𑁨. 𑀥𑀼𑀢𑀗𑁆𑀕𑀧𑀜𑁆𑀳𑁄

‘‘𑀧𑀲𑁆𑀲𑀢𑀸𑀭𑀜𑁆𑀜𑀓𑁂 𑀪𑀺𑀓𑁆𑀔𑀽, 𑀅𑀚𑁆𑀛𑁄𑀕𑀸𑀴𑁆𑀳𑁂 𑀥𑀼𑀢𑁂 𑀕𑀼𑀡𑁂;

𑀧𑀼𑀦 𑀧𑀲𑁆𑀲𑀢𑀺 𑀕𑀺𑀳𑀻 𑀭𑀸𑀚𑀸, 𑀅𑀦𑀸𑀕𑀸𑀫𑀺𑀨𑀮𑁂 𑀞𑀺𑀢𑁂.

‘‘𑀉𑀪𑁄𑀧𑀺 𑀢𑁂 𑀯𑀺𑀮𑁄𑀓𑁂𑀢𑁆𑀯𑀸, 𑀉𑀧𑁆𑀧𑀚𑁆𑀚𑀺 𑀲𑀁𑀲𑀬𑁄 𑀫𑀳𑀸;

𑀩𑀼𑀚𑁆𑀛𑁂𑀬𑁆𑀬 𑀘𑁂 𑀕𑀺𑀳𑀻 𑀥𑀫𑁆𑀫𑁂, 𑀥𑀼𑀢𑀗𑁆𑀕𑀁 𑀦𑀺𑀧𑁆𑀨𑀮𑀁 𑀲𑀺𑀬𑀸.

‘‘𑀧𑀭𑀯𑀸𑀤𑀺𑀯𑀸𑀤𑀫𑀣𑀦𑀁, 𑀦𑀺𑀧𑀼𑀡𑀁 𑀧𑀺𑀝𑀓𑀢𑁆𑀢𑀬𑁂;

𑀳𑀦𑁆𑀤 𑀧𑀼𑀘𑁆𑀙𑁂 𑀓𑀣𑀺𑀲𑁂𑀝𑁆𑀞𑀁, 𑀲𑁄 𑀫𑁂 𑀓𑀗𑁆𑀔𑀁 𑀯𑀺𑀦𑁂𑀲𑁆𑀲𑀢𑀻’’𑀢𑀺.

𑀅𑀣 𑀔𑁄 𑀫𑀺𑀮𑀺𑀦𑁆𑀤𑁄 𑀭𑀸𑀚𑀸 𑀬𑁂𑀦𑀸𑀬𑀲𑁆𑀫𑀸 𑀦𑀸𑀕𑀲𑁂𑀦𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀦𑀸𑀕𑀲𑁂𑀦𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺, 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀫𑀺𑀮𑀺𑀦𑁆𑀤𑁄 𑀭𑀸𑀚𑀸 𑀆𑀬𑀲𑁆𑀫𑀦𑁆𑀢𑀁 𑀦𑀸𑀕𑀲𑁂𑀦𑀁 𑀏𑀢𑀤𑀯𑁄𑀘 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀅𑀢𑁆𑀣𑀺 𑀓𑁄𑀘𑀺 𑀕𑀺𑀳𑀻 𑀅𑀕𑀸𑀭𑀺𑀓𑁄 𑀓𑀸𑀫𑀪𑁄𑀕𑀻 𑀧𑀼𑀢𑁆𑀢𑀤𑀸𑀭𑀲𑀫𑁆𑀩𑀸𑀥𑀲𑀬𑀦𑀁 𑀅𑀚𑁆𑀛𑀸𑀯𑀲𑀦𑁆𑀢𑁄 𑀓𑀸𑀲𑀺𑀓𑀘𑀦𑁆𑀤𑀦𑀁 𑀧𑀘𑁆𑀘𑀦𑀼𑀪𑁄𑀦𑁆𑀢𑁄 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀁 𑀥𑀸𑀭𑀬𑀦𑁆𑀢𑁄 𑀚𑀸𑀢𑀭𑀽𑀧𑀭𑀚𑀢𑀁 𑀲𑀸𑀤𑀺𑀬𑀦𑁆𑀢𑁄 𑀫𑀡𑀺𑀫𑀼𑀢𑁆𑀢𑀸𑀓𑀜𑁆𑀘𑀦𑀯𑀺𑀘𑀺𑀢𑁆𑀢𑀫𑁄𑀴𑀺𑀩𑀤𑁆𑀥𑁄 𑀬𑁂𑀦 𑀲𑀦𑁆𑀢𑀁 𑀧𑀭𑀫𑀢𑁆𑀣𑀁 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀢’’𑀦𑁆𑀢𑀺?

‘‘𑀦, 𑀫𑀳𑀸𑀭𑀸𑀚, 𑀏𑀓𑀜𑁆𑀜𑁂𑀯 𑀲𑀢𑀁 𑀦 𑀤𑁆𑀯𑁂 𑀲𑀢𑀸𑀦𑀺 𑀦 𑀢𑀻𑀡𑀺 𑀘𑀢𑁆𑀢𑀸𑀭𑀺 𑀧𑀜𑁆𑀘 𑀲𑀢𑀸𑀦𑀺 𑀦 𑀲𑀳𑀲𑁆𑀲𑀁 𑀦 𑀲𑀢𑀲𑀳𑀲𑁆𑀲𑀁 𑀦 𑀓𑁄𑀝𑀺𑀲𑀢𑀁 𑀦 𑀓𑁄𑀝𑀺𑀲𑀳𑀲𑁆𑀲𑀁 𑀦 𑀓𑁄𑀝𑀺𑀲𑀢𑀲𑀳𑀲𑁆𑀲𑀁, 𑀢𑀺𑀝𑁆𑀞𑀢𑀼 𑀫𑀳𑀸𑀭𑀸𑀚 𑀤𑀲𑀦𑁆𑀦𑀁 𑀯𑀻𑀲𑀢𑀺𑀬𑀸 𑀲𑀢𑀲𑁆𑀲 𑀲𑀳𑀲𑁆𑀲𑀲𑁆𑀲 𑀅𑀪𑀺𑀲𑀫𑀬𑁄, 𑀓𑀢𑀫𑁂𑀦 𑀢𑁂 𑀧𑀭𑀺𑀬𑀸𑀬𑁂𑀦 𑀅𑀦𑀼𑀬𑁄𑀕𑀁 𑀤𑀫𑁆𑀫𑀻’’𑀢𑀺.

‘‘𑀢𑁆𑀯𑀫𑁂𑀯𑁂𑀢𑀁 𑀩𑁆𑀭𑀽𑀳𑀻’’𑀢𑀺. ‘‘𑀢𑁂𑀦𑀳𑀺 𑀢𑁂, 𑀫𑀳𑀸𑀭𑀸𑀚, 𑀓𑀣𑀬𑀺𑀲𑁆𑀲𑀸𑀫𑀺 𑀲𑀢𑁂𑀦 𑀯𑀸 𑀲𑀳𑀲𑁆𑀲𑁂𑀦 𑀯𑀸 𑀲𑀢𑀲𑀳𑀲𑁆𑀲𑁂𑀦 𑀯𑀸 𑀓𑁄𑀝𑀺𑀬𑀸 𑀯𑀸 𑀓𑁄𑀝𑀺𑀲𑀢𑁂𑀦 𑀯𑀸 𑀓𑁄𑀝𑀺𑀲𑀳𑀲𑁆𑀲𑁂𑀦 𑀯𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑁂𑀦 𑀯𑀸, 𑀬𑀸 𑀓𑀸𑀘𑀺 𑀦𑀯𑀗𑁆𑀕𑁂 𑀩𑀼𑀤𑁆𑀥𑀯𑀘𑀦𑁂 𑀲𑀮𑁆𑀮𑁂𑀔𑀺𑀢𑀸𑀘𑀸𑀭𑀧𑁆𑀧𑀝𑀺𑀧𑀢𑁆𑀢𑀺𑀥𑀼𑀢𑀯𑀭𑀗𑁆𑀕𑀕𑀼𑀡𑀦𑀺𑀲𑁆𑀲𑀺𑀢𑀸 [𑀥𑀼𑀢𑀯𑀭𑀗𑁆𑀕𑀕𑀼𑀡𑀦𑀺𑀲𑁆𑀲𑀺𑀢𑀸 (𑀲𑀻. 𑀲𑁆𑀬𑀸. 𑀧𑀻.)] 𑀣𑀸, 𑀢𑀸 𑀲𑀩𑁆𑀩𑀸 𑀇𑀥 𑀲𑀫𑁄𑀲𑀭𑀺𑀲𑁆𑀲𑀦𑁆𑀢𑀺. 𑀬𑀣𑀸, 𑀫𑀳𑀸𑀭𑀸𑀚, 𑀦𑀺𑀦𑁆𑀦𑀼𑀦𑁆𑀦𑀢𑀲𑀫𑀯𑀺𑀲𑀫𑀣𑀮𑀸𑀣𑀮𑀤𑁂𑀲𑀪𑀸𑀕𑁂 𑀅𑀪𑀺𑀯𑀼𑀝𑁆𑀞𑀁 𑀉𑀤𑀓𑀁, 𑀲𑀩𑁆𑀩𑀁 𑀢𑀁 𑀢𑀢𑁄 𑀯𑀺𑀦𑀺𑀕𑀴𑀺𑀢𑁆𑀯𑀸 𑀫𑀳𑁄𑀤𑀥𑀺𑀁 𑀲𑀸𑀕𑀭𑀁 𑀲𑀫𑁄𑀲𑀭𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀲𑀫𑁆𑀧𑀸𑀤𑀓𑁂 𑀲𑀢𑀺 𑀬𑀸 𑀓𑀸𑀘𑀺 𑀦𑀯𑀗𑁆𑀕𑁂 𑀩𑀼𑀤𑁆𑀥𑀯𑀘𑀦𑁂 𑀲𑀮𑁆𑀮𑁂𑀔𑀺𑀢𑀸𑀘𑀸𑀭𑀧𑁆𑀧𑀝𑀺𑀧𑀢𑁆𑀢𑀺𑀥𑀼𑀢𑀗𑁆𑀕𑀕𑀼𑀡𑀥𑀭𑀦𑀺𑀲𑁆𑀲𑀺𑀢𑀸 𑀓𑀣𑀸, 𑀢𑀸 𑀲𑀩𑁆𑀩𑀸 𑀇𑀥 𑀲𑀫𑁄𑀲𑀭𑀺𑀲𑁆𑀲𑀦𑁆𑀢𑀺.

‘‘𑀫𑀬𑁆𑀳𑀫𑁆𑀧𑁂𑀢𑁆𑀣, 𑀫𑀳𑀸𑀭𑀸𑀚, 𑀧𑀭𑀺𑀩𑁆𑀬𑀢𑁆𑀢𑀢𑀸𑀬 𑀩𑀼𑀤𑁆𑀥𑀺𑀬𑀸 𑀓𑀸𑀭𑀡𑀧𑀭𑀺𑀤𑀻𑀧𑀦𑀁 𑀲𑀫𑁄𑀲𑀭𑀺𑀲𑁆𑀲𑀢𑀺, 𑀢𑁂𑀦𑁂𑀲𑁄 𑀅𑀢𑁆𑀣𑁄 𑀲𑀼𑀯𑀺𑀪𑀢𑁆𑀢𑁄 𑀯𑀺𑀘𑀺𑀢𑁆𑀢𑁄 𑀧𑀭𑀺𑀧𑀼𑀡𑁆𑀡𑁄 𑀧𑀭𑀺𑀲𑀼𑀤𑁆𑀥𑁄 𑀲𑀫𑀸𑀦𑀻𑀢𑁄 𑀪𑀯𑀺𑀲𑁆𑀲𑀢𑀺. 𑀬𑀣𑀸, 𑀫𑀳𑀸𑀭𑀸𑀚, 𑀓𑀼𑀲𑀮𑁄 𑀮𑁂𑀔𑀸𑀘𑀭𑀺𑀬𑁄 𑀅𑀦𑀼𑀲𑀺𑀝𑁆𑀞𑁄 𑀮𑁂𑀔𑀁 𑀑𑀲𑀸𑀭𑁂𑀦𑁆𑀢𑁄 𑀅𑀢𑁆𑀢𑀦𑁄 𑀩𑁆𑀬𑀢𑁆𑀢𑀢𑀸𑀬 𑀩𑀼𑀤𑁆𑀥𑀺𑀬𑀸 𑀓𑀸𑀭𑀡𑀧𑀭𑀺𑀤𑀻𑀧𑀦𑁂𑀦 𑀮𑁂𑀔𑀁 𑀧𑀭𑀺𑀧𑀽𑀭𑁂𑀢𑀺, 𑀏𑀯𑀁 𑀲𑀸 𑀮𑁂𑀔𑀸 𑀲𑀫𑀢𑁆𑀢𑀸 𑀧𑀭𑀺𑀧𑀼𑀡𑁆𑀡𑀸 𑀅𑀦𑀽𑀦𑀺𑀓𑀸 𑀪𑀯𑀺𑀲𑁆𑀲𑀢𑀺. 𑀏𑀯𑀫𑁂𑀯 𑀫𑀬𑁆𑀳𑀫𑁆𑀧𑁂𑀢𑁆𑀣 𑀧𑀭𑀺𑀩𑁆𑀬𑀢𑁆𑀢𑀢𑀸𑀬 𑀩𑀼𑀤𑁆𑀥𑀺𑀬𑀸 𑀓𑀸𑀭𑀡𑀧𑀭𑀺𑀤𑀻𑀧𑀦𑀁 𑀲𑀫𑁄𑀲𑀭𑀺𑀲𑁆𑀲𑀢𑀺, 𑀢𑁂𑀦𑁂𑀲𑁄 𑀅𑀢𑁆𑀣𑁄 𑀲𑀼𑀯𑀺𑀪𑀢𑁆𑀢𑁄 𑀯𑀺𑀘𑀺𑀢𑁆𑀢𑁄 𑀧𑀭𑀺𑀧𑀼𑀡𑁆𑀡𑁄 𑀧𑀭𑀺𑀲𑀼𑀤𑁆𑀥𑁄 𑀲𑀫𑀸𑀦𑀻𑀢𑁄 𑀪𑀯𑀺𑀲𑁆𑀲𑀢𑀺.

‘‘𑀦𑀕𑀭𑁂, 𑀫𑀳𑀸𑀭𑀸𑀚, 𑀲𑀸𑀯𑀢𑁆𑀣𑀺𑀬𑀸 𑀧𑀜𑁆𑀘𑀓𑁄𑀝𑀺𑀫𑀢𑁆𑀢𑀸 𑀅𑀭𑀺𑀬𑀲𑀸𑀯𑀓𑀸 𑀪𑀕𑀯𑀢𑁄 𑀉𑀧𑀸𑀲𑀓𑀉𑀧𑀸𑀲𑀺𑀓𑀸𑀬𑁄 𑀲𑀢𑁆𑀢𑀧𑀡𑁆𑀡𑀸𑀲𑀲𑀳𑀲𑁆𑀲𑀸𑀦𑀺 𑀢𑀻𑀡𑀺 𑀘 𑀲𑀢𑀲𑀳𑀲𑁆𑀲𑀸𑀦𑀺 𑀅𑀦𑀸𑀕𑀸𑀫𑀺𑀨𑀮𑁂 𑀧𑀢𑀺𑀝𑁆𑀞𑀺𑀢𑀸, 𑀢𑁂 𑀲𑀩𑁆𑀩𑁂𑀧𑀺 𑀕𑀺𑀳𑀻 𑀬𑁂𑀯, 𑀦 𑀧𑀩𑁆𑀩𑀚𑀺𑀢𑀸. 𑀧𑀼𑀦 𑀢𑀢𑁆𑀣𑁂𑀯 𑀓𑀡𑁆𑀟𑀫𑁆𑀩𑀫𑀽𑀮𑁂 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑁂 𑀯𑀻𑀲𑀢𑀺 𑀧𑀸𑀡𑀓𑁄𑀝𑀺𑀬𑁄 𑀅𑀪𑀺𑀲𑀫𑀺𑀁𑀲𑀼, 𑀧𑀼𑀦 𑀘𑀽𑀴𑀭𑀸𑀳𑀼𑀮𑁄𑀯𑀸𑀤𑁂 [𑀫𑀳𑀸𑀭𑀸𑀳𑀼𑀮𑁄𑀯𑀸𑀤𑁂 (𑀲𑀻. 𑀧𑀻.)], 𑀫𑀳𑀸𑀫𑀗𑁆𑀕𑀮𑀲𑀼𑀢𑁆𑀢𑀦𑁆𑀢𑁂, 𑀲𑀫𑀘𑀺𑀢𑁆𑀢𑀧𑀭𑀺𑀬𑀸𑀬𑁂, 𑀧𑀭𑀸𑀪𑀯𑀲𑀼𑀢𑁆𑀢𑀦𑁆𑀢𑁂, 𑀧𑀼𑀭𑀸𑀪𑁂𑀤𑀲𑀼𑀢𑁆𑀢𑀦𑁆𑀢𑁂, 𑀓𑀮𑀳𑀯𑀺𑀯𑀸𑀤𑀲𑀼𑀢𑁆𑀢𑀦𑁆𑀢𑁂, 𑀘𑀽𑀴𑀩𑁆𑀬𑀽𑀳𑀲𑀼𑀢𑁆𑀢𑀦𑁆𑀢𑁂, 𑀫𑀳𑀸𑀩𑁆𑀬𑀽𑀳𑀲𑀼𑀢𑁆𑀢𑀦𑁆𑀢𑁂, 𑀢𑀼𑀯𑀝𑀓𑀲𑀼𑀢𑁆𑀢𑀦𑁆𑀢𑁂, 𑀲𑀸𑀭𑀺𑀧𑀼𑀢𑁆𑀢𑀲𑀼𑀢𑁆𑀢𑀦𑁆𑀢𑁂 𑀕𑀡𑀦𑀧𑀣𑀫𑀢𑀻𑀢𑀸𑀦𑀁 𑀤𑁂𑀯𑀢𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺.

