𑁬. 𑀫𑀓𑁆𑀓𑀝𑀓𑀯𑀕𑁆𑀕𑁄

𑁧. 𑀧𑀦𑁆𑀣𑀫𑀓𑁆𑀓𑀝𑀓𑀗𑁆𑀕𑀧𑀜𑁆𑀳𑁄

𑁧. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, ‘𑀧𑀦𑁆𑀣𑀫𑀓𑁆𑀓𑀝𑀓𑀲𑁆𑀲 𑀏𑀓𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩’𑀦𑁆𑀢𑀺 𑀬𑀁 𑀯𑀤𑁂𑀲𑀺, 𑀓𑀢𑀫𑀁 𑀢𑀁 𑀏𑀓𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩’’𑀦𑁆𑀢𑀺? ‘‘𑀬𑀣𑀸, 𑀫𑀳𑀸𑀭𑀸𑀚, 𑀧𑀦𑁆𑀣𑀫𑀓𑁆𑀓𑀝𑀓𑁄 𑀧𑀦𑁆𑀣𑁂 𑀫𑀓𑁆𑀓𑀝𑀚𑀸𑀮𑀯𑀺𑀢𑀸𑀦𑀁 𑀓𑀢𑁆𑀯𑀸 𑀬𑀤𑀺 𑀢𑀢𑁆𑀣 𑀚𑀸𑀮𑀓𑁂 𑀮𑀕𑁆𑀕𑀢𑀺 𑀓𑀺𑀫𑀺 𑀯𑀸 𑀫𑀓𑁆𑀔𑀺𑀓𑀸 𑀯𑀸 𑀧𑀝𑀗𑁆𑀕𑁄 𑀯𑀸, 𑀢𑀁 𑀕𑀳𑁂𑀢𑁆𑀯𑀸 𑀪𑀓𑁆𑀔𑀬𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀲𑀢𑀺𑀧𑀝𑁆𑀞𑀸𑀦𑀚𑀸𑀮𑀯𑀺𑀢𑀸𑀦𑀁 𑀓𑀢𑁆𑀯𑀸 𑀬𑀤𑀺 𑀢𑀢𑁆𑀣 𑀓𑀺𑀮𑁂𑀲𑀫𑀓𑁆𑀔𑀺𑀓𑀸 𑀩𑀚𑁆𑀛𑀦𑁆𑀢𑀺, 𑀢𑀢𑁆𑀣𑁂𑀯 𑀖𑀸𑀢𑁂𑀢𑀩𑁆𑀩𑀸. 𑀇𑀤𑀁, 𑀫𑀳𑀸𑀭𑀸𑀚, 𑀧𑀦𑁆𑀣𑀫𑀓𑁆𑀓𑀝𑀓𑀲𑁆𑀲 𑀏𑀓𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀣𑁂𑀭𑁂𑀦 𑀅𑀦𑀼𑀭𑀼𑀤𑁆𑀥𑁂𑀦 𑁋

‘‘‘𑀘𑀺𑀢𑁆𑀢𑀁 𑀦𑀺𑀬𑀫𑁂 𑀙𑀲𑀼 𑀤𑁆𑀯𑀸𑀭𑁂𑀲𑀼, 𑀲𑀢𑀺𑀧𑀝𑁆𑀞𑀸𑀦𑀯𑀭𑀼𑀢𑁆𑀢𑀫𑁂;

𑀓𑀺𑀮𑁂𑀲𑀸 𑀢𑀢𑁆𑀣 𑀮𑀕𑁆𑀕𑀸 𑀘𑁂, 𑀳𑀦𑁆𑀢𑀩𑁆𑀩𑀸 𑀢𑁂 𑀯𑀺𑀧𑀲𑁆𑀲𑀺𑀦𑀸’’’𑀢𑀺.

𑀧𑀦𑁆𑀣𑀫𑀓𑁆𑀓𑀝𑀓𑀗𑁆𑀕𑀧𑀜𑁆𑀳𑁄 𑀧𑀞𑀫𑁄.

𑁨. 𑀣𑀦𑀲𑁆𑀲𑀺𑀢𑀤𑀸𑀭𑀓𑀗𑁆𑀕𑀧𑀜𑁆𑀳𑁄

𑁨. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, ‘𑀣𑀦𑀲𑁆𑀲𑀺𑀢𑀤𑀸𑀭𑀓𑀲𑁆𑀲 𑀏𑀓𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩’𑀦𑁆𑀢𑀺 𑀬𑀁 𑀯𑀤𑁂𑀲𑀺, 𑀓𑀢𑀫𑀁 𑀢𑀁 𑀏𑀓𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩’’𑀦𑁆𑀢𑀺? ‘‘𑀬𑀣𑀸, 𑀫𑀳𑀸𑀭𑀸𑀚, 𑀣𑀦𑀲𑁆𑀲𑀺𑀢𑀤𑀸𑀭𑀓𑁄 𑀲𑀤𑀢𑁆𑀣𑁂 𑀮𑀕𑁆𑀕𑀢𑀺, 𑀔𑀻𑀭𑀢𑁆𑀣𑀺𑀓𑁄 𑀭𑁄𑀤𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀲𑀤𑀢𑁆𑀣𑁂 𑀮𑀕𑁆𑀕𑀺𑀢𑀩𑁆𑀩𑀁, 𑀲𑀩𑁆𑀩𑀢𑁆𑀣 𑀥𑀫𑁆𑀫𑀜𑀸𑀡𑁂𑀦 𑀪𑀯𑀺𑀢𑀩𑁆𑀩𑀁, 𑀉𑀤𑁆𑀤𑁂𑀲𑁂 𑀧𑀭𑀺𑀧𑀼𑀘𑁆𑀙𑀸𑀬 𑀲𑀫𑁆𑀫𑀧𑁆𑀧𑀬𑁄𑀕𑁂 𑀧𑀯𑀺𑀯𑁂𑀓𑁂 𑀕𑀭𑀼𑀲𑀁𑀯𑀸𑀲𑁂 𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑁂𑀯𑀦𑁂. 𑀇𑀤𑀁, 𑀫𑀳𑀸𑀭𑀸𑀚, 𑀣𑀦𑀲𑁆𑀲𑀺𑀢𑀤𑀸𑀭𑀓𑀲𑁆𑀲 𑀏𑀓𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑀤𑁂𑀯𑀸𑀢𑀺𑀤𑁂𑀯𑁂𑀦 𑀤𑀻𑀖𑀦𑀺𑀓𑀸𑀬𑀯𑀭𑁂 𑀧𑀭𑀺𑀦𑀺𑀩𑁆𑀩𑀸𑀦𑀲𑀼𑀢𑁆𑀢𑀦𑁆𑀢𑁂 𑁋

