑀢𑀸𑀦𑀁 𑀳𑁂𑀝𑁆𑀞𑀺𑀫𑀁 𑀲𑀫𑀼𑀕𑁆𑀕𑀧𑀝𑀮𑀁 𑀉𑀧𑀭𑀺𑀫𑀁 𑀦𑀸𑀢𑀺𑀯𑀢𑁆𑀢𑀢𑀺, 𑀉𑀧𑀭𑀺𑀫𑀁 𑀲𑀫𑀼𑀕𑁆𑀕𑀧𑀝𑀮𑀁 𑀳𑁂𑀝𑁆𑀞𑀺𑀫𑀁 𑀦𑀸𑀢𑀺𑀯𑀢𑁆𑀢𑀢𑀺, 𑀅𑀜𑁆𑀜𑀫𑀜𑁆𑀜𑀧𑀭𑀺𑀬𑀦𑁆𑀢𑀝𑁆𑀞𑀸𑀬𑀺𑀦𑁄; 𑀏𑀯𑀫𑁂𑀯𑀁 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀦𑁂𑀬𑁆𑀬𑀜𑁆𑀘 𑀜𑀸𑀡𑀜𑁆𑀘 𑀅𑀜𑁆𑀜𑀫𑀜𑁆𑀜𑀧𑀭𑀺𑀬𑀦𑁆𑀢𑀝𑁆𑀞𑀸𑀬𑀺𑀦𑁄. 𑀬𑀸𑀯𑀢𑀓𑀁 𑀦𑁂𑀬𑁆𑀬𑀁 𑀢𑀸𑀯𑀢𑀓𑀁 𑀜𑀸𑀡𑀁, 𑀬𑀸𑀯𑀢𑀓𑀁 𑀜𑀸𑀡𑀁 𑀢𑀸𑀯𑀢𑀓𑀁 𑀦𑁂𑀬𑁆𑀬𑀁, 𑀦𑁂𑀬𑁆𑀬𑀧𑀭𑀺𑀬𑀦𑁆𑀢𑀺𑀓𑀁 𑀜𑀸𑀡𑀁, 𑀜𑀸𑀡𑀧𑀭𑀺𑀬𑀦𑁆𑀢𑀺𑀓𑀁 𑀦𑁂𑀬𑁆𑀬𑀁; 𑀦𑁂𑀬𑁆𑀬𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀜𑀸𑀡𑀁 𑀦 𑀧𑀯𑀢𑁆𑀢𑀢𑀺, 𑀜𑀸𑀡𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀦𑁂𑀬𑁆𑀬𑀧𑀣𑁄 𑀦𑀢𑁆𑀣𑀺; 𑀅𑀜𑁆𑀜𑀫𑀜𑁆𑀜𑀧𑀭𑀺𑀬𑀦𑁆𑀢𑀝𑁆𑀞𑀸𑀬𑀺𑀦𑁄 𑀢𑁂 𑀥𑀫𑁆𑀫𑀸.
𑀲𑀩𑁆𑀩𑀥𑀫𑁆𑀫𑁂𑀲𑀼 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀜𑀸𑀡𑀁 𑀧𑀯𑀢𑁆𑀢𑀢𑀺. 𑀲𑀩𑁆𑀩𑁂 𑀥𑀫𑁆𑀫𑀸 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀆𑀯𑀚𑁆𑀚𑀦𑀧𑀝𑀺𑀩𑀤𑁆𑀥𑀸 𑀆𑀓𑀗𑁆𑀔𑀧𑀝𑀺𑀩𑀤𑁆𑀥𑀸 𑀫𑀦𑀲𑀺𑀓𑀸𑀭𑀧𑀝𑀺𑀩𑀤𑁆𑀥𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀧𑀝𑀺𑀩𑀤𑁆𑀥𑀸. 𑀲𑀩𑁆𑀩𑀲𑀢𑁆𑀢𑁂𑀲𑀼 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀜𑀸𑀡𑀁 𑀧𑀯𑀢𑁆𑀢𑀢𑀺. 𑀲𑀩𑁆𑀩𑁂𑀲𑀁 𑀲𑀢𑁆𑀢𑀸𑀦𑀁 𑀪𑀕𑀯𑀸 𑀆𑀲𑀬𑀁 𑀚𑀸𑀦𑀸𑀢𑀺, 𑀅𑀦𑀼𑀲𑀬𑀁 𑀚𑀸𑀦𑀸𑀢𑀺, 𑀘𑀭𑀺𑀢𑀁 𑀚𑀸𑀦𑀸𑀢𑀺, 𑀅𑀥𑀺𑀫𑀼𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀅𑀧𑁆𑀧𑀭𑀚𑀓𑁆𑀔𑁂 𑀫𑀳𑀸𑀭𑀚𑀓𑁆𑀔𑁂 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁂 𑀫𑀼𑀤𑀺𑀦𑁆𑀤𑁆𑀭𑀺𑀬𑁂 𑀲𑁆𑀯𑀸𑀓𑀸𑀭𑁂 𑀤𑁆𑀯𑀸𑀓𑀸𑀭𑁂 𑀲𑀼𑀯𑀺𑀜𑁆𑀜𑀸𑀧𑀬𑁂 𑀤𑀼𑀯𑀺𑀜𑁆𑀜𑀸𑀧𑀬𑁂 𑀪𑀩𑁆𑀩𑀸𑀪𑀩𑁆𑀩𑁂 𑀲𑀢𑁆𑀢𑁂 𑀧𑀚𑀸𑀦𑀸𑀢𑀺. 𑀲𑀤𑁂𑀯𑀓𑁄 𑀮𑁄𑀓𑁄 𑀲𑀫𑀸𑀭𑀓𑁄 𑀲𑀩𑁆𑀭𑀳𑁆𑀫𑀓𑁄 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀻 𑀧𑀚𑀸 𑀲𑀤𑁂𑀯𑀫𑀦𑀼𑀲𑁆𑀲𑀸 𑀅𑀦𑁆𑀢𑁄𑀩𑀼𑀤𑁆𑀥𑀜𑀸𑀡𑁂 𑀧𑀭𑀺𑀯𑀢𑁆𑀢𑀢𑀺.
𑀬𑀣𑀸 𑀬𑁂 𑀓𑁂𑀘𑀺 𑀫𑀘𑁆𑀙𑀓𑀘𑁆𑀙𑀧𑀸 𑀅𑀦𑁆𑀢𑀫𑀲𑁄 𑀢𑀺𑀫𑀺𑀢𑀺𑀫𑀺𑀗𑁆𑀕𑀮𑀁 𑀉𑀧𑀸𑀤𑀸𑀬 𑀅𑀦𑁆𑀢𑁄𑀫𑀳𑀸𑀲𑀫𑀼𑀤𑁆𑀤𑁂 𑀧𑀭𑀺𑀯𑀢𑁆𑀢𑀦𑁆𑀢𑀺; 𑀏𑀯𑀫𑁂𑀯 𑀲𑀤𑁂𑀯𑀓𑁄 𑀮𑁄𑀓𑁄 𑀲𑀫𑀸𑀭𑀓𑁄 𑀲𑀩𑁆𑀭𑀳𑁆𑀫𑀓𑁄 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀻 𑀧𑀚𑀸 𑀲𑀤𑁂𑀯𑀫𑀦𑀼𑀲𑁆𑀲𑀸 𑀅𑀦𑁆𑀢𑁄𑀩𑀼𑀤𑁆𑀥𑀜𑀸𑀡𑁂 𑀧𑀭𑀺𑀯𑀢𑁆𑀢𑀢𑀺. 𑀬𑀣𑀸 𑀬𑁂 𑀓𑁂𑀘𑀺 𑀧𑀓𑁆𑀔𑀻 𑀅𑀦𑁆𑀢𑀫𑀲𑁄 𑀕𑀭𑀼𑀴𑀁 𑀯𑁂𑀦𑀢𑁂𑀬𑁆𑀬𑀁 𑀉𑀧𑀸𑀤𑀸𑀬 𑀆𑀓𑀸𑀲𑀲𑁆𑀲 𑀧𑀤𑁂𑀲𑁂 𑀧𑀭𑀺𑀯𑀢𑁆𑀢𑀦𑁆𑀢𑀺; 𑀏𑀯𑀫𑁂𑀯 𑀬𑁂𑀧𑀺 𑀢𑁂 𑀲𑀸𑀭𑀺𑀧𑀼𑀢𑁆𑀢𑀲𑀫𑀸 𑀧𑀜𑁆𑀜𑀸𑀬 𑀢𑁂𑀧𑀺 𑀩𑀼𑀤𑁆𑀥𑀜𑀸𑀡𑀲𑁆𑀲 𑀧𑀤𑁂𑀲𑁂 𑀧𑀭𑀺𑀯𑀢𑁆𑀢𑀦𑁆𑀢𑀺; 𑀩𑀼𑀤𑁆𑀥𑀜𑀸𑀡𑀁 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀧𑀜𑁆𑀜𑀁 𑀨𑀭𑀺𑀢𑁆𑀯𑀸 𑀅𑀪𑀺𑀪𑀯𑀺𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀬𑁂𑀧𑀺 𑀢𑁂 𑀔𑀢𑁆𑀢𑀺𑀬𑀧𑀡𑁆𑀟𑀺𑀢𑀸 𑀩𑁆𑀭𑀸𑀳𑁆𑀫𑀡𑀧𑀡𑁆𑀟𑀺𑀢𑀸 𑀕𑀳𑀧𑀢𑀺𑀧𑀡𑁆𑀟𑀺𑀢𑀸 𑀲𑀫𑀡𑀧𑀡𑁆𑀟𑀺𑀢𑀸 𑀦𑀺𑀧𑀼𑀡𑀸 𑀓𑀢𑀧𑀭𑀧𑁆𑀧𑀯𑀸𑀤𑀸 𑀯𑀸𑀮𑀯𑁂𑀥𑀺𑀭𑀽𑀧𑀸 𑀯𑁄𑀪𑀺𑀦𑁆𑀤𑀦𑁆𑀢𑀸 𑀫𑀜𑁆𑀜𑁂 𑀘𑀭𑀦𑁆𑀢𑀺 𑀧𑀜𑁆𑀜𑀸𑀕𑀢𑁂𑀦 𑀤𑀺𑀝𑁆𑀞𑀺𑀕𑀢𑀸𑀦𑀺, 𑀢𑁂 𑀧𑀜𑁆𑀳𑁂 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀢𑀣𑀸𑀕𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀦𑁆𑀢𑀺 𑀕𑀽𑀴𑁆𑀳𑀸𑀦𑀺 𑀘 𑀧𑀝𑀺𑀘𑁆𑀙𑀦𑁆𑀦𑀸𑀦𑀺 𑀘. 𑀓𑀣𑀺𑀢𑀸 𑀯𑀺𑀲𑀚𑁆𑀚𑀺𑀢𑀸𑀯 𑀢𑁂 𑀧𑀜𑁆𑀳𑀸 𑀪𑀕𑀯𑀢𑀸 𑀳𑁄𑀦𑁆𑀢𑀺 𑀦𑀺𑀤𑁆𑀤𑀺𑀝𑁆𑀞𑀓𑀸𑀭𑀡𑀸 𑀉𑀧𑀓𑁆𑀔𑀺𑀢𑁆𑀢𑀓𑀸 𑀘. 𑀢𑁂 𑀪𑀕𑀯𑀢𑁄 𑀲𑀫𑁆𑀧𑀚𑁆𑀚𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸𑀯 𑀢𑀢𑁆𑀣 𑀅𑀢𑀺𑀭𑁄𑀘𑀢𑀺, 𑀬𑀤𑀺𑀤𑀁 𑀧𑀜𑁆𑀜𑀸𑀬𑀸𑀢𑀺. 𑀏𑀯𑀁 𑀪𑀕𑀯𑀸 𑀧𑀜𑁆𑀜𑀸𑀘𑀓𑁆𑀔𑀼𑀦𑀸𑀧𑀺 𑀘𑀓𑁆𑀔𑀼𑀫𑀸.
𑀓𑀣𑀁 𑀪𑀕𑀯𑀸 𑀩𑀼𑀤𑁆𑀥𑀘𑀓𑁆𑀔𑀼𑀦𑀸𑀧𑀺 𑀘𑀓𑁆𑀔𑀼𑀫𑀸? 𑀪𑀕𑀯𑀸 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 [𑀑𑀮𑁄𑀓𑁂𑀦𑁆𑀢𑁄 (𑀲𑀻.)] 𑀅𑀤𑁆𑀤𑀲 𑀲𑀢𑁆𑀢𑁂 𑀅𑀧𑁆𑀧𑀭𑀚𑀓𑁆𑀔𑁂 𑀫𑀳𑀸𑀭𑀚𑀓𑁆𑀔𑁂 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁂 𑀫𑀼𑀤𑀺𑀦𑁆𑀤𑁆𑀭𑀺𑀬𑁂 𑀲𑁆𑀯𑀸𑀓𑀸𑀭𑁂 𑀤𑁆𑀯𑀸𑀓𑀸𑀭𑁂 𑀲𑀼𑀯𑀺𑀜𑁆𑀜𑀸𑀧𑀬𑁂 𑀤𑀼𑀯𑀺𑀜𑁆𑀜𑀸𑀧𑀬𑁂 𑀅𑀧𑁆𑀧𑁂𑀓𑀘𑁆𑀘𑁂 𑀧𑀭𑀮𑁄𑀓𑀯𑀚𑁆𑀚𑀪𑀬𑀤𑀲𑁆𑀲𑀸𑀯𑀺𑀦𑁄 𑀯𑀺𑀳𑀭𑀦𑁆𑀢𑁂 𑀅𑀧𑁆𑀧𑁂𑀓𑀘𑁆𑀘𑁂 𑀦𑀧𑀭𑀮𑁄𑀓𑀯𑀚𑁆𑀚𑀪𑀬𑀤𑀲𑁆𑀲𑀸𑀯𑀺𑀦𑁄 𑀯𑀺𑀳𑀭𑀦𑁆𑀢𑁂. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀉𑀧𑁆𑀧𑀮𑀺𑀦𑀺𑀬𑀁 𑀯𑀸 𑀧𑀤𑀼𑀫𑀺𑀦𑀺𑀬𑀁 𑀯𑀸 𑀧𑀼𑀡𑁆𑀟𑀭𑀻𑀓𑀺𑀦𑀺𑀬𑀁 𑀯𑀸 𑀅𑀧𑁆𑀧𑁂𑀓𑀘𑁆𑀘𑀸𑀦𑀺 𑀉𑀧𑁆𑀧𑀮𑀸𑀦𑀺 𑀯𑀸 𑀧𑀤𑀼𑀫𑀸𑀦𑀺 𑀯𑀸 𑀧𑀼𑀡𑁆𑀟𑀭𑀻𑀓𑀸𑀦𑀺 𑀯𑀸 𑀉𑀤𑀓𑁂 𑀚𑀸𑀢𑀸𑀦𑀺 𑀉𑀤𑀓𑁂 𑀲𑀁𑀯𑀟𑁆𑀠𑀸𑀦𑀺 𑀉𑀤𑀓𑀸𑀦𑀼𑀕𑁆𑀕𑀢𑀸𑀦𑀺 𑀅𑀦𑁆𑀢𑁄𑀦𑀺𑀫𑀼𑀕𑁆𑀕𑀧𑁄𑀲𑀻𑀦𑀺, 𑀅𑀧𑁆𑀧𑁂𑀓𑀘𑁆𑀘𑀸𑀦𑀺 𑀉𑀧𑁆𑀧𑀮𑀸𑀦𑀺 𑀯𑀸 𑀧𑀤𑀼𑀫𑀸𑀦𑀺 𑀯𑀸 𑀧𑀼𑀡𑁆𑀟𑀭𑀻𑀓𑀸𑀦𑀺 𑀯𑀸 𑀉𑀤𑀓𑁂 𑀚𑀸𑀢𑀸𑀦𑀺 𑀉𑀤𑀓𑁂 𑀲𑀁𑀯𑀟𑁆𑀠𑀸𑀦𑀺 𑀲𑀫𑁄𑀤𑀓𑀁 𑀞𑀺𑀢𑀸𑀦𑀺, 𑀅𑀧𑁆𑀧𑁂𑀓𑀘𑁆𑀘𑀸𑀦𑀺 𑀉𑀧𑁆𑀧𑀮𑀸𑀦𑀺 𑀯𑀸 𑀧𑀤𑀼𑀫𑀸𑀦𑀺 𑀯𑀸 𑀧𑀼𑀡𑁆𑀟𑀭𑀻𑀓𑀸𑀦𑀺 𑀯𑀸 𑀉𑀤𑀓𑁂 𑀚𑀸𑀢𑀸𑀦𑀺 𑀉𑀤𑀓𑁂 𑀲𑀁𑀯𑀟𑁆𑀠𑀸𑀦𑀺 𑀉𑀤𑀓𑀁 𑀅𑀘𑁆𑀘𑀼𑀕𑁆𑀕𑀫𑁆𑀫 𑀢𑀺𑀝𑁆𑀞𑀦𑁆𑀢𑀺 𑀅𑀦𑀼𑀧𑀮𑀺𑀢𑁆𑀢𑀸𑀦𑀺 𑀉𑀤𑀓𑁂𑀦; 𑀏𑀯𑀫𑁂𑀯𑀁 𑀪𑀕𑀯𑀸 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀅𑀤𑁆𑀤𑀲 𑀲𑀢𑁆𑀢𑁂 𑀅𑀧𑁆𑀧𑀭𑀚𑀓𑁆𑀔𑁂 𑀫𑀳𑀸𑀭𑀚𑀓𑁆𑀔𑁂 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁂 𑀫𑀼𑀤𑀺𑀦𑁆𑀤𑁆𑀭𑀺𑀬𑁂 𑀲𑁆𑀯𑀸𑀓𑀸𑀭𑁂 𑀤𑁆𑀯𑀸𑀓𑀸𑀭𑁂 𑀲𑀼𑀯𑀺𑀜𑁆𑀜𑀸𑀧𑀬𑁂 𑀤𑀼𑀯𑀺𑀜𑁆𑀜𑀸𑀧𑀬𑁂 𑀅𑀧𑁆𑀧𑁂𑀓𑀘𑁆𑀘𑁂 𑀧𑀭𑀮𑁄𑀓𑀯𑀚𑁆𑀚𑀪𑀬𑀤𑀲𑁆𑀲𑀸𑀯𑀺𑀦𑁄 𑀯𑀺𑀳𑀭𑀦𑁆𑀢𑁂 𑀅𑀧𑁆𑀧𑁂𑀓𑀘𑁆𑀘𑁂 𑀦𑀧𑀭𑀮𑁄𑀓𑀯𑀚𑁆𑀚𑀪𑀬𑀤𑀲𑁆𑀲𑀸𑀯𑀺𑀦𑁄 𑀯𑀺𑀳𑀭𑀦𑁆𑀢𑁂. 𑀚𑀸𑀦𑀸𑀢𑀺 𑀪𑀕𑀯𑀸 𑁋 ‘‘𑀅𑀬𑀁 𑀧𑀼𑀕𑁆𑀕𑀮𑁄 𑀭𑀸𑀕𑀘𑀭𑀺𑀢𑁄, 𑀅𑀬𑀁 𑀤𑁄𑀲𑀘𑀭𑀺𑀢𑁄, 𑀅𑀬𑀁 𑀫𑁄𑀳𑀘𑀭𑀺𑀢𑁄, 𑀅𑀬𑀁 𑀯𑀺𑀢𑀓𑁆𑀓𑀘𑀭𑀺𑀢𑁄, 𑀅𑀬𑀁 𑀲𑀤𑁆𑀥𑀸𑀘𑀭𑀺𑀢𑁄, 𑀅𑀬𑀁 𑀜𑀸𑀡𑀘𑀭𑀺𑀢𑁄’’𑀢𑀺. 𑀭𑀸𑀕𑀘𑀭𑀺𑀢𑀲𑁆𑀲 𑀪𑀕𑀯𑀸 𑀧𑀼𑀕𑁆𑀕𑀮𑀲𑁆𑀲 𑀅𑀲𑀼𑀪𑀓𑀣𑀁 𑀓𑀣𑁂𑀢𑀺; 𑀤𑁄𑀲𑀘𑀭𑀺𑀢𑀲𑁆𑀲 𑀪𑀕𑀯𑀸 𑀧𑀼𑀕𑁆𑀕𑀮𑀲𑁆𑀲 𑀫𑁂𑀢𑁆𑀢𑀸𑀪𑀸𑀯𑀦𑀁 𑀆𑀘𑀺𑀓𑁆𑀔𑀢𑀺; 𑀫𑁄𑀳𑀘𑀭𑀺𑀢𑀲𑁆𑀲 𑀪𑀕𑀯𑀸 𑀧𑀼𑀕𑁆𑀕𑀮𑀲𑁆𑀲 𑀉𑀤𑁆𑀤𑁂𑀲𑁂 𑀧𑀭𑀺𑀧𑀼𑀘𑁆𑀙𑀸𑀬 𑀓𑀸𑀮𑁂𑀦 𑀥𑀫𑁆𑀫𑀲𑁆𑀲𑀯𑀦𑁂 𑀓𑀸𑀮𑁂𑀦 𑀥𑀫𑁆𑀫𑀲𑀸𑀓𑀘𑁆𑀙𑀸𑀬 𑀕𑀭𑀼𑀲𑀁𑀯𑀸𑀲𑁂 𑀦𑀺𑀯𑁂𑀲𑁂𑀢𑀺; 𑀯𑀺𑀢𑀓𑁆𑀓𑀘𑀭𑀺𑀢𑀲𑁆𑀲 𑀪𑀕𑀯𑀸 𑀧𑀼𑀕𑁆𑀕𑀮𑀲𑁆𑀲 𑀆𑀦𑀸𑀧𑀸𑀦𑀲𑁆𑀲𑀢𑀺𑀁 𑀆𑀘𑀺𑀓𑁆𑀔𑀢𑀺; 𑀲𑀤𑁆𑀥𑀸𑀘𑀭𑀺𑀢𑀲𑁆𑀲 𑀪𑀕𑀯𑀸 𑀧𑀼𑀕𑁆𑀕𑀮𑀲𑁆𑀲 𑀧𑀲𑀸𑀤𑀦𑀻𑀬𑀁 𑀦𑀺𑀫𑀺𑀢𑁆𑀢𑀁 𑀆𑀘𑀺𑀓𑁆𑀔𑀢𑀺 𑀩𑀼𑀤𑁆𑀥𑀲𑀼𑀩𑁄𑀥𑀺𑀁 𑀥𑀫𑁆𑀫𑀲𑀼𑀥𑀫𑁆𑀫𑀢𑀁 𑀲𑀗𑁆𑀖𑀲𑀼𑀧𑁆𑀧𑀝𑀺𑀧𑀢𑁆𑀢𑀺𑀁 𑀲𑀻𑀮𑀸𑀦𑀺 𑀘 𑀅𑀢𑁆𑀢𑀦𑁄; 𑀜𑀸𑀡𑀘𑀭𑀺𑀢𑀲𑁆𑀲 𑀪𑀕𑀯𑀸 𑀧𑀼𑀕𑁆𑀕𑀮𑀲𑁆𑀲 𑀯𑀺𑀧𑀲𑁆𑀲𑀦𑀸𑀦𑀺𑀫𑀺𑀢𑁆𑀢𑀁 𑀆𑀘𑀺𑀓𑁆𑀔𑀢𑀺 𑀅𑀦𑀺𑀘𑁆𑀘𑀸𑀓𑀸𑀭𑀁 𑀤𑀼𑀓𑁆𑀔𑀸𑀓𑀸𑀭𑀁 𑀅𑀦𑀢𑁆𑀢𑀸𑀓𑀸𑀭𑀁.
‘‘𑀲𑁂𑀮𑁂 𑀬𑀣𑀸 𑀧𑀩𑁆𑀩𑀢𑀫𑀼𑀤𑁆𑀥𑀦𑀺𑀝𑁆𑀞𑀺𑀢𑁄, 𑀬𑀣𑀸𑀧𑀺 𑀧𑀲𑁆𑀲𑁂 𑀚𑀦𑀢𑀁 𑀲𑀫𑀦𑁆𑀢𑀢𑁄;
𑀢𑀣𑀽𑀧𑀫𑀁 𑀥𑀫𑁆𑀫𑀫𑀬𑀁 𑀲𑀼𑀫𑁂𑀥, 𑀧𑀸𑀲𑀸𑀤𑀫𑀸𑀭𑀼𑀬𑁆𑀳 𑀲𑀫𑀦𑁆𑀢𑀘𑀓𑁆𑀔𑀼;
𑀲𑁄𑀓𑀸𑀯𑀢𑀺𑀡𑁆𑀡𑀁 𑀚𑀦𑀢𑀫𑀧𑁂𑀢𑀲𑁄𑀓𑁄, 𑀅𑀯𑁂𑀓𑁆𑀔𑀲𑁆𑀲𑀼 𑀚𑀸𑀢𑀺𑀚𑀭𑀸𑀪𑀺𑀪𑀽𑀢’’𑀦𑁆𑀢𑀺.
