𑁫. 𑀲𑀦𑁆𑀣𑀯𑀯𑀕𑁆𑀕𑁄

𑁧. 𑀲𑀦𑁆𑀣𑀯𑀧𑀜𑁆𑀳𑁄

𑁧. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀪𑀸𑀲𑀺𑀢𑀫𑁆𑀧𑁂𑀢𑀁 𑀪𑀕𑀯𑀢𑀸 𑁋

‘‘‘𑀲𑀦𑁆𑀣𑀯𑀢𑁄 𑀪𑀬𑀁 𑀚𑀸𑀢𑀁, 𑀦𑀺𑀓𑁂𑀢𑀸 𑀚𑀸𑀬𑀢𑁂 𑀭𑀚𑁄;

𑀅𑀦𑀺𑀓𑁂𑀢𑀫𑀲𑀦𑁆𑀣𑀯𑀁, 𑀏𑀢𑀁 𑀯𑁂 𑀫𑀼𑀦𑀺𑀤𑀲𑁆𑀲𑀦’𑀦𑁆𑀢𑀺.

‘‘𑀧𑀼𑀦 𑀘 𑀪𑀕𑀯𑀢𑀸 𑀪𑀡𑀺𑀢𑀁 ‘𑀯𑀺𑀳𑀸𑀭𑁂 𑀓𑀸𑀭𑀬𑁂 𑀭𑀫𑁆𑀫𑁂, 𑀯𑀸𑀲𑀬𑁂𑀢𑁆𑀣 𑀩𑀳𑀼𑀲𑁆𑀲𑀼𑀢𑁂’𑀢𑀺. 𑀬𑀤𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀢𑀣𑀸𑀕𑀢𑁂𑀦 𑀪𑀡𑀺𑀢𑀁 ‘𑀲𑀦𑁆𑀣𑀯𑀢𑁄 𑀪𑀬𑀁 𑀚𑀸𑀢𑀁, 𑀦𑀺𑀓𑁂𑀢𑀸 𑀚𑀸𑀬𑀢𑁂 𑀭𑀚𑁄. 𑀅𑀦𑀺𑀓𑁂𑀢𑀫𑀲𑀦𑁆𑀣𑀯𑀁, 𑀏𑀢𑀁 𑀯𑁂 𑀫𑀼𑀦𑀺𑀤𑀲𑁆𑀲𑀦’𑀦𑁆𑀢𑀺, 𑀢𑁂𑀦 𑀳𑀺 ‘𑀯𑀺𑀳𑀸𑀭𑁂 𑀓𑀸𑀭𑀬𑁂 𑀭𑀫𑁆𑀫𑁂, 𑀯𑀸𑀲𑀬𑁂𑀢𑁆𑀣 𑀩𑀳𑀼𑀲𑁆𑀲𑀼𑀢𑁂’𑀢𑀺 𑀬𑀁 𑀯𑀘𑀦𑀁, 𑀢𑀁 𑀫𑀺𑀘𑁆𑀙𑀸. 𑀬𑀤𑀺 𑀢𑀣𑀸𑀕𑀢𑁂𑀦 𑀪𑀡𑀺𑀢𑀁 ‘𑀯𑀺𑀳𑀸𑀭𑁂 𑀓𑀸𑀭𑀬𑁂 𑀭𑀫𑁆𑀫𑁂, 𑀯𑀸𑀲𑀬𑁂𑀢𑁆𑀣 𑀩𑀳𑀼𑀲𑁆𑀲𑀼𑀢𑁂’𑀢𑀺, 𑀢𑁂𑀦 𑀳𑀺 ‘𑀲𑀦𑁆𑀣𑀯𑀢𑁄 𑀪𑀬𑀁 𑀚𑀸𑀢𑀁, 𑀦𑀺𑀓𑁂𑀢𑀸 𑀚𑀸𑀬𑀢𑁂 𑀭𑀚𑁄. 𑀅𑀦𑀺𑀓𑁂𑀢𑀫𑀲𑀦𑁆𑀣𑀯𑀁, 𑀏𑀢𑀁 𑀯𑁂 𑀫𑀼𑀦𑀺𑀤𑀲𑁆𑀲𑀦’𑀦𑁆𑀢𑀺 𑀢𑀫𑁆𑀧𑀺 𑀯𑀘𑀦𑀁 𑀫𑀺𑀘𑁆𑀙𑀸. 𑀅𑀬𑀫𑁆𑀧𑀺 𑀉𑀪𑀢𑁄 𑀓𑁄𑀝𑀺𑀓𑁄 𑀧𑀜𑁆𑀳𑁄 𑀢𑀯𑀸𑀦𑀼𑀧𑁆𑀧𑀢𑁆𑀢𑁄, 𑀲𑁄 𑀢𑀬𑀸 𑀦𑀺𑀩𑁆𑀩𑀸𑀳𑀺𑀢𑀩𑁆𑀩𑁄’’𑀢𑀺.

‘‘𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 ‘𑀲𑀦𑁆𑀣𑀯𑀢𑁄 𑀪𑀬𑀁 𑀚𑀸𑀢𑀁, 𑀦𑀺𑀓𑁂𑀢𑀸 𑀚𑀸𑀬𑀢𑁂 𑀭𑀚𑁄. 𑀅𑀦𑀺𑀓𑁂𑀢𑀫𑀲𑀦𑁆𑀣𑀯𑀁, 𑀏𑀢𑀁 𑀯𑁂 𑀫𑀼𑀦𑀺𑀤𑀲𑁆𑀲𑀦’𑀦𑁆𑀢𑀺. 𑀪𑀡𑀺𑀢𑀜𑁆𑀘 ‘𑀯𑀺𑀳𑀸𑀭𑁂 𑀓𑀸𑀭𑀬𑁂 𑀭𑀫𑁆𑀫𑁂, 𑀯𑀸𑀲𑀬𑁂𑀢𑁆𑀣 𑀩𑀳𑀼𑀲𑁆𑀲𑀼𑀢𑁂’𑀢𑀺. 𑀬𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑀪𑀡𑀺𑀢𑀁 ‘𑀲𑀦𑁆𑀣𑀯𑀢𑁄 𑀪𑀬𑀁 𑀚𑀸𑀢𑀁, 𑀦𑀺𑀓𑁂𑀢𑀸 𑀚𑀸𑀬𑀢𑁂 𑀭𑀚𑁄. 𑀅𑀦𑀺𑀓𑁂𑀢𑀫𑀲𑀦𑁆𑀣𑀯𑀁, 𑀏𑀢𑀁 𑀯𑁂 𑀫𑀼𑀦𑀺𑀤𑀲𑁆𑀲𑀦’𑀦𑁆𑀢𑀺, 𑀢𑀁 𑀲𑀪𑀸𑀯𑀯𑀘𑀦𑀁 𑀅𑀲𑁂𑀲𑀯𑀘𑀦𑀁 𑀦𑀺𑀲𑁆𑀲𑁂𑀲𑀯𑀘𑀦𑀁 𑀦𑀺𑀧𑁆𑀧𑀭𑀺𑀬𑀸𑀬𑀯𑀘𑀦𑀁 𑀲𑀫𑀡𑀸𑀦𑀼𑀘𑁆𑀙𑀯𑀁 𑀲𑀫𑀡𑀲𑀸𑀭𑀼𑀧𑁆𑀧𑀁 𑀲𑀫𑀡𑀧𑁆𑀧𑀢𑀺𑀭𑀽𑀧𑀁 𑀲𑀫𑀡𑀸𑀭𑀳𑀁 𑀲𑀫𑀡𑀕𑁄𑀘𑀭𑀁 𑀲𑀫𑀡𑀧𑁆𑀧𑀝𑀺𑀧𑀤𑀸 𑀲𑀫𑀡𑀧𑁆𑀧𑀝𑀺𑀧𑀢𑁆𑀢𑀺. 𑀬𑀣𑀸, 𑀫𑀳𑀸𑀭𑀸𑀚, 𑀆𑀭𑀜𑁆𑀜𑀓𑁄 𑀫𑀺𑀕𑁄 𑀅𑀭𑀜𑁆𑀜𑁂 𑀧𑀯𑀦𑁂 𑀘𑀭𑀫𑀸𑀦𑁄 𑀦𑀺𑀭𑀸𑀮𑀬𑁄 𑀅𑀦𑀺𑀓𑁂𑀢𑁄 𑀬𑀣𑀺𑀘𑁆𑀙𑀓𑀁 𑀲𑀬𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀪𑀺𑀓𑁆𑀔𑀼𑀦𑀸 ‘𑀲𑀦𑁆𑀣𑀯𑀢𑁄 𑀪𑀬𑀁 𑀚𑀸𑀢𑀁, 𑀦𑀺𑀓𑁂𑀢𑀸 𑀚𑀸𑀬𑀢𑁂 𑀭𑀚𑁄. 𑀅𑀦𑀺𑀓𑁂𑀢𑀫𑀲𑀦𑁆𑀣𑀯𑀁, 𑀏𑀢𑀁 𑀯𑁂 𑀫𑀼𑀦𑀺𑀤𑀲𑁆𑀲𑀦’𑀦𑁆𑀢𑀺 𑀘𑀺𑀦𑁆𑀢𑁂𑀢𑀩𑁆𑀩𑀁.

‘‘𑀬𑀁 𑀧𑀦, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑀪𑀡𑀺𑀢𑀁 ‘𑀯𑀺𑀳𑀸𑀭𑁂 𑀓𑀸𑀭𑀬𑁂 𑀭𑀫𑁆𑀫𑁂, 𑀯𑀸𑀲𑀬𑁂𑀢𑁆𑀣 𑀩𑀳𑀼𑀲𑁆𑀲𑀼𑀢𑁂’𑀢𑀺, 𑀢𑀁 𑀤𑁆𑀯𑁂 𑀅𑀢𑁆𑀣𑀯𑀲𑁂 𑀲𑀫𑁆𑀧𑀲𑁆𑀲𑀫𑀸𑀦𑁂𑀦 𑀪𑀕𑀯𑀢𑀸 𑀪𑀡𑀺𑀢𑀁. 𑀓𑀢𑀫𑁂 𑀤𑁆𑀯𑁂? 𑀯𑀺𑀳𑀸𑀭𑀤𑀸𑀦𑀁 𑀦𑀸𑀫 𑀲𑀩𑁆𑀩𑀩𑀼𑀤𑁆𑀥𑁂𑀳𑀺 𑀯𑀡𑁆𑀡𑀺𑀢𑀁 𑀅𑀦𑀼𑀫𑀢𑀁 𑀣𑁄𑀫𑀺𑀢𑀁 𑀧𑀲𑀢𑁆𑀣𑀁, 𑀢𑀁 𑀢𑁂 𑀯𑀺𑀳𑀸𑀭𑀤𑀸𑀦𑀁 𑀤𑀢𑁆𑀯𑀸 𑀚𑀸𑀢𑀺𑀚𑀭𑀸𑀫𑀭𑀡𑀸 𑀧𑀭𑀺𑀫𑀼𑀘𑁆𑀘𑀺𑀲𑁆𑀲𑀦𑁆𑀢𑀻𑀢𑀺. 𑀅𑀬𑀁 𑀢𑀸𑀯 𑀧𑀞𑀫𑁄 𑀆𑀦𑀺𑀲𑀁𑀲𑁄 𑀯𑀺𑀳𑀸𑀭𑀤𑀸𑀦𑁂.

‘‘𑀧𑀼𑀦 𑀘𑀧𑀭𑀁 𑀯𑀺𑀳𑀸𑀭𑁂 𑀯𑀺𑀚𑁆𑀚𑀫𑀸𑀦𑁂 𑀪𑀺𑀓𑁆𑀔𑀼𑀦𑀺𑀬𑁄 𑀩𑁆𑀬𑀢𑁆𑀢𑀲𑀗𑁆𑀓𑁂𑀢𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀲𑀼𑀮𑀪𑀁 𑀤𑀲𑁆𑀲𑀦𑀁 𑀤𑀲𑁆𑀲𑀦𑀓𑀸𑀫𑀸𑀦𑀁, 𑀅𑀦𑀺𑀓𑁂𑀢𑁂 𑀤𑀼𑀤𑁆𑀤𑀲𑁆𑀲𑀦𑀸 𑀪𑀯𑀺𑀲𑁆𑀲𑀦𑁆𑀢𑀻𑀢𑀺. 𑀅𑀬𑀁 𑀤𑀼𑀢𑀺𑀬𑁄 𑀆𑀦𑀺𑀲𑀁𑀲𑁄 𑀯𑀺𑀳𑀸𑀭𑀤𑀸𑀦𑁂. 𑀇𑀫𑁂 𑀤𑁆𑀯𑁂 𑀅𑀢𑁆𑀣𑀯𑀲𑁂 𑀲𑀫𑁆𑀧𑀲𑁆𑀲𑀫𑀸𑀦𑁂𑀦 𑀪𑀕𑀯𑀢𑀸 𑀪𑀡𑀺𑀢𑀁 ‘𑀯𑀺𑀳𑀸𑀭𑁂 𑀓𑀸𑀭𑀬𑁂 𑀭𑀫𑁆𑀫𑁂, 𑀯𑀸𑀲𑀬𑁂𑀢𑁆𑀣 𑀩𑀳𑀼𑀲𑁆𑀲𑀼𑀢𑁂’𑀢𑀺, 𑀦 𑀢𑀢𑁆𑀣 𑀩𑀼𑀤𑁆𑀥𑀧𑀼𑀢𑁆𑀢𑁂𑀦 𑀆𑀮𑀬𑁄 𑀓𑀭𑀡𑀻𑀬𑁄 𑀦𑀺𑀓𑁂𑀢𑁂’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀏𑀯𑀫𑁂𑀢𑀁 𑀢𑀣𑀸 𑀲𑀫𑁆𑀧𑀝𑀺𑀘𑁆𑀙𑀸𑀫𑀻’’𑀢𑀺.

𑀲𑀦𑁆𑀣𑀯𑀧𑀜𑁆𑀳𑁄 𑀧𑀞𑀫𑁄.

𑁨. 𑀉𑀤𑀭𑀲𑀁𑀬𑀢𑀧𑀜𑁆𑀳𑁄

𑁨. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀪𑀸𑀲𑀺𑀢𑀫𑁆𑀧𑁂𑀢𑀁 𑀪𑀕𑀯𑀢𑀸 𑁋

‘‘‘𑀉𑀢𑁆𑀢𑀺𑀝𑁆𑀞𑁂 𑀦𑀧𑁆𑀧𑀫𑀚𑁆𑀚𑁂𑀬𑁆𑀬, 𑀉𑀤𑀭𑁂 𑀲𑀁𑀬𑀢𑁄 𑀲𑀺𑀬𑀸’𑀢𑀺.

‘‘𑀧𑀼𑀦 𑀘 𑀪𑀕𑀯𑀢𑀸 𑀪𑀡𑀺𑀢𑀁 ‘𑀅𑀳𑀁 𑀔𑁄 𑀧𑀦𑀼𑀤𑀸𑀬𑀺, 𑀅𑀧𑁆𑀧𑁂𑀓𑀤𑀸 𑀇𑀫𑀺𑀦𑀸 𑀧𑀢𑁆𑀢𑁂𑀦 𑀲𑀫𑀢𑀺𑀢𑁆𑀢𑀺𑀓𑀫𑁆𑀧𑀺 𑀪𑀼𑀜𑁆𑀚𑀸𑀫𑀺, 𑀪𑀺𑀬𑁆𑀬𑁄𑀧𑀺 𑀪𑀼𑀜𑁆𑀚𑀸𑀫𑀻’𑀢𑀺. 𑀬𑀤𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀪𑀕𑀯𑀢𑀸 𑀪𑀡𑀺𑀢𑀁 ‘𑀉𑀢𑁆𑀢𑀺𑀝𑁆𑀞𑁂 𑀦𑀧𑁆𑀧𑀫𑀚𑁆𑀚𑁂𑀬𑁆𑀬, 𑀉𑀤𑀭𑁂 𑀲𑀁𑀬𑀢𑁄 𑀲𑀺𑀬𑀸’𑀢𑀺, 𑀢𑁂𑀦 𑀳𑀺 ‘𑀅𑀳𑀁 𑀔𑁄 𑀧𑀦𑀼𑀤𑀸𑀬𑀺, 𑀅𑀧𑁆𑀧𑁂𑀓𑀤𑀸 𑀇𑀫𑀺𑀦𑀸 𑀧𑀢𑁆𑀢𑁂𑀦 𑀲𑀫𑀢𑀺𑀢𑁆𑀣𑀺𑀓𑀫𑁆𑀧𑀺 𑀪𑀼𑀜𑁆𑀚𑀸𑀫𑀺, 𑀪𑀺𑀬𑁆𑀬𑁄𑀧𑀺 𑀪𑀼𑀜𑁆𑀚𑀸𑀫𑀻’𑀢𑀺 𑀬𑀁 𑀯𑀘𑀦𑀁, 𑀢𑀁 𑀫𑀺𑀘𑁆𑀙𑀸. 𑀬𑀤𑀺 𑀢𑀣𑀸𑀕𑀢𑁂𑀦 𑀪𑀡𑀺𑀢𑀁 ‘𑀅𑀳𑀁 𑀔𑁄 𑀧𑀦𑀼𑀤𑀸𑀬𑀺, 𑀅𑀧𑁆𑀧𑁂𑀓𑀤𑀸 𑀇𑀫𑀺𑀦𑀸 𑀧𑀢𑁆𑀢𑁂𑀦 𑀲𑀫𑀢𑀺𑀢𑁆𑀣𑀺𑀓𑀫𑁆𑀧𑀺 𑀪𑀼𑀜𑁆𑀚𑀸𑀫𑀺, 𑀪𑀺𑀬𑁆𑀬𑁄𑀧𑀺 𑀪𑀼𑀜𑁆𑀚𑀸𑀫𑀻’𑀢𑀺, 𑀢𑁂𑀦 𑀳𑀺 ‘𑀉𑀢𑁆𑀢𑀺𑀝𑁆𑀞𑁂 𑀦𑀧𑁆𑀧𑀫𑀚𑁆𑀚𑁂𑀬𑁆𑀬, 𑀉𑀤𑀭𑁂 𑀲𑀁𑀬𑀢𑁄 𑀲𑀺𑀬𑀸’𑀢𑀺 𑀢𑀫𑁆𑀧𑀺 𑀯𑀘𑀦𑀁 𑀫𑀺𑀘𑁆𑀙𑀸. 𑀅𑀬𑀫𑁆𑀧𑀺 𑀉𑀪𑀢𑁄 𑀓𑁄𑀝𑀺𑀓𑁄 𑀧𑀜𑁆𑀳𑁄 𑀢𑀯𑀸𑀦𑀼𑀧𑁆𑀧𑀢𑁆𑀢𑁄, 𑀲𑁄 𑀢𑀬𑀸 𑀦𑀺𑀩𑁆𑀩𑀸𑀳𑀺𑀢𑀩𑁆𑀩𑁄’’𑀢𑀺.