‘‘‘𑀇𑀗𑁆𑀖𑀁 𑀢𑀼𑀫𑁆𑀳𑁂, 𑀆𑀦𑀦𑁆𑀤, 𑀲𑀸𑀭𑀢𑁆𑀣𑁂 [𑀲𑀤𑀢𑁆𑀣𑁂 (𑀲𑀻. 𑀧𑀻.)] 𑀖𑀝𑀣, 𑀲𑀸𑀭𑀢𑁆𑀣𑁂 𑀅𑀦𑀼𑀬𑀼𑀜𑁆𑀚𑀣;

𑀲𑀸𑀭𑀢𑁆𑀣𑁂 𑀅𑀧𑁆𑀧𑀫𑀢𑁆𑀢𑀸 𑀆𑀢𑀸𑀧𑀺𑀦𑁄 𑀧𑀳𑀺𑀢𑀢𑁆𑀢𑀸 𑀯𑀺𑀳𑀭𑀣𑀸’’’𑀢𑀺.

𑀣𑀦𑀲𑁆𑀲𑀺𑀢𑀤𑀸𑀭𑀓𑀗𑁆𑀕𑀧𑀜𑁆𑀳𑁄 𑀤𑀼𑀢𑀺𑀬𑁄.

𑁩. 𑀘𑀺𑀢𑁆𑀢𑀓𑀥𑀭𑀓𑀼𑀫𑁆𑀫𑀗𑁆𑀕𑀧𑀜𑁆𑀳𑁄

𑁩. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, ‘𑀘𑀺𑀢𑁆𑀢𑀓𑀥𑀭𑀓𑀼𑀫𑁆𑀫𑀲𑁆𑀲 [𑀘𑀺𑀢𑁆𑀢𑀓𑀣𑀮𑀓𑀼𑀫𑁆𑀫𑀲𑁆𑀲 (𑀲𑀻. 𑀧𑀻.)] 𑀏𑀓𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩’𑀦𑁆𑀢𑀺 𑀬𑀁 𑀯𑀤𑁂𑀲𑀺, 𑀓𑀢𑀫𑀁 𑀢𑀁 𑀏𑀓𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩’’𑀦𑁆𑀢𑀺? ‘‘𑀬𑀣𑀸, 𑀫𑀳𑀸𑀭𑀸𑀚, 𑀘𑀺𑀢𑁆𑀢𑀓𑀥𑀭𑀓𑀼𑀫𑁆𑀫𑁄 𑀉𑀤𑀓𑀪𑀬𑀸 𑀉𑀤𑀓𑀁 𑀧𑀭𑀺𑀯𑀚𑁆𑀚𑁂𑀢𑁆𑀯𑀸 𑀯𑀺𑀘𑀭𑀢𑀺, 𑀢𑀸𑀬 𑀘 𑀧𑀦 𑀉𑀤𑀓𑀁 𑀧𑀭𑀺𑀯𑀚𑁆𑀚𑀦𑀸𑀬 𑀆𑀬𑀼𑀦𑀸 𑀦 𑀧𑀭𑀺𑀳𑀸𑀬𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀧𑀫𑀸𑀤𑁂 𑀪𑀬𑀤𑀲𑁆𑀲𑀸𑀯𑀺𑀦𑀸 𑀪𑀯𑀺𑀢𑀩𑁆𑀩𑀁, 𑀅𑀧𑁆𑀧𑀫𑀸𑀤𑁂 𑀕𑀼𑀡𑀯𑀺𑀲𑁂𑀲𑀤𑀲𑁆𑀲𑀸𑀯𑀺𑀦𑀸. 𑀢𑀸𑀬 𑀘 𑀧𑀦 𑀪𑀬𑀤𑀲𑁆𑀲𑀸𑀯𑀺𑀢𑀸𑀬 𑀦 𑀧𑀭𑀺𑀳𑀸𑀬𑀢𑀺 𑀲𑀸𑀫𑀜𑁆𑀜𑀸, 𑀦𑀺𑀩𑁆𑀩𑀸𑀦𑀲𑁆𑀲 𑀲𑀦𑁆𑀢𑀺𑀓𑁂 𑀉𑀧𑁂𑀢𑀺 [𑀞𑀧𑁂𑀢𑀺 (𑀓.)]. 𑀇𑀤𑀁, 𑀫𑀳𑀸𑀭𑀸𑀚, 𑀘𑀺𑀢𑁆𑀢𑀓𑀥𑀭𑀓𑀼𑀫𑁆𑀫𑀲𑁆𑀲 𑀏𑀓𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑀤𑁂𑀯𑀸𑀢𑀺𑀤𑁂𑀯𑁂𑀦 𑀥𑀫𑁆𑀫𑀧𑀤𑁂 𑁋

‘‘‘𑀅𑀧𑁆𑀧𑀫𑀸𑀤𑀭𑀢𑁄 𑀪𑀺𑀓𑁆𑀔𑀼, 𑀧𑀫𑀸𑀤𑁂 𑀪𑀬𑀤𑀲𑁆𑀲𑀺 𑀯𑀸;

𑀅𑀪𑀩𑁆𑀩𑁄 𑀧𑀭𑀺𑀳𑀸𑀦𑀸𑀬, 𑀦𑀺𑀩𑁆𑀩𑀸𑀦𑀲𑁆𑀲𑁂𑀯 𑀲𑀦𑁆𑀢𑀺𑀓𑁂’’’𑀢𑀺.

𑀘𑀺𑀢𑁆𑀢𑀓𑀥𑀭𑀓𑀼𑀫𑁆𑀫𑀗𑁆𑀕𑀧𑀜𑁆𑀳𑁄 𑀘𑀢𑀼𑀢𑁆𑀣𑁄.