‘‘𑀦𑀕𑀭𑁂 𑀭𑀸𑀚𑀕𑀳𑁂 𑀧𑀜𑁆𑀜𑀸𑀲𑀲𑀳𑀲𑁆𑀲𑀸𑀦𑀺 𑀢𑀻𑀡𑀺 𑀘 𑀲𑀢𑀲𑀳𑀲𑁆𑀲𑀸𑀦𑀺 𑀅𑀭𑀺𑀬𑀲𑀸𑀯𑀓𑀸 𑀪𑀕𑀯𑀢𑁄 𑀉𑀧𑀸𑀲𑀓𑀉𑀧𑀸𑀲𑀺𑀓𑀸𑀬𑁄, 𑀧𑀼𑀦 𑀢𑀢𑁆𑀣𑁂𑀯 𑀥𑀦𑀧𑀸𑀮𑀳𑀢𑁆𑀣𑀺𑀦𑀸𑀕𑀤𑀫𑀦𑁂 𑀦𑀯𑀼𑀢𑀺 𑀧𑀸𑀡𑀓𑁄𑀝𑀺𑀬𑁄, 𑀧𑀸𑀭𑀸𑀬𑀦𑀲𑀫𑀸𑀕𑀫𑁂 𑀧𑀸𑀲𑀸𑀡𑀓𑀘𑁂𑀢𑀺𑀬𑁂 𑀘𑀼𑀤𑁆𑀤𑀲 𑀧𑀸𑀡𑀓𑁄𑀝𑀺𑀬𑁄, 𑀧𑀼𑀦 𑀇𑀦𑁆𑀤𑀲𑀸𑀮𑀕𑀼𑀳𑀸𑀬𑀁 𑀅𑀲𑀻𑀢𑀺 𑀤𑁂𑀯𑀢𑀸𑀓𑁄𑀝𑀺𑀬𑁄, 𑀧𑀼𑀦 𑀩𑀸𑀭𑀸𑀡𑀲𑀺𑀬𑀁 𑀇𑀲𑀺𑀧𑀢𑀦𑁂 𑀫𑀺𑀕𑀤𑀸𑀬𑁂 𑀧𑀞𑀫𑁂 𑀥𑀫𑁆𑀫𑀤𑁂𑀲𑀦𑁂 𑀅𑀝𑁆𑀞𑀸𑀭𑀲 𑀩𑁆𑀭𑀳𑁆𑀫𑀓𑁄𑀝𑀺𑀬𑁄 𑀅𑀧𑀭𑀺𑀫𑀸𑀡𑀸 𑀘 𑀤𑁂𑀯𑀢𑀸𑀬𑁄, 𑀧𑀼𑀦 𑀢𑀸𑀯𑀢𑀺𑀁𑀲𑀪𑀯𑀦𑁂 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸𑀬𑀁 𑀅𑀪𑀺𑀥𑀫𑁆𑀫𑀤𑁂𑀲𑀦𑀸𑀬 𑀅𑀲𑀻𑀢𑀺 𑀤𑁂𑀯𑀢𑀸𑀓𑁄𑀝𑀺𑀬𑁄, 𑀤𑁂𑀯𑁄𑀭𑁄𑀳𑀡𑁂 𑀲𑀗𑁆𑀓𑀲𑁆𑀲𑀦𑀕𑀭𑀤𑁆𑀯𑀸𑀭𑁂 𑀮𑁄𑀓𑀯𑀺𑀯𑀭𑀡𑀧𑀸𑀝𑀺𑀳𑀸𑀭𑀺𑀬𑁂 𑀧𑀲𑀦𑁆𑀦𑀸𑀦𑀁 𑀦𑀭𑀫𑀭𑀽𑀦𑀁 𑀢𑀺𑀁𑀲 𑀓𑁄𑀝𑀺𑀬𑁄 𑀅𑀪𑀺𑀲𑀫𑀺𑀁𑀲𑀼.

𑀧𑀼𑀦 𑀲𑀓𑁆𑀓𑁂𑀲𑀼 𑀓𑀧𑀺𑀮𑀯𑀢𑁆𑀣𑀼𑀲𑁆𑀫𑀺𑀁 𑀦𑀺𑀕𑁆𑀭𑁄𑀥𑀸𑀭𑀸𑀫𑁂 𑀩𑀼𑀤𑁆𑀥𑀯𑀁𑀲𑀤𑁂𑀲𑀦𑀸𑀬 𑀫𑀳𑀸𑀲𑀫𑀬𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸𑀬 𑀘 𑀕𑀡𑀦𑀧𑀣𑀫𑀢𑀻𑀢𑀸𑀦𑀁 𑀤𑁂𑀯𑀢𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀧𑀼𑀦 𑀲𑀼𑀫𑀦𑀫𑀸𑀮𑀸𑀓𑀸𑀭𑀲𑀫𑀸𑀕𑀫𑁂, 𑀕𑀭𑀳𑀤𑀺𑀦𑁆𑀦𑀲𑀫𑀸𑀕𑀫𑁂, 𑀆𑀦𑀦𑁆𑀤𑀲𑁂𑀝𑁆𑀞𑀺𑀲𑀫𑀸𑀕𑀫𑁂, 𑀚𑀫𑁆𑀩𑀼𑀓𑀸𑀚𑀻𑀯𑀓𑀲𑀫𑀸𑀕𑀫𑁂, 𑀫𑀡𑁆𑀟𑀼𑀓𑀤𑁂𑀯𑀧𑀼𑀢𑁆𑀢𑀲𑀫𑀸𑀕𑀫𑁂, 𑀫𑀝𑁆𑀞𑀓𑀼𑀡𑁆𑀟𑀮𑀺𑀤𑁂𑀯𑀧𑀼𑀢𑁆𑀢𑀲𑀫𑀸𑀕𑀫𑁂, 𑀲𑀼𑀮𑀲𑀸𑀦𑀕𑀭𑀲𑁄𑀪𑀺𑀦𑀺𑀲𑀫𑀸𑀕𑀫𑁂, 𑀲𑀺𑀭𑀺𑀫𑀸𑀦𑀕𑀭𑀲𑁄𑀪𑀺𑀦𑀺𑀲𑀫𑀸𑀕𑀫𑁂, 𑀧𑁂𑀲𑀓𑀸𑀭𑀥𑀻𑀢𑀼𑀲𑀫𑀸𑀕𑀫𑁂, 𑀘𑀽𑀴𑀲𑀼𑀪𑀤𑁆𑀤𑀸𑀲𑀫𑀸𑀕𑀫𑁂, 𑀲𑀸𑀓𑁂𑀢𑀩𑁆𑀭𑀸𑀳𑁆𑀫𑀡𑀲𑁆𑀲 𑀆𑀴𑀸𑀳𑀦𑀤𑀲𑁆𑀲𑀦𑀲𑀫𑀸𑀕𑀫𑁂, 𑀲𑀽𑀦𑀸𑀧𑀭𑀦𑁆𑀢𑀓𑀲𑀫𑀸𑀕𑀫𑁂, 𑀲𑀓𑁆𑀓𑀧𑀜𑁆𑀳𑀲𑀫𑀸𑀕𑀫𑁂, 𑀢𑀺𑀭𑁄𑀓𑀼𑀝𑁆𑀝𑀲𑀫𑀸𑀕𑀫𑁂 [𑀢𑀺𑀭𑁄𑀓𑀼𑀟𑁆𑀟𑀲𑀫𑀸𑀕𑀫𑁂 (𑀲𑀻. 𑀧𑀻.)], 𑀭𑀢𑀦𑀲𑀼𑀢𑁆𑀢𑀲𑀫𑀸𑀕𑀫𑁂 𑀧𑀘𑁆𑀘𑁂𑀓𑀁 𑀘𑀢𑀼𑀭𑀸𑀲𑀻𑀢𑀺𑀬𑀸 𑀧𑀸𑀡𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺, 𑀬𑀸𑀯𑀢𑀸, 𑀫𑀳𑀸𑀭𑀸𑀚, 𑀪𑀕𑀯𑀸 𑀮𑁄𑀓𑁂 𑀅𑀝𑁆𑀞𑀸𑀲𑀺, 𑀢𑀸𑀯 𑀢𑀻𑀲𑀼 𑀫𑀡𑁆𑀟𑀮𑁂𑀲𑀼 𑀲𑁄𑀴𑀲𑀲𑀼 𑀫𑀳𑀸𑀚𑀦𑀧𑀤𑁂𑀲𑀼 𑀬𑀢𑁆𑀣 𑀬𑀢𑁆𑀣 𑀪𑀕𑀯𑀸 𑀯𑀺𑀳𑀸𑀲𑀺, 𑀢𑀢𑁆𑀣 𑀢𑀢𑁆𑀣 𑀬𑁂𑀪𑀼𑀬𑁆𑀬𑁂𑀦 𑀤𑁆𑀯𑁂 𑀢𑀬𑁄 𑀘𑀢𑁆𑀢𑀸𑀭𑁄 𑀧𑀜𑁆𑀘 𑀲𑀢𑀁 𑀲𑀳𑀲𑁆𑀲𑀁 𑀲𑀢𑀲𑀳𑀲𑁆𑀲𑀁 𑀤𑁂𑀯𑀸 𑀘 𑀫𑀦𑀼𑀲𑁆𑀲𑀸 𑀘 𑀲𑀦𑁆𑀢𑀁 𑀧𑀭𑀫𑀢𑁆𑀣𑀁 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀭𑀺𑀁𑀲𑀼. 𑀬𑁂 𑀢𑁂, 𑀫𑀳𑀸𑀭𑀸𑀚, 𑀤𑁂𑀯𑀸 𑀕𑀺𑀳𑀻 𑀬𑁂𑀯, 𑀦 𑀢𑁂 𑀧𑀩𑁆𑀩𑀚𑀺𑀢𑀸, 𑀏𑀢𑀸𑀦𑀺 𑀘𑁂𑀯, 𑀫𑀳𑀸𑀭𑀸𑀚, 𑀅𑀜𑁆𑀜𑀸𑀦𑀺 𑀘 𑀅𑀦𑁂𑀓𑀸𑀦𑀺 𑀤𑁂𑀯𑀢𑀸𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀺 𑀕𑀺𑀳𑀻 𑀅𑀕𑀸𑀭𑀺𑀓𑀸 𑀓𑀸𑀫𑀪𑁄𑀕𑀺𑀦𑁄 𑀲𑀦𑁆𑀢𑀁 𑀧𑀭𑀫𑀢𑁆𑀣𑀁 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀭𑀺𑀁𑀲𑀽’’𑀢𑀺.

‘‘𑀬𑀤𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀕𑀺𑀳𑀻 𑀅𑀕𑀸𑀭𑀺𑀓𑀸 𑀓𑀸𑀫𑀪𑁄𑀕𑀺𑀦𑁄 𑀲𑀦𑁆𑀢𑀁 𑀧𑀭𑀫𑀢𑁆𑀣𑀁 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀭𑁄𑀦𑁆𑀢𑀺, 𑀅𑀣 𑀇𑀫𑀸𑀦𑀺 𑀥𑀼𑀢𑀗𑁆𑀕𑀸𑀦𑀺 𑀓𑀺𑀫𑀢𑁆𑀣𑀁 𑀲𑀸𑀥𑁂𑀦𑁆𑀢𑀺, 𑀢𑁂𑀦 𑀓𑀸𑀭𑀡𑁂𑀦 𑀥𑀼𑀢𑀗𑁆𑀕𑀸𑀦𑀺 𑀅𑀓𑀺𑀘𑁆𑀘𑀓𑀭𑀸𑀦𑀺 𑀳𑁄𑀦𑁆𑀢𑀺. 𑀬𑀤𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀯𑀺𑀦𑀸 𑀫𑀦𑁆𑀢𑁄𑀲𑀥𑁂𑀳𑀺 𑀩𑁆𑀬𑀸𑀥𑀬𑁄 𑀯𑀽𑀧𑀲𑀫𑀦𑁆𑀢𑀺, 𑀓𑀺𑀁 𑀯𑀫𑀦𑀯𑀺𑀭𑁂𑀘𑀦𑀸𑀤𑀺𑀦𑀸 𑀲𑀭𑀻𑀭𑀤𑀼𑀩𑁆𑀩𑀮𑀓𑀭𑀡𑁂𑀦? 𑀬𑀤𑀺 𑀫𑀼𑀝𑁆𑀞𑀻𑀳𑀺 𑀧𑀝𑀺𑀲𑀢𑁆𑀢𑀼𑀦𑀺𑀕𑁆𑀕𑀳𑁄 𑀪𑀯𑀢𑀺, 𑀓𑀺𑀁 𑀅𑀲𑀺𑀲𑀢𑁆𑀢𑀺𑀲𑀭𑀥𑀦𑀼𑀓𑁄𑀤𑀡𑁆𑀟𑀮𑀕𑀼𑀴𑀫𑀼𑀕𑁆𑀕𑀭𑁂𑀳𑀺? 𑀬𑀤𑀺 𑀕𑀡𑁆𑀞𑀺𑀓𑀼𑀝𑀺𑀮𑀲𑀼𑀲𑀺𑀭𑀓𑀡𑁆𑀝𑀮𑀢𑀸𑀲𑀸𑀔𑀸 𑀆𑀮𑀫𑁆𑀩𑀺𑀢𑁆𑀯𑀸 𑀭𑀼𑀓𑁆𑀔𑀫𑀪𑀺𑀭𑀽𑀳𑀦𑀁 𑀪𑀯𑀢𑀺, 𑀓𑀺𑀁 𑀤𑀻𑀖𑀤𑀴𑁆𑀳𑀦𑀺𑀲𑁆𑀲𑁂𑀡𑀺𑀧𑀭𑀺𑀬𑁂𑀲𑀦𑁂𑀦? 𑀬𑀤𑀺 𑀣𑀡𑁆𑀟𑀺𑀮𑀲𑁂𑀬𑁆𑀬𑀸𑀬 𑀥𑀸𑀢𑀼𑀲𑀫𑀢𑀸 𑀪𑀯𑀢𑀺, 𑀓𑀺𑀁 𑀲𑀼𑀔𑀲𑀫𑁆𑀨𑀲𑁆𑀲𑀫𑀳𑀢𑀺𑀫𑀳𑀸𑀲𑀺𑀭𑀺𑀲𑀬𑀦𑀧𑀭𑀺𑀬𑁂𑀲𑀦𑁂𑀦? 𑀬𑀤𑀺 𑀏𑀓𑀓𑁄 𑀲𑀸𑀲𑀗𑁆𑀓𑀲𑀧𑁆𑀧𑀝𑀺𑀪𑀬𑀯𑀺𑀲𑀫𑀓𑀦𑁆𑀢𑀸𑀭𑀢𑀭𑀡𑀲𑀫𑀢𑁆𑀣𑁄 𑀪𑀯𑀢𑀺, 𑀓𑀺𑀁 𑀲𑀦𑁆𑀦𑀤𑁆𑀥𑀲𑀚𑁆𑀚𑀫𑀳𑀢𑀺𑀫𑀳𑀸𑀲𑀢𑁆𑀣𑀧𑀭𑀺𑀬𑁂𑀲𑀦𑁂𑀦? 𑀬𑀤𑀺 𑀦𑀤𑀺𑀲𑀭𑀁 𑀩𑀸𑀳𑀼𑀦𑀸 𑀢𑀭𑀺𑀢𑀼𑀁 𑀲𑀫𑀢𑁆𑀣𑁄 𑀪𑀯𑀢𑀺, 𑀓𑀺𑀁 𑀥𑀼𑀯𑀲𑁂𑀢𑀼𑀦𑀸𑀯𑀸𑀧𑀭𑀺𑀬𑁂𑀲𑀦𑁂𑀦? 𑀬𑀤𑀺 𑀲𑀓𑀲𑀦𑁆𑀢𑀓𑁂𑀦 𑀖𑀸𑀲𑀘𑁆𑀙𑀸𑀤𑀦𑀁 𑀓𑀸𑀢𑀼𑀁 𑀧𑀳𑁄𑀢𑀺, 𑀓𑀺𑀁 𑀧𑀭𑀽𑀧𑀲𑁂𑀯𑀦𑀧𑀺𑀬𑀲𑀫𑀼𑀮𑁆𑀮𑀸𑀧𑀧𑀘𑁆𑀙𑀸𑀧𑀼𑀭𑁂𑀥𑀸𑀯𑀦𑁂𑀦? 𑀬𑀤𑀺 𑀅𑀔𑀸𑀢𑀢𑀴𑀸𑀓𑁂 𑀉𑀤𑀓𑀁 𑀮𑀪𑀢𑀺, 𑀓𑀺𑀁 𑀉𑀤𑀧𑀸𑀦𑀢𑀴𑀸𑀓𑀧𑁄𑀓𑁆𑀔𑀭𑀡𑀺𑀔𑀡𑀦𑁂𑀦? 𑀏𑀯𑀫𑁂𑀯 𑀔𑁄, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀬𑀤𑀺 𑀕𑀺𑀳𑀻 𑀅𑀕𑀸𑀭𑀺𑀓𑀸 𑀓𑀸𑀫𑀪𑁄𑀕𑀺𑀦𑁄 𑀲𑀦𑁆𑀢𑀁 𑀧𑀭𑀫𑀢𑁆𑀣𑀁 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀭𑁄𑀦𑁆𑀢𑀺, 𑀓𑀺𑀁 𑀥𑀼𑀢𑀕𑀼𑀡𑀯𑀭𑀲𑀫𑀸𑀤𑀺𑀬𑀦𑁂𑀦𑀸’’𑀢𑀺?

‘‘𑀅𑀝𑁆𑀞𑀯𑀻𑀲𑀢𑀺 𑀔𑁄 𑀧𑀦𑀺𑀫𑁂, 𑀫𑀳𑀸𑀭𑀸𑀚, 𑀥𑀼𑀢𑀗𑁆𑀕𑀕𑀼𑀡𑀸 𑀬𑀣𑀸𑀪𑀼𑀘𑁆𑀘𑀕𑀼𑀡𑀸, 𑀬𑁂𑀳𑀺 𑀕𑀼𑀡𑁂𑀳𑀺 𑀥𑀼𑀢𑀗𑁆𑀕𑀸𑀦𑀺 𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀧𑀺𑀳𑀬𑀺𑀢𑀸𑀦𑀺 𑀧𑀢𑁆𑀣𑀺𑀢𑀸𑀦𑀺. 𑀓𑀢𑀫𑁂 𑀅𑀝𑁆𑀞𑀯𑀻𑀲𑀢𑀺? 𑀇𑀥, 𑀫𑀳𑀸𑀭𑀸𑀚, 𑀥𑀼𑀢𑀗𑁆𑀕𑀁 𑀲𑀼𑀤𑁆𑀥𑀸𑀚𑀻𑀯𑀁 𑀲𑀼𑀔𑀨𑀮𑀁 𑀅𑀦𑀯𑀚𑁆𑀚𑀁 𑀦 𑀧𑀭𑀤𑀼𑀓𑁆𑀔𑀸𑀧𑀦𑀁 𑀅𑀪𑀬𑀁 𑀅𑀲𑀫𑁆𑀧𑀻𑀴𑀦𑀁 𑀏𑀓𑀦𑁆𑀢𑀯𑀟𑁆𑀠𑀺𑀓𑀁 𑀅𑀧𑀭𑀺𑀳𑀸𑀦𑀺𑀬𑀁 𑀅𑀫𑀸𑀬𑀁 𑀆𑀭𑀓𑁆𑀔𑀸 𑀧𑀢𑁆𑀣𑀺𑀢𑀤𑀤𑀁 𑀲𑀩𑁆𑀩𑀲𑀢𑁆𑀢𑀤𑀫𑀦𑀁 𑀲𑀁𑀯𑀭𑀳𑀺𑀢𑀁 𑀧𑀢𑀺𑀭𑀽𑀧𑀁 𑀅𑀦𑀺𑀲𑁆𑀲𑀺𑀢𑀁 𑀯𑀺𑀧𑁆𑀧𑀫𑀼𑀢𑁆𑀢𑀁 𑀭𑀸𑀕𑀓𑁆𑀔𑀬𑀁 𑀤𑁄𑀲𑀓𑁆𑀔𑀬𑀁 𑀫𑁄𑀳𑀓𑁆𑀔𑀬𑀁 𑀫𑀸𑀦𑀧𑁆𑀧𑀳𑀸𑀦𑀁 𑀓𑀼𑀯𑀺𑀢𑀓𑁆𑀓𑀘𑁆𑀙𑁂𑀤𑀦𑀁 𑀓𑀗𑁆𑀔𑀸𑀯𑀺𑀢𑀭𑀡𑀁 𑀓𑁄𑀲𑀚𑁆𑀚𑀯𑀺𑀤𑁆𑀥𑀁𑀲𑀦𑀁 𑀅𑀭𑀢𑀺𑀧𑁆𑀧𑀳𑀸𑀦𑀁 𑀔𑀫𑀦𑀁 𑀅𑀢𑀼𑀮𑀁 𑀅𑀧𑁆𑀧𑀫𑀸𑀡𑀁 𑀲𑀩𑁆𑀩𑀤𑀼𑀓𑁆𑀔𑀓𑁆𑀔𑀬𑀕𑀫𑀦𑀁, 𑀇𑀫𑁂 𑀔𑁄, 𑀫𑀳𑀸𑀭𑀸𑀚, 𑀅𑀝𑁆𑀞𑀯𑀻𑀲𑀢𑀺 𑀥𑀼𑀢𑀗𑁆𑀕𑀕𑀼𑀡𑀸 𑀬𑀣𑀸𑀪𑀼𑀘𑁆𑀘𑀕𑀼𑀡𑀸 𑀬𑁂𑀳𑀺 𑀕𑀼𑀡𑁂𑀳𑀺 𑀥𑀼𑀢𑀗𑁆𑀕𑀸𑀦𑀺 𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀧𑀺𑀳𑀬𑀺𑀢𑀸𑀦𑀺 𑀧𑀢𑁆𑀣𑀺𑀢𑀸𑀦𑀺.

