𑁭. 𑀓𑀼𑀫𑁆𑀪𑀯𑀕𑁆𑀕𑁄

𑁧. 𑀓𑀼𑀫𑁆𑀪𑀗𑁆𑀕𑀧𑀜𑁆𑀳𑁄

𑁧. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, ‘𑀓𑀼𑀫𑁆𑀪𑀲𑁆𑀲 𑀏𑀓𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩’𑀦𑁆𑀢𑀺 𑀬𑀁 𑀯𑀤𑁂𑀲𑀺, 𑀓𑀢𑀫𑀁 𑀢𑀁 𑀏𑀓𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩’’𑀦𑁆𑀢𑀺? ‘‘𑀬𑀣𑀸, 𑀫𑀳𑀸𑀭𑀸𑀚, 𑀓𑀼𑀫𑁆𑀪𑁄 𑀲𑀫𑁆𑀧𑀼𑀡𑁆𑀡𑁄 𑀦 𑀲𑀡𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀆𑀕𑀫𑁂 𑀅𑀥𑀺𑀕𑀫𑁂 𑀧𑀭𑀺𑀬𑀢𑁆𑀢𑀺𑀬𑀁 𑀲𑀸𑀫𑀜𑁆𑀜𑁂 𑀧𑀸𑀭𑀫𑀺𑀁 𑀧𑀢𑁆𑀯𑀸 𑀦 𑀲𑀡𑀺𑀢𑀩𑁆𑀩𑀁, 𑀦 𑀢𑁂𑀦 𑀫𑀸𑀦𑁄 𑀓𑀭𑀡𑀻𑀬𑁄, 𑀦 𑀤𑀩𑁆𑀩𑁄 [𑀤𑀧𑁆𑀧𑁄 (𑀲𑀻.)] 𑀤𑀲𑁆𑀲𑁂𑀢𑀩𑁆𑀩𑁄, 𑀦𑀺𑀳𑀢𑀫𑀸𑀦𑁂𑀦 𑀦𑀺𑀳𑀢𑀤𑀩𑁆𑀩𑁂𑀦 𑀪𑀯𑀺𑀢𑀩𑁆𑀩𑀁, 𑀉𑀚𑀼𑀓𑁂𑀦 𑀅𑀫𑀼𑀔𑀭𑁂𑀦 𑀅𑀯𑀺𑀓𑀢𑁆𑀣𑀺𑀦𑀸. 𑀇𑀤𑀁, 𑀫𑀳𑀸𑀭𑀸𑀚, 𑀓𑀼𑀫𑁆𑀪𑀲𑁆𑀲 𑀏𑀓𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑀤𑁂𑀯𑀸𑀢𑀺𑀤𑁂𑀯𑁂𑀦 𑀲𑀼𑀢𑁆𑀢𑀦𑀺𑀧𑀸𑀢𑁂 𑁋

‘‘‘𑀬𑀤𑀽𑀦𑀓𑀁 𑀢𑀁 𑀲𑀡𑀢𑀺, 𑀬𑀁 𑀧𑀽𑀭𑀁 𑀲𑀦𑁆𑀢𑀫𑁂𑀯 𑀢𑀁;

𑀅𑀟𑁆𑀠𑀓𑀼𑀫𑁆𑀪𑀽𑀧𑀫𑁄 [𑀭𑀺𑀢𑁆𑀢𑀓𑀼𑀫𑁆𑀪𑀽𑀧𑀫𑁄 (𑀲𑀻.)] 𑀩𑀸𑀮𑁄, 𑀭𑀳𑀤𑁄 𑀧𑀽𑀭𑁄𑀯 𑀧𑀡𑁆𑀟𑀺𑀢𑁄’’’𑀢𑀺.

𑀓𑀼𑀫𑁆𑀪𑀗𑁆𑀕𑀧𑀜𑁆𑀳𑁄 𑀧𑀞𑀫𑁄.

