𑁫. 𑀲𑀻𑀳𑀯𑀕𑁆𑀕𑁄

𑁧. 𑀲𑀻𑀳𑀗𑁆𑀕𑀧𑀜𑁆𑀳𑁄

𑁧. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, ‘𑀲𑀻𑀳𑀲𑁆𑀲 𑀲𑀢𑁆𑀢 𑀅𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻’𑀢𑀺 𑀬𑀁 𑀯𑀤𑁂𑀲𑀺, 𑀓𑀢𑀫𑀸𑀦𑀺 𑀢𑀸𑀦𑀺 𑀲𑀢𑁆𑀢 𑀅𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻’’𑀢𑀺? ‘‘𑀬𑀣𑀸, 𑀫𑀳𑀸𑀭𑀸𑀚, 𑀲𑀻𑀳𑁄 𑀦𑀸𑀫 𑀲𑁂𑀢𑀯𑀺𑀫𑀮𑀧𑀭𑀺𑀲𑀼𑀤𑁆𑀥𑀧𑀡𑁆𑀟𑀭𑁄, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀲𑁂𑀢𑀯𑀺𑀫𑀮𑀧𑀭𑀺𑀲𑀼𑀤𑁆𑀥𑀧𑀡𑁆𑀟𑀭𑀘𑀺𑀢𑁆𑀢𑁂𑀦 𑀩𑁆𑀬𑀧𑀕𑀢𑀓𑀼𑀓𑁆𑀓𑀼𑀘𑁆𑀘𑁂𑀦 𑀪𑀯𑀺𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀲𑀻𑀳𑀲𑁆𑀲 𑀧𑀞𑀫𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀲𑀻𑀳𑁄 𑀘𑀢𑀼𑀘𑀭𑀡𑁄 𑀯𑀺𑀓𑁆𑀓𑀦𑁆𑀢𑀘𑀸𑀭𑀻, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀘𑀢𑀼𑀭𑀺𑀤𑁆𑀥𑀺𑀧𑀸𑀤𑀘𑀭𑀡𑁂𑀦 𑀪𑀯𑀺𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀲𑀻𑀳𑀲𑁆𑀲 𑀤𑀼𑀢𑀺𑀬𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀲𑀻𑀳𑁄 𑀅𑀪𑀺𑀭𑀽𑀧𑀭𑀼𑀘𑀺𑀭𑀓𑁂𑀲𑀭𑀻, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀅𑀪𑀺𑀭𑀽𑀧𑀭𑀼𑀘𑀺𑀭𑀲𑀻𑀮𑀓𑁂𑀲𑀭𑀺𑀦𑀸 𑀪𑀯𑀺𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀲𑀻𑀳𑀲𑁆𑀲 𑀢𑀢𑀺𑀬𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀲𑀻𑀳𑁄 𑀚𑀻𑀯𑀺𑀢𑀧𑀭𑀺𑀬𑀸𑀤𑀸𑀦𑁂𑀧𑀺 𑀦 𑀓𑀲𑁆𑀲𑀘𑀺 𑀑𑀦𑀫𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀧𑀭𑀺𑀬𑀸𑀤𑀸𑀦𑁂𑀧𑀺 𑀦 𑀓𑀲𑁆𑀲𑀘𑀺 𑀑𑀦𑀫𑀺𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀲𑀻𑀳𑀲𑁆𑀲 𑀘𑀢𑀼𑀢𑁆𑀣𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀲𑀻𑀳𑁄 𑀲𑀧𑀤𑀸𑀦𑀪𑀓𑁆𑀔𑁄 𑀬𑀲𑁆𑀫𑀺𑀁 𑀑𑀓𑀸𑀲𑁂 𑀦𑀺𑀧𑀢𑀢𑀺, 𑀢𑀢𑁆𑀣𑁂𑀯 𑀬𑀸𑀯𑀤𑀢𑁆𑀣𑀁 𑀪𑀓𑁆𑀔𑀬𑀢𑀺, 𑀦 𑀯𑀭𑀫𑀁𑀲𑀁 𑀯𑀺𑀘𑀺𑀦𑀸𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀲𑀧𑀤𑀸𑀦𑀪𑀓𑁆𑀔𑁂𑀦 𑀪𑀯𑀺𑀢𑀩𑁆𑀩𑀁, 𑀦 𑀓𑀼𑀮𑀸𑀦𑀺 𑀯𑀺𑀘𑀺𑀦𑀺𑀢𑀩𑁆𑀩𑀸𑀦𑀺, 𑀦 𑀧𑀼𑀩𑁆𑀩𑀕𑁂𑀳𑀁 𑀳𑀺𑀢𑁆𑀯𑀸 𑀓𑀼𑀮𑀸𑀦𑀺 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑀸𑀦𑀺, 𑀦 𑀪𑁄𑀚𑀦𑀁 𑀯𑀺𑀘𑀺𑀦𑀺𑀢𑀩𑁆𑀩𑀁, 𑀬𑀲𑁆𑀫𑀺𑀁 𑀑𑀓𑀸𑀲𑁂 𑀓𑀩𑀴𑀁 𑀆𑀤𑀻𑀬𑀢𑀺, 𑀢𑀲𑁆𑀫𑀺𑀁 𑀬𑁂𑀯 𑀑𑀓𑀸𑀲𑁂 𑀪𑀼𑀜𑁆𑀚𑀺𑀢𑀩𑁆𑀩𑀁 𑀲𑀭𑀻𑀭𑀬𑀸𑀧𑀦𑀢𑁆𑀣𑀁 [𑀲𑀭𑀻𑀭𑀬𑀸𑀧𑀦𑀫𑀢𑁆𑀢𑀁 (𑀲𑀻. 𑀧𑀻.)], 𑀦 𑀯𑀭𑀪𑁄𑀚𑀦𑀁 𑀯𑀺𑀘𑀺𑀦𑀺𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀲𑀻𑀳𑀲𑁆𑀲 𑀧𑀜𑁆𑀘𑀫𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀲𑀻𑀳𑁄 𑀅𑀲𑀦𑁆𑀦𑀺𑀥𑀺𑀪𑀓𑁆𑀔𑁄, 𑀲𑀓𑀺𑀁 𑀕𑁄𑀘𑀭𑀁 𑀪𑀓𑁆𑀔𑀬𑀺𑀢𑁆𑀯𑀸 𑀦 𑀧𑀼𑀦 𑀢𑀁 𑀉𑀧𑀕𑀘𑁆𑀙𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀅𑀲𑀦𑁆𑀦𑀺𑀥𑀺𑀓𑀸𑀭𑀧𑀭𑀺𑀪𑁄𑀕𑀺𑀦𑀸 𑀪𑀯𑀺𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀲𑀻𑀳𑀲𑁆𑀲 𑀙𑀝𑁆𑀞𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀲𑀻𑀳𑁄 𑀪𑁄𑀚𑀦𑀁 𑀅𑀮𑀤𑁆𑀥𑀸 𑀦 𑀧𑀭𑀺𑀢𑀲𑁆𑀲𑀢𑀺, 𑀮𑀤𑁆𑀥𑀸𑀧𑀺 𑀪𑁄𑀚𑀦𑀁 𑀅𑀕𑀥𑀺𑀢𑁄 [𑀅𑀕𑀣𑀺𑀢𑁄 (𑀲𑀻.)] 𑀅𑀫𑀼𑀘𑁆𑀙𑀺𑀢𑁄 𑀅𑀦𑀚𑁆𑀛𑁄𑀲𑀦𑁆𑀦𑁄 𑀧𑀭𑀺𑀪𑀼𑀜𑁆𑀚𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀪𑁄𑀚𑀦𑀁 𑀅𑀮𑀤𑁆𑀥𑀸 𑀦 𑀧𑀭𑀺𑀢𑀲𑁆𑀲𑀺𑀢𑀩𑁆𑀩𑀁, 𑀮𑀤𑁆𑀥𑀸𑀧𑀺 𑀪𑁄𑀚𑀦𑀁 𑀅𑀕𑀥𑀺𑀢𑁂𑀦 𑀅𑀫𑀼𑀘𑁆𑀙𑀺𑀢𑁂𑀦 𑀅𑀦𑀚𑁆𑀛𑁄𑀲𑀦𑁆𑀦𑁂𑀦 𑀆𑀤𑀻𑀦𑀯𑀤𑀲𑁆𑀲𑀸𑀯𑀺𑀦𑀸 𑀦𑀺𑀲𑁆𑀲𑀭𑀡𑀧𑀜𑁆𑀜𑁂𑀦 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀲𑀻𑀳𑀲𑁆𑀲 𑀲𑀢𑁆𑀢𑀫𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑀤𑁂𑀯𑀸𑀢𑀺𑀤𑁂𑀯𑁂𑀦 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑀯𑀭𑁂 𑀣𑁂𑀭𑀁 𑀫𑀳𑀸𑀓𑀲𑁆𑀲𑀧𑀁 𑀧𑀭𑀺𑀓𑀺𑀢𑁆𑀢𑀬𑀫𑀸𑀦𑁂𑀦 𑁋