‘‘𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 ‘𑀉𑀢𑁆𑀢𑀺𑀝𑁆𑀞𑁂 𑀦𑀧𑁆𑀧𑀫𑀚𑁆𑀚𑁂𑀬𑁆𑀬, 𑀉𑀤𑀭𑁂 𑀲𑀁𑀬𑀢𑁄 𑀲𑀺𑀬𑀸’𑀢𑀺, 𑀪𑀡𑀺𑀢𑀜𑁆𑀘 ‘𑀅𑀳𑀁 𑀔𑁄 𑀧𑀦𑀼𑀤𑀸𑀬𑀺, 𑀅𑀧𑁆𑀧𑁂𑀓𑀤𑀸 𑀇𑀫𑀺𑀦𑀸 𑀧𑀢𑁆𑀢𑁂𑀦 𑀲𑀫𑀢𑀺𑀢𑁆𑀢𑀺𑀓𑀫𑁆𑀧𑀺 𑀪𑀼𑀜𑁆𑀚𑀸𑀫𑀺, 𑀪𑀺𑀬𑁆𑀬𑁄𑀧𑀺 𑀪𑀼𑀜𑁆𑀚𑀸𑀫𑀻’𑀢𑀺. 𑀬𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑀪𑀡𑀺𑀢𑀁 ‘𑀉𑀢𑁆𑀢𑀺𑀝𑁆𑀞𑁂 𑀦𑀧𑁆𑀧𑀫𑀚𑁆𑀚𑁂𑀬𑁆𑀬, 𑀉𑀤𑀭𑁂 𑀲𑀁𑀬𑀢𑁄 𑀲𑀺𑀬𑀸’𑀢𑀺, 𑀢𑀁 𑀲𑀪𑀸𑀯𑀯𑀘𑀦𑀁 𑀅𑀲𑁂𑀲𑀯𑀘𑀦𑀁 𑀦𑀺𑀲𑁆𑀲𑁂𑀲𑀯𑀘𑀦𑀁 𑀦𑀺𑀧𑁆𑀧𑀭𑀺𑀬𑀸𑀬𑀯𑀘𑀦𑀁 𑀪𑀽𑀢𑀯𑀘𑀦𑀁 𑀢𑀘𑁆𑀙𑀯𑀘𑀦𑀁 𑀬𑀸𑀣𑀸𑀯𑀯𑀘𑀦𑀁 𑀅𑀯𑀺𑀧𑀭𑀻𑀢𑀯𑀘𑀦𑀁 𑀇𑀲𑀺𑀯𑀘𑀦𑀁 𑀫𑀼𑀦𑀺𑀯𑀘𑀦𑀁 𑀪𑀕𑀯𑀦𑁆𑀢𑀯𑀘𑀦𑀁 𑀅𑀭𑀳𑀦𑁆𑀢𑀯𑀘𑀦𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀯𑀘𑀦𑀁 𑀚𑀺𑀦𑀯𑀘𑀦𑀁 𑀲𑀩𑁆𑀩𑀜𑁆𑀜𑀼𑀯𑀘𑀦𑀁 𑀢𑀣𑀸𑀕𑀢𑀲𑁆𑀲 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀯𑀘𑀦𑀁.

‘‘𑀉𑀤𑀭𑁂 𑀅𑀲𑀁𑀬𑀢𑁄, 𑀫𑀳𑀸𑀭𑀸𑀚, 𑀧𑀸𑀡𑀫𑁆𑀧𑀺 𑀳𑀦𑀢𑀺, 𑀅𑀤𑀺𑀦𑁆𑀦𑀫𑁆𑀧𑀺 𑀆𑀤𑀺𑀬𑀢𑀺, 𑀧𑀭𑀤𑀸𑀭𑀫𑁆𑀧𑀺 𑀕𑀘𑁆𑀙𑀢𑀺, 𑀫𑀼𑀲𑀸𑀧𑀺 𑀪𑀡𑀢𑀺, 𑀫𑀚𑁆𑀚𑀫𑁆𑀧𑀺 𑀧𑀺𑀯𑀢𑀺, 𑀫𑀸𑀢𑀭𑀫𑁆𑀧𑀺 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀺, 𑀧𑀺𑀢𑀭𑀫𑁆𑀧𑀺 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀺, 𑀅𑀭𑀳𑀦𑁆𑀢𑀫𑁆𑀧𑀺 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀺, 𑀲𑀗𑁆𑀖𑀫𑁆𑀧𑀺 𑀪𑀺𑀦𑁆𑀤𑀢𑀺, 𑀤𑀼𑀝𑁆𑀞𑁂𑀦 𑀘𑀺𑀢𑁆𑀢𑁂𑀦 𑀢𑀣𑀸𑀕𑀢𑀲𑁆𑀲 𑀮𑁄𑀳𑀺𑀢𑀫𑁆𑀧𑀺 𑀉𑀧𑁆𑀧𑀸𑀤𑁂𑀢𑀺. 𑀦𑀦𑀼, 𑀫𑀳𑀸𑀭𑀸𑀚, 𑀤𑁂𑀯𑀤𑀢𑁆𑀢𑁄 𑀉𑀤𑀭𑁂 𑀅𑀲𑀁𑀬𑀢𑁄 𑀲𑀗𑁆𑀖𑀁 𑀪𑀺𑀦𑁆𑀤𑀺𑀢𑁆𑀯𑀸 𑀓𑀧𑁆𑀧𑀝𑁆𑀞𑀺𑀬𑀁 𑀓𑀫𑁆𑀫𑀁 𑀆𑀬𑀽𑀳𑀺 [𑀆𑀬𑀽𑀳𑀢𑀺 (𑀓.)]. 𑀏𑀯𑀭𑀽𑀧𑀸𑀦𑀺, 𑀫𑀳𑀸𑀭𑀸𑀚, 𑀅𑀜𑁆𑀜𑀸𑀦𑀺𑀧𑀺 𑀩𑀳𑀼𑀯𑀺𑀥𑀸𑀦𑀺 𑀓𑀸𑀭𑀡𑀸𑀦𑀺 𑀤𑀺𑀲𑁆𑀯𑀸 𑀪𑀕𑀯𑀢𑀸 𑀪𑀡𑀺𑀢𑀁 ‘𑀉𑀢𑁆𑀢𑀺𑀝𑁆𑀞𑁂 𑀦𑀧𑁆𑀧𑀫𑀚𑁆𑀚𑁂𑀬𑁆𑀬, 𑀉𑀤𑀭𑁂 𑀲𑀁𑀬𑀢𑁄 𑀲𑀺𑀬𑀸’𑀢𑀺.

‘‘𑀉𑀤𑀭𑁂 𑀲𑀁𑀬𑀢𑁄, 𑀫𑀳𑀸𑀭𑀸𑀚, 𑀘𑀢𑀼𑀲𑀘𑁆𑀘𑀸𑀪𑀺𑀲𑀫𑀬𑀁 𑀅𑀪𑀺𑀲𑀫𑁂𑀢𑀺, 𑀘𑀢𑁆𑀢𑀸𑀭𑀺 𑀲𑀸𑀫𑀜𑁆𑀜𑀨𑀮𑀸𑀦𑀺 𑀲𑀘𑁆𑀙𑀺𑀓𑀭𑁄𑀢𑀺, 𑀘𑀢𑀽𑀲𑀼 𑀧𑀝𑀺𑀲𑀫𑁆𑀪𑀺𑀤𑀸𑀲𑀼 𑀅𑀝𑁆𑀞𑀲𑀼 𑀲𑀫𑀸𑀧𑀢𑁆𑀢𑀻𑀲𑀼 𑀙𑀲𑀼 𑀅𑀪𑀺𑀜𑁆𑀜𑀸𑀲𑀼 𑀯𑀲𑀻𑀪𑀸𑀯𑀁 𑀧𑀸𑀧𑀼𑀡𑀸𑀢𑀺, 𑀓𑁂𑀯𑀮𑀜𑁆𑀘 𑀲𑀫𑀡𑀥𑀫𑁆𑀫𑀁 𑀧𑀽𑀭𑁂𑀢𑀺. 𑀦𑀦𑀼, 𑀫𑀳𑀸𑀭𑀸𑀚, 𑀲𑀼𑀓𑀧𑁄𑀢𑀓𑁄 𑀉𑀤𑀭𑁂 𑀲𑀁𑀬𑀢𑁄 𑀳𑀼𑀢𑁆𑀯𑀸 𑀬𑀸𑀯 𑀢𑀸𑀯𑀢𑀺𑀁𑀲𑀪𑀯𑀦𑀁 𑀓𑀫𑁆𑀧𑁂𑀢𑁆𑀯𑀸 𑀲𑀓𑁆𑀓𑀁 𑀤𑁂𑀯𑀸𑀦𑀫𑀺𑀦𑁆𑀤𑀁 𑀉𑀧𑀝𑁆𑀞𑀸𑀦𑀫𑀼𑀧𑀦𑁂𑀲𑀺, 𑀏𑀯𑀭𑀽𑀧𑀸𑀦𑀺, 𑀫𑀳𑀸𑀭𑀸𑀚, 𑀅𑀜𑁆𑀜𑀸𑀦𑀺𑀧𑀺 𑀩𑀳𑀼𑀯𑀺𑀥𑀸𑀦𑀺 𑀓𑀸𑀭𑀡𑀸𑀦𑀺 𑀤𑀺𑀲𑁆𑀯𑀸 𑀪𑀕𑀯𑀢𑀸 𑀪𑀡𑀺𑀢𑀁 ‘𑀉𑀢𑁆𑀢𑀺𑀝𑁆𑀞𑁂 𑀦𑀧𑁆𑀧𑀫𑀚𑁆𑀚𑁂𑀬𑁆𑀬, 𑀉𑀤𑀭𑁂 𑀲𑀁𑀬𑀢𑁄 𑀲𑀺𑀬𑀸’𑀢𑀺.

‘‘𑀬𑀁 𑀧𑀦, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑀪𑀡𑀺𑀢𑀁 ‘𑀅𑀳𑀁 𑀔𑁄 𑀧𑀦𑀼𑀤𑀸𑀬𑀺 𑀅𑀧𑁆𑀧𑁂𑀓𑀤𑀸 𑀇𑀫𑀺𑀦𑀸 𑀧𑀢𑁆𑀢𑁂𑀦 𑀲𑀫𑀢𑀺𑀢𑁆𑀢𑀺𑀓𑀫𑁆𑀧𑀺 𑀪𑀼𑀜𑁆𑀚𑀸𑀫𑀺, 𑀪𑀺𑀬𑁆𑀬𑁄𑀧𑀺 𑀪𑀼𑀜𑁆𑀚𑀸𑀫𑀻’𑀢𑀺, 𑀢𑀁 𑀓𑀢𑀓𑀺𑀘𑁆𑀘𑁂𑀦 𑀦𑀺𑀝𑁆𑀞𑀺𑀢𑀓𑀺𑀭𑀺𑀬𑁂𑀦 𑀲𑀺𑀤𑁆𑀥𑀢𑁆𑀣𑁂𑀦 𑀯𑀼𑀲𑀺𑀢𑀯𑁄𑀲𑀸𑀦𑁂𑀦 𑀦𑀺𑀭𑀸𑀯𑀭𑀡𑁂𑀦 𑀲𑀩𑁆𑀩𑀜𑁆𑀜𑀼𑀦𑀸 𑀲𑀬𑀫𑁆𑀪𑀼𑀦𑀸 𑀢𑀣𑀸𑀕𑀢𑁂𑀦 𑀅𑀢𑁆𑀢𑀸𑀦𑀁 𑀉𑀧𑀸𑀤𑀸𑀬 𑀪𑀡𑀺𑀢𑀁.

‘‘𑀬𑀣𑀸, 𑀫𑀳𑀸𑀭𑀸𑀚, 𑀯𑀦𑁆𑀢𑀲𑁆𑀲 𑀯𑀺𑀭𑀺𑀢𑁆𑀢𑀲𑁆𑀲 𑀅𑀦𑀼𑀯𑀸𑀲𑀺𑀢𑀲𑁆𑀲 𑀆𑀢𑀼𑀭𑀲𑁆𑀲 𑀲𑀧𑁆𑀧𑀸𑀬𑀓𑀺𑀭𑀺𑀬𑀸 𑀇𑀘𑁆𑀙𑀺𑀢𑀩𑁆𑀩𑀸 𑀳𑁄𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀲𑀓𑀺𑀮𑁂𑀲𑀲𑁆𑀲 𑀅𑀤𑀺𑀝𑁆𑀞𑀲𑀘𑁆𑀘𑀲𑁆𑀲 𑀉𑀤𑀭𑁂 𑀲𑀁𑀬𑀫𑁄 𑀓𑀭𑀡𑀻𑀬𑁄 𑀳𑁄𑀢𑀺. 𑀬𑀣𑀸, 𑀫𑀳𑀸𑀭𑀸𑀚, 𑀫𑀡𑀺𑀭𑀢𑀦𑀲𑁆𑀲 𑀲𑀧𑁆𑀧𑀪𑀸𑀲𑀲𑁆𑀲 𑀚𑀸𑀢𑀺𑀫𑀦𑁆𑀢𑀲𑁆𑀲 𑀅𑀪𑀺𑀚𑀸𑀢𑀺𑀧𑀭𑀺𑀲𑀼𑀤𑁆𑀥𑀲𑁆𑀲 𑀫𑀚𑁆𑀚𑀦𑀦𑀺𑀖𑀁𑀲𑀦𑀧𑀭𑀺𑀲𑁄𑀥𑀦𑁂𑀦 𑀓𑀭𑀡𑀻𑀬𑀁 𑀦 𑀳𑁄𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑀲𑁆𑀲 𑀩𑀼𑀤𑁆𑀥𑀯𑀺𑀲𑀬𑁂 𑀧𑀸𑀭𑀫𑀺𑀁 𑀕𑀢𑀲𑁆𑀲 𑀓𑀺𑀭𑀺𑀬𑀸𑀓𑀭𑀡𑁂𑀲𑀼 𑀆𑀯𑀭𑀡𑀁 𑀦 𑀳𑁄𑀢𑀻’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀏𑀯𑀫𑁂𑀢𑀁 𑀢𑀣𑀸 𑀲𑀫𑁆𑀧𑀝𑀺𑀘𑁆𑀙𑀸𑀫𑀻’’𑀢𑀺.

𑀉𑀤𑀭𑀲𑀁𑀬𑀢𑀧𑀜𑁆𑀳𑁄 𑀤𑀼𑀢𑀺𑀬𑁄.

𑁩. 𑀩𑀼𑀤𑁆𑀥𑀅𑀧𑁆𑀧𑀸𑀩𑀸𑀥𑀧𑀜𑁆𑀳𑁄

𑁩. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀪𑀸𑀲𑀺𑀢𑀫𑁆𑀧𑁂𑀢𑀁 𑀪𑀕𑀯𑀢𑀸 ‘𑀅𑀳𑀫𑀲𑁆𑀫𑀺, 𑀪𑀺𑀓𑁆𑀔𑀯𑁂, 𑀩𑁆𑀭𑀸𑀳𑁆𑀫𑀡𑁄 𑀬𑀸𑀘𑀬𑁄𑀕𑁄 𑀲𑀤𑀸 𑀧𑀬𑀢𑀧𑀸𑀡𑀺 𑀅𑀦𑁆𑀢𑀺𑀫𑀤𑁂𑀳𑀥𑀭𑁄 𑀅𑀦𑀼𑀢𑁆𑀢𑀭𑁄 𑀪𑀺𑀲𑀓𑁆𑀓𑁄 𑀲𑀮𑁆𑀮𑀓𑀢𑁆𑀢𑁄’𑀢𑀺. 𑀧𑀼𑀦 𑀘 𑀪𑀡𑀺𑀢𑀁 𑀪𑀕𑀯𑀢𑀸 ‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀧𑁆𑀧𑀸𑀩𑀸𑀥𑀸𑀦𑀁 𑀬𑀤𑀺𑀤𑀁 𑀩𑀸𑀓𑀼𑀮𑁄’𑀢𑀺. 𑀪𑀕𑀯𑀢𑁄 𑀘 𑀲𑀭𑀻𑀭𑁂 𑀩𑀳𑀼𑀓𑁆𑀔𑀢𑁆𑀢𑀼𑀁 𑀆𑀩𑀸𑀥𑁄 𑀉𑀧𑁆𑀧𑀦𑁆𑀦𑁄 𑀤𑀺𑀲𑁆𑀲𑀢𑀺. 𑀬𑀤𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀢𑀣𑀸𑀕𑀢𑁄 𑀅𑀦𑀼𑀢𑁆𑀢𑀭𑁄, 𑀢𑁂𑀦 𑀳𑀺 ‘𑀏𑀢𑀤𑀕𑁆𑀕𑀁…𑀧𑁂… 𑀩𑀸𑀓𑀼𑀮𑁄’𑀢𑀺 𑀬𑀁 𑀯𑀘𑀦𑀁, 𑀢𑀁 𑀫𑀺𑀘𑁆𑀙𑀸. 𑀬𑀤𑀺 𑀣𑁂𑀭𑁄 𑀩𑀸𑀓𑀼𑀮𑁄 𑀅𑀧𑁆𑀧𑀸𑀩𑀸𑀥𑀸𑀦𑀁 𑀅𑀕𑁆𑀕𑁄, 𑀢𑁂𑀦 𑀳𑀺 ‘𑀅𑀳𑀫𑀲𑁆𑀫𑀺…𑀧𑁂… 𑀲𑀮𑁆𑀮𑀓𑀢𑁆𑀢𑁄’𑀢𑀺 𑀢𑀫𑁆𑀧𑀺 𑀯𑀘𑀦𑀁 𑀫𑀺𑀘𑁆𑀙𑀸. 𑀅𑀬𑀫𑁆𑀧𑀺 𑀉𑀪𑀢𑁄 𑀓𑁄𑀝𑀺𑀓𑁄 𑀧𑀜𑁆𑀳𑁄 𑀢𑀯𑀸𑀦𑀼𑀧𑁆𑀧𑀢𑁆𑀢𑁄, 𑀲𑁄 𑀢𑀬𑀸 𑀦𑀺𑀩𑁆𑀩𑀸𑀳𑀺𑀢𑀩𑁆𑀩𑁄’’𑀢𑀺.

‘‘𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 ‘𑀅𑀳𑀫𑀲𑁆𑀫𑀺…𑀧𑁂… 𑀲𑀮𑁆𑀮𑀓𑀢𑁆𑀢𑁄’𑀢𑀺, 𑀪𑀡𑀺𑀢𑀜𑁆𑀘 ‘𑀏𑀢𑀤𑀕𑁆𑀕𑀁…𑀧𑁂… 𑀩𑀸𑀓𑀼𑀮𑁄’𑀢𑀺, 𑀢𑀜𑁆𑀘 𑀧𑀦 𑀩𑀸𑀳𑀺𑀭𑀸𑀦𑀁 𑀆𑀕𑀫𑀸𑀦𑀁 𑀅𑀥𑀺𑀕𑀫𑀸𑀦𑀁 𑀧𑀭𑀺𑀬𑀢𑁆𑀢𑀻𑀦𑀁 𑀅𑀢𑁆𑀢𑀦𑀺 𑀯𑀺𑀚𑁆𑀚𑀫𑀸𑀦𑀢𑀁 𑀲𑀦𑁆𑀥𑀸𑀬 𑀪𑀸𑀲𑀺𑀢𑀁.

‘‘𑀲𑀦𑁆𑀢𑀺 𑀔𑁄 𑀧𑀦, 𑀫𑀳𑀸𑀭𑀸𑀚, 𑀪𑀕𑀯𑀢𑁄 𑀲𑀸𑀯𑀓𑀸 𑀞𑀸𑀦𑀘𑀗𑁆𑀓𑀫𑀺𑀓𑀸, 𑀢𑁂 𑀞𑀸𑀦𑁂𑀦 𑀘𑀗𑁆𑀓𑀫𑁂𑀦 𑀤𑀺𑀯𑀸𑀭𑀢𑁆𑀢𑀺𑀁 𑀯𑀻𑀢𑀺𑀦𑀸𑀫𑁂𑀦𑁆𑀢𑀺, 𑀪𑀕𑀯𑀸 𑀧𑀦, 𑀫𑀳𑀸𑀭𑀸𑀚, 𑀞𑀸𑀦𑁂𑀦 𑀘𑀗𑁆𑀓𑀫𑁂𑀦 𑀦𑀺𑀲𑀚𑁆𑀚𑀸𑀬 𑀲𑀬𑀦𑁂𑀦 𑀤𑀺𑀯𑀸𑀭𑀢𑁆𑀢𑀺𑀁 𑀯𑀻𑀢𑀺𑀦𑀸𑀫𑁂𑀢𑀺, 𑀬𑁂 𑀢𑁂, 𑀫𑀳𑀸𑀭𑀸𑀚, 𑀪𑀺𑀓𑁆𑀔𑀽 𑀞𑀸𑀦𑀘𑀗𑁆𑀓𑀫𑀺𑀓𑀸, 𑀢𑁂 𑀢𑁂𑀦 𑀅𑀗𑁆𑀕𑁂𑀦 𑀅𑀢𑀺𑀭𑁂𑀓𑀸.