𑁨. 𑀓𑀸𑀴𑀸𑀬𑀲𑀗𑁆𑀕𑀧𑀜𑁆𑀳𑁄

𑁨. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, ‘𑀓𑀸𑀴𑀸𑀬𑀲𑀲𑁆𑀲 [𑀓𑀸𑀴𑀳𑀁𑀲𑀲𑁆𑀲 (𑀓.)] 𑀤𑁆𑀯𑁂 𑀅𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻’𑀢𑀺 𑀬𑀁 𑀯𑀤𑁂𑀲𑀺, 𑀓𑀢𑀫𑀸𑀦𑀺 𑀢𑀸𑀦𑀺 𑀤𑁆𑀯𑁂 𑀅𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻’’𑀢𑀺? ‘‘𑀬𑀣𑀸, 𑀫𑀳𑀸𑀭𑀸𑀚, 𑀓𑀸𑀴𑀸𑀬𑀲𑁄 𑀲𑀼𑀧𑀻𑀢𑁄 [𑀲𑀼𑀣𑀺𑀢𑁄 (𑀓.)] 𑀯𑀫𑀢𑀺 [𑀯𑀳𑀢𑀺 (𑀲𑁆𑀬𑀸. 𑀓.)], 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑁄 𑀬𑁄𑀕𑀸𑀯𑀘𑀭𑀲𑁆𑀲 𑀫𑀸𑀦𑀲𑀁 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁂𑀦 [𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁂 (𑀲𑀻. 𑀲𑁆𑀬𑀸. 𑀓.)] 𑀅𑀧𑀻𑀢𑀁 𑀯𑀫𑀢𑀺. 𑀇𑀤𑀁, 𑀫𑀳𑀸𑀭𑀸𑀚, 𑀓𑀸𑀴𑀸𑀬𑀲𑀲𑁆𑀲 𑀧𑀞𑀫𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀓𑀸𑀴𑀸𑀬𑀲𑁄 𑀲𑀓𑀺𑀁 𑀧𑀻𑀢𑀁 𑀉𑀤𑀓𑀁 𑀦 𑀯𑀫𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀬𑁄 𑀲𑀓𑀺𑀁 𑀉𑀧𑁆𑀧𑀦𑁆𑀦𑁄 𑀧𑀲𑀸𑀤𑁄, 𑀦 𑀧𑀼𑀦 𑀲𑁄 𑀯𑀫𑀺𑀢𑀩𑁆𑀩𑁄 ‘𑀉𑀴𑀸𑀭𑁄 𑀲𑁄 𑀪𑀕𑀯𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀲𑁆𑀯𑀸𑀓𑁆𑀔𑀸𑀢𑁄 𑀥𑀫𑁆𑀫𑁄, 𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀲𑀗𑁆𑀖𑁄’𑀢𑀺. ‘𑀭𑀽𑀧𑀁 𑀅𑀦𑀺𑀘𑁆𑀘𑀁, 𑀯𑁂𑀤𑀦𑀸 𑀅𑀦𑀺𑀘𑁆𑀘𑀸, 𑀲𑀜𑁆𑀜𑀸 𑀅𑀦𑀺𑀘𑁆𑀘𑀸, 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸, 𑀯𑀺𑀜𑁆𑀜𑀸𑀡𑀁 𑀅𑀦𑀺𑀘𑁆𑀘𑀦𑁆𑀢𑀺 𑀬𑀁 𑀲𑀓𑀺𑀁 𑀉𑀧𑁆𑀧𑀦𑁆𑀦𑀁 𑀜𑀸𑀡𑀁, 𑀦 𑀧𑀼𑀦 𑀢𑀁 𑀯𑀫𑀺𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀓𑀸𑀴𑀸𑀬𑀲𑀲𑁆𑀲 𑀤𑀼𑀢𑀺𑀬𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑀤𑁂𑀯𑀸𑀢𑀺𑀤𑁂𑀯𑁂𑀦 𑁋

‘‘‘𑀤𑀲𑁆𑀲𑀦𑀫𑁆𑀳𑀺 𑀧𑀭𑀺𑀲𑁄𑀥𑀺𑀢𑁄 [𑀧𑀭𑀺𑀲𑁄𑀥𑀺𑀓𑁂 (𑀲𑀻. 𑀓.)] 𑀦𑀭𑁄, 𑀅𑀭𑀺𑀬𑀥𑀫𑁆𑀫𑁂 𑀦𑀺𑀬𑀢𑁄 𑀯𑀺𑀲𑁂𑀲𑀕𑀽;

𑀦𑀧𑁆𑀧𑀯𑁂𑀥𑀢𑀺 𑀅𑀦𑁂𑀓𑀪𑀸𑀕𑀲𑁄, 𑀲𑀩𑁆𑀩𑀲𑁄 𑀘 𑀫𑀼𑀔𑀪𑀸𑀯𑀫𑁂𑀯 𑀲𑁄’’’𑀢𑀺.

𑀓𑀸𑀴𑀸𑀬𑀲𑀗𑁆𑀕𑀧𑀜𑁆𑀳𑁄 𑀤𑀼𑀢𑀺𑀬𑁄.

𑁩. 𑀙𑀢𑁆𑀢𑀗𑁆𑀕𑀧𑀜𑁆𑀳𑁄

𑁩. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, ‘𑀙𑀢𑁆𑀢𑀲𑁆𑀲 𑀢𑀻𑀡𑀺 𑀅𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻’𑀢𑀺 𑀬𑀁 𑀯𑀤𑁂𑀲𑀺, 𑀓𑀢𑀫𑀸𑀦𑀺 𑀢𑀸𑀦𑀺 𑀢𑀻𑀡𑀺 𑀅𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻’’𑀢𑀺? ‘‘𑀬𑀣𑀸, 𑀫𑀳𑀸𑀭𑀸𑀚, 𑀙𑀢𑁆𑀢𑀁 𑀉𑀧𑀭𑀺 𑀫𑀼𑀤𑁆𑀥𑀦𑀺 𑀘𑀭𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀓𑀺𑀮𑁂𑀲𑀸𑀦𑀁 𑀉𑀧𑀭𑀺 𑀫𑀼𑀤𑁆𑀥𑀦𑀺 𑀘𑀭𑁂𑀦 𑀪𑀯𑀺𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀙𑀢𑁆𑀢𑀲𑁆𑀲 𑀧𑀞𑀫𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀙𑀢𑁆𑀢𑀁 𑀫𑀼𑀤𑁆𑀥𑀦𑀼𑀧𑀢𑁆𑀣𑀫𑁆𑀪𑀁 𑀳𑁄𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀼𑀧𑀢𑁆𑀣𑀫𑁆𑀪𑁂𑀦 𑀪𑀯𑀺𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀙𑀢𑁆𑀢𑀲𑁆𑀲 𑀤𑀼𑀢𑀺𑀬𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀙𑀢𑁆𑀢𑀁 𑀯𑀸𑀢𑀸𑀢𑀧𑀫𑁂𑀖𑀯𑀼𑀝𑁆𑀞𑀺𑀬𑁄 𑀧𑀝𑀺𑀳𑀦𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀦𑀸𑀦𑀸𑀯𑀺𑀥𑀤𑀺𑀝𑁆𑀞𑀺𑀧𑀼𑀣𑀼𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 [𑀫𑀳𑀸𑀯𑀸𑀢 (𑀓.)] 𑀫𑀢𑀯𑀸𑀢𑀢𑀺𑀯𑀺𑀥𑀕𑁆𑀕𑀺𑀲𑀦𑁆𑀢𑀸𑀧𑀓𑀺𑀮𑁂𑀲𑀯𑀼𑀝𑁆𑀞𑀺𑀬𑁄 𑀧𑀝𑀺𑀳𑀦𑁆𑀢𑀩𑁆𑀩𑀸. 𑀇𑀤𑀁, 𑀫𑀳𑀸𑀭𑀸𑀚, 𑀙𑀢𑁆𑀢𑀲𑁆𑀲 𑀢𑀢𑀺𑀬𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀣𑁂𑀭𑁂𑀦 𑀲𑀸𑀭𑀺𑀧𑀼𑀢𑁆𑀢𑁂𑀦 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑁋

‘‘‘𑀬𑀣𑀸𑀧𑀺 𑀙𑀢𑁆𑀢𑀁 𑀯𑀺𑀧𑀼𑀮𑀁, 𑀅𑀘𑁆𑀙𑀺𑀤𑁆𑀤𑀁 𑀣𑀺𑀭𑀲𑀁𑀳𑀺𑀢𑀁;

𑀯𑀸𑀢𑀸𑀢𑀧𑀁 𑀦𑀺𑀯𑀸𑀭𑁂𑀢𑀺, 𑀫𑀳𑀢𑀻 𑀫𑁂𑀖𑀯𑀼𑀝𑁆𑀞𑀺𑀬𑁄.

‘‘‘𑀢𑀣𑁂𑀯 𑀩𑀼𑀤𑁆𑀥𑀧𑀼𑀢𑁆𑀢𑁄𑀧𑀺, 𑀲𑀻𑀮𑀙𑀢𑁆𑀢𑀥𑀭𑁄 𑀲𑀼𑀘𑀺;

𑀓𑀺𑀮𑁂𑀲𑀯𑀼𑀝𑁆𑀞𑀺𑀁 𑀯𑀸𑀭𑁂𑀢𑀺, 𑀲𑀦𑁆𑀢𑀸𑀧𑀢𑀺𑀯𑀺𑀥𑀕𑁆𑀕𑀬𑁄’’’𑀢𑀺.

𑀙𑀢𑁆𑀢𑀗𑁆𑀕𑀧𑀜𑁆𑀳𑁄 𑀢𑀢𑀺𑀬𑁄.