𑁪. 𑀧𑀯𑀦𑀗𑁆𑀕𑀧𑀜𑁆𑀳𑁄

𑁪. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, ‘𑀧𑀯𑀦𑀲𑁆𑀲 𑀧𑀜𑁆𑀘 𑀅𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻’𑀢𑀺 𑀬𑀁 𑀯𑀤𑁂𑀲𑀺, 𑀓𑀢𑀫𑀸𑀦𑀺 𑀢𑀸𑀦𑀺 𑀧𑀜𑁆𑀘 𑀅𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻’’𑀢𑀺? ‘‘𑀬𑀣𑀸, 𑀫𑀳𑀸𑀭𑀸𑀚, 𑀧𑀯𑀦𑀁 𑀦𑀸𑀫 𑀅𑀲𑀼𑀘𑀺𑀚𑀦𑀁 𑀧𑀝𑀺𑀘𑁆𑀙𑀸𑀤𑁂𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀧𑀭𑁂𑀲𑀁 𑀅𑀧𑀭𑀤𑁆𑀥𑀁 𑀔𑀮𑀺𑀢𑀁 𑀧𑀝𑀺𑀘𑁆𑀙𑀸𑀤𑁂𑀢𑀩𑁆𑀩𑀁 𑀦 𑀯𑀺𑀯𑀭𑀺𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀧𑀯𑀦𑀲𑁆𑀲 𑀧𑀞𑀫𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀧𑀯𑀦𑀁 𑀲𑀼𑀜𑁆𑀜𑀁 𑀧𑀘𑀼𑀭𑀚𑀦𑁂𑀳𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀭𑀸𑀕𑀤𑁄𑀲𑀫𑁄𑀳𑀫𑀸𑀦𑀤𑀺𑀝𑁆𑀞𑀺𑀚𑀸𑀮𑁂𑀳𑀺 𑀲𑀩𑁆𑀩𑁂𑀳𑀺 𑀘 𑀓𑀺𑀮𑁂𑀲𑁂𑀳𑀺 𑀲𑀼𑀜𑁆𑀜𑁂𑀦 𑀪𑀯𑀺𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀧𑀯𑀦𑀲𑁆𑀲 𑀤𑀼𑀢𑀺𑀬𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀧𑀯𑀦𑀁 𑀯𑀺𑀯𑀺𑀢𑁆𑀢𑀁 𑀚𑀦𑀲𑀫𑁆𑀩𑀸𑀥𑀭𑀳𑀺𑀢𑀁, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀧𑀸𑀧𑀓𑁂𑀳𑀺 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀅𑀦𑀭𑀺𑀬𑁂𑀳𑀺 𑀧𑀯𑀺𑀯𑀺𑀢𑁆𑀢𑁂𑀦 𑀪𑀯𑀺𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀧𑀯𑀦𑀲𑁆𑀲 𑀢𑀢𑀺𑀬𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀧𑀯𑀦𑀁 𑀲𑀦𑁆𑀢𑀁 𑀧𑀭𑀺𑀲𑀼𑀤𑁆𑀥𑀁, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀲𑀦𑁆𑀢𑁂𑀦 𑀧𑀭𑀺𑀲𑀼𑀤𑁆𑀥𑁂𑀦 𑀪𑀯𑀺𑀢𑀩𑁆𑀩𑀁, 𑀦𑀺𑀩𑁆𑀩𑀼𑀢𑁂𑀦 𑀧𑀳𑀻𑀦𑀫𑀸𑀦𑁂𑀦 𑀧𑀳𑀻𑀦𑀫𑀓𑁆𑀔𑁂𑀦 𑀪𑀯𑀺𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀧𑀯𑀦𑀲𑁆𑀲 𑀘𑀢𑀼𑀢𑁆𑀣𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀧𑀯𑀦𑀁 𑀅𑀭𑀺𑀬𑀚𑀦𑀲𑀁𑀲𑁂𑀯𑀺𑀢𑀁, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀅𑀭𑀺𑀬𑀚𑀦𑀲𑀁𑀲𑁂𑀯𑀺𑀢𑁂𑀦 𑀪𑀯𑀺𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀧𑀯𑀦𑀲𑁆𑀲 𑀧𑀜𑁆𑀘𑀫𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑀤𑁂𑀯𑀸𑀢𑀺𑀤𑁂𑀯𑁂𑀦 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑀯𑀭𑁂 𑁋

‘‘‘𑀧𑀯𑀺𑀯𑀺𑀢𑁆𑀢𑁂𑀳𑀺 𑀅𑀭𑀺𑀬𑁂𑀳𑀺, 𑀧𑀳𑀺𑀢𑀢𑁆𑀢𑁂𑀳𑀺 𑀛𑀸𑀬𑀺𑀪𑀺;

𑀦𑀺𑀘𑁆𑀘𑀁 𑀆𑀭𑀤𑁆𑀥𑀯𑀻𑀭𑀺𑀬𑁂𑀳𑀺, 𑀧𑀡𑁆𑀟𑀺𑀢𑁂𑀳𑀺 𑀲𑀳𑀸𑀯𑀲𑁂’’’𑀢𑀺.

𑀧𑀯𑀦𑀗𑁆𑀕𑀧𑀜𑁆𑀳𑁄 𑀘𑀢𑀼𑀢𑁆𑀣𑁄.

