𑁨. 𑀲𑀫𑀼𑀤𑁆𑀤𑀯𑀕𑁆𑀕𑁄

𑁧. 𑀮𑀸𑀩𑀼𑀮𑀢𑀗𑁆𑀕𑀧𑀜𑁆𑀳𑁄

𑁧. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, ‘𑀮𑀸𑀩𑀼𑀮𑀢𑀸𑀬 𑀏𑀓𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩’𑀦𑁆𑀢𑀺 𑀬𑀁 𑀯𑀤𑁂𑀲𑀺, 𑀓𑀢𑀫𑀁 𑀢𑀁 𑀏𑀓𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩’’𑀦𑁆𑀢𑀺? ‘‘𑀬𑀣𑀸, 𑀫𑀳𑀸𑀭𑀸𑀚, 𑀮𑀸𑀩𑀼𑀮𑀢𑀸 𑀢𑀺𑀡𑁂 𑀯𑀸 𑀓𑀝𑁆𑀞𑁂 𑀯𑀸 𑀮𑀢𑀸𑀬 𑀯𑀸 𑀲𑁄𑀡𑁆𑀟𑀺𑀓𑀸𑀳𑀺 𑀆𑀮𑀫𑁆𑀩𑀺𑀢𑁆𑀯𑀸 𑀢𑀲𑁆𑀲𑀽𑀧𑀭𑀺 𑀯𑀟𑁆𑀠𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀅𑀭𑀳𑀢𑁆𑀢𑁂 𑀅𑀪𑀺𑀯𑀟𑁆𑀠𑀺𑀢𑀼𑀓𑀸𑀫𑁂𑀦 𑀫𑀦𑀲𑀸 𑀆𑀭𑀫𑁆𑀫𑀡𑀁 𑀆𑀮𑀫𑁆𑀩𑀺𑀢𑁆𑀯𑀸 𑀅𑀭𑀳𑀢𑁆𑀢𑁂 𑀅𑀪𑀺𑀯𑀟𑁆𑀠𑀺𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀮𑀸𑀩𑀼𑀮𑀢𑀸𑀬 𑀏𑀓𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀣𑁂𑀭𑁂𑀦 𑀲𑀸𑀭𑀺𑀧𑀼𑀢𑁆𑀢𑁂𑀦 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑁋

‘‘‘𑀬𑀣𑀸 𑀮𑀸𑀩𑀼𑀮𑀢𑀸 𑀦𑀸𑀫, 𑀢𑀺𑀡𑁂 𑀓𑀝𑁆𑀞𑁂 𑀮𑀢𑀸𑀬 𑀯𑀸;

𑀆𑀮𑀫𑁆𑀩𑀺𑀢𑁆𑀯𑀸 𑀲𑁄𑀡𑁆𑀟𑀺𑀓𑀸𑀳𑀺, 𑀢𑀢𑁄 𑀯𑀟𑁆𑀠𑀢𑀺 𑀉𑀧𑁆𑀧𑀭𑀺.

‘‘‘𑀢𑀣𑁂𑀯 𑀩𑀼𑀤𑁆𑀥𑀧𑀼𑀢𑁆𑀢𑁂𑀦, 𑀅𑀭𑀳𑀢𑁆𑀢𑀨𑀮𑀓𑀸𑀫𑀺𑀦𑀸;

𑀆𑀭𑀫𑁆𑀫𑀡𑀁 𑀆𑀮𑀫𑁆𑀩𑀺𑀢𑁆𑀯𑀸, 𑀯𑀟𑁆𑀠𑀺𑀢𑀩𑁆𑀩𑀁 𑀅𑀲𑁂𑀓𑁆𑀔𑀨𑀮𑁂’’’𑀢𑀺.

𑀮𑀸𑀩𑀼𑀮𑀢𑀗𑁆𑀕𑀧𑀜𑁆𑀳𑁄 𑀧𑀞𑀫𑁄.

𑁨. 𑀧𑀤𑀼𑀫𑀗𑁆𑀕𑀧𑀜𑁆𑀳𑁄

𑁨. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, ‘𑀧𑀤𑀼𑀫𑀲𑁆𑀲 𑀢𑀻𑀡𑀺 𑀅𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻’𑀢𑀺 𑀬𑀁 𑀯𑀤𑁂𑀲𑀺, 𑀓𑀢𑀫𑀸𑀦𑀺 𑀢𑀸𑀦𑀺 𑀢𑀻𑀡𑀺 𑀅𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻’’𑀢𑀺? ‘‘𑀬𑀣𑀸, 𑀫𑀳𑀸𑀭𑀸𑀚, 𑀧𑀤𑀼𑀫𑀁 𑀉𑀤𑀓𑁂 𑀚𑀸𑀢𑀁 𑀉𑀤𑀓𑁂 𑀲𑀁𑀯𑀤𑁆𑀥𑀁 𑀅𑀦𑀼𑀧𑀮𑀺𑀢𑁆𑀢𑀁 𑀉𑀤𑀓𑁂𑀦, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀓𑀼𑀮𑁂 𑀕𑀡𑁂 𑀮𑀸𑀪𑁂 𑀬𑀲𑁂 𑀲𑀓𑁆𑀓𑀸𑀭𑁂 𑀲𑀫𑁆𑀫𑀸𑀦𑀦𑀸𑀬 𑀧𑀭𑀺𑀪𑁄𑀕𑀧𑀘𑁆𑀘𑀬𑁂𑀲𑀼 𑀘 𑀲𑀩𑁆𑀩𑀢𑁆𑀣 𑀅𑀦𑀼𑀧𑀮𑀺𑀢𑁆𑀢𑁂𑀦 𑀪𑀯𑀺𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀧𑀤𑀼𑀫𑀲𑁆𑀲 𑀧𑀞𑀫𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀧𑀤𑀼𑀫𑀁 𑀉𑀤𑀓𑀸 𑀅𑀘𑁆𑀘𑀼𑀕𑁆𑀕𑀫𑁆𑀫 𑀞𑀸𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀲𑀩𑁆𑀩𑀮𑁄𑀓𑀁 𑀅𑀪𑀺𑀪𑀯𑀺𑀢𑁆𑀯𑀸 𑀅𑀘𑁆𑀘𑀼𑀕𑁆𑀕𑀫𑁆𑀫 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂 𑀞𑀸𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀧𑀤𑀼𑀫𑀲𑁆𑀲 𑀤𑀼𑀢𑀺𑀬𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀧𑀤𑀼𑀫𑀁 𑀅𑀧𑁆𑀧𑀫𑀢𑁆𑀢𑀓𑁂𑀦𑀧𑀺 𑀅𑀦𑀺𑀮𑁂𑀦 𑀏𑀭𑀺𑀢𑀁 𑀘𑀮𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀅𑀧𑁆𑀧𑀫𑀢𑁆𑀢𑀓𑁂𑀲𑀼𑀧𑀺 𑀓𑀺𑀮𑁂𑀲𑁂𑀲𑀼 𑀲𑀁𑀬𑀫𑁄 𑀓𑀭𑀡𑀻𑀬𑁄, 𑀪𑀬𑀤𑀲𑁆𑀲𑀸𑀯𑀺𑀦𑀸 𑀯𑀺𑀳𑀭𑀺𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀧𑀤𑀼𑀫𑀲𑁆𑀲 𑀢𑀢𑀺𑀬𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑀤𑁂𑀯𑀸𑀢𑀺𑀤𑁂𑀯𑁂𑀦 ‘𑀅𑀡𑀼𑀫𑀢𑁆𑀢𑁂𑀲𑀼 𑀯𑀚𑁆𑀚𑁂𑀲𑀼 𑀪𑀬𑀤𑀲𑁆𑀲𑀸𑀯𑀻 𑀲𑀫𑀸𑀤𑀸𑀬 𑀲𑀺𑀓𑁆𑀔𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀽’𑀢𑀺.

