𑁧. 𑀕𑀤𑁆𑀭𑀪𑀯𑀕𑁆𑀕𑁄

𑁧. 𑀕𑀤𑁆𑀭𑀪𑀗𑁆𑀕𑀧𑀜𑁆𑀳𑁄

𑁧. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, ‘𑀕𑀤𑁆𑀭𑀪𑀲𑁆𑀲 𑀏𑀓𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩’𑀦𑁆𑀢𑀺 𑀬𑀁 𑀯𑀤𑁂𑀲𑀺, 𑀓𑀢𑀫𑀁 𑀢𑀁 𑀏𑀓𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩’’𑀦𑁆𑀢𑀺? ‘‘𑀬𑀣𑀸, 𑀫𑀳𑀸𑀭𑀸𑀚, 𑀕𑀤𑁆𑀭𑀪𑁄 𑀦𑀸𑀫 𑀲𑀗𑁆𑀓𑀸𑀭𑀓𑀽𑀝𑁂𑀧𑀺 𑀘𑀢𑀼𑀓𑁆𑀓𑁂𑀧𑀺 𑀲𑀺𑀗𑁆𑀖𑀸𑀝𑀓𑁂𑀧𑀺 𑀕𑀸𑀫𑀤𑁆𑀯𑀸𑀭𑁂𑀧𑀺 𑀣𑀼𑀲𑀭𑀸𑀲𑀺𑀫𑁆𑀳𑀺𑀧𑀺 𑀬𑀢𑁆𑀣 𑀓𑀢𑁆𑀣𑀘𑀺 𑀲𑀬𑀢𑀺, 𑀦 𑀲𑀬𑀦𑀩𑀳𑀼𑀮𑁄 𑀳𑁄𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀢𑀺𑀡𑀲𑀦𑁆𑀣𑀸𑀭𑁂𑀧𑀺 𑀧𑀡𑁆𑀡𑀲𑀦𑁆𑀣𑀸𑀭𑁂𑀧𑀺 𑀓𑀝𑁆𑀞𑀫𑀜𑁆𑀘𑀓𑁂𑀧𑀺 𑀙𑀫𑀸𑀬𑀧𑀺 𑀬𑀢𑁆𑀣 𑀓𑀢𑁆𑀣𑀘𑀺 𑀘𑀫𑁆𑀫𑀔𑀡𑁆𑀟𑀁 𑀧𑀢𑁆𑀣𑀭𑀺𑀢𑁆𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀲𑀬𑀺𑀢𑀩𑁆𑀩𑀁, 𑀦 𑀲𑀬𑀦𑀩𑀳𑀼𑀮𑁂𑀦 𑀪𑀯𑀺𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀕𑀤𑁆𑀭𑀪𑀲𑁆𑀲 𑀏𑀓𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑀤𑁂𑀯𑀸𑀢𑀺𑀤𑁂𑀯𑁂𑀦 ‘𑀓𑀮𑀺𑀗𑁆𑀕𑀭𑀽𑀧𑀥𑀸𑀦𑀸, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀫𑀫 𑀲𑀸𑀯𑀓𑀸 𑀯𑀺𑀳𑀭𑀦𑁆𑀢𑀺 𑀅𑀧𑁆𑀧𑀫𑀢𑁆𑀢𑀸 𑀆𑀢𑀸𑀧𑀺𑀦𑁄 𑀧𑀥𑀸𑀦𑀲𑁆𑀫𑀺’𑀦𑁆𑀢𑀺. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀣𑁂𑀭𑁂𑀦 𑀲𑀸𑀭𑀺𑀧𑀼𑀢𑁆𑀢𑁂𑀦 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸𑀧𑀺 𑁋

‘‘‘𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀺𑀦𑁆𑀦𑀲𑁆𑀲, 𑀚𑀡𑁆𑀡𑀼𑀓𑁂𑀦𑀸𑀪𑀺𑀯𑀲𑁆𑀲𑀢𑀺;

𑀅𑀮𑀁 𑀨𑀸𑀲𑀼𑀯𑀺𑀳𑀸𑀭𑀸𑀬, 𑀧𑀳𑀺𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄’’’𑀢𑀺.

𑀕𑀤𑁆𑀭𑀪𑀗𑁆𑀕𑀧𑀜𑁆𑀳𑁄 𑀧𑀞𑀫𑁄.

𑁨. 𑀓𑀼𑀓𑁆𑀓𑀼𑀝𑀗𑁆𑀕𑀧𑀜𑁆𑀳𑁄

𑁨. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, ‘𑀓𑀼𑀓𑁆𑀓𑀼𑀝𑀲𑁆𑀲 𑀧𑀜𑁆𑀘 𑀅𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻’𑀢𑀺 𑀬𑀁 𑀯𑀤𑁂𑀲𑀺, 𑀓𑀢𑀫𑀸𑀦𑀺 𑀢𑀸𑀦𑀺 𑀧𑀜𑁆𑀘 𑀅𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻’’𑀢𑀺? ‘‘𑀬𑀣𑀸, 𑀫𑀳𑀸𑀭𑀸𑀚, 𑀓𑀼𑀓𑁆𑀓𑀼𑀝𑁄 𑀓𑀸𑀮𑁂𑀦 𑀲𑀫𑀬𑁂𑀦 𑀧𑀝𑀺𑀲𑀮𑁆𑀮𑀻𑀬𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀓𑀸𑀮𑁂𑀦 𑀲𑀫𑀬𑁂𑀦𑁂𑀯 𑀘𑁂𑀢𑀺𑀬𑀗𑁆𑀕𑀡𑀁 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀧𑀸𑀦𑀻𑀬𑀁 𑀧𑀭𑀺𑀪𑁄𑀚𑀦𑀻𑀬𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀲𑀭𑀻𑀭𑀁 𑀧𑀝𑀺𑀚𑀕𑁆𑀕𑀺𑀢𑁆𑀯𑀸 𑀦𑀳𑀸𑀬𑀺𑀢𑁆𑀯𑀸 𑀘𑁂𑀢𑀺𑀬𑀁 𑀯𑀦𑁆𑀤𑀺𑀢𑁆𑀯𑀸 𑀯𑀼𑀟𑁆𑀠𑀸𑀦𑀁 𑀪𑀺𑀓𑁆𑀔𑀽𑀦𑀁 𑀤𑀲𑁆𑀲𑀦𑀸𑀬 𑀕𑀦𑁆𑀢𑁆𑀯𑀸 𑀓𑀸𑀮𑁂𑀦 𑀲𑀫𑀬𑁂𑀦 𑀲𑀼𑀜𑁆𑀜𑀸𑀕𑀸𑀭𑀁 𑀧𑀯𑀺𑀲𑀺𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀓𑀼𑀓𑁆𑀓𑀼𑀝𑀲𑁆𑀲 𑀧𑀞𑀫𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀓𑀼𑀓𑁆𑀓𑀼𑀝𑁄 𑀓𑀸𑀮𑁂𑀦 𑀲𑀫𑀬𑁂𑀦𑁂𑀯 𑀯𑀼𑀝𑁆𑀞𑀸𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀓𑀸𑀮𑁂𑀦 𑀲𑀫𑀬𑁂𑀦𑁂𑀯 𑀯𑀼𑀝𑁆𑀞𑀳𑀺𑀢𑁆𑀯𑀸 𑀘𑁂𑀢𑀺𑀬𑀗𑁆𑀕𑀡𑀁 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀧𑀸𑀦𑀻𑀬𑀁 𑀧𑀭𑀺𑀪𑁄𑀚𑀦𑀻𑀬𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀲𑀭𑀻𑀭𑀁 𑀧𑀝𑀺𑀚𑀕𑁆𑀕𑀺𑀢𑁆𑀯𑀸 𑀘𑁂𑀢𑀺𑀬𑀁 𑀯𑀦𑁆𑀤𑀺𑀢𑁆𑀯𑀸 𑀧𑀼𑀦𑀤𑁂𑀯 𑀲𑀼𑀜𑁆𑀜𑀸𑀕𑀸𑀭𑀁 𑀧𑀯𑀺𑀲𑀺𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀓𑀼𑀓𑁆𑀓𑀼𑀝𑀲𑁆𑀲 𑀤𑀼𑀢𑀺𑀬𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀓𑀼𑀓𑁆𑀓𑀼𑀝𑁄 𑀧𑀣𑀯𑀺𑀁 𑀔𑀡𑀺𑀢𑁆𑀯𑀸 𑀔𑀡𑀺𑀢𑁆𑀯𑀸 𑀅𑀚𑁆𑀛𑁄𑀳𑀸𑀭𑀁 𑀅𑀚𑁆𑀛𑁄𑀳𑀭𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀅𑀚𑁆𑀛𑁄𑀳𑀸𑀭𑀁 𑀅𑀚𑁆𑀛𑁄𑀳𑀭𑀺𑀢𑀩𑁆𑀩𑀁 ‘𑀦𑁂𑀯 𑀤𑀯𑀸𑀬 𑀦 𑀫𑀤𑀸𑀬 𑀦 𑀫𑀡𑁆𑀟𑀦𑀸𑀬 𑀦 𑀯𑀺𑀪𑀽𑀲𑀦𑀸𑀬, 𑀬𑀸𑀯𑀤𑁂𑀯 𑀇𑀫𑀲𑁆𑀲 𑀓𑀸𑀬𑀲𑁆𑀲 𑀞𑀺𑀢𑀺𑀬𑀸 𑀬𑀸𑀧𑀦𑀸𑀬 𑀯𑀺𑀳𑀺𑀁𑀲𑀽𑀧𑀭𑀢𑀺𑀬𑀸 𑀩𑁆𑀭𑀳𑁆𑀫𑀘𑀭𑀺𑀬𑀸𑀦𑀼𑀕𑁆𑀕𑀳𑀸𑀬, 𑀇𑀢𑀺 𑀧𑀼𑀭𑀸𑀡𑀜𑁆𑀘 𑀯𑁂𑀤𑀦𑀁 𑀧𑀝𑀺𑀳𑀗𑁆𑀔𑀸𑀫𑀺 𑀦𑀯𑀜𑁆𑀘 𑀯𑁂𑀤𑀦𑀁 𑀦 𑀉𑀧𑁆𑀧𑀸𑀤𑁂𑀲𑁆𑀲𑀸𑀫𑀺, 𑀬𑀸𑀢𑁆𑀭𑀸 𑀘 𑀫𑁂 𑀪𑀯𑀺𑀲𑁆𑀲𑀢𑀺 𑀅𑀦𑀯𑀚𑁆𑀚𑀢𑀸 𑀘 𑀨𑀸𑀲𑀼𑀯𑀺𑀳𑀸𑀭𑁄 𑀘𑀸’𑀢𑀺. 𑀇𑀤𑀁, 𑀫𑀳𑀸𑀭𑀸𑀚, 𑀓𑀼𑀓𑁆𑀓𑀼𑀝𑀲𑁆𑀲 𑀢𑀢𑀺𑀬𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑀤𑁂𑀯𑀸𑀢𑀺𑀤𑁂𑀯𑁂𑀦 𑁋