‘‘𑀬𑁂 𑀔𑁄 𑀢𑁂, 𑀫𑀳𑀸𑀭𑀸𑀚, 𑀥𑀼𑀢𑀕𑀼𑀡𑁂 𑀲𑀫𑁆𑀫𑀸 𑀉𑀧𑀲𑁂𑀯𑀦𑁆𑀢𑀺, 𑀢𑁂 𑀅𑀝𑁆𑀞𑀸𑀭𑀲𑀳𑀺 𑀕𑀼𑀡𑁂𑀳𑀺 𑀲𑀫𑀼𑀧𑁂𑀢𑀸 𑀪𑀯𑀦𑁆𑀢𑀺. 𑀓𑀢𑀫𑁂𑀳𑀺 𑀅𑀝𑁆𑀞𑀸𑀭𑀲𑀳𑀺? 𑀆𑀘𑀸𑀭𑁄 𑀢𑁂𑀲𑀁 𑀲𑀼𑀯𑀺𑀲𑀼𑀤𑁆𑀥𑁄 𑀳𑁄𑀢𑀺, 𑀧𑀝𑀺𑀧𑀤𑀸 𑀲𑀼𑀧𑀽𑀭𑀺𑀢𑀸 𑀳𑁄𑀢𑀺, 𑀓𑀸𑀬𑀺𑀓𑀁 𑀯𑀸𑀘𑀲𑀺𑀓𑀁 𑀲𑀼𑀭𑀓𑁆𑀔𑀺𑀢𑀁 𑀳𑁄𑀢𑀺, 𑀫𑀦𑁄𑀲𑀫𑀸𑀘𑀸𑀭𑁄 𑀲𑀼𑀯𑀺𑀲𑀼𑀤𑁆𑀥𑁄 𑀳𑁄𑀢𑀺, 𑀯𑀻𑀭𑀺𑀬𑀁 𑀲𑀼𑀧𑀕𑁆𑀕𑀳𑀺𑀢𑀁 𑀳𑁄𑀢𑀺, 𑀪𑀬𑀁 𑀯𑀽𑀧𑀲𑀫𑁆𑀫𑀢𑀺, 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺𑀩𑁆𑀬𑀧𑀕𑀢𑀸 𑀳𑁄𑀢𑀺, 𑀆𑀖𑀸𑀢𑁄 𑀉𑀧𑀭𑀢𑁄 𑀳𑁄𑀢𑀺, 𑀫𑁂𑀢𑁆𑀢𑀸 𑀉𑀧𑀝𑁆𑀞𑀺𑀢𑀸 𑀳𑁄𑀢𑀺, 𑀆𑀳𑀸𑀭𑁄 𑀧𑀭𑀺𑀜𑁆𑀜𑀸𑀢𑁄 𑀳𑁄𑀢𑀺, 𑀲𑀩𑁆𑀩𑀲𑀢𑁆𑀢𑀸𑀦𑀁 𑀕𑀭𑀼𑀓𑀢𑁄 𑀳𑁄𑀢𑀺, 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀽 𑀳𑁄𑀢𑀺, 𑀚𑀸𑀕𑀭𑀺𑀬𑀫𑀦𑀼𑀬𑀼𑀢𑁆𑀢𑁄 𑀳𑁄𑀢𑀺, 𑀅𑀦𑀺𑀓𑁂𑀢𑁄 𑀳𑁄𑀢𑀺, 𑀬𑀢𑁆𑀣 𑀨𑀸𑀲𑀼 𑀢𑀢𑁆𑀣 𑀯𑀺𑀳𑀸𑀭𑀻 𑀳𑁄𑀢𑀺, 𑀧𑀸𑀧𑀚𑁂𑀕𑀼𑀘𑁆𑀙𑀻 𑀳𑁄𑀢𑀺, 𑀯𑀺𑀯𑁂𑀓𑀸𑀭𑀸𑀫𑁄 𑀳𑁄𑀢𑀺, 𑀲𑀢𑀢𑀁 𑀅𑀧𑁆𑀧𑀫𑀢𑁆𑀢𑁄 𑀳𑁄𑀢𑀺, 𑀬𑁂 𑀢𑁂, 𑀫𑀳𑀸𑀭𑀸𑀚, 𑀥𑀼𑀢𑀕𑀼𑀡𑁂 𑀲𑀫𑁆𑀫𑀸 𑀉𑀧𑀲𑁂𑀯𑀦𑁆𑀢𑀺, 𑀢𑁂 𑀇𑀫𑁂𑀳𑀺 𑀅𑀝𑁆𑀞𑀸𑀭𑀲𑀳𑀺 𑀕𑀼𑀡𑁂𑀳𑀺 𑀲𑀫𑀼𑀧𑁂𑀢𑀸 𑀪𑀯𑀦𑁆𑀢𑀺.

‘‘𑀤𑀲 𑀇𑀫𑁂, 𑀫𑀳𑀸𑀭𑀸𑀚, 𑀧𑀼𑀕𑁆𑀕𑀮𑀸 𑀥𑀼𑀢𑀕𑀼𑀡𑀸𑀭𑀳𑀸. 𑀓𑀢𑀫𑁂 𑀤𑀲? 𑀲𑀤𑁆𑀥𑁄 𑀳𑁄𑀢𑀺 𑀳𑀺𑀭𑀺𑀫𑀸 𑀥𑀺𑀢𑀺𑀫𑀸 𑀅𑀓𑀼𑀳𑁄 𑀅𑀢𑁆𑀣𑀯𑀲𑀻 𑀅𑀮𑁄𑀮𑁄 𑀲𑀺𑀓𑁆𑀔𑀸𑀓𑀸𑀫𑁄 𑀤𑀴𑁆𑀳𑀲𑀫𑀸𑀤𑀸𑀦𑁄 𑀅𑀦𑀼𑀚𑁆𑀛𑀸𑀦𑀩𑀳𑀼𑀮𑁄 𑀫𑁂𑀢𑁆𑀢𑀸𑀯𑀺𑀳𑀸𑀭𑀻, 𑀇𑀫𑁂 𑀔𑁄, 𑀫𑀳𑀸𑀭𑀸𑀚, 𑀤𑀲 𑀧𑀼𑀕𑁆𑀕𑀮𑀸 𑀥𑀼𑀢𑀕𑀼𑀡𑀸𑀭𑀳𑀸.

‘‘𑀬𑁂 𑀢𑁂, 𑀫𑀳𑀸𑀭𑀸𑀚, 𑀕𑀺𑀳𑀻 𑀅𑀕𑀸𑀭𑀺𑀓𑀸 𑀓𑀸𑀫𑀪𑁄𑀕𑀺𑀦𑁄 𑀲𑀦𑁆𑀢𑀁 𑀧𑀭𑀫𑀢𑁆𑀣𑀁 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀭𑁄𑀦𑁆𑀢𑀺, 𑀲𑀩𑁆𑀩𑁂 𑀢𑁂 𑀧𑀼𑀭𑀺𑀫𑀸𑀲𑀼 𑀚𑀸𑀢𑀻𑀲𑀼 𑀢𑁂𑀭𑀲𑀲𑀼 𑀥𑀼𑀢𑀕𑀼𑀡𑁂𑀲𑀼 𑀓𑀢𑀽𑀧𑀸𑀲𑀦𑀸 𑀓𑀢𑀪𑀽𑀫𑀺𑀓𑀫𑁆𑀫𑀸, 𑀢𑁂 𑀢𑀢𑁆𑀣 𑀘𑀸𑀭𑀜𑁆𑀘 𑀧𑀝𑀺𑀧𑀢𑁆𑀢𑀺𑀜𑁆𑀘 𑀲𑁄𑀥𑀬𑀺𑀢𑁆𑀯𑀸 𑀅𑀚𑁆𑀚𑁂𑀢𑀭𑀳𑀺 𑀕𑀺𑀳𑀻 𑀬𑁂𑀯 𑀲𑀦𑁆𑀢𑀸 𑀲𑀦𑁆𑀢𑀁 𑀧𑀭𑀫𑀢𑁆𑀢𑀁 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀭𑁄𑀦𑁆𑀢𑀺.

‘‘𑀬𑀣𑀸, 𑀫𑀳𑀸𑀭𑀸𑀚, 𑀓𑀼𑀲𑀮𑁄 𑀇𑀲𑁆𑀲𑀸𑀲𑁄 𑀅𑀦𑁆𑀢𑁂𑀯𑀸𑀲𑀺𑀓𑁂 𑀧𑀞𑀫𑀁 𑀢𑀸𑀯 𑀉𑀧𑀸𑀲𑀦𑀲𑀸𑀮𑀸𑀬𑀁 𑀘𑀸𑀧𑀪𑁂𑀤𑀘𑀸𑀧𑀸𑀭𑁄𑀧𑀦𑀕𑁆𑀕𑀳𑀡𑀫𑀼𑀝𑁆𑀞𑀺𑀧𑁆𑀧𑀝𑀺𑀧𑀻𑀴𑀦𑀅𑀗𑁆𑀕𑀼𑀮𑀺𑀯𑀺𑀦𑀸𑀫𑀦𑀧𑀸𑀤𑀞𑀧𑀦𑀲𑀭𑀕𑁆𑀕𑀳𑀡𑀲𑀦𑁆𑀦𑀳𑀦𑀆𑀓𑀟𑁆𑀠𑀦 𑀲𑀤𑁆𑀥𑀸𑀭𑀡𑀮𑀓𑁆𑀔𑀦𑀺𑀬𑀫𑀦𑀔𑀺𑀧𑀦𑁂 𑀢𑀺𑀡𑀧𑀼𑀭𑀺𑀲𑀓𑀙𑀓𑀡 [𑀔𑀡𑀓 (𑀲𑀻. 𑀧𑀻.)] 𑀢𑀺𑀡𑀧𑀮𑀸𑀮𑀫𑀢𑁆𑀢𑀺𑀓𑀸𑀧𑀼𑀜𑁆𑀚𑀨𑀮𑀓𑀮𑀓𑁆𑀔𑀯𑁂𑀥𑁂 𑀅𑀦𑀼𑀲𑀺𑀓𑁆𑀔𑀸𑀧𑁂𑀢𑁆𑀯𑀸 𑀭𑀜𑁆𑀜𑁄 𑀲𑀦𑁆𑀢𑀺𑀓𑁂 𑀉𑀧𑀸𑀲𑀦𑀁 𑀆𑀭𑀸𑀥𑀬𑀺𑀢𑁆𑀯𑀸 𑀆𑀚𑀜𑁆𑀜𑀭𑀣𑀕𑀚𑀢𑀼𑀭𑀗𑁆𑀕𑀥𑀦𑀥𑀜𑁆𑀜𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀤𑀸𑀲𑀺𑀤𑀸𑀲𑀪𑀭𑀺𑀬𑀕𑀸𑀫𑀯𑀭𑀁 𑀮𑀪𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁂 𑀢𑁂 𑀕𑀺𑀳𑀻 𑀅𑀕𑀸𑀭𑀺𑀓𑀸 𑀓𑀸𑀫𑀪𑁄𑀕𑀺𑀦𑁄 𑀲𑀦𑁆𑀢𑀁 𑀧𑀭𑀫𑀢𑁆𑀣𑀁 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀭𑁄𑀦𑁆𑀢𑀺, 𑀢𑁂 𑀲𑀩𑁆𑀩𑁂 𑀧𑀼𑀭𑀺𑀫𑀸𑀲𑀼 𑀚𑀸𑀢𑀻𑀲𑀼 𑀢𑁂𑀭𑀲𑀲𑀼 𑀥𑀼𑀢𑀕𑀼𑀡𑁂𑀲𑀼 𑀓𑀢𑀽𑀧𑀸𑀲𑀦𑀸 𑀓𑀢𑀪𑀽𑀫𑀺𑀓𑀫𑁆𑀫𑀸, 𑀢𑁂 𑀢𑀢𑁆𑀣𑁂𑀯 𑀘𑀸𑀭𑀜𑁆𑀘 𑀧𑀝𑀺𑀧𑀢𑁆𑀢𑀺𑀜𑁆𑀘 𑀲𑁄𑀥𑀬𑀺𑀢𑁆𑀯𑀸 𑀅𑀚𑁆𑀚𑁂𑀢𑀭𑀳𑀺 𑀕𑀺𑀳𑀻 𑀬𑁂𑀯 𑀲𑀦𑁆𑀢𑀸 𑀲𑀦𑁆𑀢𑀁 𑀧𑀭𑀫𑀢𑁆𑀣𑀁 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀭𑁄𑀦𑁆𑀢𑀺. 𑀦, 𑀫𑀳𑀸𑀭𑀸𑀚, 𑀥𑀼𑀢𑀕𑀼𑀡𑁂𑀲𑀼 𑀧𑀼𑀩𑁆𑀩𑀸𑀲𑁂𑀯𑀦𑀁 𑀯𑀺𑀦𑀸 𑀏𑀓𑀺𑀲𑁆𑀲𑀸 𑀬𑁂𑀯 𑀚𑀸𑀢𑀺𑀬𑀸 𑀅𑀭𑀳𑀢𑁆𑀢𑀁 𑀲𑀘𑁆𑀙𑀺𑀓𑀺𑀭𑀺𑀬𑀸 𑀳𑁄𑀢𑀺, 𑀉𑀢𑁆𑀢𑀫𑁂𑀦 𑀧𑀦 𑀯𑀻𑀭𑀺𑀬𑁂𑀦 𑀉𑀢𑁆𑀢𑀫𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀢𑀣𑀸𑀭𑀽𑀧𑁂𑀦 𑀆𑀘𑀭𑀺𑀬𑁂𑀦 𑀓𑀮𑁆𑀬𑀸𑀡𑀫𑀺𑀢𑁆𑀢𑁂𑀦 𑀅𑀭𑀳𑀢𑁆𑀢𑀁 𑀲𑀘𑁆𑀙𑀺𑀓𑀺𑀭𑀺𑀬𑀸 𑀳𑁄𑀢𑀺.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀪𑀺𑀲𑀓𑁆𑀓𑁄 𑀲𑀮𑁆𑀮𑀓𑀢𑁆𑀢𑁄 𑀆𑀘𑀭𑀺𑀬𑀁 𑀥𑀦𑁂𑀦 𑀯𑀸 𑀯𑀢𑁆𑀢𑀧𑁆𑀧𑀝𑀺𑀧𑀢𑁆𑀢𑀺𑀬𑀸 𑀯𑀸 𑀆𑀭𑀸𑀥𑁂𑀢𑁆𑀯𑀸 𑀲𑀢𑁆𑀢𑀕𑁆𑀕𑀳𑀡𑀙𑁂𑀤𑀦𑀮𑁂𑀔𑀦𑀯𑁂𑀥𑀦𑀲𑀮𑁆𑀮𑀼𑀤𑁆𑀥𑀭𑀡𑀯𑀡𑀥𑁄𑀯𑀦𑀲𑁄𑀲𑀦𑀪𑁂𑀲𑀚𑁆𑀚𑀸𑀦𑀼𑀮𑀺𑀫𑁆𑀧𑀦𑀯𑀫𑀦 𑀯𑀺𑀭𑁂𑀘𑀦𑀸𑀦𑀼𑀯𑀸𑀲𑀦𑀓𑀺𑀭𑀺𑀬𑀫𑀦𑀼𑀲𑀺𑀓𑁆𑀔𑀺𑀢𑁆𑀯𑀸 𑀯𑀺𑀚𑁆𑀚𑀸𑀲𑀼 𑀓𑀢𑀲𑀺𑀓𑁆𑀔𑁄 𑀓𑀢𑀽𑀧𑀸𑀲𑀦𑁄 𑀓𑀢𑀳𑀢𑁆𑀣𑁄 𑀆𑀢𑀼𑀭𑁂 𑀉𑀧𑀲𑀗𑁆𑀓𑀫𑀢𑀺 𑀢𑀺𑀓𑀺𑀘𑁆𑀙𑀸𑀬, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁂 𑀢𑁂 𑀕𑀺𑀳𑀻 𑀅𑀕𑀸𑀭𑀺𑀓𑀸 𑀓𑀸𑀫𑀪𑁄𑀕𑀺𑀦𑁄 𑀲𑀦𑁆𑀢𑀁 𑀧𑀭𑀫𑀢𑁆𑀣𑀁 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀭𑁄𑀦𑁆𑀢𑀺, 𑀢𑁂 𑀲𑀩𑁆𑀩𑁂 𑀧𑀼𑀭𑀺𑀫𑀸𑀲𑀼 𑀚𑀸𑀢𑀻𑀲𑀼 𑀢𑁂𑀭𑀲𑀲𑀼 𑀥𑀼𑀢𑀕𑀼𑀡𑁂𑀲𑀼 𑀓𑀢𑀽𑀧𑀸𑀲𑀦𑀸 𑀓𑀢𑀪𑀽𑀫𑀺𑀓𑀫𑁆𑀫𑀸, 𑀢𑁂 𑀢𑀢𑁆𑀣𑁂𑀯 𑀘𑀸𑀭𑀜𑁆𑀘 𑀧𑀝𑀺𑀧𑀢𑁆𑀢𑀺𑀜𑁆𑀘 𑀲𑁄𑀥𑀬𑀺𑀢𑁆𑀯𑀸 𑀅𑀚𑁆𑀚𑁂𑀢𑀭𑀳𑀺 𑀕𑀺𑀳𑀻 𑀬𑁂𑀯 𑀲𑀦𑁆𑀢𑀸 𑀲𑀦𑁆𑀢𑀁 𑀧𑀭𑀫𑀢𑁆𑀣𑀁 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀭𑁄𑀦𑁆𑀢𑀺, 𑀦, 𑀫𑀳𑀸𑀭𑀸𑀚, 𑀥𑀼𑀢𑀕𑀼𑀡𑁂𑀳𑀺 𑀅𑀯𑀺𑀲𑀼𑀤𑁆𑀥𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀳𑁄𑀢𑀺.