𑀧𑀤𑀼𑀫𑀗𑁆𑀕𑀧𑀜𑁆𑀳𑁄 𑀤𑀼𑀢𑀺𑀬𑁄.

𑁩. 𑀩𑀻𑀚𑀗𑁆𑀕𑀧𑀜𑁆𑀳𑁄

𑁩. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, ‘𑀩𑀻𑀚𑀲𑁆𑀲 𑀤𑁆𑀯𑁂 𑀅𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻’𑀢𑀺 𑀬𑀁 𑀯𑀤𑁂𑀲𑀺, 𑀓𑀢𑀫𑀸𑀦𑀺 𑀢𑀸𑀦𑀺 𑀤𑁆𑀯𑁂 𑀅𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻’’𑀢𑀺? ‘‘𑀬𑀣𑀸, 𑀫𑀳𑀸𑀭𑀸𑀚, 𑀩𑀻𑀚𑀁 𑀅𑀧𑁆𑀧𑀓𑀫𑁆𑀧𑀺 𑀲𑀫𑀸𑀦𑀁 𑀪𑀤𑁆𑀤𑀓𑁂 𑀔𑁂𑀢𑁆𑀢𑁂 𑀯𑀼𑀢𑁆𑀢𑀁 𑀤𑁂𑀯𑁂 𑀲𑀫𑁆𑀫𑀸 𑀥𑀸𑀭𑀁 𑀧𑀯𑁂𑀘𑁆𑀙𑀦𑁆𑀢𑁂 𑀲𑀼𑀩𑀳𑀽𑀦𑀺 𑀨𑀮𑀸𑀦𑀺 𑀅𑀦𑀼𑀤𑀲𑁆𑀲𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀬𑀣𑀸 𑀧𑀝𑀺𑀧𑀸𑀤𑀺𑀢𑀁 𑀲𑀻𑀮𑀁 𑀓𑁂𑀯𑀮𑀁 𑀲𑀸𑀫𑀜𑁆𑀜𑀨𑀮𑀫𑀦𑀼𑀤𑀲𑁆𑀲𑀢𑀺. 𑀏𑀯𑀁 𑀲𑀫𑁆𑀫𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀩𑀻𑀚𑀲𑁆𑀲 𑀧𑀞𑀫𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀩𑀻𑀚𑀁 𑀲𑀼𑀧𑀭𑀺𑀲𑁄𑀥𑀺𑀢𑁂 𑀔𑁂𑀢𑁆𑀢𑁂 𑀭𑁄𑀧𑀺𑀢𑀁 𑀔𑀺𑀧𑁆𑀧𑀫𑁂𑀯 𑀲𑀁𑀯𑀺𑀭𑀽𑀳𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀫𑀸𑀦𑀲𑀁 𑀲𑀼𑀧𑀭𑀺𑀕𑁆𑀕𑀳𑀺𑀢𑀁 𑀲𑀼𑀜𑁆𑀜𑀸𑀕𑀸𑀭𑁂 𑀧𑀭𑀺𑀲𑁄𑀥𑀺𑀢𑀁 𑀲𑀢𑀺𑀧𑀝𑁆𑀞𑀸𑀦𑀔𑁂𑀢𑁆𑀢𑀯𑀭𑁂 𑀔𑀺𑀢𑁆𑀢𑀁 𑀔𑀺𑀧𑁆𑀧𑀫𑁂𑀯 𑀯𑀺𑀭𑀽𑀳𑀢𑀺. 𑀇𑀤𑀁, 𑀫𑀳𑀸𑀭𑀸𑀚, 𑀩𑀻𑀚𑀲𑁆𑀲 𑀤𑀼𑀢𑀺𑀬𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀣𑁂𑀭𑁂𑀦 𑀅𑀦𑀼𑀭𑀼𑀤𑁆𑀥𑁂𑀦 𑁋

‘‘‘𑀬𑀣𑀸𑀧𑀺 𑀔𑁂𑀢𑁆𑀢𑁂 [𑀬𑀣𑀸 𑀔𑁂𑀢𑁆𑀢𑁂 (𑀲𑀻.)] 𑀧𑀭𑀺𑀲𑀼𑀤𑁆𑀥𑁂, 𑀩𑀻𑀚𑀜𑁆𑀘𑀲𑁆𑀲 𑀧𑀢𑀺𑀝𑁆𑀞𑀺𑀢𑀁;

𑀯𑀺𑀧𑀼𑀮𑀁 𑀢𑀲𑁆𑀲 𑀨𑀮𑀁 𑀳𑁄𑀢𑀺, 𑀅𑀧𑀺 𑀢𑁄𑀲𑁂𑀢𑀺 𑀓𑀲𑁆𑀲𑀓𑀁.

‘‘‘𑀢𑀣𑁂𑀯 𑀬𑁄𑀕𑀺𑀦𑁄 𑀘𑀺𑀢𑁆𑀢𑀁, 𑀲𑀼𑀜𑁆𑀜𑀸𑀕𑀸𑀭𑁂 𑀯𑀺𑀲𑁄𑀥𑀺𑀢𑀁;

𑀲𑀢𑀺𑀧𑀝𑁆𑀞𑀸𑀦𑀔𑁂𑀢𑁆𑀢𑀫𑁆𑀳𑀺, 𑀔𑀺𑀧𑁆𑀧𑀫𑁂𑀯 𑀯𑀺𑀭𑀽𑀳𑀢𑀻’’’𑀢𑀺.

𑀩𑀻𑀚𑀗𑁆𑀕𑀧𑀜𑁆𑀳𑁄 𑀢𑀢𑀺𑀬𑁄.

𑁪. 𑀲𑀸𑀮𑀓𑀮𑁆𑀬𑀸𑀡𑀺𑀓𑀗𑁆𑀕𑀧𑀜𑁆𑀳𑁄

𑁪. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, ‘𑀲𑀸𑀮𑀓𑀮𑁆𑀬𑀸𑀡𑀺𑀓𑀸𑀬 𑀏𑀓𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩’𑀦𑁆𑀢𑀺 𑀬𑀁 𑀯𑀤𑁂𑀲𑀺, 𑀓𑀢𑀫𑀁 𑀢𑀁 𑀏𑀓𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩’’𑀦𑁆𑀢𑀺? ‘‘𑀬𑀣𑀸, 𑀫𑀳𑀸𑀭𑀸𑀚, 𑀲𑀸𑀮𑀓𑀮𑁆𑀬𑀸𑀡𑀺𑀓𑀸 𑀦𑀸𑀫 𑀅𑀦𑁆𑀢𑁄𑀧𑀣𑀯𑀺𑀬𑀁 𑀬𑁂𑀯 𑀅𑀪𑀺𑀯𑀟𑁆𑀠𑀢𑀺 𑀳𑀢𑁆𑀣𑀲𑀢𑀫𑁆𑀧𑀺 𑀪𑀺𑀬𑁆𑀬𑁄𑀧𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀘𑀢𑁆𑀢𑀸𑀭𑀺 𑀲𑀸𑀫𑀜𑁆𑀜𑀨𑀮𑀸𑀦𑀺 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸 𑀙𑀴𑀪𑀺𑀜𑁆𑀜𑀸𑀬𑁄 𑀓𑁂𑀯𑀮𑀜𑁆𑀘 𑀲𑀫𑀡𑀥𑀫𑁆𑀫𑀁 𑀲𑀼𑀜𑁆𑀜𑀸𑀕𑀸𑀭𑁂 𑀬𑁂𑀯 𑀧𑀭𑀺𑀧𑀽𑀭𑀬𑀺𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀲𑀸𑀮𑀓𑀮𑁆𑀬𑀸𑀡𑀺𑀓𑀸𑀬 𑀏𑀓𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀣𑁂𑀭𑁂𑀦 𑀭𑀸𑀳𑀼𑀮𑁂𑀦 𑁋