‘𑀲𑀦𑁆𑀢𑀼𑀝𑁆𑀞𑁄𑀬𑀁, 𑀪𑀺𑀓𑁆𑀔𑀯𑁂, 𑀓𑀲𑁆𑀲𑀧𑁄 𑀇𑀢𑀭𑀻𑀢𑀭𑁂𑀦 𑀧𑀺𑀡𑁆𑀟𑀧𑀸𑀢𑁂𑀦, 𑀇𑀢𑀭𑀻𑀢𑀭𑀧𑀺𑀡𑁆𑀟𑀧𑀸𑀢𑀲𑀦𑁆𑀢𑀼𑀝𑁆𑀞𑀺𑀬𑀸 𑀘 𑀯𑀡𑁆𑀡𑀯𑀸𑀤𑀻, 𑀦 𑀘 𑀧𑀺𑀡𑁆𑀟𑀧𑀸𑀢𑀳𑁂𑀢𑀼 𑀅𑀦𑁂𑀲𑀦𑀁 𑀅𑀧𑁆𑀧𑀢𑀺𑀭𑀽𑀧𑀁 𑀆𑀧𑀚𑁆𑀚𑀢𑀺, 𑀅𑀮𑀤𑁆𑀥𑀸 𑀘 𑀧𑀺𑀡𑁆𑀟𑀧𑀸𑀢𑀁 𑀦 𑀧𑀭𑀺𑀢𑀲𑁆𑀲𑀢𑀺, 𑀮𑀤𑁆𑀥𑀸 𑀘 𑀧𑀺𑀡𑁆𑀟𑀧𑀸𑀢𑀁 𑀅𑀕𑀥𑀺𑀢𑁄 𑀅𑀫𑀼𑀘𑁆𑀙𑀺𑀢𑁄 𑀅𑀦𑀚𑁆𑀛𑁄𑀲𑀦𑁆𑀦𑁄 𑀆𑀤𑀻𑀦𑀯𑀤𑀲𑁆𑀲𑀸𑀯𑀻 𑀦𑀺𑀲𑁆𑀲𑀭𑀡𑀧𑀜𑁆𑀜𑁄 𑀧𑀭𑀺𑀪𑀼𑀜𑁆𑀚𑀢𑀻’’’𑀢𑀺.

𑀲𑀻𑀳𑀗𑁆𑀕𑀧𑀜𑁆𑀳𑁄 𑀧𑀞𑀫𑁄.

𑁨. 𑀘𑀓𑁆𑀓𑀯𑀸𑀓𑀗𑁆𑀕𑀧𑀜𑁆𑀳𑁄

𑁨. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, ‘𑀘𑀓𑁆𑀓𑀯𑀸𑀓𑀲𑁆𑀲 𑀢𑀻𑀡𑀺 𑀅𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻’𑀢𑀺 𑀬𑀁 𑀯𑀤𑁂𑀲𑀺, 𑀓𑀢𑀫𑀸𑀦𑀺 𑀢𑀸𑀦𑀺 𑀢𑀻𑀡𑀺 𑀅𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻𑀢𑀺’’? ‘‘𑀬𑀣𑀸, 𑀫𑀳𑀸𑀭𑀸𑀚, 𑀘𑀓𑁆𑀓𑀯𑀸𑀓𑁄 𑀬𑀸𑀯 𑀚𑀻𑀯𑀺𑀢𑀧𑀭𑀺𑀬𑀸𑀤𑀸𑀦𑀸 𑀤𑀼𑀢𑀺𑀬𑀺𑀓𑀁 𑀦 𑀯𑀺𑀚𑀳𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀬𑀸𑀯 𑀚𑀻𑀯𑀺𑀢𑀧𑀭𑀺𑀬𑀸𑀤𑀸𑀦𑀸 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁄 𑀦 𑀯𑀺𑀚𑀳𑀺𑀢𑀩𑁆𑀩𑁄. 𑀇𑀤𑀁, 𑀫𑀳𑀸𑀭𑀸𑀚, 𑀘𑀓𑁆𑀓𑀯𑀸𑀓𑀲𑁆𑀲 𑀧𑀞𑀫𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀘𑀓𑁆𑀓𑀯𑀸𑀓𑁄 𑀲𑁂𑀯𑀸𑀮𑀧𑀡𑀓𑀪𑀓𑁆𑀔𑁄, 𑀢𑁂𑀦 𑀘 𑀲𑀦𑁆𑀢𑀼𑀝𑁆𑀞𑀺𑀁 𑀆𑀧𑀚𑁆𑀚𑀢𑀺, 𑀢𑀸𑀬 𑀘 𑀲𑀦𑁆𑀢𑀼𑀝𑁆𑀞𑀺𑀬𑀸 𑀩𑀮𑁂𑀦 𑀘 𑀯𑀡𑁆𑀡𑁂𑀦 𑀘 𑀦 𑀧𑀭𑀺𑀳𑀸𑀬𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀬𑀣𑀸𑀮𑀸𑀪𑀲𑀦𑁆𑀢𑁄𑀲𑁄 𑀓𑀭𑀡𑀻𑀬𑁄, 𑀬𑀣𑀸𑀮𑀸𑀪𑀲𑀦𑁆𑀢𑀼𑀝𑁆𑀞𑁄 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀻 𑀬𑁄𑀕𑀸𑀯𑀘𑀭𑁄 𑀦 𑀧𑀭𑀺𑀳𑀸𑀬𑀢𑀺 𑀲𑀻𑀮𑁂𑀦, 𑀦 𑀧𑀭𑀺𑀳𑀸𑀬𑀢𑀺 𑀲𑀫𑀸𑀥𑀺𑀦𑀸, 𑀦 𑀧𑀭𑀺𑀳𑀸𑀬𑀢𑀺 𑀧𑀜𑁆𑀜𑀸𑀬, 𑀦 𑀧𑀭𑀺𑀳𑀸𑀬𑀢𑀺 𑀯𑀺𑀫𑀼𑀢𑁆𑀢𑀺𑀬𑀸, 𑀦 𑀧𑀭𑀺𑀳𑀸𑀬𑀢𑀺 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑁂𑀦, 𑀦 𑀧𑀭𑀺𑀳𑀸𑀬𑀢𑀺 𑀲𑀩𑁆𑀩𑁂𑀳𑀺 𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺. 𑀇𑀤𑀁, 𑀫𑀳𑀸𑀭𑀸𑀚, 𑀘𑀓𑁆𑀓𑀯𑀸𑀓𑀲𑁆𑀲 𑀤𑀼𑀢𑀺𑀬𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀘𑀓𑁆𑀓𑀯𑀸𑀓𑁄 𑀧𑀸𑀡𑁂 𑀦 𑀯𑀺𑀳𑁂𑀞𑀬𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀦𑀺𑀳𑀺𑀢𑀤𑀡𑁆𑀟𑁂𑀦 𑀦𑀺𑀳𑀺𑀢𑀲𑀢𑁆𑀣𑁂𑀦 𑀮𑀚𑁆𑀚𑀺𑀦𑀸 𑀤𑀬𑀸𑀧𑀦𑁆𑀦𑁂𑀦 𑀲𑀩𑁆𑀩𑀧𑀸𑀡𑀪𑀽𑀢𑀳𑀺𑀢𑀸𑀦𑀼𑀓𑀫𑁆𑀧𑀺𑀦𑀸 𑀪𑀯𑀺𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀘𑀓𑁆𑀓𑀯𑀸𑀓𑀲𑁆𑀲 𑀢𑀢𑀺𑀬𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁. 𑀪𑀸𑀲𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑀤𑁂𑀯𑀸𑀢𑀺𑀤𑁂𑀯𑁂𑀦 𑀘𑀓𑁆𑀓𑀯𑀸𑀓𑀚𑀸𑀢𑀓𑁂 𑁋