‘‘𑀲𑀦𑁆𑀢𑀺 𑀔𑁄 𑀧𑀦, 𑀫𑀳𑀸𑀭𑀸𑀚, 𑀪𑀕𑀯𑀢𑁄 𑀲𑀸𑀯𑀓𑀸 𑀏𑀓𑀸𑀲𑀦𑀺𑀓𑀸, 𑀢𑁂 𑀚𑀻𑀯𑀺𑀢𑀳𑁂𑀢𑀼𑀧𑀺 𑀤𑀼𑀢𑀺𑀬𑀁 𑀪𑁄𑀚𑀦𑀁 𑀦 𑀪𑀼𑀜𑁆𑀚𑀦𑁆𑀢𑀺, 𑀪𑀕𑀯𑀸 𑀧𑀦, 𑀫𑀳𑀸𑀭𑀸𑀚, 𑀤𑀼𑀢𑀺𑀬𑀫𑁆𑀧𑀺 𑀬𑀸𑀯 𑀢𑀢𑀺𑀬𑀫𑁆𑀧𑀺 𑀪𑁄𑀚𑀦𑀁 𑀪𑀼𑀜𑁆𑀚𑀢𑀺, 𑀬𑁂 𑀢𑁂, 𑀫𑀳𑀸𑀭𑀸𑀚, 𑀪𑀺𑀓𑁆𑀔𑀽 𑀏𑀓𑀸𑀲𑀦𑀺𑀓𑀸, 𑀢𑁂 𑀢𑁂𑀦 𑀅𑀗𑁆𑀕𑁂𑀦 𑀅𑀢𑀺𑀭𑁂𑀓𑀸, 𑀅𑀦𑁂𑀓𑀯𑀺𑀥𑀸𑀦𑀺, 𑀫𑀳𑀸𑀭𑀸𑀚, 𑀢𑀸𑀦𑀺 𑀓𑀸𑀭𑀡𑀸𑀦𑀺 𑀢𑁂𑀲𑀁 𑀢𑁂𑀲𑀁 𑀢𑀁 𑀢𑀁 𑀲𑀦𑁆𑀥𑀸𑀬 𑀪𑀡𑀺𑀢𑀸𑀦𑀺. 𑀪𑀕𑀯𑀸 𑀧𑀦, 𑀫𑀳𑀸𑀭𑀸𑀚, 𑀅𑀦𑀼𑀢𑁆𑀢𑀭𑁄 𑀲𑀻𑀮𑁂𑀦 𑀲𑀫𑀸𑀥𑀺𑀦𑀸 𑀧𑀜𑁆𑀜𑀸𑀬 𑀯𑀺𑀫𑀼𑀢𑁆𑀢𑀺𑀬𑀸 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑁂𑀦 𑀤𑀲𑀳𑀺 𑀘 𑀩𑀮𑁂𑀳𑀺 𑀘𑀢𑀽𑀳𑀺 𑀯𑁂𑀲𑀸𑀭𑀚𑁆𑀚𑁂𑀳𑀺 𑀅𑀝𑁆𑀞𑀸𑀭𑀲𑀳𑀺 𑀩𑀼𑀤𑁆𑀥𑀥𑀫𑁆𑀫𑁂𑀳𑀺 𑀙𑀳𑀺 𑀅𑀲𑀸𑀥𑀸𑀭𑀡𑁂𑀳𑀺 𑀜𑀸𑀡𑁂𑀳𑀺, 𑀓𑁂𑀯𑀮𑁂 𑀘 𑀩𑀼𑀤𑁆𑀥𑀯𑀺𑀲𑀬𑁂 𑀢𑀁 𑀲𑀦𑁆𑀥𑀸𑀬 𑀪𑀡𑀺𑀢𑀁 ‘𑀅𑀳𑀫𑀲𑁆𑀫𑀺…𑀧𑁂… 𑀲𑀮𑁆𑀮𑀓𑀢𑁆𑀢𑁄’𑀢𑀺.

‘‘𑀇𑀥, 𑀫𑀳𑀸𑀭𑀸𑀚, 𑀫𑀦𑀼𑀲𑁆𑀲𑁂𑀲𑀼 𑀏𑀓𑁄 𑀚𑀸𑀢𑀺𑀫𑀸 𑀳𑁄𑀢𑀺, 𑀏𑀓𑁄 𑀥𑀦𑀯𑀸, 𑀏𑀓𑁄 𑀯𑀺𑀚𑁆𑀚𑀯𑀸, 𑀏𑀓𑁄 𑀲𑀺𑀧𑁆𑀧𑀯𑀸, 𑀏𑀓𑁄 𑀲𑀽𑀭𑁄, 𑀏𑀓𑁄 𑀯𑀺𑀘𑀓𑁆𑀔𑀡𑁄, 𑀲𑀩𑁆𑀩𑁂𑀧𑁂𑀢𑁂 𑀅𑀪𑀺𑀪𑀯𑀺𑀬 𑀭𑀸𑀚𑀸 𑀬𑁂𑀯 𑀢𑁂𑀲𑀁 𑀉𑀢𑁆𑀢𑀫𑁄 𑀳𑁄𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀪𑀕𑀯𑀸 𑀲𑀩𑁆𑀩𑀲𑀢𑁆𑀢𑀸𑀦𑀁 𑀅𑀕𑁆𑀕𑁄 𑀚𑁂𑀝𑁆𑀞𑁄 𑀲𑁂𑀝𑁆𑀞𑁄.

‘‘𑀬𑀁 𑀧𑀦 𑀆𑀬𑀲𑁆𑀫𑀸 𑀩𑀸𑀓𑀼𑀮𑁄 𑀅𑀧𑁆𑀧𑀸𑀩𑀸𑀥𑁄 𑀅𑀳𑁄𑀲𑀺, 𑀢𑀁 𑀅𑀪𑀺𑀦𑀻𑀳𑀸𑀭𑀯𑀲𑁂𑀦, 𑀲𑁄 𑀳𑀺, 𑀫𑀳𑀸𑀭𑀸𑀚, 𑀅𑀦𑁄𑀫𑀤𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀉𑀤𑀭𑀯𑀸𑀢𑀸𑀩𑀸𑀥𑁂 𑀉𑀧𑁆𑀧𑀦𑁆𑀦𑁂 𑀯𑀺𑀧𑀲𑁆𑀲𑀺𑀲𑁆𑀲 𑀘 𑀪𑀕𑀯𑀢𑁄 𑀅𑀝𑁆𑀞𑀲𑀝𑁆𑀞𑀺𑀬𑀸 𑀘 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀸𑀦𑀁 𑀢𑀺𑀡𑀧𑀼𑀧𑁆𑀨𑀓𑀭𑁄𑀕𑁂 𑀉𑀧𑁆𑀧𑀦𑁆𑀦𑁂 𑀲𑀬𑀁 𑀢𑀸𑀧𑀲𑁄 𑀲𑀫𑀸𑀦𑁄 𑀦𑀸𑀦𑀸𑀪𑁂𑀲𑀚𑁆𑀚𑁂𑀳𑀺 𑀢𑀁 𑀩𑁆𑀬𑀸𑀥𑀺𑀁 𑀅𑀧𑀦𑁂𑀢𑁆𑀯𑀸 𑀅𑀧𑁆𑀧𑀸𑀩𑀸𑀥𑀢𑀁 𑀧𑀢𑁆𑀢𑁄, 𑀪𑀡𑀺𑀢𑁄 𑀘 ‘𑀏𑀢𑀤𑀕𑁆𑀕𑀁…𑀧𑁂… 𑀩𑀸𑀓𑀼𑀮𑁄’𑀢𑀺.

‘‘𑀪𑀕𑀯𑀢𑁄, 𑀫𑀳𑀸𑀭𑀸𑀚, 𑀩𑁆𑀬𑀸𑀥𑀺𑀫𑁆𑀳𑀺 𑀉𑀧𑁆𑀧𑀚𑁆𑀚𑀦𑁆𑀢𑁂𑀧𑀺 𑀅𑀦𑀼𑀧𑁆𑀧𑀚𑁆𑀚𑀦𑁆𑀢𑁂𑀧𑀺 𑀥𑀼𑀢𑀗𑁆𑀕𑀁 𑀆𑀤𑀺𑀬𑀦𑁆𑀢𑁂𑀧𑀺 𑀅𑀦𑀸𑀤𑀺𑀬𑀦𑁆𑀢𑁂𑀧𑀺 𑀦𑀢𑁆𑀣𑀺 𑀪𑀕𑀯𑀢𑀸 𑀲𑀤𑀺𑀲𑁄 𑀓𑁄𑀘𑀺 𑀲𑀢𑁆𑀢𑁄. 𑀪𑀸𑀲𑀺𑀢𑀫𑁆𑀧𑁂𑀢𑀁 𑀫𑀳𑀸𑀭𑀸𑀚 𑀪𑀕𑀯𑀢𑀸 𑀤𑁂𑀯𑀸𑀢𑀺𑀤𑁂𑀯𑁂𑀦 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑀯𑀭𑀮𑀜𑁆𑀙𑀓𑁂 𑁋

‘‘‘𑀬𑀸𑀯𑀢𑀸, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀅𑀧𑀤𑀸 𑀯𑀸 𑀤𑁆𑀯𑀺𑀧𑀤𑀸 𑀯𑀸 𑀘𑀢𑀼𑀧𑁆𑀧𑀤𑀸 𑀯𑀸 𑀩𑀳𑀼𑀧𑁆𑀧𑀤𑀸 𑀯𑀸 𑀭𑀽𑀧𑀺𑀦𑁄 𑀯𑀸 𑀅𑀭𑀽𑀧𑀺𑀦𑁄 𑀯𑀸 𑀲𑀜𑁆𑀜𑀺𑀦𑁄 𑀯𑀸 𑀅𑀲𑀜𑁆𑀜𑀺𑀦𑁄 𑀯𑀸 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀺𑀦𑁄 𑀯𑀸, 𑀢𑀣𑀸𑀕𑀢𑁄 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’𑀢𑀺. ‘𑀲𑀸𑀥𑀼, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀏𑀯𑀫𑁂𑀢𑀁 𑀢𑀣𑀸 𑀲𑀫𑁆𑀧𑀝𑀺𑀘𑁆𑀙𑀸𑀫𑀻’’’𑀢𑀺.

𑀩𑀼𑀤𑁆𑀥𑀅𑀧𑁆𑀧𑀸𑀩𑀸𑀥𑀧𑀜𑁆𑀳𑁄 𑀢𑀢𑀺𑀬𑁄.

𑁪. 𑀫𑀕𑁆𑀕𑀼𑀧𑁆𑀧𑀸𑀤𑀦𑀧𑀜𑁆𑀳𑁄

𑁪. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀪𑀸𑀲𑀺𑀢𑀫𑁆𑀧𑁂𑀢𑀁 𑀪𑀕𑀯𑀢𑀸 ‘𑀢𑀣𑀸𑀕𑀢𑁄 𑀪𑀺𑀓𑁆𑀔𑀯𑁂, 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀫𑀕𑁆𑀕𑀲𑁆𑀲 𑀉𑀧𑁆𑀧𑀸𑀤𑁂𑀢𑀸’𑀢𑀺. 𑀧𑀼𑀦 𑀘 𑀪𑀡𑀺𑀢𑀁 ‘𑀅𑀤𑁆𑀤𑀲𑀁 𑀔𑁆𑀯𑀸𑀳𑀁, 𑀪𑀺𑀓𑁆𑀔𑀯𑁂, 𑀧𑀼𑀭𑀸𑀡𑀁 𑀫𑀕𑁆𑀕𑀁 𑀧𑀼𑀭𑀸𑀡𑀁 𑀅𑀜𑁆𑀚𑀲𑀁 𑀧𑀼𑀩𑁆𑀩𑀓𑁂𑀳𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀳𑀺 𑀅𑀦𑀼𑀬𑀸𑀢’𑀦𑁆𑀢𑀺. 𑀬𑀤𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀢𑀣𑀸𑀕𑀢𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀫𑀕𑁆𑀕𑀲𑁆𑀲 𑀉𑀧𑁆𑀧𑀸𑀤𑁂𑀢𑀸, 𑀢𑁂𑀦 𑀳𑀺 ‘𑀅𑀤𑁆𑀤𑀲𑀁 𑀔𑁆𑀯𑀸𑀳𑀁, 𑀪𑀺𑀓𑁆𑀔𑀯𑁂, 𑀧𑀼𑀭𑀸𑀡𑀁 𑀫𑀕𑁆𑀕𑀁 𑀧𑀼𑀭𑀸𑀡𑀁 𑀅𑀜𑁆𑀚𑀲𑀁 𑀧𑀼𑀩𑁆𑀩𑀓𑁂𑀳𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀳𑀺 𑀅𑀦𑀼𑀬𑀸𑀢’𑀦𑁆𑀢𑀺 𑀬𑀁 𑀯𑀘𑀦𑀁, 𑀢𑀁 𑀫𑀺𑀘𑁆𑀙𑀸. 𑀬𑀤𑀺 𑀢𑀣𑀸𑀕𑀢𑁂𑀦 𑀪𑀡𑀺𑀢𑀁 ‘𑀅𑀤𑁆𑀤𑀲𑀁 𑀔𑁆𑀯𑀸𑀳𑀁, 𑀪𑀺𑀓𑁆𑀔𑀯𑁂, 𑀧𑀼𑀭𑀸𑀡𑀁 𑀫𑀕𑁆𑀕𑀁 𑀧𑀼𑀭𑀸𑀡𑀁 𑀅𑀜𑁆𑀚𑀲𑀁 𑀧𑀼𑀩𑁆𑀩𑀓𑁂𑀳𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀳𑀺 𑀅𑀦𑀼𑀬𑀸𑀢’𑀦𑁆𑀢𑀺, 𑀢𑁂𑀦 𑀳𑀺 ‘𑀢𑀣𑀸𑀕𑀢𑁄, 𑀪𑀺𑀓𑁆𑀔𑀯𑁂, 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀫𑀕𑁆𑀕𑀲𑁆𑀲 𑀉𑀧𑁆𑀧𑀸𑀤𑁂𑀢𑀸’𑀢𑀺 𑀢𑀫𑁆𑀧𑀺 𑀯𑀘𑀦𑀁 𑀫𑀺𑀘𑁆𑀙𑀸. 𑀅𑀬𑀫𑁆𑀧𑀺 𑀉𑀪𑀢𑁄 𑀓𑁄𑀝𑀺𑀓𑁄 𑀧𑀜𑁆𑀳𑁄 𑀢𑀯𑀸𑀦𑀼𑀧𑁆𑀧𑀢𑁆𑀢𑁄, 𑀲𑁄 𑀢𑀬𑀸 𑀦𑀺𑀩𑁆𑀩𑀸𑀳𑀺𑀢𑀩𑁆𑀩𑁄’’𑀢𑀺.

‘‘𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 ‘𑀢𑀣𑀸𑀕𑀢𑁄, 𑀪𑀺𑀓𑁆𑀔𑀯𑁂, 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀫𑀕𑁆𑀕𑀲𑁆𑀲 𑀉𑀧𑁆𑀧𑀸𑀤𑁂𑀢𑀸’𑀢𑀺. 𑀪𑀡𑀺𑀢𑀜𑁆𑀘 ‘𑀅𑀤𑁆𑀤𑀲𑀁 𑀔𑁆𑀯𑀸𑀳𑀁, 𑀪𑀺𑀓𑁆𑀔𑀯𑁂, 𑀧𑀼𑀭𑀸𑀡𑀁 𑀫𑀕𑁆𑀕𑀁 𑀧𑀼𑀭𑀸𑀡𑀁 𑀅𑀜𑁆𑀚𑀲𑀁 𑀧𑀼𑀩𑁆𑀩𑀓𑁂𑀳𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀳𑀺 𑀅𑀦𑀼𑀬𑀸𑀢’𑀦𑁆𑀢𑀺, 𑀢𑀁 𑀤𑁆𑀯𑀬𑀫𑁆𑀧𑀺 𑀲𑀪𑀸𑀯𑀯𑀘𑀦𑀫𑁂𑀯, 𑀧𑀼𑀩𑁆𑀩𑀓𑀸𑀦𑀁, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑀸𑀦𑀁 𑀅𑀦𑁆𑀢𑀭𑀥𑀸𑀦𑁂𑀦 𑀅𑀲𑀢𑀺 𑀅𑀦𑀼𑀲𑀸𑀲𑀓𑁂 𑀫𑀕𑁆𑀕𑁄 𑀅𑀦𑁆𑀢𑀭𑀥𑀸𑀬𑀺, 𑀢𑀁 [𑀲𑁄 𑀢𑀁 (𑀲𑀻. 𑀧𑀻. 𑀓.)] 𑀢𑀣𑀸𑀕𑀢𑁄 𑀫𑀕𑁆𑀕𑀁 𑀮𑀼𑀕𑁆𑀕𑀁 𑀧𑀮𑀼𑀕𑁆𑀕𑀁 𑀕𑀽𑀴𑁆𑀳𑀁 𑀧𑀺𑀳𑀺𑀢𑀁 𑀧𑀝𑀺𑀘𑁆𑀙𑀦𑁆𑀦𑀁 𑀅𑀲𑀜𑁆𑀘𑀭𑀡𑀁 𑀧𑀜𑁆𑀜𑀸𑀘𑀓𑁆𑀔𑀼𑀦𑀸 𑀲𑀫𑁆𑀧𑀲𑁆𑀲𑀫𑀸𑀦𑁄 [𑀲𑀫𑁆𑀫𑀲𑀫𑀸𑀦𑁄 (𑀲𑀻. 𑀧𑀻.)] 𑀅𑀤𑁆𑀤𑀲 𑀧𑀼𑀩𑁆𑀩𑀓𑁂𑀳𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀳𑀺 𑀅𑀦𑀼𑀬𑀸𑀢𑀁, 𑀢𑀁𑀓𑀸𑀭𑀡𑀸 𑀆𑀳 ‘𑀅𑀤𑁆𑀤𑀲𑀁 𑀔𑁆𑀯𑀸𑀳𑀁, 𑀪𑀺𑀓𑁆𑀔𑀯𑁂, 𑀧𑀼𑀭𑀸𑀡𑀁 𑀫𑀕𑁆𑀕𑀁 𑀧𑀼𑀭𑀸𑀡𑀁 𑀅𑀜𑁆𑀚𑀲𑀁 𑀧𑀼𑀩𑁆𑀩𑀓𑁂𑀳𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀳𑀺 𑀅𑀦𑀼𑀬𑀸𑀢’𑀦𑁆𑀢𑀺.

‘‘𑀧𑀼𑀩𑁆𑀩𑀓𑀸𑀦𑀁, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑀸𑀦𑀁 𑀅𑀦𑁆𑀢𑀭𑀥𑀸𑀦𑁂𑀦 𑀅𑀲𑀢𑀺 𑀅𑀦𑀼𑀲𑀸𑀲𑀓𑁂 𑀮𑀼𑀕𑁆𑀕𑀁 𑀧𑀮𑀼𑀕𑁆𑀕𑀁 𑀕𑀽𑀴𑁆𑀳𑀁 𑀧𑀺𑀳𑀺𑀢𑀁 𑀧𑀝𑀺𑀘𑁆𑀙𑀦𑁆𑀦𑀁 𑀅𑀲𑀜𑁆𑀘𑀭𑀡𑀁 𑀫𑀕𑁆𑀕𑀁 𑀬𑀁 𑀤𑀸𑀦𑀺 𑀢𑀣𑀸𑀕𑀢𑁄 𑀲𑀜𑁆𑀘𑀭𑀡𑀁 𑀅𑀓𑀸𑀲𑀺, 𑀢𑀁𑀓𑀸𑀭𑀡𑀸 𑀆𑀳 ‘𑀢𑀣𑀸𑀕𑀢𑁄, 𑀪𑀺𑀓𑁆𑀔𑀯𑁂, 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀫𑀕𑁆𑀕𑀲𑁆𑀲 𑀉𑀧𑁆𑀧𑀸𑀤𑁂𑀢𑀸’𑀢𑀺.