‘‘𑀬𑀣𑀸, 𑀫𑀳𑀸𑀭𑀸𑀚, 𑀉𑀤𑀓𑀲𑁆𑀲 𑀅𑀲𑁂𑀘𑀦𑁂𑀦 𑀩𑀻𑀚𑀸𑀦𑀁 𑀅𑀯𑀺𑀭𑀽𑀳𑀦𑀁 𑀳𑁄𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀥𑀼𑀢𑀕𑀼𑀡𑁂𑀳𑀺 𑀅𑀯𑀺𑀲𑀼𑀤𑁆𑀥𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀦 𑀳𑁄𑀢𑀺.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀅𑀓𑀢𑀓𑀼𑀲𑀮𑀸𑀦𑀁 𑀅𑀓𑀢𑀓𑀮𑁆𑀬𑀸𑀡𑀸𑀦𑀁 𑀲𑀼𑀕𑀢𑀺𑀕𑀫𑀦𑀁 𑀦 𑀳𑁄𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀥𑀼𑀢𑀕𑀼𑀡𑁂𑀳𑀺 𑀅𑀯𑀺𑀲𑀼𑀤𑁆𑀥𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀦 𑀳𑁄𑀢𑀺.

‘‘𑀧𑀣𑀯𑀺𑀲𑀫𑀁, 𑀫𑀳𑀸𑀭𑀸𑀚, 𑀥𑀼𑀢𑀕𑀼𑀡𑀁 𑀯𑀺𑀲𑀼𑀤𑁆𑀥𑀺𑀓𑀸𑀫𑀸𑀦𑀁 𑀧𑀢𑀺𑀝𑁆𑀞𑀸𑀦𑀝𑁆𑀞𑁂𑀦. 𑀆𑀧𑁄𑀲𑀫𑀁, 𑀫𑀳𑀸𑀭𑀸𑀚, 𑀥𑀼𑀢𑀕𑀼𑀡𑀁 𑀯𑀺𑀲𑀼𑀤𑁆𑀥𑀺𑀓𑀸𑀫𑀸𑀦𑀁 𑀲𑀩𑁆𑀩𑀓𑀺𑀮𑁂𑀲𑀫𑀮𑀥𑁄𑀯𑀦𑀝𑁆𑀞𑁂𑀦. 𑀢𑁂𑀚𑁄𑀲𑀫𑀁, 𑀫𑀳𑀸𑀭𑀸𑀚, 𑀥𑀼𑀢𑀕𑀼𑀡𑀁 𑀯𑀺𑀲𑀼𑀤𑁆𑀥𑀺𑀓𑀸𑀫𑀸𑀦𑀁 𑀲𑀩𑁆𑀩𑀓𑀺𑀮𑁂𑀲𑀯𑀦𑀚𑁆𑀛𑀸𑀧𑀦𑀝𑁆𑀞𑁂𑀦. 𑀯𑀸𑀬𑁄𑀲𑀫𑀁, 𑀫𑀳𑀸𑀭𑀸𑀚, 𑀥𑀼𑀢𑀕𑀼𑀡𑀁 𑀯𑀺𑀲𑀼𑀤𑁆𑀥𑀺𑀓𑀸𑀫𑀸𑀦𑀁 𑀲𑀩𑁆𑀩𑀓𑀺𑀮𑁂𑀲𑀫𑀮𑀭𑀚𑁄𑀧𑀯𑀸𑀳𑀦𑀝𑁆𑀞𑁂𑀦. 𑀅𑀕𑀤𑀲𑀫𑀁, 𑀫𑀳𑀸𑀭𑀸𑀚, 𑀥𑀼𑀢𑀕𑀼𑀡𑀁 𑀯𑀺𑀲𑀼𑀤𑁆𑀥𑀺𑀓𑀸𑀫𑀸𑀦𑀁 𑀲𑀩𑁆𑀩𑀓𑀺𑀮𑁂𑀲𑀩𑁆𑀬𑀸𑀥𑀺𑀯𑀽𑀧𑀲𑀫𑀦𑀝𑁆𑀞𑁂𑀦. 𑀅𑀫𑀢𑀲𑀫𑀁, 𑀫𑀳𑀸𑀭𑀸𑀚, 𑀥𑀼𑀢𑀕𑀼𑀡𑀁 𑀯𑀺𑀲𑀼𑀤𑁆𑀥𑀺𑀓𑀸𑀫𑀸𑀦𑀁 𑀲𑀩𑁆𑀩𑀓𑀺𑀮𑁂𑀲𑀯𑀺𑀲𑀦𑀸𑀲𑀦𑀝𑁆𑀞𑁂𑀦. 𑀔𑁂𑀢𑁆𑀢𑀲𑀫𑀁, 𑀫𑀳𑀸𑀭𑀸𑀚, 𑀥𑀼𑀢𑀕𑀼𑀡𑀁 𑀯𑀺𑀲𑀼𑀤𑁆𑀥𑀺𑀓𑀸𑀫𑀸𑀦𑀁 𑀲𑀩𑁆𑀩𑀲𑀸𑀫𑀜𑁆𑀜𑀕𑀼𑀡𑀲𑀲𑁆𑀲𑀯𑀺𑀭𑀽𑀳𑀦𑀝𑁆𑀞𑁂𑀦. 𑀫𑀦𑁄𑀳𑀭𑀲𑀫𑀁, 𑀫𑀳𑀸𑀭𑀸𑀚, 𑀥𑀼𑀢𑀕𑀼𑀡𑀁 𑀯𑀺𑀲𑀼𑀤𑁆𑀥𑀺𑀓𑀸𑀫𑀸𑀦𑀁 𑀧𑀢𑁆𑀣𑀺𑀢𑀺𑀘𑁆𑀙𑀺𑀢𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀯𑀭𑀤𑀤𑀝𑁆𑀞𑁂𑀦. 𑀦𑀸𑀯𑀸𑀲𑀫𑀁, 𑀫𑀳𑀸𑀭𑀸𑀚, 𑀥𑀼𑀢𑀕𑀼𑀡𑀁 𑀯𑀺𑀲𑀼𑀤𑁆𑀥𑀺𑀓𑀸𑀫𑀸𑀦𑀁 𑀲𑀁𑀲𑀸𑀭𑀫𑀳𑀡𑁆𑀡𑀯𑀧𑀸𑀭𑀕𑀫𑀦𑀝𑁆𑀞𑁂𑀦. 𑀪𑀻𑀭𑀼𑀢𑁆𑀢𑀸𑀡𑀲𑀫𑀁, 𑀫𑀳𑀸𑀭𑀸𑀚, 𑀥𑀼𑀢𑀕𑀼𑀡𑀁 𑀯𑀺𑀲𑀼𑀤𑁆𑀥𑀺𑀓𑀸𑀫𑀸𑀦𑀁 𑀚𑀭𑀸𑀫𑀭𑀡𑀪𑀻𑀢𑀸𑀦𑀁 𑀅𑀲𑁆𑀲𑀸𑀲𑀓𑀭𑀡𑀝𑁆𑀞𑁂𑀦. 𑀫𑀸𑀢𑀼𑀲𑀫𑀁, 𑀫𑀳𑀸𑀭𑀸𑀚, 𑀥𑀼𑀢𑀕𑀼𑀡𑀁 𑀯𑀺𑀲𑀼𑀤𑁆𑀥𑀺𑀓𑀸𑀫𑀸𑀦𑀁 𑀓𑀺𑀮𑁂𑀲𑀤𑀼𑀓𑁆𑀔𑀧𑁆𑀧𑀝𑀺𑀧𑀻𑀴𑀺𑀢𑀸𑀦𑀁 𑀅𑀦𑀼𑀕𑁆𑀕𑀸𑀳𑀓𑀝𑁆𑀞𑁂𑀦. 𑀧𑀺𑀢𑀼𑀲𑀫𑀁, 𑀫𑀳𑀸𑀭𑀸𑀚, 𑀥𑀼𑀢𑀕𑀼𑀡𑀁 𑀯𑀺𑀲𑀼𑀤𑁆𑀥𑀺𑀓𑀸𑀫𑀸𑀦𑀁 𑀓𑀼𑀲𑀮𑀯𑀟𑁆𑀠𑀺𑀓𑀸𑀫𑀸𑀦𑀁 𑀲𑀩𑁆𑀩𑀲𑀸𑀫𑀜𑁆𑀜𑀕𑀼𑀡𑀚𑀦𑀓𑀝𑁆𑀞𑁂𑀦. 𑀫𑀺𑀢𑁆𑀢𑀲𑀫𑀁, 𑀫𑀳𑀸𑀭𑀸𑀚, 𑀥𑀼𑀢𑀕𑀼𑀡𑀁 𑀯𑀺𑀲𑀼𑀤𑁆𑀥𑀺𑀓𑀸𑀫𑀸𑀦𑀁 𑀲𑀩𑁆𑀩𑀲𑀸𑀫𑀜𑁆𑀜𑀕𑀼𑀡𑀧𑀭𑀺𑀬𑁂𑀲𑀦𑀅𑀯𑀺𑀲𑀁𑀯𑀸𑀤𑀓𑀝𑁆𑀞𑁂𑀦. 𑀧𑀤𑀼𑀫𑀲𑀫𑀁, 𑀫𑀳𑀸𑀭𑀸𑀚, 𑀥𑀼𑀢𑀕𑀼𑀡𑀁 𑀯𑀺𑀲𑀼𑀤𑁆𑀥𑀺𑀓𑀸𑀫𑀸𑀦𑀁 𑀲𑀩𑁆𑀩𑀓𑀺𑀮𑁂𑀲𑀫𑀮𑁂𑀳𑀺 𑀅𑀦𑀼𑀧𑀮𑀺𑀢𑁆𑀢𑀝𑁆𑀞𑁂𑀦. 𑀘𑀢𑀼𑀚𑁆𑀚𑀸𑀢𑀺𑀬𑀯𑀭𑀕𑀦𑁆𑀥𑀲𑀫𑀁, 𑀫𑀳𑀸𑀭𑀸𑀚, 𑀥𑀼𑀢𑀕𑀼𑀡𑀁 𑀯𑀺𑀲𑀼𑀤𑁆𑀥𑀺𑀓𑀸𑀫𑀸𑀦𑀁 𑀓𑀺𑀮𑁂𑀲𑀤𑀼𑀕𑁆𑀕𑀦𑁆𑀥𑀧𑀝𑀺𑀯𑀺𑀦𑁄𑀤𑀦𑀝𑁆𑀞𑁂𑀦. 𑀕𑀺𑀭𑀺𑀭𑀸𑀚𑀯𑀭𑀲𑀫𑀁, 𑀫𑀳𑀸𑀭𑀸𑀚, 𑀥𑀼𑀢𑀕𑀼𑀡𑀁 𑀯𑀺𑀲𑀼𑀤𑁆𑀥𑀺𑀓𑀸𑀫𑀸𑀦𑀁 𑀅𑀝𑁆𑀞𑀮𑁄𑀓𑀥𑀫𑁆𑀫𑀯𑀸𑀢𑁂𑀳𑀺 𑀅𑀓𑀫𑁆𑀧𑀺𑀬𑀝𑁆𑀞𑁂𑀦. 𑀆𑀓𑀸𑀲𑀲𑀫𑀁, 𑀫𑀳𑀸𑀭𑀸𑀚, 𑀥𑀼𑀢𑀕𑀼𑀡𑀁 𑀯𑀺𑀲𑀼𑀤𑁆𑀥𑀺𑀓𑀸𑀫𑀸𑀦𑀁 𑀲𑀩𑁆𑀩𑀢𑁆𑀣 𑀕𑀳𑀡𑀸𑀧𑀕𑀢𑀉𑀭𑀼𑀯𑀺𑀲𑀝𑀯𑀺𑀢𑁆𑀣𑀢𑀫𑀳𑀦𑁆𑀢𑀝𑁆𑀞𑁂𑀦. 𑀦𑀤𑀻𑀲𑀫𑀁, 𑀫𑀳𑀸𑀭𑀸𑀚, 𑀥𑀼𑀢𑀕𑀼𑀡𑀁 𑀯𑀺𑀲𑀼𑀤𑁆𑀥𑀺𑀓𑀸𑀫𑀸𑀦𑀁 𑀓𑀺𑀮𑁂𑀲𑀫𑀮𑀧𑀯𑀸𑀳𑀦𑀝𑁆𑀞𑁂𑀦. 𑀲𑀼𑀤𑁂𑀲𑀓𑀲𑀫𑀁, 𑀫𑀳𑀸𑀭𑀸𑀚, 𑀥𑀼𑀢𑀕𑀼𑀡𑀁 𑀯𑀺𑀲𑀼𑀤𑁆𑀥𑀺𑀓𑀸𑀫𑀸𑀦𑀁 𑀚𑀸𑀢𑀺𑀓𑀦𑁆𑀢𑀸𑀭𑀓𑀺𑀮𑁂𑀲𑀯𑀦𑀕𑀳𑀦𑀦𑀺𑀢𑁆𑀣𑀭𑀡𑀝𑁆𑀞𑁂𑀦. 𑀫𑀳𑀸𑀲𑀢𑁆𑀣𑀯𑀸𑀳𑀲𑀫𑀁, 𑀫𑀳𑀸𑀭𑀸𑀚, 𑀥𑀼𑀢𑀕𑀼𑀡𑀁 𑀯𑀺𑀲𑀼𑀤𑁆𑀥𑀺𑀓𑀸𑀫𑀸𑀦𑀁 𑀲𑀩𑁆𑀩𑀪𑀬𑀲𑀼𑀜𑁆𑀜𑀔𑁂𑀫𑀅𑀪𑀬𑀯𑀭𑀧𑀯𑀭𑀦𑀺𑀩𑁆𑀩𑀸𑀦𑀦𑀕𑀭𑀲𑀫𑁆𑀧𑀸𑀧𑀦𑀝𑁆𑀞𑁂𑀦. 𑀲𑀼𑀫𑀚𑁆𑀚𑀺𑀢𑀯𑀺𑀫𑀮𑀸𑀤𑀸𑀲𑀲𑀫𑀁, 𑀫𑀳𑀸𑀭𑀸𑀚, 𑀥𑀼𑀢𑀕𑀼𑀡𑀁 𑀯𑀺𑀲𑀼𑀤𑁆𑀥𑀺𑀓𑀸𑀫𑀸𑀦𑀁 𑀲𑀗𑁆𑀔𑀸𑀭𑀸𑀦𑀁 𑀲𑀪𑀸𑀯𑀤𑀲𑁆𑀲𑀦𑀝𑁆𑀞𑁂𑀦. 𑀨𑀮𑀓𑀲𑀫𑀁, 𑀫𑀳𑀸𑀭𑀸𑀚, 𑀥𑀼𑀢𑀕𑀼𑀡𑀁 𑀯𑀺𑀲𑀼𑀤𑁆𑀥𑀺𑀓𑀸𑀫𑀸𑀦𑀁 𑀓𑀺𑀮𑁂𑀲𑀮𑀕𑀼𑀴𑀲𑀭𑀲𑀢𑁆𑀢𑀺𑀧𑀝𑀺𑀩𑀸𑀳𑀦𑀝𑁆𑀞𑁂𑀦. 𑀙𑀢𑁆𑀢𑀲𑀫𑀁, 𑀫𑀳𑀸𑀭𑀸𑀚, 𑀥𑀼𑀢𑀕𑀼𑀡𑀁 𑀯𑀺𑀲𑀼𑀤𑁆𑀥𑀺𑀓𑀸𑀫𑀸𑀦𑀁 𑀓𑀺𑀮𑁂𑀲𑀯𑀲𑁆𑀲𑀢𑀺𑀯𑀺𑀥𑀕𑁆𑀕𑀺𑀲𑀦𑁆𑀢𑀸𑀧𑀸𑀢𑀧𑀧𑀝𑀺𑀩𑀸𑀳𑀦𑀝𑁆𑀞𑁂𑀦. 𑀘𑀦𑁆𑀤𑀲𑀫𑀁, 𑀫𑀳𑀸𑀭𑀸𑀚, 𑀥𑀼𑀢𑀕𑀼𑀡𑀁 𑀯𑀺𑀲𑀼𑀤𑁆𑀥𑀺𑀓𑀸𑀫𑀸𑀦𑀁 𑀧𑀺𑀳𑀬𑀺𑀢𑀧𑀢𑁆𑀣𑀺𑀢𑀝𑁆𑀞𑁂𑀦. 𑀲𑀽𑀭𑀺𑀬𑀲𑀫𑀁, 𑀫𑀳𑀸𑀭𑀸𑀚, 𑀥𑀼𑀢𑀕𑀼𑀡𑀁 𑀯𑀺𑀲𑀼𑀤𑁆𑀥𑀺𑀓𑀸𑀫𑀸𑀦𑀁 𑀫𑁄𑀳𑀢𑀫𑀢𑀺𑀫𑀺𑀭𑀦𑀸𑀲𑀦𑀝𑁆𑀞𑁂𑀦. 𑀲𑀸𑀕𑀭𑀲𑀫𑀁, 𑀫𑀳𑀸𑀭𑀸𑀚, 𑀥𑀼𑀢𑀕𑀼𑀡𑀁 𑀯𑀺𑀲𑀼𑀤𑁆𑀥𑀺𑀓𑀸𑀫𑀸𑀦𑀁 𑀅𑀦𑁂𑀓𑀯𑀺𑀥𑀲𑀸𑀫𑀜𑁆𑀜𑀕𑀼𑀡𑀯𑀭𑀭𑀢𑀦𑀼𑀝𑁆𑀞𑀸𑀦𑀝𑁆𑀞𑁂𑀦, 𑀅𑀧𑀭𑀺𑀫𑀺𑀢𑀅𑀲𑀗𑁆𑀔𑁆𑀬𑁂𑀬𑁆𑀬𑀅𑀧𑁆𑀧𑀫𑁂𑀬𑁆𑀬𑀝𑁆𑀞𑁂𑀦 𑀘. 𑀏𑀯𑀁 𑀔𑁄, 𑀫𑀳𑀸𑀭𑀸𑀚, 𑀥𑀼𑀢𑀕𑀼𑀡𑀁 𑀯𑀺𑀲𑀼𑀤𑁆𑀥𑀺𑀓𑀸𑀫𑀸𑀦𑀁 𑀩𑀳𑀽𑀧𑀓𑀸𑀭𑀁 𑀲𑀩𑁆𑀩𑀤𑀭𑀣𑀧𑀭𑀺𑀴𑀸𑀳𑀦𑀼𑀤𑀁 𑀅𑀭𑀢𑀺𑀦𑀼𑀤𑀁 𑀪𑀬𑀦𑀼𑀤𑀁 𑀪𑀯𑀦𑀼𑀤𑀁 𑀔𑀻𑀮𑀦𑀼𑀤𑀁 𑀫𑀮𑀦𑀼𑀤𑀁 𑀲𑁄𑀓𑀦𑀼𑀤𑀁 𑀤𑀼𑀓𑁆𑀔𑀦𑀼𑀤𑀁 𑀭𑀸𑀕𑀦𑀼𑀤𑀁 𑀤𑁄𑀲𑀦𑀼𑀤𑀁 𑀫𑁄𑀳𑀦𑀼𑀤𑀁 𑀫𑀸𑀦𑀦𑀼𑀤𑀁 𑀤𑀺𑀝𑁆𑀞𑀺𑀦𑀼𑀤𑀁 𑀲𑀩𑁆𑀩𑀸𑀓𑀼𑀲𑀮𑀥𑀫𑁆𑀫𑀦𑀼𑀤𑀁 𑀬𑀲𑀸𑀯𑀳𑀁 𑀳𑀺𑀢𑀸𑀯𑀳𑀁 𑀲𑀼𑀔𑀸𑀯𑀳𑀁 𑀨𑀸𑀲𑀼𑀓𑀭𑀁 𑀧𑀻𑀢𑀺𑀓𑀭𑀁 𑀬𑁄𑀕𑀓𑁆𑀔𑁂𑀫𑀓𑀭𑀁 𑀅𑀦𑀯𑀚𑁆𑀚𑀁 𑀇𑀝𑁆𑀞𑀲𑀼𑀔𑀯𑀺𑀧𑀸𑀓𑀁 𑀕𑀼𑀡𑀭𑀸𑀲𑀺𑀕𑀼𑀡𑀧𑀼𑀜𑁆𑀚𑀁 𑀅𑀧𑀭𑀺𑀫𑀺𑀢𑀅𑀲𑀗𑁆𑀔𑁆𑀬𑁂𑀬𑁆𑀬 𑀅𑀧𑁆𑀧𑀫𑁂𑀬𑁆𑀬𑀕𑀼𑀡𑀁 𑀯𑀭𑀁 𑀧𑀯𑀭𑀁 𑀅𑀕𑁆𑀕𑀁.