‘‘‘𑀬𑁄 𑀦 𑀳𑀦𑁆𑀢𑀺 𑀦 𑀖𑀸𑀢𑁂𑀢𑀺, 𑀦 𑀚𑀺𑀦𑀸𑀢𑀺 𑀦 𑀚𑀸𑀧𑀬𑁂;

𑀫𑁂𑀢𑁆𑀢𑀁𑀲𑁄 [𑀅𑀳𑀺𑀁𑀲𑀸 (𑀲𑀻. 𑀧𑀻.)] 𑀲𑀩𑁆𑀩𑀪𑀽𑀢𑁂𑀲𑀼, 𑀯𑁂𑀭𑀁 𑀢𑀲𑁆𑀲 𑀦 𑀓𑁂𑀦𑀘𑀻’’’𑀢𑀺.

𑀘𑀓𑁆𑀓𑀯𑀸𑀓𑀗𑁆𑀕𑀧𑀜𑁆𑀳𑁄 𑀤𑀼𑀢𑀺𑀬𑁄.

𑁩. 𑀧𑁂𑀡𑀸𑀳𑀺𑀓𑀗𑁆𑀕𑀧𑀜𑁆𑀳𑁄

𑁩. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, ‘𑀧𑁂𑀡𑀸𑀳𑀺𑀓𑀸𑀬 𑀤𑁆𑀯𑁂 𑀅𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻’𑀢𑀺 𑀬𑀁 𑀯𑀤𑁂𑀲𑀺, 𑀓𑀢𑀫𑀸𑀦𑀺 𑀢𑀸𑀦𑀺 𑀤𑁆𑀯𑁂 𑀅𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻’’𑀢𑀺? ‘‘𑀬𑀣𑀸, 𑀫𑀳𑀸𑀭𑀸𑀚, 𑀧𑁂𑀡𑀸𑀳𑀺𑀓𑀸 𑀲𑀓𑀧𑀢𑀺𑀫𑁆𑀳𑀺 𑀉𑀲𑀽𑀬𑀸𑀬 𑀙𑀸𑀧𑀓𑁂 𑀦 𑀧𑁄𑀲𑀬𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀲𑀓𑀫𑀦𑁂 [𑀲𑀓𑀫𑀦𑁄 (𑀓.)] 𑀓𑀺𑀮𑁂𑀲𑁂 𑀉𑀧𑁆𑀧𑀦𑁆𑀦𑁂 𑀉𑀲𑀽𑀬𑀸𑀬𑀺𑀢𑀩𑁆𑀩𑀁, 𑀲𑀢𑀺𑀧𑀝𑁆𑀞𑀸𑀦𑁂𑀦 𑀲𑀫𑁆𑀫𑀸𑀲𑀁𑀯𑀭𑀲𑀼𑀲𑀺𑀭𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀫𑀦𑁄𑀤𑁆𑀯𑀸𑀭𑁂 𑀓𑀸𑀬𑀕𑀢𑀸𑀲𑀢𑀺 𑀪𑀸𑀯𑁂𑀢𑀩𑁆𑀩𑀸. 𑀇𑀤𑀁, 𑀫𑀳𑀸𑀭𑀸𑀚, 𑀧𑁂𑀡𑀸𑀳𑀺𑀓𑀸𑀬 𑀧𑀞𑀫𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀧𑁂𑀡𑀸𑀳𑀺𑀓𑀸 𑀧𑀯𑀦𑁂 𑀤𑀺𑀯𑀲𑀁 𑀕𑁄𑀘𑀭𑀁 𑀘𑀭𑀺𑀢𑁆𑀯𑀸 𑀲𑀸𑀬𑀁 𑀧𑀓𑁆𑀔𑀺𑀕𑀡𑀁 𑀉𑀧𑁂𑀢𑀺 𑀅𑀢𑁆𑀢𑀦𑁄 𑀕𑀼𑀢𑁆𑀢𑀺𑀬𑀸, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀏𑀓𑀓𑁂𑀦 𑀧𑀯𑀺𑀯𑁂𑀓𑀁 𑀲𑁂𑀯𑀺𑀢𑀩𑁆𑀩𑀁 𑀲𑀁𑀬𑁄𑀚𑀦𑀧𑀭𑀺𑀫𑀼𑀢𑁆𑀢𑀺𑀬𑀸, 𑀢𑀢𑁆𑀭 𑀭𑀢𑀺𑀁 𑀅𑀮𑀪𑀫𑀸𑀦𑁂𑀦 𑀉𑀧𑀯𑀸𑀤𑀪𑀬𑀧𑀭𑀺𑀭𑀓𑁆𑀔𑀡𑀸𑀬 𑀲𑀗𑁆𑀖𑀁 𑀑𑀲𑀭𑀺𑀢𑁆𑀯𑀸 𑀲𑀗𑁆𑀖𑀭𑀓𑁆𑀔𑀺𑀢𑁂𑀦 𑀯𑀲𑀺𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀧𑁂𑀡𑀸𑀳𑀺𑀓𑀸𑀬 𑀤𑀼𑀢𑀺𑀬𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀩𑁆𑀭𑀳𑁆𑀫𑀼𑀦𑀸 𑀲𑀳𑀫𑁆𑀧𑀢𑀺𑀦𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑁋

‘‘‘𑀲𑁂𑀯𑁂𑀣 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺, 𑀘𑀭𑁂𑀬𑁆𑀬 𑀲𑀁𑀬𑁄𑀚𑀦𑀯𑀺𑀧𑁆𑀧𑀫𑁄𑀓𑁆𑀔𑀸;

𑀲𑀘𑁂 𑀭𑀢𑀺𑀁 𑀦𑀸𑀥𑀺𑀕𑀘𑁆𑀙𑁂𑀬𑁆𑀬 𑀢𑀢𑁆𑀣, 𑀲𑀗𑁆𑀖𑁂 𑀯𑀲𑁂 𑀭𑀓𑁆𑀔𑀺𑀢𑀢𑁆𑀢𑁄 𑀲𑀢𑀻𑀫𑀸’’’𑀢𑀺.

𑀧𑁂𑀡𑀸𑀳𑀺𑀓𑀗𑁆𑀕𑀧𑀜𑁆𑀳𑁄 𑀢𑀢𑀺𑀬𑁄.

𑁪. 𑀖𑀭𑀓𑀧𑁄𑀢𑀗𑁆𑀕𑀧𑀜𑁆𑀳𑁄

𑁪. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, ‘𑀖𑀭𑀓𑀧𑁄𑀢𑀲𑁆𑀲 𑀏𑀓𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩’𑀦𑁆𑀢𑀺 𑀬𑀁 𑀯𑀤𑁂𑀲𑀺, 𑀓𑀢𑀫𑀁 𑀢𑀁 𑀏𑀓𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩’’𑀦𑁆𑀢𑀺? ‘‘𑀬𑀣𑀸, 𑀫𑀳𑀸𑀭𑀸𑀚, 𑀖𑀭𑀓𑀧𑁄𑀢𑁄 𑀧𑀭𑀕𑁂𑀳𑁂 𑀯𑀲𑀫𑀸𑀦𑁄 𑀦 𑀢𑁂𑀲𑀁 𑀓𑀺𑀜𑁆𑀘𑀺 𑀪𑀡𑁆𑀟𑀲𑁆𑀲 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀸𑀢𑀺, 𑀫𑀚𑁆𑀛𑀢𑁆𑀢𑁄 𑀯𑀲𑀢𑀺 𑀲𑀜𑁆𑀜𑀸𑀩𑀳𑀼𑀮𑁄, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀧𑀭𑀓𑀼𑀮𑀁 𑀉𑀧𑀕𑀢𑁂𑀦 𑀢𑀲𑁆𑀫𑀺𑀁 𑀓𑀼𑀮𑁂 𑀇𑀢𑁆𑀣𑀻𑀦𑀁 𑀯𑀸 𑀧𑀼𑀭𑀺𑀲𑀸𑀦𑀁 𑀯𑀸 𑀫𑀜𑁆𑀘𑁂 𑀯𑀸 𑀧𑀻𑀞𑁂 𑀯𑀸 𑀯𑀢𑁆𑀣𑁂 𑀯𑀸 𑀅𑀮𑀗𑁆𑀓𑀸𑀭𑁂 𑀯𑀸 𑀉𑀧𑀪𑁄𑀕𑁂 𑀯𑀸 𑀧𑀭𑀺𑀪𑁄𑀕𑁂 𑀯𑀸 𑀪𑁄𑀚𑀦𑀯𑀺𑀓𑀢𑀻𑀲𑀼 𑀯𑀸 𑀦 𑀦𑀺𑀫𑀺𑀢𑁆𑀢𑀁 𑀕𑀳𑁂𑀢𑀩𑁆𑀩𑀁, 𑀫𑀚𑁆𑀛𑀢𑁆𑀢𑁂𑀦 𑀪𑀯𑀺𑀢𑀩𑁆𑀩𑀁, 𑀲𑀫𑀡𑀲𑀜𑁆𑀜𑀸 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑀩𑁆𑀩𑀸. 𑀇𑀤𑀁, 𑀫𑀳𑀸𑀭𑀸𑀚, 𑀖𑀭𑀓𑀧𑁄𑀢𑀲𑁆𑀲 𑀏𑀓𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑀤𑁂𑀯𑀸𑀢𑀺𑀤𑁂𑀯𑁂𑀦 𑀘𑀽𑀴𑀦𑀸𑀭𑀤𑀚𑀸𑀢𑀓𑁂 𑁋

‘‘‘𑀧𑀯𑀺𑀲𑀺𑀢𑁆𑀯𑀸 𑀧𑀭𑀓𑀼𑀮𑀁, 𑀧𑀸𑀦𑀢𑁆𑀣𑀁 𑀪𑁄𑀚𑀦𑀸𑀬 𑀯𑀸 [𑀧𑀸𑀦𑁂𑀲𑀼 𑀪𑁄𑀚𑀦𑁂𑀲𑀼 𑀯𑀸 (𑀲𑀻. 𑀧𑀻.)];

𑀫𑀺𑀢𑀁 𑀔𑀸𑀤𑁂 𑀫𑀺𑀢𑀁 𑀪𑀼𑀜𑁆𑀚𑁂, 𑀦 𑀘 𑀭𑀽𑀧𑁂 𑀫𑀦𑀁 𑀓𑀭𑁂’’’𑀢𑀺.

𑀖𑀭𑀓𑀧𑁄𑀢𑀗𑁆𑀕𑀧𑀜𑁆𑀳𑁄 𑀘𑀢𑀼𑀢𑁆𑀣𑁄.