‘‘𑀇𑀥, 𑀫𑀳𑀸𑀭𑀸𑀚, 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀅𑀦𑁆𑀢𑀭𑀥𑀸𑀦𑁂𑀦 𑀫𑀡𑀺𑀭𑀢𑀦𑀁 𑀕𑀺𑀭𑀺𑀲𑀺𑀔𑀦𑁆𑀢𑀭𑁂 𑀦𑀺𑀮𑀻𑀬𑀢𑀺, 𑀅𑀧𑀭𑀲𑁆𑀲 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀉𑀧𑀕𑀘𑁆𑀙𑀢𑀺, 𑀅𑀧𑀺 𑀦𑀼 𑀔𑁄 𑀢𑀁, 𑀫𑀳𑀸𑀭𑀸𑀚, 𑀫𑀡𑀺𑀭𑀢𑀦𑀁 𑀢𑀲𑁆𑀲 𑀧𑀓𑀢’’𑀦𑁆𑀢𑀺? ‘‘𑀦 𑀳𑀺, 𑀪𑀦𑁆𑀢𑁂, 𑀧𑀸𑀓𑀢𑀺𑀓𑀁 𑀬𑁂𑀯 𑀢𑀁 𑀫𑀡𑀺𑀭𑀢𑀦𑀁, 𑀢𑁂𑀦 𑀧𑀦 𑀦𑀺𑀩𑁆𑀩𑀢𑁆𑀢𑀺𑀢’’𑀦𑁆𑀢𑀺 [𑀦𑀺𑀩𑁆𑀩𑀢𑁆𑀢𑀦𑁆𑀢𑀺 (𑀲𑀻. 𑀧𑀻.)]. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀧𑀸𑀓𑀢𑀺𑀓𑀁 𑀧𑀼𑀩𑁆𑀩𑀓𑁂𑀳𑀺 𑀢𑀣𑀸𑀕𑀢𑁂𑀳𑀺 𑀅𑀦𑀼𑀘𑀺𑀡𑁆𑀡𑀁 𑀅𑀝𑁆𑀞𑀗𑁆𑀕𑀺𑀓𑀁 𑀲𑀺𑀯𑀁 𑀫𑀕𑁆𑀕𑀁 𑀅𑀲𑀢𑀺 𑀅𑀦𑀼𑀲𑀸𑀲𑀓𑁂 𑀮𑀼𑀕𑁆𑀕𑀁 𑀧𑀮𑀼𑀕𑁆𑀕𑀁 𑀕𑀽𑀴𑁆𑀳𑀁 𑀧𑀺𑀳𑀺𑀢𑀁 𑀧𑀝𑀺𑀘𑁆𑀙𑀦𑁆𑀦𑀁 𑀅𑀲𑀜𑁆𑀘𑀭𑀡𑀁 𑀪𑀕𑀯𑀸 𑀧𑀜𑁆𑀜𑀸𑀘𑀓𑁆𑀔𑀼𑀦𑀸 𑀲𑀫𑁆𑀧𑀲𑁆𑀲𑀫𑀸𑀦𑁄 𑀉𑀧𑁆𑀧𑀸𑀤𑁂𑀲𑀺, 𑀲𑀜𑁆𑀘𑀭𑀡𑀁 𑀅𑀓𑀸𑀲𑀺, 𑀢𑀁𑀓𑀸𑀭𑀡𑀸 𑀆𑀳 ‘𑀢𑀣𑀸𑀕𑀢𑁄, 𑀪𑀺𑀓𑁆𑀔𑀯𑁂, 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀫𑀕𑁆𑀕𑀲𑁆𑀲 𑀉𑀧𑁆𑀧𑀸𑀤𑁂𑀢𑀸’𑀢𑀺.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀲𑀦𑁆𑀢𑀁 𑀬𑁂𑀯 𑀧𑀼𑀢𑁆𑀢𑀁 𑀬𑁄𑀦𑀺𑀬𑀸 𑀚𑀦𑀬𑀺𑀢𑁆𑀯𑀸 𑀫𑀸𑀢𑀸 ‘𑀚𑀦𑀺𑀓𑀸’𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑁄 𑀲𑀦𑁆𑀢𑀁 𑀬𑁂𑀯 𑀫𑀕𑁆𑀕𑀁 𑀮𑀼𑀕𑁆𑀕𑀁 𑀧𑀮𑀼𑀕𑁆𑀕𑀁 𑀕𑀽𑀴𑁆𑀳𑀁 𑀧𑀺𑀳𑀺𑀢𑀁 𑀧𑀝𑀺𑀘𑁆𑀙𑀦𑁆𑀦𑀁 𑀅𑀲𑀜𑁆𑀘𑀭𑀡𑀁 𑀧𑀜𑁆𑀜𑀸𑀘𑀓𑁆𑀔𑀼𑀦𑀸 𑀲𑀫𑁆𑀧𑀲𑁆𑀲𑀫𑀸𑀦𑁄 𑀉𑀧𑁆𑀧𑀸𑀤𑁂𑀲𑀺, 𑀲𑀜𑁆𑀘𑀭𑀡𑀁 𑀅𑀓𑀸𑀲𑀺, 𑀢𑀁𑀓𑀸𑀭𑀡𑀸 𑀆𑀳 ‘𑀢𑀣𑀸𑀕𑀢𑁄, 𑀪𑀺𑀓𑁆𑀔𑀯𑁂, 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀫𑀕𑁆𑀕𑀲𑁆𑀲 𑀉𑀧𑁆𑀧𑀸𑀤𑁂𑀢𑀸’𑀢𑀺.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀓𑁄𑀘𑀺 𑀧𑀼𑀭𑀺𑀲𑁄 𑀬𑀁 𑀓𑀺𑀜𑁆𑀘𑀺 𑀦𑀝𑁆𑀞𑀁 𑀧𑀲𑁆𑀲𑀢𑀺, ‘𑀢𑁂𑀦 𑀢𑀁 𑀪𑀡𑁆𑀟𑀁 𑀦𑀺𑀩𑁆𑀩𑀢𑁆𑀢𑀺𑀢’𑀦𑁆𑀢𑀺 𑀚𑀦𑁄 𑀯𑁄𑀳𑀭𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑁄 𑀲𑀦𑁆𑀢𑀁 𑀬𑁂𑀯 𑀫𑀕𑁆𑀕𑀁 𑀮𑀼𑀕𑁆𑀕𑀁 𑀧𑀮𑀼𑀕𑁆𑀕𑀁 𑀕𑀽𑀴𑁆𑀳𑀁 𑀧𑀺𑀳𑀺𑀢𑀁 𑀧𑀝𑀺𑀘𑁆𑀙𑀦𑁆𑀦𑀁 𑀅𑀲𑀜𑁆𑀘𑀭𑀡𑀁 𑀧𑀜𑁆𑀜𑀸𑀘𑀓𑁆𑀔𑀼𑀦𑀸 𑀲𑀫𑁆𑀧𑀲𑁆𑀲𑀫𑀸𑀦𑁄 𑀉𑀧𑁆𑀧𑀸𑀤𑁂𑀲𑀺, 𑀲𑀜𑁆𑀘𑀭𑀡𑀁 𑀅𑀓𑀸𑀲𑀺, 𑀢𑀁𑀓𑀸𑀭𑀡𑀸 𑀆𑀳 ‘𑀢𑀣𑀸𑀕𑀢𑁄, 𑀪𑀺𑀓𑁆𑀔𑀯𑁂, 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀫𑀕𑁆𑀕𑀲𑁆𑀲 𑀉𑀧𑁆𑀧𑀸𑀤𑁂𑀢𑀸’𑀢𑀺.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀓𑁄𑀘𑀺 𑀧𑀼𑀭𑀺𑀲𑁄 𑀯𑀦𑀁 𑀲𑁄𑀥𑁂𑀢𑁆𑀯𑀸 𑀪𑀽𑀫𑀺𑀁 𑀦𑀻𑀳𑀭𑀢𑀺, ‘𑀢𑀲𑁆𑀲 𑀲𑀸 𑀪𑀽𑀫𑀻’𑀢𑀺 𑀚𑀦𑁄 𑀯𑁄𑀳𑀭𑀢𑀺, 𑀦 𑀘𑁂𑀲𑀸 𑀪𑀽𑀫𑀺 𑀢𑁂𑀦 𑀧𑀯𑀢𑁆𑀢𑀺𑀢𑀸, 𑀢𑀁 𑀪𑀽𑀫𑀺𑀁 𑀓𑀸𑀭𑀡𑀁 𑀓𑀢𑁆𑀯𑀸 𑀪𑀽𑀫𑀺𑀲𑀸𑀫𑀺𑀓𑁄 𑀦𑀸𑀫 𑀳𑁄𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑁄 𑀲𑀦𑁆𑀢𑀁 𑀬𑁂𑀯 𑀫𑀕𑁆𑀕𑀁 𑀮𑀼𑀕𑁆𑀕𑀁 𑀧𑀮𑀼𑀕𑁆𑀕𑀁 𑀕𑀽𑀴𑁆𑀳𑀁 𑀧𑀺𑀳𑀺𑀢𑀁 𑀧𑀝𑀺𑀘𑁆𑀙𑀦𑁆𑀦𑀁 𑀅𑀲𑀜𑁆𑀘𑀭𑀡𑀁 𑀧𑀜𑁆𑀜𑀸𑀬 𑀲𑀫𑁆𑀧𑀲𑁆𑀲𑀫𑀸𑀦𑁄 𑀉𑀧𑁆𑀧𑀸𑀤𑁂𑀲𑀺, 𑀲𑀜𑁆𑀘𑀭𑀡𑀁 𑀅𑀓𑀸𑀲𑀺, 𑀢𑀁𑀓𑀸𑀭𑀡𑀸 𑀆𑀳 ‘𑀢𑀣𑀸𑀕𑀢𑁄, 𑀪𑀺𑀓𑁆𑀔𑀯𑁂, 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀫𑀕𑁆𑀕𑀲𑁆𑀲 𑀉𑀧𑁆𑀧𑀸𑀤𑁂𑀢𑀸’’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀏𑀯𑀫𑁂𑀢𑀁 𑀢𑀣𑀸 𑀲𑀫𑁆𑀧𑀝𑀺𑀘𑁆𑀙𑀸𑀫𑀻’’𑀢𑀺.

𑀫𑀕𑁆𑀕𑀼𑀧𑁆𑀧𑀸𑀤𑀦𑀧𑀜𑁆𑀳𑁄 𑀘𑀢𑀼𑀢𑁆𑀣𑁄.

𑁫. 𑀩𑀼𑀤𑁆𑀥𑀅𑀯𑀺𑀳𑁂𑀞𑀓𑀧𑀜𑁆𑀳𑁄

𑁫. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀪𑀸𑀲𑀺𑀢𑀫𑁆𑀧𑁂𑀢𑀁 𑀪𑀕𑀯𑀢𑀸 ‘𑀧𑀼𑀩𑁆𑀩𑁂 𑀯𑀸𑀳𑀁 𑀫𑀦𑀼𑀲𑁆𑀲𑀪𑀽𑀢𑁄 𑀲𑀫𑀸𑀦𑁄 𑀲𑀢𑁆𑀢𑀸𑀦𑀁 𑀅𑀯𑀺𑀳𑁂𑀞𑀓𑀚𑀸𑀢𑀺𑀓𑁄 𑀅𑀳𑁄𑀲𑀺’𑀦𑁆𑀢𑀺. 𑀧𑀼𑀦 𑀘 𑀪𑀡𑀺𑀢𑀁 ‘𑀮𑁄𑀫𑀲𑀓𑀲𑁆𑀲𑀧𑁄 𑀦𑀸𑀫 𑀇𑀲𑀺 𑀲𑀫𑀸𑀦𑁄 𑀅𑀦𑁂𑀓𑀲𑀢𑁂 𑀧𑀸𑀡𑁂 𑀖𑀸𑀢𑀬𑀺𑀢𑁆𑀯𑀸 𑀯𑀸𑀚𑀧𑁂𑀬𑁆𑀬𑀁 𑀫𑀳𑀸𑀬𑀜𑁆𑀜𑀁 𑀬𑀚𑀻’𑀢𑀺. 𑀬𑀤𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀪𑀕𑀯𑀢𑀸 𑀪𑀡𑀺𑀢𑀁 ‘𑀧𑀼𑀩𑁆𑀩𑁂 𑀯𑀸𑀳𑀁 𑀫𑀦𑀼𑀲𑁆𑀲𑀪𑀽𑀢𑁄 𑀲𑀫𑀸𑀦𑁄 𑀲𑀢𑁆𑀢𑀸𑀦𑀁 𑀅𑀯𑀺𑀳𑁂𑀞𑀓𑀚𑀸𑀢𑀺𑀓𑁄 𑀅𑀳𑁄𑀲𑀺’𑀦𑁆𑀢𑀺, 𑀢𑁂𑀦 𑀳𑀺 ‘𑀮𑁄𑀫𑀲𑀓𑀲𑁆𑀲𑀧𑁂𑀦 𑀇𑀲𑀺𑀦𑀸 𑀅𑀦𑁂𑀓𑀲𑀢𑁂 𑀧𑀸𑀡𑁂 𑀖𑀸𑀢𑀬𑀺𑀢𑁆𑀯𑀸 𑀯𑀸𑀚𑀧𑁂𑀬𑁆𑀬𑀁 𑀫𑀳𑀸𑀬𑀜𑁆𑀜𑀁 𑀬𑀚𑀺𑀢’𑀦𑁆𑀢𑀺 𑀬𑀁 𑀯𑀘𑀦𑀁, 𑀢𑀁 𑀫𑀺𑀘𑁆𑀙𑀸. 𑀬𑀤𑀺 ‘𑀮𑁄𑀫𑀲𑀓𑀲𑁆𑀲𑀧𑁂𑀦 𑀇𑀲𑀺𑀦𑀸 𑀅𑀦𑁂𑀓𑀲𑀢𑁂 𑀧𑀸𑀡𑁂 𑀖𑀸𑀢𑀬𑀺𑀢𑁆𑀯𑀸 𑀯𑀸𑀚𑀧𑁂𑀬𑁆𑀬𑀁 𑀫𑀳𑀸𑀬𑀜𑁆𑀜𑀁 𑀬𑀚𑀺𑀢𑀁’, 𑀢𑁂𑀦 𑀳𑀺 ‘𑀧𑀼𑀩𑁆𑀩𑁂 𑀯𑀸𑀳𑀁 𑀫𑀦𑀼𑀲𑁆𑀲𑀪𑀽𑀢𑁄 𑀲𑀫𑀸𑀦𑁄 𑀲𑀢𑁆𑀢𑀸𑀦𑀁 𑀅𑀯𑀺𑀳𑁂𑀞𑀓𑀚𑀸𑀢𑀺𑀓𑁄 𑀅𑀳𑁄𑀲𑀺’𑀦𑁆𑀢𑀺 𑀢𑀫𑁆𑀧𑀺 𑀯𑀘𑀦𑀁 𑀫𑀺𑀘𑁆𑀙𑀸. 𑀅𑀬𑀫𑁆𑀧𑀺 𑀉𑀪𑀢𑁄 𑀓𑁄𑀝𑀺𑀓𑁄 𑀧𑀜𑁆𑀳𑁄 𑀢𑀯𑀸𑀦𑀼𑀧𑁆𑀧𑀢𑁆𑀢𑁄, 𑀲𑁄 𑀢𑀬𑀸 𑀦𑀺𑀩𑁆𑀩𑀸𑀳𑀺𑀢𑀩𑁆𑀩𑁄’’𑀢𑀺.

‘‘𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 ‘𑀧𑀼𑀩𑁆𑀩𑁂 𑀯𑀸𑀳𑀁 𑀫𑀦𑀼𑀲𑁆𑀲𑀪𑀽𑀢𑁄 𑀲𑀫𑀸𑀦𑁄 𑀲𑀢𑁆𑀢𑀸𑀦𑀁 𑀅𑀯𑀺𑀳𑁂𑀞𑀓𑀚𑀸𑀢𑀺𑀓𑁄 𑀅𑀳𑁄𑀲𑀺’𑀦𑁆𑀢𑀺, ‘𑀮𑁄𑀫𑀲𑀓𑀲𑁆𑀲𑀧𑁂𑀦 𑀇𑀲𑀺𑀦𑀸 𑀅𑀦𑁂𑀓𑀲𑀢𑁂 𑀧𑀸𑀡𑁂 𑀖𑀸𑀢𑀬𑀺𑀢𑁆𑀯𑀸 𑀯𑀸𑀚𑀧𑁂𑀬𑁆𑀬𑀁 𑀫𑀳𑀸𑀬𑀜𑁆𑀜𑀁 𑀬𑀚𑀺𑀢𑀁’, 𑀢𑀜𑁆𑀘 𑀧𑀦 𑀭𑀸𑀕𑀯𑀲𑁂𑀦 𑀯𑀺𑀲𑀜𑁆𑀜𑀺𑀦𑀸, 𑀦𑁄 𑀲𑀘𑁂𑀢𑀦𑁂𑀦𑀸’’𑀢𑀺.

‘‘𑀅𑀝𑁆𑀞𑀺𑀫𑁂, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀧𑀼𑀕𑁆𑀕𑀮𑀸 𑀧𑀸𑀡𑀁 𑀳𑀦𑀦𑁆𑀢𑀺. 𑀓𑀢𑀫𑁂 𑀅𑀝𑁆𑀞? 𑀭𑀢𑁆𑀢𑁄 𑀭𑀸𑀕𑀯𑀲𑁂𑀦 𑀧𑀸𑀡𑀁 𑀳𑀦𑀢𑀺, 𑀤𑀼𑀝𑁆𑀞𑁄 𑀤𑁄𑀲𑀯𑀲𑁂𑀦 𑀧𑀸𑀡𑀁 𑀳𑀦𑀢𑀺, 𑀫𑀽𑀴𑁆𑀳𑁄 𑀫𑁄𑀳𑀯𑀲𑁂𑀦 𑀧𑀸𑀡𑀁 𑀳𑀦𑀢𑀺, 𑀫𑀸𑀦𑀻 𑀫𑀸𑀦𑀯𑀲𑁂𑀦 𑀧𑀸𑀡𑀁 𑀳𑀦𑀢𑀺, 𑀮𑀼𑀤𑁆𑀥𑁄 𑀮𑁄𑀪𑀯𑀲𑁂𑀦 𑀧𑀸𑀡𑀁 𑀳𑀦𑀢𑀺, 𑀅𑀓𑀺𑀜𑁆𑀘𑀦𑁄 𑀚𑀻𑀯𑀺𑀓𑀢𑁆𑀣𑀸𑀬 𑀧𑀸𑀡𑀁 𑀳𑀦𑀢𑀺, 𑀩𑀸𑀮𑁄 𑀳𑀲𑁆𑀲𑀯𑀲𑁂𑀦 [𑀅𑀜𑁆𑀜𑀸𑀡𑀯𑀲𑁂𑀦 (𑀓. 𑀲𑀻.)] 𑀧𑀸𑀡𑀁 𑀳𑀦𑀢𑀺, 𑀭𑀸𑀚𑀸 𑀯𑀺𑀦𑀬𑀦𑀯𑀲𑁂𑀦 𑀧𑀸𑀡𑀁 𑀳𑀦𑀢𑀺. 𑀇𑀫𑁂 𑀔𑁄, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀅𑀝𑁆𑀞 𑀧𑀼𑀕𑁆𑀕𑀮𑀸 𑀧𑀸𑀡𑀁 𑀳𑀦𑀦𑁆𑀢𑀺. 𑀧𑀸𑀓𑀢𑀺𑀓𑀁 𑀬𑁂𑀯, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀩𑁄𑀥𑀺𑀲𑀢𑁆𑀢𑁂𑀦 𑀓𑀢’’𑀦𑁆𑀢𑀺. ‘‘𑀦, 𑀫𑀳𑀸𑀭𑀸𑀚, 𑀧𑀸𑀓𑀢𑀺𑀓𑀁 𑀩𑁄𑀥𑀺𑀲𑀢𑁆𑀢𑁂𑀦 𑀓𑀢𑀁, 𑀬𑀤𑀺, 𑀫𑀳𑀸𑀭𑀸𑀚, 𑀩𑁄𑀥𑀺𑀲𑀢𑁆𑀢𑁄 𑀧𑀓𑀢𑀺𑀪𑀸𑀯𑁂𑀦 𑀑𑀦𑀫𑁂𑀬𑁆𑀬 𑀫𑀳𑀸𑀬𑀜𑁆𑀜𑀁 𑀬𑀚𑀺𑀢𑀼𑀁, 𑀦 𑀬𑀺𑀫𑀁 𑀕𑀸𑀣𑀁 𑀪𑀡𑁂𑀬𑁆𑀬 𑁋

‘‘‘𑀲𑀲𑀫𑀼𑀤𑁆𑀤𑀧𑀭𑀺𑀬𑀸𑀬𑀁, 𑀫𑀳𑀺𑀁 𑀲𑀸𑀕𑀭𑀓𑀼𑀡𑁆𑀟𑀮𑀁;

𑀦 𑀇𑀘𑁆𑀙𑁂 𑀲𑀳 𑀦𑀺𑀦𑁆𑀤𑀸𑀬, 𑀏𑀯𑀁 𑀲𑁂𑀬𑁆𑀳 [𑀲𑀬𑁆𑀳 (𑀲𑀻. 𑀧𑀻.)] 𑀯𑀺𑀚𑀸𑀦𑀳𑀻’𑀢𑀺.