‘‘‘𑀲𑀸𑀮𑀓𑀮𑁆𑀬𑀸𑀡𑀺𑀓𑀸 𑀦𑀸𑀫, 𑀧𑀸𑀤𑀧𑁄 𑀥𑀭𑀡𑀻𑀭𑀼𑀳𑁄;

𑀅𑀦𑁆𑀢𑁄𑀧𑀣𑀯𑀺𑀬𑀁 𑀬𑁂𑀯, 𑀲𑀢𑀳𑀢𑁆𑀣𑁄𑀧𑀺 𑀯𑀟𑁆𑀠𑀢𑀺.

‘‘‘𑀬𑀣𑀸 𑀓𑀸𑀮𑀫𑁆𑀳𑀺 𑀲𑀫𑁆𑀧𑀢𑁆𑀢𑁂, 𑀧𑀭𑀺𑀧𑀸𑀓𑁂𑀦 𑀲𑁄 𑀤𑀼𑀫𑁄;

𑀉𑀕𑁆𑀕𑀜𑁆𑀙𑀺𑀢𑁆𑀯𑀸𑀦 𑀏𑀓𑀸𑀳𑀁, 𑀲𑀢𑀳𑀢𑁆𑀣𑁄𑀧𑀺 𑀯𑀟𑁆𑀠𑀢𑀺.

‘‘‘𑀏𑀯𑀫𑁂𑀯𑀸𑀳𑀁 𑀫𑀳𑀸𑀯𑀻𑀭, 𑀲𑀸𑀮𑀓𑀮𑁆𑀬𑀸𑀡𑀺𑀓𑀸 𑀯𑀺𑀬;

𑀅𑀩𑁆𑀪𑀦𑁆𑀢𑀭𑁂 𑀲𑀼𑀜𑁆𑀜𑀸𑀕𑀸𑀭𑁂, 𑀥𑀫𑁆𑀫𑀢𑁄 𑀅𑀪𑀺𑀯𑀟𑁆𑀠𑀬𑀺’’’𑀦𑁆𑀢𑀺.

𑀲𑀸𑀮𑀓𑀮𑁆𑀬𑀸𑀡𑀺𑀓𑀗𑁆𑀕𑀧𑀜𑁆𑀳𑁄 𑀘𑀢𑀼𑀢𑁆𑀣𑁄.

𑁫. 𑀦𑀸𑀯𑀗𑁆𑀕𑀧𑀜𑁆𑀳𑁄

𑁫. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, ‘𑀦𑀸𑀯𑀸𑀬 𑀢𑀻𑀡𑀺 𑀅𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻’𑀢𑀺 𑀬𑀁 𑀯𑀤𑁂𑀲𑀺, 𑀓𑀢𑀫𑀸𑀦𑀺 𑀢𑀸𑀦𑀺 𑀢𑀻𑀡𑀺 𑀅𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻’’𑀢𑀺? ‘‘𑀬𑀣𑀸, 𑀫𑀳𑀸𑀭𑀸𑀚, 𑀦𑀸𑀯𑀸 𑀩𑀳𑀼𑀯𑀺𑀥𑀤𑀸𑀭𑀼𑀲𑀗𑁆𑀖𑀸𑀝𑀲𑀫𑀯𑀸𑀬𑁂𑀦 𑀩𑀳𑀼𑀫𑁆𑀧𑀺 𑀚𑀦𑀁 𑀢𑀸𑀭𑀬𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀆𑀘𑀸𑀭𑀲𑀻𑀮𑀕𑀼𑀡𑀯𑀢𑁆𑀢𑀧𑁆𑀧𑀝𑀺𑀯𑀢𑁆𑀢𑀩𑀳𑀼𑀯𑀺𑀥𑀥𑀫𑁆𑀫𑀲𑀗𑁆𑀖𑀸𑀝𑀲𑀫𑀯𑀸𑀬𑁂𑀦 𑀲𑀤𑁂𑀯𑀓𑁄 𑀮𑁄𑀓𑁄 𑀢𑀸𑀭𑀬𑀺𑀢𑀩𑁆𑀩𑁄. 𑀇𑀤𑀁, 𑀫𑀳𑀸𑀭𑀸𑀚, 𑀦𑀸𑀯𑀸𑀬 𑀧𑀞𑀫𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀦𑀸𑀯𑀸 𑀩𑀳𑀼𑀯𑀺𑀥𑀊𑀫𑀺𑀢𑁆𑀣𑀦𑀺𑀢𑀯𑁂𑀕𑀯𑀺𑀲𑀝𑀫𑀸𑀯𑀝𑁆𑀝𑀯𑁂𑀕𑀁 𑀲𑀳𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀩𑀳𑀼𑀯𑀺𑀥𑀓𑀺𑀮𑁂𑀲𑀊𑀫𑀺𑀯𑁂𑀕𑀁 𑀮𑀸𑀪𑀲𑀓𑁆𑀓𑀸𑀭𑀬𑀲𑀲𑀺𑀮𑁄𑀓𑀧𑀽𑀚𑀦𑀯𑀦𑁆𑀤𑀦𑀸 𑀧𑀭𑀓𑀼𑀮𑁂𑀲𑀼 𑀦𑀺𑀦𑁆𑀤𑀸𑀧𑀲𑀁𑀲𑀸𑀲𑀼𑀔𑀤𑀼𑀓𑁆𑀔𑀲𑀫𑁆𑀫𑀸𑀦𑀦𑀯𑀺𑀫𑀸𑀦𑀦𑀩𑀳𑀼𑀯𑀺𑀥𑀤𑁄𑀲𑀊𑀫𑀺𑀯𑁂𑀕𑀜𑁆𑀘 𑀲𑀳𑀺𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀦𑀸𑀯𑀸𑀬 𑀤𑀼𑀢𑀺𑀬𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀦𑀸𑀯𑀸 𑀅𑀧𑀭𑀺𑀫𑀺𑀢𑀫𑀦𑀦𑁆𑀢𑀫𑀧𑀸𑀭𑀫𑀓𑁆𑀔𑁄𑀪𑀺𑀢𑀕𑀫𑁆𑀪𑀻𑀭𑁂 𑀫𑀳𑀢𑀺𑀫𑀳𑀸𑀖𑁄𑀲𑁂 𑀢𑀺𑀫𑀺𑀢𑀺𑀫𑀺𑀗𑁆𑀕𑀮𑀫𑀓𑀭𑀫𑀘𑁆𑀙𑀕𑀡𑀸𑀓𑀼𑀮𑁂 𑀫𑀳𑀢𑀺𑀫𑀳𑀸𑀲𑀫𑀼𑀤𑁆𑀤𑁂 𑀘𑀭𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀢𑀺𑀧𑀭𑀺𑀯𑀝𑁆𑀝 𑀤𑁆𑀯𑀸𑀤𑀲𑀸𑀓𑀸𑀭 𑀘𑀢𑀼𑀲𑀘𑁆𑀘𑀸𑀪𑀺𑀲𑀫𑀬𑀧𑁆𑀧𑀝𑀺𑀯𑁂𑀥𑁂 𑀫𑀸𑀦𑀲𑀁 𑀲𑀜𑁆𑀘𑀸𑀭𑀬𑀺𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀦𑀸𑀯𑀸𑀬 𑀢𑀢𑀺𑀬𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑀤𑁂𑀯𑀸𑀢𑀺𑀤𑁂𑀯𑁂𑀦 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑀯𑀭𑁂 𑀲𑀘𑁆𑀘𑀲𑀁𑀬𑀼𑀢𑁆𑀢𑁂 𑁋