‘‘𑀬𑀣𑀸, 𑀫𑀳𑀸𑀭𑀸𑀚, 𑀫𑀦𑀼𑀲𑁆𑀲𑀸 𑀉𑀧𑀢𑁆𑀣𑀫𑁆𑀪𑀯𑀲𑁂𑀦 𑀪𑁄𑀚𑀦𑀁 𑀉𑀧𑀲𑁂𑀯𑀦𑁆𑀢𑀺, 𑀳𑀺𑀢𑀯𑀲𑁂𑀦 𑀪𑁂𑀲𑀚𑁆𑀚𑀁 𑀉𑀧𑀲𑁂𑀯𑀦𑁆𑀢𑀺, 𑀉𑀧𑀓𑀸𑀭𑀯𑀲𑁂𑀦 𑀫𑀺𑀢𑁆𑀢𑀁 𑀉𑀧𑀲𑁂𑀯𑀦𑁆𑀢𑀺, 𑀢𑀸𑀭𑀡𑀯𑀲𑁂𑀦 𑀦𑀸𑀯𑀁 𑀉𑀧𑀲𑁂𑀯𑀦𑁆𑀢𑀺, 𑀲𑀼𑀕𑀦𑁆𑀥𑀯𑀲𑁂𑀦 𑀫𑀸𑀮𑀸𑀕𑀦𑁆𑀥𑀁 𑀉𑀧𑀲𑁂𑀯𑀦𑁆𑀢𑀺, 𑀅𑀪𑀬𑀯𑀲𑁂𑀦 𑀪𑀻𑀭𑀼𑀢𑁆𑀢𑀸𑀡𑀁 𑀉𑀧𑀲𑁂𑀯𑀦𑁆𑀢𑀺, 𑀧𑀢𑀺𑀝𑁆𑀞𑀸𑀯𑀲𑁂𑀦 [𑀧𑀢𑀺𑀝𑁆𑀞𑀸𑀦𑀯𑀲𑁂𑀦 (𑀓.)] 𑀧𑀣𑀯𑀺𑀁 𑀉𑀧𑀲𑁂𑀯𑀦𑁆𑀢𑀺, 𑀲𑀺𑀧𑁆𑀧𑀯𑀲𑁂𑀦 𑀆𑀘𑀭𑀺𑀬𑀁 𑀉𑀧𑀲𑁂𑀯𑀦𑁆𑀢𑀺, 𑀬𑀲𑀯𑀲𑁂𑀦 𑀭𑀸𑀚𑀸𑀦𑀁 𑀉𑀧𑀲𑁂𑀯𑀦𑁆𑀢𑀺, 𑀓𑀸𑀫𑀤𑀤𑀯𑀲𑁂𑀦 𑀫𑀡𑀺𑀭𑀢𑀦𑀁 𑀉𑀧𑀲𑁂𑀯𑀦𑁆𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀲𑀩𑁆𑀩𑀲𑀸𑀫𑀜𑁆𑀜𑀕𑀼𑀡𑀤𑀤𑀯𑀲𑁂𑀦 𑀅𑀭𑀺𑀬𑀸 𑀥𑀼𑀢𑀕𑀼𑀡𑀁 𑀉𑀧𑀲𑁂𑀯𑀦𑁆𑀢𑀺.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀉𑀤𑀓𑀁 𑀩𑀻𑀚𑀯𑀺𑀭𑀽𑀳𑀦𑀸𑀬, 𑀅𑀕𑁆𑀕𑀺 𑀛𑀸𑀧𑀦𑀸𑀬, 𑀆𑀳𑀸𑀭𑁄 𑀩𑀮𑀸𑀳𑀭𑀡𑀸𑀬, 𑀮𑀢𑀸 𑀩𑀦𑁆𑀥𑀦𑀸𑀬, 𑀲𑀢𑁆𑀣𑀁 𑀙𑁂𑀤𑀦𑀸𑀬, 𑀧𑀸𑀦𑀻𑀬𑀁 𑀧𑀺𑀧𑀸𑀲𑀸𑀯𑀺𑀦𑀬𑀦𑀸𑀬, 𑀦𑀺𑀥𑀺 𑀅𑀲𑁆𑀲𑀸𑀲𑀓𑀭𑀡𑀸𑀬, 𑀦𑀸𑀯𑀸 𑀢𑀻𑀭𑀲𑀫𑁆𑀧𑀸𑀧𑀦𑀸𑀬, 𑀪𑁂𑀲𑀚𑁆𑀚𑀁 𑀩𑁆𑀬𑀸𑀥𑀺𑀯𑀽𑀧𑀲𑀫𑀦𑀸𑀬, 𑀬𑀸𑀦𑀁 𑀲𑀼𑀔𑀕𑀫𑀦𑀸𑀬, 𑀪𑀻𑀭𑀼𑀢𑁆𑀢𑀸𑀡𑀁 𑀪𑀬𑀯𑀺𑀦𑁄𑀤𑀦𑀸𑀬, 𑀭𑀸𑀚𑀸 𑀆𑀭𑀓𑁆𑀔𑀢𑁆𑀣𑀸𑀬, 𑀨𑀮𑀓𑀁 𑀤𑀡𑁆𑀟𑀮𑁂𑀟𑁆𑀟𑀼𑀮𑀕𑀼𑀴𑀲𑀭𑀲𑀢𑁆𑀢𑀺𑀧𑀝𑀺𑀩𑀸𑀳𑀦𑀸𑀬, 𑀆𑀘𑀭𑀺𑀬𑁄 𑀅𑀦𑀼𑀲𑀸𑀲𑀦𑀸𑀬, 𑀫𑀸𑀢𑀸 𑀧𑁄𑀲𑀦𑀸𑀬, 𑀆𑀤𑀸𑀲𑁄 𑀑𑀮𑁄𑀓𑀦𑀸𑀬, 𑀅𑀮𑀗𑁆𑀓𑀸𑀭𑁄 𑀲𑁄𑀪𑀦𑀸𑀬, 𑀯𑀢𑁆𑀣𑀁 𑀧𑀝𑀺𑀘𑁆𑀙𑀸𑀤𑀦𑀸𑀬, 𑀦𑀺𑀲𑁆𑀲𑁂𑀡𑀻 𑀆𑀭𑁄𑀳𑀦𑀸𑀬, 𑀢𑀼𑀮𑀸 𑀯𑀺𑀲𑀫𑀯𑀺𑀓𑁆𑀔𑁂𑀧𑀦𑀸𑀬 [𑀦𑀺𑀓𑁆𑀔𑁂𑀧𑀦𑀸𑀬 (𑀲𑀻. 𑀧𑀻.)], 𑀫𑀦𑁆𑀢𑀁 𑀧𑀭𑀺𑀚𑀧𑁆𑀧𑀦𑀸𑀬, 𑀆𑀯𑀼𑀥𑀁 𑀢𑀚𑁆𑀚𑀦𑀻𑀬𑀧𑀝𑀺𑀩𑀸𑀳𑀦𑀸𑀬, 𑀧𑀤𑀻𑀧𑁄 𑀅𑀦𑁆𑀥𑀓𑀸𑀭𑀯𑀺𑀥𑀫𑀦𑀸𑀬, 𑀯𑀸𑀢𑁄 𑀧𑀭𑀺𑀴𑀸𑀳𑀦𑀺𑀩𑁆𑀩𑀸𑀧𑀦𑀸𑀬, 𑀲𑀺𑀧𑁆𑀧𑀁 𑀯𑀼𑀢𑁆𑀢𑀺𑀦𑀺𑀧𑁆𑀨𑀸𑀤𑀦𑀸𑀬, 𑀅𑀕𑀤𑀁 𑀚𑀻𑀯𑀺𑀢𑀭𑀓𑁆𑀔𑀡𑀸𑀬, 𑀆𑀓𑀭𑁄 𑀭𑀢𑀦𑀼𑀧𑁆𑀧𑀸𑀤𑀦𑀸𑀬, 𑀭𑀢𑀦𑀁 𑀅𑀮𑀗𑁆𑀓𑀭𑀸𑀬, 𑀆𑀡𑀸 𑀅𑀦𑀢𑀺𑀓𑁆𑀓𑀫𑀦𑀸𑀬, 𑀇𑀲𑁆𑀲𑀭𑀺𑀬𑀁 𑀯𑀲𑀯𑀢𑁆𑀢𑀦𑀸𑀬, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀥𑀼𑀢𑀕𑀼𑀡𑀁 𑀲𑀸𑀫𑀜𑁆𑀜𑀩𑀻𑀚𑀯𑀺𑀭𑀽𑀳𑀦𑀸𑀬, 𑀓𑀺𑀮𑁂𑀲𑀫𑀮𑀛𑀸𑀧𑀦𑀸𑀬, 𑀇𑀤𑁆𑀥𑀺𑀩𑀮𑀸𑀳𑀭𑀡𑀸𑀬, 𑀲𑀢𑀺𑀲𑀁𑀯𑀭𑀦𑀺𑀩𑀦𑁆𑀥𑀦𑀸𑀬, 𑀯𑀺𑀫𑀢𑀺𑀯𑀺𑀘𑀺𑀓𑀺𑀘𑁆𑀙𑀸𑀲𑀫𑀼𑀘𑁆𑀙𑁂𑀤𑀦𑀸𑀬, 𑀢𑀡𑁆𑀳𑀸𑀧𑀺𑀧𑀸𑀲𑀸𑀯𑀺𑀦𑀬𑀦𑀸𑀬, 𑀅𑀪𑀺𑀲𑀫𑀬𑀅𑀲𑁆𑀲𑀸𑀲𑀓𑀭𑀡𑀸𑀬, 𑀘𑀢𑀼𑀭𑁄𑀖𑀦𑀺𑀢𑁆𑀣𑀭𑀡𑀸𑀬, 𑀓𑀺𑀮𑁂𑀲𑀩𑁆𑀬𑀸𑀥𑀺𑀯𑀽𑀧𑀲𑀫𑀸𑀬, 𑀦𑀺𑀩𑁆𑀩𑀸𑀦𑀲𑀼𑀔𑀧𑁆𑀧𑀝𑀺𑀮𑀸𑀪𑀸𑀬, 𑀚𑀸𑀢𑀺𑀚𑀭𑀸𑀩𑁆𑀬𑀸𑀥𑀺𑀫𑀭𑀡𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀪𑀬𑀯𑀺𑀦𑁄𑀤𑀦𑀸𑀬, 𑀲𑀸𑀫𑀜𑁆𑀜𑀕𑀼𑀡𑀧𑀭𑀺𑀭𑀓𑁆𑀔𑀡𑀸𑀬, 𑀅𑀭𑀢𑀺𑀓𑀼𑀯𑀺𑀢𑀓𑁆𑀓𑀧𑀝𑀺𑀩𑀸𑀳𑀦𑀸𑀬, 𑀲𑀓𑀮𑀲𑀸𑀫𑀜𑁆𑀜𑀢𑁆𑀣𑀸𑀦𑀼𑀲𑀸𑀲𑀦𑀸𑀬, 𑀲𑀩𑁆𑀩𑀲𑀸𑀫𑀜𑁆𑀜𑀕𑀼𑀡𑀧𑁄𑀲𑀦𑀸𑀬, 𑀲𑀫𑀣𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀤𑀲𑁆𑀲𑀦𑀸𑀬, 𑀲𑀓𑀮𑀮𑁄𑀓𑀣𑀼𑀢𑀣𑁄𑀫𑀺𑀢𑀫𑀳𑀢𑀺𑀫𑀳𑀸𑀲𑁄𑀪𑀦𑀓𑀭𑀡𑀸𑀬, 𑀲𑀩𑁆𑀩𑀸𑀧𑀸𑀬𑀧𑀺𑀤𑀳𑀦𑀸𑀬, 𑀲𑀸𑀫𑀜𑁆𑀜𑀢𑁆𑀣𑀲𑁂𑀮𑀲𑀺𑀔𑀭𑀫𑀼𑀤𑁆𑀥𑀦𑀺 𑀅𑀪𑀺𑀭𑀽𑀳𑀦𑀸𑀬, 𑀯𑀗𑁆𑀓𑀓𑀼𑀝𑀺𑀮𑀯𑀺𑀲𑀫𑀘𑀺𑀢𑁆𑀢𑀯𑀺𑀓𑁆𑀔𑁂𑀧𑀦𑀸𑀬 [𑀘𑀺𑀢𑁆𑀢𑀦𑀺𑀓𑁆𑀔𑁂𑀧𑀦𑀸𑀬 (𑀲𑀻. 𑀧𑀻.)], 𑀲𑁂𑀯𑀺𑀢𑀩𑁆𑀩𑀸𑀲𑁂𑀯𑀺𑀢𑀩𑁆𑀩𑀥𑀫𑁆𑀫𑁂 𑀲𑀸𑀥𑀼𑀲𑀚𑁆𑀛𑀸𑀬𑀓𑀭𑀡𑀸𑀬, 𑀲𑀩𑁆𑀩𑀓𑀺𑀮𑁂𑀲𑀧𑀝𑀺𑀲𑀢𑁆𑀢𑀼𑀢𑀚𑁆𑀚𑀦𑀸𑀬, 𑀅𑀯𑀺𑀚𑁆𑀚𑀦𑁆𑀥𑀓𑀸𑀭𑀯𑀺𑀥𑀫𑀦𑀸𑀬, 𑀢𑀺𑀯𑀺𑀥𑀕𑁆𑀕𑀺𑀲𑀦𑁆𑀢𑀸𑀧𑀧𑀭𑀺𑀴𑀸𑀳𑀦𑀺𑀩𑁆𑀩𑀸𑀧𑀦𑀸𑀬, 𑀲𑀡𑁆𑀳𑀲𑀼𑀔𑀼𑀫𑀲𑀦𑁆𑀢𑀲𑀫𑀸𑀧𑀢𑁆𑀢𑀺𑀦𑀺𑀧𑁆𑀨𑀸𑀤𑀦𑀸𑀬, 𑀲𑀓𑀮𑀲𑀸𑀫𑀜𑁆𑀜𑀕𑀼𑀡𑀧𑀭𑀺𑀭𑀓𑁆𑀔𑀡𑀸𑀬, 𑀩𑁄𑀚𑁆𑀛𑀗𑁆𑀕𑀯𑀭𑀭𑀢𑀦𑀼𑀧𑁆𑀧𑀸𑀤𑀦𑀸𑀬, 𑀬𑁄𑀕𑀺𑀚𑀦𑀸𑀮𑀗𑁆𑀓𑀭𑀡𑀸𑀬, 𑀅𑀦𑀯𑀚𑁆𑀚𑀦𑀺𑀧𑀼𑀡𑀲𑀼𑀔𑀼𑀫𑀲𑀦𑁆𑀢𑀺𑀲𑀼𑀔𑀫𑀦𑀢𑀺𑀓𑁆𑀓𑀫𑀦𑀸𑀬, 𑀲𑀓𑀮𑀲𑀸𑀫𑀜𑁆𑀜𑀅𑀭𑀺𑀬𑀥𑀫𑁆𑀫𑀯𑀲𑀯𑀢𑁆𑀢𑀦𑀸𑀬. 𑀇𑀢𑀺, 𑀫𑀳𑀸𑀭𑀸𑀚, 𑀇𑀫𑁂𑀲𑀁 𑀕𑀼𑀡𑀸𑀦𑀁 𑀅𑀥𑀺𑀕𑀫𑀸𑀬 𑀬𑀤𑀺𑀤𑀁 𑀏𑀓𑀫𑁂𑀓𑀁 𑀥𑀼𑀢𑀕𑀼𑀡𑀁, 𑀏𑀯𑀁, 𑀫𑀳𑀸𑀭𑀸𑀚, 𑀅𑀢𑀼𑀮𑀺𑀬𑀁 𑀥𑀼𑀢𑀕𑀼𑀡𑀁 𑀅𑀧𑁆𑀧𑀫𑁂𑀬𑁆𑀬𑀁 𑀅𑀲𑀫𑀁 𑀅𑀧𑁆𑀧𑀝𑀺𑀲𑀫𑀁 𑀅𑀧𑁆𑀧𑀝𑀺𑀪𑀸𑀕𑀁 𑀅𑀧𑁆𑀧𑀝𑀺𑀲𑁂𑀝𑁆𑀞𑀁 𑀉𑀢𑁆𑀢𑀭𑀁 𑀲𑁂𑀝𑁆𑀞𑀁 𑀯𑀺𑀲𑀺𑀝𑁆𑀞𑀁 𑀅𑀥𑀺𑀓𑀁 𑀆𑀬𑀢𑀁 𑀧𑀼𑀣𑀼𑀮𑀁 𑀯𑀺𑀲𑀝𑀁 𑀯𑀺𑀢𑁆𑀣𑀢𑀁 𑀕𑀭𑀼𑀓𑀁 𑀪𑀸𑀭𑀺𑀬𑀁 𑀫𑀳𑀦𑁆𑀢𑀁.