‘‘𑀏𑀯𑀁𑀯𑀸𑀤𑀻, 𑀫𑀳𑀸𑀭𑀸𑀚, 𑀩𑁄𑀥𑀺𑀲𑀢𑁆𑀢𑁄 𑀲𑀳 𑀤𑀲𑁆𑀲𑀦𑁂𑀦 𑀘𑀦𑁆𑀤𑀯𑀢𑀺𑀬𑀸 𑀭𑀸𑀚𑀓𑀜𑁆𑀜𑀸𑀬 𑀯𑀺𑀲𑀜𑁆𑀜𑀻 𑀅𑀳𑁄𑀲𑀺 𑀔𑀺𑀢𑁆𑀢𑀘𑀺𑀢𑁆𑀢𑁄 𑀭𑀢𑁆𑀢𑁄 𑀯𑀺𑀲𑀜𑁆𑀜𑀺𑀪𑀽𑀢𑁄 𑀆𑀓𑀼𑀮𑀸𑀓𑀼𑀮𑁄 𑀢𑀼𑀭𑀺𑀢𑀢𑀼𑀭𑀺𑀢𑁄 𑀢𑁂𑀦 𑀯𑀺𑀓𑁆𑀔𑀺𑀢𑁆𑀢𑀪𑀦𑁆𑀢𑀮𑀼𑀴𑀺𑀢𑀘𑀺𑀢𑁆𑀢𑁂𑀦 𑀫𑀳𑀢𑀺𑀫𑀳𑀸𑀧𑀲𑀼𑀖𑀸𑀢𑀕𑀮𑀭𑀼𑀳𑀺𑀭𑀲𑀜𑁆𑀘𑀬𑀁 𑀯𑀸𑀚𑀧𑁂𑀬𑁆𑀬𑀁 𑀫𑀳𑀸𑀬𑀜𑁆𑀜𑀁 𑀬𑀚𑀺.

‘‘𑀬𑀣𑀸, 𑀫𑀳𑀸𑀭𑀸𑀚, 𑀉𑀫𑁆𑀫𑀢𑁆𑀢𑀓𑁄 𑀔𑀺𑀢𑁆𑀢𑀘𑀺𑀢𑁆𑀢𑁄 𑀚𑀮𑀺𑀢𑀫𑁆𑀧𑀺 𑀚𑀸𑀢𑀯𑁂𑀤𑀁 𑀅𑀓𑁆𑀓𑀫𑀢𑀺, 𑀓𑀼𑀧𑀺𑀢𑀫𑁆𑀧𑀺 𑀆𑀲𑀻𑀯𑀺𑀲𑀁 𑀕𑀡𑁆𑀳𑀸𑀢𑀺, 𑀫𑀢𑁆𑀢𑀫𑁆𑀧𑀺 𑀳𑀢𑁆𑀣𑀺𑀁 𑀉𑀧𑁂𑀢𑀺, 𑀲𑀫𑀼𑀤𑁆𑀤𑀫𑁆𑀧𑀺 𑀅𑀢𑀻𑀭𑀤𑀲𑁆𑀲𑀺𑀁 𑀧𑀓𑁆𑀔𑀦𑁆𑀤𑀢𑀺, 𑀘𑀦𑁆𑀤𑀦𑀺𑀓𑀫𑁆𑀧𑀺 𑀑𑀴𑀺𑀕𑀮𑁆𑀮𑀫𑁆𑀧𑀺 𑀑𑀫𑀤𑁆𑀤𑀢𑀺, 𑀓𑀡𑁆𑀝𑀓𑀸𑀥𑀸𑀦𑀫𑁆𑀧𑀺 𑀅𑀪𑀺𑀭𑀼𑀳𑀢𑀺, 𑀧𑀧𑀸𑀢𑁂𑀧𑀺 𑀧𑀢𑀢𑀺, 𑀅𑀲𑀼𑀘𑀺𑀫𑁆𑀧𑀺 𑀪𑀓𑁆𑀔𑁂𑀢𑀺, 𑀦𑀕𑁆𑀕𑁄𑀧𑀺 𑀭𑀣𑀺𑀬𑀸 𑀘𑀭𑀢𑀺, 𑀅𑀜𑁆𑀜𑀫𑁆𑀧𑀺 𑀩𑀳𑀼𑀯𑀺𑀥𑀁 𑀅𑀓𑀺𑀭𑀺𑀬𑀁 𑀓𑀭𑁄𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀩𑁄𑀥𑀺𑀲𑀢𑁆𑀢𑁄 𑀲𑀳 𑀤𑀲𑁆𑀲𑀦𑁂𑀦 𑀘𑀦𑁆𑀤𑀯𑀢𑀺𑀬𑀸 𑀭𑀸𑀚𑀓𑀜𑁆𑀜𑀸𑀬 𑀯𑀺𑀲𑀜𑁆𑀜𑀻 𑀅𑀳𑁄𑀲𑀺 𑀔𑀺𑀢𑁆𑀢𑀘𑀺𑀢𑁆𑀢𑁄 𑀭𑀢𑁆𑀢𑁄 𑀯𑀺𑀲𑀜𑁆𑀜𑀺𑀪𑀽𑀢𑁄 𑀆𑀓𑀼𑀮𑀸𑀓𑀼𑀮𑁄 𑀢𑀼𑀭𑀺𑀢𑀢𑀼𑀭𑀺𑀢𑁄, 𑀢𑁂𑀦 𑀯𑀺𑀓𑁆𑀔𑀺𑀢𑁆𑀢𑀪𑀦𑁆𑀢𑀮𑀼𑀴𑀺𑀢𑀘𑀺𑀢𑁆𑀢𑁂𑀦 𑀫𑀳𑀢𑀺𑀫𑀳𑀸𑀧𑀲𑀼𑀖𑀸𑀢𑀕𑀮𑀭𑀼𑀳𑀺𑀭𑀲𑀜𑁆𑀘𑀬𑀁 𑀯𑀸𑀚𑀧𑁂𑀬𑁆𑀬𑀁 𑀫𑀳𑀸𑀬𑀜𑁆𑀜𑀁 𑀬𑀚𑀺.

‘‘𑀔𑀺𑀢𑁆𑀢𑀘𑀺𑀢𑁆𑀢𑁂𑀦, 𑀫𑀳𑀸𑀭𑀸𑀚, 𑀓𑀢𑀁 𑀧𑀸𑀧𑀁 𑀤𑀺𑀝𑁆𑀞𑀥𑀫𑁆𑀫𑁂𑀧𑀺 𑀦 𑀫𑀳𑀸𑀲𑀸𑀯𑀚𑁆𑀚𑀁 𑀳𑁄𑀢𑀺, 𑀲𑀫𑁆𑀧𑀭𑀸𑀬𑁂 𑀯𑀺𑀧𑀸𑀓𑁂𑀦𑀧𑀺 𑀦𑁄 𑀢𑀣𑀸. 𑀇𑀥, 𑀫𑀳𑀸𑀭𑀸𑀚, 𑀓𑁄𑀘𑀺 𑀉𑀫𑁆𑀫𑀢𑁆𑀢𑀓𑁄 𑀯𑀚𑁆𑀛𑀫𑀸𑀧𑀚𑁆𑀚𑁂𑀬𑁆𑀬, 𑀢𑀲𑁆𑀲 𑀢𑀼𑀫𑁆𑀳𑁂 𑀓𑀺𑀁 𑀤𑀡𑁆𑀟𑀁 𑀥𑀸𑀭𑁂𑀣𑀸’’𑀢𑀺? ‘‘𑀓𑁄, 𑀪𑀦𑁆𑀢𑁂, 𑀉𑀫𑁆𑀫𑀢𑁆𑀢𑀓𑀲𑁆𑀲 𑀤𑀡𑁆𑀟𑁄 𑀪𑀯𑀺𑀲𑁆𑀲𑀢𑀺, 𑀢𑀁 𑀫𑀬𑀁 𑀧𑁄𑀣𑀸𑀧𑁂𑀢𑁆𑀯𑀸 𑀦𑀻𑀳𑀭𑀸𑀧𑁂𑀫, 𑀏𑀲𑁄𑀯 𑀢𑀲𑁆𑀲 𑀤𑀡𑁆𑀟𑁄’’𑀢𑀺. ‘‘𑀇𑀢𑀺 𑀔𑁄, 𑀫𑀳𑀸𑀭𑀸𑀚, 𑀉𑀫𑁆𑀫𑀢𑁆𑀢𑀓𑀲𑁆𑀲 𑀅𑀧𑀭𑀸𑀥𑁂 𑀤𑀡𑁆𑀟𑁄𑀧𑀺 𑀦 𑀪𑀯𑀢𑀺, 𑀢𑀲𑁆𑀫𑀸 𑀉𑀫𑁆𑀫𑀢𑁆𑀢𑀓𑀲𑁆𑀲 𑀓𑀢𑁂𑀧𑀺 𑀦 𑀤𑁄𑀲𑁄 𑀪𑀯𑀢𑀺 𑀲𑀢𑁂𑀓𑀺𑀘𑁆𑀙𑁄. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀮𑁄𑀫𑀲𑀓𑀲𑁆𑀲𑀧𑁄 𑀇𑀲𑀺 𑀲𑀳 𑀤𑀲𑁆𑀲𑀦𑁂𑀦 𑀘𑀦𑁆𑀤𑀯𑀢𑀺𑀬𑀸 𑀭𑀸𑀚𑀓𑀜𑁆𑀜𑀸𑀬 𑀯𑀺𑀲𑀜𑁆𑀜𑀻 𑀅𑀳𑁄𑀲𑀺 𑀔𑀺𑀢𑁆𑀢𑀘𑀺𑀢𑁆𑀢𑁄 𑀭𑀢𑁆𑀢𑁄 𑀯𑀺𑀲𑀜𑁆𑀜𑀺𑀪𑀽𑀢𑁄 𑀯𑀺𑀲𑀝𑀧𑀬𑀸𑀢𑁄 𑀆𑀓𑀼𑀮𑀸𑀓𑀼𑀮𑁄 𑀢𑀼𑀭𑀺𑀢𑀢𑀼𑀭𑀺𑀢𑁄, 𑀢𑁂𑀦 𑀯𑀺𑀓𑁆𑀔𑀺𑀢𑁆𑀢𑀪𑀦𑁆𑀢𑀮𑀼𑀴𑀺𑀢𑀘𑀺𑀢𑁆𑀢𑁂𑀦 𑀫𑀳𑀢𑀺𑀫𑀳𑀸𑀧𑀲𑀼𑀖𑀸𑀢𑀕𑀮𑀭𑀼𑀳𑀺𑀭𑀲𑀜𑁆𑀘𑀬𑀁 𑀯𑀸𑀚𑀧𑁂𑀬𑁆𑀬𑀁 𑀫𑀳𑀸𑀬𑀜𑁆𑀜𑀁 𑀬𑀚𑀺. 𑀬𑀤𑀸 𑀘 𑀧𑀦 𑀧𑀓𑀢𑀺𑀘𑀺𑀢𑁆𑀢𑁄 𑀅𑀳𑁄𑀲𑀺 𑀧𑀝𑀺𑀮𑀤𑁆𑀥𑀲𑁆𑀲𑀢𑀺, 𑀢𑀤𑀸 𑀧𑀼𑀦𑀤𑁂𑀯 𑀧𑀩𑁆𑀩𑀚𑀺𑀢𑁆𑀯𑀸 𑀧𑀜𑁆𑀘𑀸𑀪𑀺𑀜𑁆𑀜𑀸𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀽𑀧𑀕𑁄 𑀅𑀳𑁄𑀲𑀻’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀏𑀯𑀫𑁂𑀢𑀁 𑀢𑀣𑀸 𑀲𑀫𑁆𑀧𑀝𑀺𑀘𑁆𑀙𑀸𑀫𑀻’’𑀢𑀺.

𑀩𑀼𑀤𑁆𑀥𑀅𑀯𑀺𑀳𑁂𑀞𑀓𑀧𑀜𑁆𑀳𑁄 𑀧𑀜𑁆𑀘𑀫𑁄.

𑁬. 𑀙𑀤𑁆𑀤𑀦𑁆𑀢𑀚𑁄𑀢𑀺𑀧𑀸𑀮𑀸𑀭𑀩𑁆𑀪𑀧𑀜𑁆𑀳𑁄

𑁬. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀪𑀸𑀲𑀺𑀢𑀫𑁆𑀧𑁂𑀢𑀁 𑀪𑀕𑀯𑀢𑀸 𑀙𑀤𑁆𑀤𑀦𑁆𑀢𑁄 𑀦𑀸𑀕𑀭𑀸𑀚𑀸 𑁋

‘‘‘𑀯𑀥𑀺𑀲𑁆𑀲𑀫𑁂𑀢𑀦𑁆𑀢𑀺 𑀧𑀭𑀸𑀫𑀲𑀦𑁆𑀢𑁄, 𑀓𑀸𑀲𑀸𑀯𑀫𑀤𑁆𑀤𑀓𑁆𑀔𑀺 𑀥𑀚𑀁 𑀇𑀲𑀻𑀦𑀁;

𑀤𑀼𑀓𑁆𑀔𑁂𑀦 𑀨𑀼𑀝𑁆𑀞𑀲𑁆𑀲𑀼𑀤𑀧𑀸𑀤𑀺 𑀲𑀜𑁆𑀜𑀸, 𑀅𑀭𑀳𑀤𑁆𑀥𑀚𑁄 𑀲𑀩𑁆𑀪𑀺 𑀅𑀯𑀚𑁆𑀛𑀭𑀽𑀧𑁄’𑀢𑀺.

‘‘𑀧𑀼𑀦 𑀘 𑀪𑀡𑀺𑀢𑀁 ‘𑀚𑁄𑀢𑀺𑀧𑀸𑀮𑀫𑀸𑀡𑀯𑁄 𑀲𑀫𑀸𑀦𑁄 𑀓𑀲𑁆𑀲𑀧𑀁 𑀪𑀕𑀯𑀦𑁆𑀢𑀁 𑀅𑀭𑀳𑀦𑁆𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀫𑀼𑀡𑁆𑀟𑀓𑀯𑀸𑀤𑁂𑀦 𑀲𑀫𑀡𑀓𑀯𑀸𑀤𑁂𑀦 𑀅𑀲𑀩𑁆𑀪𑀸𑀳𑀺 𑀨𑀭𑀼𑀲𑀸𑀳𑀺 𑀯𑀸𑀘𑀸𑀳𑀺 𑀅𑀓𑁆𑀓𑁄𑀲𑀺 𑀧𑀭𑀺𑀪𑀸𑀲𑀻’𑀢𑀺. 𑀬𑀤𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀩𑁄𑀥𑀺𑀲𑀢𑁆𑀢𑁄 𑀢𑀺𑀭𑀘𑁆𑀙𑀸𑀦𑀕𑀢𑁄 𑀲𑀫𑀸𑀦𑁄 𑀓𑀸𑀲𑀸𑀯𑀁 𑀅𑀪𑀺𑀧𑀽𑀚𑀬𑀺, 𑀢𑁂𑀦 𑀳𑀺 ‘𑀚𑁄𑀢𑀺𑀧𑀸𑀮𑁂𑀦 𑀫𑀸𑀡𑀯𑁂𑀦 𑀓𑀲𑁆𑀲𑀧𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀫𑀼𑀡𑁆𑀟𑀓𑀯𑀸𑀤𑁂𑀦 𑀲𑀫𑀡𑀓𑀯𑀸𑀤𑁂𑀦 𑀅𑀲𑀩𑁆𑀪𑀸𑀳𑀺 𑀨𑀭𑀼𑀲𑀸𑀳𑀺 𑀯𑀸𑀘𑀸𑀳𑀺 𑀅𑀓𑁆𑀓𑀼𑀝𑁆𑀞𑁄 𑀧𑀭𑀺𑀪𑀸𑀲𑀺𑀢𑁄’𑀢𑀺 𑀬𑀁 𑀯𑀘𑀦𑀁, 𑀢𑀁 𑀫𑀺𑀘𑁆𑀙𑀸. 𑀬𑀤𑀺 𑀚𑁄𑀢𑀺𑀧𑀸𑀮𑁂𑀦 𑀫𑀸𑀡𑀯𑁂𑀦 𑀓𑀲𑁆𑀲𑀧𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀫𑀼𑀡𑁆𑀟𑀓𑀯𑀸𑀤𑁂𑀦 𑀲𑀫𑀡𑀓𑀯𑀸𑀤𑁂𑀦 𑀅𑀲𑀩𑁆𑀪𑀸𑀳𑀺 𑀨𑀭𑀼𑀲𑀸𑀳𑀺 𑀯𑀸𑀘𑀸𑀳𑀺 𑀅𑀓𑁆𑀓𑀼𑀝𑁆𑀞𑁄 𑀧𑀭𑀺𑀪𑀸𑀲𑀺𑀢𑁄, 𑀢𑁂𑀦 𑀳𑀺 ‘𑀙𑀤𑁆𑀤𑀦𑁆𑀢𑁂𑀦 𑀦𑀸𑀕𑀭𑀸𑀚𑁂𑀦 𑀓𑀸𑀲𑀸𑀯𑀁 𑀧𑀽𑀚𑀺𑀢’𑀦𑁆𑀢𑀺 𑀢𑀫𑁆𑀧𑀺 𑀯𑀘𑀦𑀁 𑀫𑀺𑀘𑁆𑀙𑀸. 𑀬𑀤𑀺 𑀢𑀺𑀭𑀘𑁆𑀙𑀸𑀦𑀕𑀢𑁂𑀦 𑀩𑁄𑀥𑀺𑀲𑀢𑁆𑀢𑁂𑀦 𑀓𑀓𑁆𑀔𑀴𑀔𑀭𑀓𑀝𑀼𑀓𑀯𑁂𑀤𑀦𑀁 𑀯𑁂𑀤𑀬𑀫𑀸𑀦𑁂𑀦 𑀮𑀼𑀤𑁆𑀤𑀓𑁂𑀦 𑀦𑀺𑀯𑀢𑁆𑀣𑀁 𑀓𑀸𑀲𑀸𑀯𑀁 𑀧𑀽𑀚𑀺𑀢𑀁, 𑀓𑀺𑀁 𑀫𑀦𑀼𑀲𑁆𑀲𑀪𑀽𑀢𑁄 𑀲𑀫𑀸𑀦𑁄 𑀧𑀭𑀺𑀧𑀓𑁆𑀓𑀜𑀸𑀡𑁄 𑀧𑀭𑀺𑀧𑀓𑁆𑀓𑀸𑀬 𑀩𑁄𑀥𑀺𑀬𑀸 𑀓𑀲𑁆𑀲𑀧𑀁 𑀪𑀕𑀯𑀦𑁆𑀢𑀁 𑀅𑀭𑀳𑀦𑁆𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀤𑀲𑀩𑀮𑀁 𑀮𑁄𑀓𑀦𑀸𑀬𑀓𑀁 𑀉𑀤𑀺𑀢𑁄𑀤𑀺𑀢𑀁 𑀚𑀮𑀺𑀢𑀩𑁆𑀬𑀸𑀫𑁄𑀪𑀸𑀲𑀁 𑀧𑀯𑀭𑀼𑀢𑁆𑀢𑀫𑀁 𑀧𑀯𑀭𑀭𑀼𑀘𑀺𑀭𑀓𑀸𑀲𑀺𑀓𑀓𑀸𑀲𑀸𑀯𑀫𑀪𑀺𑀧𑀸𑀭𑀼𑀢𑀁 𑀤𑀺𑀲𑁆𑀯𑀸 𑀦 𑀧𑀽𑀚𑀬𑀺? 𑀅𑀬𑀫𑁆𑀧𑀺 𑀉𑀪𑀢𑁄 𑀓𑁄𑀝𑀺𑀓𑁄 𑀧𑀜𑁆𑀳𑁄 𑀢𑀯𑀸𑀦𑀼𑀧𑁆𑀧𑀢𑁆𑀢𑁄, 𑀲𑁄 𑀢𑀬𑀸 𑀦𑀺𑀩𑁆𑀩𑀸𑀳𑀺𑀢𑀩𑁆𑀩𑁄𑀢𑀺.