𑁫. 𑀉𑀮𑀽𑀓𑀗𑁆𑀕𑀧𑀜𑁆𑀳𑁄

𑁫. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, ‘𑀉𑀮𑀽𑀓𑀲𑁆𑀲 𑀤𑁆𑀯𑁂 𑀅𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻’𑀢𑀺 𑀬𑀁 𑀯𑀤𑁂𑀲𑀺, 𑀓𑀢𑀫𑀸𑀦𑀺 𑀢𑀸𑀦𑀺 𑀤𑁆𑀯𑁂 𑀅𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻’’𑀢𑀺? ‘‘𑀬𑀣𑀸, 𑀫𑀳𑀸𑀭𑀸𑀚, 𑀉𑀮𑀽𑀓𑁄 𑀓𑀸𑀓𑁂𑀳𑀺 𑀧𑀝𑀺𑀯𑀺𑀭𑀼𑀤𑁆𑀥𑁄, 𑀭𑀢𑁆𑀢𑀺𑀁 𑀓𑀸𑀓𑀲𑀗𑁆𑀖𑀁 𑀕𑀦𑁆𑀢𑁆𑀯𑀸 𑀩𑀳𑀽𑀧𑀺 𑀓𑀸𑀓𑁂 𑀳𑀦𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀅𑀜𑁆𑀜𑀸𑀡𑁂𑀦 𑀧𑀝𑀺𑀯𑀺𑀭𑀼𑀤𑁆𑀥𑁄 𑀓𑀸𑀢𑀩𑁆𑀩𑁄, 𑀏𑀓𑁂𑀦 𑀭𑀳𑁄 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀜𑀸𑀡𑀁 𑀲𑀫𑁆𑀧𑀫𑀤𑁆𑀤𑀺𑀢𑀩𑁆𑀩𑀁, 𑀫𑀽𑀮𑀢𑁄 𑀙𑀺𑀦𑁆𑀤𑀺𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀉𑀮𑀽𑀓𑀲𑁆𑀲 𑀧𑀞𑀫𑀁 𑀕𑀳𑁂𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀉𑀮𑀽𑀓𑁄 𑀲𑀼𑀧𑁆𑀧𑀝𑀺𑀲𑀮𑁆𑀮𑀻𑀦𑁄 𑀳𑁄𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀧𑀝𑀺𑀲𑀮𑁆𑀮𑀸𑀦𑀸𑀭𑀸𑀫𑁂𑀦 𑀪𑀯𑀺𑀢𑀩𑁆𑀩𑀁 𑀧𑀝𑀺𑀲𑀮𑁆𑀮𑀸𑀦𑀭𑀢𑁂𑀦. 𑀇𑀤𑀁, 𑀫𑀳𑀸𑀭𑀸𑀚, 𑀉𑀮𑀽𑀓𑀲𑁆𑀲 𑀤𑀼𑀢𑀺𑀬𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑀤𑁂𑀯𑀸𑀢𑀺𑀤𑁂𑀯𑁂𑀦 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑀯𑀭𑁂 𑁋

‘‘‘𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀝𑀺𑀲𑀮𑁆𑀮𑀸𑀦𑀸𑀭𑀸𑀫𑁄 𑀧𑀝𑀺𑀲𑀮𑁆𑀮𑀸𑀦𑀭𑀢𑁄 ‘‘𑀇𑀤𑀁 𑀤𑀼𑀓𑁆𑀔’’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, ‘‘𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄’’𑀢𑀺 𑀬𑀣𑀸 𑀪𑀽𑀣𑀁 𑀧𑀚𑀸𑀦𑀸𑀢𑀺, ‘‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑁄’’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, ‘‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀻’’’𑀢𑀺.

𑀉𑀮𑀽𑀓𑀗𑁆𑀕𑀧𑀜𑁆𑀳𑁄 𑀧𑀜𑁆𑀘𑀫𑁄.

𑁬. 𑀲𑀢𑀧𑀢𑁆𑀢𑀗𑁆𑀕𑀧𑀜𑁆𑀳𑁄

𑁬. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, ‘𑀲𑀢𑀧𑀢𑁆𑀢𑀲𑁆𑀲 𑀏𑀓𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩’𑀦𑁆𑀢𑀺 𑀬𑀁 𑀯𑀤𑁂𑀲𑀺, 𑀓𑀢𑀫𑀁 𑀢𑀁 𑀏𑀓𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩’’𑀦𑁆𑀢𑀺? ‘‘𑀬𑀣𑀸, 𑀫𑀳𑀸𑀭𑀸𑀚, 𑀲𑀢𑀧𑀢𑁆𑀢𑁄 𑀭𑀯𑀺𑀢𑁆𑀯𑀸 𑀧𑀭𑁂𑀲𑀁 𑀔𑁂𑀫𑀁 𑀯𑀸 𑀪𑀬𑀁 𑀯𑀸 𑀆𑀘𑀺𑀓𑁆𑀔𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀧𑀭𑁂𑀲𑀁 𑀥𑀫𑁆𑀫𑀁 𑀤𑁂𑀲𑀬𑀫𑀸𑀦𑁂𑀦 𑀯𑀺𑀦𑀺𑀧𑀸𑀢𑀁 𑀪𑀬𑀢𑁄 𑀤𑀲𑁆𑀲𑀬𑀺𑀢𑀩𑁆𑀩𑀁, 𑀦𑀺𑀩𑁆𑀩𑀸𑀦𑀁 𑀔𑁂𑀫𑀢𑁄 𑀤𑀲𑁆𑀲𑀬𑀺𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀲𑀢𑀧𑀢𑁆𑀢𑀲𑁆𑀲 𑀏𑀓𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀣𑁂𑀭𑁂𑀦 𑀧𑀺𑀡𑁆𑀟𑁄𑀮𑀪𑀸𑀭𑀤𑁆𑀯𑀸𑀚𑁂𑀦 𑁋

‘‘‘𑀦𑀺𑀭𑀬𑁂 𑀪𑀬𑀲𑀦𑁆𑀢𑀸𑀲𑀁, 𑀦𑀺𑀩𑁆𑀩𑀸𑀦𑁂 𑀯𑀺𑀧𑀼𑀮𑀁 𑀲𑀼𑀔𑀁;

𑀉𑀪𑀬𑀸𑀦𑁂𑀢𑀸𑀦𑀢𑁆𑀣𑀸𑀦𑀺 𑀤𑀲𑁆𑀲𑁂𑀢𑀩𑁆𑀩𑀸𑀦𑀺 𑀬𑁄𑀕𑀺𑀦𑀸’’’𑀢𑀺.

𑀲𑀢𑀧𑀢𑁆𑀢𑀗𑁆𑀕𑀧𑀜𑁆𑀳𑁄 𑀙𑀝𑁆𑀞𑁄.