‘‘‘𑀓𑀦𑁆𑀢𑀸𑀭𑁂 𑀧𑀼𑀢𑁆𑀢𑀫𑀁𑀲𑀁𑀯, 𑀅𑀓𑁆𑀔𑀲𑁆𑀲𑀩𑁆𑀪𑀜𑁆𑀚𑀦𑀁 𑀬𑀣𑀸;

𑀏𑀯𑀁 𑀆𑀳𑀭𑀺 𑀆𑀳𑀸𑀭𑀁, 𑀬𑀸𑀧𑀦𑀢𑁆𑀣𑀫𑀫𑀼𑀘𑁆𑀙𑀺𑀢𑁄’𑀢𑀺.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀓𑀼𑀓𑁆𑀓𑀼𑀝𑁄 𑀲𑀘𑀓𑁆𑀔𑀼𑀓𑁄𑀧𑀺 𑀭𑀢𑁆𑀢𑀺𑀁 𑀅𑀦𑁆𑀥𑁄 𑀳𑁄𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀅𑀦𑀦𑁆𑀥𑁂𑀦𑁂𑀯 𑀅𑀦𑁆𑀥𑁂𑀦 𑀯𑀺𑀬 𑀪𑀯𑀺𑀢𑀩𑁆𑀩𑀁, 𑀅𑀭𑀜𑁆𑀜𑁂𑀧𑀺 𑀕𑁄𑀘𑀭𑀕𑀸𑀫𑁂 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁂𑀦𑀧𑀺 𑀭𑀚𑀦𑀻𑀬𑁂𑀲𑀼 𑀭𑀽𑀧𑀲𑀤𑁆𑀤𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑀥𑀫𑁆𑀫𑁂𑀲𑀼 𑀅𑀦𑁆𑀥𑁂𑀦 𑀩𑀥𑀺𑀭𑁂𑀦 𑀫𑀽𑀕𑁂𑀦 𑀯𑀺𑀬 𑀪𑀯𑀺𑀢𑀩𑁆𑀩𑀁, 𑀦 𑀦𑀺𑀫𑀺𑀢𑁆𑀢𑀁 𑀕𑀳𑁂𑀢𑀩𑁆𑀩𑀁, 𑀦𑀸𑀦𑀼𑀩𑁆𑀬𑀜𑁆𑀚𑀦𑀁 𑀕𑀳𑁂𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀓𑀼𑀓𑁆𑀓𑀼𑀝𑀲𑁆𑀲 𑀘𑀢𑀼𑀢𑁆𑀣𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀣𑁂𑀭𑁂𑀦 𑀫𑀳𑀸𑀓𑀘𑁆𑀘𑀸𑀬𑀦𑁂𑀦 𑁋

‘𑀘𑀓𑁆𑀔𑀼𑀫𑀸𑀲𑁆𑀲 𑀬𑀣𑀸 𑀅𑀦𑁆𑀥𑁄, 𑀲𑁄𑀢𑀯𑀸 𑀩𑀥𑀺𑀭𑁄 𑀬𑀣𑀸;

𑀧𑀜𑁆𑀜𑀯𑀸𑀲𑁆𑀲 [𑀚𑀺𑀯𑁆𑀳𑀸𑀯𑀲𑁆𑀲 (𑀲𑀻. 𑀧𑀻.)] 𑀬𑀣𑀸 𑀫𑀽𑀕𑁄, 𑀩𑀮𑀯𑀸 𑀤𑀼𑀩𑁆𑀩𑀮𑁄𑀭𑀺𑀯;

𑀅𑀢𑁆𑀢𑀅𑀢𑁆𑀣𑁂 [𑀅𑀣 𑀅𑀢𑁆𑀣𑁂 (𑀲𑀻. 𑀧𑀻.)] 𑀲𑀫𑀼𑀧𑁆𑀧𑀦𑁆𑀦𑁂, 𑀲𑀬𑁂𑀣 𑀫𑀢𑀲𑀸𑀬𑀺𑀓’𑀦𑁆𑀢𑀺.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀓𑀼𑀓𑁆𑀓𑀼𑀝𑁄 𑀮𑁂𑀟𑁆𑀟𑀼𑀤𑀡𑁆𑀟𑀮𑀕𑀼𑀴𑀫𑀼𑀕𑁆𑀕𑀭𑁂𑀳𑀺 𑀧𑀭𑀺𑀧𑀸𑀢𑀺𑀬𑀦𑁆𑀢𑁄𑀧𑀺 𑀲𑀓𑀁 𑀕𑁂𑀳𑀁 𑀦 𑀯𑀺𑀚𑀳𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀘𑀻𑀯𑀭𑀓𑀫𑁆𑀫𑀁 𑀓𑀭𑁄𑀦𑁆𑀢𑁂𑀦𑀧𑀺 𑀦𑀯𑀓𑀫𑁆𑀫𑀁 𑀓𑀭𑁄𑀦𑁆𑀢𑁂𑀦𑀧𑀺 𑀯𑀢𑁆𑀢𑀧𑁆𑀧𑀝𑀺𑀯𑀢𑁆𑀢𑀁 𑀓𑀭𑁄𑀦𑁆𑀢𑁂𑀦𑀧𑀺 𑀉𑀤𑁆𑀤𑀺𑀲𑀦𑁆𑀢𑁂𑀦𑀧𑀺 𑀉𑀤𑁆𑀤𑀺𑀲𑀸𑀧𑁂𑀦𑁆𑀢𑁂𑀦𑀧𑀺 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁄 𑀦 𑀯𑀺𑀚𑀳𑀺𑀢𑀩𑁆𑀩𑁄, 𑀲𑀓𑀁 𑀔𑁄 𑀧𑀦𑁂𑀢𑀁, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑁄 𑀕𑁂𑀳𑀁, 𑀬𑀤𑀺𑀤𑀁 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁄. 𑀇𑀤𑀁, 𑀫𑀳𑀸𑀭𑀸𑀚, 𑀓𑀼𑀓𑁆𑀓𑀼𑀝𑀲𑁆𑀲 𑀧𑀜𑁆𑀘𑀫𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑀤𑁂𑀯𑀸𑀢𑀺𑀤𑁂𑀯𑁂𑀦 ‘𑀓𑁄 𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀕𑁄𑀘𑀭𑁄 𑀲𑀓𑁄 𑀧𑁂𑀢𑁆𑀢𑀺𑀓𑁄 𑀯𑀺𑀲𑀬𑁄? 𑀬𑀤𑀺𑀤𑀁 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸’𑀢𑀺. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀣𑁂𑀭𑁂𑀦 𑀲𑀸𑀭𑀺𑀧𑀼𑀢𑁆𑀢𑁂𑀦 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸𑀧𑀺 𑁋