‘‘‘𑀯𑀺𑀢𑀓𑁆𑀓𑁂𑀦𑁆𑀢𑀸 𑀘 𑀔𑁄 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, ‘‘𑀇𑀤𑀁 𑀤𑀼𑀓𑁆𑀔’’𑀦𑁆𑀢𑀺 𑀯𑀺𑀢𑀓𑁆𑀓𑁂𑀬𑁆𑀬𑀸𑀣, ‘‘𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄’’𑀢𑀺 𑀯𑀺𑀢𑀓𑁆𑀓𑁂𑀬𑁆𑀬𑀸𑀣, ‘‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑁄’’𑀢𑀺 𑀯𑀺𑀢𑀓𑁆𑀓𑁂𑀬𑁆𑀬𑀸𑀣, ‘‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’’𑀢𑀺 𑀯𑀺𑀢𑀓𑁆𑀓𑁂𑀬𑁆𑀬𑀸𑀣𑀸’’’𑀢𑀺.

𑀦𑀸𑀯𑀗𑁆𑀕𑀧𑀜𑁆𑀳𑁄 𑀧𑀜𑁆𑀘𑀫𑁄.

𑁬. 𑀦𑀸𑀯𑀸𑀮𑀕𑁆𑀕𑀦𑀓𑀗𑁆𑀕𑀧𑀜𑁆𑀳𑁄

𑁬. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, ‘𑀦𑀸𑀯𑀸𑀮𑀕𑁆𑀕𑀦𑀓𑀲𑁆𑀲 𑀤𑁆𑀯𑁂 𑀅𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻’𑀢𑀺 𑀬𑀁 𑀯𑀤𑁂𑀲𑀺, 𑀓𑀢𑀫𑀸𑀦𑀺 𑀢𑀸𑀦𑀺 𑀤𑁆𑀯𑁂 𑀅𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻’’𑀢𑀺? ‘‘𑀬𑀣𑀸, 𑀫𑀳𑀸𑀭𑀸𑀚, 𑀦𑀸𑀯𑀸𑀮𑀕𑁆𑀕𑀦𑀓𑀁 𑀩𑀳𑀼𑀊𑀫𑀺𑀚𑀸𑀮𑀸𑀓𑀼𑀮𑀯𑀺𑀓𑁆𑀔𑁄𑀪𑀺𑀢𑀲𑀮𑀺𑀮𑀢𑀮𑁂 𑀫𑀳𑀢𑀺𑀫𑀳𑀸𑀲𑀫𑀼𑀤𑁆𑀤𑁂 𑀦𑀸𑀯𑀁 𑀮𑀕𑁆𑀕𑁂𑀢𑀺 𑀞𑀧𑁂𑀢𑀺, 𑀦 𑀤𑁂𑀢𑀺 𑀤𑀺𑀲𑀸𑀯𑀺𑀤𑀺𑀲𑀁 𑀳𑀭𑀺𑀢𑀼𑀁, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀭𑀸𑀕𑀤𑁄𑀲𑀫𑁄𑀳𑀽𑀫𑀺𑀚𑀸𑀮𑁂 𑀫𑀳𑀢𑀺𑀫𑀳𑀸𑀯𑀺𑀢𑀓𑁆𑀓𑀲𑀫𑁆𑀧𑀳𑀸𑀭𑁂 𑀘𑀺𑀢𑁆𑀢𑀁 𑀮𑀕𑁆𑀕𑁂𑀢𑀩𑁆𑀩𑀁, 𑀦 𑀤𑀸𑀢𑀩𑁆𑀩𑀁 𑀤𑀺𑀲𑀸𑀯𑀺𑀤𑀺𑀲𑀁 𑀳𑀭𑀺𑀢𑀼𑀁. 𑀇𑀤𑀁, 𑀫𑀳𑀸𑀭𑀸𑀚, 𑀦𑀸𑀯𑀸𑀮𑀕𑁆𑀕𑀦𑀓𑀲𑁆𑀲 𑀧𑀞𑀫𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀦𑀸𑀯𑀸𑀮𑀕𑁆𑀕𑀦𑀓𑀁 𑀦 𑀧𑁆𑀮𑀯𑀢𑀺 [𑀦 𑀧𑀺𑀮𑀯𑀢𑀺 (𑀲𑀻. 𑀧𑀻.)] 𑀯𑀺𑀲𑀻𑀤𑀢𑀺, 𑀳𑀢𑁆𑀣𑀲𑀢𑁂𑀧𑀺 𑀉𑀤𑀓𑁂 𑀦𑀸𑀯𑀁 𑀮𑀕𑁆𑀕𑁂𑀢𑀺 𑀞𑀸𑀦𑀫𑀼𑀧𑀦𑁂𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀮𑀸𑀪𑀬𑀲𑀲𑀓𑁆𑀓𑀸𑀭𑀫𑀸𑀦𑀦𑀯𑀦𑁆𑀤𑀦𑀧𑀽𑀚𑀦𑀅𑀧𑀘𑀺𑀢𑀻𑀲𑀼 𑀮𑀸𑀪𑀕𑁆𑀕𑀬𑀲𑀕𑁆𑀕𑁂𑀧𑀺 𑀦 𑀧𑁆𑀮𑀯𑀺𑀢𑀩𑁆𑀩𑀁, 𑀲𑀭𑀻𑀭𑀬𑀸𑀧𑀦𑀫𑀢𑁆𑀢𑀓𑁂 𑀬𑁂𑀯 𑀘𑀺𑀢𑁆𑀢𑀁 𑀞𑀧𑁂𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀦𑀸𑀯𑀸𑀮𑀕𑁆𑀕𑀦𑀓𑀲𑁆𑀲 𑀤𑀼𑀢𑀺𑀬𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀣𑁂𑀭𑁂𑀦 𑀲𑀸𑀭𑀺𑀧𑀼𑀢𑁆𑀢𑁂𑀦 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑁋

‘‘‘𑀬𑀣𑀸 𑀲𑀫𑀼𑀤𑁆𑀤𑁂 𑀮𑀕𑁆𑀕𑀦𑀓𑀁, 𑀦 𑀧𑁆𑀮𑀯𑀢𑀺 𑀯𑀺𑀲𑀻𑀤𑀢𑀺;

𑀢𑀣𑁂𑀯 𑀮𑀸𑀪𑀲𑀓𑁆𑀓𑀸𑀭𑁂, 𑀫𑀸 𑀧𑁆𑀮𑀯𑀣 𑀯𑀺𑀲𑀻𑀤𑀣𑀸’’’𑀢𑀺.

𑀦𑀸𑀯𑀸𑀮𑀕𑁆𑀕𑀦𑀓𑀗𑁆𑀕𑀧𑀜𑁆𑀳𑁄 𑀙𑀝𑁆𑀞𑁄.