‘‘𑀬𑁄 𑀔𑁄, 𑀫𑀳𑀸𑀭𑀸𑀚, 𑀧𑀼𑀕𑁆𑀕𑀮𑁄 𑀧𑀸𑀧𑀺𑀘𑁆𑀙𑁄 𑀇𑀘𑁆𑀙𑀸𑀧𑀓𑀢𑁄 𑀓𑀼𑀳𑀓𑁄 𑀮𑀼𑀤𑁆𑀥𑁄 𑀑𑀤𑀭𑀺𑀓𑁄 𑀮𑀸𑀪𑀓𑀸𑀫𑁄 𑀬𑀲𑀓𑀸𑀫𑁄 𑀓𑀺𑀢𑁆𑀢𑀺𑀓𑀸𑀫𑁄 𑀅𑀬𑀼𑀢𑁆𑀢𑁄 𑀅𑀧𑁆𑀧𑀢𑁆𑀢𑁄 𑀅𑀦𑀦𑀼𑀘𑁆𑀙𑀯𑀺𑀓𑁄 𑀅𑀦𑀭𑀳𑁄 𑀅𑀧𑁆𑀧𑀢𑀺𑀭𑀽𑀧𑁄 𑀥𑀼𑀢𑀗𑁆𑀕𑀁 [𑀢𑀥𑀼𑀕𑀼𑀡𑀁 (𑀓.) 𑀏𑀯𑀫𑀼𑀧𑀭𑀺𑀧𑀺] 𑀲𑀫𑀸𑀤𑀺𑀬𑀢𑀺, 𑀲𑁄 𑀤𑀺𑀕𑀼𑀡𑀁 𑀤𑀡𑁆𑀟𑀫𑀸𑀧𑀚𑁆𑀚𑀢𑀺, 𑀲𑀩𑁆𑀩𑀕𑀼𑀡𑀖𑀸𑀢𑀫𑀸𑀧𑀚𑁆𑀚𑀢𑀺, 𑀤𑀺𑀝𑁆𑀞𑀥𑀫𑁆𑀫𑀺𑀓𑀁 𑀳𑀻𑀴𑀦𑀁 𑀔𑀻𑀴𑀦𑀁 𑀕𑀭𑀳𑀦𑀁 𑀉𑀧𑁆𑀧𑀡𑁆𑀟𑀦𑀁 𑀔𑀺𑀧𑀦𑀁 𑀅𑀲𑀫𑁆𑀪𑁄𑀕𑀁 𑀦𑀺𑀲𑁆𑀲𑀸𑀭𑀡𑀁 𑀦𑀺𑀘𑁆𑀙𑀼𑀪𑀦𑀁 𑀧𑀯𑀸𑀳𑀦𑀁 𑀧𑀩𑁆𑀩𑀸𑀚𑀦𑀁 𑀧𑀝𑀺𑀮𑀪𑀢𑀺, 𑀲𑀫𑁆𑀧𑀭𑀸𑀬𑁂𑀧𑀺 𑀲𑀢𑀬𑁄𑀚𑀦𑀺𑀓𑁂 𑀅𑀯𑀻𑀘𑀺𑀫𑀳𑀸𑀦𑀺𑀭𑀬𑁂 𑀉𑀡𑁆𑀳𑀓𑀞𑀺𑀢𑀢𑀢𑁆𑀢𑀲𑀦𑁆𑀢𑀢𑁆𑀢𑀅𑀘𑁆𑀘𑀺𑀚𑀸𑀮𑀸𑀫𑀸𑀮𑀓𑁂 𑀅𑀦𑁂𑀓𑀯𑀲𑁆𑀲𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀺 𑀉𑀤𑁆𑀥𑀫𑀥𑁄 𑀢𑀺𑀭𑀺𑀬𑀁 𑀨𑁂𑀡𑀼𑀤𑁆𑀤𑁂𑀳𑀓𑀁 𑀲𑀫𑁆𑀧𑀭𑀺𑀯𑀢𑁆𑀢𑀓𑀁 𑀧𑀘𑁆𑀘𑀢𑀺, 𑀢𑀢𑁄 𑀫𑀼𑀘𑁆𑀘𑀺𑀢𑁆𑀯𑀸 [𑀫𑀼𑀘𑁆𑀘𑀺𑀢𑁆𑀯𑀸 (𑀲𑀻. 𑀧𑀻.)] 𑀓𑀺𑀲𑀨𑀭𑀼𑀲𑀓𑀸𑀴𑀗𑁆𑀕𑀧𑀘𑁆𑀘𑀗𑁆𑀕𑁄 𑀲𑀽𑀦𑀼𑀤𑁆𑀥𑀼𑀫𑀸𑀢𑀲𑀼𑀲𑀺𑀭𑀼𑀢𑁆𑀢𑀫𑀗𑁆𑀕𑁄 [𑀲𑀽𑀦𑀼𑀤𑁆𑀥𑀼𑀫𑀸𑀢𑀲𑀽𑀘𑀺𑀫𑀼𑀔𑀧𑀫𑀸𑀡𑀲𑀼𑀲𑀺𑀭𑀼𑀢𑁆𑀢𑀫𑀗𑁆𑀕𑁄 (𑀲𑀻. 𑀧𑀻.)] 𑀙𑀸𑀢𑁄 𑀧𑀺𑀧𑀸𑀲𑀺𑀢𑁄 𑀯𑀺𑀲𑀫𑀪𑀻𑀫𑀭𑀽𑀧𑀯𑀡𑁆𑀡𑁄 𑀪𑀕𑁆𑀕𑀓𑀡𑁆𑀡𑀲𑁄𑀢𑁄 𑀉𑀫𑁆𑀫𑀻𑀮𑀺𑀢𑀦𑀺𑀫𑀻𑀮𑀺𑀢𑀦𑁂𑀢𑁆𑀢𑀦𑀬𑀦𑁄 𑀅𑀭𑀼𑀕𑀢𑁆𑀢𑀧𑀓𑁆𑀓𑀕𑀢𑁆𑀢𑁄 𑀧𑀼𑀴𑀯𑀸𑀓𑀺𑀡𑁆𑀡𑀲𑀩𑁆𑀩𑀓𑀸𑀬𑁄 𑀯𑀸𑀢𑀫𑀼𑀔𑁂 𑀚𑀮𑀫𑀸𑀦𑁄 𑀯𑀺𑀬 𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀅𑀦𑁆𑀢𑁄 𑀚𑀮𑀫𑀸𑀦𑁄 𑀧𑀚𑁆𑀚𑀮𑀫𑀸𑀦𑁄 𑀅𑀢𑀸𑀡𑁄 𑀅𑀲𑀭𑀡𑁄 𑀆𑀭𑀼𑀡𑁆𑀡𑀭𑀼𑀡𑁆𑀡𑀓𑀸𑀭𑀼𑀜𑁆𑀜𑀭𑀯𑀁 𑀧𑀭𑀺𑀤𑁂𑀯𑀫𑀸𑀦𑁄 𑀦𑀺𑀚𑁆𑀛𑀸𑀫𑀢𑀡𑁆𑀳𑀺𑀓𑁄 𑀲𑀫𑀡𑀫𑀳𑀸𑀧𑁂𑀢𑁄 𑀳𑀼𑀢𑁆𑀯𑀸 𑀆𑀳𑀺𑀡𑁆𑀟𑀫𑀸𑀦𑁄 𑀫𑀳𑀺𑀬𑀸 𑀅𑀝𑁆𑀝𑀲𑁆𑀲𑀭𑀁 𑀓𑀭𑁄𑀢𑀺.

‘‘𑀬𑀣𑀸, 𑀫𑀳𑀸𑀭𑀸𑀚, 𑀓𑁄𑀘𑀺 𑀅𑀬𑀼𑀢𑁆𑀢𑁄 𑀅𑀧𑁆𑀧𑀢𑁆𑀢𑁄 𑀅𑀦𑀦𑀼𑀘𑁆𑀙𑀯𑀺𑀓𑁄 𑀅𑀦𑀭𑀳𑁄 𑀅𑀧𑁆𑀧𑀢𑀺𑀭𑀽𑀧𑁄 𑀳𑀻𑀦𑁄 𑀓𑀼𑀚𑀸𑀢𑀺𑀓𑁄 𑀔𑀢𑁆𑀢𑀺𑀬𑀸𑀪𑀺𑀲𑁂𑀓𑁂𑀦 𑀅𑀪𑀺𑀲𑀺𑀜𑁆𑀘𑀢𑀺, 𑀲𑁄 𑀮𑀪𑀢𑀺 𑀳𑀢𑁆𑀣𑀘𑁆𑀙𑁂𑀤𑀁 𑀧𑀸𑀤𑀘𑁆𑀙𑁂𑀤𑀁 𑀳𑀢𑁆𑀣𑀧𑀸𑀤𑀘𑁆𑀙𑁂𑀤𑀁 𑀓𑀡𑁆𑀡𑀘𑁆𑀙𑁂𑀤𑀁 𑀦𑀸𑀲𑀘𑁆𑀙𑁂𑀤𑀁 𑀓𑀡𑁆𑀡𑀦𑀸𑀲𑀘𑁆𑀙𑁂𑀤𑀁 𑀩𑀺𑀮𑀗𑁆𑀕𑀣𑀸𑀮𑀺𑀓𑀁 𑀲𑀗𑁆𑀔𑀫𑀼𑀡𑁆𑀟𑀺𑀓𑀁 𑀭𑀸𑀳𑀼𑀫𑀼𑀔𑀁 𑀚𑁄𑀢𑀺𑀫𑀸𑀮𑀺𑀓𑀁 𑀳𑀢𑁆𑀣𑀧𑀚𑁆𑀚𑁄𑀢𑀺𑀓𑀁 𑀏𑀭𑀓𑀯𑀢𑁆𑀢𑀺𑀓𑀁 𑀘𑀻𑀭𑀓𑀯𑀸𑀲𑀺𑀓𑀁 𑀏𑀡𑁂𑀬𑁆𑀬𑀓𑀁 𑀩𑀴𑀺𑀲𑀫𑀁𑀲𑀺𑀓𑀁 𑀓𑀳𑀸𑀧𑀡𑀓𑀁 𑀔𑀸𑀭𑀸𑀧𑀢𑀘𑁆𑀙𑀺𑀓𑀁 𑀧𑀮𑀺𑀖𑀧𑀭𑀺𑀯𑀢𑁆𑀢𑀺𑀓𑀁 𑀧𑀮𑀸𑀮𑀧𑀻𑀞𑀓𑀁 𑀢𑀢𑁆𑀢𑁂𑀦 𑀢𑁂𑀮𑁂𑀦 𑀑𑀲𑀺𑀜𑁆𑀘𑀦𑀁 𑀲𑀼𑀦𑀔𑁂𑀳𑀺 𑀔𑀸𑀤𑀸𑀧𑀦𑀁 𑀚𑀻𑀯𑀲𑀽𑀮𑀸𑀭𑁄𑀧𑀦𑀁 𑀅𑀲𑀺𑀦𑀸 𑀲𑀻𑀲𑀘𑁆𑀙𑁂𑀤𑀁 𑀅𑀦𑁂𑀓𑀯𑀺𑀳𑀺𑀢𑀫𑁆𑀧𑀺 𑀓𑀫𑁆𑀫𑀓𑀸𑀭𑀡𑀁 𑀅𑀦𑀼𑀪𑀯𑀢𑀺. 𑀓𑀺𑀁 𑀓𑀸𑀭𑀡𑀸? 𑀅𑀬𑀼𑀢𑁆𑀢𑁄 𑀅𑀧𑁆𑀧𑀢𑁆𑀢𑁄 𑀅𑀦𑀦𑀼𑀘𑁆𑀙𑀯𑀺𑀓𑁄 𑀅𑀦𑀭𑀳𑁄 𑀅𑀧𑁆𑀧𑀢𑀺𑀭𑀽𑀧𑁄 𑀳𑀻𑀦𑁄 𑀓𑀼𑀚𑀸𑀢𑀺𑀓𑁄 𑀫𑀳𑀦𑁆𑀢𑁂 𑀇𑀲𑁆𑀲𑀭𑀺𑀬𑁂 𑀞𑀸𑀦𑁂 𑀅𑀢𑁆𑀢𑀸𑀦𑀁 𑀞𑀧𑁂𑀲𑀺, 𑀯𑁂𑀮𑀁 𑀖𑀸𑀢𑁂𑀲𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄 𑀓𑁄𑀘𑀺 𑀧𑀼𑀕𑁆𑀕𑀮𑁄 𑀧𑀸𑀧𑀺𑀘𑁆𑀙𑁄…𑀧𑁂… 𑀫𑀳𑀺𑀬𑀸 𑀅𑀝𑁆𑀝𑀲𑁆𑀲𑀭𑀁 𑀓𑀭𑁄𑀢𑀺.

‘‘𑀬𑁄 𑀧𑀦, 𑀫𑀳𑀸𑀭𑀸𑀚, 𑀧𑀼𑀕𑁆𑀕𑀮𑁄 𑀬𑀼𑀢𑁆𑀢𑁄 𑀧𑀢𑁆𑀢𑁄 𑀅𑀦𑀼𑀘𑁆𑀙𑀯𑀺𑀓𑁄 𑀅𑀭𑀳𑁄 𑀧𑀢𑀺𑀭𑀽𑀧𑁄 𑀅𑀧𑁆𑀧𑀺𑀘𑁆𑀙𑁄 𑀲𑀦𑁆𑀢𑀼𑀝𑁆𑀞𑁄 𑀧𑀯𑀺𑀯𑀺𑀢𑁆𑀢𑁄 𑀅𑀲𑀁𑀲𑀝𑁆𑀞𑁄 𑀆𑀭𑀤𑁆𑀥𑀯𑀻𑀭𑀺𑀬𑁄 𑀧𑀳𑀺𑀢𑀢𑁆𑀢𑁄 𑀅𑀲𑀞𑁄 𑀅𑀫𑀸𑀬𑁄 𑀅𑀦𑁄𑀤𑀭𑀺𑀓𑁄 𑀅𑀮𑀸𑀪𑀓𑀸𑀫𑁄 𑀅𑀬𑀲𑀓𑀸𑀫𑁄 𑀅𑀓𑀺𑀢𑁆𑀢𑀺𑀓𑀸𑀫𑁄 𑀲𑀤𑁆𑀥𑁄 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑁄 𑀚𑀭𑀸𑀫𑀭𑀡𑀸 𑀫𑀼𑀘𑁆𑀘𑀺𑀢𑀼𑀓𑀸𑀫𑁄 ‘𑀲𑀸𑀲𑀦𑀁 𑀧𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀻’𑀢𑀺 𑀥𑀼𑀢𑀗𑁆𑀕𑀁 𑀲𑀫𑀸𑀤𑀺𑀬𑀢𑀺, 𑀲𑁄 𑀤𑀺𑀕𑀼𑀡𑀁 𑀧𑀽𑀚𑀁 𑀅𑀭𑀳𑀢𑀺 𑀤𑁂𑀯𑀸𑀦𑀜𑁆𑀘 𑀧𑀺𑀬𑁄 𑀳𑁄𑀢𑀺 𑀫𑀦𑀸𑀧𑁄 𑀧𑀺𑀳𑀬𑀺𑀢𑁄 𑀧𑀢𑁆𑀣𑀺𑀢𑁄, 𑀚𑀸𑀢𑀺𑀲𑀼𑀫𑀦𑀫𑀮𑁆𑀮𑀺𑀓𑀸𑀤𑀻𑀦𑀁 𑀯𑀺𑀬 𑀧𑀼𑀧𑁆𑀨𑀁 𑀦𑀳𑀸𑀢𑀸𑀦𑀼𑀮𑀺𑀢𑁆𑀢𑀲𑁆𑀲, 𑀚𑀺𑀖𑀘𑁆𑀙𑀺𑀢𑀲𑁆𑀲 𑀯𑀺𑀬 𑀧𑀡𑀻𑀢𑀪𑁄𑀚𑀦𑀁, 𑀧𑀺𑀧𑀸𑀲𑀺𑀢𑀲𑁆𑀲 𑀯𑀺𑀬 𑀲𑀻𑀢𑀮𑀯𑀺𑀫𑀮𑀲𑀼𑀭𑀪𑀺𑀧𑀸𑀦𑀻𑀬𑀁, 𑀯𑀺𑀲𑀕𑀢𑀲𑁆𑀲 𑀯𑀺𑀬 𑀑𑀲𑀥𑀯𑀭𑀁, 𑀲𑀻𑀖𑀕𑀫𑀦𑀓𑀸𑀫𑀲𑁆𑀲 𑀯𑀺𑀬 𑀆𑀚𑀜𑁆𑀜𑀭𑀣𑀯𑀭𑀼𑀢𑁆𑀢𑀫𑀁, 𑀅𑀢𑁆𑀣𑀓𑀸𑀫𑀲𑁆𑀲 𑀯𑀺𑀬 𑀫𑀦𑁄𑀳𑀭𑀫𑀡𑀺𑀭𑀢𑀦𑀁, 𑀅𑀪𑀺𑀲𑀺𑀜𑁆𑀘𑀺𑀢𑀼𑀓𑀸𑀫𑀲𑁆𑀲 𑀯𑀺𑀬 𑀧𑀡𑁆𑀟𑀭𑀯𑀺𑀫𑀮𑀲𑁂𑀢𑀘𑁆𑀙𑀢𑁆𑀢𑀁, 𑀥𑀫𑁆𑀫𑀓𑀸𑀫𑀲𑁆𑀲 𑀯𑀺𑀬 𑀅𑀭𑀳𑀢𑁆𑀢𑀨𑀮𑀸𑀥𑀺𑀕𑀫𑀫𑀦𑀼𑀢𑁆𑀢𑀭𑀁. 𑀢𑀲𑁆𑀲 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺, 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀧𑀜𑁆𑀘 𑀩𑀮𑀸𑀦𑀺 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀺, 𑀲𑀫𑀣𑀯𑀺𑀧𑀲𑁆𑀲𑀦𑀸 𑀅𑀥𑀺𑀕𑀘𑁆𑀙𑀢𑀺, 𑀅𑀥𑀺𑀕𑀫𑀧𑁆𑀧𑀝𑀺𑀧𑀢𑁆𑀢𑀺 𑀧𑀭𑀺𑀡𑀫𑀢𑀺, 𑀘𑀢𑁆𑀢𑀸𑀭𑀺 𑀲𑀸𑀫𑀜𑁆𑀜𑀨𑀮𑀸𑀦𑀺 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀙𑀴𑀪𑀺𑀜𑁆𑀜𑀸 𑀓𑁂𑀯𑀮𑁄 𑀘 𑀲𑀫𑀡𑀥𑀫𑁆𑀫𑁄 𑀲𑀩𑁆𑀩𑁂 𑀢𑀲𑁆𑀲𑀸𑀥𑁂𑀬𑁆𑀬𑀸 𑀳𑁄𑀦𑁆𑀢𑀺, 𑀯𑀺𑀫𑀼𑀢𑁆𑀢𑀺𑀧𑀡𑁆𑀟𑀭𑀯𑀺𑀫𑀮𑀲𑁂𑀢𑀘𑁆𑀙𑀢𑁆𑀢𑁂𑀦 𑀅𑀪𑀺𑀲𑀺𑀜𑁆𑀘𑀢𑀺.