‘‘‘𑀬𑀣𑀸 𑀲𑀼𑀤𑀦𑁆𑀢𑁄 𑀫𑀸𑀢𑀗𑁆𑀕𑁄, 𑀲𑀓𑀁 𑀲𑁄𑀡𑁆𑀟𑀁 𑀦 𑀫𑀤𑁆𑀤𑀢𑀺;

𑀪𑀓𑁆𑀔𑀸𑀪𑀓𑁆𑀔𑀁 𑀯𑀺𑀚𑀸𑀦𑀸𑀢𑀺, 𑀅𑀢𑁆𑀢𑀦𑁄 𑀯𑀼𑀢𑁆𑀢𑀺𑀓𑀧𑁆𑀧𑀦𑀁.

‘‘‘𑀢𑀣𑁂𑀯 𑀩𑀼𑀤𑁆𑀥𑀧𑀼𑀢𑁆𑀢𑁂𑀦, 𑀅𑀧𑁆𑀧𑀫𑀢𑁆𑀢𑁂𑀦 𑀯𑀸 𑀧𑀦;

𑀚𑀺𑀦𑀯𑀘𑀦𑀁 𑀦 𑀫𑀤𑁆𑀤𑀺𑀢𑀩𑁆𑀩𑀁, 𑀫𑀦𑀲𑀺𑀓𑀸𑀭𑀯𑀭𑀼𑀢𑁆𑀢𑀫’’’𑀦𑁆𑀢𑀺.

𑀓𑀼𑀓𑁆𑀓𑀼𑀝𑀗𑁆𑀕𑀧𑀜𑁆𑀳𑁄 𑀤𑀼𑀢𑀺𑀬𑁄.

𑁩. 𑀓𑀮𑀦𑁆𑀤𑀓𑀗𑁆𑀕𑀧𑀜𑁆𑀳𑁄

𑁩. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, ‘𑀓𑀮𑀦𑁆𑀤𑀓𑀲𑁆𑀲 𑀏𑀓𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩’𑀦𑁆𑀢𑀺 𑀬𑀁 𑀯𑀤𑁂𑀲𑀺, 𑀓𑀢𑀫𑀁 𑀢𑀁 𑀏𑀓𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩’’𑀦𑁆𑀢𑀺? ‘‘𑀬𑀣𑀸, 𑀫𑀳𑀸𑀭𑀸𑀚, 𑀓𑀮𑀦𑁆𑀤𑀓𑁄 𑀧𑀝𑀺𑀲𑀢𑁆𑀢𑀼𑀫𑁆𑀳𑀺 𑀑𑀧𑀢𑀦𑁆𑀢𑁂 𑀦𑀗𑁆𑀕𑀼𑀝𑁆𑀞𑀁 𑀧𑀧𑁆𑀨𑁄𑀝𑁂𑀢𑁆𑀯𑀸 𑀫𑀳𑀦𑁆𑀢𑀁 𑀓𑀢𑁆𑀯𑀸 𑀢𑁂𑀦𑁂𑀯 𑀦𑀗𑁆𑀕𑀼𑀝𑁆𑀞𑀮𑀕𑀼𑀴𑁂𑀦 𑀧𑀝𑀺𑀲𑀢𑁆𑀢𑀼𑀁 𑀧𑀝𑀺𑀩𑀸𑀳𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀓𑀺𑀮𑁂𑀲𑀲𑀢𑁆𑀢𑀼𑀫𑁆𑀳𑀺 𑀑𑀧𑀢𑀦𑁆𑀢𑁂 𑀲𑀢𑀺𑀧𑀝𑁆𑀞𑀸𑀦𑀮𑀕𑀼𑀴𑀁 𑀧𑀧𑁆𑀨𑁄𑀝𑁂𑀢𑁆𑀯𑀸 𑀫𑀳𑀦𑁆𑀢𑀁 𑀓𑀢𑁆𑀯𑀸 𑀢𑁂𑀦𑁂𑀯 𑀲𑀢𑀺𑀧𑀝𑁆𑀞𑀸𑀦𑀮𑀕𑀼𑀴𑁂𑀦 𑀲𑀩𑁆𑀩𑀓𑀺𑀮𑁂𑀲𑀸 𑀧𑀝𑀺𑀩𑀸𑀳𑀺𑀢𑀩𑁆𑀩𑀸. 𑀇𑀤𑀁, 𑀫𑀳𑀸𑀭𑀸𑀚, 𑀓𑀮𑀦𑁆𑀤𑀓𑀲𑁆𑀲 𑀏𑀓𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀣𑁂𑀭𑁂𑀦 𑀘𑀽𑀴𑀧𑀦𑁆𑀣𑀓𑁂𑀦 𑁋

‘𑀬𑀤𑀸 𑀓𑀺𑀮𑁂𑀲𑀸 𑀑𑀧𑀢𑀦𑁆𑀢𑀺, 𑀲𑀸𑀫𑀜𑁆𑀜𑀕𑀼𑀡𑀥𑀁𑀲𑀦𑀸;

𑀲𑀢𑀺𑀧𑀝𑁆𑀞𑀸𑀦𑀮𑀕𑀼𑀴𑁂𑀦, 𑀳𑀦𑁆𑀢𑀩𑁆𑀩𑀸 𑀢𑁂 𑀧𑀼𑀦𑀧𑁆𑀧𑀼𑀦’’’𑀦𑁆𑀢𑀺.

𑀓𑀮𑀦𑁆𑀤𑀓𑀗𑁆𑀕𑀧𑀜𑁆𑀳𑁄 𑀢𑀢𑀺𑀬𑁄.

𑁪. 𑀤𑀻𑀧𑀺𑀦𑀺𑀬𑀗𑁆𑀕𑀧𑀜𑁆𑀳𑁄

𑁪. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, ‘𑀤𑀻𑀧𑀺𑀦𑀺𑀬𑀸 𑀏𑀓𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩’𑀦𑁆𑀢𑀺 𑀬𑀁 𑀯𑀤𑁂𑀲𑀺, 𑀓𑀢𑀫𑀁 𑀢𑀁 𑀏𑀓𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩’’𑀦𑁆𑀢𑀺? ‘‘𑀬𑀣𑀸, 𑀫𑀳𑀸𑀭𑀸𑀚, 𑀤𑀻𑀧𑀺𑀦𑀻 𑀲𑀓𑀺𑀁 𑀬𑁂𑀯 𑀕𑀩𑁆𑀪𑀁 𑀕𑀡𑁆𑀳𑀸𑀢𑀺, 𑀦 𑀧𑀼𑀦𑀧𑁆𑀧𑀼𑀦𑀁 𑀧𑀼𑀭𑀺𑀲𑀁 𑀉𑀧𑁂𑀢𑀺? 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀆𑀬𑀢𑀺𑀁 𑀧𑀝𑀺𑀲𑀦𑁆𑀥𑀺𑀁 𑀉𑀧𑁆𑀧𑀢𑁆𑀢𑀺𑀁 𑀕𑀩𑁆𑀪𑀲𑁂𑀬𑁆𑀬𑀁 𑀘𑀼𑀢𑀺𑀁 𑀪𑁂𑀤𑀁 𑀔𑀬𑀁 𑀯𑀺𑀦𑀸𑀲𑀁 𑀲𑀁𑀲𑀸𑀭𑀪𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀲𑀫𑀁 𑀲𑀫𑁆𑀧𑀻𑀴𑀺𑀢𑀁 𑀤𑀺𑀲𑁆𑀯𑀸 ‘𑀧𑀼𑀦𑀩𑁆𑀪𑀯𑁂 𑀦𑀧𑁆𑀧𑀝𑀺𑀲𑀦𑁆𑀤𑀳𑀺𑀲𑁆𑀲𑀸𑀫𑀻’𑀢𑀺 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁄 𑀓𑀭𑀡𑀻𑀬𑁄. 𑀇𑀤𑀁, 𑀫𑀳𑀸𑀭𑀸𑀚, 𑀤𑀻𑀧𑀺𑀦𑀺𑀬𑀸 𑀏𑀓𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑀤𑁂𑀯𑀸𑀢𑀺𑀤𑁂𑀯𑁂𑀦 𑀲𑀼𑀢𑁆𑀢𑀦𑀺𑀧𑀸𑀢𑁂 𑀥𑀦𑀺𑀬𑀕𑁄𑀧𑀸𑀮𑀓𑀲𑀼𑀢𑁆𑀢𑁂 𑁋

