𑁯. 𑀩𑀸𑀴𑀺𑀲𑀺𑀓𑀗𑁆𑀕𑀧𑀜𑁆𑀳𑁄

𑁯. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, ‘𑀩𑀸𑀴𑀺𑀲𑀺𑀓𑀲𑁆𑀲 𑀤𑁆𑀯𑁂 𑀅𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻’𑀢𑀺 𑀬𑀁 𑀯𑀤𑁂𑀲𑀺, 𑀓𑀢𑀫𑀸𑀦𑀺 𑀢𑀸𑀦𑀺 𑀤𑁆𑀯𑁂 𑀅𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻’’𑀢𑀺? ‘‘𑀬𑀣𑀸, 𑀫𑀳𑀸𑀭𑀸𑀚, 𑀩𑀸𑀴𑀺𑀲𑀺𑀓𑁄 𑀩𑀴𑀺𑀲𑁂𑀦 𑀫𑀘𑁆𑀙𑁂 𑀉𑀤𑁆𑀥𑀭𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀜𑀸𑀡𑁂𑀦 𑀉𑀢𑁆𑀢𑀭𑀺𑀁 𑀲𑀸𑀫𑀜𑁆𑀜𑀨𑀮𑀸𑀦𑀺 𑀉𑀤𑁆𑀥𑀭𑀺𑀢𑀩𑁆𑀩𑀸𑀦𑀺. 𑀇𑀤𑀁, 𑀫𑀳𑀸𑀭𑀸𑀚, 𑀩𑀸𑀴𑀺𑀲𑀺𑀓𑀲𑁆𑀲 𑀧𑀞𑀫𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀩𑀸𑀴𑀺𑀲𑀺𑀓𑁄 𑀧𑀭𑀺𑀢𑁆𑀢𑀓𑀁 𑀯𑀥𑀺𑀢𑁆𑀯𑀸 𑀯𑀺𑀧𑀼𑀮𑀁 𑀮𑀸𑀪𑀫𑀥𑀺𑀕𑀘𑁆𑀙𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀧𑀭𑀺𑀢𑁆𑀢𑀮𑁄𑀓𑀸𑀫𑀺𑀲𑀫𑀢𑁆𑀢𑀁 𑀧𑀭𑀺𑀘𑁆𑀘𑀚𑀺𑀢𑀩𑁆𑀩𑀁. 𑀮𑁄𑀓𑀸𑀫𑀺𑀲𑀫𑀢𑁆𑀢𑀁, 𑀫𑀳𑀸𑀭𑀸𑀚, 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀬𑁄𑀕𑀻 𑀬𑁄𑀕𑀸𑀯𑀘𑀭𑁄 𑀯𑀺𑀧𑀼𑀮𑀁 𑀲𑀸𑀫𑀜𑁆𑀜𑀨𑀮𑀁 𑀅𑀥𑀺𑀕𑀘𑁆𑀙𑀢𑀺. 𑀇𑀤𑀁, 𑀫𑀳𑀸𑀭𑀸𑀚, 𑀩𑀸𑀴𑀺𑀲𑀺𑀓𑀲𑁆𑀲 𑀤𑀼𑀢𑀺𑀬𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀣𑁂𑀭𑁂𑀦 𑀭𑀸𑀳𑀼𑀮𑁂𑀦 𑁋

‘‘‘𑀲𑀼𑀜𑁆𑀜𑀢𑀜𑁆𑀘𑀸𑀦𑀺𑀫𑀺𑀢𑁆𑀢𑀜𑁆𑀘, 𑀯𑀺𑀫𑁄𑀓𑁆𑀔𑀜𑁆𑀘𑀸𑀧𑁆𑀧𑀡𑀺𑀳𑀺𑀢𑀁;

𑀘𑀢𑀼𑀭𑁄 𑀨𑀮𑁂 𑀙𑀴𑀪𑀺𑀜𑁆𑀜𑀸, 𑀘𑀚𑀺𑀢𑁆𑀯𑀸 𑀮𑁄𑀓𑀸𑀫𑀺𑀲𑀁 𑀮𑀪𑁂’’’𑀢𑀺.

𑀩𑀸𑀴𑀺𑀲𑀺𑀓𑀗𑁆𑀕𑀧𑀜𑁆𑀳𑁄 𑀦𑀯𑀫𑁄.