𑁪. 𑀉𑀧𑀘𑀺𑀓𑀸𑀯𑀕𑁆𑀕𑁄

𑁧. 𑀉𑀧𑀘𑀺𑀓𑀗𑁆𑀕𑀧𑀜𑁆𑀳𑁄

𑁧. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, ‘𑀉𑀧𑀘𑀺𑀓𑀸𑀬 𑀏𑀓𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩’𑀦𑁆𑀢𑀺 𑀬𑀁 𑀯𑀤𑁂𑀲𑀺, 𑀓𑀢𑀫𑀁 𑀢𑀁 𑀏𑀓𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩’’𑀦𑁆𑀢𑀺? ‘‘𑀬𑀣𑀸, 𑀫𑀳𑀸𑀭𑀸𑀚, 𑀉𑀧𑀘𑀺𑀓𑀸 𑀉𑀧𑀭𑀺 𑀙𑀤𑀦𑀁 𑀓𑀢𑁆𑀯𑀸 𑀅𑀢𑁆𑀢𑀸𑀦𑀁 𑀧𑀺𑀤𑀳𑀺𑀢𑁆𑀯𑀸 𑀕𑁄𑀘𑀭𑀸𑀬 𑀘𑀭𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀲𑀻𑀮𑀲𑀁𑀯𑀭𑀙𑀤𑀦𑀁 𑀓𑀢𑁆𑀯𑀸 𑀫𑀸𑀦𑀲𑀁 𑀧𑀺𑀤𑀳𑀺𑀢𑁆𑀯𑀸 𑀧𑀺𑀡𑁆𑀟𑀸𑀬 𑀘𑀭𑀺𑀢𑀩𑁆𑀩𑀁, 𑀲𑀻𑀮𑀲𑀁𑀯𑀭𑀙𑀤𑀦𑁂𑀦 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀻 𑀬𑁄𑀕𑀸𑀯𑀘𑀭𑁄 𑀲𑀩𑁆𑀩𑀪𑀬𑀲𑀫𑀢𑀺𑀓𑁆𑀓𑀦𑁆𑀢𑁄 𑀳𑁄𑀢𑀺. 𑀇𑀤𑀁, 𑀫𑀳𑀸𑀭𑀸𑀚, 𑀉𑀧𑀘𑀺𑀓𑀸𑀬 𑀏𑀓𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁, 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀣𑁂𑀭𑁂𑀦 𑀉𑀧𑀲𑁂𑀦𑁂𑀦 𑀯𑀗𑁆𑀕𑀦𑁆𑀢𑀧𑀼𑀢𑁆𑀢𑁂𑀦 𑁋

‘‘‘𑀲𑀻𑀮𑀲𑀁𑀯𑀭𑀙𑀤𑀦𑀁, 𑀬𑁄𑀕𑀻 𑀓𑀢𑁆𑀯𑀸𑀦 𑀫𑀸𑀦𑀲𑀁;

𑀅𑀦𑀼𑀧𑀮𑀺𑀢𑁆𑀢𑁄 𑀮𑁄𑀓𑁂𑀦, 𑀪𑀬𑀸 𑀘 𑀧𑀭𑀺𑀫𑀼𑀘𑁆𑀘𑀢𑀻’’’𑀢𑀺.

𑀉𑀧𑀘𑀺𑀓𑀗𑁆𑀕𑀧𑀜𑁆𑀳𑁄 𑀧𑀞𑀫𑁄.

𑁨. 𑀩𑀺𑀴𑀸𑀭𑀗𑁆𑀕𑀧𑀜𑁆𑀳𑁄

𑁨. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, ‘𑀩𑀺𑀴𑀸𑀭𑀲𑁆𑀲 𑀤𑁆𑀯𑁂 𑀅𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻’𑀢𑀺 𑀬𑀁 𑀯𑀤𑁂𑀲𑀺, 𑀓𑀢𑀫𑀸𑀦𑀺 𑀢𑀸𑀦𑀺 𑀤𑁆𑀯𑁂 𑀅𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻’’𑀢𑀺? ‘‘𑀬𑀣𑀸, 𑀫𑀳𑀸𑀭𑀸𑀚, 𑀩𑀺𑀴𑀸𑀭𑁄 𑀕𑀼𑀳𑀸𑀕𑀢𑁄𑀧𑀺 𑀲𑀼𑀲𑀺𑀭𑀕𑀢𑁄𑀧𑀺 𑀳𑀫𑁆𑀫𑀺𑀬𑀦𑁆𑀢𑀭𑀕𑀢𑁄𑀧𑀺 𑀉𑀦𑁆𑀤𑀽𑀭𑀁 𑀬𑁂𑀯 𑀧𑀭𑀺𑀬𑁂𑀲𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀕𑀸𑀫𑀕𑀢𑁂𑀦𑀸𑀧𑀺 𑀅𑀭𑀜𑁆𑀜𑀕𑀢𑁂𑀦𑀸𑀧𑀺 𑀭𑀼𑀓𑁆𑀔𑀫𑀽𑀮𑀕𑀢𑁂𑀦𑀸𑀧𑀺 𑀲𑀼𑀜𑁆𑀜𑀸𑀕𑀸𑀭𑀕𑀢𑁂𑀦𑀸𑀧𑀺 𑀲𑀢𑀢𑀁 𑀲𑀫𑀺𑀢𑀁 𑀅𑀧𑁆𑀧𑀫𑀢𑁆𑀢𑁂𑀦 𑀓𑀸𑀬𑀕𑀢𑀸𑀲𑀢𑀺𑀪𑁄𑀚𑀦𑀁 𑀬𑁂𑀯 𑀧𑀭𑀺𑀬𑁂𑀲𑀺𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀩𑀺𑀴𑀸𑀭𑀲𑁆𑀲 𑀧𑀞𑀫𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀩𑀺𑀴𑀸𑀭𑁄 𑀆𑀲𑀦𑁆𑀦𑁂 𑀬𑁂𑀯 𑀕𑁄𑀘𑀭𑀁 𑀧𑀭𑀺𑀬𑁂𑀲𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀇𑀫𑁂𑀲𑀼 𑀬𑁂𑀯 𑀧𑀜𑁆𑀘𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 𑀉𑀤𑀬𑀩𑁆𑀩𑀬𑀸𑀦𑀼𑀧𑀲𑁆𑀲𑀺𑀦𑀸 𑀯𑀺𑀳𑀭𑀺𑀢𑀩𑁆𑀩𑀁 ‘𑀇𑀢𑀺 𑀭𑀽𑀧𑀁 𑀇𑀢𑀺 𑀭𑀽𑀧𑀲𑁆𑀲 𑀲𑀫𑀼𑀤𑀬𑁄 𑀇𑀢𑀺 𑀭𑀽𑀧𑀲𑁆𑀲 𑀅𑀢𑁆𑀣𑀗𑁆𑀕𑀫𑁄, 𑀇𑀢𑀺 𑀯𑁂𑀤𑀦𑀸 𑀇𑀢𑀺 𑀯𑁂𑀤𑀦𑀸𑀬 𑀲𑀫𑀼𑀤𑀬𑁄 𑀇𑀢𑀺 𑀯𑁂𑀤𑀦𑀸𑀬 𑀅𑀢𑁆𑀣𑀗𑁆𑀕𑀫𑁄, 𑀇𑀢𑀺 𑀲𑀜𑁆𑀜𑀸 𑀇𑀢𑀺 𑀲𑀜𑁆𑀜𑀸𑀬 𑀲𑀫𑀼𑀤𑀬𑁄 𑀇𑀢𑀺 𑀲𑀜𑁆𑀜𑀸𑀬 𑀅𑀢𑁆𑀣𑀗𑁆𑀕𑀫𑁄, 𑀇𑀢𑀺 𑀲𑀗𑁆𑀔𑀸𑀭𑀸 𑀇𑀢𑀺 𑀲𑀗𑁆𑀔𑀸𑀭𑀸𑀦𑀁 𑀲𑀫𑀼𑀤𑀬𑁄 𑀇𑀢𑀺 𑀲𑀗𑁆𑀔𑀸𑀭𑀸𑀦𑀁 𑀅𑀢𑁆𑀣𑀗𑁆𑀕𑀫𑁄, 𑀇𑀢𑀺 𑀯𑀺𑀜𑁆𑀜𑀸𑀡𑀁 𑀇𑀢𑀺 𑀯𑀺𑀜𑁆𑀜𑀸𑀡𑀲𑁆𑀲 𑀲𑀫𑀼𑀤𑀬𑁄 𑀇𑀢𑀺 𑀯𑀺𑀜𑁆𑀜𑀸𑀡𑀲𑁆𑀲 𑀅𑀢𑁆𑀣𑀗𑁆𑀕𑀫𑁄’𑀢𑀺. 𑀇𑀤𑀁, 𑀫𑀳𑀸𑀭𑀸𑀚, 𑀩𑀺𑀴𑀸𑀭𑀲𑁆𑀲 𑀤𑀼𑀢𑀺𑀬𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑀤𑁂𑀯𑀸𑀢𑀺𑀤𑁂𑀯𑁂𑀦 𑁋