𑀏𑀯𑀁 𑀪𑀕𑀯𑀸 𑀩𑀼𑀤𑁆𑀥𑀘𑀓𑁆𑀔𑀼𑀦𑀸𑀧𑀺 𑀘𑀓𑁆𑀔𑀼𑀫𑀸.
𑀓𑀣𑀁 𑀪𑀕𑀯𑀸 𑀲𑀫𑀦𑁆𑀢𑀘𑀓𑁆𑀔𑀼𑀦𑀸𑀧𑀺 𑀘𑀓𑁆𑀔𑀼𑀫𑀸? 𑀲𑀫𑀦𑁆𑀢𑀘𑀓𑁆𑀔𑀼 𑀯𑀼𑀘𑁆𑀘𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁. 𑀪𑀕𑀯𑀸 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑁂𑀦 𑀉𑀧𑁂𑀢𑁄 𑀲𑀫𑀼𑀧𑁂𑀢𑁄 𑀉𑀧𑀕𑀢𑁄 𑀲𑀫𑀼𑀧𑀕𑀢𑁄 𑀉𑀧𑀧𑀦𑁆𑀦𑁄 𑀲𑀫𑀼𑀧𑀧𑀦𑁆𑀦𑁄 𑀲𑀫𑀦𑁆𑀦𑀸𑀕𑀢𑁄.
‘‘𑀦 𑀢𑀲𑁆𑀲 𑀅𑀤𑀺𑀝𑁆𑀞𑀫𑀺𑀥𑀢𑁆𑀣𑀺 𑀓𑀺𑀜𑁆𑀘𑀺, 𑀅𑀣𑁄 𑀅𑀯𑀺𑀜𑁆𑀜𑀸𑀢𑀫𑀚𑀸𑀦𑀺𑀢𑀩𑁆𑀩𑀁;
𑀲𑀩𑁆𑀩𑀁 𑀅𑀪𑀺𑀜𑁆𑀜𑀸𑀲𑀺 𑀬𑀤𑀢𑁆𑀣𑀺 𑀦𑁂𑀬𑁆𑀬𑀁, 𑀢𑀣𑀸𑀕𑀢𑁄 𑀢𑁂𑀦 𑀲𑀫𑀦𑁆𑀢𑀘𑀓𑁆𑀔𑀽’’𑀢𑀺.
𑀏𑀯𑀁 𑀪𑀕𑀯𑀸 𑀲𑀫𑀦𑁆𑀢𑀘𑀓𑁆𑀔𑀼𑀦𑀸𑀧𑀺 𑀘𑀓𑁆𑀔𑀼𑀫𑀸𑀢𑀺 𑁋 𑀬𑀣𑀸 𑀤𑀺𑀲𑁆𑀲𑀢𑀺 𑀘𑀓𑁆𑀔𑀼𑀫𑀸.
𑀲𑀩𑁆𑀩𑀁 𑀢𑀫𑀁 𑀯𑀺𑀦𑁄𑀤𑁂𑀢𑁆𑀯𑀸𑀢𑀺 𑀲𑀩𑁆𑀩𑀁 𑀭𑀸𑀕𑀢𑀫𑀁 𑀤𑁄𑀲𑀢𑀫𑀁 𑀫𑁄𑀳𑀢𑀫𑀁 𑀫𑀸𑀦𑀢𑀫𑀁 𑀤𑀺𑀝𑁆𑀞𑀺𑀢𑀫𑀁 𑀓𑀺𑀮𑁂𑀲𑀢𑀫𑀁 𑀤𑀼𑀘𑁆𑀘𑀭𑀺𑀢𑀢𑀫𑀁 𑀅𑀦𑁆𑀥𑀓𑀭𑀡𑀁 𑀅𑀘𑀓𑁆𑀔𑀼𑀓𑀭𑀡𑀁 𑀅𑀜𑁆𑀜𑀸𑀡𑀓𑀭𑀡𑀁 𑀧𑀜𑁆𑀜𑀸𑀦𑀺𑀭𑁄𑀥𑀺𑀓𑀁 𑀯𑀺𑀖𑀸𑀢𑀧𑀓𑁆𑀔𑀺𑀓𑀁 𑀅𑀦𑀺𑀩𑁆𑀩𑀸𑀦𑀲𑀁𑀯𑀢𑁆𑀢𑀦𑀺𑀓𑀁 𑀦𑀼𑀤𑀺𑀢𑁆𑀯𑀸 𑀧𑀦𑀼𑀤𑀺𑀢𑁆𑀯𑀸 𑀚𑀳𑀺𑀢𑁆𑀯𑀸 𑀧𑀚𑀳𑀺𑀢𑁆𑀯𑀸 𑀯𑀺𑀦𑁄𑀤𑁂𑀢𑁆𑀯𑀸 𑀩𑁆𑀬𑀦𑁆𑀢𑀺𑀁 𑀓𑀭𑀺𑀢𑁆𑀯𑀸 𑀅𑀦𑀪𑀸𑀯𑀁 𑀕𑀫𑁂𑀢𑁆𑀯𑀸𑀢𑀺 𑁋 𑀲𑀩𑁆𑀩𑀁 𑀢𑀫𑀁 𑀯𑀺𑀦𑁄𑀤𑁂𑀢𑁆𑀯𑀸.
𑀏𑀓𑁄𑀯 𑀭𑀢𑀺𑀫𑀚𑁆𑀛𑀕𑀸𑀢𑀺. 𑀏𑀓𑁄𑀢𑀺 𑀪𑀕𑀯𑀸 𑀧𑀩𑁆𑀩𑀚𑁆𑀚𑀸𑀲𑀗𑁆𑀔𑀸𑀢𑁂𑀦 𑀏𑀓𑁄, 𑀅𑀤𑀼𑀢𑀺𑀬𑀝𑁆𑀞𑁂𑀦 𑀏𑀓𑁄, 𑀢𑀡𑁆𑀳𑀸𑀬 𑀧𑀳𑀸𑀦𑀝𑁆𑀞𑁂𑀦 𑀏𑀓𑁄, 𑀏𑀓𑀦𑁆𑀢𑀯𑀻𑀢𑀭𑀸𑀕𑁄𑀢𑀺 𑀏𑀓𑁄, 𑀏𑀓𑀦𑁆𑀢𑀯𑀻𑀢𑀤𑁄𑀲𑁄𑀢𑀺 𑀏𑀓𑁄, 𑀏𑀓𑀦𑁆𑀢𑀯𑀻𑀢𑀫𑁄𑀳𑁄𑀢𑀺 𑀏𑀓𑁄, 𑀏𑀓𑀦𑁆𑀢𑀦𑀺𑀓𑁆𑀓𑀺𑀮𑁂𑀲𑁄𑀢𑀺 𑀏𑀓𑁄, 𑀏𑀓𑀸𑀬𑀦𑀫𑀕𑁆𑀕𑀁 𑀕𑀢𑁄𑀢𑀺 𑀏𑀓𑁄, 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀏𑀓𑁄.
𑀓𑀣𑀁 𑀪𑀕𑀯𑀸 𑀧𑀩𑁆𑀩𑀚𑁆𑀚𑀸𑀲𑀗𑁆𑀔𑀸𑀢𑁂𑀦 𑀏𑀓𑁄? 𑀪𑀕𑀯𑀸 𑀤𑀳𑀭𑁄𑀯 𑀲𑀫𑀸𑀦𑁄 𑀲𑀼𑀲𑀼 𑀓𑀸𑀴𑀓𑁂𑀲𑁄 𑀪𑀤𑁆𑀭𑁂𑀦 [𑀪𑀤𑁆𑀤𑁂𑀦 (𑀲𑁆𑀬𑀸.)] 𑀬𑁄𑀩𑁆𑀩𑀦𑁂𑀦 𑀲𑀫𑀦𑁆𑀦𑀸𑀕𑀢𑁄 𑀧𑀞𑀫𑁂𑀦 𑀯𑀬𑀲𑀸 𑀅𑀓𑀸𑀫𑀓𑀸𑀦𑀁 𑀫𑀸𑀢𑀸𑀧𑀺𑀢𑀽𑀦𑀁 𑀅𑀲𑁆𑀲𑀼𑀫𑀼𑀔𑀸𑀦𑀁 𑀭𑀼𑀤𑀦𑁆𑀢𑀸𑀦𑀁 𑀯𑀺𑀮𑀧𑀦𑁆𑀢𑀸𑀦𑀁 𑀜𑀸𑀢𑀺𑀲𑀗𑁆𑀖𑀁 𑀧𑀳𑀸𑀬 𑀲𑀩𑁆𑀩𑀁 𑀖𑀭𑀸𑀯𑀸𑀲𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀢𑁆𑀯𑀸 𑀧𑀼𑀢𑁆𑀢𑀤𑀸𑀭𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀢𑁆𑀯𑀸 𑀜𑀸𑀢𑀺𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀢𑁆𑀯𑀸 𑀫𑀺𑀢𑁆𑀢𑀸𑀫𑀘𑁆𑀘𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀢𑁆𑀯𑀸 𑀲𑀦𑁆𑀦𑀺𑀥𑀺𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀢𑁆𑀯𑀸 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀓𑀺𑀜𑁆𑀘𑀦𑀪𑀸𑀯𑀁 𑀉𑀧𑀕𑀦𑁆𑀢𑁆𑀯𑀸 𑀏𑀓𑁄 𑀘𑀭𑀢𑀺 𑀯𑀺𑀳𑀭𑀢𑀺 𑀇𑀭𑀺𑀬𑀢𑀺 𑀯𑀢𑁆𑀢𑀢𑀺 𑀧𑀸𑀮𑁂𑀢𑀺 𑀬𑀧𑁂𑀢𑀺 𑀬𑀸𑀧𑁂𑀢𑀺 𑁋 𑀏𑀯𑀁 𑀪𑀕𑀯𑀸 𑀧𑀩𑁆𑀩𑀚𑁆𑀚𑀸𑀲𑀗𑁆𑀔𑀸𑀢𑁂𑀦 𑀏𑀓𑁄.
𑀓𑀣𑀁 𑀪𑀕𑀯𑀸 𑀅𑀤𑀼𑀢𑀺𑀬𑀝𑁆𑀞𑁂𑀦 𑀏𑀓𑁄? 𑀲𑁄 𑀏𑀯𑀁 𑀧𑀩𑁆𑀩𑀚𑀺𑀢𑁄 𑀲𑀫𑀸𑀦𑁄 𑀏𑀓𑁄 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀢𑀺 𑀅𑀧𑁆𑀧𑀲𑀤𑁆𑀤𑀸𑀦𑀺 𑀅𑀧𑁆𑀧𑀦𑀺𑀕𑁆𑀖𑁄𑀲𑀸𑀦𑀺 𑀯𑀺𑀚𑀦𑀯𑀸𑀢𑀸𑀦𑀺 𑀫𑀦𑀼𑀲𑁆𑀲𑀭𑀸𑀳𑀲𑁆𑀲𑁂𑀬𑁆𑀬𑀓𑀸𑀦𑀺 𑀧𑀝𑀺𑀲𑀮𑁆𑀮𑀸𑀦𑀲𑀸𑀭𑀼𑀧𑁆𑀧𑀸𑀦𑀺. 𑀲𑁄 𑀏𑀓𑁄 𑀘𑀭𑀢𑀺, 𑀏𑀓𑁄 𑀕𑀘𑁆𑀙𑀢𑀺, 𑀏𑀓𑁄 𑀢𑀺𑀝𑁆𑀞𑀢𑀺, 𑀏𑀓𑁄 𑀦𑀺𑀲𑀻𑀤𑀢𑀺, 𑀏𑀓𑁄 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺, 𑀏𑀓𑁄 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀢𑀺, 𑀏𑀓𑁄 𑀧𑀝𑀺𑀓𑁆𑀓𑀫𑀢𑀺, 𑀏𑀓𑁄 𑀭𑀳𑁄 𑀦𑀺𑀲𑀻𑀤𑀢𑀺, 𑀏𑀓𑁄 𑀘𑀗𑁆𑀓𑀫𑀁 𑀅𑀥𑀺𑀝𑁆𑀞𑀸𑀢𑀺, 𑀏𑀓𑁄 𑀘𑀭𑀢𑀺 𑀯𑀺𑀳𑀭𑀢𑀺 𑀇𑀭𑀺𑀬𑀢𑀺 𑀯𑀢𑁆𑀢𑀢𑀺 𑀧𑀸𑀮𑁂𑀢𑀺 𑀬𑀧𑁂𑀢𑀺 𑀬𑀸𑀧𑁂𑀢𑀺 𑁋 𑀏𑀯𑀁 𑀪𑀕𑀯𑀸 𑀅𑀤𑀼𑀢𑀺𑀬𑀝𑁆𑀞𑁂𑀦 𑀏𑀓𑁄.
𑀓𑀣𑀁 𑀪𑀕𑀯𑀸 𑀢𑀡𑁆𑀳𑀸𑀬 𑀧𑀳𑀸𑀦𑀝𑁆𑀞𑁂𑀦 𑀏𑀓𑁄? 𑀲𑁄 𑀏𑀯𑀁 𑀏𑀓𑁄 𑀅𑀤𑀼𑀢𑀺𑀬𑁄 𑀅𑀧𑁆𑀧𑀫𑀢𑁆𑀢𑁄 𑀆𑀢𑀸𑀧𑀻 𑀧𑀳𑀺𑀢𑀢𑁆𑀢𑁄 𑀯𑀺𑀳𑀭𑀦𑁆𑀢𑁄 𑀦𑀚𑁆𑀚𑀸 𑀦𑁂𑀭𑀜𑁆𑀚𑀭𑀸𑀬 𑀢𑀻𑀭𑁂 𑀩𑁄𑀥𑀺𑀭𑀼𑀓𑁆𑀔𑀫𑀽𑀮𑁂 𑀫𑀳𑀸𑀧𑀥𑀸𑀦𑀁 𑀧𑀤𑀳𑀦𑁆𑀢𑁄 𑀫𑀸𑀭𑀁 𑀲𑀲𑁂𑀦𑀁 𑀓𑀡𑁆𑀳𑀁 𑀦𑀫𑀼𑀘𑀺𑀁 𑀧𑀫𑀢𑁆𑀢𑀩𑀦𑁆𑀥𑀼𑀁 𑀯𑀺𑀥𑀫𑀺𑀢𑁆𑀯𑀸 𑀢𑀡𑁆𑀳𑀸𑀚𑀸𑀮𑀺𑀦𑀺𑀁 𑀯𑀺𑀲𑀭𑀺𑀢𑀁 𑀯𑀺𑀲𑀢𑁆𑀢𑀺𑀓𑀁 𑀧𑀚𑀳𑀲𑀺 𑀯𑀺𑀦𑁄𑀤𑁂𑀲𑀺 𑀩𑁆𑀬𑀦𑁆𑀢𑀺𑀁 𑀅𑀓𑀸𑀲𑀺 𑀅𑀦𑀪𑀸𑀯𑀁 𑀕𑀫𑁂𑀲𑀺.
‘‘𑀢𑀡𑁆𑀳𑀸𑀤𑀼𑀢𑀺𑀬𑁄 𑀧𑀼𑀭𑀺𑀲𑁄, 𑀤𑀻𑀖𑀫𑀤𑁆𑀥𑀸𑀦𑀲𑀁𑀲𑀭𑀁;
𑀇𑀢𑁆𑀣𑀪𑀸𑀯𑀜𑁆𑀜𑀣𑀸𑀪𑀸𑀯𑀁 [𑀇𑀢𑁆𑀣𑀁 𑀪𑀸𑀯𑀜𑁆𑀜𑀣𑀸𑀪𑀸𑀯𑀁 (𑀓.) 𑀇𑀢𑀺𑀯𑀼. 𑁧𑁫, 𑁧𑁦𑁫], 𑀲𑀁𑀲𑀸𑀭𑀁 𑀦𑀸𑀢𑀺𑀯𑀢𑁆𑀢𑀢𑀺.
‘‘𑀏𑀢𑀫𑀸𑀤𑀻𑀦𑀯𑀁 𑀜𑀢𑁆𑀯𑀸, 𑀢𑀡𑁆𑀳𑀁 𑀤𑀼𑀓𑁆𑀔𑀲𑁆𑀲 𑀲𑀫𑁆𑀪𑀯𑀁;
𑀯𑀻𑀢𑀢𑀡𑁆𑀳𑁄 𑀅𑀦𑀸𑀤𑀸𑀦𑁄, 𑀲𑀢𑁄 𑀪𑀺𑀓𑁆𑀔𑀼 𑀧𑀭𑀺𑀩𑁆𑀩𑀚𑁂’’𑀢𑀺.
𑀏𑀯𑀁 𑀪𑀕𑀯𑀸 𑀢𑀡𑁆𑀳𑀸𑀬 𑀧𑀳𑀸𑀦𑀝𑁆𑀞𑁂𑀦 𑀏𑀓𑁄.
𑀓𑀣𑀁 𑀪𑀕𑀯𑀸 𑀏𑀓𑀦𑁆𑀢𑀯𑀻𑀢𑀭𑀸𑀕𑁄𑀢𑀺 𑀏𑀓𑁄? 𑀭𑀸𑀕𑀲𑁆𑀲 𑀧𑀳𑀻𑀦𑀢𑁆𑀢𑀸 𑀏𑀓𑀦𑁆𑀢𑀯𑀻𑀢𑀭𑀸𑀕𑁄𑀢𑀺 𑀏𑀓𑁄, 𑀤𑁄𑀲𑀲𑁆𑀲 𑀧𑀳𑀻𑀦𑀢𑁆𑀢𑀸 𑀏𑀓𑀦𑁆𑀢𑀯𑀻𑀢𑀤𑁄𑀲𑁄𑀢𑀺 𑀏𑀓𑁄, 𑀫𑁄𑀳𑀲𑁆𑀲 𑀧𑀳𑀻𑀦𑀢𑁆𑀢𑀸 𑀏𑀓𑀦𑁆𑀢𑀯𑀻𑀢𑀫𑁄𑀳𑁄𑀢𑀺 𑀏𑀓𑁄, 𑀓𑀺𑀮𑁂𑀲𑀸𑀦𑀁 𑀧𑀳𑀻𑀦𑀢𑁆𑀢𑀸 𑀏𑀓𑀦𑁆𑀢𑀦𑀺𑀓𑁆𑀓𑀺𑀮𑁂𑀲𑁄𑀢𑀺 𑀏𑀓𑁄.
𑀓𑀣𑀁 𑀪𑀕𑀯𑀸 𑀏𑀓𑀸𑀬𑀦𑀫𑀕𑁆𑀕𑀁 𑀕𑀢𑁄𑀢𑀺 𑀏𑀓𑁄? 𑀏𑀓𑀸𑀬𑀦𑀫𑀕𑁆𑀕𑁄 𑀯𑀼𑀘𑁆𑀘𑀢𑀺 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀧𑀜𑁆𑀘 𑀩𑀮𑀸𑀦𑀺 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄.
‘‘𑀏𑀓𑀸𑀬𑀦𑀁 𑀚𑀸𑀢𑀺𑀔𑀬𑀦𑁆𑀢𑀤𑀲𑁆𑀲𑀻, 𑀫𑀕𑁆𑀕𑀁 𑀧𑀚𑀸𑀦𑀸𑀢𑀺 𑀳𑀺𑀢𑀸𑀦𑀼𑀓𑀫𑁆𑀧𑀻;
𑀏𑀢𑁂𑀦 𑀫𑀕𑁆𑀕𑁂𑀦 𑀢𑀭𑀺𑀁𑀲𑀼 [𑀅𑀢𑀭𑀺𑀁𑀲𑀼 (𑀲𑁆𑀬𑀸.)] 𑀧𑀼𑀩𑁆𑀩𑁂, 𑀢𑀭𑀺𑀲𑁆𑀲𑀦𑁆𑀢𑀺 𑀬𑁂 𑀘 𑀢𑀭𑀦𑁆𑀢𑀺 𑀑𑀖’’𑀦𑁆𑀢𑀺.
𑀏𑀯𑀁 𑀪𑀕𑀯𑀸 𑀏𑀓𑀸𑀬𑀦𑀫𑀕𑁆𑀕𑀁 𑀕𑀢𑁄𑀢𑀺 𑀏𑀓𑁄.
𑀓𑀣𑀁 𑀪𑀕𑀯𑀸 𑀏𑀓𑁄 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀏𑀓𑁄? 𑀩𑁄𑀥𑀺 𑀯𑀼𑀘𑁆𑀘𑀢𑀺 𑀘𑀢𑀽𑀲𑀼 𑀫𑀕𑁆𑀕𑁂𑀲𑀼 𑀜𑀸𑀡𑀁 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀧𑀜𑁆𑀜𑀸𑀩𑀮𑀁 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀯𑀻𑀫𑀁𑀲𑀸 𑀯𑀺𑀧𑀲𑁆𑀲𑀦𑀸 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀪𑀕𑀯𑀸 𑀢𑁂𑀦 𑀩𑁄𑀥𑀺𑀜𑀸𑀡𑁂𑀦 ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺 𑀩𑀼𑀚𑁆𑀛𑀺, ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀸’’𑀢𑀺 𑀩𑀼𑀚𑁆𑀛𑀺, ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸’’𑀢𑀺 𑀩𑀼𑀚𑁆𑀛𑀺, ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺 𑀩𑀼𑀚𑁆𑀛𑀺…𑀧𑁂… ‘‘𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡’’𑀦𑁆𑀢𑀺 𑀩𑀼𑀚𑁆𑀛𑀺; ‘‘𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑀸 𑀲𑀗𑁆𑀔𑀸𑀭𑀦𑀺𑀭𑁄𑀥𑁄’’𑀢𑀺 𑀩𑀼𑀚𑁆𑀛𑀺…𑀧𑁂… ‘‘𑀚𑀸𑀢𑀺𑀦𑀺𑀭𑁄𑀥𑀸 𑀚𑀭𑀸𑀫𑀭𑀡𑀦𑀺𑀭𑁄𑀥𑁄’’𑀢𑀺 𑀩𑀼𑀚𑁆𑀛𑀺; ‘‘𑀇𑀤𑀁 𑀤𑀼𑀓𑁆𑀔’’𑀦𑁆𑀢𑀺 𑀩𑀼𑀚𑁆𑀛𑀺, ‘‘𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄’’𑀢𑀺 𑀩𑀼𑀚𑁆𑀛𑀺, ‘‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑁄’’𑀢𑀺 𑀩𑀼𑀚𑁆𑀛𑀺, ‘‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’’𑀢𑀺 𑀩𑀼𑀚𑁆𑀛𑀺; ‘‘𑀇𑀫𑁂 𑀆𑀲𑀯𑀸’’𑀢𑀺 𑀩𑀼𑀚𑁆𑀛𑀺…𑀧𑁂… ‘‘𑀅𑀬𑀁 𑀆𑀲𑀯𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’’𑀢𑀺 𑀩𑀼𑀚𑁆𑀛𑀺; ‘‘𑀇𑀫𑁂 𑀥𑀫𑁆𑀫𑀸 𑀧𑀭𑀺𑀜𑁆𑀜𑁂𑀬𑁆𑀬𑀸’’𑀢𑀺 𑀩𑀼𑀚𑁆𑀛𑀺… 𑀧𑀳𑀸𑀢𑀩𑁆𑀩𑀸𑀢𑀺… 𑀪𑀸𑀯𑁂𑀢𑀩𑁆𑀩𑀸𑀢𑀺… 𑀲𑀘𑁆𑀙𑀺𑀓𑀸𑀢𑀩𑁆𑀩𑀸𑀢𑀺 𑀩𑀼𑀚𑁆𑀛𑀺, 𑀙𑀦𑁆𑀦𑀁 𑀨𑀲𑁆𑀲𑀸𑀬𑀢𑀦𑀸𑀦𑀁 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀩𑀼𑀚𑁆𑀛𑀺, 𑀧𑀜𑁆𑀘𑀦𑁆𑀦𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀩𑀼𑀚𑁆𑀛𑀺, 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀩𑀼𑀚𑁆𑀛𑀺, ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁, 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺 𑀩𑀼𑀚𑁆𑀛𑀺.
𑀅𑀣 𑀯𑀸 𑀬𑀁 𑀓𑀺𑀜𑁆𑀘𑀺 𑀩𑀼𑀚𑁆𑀛𑀺𑀢𑀩𑁆𑀩𑀁 𑀅𑀦𑀼𑀩𑀼𑀚𑁆𑀛𑀺𑀢𑀩𑁆𑀩𑀁 𑀧𑀝𑀺𑀩𑀼𑀚𑁆𑀛𑀺𑀢𑀩𑁆𑀩𑀁 𑀲𑀫𑁆𑀩𑀼𑀚𑁆𑀛𑀺𑀢𑀩𑁆𑀩𑀁 𑀅𑀥𑀺𑀕𑀦𑁆𑀢𑀩𑁆𑀩𑀁 𑀨𑀲𑁆𑀲𑀺𑀢𑀩𑁆𑀩𑀁 𑀲𑀘𑁆𑀙𑀺𑀓𑀸𑀢𑀩𑁆𑀩𑀁, 𑀲𑀩𑁆𑀩𑀁 𑀢𑀁 𑀢𑁂𑀦 𑀩𑁄𑀥𑀺𑀜𑀸𑀡𑁂𑀦 𑀩𑀼𑀚𑁆𑀛𑀺 𑀅𑀦𑀼𑀩𑀼𑀚𑁆𑀛𑀺 𑀧𑀝𑀺𑀩𑀼𑀚𑁆𑀛𑀺 𑀲𑀫𑁆𑀩𑀼𑀚𑁆𑀛𑀺 𑀲𑀫𑁆𑀫𑀸𑀩𑀼𑀚𑁆𑀛𑀺 𑀅𑀥𑀺𑀕𑀘𑁆𑀙𑀺 𑀨𑀲𑁆𑀲𑁂𑀲𑀺 𑀲𑀘𑁆𑀙𑀸𑀓𑀸𑀲𑀺. 𑀏𑀯𑀁 𑀪𑀕𑀯𑀸 𑀏𑀓𑁄 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀏𑀓𑁄.