‘‘𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑀙𑀤𑁆𑀤𑀦𑁆𑀢𑁄 𑀦𑀸𑀕𑀭𑀸𑀚𑀸 ‘𑀯𑀥𑀺𑀲𑁆𑀲𑀫𑁂𑀢𑀦𑁆𑀢𑀺…𑀧𑁂… 𑀅𑀯𑀚𑁆𑀛𑀭𑀽𑀧𑁄’𑀢𑀺. 𑀚𑁄𑀢𑀺𑀧𑀸𑀮𑁂𑀦 𑀘 𑀫𑀸𑀡𑀯𑁂𑀦 𑀓𑀲𑁆𑀲𑀧𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀫𑀼𑀡𑁆𑀟𑀓𑀯𑀸𑀤𑁂𑀦 𑀲𑀫𑀡𑀓𑀯𑀸𑀤𑁂𑀦 𑀅𑀲𑀩𑁆𑀪𑀸𑀳𑀺 𑀨𑀭𑀼𑀲𑀸𑀳𑀺 𑀯𑀸𑀘𑀸𑀳𑀺 𑀅𑀓𑁆𑀓𑀼𑀝𑁆𑀞𑁄 𑀧𑀭𑀺𑀪𑀸𑀲𑀺𑀢𑁄, 𑀢𑀜𑁆𑀘 𑀧𑀦 𑀚𑀸𑀢𑀺𑀯𑀲𑁂𑀦 𑀓𑀼𑀮𑀯𑀲𑁂𑀦. 𑀚𑁄𑀢𑀺𑀧𑀸𑀮𑁄, 𑀫𑀳𑀸𑀭𑀸𑀚, 𑀫𑀸𑀡𑀯𑁄 𑀅𑀲𑁆𑀲𑀤𑁆𑀥𑁂 𑀅𑀧𑁆𑀧𑀲𑀦𑁆𑀦𑁂 𑀓𑀼𑀮𑁂 𑀧𑀘𑁆𑀘𑀸𑀚𑀸𑀢𑁄, 𑀢𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀪𑀕𑀺𑀦𑀺𑀪𑀸𑀢𑀭𑁄 𑀤𑀸𑀲𑀺𑀤𑀸𑀲𑀘𑁂𑀝𑀓𑀧𑀭𑀺𑀯𑀸𑀭𑀓𑀫𑀦𑀼𑀲𑁆𑀲𑀸 𑀩𑁆𑀭𑀳𑁆𑀫𑀤𑁂𑀯𑀢𑀸 𑀩𑁆𑀭𑀳𑁆𑀫𑀕𑀭𑀼𑀓𑀸, 𑀢𑁂 ‘𑀩𑁆𑀭𑀸𑀳𑁆𑀫𑀡𑀸 𑀏𑀯 𑀉𑀢𑁆𑀢𑀫𑀸 𑀧𑀯𑀭𑀸’𑀢𑀺 𑀅𑀯𑀲𑁂𑀲𑁂 𑀧𑀩𑁆𑀩𑀚𑀺𑀢𑁂 𑀕𑀭𑀳𑀦𑁆𑀢𑀺 𑀚𑀺𑀕𑀼𑀘𑁆𑀙𑀦𑁆𑀢𑀺, 𑀢𑁂𑀲𑀁 𑀢𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀚𑁄𑀢𑀺𑀧𑀸𑀮𑁄 𑀫𑀸𑀡𑀯𑁄 𑀖𑀝𑀺𑀓𑀸𑀭𑁂𑀦 𑀓𑀼𑀫𑁆𑀪𑀓𑀸𑀭𑁂𑀦 𑀲𑀢𑁆𑀣𑀸𑀭𑀁 𑀤𑀲𑁆𑀲𑀦𑀸𑀬 𑀧𑀓𑁆𑀓𑁄𑀲𑀺𑀢𑁄 𑀏𑀯𑀫𑀸𑀳 ‘𑀓𑀺𑀁 𑀧𑀦 𑀢𑁂𑀦 𑀫𑀼𑀡𑁆𑀟𑀓𑁂𑀦 𑀲𑀫𑀡𑀓𑁂𑀦 𑀤𑀺𑀝𑁆𑀞𑁂𑀦𑀸’𑀢𑀺.

‘‘𑀬𑀣𑀸, 𑀫𑀳𑀸𑀭𑀸𑀚, 𑀅𑀫𑀢𑀁 𑀯𑀺𑀲𑀫𑀸𑀲𑀚𑁆𑀚 𑀢𑀺𑀢𑁆𑀢𑀓𑀁 𑀳𑁄𑀢𑀺, 𑀬𑀣𑀸 𑀘 𑀲𑀻𑀢𑁄𑀤𑀓𑀁 𑀅𑀕𑁆𑀕𑀺𑀫𑀸𑀲𑀚𑁆𑀚 𑀉𑀡𑁆𑀳𑀁 𑀳𑁄𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀚𑁄𑀢𑀺𑀧𑀸𑀮𑁄 𑀫𑀸𑀡𑀯𑁄 𑀅𑀲𑁆𑀲𑀤𑁆𑀥𑁂 𑀅𑀧𑁆𑀧𑀲𑀦𑁆𑀦𑁂 𑀓𑀼𑀮𑁂 𑀧𑀘𑁆𑀘𑀸𑀚𑀸𑀢𑁄, 𑀲𑁄 𑀓𑀼𑀮𑀯𑀲𑁂𑀦 𑀅𑀦𑁆𑀥𑁄 𑀳𑀼𑀢𑁆𑀯𑀸 [𑀲𑁄 𑀓𑀼𑀮𑀚𑀸𑀢𑀺𑀯𑀲𑁂𑀦 𑀅𑀦𑁆𑀥𑁄 𑀪𑀯𑀺𑀢𑁆𑀯𑀸 (𑀲𑁆𑀬𑀸.)] 𑀢𑀣𑀸𑀕𑀢𑀁 𑀅𑀓𑁆𑀓𑁄𑀲𑀺 𑀧𑀭𑀺𑀪𑀸𑀲𑀺.

‘‘𑀬𑀣𑀸, 𑀫𑀳𑀸𑀭𑀸𑀚, 𑀚𑀮𑀺𑀢𑀧𑀚𑁆𑀚𑀮𑀺𑀢𑁄 𑀫𑀳𑀸𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀲𑀧𑁆𑀧𑀪𑀸𑀲𑁄 𑀉𑀤𑀓𑀫𑀸𑀲𑀚𑁆𑀚 𑀉𑀧𑀳𑀢𑀧𑁆𑀧𑀪𑀸𑀢𑁂𑀚𑁄 𑀲𑀻𑀢𑀮𑁄 𑀓𑀸𑀴𑀓𑁄 𑀪𑀯𑀢𑀺 𑀧𑀭𑀺𑀧𑀓𑁆𑀓𑀦𑀺𑀕𑁆𑀕𑀼𑀡𑁆𑀟𑀺𑀨𑀮𑀲𑀤𑀺𑀲𑁄, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀚𑁄𑀢𑀺𑀧𑀸𑀮𑁄 𑀫𑀸𑀡𑀯𑁄 𑀧𑀼𑀜𑁆𑀜𑀯𑀸 𑀲𑀤𑁆𑀥𑁄 𑀜𑀸𑀡𑀯𑀺𑀧𑀼𑀮𑀲𑀧𑁆𑀧𑀪𑀸𑀲𑁄 𑀅𑀲𑁆𑀲𑀤𑁆𑀥𑁂 𑀅𑀧𑁆𑀧𑀲𑀦𑁆𑀦𑁂 𑀓𑀼𑀮𑁂 𑀧𑀘𑁆𑀘𑀸𑀚𑀸𑀢𑁄, 𑀲𑁄 𑀓𑀼𑀮𑀯𑀲𑁂𑀦 𑀅𑀦𑁆𑀥𑁄 𑀳𑀼𑀢𑁆𑀯𑀸 𑀢𑀣𑀸𑀕𑀢𑀁 𑀅𑀓𑁆𑀓𑁄𑀲𑀺 𑀧𑀭𑀺𑀪𑀸𑀲𑀺, 𑀉𑀧𑀕𑀦𑁆𑀢𑁆𑀯𑀸 𑀘 𑀩𑀼𑀤𑁆𑀥𑀕𑀼𑀡𑀫𑀜𑁆𑀜𑀸𑀬 𑀘𑁂𑀝𑀓𑀪𑀽𑀢𑁄 𑀯𑀺𑀬 𑀅𑀳𑁄𑀲𑀺, 𑀚𑀺𑀦𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀅𑀪𑀺𑀜𑁆𑀜𑀸 𑀘 𑀲𑀫𑀸𑀧𑀢𑁆𑀢𑀺𑀬𑁄 𑀘 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀽𑀧𑀕𑁄 𑀅𑀳𑁄𑀲𑀻’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀏𑀯𑀫𑁂𑀢𑀁 𑀢𑀣𑀸 𑀲𑀫𑁆𑀧𑀝𑀺𑀘𑁆𑀙𑀸𑀫𑀻’’𑀢𑀺.

𑀙𑀤𑁆𑀤𑀦𑁆𑀢𑀚𑁄𑀢𑀺𑀧𑀸𑀮𑀸𑀭𑀩𑁆𑀪𑀧𑀜𑁆𑀳𑁄 𑀙𑀝𑁆𑀞𑁄.

𑁭. 𑀖𑀝𑀺𑀓𑀸𑀭𑀧𑀜𑁆𑀳𑁄

𑁭. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀪𑀸𑀲𑀺𑀢𑀫𑁆𑀧𑁂𑀢𑀁 𑀪𑀕𑀯𑀢𑀸 ‘𑀖𑀝𑀺𑀓𑀸𑀭𑀲𑁆𑀲 𑀓𑀼𑀫𑁆𑀪𑀓𑀸𑀭𑀲𑁆𑀲 𑀆𑀯𑁂𑀲𑀦𑀁 𑀲𑀩𑁆𑀩𑀁 𑀢𑁂𑀫𑀸𑀲𑀁 𑀆𑀓𑀸𑀲𑀘𑁆𑀙𑀤𑀦𑀁 𑀅𑀝𑁆𑀞𑀸𑀲𑀺, 𑀦 𑀤𑁂𑀯𑁄𑀢𑀺𑀯𑀲𑁆𑀲𑀻’𑀢𑀺. 𑀧𑀼𑀦 𑀘 𑀪𑀡𑀺𑀢𑀁 ‘𑀓𑀲𑁆𑀲𑀧𑀲𑁆𑀲 𑀢𑀣𑀸𑀕𑀢𑀲𑁆𑀲 [𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 (𑀫. 𑀦𑀺. 𑁨.𑁨𑁮𑁯)] 𑀓𑀼𑀝𑀺 𑀑𑀯𑀲𑁆𑀲𑀢𑀻’𑀢𑀺. 𑀓𑀺𑀲𑁆𑀲 𑀧𑀦, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀢𑀣𑀸𑀕𑀢𑀲𑁆𑀲 𑀏𑀯𑀫𑀼𑀲𑁆𑀲𑀦𑁆𑀦𑀓𑀼𑀲𑀮𑀫𑀽𑀮𑀲𑁆𑀲 [𑀏𑀯𑀭𑀽𑀧𑀲𑁆𑀲 𑀉𑀲𑁆𑀲𑀦𑁆𑀦𑀓𑀼𑀲𑀮𑀫𑀽𑀮𑀲𑁆𑀲 (𑀓.)] 𑀓𑀼𑀝𑀺 𑀑𑀯𑀲𑁆𑀲𑀢𑀺, 𑀢𑀣𑀸𑀕𑀢𑀲𑁆𑀲 𑀦𑀸𑀫 𑀲𑁄 𑀆𑀦𑀼𑀪𑀸𑀯𑁄 𑀇𑀘𑁆𑀙𑀺𑀢𑀩𑁆𑀩𑁄? 𑀬𑀤𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀖𑀝𑀺𑀓𑀸𑀭𑀲𑁆𑀲 𑀓𑀼𑀫𑁆𑀪𑀓𑀸𑀭𑀲𑁆𑀲 𑀆𑀯𑁂𑀲𑀦𑀁 𑀅𑀦𑁄𑀯𑀲𑁆𑀲𑀁 𑀆𑀓𑀸𑀲𑀘𑁆𑀙𑀤𑀦𑀁 𑀅𑀳𑁄𑀲𑀺, 𑀢𑁂𑀦 𑀳𑀺 ‘𑀢𑀣𑀸𑀕𑀢𑀲𑁆𑀲 𑀓𑀼𑀝𑀺 𑀑𑀯𑀲𑁆𑀲𑀢𑀻’𑀢𑀺 𑀬𑀁 𑀯𑀘𑀦𑀁, 𑀢𑀁 𑀫𑀺𑀘𑁆𑀙𑀸. 𑀬𑀤𑀺 𑀢𑀣𑀸𑀕𑀢𑀲𑁆𑀲 𑀓𑀼𑀝𑀺 𑀑𑀯𑀲𑁆𑀲𑀢𑀺, 𑀢𑁂𑀦 𑀳𑀺 ‘𑀖𑀝𑀺𑀓𑀸𑀭𑀲𑁆𑀲 𑀓𑀼𑀫𑁆𑀪𑀓𑀸𑀭𑀲𑁆𑀲 𑀆𑀯𑁂𑀲𑀦𑀁 𑀅𑀦𑁄𑀯𑀲𑁆𑀲𑀓𑀁 𑀅𑀳𑁄𑀲𑀺 𑀆𑀓𑀸𑀲𑀘𑁆𑀙𑀤𑀦’𑀦𑁆𑀢𑀺 𑀢𑀫𑁆𑀧𑀺 𑀯𑀘𑀦𑀁 𑀫𑀺𑀘𑁆𑀙𑀸. 𑀅𑀬𑀫𑁆𑀧𑀺 𑀉𑀪𑀢𑁄 𑀓𑁄𑀝𑀺𑀓𑁄 𑀧𑀜𑁆𑀳𑁄 𑀢𑀯𑀸𑀦𑀼𑀧𑁆𑀧𑀢𑁆𑀢𑁄, 𑀲𑁄 𑀢𑀬𑀸 𑀦𑀺𑀩𑁆𑀩𑀸𑀳𑀺𑀢𑀩𑁆𑀩𑁄’’𑀢𑀺.

‘‘𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 ‘𑀖𑀝𑀺𑀓𑀸𑀭𑀲𑁆𑀲 𑀓𑀼𑀫𑁆𑀪𑀓𑀸𑀭𑀲𑁆𑀲 𑀆𑀯𑁂𑀲𑀦𑀁 𑀲𑀩𑁆𑀩𑀁 𑀢𑁂𑀫𑀸𑀲𑀁 𑀆𑀓𑀸𑀲𑀘𑁆𑀙𑀤𑀦𑀁 𑀅𑀝𑁆𑀞𑀸𑀲𑀺, 𑀦 𑀤𑁂𑀯𑁄𑀢𑀺𑀯𑀲𑁆𑀲𑀻’𑀢𑀺. 𑀪𑀡𑀺𑀢𑀜𑁆𑀘 ‘𑀓𑀲𑁆𑀲𑀧𑀲𑁆𑀲 𑀢𑀣𑀸𑀕𑀢𑀲𑁆𑀲 𑀓𑀼𑀝𑀺 𑀑𑀯𑀲𑁆𑀲𑀢𑀻’𑀢𑀺. 𑀖𑀝𑀺𑀓𑀸𑀭𑁄, 𑀫𑀳𑀸𑀭𑀸𑀚, 𑀓𑀼𑀫𑁆𑀪𑀓𑀸𑀭𑁄 𑀲𑀻𑀮𑀯𑀸 𑀓𑀮𑁆𑀬𑀸𑀡𑀥𑀫𑁆𑀫𑁄 𑀉𑀲𑁆𑀲𑀦𑁆𑀦𑀓𑀼𑀲𑀮𑀫𑀽𑀮𑁄 𑀅𑀦𑁆𑀥𑁂 𑀚𑀺𑀡𑁆𑀡𑁂 𑀫𑀸𑀢𑀸𑀧𑀺𑀢𑀭𑁄 𑀧𑁄𑀲𑁂𑀢𑀺, 𑀢𑀲𑁆𑀲 𑀅𑀲𑀫𑁆𑀫𑀼𑀔𑀸 𑀅𑀦𑀸𑀧𑀼𑀘𑁆𑀙𑀸𑀬𑁂𑀯𑀲𑁆𑀲 𑀖𑀭𑁂 𑀢𑀺𑀡𑀁 𑀳𑀭𑀺𑀢𑁆𑀯𑀸 𑀪𑀕𑀯𑀢𑁄 𑀓𑀼𑀝𑀺𑀁 𑀙𑀸𑀤𑁂𑀲𑀼𑀁, 𑀲𑁄 𑀢𑁂𑀦 𑀢𑀺𑀡𑀳𑀭𑀡𑁂𑀦 𑀅𑀓𑀫𑁆𑀧𑀺𑀢𑀁 𑀅𑀲𑀜𑁆𑀘𑀮𑀺𑀢𑀁 𑀲𑀼𑀲𑀡𑁆𑀞𑀺𑀢𑀁 𑀯𑀺𑀧𑀼𑀮𑀫𑀲𑀫𑀁 𑀧𑀻𑀢𑀺𑀁 𑀧𑀝𑀺𑀮𑀪𑀢𑀺, 𑀪𑀺𑀬𑁆𑀬𑁄 𑀲𑁄𑀫𑀦𑀲𑁆𑀲𑀜𑁆𑀘 𑀅𑀢𑀼𑀮𑀁 𑀉𑀧𑁆𑀧𑀸𑀤𑁂𑀲𑀺 ‘𑀅𑀳𑁄 𑀯𑀢 𑀫𑁂 𑀪𑀕𑀯𑀸 𑀮𑁄𑀓𑀼𑀢𑁆𑀢𑀫𑁄 𑀲𑀼𑀯𑀺𑀲𑁆𑀲𑀢𑁆𑀣𑁄’𑀢𑀺, 𑀢𑁂𑀦 𑀢𑀲𑁆𑀲 𑀤𑀺𑀝𑁆𑀞𑀥𑀫𑁆𑀫𑀺𑀓𑁄 𑀯𑀺𑀧𑀸𑀓𑁄 𑀦𑀺𑀩𑁆𑀩𑀢𑁆𑀢𑁄. 𑀦 𑀳𑀺, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑁄 𑀢𑀸𑀯𑀢𑀓𑁂𑀦 𑀯𑀺𑀓𑀸𑀭𑁂𑀦 𑀘𑀮𑀢𑀺.

‘‘𑀬𑀣𑀸, 𑀫𑀳𑀸𑀭𑀸𑀚, 𑀲𑀺𑀦𑁂𑀭𑀼 𑀕𑀺𑀭𑀺𑀭𑀸𑀚𑀸 𑀅𑀦𑁂𑀓𑀲𑀢𑀲𑀳𑀲𑁆𑀲𑀯𑀸𑀢𑀲𑀫𑁆𑀧𑀳𑀸𑀭𑁂𑀦𑀧𑀺 𑀦 𑀓𑀫𑁆𑀧𑀢𑀺 𑀦 𑀘𑀮𑀢𑀺, 𑀫𑀳𑁄𑀤𑀥𑀺 𑀯𑀭𑀧𑁆𑀧𑀯𑀭𑀲𑀸𑀕𑀭𑁄 𑀅𑀦𑁂𑀓𑀲𑀢𑀦𑀳𑀼𑀢𑀫𑀳𑀸𑀕𑀗𑁆𑀕𑀸𑀲𑀢𑀲𑀳𑀲𑁆𑀲𑁂𑀳𑀺𑀧𑀺 𑀦 𑀧𑀽𑀭𑀢𑀺 𑀦 𑀯𑀺𑀓𑀸𑀭𑀫𑀸𑀧𑀚𑁆𑀚𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑁄 𑀦 𑀢𑀸𑀯𑀢𑀓𑁂𑀦 𑀯𑀺𑀓𑀸𑀭𑁂𑀦 𑀘𑀮𑀢𑀺.