𑁭. 𑀓𑀽𑀧𑀗𑁆𑀕𑀧𑀜𑁆𑀳𑁄

𑁭. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, ‘𑀓𑀽𑀧𑀲𑁆𑀲 𑀏𑀓𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩’𑀦𑁆𑀢𑀺 𑀬𑀁 𑀯𑀤𑁂𑀲𑀺, 𑀓𑀢𑀫𑀁 𑀢𑀁 𑀏𑀓𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩’’𑀦𑁆𑀢𑀺? ‘‘𑀬𑀣𑀸, 𑀫𑀳𑀸𑀭𑀸𑀚, 𑀓𑀽𑀧𑁄 𑀭𑀚𑁆𑀚𑀼𑀜𑁆𑀘 𑀯𑀭𑀢𑁆𑀢𑀜𑁆𑀘 𑀮𑀗𑁆𑀓𑀸𑀭𑀜𑁆𑀘 𑀥𑀸𑀭𑁂𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀲𑀢𑀺𑀲𑀫𑁆𑀧𑀚𑀜𑁆𑀜𑀲𑀫𑀦𑁆𑀦𑀸𑀕𑀢𑁂𑀦 𑀪𑀯𑀺𑀢𑀩𑁆𑀩𑀁, 𑀅𑀪𑀺𑀓𑁆𑀓𑀦𑁆𑀢𑁂 𑀧𑀝𑀺𑀓𑁆𑀓𑀦𑁆𑀢𑁂 𑀆𑀮𑁄𑀓𑀺𑀢𑁂 𑀯𑀺𑀮𑁄𑀓𑀺𑀢𑁂 𑀲𑀫𑀺𑀜𑁆𑀚𑀺𑀢𑁂 𑀧𑀲𑀸𑀭𑀺𑀢𑁂 𑀲𑀗𑁆𑀖𑀸𑀝𑀺𑀧𑀢𑁆𑀢𑀘𑀻𑀯𑀭𑀥𑀸𑀭𑀡𑁂 𑀅𑀲𑀺𑀢𑁂 𑀧𑀻𑀢𑁂 𑀔𑀸𑀬𑀺𑀢𑁂 𑀲𑀸𑀬𑀺𑀢𑁂 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀓𑀫𑁆𑀫𑁂 𑀕𑀢𑁂 𑀞𑀺𑀢𑁂 𑀦𑀺𑀲𑀺𑀦𑁆𑀦𑁂 𑀲𑀼𑀢𑁆𑀢𑁂 𑀚𑀸𑀕𑀭𑀺𑀢𑁂 𑀪𑀸𑀲𑀺𑀢𑁂 𑀢𑀼𑀡𑁆𑀳𑀻𑀪𑀸𑀯𑁂 𑀲𑀫𑁆𑀧𑀚𑀸𑀦𑀓𑀸𑀭𑀺𑀦𑀸 𑀪𑀯𑀺𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀓𑀽𑀧𑀲𑁆𑀲 𑀏𑀓𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑀤𑁂𑀯𑀸𑀢𑀺𑀤𑁂𑀯𑁂𑀦 ‘𑀲𑀢𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀯𑀺𑀳𑀭𑁂𑀬𑁆𑀬 𑀲𑀫𑁆𑀧𑀚𑀸𑀦𑁄, 𑀅𑀬𑀁 𑀯𑁄 𑀅𑀫𑁆𑀳𑀸𑀓𑀁 𑀅𑀦𑀼𑀲𑀸𑀲𑀦𑀻’’’𑀢𑀺.

𑀓𑀽𑀧𑀗𑁆𑀕𑀧𑀜𑁆𑀳𑁄 𑀲𑀢𑁆𑀢𑀫𑁄.

𑁮. 𑀦𑀺𑀬𑀸𑀫𑀓𑀗𑁆𑀕𑀧𑀜𑁆𑀳𑁄

𑁮. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, ‘𑀦𑀺𑀬𑀸𑀫𑀓𑀲𑁆𑀲 𑀢𑀻𑀡𑀺 𑀅𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻’𑀢𑀺 𑀬𑀁 𑀯𑀤𑁂𑀲𑀺, 𑀓𑀢𑀫𑀸𑀦𑀺 𑀢𑀸𑀦𑀺 𑀢𑀻𑀡𑀺 𑀅𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻’’𑀢𑀺? ‘‘𑀬𑀣𑀸, 𑀫𑀳𑀸𑀭𑀸𑀚, 𑀦𑀺𑀬𑀸𑀫𑀓𑁄 𑀭𑀢𑁆𑀢𑀺𑀦𑁆𑀤𑀺𑀯𑀁 𑀲𑀢𑀢𑀁 𑀲𑀫𑀺𑀢𑀁 𑀅𑀧𑁆𑀧𑀫𑀢𑁆𑀢𑁄 𑀬𑀢𑁆𑀢𑀧𑁆𑀧𑀬𑀢𑁆𑀢𑁄 𑀦𑀸𑀯𑀁 𑀲𑀸𑀭𑁂𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀘𑀺𑀢𑁆𑀢𑀁 𑀦𑀺𑀬𑀸𑀫𑀬𑀫𑀸𑀦𑁂𑀦 𑀭𑀢𑁆𑀢𑀺𑀦𑁆𑀤𑀺𑀯𑀁 𑀲𑀢𑀢𑀁 𑀲𑀫𑀺𑀢𑀁 𑀅𑀧𑁆𑀧𑀫𑀢𑁆𑀢𑁂𑀦 𑀬𑀢𑁆𑀢𑀧𑁆𑀧𑀬𑀢𑁆𑀢𑁂𑀦 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁂𑀦 𑀘𑀺𑀢𑁆𑀢𑀁 𑀦𑀺𑀬𑀸𑀫𑁂𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀦𑀺𑀬𑀸𑀫𑀓𑀲𑁆𑀲 𑀧𑀞𑀫𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑀤𑁂𑀯𑀸𑀢𑀺𑀤𑁂𑀯𑁂𑀦 𑀥𑀫𑁆𑀫𑀧𑀤𑁂 𑁋

‘‘‘𑀅𑀧𑁆𑀧𑀫𑀸𑀤𑀭𑀢𑀸 𑀳𑁄𑀣, 𑀲𑀘𑀺𑀢𑁆𑀢𑀫𑀦𑀼𑀭𑀓𑁆𑀔𑀣;