𑀭𑀢𑀺𑀫𑀚𑁆𑀛𑀕𑀸𑀢𑀺. 𑀭𑀢𑀺𑀦𑁆𑀢𑀺 𑀦𑁂𑀓𑁆𑀔𑀫𑁆𑀫𑀭𑀢𑀺𑀁 𑀯𑀺𑀯𑁂𑀓𑀭𑀢𑀺𑀁 𑀉𑀧𑀲𑀫𑀭𑀢𑀺𑀁 𑀲𑀫𑁆𑀩𑁄𑀥𑀺𑀭𑀢𑀺𑀁 𑀅𑀚𑁆𑀛𑀕𑀸 𑀲𑀫𑀚𑁆𑀛𑀕𑀸 𑀅𑀥𑀺𑀕𑀘𑁆𑀙𑀺 𑀨𑀲𑁆𑀲𑁂𑀲𑀺 𑀲𑀘𑁆𑀙𑀸𑀓𑀸𑀲𑀻𑀢𑀺 𑁋 𑀏𑀓𑁄𑀯 𑀭𑀢𑀺𑀫𑀚𑁆𑀛𑀕𑀸.
𑀢𑁂𑀦𑀸𑀳 𑀣𑁂𑀭𑁄 𑀲𑀸𑀭𑀺𑀧𑀼𑀢𑁆𑀢𑁄 𑁋
‘‘𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲, 𑀬𑀣𑀸 𑀤𑀺𑀲𑁆𑀲𑀢𑀺 𑀘𑀓𑁆𑀔𑀼𑀫𑀸;
𑀲𑀩𑁆𑀩𑀁 𑀢𑀫𑀁 𑀯𑀺𑀦𑁄𑀤𑁂𑀢𑁆𑀯𑀸, 𑀏𑀓𑁄𑀯 𑀭𑀢𑀺𑀫𑀚𑁆𑀛𑀕𑀸’’𑀢𑀺.
𑁧𑁯𑁨. 𑀢𑀁 𑀩𑀼𑀤𑁆𑀥𑀁 𑀅𑀲𑀺𑀢𑀁 𑀢𑀸𑀤𑀺𑀁, 𑀅𑀓𑀼𑀳𑀁 𑀕𑀡𑀺𑀫𑀸𑀕𑀢𑀁;
𑀩𑀳𑀽𑀦𑀫𑀺𑀥 𑀩𑀤𑁆𑀥𑀸𑀦𑀁, 𑀅𑀢𑁆𑀣𑀺 𑀧𑀜𑁆𑀳𑁂𑀦 𑀆𑀕𑀫𑀁.
𑀢𑀁 𑀩𑀼𑀤𑁆𑀥𑀁 𑀅𑀲𑀺𑀢𑀁 𑀢𑀸𑀤𑀺𑀦𑁆𑀢𑀺. 𑀩𑀼𑀤𑁆𑀥𑁄𑀢𑀺 𑀬𑁄 𑀲𑁄 𑀪𑀕𑀯𑀸 𑀲𑀬𑀫𑁆𑀪𑀽 𑀅𑀦𑀸𑀘𑀭𑀺𑀬𑀓𑁄 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀲𑀸𑀫𑀁 𑀲𑀘𑁆𑀘𑀸𑀦𑀺 𑀅𑀪𑀺𑀲𑀫𑁆𑀩𑀼𑀚𑁆𑀛𑀺, 𑀢𑀢𑁆𑀣 𑀘 𑀲𑀩𑁆𑀩𑀜𑁆𑀜𑀼𑀢𑀁 𑀧𑀸𑀧𑀼𑀡𑀺 [𑀧𑀢𑁆𑀢𑁄 (𑀲𑁆𑀬𑀸.)], 𑀩𑀮𑁂𑀲𑀼 𑀘 𑀯𑀲𑀻𑀪𑀸𑀯𑀁 𑀧𑀸𑀧𑀼𑀡𑀺. 𑀩𑀼𑀤𑁆𑀥𑁄𑀢𑀺 𑀓𑁂𑀦𑀝𑁆𑀞𑁂𑀦 𑀩𑀼𑀤𑁆𑀥𑁄? 𑀩𑀼𑀚𑁆𑀛𑀺𑀢𑀸 𑀲𑀘𑁆𑀘𑀸𑀦𑀻𑀢𑀺 𑀩𑀼𑀤𑁆𑀥𑁄, 𑀩𑁄𑀥𑁂𑀢𑀸 𑀧𑀚𑀸𑀬𑀸𑀢𑀺 𑀩𑀼𑀤𑁆𑀥𑁄, 𑀲𑀩𑁆𑀩𑀜𑁆𑀜𑀼𑀢𑀸𑀬 𑀩𑀼𑀤𑁆𑀥𑁄, 𑀲𑀩𑁆𑀩𑀤𑀲𑁆𑀲𑀸𑀯𑀺𑀢𑀸𑀬 𑀩𑀼𑀤𑁆𑀥𑁄, 𑀅𑀦𑀜𑁆𑀜𑀦𑁂𑀬𑁆𑀬𑀢𑀸𑀬 𑀩𑀼𑀤𑁆𑀥𑁄, 𑀯𑀺𑀲𑀯𑀺𑀢𑀸𑀬 𑀩𑀼𑀤𑁆𑀥𑁄, 𑀔𑀻𑀡𑀸𑀲𑀯𑀲𑀗𑁆𑀔𑀸𑀢𑁂𑀦 𑀩𑀼𑀤𑁆𑀥𑁄, 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀲𑀗𑁆𑀔𑀸𑀢𑁂𑀦 𑀩𑀼𑀤𑁆𑀥𑁄, 𑀏𑀓𑀦𑁆𑀢𑀯𑀻𑀢𑀭𑀸𑀕𑁄𑀢𑀺 𑀩𑀼𑀤𑁆𑀥𑁄, 𑀏𑀓𑀦𑁆𑀢𑀯𑀻𑀢𑀤𑁄𑀲𑁄𑀢𑀺 𑀩𑀼𑀤𑁆𑀥𑁄, 𑀏𑀓𑀦𑁆𑀢𑀯𑀻𑀢𑀫𑁄𑀳𑁄𑀢𑀺 𑀩𑀼𑀤𑁆𑀥𑁄, 𑀏𑀓𑀦𑁆𑀢𑀦𑀺𑀓𑁆𑀓𑀺𑀮𑁂𑀲𑁄𑀢𑀺 𑀩𑀼𑀤𑁆𑀥𑁄, 𑀏𑀓𑀸𑀬𑀦𑀫𑀕𑁆𑀕𑀁 𑀕𑀢𑁄𑀢𑀺 𑀩𑀼𑀤𑁆𑀥𑁄, 𑀏𑀓𑁄 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀩𑀼𑀤𑁆𑀥𑁄, 𑀅𑀩𑀼𑀤𑁆𑀥𑀺𑀯𑀺𑀳𑀢𑀢𑁆𑀢𑀸 𑀩𑀼𑀤𑁆𑀥𑀺𑀧𑀝𑀺𑀮𑀸𑀪𑀢𑁆𑀢𑀸 𑀩𑀼𑀤𑁆𑀥𑁄. 𑀩𑀼𑀤𑁆𑀥𑁄𑀢𑀺 𑀦𑁂𑀢𑀁 𑀫𑀸𑀢𑀭𑀸 𑀓𑀢𑀁 𑀦 𑀧𑀺𑀢𑀭𑀸 𑀓𑀢𑀁, 𑀦 𑀪𑀸𑀢𑀭𑀸 𑀓𑀢𑀁, 𑀦 𑀪𑀕𑀺𑀦𑀺𑀬𑀸 𑀓𑀢𑀁, 𑀦 𑀫𑀺𑀢𑁆𑀢𑀸𑀫𑀘𑁆𑀘𑁂𑀳𑀺 𑀓𑀢𑀁, 𑀦 𑀜𑀸𑀢𑀺𑀲𑀸𑀮𑁄𑀳𑀺𑀢𑁂𑀳𑀺 𑀓𑀢𑀁, 𑀦 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀳𑀺 𑀓𑀢𑀁, 𑀦 𑀤𑁂𑀯𑀢𑀸𑀳𑀺 𑀓𑀢𑀁. 𑀯𑀺𑀫𑁄𑀓𑁆𑀔𑀦𑁆𑀢𑀺𑀓𑀫𑁂𑀢𑀁 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀩𑁄𑀥𑀺𑀬𑀸 𑀫𑀽𑀮𑁂 𑀲𑀳 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀲𑁆𑀲 𑀧𑀝𑀺𑀮𑀸𑀪𑀸 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺, 𑀬𑀤𑀺𑀤𑀁 𑀩𑀼𑀤𑁆𑀥𑁄𑀢𑀺 𑁋 𑀢𑀁 𑀩𑀼𑀤𑁆𑀥𑀁. 𑀅𑀲𑀺𑀢𑀦𑁆𑀢𑀺 𑀤𑁆𑀯𑁂 𑀦𑀺𑀲𑁆𑀲𑀬𑀸 𑁋 𑀢𑀡𑁆𑀳𑀸𑀦𑀺𑀲𑁆𑀲𑀬𑁄 𑀘 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑁄 𑀘. 𑀓𑀢𑀫𑁄 𑀢𑀡𑁆𑀳𑀸𑀦𑀺𑀲𑁆𑀲𑀬𑁄? 𑀬𑀸𑀯 𑀢𑀡𑁆𑀳𑀸𑀲𑀗𑁆𑀔𑀸𑀢𑁂𑀦 𑀲𑀻𑀫𑀓𑀢𑀁 𑀑𑀥𑀺𑀓𑀢𑀁 [𑀧𑀭𑀺𑀬𑀸𑀤𑀺𑀓𑀢𑀁 (𑀲𑁆𑀬𑀸.)] 𑀧𑀭𑀺𑀬𑀦𑁆𑀢𑀓𑀢𑀁 𑀧𑀭𑀺𑀕𑁆𑀕𑀳𑀺𑀢𑀁 𑀫𑀫𑀸𑀬𑀺𑀢𑀁 𑁋 𑀇𑀤𑀁 𑀫𑀫, 𑀏𑀢𑀁 𑀫𑀫, 𑀏𑀢𑁆𑀢𑀓𑀁 𑀫𑀫, 𑀏𑀢𑁆𑀢𑀸𑀯𑀢𑀸 𑀫𑀫, 𑀫𑀫 𑀭𑀽𑀧𑀸 𑀲𑀤𑁆𑀤𑀸 𑀕𑀦𑁆𑀥𑀸 𑀭𑀲𑀸 𑀨𑁄𑀝𑁆𑀞𑀩𑁆𑀩𑀸, 𑀅𑀢𑁆𑀣𑀭𑀡𑀸 𑀧𑀸𑀯𑀼𑀭𑀡𑀸 𑀤𑀸𑀲𑀺𑀤𑀸𑀲𑀸 𑀅𑀚𑁂𑀴𑀓𑀸 𑀓𑀼𑀓𑁆𑀓𑀼𑀝𑀲𑀽𑀓𑀭𑀸 𑀳𑀢𑁆𑀣𑀺𑀕𑀯𑀸𑀲𑁆𑀲𑀯𑀴𑀯𑀸, 𑀔𑁂𑀢𑁆𑀢𑀁 𑀯𑀢𑁆𑀣𑀼𑀁 𑀳𑀺𑀭𑀜𑁆𑀜𑀁 𑀲𑀼𑀯𑀡𑁆𑀡𑀁, 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀺𑀬𑁄 𑀭𑀝𑁆𑀞𑀜𑁆𑀘 𑀚𑀦𑀧𑀤𑁄 𑀘 𑀓𑁄𑀲𑁄 𑀘 𑀓𑁄𑀝𑁆𑀞𑀸𑀕𑀸𑀭𑀜𑁆𑀘, 𑀓𑁂𑀯𑀮𑀫𑁆𑀧𑀺 𑀫𑀳𑀸𑀧𑀣𑀯𑀺𑀁 𑀢𑀡𑁆𑀳𑀸𑀯𑀲𑁂𑀦 𑀫𑀫𑀸𑀬𑀢𑀺, 𑀬𑀸𑀯𑀢𑀸 𑀅𑀝𑁆𑀞𑀲𑀢𑀁 𑀢𑀡𑁆𑀳𑀸𑀯𑀺𑀘𑀭𑀺𑀢𑀁 𑁋 𑀅𑀬𑀁 𑀢𑀡𑁆𑀳𑀸𑀦𑀺𑀲𑁆𑀲𑀬𑁄.
𑀓𑀢𑀫𑁄 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑁄? 𑀯𑀻𑀲𑀢𑀺𑀯𑀢𑁆𑀣𑀼𑀓𑀸 𑀲𑀓𑁆𑀓𑀸𑀬𑀤𑀺𑀝𑁆𑀞𑀺, 𑀤𑀲𑀯𑀢𑁆𑀣𑀼𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺, 𑀤𑀲𑀯𑀢𑁆𑀣𑀼𑀓𑀸 𑀅𑀦𑁆𑀢𑀕𑁆𑀕𑀸𑀳𑀺𑀓𑀸 𑀤𑀺𑀝𑁆𑀞𑀺. 𑀬𑀸 𑀏𑀯𑀭𑀽𑀧𑀸 𑀤𑀺𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀁 𑀤𑀺𑀝𑁆𑀞𑀺𑀕𑀳𑀦𑀁 𑀤𑀺𑀝𑁆𑀞𑀺𑀓𑀦𑁆𑀢𑀸𑀭𑁄 𑀤𑀺𑀝𑁆𑀞𑀺𑀯𑀺𑀲𑀽𑀓𑀸𑀬𑀺𑀓𑀁 𑀤𑀺𑀝𑁆𑀞𑀺𑀯𑀺𑀧𑁆𑀨𑀦𑁆𑀤𑀺𑀢𑀁 𑀤𑀺𑀝𑁆𑀞𑀺𑀲𑀜𑁆𑀜𑁄𑀚𑀦𑀁 𑀕𑀸𑀳𑁄 𑀧𑀝𑀺𑀕𑁆𑀕𑀸𑀳𑁄 𑀅𑀪𑀺𑀦𑀺𑀯𑁂𑀲𑁄 𑀧𑀭𑀸𑀫𑀸𑀲𑁄 𑀓𑀼𑀫𑁆𑀫𑀕𑁆𑀕𑁄 𑀫𑀺𑀘𑁆𑀙𑀸𑀧𑀣𑁄 𑀫𑀺𑀘𑁆𑀙𑀢𑁆𑀢𑀁 𑀢𑀺𑀢𑁆𑀣𑀸𑀬𑀢𑀦𑀁 𑀯𑀺𑀧𑀭𑀺𑀬𑀸𑀲𑀕𑁆𑀕𑀸𑀳𑁄 𑀯𑀺𑀧𑀭𑀻𑀢𑀕𑁆𑀕𑀸𑀳𑁄 𑀯𑀺𑀧𑀮𑁆𑀮𑀸𑀲𑀕𑁆𑀕𑀸𑀳𑁄 𑀫𑀺𑀘𑁆𑀙𑀸𑀕𑀸𑀳𑁄 ‘‘𑀅𑀬𑀸𑀣𑀸𑀯𑀓𑀲𑁆𑀫𑀺𑀁 𑀬𑀸𑀣𑀸𑀯𑀓’’𑀦𑁆𑀢𑀺 𑀕𑀸𑀳𑁄 𑀬𑀸𑀯𑀢𑀸 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑁋 𑀅𑀬𑀁 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑁄.
𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀢𑀡𑁆𑀳𑀸𑀦𑀺𑀲𑁆𑀲𑀬𑁄 𑀧𑀳𑀻𑀦𑁄, 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑁄; 𑀢𑀡𑁆𑀳𑀸𑀦𑀺𑀲𑁆𑀲𑀬𑀲𑁆𑀲 𑀧𑀳𑀻𑀦𑀢𑁆𑀢𑀸 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑀲𑁆𑀲 𑀧𑀝𑀺𑀦𑀺𑀲𑁆𑀲𑀝𑁆𑀞𑀢𑁆𑀢𑀸 𑀪𑀕𑀯𑀸 𑀘𑀓𑁆𑀔𑀼𑀁 𑀅𑀲𑀺𑀢𑁄, 𑀲𑁄𑀢𑀁… 𑀖𑀸𑀦𑀁… 𑀚𑀺𑀯𑁆𑀳𑀁… 𑀓𑀸𑀬𑀁… 𑀫𑀦𑀁 𑀅𑀲𑀺𑀢𑁄, 𑀭𑀽𑀧𑁂… 𑀲𑀤𑁆𑀤𑁂… 𑀕𑀦𑁆𑀥𑁂… 𑀭𑀲𑁂… 𑀨𑁄𑀝𑁆𑀞𑀩𑁆𑀩𑁂… 𑀓𑀼𑀮𑀁… 𑀕𑀡𑀁… 𑀆𑀯𑀸𑀲𑀁… 𑀮𑀸𑀪𑀁… 𑀬𑀲𑀁… 𑀧𑀲𑀁𑀲𑀁… 𑀲𑀼𑀔𑀁… 𑀘𑀻𑀯𑀭𑀁… 𑀧𑀺𑀡𑁆𑀟𑀧𑀸𑀢𑀁… 𑀲𑁂𑀦𑀸𑀲𑀦𑀁… 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁… 𑀓𑀸𑀫𑀥𑀸𑀢𑀼𑀁… 𑀭𑀽𑀧𑀥𑀸𑀢𑀼𑀁… 𑀅𑀭𑀽𑀧𑀥𑀸𑀢𑀼𑀁 … 𑀓𑀸𑀫𑀪𑀯𑀁… 𑀭𑀽𑀧𑀪𑀯𑀁… 𑀅𑀭𑀽𑀧𑀪𑀯𑀁… 𑀲𑀜𑁆𑀜𑀸𑀪𑀯𑀁… 𑀅𑀲𑀜𑁆𑀜𑀸𑀪𑀯𑀁… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀪𑀯𑀁… 𑀏𑀓𑀯𑁄𑀓𑀸𑀭𑀪𑀯𑀁… 𑀘𑀢𑀼𑀯𑁄𑀓𑀸𑀭𑀪𑀯𑀁… 𑀧𑀜𑁆𑀘𑀯𑁄𑀓𑀸𑀭𑀪𑀯𑀁… 𑀅𑀢𑀻𑀢𑀁… 𑀅𑀦𑀸𑀕𑀢𑀁… 𑀧𑀘𑁆𑀘𑀼𑀧𑁆𑀧𑀦𑁆𑀦𑀁… 𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀺𑀜𑁆𑀜𑀸𑀢𑀩𑁆𑀩𑁂 𑀥𑀫𑁆𑀫𑁂 𑀅𑀲𑀺𑀢𑁄 𑀅𑀦𑀺𑀲𑁆𑀲𑀺𑀢𑁄 𑀅𑀦𑀮𑁆𑀮𑀻𑀦𑁄 𑀅𑀦𑀼𑀧𑀕𑀢𑁄 𑀅𑀦𑀚𑁆𑀛𑁄𑀲𑀺𑀢𑁄 𑀅𑀦𑀥𑀺𑀫𑀼𑀢𑁆𑀢𑁄 𑀦𑀺𑀓𑁆𑀔𑀦𑁆𑀢𑁄 𑀦𑀺𑀲𑁆𑀲𑀝𑁄 𑀯𑀺𑀧𑁆𑀧𑀫𑀼𑀢𑁆𑀢𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀻𑀢𑀺 𑁋 𑀢𑀁 𑀩𑀼𑀤𑁆𑀥𑀁 𑀅𑀲𑀺𑀢𑀁.
𑀢𑀸𑀤𑀺𑀦𑁆𑀢𑀺 𑀪𑀕𑀯𑀸 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀢𑀸𑀤𑀻 𑁋 𑀇𑀝𑁆𑀞𑀸𑀦𑀺𑀝𑁆𑀞𑁂 𑀢𑀸𑀤𑀻, 𑀘𑀢𑁆𑀢𑀸𑀯𑀻𑀢𑀺 𑀢𑀸𑀤𑀻, 𑀢𑀺𑀡𑁆𑀡𑀸𑀯𑀻𑀢𑀺 𑀢𑀸𑀤𑀻, 𑀫𑀼𑀢𑁆𑀢𑀸𑀯𑀻𑀢𑀺 𑀢𑀸𑀤𑀻, 𑀢𑀁𑀦𑀺𑀤𑁆𑀤𑁂𑀲𑀸 𑀢𑀸𑀤𑀻.
𑀓𑀣𑀁 𑀪𑀕𑀯𑀸 𑀇𑀝𑁆𑀞𑀸𑀦𑀺𑀝𑁆𑀞𑁂 𑀢𑀸𑀤𑀻? 𑀪𑀕𑀯𑀸 𑀮𑀸𑀪𑁂𑀧𑀺 𑀢𑀸𑀤𑀻, 𑀅𑀮𑀸𑀪𑁂𑀧𑀺 𑀢𑀸𑀤𑀻, 𑀬𑀲𑁂𑀧𑀺 𑀢𑀸𑀤𑀻, 𑀅𑀬𑀲𑁂𑀧𑀺 𑀢𑀸𑀤𑀻, 𑀧𑀲𑀁𑀲𑀸𑀬𑀧𑀺 𑀢𑀸𑀤𑀻 𑀦𑀺𑀦𑁆𑀤𑀸𑀬𑀧𑀺 𑀢𑀸𑀤𑀻, 𑀲𑀼𑀔𑁂𑀧𑀺 𑀢𑀸𑀤𑀻, 𑀤𑀼𑀓𑁆𑀔𑁂𑀧𑀺 𑀢𑀸𑀤𑀻; 𑀏𑀓𑀘𑁆𑀘𑁂 𑀩𑀸𑀳𑀁 𑀕𑀦𑁆𑀥𑁂𑀦 𑀮𑀺𑀫𑁆𑀧𑁂𑀬𑁆𑀬𑀼𑀁, 𑀏𑀓𑀘𑁆𑀘𑁂 𑀩𑀸𑀳𑀁 𑀯𑀸𑀲𑀺𑀬𑀸 𑀢𑀘𑁆𑀙𑁂𑀬𑁆𑀬𑀼𑀁, 𑀅𑀫𑀼𑀓𑀲𑁆𑀫𑀺𑀁 𑀦𑀢𑁆𑀣𑀺 𑀭𑀸𑀕𑁄, 𑀅𑀫𑀼𑀓𑀲𑁆𑀫𑀺𑀁 𑀦𑀢𑁆𑀣𑀺 𑀧𑀝𑀺𑀖𑀁, 𑀅𑀦𑀼𑀦𑀬𑀧𑀝𑀺𑀖𑀯𑀺𑀧𑁆𑀧𑀳𑀻𑀦𑁄 𑀉𑀕𑁆𑀖𑀸𑀢𑀺𑀦𑀺𑀕𑁆𑀖𑀸𑀢𑀺𑀯𑀻𑀢𑀺𑀯𑀢𑁆𑀢𑁄 𑀅𑀦𑀼𑀭𑁄𑀥𑀯𑀺𑀭𑁄𑀥𑀁 𑀲𑀫𑀢𑀺𑀓𑁆𑀓𑀦𑁆𑀢𑁄. 𑀏𑀯𑀁 𑀪𑀕𑀯𑀸 𑀇𑀝𑁆𑀞𑀸𑀦𑀺𑀝𑁆𑀞𑁂 𑀢𑀸𑀤𑀻.