𑁪. 𑀔𑁂𑀢𑁆𑀢𑀗𑁆𑀕𑀧𑀜𑁆𑀳𑁄

𑁪. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, ‘𑀔𑁂𑀢𑁆𑀢𑀲𑁆𑀲 𑀢𑀻𑀡𑀺 𑀅𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻’𑀢𑀺 𑀬𑀁 𑀯𑀤𑁂𑀲𑀺, 𑀓𑀢𑀫𑀸𑀦𑀺 𑀢𑀸𑀦𑀺 𑀢𑀻𑀡𑀺 𑀅𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻’’𑀢𑀺? ‘‘𑀬𑀣𑀸, 𑀫𑀳𑀸𑀭𑀸𑀚, 𑀔𑁂𑀢𑁆𑀢𑀁 𑀫𑀸𑀢𑀺𑀓𑀸𑀲𑀫𑁆𑀧𑀦𑁆𑀦𑀁 𑀳𑁄𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀲𑀼𑀘𑀭𑀺𑀢𑀯𑀢𑁆𑀢𑀧𑁆𑀧𑀝𑀺𑀯𑀢𑁆𑀢𑀫𑀸𑀢𑀺𑀓𑀸𑀲𑀫𑁆𑀧𑀦𑁆𑀦𑁂𑀦 𑀪𑀯𑀺𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀔𑁂𑀢𑁆𑀢𑀲𑁆𑀲 𑀧𑀞𑀫𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀔𑁂𑀢𑁆𑀢𑀁 𑀫𑀭𑀺𑀬𑀸𑀤𑀸𑀲𑀫𑁆𑀧𑀦𑁆𑀦𑀁 𑀳𑁄𑀢𑀺, 𑀢𑀸𑀬 𑀘 𑀫𑀭𑀺𑀬𑀸𑀤𑀸𑀬 𑀉𑀤𑀓𑀁 𑀭𑀓𑁆𑀔𑀺𑀢𑁆𑀯𑀸 𑀥𑀜𑁆𑀜𑀁 𑀧𑀭𑀺𑀧𑀸𑀘𑁂𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀲𑀻𑀮𑀳𑀺𑀭𑀺𑀫𑀭𑀺𑀬𑀸𑀤𑀸𑀲𑀫𑁆𑀧𑀦𑁆𑀦𑁂𑀦 𑀪𑀯𑀺𑀢𑀩𑁆𑀩𑀁, 𑀢𑀸𑀬 𑀘 𑀲𑀻𑀮𑀳𑀺𑀭𑀺𑀫𑀭𑀺𑀬𑀸𑀤𑀸𑀬 𑀲𑀸𑀫𑀜𑁆𑀜𑀁 𑀭𑀓𑁆𑀔𑀺𑀢𑁆𑀯𑀸 𑀘𑀢𑁆𑀢𑀸𑀭𑀺 𑀲𑀸𑀫𑀜𑁆𑀜𑀨𑀮𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀺. 𑀇𑀤𑀁, 𑀫𑀳𑀸𑀭𑀸𑀚, 𑀔𑁂𑀢𑁆𑀢𑀲𑁆𑀲 𑀤𑀼𑀢𑀺𑀬𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀔𑁂𑀢𑁆𑀢𑀁 𑀉𑀝𑁆𑀞𑀸𑀦𑀲𑀫𑁆𑀧𑀦𑁆𑀦𑀁 𑀳𑁄𑀢𑀺, 𑀓𑀲𑁆𑀲𑀓𑀲𑁆𑀲 𑀳𑀸𑀲𑀚𑀦𑀓𑀁 𑀅𑀧𑁆𑀧𑀫𑁆𑀧𑀺 𑀩𑀻𑀚𑀁 𑀯𑀼𑀢𑁆𑀢𑀁 𑀩𑀳𑀼 𑀳𑁄𑀢𑀺, 𑀩𑀳𑀼 𑀯𑀼𑀢𑁆𑀢𑀁 𑀩𑀳𑀼𑀢𑀭𑀁 𑀳𑁄𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀉𑀝𑁆𑀞𑀸𑀦𑀲𑀫𑁆𑀧𑀦𑁆𑀦𑁂𑀦 𑀯𑀺𑀧𑀼𑀮𑀨𑀮𑀤𑀸𑀬𑀺𑀦𑀸 𑀪𑀯𑀺𑀢𑀩𑁆𑀩𑀁, 𑀤𑀸𑀬𑀓𑀸𑀦𑀁 𑀳𑀸𑀲𑀚𑀦𑀓𑁂𑀦 𑀪𑀯𑀺𑀢𑀩𑁆𑀩𑀁, 𑀬𑀣𑀸 𑀅𑀧𑁆𑀧𑀁 𑀤𑀺𑀦𑁆𑀦𑀁 𑀩𑀳𑀼 𑀳𑁄𑀢𑀺, 𑀩𑀳𑀼 𑀤𑀺𑀦𑁆𑀦𑀁 𑀩𑀳𑀼𑀢𑀭𑀁 𑀳𑁄𑀢𑀺. 𑀇𑀤𑀁, 𑀫𑀳𑀸𑀭𑀸𑀚, 𑀔𑁂𑀢𑁆𑀢𑀲𑁆𑀲 𑀢𑀢𑀺𑀬𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀣𑁂𑀭𑁂𑀦 𑀉𑀧𑀸𑀮𑀺𑀦𑀸 𑀯𑀺𑀦𑀬𑀥𑀭𑁂𑀦 𑁋

‘‘‘𑀔𑁂𑀢𑁆𑀢𑀽𑀧𑀫𑁂𑀦 𑀪𑀯𑀺𑀢𑀩𑁆𑀩𑀁, 𑀉𑀝𑁆𑀞𑀸𑀦𑀯𑀺𑀧𑀼𑀮𑀤𑀸𑀬𑀺𑀦𑀸;

𑀏𑀲 𑀔𑁂𑀢𑁆𑀢𑀯𑀭𑁄 𑀦𑀸𑀫, 𑀬𑁄 𑀤𑀤𑀸𑀢𑀺 𑀯𑀺𑀧𑀼𑀮𑀁 𑀨𑀮’’’𑀦𑁆𑀢𑀺.

𑀔𑁂𑀢𑁆𑀢𑀗𑁆𑀕𑀧𑀜𑁆𑀳𑁄 𑀘𑀢𑀼𑀢𑁆𑀣𑁄.

𑁫. 𑀅𑀕𑀤𑀗𑁆𑀕𑀧𑀜𑁆𑀳𑁄

𑁫. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, ‘𑀅𑀕𑀤𑀲𑁆𑀲 𑀤𑁆𑀯𑁂 𑀅𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻’𑀢𑀺 𑀬𑀁 𑀯𑀤𑁂𑀲𑀺, 𑀓𑀢𑀫𑀸𑀦𑀺 𑀢𑀸𑀦𑀺 𑀤𑁆𑀯𑁂 𑀅𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻’’𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀅𑀕𑀤𑁂 𑀓𑀺𑀫𑀻 𑀦 𑀲𑀡𑁆𑀞𑀳𑀦𑁆𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀫𑀸𑀦𑀲𑁂 𑀓𑀺𑀮𑁂𑀲𑀸 𑀦 𑀲𑀡𑁆𑀞𑀧𑁂𑀢𑀩𑁆𑀩𑀸. 𑀇𑀤𑀁, 𑀫𑀳𑀸𑀭𑀸𑀚, 𑀅𑀕𑀤𑀲𑁆𑀲 𑀧𑀞𑀫𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀅𑀕𑀤𑁄 𑀤𑀝𑁆𑀞𑀨𑀼𑀝𑁆𑀞𑀤𑀺𑀝𑁆𑀞𑀅𑀲𑀺𑀢𑀧𑀻𑀢𑀔𑀸𑀬𑀺𑀢𑀲𑀸𑀬𑀺𑀢𑀁 𑀲𑀩𑁆𑀩𑀁 𑀯𑀺𑀲𑀁 𑀧𑀝𑀺𑀳𑀦𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀭𑀸𑀕𑀤𑁄𑀲𑀫𑁄𑀳𑀫𑀸𑀦𑀤𑀺𑀝𑁆𑀞𑀺𑀯𑀺𑀲𑀁 𑀲𑀩𑁆𑀩𑀁 𑀧𑀝𑀺𑀳𑀦𑀺𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀅𑀕𑀤𑀲𑁆𑀲 𑀤𑀼𑀢𑀺𑀬𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑀤𑁂𑀯𑀸𑀢𑀺𑀤𑁂𑀯𑁂𑀦 𑁋