‘‘𑀬𑀁 𑀧𑀦, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑀲𑁆𑀲 𑀓𑀼𑀝𑀺 𑀑𑀯𑀲𑁆𑀲𑀢𑀺, 𑀢𑀁 𑀫𑀳𑀢𑁄 𑀚𑀦𑀓𑀸𑀬𑀲𑁆𑀲 𑀅𑀦𑀼𑀓𑀫𑁆𑀧𑀸𑀬. 𑀤𑁆𑀯𑁂𑀫𑁂, 𑀫𑀳𑀸𑀭𑀸𑀚, 𑀅𑀢𑁆𑀣𑀯𑀲𑁂 𑀲𑀫𑁆𑀧𑀲𑁆𑀲𑀫𑀸𑀦𑀸 𑀢𑀣𑀸𑀕𑀢𑀸 𑀲𑀬𑀁 𑀦𑀺𑀫𑁆𑀫𑀺𑀢𑀁 𑀧𑀘𑁆𑀘𑀬𑀁 𑀦𑀧𑁆𑀧𑀝𑀺𑀲𑁂𑀯𑀦𑁆𑀢𑀺, ‘𑀅𑀬𑀁 𑀅𑀕𑁆𑀕𑀤𑀓𑁆𑀔𑀺𑀡𑁂𑀬𑁆𑀬𑁄 𑀲𑀢𑁆𑀣𑀸’𑀢𑀺 𑀪𑀕𑀯𑀢𑁄 𑀧𑀘𑁆𑀘𑀬𑀁 𑀤𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑀸 𑀲𑀩𑁆𑀩𑀤𑀼𑀕𑁆𑀕𑀢𑀺𑀢𑁄 𑀧𑀭𑀺𑀫𑀼𑀘𑁆𑀘𑀺𑀲𑁆𑀲𑀦𑁆𑀢𑀻𑀢𑀺, 𑀤𑀲𑁆𑀲𑁂𑀢𑁆𑀯𑀸 𑀯𑀼𑀢𑁆𑀢𑀺𑀁 𑀧𑀭𑀺𑀬𑁂𑀲𑀦𑁆𑀢𑀻𑀢𑀺 ‘𑀫𑀸 𑀅𑀜𑁆𑀜𑁂 𑀉𑀧𑀯𑀤𑁂𑀬𑁆𑀬𑀼’𑀦𑁆𑀢𑀺. 𑀇𑀫𑁂 𑀤𑁆𑀯𑁂 𑀅𑀢𑁆𑀣𑀯𑀲𑁂 𑀲𑀫𑁆𑀧𑀲𑁆𑀲𑀫𑀸𑀦𑀸 𑀢𑀣𑀸𑀕𑀢𑀸 𑀲𑀬𑀁 𑀦𑀺𑀫𑁆𑀫𑀺𑀢𑀁 𑀧𑀘𑁆𑀘𑀬𑀁 𑀦𑀧𑁆𑀧𑀝𑀺𑀲𑁂𑀯𑀦𑁆𑀢𑀺. 𑀬𑀤𑀺, 𑀫𑀳𑀸𑀭𑀸𑀚, 𑀲𑀓𑁆𑀓𑁄 𑀯𑀸 𑀢𑀁 𑀓𑀼𑀝𑀺𑀁 𑀅𑀦𑁄𑀯𑀲𑁆𑀲𑀁 𑀓𑀭𑁂𑀬𑁆𑀬 𑀩𑁆𑀭𑀳𑁆𑀫𑀸 𑀯𑀸 𑀲𑀬𑀁 𑀯𑀸, 𑀲𑀸𑀯𑀚𑁆𑀚𑀁 𑀪𑀯𑁂𑀬𑁆𑀬 𑀢𑀁 𑀬𑁂𑀯 𑀓𑀭𑀡𑀁 [𑀓𑀸𑀭𑀡𑀁 (𑀲𑀻. 𑀧𑀻.)] 𑀲𑀤𑁄𑀲𑀁 𑀲𑀦𑀺𑀕𑁆𑀕𑀳𑀁, 𑀇𑀫𑁂 𑀯𑀺𑀪𑀽𑀢𑀁 [𑀯𑀺𑀪𑀽𑀲𑀁 (𑀲𑀻. 𑀧𑀻.)] 𑀓𑀢𑁆𑀯𑀸 𑀮𑁄𑀓𑀁 𑀲𑀫𑁆𑀫𑁄𑀳𑁂𑀦𑁆𑀢𑀺 𑀅𑀥𑀺𑀓𑀢𑀁 𑀓𑀭𑁄𑀦𑁆𑀢𑀻𑀢𑀺, 𑀢𑀲𑁆𑀫𑀸 𑀢𑀁 𑀓𑀭𑀡𑀁 𑀯𑀚𑁆𑀚𑀦𑀻𑀬𑀁. 𑀦, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑀸 𑀯𑀢𑁆𑀣𑀼𑀁 𑀬𑀸𑀘𑀦𑁆𑀢𑀺, 𑀢𑀸𑀬 𑀅𑀯𑀢𑁆𑀣𑀼𑀬𑀸𑀘𑀦𑀸𑀬 𑀅𑀧𑀭𑀺𑀪𑀸𑀲𑀺𑀬𑀸 𑀪𑀯𑀦𑁆𑀢𑀻’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀏𑀯𑀫𑁂𑀢𑀁 𑀢𑀣𑀸 𑀲𑀫𑁆𑀧𑀝𑀺𑀘𑁆𑀙𑀸𑀫𑀻’’𑀢𑀺.

𑀖𑀝𑀺𑀓𑀸𑀭𑀧𑀜𑁆𑀳𑁄 𑀲𑀢𑁆𑀢𑀫𑁄.

𑁮. 𑀩𑁆𑀭𑀸𑀳𑁆𑀫𑀡𑀭𑀸𑀚𑀯𑀸𑀤𑀧𑀜𑁆𑀳𑁄

𑁮. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀪𑀸𑀲𑀺𑀢𑀫𑁆𑀧𑁂𑀢𑀁 𑀢𑀣𑀸𑀕𑀢𑁂𑀦 ‘𑀅𑀳𑀫𑀲𑁆𑀫𑀺, 𑀪𑀺𑀓𑁆𑀔𑀯𑁂, 𑀩𑁆𑀭𑀸𑀳𑁆𑀫𑀡𑁄 𑀬𑀸𑀘𑀬𑁄𑀕𑁄’𑀢𑀺. 𑀧𑀼𑀦 𑀘 𑀪𑀡𑀺𑀢𑀁 ‘𑀭𑀸𑀚𑀸𑀳𑀫𑀲𑁆𑀫𑀺 𑀲𑁂𑀮𑀸’𑀢𑀺. 𑀬𑀤𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀪𑀕𑀯𑀢𑀸 𑀪𑀡𑀺𑀢𑀁 ‘𑀅𑀳𑀫𑀲𑁆𑀫𑀺, 𑀪𑀺𑀓𑁆𑀔𑀯𑁂, 𑀩𑁆𑀭𑀸𑀳𑁆𑀫𑀡𑁄 𑀬𑀸𑀘𑀬𑁄𑀕𑁄’𑀢𑀺, 𑀢𑁂𑀦 𑀳𑀺 ‘𑀭𑀸𑀚𑀸𑀳𑀫𑀲𑁆𑀫𑀺 𑀲𑁂𑀮𑀸’𑀢𑀺 𑀬𑀁 𑀯𑀘𑀦𑀁, 𑀢𑀁 𑀫𑀺𑀘𑁆𑀙𑀸. 𑀬𑀤𑀺 𑀢𑀣𑀸𑀕𑀢𑁂𑀦 𑀪𑀡𑀺𑀢𑀁 ‘𑀭𑀸𑀚𑀸𑀳𑀫𑀲𑁆𑀫𑀺 𑀲𑁂𑀮𑀸’𑀢𑀺, 𑀢𑁂𑀦 𑀳𑀺 ‘𑀅𑀳𑀫𑀲𑁆𑀫𑀺, 𑀪𑀺𑀓𑁆𑀔𑀯𑁂, 𑀩𑁆𑀭𑀸𑀳𑁆𑀫𑀡𑁄 𑀬𑀸𑀘𑀬𑁄𑀕𑁄’𑀢𑀺 𑀢𑀫𑁆𑀧𑀺 𑀯𑀘𑀦𑀁 𑀫𑀺𑀘𑁆𑀙𑀸. 𑀔𑀢𑁆𑀢𑀺𑀬𑁄 𑀯𑀸 𑀳𑀺 𑀪𑀯𑁂𑀬𑁆𑀬 𑀩𑁆𑀭𑀸𑀳𑁆𑀫𑀡𑁄 𑀯𑀸, 𑀦𑀢𑁆𑀣𑀺 𑀏𑀓𑀸𑀬 𑀚𑀸𑀢𑀺𑀬𑀸 𑀤𑁆𑀯𑁂 𑀯𑀡𑁆𑀡𑀸 𑀦𑀸𑀫, 𑀅𑀬𑀫𑁆𑀧𑀺 𑀉𑀪𑀢𑁄 𑀓𑁄𑀝𑀺𑀓𑁄 𑀧𑀜𑁆𑀳𑁄 𑀢𑀯𑀸𑀦𑀼𑀧𑁆𑀧𑀢𑁆𑀢𑁄, 𑀲𑁄 𑀢𑀬𑀸 𑀦𑀺𑀩𑁆𑀩𑀸𑀳𑀺𑀢𑀩𑁆𑀩𑁄’’𑀢𑀺.

‘‘𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 ‘𑀅𑀳𑀫𑀲𑁆𑀫𑀺, 𑀪𑀺𑀓𑁆𑀔𑀯𑁂, 𑀩𑁆𑀭𑀸𑀳𑁆𑀫𑀡𑁄 𑀬𑀸𑀘𑀬𑁄𑀕𑁄’𑀢𑀺, 𑀧𑀼𑀦 𑀘 𑀪𑀡𑀺𑀢𑀁 ‘𑀭𑀸𑀚𑀸𑀳𑀫𑀲𑁆𑀫𑀺 𑀲𑁂𑀮𑀸’𑀢𑀺, 𑀢𑀢𑁆𑀣 𑀓𑀸𑀭𑀡𑀁 𑀅𑀢𑁆𑀣𑀺, 𑀬𑁂𑀦 𑀓𑀸𑀭𑀡𑁂𑀦 𑀢𑀣𑀸𑀕𑀢𑁄 𑀩𑁆𑀭𑀸𑀳𑁆𑀫𑀡𑁄 𑀘 𑀭𑀸𑀚𑀸 𑀘 𑀳𑁄𑀢𑀻’’𑀢𑀺.

‘‘𑀓𑀺𑀁 𑀧𑀦 𑀢𑀁, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀓𑀸𑀭𑀡𑀁, 𑀬𑁂𑀦 𑀓𑀸𑀭𑀡𑁂𑀦 𑀢𑀣𑀸𑀕𑀢𑁄 𑀩𑁆𑀭𑀸𑀳𑁆𑀫𑀡𑁄 𑀘 𑀭𑀸𑀚𑀸 𑀘 𑀳𑁄𑀢𑀺’’? ‘‘𑀲𑀩𑁆𑀩𑁂, 𑀫𑀳𑀸𑀭𑀸𑀚, 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀢𑀣𑀸𑀕𑀢𑀲𑁆𑀲 𑀩𑀸𑀳𑀺𑀢𑀸 𑀧𑀳𑀻𑀦𑀸 𑀅𑀧𑀕𑀢𑀸 𑀩𑁆𑀬𑀧𑀕𑀢𑀸 𑀉𑀘𑁆𑀙𑀺𑀦𑁆𑀦𑀸 𑀔𑀻𑀡𑀸 𑀔𑀬𑀁 𑀧𑀢𑁆𑀢𑀸 𑀦𑀺𑀩𑁆𑀩𑀼𑀢𑀸 𑀉𑀧𑀲𑀦𑁆𑀢𑀸, 𑀢𑀲𑁆𑀫𑀸 𑀢𑀣𑀸𑀕𑀢𑁄 ‘𑀩𑁆𑀭𑀸𑀳𑁆𑀫𑀡𑁄’𑀢𑀺 𑀯𑀼𑀘𑁆𑀘𑀢𑀺.

‘‘𑀩𑁆𑀭𑀸𑀳𑁆𑀫𑀡𑁄 𑀦𑀸𑀫 𑀲𑀁𑀲𑀬𑀫𑀦𑁂𑀓𑀁𑀲𑀁 𑀯𑀺𑀫𑀢𑀺𑀧𑀣𑀁 𑀯𑀻𑀢𑀺𑀯𑀢𑁆𑀢𑁄, 𑀪𑀕𑀯𑀸𑀧𑀺, 𑀫𑀳𑀸𑀭𑀸𑀚, 𑀲𑀁𑀲𑀬𑀫𑀦𑁂𑀓𑀁𑀲𑀁 𑀯𑀺𑀫𑀢𑀺𑀧𑀣𑀁 𑀯𑀻𑀢𑀺𑀯𑀢𑁆𑀢𑁄, 𑀢𑁂𑀦 𑀓𑀸𑀭𑀡𑁂𑀦 𑀢𑀣𑀸𑀕𑀢𑁄 ‘𑀩𑁆𑀭𑀸𑀳𑁆𑀫𑀡𑁄’𑀢𑀺 𑀯𑀼𑀘𑁆𑀘𑀢𑀺.

‘‘𑀩𑁆𑀭𑀸𑀳𑁆𑀫𑀡𑁄 𑀦𑀸𑀫 𑀲𑀩𑁆𑀩𑀪𑀯𑀕𑀢𑀺𑀬𑁄𑀦𑀺𑀦𑀺𑀲𑁆𑀲𑀝𑁄 𑀫𑀮𑀭𑀚𑀕𑀢𑀯𑀺𑀧𑁆𑀧𑀫𑀼𑀢𑁆𑀢𑁄 𑀅𑀲𑀳𑀸𑀬𑁄, 𑀪𑀕𑀯𑀸𑀧𑀺, 𑀫𑀳𑀸𑀭𑀸𑀚, 𑀲𑀩𑁆𑀩𑀪𑀯𑀕𑀢𑀺𑀬𑁄𑀦𑀺𑀦𑀺𑀲𑁆𑀲𑀝𑁄 𑀫𑀮𑀭𑀚𑀕𑀢𑀯𑀺𑀧𑁆𑀧𑀫𑀼𑀢𑁆𑀢𑁄 𑀅𑀲𑀳𑀸𑀬𑁄, 𑀢𑁂𑀦 𑀓𑀸𑀭𑀡𑁂𑀦 𑀢𑀣𑀸𑀕𑀢𑁄 ‘𑀩𑁆𑀭𑀸𑀳𑁆𑀫𑀡𑁄’𑀢𑀺 𑀯𑀼𑀘𑁆𑀘𑀢𑀺.

‘‘𑀩𑁆𑀭𑀸𑀳𑁆𑀫𑀡𑀸 𑀦𑀸𑀫 𑀅𑀕𑁆𑀕𑀲𑁂𑀝𑁆𑀞𑀯𑀭𑀧𑀯𑀭𑀤𑀺𑀩𑁆𑀩𑀯𑀺𑀳𑀸𑀭𑀩𑀳𑀼𑀮𑁄, 𑀪𑀕𑀯𑀸𑀧𑀺, 𑀫𑀳𑀸𑀭𑀸𑀚, 𑀅𑀕𑁆𑀕𑀲𑁂𑀝𑁆𑀞𑀯𑀭𑀧𑀯𑀭𑀤𑀺𑀩𑁆𑀩𑀯𑀺𑀳𑀸𑀭𑀩𑀳𑀼𑀮𑁄, 𑀢𑁂𑀦𑀸𑀧𑀺 𑀓𑀧𑀭𑀡𑁂𑀦 𑀢𑀣𑀸𑀕𑀢𑁄 ‘‘𑀩𑁆𑀭𑀸𑀳𑁆𑀫𑀡𑁄’’𑀢𑀺 𑀯𑀼𑀘𑁆𑀘𑀢𑀺.

‘‘𑀩𑁆𑀭𑀸𑀳𑁆𑀫𑀡𑁄 𑀦𑀸𑀫 𑀅𑀚𑁆𑀛𑀬𑀦 𑀅𑀚𑁆𑀛𑀸𑀧𑀦 𑀤𑀸𑀦𑀧𑁆𑀧𑀝𑀺𑀕𑁆𑀕𑀳𑀡 𑀤𑀫 𑀲𑀁𑀬𑀫𑀦𑀺𑀬𑀫𑀧𑀼𑀩𑁆𑀩𑀫𑀦𑀼𑀲𑀺𑀝𑁆𑀞𑀺 𑀧𑀯𑁂𑀡𑀺 𑀯𑀁𑀲 𑀥𑀭𑀡𑁄, 𑀪𑀕𑀯𑀸𑀧𑀺, 𑀫𑀳𑀸𑀭𑀸𑀚, 𑀅𑀚𑁆𑀛𑀬𑀦 𑀅𑀚𑁆𑀛𑀸𑀧𑀦 𑀤𑀸𑀦𑀧𑁆𑀧𑀝𑀺𑀕𑁆𑀕𑀳𑀡 𑀤𑀫 𑀲𑀁𑀬𑀫 𑀦𑀺𑀬𑀫 𑀧𑀼𑀩𑁆𑀩𑀚𑀺𑀦𑀸𑀘𑀺𑀡𑁆𑀡 𑀅𑀦𑀼𑀲𑀺𑀝𑁆𑀞𑀺 𑀧𑀯𑁂𑀡𑀺 𑀯𑀁𑀲 𑀥𑀭𑀡𑁄 𑀢𑁂𑀦𑀸𑀧𑀺 𑀓𑀸𑀭𑀡𑁂𑀦 𑀢𑀣𑀸𑀕𑀢𑁄 ‘𑀩𑁆𑀭𑀸𑀳𑁆𑀫𑀡𑁄’𑀢𑀺 𑀯𑀼𑀘𑁆𑀘𑀢𑀺.

‘‘𑀩𑁆𑀭𑀸𑀳𑁆𑀫𑀡𑁄 𑀦𑀸𑀫 𑀩𑁆𑀭𑀳𑀸𑀲𑀼𑀔𑀯𑀺𑀳𑀸𑀭𑀚𑁆𑀛𑀸𑀦𑀛𑀸𑀬𑀻; 𑀪𑀕𑀯𑀸𑀧𑀺, 𑀫𑀳𑀸𑀭𑀸𑀚, 𑀩𑁆𑀭𑀳𑀸𑀲𑀼𑀔𑀯𑀺𑀳𑀸𑀭𑀚𑁆𑀛𑀸𑀦𑀛𑀸𑀬𑀻, 𑀢𑁂𑀦𑀸𑀧𑀺 𑀓𑀸𑀭𑀡𑁂𑀦 𑀢𑀣𑀸𑀕𑀢𑁄 ‘𑀩𑁆𑀭𑀸𑀳𑁆𑀫𑀡𑁄’𑀢𑀺 𑀯𑀼𑀘𑁆𑀘𑀢𑀺.

‘‘𑀩𑁆𑀭𑀸𑀳𑁆𑀫𑀡𑁄 𑀦𑀸𑀫 𑀲𑀩𑁆𑀩𑀪𑀯𑀸𑀪𑀯𑀕𑀢𑀻𑀲𑀼 𑀅𑀪𑀺𑀚𑀸𑀢𑀺𑀯𑀢𑁆𑀢𑀺𑀢𑀫𑀦𑀼𑀘𑀭𑀺𑀢𑀁 𑀚𑀸𑀦𑀸𑀢𑀺, 𑀪𑀕𑀯𑀸𑀧𑀺, 𑀫𑀳𑀸𑀭𑀸𑀚, 𑀲𑀩𑁆𑀩𑀪𑀯𑀸𑀪𑀯𑀕𑀢𑀻𑀲𑀼 𑀅𑀪𑀺𑀚𑀸𑀢𑀺𑀯𑀢𑁆𑀢𑀺𑀢𑀫𑀦𑀼𑀘𑀭𑀺𑀢𑀁 𑀚𑀸𑀦𑀸𑀢𑀺, 𑀢𑁂𑀦𑀸𑀧𑀺 𑀓𑀸𑀭𑀡𑁂𑀦 𑀢𑀣𑀸𑀕𑀢𑁄 ‘𑀩𑁆𑀭𑀸𑀳𑁆𑀫𑀡𑁄’𑀢𑀺 𑀯𑀼𑀘𑁆𑀘𑀢𑀺.