𑀓𑀣𑀁 𑀪𑀕𑀯𑀸 𑀘𑀢𑁆𑀢𑀸𑀯𑀻𑀢𑀺 𑀢𑀸𑀤𑀻? 𑀪𑀕𑀯𑀢𑀸 [𑀪𑀕𑀯𑀢𑁄 (𑀲𑁆𑀬𑀸.)] 𑀭𑀸𑀕𑁄 𑀘𑀢𑁆𑀢𑁄 𑀯𑀦𑁆𑀢𑁄 𑀫𑀼𑀢𑁆𑀢𑁄 𑀧𑀳𑀻𑀦𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑁄, 𑀤𑁄𑀲𑁄…𑀧𑁂… 𑀫𑁄𑀳𑁄… 𑀓𑁄𑀥𑁄… 𑀉𑀧𑀦𑀸𑀳𑁄… 𑀫𑀓𑁆𑀔𑁄… 𑀧𑀴𑀸𑀲𑁄… 𑀇𑀲𑁆𑀲𑀸… 𑀫𑀘𑁆𑀙𑀭𑀺𑀬𑀁… 𑀫𑀸𑀬𑀸… 𑀲𑀸𑀞𑁂𑀬𑁆𑀬𑀁… 𑀣𑀫𑁆𑀪𑁄… 𑀲𑀸𑀭𑀫𑁆𑀪𑁄… 𑀫𑀸𑀦𑁄… 𑀅𑀢𑀺𑀫𑀸𑀦𑁄… 𑀫𑀤𑁄… 𑀧𑀫𑀸𑀤𑁄… 𑀲𑀩𑁆𑀩𑁂 𑀓𑀺𑀮𑁂𑀲𑀸… 𑀲𑀩𑁆𑀩𑁂 𑀤𑀼𑀘𑁆𑀘𑀭𑀺𑀢𑀸… 𑀲𑀩𑁆𑀩𑁂 𑀤𑀭𑀣𑀸… 𑀲𑀩𑁆𑀩𑁂 𑀧𑀭𑀺𑀴𑀸𑀳𑀸… 𑀲𑀩𑁆𑀩𑁂 𑀲𑀦𑁆𑀢𑀸𑀧𑀸 … 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀸 𑀘𑀢𑁆𑀢𑀸 𑀯𑀦𑁆𑀢𑀸 𑀫𑀼𑀢𑁆𑀢𑀸 𑀧𑀳𑀻𑀦𑀸 𑀧𑀝𑀺𑀦𑀺𑀲𑁆𑀲𑀝𑁆𑀞𑀸. 𑀏𑀯𑀁 𑀪𑀕𑀯𑀸 𑀘𑀢𑁆𑀢𑀸𑀯𑀻𑀢𑀺 𑀢𑀸𑀤𑀻.
𑀓𑀣𑀁 𑀪𑀕𑀯𑀸 𑀢𑀺𑀡𑁆𑀡𑀸𑀯𑀻𑀢𑀺 𑀢𑀸𑀤𑀻? 𑀪𑀕𑀯𑀸 𑀓𑀸𑀫𑁄𑀖𑀁 𑀢𑀺𑀡𑁆𑀡𑁄, 𑀪𑀯𑁄𑀖𑀁 𑀢𑀺𑀡𑁆𑀡𑁄, 𑀤𑀺𑀝𑁆𑀞𑁄𑀖𑀁 𑀢𑀺𑀡𑁆𑀡𑁄, 𑀅𑀯𑀺𑀚𑁆𑀚𑁄𑀖𑀁 𑀢𑀺𑀡𑁆𑀡𑁄, 𑀲𑀩𑁆𑀩𑀁 𑀲𑀁𑀲𑀸𑀭𑀧𑀣𑀁 𑀢𑀺𑀡𑁆𑀡𑁄 𑀉𑀢𑁆𑀢𑀺𑀡𑁆𑀡𑁄 𑀦𑀺𑀢𑁆𑀢𑀺𑀡𑁆𑀡𑁄 𑀅𑀢𑀺𑀓𑁆𑀓𑀦𑁆𑀢𑁄 𑀲𑀫𑀢𑀺𑀓𑁆𑀓𑀦𑁆𑀢𑁄 𑀯𑀻𑀢𑀺𑀯𑀢𑁆𑀢𑁄. 𑀲𑁄 𑀯𑀼𑀝𑁆𑀞𑀯𑀸𑀲𑁄 𑀘𑀺𑀡𑁆𑀡𑀘𑀭𑀡𑁄 𑀕𑀢𑀤𑁆𑀥𑁄 𑀕𑀢𑀤𑀺𑀲𑁄 𑀕𑀢𑀓𑁄𑀝𑀺𑀬𑁄 𑀧𑀸𑀮𑀺𑀢𑀩𑁆𑀭𑀳𑁆𑀫𑀘𑀭𑀺𑀬𑁄 𑀉𑀢𑁆𑀢𑀫𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄 𑀪𑀸𑀯𑀺𑀢𑀫𑀕𑁆𑀕𑁄 𑀧𑀳𑀻𑀦𑀓𑀺𑀮𑁂𑀲𑁄 𑀧𑀝𑀺𑀯𑀺𑀤𑁆𑀥𑀸𑀓𑀼𑀧𑁆𑀧𑁄 𑀲𑀘𑁆𑀙𑀺𑀓𑀢𑀦𑀺𑀭𑁄𑀥𑁄. 𑀤𑀼𑀓𑁆𑀔𑀁 𑀢𑀲𑁆𑀲 𑀧𑀭𑀺𑀜𑁆𑀜𑀸𑀢𑀁, 𑀲𑀫𑀼𑀤𑀬𑁄 𑀧𑀳𑀻𑀦𑁄, 𑀫𑀕𑁆𑀕𑁄 𑀪𑀸𑀯𑀺𑀢𑁄, 𑀦𑀺𑀭𑁄𑀥𑁄 𑀲𑀘𑁆𑀙𑀺𑀓𑀢𑁄, 𑀅𑀪𑀺𑀜𑁆𑀜𑁂𑀬𑁆𑀬𑀁 𑀅𑀪𑀺𑀜𑁆𑀜𑀸𑀢𑀁, 𑀧𑀭𑀺𑀜𑁆𑀜𑁂𑀬𑁆𑀬𑀁 𑀧𑀭𑀺𑀜𑁆𑀜𑀸𑀢𑀁, 𑀧𑀳𑀸𑀢𑀩𑁆𑀩𑀁 𑀧𑀳𑀻𑀦𑀁, 𑀪𑀸𑀯𑁂𑀢𑀩𑁆𑀩𑀁 𑀪𑀸𑀯𑀺𑀢𑀁, 𑀲𑀘𑁆𑀙𑀺𑀓𑀸𑀢𑀩𑁆𑀩𑀁 𑀲𑀘𑁆𑀙𑀺𑀓𑀢𑀁. 𑀲𑁄 𑀉𑀓𑁆𑀔𑀺𑀢𑁆𑀢𑀧𑀴𑀺𑀖𑁄 [𑀉𑀓𑁆𑀔𑀺𑀢𑁆𑀢𑀧𑀮𑀺𑀖𑁄 (𑀲𑁆𑀬𑀸. 𑀓.) 𑀫𑀳𑀸𑀦𑀺. 𑁬] 𑀲𑀁𑀓𑀺𑀡𑁆𑀡𑀧𑀭𑀺𑀓𑁆𑀔𑁄 𑀅𑀩𑁆𑀩𑀽𑀴𑁆𑀳𑁂𑀲𑀺𑀓𑁄 𑀦𑀺𑀭𑀕𑁆𑀕𑀴𑁄 𑀅𑀭𑀺𑀬𑁄 𑀧𑀦𑁆𑀦𑀤𑁆𑀥𑀚𑁄 𑀧𑀦𑁆𑀦𑀪𑀸𑀭𑁄 𑀯𑀺𑀲𑀜𑁆𑀜𑀼𑀢𑁆𑀢𑁄 𑀧𑀜𑁆𑀘𑀗𑁆𑀕𑀯𑀺𑀧𑁆𑀧𑀳𑀻𑀦𑁄 𑀙𑀴𑀗𑁆𑀕𑀲𑀫𑀦𑁆𑀦𑀸𑀕𑀢𑁄 𑀏𑀓𑀸𑀭𑀓𑁆𑀔𑁄 𑀘𑀢𑀼𑀭𑀸𑀧𑀲𑁆𑀲𑁂𑀦𑁄 𑀧𑀦𑀼𑀡𑁆𑀡𑀧𑀘𑁆𑀘𑁂𑀓𑀲𑀘𑁆𑀘𑁄 𑀲𑀫𑀯𑀬𑀲𑀝𑁆𑀞𑁂𑀲𑀦𑁄 𑀅𑀦𑀸𑀯𑀺𑀮𑀲𑀗𑁆𑀓𑀧𑁆𑀧𑁄 𑀧𑀲𑁆𑀲𑀤𑁆𑀥𑀓𑀸𑀬𑀲𑀗𑁆𑀔𑀸𑀭𑁄 𑀲𑀼𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄 𑀲𑀼𑀯𑀺𑀫𑀼𑀢𑁆𑀢𑀧𑀜𑁆𑀜𑁄 𑀓𑁂𑀯𑀮𑀻 𑀯𑀼𑀲𑀺𑀢𑀯𑀸 𑀉𑀢𑁆𑀢𑀫𑀧𑀼𑀭𑀺𑀲𑁄 𑀧𑀭𑀫𑀧𑀼𑀭𑀺𑀲𑁄 𑀧𑀭𑀫𑀧𑀢𑁆𑀢𑀺𑀧𑁆𑀧𑀢𑁆𑀢𑁄. 𑀲𑁄 𑀦𑁂𑀯𑀸𑀘𑀺𑀦𑀢𑀺, 𑀦𑀸𑀧𑀘𑀺𑀦𑀢𑀺; 𑀅𑀧𑀘𑀺𑀦𑀺𑀢𑁆𑀯𑀸 𑀞𑀺𑀢𑁄 𑀦𑁂𑀯 𑀧𑀚𑀳𑀢𑀺, 𑀦 𑀉𑀧𑀸𑀤𑀺𑀬𑀢𑀺; 𑀧𑀚𑀳𑀺𑀢𑁆𑀯𑀸 𑀞𑀺𑀢𑁄 𑀦𑁂𑀯 𑀲𑀁𑀲𑀺𑀩𑁆𑀩𑀢𑀺, 𑀦 𑀉𑀲𑀺𑀦𑁂𑀢𑀺; 𑀯𑀺𑀲𑀺𑀦𑁂𑀢𑁆𑀯𑀸 𑀞𑀺𑀢𑁄 𑀦𑁂𑀯 𑀯𑀺𑀥𑀽𑀧𑁂𑀢𑀺, 𑀦 𑀲𑀦𑁆𑀥𑀽𑀧𑁂𑀢𑀺; 𑀯𑀺𑀥𑀽𑀧𑁂𑀢𑁆𑀯𑀸 𑀞𑀺𑀢𑁄, 𑀅𑀲𑁂𑀔𑁂𑀦 𑀲𑀻𑀮𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀞𑀺𑀢𑁄, 𑀅𑀲𑁂𑀔𑁂𑀦 𑀲𑀫𑀸𑀥𑀺𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀞𑀺𑀢𑁄, 𑀅𑀲𑁂𑀔𑁂𑀦 𑀧𑀜𑁆𑀜𑀸𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀞𑀺𑀢𑁄, 𑀅𑀲𑁂𑀔𑁂𑀦 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀞𑀺𑀢𑁄, 𑀅𑀲𑁂𑀔𑁂𑀦 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀞𑀺𑀢𑁄, 𑀲𑀘𑁆𑀘𑀁 𑀲𑀫𑁆𑀧𑀝𑀺𑀧𑀸𑀤𑀺𑀬𑀺𑀢𑁆𑀯𑀸 𑀞𑀺𑀢𑁄, 𑀏𑀚𑀁 𑀲𑀫𑀢𑀺𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑁄, 𑀓𑀺𑀮𑁂𑀲𑀕𑁆𑀕𑀺𑀁 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀞𑀺𑀢𑁄, 𑀅𑀧𑀭𑀺𑀕𑀫𑀦𑀢𑀸𑀬 𑀞𑀺𑀢𑁄, 𑀓𑀝𑀁 𑀲𑀫𑀸𑀤𑀸𑀬 𑀞𑀺𑀢𑁄, 𑀫𑀼𑀢𑁆𑀢𑀧𑀝𑀺𑀲𑁂𑀯𑀦𑀢𑀸𑀬 𑀞𑀺𑀢𑁄, 𑀫𑁂𑀢𑁆𑀢𑀸𑀬 𑀧𑀸𑀭𑀺𑀲𑀼𑀤𑁆𑀥𑀺𑀬𑀸 𑀞𑀺𑀢𑁄, 𑀓𑀭𑀼𑀡𑀸𑀬 𑀧𑀸𑀭𑀺𑀲𑀼𑀤𑁆𑀥𑀺𑀬𑀸 𑀞𑀺𑀢𑁄, 𑀫𑀼𑀤𑀺𑀢𑀸𑀬 𑀧𑀸𑀭𑀺𑀲𑀼𑀤𑁆𑀥𑀺𑀬𑀸 𑀞𑀺𑀢𑁄, 𑀉𑀧𑁂𑀓𑁆𑀔𑀸𑀬 𑀧𑀸𑀭𑀺𑀲𑀼𑀤𑁆𑀥𑀺𑀬𑀸 𑀞𑀺𑀢𑁄, 𑀅𑀘𑁆𑀘𑀦𑁆𑀢𑀧𑀸𑀭𑀺𑀲𑀼𑀤𑁆𑀥𑀺𑀬𑀸 𑀞𑀺𑀢𑁄, 𑀅𑀢𑀫𑁆𑀫𑀬𑀢𑀸𑀬 𑀧𑀸𑀭𑀺𑀲𑀼𑀤𑁆𑀥𑀺𑀬𑀸 𑀞𑀺𑀢𑁄, 𑀯𑀺𑀫𑀼𑀢𑁆𑀢𑀢𑁆𑀢𑀸 𑀞𑀺𑀢𑁄, 𑀲𑀦𑁆𑀢𑀼𑀲𑀺𑀢𑀢𑁆𑀢𑀸 𑀞𑀺𑀢𑁄, 𑀔𑀦𑁆𑀥𑀧𑀭𑀺𑀬𑀦𑁆𑀢𑁂 𑀞𑀺𑀢𑁄, 𑀥𑀸𑀢𑀼𑀧𑀭𑀺𑀬𑀦𑁆𑀢𑁂 𑀞𑀺𑀢𑁄, 𑀆𑀬𑀢𑀦𑀧𑀭𑀺𑀬𑀦𑁆𑀢𑁂 𑀞𑀺𑀢𑁄, 𑀕𑀢𑀺𑀧𑀭𑀺𑀬𑀦𑁆𑀢𑁂 𑀞𑀺𑀢𑁄, 𑀉𑀧𑀧𑀢𑁆𑀢𑀺𑀧𑀭𑀺𑀬𑀦𑁆𑀢𑁂 𑀞𑀺𑀢𑁄, 𑀧𑀝𑀺𑀲𑀦𑁆𑀥𑀺𑀧𑀭𑀺𑀬𑀦𑁆𑀢𑁂 𑀞𑀺𑀢𑁄, 𑀪𑀯𑀧𑀭𑀺𑀬𑀦𑁆𑀢𑁂 𑀞𑀺𑀢𑁄, 𑀲𑀁𑀲𑀸𑀭𑀧𑀭𑀺𑀬𑀦𑁆𑀢𑁂 𑀞𑀺𑀢𑁄, 𑀯𑀝𑁆𑀝𑀧𑀭𑀺𑀬𑀦𑁆𑀢𑁂 𑀞𑀺𑀢𑁄, 𑀅𑀦𑁆𑀢𑀺𑀫𑁂 𑀪𑀯𑁂 𑀞𑀺𑀢𑁄, 𑀅𑀦𑁆𑀢𑀺𑀫𑁂 𑀲𑀫𑀼𑀲𑁆𑀲𑀬𑁂 𑀞𑀺𑀢𑁄, 𑀅𑀦𑁆𑀢𑀺𑀫𑀤𑁂𑀳𑀥𑀭𑁄 𑀪𑀕𑀯𑀸.
‘‘𑀢𑀲𑁆𑀲𑀸𑀬𑀁 𑀧𑀘𑁆𑀙𑀺𑀫𑀓𑁄 𑀪𑀯𑁄, 𑀘𑀭𑀺𑀫𑁄𑀬𑀁 𑀲𑀫𑀼𑀲𑁆𑀲𑀬𑁄;
𑀚𑀸𑀢𑀺𑀫𑀭𑀡𑀲𑀁𑀲𑀸𑀭𑁄, 𑀦𑀢𑁆𑀣𑀺 𑀢𑀲𑁆𑀲 𑀧𑀼𑀦𑀩𑁆𑀪𑀯𑁄’’𑀢𑀺.
𑀏𑀯𑀁 𑀪𑀕𑀯𑀸 𑀢𑀺𑀡𑁆𑀡𑀸𑀯𑀻𑀢𑀺 𑀢𑀸𑀤𑀻.
𑀓𑀣𑀁 𑀪𑀕𑀯𑀸 𑀫𑀼𑀢𑁆𑀢𑀸𑀯𑀻𑀢𑀺 𑀢𑀸𑀤𑀻? 𑀪𑀕𑀯𑀢𑁄 𑀭𑀸𑀕𑀸 𑀘𑀺𑀢𑁆𑀢𑀁 𑀫𑀼𑀢𑁆𑀢𑀁 𑀯𑀺𑀫𑀼𑀢𑁆𑀢𑀁 𑀲𑀼𑀯𑀺𑀫𑀼𑀢𑁆𑀢𑀁, 𑀤𑁄𑀲𑀸 𑀘𑀺𑀢𑁆𑀢𑀁… 𑀫𑁄𑀳𑀸 𑀘𑀺𑀢𑁆𑀢𑀁… 𑀓𑁄𑀥𑀸… 𑀉𑀧𑀦𑀸𑀳𑀸… 𑀫𑀓𑁆𑀔𑀸… 𑀧𑀴𑀸𑀲𑀸… 𑀇𑀲𑁆𑀲𑀸𑀬… 𑀫𑀘𑁆𑀙𑀭𑀺𑀬𑀸… 𑀫𑀸𑀬𑀸𑀬… 𑀲𑀸𑀞𑁂𑀬𑁆𑀬𑀸… 𑀣𑀫𑁆𑀪𑀸… 𑀲𑀸𑀭𑀫𑁆𑀪𑀸… 𑀫𑀸𑀦𑀸… 𑀅𑀢𑀺𑀫𑀸𑀦𑀸… 𑀫𑀤𑀸… 𑀧𑀫𑀸𑀤𑀸… 𑀲𑀩𑁆𑀩𑀓𑀺𑀮𑁂𑀲𑁂𑀳𑀺… 𑀲𑀩𑁆𑀩𑀤𑀼𑀘𑁆𑀘𑀭𑀺𑀢𑁂𑀳𑀺… 𑀲𑀩𑁆𑀩𑀤𑀭𑀣𑁂𑀳𑀺… 𑀲𑀩𑁆𑀩𑀧𑀭𑀺𑀴𑀸𑀳𑁂𑀳𑀺… 𑀲𑀩𑁆𑀩𑀲𑀦𑁆𑀢𑀸𑀧𑁂𑀳𑀺… 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑁂𑀳𑀺 𑀘𑀺𑀢𑁆𑀢𑀁 𑀫𑀼𑀢𑁆𑀢𑀁 𑀯𑀺𑀫𑀼𑀢𑁆𑀢𑀁 𑀲𑀼𑀯𑀺𑀫𑀼𑀢𑁆𑀢𑀁. 𑀏𑀯𑀁 𑀪𑀕𑀯𑀸 𑀫𑀼𑀢𑁆𑀢𑀸𑀯𑀻𑀢𑀺 𑀢𑀸𑀤𑀻.
𑀓𑀣𑀁 𑀪𑀕𑀯𑀸 𑀢𑀁𑀦𑀺𑀤𑁆𑀤𑁂𑀲𑀸 𑀢𑀸𑀤𑀻? 𑀪𑀕𑀯𑀸 𑀲𑀻𑀮𑁂 𑀲𑀢𑀺 𑀲𑀻𑀮𑀯𑀸𑀢𑀺 𑀢𑀁𑀦𑀺𑀤𑁆𑀤𑁂𑀲𑀸 𑀢𑀸𑀤𑀻, 𑀲𑀤𑁆𑀥𑀸𑀬 𑀲𑀢𑀺 𑀲𑀤𑁆𑀥𑁄𑀢𑀺 𑀢𑀁𑀦𑀺𑀤𑁆𑀤𑁂𑀲𑀸 𑀢𑀸𑀤𑀻, 𑀯𑀻𑀭𑀺𑀬𑁂 𑀲𑀢𑀺 𑀯𑀻𑀭𑀺𑀬𑀯𑀸𑀢𑀺 𑀢𑀁𑀦𑀺𑀤𑁆𑀤𑁂𑀲𑀸 𑀢𑀸𑀤𑀻, 𑀲𑀢𑀺𑀬𑀸 𑀲𑀢𑀺 𑀲𑀢𑀺𑀫𑀸𑀢𑀺 𑀢𑀁𑀦𑀺𑀤𑁆𑀤𑁂𑀲𑀸 𑀢𑀸𑀤𑀻, 𑀲𑀫𑀸𑀥𑀺𑀲𑁆𑀫𑀺𑀁 𑀲𑀢𑀺 𑀲𑀫𑀸𑀳𑀺𑀢𑁄𑀢𑀺 𑀢𑀁𑀦𑀺𑀤𑁆𑀤𑁂𑀲𑀸 𑀢𑀸𑀤𑀻, 𑀧𑀜𑁆𑀜𑀸𑀬 𑀲𑀢𑀺 𑀧𑀜𑁆𑀜𑀯𑀸𑀢𑀺 𑀢𑀁𑀦𑀺𑀤𑁆𑀤𑁂𑀲𑀸 𑀢𑀸𑀤𑀻, 𑀯𑀺𑀚𑁆𑀚𑀸𑀬 𑀲𑀢𑀺 𑀢𑁂𑀯𑀺𑀚𑁆𑀚𑁄𑀢𑀺 𑀢𑀁𑀦𑀺𑀤𑁆𑀤𑁂𑀲𑀸 𑀢𑀸𑀤𑀻, 𑀅𑀪𑀺𑀜𑁆𑀜𑀸𑀬 𑀲𑀢𑀺 𑀙𑀴𑀪𑀺𑀜𑁆𑀜𑁄𑀢𑀺 𑀢𑀁𑀦𑀺𑀤𑁆𑀤𑁂𑀲𑀸 𑀢𑀸𑀤𑀻, 𑀤𑀲𑀩𑀮𑁂 𑀲𑀢𑀺 𑀤𑀲𑀩𑀮𑁄𑀢𑀺 𑀢𑀁𑀦𑀺𑀤𑁆𑀤𑁂𑀲𑀸 𑀢𑀸𑀤𑀻. 𑀏𑀯𑀁 𑀪𑀕𑀯𑀸 𑀢𑀁𑀦𑀺𑀤𑁆𑀤𑁂𑀲𑀸 𑀢𑀸𑀤𑀻𑀢𑀺 𑁋 𑀢𑀁 𑀩𑀼𑀤𑁆𑀥𑀁 𑀅𑀲𑀺𑀢𑀁 𑀢𑀸𑀤𑀺𑀁.
𑀅𑀓𑀼𑀳𑀁 𑀕𑀡𑀺𑀫𑀸𑀕𑀢𑀦𑁆𑀢𑀺. 𑀅𑀓𑀼𑀳𑁄𑀢𑀺 𑀢𑀻𑀡𑀺 𑀓𑀼𑀳𑀦𑀯𑀢𑁆𑀣𑀽𑀦𑀺 𑁋 𑀧𑀘𑁆𑀘𑀬𑀧𑀝𑀺𑀲𑁂𑀯𑀦𑀲𑀗𑁆𑀔𑀸𑀢𑀁 𑀓𑀼𑀳𑀦𑀯𑀢𑁆𑀣𑀼, 𑀇𑀭𑀺𑀬𑀸𑀧𑀣𑀲𑀗𑁆𑀔𑀸𑀢𑀁 𑀓𑀼𑀳𑀦𑀯𑀢𑁆𑀣𑀼, 𑀲𑀸𑀫𑀦𑁆𑀢𑀚𑀧𑁆𑀧𑀦𑀲𑀗𑁆𑀔𑀸𑀢𑀁 𑀓𑀼𑀳𑀦𑀯𑀢𑁆𑀣𑀼.