𑀤𑀼𑀕𑁆𑀕𑀸 𑀉𑀤𑁆𑀥𑀭𑀣𑀢𑁆𑀢𑀸𑀦𑀁, 𑀧𑀗𑁆𑀓𑁂 𑀲𑀦𑁆𑀦𑁄𑀯 [𑀲𑀢𑁆𑀢𑁄𑀯 (𑀲𑀻. 𑀧𑀻.)] 𑀓𑀼𑀜𑁆𑀚𑀭𑁄’𑀢𑀺.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀦𑀺𑀬𑀸𑀫𑀓𑀲𑁆𑀲 𑀬𑀁 𑀓𑀺𑀜𑁆𑀘𑀺 𑀫𑀳𑀸𑀲𑀫𑀼𑀤𑁆𑀤𑁂 𑀓𑀮𑁆𑀬𑀸𑀡𑀁 𑀯𑀸 𑀧𑀸𑀧𑀓𑀁 𑀯𑀸, 𑀲𑀩𑁆𑀩𑀁 𑀢𑀁 𑀯𑀺𑀤𑀺𑀢𑀁 𑀳𑁄𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀓𑀼𑀲𑀮𑀸𑀓𑀼𑀲𑀮𑀁 𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑀁 𑀳𑀻𑀦𑀧𑁆𑀧𑀡𑀻𑀢𑀁 𑀓𑀡𑁆𑀳𑀲𑀼𑀓𑁆𑀓𑀲𑀧𑁆𑀧𑀝𑀺𑀪𑀸𑀕𑀁 𑀯𑀺𑀚𑀸𑀦𑀺𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀦𑀺𑀬𑀸𑀫𑀓𑀲𑁆𑀲 𑀤𑀼𑀢𑀺𑀬𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀦𑀺𑀬𑀸𑀫𑀓𑁄 𑀬𑀦𑁆𑀢𑁂 𑀫𑀼𑀤𑁆𑀤𑀺𑀓𑀁 𑀤𑁂𑀢𑀺 ‘𑀫𑀸 𑀓𑁄𑀘𑀺 𑀬𑀦𑁆𑀢𑀁 𑀆𑀫𑀲𑀺𑀢𑁆𑀣𑀸’𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀘𑀺𑀢𑁆𑀢𑁂 𑀲𑀁𑀯𑀭𑀫𑀼𑀤𑁆𑀤𑀺𑀓𑀸 𑀤𑀸𑀢𑀩𑁆𑀩𑀸 ‘𑀫𑀸 𑀓𑀺𑀜𑁆𑀘𑀺 𑀧𑀸𑀧𑀓𑀁 𑀅𑀓𑀼𑀲𑀮𑀯𑀺𑀢𑀓𑁆𑀓𑀁 𑀯𑀺𑀢𑀓𑁆𑀓𑁂𑀲𑀻’𑀢𑀺, 𑀇𑀤𑀁, 𑀫𑀳𑀸𑀭𑀸𑀚, 𑀦𑀺𑀬𑀸𑀫𑀓𑀲𑁆𑀲 𑀢𑀢𑀺𑀬𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑀤𑁂𑀯𑀸𑀢𑀺𑀤𑁂𑀯𑁂𑀦 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑀯𑀭𑁂 ‘𑀫𑀸, 𑀪𑀺𑀓𑁆𑀔𑀯𑁂, 𑀧𑀸𑀧𑀓𑁂 𑀅𑀓𑀼𑀲𑀮𑁂 𑀯𑀺𑀢𑀓𑁆𑀓𑁂 𑀯𑀺𑀢𑀓𑁆𑀓𑁂𑀬𑁆𑀬𑀸𑀣, 𑀲𑁂𑀬𑁆𑀬𑀣𑀻𑀤𑀁, 𑀓𑀸𑀫𑀯𑀺𑀢𑀓𑁆𑀓𑀁 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑀁 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓’’’𑀦𑁆𑀢𑀺.

𑀦𑀺𑀬𑀸𑀫𑀓𑀗𑁆𑀕𑀧𑀜𑁆𑀳𑁄 𑀅𑀝𑁆𑀞𑀫𑁄.

𑁯. 𑀓𑀫𑁆𑀫𑀓𑀸𑀭𑀗𑁆𑀕𑀧𑀜𑁆𑀳𑁄

𑁯. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, ‘𑀓𑀫𑁆𑀫𑀓𑀸𑀭𑀲𑁆𑀲 𑀏𑀓𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩’𑀦𑁆𑀢𑀺 𑀬𑀁 𑀯𑀤𑁂𑀲𑀺, 𑀓𑀢𑀫𑀁 𑀢𑀁 𑀏𑀓𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩’’𑀦𑁆𑀢𑀺? ‘‘𑀬𑀣𑀸, 𑀫𑀳𑀸𑀭𑀸𑀚, 𑀓𑀫𑁆𑀫𑀓𑀸𑀭𑁄 𑀏𑀯𑀁 𑀘𑀺𑀦𑁆𑀢𑀬𑀢𑀺 ‘𑀪𑀢𑀓𑁄 𑀅𑀳𑀁 𑀇𑀫𑀸𑀬 𑀦𑀸𑀯𑀸𑀬 𑀓𑀫𑁆𑀫𑀁 𑀓𑀭𑁄𑀫𑀺, 𑀇𑀫𑀸𑀬𑀸𑀳𑀁 𑀦𑀸𑀯𑀸𑀬 𑀯𑀸𑀳𑀲𑀸 𑀪𑀢𑁆𑀢𑀯𑁂𑀢𑀦𑀁 𑀮𑀪𑀸𑀫𑀺, 𑀦 𑀫𑁂 𑀧𑀫𑀸𑀤𑁄 𑀓𑀭𑀡𑀻𑀬𑁄, 𑀅𑀧𑁆𑀧𑀫𑀸𑀤𑁂𑀦 𑀫𑁂 𑀅𑀬𑀁 𑀦𑀸𑀯𑀸 𑀯𑀸𑀳𑁂𑀢𑀩𑁆𑀩𑀸’𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀏𑀯𑀁 𑀘𑀺𑀦𑁆𑀢𑀬𑀺𑀢𑀩𑁆𑀩𑀁 ‘𑀇𑀫𑀁 𑀔𑁄 𑀅𑀳𑀁 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑀁 𑀓𑀸𑀬𑀁 𑀲𑀫𑁆𑀫𑀲𑀦𑁆𑀢𑁄 𑀲𑀢𑀢𑀁 𑀲𑀫𑀺𑀢𑀁 𑀅𑀧𑁆𑀧𑀫𑀢𑁆𑀢𑁄 𑀉𑀧𑀝𑁆𑀞𑀺𑀢𑀲𑁆𑀲𑀢𑀺 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀲𑀫𑀸𑀳𑀺𑀢𑁄 𑀏𑀓𑀕𑁆𑀕𑀘𑀺𑀢𑁆𑀢𑁄 𑀚𑀸𑀢𑀺𑀚𑀭𑀸𑀩𑁆𑀬𑀸𑀥𑀺𑀫𑀭𑀡𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑁂𑀳𑀺 𑀧𑀭𑀺𑀫𑀼𑀘𑁆𑀘𑀺𑀲𑁆𑀲𑀸𑀫𑀻𑀢𑀺 𑀅𑀧𑁆𑀧𑀫𑀸𑀤𑁄 𑀫𑁂 𑀓𑀭𑀡𑀻𑀬𑁄’𑀢𑀺, 𑀇𑀤𑀁, 𑀫𑀳𑀸𑀭𑀸𑀚, 𑀓𑀫𑁆𑀫𑀓𑀸𑀭𑀲𑁆𑀲 𑀏𑀓𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀣𑁂𑀭𑁂𑀦 𑀲𑀸𑀭𑀺𑀧𑀼𑀢𑁆𑀢𑁂𑀦 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑁋

‘‘‘𑀓𑀸𑀬𑀁 𑀇𑀫𑀁 𑀲𑀫𑁆𑀫𑀲𑀣, 𑀧𑀭𑀺𑀚𑀸𑀦𑀸𑀣 𑀧𑀼𑀦𑀧𑁆𑀧𑀼𑀦𑀁;

𑀓𑀸𑀬𑁂 𑀲𑀪𑀸𑀯𑀁 𑀤𑀺𑀲𑁆𑀯𑀸𑀦, 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀣𑀸’𑀢𑀺.

𑀓𑀫𑁆𑀫𑀓𑀸𑀭𑀗𑁆𑀕𑀧𑀜𑁆𑀳𑁄 𑀦𑀯𑀫𑁄.