‘‘‘𑀦 𑀇𑀢𑁄 𑀤𑀽𑀭𑁂 𑀪𑀯𑀺𑀢𑀩𑁆𑀩𑀁, 𑀪𑀯𑀕𑁆𑀕𑀁 𑀓𑀺𑀁 𑀓𑀭𑀺𑀲𑁆𑀲𑀢𑀺;

𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑁆𑀳𑀺 𑀯𑁄𑀳𑀸𑀭𑁂, 𑀲𑀓𑁂 𑀓𑀸𑀬𑀫𑁆𑀳𑀺 𑀯𑀺𑀦𑁆𑀤𑀣𑀸’’’𑀢𑀺.

𑀩𑀺𑀴𑀸𑀭𑀗𑁆𑀕𑀧𑀜𑁆𑀳𑁄 𑀤𑀼𑀢𑀺𑀬𑁄.

𑁩. 𑀉𑀦𑁆𑀤𑀽𑀭𑀗𑁆𑀕𑀧𑀜𑁆𑀳𑁄

𑁩. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, ‘𑀉𑀦𑁆𑀤𑀽𑀭𑀲𑁆𑀲 [𑀉𑀦𑁆𑀤𑀼𑀭𑀲𑁆𑀲 (𑀲𑁆𑀬𑀸. 𑀓.)] 𑀏𑀓𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩’𑀦𑁆𑀢𑀺 𑀬𑀁 𑀯𑀤𑁂𑀲𑀺, 𑀓𑀢𑀫𑀁 𑀢𑀁 𑀏𑀓𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩’’𑀦𑁆𑀢𑀺? ‘‘𑀬𑀣𑀸, 𑀫𑀳𑀸𑀭𑀸𑀚, 𑀉𑀦𑁆𑀤𑀽𑀭𑁄 𑀇𑀢𑁄𑀘𑀺𑀢𑁄 𑀘 𑀯𑀺𑀘𑀭𑀦𑁆𑀢𑁄 𑀆𑀳𑀸𑀭𑀽𑀧𑀸𑀲𑀻𑀲𑀓𑁄 𑀬𑁂𑀯 𑀘𑀭𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀇𑀢𑁄𑀘𑀺𑀢𑁄 𑀘 𑀯𑀺𑀘𑀭𑀦𑁆𑀢𑁂𑀦 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀽𑀧𑀸𑀲𑀻𑀲𑀓𑁂𑀦𑁂𑀯 𑀪𑀯𑀺𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀉𑀦𑁆𑀤𑀽𑀭𑀲𑁆𑀲 𑀏𑀓𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀣𑁂𑀭𑁂𑀦 𑀉𑀧𑀲𑁂𑀦𑁂𑀦 𑀯𑀗𑁆𑀕𑀦𑁆𑀢𑀧𑀼𑀢𑁆𑀢𑁂𑀦 𑁋

‘‘‘𑀥𑀫𑁆𑀫𑀸𑀲𑀻𑀲𑀁 [𑀥𑀫𑁆𑀫𑀲𑀻𑀲𑀁 (𑀲𑀻. 𑀧𑀻.)] 𑀓𑀭𑀺𑀢𑁆𑀯𑀸𑀦, 𑀯𑀺𑀳𑀭𑀦𑁆𑀢𑁄 𑀯𑀺𑀧𑀲𑁆𑀲𑀓𑁄;

𑀅𑀦𑁄𑀮𑀻𑀦𑁄 𑀯𑀺𑀳𑀭𑀢𑀺, 𑀉𑀧𑀲𑀦𑁆𑀢𑁄 𑀲𑀤𑀸 𑀲𑀢𑁄’’’𑀢𑀺.

𑀉𑀦𑁆𑀤𑀽𑀭𑀗𑁆𑀕𑀧𑀜𑁆𑀳𑁄 𑀢𑀢𑀺𑀬𑁄.

𑁪. 𑀯𑀺𑀘𑁆𑀙𑀺𑀓𑀗𑁆𑀕𑀧𑀜𑁆𑀳𑁄

𑁪. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, ‘𑀯𑀺𑀘𑁆𑀙𑀺𑀓𑀲𑁆𑀲 𑀏𑀓𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩’𑀦𑁆𑀢𑀺 𑀬𑀁 𑀯𑀤𑁂𑀲𑀺, 𑀓𑀢𑀫𑀁 𑀢𑀁 𑀏𑀓𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩’’𑀦𑁆𑀢𑀺? ‘‘𑀬𑀣𑀸, 𑀫𑀳𑀸𑀭𑀸𑀚, 𑀯𑀺𑀘𑁆𑀙𑀺𑀓𑁄 𑀦𑀗𑁆𑀕𑀼𑀮𑀸𑀯𑀼𑀥𑁄 𑀦𑀗𑁆𑀕𑀼𑀮𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 𑀘𑀭𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀜𑀸𑀡𑀸𑀯𑀼𑀥𑁂𑀦 𑀪𑀯𑀺𑀢𑀩𑁆𑀩𑀁, 𑀜𑀸𑀡𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 𑀯𑀺𑀳𑀭𑀺𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀯𑀺𑀘𑁆𑀙𑀺𑀓𑀲𑁆𑀲 𑀏𑀓𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀣𑁂𑀭𑁂𑀦 𑀉𑀧𑀲𑁂𑀦𑁂𑀦 𑀯𑀗𑁆𑀕𑀦𑁆𑀢𑀧𑀼𑀢𑁆𑀢𑁂𑀦 𑁋

‘‘‘𑀜𑀸𑀡𑀔𑀕𑁆𑀕𑀁 𑀕𑀳𑁂𑀢𑁆𑀯𑀸𑀦, 𑀯𑀺𑀳𑀭𑀦𑁆𑀢𑁄 𑀯𑀺𑀧𑀲𑁆𑀲𑀓𑁄;

𑀧𑀭𑀺𑀫𑀼𑀘𑁆𑀘𑀢𑀺 𑀲𑀩𑁆𑀩𑀪𑀬𑀸, 𑀤𑀼𑀧𑁆𑀧𑀲𑀳𑁄 𑀘 𑀲𑁄 𑀪𑀯𑁂’’’𑀢𑀺.