𑁫. 𑀭𑀼𑀓𑁆𑀔𑀗𑁆𑀕𑀧𑀜𑁆𑀳𑁄

𑁫. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, ‘𑀭𑀼𑀓𑁆𑀔𑀲𑁆𑀲 𑀢𑀻𑀡𑀺 𑀅𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻’𑀢𑀺 𑀬𑀁 𑀯𑀤𑁂𑀲𑀺, 𑀓𑀢𑀫𑀸𑀦𑀺 𑀢𑀸𑀦𑀺 𑀢𑀻𑀡𑀺 𑀅𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻’’𑀢𑀺? ‘‘𑀬𑀣𑀸, 𑀫𑀳𑀸𑀭𑀸𑀚, 𑀭𑀼𑀓𑁆𑀔𑁄 𑀦𑀸𑀫 𑀧𑀼𑀧𑁆𑀨𑀨𑀮𑀥𑀭𑁄, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀯𑀺𑀫𑀼𑀢𑁆𑀢𑀺𑀧𑀼𑀧𑁆𑀨𑀲𑀸𑀫𑀜𑁆𑀜𑀨𑀮𑀥𑀸𑀭𑀺𑀦𑀸 𑀪𑀯𑀺𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀭𑀼𑀓𑁆𑀔𑀲𑁆𑀲 𑀧𑀞𑀫𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀭𑀼𑀓𑁆𑀔𑁄 𑀉𑀧𑀕𑀢𑀸𑀦𑀫𑀦𑀼𑀧𑁆𑀧𑀯𑀺𑀝𑁆𑀞𑀸𑀦𑀁 𑀚𑀦𑀸𑀦𑀁 𑀙𑀸𑀬𑀁 𑀤𑁂𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀉𑀧𑀕𑀢𑀸𑀦𑀫𑀦𑀼𑀧𑁆𑀧𑀯𑀺𑀝𑁆𑀞𑀸𑀦𑀁 𑀧𑀼𑀕𑁆𑀕𑀮𑀸𑀦𑀁 𑀆𑀫𑀺𑀲𑀧𑁆𑀧𑀝𑀺𑀲𑀦𑁆𑀥𑀸𑀭𑁂𑀦 𑀯𑀸 𑀥𑀫𑁆𑀫𑀧𑁆𑀧𑀝𑀺𑀲𑀦𑁆𑀣𑀸𑀭𑁂𑀦 𑀯𑀸 𑀧𑀝𑀺𑀲𑀦𑁆𑀣𑀭𑀺𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀭𑀼𑀓𑁆𑀔𑀲𑁆𑀲 𑀤𑀼𑀢𑀺𑀬𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀭𑀼𑀓𑁆𑀔𑁄 𑀙𑀸𑀬𑀸𑀯𑁂𑀫𑀢𑁆𑀢𑀁 𑀦 𑀓𑀭𑁄𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀲𑀩𑁆𑀩𑀲𑀢𑁆𑀢𑁂𑀲𑀼 𑀯𑁂𑀫𑀢𑁆𑀢𑀢𑀸 𑀦 𑀓𑀸𑀢𑀩𑁆𑀩𑀸, 𑀘𑁄𑀭𑀯𑀥𑀓𑀧𑀘𑁆𑀘𑀢𑁆𑀣𑀺𑀓𑁂𑀲𑀼𑀧𑀺 𑀅𑀢𑁆𑀢𑀦𑀺𑀧𑀺 𑀲𑀫𑀲𑀫𑀸 𑀫𑁂𑀢𑁆𑀢𑀸𑀪𑀸𑀯𑀦𑀸 𑀓𑀸𑀢𑀩𑁆𑀩𑀸, ‘𑀓𑀺𑀦𑁆𑀢𑀺 𑀇𑀫𑁂 𑀲𑀢𑁆𑀢𑀸 𑀅𑀯𑁂𑀭𑀸 𑀅𑀩𑁆𑀬𑀸𑀧𑀚𑁆𑀚𑀸 [𑀅𑀩𑁆𑀬𑀸𑀧𑀚𑁆𑀛𑀸 (𑀲𑀻.)] 𑀅𑀦𑀻𑀖𑀸 𑀲𑀼𑀔𑀻 𑀅𑀢𑁆𑀢𑀸𑀦𑀁 𑀧𑀭𑀺𑀳𑀭𑁂𑀬𑁆𑀬𑀼’𑀦𑁆𑀢𑀺. 𑀇𑀤𑀁, 𑀫𑀳𑀸𑀭𑀸𑀚, 𑀭𑀼𑀓𑁆𑀔𑀲𑁆𑀲 𑀢𑀢𑀺𑀬𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀣𑁂𑀭𑁂𑀦 𑀲𑀸𑀭𑀺𑀧𑀼𑀢𑁆𑀢𑁂𑀦 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑁋

‘‘‘𑀯𑀥𑀓𑁂 𑀤𑁂𑀯𑀤𑀢𑁆𑀢𑀫𑁆𑀳𑀺, 𑀘𑁄𑀭𑁂 𑀅𑀗𑁆𑀕𑀼𑀮𑀺𑀫𑀸𑀮𑀓𑁂;

𑀥𑀦𑀧𑀸𑀮𑁂 𑀭𑀸𑀳𑀼𑀮𑁂 𑀘, 𑀲𑀩𑁆𑀩𑀢𑁆𑀣 𑀲𑀫𑀓𑁄 𑀫𑀼𑀦𑀻’’’𑀢𑀺.

𑀭𑀼𑀓𑁆𑀔𑀗𑁆𑀕𑀧𑀜𑁆𑀳𑁄 𑀧𑀜𑁆𑀘𑀫𑁄.