𑁭. 𑀯𑀕𑁆𑀕𑀼𑀮𑀺𑀗𑁆𑀕𑀧𑀜𑁆𑀳𑁄

𑁭. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, ‘𑀯𑀕𑁆𑀕𑀼𑀮𑀺𑀲𑁆𑀲 𑀤𑁆𑀯𑁂 𑀅𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻’𑀢𑀺 𑀬𑀁 𑀯𑀤𑁂𑀲𑀺, 𑀓𑀢𑀫𑀸𑀦𑀺 𑀢𑀸𑀦𑀺 𑀤𑁆𑀯𑁂 𑀅𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻’’𑀢𑀺? ‘‘𑀬𑀣𑀸, 𑀫𑀳𑀸𑀭𑀸𑀚, 𑀯𑀕𑁆𑀕𑀼𑀮𑀺 𑀕𑁂𑀳𑀁 𑀧𑀯𑀺𑀲𑀺𑀢𑁆𑀯𑀸 𑀯𑀺𑀘𑀭𑀺𑀢𑁆𑀯𑀸 𑀦𑀺𑀓𑁆𑀔𑀫𑀢𑀺, 𑀦 𑀢𑀢𑁆𑀣 𑀧𑀮𑀺𑀩𑀼𑀤𑁆𑀥𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀢𑁆𑀯𑀸 𑀲𑀧𑀤𑀸𑀦𑀁 𑀯𑀺𑀘𑀭𑀺𑀢𑁆𑀯𑀸 𑀧𑀝𑀺𑀮𑀤𑁆𑀥𑀮𑀸𑀪𑁂𑀦 𑀔𑀺𑀧𑁆𑀧𑀫𑁂𑀯 𑀦𑀺𑀓𑁆𑀔𑀫𑀺𑀢𑀩𑁆𑀩𑀁, 𑀦 𑀢𑀢𑁆𑀣 𑀧𑀮𑀺𑀩𑀼𑀤𑁆𑀥𑁂𑀦 𑀪𑀯𑀺𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀯𑀕𑁆𑀕𑀼𑀮𑀺𑀲𑁆𑀲 𑀧𑀞𑀫𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀯𑀕𑁆𑀕𑀼𑀮𑀺 𑀧𑀭𑀕𑁂𑀳𑁂 𑀯𑀲𑀫𑀸𑀦𑁄 𑀦 𑀢𑁂𑀲𑀁 𑀧𑀭𑀺𑀳𑀸𑀦𑀺𑀁 𑀓𑀭𑁄𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀓𑀼𑀮𑀸𑀦𑀺 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀢𑀺𑀬𑀸𑀘𑀦𑀸𑀬 𑀯𑀸 𑀯𑀺𑀜𑁆𑀜𑀢𑁆𑀢𑀺𑀩𑀳𑀼𑀮𑀢𑀸𑀬 𑀯𑀸 𑀓𑀸𑀬𑀤𑁄𑀲𑀩𑀳𑀼𑀮𑀢𑀸𑀬 𑀯𑀸 𑀅𑀢𑀺𑀪𑀸𑀡𑀺𑀢𑀸𑀬 𑀯𑀸 𑀲𑀫𑀸𑀦𑀲𑀼𑀔𑀤𑀼𑀓𑁆𑀔𑀢𑀸𑀬 𑀯𑀸 𑀦 𑀢𑁂𑀲𑀁 𑀓𑁄𑀘𑀺 𑀯𑀺𑀧𑁆𑀧𑀝𑀺𑀲𑀸𑀭𑁄 𑀓𑀭𑀡𑀻𑀬𑁄, 𑀦𑀧𑀺 𑀢𑁂𑀲𑀁 𑀫𑀽𑀮𑀓𑀫𑁆𑀫𑀁 𑀧𑀭𑀺𑀳𑀸𑀧𑁂𑀢𑀩𑁆𑀩𑀁, 𑀲𑀩𑁆𑀩𑀣𑀸 𑀯𑀟𑁆𑀠𑀺 𑀬𑁂𑀯 𑀇𑀘𑁆𑀙𑀺𑀢𑀩𑁆𑀩𑀸. 𑀇𑀤𑀁, 𑀫𑀳𑀸𑀭𑀸𑀚, 𑀯𑀕𑁆𑀕𑀼𑀮𑀺𑀲𑁆𑀲 𑀤𑀼𑀢𑀺𑀬𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑀤𑁂𑀯𑀸𑀢𑀺𑀤𑁂𑀯𑁂𑀦 𑀤𑀻𑀖𑀦𑀺𑀓𑀸𑀬𑀯𑀭𑁂 𑀮𑀓𑁆𑀔𑀡𑀲𑀼𑀢𑁆𑀢𑀦𑁆𑀢𑁂 𑁋

‘‘‘𑀲𑀤𑁆𑀥𑀸𑀬 𑀲𑀻𑀮𑁂𑀦 𑀲𑀼𑀢𑁂𑀦 𑀩𑀼𑀤𑁆𑀥𑀺𑀬𑀸, 𑀘𑀸𑀕𑁂𑀦 𑀥𑀫𑁆𑀫𑁂𑀦 𑀩𑀳𑀽𑀳𑀺 𑀲𑀸𑀥𑀼𑀳𑀺;

𑀥𑀦𑁂𑀦 𑀥𑀜𑁆𑀜𑁂𑀦 𑀘 𑀔𑁂𑀢𑁆𑀢𑀯𑀢𑁆𑀣𑀼𑀦𑀸, 𑀧𑀼𑀢𑁆𑀢𑁂𑀳𑀺 𑀤𑀸𑀭𑁂𑀳𑀺 𑀘𑀢𑀼𑀧𑁆𑀧𑀤𑁂𑀳𑀺 𑀘.

‘‘‘𑀜𑀸𑀢𑀻𑀳𑀺 𑀫𑀺𑀢𑁆𑀢𑁂𑀳𑀺 𑀘 𑀩𑀦𑁆𑀥𑀯𑁂𑀳𑀺, 𑀩𑀮𑁂𑀦 𑀯𑀡𑁆𑀡𑁂𑀦 𑀲𑀼𑀔𑁂𑀦 𑀘𑀽𑀪𑀬𑀁;

𑀓𑀣𑀁 𑀦 𑀳𑀸𑀬𑁂𑀬𑁆𑀬𑀼𑀁 𑀧𑀭𑁂𑀢𑀺 𑀇𑀘𑁆𑀙𑀢𑀺, 𑀅𑀢𑁆𑀣𑀲𑀫𑀺𑀤𑁆𑀥𑀺𑀜𑁆𑀘 𑀧𑀦𑀸𑀪𑀺𑀓𑀗𑁆𑀔𑀢𑀻’’’𑀢𑀺.

𑀯𑀕𑁆𑀕𑀼𑀮𑀺𑀗𑁆𑀕𑀧𑀜𑁆𑀳𑁄 𑀲𑀢𑁆𑀢𑀫𑁄.

𑁮. 𑀚𑀮𑀽𑀓𑀗𑁆𑀕𑀧𑀜𑁆𑀳𑁄

𑁮. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, ‘𑀚𑀮𑀽𑀓𑀸𑀬 𑀏𑀓𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩’𑀦𑁆𑀢𑀺 𑀬𑀁 𑀯𑀤𑁂𑀲𑀺, 𑀓𑀢𑀫𑀁 𑀢𑀁 𑀏𑀓𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩’’𑀦𑁆𑀢𑀺? ‘‘𑀬𑀣𑀸, 𑀫𑀳𑀸𑀭𑀸𑀚, 𑀚𑀮𑀽𑀓𑀸 𑀬𑀢𑁆𑀣 𑀅𑀮𑁆𑀮𑀻𑀬𑀢𑀺, 𑀢𑀢𑁆𑀣𑁂𑀯 𑀤𑀴𑁆𑀳𑀁 𑀅𑀮𑁆𑀮𑀻𑀬𑀺𑀢𑁆𑀯𑀸 𑀭𑀼𑀳𑀺𑀭𑀁 𑀧𑀺𑀯𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀬𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀁 𑀅𑀮𑁆𑀮𑀻𑀬𑀢𑀺, 𑀢𑀁 𑀆𑀭𑀫𑁆𑀫𑀡𑀁 𑀯𑀡𑁆𑀡𑀢𑁄 𑀘 𑀲𑀡𑁆𑀞𑀸𑀦𑀢𑁄 𑀘 𑀤𑀺𑀲𑀢𑁄 𑀘 𑀑𑀓𑀸𑀲𑀢𑁄 𑀘 𑀧𑀭𑀺𑀘𑁆𑀙𑁂𑀤𑀢𑁄 𑀘 𑀮𑀺𑀗𑁆𑀕𑀢𑁄 𑀘 𑀦𑀺𑀫𑀺𑀢𑁆𑀢𑀢𑁄 𑀘 𑀤𑀴𑁆𑀳𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀢𑁂𑀦𑁂𑀯𑀸𑀭𑀫𑁆𑀫𑀡𑁂𑀦 𑀯𑀺𑀫𑀼𑀢𑁆𑀢𑀺𑀭𑀲𑀫𑀲𑁂𑀘𑀦𑀓𑀁 𑀧𑀸𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀚𑀮𑀽𑀓𑀸𑀬 𑀏𑀓𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀣𑁂𑀭𑁂𑀦 𑀅𑀦𑀼𑀭𑀼𑀤𑁆𑀥𑁂𑀦 𑁋