𑀓𑀢𑀫𑀁 𑀧𑀘𑁆𑀘𑀬𑀧𑀝𑀺𑀲𑁂𑀯𑀦𑀲𑀗𑁆𑀔𑀸𑀢𑀁 𑀓𑀼𑀳𑀦𑀯𑀢𑁆𑀣𑀼? 𑀇𑀥 𑀕𑀳𑀧𑀢𑀺𑀓𑀸 𑀪𑀺𑀓𑁆𑀔𑀼𑀁 𑀦𑀺𑀫𑀦𑁆𑀢𑁂𑀦𑁆𑀢𑀺 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁂𑀳𑀺. 𑀲𑁄 𑀧𑀸𑀧𑀺𑀘𑁆𑀙𑁄 𑀇𑀘𑁆𑀙𑀸𑀧𑀓𑀢𑁄 𑀅𑀢𑁆𑀣𑀺𑀓𑁄 [𑀅𑀢𑀺𑀢𑁆𑀢𑀺𑀓𑁄 (𑀲𑀻.), 𑀇𑀢𑁆𑀣𑀺𑀓𑁄 (𑀲𑁆𑀬𑀸.), 𑀧𑀼𑀭𑀸𑀪𑁂𑀤𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁂 𑀧𑀸𑀞𑀦𑀸𑀦𑀢𑁆𑀢𑀁 𑀦𑀢𑁆𑀣𑀺] 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦𑀁 𑀪𑀺𑀬𑁆𑀬𑁄𑀓𑀫𑁆𑀬𑀢𑀁 𑀉𑀧𑀸𑀤𑀸𑀬 𑀘𑀻𑀯𑀭𑀁 𑀧𑀘𑁆𑀘𑀓𑁆𑀔𑀸𑀢𑀺, 𑀧𑀺𑀡𑁆𑀟𑀧𑀸𑀢𑀁 𑀧𑀘𑁆𑀘𑀓𑁆𑀔𑀸𑀢𑀺, 𑀲𑁂𑀦𑀸𑀲𑀦𑀁 𑀧𑀘𑁆𑀘𑀓𑁆𑀔𑀸𑀢𑀺, 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 𑀧𑀘𑁆𑀘𑀓𑁆𑀔𑀸𑀢𑀺. 𑀲𑁄 𑀏𑀯𑀫𑀸𑀳 𑁋 ‘‘𑀓𑀺𑀁 𑀲𑀫𑀡𑀲𑁆𑀲 𑀫𑀳𑀕𑁆𑀖𑁂𑀦 𑀘𑀻𑀯𑀭𑁂𑀦! 𑀏𑀢𑀁 𑀲𑀸𑀭𑀼𑀧𑁆𑀧𑀁, 𑀬𑀁 𑀲𑀫𑀡𑁄 𑀲𑀼𑀲𑀸𑀦𑀸 𑀯𑀸 𑀲𑀗𑁆𑀓𑀸𑀭𑀓𑀽𑀝𑀸 𑀯𑀸 𑀧𑀸𑀧𑀡𑀺𑀓𑀸 𑀯𑀸 𑀦𑀦𑁆𑀢𑀓𑀸𑀦𑀺 𑀉𑀘𑁆𑀘𑀺𑀦𑀺𑀢𑁆𑀯𑀸 𑀲𑀗𑁆𑀖𑀸𑀝𑀺𑀁 𑀓𑀭𑀺𑀢𑁆𑀯𑀸 𑀥𑀸𑀭𑁂𑀬𑁆𑀬. 𑀓𑀺𑀁 𑀲𑀫𑀡𑀲𑁆𑀲 𑀫𑀳𑀕𑁆𑀖𑁂𑀦 𑀧𑀺𑀡𑁆𑀟𑀧𑀸𑀢𑁂𑀦! 𑀏𑀢𑀁 𑀲𑀸𑀭𑀼𑀧𑁆𑀧𑀁, 𑀬𑀁 𑀲𑀫𑀡𑁄 𑀉𑀜𑁆𑀙𑀸𑀘𑀭𑀺𑀬𑀸𑀬 𑀧𑀺𑀡𑁆𑀟𑀺𑀬𑀸𑀮𑁄𑀧𑁂𑀦 𑀚𑀻𑀯𑀺𑀢𑀁 𑀓𑀧𑁆𑀧𑁂𑀬𑁆𑀬. 𑀓𑀺𑀁 𑀲𑀫𑀡𑀲𑁆𑀲 𑀫𑀳𑀕𑁆𑀖𑁂𑀦 𑀲𑁂𑀦𑀸𑀲𑀦𑁂𑀦! 𑀏𑀢𑀁 𑀲𑀸𑀭𑀼𑀧𑁆𑀧𑀁, 𑀬𑀁 𑀲𑀫𑀡𑁄 𑀭𑀼𑀓𑁆𑀔𑀫𑀽𑀮𑀺𑀓𑁄 𑀯𑀸 𑀅𑀲𑁆𑀲 𑀲𑁄𑀲𑀸𑀦𑀺𑀓𑁄 𑀯𑀸 𑀅𑀩𑁆𑀪𑁄𑀓𑀸𑀲𑀺𑀓𑁄 𑀯𑀸. 𑀓𑀺𑀁 𑀲𑀫𑀡𑀲𑁆𑀲 𑀫𑀳𑀕𑁆𑀖𑁂𑀦 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁂𑀦! 𑀏𑀢𑀁 𑀲𑀸𑀭𑀼𑀧𑁆𑀧𑀁, 𑀬𑀁 𑀲𑀫𑀡𑁄 𑀧𑀽𑀢𑀺𑀫𑀼𑀢𑁆𑀢𑁂𑀦 𑀳𑀭𑀺𑀢𑀓𑀻𑀔𑀡𑁆𑀟𑁂𑀦 𑀑𑀲𑀥𑀁 𑀓𑀭𑁂𑀬𑁆𑀬𑀸’’𑀢𑀺 𑀢𑀤𑀼𑀧𑀸𑀤𑀸𑀬 𑀮𑀽𑀔𑀁 𑀘𑀻𑀯𑀭𑀁 𑀥𑀸𑀭𑁂𑀢𑀺, 𑀮𑀽𑀔𑀁 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀢𑀺, 𑀮𑀽𑀔𑀁 𑀲𑁂𑀦𑀸𑀲𑀦𑀁 𑀧𑀝𑀺𑀲𑁂𑀯𑀢𑀺, 𑀮𑀽𑀔𑀁 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 𑀧𑀝𑀺𑀲𑁂𑀯𑀢𑀺. 𑀢𑀫𑁂𑀦𑀁 𑀕𑀳𑀧𑀢𑀺𑀓𑀸 𑀏𑀯𑀁 𑀚𑀸𑀦𑀦𑁆𑀢𑀺 𑁋 ‘‘𑀅𑀬𑀁 𑀲𑀫𑀡𑁄 𑀅𑀧𑁆𑀧𑀺𑀘𑁆𑀙𑁄 𑀲𑀦𑁆𑀢𑀼𑀝𑁆𑀞𑁄 𑀧𑀯𑀺𑀯𑀺𑀢𑁆𑀢𑁄 𑀅𑀲𑀁𑀲𑀝𑁆𑀞𑁄 𑀆𑀭𑀤𑁆𑀥𑀯𑀻𑀭𑀺𑀬𑁄 𑀥𑀼𑀢𑀯𑀸𑀤𑁄’’𑀢𑀺 𑀪𑀺𑀬𑁆𑀬𑁄 𑀪𑀺𑀬𑁆𑀬𑁄 𑀦𑀺𑀫𑀦𑁆𑀢𑁂𑀦𑁆𑀢𑀺 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁂𑀳𑀺. 𑀲𑁄 𑀏𑀯𑀫𑀸𑀳 𑁋 ‘‘𑀢𑀺𑀡𑁆𑀡𑀁 𑀲𑀫𑁆𑀫𑀼𑀔𑀻𑀪𑀸𑀯𑀸 𑀲𑀤𑁆𑀥𑁄 𑀓𑀼𑀮𑀧𑀼𑀢𑁆𑀢𑁄 𑀩𑀳𑀼𑀁 𑀧𑀼𑀜𑁆𑀜𑀁 𑀧𑀲𑀯𑀢𑀺, 𑀲𑀤𑁆𑀥𑀸𑀬 𑀲𑀫𑁆𑀫𑀼𑀔𑀻𑀪𑀸𑀯𑀸 𑀲𑀤𑁆𑀥𑁄 𑀓𑀼𑀮𑀧𑀼𑀢𑁆𑀢𑁄 𑀩𑀳𑀼𑀁 𑀧𑀼𑀜𑁆𑀜𑀁 𑀧𑀲𑀯𑀢𑀺, 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀲𑀫𑁆𑀫𑀼𑀔𑀻𑀪𑀸𑀯𑀸 𑀲𑀤𑁆𑀥𑁄 𑀓𑀼𑀮𑀧𑀼𑀢𑁆𑀢𑁄 𑀩𑀳𑀼𑀁 𑀧𑀼𑀜𑁆𑀜𑀁 𑀧𑀲𑀯𑀢𑀺, 𑀤𑀓𑁆𑀔𑀺𑀡𑁂𑀬𑁆𑀬𑀸𑀦𑀁 𑀲𑀫𑁆𑀫𑀼𑀔𑀻𑀪𑀸𑀯𑀸 𑀲𑀤𑁆𑀥𑁄 𑀓𑀼𑀮𑀧𑀼𑀢𑁆𑀢𑁄 𑀩𑀳𑀼𑀁 𑀧𑀼𑀜𑁆𑀜𑀁 𑀧𑀲𑀯𑀢𑀺. 𑀢𑀼𑀫𑁆𑀳𑀸𑀓𑀜𑁆𑀘𑁂𑀯𑀸𑀬𑀁 𑀲𑀤𑁆𑀥𑀸 𑀅𑀢𑁆𑀣𑀺, 𑀤𑁂𑀬𑁆𑀬𑀥𑀫𑁆𑀫𑁄 𑀘 𑀲𑀁𑀯𑀺𑀚𑁆𑀚𑀢𑀺, 𑀅𑀳𑀜𑁆𑀘 𑀧𑀝𑀺𑀕𑁆𑀕𑀸𑀳𑀓𑁄. 𑀲𑀘𑁂 𑀅𑀳𑀁 𑀦 𑀧𑀝𑀺𑀕𑁆𑀕𑀳𑁂𑀲𑁆𑀲𑀸𑀫𑀺, 𑀏𑀯𑀁 𑀢𑀼𑀫𑁆𑀳𑁂 𑀧𑀼𑀜𑁆𑀜𑁂𑀦 𑀧𑀭𑀺𑀩𑀸𑀳𑀺𑀭𑀸 [𑀧𑀝𑀺𑀩𑀸𑀳𑀺𑀭𑀸 (𑀓.)] 𑀪𑀯𑀺𑀲𑁆𑀲𑀣, 𑀦 𑀫𑀬𑁆𑀳𑀁 𑀇𑀫𑀺𑀦𑀸 𑀅𑀢𑁆𑀣𑁄, 𑀅𑀧𑀺 𑀘 𑀢𑀼𑀫𑁆𑀳𑀸𑀓𑀁𑀬𑁂𑀯 𑀅𑀦𑀼𑀓𑀫𑁆𑀧𑀸𑀬 𑀧𑀝𑀺𑀕𑁆𑀕𑀡𑁆𑀳𑀸𑀫𑀻’’𑀢𑀺. 𑀢𑀤𑀼𑀧𑀸𑀤𑀸𑀬 𑀩𑀳𑀼𑀫𑁆𑀧𑀺 𑀘𑀻𑀯𑀭𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 [𑀧𑀝𑀺𑀕𑀡𑁆𑀳𑀢𑀺 (𑀲𑀻.)], 𑀩𑀳𑀼𑀫𑁆𑀧𑀺 𑀧𑀺𑀡𑁆𑀟𑀧𑀸𑀢𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀩𑀳𑀼𑀫𑁆𑀧𑀺 𑀲𑁂𑀦𑀸𑀲𑀦𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀩𑀳𑀼𑀫𑁆𑀧𑀺 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀺. 𑀬𑀸 𑀏𑀯𑀭𑀽𑀧𑀸 𑀪𑀸𑀓𑀼𑀝𑀺𑀓𑀸 𑀪𑀸𑀓𑀼𑀝𑀺𑀬𑀁 𑀓𑀼𑀳𑀦𑀸 𑀓𑀼𑀳𑀸𑀬𑀦𑀸 𑀓𑀼𑀳𑀺𑀢𑀢𑁆𑀢𑀁 𑁋 𑀇𑀤𑀁 𑀧𑀘𑁆𑀘𑀬𑀧𑀝𑀺𑀲𑁂𑀯𑀦𑀲𑀗𑁆𑀔𑀸𑀢𑀁 𑀓𑀼𑀳𑀦𑀯𑀢𑁆𑀣𑀼.
𑀓𑀢𑀫𑀁 𑀇𑀭𑀺𑀬𑀸𑀧𑀣𑀲𑀗𑁆𑀔𑀸𑀢𑀁 𑀓𑀼𑀳𑀦𑀯𑀢𑁆𑀣𑀼? 𑀇𑀥𑁂𑀓𑀘𑁆𑀘𑁄 𑀧𑀸𑀧𑀺𑀘𑁆𑀙𑁄 𑀇𑀘𑁆𑀙𑀸𑀧𑀓𑀢𑁄 𑀲𑀫𑁆𑀪𑀸𑀯𑀦𑀸𑀥𑀺𑀧𑁆𑀧𑀸𑀬𑁄, ‘‘𑀏𑀯𑀁 𑀫𑀁 𑀚𑀦𑁄 𑀲𑀫𑁆𑀪𑀸𑀯𑁂𑀲𑁆𑀲𑀢𑀻’’𑀢𑀺 𑀕𑀫𑀦𑀁 𑀲𑀡𑁆𑀞𑀧𑁂𑀢𑀺, 𑀞𑀸𑀦𑀁 𑀲𑀡𑁆𑀞𑀧𑁂𑀢𑀺, 𑀦𑀺𑀲𑀚𑁆𑀚𑀁 𑀲𑀡𑁆𑀞𑀧𑁂𑀢𑀺, 𑀲𑀬𑀦𑀁 𑀲𑀡𑁆𑀞𑀧𑁂𑀢𑀺, 𑀧𑀡𑀺𑀥𑀸𑀬 𑀕𑀘𑁆𑀙𑀢𑀺, 𑀧𑀡𑀺𑀥𑀸𑀬 𑀢𑀺𑀝𑁆𑀞𑀢𑀺, 𑀧𑀡𑀺𑀥𑀸𑀬 𑀦𑀺𑀲𑀻𑀤𑀢𑀺, 𑀧𑀡𑀺𑀥𑀸𑀬 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺, 𑀲𑀫𑀸𑀳𑀺𑀢𑁄 𑀯𑀺𑀬 𑀕𑀘𑁆𑀙𑀢𑀺, 𑀲𑀫𑀸𑀳𑀺𑀢𑁄 𑀯𑀺𑀬 𑀢𑀺𑀝𑁆𑀞𑀢𑀺, 𑀲𑀫𑀸𑀳𑀺𑀢𑁄 𑀯𑀺𑀬 𑀦𑀺𑀲𑀻𑀤𑀢𑀺, 𑀲𑀫𑀸𑀳𑀺𑀢𑁄 𑀯𑀺𑀬 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺, 𑀆𑀧𑀸𑀣𑀓𑀚𑁆𑀛𑀸𑀬𑀻𑀯 𑀳𑁄𑀢𑀺. 𑀬𑀸 𑀏𑀯𑀭𑀽𑀧𑀸 𑀇𑀭𑀺𑀬𑀸𑀧𑀣𑀲𑁆𑀲 𑀆𑀞𑀧𑀦𑀸 𑀞𑀧𑀦𑀸 𑀲𑀡𑁆𑀞𑀧𑀦𑀸 𑀪𑀸𑀓𑀼𑀝𑀺𑀓𑀸 𑀪𑀸𑀓𑀼𑀝𑀺𑀬𑀁 𑀓𑀼𑀳𑀦𑀸 𑀓𑀼𑀳𑀸𑀬𑀦𑀸 𑀓𑀼𑀳𑀺𑀢𑀢𑁆𑀢𑀁 𑁋 𑀇𑀤𑀁 𑀇𑀭𑀺𑀬𑀸𑀧𑀣𑀲𑀗𑁆𑀔𑀸𑀢𑀁 𑀓𑀼𑀳𑀦𑀯𑀢𑁆𑀣𑀼.
𑀓𑀢𑀫𑀁 𑀲𑀸𑀫𑀦𑁆𑀢𑀚𑀧𑁆𑀧𑀦𑀲𑀗𑁆𑀔𑀸𑀢𑀁 𑀓𑀼𑀳𑀦𑀯𑀢𑁆𑀣𑀼? 𑀇𑀥𑁂𑀓𑀘𑁆𑀘𑁄 𑀧𑀸𑀧𑀺𑀘𑁆𑀙𑁄 𑀇𑀘𑁆𑀙𑀸𑀧𑀓𑀢𑁄 𑀲𑀫𑁆𑀪𑀸𑀯𑀦𑀸𑀥𑀺𑀧𑁆𑀧𑀸𑀬𑁄 ‘‘𑀏𑀯𑀁 𑀫𑀁 𑀚𑀦𑁄 𑀲𑀫𑁆𑀪𑀸𑀯𑁂𑀲𑁆𑀲𑀢𑀻’’𑀢𑀺, 𑀅𑀭𑀺𑀬𑀥𑀫𑁆𑀫𑀲𑀦𑁆𑀦𑀺𑀲𑁆𑀲𑀺𑀢𑀁 𑀯𑀸𑀘𑀁 𑀪𑀸𑀲𑀢𑀺. ‘‘𑀬𑁄 𑀏𑀯𑀭𑀽𑀧𑀁 𑀘𑀻𑀯𑀭𑀁 𑀥𑀸𑀭𑁂𑀢𑀺 𑀲𑁄 𑀲𑀫𑀡𑁄 𑀫𑀳𑁂𑀲𑀓𑁆𑀔𑁄’’𑀢𑀺 𑀪𑀡𑀢𑀺; ‘‘𑀬𑁄 𑀏𑀯𑀭𑀽𑀧𑀁 𑀧𑀢𑁆𑀢𑀁 𑀥𑀸𑀭𑁂𑀢𑀺… 𑀮𑁄𑀳𑀣𑀸𑀮𑀓𑀁 𑀥𑀸𑀭𑁂𑀢𑀺… 𑀥𑀫𑁆𑀫𑀓𑀭𑀡𑀁 [𑀥𑀫𑁆𑀫𑀓𑀭𑀓𑀁 (𑀲𑀻. 𑀲𑁆𑀬𑀸.) 𑀅𑀪𑀺𑀥𑀸𑀦𑀧𑁆𑀧𑀤𑀻𑀧𑀺𑀓𑀸𑀪𑀺𑀦𑀯𑀦𑀺𑀲𑁆𑀲𑀬𑀁 𑀑𑀮𑁄𑀓𑁂𑀢𑀩𑁆𑀩𑀁] 𑀥𑀸𑀭𑁂𑀢𑀺… 𑀧𑀭𑀺𑀲𑁆𑀲𑀸𑀯𑀦𑀁 𑀥𑀸𑀭𑁂𑀢𑀺… 𑀓𑀼𑀜𑁆𑀘𑀺𑀓𑀁 𑀥𑀸𑀭𑁂𑀢𑀺… 𑀉𑀧𑀸𑀳𑀦𑀁 𑀥𑀸𑀭𑁂𑀢𑀺… 𑀓𑀸𑀬𑀩𑀦𑁆𑀥𑀦𑀁 𑀥𑀸𑀭𑁂𑀢𑀺… 𑀆𑀬𑁄𑀕𑀁 𑀥𑀸𑀭𑁂𑀢𑀺, 𑀲𑁄 𑀲𑀫𑀡𑁄 𑀫𑀳𑁂𑀲𑀓𑁆𑀔𑁄’’𑀢𑀺 𑀪𑀡𑀢𑀺; ‘‘𑀬𑀲𑁆𑀲 𑀏𑀯𑀭𑀽𑀧𑁄 𑀉𑀧𑀚𑁆𑀛𑀸𑀬𑁄 𑀲𑁄 𑀲𑀫𑀡𑁄 𑀫𑀳𑁂𑀲𑀓𑁆𑀔𑁄’’𑀢𑀺 𑀪𑀡𑀢𑀺; ‘‘𑀬𑀲𑁆𑀲 𑀏𑀯𑀭𑀽𑀧𑁄 𑀆𑀘𑀭𑀺𑀬𑁄… 𑀏𑀯𑀭𑀽𑀧𑀸 𑀲𑀫𑀸𑀦𑀼𑀧𑀚𑁆𑀛𑀸𑀬𑀓𑀸… 𑀲𑀫𑀸𑀦𑀸𑀘𑀭𑀺𑀬𑀓𑀸… 𑀫𑀺𑀢𑁆𑀢𑀸… 𑀲𑀦𑁆𑀤𑀺𑀝𑁆𑀞𑀸… 𑀲𑀫𑁆𑀪𑀢𑁆𑀢𑀸… 𑀲𑀳𑀸𑀬𑀸, 𑀲𑁄 𑀲𑀫𑀡𑁄 𑀫𑀳𑁂𑀲𑀓𑁆𑀔𑁄’’𑀢𑀺 𑀪𑀡𑀢𑀺; ‘‘𑀬𑁄 𑀏𑀯𑀭𑀽𑀧𑁂 𑀯𑀺𑀳𑀸𑀭𑁂 𑀯𑀲𑀢𑀺, 𑀲𑁄 𑀲𑀫𑀡𑁄 𑀫𑀳𑁂𑀲𑀓𑁆𑀔𑁄’’𑀢𑀺 𑀪𑀡𑀢𑀺; ‘‘𑀬𑁄 𑀏𑀯𑀭𑀽𑀧𑁂 𑀅𑀟𑁆𑀠𑀬𑁄𑀕𑁂 𑀯𑀲𑀢𑀺… 𑀧𑀸𑀲𑀸𑀤𑁂 𑀯𑀲𑀢𑀺… 𑀳𑀫𑁆𑀫𑀺𑀬𑁂 𑀯𑀲𑀢𑀺… 𑀕𑀼𑀳𑀸𑀬𑀁 𑀯𑀲𑀢𑀺… 𑀮𑁂𑀡𑁂 𑀯𑀲𑀢𑀺… 𑀓𑀼𑀝𑀺𑀬𑀸 𑀯𑀲𑀢𑀺… 𑀓𑀽𑀝𑀸𑀕𑀸𑀭𑁂 𑀯𑀲𑀢𑀺… 𑀅𑀝𑁆𑀝𑁂 𑀯𑀲𑀢𑀺 … 𑀫𑀸𑀴𑁂 𑀯𑀲𑀢𑀺… 𑀉𑀤𑁆𑀤𑀡𑁆𑀟𑁂 𑀯𑀲𑀢𑀺… 𑀉𑀧𑀝𑁆𑀞𑀸𑀦𑀲𑀸𑀮𑀸𑀬𑀁 𑀯𑀲𑀢𑀺… 𑀫𑀡𑁆𑀟𑀧𑁂 𑀯𑀲𑀢𑀺… 𑀭𑀼𑀓𑁆𑀔𑀫𑀽𑀮𑁂 𑀯𑀲𑀢𑀺, 𑀲𑁄 𑀲𑀫𑀡𑁄 𑀫𑀳𑁂𑀲𑀓𑁆𑀔𑁄’’𑀢𑀺 𑀪𑀡𑀢𑀺.
𑀅𑀣 𑀯𑀸 𑀓𑁄𑀭𑀚𑀺𑀓𑀓𑁄𑀭𑀚𑀺𑀓𑁄, 𑀪𑀸𑀓𑀼𑀝𑀺𑀓𑀪𑀸𑀓𑀼𑀝𑀺𑀓𑁄, 𑀓𑀼𑀳𑀓𑀓𑀼𑀳𑀓𑁄, 𑀮𑀧𑀓𑀮𑀧𑀓𑁄, 𑀫𑀼𑀔𑀲𑀫𑁆𑀪𑀸𑀯𑀺𑀢𑁄 ‘‘𑀅𑀬𑀁 𑀲𑀫𑀡𑁄 𑀇𑀫𑀸𑀲𑀁 𑀏𑀯𑀭𑀽𑀧𑀸𑀦𑀁 𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀻𑀦𑀁 𑀮𑀸𑀪𑀻’’𑀢𑀺. 𑀢𑀸𑀤𑀺𑀲𑀁 𑀕𑀫𑁆𑀪𑀻𑀭𑀁 𑀕𑀽𑀴𑁆𑀳𑀁 𑀦𑀺𑀧𑀼𑀡𑀁 𑀧𑀝𑀺𑀘𑁆𑀙𑀦𑁆𑀦𑀁 𑀮𑁄𑀓𑀼𑀢𑁆𑀢𑀭𑀁 𑀲𑀼𑀜𑁆𑀜𑀢𑀸𑀧𑀝𑀺𑀲𑀜𑁆𑀜𑀼𑀢𑁆𑀢𑀁 𑀓𑀣𑀁 𑀓𑀣𑁂𑀢𑀺. 𑀬𑀸 𑀏𑀯𑀭𑀽𑀧𑀸 𑀪𑀸𑀓𑀼𑀝𑀺𑀓𑀸 𑀪𑀸𑀓𑀼𑀝𑀺𑀬𑀁 𑀓𑀼𑀳𑀦𑀸 𑀓𑀼𑀳𑀸𑀬𑀦𑀸 𑀓𑀼𑀳𑀺𑀢𑀢𑁆𑀢𑀁 𑁋 𑀇𑀤𑀁 𑀲𑀸𑀫𑀦𑁆𑀢𑀚𑀧𑁆𑀧𑀦𑀲𑀗𑁆𑀔𑀸𑀢𑀁 𑀓𑀼𑀳𑀦𑀯𑀢𑁆𑀣𑀼. 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀇𑀫𑀸𑀦𑀺 𑀢𑀻𑀡𑀺 𑀓𑀼𑀳𑀦𑀯𑀢𑁆𑀣𑀽𑀦𑀺 𑀧𑀳𑀻𑀦𑀸𑀦𑀺 𑀲𑀫𑀼𑀘𑁆𑀙𑀺𑀦𑁆𑀦𑀸𑀦𑀺 𑀯𑀽𑀧𑀲𑀦𑁆𑀢𑀸𑀦𑀺 𑀧𑀝𑀺𑀧𑀲𑁆𑀲𑀤𑁆𑀥𑀸𑀦𑀺 𑀅𑀪𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸𑀦𑀺 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸𑀦𑀺. 𑀢𑀲𑁆𑀫𑀸 𑀩𑀼𑀤𑁆𑀥𑁄 𑀅𑀓𑀼𑀳𑁄𑀢𑀺 𑁋 𑀅𑀓𑀼𑀳𑀁.