‘‘𑀬𑀣𑀸, 𑀫𑀳𑀸𑀭𑀸𑀚, 𑀭𑀜𑁆𑀜𑁄 𑀔𑀢𑁆𑀢𑀺𑀬𑀲𑁆𑀲 𑀅𑀪𑀺𑀚𑀸𑀢𑀓𑀼𑀮𑀓𑀼𑀮𑀻𑀦𑀲𑁆𑀲 𑀔𑀢𑁆𑀢𑀺𑀬𑀸𑀪𑀺𑀲𑁂𑀓𑁂𑀦 𑀅𑀪𑀺𑀲𑀺𑀢𑁆𑀢𑀲𑁆𑀲 𑀧𑀭𑀺𑀘𑀭𑀦𑁆𑀢𑀺 𑀲𑀭𑀝𑁆𑀞𑀦𑁂𑀕𑀫𑀚𑀸𑀦𑀧𑀤𑀪𑀝𑀩𑀮𑀸 [𑀩𑀮𑀢𑁆𑀣𑀸 (𑀲𑀻. 𑀧𑀻.)] 𑀅𑀝𑁆𑀞𑀢𑁆𑀢𑀺𑀁𑀲𑀸 𑀘 𑀭𑀸𑀚𑀧𑀭𑀺𑀲𑀸 𑀦𑀝𑀦𑀘𑁆𑀘𑀓𑀸 𑀫𑀼𑀔𑀫𑀗𑁆𑀕𑀮𑀺𑀓𑀸 𑀲𑁄𑀢𑁆𑀣𑀺𑀯𑀸𑀘𑀓𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀲𑀩𑁆𑀩𑀧𑀸𑀲𑀡𑁆𑀟𑀕𑀡𑀸 𑀅𑀪𑀺𑀕𑀘𑁆𑀙𑀦𑁆𑀢𑀺, 𑀬𑀁 𑀓𑀺𑀜𑁆𑀘𑀺 𑀧𑀣𑀯𑀺𑀬𑀸 𑀧𑀝𑁆𑀝𑀦𑀭𑀢𑀦𑀸𑀓𑀭𑀦𑀕𑀭𑀲𑀼𑀗𑁆𑀓𑀝𑁆𑀞𑀸𑀦𑀯𑁂𑀭𑀚𑁆𑀚𑀓𑀙𑁂𑀚𑁆𑀚𑀪𑁂𑀚𑁆𑀚𑀚𑀦𑀫𑀦𑀼𑀲𑀸𑀲𑀦𑀁 𑀲𑀩𑁆𑀩𑀢𑁆𑀣 𑀲𑀸𑀫𑀺𑀓𑁄 𑀪𑀯𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄 𑀓𑁄𑀘𑀺 𑀧𑀼𑀕𑁆𑀕𑀮𑁄 𑀬𑀼𑀢𑁆𑀢𑁄 𑀧𑀢𑁆𑀢𑁄…𑀧𑁂… 𑀯𑀺𑀫𑀼𑀢𑁆𑀢𑀺𑀧𑀡𑁆𑀟𑀭𑀯𑀺𑀫𑀮𑀲𑁂𑀢𑀘𑁆𑀙𑀢𑁆𑀢𑁂𑀦 𑀅𑀪𑀺𑀲𑀺𑀜𑁆𑀘𑀢𑀺.

‘‘𑀢𑁂𑀭𑀲𑀺𑀫𑀸𑀦𑀺, 𑀫𑀳𑀸𑀭𑀸𑀚, 𑀥𑀼𑀢𑀗𑁆𑀕𑀸𑀦𑀺, 𑀬𑁂𑀳𑀺 𑀲𑀼𑀤𑁆𑀥𑀺𑀓𑀢𑁄 𑀦𑀺𑀩𑁆𑀩𑀸𑀦𑀫𑀳𑀸𑀲𑀫𑀼𑀤𑁆𑀤𑀁 𑀧𑀯𑀺𑀲𑀺𑀢𑁆𑀯𑀸 𑀩𑀳𑀼𑀯𑀺𑀥𑀁 𑀥𑀫𑁆𑀫𑀓𑀻𑀴𑀫𑀪𑀺𑀓𑀻𑀴𑀢𑀺, 𑀭𑀽𑀧𑀸𑀭𑀽𑀧𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀬𑁄 𑀯𑀴𑀜𑁆𑀚𑁂𑀢𑀺, 𑀇𑀤𑁆𑀥𑀺𑀯𑀺𑀥𑀁 𑀤𑀺𑀩𑁆𑀩𑀲𑁄𑀢𑀥𑀸𑀢𑀼𑀁 𑀧𑀭𑀘𑀺𑀢𑁆𑀢𑀯𑀺𑀚𑀸𑀦𑀦𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀁 𑀤𑀺𑀩𑁆𑀩𑀘𑀓𑁆𑀔𑀼𑀁 𑀲𑀩𑁆𑀩𑀸𑀲𑀯𑀓𑁆𑀔𑀬𑀜𑁆𑀘 𑀧𑀸𑀧𑀼𑀡𑀸𑀢𑀺. 𑀓𑀢𑀫𑁂 𑀢𑁂𑀭𑀲? 𑀧𑀁𑀲𑀼𑀓𑀽𑀮𑀺𑀓𑀗𑁆𑀕𑀁 𑀢𑁂𑀘𑀻𑀯𑀭𑀺𑀓𑀗𑁆𑀕𑀁 𑀧𑀺𑀡𑁆𑀟𑀧𑀸𑀢𑀺𑀓𑀗𑁆𑀕𑀁 𑀲𑀧𑀤𑀸𑀦𑀘𑀸𑀭𑀺𑀓𑀗𑁆𑀕𑀁 𑀏𑀓𑀸𑀲𑀦𑀺𑀓𑀗𑁆𑀕𑀁 𑀧𑀢𑁆𑀢𑀧𑀺𑀡𑁆𑀟𑀺𑀓𑀗𑁆𑀕𑀁 𑀔𑀮𑀼𑀧𑀘𑁆𑀙𑀸𑀪𑀢𑁆𑀢𑀺𑀓𑀗𑁆𑀕𑀁 𑀆𑀭𑀜𑁆𑀜𑀺𑀓𑀗𑁆𑀕𑀁 𑀭𑀼𑀓𑁆𑀔𑀫𑀽𑀮𑀺𑀓𑀗𑁆𑀕𑀁 𑀅𑀩𑁆𑀪𑁄𑀓𑀸𑀲𑀺𑀓𑀗𑁆𑀕𑀁 𑀲𑁄𑀲𑀸𑀦𑀺𑀓𑀗𑁆𑀕𑀁 𑀬𑀣𑀸𑀲𑀦𑁆𑀣𑀢𑀺𑀓𑀗𑁆𑀕𑀁 𑀦𑁂𑀲𑀚𑁆𑀚𑀺𑀓𑀗𑁆𑀕𑀁, 𑀇𑀫𑁂𑀳𑀺 𑀔𑁄, 𑀫𑀳𑀸𑀭𑀸𑀚, 𑀢𑁂𑀭𑀲𑀳𑀺 𑀥𑀼𑀢𑀕𑀼𑀡𑁂𑀳𑀺 𑀧𑀼𑀩𑁆𑀩𑁂 𑀆𑀲𑁂𑀯𑀺𑀢𑁂𑀳𑀺 𑀦𑀺𑀲𑁂𑀯𑀺𑀢𑁂𑀳𑀺 𑀘𑀺𑀡𑁆𑀡𑁂𑀳𑀺 𑀧𑀭𑀺𑀘𑀺𑀡𑁆𑀡𑁂𑀳𑀺 𑀘𑀭𑀺𑀢𑁂𑀳𑀺 𑀉𑀧𑀘𑀭𑀺𑀢𑁂𑀳𑀺 𑀧𑀭𑀺𑀧𑀽𑀭𑀺𑀢𑁂𑀳𑀺 𑀓𑁂𑀯𑀮𑀁 𑀲𑀸𑀫𑀜𑁆𑀜𑀁 𑀧𑀝𑀺𑀮𑀪𑀢𑀺, 𑀢𑀲𑁆𑀲𑀸𑀥𑁂𑀬𑁆𑀬𑀸 𑀳𑁄𑀦𑁆𑀢𑀺 𑀓𑁂𑀯𑀮𑀸 𑀲𑀦𑁆𑀢𑀸 𑀲𑀼𑀔𑀸 𑀲𑀫𑀸𑀧𑀢𑁆𑀢𑀺𑀬𑁄.

‘‘𑀬𑀣𑀸, 𑀫𑀳𑀸𑀭𑀸𑀚, 𑀲𑀥𑀦𑁄 𑀦𑀸𑀯𑀺𑀓𑁄 𑀧𑀝𑁆𑀝𑀦𑁂 𑀲𑀼𑀝𑁆𑀞𑀼 𑀓𑀢𑀲𑀼𑀗𑁆𑀓𑁄 𑀫𑀳𑀸𑀲𑀫𑀼𑀤𑁆𑀤𑀁 𑀧𑀯𑀺𑀲𑀺𑀢𑁆𑀯𑀸 𑀯𑀗𑁆𑀕𑀁 𑀢𑀓𑁆𑀓𑁄𑀮𑀁 𑀘𑀻𑀦𑀁 𑀲𑁄𑀯𑀻𑀭𑀁 𑀲𑀼𑀭𑀝𑁆𑀞𑀁 𑀅𑀮𑀲𑀦𑁆𑀤𑀁 𑀓𑁄𑀮𑀧𑀝𑁆𑀝𑀦𑀁 𑀲𑀼𑀯𑀡𑁆𑀡𑀪𑀽𑀫𑀺𑀁 𑀕𑀘𑁆𑀙𑀢𑀺 𑀅𑀜𑁆𑀜𑀫𑁆𑀧𑀺 𑀬𑀁 𑀓𑀺𑀜𑁆𑀘𑀺 𑀦𑀸𑀯𑀸𑀲𑀜𑁆𑀘𑀭𑀡𑀁, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀇𑀫𑁂𑀳𑀺 𑀢𑁂𑀭𑀲𑀳𑀺 𑀥𑀼𑀢𑀕𑀼𑀡𑁂𑀳𑀺 𑀧𑀼𑀩𑁆𑀩𑁂 𑀆𑀲𑁂𑀯𑀺𑀢𑁂𑀳𑀺 𑀦𑀺𑀲𑁂𑀯𑀺𑀢𑁂𑀳𑀺 𑀘𑀺𑀡𑁆𑀡𑁂𑀳𑀺 𑀧𑀭𑀺𑀘𑀺𑀡𑁆𑀡𑁂𑀳𑀺 𑀘𑀭𑀺𑀢𑁂𑀳𑀺 𑀉𑀧𑀘𑀭𑀺𑀢𑁂𑀳𑀺 𑀧𑀭𑀺𑀧𑀽𑀭𑀺𑀢𑁂𑀳𑀺 𑀓𑁂𑀯𑀮𑀁 𑀲𑀸𑀫𑀜𑁆𑀜𑀁 𑀧𑀝𑀺𑀮𑀪𑀢𑀺, 𑀢𑀲𑁆𑀲𑀸𑀥𑁂𑀬𑁆𑀬𑀸 𑀳𑁄𑀦𑁆𑀢𑀺 𑀓𑁂𑀯𑀮𑀸 𑀲𑀦𑁆𑀢𑀸 𑀲𑀼𑀔𑀸 𑀲𑀫𑀸𑀧𑀢𑁆𑀢𑀺𑀬𑁄.

‘‘𑀬𑀣𑀸, 𑀫𑀳𑀸𑀭𑀸𑀚, 𑀓𑀲𑁆𑀲𑀓𑁄 𑀧𑀞𑀫𑀁 𑀔𑁂𑀢𑁆𑀢𑀤𑁄𑀲𑀁 𑀢𑀺𑀡𑀓𑀝𑁆𑀞𑀧𑀸𑀲𑀸𑀡𑀁 𑀅𑀧𑀦𑁂𑀢𑁆𑀯𑀸 𑀓𑀲𑀺𑀢𑁆𑀯𑀸 𑀯𑀧𑀺𑀢𑁆𑀯𑀸 𑀲𑀫𑁆𑀫𑀸 𑀉𑀤𑀓𑀁 𑀧𑀯𑁂𑀲𑁂𑀢𑁆𑀯𑀸 𑀭𑀓𑁆𑀔𑀺𑀢𑁆𑀯𑀸 𑀕𑁄𑀧𑁂𑀢𑁆𑀯𑀸 𑀮𑀯𑀦𑀫𑀤𑁆𑀤𑀦𑁂𑀦 𑀩𑀳𑀼𑀥𑀜𑁆𑀜𑀓𑁄 𑀳𑁄𑀢𑀺, 𑀢𑀲𑁆𑀲𑀸𑀥𑁂𑀬𑁆𑀬𑀸 𑀪𑀯𑀦𑁆𑀢𑀺 𑀬𑁂 𑀓𑁂𑀘𑀺 𑀅𑀥𑀦𑀸 𑀓𑀧𑀡𑀸 𑀤𑀮𑀺𑀤𑁆𑀤𑀸 𑀤𑀼𑀕𑁆𑀕𑀢𑀚𑀦𑀸, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀇𑀫𑁂𑀳𑀺 𑀢𑁂𑀭𑀲𑀳𑀺 𑀥𑀼𑀢𑀕𑀼𑀡𑁂𑀳𑀺 𑀧𑀼𑀩𑁆𑀩𑁂 𑀆𑀲𑁂𑀯𑀺𑀢𑁂𑀳𑀺…𑀧𑁂… 𑀓𑁂𑀯𑀮𑀸 𑀲𑀦𑁆𑀢𑀸 𑀲𑀼𑀔𑀸 𑀲𑀫𑀸𑀧𑀢𑁆𑀢𑀺𑀬𑁄.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀔𑀢𑁆𑀢𑀺𑀬𑁄 𑀫𑀼𑀤𑁆𑀥𑀸𑀯𑀲𑀺𑀢𑁆𑀢𑁄 𑀅𑀪𑀺𑀚𑀸𑀢𑀓𑀼𑀮𑀻𑀦𑁄 𑀙𑁂𑀚𑁆𑀚𑀪𑁂𑀚𑁆𑀚𑀚𑀦𑀫𑀦𑀼𑀲𑀸𑀲𑀦𑁂 𑀇𑀲𑁆𑀲𑀭𑁄 𑀳𑁄𑀢𑀺 𑀯𑀲𑀯𑀢𑁆𑀢𑀻 𑀲𑀸𑀫𑀺𑀓𑁄 𑀇𑀘𑁆𑀙𑀸𑀓𑀭𑀡𑁄, 𑀓𑁂𑀯𑀮𑀸 𑀘 𑀫𑀳𑀸𑀧𑀣𑀯𑀻 𑀢𑀲𑁆𑀲𑀸𑀥𑁂𑀬𑁆𑀬𑀸 𑀳𑁄𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀇𑀫𑁂𑀳𑀺 𑀢𑁂𑀭𑀲𑀳𑀺 𑀥𑀼𑀢𑀕𑀼𑀡𑁂𑀳𑀺 𑀧𑀼𑀩𑁆𑀩𑁂 𑀆𑀲𑁂𑀯𑀺𑀢𑁂𑀳𑀺 𑀦𑀺𑀲𑁂𑀯𑀺𑀢𑁂𑀳𑀺 𑀘𑀺𑀡𑁆𑀡𑁂𑀳𑀺 𑀧𑀭𑀺𑀘𑀺𑀡𑁆𑀡𑁂𑀳𑀺 𑀘𑀭𑀺𑀢𑁂𑀳𑀺 𑀉𑀧𑀘𑀭𑀺𑀢𑁂𑀳𑀺 𑀧𑀭𑀺𑀧𑀽𑀭𑀺𑀢𑁂𑀳𑀺 𑀚𑀺𑀦𑀲𑀸𑀲𑀦𑀯𑀭𑁂 𑀇𑀲𑁆𑀲𑀭𑁄 𑀳𑁄𑀢𑀺 𑀯𑀲𑀯𑀢𑁆𑀢𑀻 𑀲𑀸𑀫𑀺𑀓𑁄 𑀇𑀘𑁆𑀙𑀸𑀓𑀭𑀡𑁄, 𑀓𑁂𑀯𑀮𑀸 𑀘 𑀲𑀫𑀡𑀕𑀼𑀡𑀸 𑀢𑀲𑁆𑀲𑀸𑀥𑁂𑀬𑁆𑀬𑀸 𑀳𑁄𑀦𑁆𑀢𑀺.

‘‘𑀦𑀦𑀼, 𑀫𑀳𑀸𑀭𑀸𑀚, 𑀣𑁂𑀭𑁄 𑀉𑀧𑀲𑁂𑀦𑁄 𑀯𑀗𑁆𑀕𑀦𑁆𑀢𑀧𑀼𑀢𑁆𑀢𑁄 𑀲𑀮𑁆𑀮𑁂𑀔𑀥𑀼𑀢𑀕𑀼𑀡𑁂 𑀧𑀭𑀺𑀧𑀽𑀭𑀓𑀸𑀭𑀺𑀢𑀸𑀬 𑀅𑀦𑀸𑀤𑀺𑀬𑀺𑀢𑁆𑀯𑀸 𑀲𑀸𑀯𑀢𑁆𑀣𑀺𑀬𑀸 𑀲𑀗𑁆𑀖𑀲𑁆𑀲 𑀓𑀢𑀺𑀓𑀁 𑀲𑀧𑀭𑀺𑀲𑁄 𑀦𑀭𑀤𑀫𑁆𑀫𑀲𑀸𑀭𑀣𑀺𑀁 𑀧𑀝𑀺𑀲𑀮𑁆𑀮𑀸𑀦𑀕𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑁄 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺, 𑀪𑀕𑀯𑀸 𑀘 𑀢𑀁 𑀲𑀼𑀯𑀺𑀦𑀻𑀢𑀁 𑀧𑀭𑀺𑀲𑀁 𑀑𑀮𑁄𑀓𑁂𑀢𑁆𑀯𑀸 𑀳𑀝𑁆𑀞𑀢𑀼𑀝𑁆𑀞𑁄 𑀧𑀫𑀼𑀤𑀺𑀢𑁄 𑀉𑀤𑀕𑁆𑀕𑁄 𑀧𑀭𑀺𑀲𑀸𑀬 𑀲𑀤𑁆𑀥𑀺𑀁 𑀲𑀮𑁆𑀮𑀸𑀧𑀁 𑀲𑀮𑁆𑀮𑀧𑀺𑀢𑁆𑀯𑀸 𑀅𑀲𑀫𑁆𑀪𑀺𑀦𑁆𑀦𑁂𑀦 𑀩𑁆𑀭𑀳𑁆𑀫𑀲𑁆𑀲𑀭𑁂𑀦 𑀏𑀢𑀤𑀯𑁄𑀘 ‘𑀧𑀸𑀲𑀸𑀤𑀺𑀓𑀸 𑀔𑁄 𑀧𑀦 𑀢𑁆𑀬𑀸𑀬𑀁 𑀉𑀧𑀲𑁂𑀦 𑀧𑀭𑀺𑀲𑀸, 𑀓𑀢𑀁 𑀢𑁆𑀯𑀁 𑀉𑀧𑀲𑁂𑀦 𑀧𑀭𑀺𑀲𑀁 𑀯𑀺𑀦𑁂𑀲𑀻’𑀢𑀺. 𑀲𑁄𑀧𑀺 𑀲𑀩𑁆𑀩𑀜𑁆𑀜𑀼𑀦𑀸 𑀤𑀲𑀩𑀮𑁂𑀦 𑀤𑁂𑀯𑀸𑀢𑀺𑀤𑁂𑀯𑁂𑀦 𑀧𑀼𑀝𑁆𑀞𑁄 𑀬𑀣𑀸𑀪𑀽𑀢𑀲𑀪𑀸𑀯𑀕𑀼𑀡𑀯𑀲𑁂𑀦 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀬𑁄 𑀓𑁄𑀘𑀺 𑀫𑀁, 𑀪𑀦𑁆𑀢𑁂, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀯𑀸 𑀦𑀺𑀲𑁆𑀲𑀬𑀁 𑀯𑀸 𑀬𑀸𑀘𑀢𑀺, 𑀢𑀫𑀳𑀁 𑀏𑀯𑀁 𑀯𑀤𑀸𑀫𑀺 ‘‘𑀅𑀳𑀁 𑀔𑁄 𑀆𑀯𑀼𑀲𑁄 𑀆𑀭𑀜𑁆𑀜𑀺𑀓𑁄 𑀧𑀺𑀡𑁆𑀟𑀧𑀸𑀢𑀺𑀓𑁄 𑀧𑀁𑀲𑀼𑀓𑀽𑀮𑀺𑀓𑁄 𑀢𑁂𑀘𑀻𑀯𑀭𑀺𑀓𑁄. 𑀲𑀘𑁂 𑀢𑁆𑀯𑀫𑁆𑀧𑀺 𑀆𑀭𑀜𑁆𑀜𑀺𑀓𑁄 𑀪𑀯𑀺𑀲𑁆𑀲𑀲𑀺 𑀧𑀺𑀡𑁆𑀟𑀧𑀸𑀢𑀺𑀓𑁄 𑀧𑀁𑀲𑀼𑀓𑀽𑀮𑀺𑀓𑁄 𑀢𑁂𑀘𑀻𑀯𑀭𑀺𑀓𑁄, 𑀏𑀯𑀸𑀳𑀁 𑀢𑀁 𑀧𑀩𑁆𑀩𑀸𑀚𑁂𑀲𑁆𑀲𑀸𑀫𑀺 𑀦𑀺𑀲𑁆𑀲𑀬𑀁 𑀤𑀲𑁆𑀲𑀸𑀫𑀻’’𑀢𑀺, 𑀲𑀘𑁂 𑀲𑁄 𑀫𑁂, 𑀪𑀦𑁆𑀢𑁂, 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀦𑀦𑁆𑀤𑀢𑀺 𑀑𑀭𑀫𑀢𑀺, 𑀏𑀯𑀸𑀳𑀁 𑀢𑀁 𑀧𑀩𑁆𑀩𑀸𑀚𑁂𑀫𑀺 𑀦𑀺𑀲𑁆𑀲𑀬𑀁 𑀤𑁂𑀫𑀺, 𑀲𑀘𑁂 𑀦 𑀦𑀦𑁆𑀤𑀢𑀺 𑀦 𑀑𑀭𑀫𑀢𑀺, 𑀦 𑀢𑀁 𑀧𑀩𑁆𑀩𑀸𑀚𑁂𑀫𑀺, 𑀦 𑀦𑀺𑀲𑁆𑀲𑀬𑀁 𑀤𑁂𑀫𑀺, 𑀏𑀯𑀸𑀳𑀁, 𑀪𑀦𑁆𑀢𑁂, 𑀧𑀭𑀺𑀲𑀁 𑀯𑀺𑀦𑁂𑀫𑀻’’𑀢𑀺. 𑀏𑀯𑀁 𑀔𑁄 [𑀏𑀯𑀫𑁆𑀧𑀺 (𑀓.)], 𑀫𑀳𑀸𑀭𑀸𑀚, 𑀥𑀼𑀢𑀕𑀼𑀡𑀯𑀭𑀲𑀫𑀸𑀤𑀺𑀡𑁆𑀡𑁄 𑀚𑀺𑀦𑀲𑀸𑀲𑀦𑀯𑀭𑁂 𑀇𑀲𑁆𑀲𑀭𑁄 𑀳𑁄𑀢𑀺. 𑀯𑀲𑀯𑀢𑁆𑀢𑀻 𑀲𑀸𑀫𑀺𑀓𑁄 𑀇𑀘𑁆𑀙𑀸𑀓𑀭𑀡𑁄, 𑀢𑀲𑁆𑀲𑀸𑀥𑁂𑀬𑁆𑀬𑀸 𑀳𑁄𑀦𑁆𑀢𑀺 𑀓𑁂𑀯𑀮𑀸 𑀲𑀦𑁆𑀢𑀸 𑀲𑀼𑀔𑀸 𑀲𑀫𑀸𑀧𑀢𑁆𑀢𑀺𑀬𑁄.