‘‘‘𑀉𑀲𑀪𑁄𑀭𑀺𑀯 𑀙𑁂𑀢𑁆𑀯 𑀩𑀦𑁆𑀥𑀦𑀸𑀦𑀺, 𑀦𑀸𑀕𑁄 𑀧𑀽𑀢𑀺𑀮𑀢𑀁𑀯 𑀤𑀸𑀮𑀬𑀺𑀢𑁆𑀯𑀸;

𑀦𑀸𑀳𑀁 𑀧𑀼𑀦𑀼𑀧𑁂𑀲𑁆𑀲𑀁 𑀕𑀩𑁆𑀪𑀲𑁂𑀬𑁆𑀬𑀁, 𑀅𑀣 𑀘𑁂 𑀧𑀢𑁆𑀣𑀬𑀲𑀻 𑀧𑀯𑀲𑁆𑀲 𑀤𑁂𑀯𑀸’’’𑀢𑀺.

𑀤𑀻𑀧𑀺𑀦𑀺𑀬𑀗𑁆𑀕𑀧𑀜𑁆𑀳𑁄 𑀘𑀢𑀼𑀢𑁆𑀣𑁄.

𑁫. 𑀤𑀻𑀧𑀺𑀓𑀗𑁆𑀕𑀧𑀜𑁆𑀳𑁄

𑁫. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, ‘𑀤𑀻𑀧𑀺𑀓𑀲𑁆𑀲 𑀤𑁆𑀯𑁂 𑀅𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻’𑀢𑀺 𑀬𑀁 𑀯𑀤𑁂𑀲𑀺, 𑀓𑀢𑀫𑀸𑀦𑀺 𑀢𑀸𑀦𑀺 𑀤𑁆𑀯𑁂 𑀅𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻’’𑀢𑀺? ‘‘𑀬𑀣𑀸, 𑀫𑀳𑀸𑀭𑀸𑀚, 𑀤𑀻𑀧𑀺𑀓𑁄 𑀅𑀭𑀜𑁆𑀜𑁂 𑀢𑀺𑀡𑀕𑀳𑀦𑀁 𑀯𑀸 𑀯𑀦𑀕𑀳𑀦𑀁 𑀯𑀸 𑀧𑀩𑁆𑀩𑀢𑀕𑀳𑀦𑀁 𑀯𑀸 𑀦𑀺𑀲𑁆𑀲𑀸𑀬 𑀦𑀺𑀮𑀻𑀬𑀺𑀢𑁆𑀯𑀸 𑀫𑀺𑀕𑁂 𑀕𑀡𑁆𑀳𑀸𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀯𑀺𑀯𑁂𑀓𑀁 𑀲𑁂𑀯𑀺𑀢𑀩𑁆𑀩𑀁 𑀅𑀭𑀜𑁆𑀜𑀁 𑀭𑀼𑀓𑁆𑀔𑀫𑀽𑀮𑀁 𑀧𑀩𑁆𑀩𑀢𑀁 𑀓𑀦𑁆𑀤𑀭𑀁 𑀕𑀺𑀭𑀺𑀕𑀼𑀳𑀁 𑀲𑀼𑀲𑀸𑀦𑀁 𑀯𑀦𑀧𑀢𑁆𑀣𑀁 𑀅𑀩𑁆𑀪𑁄𑀓𑀸𑀲𑀁 𑀧𑀮𑀸𑀮𑀧𑀼𑀜𑁆𑀚𑀁 𑀅𑀧𑁆𑀧𑀲𑀤𑁆𑀤𑀁 𑀅𑀧𑁆𑀧𑀦𑀺𑀕𑁆𑀖𑁄𑀲𑀁 𑀯𑀺𑀚𑀦𑀯𑀸𑀢𑀁 𑀫𑀦𑀼𑀲𑁆𑀲𑀭𑀸𑀳𑀲𑁂𑀬𑁆𑀬𑀓𑀁 𑀧𑀝𑀺𑀲𑀮𑁆𑀮𑀸𑀦𑀲𑀸𑀭𑀼𑀧𑁆𑀧𑀁; 𑀯𑀺𑀯𑁂𑀓𑀁 𑀲𑁂𑀯𑀫𑀸𑀦𑁄 𑀳𑀺, 𑀫𑀳𑀸𑀭𑀸𑀚, 𑀬𑁄𑀕𑀻 𑀬𑁄𑀕𑀸𑀯𑀘𑀭𑁄 𑀦𑀘𑀺𑀭𑀲𑁆𑀲𑁂𑀯 𑀙𑀴𑀪𑀺𑀜𑁆𑀜𑀸𑀲𑀼 𑀘 𑀯𑀲𑀺𑀪𑀸𑀯𑀁 𑀧𑀸𑀧𑀼𑀡𑀸𑀢𑀺. 𑀇𑀤𑀁, 𑀫𑀳𑀸𑀭𑀸𑀚, 𑀤𑀻𑀧𑀺𑀓𑀲𑁆𑀲 𑀧𑀞𑀫𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀣𑁂𑀭𑁂𑀳𑀺 𑀥𑀫𑁆𑀫𑀲𑀗𑁆𑀕𑀸𑀳𑀓𑁂𑀳𑀺 𑁋

‘‘‘𑀬𑀣𑀸𑀧𑀺 𑀤𑀻𑀧𑀺𑀓𑁄 𑀦𑀸𑀫, 𑀦𑀺𑀮𑀻𑀬𑀺𑀢𑁆𑀯𑀸 𑀕𑀡𑁆𑀳𑀢𑁂 [𑀕𑀡𑁆𑀳𑀢𑀻 (𑀲𑀻. 𑀧𑀻.)] 𑀫𑀺𑀕𑁂;

𑀢𑀣𑁂𑀯𑀸𑀬𑀁 𑀩𑀼𑀤𑁆𑀥𑀧𑀼𑀢𑁆𑀢𑁄, 𑀬𑀼𑀢𑁆𑀢𑀬𑁄𑀕𑁄 𑀯𑀺𑀧𑀲𑁆𑀲𑀓𑁄;

𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸𑀦, 𑀕𑀡𑁆𑀳𑀸𑀢𑀺 𑀨𑀮𑀫𑀼𑀢𑁆𑀢𑀫’𑀦𑁆𑀢𑀺.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀤𑀻𑀧𑀺𑀓𑁄 𑀬𑀁 𑀓𑀺𑀜𑁆𑀘𑀺 𑀧𑀲𑀼𑀁 𑀯𑀥𑀺𑀢𑁆𑀯𑀸 𑀯𑀸𑀫𑁂𑀦 𑀧𑀲𑁆𑀲𑁂𑀦 𑀧𑀢𑀺𑀢𑀁 𑀦 𑀪𑀓𑁆𑀔𑁂𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀯𑁂𑀴𑀼𑀤𑀸𑀦𑁂𑀦 𑀯𑀸 𑀧𑀢𑁆𑀢𑀤𑀸𑀦𑁂𑀦 𑀯𑀸 𑀧𑀼𑀧𑁆𑀨𑀤𑀸𑀦𑁂𑀦 𑀯𑀸 𑀨𑀮𑀤𑀸𑀦𑁂𑀦 𑀯𑀸 𑀲𑀺𑀦𑀸𑀦𑀤𑀸𑀦𑁂𑀦 𑀯𑀸 𑀫𑀢𑁆𑀢𑀺𑀓𑀸𑀤𑀸𑀦𑁂𑀦 𑀯𑀸 𑀘𑀼𑀡𑁆𑀡𑀤𑀸𑀦𑁂𑀦 𑀯𑀸 𑀤𑀦𑁆𑀢𑀓𑀝𑁆𑀞𑀤𑀸𑀦𑁂𑀦 𑀯𑀸 𑀫𑀼𑀔𑁄𑀤𑀓𑀤𑀸𑀦𑁂𑀦 𑀯𑀸 𑀘𑀸𑀢𑀼𑀓𑀫𑁆𑀬𑀢𑀸𑀬 𑀯𑀸 𑀫𑀼𑀕𑁆𑀕𑀲𑀼𑀧𑁆𑀬𑀢𑀸𑀬 [𑀫𑀼𑀕𑁆𑀕𑀲𑀼𑀧𑁆𑀧𑀢𑀸𑀬 (𑀲𑀻. 𑀧𑀻.)] 𑀯𑀸 𑀧𑀸𑀭𑀺𑀪𑀝 [𑀧𑀸𑀭𑀺𑀪𑀝𑁆𑀝𑀢𑀸𑀬 (𑀲𑀻. 𑀧𑀻.)] 𑀬𑀢𑀸𑀬 𑀯𑀸 𑀚𑀗𑁆𑀖𑀧𑁂𑀲𑀦𑀻𑀬𑁂𑀦 𑀯𑀸 𑀯𑁂𑀚𑁆𑀚𑀓𑀫𑁆𑀫𑁂𑀦 𑀯𑀸 𑀤𑀽𑀢𑀓𑀫𑁆𑀫𑁂𑀦 𑀯𑀸 𑀧𑀳𑀺𑀡𑀕𑀫𑀦𑁂𑀦 𑀯𑀸 𑀧𑀺𑀡𑁆𑀟𑀧𑀝𑀺𑀧𑀺𑀡𑁆𑀟𑁂𑀦 𑀯𑀸 𑀤𑀸𑀦𑀸𑀦𑀼𑀧𑁆𑀧𑀤𑀸𑀦𑁂𑀦 𑀯𑀸 𑀯𑀢𑁆𑀣𑀼𑀯𑀺𑀚𑁆𑀚𑀸𑀬 𑀯𑀸 𑀦𑀓𑁆𑀔𑀢𑁆𑀢𑀯𑀺𑀚𑁆𑀚𑀸𑀬 𑀯𑀸 𑀅𑀗𑁆𑀕𑀯𑀺𑀚𑁆𑀚𑀸𑀬 [𑀦𑀕𑀯𑀺𑀚𑁆𑀚𑀸𑀬 (𑀓.)] 𑀯𑀸 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀯𑀸 𑀩𑀼𑀤𑁆𑀥𑀧𑁆𑀧𑀝𑀺𑀓𑀼𑀝𑁆𑀞𑁂𑀦 𑀫𑀺𑀘𑁆𑀙𑀸𑀚𑀻𑀯𑁂𑀦 𑀦𑀺𑀧𑁆𑀨𑀸𑀤𑀺𑀢𑀁 𑀪𑁄𑀚𑀦𑀁 𑀦 𑀪𑀼𑀜𑁆𑀚𑀺𑀢𑀩𑁆𑀩𑀁 [𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁 (𑀲𑀻. 𑀧𑀻.)] 𑀯𑀸𑀫𑁂𑀦 𑀧𑀲𑁆𑀲𑁂𑀦 𑀧𑀢𑀺𑀢𑀁 𑀧𑀲𑀼𑀁 𑀯𑀺𑀬 𑀤𑀻𑀧𑀺𑀓𑁄. 𑀇𑀤𑀁, 𑀫𑀳𑀸𑀭𑀸𑀚, 𑀤𑀻𑀧𑀺𑀓𑀲𑁆𑀲 𑀤𑀼𑀢𑀺𑀬𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀣𑁂𑀭𑁂𑀦 𑀲𑀸𑀭𑀺𑀧𑀼𑀢𑁆𑀢𑁂𑀦 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑁋

‘‘‘𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀯𑀺𑀧𑁆𑀨𑀸𑀭𑀸, 𑀉𑀧𑁆𑀧𑀦𑁆𑀦𑀁 𑀫𑀥𑀼𑀧𑀸𑀬𑀲𑀁;

𑀲𑀘𑁂 𑀪𑀼𑀢𑁆𑀢𑁄 𑀪𑀯𑁂𑀬𑁆𑀬𑀸𑀳𑀁, 𑀲𑀸𑀚𑀻𑀯𑁄 𑀕𑀭𑀳𑀺𑀢𑁄 𑀫𑀫.

‘‘‘𑀬𑀤𑀺𑀧𑀺 𑀫𑁂 𑀅𑀦𑁆𑀢𑀕𑀼𑀡𑀁, 𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀳𑀻 𑀘𑀭𑁂;

𑀦𑁂𑀯 𑀪𑀺𑀦𑁆𑀤𑁂𑀬𑁆𑀬𑀫𑀸𑀚𑀻𑀯𑀁, 𑀘𑀚𑀫𑀸𑀦𑁄𑀧𑀺 𑀚𑀻𑀯𑀺𑀢’’’𑀦𑁆𑀢𑀺.

𑀤𑀻𑀧𑀺𑀓𑀗𑁆𑀕𑀧𑀜𑁆𑀳𑁄 𑀧𑀜𑁆𑀘𑀫𑁄.

𑁬. 𑀓𑀼𑀫𑁆𑀫𑀗𑁆𑀕𑀧𑀜𑁆𑀳𑁄

𑁬. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, ‘𑀓𑀼𑀫𑁆𑀫𑀲𑁆𑀲 𑀧𑀜𑁆𑀘 𑀅𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻’𑀢𑀺 𑀬𑀁 𑀯𑀤𑁂𑀲𑀺, 𑀓𑀢𑀫𑀸𑀦𑀺 𑀢𑀸𑀦𑀺 𑀧𑀜𑁆𑀘 𑀅𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻’’𑀢𑀺? ‘‘𑀬𑀣𑀸, 𑀫𑀳𑀸𑀭𑀸𑀚, 𑀓𑀼𑀫𑁆𑀫𑁄 𑀉𑀤𑀓𑀘𑀭𑁄 𑀉𑀤𑀓𑁂𑀬𑁂𑀯 𑀯𑀸𑀲𑀁 𑀓𑀧𑁆𑀧𑁂𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀲𑀩𑁆𑀩𑀧𑀸𑀡𑀪𑀽𑀢𑀧𑀼𑀕𑁆𑀕𑀮𑀸𑀦𑀁 𑀳𑀺𑀢𑀸𑀦𑀼𑀓𑀫𑁆𑀧𑀺𑀦𑀸 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 𑀅𑀯𑁂𑀭𑁂𑀦 𑀅𑀩𑁆𑀬𑀸𑀧𑀚𑁆𑀚𑁂𑀦 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀺𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀓𑀼𑀫𑁆𑀫𑀲𑁆𑀲 𑀧𑀞𑀫𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀓𑀼𑀫𑁆𑀫𑁄 𑀉𑀤𑀓𑁂 𑀉𑀧𑁆𑀧𑀺𑀮𑀯𑀦𑁆𑀢𑁄 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀬𑀤𑀺 𑀓𑁄𑀘𑀺 𑀧𑀲𑁆𑀲𑀢𑀺, 𑀢𑀢𑁆𑀣𑁂𑀯 𑀦𑀺𑀫𑀼𑀚𑁆𑀚𑀢𑀺 𑀕𑀸𑀴𑁆𑀳𑀫𑁄𑀕𑀸𑀳𑀢𑀺 ‘𑀫𑀸 𑀫𑀁 𑀢𑁂 𑀧𑀼𑀦 𑀧𑀲𑁆𑀲𑁂𑀬𑁆𑀬𑀼’𑀦𑁆𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀓𑀺𑀮𑁂𑀲𑁂𑀲𑀼 𑀑𑀧𑀢𑀦𑁆𑀢𑁂𑀲𑀼 𑀆𑀭𑀫𑁆𑀫𑀡𑀲𑀭𑁂 𑀦𑀺𑀫𑀼𑀚𑁆𑀚𑀺𑀢𑀩𑁆𑀩𑀁 𑀕𑀸𑀴𑁆𑀳𑀫𑁄𑀕𑀸𑀳𑀺𑀢𑀩𑁆𑀩𑀁 ‘𑀫𑀸 𑀫𑀁 𑀓𑀺𑀮𑁂𑀲𑀸 𑀧𑀼𑀦 𑀧𑀲𑁆𑀲𑁂𑀬𑁆𑀬𑀼’𑀦𑁆𑀢𑀺. 𑀇𑀤𑀁, 𑀫𑀳𑀸𑀭𑀸𑀚, 𑀓𑀼𑀫𑁆𑀫𑀲𑁆𑀲 𑀤𑀼𑀢𑀺𑀬𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀓𑀼𑀫𑁆𑀫𑁄 𑀉𑀤𑀓𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀓𑀸𑀬𑀁 𑀑𑀢𑀸𑀧𑁂𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀦𑀺𑀲𑀚𑁆𑀚𑀝𑁆𑀞𑀸𑀦𑀲𑀬𑀦𑀘𑀗𑁆𑀓𑀫𑀢𑁄 𑀫𑀸𑀦𑀲𑀁 𑀦𑀻𑀳𑀭𑀺𑀢𑁆𑀯𑀸 𑀲𑀫𑁆𑀫𑀧𑁆𑀧𑀥𑀸𑀦𑁂 𑀫𑀸𑀦𑀲𑀁 𑀑𑀢𑀸𑀧𑁂𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀓𑀼𑀫𑁆𑀫𑀲𑁆𑀲 𑀢𑀢𑀺𑀬𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀓𑀼𑀫𑁆𑀫𑁄 𑀧𑀣𑀯𑀺𑀁 𑀔𑀡𑀺𑀢𑁆𑀯𑀸 𑀯𑀺𑀯𑀺𑀢𑁆𑀢𑁂 𑀯𑀸𑀲𑀁 𑀓𑀧𑁆𑀧𑁂𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀁 𑀧𑀚𑀳𑀺𑀢𑁆𑀯𑀸 𑀲𑀼𑀜𑁆𑀜𑀁 𑀯𑀺𑀯𑀺𑀢𑁆𑀢𑀁 𑀓𑀸𑀦𑀦𑀁 𑀯𑀦𑀧𑀢𑁆𑀣𑀁 𑀧𑀩𑁆𑀩𑀢𑀁 𑀓𑀦𑁆𑀤𑀭𑀁 𑀕𑀺𑀭𑀺𑀕𑀼𑀳𑀁 𑀅𑀧𑁆𑀧𑀲𑀤𑁆𑀤𑀁 𑀅𑀧𑁆𑀧𑀦𑀺𑀕𑁆𑀖𑁄𑀲𑀁 𑀧𑀯𑀺𑀯𑀺𑀢𑁆𑀢𑀫𑁄𑀕𑀸𑀳𑀺𑀢𑁆𑀯𑀸 𑀯𑀺𑀯𑀺𑀢𑁆𑀢𑁂 𑀬𑁂𑀯 𑀯𑀸𑀲𑀁 𑀉𑀧𑀕𑀦𑁆𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀓𑀼𑀫𑁆𑀫𑀲𑁆𑀲 𑀘𑀢𑀼𑀢𑁆𑀣𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀣𑁂𑀭𑁂𑀦 𑀉𑀧𑀲𑁂𑀦𑁂𑀦 𑀯𑀗𑁆𑀕𑀦𑁆𑀢𑀧𑀼𑀢𑁆𑀢𑁂𑀦 𑁋