‘‘‘𑀧𑀭𑀺𑀲𑀼𑀤𑁆𑀥𑁂𑀦 𑀘𑀺𑀢𑁆𑀢𑁂𑀦, 𑀆𑀭𑀫𑁆𑀫𑀡𑁂 𑀧𑀢𑀺𑀝𑁆𑀞𑀸𑀬;

𑀢𑁂𑀦 𑀘𑀺𑀢𑁆𑀢𑁂𑀦 𑀧𑀸𑀢𑀩𑁆𑀩𑀁, 𑀯𑀺𑀫𑀼𑀢𑁆𑀢𑀺𑀭𑀲𑀫𑀲𑁂𑀘𑀦’’’𑀦𑁆𑀢𑀺.

𑀚𑀮𑀽𑀓𑀗𑁆𑀕𑀧𑀜𑁆𑀳𑁄 𑀅𑀝𑁆𑀞𑀫𑁄.

𑁯. 𑀲𑀧𑁆𑀧𑀗𑁆𑀕𑀧𑀜𑁆𑀳𑁄

𑁯. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, ‘𑀲𑀧𑁆𑀧𑀲𑁆𑀲 𑀢𑀻𑀡𑀺 𑀅𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻’𑀢𑀺 𑀬𑀁 𑀯𑀤𑁂𑀲𑀺, 𑀓𑀢𑀫𑀸𑀦𑀺 𑀢𑀸𑀦𑀺 𑀢𑀻𑀡𑀺 𑀅𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻’’𑀢𑀺? ‘‘𑀬𑀣𑀸, 𑀫𑀳𑀸𑀭𑀸𑀚, 𑀲𑀧𑁆𑀧𑁄 𑀉𑀭𑁂𑀦 𑀕𑀘𑁆𑀙𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀧𑀜𑁆𑀜𑀸𑀬 𑀘𑀭𑀺𑀢𑀩𑁆𑀩𑀁, 𑀧𑀜𑁆𑀜𑀸𑀬 𑀘𑀭𑀫𑀸𑀦𑀲𑁆𑀲 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑁄 𑀘𑀺𑀢𑁆𑀢𑀁 𑀜𑀸𑀬𑁂 𑀘𑀭𑀢𑀺, 𑀯𑀺𑀮𑀓𑁆𑀔𑀡𑀁 𑀯𑀺𑀯𑀚𑁆𑀚𑁂𑀢𑀺, 𑀲𑀮𑀓𑁆𑀔𑀡𑀁 𑀪𑀸𑀯𑁂𑀢𑀺. 𑀇𑀤𑀁, 𑀫𑀳𑀸𑀭𑀸𑀚, 𑀲𑀧𑁆𑀧𑀲𑁆𑀲 𑀧𑀞𑀫𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀲𑀧𑁆𑀧𑁄 𑀘𑀭𑀫𑀸𑀦𑁄 𑀑𑀲𑀥𑀁 𑀧𑀭𑀺𑀯𑀚𑁆𑀚𑁂𑀦𑁆𑀢𑁄 𑀘𑀭𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀤𑀼𑀘𑁆𑀘𑀭𑀺𑀢𑀁 𑀧𑀭𑀺𑀯𑀚𑁆𑀚𑁂𑀦𑁆𑀢𑁂𑀦 𑀘𑀭𑀺𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀲𑀧𑁆𑀧𑀲𑁆𑀲 𑀤𑀼𑀢𑀺𑀬𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀲𑀧𑁆𑀧𑁄 𑀫𑀦𑀼𑀲𑁆𑀲𑁂 𑀤𑀺𑀲𑁆𑀯𑀸 𑀢𑀧𑁆𑀧𑀢𑀺 [𑀫𑀦𑀼𑀲𑁆𑀲𑀁 𑀤𑀺𑀲𑁆𑀯𑀸 𑀓𑀫𑁆𑀧𑀢𑀺 (𑀓.)] 𑀲𑁄𑀘𑀢𑀺 𑀘𑀺𑀦𑁆𑀢𑀬𑀢𑀺, 𑀏𑀯𑀫𑁂𑀯 𑀔𑁄 𑀫𑀳𑀸𑀭𑀸𑀚 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀓𑀼𑀯𑀺𑀢𑀓𑁆𑀓𑁂, 𑀯𑀺𑀢𑀓𑁆𑀓𑁂𑀢𑁆𑀯𑀸 𑀅𑀭𑀢𑀺𑀁 𑀉𑀧𑁆𑀧𑀸𑀤𑀬𑀺𑀢𑁆𑀯𑀸 𑀢𑀧𑁆𑀧𑀺𑀢𑀩𑁆𑀩𑀁 𑀲𑁄𑀘𑀺𑀢𑀩𑁆𑀩𑀁 𑀘𑀺𑀦𑁆𑀢𑀬𑀺𑀢𑀩𑁆𑀩𑀁 ‘𑀧𑀫𑀸𑀤𑁂𑀦 𑀫𑁂 𑀤𑀺𑀯𑀲𑁄 𑀯𑀻𑀢𑀺𑀦𑀸𑀫𑀺𑀢𑁄, 𑀦 𑀲𑁄 𑀧𑀼𑀦 𑀲𑀓𑁆𑀓𑀸 𑀮𑀤𑁆𑀥𑀼’𑀦𑁆𑀢𑀺. 𑀇𑀤𑀁, 𑀫𑀳𑀸𑀭𑀸𑀚, 𑀲𑀧𑁆𑀧𑀲𑁆𑀲 𑀢𑀢𑀺𑀬𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑀪𑀮𑁆𑀮𑀸𑀝𑀺𑀬𑀚𑀸𑀢𑀓𑁂 𑀤𑁆𑀯𑀺𑀦𑁆𑀦𑀁 𑀓𑀺𑀦𑁆𑀦𑀭𑀸𑀦𑀁 𑁋

‘‘‘𑀫𑀬𑁂𑀓𑀭𑀢𑁆𑀢𑀁 [𑀬𑀫𑁂𑀓𑀭𑀢𑁆𑀢𑀺𑀁 (𑀲𑀻. 𑀧𑀻.)] 𑀯𑀺𑀧𑁆𑀧𑀯𑀲𑀺𑀫𑁆𑀳 𑀮𑀼𑀤𑁆𑀤, 𑀅𑀓𑀸𑀫𑀓𑀸 𑀅𑀜𑁆𑀜𑀫𑀜𑁆𑀜𑀁 𑀲𑀭𑀦𑁆𑀢𑀸;

𑀢𑀫𑁂𑀓𑀭𑀢𑁆𑀢𑀁 [𑀢𑀫𑁂𑀓𑀭𑀢𑁆𑀢𑀺𑀁 (𑀲𑀻. 𑀧𑀻.)] 𑀅𑀦𑀼𑀢𑀧𑁆𑀧𑀫𑀸𑀦𑀸, 𑀲𑁄𑀘𑀸𑀫 ‘𑀲𑀸 𑀭𑀢𑁆𑀢𑀺 𑀧𑀼𑀦 𑀦𑀳𑁂𑀲𑁆𑀲𑀢𑀻’’’𑀢𑀺.