𑀕𑀡𑀺𑀫𑀸𑀕𑀢𑀦𑁆𑀢𑀺. 𑀕𑀡𑀻𑀢𑀺 𑀕𑀡𑀻 𑀪𑀕𑀯𑀸. 𑀕𑀡𑀸𑀘𑀭𑀺𑀬𑁄𑀢𑀺 𑀕𑀡𑀻, 𑀕𑀡𑀲𑁆𑀲 𑀲𑀢𑁆𑀣𑀸𑀢𑀺 𑀕𑀡𑀻, 𑀕𑀡𑀁 𑀧𑀭𑀺𑀳𑀭𑀢𑀻𑀢𑀺 𑀕𑀡𑀻, 𑀕𑀡𑀁 𑀑𑀯𑀤𑀢𑀻𑀢𑀺 𑀕𑀡𑀻, 𑀕𑀡𑀁 𑀅𑀦𑀼𑀲𑀸𑀲𑀢𑀻𑀢𑀺 𑀕𑀡𑀻, 𑀯𑀺𑀲𑀸𑀭𑀤𑁄 𑀕𑀡𑀁 𑀉𑀧𑀲𑀗𑁆𑀓𑀫𑀢𑀻𑀢𑀺 𑀕𑀡𑀻, 𑀕𑀡𑀲𑁆𑀲 𑀲𑀼𑀲𑁆𑀲𑀽𑀲𑀢𑀺 𑀲𑁄𑀢𑀁 𑀑𑀤𑀳𑀢𑀺 𑀅𑀜𑁆𑀜𑀸 𑀘𑀺𑀢𑁆𑀢𑀁 𑀉𑀧𑀝𑁆𑀞𑀧𑁂𑀢𑀻𑀢𑀺 𑀕𑀡𑀻, 𑀕𑀡𑀁 𑀅𑀓𑀼𑀲𑀮𑀸 𑀯𑀼𑀝𑁆𑀞𑀸𑀧𑁂𑀢𑁆𑀯𑀸 𑀓𑀼𑀲𑀮𑁂 𑀧𑀢𑀺𑀝𑁆𑀞𑀸𑀧𑁂𑀢𑀻𑀢𑀺 𑀕𑀡𑀻, 𑀪𑀺𑀓𑁆𑀔𑀼𑀕𑀡𑀲𑁆𑀲 𑀕𑀡𑀻, 𑀪𑀺𑀓𑁆𑀔𑀼𑀦𑀻𑀕𑀡𑀲𑁆𑀲 𑀕𑀡𑀻, 𑀉𑀧𑀸𑀲𑀓𑀕𑀡𑀲𑁆𑀲 𑀕𑀡𑀻, 𑀉𑀧𑀸𑀲𑀺𑀓𑀸𑀕𑀡𑀲𑁆𑀲 𑀕𑀡𑀻, 𑀭𑀸𑀚𑀕𑀡𑀲𑁆𑀲 𑀕𑀡𑀻, 𑀔𑀢𑁆𑀢𑀺𑀬𑀕𑀡𑀲𑁆𑀲 𑀕𑀡𑀻, 𑀩𑁆𑀭𑀸𑀳𑁆𑀫𑀡𑀕𑀡𑀲𑁆𑀲 𑀕𑀡𑀻, 𑀯𑁂𑀲𑁆𑀲𑀕𑀡𑀲𑁆𑀲 𑀕𑀡𑀻, 𑀲𑀼𑀤𑁆𑀤𑀕𑀡𑀲𑁆𑀲 𑀕𑀡𑀻, 𑀩𑁆𑀭𑀳𑁆𑀫𑀕𑀡𑀲𑁆𑀲 𑀕𑀡𑀻, 𑀤𑁂𑀯𑀕𑀡𑀲𑁆𑀲 𑀕𑀡𑀻, 𑀲𑀗𑁆𑀖𑀺𑀁 [𑀲𑀁𑀖𑀕𑀡𑀲𑁆𑀲 𑀕𑀡𑀻 (𑀲𑀻.)] 𑀕𑀡𑀺𑀁 𑀕𑀡𑀸𑀘𑀭𑀺𑀬𑀁. 𑀆𑀕𑀢𑀦𑁆𑀢𑀺 𑀉𑀧𑀕𑀢𑀁 𑀲𑀫𑀼𑀧𑀕𑀢𑀁 𑀲𑀫𑀼𑀧𑀧𑀦𑁆𑀦𑀁 [𑀲𑀫𑁆𑀧𑀢𑁆𑀢𑀁 (𑀩𑀳𑀽𑀲𑀼)] 𑀲𑀗𑁆𑀓𑀲𑁆𑀲𑀦𑀕𑀭𑀦𑁆𑀢𑀺 𑁋 𑀅𑀓𑀼𑀳𑀁 𑀕𑀡𑀺𑀫𑀸𑀕𑀢𑀁.
𑀩𑀳𑀽𑀦𑀫𑀺𑀥 𑀩𑀤𑁆𑀥𑀸𑀦𑀦𑁆𑀢𑀺. 𑀩𑀳𑀽𑀦𑀁 𑀔𑀢𑁆𑀢𑀺𑀬𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀯𑁂𑀲𑁆𑀲𑀸𑀦𑀁 𑀲𑀼𑀤𑁆𑀤𑀸𑀦𑀁 𑀕𑀳𑀝𑁆𑀞𑀸𑀦𑀁 𑀧𑀩𑁆𑀩𑀚𑀺𑀢𑀸𑀦𑀁 𑀤𑁂𑀯𑀸𑀦𑀁 𑀫𑀦𑀼𑀲𑁆𑀲𑀸𑀦𑀁. 𑀩𑀤𑁆𑀥𑀸𑀦𑀦𑁆𑀢𑀺 𑀩𑀤𑁆𑀥𑀸𑀦𑀁 𑀩𑀤𑁆𑀥𑀘𑀭𑀸𑀦𑀁 𑀧𑀭𑀺𑀘𑀸𑀭𑀓𑀸𑀦𑀁 𑀲𑀺𑀲𑁆𑀲𑀸𑀦𑀦𑁆𑀢𑀺 𑁋 𑀩𑀳𑀽𑀦𑀫𑀺𑀥 𑀩𑀤𑁆𑀥𑀸𑀦𑀁.
𑀅𑀢𑁆𑀣𑀺 𑀧𑀜𑁆𑀳𑁂𑀦 𑀆𑀕𑀫𑀦𑁆𑀢𑀺. 𑀧𑀜𑁆𑀳𑁂𑀦 𑀅𑀢𑁆𑀣𑀺𑀓𑁄 𑀆𑀕𑀢𑁄𑀫𑁆𑀳𑀺 [𑀅𑀢𑁆𑀣𑀺𑀓𑀸𑀫𑁆𑀳 𑀆𑀕𑀢𑀸 (𑀲𑀻. 𑀓.) 𑀏𑀯𑀫𑀻𑀤𑀺𑀲𑁂𑀲𑀼 𑀤𑁆𑀯𑀻𑀲𑀼 𑀧𑀤𑁂𑀲𑀼𑀧𑀺 𑀩𑀳𑀼𑀯𑀘𑀦𑁂𑀦], 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑀼𑀓𑀸𑀫𑁄 𑀆𑀕𑀢𑁄𑀫𑁆𑀳𑀺, 𑀧𑀜𑁆𑀳𑀁 𑀲𑁄𑀢𑀼𑀓𑀸𑀫𑁄 𑀆𑀕𑀢𑁄𑀫𑁆𑀳𑀻𑀢𑀺. 𑀏𑀯𑀫𑁆𑀧𑀺 𑀅𑀢𑁆𑀣𑀺 𑀧𑀜𑁆𑀳𑁂𑀦 𑀆𑀕𑀫𑀁. 𑀅𑀣 𑀯𑀸 𑀧𑀜𑁆𑀳𑀢𑁆𑀣𑀺𑀓𑀸𑀦𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑀼𑀓𑀸𑀫𑀸𑀦𑀁 𑀧𑀜𑁆𑀳𑀁 𑀲𑁄𑀢𑀼𑀓𑀸𑀫𑀸𑀦𑀁 𑀆𑀕𑀫𑀦𑀁 𑀅𑀪𑀺𑀓𑁆𑀓𑀫𑀦𑀁 𑀉𑀧𑀲𑀗𑁆𑀓𑀫𑀦𑀁 𑀧𑀬𑀺𑀭𑀼𑀧𑀸𑀲𑀦𑀁 [𑀧𑀬𑀺𑀭𑀼𑀧𑀸𑀲𑀦𑀸 (𑀲𑁆𑀬𑀸. 𑀓.)] 𑀲𑀺𑀬𑀸 𑀅𑀢𑁆𑀣𑀻𑀢𑀺. 𑀏𑀯𑀫𑁆𑀧𑀺 𑀅𑀢𑁆𑀣𑀺 𑀧𑀜𑁆𑀳𑁂𑀦 𑀆𑀕𑀫𑀁. 𑀅𑀣 𑀯𑀸 𑀧𑀜𑁆𑀳𑀸𑀕𑀫𑁄 𑀢𑀼𑀬𑁆𑀳𑀁 𑀅𑀢𑁆𑀣𑀺, 𑀢𑁆𑀯𑀫𑁆𑀧𑀺 𑀧𑀳𑀼 [𑀇𑀫𑀸𑀦𑀺 𑀢𑀻𑀡𑀺 𑀧𑀤𑀸𑀦𑀺 𑀦𑀢𑁆𑀣𑀺 𑀲𑁆𑀬𑀸. 𑀧𑁄𑀢𑁆𑀣𑀓𑁂], 𑀢𑁆𑀯𑀫𑀲𑀺 𑀅𑀮𑀫𑀢𑁆𑀣𑁄 𑀫𑀬𑀸 𑀧𑀼𑀘𑁆𑀙𑀺𑀢𑀁 𑀓𑀣𑁂𑀢𑀼𑀁 𑀯𑀺𑀲𑀚𑁆𑀚𑁂𑀢𑀼𑀁 ‘‘𑀯𑀳𑀲𑁆𑀲𑁂𑀢𑀁 𑀪𑀸𑀭’’𑀦𑁆𑀢𑀺. 𑀏𑀯𑀫𑁆𑀧𑀺 𑀅𑀢𑁆𑀣𑀺 𑀧𑀜𑁆𑀳𑁂𑀦 𑀆𑀕𑀫𑀁.
𑀢𑁂𑀦𑀸𑀳 𑀣𑁂𑀭𑁄 𑀲𑀸𑀭𑀺𑀧𑀼𑀢𑁆𑀢𑁄 𑁋
‘‘𑀢𑀁 𑀩𑀼𑀤𑁆𑀥𑀁 𑀅𑀲𑀺𑀢𑀁 𑀢𑀸𑀤𑀺𑀁, 𑀅𑀓𑀼𑀳𑀁 𑀕𑀡𑀺𑀫𑀸𑀕𑀢𑀁;
𑀩𑀳𑀽𑀦𑀫𑀺𑀥 𑀩𑀤𑁆𑀥𑀸𑀦𑀁, 𑀅𑀢𑁆𑀣𑀺 𑀧𑀜𑁆𑀳𑁂𑀦 𑀆𑀕𑀫’’𑀦𑁆𑀢𑀺.
𑁧𑁯𑁩. 𑀪𑀺𑀓𑁆𑀔𑀼𑀦𑁄 𑀯𑀺𑀚𑀺𑀕𑀼𑀘𑁆𑀙𑀢𑁄, 𑀪𑀚𑀢𑁄 𑀭𑀺𑀢𑁆𑀢𑀫𑀸𑀲𑀦𑀁;
𑀭𑀼𑀓𑁆𑀔𑀫𑀽𑀮𑀁 𑀲𑀼𑀲𑀸𑀦𑀁 𑀯𑀸, 𑀧𑀩𑁆𑀩𑀢𑀸𑀦𑀁 𑀕𑀼𑀳𑀸𑀲𑀼 𑀯𑀸.
𑀪𑀺𑀓𑁆𑀔𑀼𑀦𑁄 𑀯𑀺𑀚𑀺𑀕𑀼𑀘𑁆𑀙𑀢𑁄𑀢𑀺. 𑀪𑀺𑀓𑁆𑀔𑀼𑀦𑁄𑀢𑀺 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀲𑁆𑀲 𑀯𑀸 𑀪𑀺𑀓𑁆𑀔𑀼𑀦𑁄 𑀲𑁂𑀓𑁆𑀔𑀲𑁆𑀲 𑀯𑀸 𑀪𑀺𑀓𑁆𑀔𑀼𑀦𑁄. 𑀯𑀺𑀚𑀺𑀕𑀼𑀘𑁆𑀙𑀢𑁄𑀢𑀺 𑀚𑀸𑀢𑀺𑀬𑀸 𑀯𑀺𑀚𑀺𑀕𑀼𑀘𑁆𑀙𑀢𑁄, 𑀚𑀭𑀸𑀬… 𑀩𑁆𑀬𑀸𑀥𑀺𑀦𑀸… 𑀫𑀭𑀡𑁂𑀦… 𑀲𑁄𑀓𑁂𑀳𑀺… 𑀧𑀭𑀺𑀤𑁂𑀯𑁂𑀳𑀺… 𑀤𑀼𑀓𑁆𑀔𑁂𑀳𑀺… 𑀤𑁄𑀫𑀦𑀲𑁆𑀲𑁂𑀳𑀺… 𑀉𑀧𑀸𑀬𑀸𑀲𑁂𑀳𑀺 𑀯𑀺𑀚𑀺𑀕𑀼𑀘𑁆𑀙𑀢𑁄, 𑀦𑁂𑀭𑀬𑀺𑀓𑁂𑀦 𑀤𑀼𑀓𑁆𑀔𑁂𑀦… 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀓𑁂𑀦 𑀤𑀼𑀓𑁆𑀔𑁂𑀦… 𑀧𑁂𑀢𑁆𑀢𑀺𑀯𑀺𑀲𑀬𑀺𑀓𑁂𑀦 𑀤𑀼𑀓𑁆𑀔𑁂𑀦… 𑀫𑀸𑀦𑀼𑀲𑀺𑀓𑁂𑀦 [𑀫𑀸𑀦𑀼𑀲𑀓𑁂𑀦 (𑀲𑀻. 𑀲𑁆𑀬𑀸.) 𑀫𑀳𑀸𑀦𑀺. 𑁧𑁭𑁧] 𑀤𑀼𑀓𑁆𑀔𑁂𑀦… 𑀕𑀩𑁆𑀪𑁄𑀓𑁆𑀓𑀦𑁆𑀢𑀺𑀫𑀽𑀮𑀓𑁂𑀦 𑀤𑀼𑀓𑁆𑀔𑁂𑀦… 𑀕𑀩𑁆𑀪𑀝𑁆𑀞𑀺𑀢𑀺𑀫𑀽𑀮𑀓𑁂𑀦 𑀤𑀼𑀓𑁆𑀔𑁂𑀦… 𑀕𑀩𑁆𑀪𑀯𑀼𑀝𑁆𑀞𑀸𑀦𑀫𑀽𑀮𑀓𑁂𑀦 𑀤𑀼𑀓𑁆𑀔𑁂𑀦… 𑀚𑀸𑀢𑀲𑁆𑀲𑀽𑀧𑀦𑀺𑀩𑀦𑁆𑀥𑀓𑁂𑀦 𑀤𑀼𑀓𑁆𑀔𑁂𑀦… 𑀚𑀸𑀢𑀲𑁆𑀲 𑀧𑀭𑀸𑀥𑁂𑀬𑁆𑀬𑀓𑁂𑀦 𑀤𑀼𑀓𑁆𑀔𑁂𑀦… 𑀅𑀢𑁆𑀢𑀽𑀧𑀓𑁆𑀓𑀫𑁂𑀦 𑀤𑀼𑀓𑁆𑀔𑁂𑀦… 𑀧𑀭𑀽𑀧𑀓𑁆𑀓𑀫𑁂𑀦 𑀤𑀼𑀓𑁆𑀔𑁂𑀦… 𑀤𑀼𑀓𑁆𑀔𑀤𑀼𑀓𑁆𑀔𑁂𑀦… 𑀲𑀗𑁆𑀔𑀸𑀭𑀤𑀼𑀓𑁆𑀔𑁂𑀦 … 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑁂𑀦… 𑀘𑀓𑁆𑀔𑀼𑀭𑁄𑀕𑁂𑀦 𑀤𑀼𑀓𑁆𑀔𑁂𑀦… 𑀲𑁄𑀢𑀭𑁄𑀕𑁂𑀦 𑀤𑀼𑀓𑁆𑀔𑁂𑀦… 𑀖𑀸𑀦𑀭𑁄𑀕𑁂𑀦 𑀤𑀼𑀓𑁆𑀔𑁂𑀦… 𑀚𑀺𑀯𑁆𑀳𑀸𑀭𑁄𑀕𑁂𑀦 𑀤𑀼𑀓𑁆𑀔𑁂𑀦… 𑀓𑀸𑀬𑀭𑁄𑀕𑁂𑀦 𑀤𑀼𑀓𑁆𑀔𑁂𑀦… 𑀲𑀻𑀲𑀭𑁄𑀕𑁂𑀦 𑀤𑀼𑀓𑁆𑀔𑁂𑀦… 𑀓𑀡𑁆𑀡𑀭𑁄𑀕𑁂𑀦 𑀤𑀼𑀓𑁆𑀔𑁂𑀦… 𑀫𑀼𑀔𑀭𑁄𑀕𑁂𑀦 𑀤𑀼𑀓𑁆𑀔𑁂𑀦… 𑀤𑀦𑁆𑀢𑀭𑁄𑀕𑁂𑀦 𑀤𑀼𑀓𑁆𑀔𑁂𑀦… 𑀓𑀸𑀲𑁂𑀦… 𑀲𑀸𑀲𑁂𑀦… 𑀧𑀺𑀦𑀸𑀲𑁂𑀦… 𑀟𑀸𑀳𑁂𑀦… 𑀚𑀭𑁂𑀦… 𑀓𑀼𑀘𑁆𑀙𑀺𑀭𑁄𑀕𑁂𑀦… 𑀫𑀼𑀘𑁆𑀙𑀸𑀬… 𑀧𑀓𑁆𑀔𑀦𑁆𑀤𑀺𑀓𑀸𑀬… 𑀲𑀽𑀮𑀸𑀬… 𑀯𑀺𑀲𑀽𑀘𑀺𑀓𑀸𑀬… 𑀓𑀼𑀝𑁆𑀞𑁂𑀦… 𑀕𑀡𑁆𑀟𑁂𑀦… 𑀓𑀺𑀮𑀸𑀲𑁂𑀦… 𑀲𑁄𑀲𑁂𑀦… 𑀅𑀧𑀫𑀸𑀭𑁂𑀦… 𑀤𑀤𑁆𑀤𑀼𑀬𑀸… 𑀓𑀡𑁆𑀟𑀼𑀬𑀸… 𑀓𑀘𑁆𑀙𑀼𑀬𑀸… 𑀭𑀔𑀲𑀸𑀬… 𑀯𑀺𑀢𑀘𑁆𑀙𑀺𑀓𑀸𑀬… 𑀮𑁄𑀳𑀺𑀢𑁂𑀦… 𑀧𑀺𑀢𑁆𑀢𑁂𑀦… 𑀫𑀥𑀼𑀫𑁂𑀳𑁂𑀦… 𑀅𑀁𑀲𑀸𑀬… 𑀧𑀺𑀴𑀓𑀸𑀬… 𑀪𑀕𑀦𑁆𑀤𑀮𑁂𑀦… 𑀧𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑁂𑀦 𑀆𑀩𑀸𑀥𑁂𑀦… 𑀲𑁂𑀫𑁆𑀳𑀲𑀫𑀼𑀝𑁆𑀞𑀸𑀦𑁂𑀦 𑀆𑀩𑀸𑀥𑁂𑀦… 𑀯𑀸𑀢𑀲𑀫𑀼𑀝𑁆𑀞𑀸𑀦𑁂𑀦 𑀆𑀩𑀸𑀥𑁂𑀦… 𑀲𑀦𑁆𑀦𑀺𑀧𑀸𑀢𑀺𑀓𑁂𑀦 𑀆𑀩𑀸𑀥𑁂𑀦… 𑀉𑀢𑀼𑀧𑀭𑀺𑀡𑀸𑀫𑀚𑁂𑀦 𑀆𑀩𑀸𑀥𑁂𑀦… 𑀯𑀺𑀲𑀫𑀧𑀭𑀺𑀳𑀸𑀭𑀚𑁂𑀦 𑀆𑀩𑀸𑀥𑁂𑀦… 𑀑𑀧𑀓𑁆𑀓𑀫𑀺𑀓𑁂𑀦 𑀆𑀩𑀸𑀥𑁂𑀦… 𑀓𑀫𑁆𑀫𑀯𑀺𑀧𑀸𑀓𑀚𑁂𑀦 𑀆𑀩𑀸𑀥𑁂𑀦… 𑀲𑀻𑀢𑁂𑀦… 𑀉𑀡𑁆𑀳𑁂𑀦… 𑀚𑀺𑀖𑀘𑁆𑀙𑀸𑀬… 𑀧𑀺𑀧𑀸𑀲𑀸𑀬… 𑀉𑀘𑁆𑀘𑀸𑀭𑁂𑀦 … 𑀧𑀲𑁆𑀲𑀸𑀯𑁂𑀦… 𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀻𑀲𑀧𑀲𑀫𑁆𑀨𑀲𑁆𑀲𑁂𑀦 𑀤𑀼𑀓𑁆𑀔𑁂𑀦… 𑀫𑀸𑀢𑀼𑀫𑀭𑀡𑁂𑀦 𑀤𑀼𑀓𑁆𑀔𑁂𑀦… 𑀧𑀺𑀢𑀼𑀫𑀭𑀡𑁂𑀦 𑀤𑀼𑀓𑁆𑀔𑁂𑀦… 𑀪𑀸𑀢𑀼𑀫𑀭𑀡𑁂𑀦… 𑀪𑀕𑀺𑀦𑀺𑀫𑀭𑀡𑁂𑀦… 𑀧𑀼𑀢𑁆𑀢𑀫𑀭𑀡𑁂𑀦 … 𑀥𑀻𑀢𑀼𑀫𑀭𑀡𑁂𑀦… 𑀜𑀸𑀢𑀺𑀩𑁆𑀬𑀲𑀦𑁂𑀦… 𑀪𑁄𑀕𑀩𑁆𑀬𑀲𑀦𑁂𑀦… 𑀭𑁄𑀕𑀩𑁆𑀬𑀲𑀦𑁂𑀦… 𑀲𑀻𑀮𑀩𑁆𑀬𑀲𑀦𑁂𑀦… 𑀤𑀺𑀝𑁆𑀞𑀺𑀩𑁆𑀬𑀲𑀦𑁂𑀦 𑀤𑀼𑀓𑁆𑀔𑁂𑀦 𑀯𑀺𑀚𑀺𑀕𑀼𑀘𑁆𑀙𑀢𑁄 𑀅𑀝𑁆𑀝𑀻𑀬𑀢𑁄 𑀳𑀭𑀸𑀬𑀢𑁄 𑀚𑀺𑀕𑀼𑀘𑁆𑀙𑀢𑁄𑀢𑀺 𑁋 𑀪𑀺𑀓𑁆𑀔𑀼𑀦𑁄 𑀯𑀺𑀚𑀺𑀕𑀼𑀘𑁆𑀙𑀢𑁄.