‘‘‘𑀯𑀺𑀯𑀺𑀢𑁆𑀢𑀁 𑀅𑀧𑁆𑀧𑀦𑀺𑀕𑁆𑀖𑁄𑀲𑀁, 𑀯𑀸𑀴𑀫𑀺𑀕𑀦𑀺𑀲𑁂𑀯𑀺𑀢𑀁;

𑀲𑁂𑀯𑁂 𑀲𑁂𑀦𑀸𑀲𑀦𑀁 𑀪𑀺𑀓𑁆𑀔𑀼, 𑀧𑀝𑀺𑀲𑀮𑁆𑀮𑀸𑀦𑀓𑀸𑀭𑀡𑀸’𑀢𑀺.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀓𑀼𑀫𑁆𑀫𑁄 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀬𑀤𑀺 𑀓𑀜𑁆𑀘𑀺 𑀧𑀲𑁆𑀲𑀢𑀺 𑀯𑀸, 𑀲𑀤𑁆𑀤𑀁 𑀲𑀼𑀡𑀸𑀢𑀺 𑀯𑀸, 𑀲𑁄𑀡𑁆𑀟𑀺𑀧𑀜𑁆𑀘𑀫𑀸𑀦𑀺 𑀅𑀗𑁆𑀕𑀸𑀦𑀺 𑀲𑀓𑁂 𑀓𑀧𑀸𑀮𑁂 𑀦𑀺𑀤𑀳𑀺𑀢𑁆𑀯𑀸 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀢𑀼𑀡𑁆𑀳𑀻𑀪𑀽𑀢𑁄 𑀢𑀺𑀝𑁆𑀞𑀢𑀺 𑀓𑀸𑀬𑀫𑀦𑀼𑀭𑀓𑁆𑀔𑀦𑁆𑀢𑁄, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀲𑀩𑁆𑀩𑀢𑁆𑀣 𑀭𑀽𑀧𑀲𑀤𑁆𑀤𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑀥𑀫𑁆𑀫𑁂𑀲𑀼 𑀆𑀧𑀢𑀦𑁆𑀢𑁂𑀲𑀼 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀲𑀁𑀯𑀭𑀓𑀯𑀸𑀝𑀁 𑀅𑀦𑀼𑀕𑁆𑀖𑀸𑀝𑁂𑀢𑁆𑀯𑀸 𑀫𑀸𑀦𑀲𑀁 𑀲𑀫𑁄𑀤𑀳𑀺𑀢𑁆𑀯𑀸 𑀲𑀁𑀯𑀭𑀁 𑀓𑀢𑁆𑀯𑀸 𑀲𑀢𑁂𑀦 𑀲𑀫𑁆𑀧𑀚𑀸𑀦𑁂𑀦 𑀯𑀺𑀳𑀸𑀢𑀩𑁆𑀩𑀁 𑀲𑀫𑀡𑀥𑀫𑁆𑀫𑀁 𑀅𑀦𑀼𑀭𑀓𑁆𑀔𑀫𑀸𑀦𑁂𑀦. 𑀇𑀤𑀁, 𑀫𑀳𑀸𑀭𑀸𑀚, 𑀓𑀼𑀫𑁆𑀫𑀲𑁆𑀲 𑀧𑀜𑁆𑀘𑀫𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑀤𑁂𑀯𑀸𑀢𑀺𑀤𑁂𑀯𑁂𑀦 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑀯𑀭𑁂 𑀓𑀼𑀫𑁆𑀫𑀽𑀧𑀫𑀲𑀼𑀢𑁆𑀢𑀦𑁆𑀢𑁂 𑁋

‘‘‘𑀓𑀼𑀫𑁆𑀫𑁄𑀯 𑀅𑀗𑁆𑀕𑀸𑀦𑀺 𑀲𑀓𑁂 𑀓𑀧𑀸𑀮𑁂, 𑀲𑀫𑁄𑀤𑀳𑀁 𑀪𑀺𑀓𑁆𑀔𑀼 𑀫𑀦𑁄𑀯𑀺𑀢𑀓𑁆𑀓𑁂;

𑀅𑀦𑀺𑀲𑁆𑀲𑀺𑀢𑁄 𑀅𑀜𑁆𑀜𑀫𑀳𑁂𑀞𑀬𑀸𑀦𑁄, 𑀧𑀭𑀺𑀦𑀺𑀩𑁆𑀩𑀼𑀢𑁄𑀦𑀽𑀧𑀯𑀤𑁂𑀬𑁆𑀬 𑀓𑀜𑁆𑀘𑀻’’’𑀢𑀺.

𑀓𑀼𑀫𑁆𑀫𑀗𑁆𑀕𑀧𑀜𑁆𑀳𑁄 𑀙𑀝𑁆𑀞𑁄.

𑁭. 𑀯𑀁𑀲𑀗𑁆𑀕𑀧𑀜𑁆𑀳𑁄

𑁭. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, ‘𑀯𑀁𑀲𑀲𑁆𑀲 𑀏𑀓𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩’𑀦𑁆𑀢𑀺 𑀬𑀁 𑀯𑀤𑁂𑀲𑀺, 𑀓𑀢𑀫𑀁 𑀢𑀁 𑀏𑀓𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩’’𑀦𑁆𑀢𑀺? ‘‘𑀬𑀣𑀸, 𑀫𑀳𑀸𑀭𑀸𑀚, 𑀯𑀁𑀲𑁄 𑀬𑀢𑁆𑀣 𑀯𑀸𑀢𑁄, 𑀢𑀢𑁆𑀣 𑀅𑀦𑀼𑀮𑁄𑀫𑁂𑀢𑀺, 𑀦𑀸𑀜𑁆𑀜𑀢𑁆𑀣𑀫𑀦𑀼𑀥𑀸𑀯𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀬𑀁 𑀩𑀼𑀤𑁆𑀥𑁂𑀦 𑀪𑀕𑀯𑀢𑀸 𑀪𑀸𑀲𑀺𑀢𑀁 𑀦𑀯𑀗𑁆𑀕𑀁 𑀲𑀢𑁆𑀣𑀼 𑀲𑀸𑀲𑀦𑀁, 𑀢𑀁 𑀅𑀦𑀼𑀮𑁄𑀫𑀬𑀺𑀢𑁆𑀯𑀸 𑀓𑀧𑁆𑀧𑀺𑀬𑁂 𑀅𑀦𑀯𑀚𑁆𑀚𑁂 𑀞𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀬𑁂𑀯 𑀧𑀭𑀺𑀬𑁂𑀲𑀺𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀯𑀁𑀲𑀲𑁆𑀲 𑀏𑀓𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁. 𑀪𑀸𑀲𑀺𑀢𑀫𑁆𑀧𑁂𑀢𑀁 𑀫𑀳𑀸𑀭𑀸𑀚 𑀣𑁂𑀭𑁂𑀦 𑀭𑀸𑀳𑀼𑀮𑁂𑀦 𑁋