𑀯𑀺𑀘𑁆𑀙𑀺𑀓𑀗𑁆𑀕𑀧𑀜𑁆𑀳𑁄 𑀘𑀢𑀼𑀢𑁆𑀣𑁄.

𑁫. 𑀦𑀓𑀼𑀮𑀗𑁆𑀕𑀧𑀜𑁆𑀳𑁄

𑁫. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, ‘𑀦𑀓𑀼𑀮𑀲𑁆𑀲 𑀏𑀓𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩’𑀦𑁆𑀢𑀺 𑀬𑀁 𑀯𑀤𑁂𑀲𑀺, 𑀓𑀢𑀫𑀁 𑀢𑀁 𑀏𑀓𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩’’𑀦𑁆𑀢𑀺? ‘‘𑀬𑀣𑀸, 𑀫𑀳𑀸𑀭𑀸𑀚, 𑀦𑀓𑀼𑀮𑁄 𑀉𑀭𑀕𑀫𑀼𑀧𑀕𑀘𑁆𑀙𑀦𑁆𑀢𑁄 𑀪𑁂𑀲𑀚𑁆𑀚𑁂𑀦 𑀓𑀸𑀬𑀁 𑀧𑀭𑀺𑀪𑀸𑀯𑁂𑀢𑁆𑀯𑀸 𑀉𑀭𑀕𑀫𑀼𑀧𑀕𑀘𑁆𑀙𑀢𑀺 𑀕𑀳𑁂𑀢𑀼𑀁, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀓𑁄𑀥𑀸𑀖𑀸𑀢𑀩𑀳𑀼𑀮𑀁 𑀓𑀮𑀳𑀯𑀺𑀕𑁆𑀕𑀳𑀯𑀺𑀯𑀸𑀤𑀯𑀺𑀭𑁄𑀥𑀸𑀪𑀺𑀪𑀽𑀢𑀁 𑀮𑁄𑀓𑀫𑀼𑀧𑀕𑀘𑁆𑀙𑀦𑁆𑀢𑁂𑀦 𑀫𑁂𑀢𑁆𑀢𑀸𑀪𑁂𑀲𑀚𑁆𑀚𑁂𑀦 𑀫𑀸𑀦𑀲𑀁 𑀅𑀦𑀼𑀮𑀺𑀫𑁆𑀧𑀺𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀦𑀓𑀼𑀮𑀲𑁆𑀲 𑀏𑀓𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀣𑁂𑀭𑁂𑀦 𑀲𑀸𑀭𑀺𑀧𑀼𑀢𑁆𑀢𑁂𑀦 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑁋

‘‘‘𑀢𑀲𑁆𑀫𑀸 𑀲𑀓𑀁 𑀧𑀭𑁂𑀲𑀫𑁆𑀧𑀺, 𑀓𑀸𑀢𑀩𑁆𑀩𑀸 𑀫𑁂𑀢𑁆𑀢𑀪𑀸𑀯𑀦𑀸;

𑀫𑁂𑀢𑁆𑀢𑀘𑀺𑀢𑁆𑀢𑁂𑀦 𑀨𑀭𑀺𑀢𑀩𑁆𑀩𑀁, 𑀏𑀢𑀁 𑀩𑀼𑀤𑁆𑀥𑀸𑀦 𑀲𑀸𑀲𑀦’’’𑀦𑁆𑀢𑀺.

𑀦𑀓𑀼𑀮𑀗𑁆𑀕𑀧𑀜𑁆𑀳𑁄 𑀧𑀜𑁆𑀘𑀫𑁄.

𑁬. 𑀚𑀭𑀲𑀺𑀗𑁆𑀕𑀸𑀮𑀗𑁆𑀕𑀧𑀜𑁆𑀳𑁄

𑁬. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, ‘𑀚𑀭𑀲𑀺𑀗𑁆𑀕𑀸𑀮𑀲𑁆𑀲 𑀤𑁆𑀯𑁂 𑀅𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻’𑀢𑀺 𑀬𑀁 𑀯𑀤𑁂𑀲𑀺, 𑀓𑀢𑀫𑀸𑀦𑀺 𑀢𑀸𑀦𑀺 𑀤𑁆𑀯𑁂 𑀅𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻’’𑀢𑀺? ‘‘𑀬𑀣𑀸, 𑀫𑀳𑀸𑀭𑀸𑀚, 𑀚𑀭𑀲𑀺𑀗𑁆𑀕𑀸𑀮𑁄 𑀪𑁄𑀚𑀦𑀁 𑀧𑀝𑀺𑀮𑀪𑀺𑀢𑁆𑀯𑀸 𑀅𑀚𑀺𑀕𑀼𑀘𑁆𑀙𑀫𑀸𑀦𑁄 𑀬𑀸𑀯𑀤𑀢𑁆𑀣𑀁 𑀆𑀳𑀭𑀬𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀪𑁄𑀚𑀦𑀁 𑀧𑀝𑀺𑀮𑀪𑀺𑀢𑁆𑀯𑀸 𑀅𑀚𑀺𑀕𑀼𑀘𑁆𑀙𑀫𑀸𑀦𑁂𑀦 𑀲𑀭𑀻𑀭𑀬𑀸𑀧𑀦𑀫𑀢𑁆𑀢𑀫𑁂𑀯 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀚𑀭𑀲𑀺𑀗𑁆𑀕𑀸𑀮𑀲𑁆𑀲 𑀧𑀞𑀫𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀣𑁂𑀭𑁂𑀦 𑀫𑀳𑀸𑀓𑀲𑁆𑀲𑀧𑁂𑀦 𑁋

‘‘‘𑀲𑁂𑀦𑀸𑀲𑀦𑀫𑁆𑀳𑀸 𑀑𑀭𑀼𑀬𑁆𑀳, 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺𑀁;

𑀪𑀼𑀜𑁆𑀚𑀦𑁆𑀢𑀁 𑀧𑀼𑀭𑀺𑀲𑀁 𑀓𑀼𑀝𑁆𑀞𑀺𑀁, 𑀲𑀓𑁆𑀓𑀘𑁆𑀘 𑀦𑀁 𑀉𑀧𑀝𑁆𑀞𑀳𑀺𑀁.