𑀪𑀚𑀢𑁄 𑀭𑀺𑀢𑁆𑀢𑀫𑀸𑀲𑀦𑀦𑁆𑀢𑀺. 𑀆𑀲𑀦𑀁 𑀯𑀼𑀘𑁆𑀘𑀢𑀺 𑀬𑀢𑁆𑀣 𑀦𑀺𑀲𑀻𑀤𑀢𑀺 𑁋 𑀫𑀜𑁆𑀘𑁄 𑀧𑀻𑀞𑀁 𑀪𑀺𑀲𑀺 𑀢𑀝𑁆𑀝𑀺𑀓𑀸 𑀘𑀫𑁆𑀫𑀔𑀡𑁆𑀟𑁄 𑀢𑀺𑀡𑀲𑀦𑁆𑀣𑀸𑀭𑁄 𑀧𑀡𑁆𑀡𑀲𑀦𑁆𑀣𑀸𑀭𑁄 𑀧𑀮𑀸𑀮𑀲𑀦𑁆𑀣𑀸𑀭𑁄 [𑀧𑀮𑀸𑀲𑀲𑀦𑁆𑀣𑀸𑀭𑁄 (𑀲𑀻. 𑀲𑁆𑀬𑀸.)]. 𑀢𑀁 𑀆𑀲𑀦𑀁 𑀅𑀲𑀧𑁆𑀧𑀸𑀬𑀭𑀽𑀧𑀤𑀲𑁆𑀲𑀦𑁂𑀦 𑀭𑀺𑀢𑁆𑀢𑀁 𑀯𑀺𑀯𑀺𑀢𑁆𑀢𑀁 𑀧𑀯𑀺𑀯𑀺𑀢𑁆𑀢𑀁, 𑀅𑀲𑀧𑁆𑀧𑀸𑀬𑀲𑀤𑁆𑀤𑀲𑁆𑀲𑀯𑀦𑁂𑀦 𑀭𑀺𑀢𑁆𑀢𑀁 𑀯𑀺𑀯𑀺𑀢𑁆𑀢𑀁 𑀧𑀯𑀺𑀯𑀺𑀢𑁆𑀢𑀁, 𑀅𑀲𑀧𑁆𑀧𑀸𑀬𑁂𑀳𑀺 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀭𑀺𑀢𑁆𑀢𑀁 𑀯𑀺𑀯𑀺𑀢𑁆𑀢𑀁 𑀧𑀯𑀺𑀯𑀺𑀢𑁆𑀢𑀁. 𑀢𑀁 𑀧𑀯𑀺𑀯𑀺𑀢𑁆𑀢𑀁 𑀆𑀲𑀦𑀁 𑀪𑀚𑀢𑁄 𑀲𑀫𑁆𑀪𑀚𑀢𑁄 𑀲𑁂𑀯𑀢𑁄 𑀦𑀺𑀲𑁂𑀯𑀢𑁄 𑀲𑀁𑀲𑁂𑀯𑀢𑁄 𑀧𑀝𑀺𑀲𑁂𑀯𑀢𑁄𑀢𑀺 𑁋 𑀪𑀚𑀢𑁄 𑀭𑀺𑀢𑁆𑀢𑀫𑀸𑀲𑀦𑀁.
𑀭𑀼𑀓𑁆𑀔𑀫𑀽𑀮𑀁 𑀲𑀼𑀲𑀸𑀦𑀁 𑀯𑀸𑀢𑀺. 𑀭𑀼𑀓𑁆𑀔𑀫𑀽𑀮𑀁𑀬𑁂𑀯 𑀭𑀼𑀓𑁆𑀔𑀫𑀽𑀮𑀁, 𑀲𑀼𑀲𑀸𑀦𑀁𑀬𑁂𑀯 𑀲𑀼𑀲𑀸𑀦𑀦𑁆𑀢𑀺 𑁋 𑀭𑀼𑀓𑁆𑀔𑀫𑀽𑀮𑀁 𑀲𑀼𑀲𑀸𑀦𑀁 𑀯𑀸. 𑀧𑀩𑁆𑀩𑀢𑀸𑀦𑀁 𑀕𑀼𑀳𑀸𑀲𑀼 𑀯𑀸𑀢𑀺. 𑀧𑀩𑁆𑀩𑀢𑀸𑀬𑁂𑀯 𑀧𑀩𑁆𑀩𑀢𑀸, 𑀓𑀦𑁆𑀤𑀭𑀸𑀬𑁂𑀯 𑀓𑀦𑁆𑀤𑀭𑀸, 𑀕𑀺𑀭𑀺𑀕𑀼𑀳𑀸𑀬𑁂𑀯 𑀕𑀺𑀭𑀺𑀕𑀼𑀳𑀸. 𑀧𑀩𑁆𑀩𑀢𑀦𑁆𑀢𑀭𑀺𑀓𑀸𑀬𑁄 𑀯𑀼𑀘𑁆𑀘𑀦𑁆𑀢𑀺 𑀧𑀩𑁆𑀩𑀢𑀧𑀩𑁆𑀪𑀸𑀭𑀸𑀢𑀺 𑁋 𑀧𑀩𑁆𑀩𑀢𑀸𑀦𑀁 𑀕𑀼𑀳𑀸𑀲𑀼 𑀯𑀸.
𑀢𑁂𑀦𑀸𑀳 𑀣𑁂𑀭𑁄 𑀲𑀸𑀭𑀺𑀧𑀼𑀢𑁆𑀢𑁄 𑁋
‘‘𑀪𑀺𑀓𑁆𑀔𑀼𑀦𑁄 𑀯𑀺𑀚𑀺𑀕𑀼𑀘𑁆𑀙𑀢𑁄, 𑀪𑀚𑀢𑁄 𑀭𑀺𑀢𑁆𑀢𑀫𑀸𑀲𑀦𑀁;
𑀭𑀼𑀓𑁆𑀔𑀫𑀽𑀮𑀁 𑀲𑀼𑀲𑀸𑀦𑀁 𑀯𑀸, 𑀧𑀩𑁆𑀩𑀢𑀸𑀦𑀁 𑀕𑀼𑀳𑀸𑀲𑀼 𑀯𑀸’’𑀢𑀺.
𑁧𑁯𑁪. 𑀉𑀘𑁆𑀘𑀸𑀯𑀘𑁂𑀲𑀼 𑀲𑀬𑀦𑁂𑀲𑀼, 𑀓𑀺𑀯𑀦𑁆𑀢𑁄 [𑀕𑀻𑀯𑀦𑁆𑀢𑁄 (𑀲𑁆𑀬𑀸.) 𑀫𑁄𑀕𑁆𑀕𑀮𑁆𑀮𑀸𑀦𑀩𑁆𑀬𑀸𑀓𑀭𑀡𑀁 𑀑𑀮𑁄𑀓𑁂𑀢𑀩𑁆𑀩𑀁] 𑀢𑀢𑁆𑀣 𑀪𑁂𑀭𑀯𑀸;
𑀬𑁂 𑀳𑀺 𑀪𑀺𑀓𑁆𑀔𑀼 𑀦 𑀯𑁂𑀥𑁂𑀬𑁆𑀬, 𑀦𑀺𑀕𑁆𑀖𑁄𑀲𑁂 𑀲𑀬𑀦𑀸𑀲𑀦𑁂.
𑀉𑀘𑁆𑀘𑀸𑀯𑀘𑁂𑀲𑀼 𑀲𑀬𑀦𑁂𑀲𑀽𑀢𑀺. 𑀉𑀘𑁆𑀘𑀸𑀯𑀘𑁂𑀲𑀽𑀢𑀺 𑀉𑀘𑁆𑀘𑀸𑀯𑀘𑁂𑀲𑀼 𑀳𑀻𑀦𑀧𑁆𑀧𑀡𑀻𑀢𑁂𑀲𑀼 𑀙𑁂𑀓𑀧𑀸𑀧𑀓𑁂𑀲𑀼. 𑀲𑀬𑀦𑀁 𑀯𑀼𑀘𑁆𑀘𑀢𑀺 𑀲𑁂𑀦𑀸𑀲𑀦𑀁 𑀯𑀺𑀳𑀸𑀭𑁄 𑀅𑀟𑁆𑀠𑀬𑁄𑀕𑁄 𑀧𑀸𑀲𑀸𑀤𑁄 𑀳𑀫𑁆𑀫𑀺𑀬𑀁 𑀕𑀼𑀳𑀸𑀢𑀺 𑁋 𑀉𑀘𑁆𑀘𑀸𑀯𑀘𑁂𑀲𑀼 𑀲𑀬𑀦𑁂𑀲𑀼. 𑀓𑀺𑀯𑀦𑁆𑀢𑁄 𑀢𑀢𑁆𑀣 𑀪𑁂𑀭𑀯𑀸𑀢𑀺. 𑀓𑀺𑀯𑀦𑁆𑀢𑁄𑀢𑀺 𑀓𑀺𑀯𑀦𑁆𑀢𑁄 [𑀓𑀼𑀯𑀦𑁆𑀢𑁄 (𑀲𑀻.), 𑀕𑀻𑀯𑀦𑁆𑀢𑁄 (𑀲𑁆𑀬𑀸.)] 𑀓𑀽𑀚𑀦𑁆𑀢𑁄 𑀦𑀤𑀦𑁆𑀢𑁄 𑀲𑀤𑁆𑀤𑀁 𑀓𑀭𑁄𑀦𑁆𑀢𑁄. 𑀅𑀣 𑀯𑀸 𑀓𑀺𑀯𑀦𑁆𑀢𑁄𑀢𑀺 𑀓𑀢𑀺 𑀓𑀺𑀢𑁆𑀢𑀓𑀸 𑀓𑀻𑀯𑀢𑀓𑀸 𑀓𑀻𑀯𑀩𑀳𑀼𑀓𑀸 𑀢𑁂. 𑀪𑁂𑀭𑀯𑀸𑀢𑀺 𑀲𑀻𑀳𑀸 𑀩𑁆𑀬𑀕𑁆𑀖𑀸 𑀤𑀻𑀧𑀻 𑀅𑀘𑁆𑀙𑀸 𑀢𑀭𑀘𑁆𑀙𑀸 𑀓𑁄𑀓𑀸 𑀫𑀳𑀺𑀁𑀲𑀸 𑀳𑀢𑁆𑀣𑀻 𑀅𑀳𑀺 𑀯𑀺𑀘𑁆𑀙𑀺𑀓𑀸 𑀲𑀢𑀧𑀤𑀻, 𑀘𑁄𑀭𑀸 𑀯𑀸 𑀅𑀲𑁆𑀲𑀼 𑀫𑀸𑀦𑀯𑀸 𑀯𑀸 𑀓𑀢𑀓𑀫𑁆𑀫𑀸 𑀯𑀸 𑀅𑀓𑀢𑀓𑀫𑁆𑀫𑀸 𑀯𑀸𑀢𑀺 𑁋 𑀓𑀺𑀯𑀦𑁆𑀢𑁄 𑀢𑀢𑁆𑀣 𑀪𑁂𑀭𑀯𑀸.
𑀬𑁂 𑀳𑀺 𑀪𑀺𑀓𑁆𑀔𑀼 𑀦 𑀯𑁂𑀥𑁂𑀬𑁆𑀬𑀸𑀢𑀺. 𑀬𑁂 𑀳𑀻𑀢𑀺 𑀬𑁂 𑀳𑀺 𑀪𑁂𑀭𑀯𑁂 𑀧𑀲𑁆𑀲𑀺𑀢𑁆𑀯𑀸 𑀯𑀸 𑀲𑀼𑀡𑀺𑀢𑁆𑀯𑀸 𑀯𑀸 𑀦 𑀯𑁂𑀥𑁂𑀬𑁆𑀬 𑀦𑀧𑁆𑀧𑀯𑁂𑀥𑁂𑀬𑁆𑀬 𑀦 𑀲𑀫𑁆𑀧𑀯𑁂𑀥𑁂𑀬𑁆𑀬 𑀦 𑀢𑀲𑁂𑀬𑁆𑀬 𑀦 𑀉𑀢𑁆𑀢𑀲𑁂𑀬𑁆𑀬 𑀦 𑀧𑀭𑀺𑀢𑁆𑀢𑀲𑁂𑀬𑁆𑀬 𑀦 𑀪𑀸𑀬𑁂𑀬𑁆𑀬 𑀦 𑀲𑀦𑁆𑀢𑀸𑀲𑀁 𑀆𑀧𑀚𑁆𑀚𑁂𑀬𑁆𑀬, 𑀅𑀪𑀻𑀭𑀽 𑀅𑀲𑁆𑀲 𑀅𑀘𑁆𑀙𑀫𑁆𑀪𑀻 𑀅𑀦𑀼𑀢𑁆𑀭𑀸𑀲𑀻 𑀅𑀧𑀮𑀸𑀬𑀻, 𑀧𑀳𑀻𑀦𑀪𑀬𑀪𑁂𑀭𑀯𑁄 𑀯𑀺𑀕𑀢𑀮𑁄𑀫𑀳𑀁𑀲𑁄 𑀯𑀺𑀳𑀭𑁂𑀬𑁆𑀬𑀸𑀢𑀺 𑁋 𑀬𑁂 𑀳𑀺 𑀪𑀺𑀓𑁆𑀔𑀼 𑀦 𑀯𑁂𑀥𑁂𑀬𑁆𑀬.
𑀦𑀺𑀕𑁆𑀖𑁄𑀲𑁂 𑀲𑀬𑀦𑀸𑀲𑀦𑁂𑀢𑀺. 𑀅𑀧𑁆𑀧𑀲𑀤𑁆𑀤𑁂 𑀅𑀧𑁆𑀧𑀦𑀺𑀕𑁆𑀖𑁄𑀲𑁂 𑀯𑀺𑀚𑀦𑀯𑀸𑀢𑁂 𑀫𑀦𑀼𑀲𑁆𑀲𑀭𑀸𑀳𑀲𑁆𑀲𑁂𑀬𑁆𑀬𑀓𑁂 𑀧𑀝𑀺𑀲𑀮𑁆𑀮𑀸𑀦𑀲𑀸𑀭𑀼𑀧𑁆𑀧𑁂 𑀲𑁂𑀦𑀸𑀲𑀦𑁂𑀢𑀺 𑁋 𑀦𑀺𑀕𑁆𑀖𑁄𑀲𑁂 𑀲𑀬𑀦𑀸𑀲𑀦𑁂.
𑀢𑁂𑀦𑀸𑀳 𑀣𑁂𑀭𑁄 𑀲𑀸𑀭𑀺𑀧𑀼𑀢𑁆𑀢𑁄 𑁋
‘‘𑀉𑀘𑁆𑀘𑀸𑀯𑀘𑁂𑀲𑀼 𑀲𑀬𑀦𑁂𑀲𑀼, 𑀓𑀺𑀯𑀦𑁆𑀢𑁄 𑀢𑀢𑁆𑀣 𑀪𑁂𑀭𑀯𑀸;
𑀬𑁂 𑀳𑀺 𑀪𑀺𑀓𑁆𑀔𑀼 𑀦 𑀯𑁂𑀥𑁂𑀬𑁆𑀬, 𑀦𑀺𑀕𑁆𑀖𑁄𑀲𑁂 𑀲𑀬𑀦𑀸𑀲𑀦𑁂’’𑀢𑀺.
𑁧𑁯𑁫. 𑀓𑀢𑀺 𑀧𑀭𑀺𑀲𑁆𑀲𑀬𑀸 𑀮𑁄𑀓𑁂, 𑀕𑀘𑁆𑀙𑀢𑁄 𑀅𑀕𑀢𑀁 𑀤𑀺𑀲𑀁;
𑀬𑁂 𑀪𑀺𑀓𑁆𑀔𑀼 𑀅𑀪𑀺𑀲𑀫𑁆𑀪𑀯𑁂, 𑀧𑀦𑁆𑀢𑀫𑁆𑀳𑀺 𑀲𑀬𑀦𑀸𑀲𑀦𑁂.
𑀓𑀢𑀺 𑀧𑀭𑀺𑀲𑁆𑀲𑀬𑀸 𑀮𑁄𑀓𑁂𑀢𑀺. 𑀓𑀢𑀻𑀢𑀺 𑀓𑀢𑀺 𑀓𑀺𑀢𑁆𑀢𑀓𑀸 𑀓𑀻𑀯𑀢𑀓𑀸 𑀓𑀻𑀯𑀩𑀳𑀼𑀓𑀸. 𑀧𑀭𑀺𑀲𑁆𑀲𑀬𑀸𑀢𑀺 𑀤𑁆𑀯𑁂 𑀧𑀭𑀺𑀲𑁆𑀲𑀬𑀸 𑁋 𑀧𑀸𑀓𑀝𑀧𑀭𑀺𑀲𑁆𑀲𑀬𑀸 𑀘 𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀲𑁆𑀲𑀬𑀸 𑀘. 𑀓𑀢𑀫𑁂 𑀧𑀸𑀓𑀝𑀧𑀭𑀺𑀲𑁆𑀲𑀬𑀸? 𑀲𑀻𑀳𑀸 𑀩𑁆𑀬𑀕𑁆𑀖𑀸 𑀤𑀻𑀧𑀻 𑀅𑀘𑁆𑀙𑀸 𑀢𑀭𑀘𑁆𑀙𑀸 𑀓𑁄𑀓𑀸 𑀫𑀳𑀺𑀁𑀲𑀸 𑀳𑀢𑁆𑀣𑀻 𑀅𑀳𑀺 𑀯𑀺𑀘𑁆𑀙𑀺𑀓𑀸 𑀲𑀢𑀧𑀤𑀻, 𑀘𑁄𑀭𑀸 𑀯𑀸 𑀅𑀲𑁆𑀲𑀼 𑀫𑀸𑀦𑀯𑀸 𑀯𑀸 𑀓𑀢𑀓𑀫𑁆𑀫𑀸 𑀯𑀸 𑀅𑀓𑀢𑀓𑀫𑁆𑀫𑀸 𑀯𑀸, 𑀘𑀓𑁆𑀔𑀼𑀭𑁄𑀕𑁄 𑀲𑁄𑀢𑀭𑁄𑀕𑁄 𑀖𑀸𑀦𑀭𑁄𑀕𑁄 𑀚𑀺𑀯𑁆𑀳𑀸𑀭𑁄𑀕𑁄 𑀓𑀸𑀬𑀭𑁄𑀕𑁄 𑀲𑀻𑀲𑀭𑁄𑀕𑁄 𑀓𑀡𑁆𑀡𑀭𑁄𑀕𑁄 𑀫𑀼𑀔𑀭𑁄𑀕𑁄 𑀤𑀦𑁆𑀢𑀭𑁄𑀕𑁄 𑀓𑀸𑀲𑁄 𑀲𑀸𑀲𑁄 𑀧𑀺𑀦𑀸𑀲𑁄 𑀟𑀸𑀳𑁄 𑀚𑀭𑁄 𑀓𑀼𑀘𑁆𑀙𑀺𑀭𑁄𑀕𑁄 𑀫𑀼𑀘𑁆𑀙𑀸 𑀧𑀓𑁆𑀔𑀦𑁆𑀤𑀺𑀓𑀸 𑀲𑀽𑀮𑀸 𑀯𑀺𑀲𑀽𑀘𑀺𑀓𑀸 𑀓𑀼𑀝𑁆𑀞𑀁 𑀕𑀡𑁆𑀟𑁄 𑀓𑀺𑀮𑀸𑀲𑁄 𑀲𑁄𑀲𑁄 𑀅𑀧𑀫𑀸𑀭𑁄 𑀤𑀤𑁆𑀤𑀼 𑀓𑀡𑁆𑀟𑀼 𑀓𑀘𑁆𑀙𑀼 𑀭𑀔𑀲𑀸 𑀯𑀺𑀢𑀘𑁆𑀙𑀺𑀓𑀸 𑀮𑁄𑀳𑀺𑀢𑀁 𑀧𑀺𑀢𑁆𑀢𑀁 𑀫𑀥𑀼𑀫𑁂𑀳𑁄 𑀅𑀁𑀲𑀸 𑀧𑀺𑀴𑀓𑀸 𑀪𑀕𑀦𑁆𑀤𑀮𑀸, 𑀧𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸 𑀆𑀩𑀸𑀥𑀸…𑀧𑁂… 𑀲𑀻𑀢𑀁 𑀉𑀡𑁆𑀳𑀁 𑀚𑀺𑀖𑀘𑁆𑀙𑀸 𑀧𑀺𑀧𑀸𑀲𑀸 𑀉𑀘𑁆𑀘𑀸𑀭𑁄 𑀧𑀲𑁆𑀲𑀸𑀯𑁄 𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀻𑀲𑀧𑀲𑀫𑁆𑀨𑀲𑁆𑀲𑀸 𑁋 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀧𑀸𑀓𑀝𑀧𑀭𑀺𑀲𑁆𑀲𑀬𑀸.
𑀓𑀢𑀫𑁂 𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀲𑁆𑀲𑀬𑀸? 𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀯𑀘𑀻𑀤𑀼𑀘𑁆𑀘𑀭𑀺𑀢𑀁 𑀫𑀦𑁄𑀤𑀼𑀘𑁆𑀘𑀭𑀺𑀢𑀁 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀁 𑀩𑁆𑀬𑀸𑀧𑀸𑀤𑀦𑀻𑀯𑀭𑀡𑀁 𑀣𑀺𑀦𑀫𑀺𑀤𑁆𑀥𑀦𑀻𑀯𑀭𑀡𑀁 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀦𑀻𑀯𑀭𑀡𑀁 𑀯𑀺𑀘𑀺𑀓𑀺𑀘𑁆𑀙𑀸𑀦𑀻𑀯𑀭𑀡𑀁 𑀭𑀸𑀕𑁄 𑀤𑁄𑀲𑁄 𑀫𑁄𑀳𑁄 𑀓𑁄𑀥𑁄 𑀉𑀧𑀦𑀸𑀳𑁄 𑀫𑀓𑁆𑀔𑁄 𑀧𑀴𑀸𑀲𑁄 𑀇𑀲𑁆𑀲𑀸 𑀫𑀘𑁆𑀙𑀭𑀺𑀬𑀁 𑀫𑀸𑀬𑀸 𑀲𑀸𑀞𑁂𑀬𑁆𑀬𑀁 𑀣𑀫𑁆𑀪𑁄 𑀲𑀸𑀭𑀫𑁆𑀪𑁄 𑀫𑀸𑀦𑁄 𑀅𑀢𑀺𑀫𑀸𑀦𑁄 𑀫𑀤𑁄 𑀧𑀫𑀸𑀤𑁄, 𑀲𑀩𑁆𑀩𑁂 𑀓𑀺𑀮𑁂𑀲𑀸 𑀲𑀩𑁆𑀩𑁂 𑀤𑀼𑀘𑁆𑀘𑀭𑀺𑀢𑀸 𑀲𑀩𑁆𑀩𑁂 𑀤𑀭𑀣𑀸 𑀲𑀩𑁆𑀩𑁂 𑀧𑀭𑀺𑀴𑀸𑀳𑀸 𑀲𑀩𑁆𑀩𑁂 𑀲𑀦𑁆𑀢𑀸𑀧𑀸 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀸 𑁋 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀲𑁆𑀲𑀬𑀸.
𑀧𑀭𑀺𑀲𑁆𑀲𑀬𑀸𑀢𑀺 𑀓𑁂𑀦𑀝𑁆𑀞𑁂𑀦 𑀧𑀭𑀺𑀲𑁆𑀲𑀬𑀸? 𑀧𑀭𑀺𑀲𑀳𑀦𑁆𑀢𑀻𑀢𑀺 𑀧𑀭𑀺𑀲𑁆𑀲𑀬𑀸, 𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀧𑀭𑀺𑀲𑁆𑀲𑀬𑀸, 𑀢𑀢𑁆𑀭𑀸𑀲𑀬𑀸𑀢𑀺 𑀧𑀭𑀺𑀲𑁆𑀲𑀬𑀸.
𑀓𑀣𑀁 𑀧𑀭𑀺𑀲𑀳𑀦𑁆𑀢𑀻𑀢𑀺 𑀧𑀭𑀺𑀲𑁆𑀲𑀬𑀸? 𑀢𑁂 𑀧𑀭𑀺𑀲𑁆𑀲𑀬𑀸 𑀢𑀁 𑀧𑀼𑀕𑁆𑀕𑀮𑀁 𑀲𑀳𑀦𑁆𑀢𑀺 𑀧𑀭𑀺𑀲𑀳𑀦𑁆𑀢𑀺 𑀅𑀪𑀺𑀪𑀯𑀦𑁆𑀢𑀺 𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑀺 𑀧𑀭𑀺𑀬𑀸𑀤𑀺𑀬𑀦𑁆𑀢𑀺 𑀫𑀤𑁆𑀤𑀦𑁆𑀢𑀺. 𑀏𑀯𑀁 𑀧𑀭𑀺𑀲𑀳𑀦𑁆𑀢𑀻𑀢𑀺 𑁋 𑀧𑀭𑀺𑀲𑁆𑀲𑀬𑀸.