𑁬. 𑀫𑁂𑀖𑀗𑁆𑀕𑀧𑀜𑁆𑀳𑁄

𑁬. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, ‘𑀫𑁂𑀖𑀲𑁆𑀲 𑀧𑀜𑁆𑀘 𑀅𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻’𑀢𑀺 𑀬𑀁 𑀯𑀤𑁂𑀲𑀺, 𑀓𑀢𑀫𑀸𑀦𑀺 𑀢𑀸𑀦𑀺 𑀧𑀜𑁆𑀘 𑀅𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻’’𑀢𑀺? ‘‘𑀬𑀣𑀸, 𑀫𑀳𑀸𑀭𑀸𑀚, 𑀫𑁂𑀖𑁄 𑀉𑀧𑁆𑀧𑀦𑁆𑀦𑀁 𑀭𑀚𑁄𑀚𑀮𑁆𑀮𑀁 𑀯𑀽𑀧𑀲𑀫𑁂𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀉𑀧𑁆𑀧𑀦𑁆𑀦𑀁 𑀓𑀺𑀮𑁂𑀲𑀭𑀚𑁄𑀚𑀮𑁆𑀮𑀁 𑀯𑀽𑀧𑀲𑀫𑁂𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀫𑁂𑀖𑀲𑁆𑀲 𑀧𑀞𑀫𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀫𑁂𑀖𑁄 𑀧𑀣𑀯𑀺𑀬𑀸 𑀉𑀡𑁆𑀳𑀁 𑀦𑀺𑀩𑁆𑀩𑀸𑀧𑁂𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀫𑁂𑀢𑁆𑀢𑀸𑀪𑀸𑀯𑀦𑀸𑀬 𑀲𑀤𑁂𑀯𑀓𑁄 𑀮𑁄𑀓𑁄 𑀦𑀺𑀩𑁆𑀩𑀸𑀧𑁂𑀢𑀩𑁆𑀩𑁄. 𑀇𑀤𑀁, 𑀫𑀳𑀸𑀭𑀸𑀚, 𑀫𑁂𑀖𑀲𑁆𑀲 𑀤𑀼𑀢𑀺𑀬𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀫𑁂𑀖𑁄 𑀲𑀩𑁆𑀩𑀩𑀻𑀚𑀸𑀦𑀺 𑀯𑀺𑀭𑀼𑀳𑀸𑀧𑁂𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀲𑀩𑁆𑀩𑀲𑀢𑁆𑀢𑀸𑀦𑀁 𑀲𑀤𑁆𑀥𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀢𑀁 𑀲𑀤𑁆𑀥𑀸𑀩𑀻𑀚𑀁 𑀢𑀻𑀲𑀼 𑀲𑀫𑁆𑀧𑀢𑁆𑀢𑀻𑀲𑀼 𑀭𑁄𑀧𑁂𑀢𑀩𑁆𑀩𑀁, 𑀤𑀺𑀩𑁆𑀩𑀫𑀸𑀦𑀼𑀲𑀺𑀓𑀸𑀲𑀼 𑀲𑀼𑀔𑀲𑀫𑁆𑀧𑀢𑁆𑀢𑀻𑀲𑀼 𑀬𑀸𑀯𑀧𑀭𑀫𑀢𑁆𑀣𑀦𑀺𑀩𑁆𑀩𑀸𑀦𑀲𑀼𑀔𑀲𑀫𑁆𑀧𑀢𑁆𑀢𑀺. 𑀇𑀤𑀁, 𑀫𑀳𑀸𑀭𑀸𑀚, 𑀫𑁂𑀖𑀲𑁆𑀲 𑀢𑀢𑀺𑀬𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀫𑁂𑀖𑁄 𑀉𑀢𑀼𑀢𑁄 𑀲𑀫𑀼𑀝𑁆𑀞𑀳𑀺𑀢𑁆𑀯𑀸 𑀥𑀭𑀡𑀺𑀢𑀮𑀭𑀼𑀳𑁂 𑀢𑀺𑀡𑀭𑀼𑀓𑁆𑀔𑀮𑀢𑀸𑀕𑀼𑀫𑁆𑀩𑀑𑀲𑀥𑀺𑀯𑀦𑀧𑁆𑀧𑀢𑀬𑁄 𑀧𑀭𑀺𑀭𑀓𑁆𑀔𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀢𑁂𑀦 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁂𑀦 𑀲𑀫𑀡𑀥𑀫𑁆𑀫𑁄 𑀧𑀭𑀺𑀭𑀓𑁆𑀔𑀺𑀢𑀩𑁆𑀩𑁄, 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀫𑀽𑀮𑀓𑀸 𑀲𑀩𑁆𑀩𑁂 𑀓𑀼𑀲𑀮𑀸 𑀥𑀫𑁆𑀫𑀸. 𑀇𑀤𑀁, 𑀫𑀳𑀸𑀭𑀸𑀚, 𑀫𑁂𑀖𑀲𑁆𑀲 𑀘𑀢𑀼𑀢𑁆𑀣𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀫𑁂𑀖𑁄 𑀯𑀲𑁆𑀲𑀫𑀸𑀦𑁄 𑀦𑀤𑀺𑀢𑀴𑀸𑀓𑀧𑁄𑀓𑁆𑀔𑀭𑀡𑀺𑀬𑁄 𑀓𑀦𑁆𑀤𑀭𑀧𑀤𑀭𑀲𑀭𑀲𑁄𑀩𑁆𑀪𑀉𑀤𑀧𑀸𑀦𑀸𑀦𑀺 𑀘 𑀧𑀭𑀺𑀧𑀽𑀭𑁂𑀢𑀺 𑀉𑀤𑀓𑀥𑀸𑀭𑀸𑀳𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀆𑀕𑀫𑀧𑀭𑀺𑀬𑀢𑁆𑀢𑀺𑀬𑀸 𑀥𑀫𑁆𑀫𑀫𑁂𑀖𑀫𑀪𑀺𑀯𑀲𑁆𑀲𑀬𑀺𑀢𑁆𑀯𑀸 𑀅𑀥𑀺𑀕𑀫𑀓𑀸𑀫𑀸𑀦𑀁 𑀫𑀸𑀦𑀲𑀁 𑀧𑀭𑀺𑀧𑀽𑀭𑀬𑀺𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀫𑁂𑀖𑀲𑁆𑀲 𑀧𑀜𑁆𑀘𑀫𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀣𑁂𑀭𑁂𑀦 𑀲𑀸𑀭𑀺𑀧𑀼𑀢𑁆𑀢𑁂𑀦 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑁋

‘‘‘𑀩𑁄𑀥𑀦𑁂𑀬𑁆𑀬𑀁 𑀚𑀦𑀁 𑀤𑀺𑀲𑁆𑀯𑀸, 𑀲𑀢𑀲𑀳𑀲𑁆𑀲𑁂𑀧𑀺 𑀬𑁄𑀚𑀦𑁂;

𑀔𑀡𑁂𑀦 𑀉𑀧𑀕𑀦𑁆𑀢𑁆𑀯𑀸𑀦, 𑀩𑁄𑀥𑁂𑀢𑀺 𑀢𑀁 𑀫𑀳𑀸𑀫𑀼𑀦𑀻’’’𑀢𑀺.

𑀫𑁂𑀖𑀗𑁆𑀕𑀧𑀜𑁆𑀳𑁄 𑀙𑀝𑁆𑀞𑁄.

𑁭. 𑀫𑀡𑀺𑀭𑀢𑀦𑀗𑁆𑀕𑀧𑀜𑁆𑀳𑁄

𑁭. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, ‘𑀫𑀡𑀺𑀭𑀢𑀦𑀲𑁆𑀲 𑀢𑀻𑀡𑀺 𑀅𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻’𑀢𑀺 𑀬𑀁 𑀯𑀤𑁂𑀲𑀺, 𑀓𑀢𑀫𑀸𑀦𑀺 𑀢𑀸𑀦𑀺 𑀢𑀻𑀡𑀺 𑀅𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻’’𑀢𑀺? ‘‘𑀬𑀣𑀸, 𑀫𑀳𑀸𑀭𑀸𑀚, 𑀫𑀡𑀺𑀭𑀢𑀦𑀁 𑀏𑀓𑀦𑁆𑀢𑀧𑀭𑀺𑀲𑀼𑀤𑁆𑀥𑀁, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀏𑀓𑀦𑁆𑀢𑀧𑀭𑀺𑀲𑀼𑀤𑁆𑀥𑀸𑀚𑀻𑀯𑁂𑀦 𑀪𑀯𑀺𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀫𑀡𑀺𑀭𑀢𑀦𑀲𑁆𑀲 𑀧𑀞𑀫𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀫𑀡𑀺𑀭𑀢𑀦𑀁 𑀦 𑀓𑁂𑀦𑀘𑀺 𑀲𑀤𑁆𑀥𑀺𑀁 𑀫𑀺𑀲𑁆𑀲𑀻𑀬𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀧𑀸𑀧𑁂𑀳𑀺 𑀧𑀸𑀧𑀲𑀳𑀸𑀬𑁂𑀳𑀺 𑀲𑀤𑁆𑀥𑀺𑀁 𑀦 𑀫𑀺𑀲𑁆𑀲𑀺𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀫𑀡𑀺𑀭𑀢𑀦𑀲𑁆𑀲 𑀤𑀼𑀢𑀺𑀬𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀫𑀡𑀺𑀭𑀢𑀦𑀁 𑀚𑀸𑀢𑀺𑀭𑀢𑀦𑁂𑀳𑀺 𑀬𑁄𑀚𑀻𑀬𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀉𑀢𑁆𑀢𑀫𑀯𑀭𑀚𑀸𑀢𑀺𑀫𑀦𑁆𑀢𑁂𑀳𑀺 𑀲𑀤𑁆𑀥𑀺𑀁 𑀲𑀁𑀯𑀲𑀺𑀢𑀩𑁆𑀩𑀁, 𑀧𑀝𑀺𑀧𑀦𑁆𑀦𑀓𑀨𑀮𑀝𑁆𑀞𑀲𑁂𑀓𑁆𑀔𑀨𑀮𑀲𑀫𑀗𑁆𑀕𑀻𑀳𑀺 𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀺𑀅𑀦𑀸𑀕𑀸𑀫𑀺𑀅𑀭𑀳𑀦𑁆𑀢𑀢𑁂𑀯𑀺𑀚𑁆𑀚𑀙𑀴𑀪𑀺𑀜𑁆𑀜𑀲𑀫𑀡𑀫𑀡𑀺𑀭𑀢𑀦𑁂𑀳𑀺 𑀲𑀤𑁆𑀥𑀺𑀁 𑀲𑀁𑀯𑀲𑀺𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀫𑀡𑀺𑀭𑀢𑀦𑀲𑁆𑀲 𑀢𑀢𑀺𑀬𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑀤𑁂𑀯𑀸𑀢𑀺𑀤𑁂𑀯𑁂𑀦 𑀲𑀼𑀢𑁆𑀢𑀦𑀺𑀧𑀸𑀢𑁂 𑁋