‘‘‘𑀲𑁄 𑀫𑁂 𑀧𑀓𑁆𑀓𑁂𑀦 𑀳𑀢𑁆𑀣𑁂𑀦, 𑀆𑀮𑁄𑀧𑀁 𑀉𑀧𑀦𑀸𑀫𑀬𑀺;

𑀆𑀮𑁄𑀧𑀁 𑀧𑀓𑁆𑀔𑀺𑀧𑀦𑁆𑀢𑀲𑁆𑀲, 𑀅𑀗𑁆𑀕𑀼𑀮𑀺𑀧𑁂𑀢𑁆𑀣 𑀙𑀺𑀚𑁆𑀚𑀣.

‘‘‘𑀓𑀼𑀝𑁆𑀝𑀫𑀽𑀮𑀜𑁆𑀘 𑀦𑀺𑀲𑁆𑀲𑀸𑀬, 𑀆𑀮𑁄𑀧𑀁 𑀢𑀁 𑀅𑀪𑀼𑀜𑁆𑀚𑀺𑀲𑀁;

𑀪𑀼𑀜𑁆𑀚𑀫𑀸𑀦𑁂 𑀯𑀸 𑀪𑀼𑀢𑁆𑀢𑁂 𑀯𑀸, 𑀚𑁂𑀕𑀼𑀘𑁆𑀙𑀁 𑀫𑁂 𑀦 𑀯𑀺𑀚𑁆𑀚𑀢𑀻’𑀢𑀺.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀚𑀭𑀲𑀺𑀗𑁆𑀕𑀸𑀮𑁄 𑀪𑁄𑀚𑀦𑀁 𑀧𑀝𑀺𑀮𑀪𑀺𑀢𑁆𑀯𑀸 𑀦 𑀯𑀺𑀘𑀺𑀦𑀸𑀢𑀺 𑀮𑀽𑀔𑀁 𑀯𑀸 𑀧𑀡𑀻𑀢𑀁 𑀯𑀸𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀪𑁄𑀚𑀦𑀁 𑀧𑀝𑀺𑀮𑀪𑀺𑀢𑁆𑀯𑀸 𑀦 𑀯𑀺𑀘𑀺𑀦𑀺𑀢𑀩𑁆𑀩𑀁 ‘𑀮𑀽𑀔𑀁 𑀯𑀸 𑀧𑀡𑀻𑀢𑀁 𑀯𑀸 𑀲𑀫𑁆𑀧𑀦𑁆𑀦𑀁 𑀯𑀸 𑀅𑀲𑀫𑁆𑀧𑀦𑁆𑀦𑀁 𑀯𑀸’𑀢𑀺, 𑀬𑀣𑀸𑀮𑀤𑁆𑀥𑁂𑀦 𑀲𑀦𑁆𑀢𑀼𑀲𑁆𑀲𑀺𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀚𑀭𑀲𑀺𑀗𑁆𑀕𑀸𑀮𑀲𑁆𑀲 𑀤𑀼𑀢𑀺𑀬𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀣𑁂𑀭𑁂𑀦 𑀉𑀧𑀲𑁂𑀦𑁂𑀦 𑀯𑀗𑁆𑀕𑀦𑁆𑀢𑀧𑀼𑀢𑁆𑀢𑁂𑀦 𑁋

‘‘‘𑀮𑀽𑀔𑁂𑀦𑀧𑀺 𑀘 𑀲𑀦𑁆𑀢𑀼𑀲𑁆𑀲𑁂, 𑀦𑀸𑀜𑁆𑀜𑀁 𑀧𑀢𑁆𑀣𑁂 𑀭𑀲𑀁 𑀩𑀳𑀼𑀁;

𑀭𑀲𑁂𑀲𑀼 𑀅𑀦𑀼𑀕𑀺𑀤𑁆𑀥𑀲𑁆𑀲, 𑀛𑀸𑀦𑁂 𑀦 𑀭𑀫𑀢𑁂 [𑀭𑀫𑀢𑀻 (𑀲𑀻. 𑀧𑀻.)] 𑀫𑀦𑁄;

𑀇𑀢𑀭𑀻𑀢𑀭𑁂𑀦 𑀲𑀦𑁆𑀢𑀼𑀝𑁆𑀞𑁄 [𑀲𑀦𑁆𑀢𑀼𑀝𑁆𑀞𑁂 (𑀲𑀻. 𑀧𑀻.)], 𑀲𑀸𑀫𑀜𑁆𑀜𑀁 𑀧𑀭𑀺𑀧𑀽𑀭𑀢𑀻’’’𑀢𑀺.

𑀚𑀭𑀲𑀺𑀗𑁆𑀕𑀸𑀮𑀗𑁆𑀕𑀧𑀜𑁆𑀳𑁄 𑀙𑀝𑁆𑀞𑁄.

𑁭. 𑀫𑀺𑀕𑀗𑁆𑀕𑀧𑀜𑁆𑀳𑁄

𑁭. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, ‘𑀫𑀺𑀕𑀲𑁆𑀲 𑀢𑀻𑀡𑀺 𑀅𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻’𑀢𑀺 𑀬𑀁 𑀯𑀤𑁂𑀲𑀺, 𑀓𑀢𑀫𑀸𑀦𑀺 𑀢𑀸𑀦𑀺 𑀢𑀻𑀡𑀺 𑀅𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻’’𑀢𑀺? ‘‘𑀬𑀣𑀸, 𑀫𑀳𑀸𑀭𑀸𑀚, 𑀫𑀺𑀕𑁄 𑀤𑀺𑀯𑀸 𑀅𑀭𑀜𑁆𑀜𑁂 𑀘𑀭𑀢𑀺, 𑀭𑀢𑁆𑀢𑀺𑀁 𑀅𑀩𑁆𑀪𑁄𑀓𑀸𑀲𑁂, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀤𑀺𑀯𑀸 𑀅𑀭𑀜𑁆𑀜𑁂 𑀯𑀺𑀳𑀭𑀺𑀢𑀩𑁆𑀩𑀁, 𑀭𑀢𑁆𑀢𑀺𑀁 𑀅𑀩𑁆𑀪𑁄𑀓𑀸𑀲𑁂. 𑀇𑀤𑀁, 𑀫𑀳𑀸𑀭𑀸𑀚, 𑀫𑀺𑀕𑀲𑁆𑀲 𑀧𑀞𑀫𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁.

‘‘𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑀤𑁂𑀯𑀸𑀢𑀺𑀤𑁂𑀯𑁂𑀦 𑀮𑁄𑀫𑀳𑀁𑀲𑀦𑀧𑀭𑀺𑀬𑀸𑀬𑁂 𑁋