𑁧𑁦. 𑀲𑀫𑀼𑀤𑁆𑀤𑀗𑁆𑀕𑀧𑀜𑁆𑀳𑁄

𑁧𑁦. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, ‘𑀲𑀫𑀼𑀤𑁆𑀤𑀲𑁆𑀲 𑀧𑀜𑁆𑀘 𑀅𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻’𑀢𑀺 𑀬𑀁 𑀯𑀤𑁂𑀲𑀺, 𑀓𑀢𑀫𑀸𑀦𑀺 𑀢𑀸𑀦𑀺 𑀧𑀜𑁆𑀘 𑀅𑀗𑁆𑀕𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀻’’𑀢𑀺? ‘‘𑀬𑀣𑀸, 𑀫𑀳𑀸𑀭𑀸𑀚, 𑀫𑀳𑀸𑀲𑀫𑀼𑀤𑁆𑀤𑁄 𑀫𑀢𑁂𑀦 𑀓𑀼𑀡𑀧𑁂𑀦 𑀲𑀤𑁆𑀥𑀺𑀁 𑀦 𑀲𑀁𑀯𑀲𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀭𑀸𑀕𑀤𑁄𑀲𑀫𑁄𑀳𑀫𑀸𑀦𑀤𑀺𑀝𑁆𑀞𑀺𑀫𑀓𑁆𑀔𑀧𑀴𑀸𑀲𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀫𑀸𑀬𑀸𑀲𑀸𑀞𑁂𑀬𑁆𑀬𑀓𑀼𑀝𑀺𑀮𑀯𑀺𑀲𑀫𑀤𑀼𑀘𑁆𑀘𑀭𑀺𑀢𑀓𑀺𑀮𑁂𑀲𑀫𑀮𑁂𑀳𑀺 𑀲𑀤𑁆𑀥𑀺𑀁 𑀦 𑀲𑀁𑀯𑀲𑀺𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀲𑀫𑀼𑀤𑁆𑀤𑀲𑁆𑀲 𑀧𑀞𑀫𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀫𑀳𑀸𑀲𑀫𑀼𑀤𑁆𑀤𑁄 𑀫𑀼𑀢𑁆𑀢𑀸𑀫𑀡𑀺𑀯𑁂𑀴𑀼𑀭𑀺𑀬𑀲𑀗𑁆𑀔𑀲𑀺𑀮𑀸𑀧𑀯𑀸𑀴𑀨𑀮𑀺𑀓𑀫𑀡𑀺𑀯𑀺𑀯𑀺𑀥𑀭𑀢𑀦𑀦𑀺𑀘𑀬𑀁 𑀥𑀸𑀭𑁂𑀦𑁆𑀢𑁄 𑀧𑀺𑀤𑀳𑀢𑀺, 𑀦 𑀩𑀳𑀺 𑀯𑀺𑀓𑀺𑀭𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀫𑀕𑁆𑀕𑀨𑀮𑀛𑀸𑀦𑀯𑀺𑀫𑁄𑀓𑁆𑀔𑀲𑀫𑀸𑀥𑀺𑀲𑀫𑀸𑀧𑀢𑁆𑀢𑀺𑀯𑀺𑀧𑀲𑁆𑀲𑀦𑀸𑀪𑀺𑀜𑁆𑀜𑀸𑀯𑀺𑀯𑀺𑀥𑀕𑀼𑀡𑀭𑀢𑀦𑀸𑀦𑀺 𑀅𑀥𑀺𑀕𑀦𑁆𑀢𑁆𑀯𑀸 𑀧𑀺𑀤𑀳𑀺𑀢𑀩𑁆𑀩𑀸𑀦𑀺, 𑀦 𑀩𑀳𑀺 𑀦𑀻𑀳𑀭𑀺𑀢𑀩𑁆𑀩𑀸𑀦𑀺. 𑀇𑀤𑀁, 𑀫𑀳𑀸𑀭𑀸𑀚, 𑀲𑀫𑀼𑀤𑁆𑀤𑀲𑁆𑀲 𑀤𑀼𑀢𑀺𑀬𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀫𑀳𑀸𑀲𑀫𑀼𑀤𑁆𑀤𑁄 𑀫𑀳𑀦𑁆𑀢𑁂𑀳𑀺 𑀫𑀳𑀸𑀪𑀽𑀢𑁂𑀳𑀺 𑀲𑀤𑁆𑀥𑀺𑀁 𑀲𑀁𑀯𑀲𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀅𑀧𑁆𑀧𑀺𑀘𑁆𑀙𑀁 𑀲𑀦𑁆𑀢𑀼𑀝𑁆𑀞𑀁 𑀥𑀼𑀢𑀯𑀸𑀤𑀁 𑀲𑀮𑁆𑀮𑁂𑀔𑀯𑀼𑀢𑁆𑀢𑀺𑀁 𑀆𑀘𑀸𑀭𑀲𑀫𑁆𑀧𑀦𑁆𑀦𑀁 𑀮𑀚𑁆𑀚𑀺𑀁 𑀧𑁂𑀲𑀮𑀁 𑀕𑀭𑀼𑀁 𑀪𑀸𑀯𑀦𑀻𑀬𑀁 𑀯𑀢𑁆𑀢𑀸𑀭𑀁 𑀯𑀘𑀦𑀓𑁆𑀔𑀫𑀁 𑀘𑁄𑀤𑀓𑀁 𑀧𑀸𑀧𑀕𑀭𑀳𑀺𑀁 𑀑𑀯𑀸𑀤𑀓𑀁 𑀅𑀦𑀼𑀲𑀸𑀲𑀓𑀁 𑀯𑀺𑀜𑁆𑀜𑀸𑀧𑀓𑀁 𑀲𑀦𑁆𑀤𑀲𑁆𑀲𑀓𑀁 𑀲𑀫𑀸𑀤𑀧𑀓𑀁 𑀲𑀫𑀼𑀢𑁆𑀢𑁂𑀚𑀓𑀁 𑀲𑀫𑁆𑀧𑀳𑀁𑀲𑀓𑀁 𑀓𑀮𑁆𑀬𑀸𑀡𑀫𑀺𑀢𑁆𑀢𑀁 𑀲𑀩𑁆𑀭𑀳𑁆𑀫𑀘𑀸𑀭𑀺𑀁 𑀦𑀺𑀲𑁆𑀲𑀸𑀬 𑀯𑀲𑀺𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀫𑀳𑀸𑀲𑀫𑀼𑀤𑁆𑀤𑀲𑁆𑀲 𑀢𑀢𑀺𑀬𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀫𑀳𑀸𑀲𑀫𑀼𑀤𑁆𑀤𑁄 𑀦𑀯𑀲𑀮𑀺𑀮𑀲𑀫𑁆𑀧𑀼𑀡𑁆𑀡𑀸𑀳𑀺 𑀕𑀗𑁆𑀕𑀸𑀬𑀫𑀼𑀦𑀸𑀅𑀘𑀺𑀭𑀯𑀢𑀻𑀲𑀭𑀪𑀽𑀫𑀳𑀻𑀆𑀤𑀻𑀳𑀺 𑀦𑀤𑀻𑀲𑀢𑀲𑀳𑀲𑁆𑀲𑁂𑀳𑀺 𑀅𑀦𑁆𑀢𑀮𑀺𑀓𑁆𑀔𑁂 𑀲𑀮𑀺𑀮𑀥𑀸𑀭𑀸𑀳𑀺 𑀘 𑀧𑀽𑀭𑀺𑀢𑁄𑀧𑀺 𑀲𑀓𑀁 𑀯𑁂𑀮𑀁 𑀦𑀸𑀢𑀺𑀯𑀢𑁆𑀢𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀯𑀦𑁆𑀤𑀦𑀫𑀸𑀦𑀦𑀧𑀽𑀚𑀦𑀓𑀸𑀭𑀡𑀸 𑀚𑀻𑀯𑀺𑀢𑀳𑁂𑀢𑀼𑀧𑀺 𑀲𑀜𑁆𑀘𑀺𑀘𑁆𑀘 𑀲𑀺𑀓𑁆𑀔𑀸𑀧𑀤𑀯𑀻𑀢𑀺𑀓𑁆𑀓𑀫𑁄 𑀦 𑀓𑀭𑀡𑀻𑀬𑁄. 𑀇𑀤𑀁, 𑀫𑀳𑀸𑀭𑀸𑀚, 𑀫𑀳𑀸𑀲𑀫𑀼𑀤𑁆𑀤𑀲𑁆𑀲 𑀘𑀢𑀼𑀢𑁆𑀣𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑀤𑁂𑀯𑀸𑀢𑀺𑀤𑁂𑀯𑁂𑀦 𑁋

