𑁬. 𑀚𑀭𑀲𑀺𑀗𑁆𑀕𑀸𑀮𑀗𑁆𑀕𑀧𑀜𑁆𑀳𑁄

𑁬. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, ‘𑀚𑀭𑀲𑀺𑀗𑁆𑀕𑀸𑀮𑀲𑁆𑀲 𑀤𑁆𑀯𑁂 𑀅𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻’𑀢𑀺 𑀬𑀁 𑀯𑀤𑁂𑀲𑀺, 𑀓𑀢𑀫𑀸𑀦𑀺 𑀢𑀸𑀦𑀺 𑀤𑁆𑀯𑁂 𑀅𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻’’𑀢𑀺? ‘‘𑀬𑀣𑀸, 𑀫𑀳𑀸𑀭𑀸𑀚, 𑀚𑀭𑀲𑀺𑀗𑁆𑀕𑀸𑀮𑁄 𑀪𑁄𑀚𑀦𑀁 𑀧𑀝𑀺𑀮𑀪𑀺𑀢𑁆𑀯𑀸 𑀅𑀚𑀺𑀕𑀼𑀘𑁆𑀙𑀫𑀸𑀦𑁄 𑀬𑀸𑀯𑀤𑀢𑁆𑀣𑀁 𑀆𑀳𑀭𑀬𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀪𑁄𑀚𑀦𑀁 𑀧𑀝𑀺𑀮𑀪𑀺𑀢𑁆𑀯𑀸 𑀅𑀚𑀺𑀕𑀼𑀘𑁆𑀙𑀫𑀸𑀦𑁂𑀦 𑀲𑀭𑀻𑀭𑀬𑀸𑀧𑀦𑀫𑀢𑁆𑀢𑀫𑁂𑀯 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀚𑀭𑀲𑀺𑀗𑁆𑀕𑀸𑀮𑀲𑁆𑀲 𑀧𑀞𑀫𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀣𑁂𑀭𑁂𑀦 𑀫𑀳𑀸𑀓𑀲𑁆𑀲𑀧𑁂𑀦 𑁋

‘‘‘𑀲𑁂𑀦𑀸𑀲𑀦𑀫𑁆𑀳𑀸 𑀑𑀭𑀼𑀬𑁆𑀳, 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺𑀁;

𑀪𑀼𑀜𑁆𑀚𑀦𑁆𑀢𑀁 𑀧𑀼𑀭𑀺𑀲𑀁 𑀓𑀼𑀝𑁆𑀞𑀺𑀁, 𑀲𑀓𑁆𑀓𑀘𑁆𑀘 𑀦𑀁 𑀉𑀧𑀝𑁆𑀞𑀳𑀺𑀁.

‘‘‘𑀲𑁄 𑀫𑁂 𑀧𑀓𑁆𑀓𑁂𑀦 𑀳𑀢𑁆𑀣𑁂𑀦, 𑀆𑀮𑁄𑀧𑀁 𑀉𑀧𑀦𑀸𑀫𑀬𑀺;

𑀆𑀮𑁄𑀧𑀁 𑀧𑀓𑁆𑀔𑀺𑀧𑀦𑁆𑀢𑀲𑁆𑀲, 𑀅𑀗𑁆𑀕𑀼𑀮𑀺𑀧𑁂𑀢𑁆𑀣 𑀙𑀺𑀚𑁆𑀚𑀣.

‘‘‘𑀓𑀼𑀝𑁆𑀝𑀫𑀽𑀮𑀜𑁆𑀘 𑀦𑀺𑀲𑁆𑀲𑀸𑀬, 𑀆𑀮𑁄𑀧𑀁 𑀢𑀁 𑀅𑀪𑀼𑀜𑁆𑀚𑀺𑀲𑀁;

𑀪𑀼𑀜𑁆𑀚𑀫𑀸𑀦𑁂 𑀯𑀸 𑀪𑀼𑀢𑁆𑀢𑁂 𑀯𑀸, 𑀚𑁂𑀕𑀼𑀘𑁆𑀙𑀁 𑀫𑁂 𑀦 𑀯𑀺𑀚𑁆𑀚𑀢𑀻’𑀢𑀺.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀚𑀭𑀲𑀺𑀗𑁆𑀕𑀸𑀮𑁄 𑀪𑁄𑀚𑀦𑀁 𑀧𑀝𑀺𑀮𑀪𑀺𑀢𑁆𑀯𑀸 𑀦 𑀯𑀺𑀘𑀺𑀦𑀸𑀢𑀺 𑀮𑀽𑀔𑀁 𑀯𑀸 𑀧𑀡𑀻𑀢𑀁 𑀯𑀸𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀪𑁄𑀚𑀦𑀁 𑀧𑀝𑀺𑀮𑀪𑀺𑀢𑁆𑀯𑀸 𑀦 𑀯𑀺𑀘𑀺𑀦𑀺𑀢𑀩𑁆𑀩𑀁 ‘𑀮𑀽𑀔𑀁 𑀯𑀸 𑀧𑀡𑀻𑀢𑀁 𑀯𑀸 𑀲𑀫𑁆𑀧𑀦𑁆𑀦𑀁 𑀯𑀸 𑀅𑀲𑀫𑁆𑀧𑀦𑁆𑀦𑀁 𑀯𑀸’𑀢𑀺, 𑀬𑀣𑀸𑀮𑀤𑁆𑀥𑁂𑀦 𑀲𑀦𑁆𑀢𑀼𑀲𑁆𑀲𑀺𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀚𑀭𑀲𑀺𑀗𑁆𑀕𑀸𑀮𑀲𑁆𑀲 𑀤𑀼𑀢𑀺𑀬𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀣𑁂𑀭𑁂𑀦 𑀉𑀧𑀲𑁂𑀦𑁂𑀦 𑀯𑀗𑁆𑀕𑀦𑁆𑀢𑀧𑀼𑀢𑁆𑀢𑁂𑀦 𑁋

‘‘‘𑀮𑀽𑀔𑁂𑀦𑀧𑀺 𑀘 𑀲𑀦𑁆𑀢𑀼𑀲𑁆𑀲𑁂, 𑀦𑀸𑀜𑁆𑀜𑀁 𑀧𑀢𑁆𑀣𑁂 𑀭𑀲𑀁 𑀩𑀳𑀼𑀁;

𑀭𑀲𑁂𑀲𑀼 𑀅𑀦𑀼𑀕𑀺𑀤𑁆𑀥𑀲𑁆𑀲, 𑀛𑀸𑀦𑁂 𑀦 𑀭𑀫𑀢𑁂 [𑀭𑀫𑀢𑀻 (𑀲𑀻. 𑀧𑀻.)] 𑀫𑀦𑁄;

𑀇𑀢𑀭𑀻𑀢𑀭𑁂𑀦 𑀲𑀦𑁆𑀢𑀼𑀝𑁆𑀞𑁄 [𑀲𑀦𑁆𑀢𑀼𑀝𑁆𑀞𑁂 (𑀲𑀻. 𑀧𑀻.)], 𑀲𑀸𑀫𑀜𑁆𑀜𑀁 𑀧𑀭𑀺𑀧𑀽𑀭𑀢𑀻’’’𑀢𑀺.

𑀚𑀭𑀲𑀺𑀗𑁆𑀕𑀸𑀮𑀗𑁆𑀕𑀧𑀜𑁆𑀳𑁄 𑀙𑀝𑁆𑀞𑁄.