‘𑀲𑁄 𑀔𑁄 𑀅𑀳𑀁, 𑀲𑀸𑀭𑀺𑀧𑀼𑀢𑁆𑀢, 𑀬𑀸 𑀢𑀸 𑀭𑀢𑁆𑀢𑀺𑀬𑁄 𑀲𑀻𑀢𑀸 𑀳𑁂𑀫𑀦𑁆𑀢𑀺𑀓𑀸 𑀅𑀦𑁆𑀢𑀭𑀝𑁆𑀞𑀓𑀸 𑀳𑀺𑀫𑀧𑀸𑀢𑀲𑀫𑀬𑀸 [𑀅𑀦𑁆𑀢𑀭𑀝𑁆𑀞𑀓𑁂 𑀳𑀺𑀫𑀧𑀸𑀢𑀲𑀫𑀬𑁂 (𑀲𑀻. 𑀧𑀻. 𑀓.)], 𑀢𑀣𑀸𑀭𑀽𑀧𑀸𑀲𑀼 𑀭𑀢𑁆𑀢𑀻𑀲𑀼 𑀭𑀢𑁆𑀢𑀺𑀁 𑀅𑀩𑁆𑀪𑁄𑀓𑀸𑀲𑁂 𑀯𑀺𑀳𑀭𑀸𑀫𑀺, 𑀤𑀺𑀯𑀸 𑀯𑀦𑀲𑀡𑁆𑀟𑁂. 𑀕𑀺𑀫𑁆𑀳𑀸𑀦𑀁 𑀧𑀘𑁆𑀙𑀺𑀫𑁂 𑀫𑀸𑀲𑁂 𑀤𑀺𑀯𑀸 𑀅𑀩𑁆𑀪𑁄𑀓𑀸𑀲𑁂 𑀯𑀺𑀳𑀭𑀸𑀫𑀺, 𑀭𑀢𑁆𑀢𑀺𑀁 𑀯𑀦𑀲𑀡𑁆𑀟𑁂’𑀢𑀺.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀫𑀺𑀕𑁄 𑀲𑀢𑁆𑀢𑀺𑀫𑁆𑀳𑀺 𑀯𑀸 𑀲𑀭𑁂 𑀯𑀸 𑀑𑀧𑀢𑀦𑁆𑀢𑁂 𑀯𑀜𑁆𑀘𑁂𑀢𑀺 [𑀯𑀚𑁆𑀚𑁂𑀢𑀺 (𑀓.)] 𑀧𑀮𑀸𑀬𑀢𑀺, 𑀦 𑀓𑀸𑀬𑀫𑀼𑀧𑀦𑁂𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀓𑀺𑀮𑁂𑀲𑁂𑀲𑀼 𑀑𑀧𑀢𑀦𑁆𑀢𑁂𑀲𑀼 𑀯𑀜𑁆𑀘𑀬𑀺𑀢𑀩𑁆𑀩𑀁 [𑀯𑀚𑁆𑀚𑀬𑀺𑀢𑀩𑁆𑀩𑀁 (𑀓.)] 𑀧𑀮𑀸𑀬𑀺𑀢𑀩𑁆𑀩𑀁, 𑀦 𑀘𑀺𑀢𑁆𑀢𑀫𑀼𑀧𑀦𑁂𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀫𑀺𑀕𑀲𑁆𑀲 𑀤𑀼𑀢𑀺𑀬𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀫𑀺𑀕𑁄 𑀫𑀦𑀼𑀲𑁆𑀲𑁂 𑀤𑀺𑀲𑁆𑀯𑀸 𑀬𑁂𑀦 𑀯𑀸 𑀢𑁂𑀦 𑀯𑀸 𑀧𑀮𑀸𑀬𑀢𑀺 ‘𑀫𑀸 𑀫𑀁 𑀢𑁂 𑀅𑀤𑁆𑀤𑀲𑀁𑀲𑀽’𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀪𑀡𑁆𑀟𑀦𑀓𑀮𑀳𑀯𑀺𑀕𑁆𑀕𑀳𑀯𑀺𑀯𑀸𑀤𑀲𑀻𑀮𑁂 𑀤𑀼𑀲𑁆𑀲𑀻𑀮𑁂 𑀓𑀼𑀲𑀻𑀢𑁂 𑀲𑀗𑁆𑀕𑀡𑀺𑀓𑀸𑀭𑀸𑀫𑁂 𑀤𑀺𑀲𑁆𑀯𑀸 𑀬𑁂𑀦 𑀯𑀸 𑀢𑁂𑀦 𑀯𑀸 𑀧𑀮𑀸𑀬𑀺𑀢𑀩𑁆𑀩𑀁 ‘𑀫𑀸 𑀫𑀁 𑀢𑁂 𑀅𑀤𑁆𑀤𑀲𑀁𑀲𑀼, 𑀅𑀳𑀜𑁆𑀘 𑀢𑁂 𑀫𑀸 𑀅𑀤𑁆𑀤𑀲’𑀦𑁆𑀢𑀺. 𑀇𑀤𑀁, 𑀫𑀳𑀸𑀭𑀸𑀚, 𑀫𑀺𑀕𑀲𑁆𑀲 𑀢𑀢𑀺𑀬𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀣𑁂𑀭𑁂𑀦 𑀲𑀸𑀭𑀺𑀧𑀼𑀢𑁆𑀢𑁂𑀦 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑁋

‘‘‘𑀫𑀸 𑀫𑁂 𑀓𑀤𑀸𑀘𑀺 𑀧𑀸𑀧𑀺𑀘𑁆𑀙𑁄, 𑀓𑀼𑀲𑀻𑀢𑁄 𑀳𑀻𑀦𑀯𑀻𑀭𑀺𑀬𑁄;

𑀅𑀧𑁆𑀧𑀲𑁆𑀲𑀼𑀢𑁄 𑀅𑀦𑀸𑀘𑀸𑀭𑁄, 𑀲𑀫𑁆𑀫𑀢𑁄 [𑀲𑀫𑁂𑀢𑁄 (𑀲𑀻. 𑀧𑀻.)] 𑀅𑀳𑀼 𑀓𑀢𑁆𑀣𑀘𑀻’’’𑀢𑀺.

𑀫𑀺𑀕𑀗𑁆𑀕𑀧𑀜𑁆𑀳𑁄 𑀲𑀢𑁆𑀢𑀫𑁄.