‘‘‘𑀲𑀗𑁆𑀔𑀸𑀭𑀸𑀦𑀁 𑀲𑀪𑀸𑀯𑀢𑁆𑀣𑀁, 𑀤𑀝𑁆𑀞𑀼𑀓𑀸𑀫𑁂𑀦 𑀬𑁄𑀕𑀺𑀦𑀸;

𑀅𑀕𑀤𑁂𑀦𑁂𑀯 𑀳𑁄𑀢𑀩𑁆𑀩𑀁, 𑀓𑀺𑀮𑁂𑀲𑀯𑀺𑀲𑀦𑀸𑀲𑀦𑁂’’’𑀢𑀺.

𑀅𑀕𑀤𑀗𑁆𑀕𑀧𑀜𑁆𑀳𑁄 𑀧𑀜𑁆𑀘𑀫𑁄.

𑁬. 𑀪𑁄𑀚𑀦𑀗𑁆𑀕𑀧𑀜𑁆𑀳𑁄

𑁬. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, ‘𑀪𑁄𑀚𑀦𑀲𑁆𑀲 𑀢𑀻𑀡𑀺 𑀅𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻’𑀢𑀺 𑀬𑀁 𑀯𑀤𑁂𑀲𑀺, 𑀓𑀢𑀫𑀸𑀦𑀺 𑀢𑀸𑀦𑀺 𑀢𑀻𑀡𑀺 𑀅𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻’’𑀢𑀺? ‘‘𑀬𑀣𑀸, 𑀫𑀳𑀸𑀭𑀸𑀚, 𑀪𑁄𑀚𑀦𑀁 𑀲𑀩𑁆𑀩𑀲𑀢𑁆𑀢𑀸𑀦𑀁 𑀉𑀧𑀢𑁆𑀣𑀫𑁆𑀪𑁄, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀲𑀩𑁆𑀩𑀲𑀢𑁆𑀢𑀸𑀦𑀁 𑀫𑀕𑁆𑀕𑀼𑀧𑀢𑁆𑀣𑀫𑁆𑀪𑁂𑀦 𑀪𑀯𑀺𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀪𑁄𑀚𑀦𑀲𑁆𑀲 𑀧𑀞𑀫𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀪𑁄𑀚𑀦𑀁 𑀲𑀩𑁆𑀩𑀲𑀢𑁆𑀢𑀸𑀦𑀁 𑀩𑀮𑀁 𑀯𑀟𑁆𑀠𑁂𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀧𑀼𑀜𑁆𑀜𑀯𑀟𑁆𑀠𑀺𑀬𑀸 𑀯𑀟𑁆𑀠𑀺𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀪𑁄𑀚𑀦𑀲𑁆𑀲 𑀤𑀼𑀢𑀺𑀬𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀪𑁄𑀚𑀦𑀁 𑀲𑀩𑁆𑀩𑀲𑀢𑁆𑀢𑀸𑀦𑀁 𑀅𑀪𑀺𑀧𑀢𑁆𑀣𑀺𑀢𑀁, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀲𑀩𑁆𑀩𑀮𑁄𑀓𑀸𑀪𑀺𑀧𑀢𑁆𑀣𑀺𑀢𑁂𑀦 𑀪𑀯𑀺𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀪𑁄𑀚𑀦𑀲𑁆𑀲 𑀢𑀢𑀺𑀬𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀣𑁂𑀭𑁂𑀦 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁂𑀦 𑁋

‘‘‘𑀲𑀁𑀬𑀫𑁂𑀦 𑀦𑀺𑀬𑀫𑁂𑀦, 𑀲𑀻𑀮𑁂𑀦 𑀧𑀝𑀺𑀧𑀢𑁆𑀢𑀺𑀬𑀸;

𑀧𑀢𑁆𑀣𑀺𑀢𑁂𑀦 𑀪𑀯𑀺𑀢𑀩𑁆𑀩𑀁, 𑀲𑀩𑁆𑀩𑀮𑁄𑀓𑀲𑁆𑀲 𑀬𑁄𑀕𑀺𑀦𑀸’’’𑀢𑀺.

𑀪𑁄𑀚𑀦𑀗𑁆𑀕𑀧𑀜𑁆𑀳𑁄 𑀙𑀝𑁆𑀞𑁄.