‘‘‘𑀦𑀯𑀗𑁆𑀕𑀁 𑀩𑀼𑀤𑁆𑀥𑀯𑀘𑀦𑀁, 𑀅𑀦𑀼𑀮𑁄𑀫𑁂𑀢𑁆𑀯𑀸𑀦 𑀲𑀩𑁆𑀩𑀤𑀸;

𑀓𑀧𑁆𑀧𑀺𑀬𑁂 𑀅𑀦𑀯𑀚𑁆𑀚𑀲𑁆𑀫𑀺𑀁, 𑀞𑀢𑁆𑀯𑀸𑀧𑀸𑀬𑀁 𑀲𑀫𑀼𑀢𑁆𑀢𑀭𑀺’’’𑀦𑁆𑀢𑀺.

𑀯𑀁𑀲𑀗𑁆𑀕𑀧𑀜𑁆𑀳𑁄 𑀲𑀢𑁆𑀢𑀫𑁄.

𑁮. 𑀘𑀸𑀧𑀗𑁆𑀕𑀧𑀜𑁆𑀳𑁄

𑁮. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, ‘𑀘𑀸𑀧𑀲𑁆𑀲 𑀏𑀓𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩’𑀦𑁆𑀢𑀺 𑀬𑀁 𑀯𑀤𑁂𑀲𑀺, 𑀓𑀢𑀫𑀁 𑀢𑀁 𑀏𑀓𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩’’𑀦𑁆𑀢𑀺? ‘‘𑀬𑀣𑀸, 𑀫𑀳𑀸𑀭𑀸𑀚, 𑀘𑀸𑀧𑁄 𑀲𑀼𑀢𑀘𑁆𑀙𑀺𑀢𑁄 𑀦𑀫𑀺𑀢𑁄 [𑀫𑀺𑀢𑁄 (𑀲𑀻. 𑀧𑀻. 𑀓.)] 𑀬𑀸𑀯𑀕𑁆𑀕𑀫𑀽𑀮𑀁 𑀲𑀫𑀓𑀫𑁂𑀯 𑀅𑀦𑀼𑀦𑀫𑀢𑀺 𑀦𑀧𑁆𑀧𑀝𑀺𑀢𑁆𑀣𑀫𑁆𑀪𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀣𑁂𑀭𑀦𑀯𑀫𑀚𑁆𑀛𑀺𑀫𑀲𑀫𑀓𑁂𑀲𑀼 𑀅𑀦𑀼𑀦𑀫𑀺𑀢𑀩𑁆𑀩𑀁 𑀦𑀧𑁆𑀧𑀝𑀺𑀨𑀭𑀺𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀘𑀸𑀧𑀲𑁆𑀲 𑀏𑀓𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑀤𑁂𑀯𑀸𑀢𑀺𑀤𑁂𑀯𑁂𑀦 𑀯𑀺𑀥𑀼𑀭 [𑀧𑀼𑀡𑁆𑀡𑀓] 𑀚𑀸𑀢𑀓𑁂 𑁋

‘‘‘𑀘𑀸𑀧𑁄𑀯𑀽𑀦𑀼𑀤𑀭𑁄 𑀥𑀻𑀭𑁄, 𑀯𑀁𑀲𑁄 𑀯𑀸𑀧𑀺 𑀧𑀓𑀫𑁆𑀧𑀬𑁂 [𑀘𑀸𑀧𑁄 𑀯𑀸 𑀦𑀼𑀦 𑀫𑁂 𑀥𑀻𑀭𑁄, 𑀯𑀁𑀲𑁄𑀯 𑀅𑀦𑀼𑀮𑁄𑀫𑀬𑀁 (𑀲𑀻. 𑀧𑀻. 𑀓.)];

𑀧𑀝𑀺𑀮𑁄𑀫𑀁 𑀦 𑀯𑀢𑁆𑀢𑁂𑀬𑁆𑀬, 𑀲 𑀭𑀸𑀚𑀯𑀲𑀢𑀺𑀁 𑀯𑀲𑁂’’’𑀢𑀺.

𑀘𑀸𑀧𑀗𑁆𑀕𑀧𑀜𑁆𑀳𑁄 𑀅𑀝𑁆𑀞𑀫𑁄.

𑁯. 𑀯𑀸𑀬𑀲𑀗𑁆𑀕𑀧𑀜𑁆𑀳𑁄

𑁯. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, ‘𑀯𑀸𑀬𑀲𑀲𑁆𑀲 𑀤𑁆𑀯𑁂 𑀅𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻’𑀢𑀺 𑀬𑀁 𑀯𑀤𑁂𑀲𑀺, 𑀓𑀢𑀫𑀸𑀦𑀺 𑀢𑀸𑀦𑀺 𑀤𑁆𑀯𑁂 𑀅𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻’’𑀢𑀺? ‘‘𑀬𑀣𑀸, 𑀫𑀳𑀸𑀭𑀸𑀚, 𑀯𑀸𑀬𑀲𑁄 𑀆𑀲𑀗𑁆𑀓𑀺𑀢𑀧𑀭𑀺𑀲𑀗𑁆𑀓𑀺𑀢𑁄 𑀬𑀢𑁆𑀢𑀧𑁆𑀧𑀬𑀢𑁆𑀢𑁄 𑀘𑀭𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀆𑀲𑀗𑁆𑀓𑀺𑀢𑀧𑀭𑀺𑀲𑀗𑁆𑀓𑀺𑀢𑁂𑀦 𑀬𑀢𑁆𑀢𑀧𑀬𑀢𑁆𑀢𑁂𑀦 𑀉𑀧𑀝𑁆𑀞𑀺𑀢𑀸𑀬 𑀲𑀢𑀺𑀬𑀸 𑀲𑀁𑀯𑀼𑀢𑁂𑀳𑀺 𑀇𑀦𑁆𑀤𑁆𑀭𑀺𑀬𑁂𑀳𑀺 𑀘𑀭𑀺𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀯𑀸𑀬𑀲𑀲𑁆𑀲 𑀧𑀞𑀫𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀯𑀸𑀬𑀲𑁄 𑀬𑀁 𑀓𑀺𑀜𑁆𑀘𑀺 𑀪𑁄𑀚𑀦𑀁 𑀤𑀺𑀲𑁆𑀯𑀸 𑀜𑀸𑀢𑀻𑀳𑀺 𑀲𑀁𑀯𑀺𑀪𑀚𑀺𑀢𑁆𑀯𑀸 𑀪𑀼𑀜𑁆𑀚𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀬𑁂 𑀢𑁂 𑀮𑀸𑀪𑀸 𑀥𑀫𑁆𑀫𑀺𑀓𑀸 𑀥𑀫𑁆𑀫𑀮𑀤𑁆𑀥𑀸 𑀅𑀦𑁆𑀢𑀫𑀲𑁄 𑀧𑀢𑁆𑀢𑀧𑀭𑀺𑀬𑀸𑀧𑀦𑁆𑀦𑀫𑀢𑁆𑀢𑀫𑁆𑀧𑀺, 𑀢𑀣𑀸𑀭𑀽𑀧𑁂𑀳𑀺 𑀮𑀸𑀪𑁂𑀳𑀺 𑀧𑀝𑀺𑀯𑀺𑀪𑀢𑁆𑀢𑀪𑁄𑀕𑀺𑀦𑀸 𑀪𑀯𑀺𑀢𑀩𑁆𑀩𑀁 𑀲𑀻𑀮𑀯𑀦𑁆𑀢𑁂𑀳𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀳𑀺. 𑀇𑀤𑀁, 𑀫𑀳𑀸𑀭𑀸𑀚, 𑀯𑀸𑀬𑀲𑀲𑁆𑀲 𑀤𑀼𑀢𑀺𑀬𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀣𑁂𑀭𑁂𑀦 𑀲𑀸𑀭𑀺𑀧𑀼𑀢𑁆𑀢𑁂𑀦 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑁋

‘‘‘𑀲𑀘𑁂 𑀫𑁂 𑀉𑀧𑀦𑀸𑀫𑁂𑀦𑁆𑀢𑀺, 𑀬𑀣𑀸𑀮𑀤𑁆𑀥𑀁 𑀢𑀧𑀲𑁆𑀲𑀺𑀦𑁄;

𑀲𑀩𑁆𑀩𑁂 𑀲𑀁𑀯𑀺𑀪𑀚𑀺𑀢𑁆𑀯𑀸𑀦, 𑀢𑀢𑁄 𑀪𑀼𑀜𑁆𑀚𑀸𑀫𑀺 𑀪𑁄𑀚𑀦’’’𑀦𑁆𑀢𑀺.