‘‘𑀬𑀣𑀸, 𑀫𑀳𑀸𑀭𑀸𑀚, 𑀧𑀤𑀼𑀫𑀁 𑀅𑀪𑀺𑀯𑀼𑀤𑁆𑀥𑀧𑀭𑀺𑀲𑀼𑀤𑁆𑀥𑀉𑀤𑀺𑀘𑁆𑀘𑀚𑀸𑀢𑀺𑀧𑁆𑀧𑀪𑀯𑀁 𑀲𑀺𑀦𑀺𑀤𑁆𑀥𑀁 𑀫𑀼𑀤𑀼 𑀮𑁄𑀪𑀦𑀻𑀬𑀁 𑀲𑀼𑀕𑀦𑁆𑀥𑀁 𑀧𑀺𑀬𑀁 𑀧𑀢𑁆𑀣𑀺𑀢𑀁 𑀧𑀲𑀢𑁆𑀣𑀁 𑀚𑀮𑀓𑀤𑁆𑀤𑀫𑀫𑀦𑀼𑀧𑀮𑀺𑀢𑁆𑀢𑀁 𑀅𑀡𑀼𑀧𑀢𑁆𑀢𑀓𑁂𑀲𑀭𑀓𑀡𑁆𑀡𑀺𑀓𑀸𑀪𑀺𑀫𑀡𑁆𑀟𑀺𑀢𑀁 𑀪𑀫𑀭𑀕𑀡𑀲𑁂𑀯𑀺𑀢𑀁 𑀲𑀻𑀢𑀮𑀲𑀮𑀺𑀮𑀲𑀁𑀯𑀤𑁆𑀥𑀁, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀇𑀫𑁂𑀳𑀺 𑀢𑁂𑀭𑀲𑀳𑀺 𑀥𑀼𑀢𑀕𑀼𑀡𑁂𑀳𑀺 𑀧𑀼𑀩𑁆𑀩𑁂 𑀆𑀲𑁂𑀯𑀺𑀢𑁂𑀳𑀺 𑀦𑀺𑀲𑁂𑀯𑀺𑀢𑁂𑀳𑀺 𑀘𑀺𑀡𑁆𑀡𑁂𑀳𑀺 𑀧𑀭𑀺𑀘𑀺𑀡𑁆𑀡𑁂𑀳𑀺 𑀘𑀭𑀺𑀢𑁂𑀳𑀺 𑀉𑀧𑀘𑀭𑀺𑀢𑁂𑀳𑀺 𑀧𑀭𑀺𑀧𑀽𑀭𑀺𑀢𑁂𑀳𑀺 𑀅𑀭𑀺𑀬𑀲𑀸𑀯𑀓𑁄 𑀢𑀺𑀁𑀲𑀕𑀼𑀡𑀯𑀭𑁂𑀳𑀺 𑀲𑀫𑀼𑀧𑁂𑀢𑁄 𑀳𑁄𑀢𑀺.

‘‘𑀓𑀢𑀫𑁂𑀳𑀺 𑀢𑀺𑀁𑀲𑀕𑀼𑀡𑀯𑀭𑁂𑀳𑀺? 𑀲𑀺𑀦𑀺𑀤𑁆𑀥𑀫𑀼𑀤𑀼𑀫𑀤𑁆𑀤𑀯𑀫𑁂𑀢𑁆𑀢𑀘𑀺𑀢𑁆𑀢𑁄 𑀳𑁄𑀢𑀺, 𑀖𑀸𑀢𑀺𑀢𑀳𑀢𑀯𑀺𑀳𑀢𑀓𑀺𑀮𑁂𑀲𑁄 𑀳𑁄𑀢𑀺, 𑀳𑀢𑀦𑀺𑀳𑀢𑀫𑀸𑀦𑀤𑀩𑁆𑀩𑁄 𑀳𑁄𑀢𑀺, 𑀅𑀘𑀮𑀤𑀴𑁆𑀳𑀦𑀺𑀯𑀺𑀝𑁆𑀞𑀦𑀺𑀩𑁆𑀩𑁂𑀫𑀢𑀺𑀓𑀲𑀤𑁆𑀥𑁄 𑀳𑁄𑀢𑀺, 𑀧𑀭𑀺𑀧𑀼𑀡𑁆𑀡𑀧𑀻𑀡𑀺𑀢𑀧𑀳𑀝𑁆𑀞𑀮𑁄𑀪𑀦𑀻𑀬𑀲𑀦𑁆𑀢𑀲𑀼𑀔𑀲𑀫𑀸𑀧𑀢𑁆𑀢𑀺𑀮𑀸𑀪𑀻 𑀳𑁄𑀢𑀺, 𑀲𑀻𑀮𑀯𑀭𑀧𑀯𑀭𑀅𑀲𑀫𑀲𑀼𑀘𑀺𑀕𑀦𑁆𑀥𑀧𑀭𑀺𑀪𑀸𑀯𑀺𑀢𑁄 𑀳𑁄𑀢𑀺, 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀧𑀺𑀬𑁄 𑀳𑁄𑀢𑀺 𑀫𑀦𑀸𑀧𑁄, 𑀔𑀻𑀡𑀸𑀲𑀯𑀅𑀭𑀺𑀬𑀯𑀭𑀧𑀼𑀕𑁆𑀕𑀮𑀧𑀢𑁆𑀣𑀺𑀢𑁄, 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀯𑀦𑁆𑀤𑀺𑀢𑀧𑀽𑀚𑀺𑀢𑁄, 𑀩𑀼𑀥𑀯𑀺𑀩𑀼𑀥𑀧𑀡𑁆𑀟𑀺𑀢𑀚𑀦𑀸𑀦𑀁 𑀣𑀼𑀢𑀣𑀯𑀺𑀢𑀣𑁄𑀫𑀺𑀢𑀧𑀲𑀢𑁆𑀣𑁄, 𑀇𑀥 𑀯𑀸 𑀳𑀼𑀭𑀁 𑀯𑀸 𑀮𑁄𑀓𑁂𑀦 𑀅𑀦𑀼𑀧𑀮𑀺𑀢𑁆𑀢𑁄, 𑀅𑀧𑁆𑀧𑀣𑁄𑀓𑀯𑀚𑁆𑀚𑁂𑀧𑀺 [𑀅𑀧𑁆𑀧𑀲𑀸𑀯𑀚𑁆𑀚𑁂𑀧𑀺 (𑀓.)] 𑀪𑀬𑀤𑀲𑁆𑀲𑀸𑀯𑀻, 𑀯𑀺𑀧𑀼𑀮𑀯𑀭𑀲𑀫𑁆𑀧𑀢𑁆𑀢𑀺𑀓𑀸𑀫𑀸𑀦𑀁 𑀫𑀕𑁆𑀕𑀨𑀮𑀯𑀭𑀢𑁆𑀣𑀲𑀸𑀥𑀦𑁄, 𑀆𑀬𑀸𑀘𑀺𑀢𑀯𑀺𑀧𑀼𑀮𑀧𑀡𑀻𑀢𑀧𑀘𑁆𑀘𑀬𑀪𑀸𑀕𑀻, 𑀅𑀦𑀺𑀓𑁂𑀢𑀲𑀬𑀦𑁄, 𑀛𑀸𑀦𑀚𑁆𑀛𑁄𑀲𑀺𑀢𑀢𑀧𑁆𑀧𑀯𑀭𑀯𑀺𑀳𑀸𑀭𑀻, 𑀯𑀺𑀚𑀝𑀺𑀢𑀓𑀺𑀮𑁂𑀲𑀚𑀸𑀮𑀯𑀢𑁆𑀣𑀼, 𑀪𑀺𑀦𑁆𑀦𑀪𑀕𑁆𑀕𑀲𑀗𑁆𑀓𑀼𑀝𑀺𑀢𑀲𑀜𑁆𑀙𑀺𑀦𑁆𑀦𑀕𑀢𑀺𑀦𑀻𑀯𑀭𑀡𑁄, 𑀅𑀓𑀼𑀧𑁆𑀧𑀥𑀫𑁆𑀫𑁄, 𑀅𑀪𑀺𑀦𑀻𑀢𑀯𑀸𑀲𑁄, 𑀅𑀦𑀯𑀚𑁆𑀚𑀪𑁄𑀕𑀻, 𑀕𑀢𑀺𑀯𑀺𑀫𑀼𑀢𑁆𑀢𑁄, 𑀉𑀢𑁆𑀢𑀺𑀡𑁆𑀡𑀲𑀩𑁆𑀩𑀯𑀺𑀘𑀺𑀓𑀺𑀘𑁆𑀙𑁄, 𑀯𑀺𑀫𑀼𑀢𑁆𑀢𑀺𑀚𑁆𑀛𑁄𑀲𑀺𑀢𑀢𑁆𑀣𑁄 [𑀯𑀺𑀫𑀼𑀢𑁆𑀢𑀺𑀚𑁆𑀛𑀸𑀲𑀺𑀢𑀢𑁆𑀢𑁄 (𑀲𑀻. 𑀧𑀻.)], 𑀤𑀺𑀝𑁆𑀞𑀥𑀫𑁆𑀫𑁄, 𑀅𑀘𑀮𑀤𑀴𑁆𑀳𑀪𑀻𑀭𑀼𑀢𑁆𑀢𑀸𑀡𑀫𑀼𑀧𑀕𑀢𑁄, 𑀲𑀫𑀼𑀘𑁆𑀙𑀺𑀦𑁆𑀦𑀸𑀦𑀼𑀲𑀬𑁄, 𑀲𑀩𑁆𑀩𑀸𑀲𑀯𑀓𑁆𑀔𑀬𑀁 𑀧𑀢𑁆𑀢𑁄, 𑀲𑀦𑁆𑀢𑀲𑀼𑀔𑀲𑀫𑀸𑀧𑀢𑁆𑀢𑀺𑀯𑀺𑀳𑀸𑀭𑀩𑀳𑀼𑀮𑁄, 𑀲𑀩𑁆𑀩𑀲𑀫𑀡𑀕𑀼𑀡𑀲𑀫𑀼𑀧𑁂𑀢𑁄, 𑀇𑀫𑁂𑀳𑀺 𑀢𑀺𑀁𑀲𑀕𑀼𑀡𑀯𑀭𑁂𑀳𑀺 𑀲𑀫𑀼𑀧𑁂𑀢𑁄 𑀳𑁄𑀢𑀺.

‘‘𑀦𑀦𑀼, 𑀫𑀳𑀸𑀭𑀸𑀚, 𑀣𑁂𑀭𑁄 𑀲𑀸𑀭𑀺𑀧𑀼𑀢𑁆𑀢𑁄 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀬𑀸 𑀅𑀕𑁆𑀕𑀧𑀼𑀭𑀺𑀲𑁄 𑀞𑀧𑁂𑀢𑁆𑀯𑀸 𑀤𑀲𑀩𑀮𑀁 𑀮𑁄𑀓𑀸𑀘𑀭𑀺𑀬𑀁, 𑀲𑁄𑀧𑀺 𑀅𑀧𑀭𑀺𑀫𑀺𑀢𑀫𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑁂 𑀲𑀫𑀸𑀘𑀺𑀢𑀓𑀼𑀲𑀮𑀫𑀽𑀮𑁄 [𑀲𑀫𑀸𑀘𑀺𑀡𑁆𑀡𑀓𑀼𑀲𑀮𑀫𑀽𑀮𑁄 (𑀓.)] 𑀩𑁆𑀭𑀸𑀳𑁆𑀫𑀡𑀓𑀼𑀮𑀓𑀼𑀮𑀻𑀦𑁄 𑀫𑀦𑀸𑀧𑀺𑀓𑀁 𑀓𑀸𑀫𑀭𑀢𑀺𑀁 𑀅𑀦𑁂𑀓𑀲𑀢𑀲𑀗𑁆𑀔𑀁 𑀥𑀦𑀯𑀭𑀜𑁆𑀘 𑀑𑀳𑀸𑀬 𑀚𑀺𑀦𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀇𑀫𑁂𑀳𑀺 𑀢𑁂𑀭𑀲𑀳𑀺 𑀥𑀼𑀢𑀕𑀼𑀡𑁂𑀳𑀺 𑀓𑀸𑀬𑀯𑀘𑀻𑀘𑀺𑀢𑁆𑀢𑀁 𑀤𑀫𑀬𑀺𑀢𑁆𑀯𑀸 𑀅𑀚𑁆𑀚𑁂𑀢𑀭𑀳𑀺 𑀅𑀦𑀦𑁆𑀢𑀕𑀼𑀡𑀲𑀫𑀦𑁆𑀦𑀸𑀕𑀢𑁄 𑀕𑁄𑀢𑀫𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑀯𑀭𑁂 𑀥𑀫𑁆𑀫𑀘𑀓𑁆𑀓𑀫𑀦𑀼𑀧𑁆𑀧𑀯𑀢𑁆𑀢𑀓𑁄 𑀚𑀸𑀢𑁄. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑀤𑁂𑀯𑀸𑀢𑀺𑀤𑁂𑀯𑁂𑀦 𑀏𑀓𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬𑀯𑀭𑀮𑀜𑁆𑀙𑀓𑁂 𑁋

‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀁 𑀏𑀓𑀧𑀼𑀕𑁆𑀕𑀮𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺, 𑀬𑁄 𑀏𑀯𑀁 𑀢𑀣𑀸𑀕𑀢𑁂𑀦 𑀅𑀦𑀼𑀢𑁆𑀢𑀭𑀁 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑀺𑀢𑀁 𑀲𑀫𑁆𑀫𑀤𑁂𑀯 𑀅𑀦𑀼𑀧𑁆𑀧𑀯𑀢𑁆𑀢𑁂𑀢𑀺, 𑀬𑀣𑀬𑀺𑀤𑀁 𑀪𑀺𑀓𑁆𑀔𑀯𑁂, 𑀲𑀸𑀭𑀺𑀧𑀼𑀢𑁆𑀢𑁄, 𑀲𑀸𑀭𑀺𑀧𑀼𑀢𑁆𑀢𑁄. 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁂𑀦 𑀅𑀦𑀼𑀢𑁆𑀢𑀭𑀁 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑀺𑀢𑀁 𑀲𑀫𑁆𑀫𑀤𑁂𑀯 𑀅𑀦𑀼𑀧𑁆𑀧𑀯𑀢𑁆𑀢𑁂𑀢𑀻’’’𑀢𑀺.

‘‘𑀲𑀸𑀥𑀼, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀬𑀁 𑀓𑀺𑀜𑁆𑀘𑀺 𑀦𑀯𑀗𑁆𑀕𑀁 𑀩𑀼𑀤𑁆𑀥𑀯𑀘𑀦𑀁, 𑀬𑀸 𑀘 𑀮𑁄𑀓𑀼𑀢𑁆𑀢𑀭𑀸 𑀓𑀺𑀭𑀺𑀬𑀸, 𑀬𑀸 𑀘 𑀮𑁄𑀓𑁂 𑀅𑀥𑀺𑀕𑀫𑀯𑀺𑀧𑀼𑀮𑀯𑀭𑀲𑀫𑁆𑀧𑀢𑁆𑀢𑀺𑀬𑁄, 𑀲𑀩𑁆𑀩𑀁 𑀢𑀁 𑀢𑁂𑀭𑀲𑀲𑀼 𑀥𑀼𑀢𑀕𑀼𑀡𑁂𑀲𑀼 𑀲𑀫𑁄𑀥𑀸𑀦𑁄𑀧𑀕𑀢’’ [𑀲𑀫𑁄𑀥𑀸𑀦𑁂𑀢𑀩𑁆𑀩𑀁 (𑀓.)] 𑀦𑁆𑀢𑀺.

𑀥𑀼𑀢𑀗𑁆𑀕𑀧𑀜𑁆𑀳𑁄 𑀤𑀼𑀢𑀺𑀬𑁄.

𑀅𑀦𑀼𑀫𑀸𑀦𑀯𑀕𑁆𑀕𑁄 𑀘𑀢𑀼𑀢𑁆𑀣𑁄.