𑁭. 𑀇𑀲𑁆𑀲𑀸𑀲𑀗𑁆𑀕𑀧𑀜𑁆𑀳𑁄

𑁭. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, ‘𑀇𑀲𑁆𑀲𑀸𑀲𑀲𑁆𑀲 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻’𑀢𑀺 𑀬𑀁 𑀯𑀤𑁂𑀲𑀺, 𑀓𑀢𑀫𑀸𑀦𑀺 𑀢𑀸𑀦𑀺 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻’’𑀢𑀺? ‘‘𑀬𑀣𑀸, 𑀫𑀳𑀸𑀭𑀸𑀚, 𑀇𑀲𑁆𑀲𑀸𑀲𑁄 𑀲𑀭𑁂 𑀧𑀸𑀢𑀬𑀦𑁆𑀢𑁄 𑀉𑀪𑁄 𑀧𑀸𑀤𑁂 𑀧𑀣𑀯𑀺𑀬𑀁 𑀤𑀴𑁆𑀳𑀁 𑀧𑀢𑀺𑀝𑁆𑀞𑀸𑀧𑁂𑀢𑀺, 𑀚𑀡𑁆𑀡𑀼𑀅𑀯𑁂𑀓𑀮𑁆𑀮𑀁 𑀓𑀭𑁄𑀢𑀺, 𑀲𑀭𑀓𑀮𑀸𑀧𑀁 𑀓𑀝𑀺𑀲𑀦𑁆𑀥𑀺𑀫𑁆𑀳𑀺 𑀞𑀧𑁂𑀢𑀺, 𑀓𑀸𑀬𑀁 𑀉𑀧𑀢𑁆𑀣𑀤𑁆𑀥𑀁 𑀓𑀭𑁄𑀢𑀺, 𑀤𑁆𑀯𑁂 𑀳𑀢𑁆𑀣𑁂 𑀲𑀦𑁆𑀥𑀺𑀝𑁆𑀞𑀸𑀦𑀁 𑀆𑀭𑁄𑀧𑁂𑀢𑀺, 𑀫𑀼𑀝𑁆𑀞𑀺𑀁 𑀧𑀻𑀴𑀬𑀢𑀺, 𑀅𑀗𑁆𑀕𑀼𑀮𑀺𑀬𑁄 𑀦𑀺𑀭𑀦𑁆𑀢𑀭𑀁 𑀓𑀭𑁄𑀢𑀺, 𑀕𑀻𑀯𑀁 𑀧𑀕𑁆𑀕𑀡𑁆𑀳𑀸𑀢𑀺, 𑀘𑀓𑁆𑀔𑀽𑀦𑀺 𑀫𑀼𑀔𑀜𑁆𑀘 𑀧𑀺𑀤𑀳𑀢𑀺, 𑀦𑀺𑀫𑀺𑀢𑁆𑀢𑀁 𑀉𑀚𑀼𑀁 𑀓𑀭𑁄𑀢𑀺, 𑀳𑀸𑀲𑀫𑀼𑀧𑁆𑀧𑀸𑀤𑁂𑀢𑀺 ‘𑀯𑀺𑀚𑁆𑀛𑀺𑀲𑁆𑀲𑀸𑀫𑀻’𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀲𑀻𑀮𑀧𑀣𑀯𑀺𑀬𑀁 𑀯𑀻𑀭𑀺𑀬𑀧𑀸𑀤𑁂 𑀧𑀢𑀺𑀝𑁆𑀞𑀸𑀧𑁂𑀢𑀩𑁆𑀩𑀁, 𑀔𑀦𑁆𑀢𑀺𑀲𑁄𑀭𑀘𑁆𑀘𑀁 𑀅𑀯𑁂𑀓𑀮𑁆𑀮𑀁 𑀓𑀸𑀢𑀩𑁆𑀩𑀁, 𑀲𑀁𑀯𑀭𑁂 𑀘𑀺𑀢𑁆𑀢𑀁 𑀞𑀧𑁂𑀢𑀩𑁆𑀩𑀁, 𑀲𑀁𑀬𑀫𑀦𑀺𑀬𑀫𑁂 𑀅𑀢𑁆𑀢𑀸 𑀉𑀧𑀦𑁂𑀢𑀩𑁆𑀩𑁄, 𑀇𑀘𑁆𑀙𑀸 𑀫𑀼𑀘𑁆𑀙𑀸 𑀧𑀻𑀴𑀬𑀺𑀢𑀩𑁆𑀩𑀸, 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁂 𑀘𑀺𑀢𑁆𑀢𑀁 𑀦𑀺𑀭𑀦𑁆𑀢𑀭𑀁 𑀓𑀸𑀢𑀩𑁆𑀩𑀁, 𑀯𑀻𑀭𑀺𑀬𑀁 𑀧𑀕𑁆𑀕𑀳𑁂𑀢𑀩𑁆𑀩𑀁, 𑀙 𑀤𑁆𑀯𑀸𑀭𑀸 𑀧𑀺𑀤𑀳𑀺𑀢𑀩𑁆𑀩𑀸, 𑀲𑀢𑀺 𑀉𑀧𑀝𑁆𑀞𑀧𑁂𑀢𑀩𑁆𑀩𑀸, 𑀳𑀸𑀲𑀫𑀼𑀧𑁆𑀧𑀸𑀤𑁂𑀢𑀩𑁆𑀩𑀁 ‘𑀲𑀩𑁆𑀩𑀓𑀺𑀮𑁂𑀲𑁂 𑀜𑀸𑀡𑀦𑀸𑀭𑀸𑀘𑁂𑀦 𑀯𑀺𑀚𑁆𑀛𑀺𑀲𑁆𑀲𑀸𑀫𑀻’𑀢𑀺. 𑀇𑀤𑀁, 𑀫𑀳𑀸𑀭𑀸𑀚, 𑀇𑀲𑁆𑀲𑀸𑀲𑀲𑁆𑀲 𑀧𑀞𑀫𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀇𑀲𑁆𑀲𑀸𑀲𑁄 𑀆𑀴𑀓𑀁 𑀧𑀭𑀺𑀳𑀭𑀢𑀺 𑀯𑀗𑁆𑀓𑀚𑀺𑀫𑁆𑀳𑀓𑀼𑀝𑀺𑀮𑀦𑀸𑀭𑀸𑀘𑀲𑁆𑀲 𑀉𑀚𑀼𑀓𑀭𑀡𑀸𑀬. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀇𑀫𑀲𑁆𑀫𑀺𑀁 𑀓𑀸𑀬𑁂 𑀲𑀢𑀺𑀧𑀝𑁆𑀞𑀸𑀦𑀆𑀴𑀓𑀁 𑀧𑀭𑀺𑀳𑀭𑀺𑀢𑀩𑁆𑀩𑀁 𑀯𑀗𑁆𑀓𑀚𑀺𑀫𑁆𑀳𑀓𑀼𑀝𑀺𑀮𑀘𑀺𑀢𑁆𑀢𑀲𑁆𑀲 𑀉𑀚𑀼𑀓𑀭𑀡𑀸𑀬. 