𑀲𑀧𑁆𑀧𑀗𑁆𑀕𑀧𑀜𑁆𑀳𑁄 𑀦𑀯𑀫𑁄.

𑁧𑁦. 𑀅𑀚𑀕𑀭𑀗𑁆𑀕𑀧𑀜𑁆𑀳𑁄

𑁧𑁦. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, ‘𑀅𑀚𑀕𑀭𑀲𑁆𑀲 𑀏𑀓𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩’𑀦𑁆𑀢𑀺 𑀬𑀁 𑀯𑀤𑁂𑀲𑀺, 𑀓𑀢𑀫𑀁 𑀢𑀁 𑀏𑀓𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩’’𑀦𑁆𑀢𑀺? ‘‘𑀬𑀣𑀸, 𑀫𑀳𑀸𑀭𑀸𑀚, 𑀅𑀚𑀕𑀭𑁄 𑀫𑀳𑀢𑀺𑀫𑀳𑀸𑀓𑀸𑀬𑁄 𑀩𑀳𑀽𑀧𑀺 𑀤𑀺𑀯𑀲𑁂 𑀊𑀦𑀽𑀤𑀭𑁄 𑀤𑀻𑀦𑀢𑀭𑁄 𑀓𑀼𑀘𑁆𑀙𑀺𑀧𑀽𑀭𑀁 𑀆𑀳𑀸𑀭𑀁 𑀦 𑀮𑀪𑀢𑀺, 𑀅𑀧𑀭𑀺𑀧𑀼𑀡𑁆𑀡𑁄 𑀬𑁂𑀯 𑀬𑀸𑀯𑀤𑁂𑀯 𑀲𑀭𑀻𑀭𑀬𑀸𑀧𑀦𑀫𑀢𑁆𑀢𑀓𑁂𑀦 𑀬𑀸𑀧𑁂𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑁄 𑀬𑁄𑀕𑀸𑀯𑀘𑀭𑀲𑁆𑀲 𑀪𑀺𑀓𑁆𑀔𑀸𑀘𑀭𑀺𑀬𑀧𑁆𑀧𑀲𑀼𑀢𑀲𑁆𑀲 𑀧𑀭𑀧𑀺𑀡𑁆𑀟𑀫𑀼𑀧𑀕𑀢𑀲𑁆𑀲 𑀧𑀭𑀤𑀺𑀦𑁆𑀦𑀧𑁆𑀧𑀸𑀝𑀺𑀓𑀗𑁆𑀔𑀺𑀲𑁆𑀲 𑀲𑀬𑀁𑀕𑀸𑀳𑀧𑁆𑀧𑀝𑀺𑀯𑀺𑀭𑀢𑀲𑁆𑀲 𑀤𑀼𑀮𑁆𑀮𑀪𑀁 𑀉𑀤𑀭𑀧𑀭𑀺𑀧𑀽𑀭𑀁 𑀆𑀳𑀸𑀭𑀁, 𑀅𑀧𑀺 𑀘 𑀅𑀢𑁆𑀣𑀯𑀲𑀺𑀓𑁂𑀦 𑀓𑀼𑀮𑀧𑀼𑀢𑁆𑀢𑁂𑀦 𑀘𑀢𑁆𑀢𑀸𑀭𑁄 𑀧𑀜𑁆𑀘 𑀆𑀮𑁄𑀧𑁂 𑀅𑀪𑀼𑀜𑁆𑀚𑀺𑀢𑁆𑀯𑀸 𑀅𑀯𑀲𑁂𑀲𑀁 𑀉𑀤𑀓𑁂𑀦 𑀧𑀭𑀺𑀧𑀽𑀭𑁂𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀅𑀚𑀕𑀭𑀲𑁆𑀲 𑀏𑀓𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀣𑁂𑀭𑁂𑀦 𑀲𑀸𑀭𑀺𑀧𑀼𑀢𑁆𑀢𑁂𑀦 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑁋

‘‘‘𑀅𑀮𑁆𑀮𑀁 𑀲𑀼𑀓𑁆𑀔𑀁 𑀯𑀸 𑀪𑀼𑀜𑁆𑀚𑀦𑁆𑀢𑁄, 𑀦 𑀩𑀸𑀴𑁆𑀳𑀁 𑀲𑀼𑀳𑀺𑀢𑁄 𑀲𑀺𑀬𑀸;

𑀊𑀦𑀽𑀤𑀭𑁄 𑀫𑀺𑀢𑀸𑀳𑀸𑀭𑁄, 𑀲𑀢𑁄 𑀪𑀺𑀓𑁆𑀔𑀼 𑀧𑀭𑀺𑀩𑁆𑀩𑀚𑁂.

‘‘‘𑀘𑀢𑁆𑀢𑀸𑀭𑁄 𑀧𑀜𑁆𑀘 𑀆𑀮𑁄𑀧𑁂, 𑀅𑀪𑀼𑀢𑁆𑀯𑀸 𑀉𑀤𑀓𑀁 𑀧𑀺𑀯𑁂;

𑀅𑀮𑀁 𑀨𑀸𑀲𑀼 𑀯𑀺𑀳𑀸𑀭𑀸𑀬, 𑀧𑀳𑀺𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄’’’𑀢𑀺.

𑀅𑀚𑀕𑀭𑀗𑁆𑀕𑀧𑀜𑁆𑀳𑁄 𑀤𑀲𑀫𑁄.

𑀲𑀻𑀳𑀯𑀕𑁆𑀕𑁄 𑀧𑀜𑁆𑀘𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀓𑁂𑀲𑀭𑀻 𑀘𑀓𑁆𑀓𑀯𑀸𑀓𑁄 𑀘, 𑀧𑁂𑀡𑀸𑀳𑀺 𑀖𑀭𑀓𑀧𑁄𑀢𑀓𑁄;

𑀉𑀮𑀽𑀓𑁄 𑀲𑀢𑀧𑀢𑁆𑀢𑁄 𑀘, 𑀯𑀕𑁆𑀕𑀼𑀮𑀺 𑀘 𑀚𑀮𑀽𑀧𑀺𑀓𑀸;

𑀲𑀧𑁆𑀧𑁄 𑀅𑀚𑀕𑀭𑁄 𑀘𑁂𑀯, 𑀯𑀕𑁆𑀕𑁄 𑀢𑁂𑀦 𑀧𑀯𑀼𑀘𑁆𑀘𑀢𑀻𑀢𑀺.