‘‘‘𑀲𑀼𑀤𑁆𑀥𑀸 𑀲𑀼𑀤𑁆𑀥𑁂𑀳𑀺 𑀲𑀁𑀯𑀸𑀲𑀁, 𑀓𑀧𑁆𑀧𑀬𑀯𑁆𑀳𑁄 𑀧𑀢𑀺𑀲𑁆𑀲𑀢𑀸;

𑀢𑀢𑁄 𑀲𑀫𑀕𑁆𑀕𑀸 𑀦𑀺𑀧𑀓𑀸, 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀣𑀸’’’𑀢𑀺.

𑀫𑀡𑀺𑀭𑀢𑀦𑀧𑀜𑁆𑀳𑁄 𑀲𑀢𑁆𑀢𑀫𑁄.

𑁮. 𑀫𑀸𑀕𑀯𑀺𑀓𑀗𑁆𑀕𑀧𑀜𑁆𑀳𑁄

𑁮. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, ‘𑀫𑀸𑀕𑀯𑀺𑀓𑀲𑁆𑀲 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻’𑀢𑀺 𑀬𑀁 𑀯𑀤𑁂𑀲𑀺, 𑀓𑀢𑀫𑀸𑀦𑀺 𑀢𑀸𑀦𑀺 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻’’𑀢𑀺? ‘‘𑀬𑀣𑀸, 𑀫𑀳𑀸𑀭𑀸𑀚, 𑀫𑀸𑀕𑀯𑀺𑀓𑁄 𑀅𑀧𑁆𑀧𑀫𑀺𑀤𑁆𑀥𑁄 𑀳𑁄𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀅𑀧𑁆𑀧𑀫𑀺𑀤𑁆𑀥𑁂𑀦 𑀪𑀯𑀺𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀫𑀸𑀕𑀯𑀺𑀓𑀲𑁆𑀲 𑀧𑀞𑀫𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀫𑀸𑀕𑀯𑀺𑀓𑁄 𑀫𑀺𑀕𑁂𑀲𑀼 𑀬𑁂𑀯 𑀘𑀺𑀢𑁆𑀢𑀁 𑀉𑀧𑀦𑀺𑀩𑀦𑁆𑀥𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀆𑀭𑀫𑁆𑀫𑀡𑁂𑀲𑀼 𑀬𑁂𑀯 𑀘𑀺𑀢𑁆𑀢𑀁 𑀉𑀧𑀦𑀺𑀩𑀦𑁆𑀥𑀺𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀫𑀸𑀕𑀯𑀺𑀓𑀲𑁆𑀲 𑀤𑀼𑀢𑀺𑀬𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀫𑀸𑀕𑀯𑀺𑀓𑁄 𑀓𑀸𑀮𑀁 𑀓𑀫𑁆𑀫𑀲𑁆𑀲 𑀚𑀸𑀦𑀸𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀧𑀝𑀺𑀲𑀮𑁆𑀮𑀸𑀦𑀲𑁆𑀲 𑀓𑀸𑀮𑁄 𑀚𑀸𑀦𑀺𑀢𑀩𑁆𑀩𑁄 ‘𑀅𑀬𑀁 𑀓𑀸𑀮𑁄 𑀧𑀝𑀺𑀲𑀮𑁆𑀮𑀸𑀦𑀲𑁆𑀲, 𑀅𑀬𑀁 𑀓𑀸𑀮𑁄 𑀦𑀺𑀓𑁆𑀔𑀫𑀦𑀸𑀬𑀸’𑀢𑀺. 𑀇𑀤𑀁, 𑀫𑀳𑀸𑀭𑀸𑀚, 𑀫𑀸𑀕𑀯𑀺𑀓𑀲𑁆𑀲 𑀢𑀢𑀺𑀬𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀫𑀸𑀕𑀯𑀺𑀓𑁄 𑀫𑀺𑀕𑀁 𑀤𑀺𑀲𑁆𑀯𑀸 𑀳𑀸𑀲𑀫𑀪𑀺𑀚𑀦𑁂𑀢𑀺 ‘𑀇𑀫𑀁 𑀮𑀘𑁆𑀙𑀸𑀫𑀻’𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀆𑀭𑀫𑁆𑀫𑀡𑁂 𑀅𑀪𑀺𑀭𑀫𑀺𑀢𑀩𑁆𑀩𑀁, 𑀳𑀸𑀲𑀫𑀪𑀺𑀚𑀦𑁂𑀢𑀩𑁆𑀩𑀁 ‘𑀉𑀢𑁆𑀢𑀭𑀺𑀁 𑀯𑀺𑀲𑁂𑀲𑀫𑀥𑀺𑀕𑀘𑁆𑀙𑀺𑀲𑁆𑀲𑀸𑀫𑀻’𑀢𑀺. 𑀇𑀤𑀁, 𑀫𑀳𑀸𑀭𑀸𑀚, 𑀫𑀸𑀕𑀯𑀺𑀓𑀲𑁆𑀲 𑀘𑀢𑀼𑀢𑁆𑀣𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁. 𑀪𑀸𑀲𑀺𑀢𑀫𑁆𑀧𑁂𑀢𑀁 𑀫𑀳𑀸𑀭𑀸𑀚 𑀣𑁂𑀭𑁂𑀦 𑀫𑁄𑀖𑀭𑀸𑀚𑁂𑀦 𑁋

‘‘‘𑀆𑀭𑀫𑁆𑀫𑀡𑁂 𑀮𑀪𑀺𑀢𑁆𑀯𑀸𑀦, 𑀧𑀳𑀺𑀢𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸;

𑀪𑀺𑀬𑁆𑀬𑁄 𑀳𑀸𑀲𑁄 𑀚𑀦𑁂𑀢𑀩𑁆𑀩𑁄, 𑀅𑀥𑀺𑀕𑀘𑁆𑀙𑀺𑀲𑁆𑀲𑀸𑀫𑀺 𑀉𑀢𑁆𑀢𑀭𑀺’’’𑀦𑁆𑀢𑀺.