𑀯𑀸𑀬𑀲𑀗𑁆𑀕𑀧𑀜𑁆𑀳𑁄 𑀦𑀯𑀫𑁄.

𑁧𑁦. 𑀫𑀓𑁆𑀓𑀝𑀗𑁆𑀕𑀧𑀜𑁆𑀳𑁄

𑁧𑁦. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, ‘𑀫𑀓𑁆𑀓𑀝𑀲𑁆𑀲 𑀤𑁆𑀯𑁂 𑀅𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻’𑀢𑀺 𑀬𑀁 𑀯𑀤𑁂𑀲𑀺, 𑀓𑀢𑀫𑀸𑀦𑀺 𑀢𑀸𑀦𑀺 𑀤𑁆𑀯𑁂 𑀅𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻’’𑀢𑀺? ‘‘𑀬𑀣𑀸, 𑀫𑀳𑀸𑀭𑀸𑀚, 𑀫𑀓𑁆𑀓𑀝𑁄 𑀯𑀸𑀲𑀫𑀼𑀧𑀕𑀘𑁆𑀙𑀦𑁆𑀢𑁄 𑀢𑀣𑀸𑀭𑀽𑀧𑁂 𑀑𑀓𑀸𑀲𑁂 𑀫𑀳𑀢𑀺𑀫𑀳𑀸𑀭𑀼𑀓𑁆𑀔𑁂 𑀧𑀯𑀺𑀯𑀺𑀢𑁆𑀢𑁂 𑀲𑀩𑁆𑀩𑀝𑁆𑀞𑀓𑀲𑀸𑀔𑁂 [𑀲𑀩𑁆𑀩𑀢𑁆𑀣𑀓𑀲𑀸𑀔𑁂 (𑀲𑁆𑀬𑀸.), 𑀲𑀩𑁆𑀩𑀝𑁆𑀞𑀲𑀸𑀔𑁂 (𑀓.)] 𑀪𑀻𑀭𑀼𑀢𑁆𑀢𑀸𑀡𑁂 𑀯𑀸𑀲𑀫𑀼𑀧𑀕𑀘𑁆𑀙𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀮𑀚𑁆𑀚𑀺𑀁 𑀧𑁂𑀲𑀮𑀁 𑀲𑀻𑀮𑀯𑀦𑁆𑀢𑀁 𑀓𑀮𑁆𑀬𑀸𑀡𑀥𑀫𑁆𑀫𑀁 𑀩𑀳𑀼𑀲𑁆𑀲𑀼𑀢𑀁 𑀥𑀫𑁆𑀫𑀥𑀭𑀁 𑀯𑀺𑀦𑀬𑀥𑀭𑀁 𑀧𑀺𑀬𑀁 𑀕𑀭𑀼𑀪𑀸𑀯𑀦𑀻𑀬𑀁 𑀯𑀢𑁆𑀢𑀸𑀭𑀁 𑀯𑀘𑀦𑀓𑁆𑀔𑀫𑀁 𑀑𑀯𑀸𑀤𑀓𑀁 𑀯𑀺𑀜𑁆𑀜𑀸𑀧𑀓𑀁 𑀲𑀦𑁆𑀤𑀲𑁆𑀲𑀓𑀁 𑀲𑀫𑀸𑀤𑀧𑀓𑀁 𑀲𑀫𑀼𑀢𑁆𑀢𑁂𑀚𑀓𑀁 𑀲𑀫𑁆𑀧𑀳𑀁𑀲𑀓𑀁 𑀏𑀯𑀭𑀽𑀧𑀁 𑀓𑀮𑁆𑀬𑀸𑀡𑀫𑀺𑀢𑁆𑀢𑀁 𑀆𑀘𑀭𑀺𑀬𑀁 𑀦𑀺𑀲𑁆𑀲𑀸𑀬 𑀯𑀺𑀳𑀭𑀺𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀫𑀓𑁆𑀓𑀝𑀲𑁆𑀲 𑀧𑀞𑀫𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀫𑀓𑁆𑀓𑀝𑁄 𑀭𑀼𑀓𑁆𑀔𑁂 𑀬𑁂𑀯 𑀘𑀭𑀢𑀺 𑀢𑀺𑀝𑁆𑀞𑀢𑀺 𑀦𑀺𑀲𑀻𑀤𑀢𑀺, 𑀬𑀤𑀺 𑀦𑀺𑀤𑁆𑀤𑀁 𑀑𑀓𑁆𑀓𑀫𑀢𑀺, 𑀢𑀢𑁆𑀣𑁂𑀯 𑀭𑀢𑁆𑀢𑀺𑀁 𑀯𑀸𑀲𑀫𑀦𑀼𑀪𑀯𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀧𑀯𑀦𑀸𑀪𑀺𑀫𑀼𑀔𑁂𑀦 𑀪𑀯𑀺𑀢𑀩𑁆𑀩𑀁, 𑀧𑀯𑀦𑁂 𑀬𑁂𑀯 𑀞𑀸𑀦𑀘𑀗𑁆𑀓𑀫𑀦𑀺𑀲𑀚𑁆𑀚𑀸𑀲𑀬𑀦𑀁 𑀦𑀺𑀤𑁆𑀤𑀁 𑀑𑀓𑁆𑀓𑀫𑀺𑀢𑀩𑁆𑀩𑀁, 𑀢𑀢𑁆𑀣𑁂𑀯 𑀲𑀢𑀺𑀧𑀝𑁆𑀞𑀸𑀦𑀫𑀦𑀼𑀪𑀯𑀺𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀫𑀓𑁆𑀓𑀝𑀲𑁆𑀲 𑀤𑀼𑀢𑀺𑀬𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀣𑁂𑀭𑁂𑀦 𑀲𑀸𑀭𑀺𑀧𑀼𑀢𑁆𑀢𑁂𑀦 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑁋

‘‘‘𑀘𑀗𑁆𑀓𑀫𑀦𑁆𑀢𑁄𑀧𑀺 𑀢𑀺𑀝𑁆𑀞𑀦𑁆𑀢𑁄, 𑀦𑀺𑀲𑀚𑁆𑀚𑀸𑀲𑀬𑀦𑁂𑀦 𑀯𑀸;

𑀧𑀯𑀦𑁂 𑀲𑁄𑀪𑀢𑁂 𑀪𑀺𑀓𑁆𑀔𑀼, 𑀧𑀯𑀦𑀦𑁆𑀢𑀁𑀯 𑀯𑀡𑁆𑀡𑀺𑀢’’’𑀦𑁆𑀢𑀺.

𑀫𑀓𑁆𑀓𑀝𑀗𑁆𑀕𑀧𑀜𑁆𑀳𑁄 𑀤𑀲𑀫𑁄.

𑀕𑀤𑁆𑀭𑀪𑀯𑀕𑁆𑀕𑁄 𑀧𑀞𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀕𑀤𑁆𑀭𑀪𑁄 𑀘𑁂𑀯 [𑀖𑁄𑀭𑀲𑁆𑀲𑀭𑁄 𑀘 (𑀲𑀻. 𑀲𑁆𑀬𑀸. 𑀧𑀻.)] 𑀓𑀼𑀓𑁆𑀓𑀼𑀝𑁄, 𑀓𑀮𑀦𑁆𑀤𑁄 𑀤𑀻𑀧𑀺𑀦𑀺 𑀤𑀻𑀧𑀺𑀓𑁄;

𑀓𑀼𑀫𑁆𑀫𑁄 𑀯𑀁𑀲𑁄 𑀘 𑀘𑀸𑀧𑁄 𑀘, 𑀯𑀸𑀬𑀲𑁄 𑀅𑀣 𑀫𑀓𑁆𑀓𑀝𑁄𑀢𑀺.