‘𑀲𑁂𑀬𑁆𑀬𑀣𑀸𑀧𑀺, 𑀫𑀳𑀸𑀭𑀸𑀚 [𑀧𑀳𑀸𑀭𑀸𑀥 (𑀲𑀻. 𑀧𑀻.)], 𑀫𑀳𑀸𑀲𑀫𑀼𑀤𑁆𑀤𑁄 𑀞𑀺𑀢𑀥𑀫𑁆𑀫𑁄 𑀯𑁂𑀮𑀁 𑀦𑀸𑀢𑀺𑀓𑁆𑀓𑀫𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑀁 𑀫𑀳𑀸 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁, 𑀢𑀁 𑀫𑀫 𑀲𑀸𑀯𑀓𑀸 𑀚𑀻𑀯𑀺𑀢𑀳𑁂𑀢𑀼𑀧𑀺 𑀦𑀸𑀢𑀺𑀓𑁆𑀓𑀫𑀦𑁆𑀢𑀻’𑀢𑀺.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀫𑀳𑀸𑀲𑀫𑀼𑀤𑁆𑀤𑁄 𑀲𑀩𑁆𑀩𑀲𑀯𑀦𑁆𑀢𑀻𑀳𑀺 𑀕𑀗𑁆𑀕𑀸𑀬𑀫𑀼𑀦𑀸𑀅𑀘𑀺𑀭𑀯𑀢𑀻𑀲𑀭𑀪𑀽𑀫𑀳𑀻𑀳𑀺 𑀅𑀦𑁆𑀢𑀮𑀺𑀓𑁆𑀔𑁂 𑀉𑀤𑀓𑀥𑀸𑀭𑀸𑀳𑀺𑀧𑀺 𑀦 𑀧𑀭𑀺𑀧𑀽𑀭𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄𑀕𑀺𑀦𑀸 𑀬𑁄𑀕𑀸𑀯𑀘𑀭𑁂𑀦 𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸𑀲𑀯𑀦𑀥𑀸𑀭𑀡𑀯𑀺𑀦𑀺𑀘𑁆𑀙𑀬𑀅𑀪𑀺𑀥𑀫𑁆𑀫𑀯𑀺𑀦𑀬𑀕𑀸𑀴𑁆𑀳𑀲𑀼𑀢𑁆𑀢𑀦𑁆𑀢𑀯𑀺𑀕𑁆𑀕𑀳𑀧𑀤𑀦𑀺𑀓𑁆𑀔𑁂𑀧𑀧𑀤𑀲𑀦𑁆𑀥𑀺 𑀧𑀤𑀯𑀺𑀪𑀢𑁆𑀢𑀺𑀦𑀯𑀗𑁆𑀕𑀚𑀺𑀦𑀲𑀸𑀲𑀦𑀯𑀭𑀁 𑀲𑀼𑀡𑀦𑁆𑀢𑁂𑀦𑀸𑀧𑀺 𑀦 𑀢𑀧𑁆𑀧𑀺𑀢𑀩𑁆𑀩𑀁. 𑀇𑀤𑀁, 𑀫𑀳𑀸𑀭𑀸𑀚, 𑀫𑀳𑀸𑀲𑀫𑀼𑀤𑁆𑀤𑀲𑁆𑀲 𑀧𑀜𑁆𑀘𑀫𑀁 𑀅𑀗𑁆𑀕𑀁 𑀕𑀳𑁂𑀢𑀩𑁆𑀩𑀁. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑀤𑁂𑀯𑀸𑀢𑀺𑀤𑁂𑀯𑁂𑀦 𑀲𑀼𑀢𑀲𑁄𑀫𑀚𑀸𑀢𑀓𑁂 𑁋

‘‘‘𑀅𑀕𑁆𑀕𑀺 𑀬𑀣𑀸 𑀢𑀺𑀡𑀓𑀝𑁆𑀞𑀁 𑀤𑀳𑀦𑁆𑀢𑁄, 𑀦 𑀢𑀧𑁆𑀧𑀢𑀺 𑀲𑀸𑀕𑀭𑁄 𑀯𑀸 𑀦𑀤𑀻𑀳𑀺;

𑀏𑀯𑀫𑁆𑀧𑀺 𑀘𑁂 [𑀏𑀯𑀫𑁆𑀧𑀺 𑀯𑁂 (𑀲𑁆𑀬𑀸.), 𑀏𑀯𑀁 𑀳𑀺 𑀫𑁂 (𑀓.) 𑀚𑀸. 𑁧 𑀅𑀲𑀻𑀢𑀺𑀦𑀺𑀧𑀸𑀢𑁂] 𑀧𑀡𑁆𑀟𑀺𑀢𑀸 𑀭𑀸𑀚𑀲𑁂𑀝𑁆𑀞, 𑀲𑀼𑀢𑁆𑀯𑀸 𑀦 𑀢𑀧𑁆𑀧𑀦𑁆𑀢𑀺 𑀲𑀼𑀪𑀸𑀲𑀺𑀢𑁂𑀦𑀸’’’𑀢𑀺.

𑀲𑀫𑀼𑀤𑁆𑀤𑀗𑁆𑀕𑀧𑀜𑁆𑀳𑁄 𑀤𑀲𑀫𑁄.𑀲𑀫𑀼𑀤𑁆𑀤𑀯𑀕𑁆𑀕𑁄 𑀤𑀼𑀢𑀺𑀬𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀮𑀸𑀩𑀼𑀮𑀢𑀸 𑀘 𑀧𑀤𑀼𑀫𑀁, 𑀩𑀻𑀚𑀁 𑀲𑀸𑀮𑀓𑀮𑁆𑀬𑀸𑀡𑀺𑀓𑀸;

𑀦𑀸𑀯𑀸 𑀘 𑀦𑀸𑀯𑀸𑀮𑀕𑁆𑀕𑀦𑀁, 𑀓𑀽𑀧𑁄 𑀦𑀺𑀬𑀸𑀫𑀓𑁄 𑀢𑀣𑀸;

𑀓𑀫𑁆𑀫𑀓𑀸𑀭𑁄 𑀲𑀫𑀼𑀤𑁆𑀤𑁄 𑀘, 𑀯𑀕𑁆𑀕𑁄 𑀢𑁂𑀦 𑀧𑀯𑀼𑀘𑁆𑀘𑀢𑀻𑀢𑀺.