𑁮. 𑀕𑁄𑀭𑀽𑀧𑀗𑁆𑀕𑀧𑀜𑁆𑀳𑁄

𑁮. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, ‘𑀕𑁄𑀭𑀽𑀧𑀲𑁆𑀲 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻’𑀢𑀺 𑀬𑀁 𑀯𑀤𑁂𑀲𑀺, 𑀓𑀢𑀫𑀸𑀦𑀺 𑀢𑀸𑀦𑀺 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻’’𑀢𑀺? ‘‘𑀬𑀣𑀸, 𑀫𑀳𑀸𑀭𑀸𑀚, 𑀕𑁄𑀭𑀽𑀧𑁄 𑀲𑀓𑀁 𑀕𑁂𑀳𑀁 𑀦 𑀯𑀺𑀚𑀳𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀲𑀓𑁄 𑀓𑀸𑀬𑁄 𑀦 𑀯𑀺𑀚𑀳𑀺𑀢𑀩𑁆𑀩𑁄 ‘𑀅𑀦𑀺𑀘𑁆𑀘𑀼𑀘𑁆𑀙𑀸𑀤𑀦𑀧𑀭𑀺𑀫𑀤𑁆𑀤𑀦𑀪𑁂𑀤𑀦𑀯𑀺𑀓𑀺𑀭𑀡𑀯𑀺𑀤𑁆𑀥𑀁𑀲𑀦𑀥𑀫𑁆𑀫𑁄 𑀅𑀬𑀁 𑀓𑀸𑀬𑁄’𑀢𑀺. 𑀇𑀤𑀁, 𑀫𑀳𑀸𑀭𑀸𑀚, 𑀕𑁄𑀭𑀽𑀧𑀲𑁆𑀲 𑀧𑀞𑀫𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀕𑁄𑀭𑀽𑀧𑁄 𑀆𑀤𑀺𑀦𑁆𑀦𑀥𑀼𑀭𑁄 𑀲𑀼𑀔𑀤𑀼𑀓𑁆𑀔𑁂𑀦 𑀥𑀼𑀭𑀁 𑀯𑀳𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀆𑀤𑀺𑀦𑁆𑀦𑀩𑁆𑀭𑀳𑁆𑀫𑀘𑀭𑀺𑀬𑁂𑀦 𑀲𑀼𑀔𑀤𑀼𑀓𑁆𑀔𑁂𑀦 𑀬𑀸𑀯 𑀚𑀻𑀯𑀺𑀢𑀧𑀭𑀺𑀬𑀸𑀤𑀸𑀦𑀸 𑀆𑀧𑀸𑀡𑀓𑁄𑀝𑀺𑀓𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀕𑁄𑀭𑀽𑀧𑀲𑁆𑀲 𑀤𑀼𑀢𑀺𑀬𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀕𑁄𑀭𑀽𑀧𑁄 𑀙𑀦𑁆𑀤𑁂𑀦 𑀖𑀸𑀬𑀫𑀸𑀦𑁄 𑀧𑀸𑀦𑀻𑀬𑀁 𑀧𑀺𑀯𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀁 𑀅𑀦𑀼𑀲𑀺𑀝𑁆𑀞𑀺 𑀙𑀦𑁆𑀤𑁂𑀦 𑀧𑁂𑀫𑁂𑀦 𑀧𑀲𑀸𑀤𑁂𑀦 𑀖𑀸𑀬𑀫𑀸𑀦𑁂𑀦 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀸. 𑀇𑀤𑀁, 𑀫𑀳𑀸𑀭𑀸𑀚, 𑀕𑁄𑀭𑀽𑀧𑀲𑁆𑀲 𑀢𑀢𑀺𑀬𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀕𑁄𑀭𑀽𑀧𑁄 𑀬𑁂𑀦 𑀓𑁂𑀦𑀘𑀺 𑀯𑀸𑀳𑀺𑀬𑀫𑀸𑀦𑁄 𑀯𑀳𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀣𑁂𑀭𑀦𑀯𑀫𑀚𑁆𑀛𑀺𑀫𑀪𑀺𑀓𑁆𑀔𑀽𑀦𑀫𑁆𑀧𑀺 𑀕𑀺𑀳𑀺𑀉𑀧𑀸𑀲𑀓𑀲𑁆𑀲𑀸𑀧𑀺 𑀑𑀯𑀸𑀤𑀸𑀦𑀼𑀲𑀸𑀲𑀦𑀻 𑀲𑀺𑀭𑀲𑀸 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀸. 𑀇𑀤𑀁, 𑀫𑀳𑀸𑀭𑀸𑀚, 𑀕𑁄𑀭𑀽𑀧𑀲𑁆𑀲 𑀘𑀢𑀼𑀢𑁆𑀣𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀣𑁂𑀭𑁂𑀦 𑀲𑀸𑀭𑀺𑀧𑀼𑀢𑁆𑀢𑁂𑀦 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑁋

‘‘‘𑀢𑀤𑀳𑀼 𑀧𑀩𑁆𑀩𑀚𑀺𑀢𑁄 𑀲𑀦𑁆𑀢𑁄, 𑀚𑀸𑀢𑀺𑀬𑀸 𑀲𑀢𑁆𑀢𑀯𑀲𑁆𑀲𑀺𑀓𑁄;

𑀲𑁄𑀧𑀺 𑀫𑀁 𑀅𑀦𑀼𑀲𑀸𑀲𑁂𑀬𑁆𑀬, 𑀲𑀫𑁆𑀧𑀝𑀺𑀘𑁆𑀙𑀸𑀫𑀺 𑀫𑀢𑁆𑀣𑀓𑁂 [𑀫𑀼𑀤𑁆𑀥𑀦𑀸 (𑀲𑀻.)].

‘‘‘𑀢𑀺𑀩𑁆𑀩𑀁 𑀙𑀦𑁆𑀤𑀜𑁆𑀘 𑀧𑁂𑀫𑀜𑁆𑀘, 𑀢𑀲𑁆𑀫𑀺𑀁 𑀤𑀺𑀲𑁆𑀯𑀸 𑀉𑀧𑀝𑁆𑀞𑀧𑁂;

𑀞𑀧𑁂𑀬𑁆𑀬𑀸𑀘𑀭𑀺𑀬𑀝𑁆𑀞𑀸𑀦𑁂, 𑀲𑀓𑁆𑀓𑀘𑁆𑀘 𑀦𑀁 𑀧𑀼𑀦𑀧𑁆𑀧𑀼𑀦’’’𑀦𑁆𑀢𑀺.

𑀕𑁄𑀭𑀽𑀧𑀗𑁆𑀕𑀧𑀜𑁆𑀳𑁄 𑀅𑀝𑁆𑀞𑀫𑁄.

𑁯. 𑀯𑀭𑀸𑀳𑀗𑁆𑀕𑀧𑀜𑁆𑀳𑁄

𑁯. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, ‘𑀯𑀭𑀸𑀳𑀲𑁆𑀲 𑀤𑁆𑀯𑁂 𑀅𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻’𑀢𑀺 𑀬𑀁 𑀯𑀤𑁂𑀲𑀺, 𑀓𑀢𑀫𑀸𑀦𑀺 𑀢𑀸𑀦𑀺 𑀤𑁆𑀯𑁂 𑀅𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻’’𑀢𑀺? ‘‘𑀬𑀣𑀸, 𑀫𑀳𑀸𑀭𑀸𑀚, 𑀯𑀭𑀸𑀳𑁄 𑀲𑀦𑁆𑀢𑀢𑁆𑀢𑀓𑀞𑀺𑀢𑁂 [𑀲𑀦𑁆𑀢𑀢𑁆𑀢𑀓𑀞𑀺𑀦𑁂 (𑀲𑀻. 𑀧𑀻.)] 𑀕𑀺𑀫𑁆𑀳𑀲𑀫𑀬𑁂 𑀲𑀫𑁆𑀧𑀢𑁆𑀢𑁂 𑀉𑀤𑀓𑀁 𑀉𑀧𑀕𑀘𑁆𑀙𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀤𑁄𑀲𑁂𑀦 𑀘𑀺𑀢𑁆𑀢𑁂 𑀆𑀮𑀼𑀴𑀺𑀢𑀔𑀮𑀺𑀢𑀯𑀺𑀩𑁆𑀪𑀦𑁆𑀢𑀲𑀦𑁆𑀢𑀢𑁆𑀢𑁂 𑀲𑀻𑀢𑀮𑀸𑀫𑀢𑀧𑀡𑀻𑀢𑀫𑁂𑀢𑁆𑀢𑀸𑀪𑀸𑀯𑀦𑀁 𑀉𑀧𑀕𑀦𑁆𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀯𑀭𑀸𑀳𑀲𑁆𑀲 𑀧𑀞𑀫𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀯𑀭𑀸𑀳𑁄 𑀘𑀺𑀓𑁆𑀔𑀮𑁆𑀮𑀫𑀼𑀤𑀓𑀫𑀼𑀧𑀕𑀦𑁆𑀢𑁆𑀯𑀸 𑀦𑀸𑀲𑀺𑀓𑀸𑀬 𑀧𑀣𑀯𑀺𑀁 𑀔𑀡𑀺𑀢𑁆𑀯𑀸 𑀤𑁄𑀡𑀺𑀁 𑀓𑀢𑁆𑀯𑀸 𑀤𑁄𑀡𑀺𑀓𑀸𑀬 𑀲𑀬𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀫𑀸𑀦𑀲𑁂 𑀓𑀸𑀬𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀆𑀭𑀫𑁆𑀫𑀡𑀦𑁆𑀢𑀭𑀕𑀢𑁂𑀦 𑀲𑀬𑀺𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀯𑀭𑀸𑀳𑀲𑁆𑀲 𑀤𑀼𑀢𑀺𑀬𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀣𑁂𑀭𑁂𑀦 𑀧𑀺𑀡𑁆𑀟𑁄𑀮𑀪𑀸𑀭𑀤𑁆𑀯𑀸𑀚𑁂𑀦 𑁋