𑀫𑀸𑀕𑀯𑀺𑀓𑀗𑁆𑀕𑀧𑀜𑁆𑀳𑁄 𑀅𑀝𑁆𑀞𑀫𑁄.

𑁯. 𑀩𑀸𑀴𑀺𑀲𑀺𑀓𑀗𑁆𑀕𑀧𑀜𑁆𑀳𑁄

𑁯. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, ‘𑀩𑀸𑀴𑀺𑀲𑀺𑀓𑀲𑁆𑀲 𑀤𑁆𑀯𑁂 𑀅𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻’𑀢𑀺 𑀬𑀁 𑀯𑀤𑁂𑀲𑀺, 𑀓𑀢𑀫𑀸𑀦𑀺 𑀢𑀸𑀦𑀺 𑀤𑁆𑀯𑁂 𑀅𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻’’𑀢𑀺? ‘‘𑀬𑀣𑀸, 𑀫𑀳𑀸𑀭𑀸𑀚, 𑀩𑀸𑀴𑀺𑀲𑀺𑀓𑁄 𑀩𑀴𑀺𑀲𑁂𑀦 𑀫𑀘𑁆𑀙𑁂 𑀉𑀤𑁆𑀥𑀭𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀜𑀸𑀡𑁂𑀦 𑀉𑀢𑁆𑀢𑀭𑀺𑀁 𑀲𑀸𑀫𑀜𑁆𑀜𑀨𑀮𑀸𑀦𑀺 𑀉𑀤𑁆𑀥𑀭𑀺𑀢𑀩𑁆𑀩𑀸𑀦𑀺. 𑀇𑀤𑀁, 𑀫𑀳𑀸𑀭𑀸𑀚, 𑀩𑀸𑀴𑀺𑀲𑀺𑀓𑀲𑁆𑀲 𑀧𑀞𑀫𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀩𑀸𑀴𑀺𑀲𑀺𑀓𑁄 𑀧𑀭𑀺𑀢𑁆𑀢𑀓𑀁 𑀯𑀥𑀺𑀢𑁆𑀯𑀸 𑀯𑀺𑀧𑀼𑀮𑀁 𑀮𑀸𑀪𑀫𑀥𑀺𑀕𑀘𑁆𑀙𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀧𑀭𑀺𑀢𑁆𑀢𑀮𑁄𑀓𑀸𑀫𑀺𑀲𑀫𑀢𑁆𑀢𑀁 𑀧𑀭𑀺𑀘𑁆𑀘𑀚𑀺𑀢𑀩𑁆𑀩𑀁. 𑀮𑁄𑀓𑀸𑀫𑀺𑀲𑀫𑀢𑁆𑀢𑀁, 𑀫𑀳𑀸𑀭𑀸𑀚, 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀬𑁄𑀕𑀻 𑀬𑁄𑀕𑀸𑀯𑀘𑀭𑁄 𑀯𑀺𑀧𑀼𑀮𑀁 𑀲𑀸𑀫𑀜𑁆𑀜𑀨𑀮𑀁 𑀅𑀥𑀺𑀕𑀘𑁆𑀙𑀢𑀺. 𑀇𑀤𑀁, 𑀫𑀳𑀸𑀭𑀸𑀚, 𑀩𑀸𑀴𑀺𑀲𑀺𑀓𑀲𑁆𑀲 𑀤𑀼𑀢𑀺𑀬𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀣𑁂𑀭𑁂𑀦 𑀭𑀸𑀳𑀼𑀮𑁂𑀦 𑁋

‘‘‘𑀲𑀼𑀜𑁆𑀜𑀢𑀜𑁆𑀘𑀸𑀦𑀺𑀫𑀺𑀢𑁆𑀢𑀜𑁆𑀘, 𑀯𑀺𑀫𑁄𑀓𑁆𑀔𑀜𑁆𑀘𑀸𑀧𑁆𑀧𑀡𑀺𑀳𑀺𑀢𑀁;

𑀘𑀢𑀼𑀭𑁄 𑀨𑀮𑁂 𑀙𑀴𑀪𑀺𑀜𑁆𑀜𑀸, 𑀘𑀚𑀺𑀢𑁆𑀯𑀸 𑀮𑁄𑀓𑀸𑀫𑀺𑀲𑀁 𑀮𑀪𑁂’’’𑀢𑀺.

𑀩𑀸𑀴𑀺𑀲𑀺𑀓𑀗𑁆𑀕𑀧𑀜𑁆𑀳𑁄 𑀦𑀯𑀫𑁄.