𑀇𑀤𑀁, 𑀫𑀳𑀸𑀭𑀸𑀚, 𑀇𑀲𑁆𑀲𑀸𑀲𑀲𑁆𑀲 𑀤𑀼𑀢𑀺𑀬𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀇𑀲𑁆𑀲𑀸𑀲𑁄 𑀮𑀓𑁆𑀔𑁂 𑀉𑀧𑀸𑀲𑁂𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀇𑀫𑀲𑁆𑀫𑀺𑀁 𑀓𑀸𑀬𑁂 𑀉𑀧𑀸𑀲𑀺𑀢𑀩𑁆𑀩𑀁. 𑀓𑀣𑀁 𑀫𑀳𑀸𑀭𑀸𑀚 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀇𑀫𑀲𑁆𑀫𑀺𑀁 𑀓𑀸𑀬𑁂 𑀉𑀧𑀸𑀲𑀺𑀢𑀩𑁆𑀩𑀁? 𑀅𑀦𑀺𑀘𑁆𑀘𑀢𑁄 𑀉𑀧𑀸𑀲𑀺𑀢𑀩𑁆𑀩𑀁, 𑀤𑀼𑀓𑁆𑀔𑀢𑁄 𑀉𑀧𑀸𑀲𑀺𑀢𑀩𑁆𑀩𑀁, 𑀅𑀦𑀢𑁆𑀢𑀢𑁄 𑀉𑀧𑀸𑀲𑀺𑀢𑀩𑁆𑀩𑀁, 𑀭𑁄𑀕𑀢𑁄…𑀧𑁂… 𑀕𑀡𑁆𑀟𑀢𑁄…𑀧𑁂… 𑀲𑀮𑁆𑀮𑀢𑁄…𑀧𑁂… 𑀅𑀖𑀢𑁄…𑀧𑁂… 𑀆𑀩𑀸𑀥𑀢𑁄…𑀧𑁂… 𑀧𑀭𑀢𑁄…𑀧𑁂… 𑀧𑀮𑁄𑀓𑀢𑁄…𑀧𑁂… 𑀈𑀢𑀺𑀢𑁄…𑀧𑁂… 𑀉𑀧𑀤𑁆𑀤𑀯𑀢𑁄…𑀧𑁂… 𑀪𑀬𑀢𑁄…𑀧𑁂… 𑀉𑀧𑀲𑀕𑁆𑀕𑀢𑁄…𑀧𑁂… 𑀘𑀮𑀢𑁄…𑀧𑁂… 𑀧𑀪𑀗𑁆𑀕𑀼𑀢𑁄…𑀧𑁂… 𑀅𑀤𑁆𑀥𑀼𑀯𑀢𑁄…𑀧𑁂… 𑀅𑀢𑀸𑀡𑀢𑁄…𑀧𑁂… 𑀅𑀮𑁂𑀡𑀢𑁄…𑀧𑁂… 𑀅𑀲𑀭𑀡𑀢𑁄…𑀧𑁂… 𑀭𑀺𑀢𑁆𑀢𑀢𑁄…𑀧𑁂… 𑀢𑀼𑀘𑁆𑀙𑀢𑁄…𑀧𑁂… 𑀲𑀼𑀜𑁆𑀜𑀢𑁄…𑀧𑁂… 𑀆𑀤𑀻𑀦𑀯𑀢𑁄…𑀧𑁂… 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀢𑁄…𑀧𑁂… 𑀅𑀲𑀸𑀭𑀢𑁄 …𑀧𑁂… 𑀅𑀖𑀫𑀽𑀮𑀢𑁄…𑀧𑁂… 𑀯𑀥𑀓𑀢𑁄…𑀧𑁂… 𑀯𑀺𑀪𑀯𑀢𑁄…𑀧𑁂… 𑀲𑀸𑀲𑀯𑀢𑁄…𑀧𑁂… 𑀲𑀗𑁆𑀔𑀢𑀢𑁄…𑀧𑁂… 𑀫𑀸𑀭𑀸𑀫𑀺𑀲𑀢𑁄…𑀧𑁂… 𑀚𑀸𑀢𑀺𑀥𑀫𑁆𑀫𑀢𑁄…𑀧𑁂… 𑀚𑀭𑀸𑀥𑀫𑁆𑀫𑀢𑁄…𑀧𑁂… 𑀩𑁆𑀬𑀸𑀥𑀺𑀥𑀫𑁆𑀫𑀢𑁄…𑀧𑁂… 𑀫𑀭𑀡𑀥𑀫𑁆𑀫𑀢𑁄…𑀧𑁂… 𑀲𑁄𑀓𑀥𑀫𑁆𑀫𑀢𑁄…𑀧𑁂… 𑀧𑀭𑀺𑀤𑁂𑀯𑀥𑀫𑁆𑀫𑀢𑁄…𑀧𑁂… 𑀉𑀧𑀸𑀬𑀸𑀲𑀥𑀫𑁆𑀫𑀢𑁄…𑀧𑁂… 𑀲𑀁𑀓𑀺𑀮𑁂𑀲𑀥𑀫𑁆𑀫𑀢𑁄…𑀧𑁂… 𑀏𑀯𑀁 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀇𑀫𑀲𑁆𑀫𑀺𑀁 𑀓𑀸𑀬𑁂 𑀉𑀧𑀸𑀲𑀺𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀇𑀲𑁆𑀲𑀸𑀲𑀲𑁆𑀲 𑀢𑀢𑀺𑀬𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀇𑀲𑁆𑀲𑀸𑀲𑁄 𑀲𑀸𑀬𑀁 𑀧𑀸𑀢𑀁 𑀉𑀧𑀸𑀲𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀲𑀸𑀬𑀁 𑀧𑀸𑀢𑀁 𑀆𑀭𑀫𑁆𑀫𑀡𑁂 𑀉𑀧𑀸𑀲𑀺𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀇𑀲𑁆𑀲𑀸𑀲𑀲𑁆𑀲 𑀘𑀢𑀼𑀢𑁆𑀣𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀣𑁂𑀭𑁂𑀦 𑀲𑀸𑀭𑀺𑀧𑀼𑀢𑁆𑀢𑁂𑀦 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑁋

‘‘‘𑀬𑀣𑀸 𑀇𑀲𑁆𑀲𑀸𑀲𑀓𑁄 𑀦𑀸𑀫, 𑀲𑀸𑀬𑀁 𑀧𑀸𑀢𑀁 𑀉𑀧𑀸𑀲𑀢𑀺;

𑀉𑀧𑀸𑀲𑀦𑀁 𑀅𑀭𑀺𑀜𑁆𑀘𑀦𑁆𑀢𑁄 [𑀦 𑀭𑀺𑀘𑁆𑀙𑀦𑁆𑀢𑁄 (𑀲𑀻. 𑀓.)], 𑀮𑀪𑀢𑁂 𑀪𑀢𑁆𑀢𑀯𑁂𑀢𑀦𑀁.

‘‘‘𑀢𑀣𑁂𑀯 𑀩𑀼𑀤𑁆𑀥𑀧𑀼𑀢𑁆𑀢𑁄𑀧𑀺, 𑀓𑀭𑁄𑀢𑀺 𑀓𑀸𑀬𑀼𑀧𑀸𑀲𑀦𑀁;

𑀓𑀸𑀬𑀼𑀧𑀸𑀲𑀦𑀁 𑀅𑀭𑀺𑀜𑁆𑀘𑀦𑁆𑀢𑁄, 𑀅𑀭𑀳𑀢𑁆𑀢𑀫𑀥𑀺𑀕𑀘𑁆𑀙𑀢𑀻’’’𑀢𑀺.

𑀇𑀲𑁆𑀲𑀸𑀲𑀗𑁆𑀕𑀧𑀜𑁆𑀳𑁄 𑀲𑀢𑁆𑀢𑀫𑁄.

𑀓𑀼𑀫𑁆𑀪𑀯𑀕𑁆𑀕𑁄 𑀲𑀢𑁆𑀢𑀫𑁄 [𑀇𑀢𑁄 𑀧𑀭𑀁 𑀭𑀸𑀚𑀗𑁆𑀕𑀧𑀜𑁆𑀳𑀸𑀤𑀺𑀓𑀸 𑀅𑀝𑁆𑀞𑀢𑀺𑀁𑀲 𑀧𑀜𑁆𑀳𑀸 𑀯𑀺𑀦𑀝𑁆𑀞𑀸, 𑀬𑁂𑀳𑀺 𑀢𑀸 𑀤𑀺𑀝𑁆𑀞𑀸,§𑀢𑁂𑀳𑀺 𑀦𑁄 𑀆𑀭𑁄𑀘𑁂𑀢𑀩𑁆𑀩𑀸 𑀧𑀼𑀦 𑀫𑀼𑀤𑁆𑀤𑀸𑀧𑀦𑀓𑀸𑀮𑁂 𑀧𑀓𑁆𑀔𑀺𑀧𑀦𑀢𑁆𑀣𑀸𑀬𑀸𑀢𑀺 (𑀦, 𑀩𑀼, 𑀲)].

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀓𑀼𑀫𑁆𑀪𑁄 𑀘 𑀓𑀸𑀴𑀸𑀬𑀲𑁄 𑀘, 𑀙𑀢𑁆𑀢𑀁 𑀔𑁂𑀢𑁆𑀢𑀜𑁆𑀘 𑀅𑀕𑀤𑁄;

𑀪𑁄𑀚𑀦𑁂𑀦 𑀘 𑀇𑀲𑁆𑀲𑀸𑀲𑁄, 𑀯𑀼𑀢𑁆𑀢𑀁 𑀤𑀸𑀦𑀺 𑀯𑀺𑀤𑀽𑀳𑀻𑀢𑀺.

𑀑𑀧𑀫𑁆𑀫𑀓𑀣𑀸𑀧𑀜𑁆𑀳𑁄 𑀦𑀺𑀝𑁆𑀞𑀺𑀢𑁄.