‘‘‘𑀓𑀸𑀬𑁂 [𑀓𑀸𑀬𑁂𑀦 (𑀓.)] 𑀲𑀪𑀸𑀯𑀁 𑀤𑀺𑀲𑁆𑀯𑀸𑀦, 𑀯𑀺𑀘𑀺𑀦𑀺𑀢𑁆𑀯𑀸 𑀯𑀺𑀧𑀲𑁆𑀲𑀓𑁄;

𑀏𑀓𑀸𑀓𑀺𑀬𑁄 𑀅𑀤𑀼𑀢𑀺𑀬𑁄, 𑀲𑁂𑀢𑀺 𑀆𑀭𑀫𑁆𑀫𑀡𑀦𑁆𑀢𑀭𑁂’’’𑀢𑀺.

𑀯𑀭𑀸𑀳𑀗𑁆𑀕𑀧𑀜𑁆𑀳𑁄 𑀦𑀯𑀫𑁄.

𑁧𑁦. 𑀳𑀢𑁆𑀣𑀺𑀗𑁆𑀕𑀧𑀜𑁆𑀳𑁄

𑁧𑁦. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, ‘𑀳𑀢𑁆𑀣𑀺𑀲𑁆𑀲 𑀧𑀜𑁆𑀘 𑀅𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻’𑀢𑀺 𑀬𑀁 𑀯𑀤𑁂𑀲𑀺, 𑀓𑀢𑀫𑀸𑀦𑀺 𑀢𑀸𑀦𑀺 𑀧𑀜𑁆𑀘 𑀅𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻’’𑀢𑀺? ‘‘𑀬𑀣𑀸, 𑀫𑀳𑀸𑀭𑀸𑀚, 𑀳𑀢𑁆𑀣𑀻 𑀦𑀸𑀫 𑀘𑀭𑀦𑁆𑀢𑁄 𑀬𑁂𑀯 𑀧𑀣𑀯𑀺𑀁 𑀤𑀸𑀮𑁂𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀓𑀸𑀬𑀁 𑀲𑀫𑁆𑀫𑀲𑀫𑀸𑀦𑁂𑀦𑁂𑀯 𑀲𑀩𑁆𑀩𑁂 𑀓𑀺𑀮𑁂𑀲𑀸 𑀤𑀸𑀮𑁂𑀢𑀩𑁆𑀩𑀸. 𑀇𑀤𑀁, 𑀫𑀳𑀸𑀭𑀸𑀚, 𑀳𑀢𑁆𑀣𑀺𑀲𑁆𑀲 𑀧𑀞𑀫𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀳𑀢𑁆𑀣𑀻 𑀲𑀩𑁆𑀩𑀓𑀸𑀬𑁂𑀦𑁂𑀯 𑀅𑀧𑀮𑁄𑀓𑁂𑀢𑀺, 𑀉𑀚𑀼𑀓𑀁 𑀬𑁂𑀯 𑀧𑁂𑀓𑁆𑀔𑀢𑀺, 𑀦 𑀤𑀺𑀲𑀸𑀯𑀺𑀤𑀺𑀲𑀸 𑀯𑀺𑀮𑁄𑀓𑁂𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀲𑀩𑁆𑀩𑀓𑀸𑀬𑁂𑀦 𑀅𑀧𑀮𑁄𑀓𑀺𑀦𑀸 𑀪𑀯𑀺𑀢𑀩𑁆𑀩𑀁, 𑀦 𑀤𑀺𑀲𑀸𑀯𑀺𑀤𑀺𑀲𑀸 𑀯𑀺𑀮𑁄𑀓𑁂𑀢𑀩𑁆𑀩𑀸, 𑀦 𑀉𑀤𑁆𑀥𑀁 𑀉𑀮𑁆𑀮𑁄𑀓𑁂𑀢𑀩𑁆𑀩𑀁, 𑀦 𑀅𑀥𑁄 𑀑𑀮𑁄𑀓𑁂𑀢𑀩𑁆𑀩𑀁, 𑀬𑀼𑀕𑀫𑀢𑁆𑀢𑀧𑁂𑀓𑁆𑀔𑀺𑀦𑀸 𑀪𑀯𑀺𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀳𑀢𑁆𑀣𑀺𑀲𑁆𑀲 𑀤𑀼𑀢𑀺𑀬𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀳𑀢𑁆𑀣𑀻 𑀅𑀦𑀺𑀩𑀤𑁆𑀥𑀲𑀬𑀦𑁄 𑀕𑁄𑀘𑀭𑀸𑀬𑀫𑀦𑀼𑀕𑀦𑁆𑀢𑁆𑀯𑀸 𑀦 𑀢𑀫𑁂𑀯 𑀤𑁂𑀲𑀁 𑀯𑀸𑀲𑀢𑁆𑀣𑀫𑀼𑀧𑀕𑀘𑁆𑀙𑀢𑀺, 𑀦 𑀥𑀼𑀯𑀧𑁆𑀧𑀢𑀺𑀝𑁆𑀞𑀸𑀮𑀬𑁄, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀅𑀦𑀺𑀩𑀤𑁆𑀥𑀲𑀬𑀦𑁂𑀦 𑀪𑀯𑀺𑀢𑀩𑁆𑀩𑀁, 𑀦𑀺𑀭𑀸𑀮𑀬𑁂𑀦 𑀧𑀺𑀡𑁆𑀟𑀸𑀬 𑀕𑀦𑁆𑀢𑀩𑁆𑀩𑀁, 𑀬𑀤𑀺 𑀧𑀲𑁆𑀲𑀢𑀺 𑀯𑀺𑀧𑀲𑁆𑀲𑀓𑁄 𑀫𑀦𑀼𑀜𑁆𑀜𑀁 𑀧𑀢𑀺𑀭𑀽𑀧𑀁 𑀭𑀼𑀘𑀺𑀭𑀤𑁂𑀲𑁂 𑀪𑀯𑀁 𑀫𑀡𑁆𑀟𑀧𑀁 𑀯𑀸 𑀭𑀼𑀓𑁆𑀔𑀫𑀽𑀮𑀁 𑀯𑀸 𑀕𑀼𑀳𑀁 𑀯𑀸 𑀧𑀩𑁆𑀪𑀸𑀭𑀁 𑀯𑀸, 𑀢𑀢𑁆𑀣𑁂𑀯 𑀯𑀸𑀲𑀫𑀼𑀧𑀕𑀦𑁆𑀢𑀩𑁆𑀩𑀁, 𑀥𑀼𑀯𑀧𑁆𑀧𑀢𑀺𑀝𑁆𑀞𑀸𑀮𑀬𑁄 𑀦 𑀓𑀸𑀢𑀩𑁆𑀩𑁄. 