𑁧𑁦. 𑀢𑀘𑁆𑀙𑀓𑀗𑁆𑀕𑀧𑀜𑁆𑀳𑁄

𑁧𑁦. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, ‘𑀢𑀘𑁆𑀙𑀓𑀲𑁆𑀲 𑀤𑁆𑀯𑁂 𑀅𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻’𑀢𑀺 𑀬𑀁 𑀯𑀤𑁂𑀲𑀺, 𑀓𑀢𑀫𑀸𑀦𑀺 𑀢𑀸𑀦𑀺 𑀤𑁆𑀯𑁂 𑀅𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻’’𑀢𑀺? ‘‘𑀬𑀣𑀸, 𑀫𑀳𑀸𑀭𑀸𑀚, 𑀢𑀘𑁆𑀙𑀓𑁄 𑀓𑀸𑀴𑀲𑀼𑀢𑁆𑀢𑀁 𑀅𑀦𑀼𑀮𑁄𑀫𑁂𑀢𑁆𑀯𑀸 𑀭𑀼𑀓𑁆𑀔𑀁 𑀢𑀘𑁆𑀙𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀚𑀺𑀦𑀲𑀸𑀲𑀦𑀫𑀦𑀼𑀮𑁄𑀫𑀬𑀺𑀢𑁆𑀯𑀸 𑀲𑀻𑀮𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀳𑀺𑀢𑁆𑀯𑀸 𑀲𑀤𑁆𑀥𑀸𑀳𑀢𑁆𑀣𑁂𑀦 𑀧𑀜𑁆𑀜𑀸𑀯𑀸𑀲𑀺𑀁 𑀕𑀳𑁂𑀢𑁆𑀯𑀸 𑀓𑀺𑀮𑁂𑀲𑀸 𑀢𑀘𑁆𑀙𑁂𑀢𑀩𑁆𑀩𑀸. 𑀇𑀤𑀁, 𑀫𑀳𑀸𑀭𑀸𑀚, 𑀢𑀘𑁆𑀙𑀓𑀲𑁆𑀲 𑀧𑀞𑀫𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀢𑀘𑁆𑀙𑀓𑁄 𑀨𑁂𑀕𑁆𑀕𑀼𑀁 𑀅𑀧𑀳𑀭𑀺𑀢𑁆𑀯𑀸 𑀲𑀸𑀭𑀫𑀸𑀤𑀺𑀬𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀲𑀲𑁆𑀲𑀢𑀁 𑀉𑀘𑁆𑀙𑁂𑀤𑀁 𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭𑀁 𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭𑀁 𑀢𑀤𑀼𑀢𑁆𑀢𑀫𑀁 𑀅𑀜𑁆𑀜𑀤𑀼𑀢𑁆𑀢𑀫𑀁 𑀅𑀓𑀢𑀫𑀪𑀩𑁆𑀩𑀁 𑀅𑀧𑀼𑀭𑀺𑀲𑀓𑀸𑀭𑀁 𑀅𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀁 𑀲𑀢𑁆𑀢𑀯𑀺𑀦𑀸𑀲𑀁 𑀦𑀯𑀲𑀢𑁆𑀢𑀧𑀸𑀢𑀼𑀪𑀸𑀯𑀁 𑀲𑀗𑁆𑀔𑀸𑀭𑀲𑀲𑁆𑀲𑀢𑀪𑀸𑀯𑀁 𑀬𑁄 𑀓𑀭𑁄𑀢𑀺, 𑀲𑁄 𑀧𑀝𑀺𑀲𑀁𑀯𑁂𑀤𑁂𑀢𑀺, 𑀅𑀜𑁆𑀜𑁄 𑀓𑀭𑁄𑀢𑀺, 𑀅𑀜𑁆𑀜𑁄 𑀧𑀝𑀺𑀲𑀁𑀯𑁂𑀤𑁂𑀢𑀺, 𑀓𑀫𑁆𑀫𑀨𑀮𑀤𑀲𑁆𑀲𑀦𑀸 𑀘 𑀓𑀺𑀭𑀺𑀬𑀨𑀮𑀤𑀺𑀝𑁆𑀞𑀺 𑀘 𑀇𑀢𑀺 𑀏𑀯𑀭𑀽𑀧𑀸𑀦𑀺 𑀘𑁂𑀯 𑀅𑀜𑁆𑀜𑀸𑀦𑀺 𑀘 𑀯𑀺𑀯𑀸𑀤𑀧𑀣𑀸𑀦𑀺 𑀅𑀧𑀦𑁂𑀢𑁆𑀯𑀸 𑀲𑀗𑁆𑀔𑀸𑀭𑀸𑀦𑀁 𑀲𑀪𑀸𑀯𑀁 𑀧𑀭𑀫𑀲𑀼𑀜𑁆𑀜𑀢𑀁 𑀦𑀺𑀭𑀻𑀳𑀦𑀺𑀚𑁆𑀚𑀻𑀯𑀢𑀁 [𑀦𑀺𑀲𑀢𑁆𑀢𑀦𑀺𑀚𑀻𑀯𑀢𑀁 (𑀓.)] 𑀅𑀘𑁆𑀘𑀦𑁆𑀢𑀁 𑀲𑀼𑀜𑁆𑀜𑀢𑀁 𑀆𑀤𑀺𑀬𑀺𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀢𑀘𑁆𑀙𑀓𑀲𑁆𑀲 𑀤𑀼𑀢𑀺𑀬𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑀤𑁂𑀯𑀸𑀢𑀺𑀤𑁂𑀯𑁂𑀦 𑀲𑀼𑀢𑁆𑀢𑀦𑀺𑀧𑀸𑀢𑁂 𑁋

‘‘‘𑀓𑀸𑀭𑀡𑁆𑀟𑀯𑀁 𑀦𑀺𑀤𑁆𑀥𑀫𑀣, 𑀓𑀲𑀫𑁆𑀩𑀼𑀁 𑀅𑀧𑀓𑀲𑁆𑀲𑀣;

𑀢𑀢𑁄 𑀧𑀮𑀸𑀧𑁂 𑀯𑀸𑀳𑁂𑀣, 𑀅𑀲𑁆𑀲𑀫𑀡𑁂 𑀲𑀫𑀡𑀫𑀸𑀦𑀺𑀦𑁂.

‘‘‘𑀦𑀺𑀤𑁆𑀥𑀫𑀺𑀢𑁆𑀯𑀸𑀦 𑀧𑀸𑀧𑀺𑀘𑁆𑀙𑁂, 𑀧𑀸𑀧𑀆𑀘𑀸𑀭𑀕𑁄𑀘𑀭𑁂;

𑀲𑀼𑀤𑁆𑀥𑀸 𑀲𑀼𑀤𑁆𑀥𑁂𑀳𑀺 𑀲𑀁𑀯𑀸𑀲𑀁, 𑀓𑀧𑁆𑀧𑀬𑀯𑁆𑀳𑁄 𑀧𑀢𑀺𑀲𑁆𑀲𑀢𑀸;

𑀢𑀢𑁄 𑀲𑀫𑀕𑁆𑀕𑀸 𑀦𑀺𑀧𑀓𑀸, 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀣𑀸’’’𑀢𑀺.

𑀢𑀘𑁆𑀙𑀓𑀗𑁆𑀕𑀧𑀜𑁆𑀳𑁄 𑀤𑀲𑀫𑁄.

𑀫𑀓𑁆𑀓𑀝𑀓𑀯𑀕𑁆𑀕𑁄 𑀙𑀝𑁆𑀞𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀫𑀓𑁆𑀓𑀝𑁄 𑀤𑀸𑀭𑀓𑁄 𑀓𑀼𑀫𑁆𑀫𑁄, 𑀯𑀦𑀁 𑀭𑀼𑀓𑁆𑀔𑁄 𑀘 𑀧𑀜𑁆𑀘𑀫𑁄;

𑀫𑁂𑀖𑁄 𑀫𑀡𑀺 𑀫𑀸𑀕𑀯𑀺𑀓𑁄, 𑀩𑀸𑀴𑀺𑀲𑀻 𑀢𑀘𑁆𑀙𑀓𑁂𑀦 𑀘𑀸𑀢𑀺.