𑀓𑀣𑀁 𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀧𑀭𑀺𑀲𑁆𑀲𑀬𑀸? 𑀢𑁂 𑀧𑀭𑀺𑀲𑁆𑀲𑀬𑀸 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑁆𑀢𑀭𑀸𑀬𑀸𑀬 𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀓𑀢𑀫𑁂𑀲𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁? 𑀲𑀫𑁆𑀫𑀸𑀧𑀝𑀺𑀧𑀤𑀸𑀬 𑀅𑀦𑀼𑀮𑁄𑀫𑀧𑀝𑀺𑀧𑀤𑀸𑀬 𑀅𑀧𑀘𑁆𑀘𑀦𑀻𑀓𑀧𑀝𑀺𑀧𑀤𑀸𑀬 𑀅𑀯𑀺𑀭𑀼𑀤𑁆𑀥𑀧𑀝𑀺𑀧𑀤𑀸𑀬 𑀅𑀦𑁆𑀯𑀢𑁆𑀣𑀧𑀝𑀺𑀧𑀤𑀸𑀬 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀤𑀸𑀬 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀺𑀢𑀸𑀬 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀢𑀸𑀬 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀸𑀬 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑀲𑁆𑀲 𑀲𑀢𑀺𑀲𑀫𑁆𑀧𑀚𑀜𑁆𑀜𑀲𑁆𑀲 𑀘𑀢𑀼𑀦𑁆𑀦𑀁 𑀲𑀢𑀺𑀧𑀝𑁆𑀞𑀸𑀦𑀸𑀦𑀁 𑀪𑀸𑀯𑀦𑀸𑀦𑀼𑀬𑁄𑀕𑀲𑁆𑀲 𑀘𑀢𑀼𑀦𑁆𑀦𑀁 𑀲𑀫𑁆𑀫𑀧𑁆𑀧𑀥𑀸𑀦𑀸𑀦𑀁 𑀘𑀢𑀼𑀦𑁆𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁 𑀧𑀜𑁆𑀘𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀜𑁆𑀘𑀦𑁆𑀦𑀁 𑀩𑀮𑀸𑀦𑀁 𑀲𑀢𑁆𑀢𑀦𑁆𑀦𑀁 𑀩𑁄𑀚𑁆𑀛𑀗𑁆𑀕𑀸𑀦𑀁 𑀅𑀭𑀺𑀬𑀲𑁆𑀲 𑀅𑀝𑁆𑀞𑀗𑁆𑀕𑀺𑀓𑀲𑁆𑀲 𑀫𑀕𑁆𑀕𑀲𑁆𑀲 𑀪𑀸𑀯𑀦𑀸𑀦𑀼𑀬𑁄𑀕𑀲𑁆𑀲 𑁋 𑀇𑀫𑁂𑀲𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑁆𑀢𑀭𑀸𑀬𑀸𑀬 𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀏𑀯𑀁 𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑁋 𑀧𑀭𑀺𑀲𑁆𑀲𑀬𑀸.
𑀓𑀣𑀁 𑀢𑀢𑁆𑀭𑀸𑀲𑀬𑀸𑀢𑀺 𑀧𑀭𑀺𑀲𑁆𑀲𑀬𑀸? 𑀢𑀢𑁆𑀣𑁂𑀢𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀅𑀢𑁆𑀢𑀪𑀸𑀯𑀲𑀦𑁆𑀦𑀺𑀲𑁆𑀲𑀬𑀸. 𑀬𑀣𑀸 𑀩𑀺𑀮𑁂 𑀩𑀺𑀮𑀸𑀲𑀬𑀸 𑀧𑀸𑀡𑀸 𑀲𑀬𑀦𑁆𑀢𑀺, 𑀤𑀓𑁂 𑀤𑀓𑀸𑀲𑀬𑀸 𑀧𑀸𑀡𑀸 𑀲𑀬𑀦𑁆𑀢𑀺, 𑀯𑀦𑁂 𑀯𑀦𑀸𑀲𑀬𑀸 𑀧𑀸𑀡𑀸 𑀲𑀬𑀦𑁆𑀢𑀺, 𑀭𑀼𑀓𑁆𑀔𑁂 𑀭𑀼𑀓𑁆𑀔𑀸𑀲𑀬𑀸 𑀧𑀸𑀡𑀸 𑀲𑀬𑀦𑁆𑀢𑀺; 𑀏𑀯𑀫𑁂𑀯 𑀢𑀢𑁆𑀣𑁂𑀢𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀅𑀢𑁆𑀢𑀪𑀸𑀯𑀲𑀦𑁆𑀦𑀺𑀲𑁆𑀲𑀬𑀸𑀢𑀺. 𑀏𑀯𑀫𑁆𑀧𑀺 𑀢𑀢𑁆𑀭𑀸𑀲𑀬𑀸𑀢𑀺 𑁋 𑀧𑀭𑀺𑀲𑁆𑀲𑀬𑀸.
𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋
‘‘𑀲𑀸𑀦𑁆𑀢𑁂𑀯𑀸𑀲𑀺𑀓𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀸𑀘𑀭𑀺𑀬𑀓𑁄 𑀤𑀼𑀓𑁆𑀔𑀁 𑀦 𑀨𑀸𑀲𑀼 𑀯𑀺𑀳𑀭𑀢𑀺. 𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀸𑀦𑁆𑀢𑁂𑀯𑀸𑀲𑀺𑀓𑁄 𑀲𑀸𑀘𑀭𑀺𑀬𑀓𑁄 𑀤𑀼𑀓𑁆𑀔𑀁 𑀦 𑀨𑀸𑀲𑀼 𑀯𑀺𑀳𑀭𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀭𑀲𑀗𑁆𑀓𑀧𑁆𑀧𑀸 𑀲𑀜𑁆𑀜𑁄𑀚𑀦𑀺𑀬𑀸, 𑀢𑁆𑀬𑀲𑁆𑀲 𑀅𑀦𑁆𑀢𑁄 𑀯𑀲𑀦𑁆𑀢𑀺 𑀅𑀦𑁆𑀯𑀸𑀲𑁆𑀲𑀯𑀦𑁆𑀢𑀺 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸𑀢𑀺. 𑀢𑀲𑁆𑀫𑀸 𑀲𑀸𑀦𑁆𑀢𑁂𑀯𑀸𑀲𑀺𑀓𑁄𑀢𑀺 𑀯𑀼𑀘𑁆𑀘𑀢𑀺. 𑀢𑁂 𑀦𑀁 𑀲𑀫𑀼𑀤𑀸𑀘𑀭𑀦𑁆𑀢𑀺, 𑀲𑀫𑀼𑀤𑀸𑀘𑀭𑀦𑁆𑀢𑀺 𑀦𑀁 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸𑀢𑀺. 𑀢𑀲𑁆𑀫𑀸 𑀲𑀸𑀘𑀭𑀺𑀬𑀓𑁄𑀢𑀺 𑀯𑀼𑀘𑁆𑀘𑀢𑀺.
‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀲𑁄𑀢𑁂𑀦 𑀲𑀤𑁆𑀤𑀁 𑀲𑀼𑀢𑁆𑀯𑀸…𑀧𑁂… 𑀖𑀸𑀦𑁂𑀦 𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸… 𑀚𑀺𑀯𑁆𑀳𑀸𑀬 𑀭𑀲𑀁 𑀲𑀸𑀬𑀺𑀢𑁆𑀯𑀸… 𑀓𑀸𑀬𑁂𑀦 𑀨𑁄𑀝𑁆𑀞𑀩𑁆𑀩𑀁 𑀨𑀼𑀲𑀺𑀢𑁆𑀯𑀸… 𑀫𑀦𑀲𑀸 𑀥𑀫𑁆𑀫𑀁 𑀯𑀺𑀜𑁆𑀜𑀸𑀬 𑀉𑀧𑁆𑀧𑀚𑁆𑀚𑀦𑁆𑀢𑀺 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀭𑀲𑀗𑁆𑀓𑀧𑁆𑀧𑀸 𑀲𑀜𑁆𑀜𑁄𑀚𑀦𑀺𑀬𑀸, 𑀢𑁆𑀬𑀲𑁆𑀲 𑀅𑀦𑁆𑀢𑁄 𑀯𑀲𑀦𑁆𑀢𑀺 𑀅𑀦𑁆𑀯𑀸𑀲𑁆𑀲𑀯𑀦𑁆𑀢𑀺 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸𑀢𑀺. 𑀢𑀲𑁆𑀫𑀸 𑀲𑀸𑀦𑁆𑀢𑁂𑀯𑀸𑀲𑀺𑀓𑁄𑀢𑀺 𑀯𑀼𑀘𑁆𑀘𑀢𑀺. 𑀢𑁂 𑀦𑀁 𑀲𑀫𑀼𑀤𑀸𑀘𑀭𑀦𑁆𑀢𑀺, 𑀲𑀫𑀼𑀤𑀸𑀘𑀭𑀦𑁆𑀢𑀺 𑀦𑀁 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸𑀢𑀺. 𑀢𑀲𑁆𑀫𑀸 𑀲𑀸𑀘𑀭𑀺𑀬𑀓𑁄𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀸𑀦𑁆𑀢𑁂𑀯𑀸𑀲𑀺𑀓𑁄 𑀲𑀸𑀘𑀭𑀺𑀬𑀓𑁄 𑀤𑀼𑀓𑁆𑀔𑀁 𑀦 𑀨𑀸𑀲𑀼 𑀯𑀺𑀳𑀭𑀢𑀻’’𑀢𑀺. 𑀏𑀯𑀫𑁆𑀧𑀺 𑀢𑀢𑁆𑀭𑀸𑀲𑀬𑀸𑀢𑀺 𑁋 𑀧𑀭𑀺𑀲𑁆𑀲𑀬𑀸.
𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋
‘‘𑀢𑀬𑁄𑀫𑁂, 𑀪𑀺𑀓𑁆𑀔𑀯𑁂, 𑀅𑀦𑁆𑀢𑀭𑀸𑀫𑀮𑀸 𑀅𑀦𑁆𑀢𑀭𑀸𑀅𑀫𑀺𑀢𑁆𑀢𑀸 𑀅𑀦𑁆𑀢𑀭𑀸𑀲𑀧𑀢𑁆𑀢𑀸 𑀅𑀦𑁆𑀢𑀭𑀸𑀯𑀥𑀓𑀸 𑀅𑀦𑁆𑀢𑀭𑀸𑀧𑀘𑁆𑀘𑀢𑁆𑀣𑀺𑀓𑀸. 𑀓𑀢𑀫𑁂 𑀢𑀬𑁄? 𑀮𑁄𑀪𑁄, 𑀪𑀺𑀓𑁆𑀔𑀯𑁂, 𑀅𑀦𑁆𑀢𑀭𑀸𑀫𑀮𑁄 𑀅𑀦𑁆𑀢𑀭𑀸𑀅𑀫𑀺𑀢𑁆𑀢𑁄 𑀅𑀦𑁆𑀢𑀭𑀸𑀲𑀧𑀢𑁆𑀢𑁄 𑀅𑀦𑁆𑀢𑀭𑀸𑀯𑀥𑀓𑁄 𑀅𑀦𑁆𑀢𑀭𑀸𑀧𑀘𑁆𑀘𑀢𑁆𑀣𑀺𑀓𑁄, 𑀤𑁄𑀲𑁄, 𑀪𑀺𑀓𑁆𑀔𑀯𑁂…𑀧𑁂… 𑀫𑁄𑀳𑁄, 𑀪𑀺𑀓𑁆𑀔𑀯𑁂, 𑀅𑀦𑁆𑀢𑀭𑀸𑀫𑀮𑁄 𑀅𑀦𑁆𑀢𑀭𑀸𑀅𑀫𑀺𑀢𑁆𑀢𑁄 𑀅𑀦𑁆𑀢𑀭𑀸𑀲𑀧𑀢𑁆𑀢𑁄 𑀅𑀦𑁆𑀢𑀭𑀸𑀯𑀥𑀓𑁄 𑀅𑀦𑁆𑀢𑀭𑀸𑀧𑀘𑁆𑀘𑀢𑁆𑀣𑀺𑀓𑁄. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀢𑀬𑁄 𑀅𑀦𑁆𑀢𑀭𑀸𑀫𑀮𑀸 𑀅𑀦𑁆𑀢𑀭𑀸𑀅𑀫𑀺𑀢𑁆𑀢𑀸 𑀅𑀦𑁆𑀢𑀭𑀸𑀲𑀧𑀢𑁆𑀢𑀸 𑀅𑀦𑁆𑀢𑀭𑀸𑀯𑀥𑀓𑀸 𑀅𑀦𑁆𑀢𑀭𑀸𑀧𑀘𑁆𑀘𑀢𑁆𑀣𑀺𑀓𑀸’’.
‘‘𑀅𑀦𑀢𑁆𑀣𑀚𑀦𑀦𑁄 𑀮𑁄𑀪𑁄, 𑀮𑁄𑀪𑁄 𑀘𑀺𑀢𑁆𑀢𑀧𑁆𑀧𑀓𑁄𑀧𑀦𑁄;
𑀪𑀬𑀫𑀦𑁆𑀢𑀭𑀢𑁄 𑀚𑀸𑀢𑀁, 𑀢𑀁 𑀚𑀦𑁄 𑀦𑀸𑀯𑀩𑀼𑀚𑁆𑀛𑀢𑀺.
‘‘𑀮𑀼𑀤𑁆𑀥𑁄 𑀅𑀢𑁆𑀣𑀁 𑀦 𑀚𑀸𑀦𑀸𑀢𑀺, 𑀮𑀼𑀤𑁆𑀥𑁄 𑀥𑀫𑁆𑀫𑀁 𑀦 𑀧𑀲𑁆𑀲𑀢𑀺;
𑀅𑀦𑁆𑀥𑀦𑁆𑀢𑀫𑀁 [𑀅𑀦𑁆𑀥𑀢𑀫𑀁 (𑀲𑁆𑀬𑀸. 𑀓.) 𑀫𑀳𑀸𑀦𑀺. 𑁧𑁫𑁬; 𑀇𑀢𑀺𑀯𑀼. 𑁮𑁮] 𑀢𑀤𑀸 𑀳𑁄𑀢𑀺, 𑀬𑀁 𑀮𑁄𑀪𑁄 𑀲𑀳𑀢𑁂 𑀦𑀭𑀁.
‘‘𑀅𑀦𑀢𑁆𑀣𑀚𑀦𑀦𑁄 𑀤𑁄𑀲𑁄, 𑀤𑁄𑀲𑁄 𑀘𑀺𑀢𑁆𑀢𑀧𑁆𑀧𑀓𑁄𑀧𑀦𑁄;
𑀪𑀬𑀫𑀦𑁆𑀢𑀭𑀢𑁄 𑀚𑀸𑀢𑀁, 𑀢𑀁 𑀚𑀦𑁄 𑀦𑀸𑀯𑀩𑀼𑀚𑁆𑀛𑀢𑀺.
‘‘𑀓𑀼𑀤𑁆𑀥𑁄 𑀅𑀢𑁆𑀣𑀁 𑀦 𑀚𑀸𑀦𑀸𑀢𑀺, 𑀓𑀼𑀤𑁆𑀥𑁄 𑀥𑀫𑁆𑀫𑀁 𑀦 𑀧𑀲𑁆𑀲𑀢𑀺;
𑀅𑀦𑁆𑀥𑀦𑁆𑀢𑀫𑀁 𑀢𑀤𑀸 𑀳𑁄𑀢𑀺, 𑀬𑀁 𑀤𑁄𑀲𑁄 𑀲𑀳𑀢𑁂 𑀦𑀭𑀁.
‘‘𑀅𑀦𑀢𑁆𑀣𑀚𑀦𑀦𑁄 𑀫𑁄𑀳𑁄, 𑀫𑁄𑀳𑁄 𑀘𑀺𑀢𑁆𑀢𑀧𑁆𑀧𑀓𑁄𑀧𑀦𑁄;
𑀪𑀬𑀫𑀦𑁆𑀢𑀭𑀢𑁄 𑀚𑀸𑀢𑀁, 𑀢𑀁 𑀚𑀦𑁄 𑀦𑀸𑀯𑀩𑀼𑀚𑁆𑀛𑀢𑀺.
‘‘𑀫𑀽𑀴𑁆𑀳𑁄 𑀅𑀢𑁆𑀣𑀁 𑀦 𑀚𑀸𑀦𑀸𑀢𑀺, 𑀫𑀽𑀴𑁆𑀳𑁄 𑀥𑀫𑁆𑀫𑀁 𑀦 𑀧𑀲𑁆𑀲𑀢𑀺;
𑀅𑀦𑁆𑀥𑀦𑁆𑀢𑀫𑀁 𑀢𑀤𑀸 𑀳𑁄𑀢𑀺, 𑀬𑀁 𑀫𑁄𑀳𑁄 𑀲𑀳𑀢𑁂 𑀦𑀭’’𑀦𑁆𑀢𑀺.
𑀏𑀯𑀫𑁆𑀧𑀺 𑀢𑀢𑁆𑀭𑀸𑀲𑀬𑀸𑀢𑀺 𑁋 𑀧𑀭𑀺𑀲𑁆𑀲𑀬𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋
‘‘𑀢𑀬𑁄 𑀔𑁄, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑀲𑁆𑀲 𑀥𑀫𑁆𑀫𑀸 𑀅𑀚𑁆𑀛𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀅𑀨𑀸𑀲𑀼𑀯𑀺𑀳𑀸𑀭𑀸𑀬. 𑀓𑀢𑀫𑁂 𑀢𑀬𑁄? 𑀮𑁄𑀪𑁄 𑀔𑁄, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑀲𑁆𑀲 𑀥𑀫𑁆𑀫𑁄 𑀅𑀚𑁆𑀛𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀺 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀅𑀨𑀸𑀲𑀼𑀯𑀺𑀳𑀸𑀭𑀸𑀬; 𑀤𑁄𑀲𑁄 𑀔𑁄, 𑀫𑀳𑀸𑀭𑀸𑀚…𑀧𑁂… 𑀫𑁄𑀳𑁄 𑀔𑁄, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑀲𑁆𑀲 𑀥𑀫𑁆𑀫𑁄 𑀅𑀚𑁆𑀛𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀺 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀅𑀨𑀸𑀲𑀼𑀯𑀺𑀳𑀸𑀭𑀸𑀬. 𑀇𑀫𑁂 𑀔𑁄, 𑀫𑀳𑀸𑀭𑀸𑀚, 𑀢𑀬𑁄 𑀧𑀼𑀭𑀺𑀲𑀲𑁆𑀲 𑀥𑀫𑁆𑀫𑀸 𑀅𑀚𑁆𑀛𑀢𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀅𑀨𑀸𑀲𑀼𑀯𑀺𑀳𑀸𑀭𑀸𑀬𑀸’’𑀢𑀺.
‘‘𑀮𑁄𑀪𑁄 𑀤𑁄𑀲𑁄 𑀘 𑀫𑁄𑀳𑁄 𑀘, 𑀧𑀼𑀭𑀺𑀲𑀁 𑀧𑀸𑀧𑀘𑁂𑀢𑀲𑀁;
𑀳𑀺𑀁𑀲𑀦𑁆𑀢𑀺 𑀅𑀢𑁆𑀢𑀲𑀫𑁆𑀪𑀽𑀢𑀸, 𑀢𑀘𑀲𑀸𑀭𑀁𑀯 𑀲𑀫𑁆𑀨𑀮’’𑀦𑁆𑀢𑀺.
𑀏𑀯𑀫𑁆𑀧𑀺 𑀢𑀢𑁆𑀭𑀸𑀲𑀬𑀸𑀢𑀺 𑁋 𑀧𑀭𑀺𑀲𑁆𑀲𑀬𑀸.
𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋
‘‘𑀭𑀸𑀕𑁄 𑀘 𑀤𑁄𑀲𑁄 𑀘 𑀇𑀢𑁄𑀦𑀺𑀤𑀸𑀦𑀸, 𑀅𑀭𑀢𑀻 𑀭𑀢𑀻 𑀮𑁄𑀫𑀳𑀁𑀲𑁄 𑀇𑀢𑁄𑀚𑀸;
𑀇𑀢𑁄 𑀲𑀫𑀼𑀝𑁆𑀞𑀸𑀬 𑀫𑀦𑁄𑀯𑀺𑀢𑀓𑁆𑀓𑀸, 𑀓𑀼𑀫𑀸𑀭𑀓𑀸 𑀥𑀗𑁆𑀓𑀫𑀺𑀯𑁄𑀲𑁆𑀲𑀚𑀦𑁆𑀢𑀻’’𑀢𑀺.
𑀏𑀯𑀫𑁆𑀧𑀺 𑀢𑀢𑁆𑀭𑀸𑀲𑀬𑀸𑀢𑀺 𑁋 𑀧𑀭𑀺𑀲𑁆𑀲𑀬𑀸. 𑀮𑁄𑀓𑁂𑀢𑀺 𑀫𑀦𑀼𑀲𑁆𑀲𑀮𑁄𑀓𑁂𑀢𑀺 𑁋 𑀓𑀢𑀺 𑀧𑀭𑀺𑀲𑁆𑀲𑀬𑀸 𑀮𑁄𑀓𑁂.
𑀕𑀘𑁆𑀙𑀢𑁄 𑀅𑀕𑀢𑀁 𑀤𑀺𑀲𑀦𑁆𑀢𑀺. 𑀅𑀕𑀢𑀸 𑀤𑀺𑀲𑀸 𑀯𑀼𑀘𑁆𑀘𑀢𑀺 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁. 𑀬𑁄 𑀲𑁄 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀢𑀡𑁆𑀳𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁. 𑀅𑀕𑀢𑀧𑀼𑀩𑁆𑀩𑀸 𑀲𑀸 𑀤𑀺𑀲𑀸 𑀦 𑀲𑀸 𑀤𑀺𑀲𑀸 𑀕𑀢𑀧𑀼𑀩𑁆𑀩𑀸 𑀇𑀫𑀺𑀦𑀸 𑀤𑀻𑀖𑁂𑀦 𑀅𑀤𑁆𑀥𑀼𑀦𑀸.
‘‘𑀲𑀫𑀢𑀺𑀢𑁆𑀢𑀺𑀓𑀁 𑀅𑀦𑀯𑀲𑁂𑀲𑀁, 𑀢𑁂𑀮𑀧𑀢𑁆𑀢𑀁 𑀬𑀣𑀸 𑀧𑀭𑀺𑀳𑀭𑁂𑀬𑁆𑀬;
𑀏𑀯𑀁 𑀲𑀘𑀺𑀢𑁆𑀢𑀫𑀦𑀼𑀭𑀓𑁆𑀔𑁂, 𑀧𑀢𑁆𑀣𑀬𑀸𑀦𑁄 [𑀧𑀢𑁆𑀣𑀬𑀫𑀸𑀦𑁄 (𑀲𑁆𑀬𑀸.)] 𑀤𑀺𑀲𑀁 𑀅𑀕𑀢𑀧𑀼𑀩𑁆𑀩𑀁’’.
𑀅𑀕𑀢𑀧𑀼𑀩𑁆𑀩𑀁 𑀤𑀺𑀲𑀁 𑀯𑀚𑀢𑁄 𑀕𑀘𑁆𑀙𑀢𑁄 𑀅𑀪𑀺𑀓𑁆𑀓𑀫𑀢𑁄𑀢𑀺 𑁋 𑀕𑀘𑁆𑀙𑀢𑁄 𑀅𑀕𑀢𑀁 𑀤𑀺𑀲𑀁.
𑀬𑁂 𑀪𑀺𑀓𑁆𑀔𑀼 𑀅𑀪𑀺𑀲𑀫𑁆𑀪𑀯𑁂𑀢𑀺. 𑀬𑁂𑀢𑀺 𑀬𑁂 𑀧𑀭𑀺𑀲𑁆𑀲𑀬𑁂 𑀅𑀪𑀺𑀲𑀫𑁆𑀪𑀯𑁂𑀬𑁆𑀬 𑀅𑀪𑀺𑀪𑀯𑁂𑀬𑁆𑀬 𑀅𑀚𑁆𑀛𑁄𑀢𑁆𑀣𑀭𑁂𑀬𑁆𑀬 𑀧𑀭𑀺𑀬𑀸𑀤𑀺𑀬𑁂𑀬𑁆𑀬 𑀫𑀤𑁆𑀤𑁂𑀬𑁆𑀬𑀸𑀢𑀺 𑁋 𑀬𑁂 𑀪𑀺𑀓𑁆𑀔𑀼 𑀅𑀪𑀺𑀲𑀫𑁆𑀪𑀯𑁂.
𑀧𑀦𑁆𑀢𑀫𑁆𑀳𑀺 𑀲𑀬𑀦𑀸𑀲𑀦𑁂𑀢𑀺. 𑀅𑀦𑁆𑀢𑁂 𑀧𑀦𑁆𑀢𑁂 𑀧𑀭𑀺𑀬𑀦𑁆𑀢𑁂 𑀲𑁂𑀮𑀦𑁆𑀢𑁂 𑀯𑀸 𑀯𑀦𑀦𑁆𑀢𑁂 𑀯𑀸 𑀦𑀤𑀦𑁆𑀢𑁂 𑀯𑀸 𑀉𑀤𑀓𑀦𑁆𑀢𑁂 𑀯𑀸 𑀬𑀢𑁆𑀣 𑀦 𑀓𑀲𑀻𑀬𑀢𑀺 𑀦 𑀯𑀧𑀻𑀬𑀢𑀺, 𑀚𑀦𑀦𑁆𑀢𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀫𑀦𑀼𑀲𑁆𑀲𑀸𑀦𑀁 𑀅𑀦𑀼𑀧𑀘𑀸𑀭𑁂 𑀲𑁂𑀦𑀸𑀲𑀦𑁂𑀢𑀺 𑁋 𑀧𑀦𑁆𑀢𑀫𑁆𑀳𑀺 𑀲𑀬𑀦𑀸𑀲𑀦𑁂.
𑀢𑁂𑀦𑀸𑀳 𑀣𑁂𑀭𑁄 𑀲𑀸𑀭𑀺𑀧𑀼𑀢𑁆𑀢𑁄 𑁋