𑀇𑀤𑀁, 𑀫𑀳𑀸𑀭𑀸𑀚, 𑀳𑀢𑁆𑀣𑀺𑀲𑁆𑀲 𑀢𑀢𑀺𑀬𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀳𑀢𑁆𑀣𑀻 𑀉𑀤𑀓𑀁 𑀑𑀕𑀸𑀳𑀺𑀢𑁆𑀯𑀸 𑀲𑀼𑀘𑀺𑀯𑀺𑀫𑀮𑀲𑀻𑀢𑀮𑀲𑀮𑀺𑀮𑀧𑀭𑀺𑀧𑀼𑀡𑁆𑀡𑀁 𑀓𑀼𑀫𑀼𑀤𑀼𑀧𑁆𑀧𑀮𑀧𑀤𑀼𑀫𑀧𑀼𑀡𑁆𑀟𑀭𑀻𑀓𑀲𑀜𑁆𑀙𑀦𑁆𑀦𑀁 𑀫𑀳𑀢𑀺𑀫𑀳𑀦𑁆𑀢𑀁 𑀧𑀤𑀼𑀫𑀲𑀭𑀁 𑀑𑀕𑀸𑀳𑀺𑀢𑁆𑀯𑀸 𑀓𑀻𑀴𑀢𑀺 𑀕𑀚𑀯𑀭𑀓𑀻𑀴𑀁, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀲𑀼𑀘𑀺𑀯𑀺𑀫𑀮𑀯𑀺𑀧𑁆𑀧𑀲𑀦𑁆𑀦𑀫𑀦𑀸𑀯𑀺𑀮𑀥𑀫𑁆𑀫𑀯𑀭𑀯𑀸𑀭𑀺𑀧𑀼𑀡𑁆𑀡𑀁 𑀯𑀺𑀫𑀼𑀢𑁆𑀢𑀺𑀓𑀼𑀲𑀼𑀫𑀲𑀜𑁆𑀙𑀦𑁆𑀦𑀁 𑀫𑀳𑀸𑀲𑀢𑀺𑀧𑀝𑁆𑀞𑀸𑀦𑀧𑁄𑀓𑁆𑀔𑀭𑀡𑀺𑀁 𑀑𑀕𑀸𑀳𑀺𑀢𑁆𑀯𑀸 𑀜𑀸𑀡𑁂𑀦 𑀲𑀗𑁆𑀔𑀸𑀭𑀸 𑀑𑀥𑀼𑀦𑀺𑀢𑀩𑁆𑀩𑀸 𑀯𑀺𑀥𑀼𑀦𑀺𑀢𑀩𑁆𑀩𑀸, 𑀬𑁄𑀕𑀸𑀯𑀘𑀭𑀓𑀻𑀴𑀸 𑀓𑀻𑀴𑀺𑀢𑀩𑁆𑀩𑀸. 𑀇𑀤𑀁, 𑀫𑀳𑀸𑀭𑀸𑀚, 𑀳𑀢𑁆𑀣𑀺𑀲𑁆𑀲 𑀘𑀢𑀼𑀢𑁆𑀣𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀳𑀢𑁆𑀣𑀻 𑀲𑀢𑁄 𑀧𑀸𑀤𑀁 𑀉𑀤𑁆𑀥𑀭𑀢𑀺, 𑀲𑀢𑁄 𑀧𑀸𑀤𑀁 𑀦𑀺𑀓𑁆𑀔𑀺𑀧𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀲𑀢𑁂𑀦 𑀲𑀫𑁆𑀧𑀚𑀸𑀦𑁂𑀦 𑀧𑀸𑀤𑀁 𑀉𑀤𑁆𑀥𑀭𑀺𑀢𑀩𑁆𑀩𑀁, 𑀲𑀢𑁂𑀦 𑀲𑀫𑁆𑀧𑀚𑀸𑀦𑁂𑀦 𑀧𑀸𑀤𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁, 𑀅𑀪𑀺𑀓𑁆𑀓𑀫𑀧𑀝𑀺𑀓𑁆𑀓𑀫𑁂 𑀲𑀫𑀺𑀜𑁆𑀚𑀦𑀧𑀲𑀸𑀭𑀡𑁂 𑀲𑀩𑁆𑀩𑀢𑁆𑀣 𑀲𑀢𑁂𑀦 𑀲𑀫𑁆𑀧𑀚𑀸𑀦𑁂𑀦 𑀪𑀯𑀺𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀳𑀢𑁆𑀣𑀺𑀲𑁆𑀲 𑀧𑀜𑁆𑀘𑀫𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑀤𑁂𑀯𑀸𑀢𑀺𑀤𑁂𑀯𑁂𑀦 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑀯𑀭𑁂 𑁋

‘‘‘𑀓𑀸𑀬𑁂𑀦 𑀲𑀁𑀯𑀭𑁄 𑀲𑀸𑀥𑀼, 𑀲𑀸𑀥𑀼 𑀯𑀸𑀘𑀸𑀬 𑀲𑀁𑀯𑀭𑁄;

𑀫𑀦𑀲𑀸 𑀲𑀁𑀯𑀭𑁄 𑀲𑀸𑀥𑀼, 𑀲𑀸𑀥𑀼 𑀲𑀩𑁆𑀩𑀢𑁆𑀣 𑀲𑀁𑀯𑀭𑁄;

𑀲𑀩𑁆𑀩𑀢𑁆𑀣 𑀲𑀁𑀯𑀼𑀢𑁄 𑀮𑀚𑁆𑀚𑀻, 𑀭𑀓𑁆𑀔𑀺𑀢𑁄𑀢𑀺 𑀧𑀯𑀼𑀘𑁆𑀘𑀢𑀻’’’𑀢𑀺.

𑀳𑀢𑁆𑀣𑀺𑀗𑁆𑀕𑀧𑀜𑁆𑀳𑁄 𑀤𑀲𑀫𑁄.𑀉𑀧𑀘𑀺𑀓𑀸𑀯𑀕𑁆𑀕𑁄 𑀘𑀢𑀼𑀢𑁆𑀣𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀉𑀧𑀘𑀺𑀓𑀸 𑀩𑀺𑀴𑀸𑀭𑁄 𑀘, 𑀉𑀦𑁆𑀤𑀽𑀭𑁄 𑀯𑀺𑀘𑁆𑀙𑀺𑀓𑁂𑀦 𑀘;

𑀦𑀓𑀼𑀮𑁄 𑀲𑀺𑀗𑁆𑀕𑀸𑀮𑁄 𑀫𑀺𑀕𑁄,

𑀕𑁄𑀭𑀽𑀧𑁄 𑀯𑀭𑀸𑀳𑁄 𑀳𑀢𑁆𑀣𑀺𑀦𑀸 𑀤𑀲𑀸𑀢𑀺.