‘‘𑀩𑁆𑀭𑀸𑀳𑁆𑀫𑀡𑁄𑀢𑀺, 𑀫𑀳𑀸𑀭𑀸𑀚, 𑀪𑀕𑀯𑀢𑁄 𑀦𑁂𑀢𑀁 𑀦𑀸𑀫𑀁 𑀫𑀸𑀢𑀭𑀸 𑀓𑀢𑀁, 𑀦 𑀧𑀺𑀢𑀭𑀸 𑀓𑀢𑀁, 𑀦 𑀪𑀸𑀢𑀭𑀸 𑀓𑀢𑀁, 𑀦 𑀪𑀕𑀺𑀦𑀺𑀬𑀸 𑀓𑀢𑀁, 𑀦 𑀫𑀺𑀢𑁆𑀢𑀸𑀫𑀘𑁆𑀘𑁂𑀳𑀺 𑀓𑀢𑀁, 𑀦 𑀜𑀸𑀢𑀺𑀲𑀸𑀮𑁄𑀳𑀺𑀢𑁂𑀳𑀺 𑀓𑀢𑀁, 𑀦 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀳𑀺 𑀓𑀢𑀁, 𑀦 𑀤𑁂𑀯𑀢𑀸𑀳𑀺 𑀓𑀢𑀁, 𑀯𑀺𑀫𑁄𑀓𑁆𑀔𑀦𑁆𑀢𑀺𑀓𑀫𑁂𑀢𑀁 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀦𑀸𑀫𑀁 𑀩𑁄𑀥𑀺𑀬𑀸 𑀬𑁂𑀯 𑀫𑀽𑀮𑁂 𑀫𑀸𑀭𑀲𑁂𑀦𑀁 𑀯𑀺𑀥𑀫𑀺𑀢𑁆𑀯𑀸 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀧𑀸𑀧𑀓𑁂 𑀅𑀓𑀼𑀲𑀮𑁂 𑀥𑀫𑁆𑀫𑁂 𑀩𑀸𑀳𑁂𑀢𑁆𑀯𑀸 𑀲𑀳 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀲𑁆𑀲 𑀧𑀝𑀺𑀮𑀸𑀪𑀸 𑀧𑀝𑀺𑀮𑀤𑁆𑀥𑀧𑀸𑀢𑀼𑀪𑀽𑀢𑀲𑀫𑀼𑀧𑁆𑀧𑀦𑁆𑀦𑀫𑀢𑁆𑀢𑁂 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺 𑀬𑀤𑀺𑀤𑀁 𑀩𑁆𑀭𑀸𑀳𑁆𑀫𑀡𑁄𑀢𑀺, 𑀢𑁂𑀦 𑀓𑀸𑀭𑀡𑁂𑀦 𑀢𑀣𑀸𑀕𑀢𑁄 𑀯𑀼𑀘𑁆𑀘𑀢𑀺 ‘𑀩𑁆𑀭𑀸𑀳𑁆𑀫𑀡𑁄’’’𑀢𑀺.

‘‘𑀓𑁂𑀦 𑀧𑀦, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀓𑀸𑀭𑀡𑁂𑀦 𑀢𑀣𑀸𑀕𑀢𑁄 𑀯𑀼𑀘𑁆𑀘𑀢𑀺 ‘𑀭𑀸𑀚𑀸’’’𑀢𑀺? ‘‘𑀭𑀸𑀚𑀸 𑀦𑀸𑀫, 𑀫𑀳𑀸𑀭𑀸𑀚, 𑀬𑁄 𑀓𑁄𑀘𑀺 𑀭𑀚𑁆𑀚𑀁 𑀓𑀸𑀭𑁂𑀢𑀺 𑀮𑁄𑀓𑀫𑀦𑀼𑀲𑀸𑀲𑀢𑀺, 𑀪𑀕𑀯𑀸𑀧𑀺, 𑀫𑀳𑀸𑀭𑀸𑀚, 𑀤𑀲𑀲𑀳𑀲𑁆𑀲𑀺𑀬𑀸 𑀮𑁄𑀓𑀥𑀸𑀢𑀼𑀬𑀸 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀢𑀺, 𑀲𑀤𑁂𑀯𑀓𑀁 𑀮𑁄𑀓𑀁 𑀲𑀫𑀸𑀭𑀓𑀁 𑀲𑀩𑁆𑀭𑀳𑁆𑀫𑀓𑀁 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀁 𑀧𑀚𑀁 𑀲𑀤𑁂𑀯𑀫𑀦𑀼𑀲𑁆𑀲𑀁 𑀅𑀦𑀼𑀲𑀸𑀲𑀢𑀺, 𑀢𑁂𑀦𑀸𑀧𑀺 𑀓𑀸𑀭𑀡𑁂𑀦 𑀢𑀣𑀸𑀕𑀢𑁄 𑀯𑀼𑀘𑁆𑀘𑀢𑀺 ‘𑀭𑀸𑀚𑀸’𑀢𑀺.

‘‘𑀭𑀸𑀚𑀸 𑀦𑀸𑀫, 𑀫𑀳𑀸𑀭𑀸𑀚, 𑀲𑀩𑁆𑀩𑀚𑀦𑀫𑀦𑀼𑀲𑁆𑀲𑁂 𑀅𑀪𑀺𑀪𑀯𑀺𑀢𑁆𑀯𑀸 𑀦𑀦𑁆𑀤𑀬𑀦𑁆𑀢𑁄 𑀜𑀸𑀢𑀺𑀲𑀗𑁆𑀖𑀁, 𑀲𑁄𑀘𑀬𑀦𑁆𑀢𑁄 𑀅𑀫𑀺𑀢𑁆𑀢𑀲𑀗𑁆𑀖𑀁, 𑀫𑀳𑀢𑀺𑀫𑀳𑀸𑀬𑀲𑀲𑀺𑀭𑀺𑀳𑀭𑀁 𑀣𑀺𑀭𑀲𑀸𑀭𑀤𑀡𑁆𑀟𑀁 𑀅𑀦𑀽𑀦𑀲𑀢𑀲𑀮𑀸𑀓𑀸𑀮𑀗𑁆𑀓𑀢𑀁 𑀉𑀲𑁆𑀲𑀸𑀧𑁂𑀢𑀺 𑀧𑀡𑁆𑀟𑀭𑀯𑀺𑀫𑀮𑀲𑁂𑀢𑀘𑁆𑀙𑀢𑁆𑀢𑀁, 𑀪𑀕𑀯𑀸𑀧𑀺, 𑀫𑀳𑀸𑀭𑀸𑀚, 𑀲𑁄𑀘𑀬𑀦𑁆𑀢𑁄 𑀫𑀸𑀭𑀲𑁂𑀦𑀁 𑀫𑀺𑀘𑁆𑀙𑀸𑀧𑀝𑀺𑀧𑀦𑁆𑀦𑀁, 𑀦𑀦𑁆𑀤𑀬𑀦𑁆𑀢𑁄 𑀤𑁂𑀯𑀫𑀦𑀼𑀲𑁆𑀲𑁂 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑁂 𑀤𑀲𑀲𑀳𑀲𑁆𑀲𑀺𑀬𑀸 𑀮𑁄𑀓𑀥𑀸𑀢𑀼𑀬𑀸 𑀫𑀳𑀢𑀺𑀫𑀳𑀸𑀬𑀲𑀲𑀺𑀭𑀺𑀳𑀭𑀁 𑀔𑀦𑁆𑀢𑀺𑀣𑀺𑀭𑀲𑀸𑀭𑀤𑀡𑁆𑀟𑀁 𑀜𑀸𑀡𑀯𑀭𑀲𑀢𑀲𑀮𑀸𑀓𑀸𑀮𑀗𑁆𑀓𑀢𑀁 𑀉𑀲𑁆𑀲𑀸𑀧𑁂𑀢𑀺 𑀅𑀕𑁆𑀕𑀯𑀭𑀯𑀺𑀫𑀼𑀢𑁆𑀢𑀺𑀧𑀡𑁆𑀟𑀭𑀯𑀺𑀫𑀮𑀲𑁂𑀢𑀘𑁆𑀙𑀢𑁆𑀢𑀁, 𑀢𑁂𑀦𑀸𑀧𑀺 𑀓𑀸𑀭𑀡𑁂𑀦 𑀢𑀣𑀸𑀕𑀢𑁄 𑀯𑀼𑀘𑁆𑀘𑀢𑀺 ‘𑀭𑀸𑀚𑀸’𑀢𑀺.

‘‘𑀭𑀸𑀚𑀸 𑀦𑀸𑀫 𑀉𑀧𑀕𑀢𑀲𑀫𑁆𑀧𑀢𑁆𑀢𑀚𑀦𑀸𑀦𑀁 𑀩𑀳𑀽𑀦𑀫𑀪𑀺𑀯𑀦𑁆𑀤𑀦𑀻𑀬𑁄 𑀪𑀯𑀢𑀺, 𑀪𑀕𑀯𑀸𑀧𑀺, 𑀫𑀳𑀸𑀭𑀸𑀚, 𑀉𑀧𑀕𑀢𑀲𑀫𑁆𑀧𑀢𑁆𑀢𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀩𑀳𑀽𑀦𑀫𑀪𑀺𑀯𑀦𑁆𑀤𑀦𑀻𑀬𑁄, 𑀢𑁂𑀦𑀸𑀧𑀺 𑀓𑀸𑀭𑀡𑁂𑀦 𑀢𑀣𑀸𑀕𑀢𑁄 𑀯𑀼𑀘𑁆𑀘𑀢𑀺 ‘𑀭𑀸𑀚𑀸’𑀢𑀺.

‘‘𑀭𑀸𑀚𑀸 𑀦𑀸𑀫 𑀬𑀲𑁆𑀲 𑀓𑀲𑁆𑀲𑀘𑀺 𑀆𑀭𑀸𑀥𑀓𑀲𑁆𑀲 𑀧𑀲𑀻𑀤𑀺𑀢𑁆𑀯𑀸 𑀯𑀭𑀺𑀢𑀁 𑀯𑀭𑀁 𑀤𑀢𑁆𑀯𑀸 𑀓𑀸𑀫𑁂𑀦 𑀢𑀧𑁆𑀧𑀬𑀢𑀺, 𑀪𑀕𑀯𑀸𑀧𑀺, 𑀫𑀳𑀸𑀭𑀸𑀚, 𑀬𑀲𑁆𑀲 𑀓𑀲𑁆𑀲𑀘𑀺 𑀓𑀸𑀬𑁂𑀦 𑀯𑀸𑀘𑀸𑀬 𑀫𑀦𑀲𑀸 𑀆𑀭𑀸𑀥𑀓𑀲𑁆𑀲 𑀧𑀲𑀻𑀤𑀺𑀢𑁆𑀯𑀸 𑀯𑀭𑀺𑀢𑀁 𑀯𑀭𑀫𑀦𑀼𑀢𑁆𑀢𑀭𑀁 𑀲𑀩𑁆𑀩𑀤𑀼𑀓𑁆𑀔𑀧𑀭𑀺𑀫𑀼𑀢𑁆𑀢𑀺𑀁 𑀤𑀢𑁆𑀯𑀸 𑀅𑀲𑁂𑀲𑀓𑀸𑀫𑀯𑀭𑁂𑀦 𑀘 𑀢𑀧𑁆𑀧𑀬𑀢𑀺, 𑀢𑁂𑀦𑀸𑀧𑀺 𑀓𑀸𑀭𑀡𑁂𑀦 𑀢𑀣𑀸𑀕𑀢𑁄 𑀯𑀼𑀘𑁆𑀘𑀢𑀺 ‘𑀭𑀸𑀚𑀸’𑀢𑀺.

‘‘𑀭𑀸𑀚𑀸 𑀦𑀸𑀫 𑀆𑀡𑀁 𑀯𑀻𑀢𑀺𑀓𑁆𑀓𑀫𑀦𑁆𑀢𑀁 𑀯𑀺𑀕𑀭𑀳𑀢𑀺 𑀛𑀸𑀧𑁂𑀢𑀺 [𑀚𑀸𑀧𑁂𑀢𑀺 (𑀲𑀻. 𑀧𑀻.)] 𑀥𑀁𑀲𑁂𑀢𑀺, 𑀪𑀕𑀯𑀢𑁄𑀧𑀺, 𑀫𑀳𑀸𑀭𑀸𑀚, 𑀲𑀸𑀲𑀦𑀯𑀭𑁂 𑀆𑀡𑀁 𑀅𑀢𑀺𑀓𑁆𑀓𑀫𑀦𑁆𑀢𑁄 𑀅𑀮𑀚𑁆𑀚𑀻 𑀫𑀗𑁆𑀓𑀼𑀪𑀸𑀯𑁂𑀦 𑀑𑀜𑁆𑀜𑀸𑀢𑁄 𑀳𑀻𑀴𑀺𑀢𑁄 𑀕𑀭𑀳𑀺𑀢𑁄 𑀪𑀯𑀺𑀢𑁆𑀯𑀸 𑀯𑀚𑁆𑀚𑀢𑀺 𑀚𑀺𑀦𑀲𑀸𑀲𑀦𑀯𑀭𑀫𑁆𑀳𑀸, 𑀢𑁂𑀦𑀸𑀧𑀺 𑀓𑀸𑀭𑀡𑁂𑀦 𑀢𑀣𑀸𑀕𑀢𑁄 𑀯𑀼𑀘𑁆𑀘𑀢𑀺 ‘𑀭𑀸𑀚𑀸’𑀢𑀺.

‘‘𑀭𑀸𑀚𑀸 𑀦𑀸𑀫 𑀧𑀼𑀩𑁆𑀩𑀓𑀸𑀦𑀁 𑀥𑀫𑁆𑀫𑀺𑀓𑀸𑀦𑀁 𑀭𑀸𑀚𑀽𑀦𑀁 𑀧𑀯𑁂𑀡𑀺𑀫𑀦𑀼𑀲𑀺𑀝𑁆𑀞𑀺𑀬𑀸 𑀥𑀫𑁆𑀫𑀸𑀥𑀫𑁆𑀫𑀫𑀦𑀼𑀤𑀻𑀧𑀬𑀺𑀢𑁆𑀯𑀸 𑀥𑀫𑁆𑀫𑁂𑀦 𑀭𑀚𑁆𑀚𑀁 𑀓𑀸𑀭𑀬𑀫𑀸𑀦𑁄 𑀧𑀺𑀳𑀬𑀺𑀢𑁄 𑀧𑀺𑀬𑁄 𑀧𑀢𑁆𑀣𑀺𑀢𑁄 𑀪𑀯𑀢𑀺 𑀚𑀦𑀫𑀦𑀼𑀲𑁆𑀲𑀸𑀦𑀁, 𑀘𑀺𑀭𑀁 𑀭𑀸𑀚𑀓𑀼𑀮𑀯𑀁𑀲𑀁 𑀞𑀧𑀬𑀢𑀺 𑀥𑀫𑁆𑀫𑀕𑀼𑀡𑀩𑀮𑁂𑀦, 𑀪𑀕𑀯𑀸𑀧𑀺, 𑀫𑀳𑀸𑀭𑀸𑀚, 𑀧𑀼𑀩𑁆𑀩𑀓𑀸𑀦𑀁 𑀲𑀬𑀫𑁆𑀪𑀽𑀦𑀁 𑀧𑀯𑁂𑀡𑀺𑀫𑀦𑀼𑀲𑀺𑀝𑁆𑀞𑀺𑀬𑀸 𑀥𑀫𑁆𑀫𑀸𑀥𑀫𑁆𑀫𑀫𑀦𑀼𑀤𑀻𑀧𑀬𑀺𑀢𑁆𑀯𑀸 𑀥𑀫𑁆𑀫𑁂𑀦 𑀮𑁄𑀓𑀫𑀦𑀼𑀲𑀸𑀲𑀫𑀸𑀦𑁄 𑀧𑀺𑀳𑀬𑀺𑀢𑁄 𑀧𑀺𑀬𑁄 𑀧𑀢𑁆𑀣𑀺𑀢𑁄 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀘𑀺𑀭𑀁 𑀲𑀸𑀲𑀦𑀁 𑀧𑀯𑀢𑁆𑀢𑁂𑀢𑀺 𑀥𑀫𑁆𑀫𑀕𑀼𑀡𑀩𑀮𑁂𑀦, 𑀢𑁂𑀦𑀸𑀧𑀺 𑀓𑀸𑀭𑀡𑁂𑀦 𑀢𑀣𑀸𑀕𑀢𑁄 𑀯𑀼𑀘𑁆𑀘𑀢𑀺 ‘𑀭𑀸𑀚𑀸’𑀢𑀺. 𑀏𑀯𑀫𑀦𑁂𑀓𑀯𑀺𑀥𑀁, 𑀫𑀳𑀸𑀭𑀸𑀚, 𑀓𑀸𑀭𑀡𑀁, 𑀬𑁂𑀦 𑀓𑀸𑀭𑀡𑁂𑀦 𑀢𑀣𑀸𑀕𑀢𑁄 𑀩𑁆𑀭𑀸𑀳𑁆𑀫𑀡𑁄𑀧𑀺 𑀪𑀯𑁂𑀬𑁆𑀬 𑀭𑀸𑀚𑀸𑀧𑀺 𑀪𑀯𑁂𑀬𑁆𑀬, 𑀲𑀼𑀦𑀺𑀧𑀼𑀡𑁄 𑀪𑀺𑀓𑁆𑀔𑀼 𑀓𑀧𑁆𑀧𑀫𑁆𑀧𑀺 𑀦𑁄 𑀦𑀁 𑀲𑀫𑁆𑀧𑀸𑀤𑁂𑀬𑁆𑀬, 𑀓𑀺𑀁 𑀅𑀢𑀺𑀩𑀳𑀼𑀁 𑀪𑀡𑀺𑀢𑁂𑀦, 𑀲𑀁𑀔𑀺𑀢𑁆𑀢𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩’’𑀦𑁆𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀏𑀯𑀫𑁂𑀢𑀁 𑀢𑀣𑀸 𑀲𑀫𑁆𑀧𑀝𑀺𑀘𑁆𑀙𑀸𑀫𑀻’’𑀢𑀺.

𑀩𑁆𑀭𑀸𑀳𑁆𑀫𑀡𑀭𑀸𑀚𑀯𑀸𑀤𑀧𑀜𑁆𑀳𑁄 𑀅𑀝𑁆𑀞𑀫𑁄.

𑁯. 𑀕𑀸𑀣𑀸𑀪𑀺𑀕𑀻𑀢𑀪𑁄𑀚𑀦𑀓𑀣𑀸𑀧𑀜𑁆𑀳𑁄

𑁯. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀪𑀸𑀲𑀺𑀢𑀫𑁆𑀧𑁂𑀢𑀁 𑀪𑀕𑀯𑀢𑀸 𑁋

‘‘‘𑀕𑀸𑀣𑀸𑀪𑀺𑀕𑀻𑀢𑀁 𑀫𑁂 𑀅𑀪𑁄𑀚𑀦𑁂𑀬𑁆𑀬𑀁 [𑀅𑀪𑁄𑀚𑀦𑀻𑀬𑀁 (𑀓.) 𑀲𑀼. 𑀦𑀺. 𑁮𑁧 𑀧𑀲𑁆𑀲𑀺𑀢𑀩𑁆𑀩𑀁], 𑀲𑀫𑁆𑀧𑀲𑁆𑀲𑀢𑀁 𑀩𑁆𑀭𑀸𑀳𑁆𑀫𑀡 𑀦𑁂𑀲 𑀥𑀫𑁆𑀫𑀸;

𑀕𑀸𑀣𑀸𑀪𑀺𑀕𑀻𑀢𑀁 𑀧𑀦𑀼𑀤𑀦𑁆𑀢𑀺 𑀩𑀼𑀤𑁆𑀥𑀸, 𑀥𑀫𑁆𑀫𑁂 𑀲𑀢𑀻 𑀩𑁆𑀭𑀸𑀳𑁆𑀫𑀡 𑀯𑀼𑀢𑁆𑀢𑀺𑀭𑁂𑀲𑀸’𑀢𑀺.

‘‘𑀧𑀼𑀦 𑀘 𑀪𑀕𑀯𑀸 𑀧𑀭𑀺𑀲𑀸𑀬 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀓𑀣𑁂𑀦𑁆𑀢𑁄 𑀅𑀦𑀼𑀧𑀼𑀩𑁆𑀩𑀺𑀓𑀣𑀁 𑀧𑀞𑀫𑀁 𑀢𑀸𑀯 𑀤𑀸𑀦𑀓𑀣𑀁 𑀓𑀣𑁂𑀢𑀺, 𑀧𑀘𑁆𑀙𑀸 𑀲𑀻𑀮𑀓𑀣𑀁, 𑀢𑀲𑁆𑀲 𑀪𑀕𑀯𑀢𑁄 𑀲𑀩𑁆𑀩𑀮𑁄𑀓𑀺𑀲𑁆𑀲𑀭𑀲𑁆𑀲 𑀪𑀸𑀲𑀺𑀢𑀁 𑀲𑀼𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑀸 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀤𑀸𑀦𑀁 𑀤𑁂𑀦𑁆𑀢𑀺, 𑀢𑀲𑁆𑀲 𑀢𑀁 𑀉𑀬𑁆𑀬𑁄𑀚𑀺𑀢𑀁 𑀤𑀸𑀦𑀁 𑀲𑀸𑀯𑀓𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀺. 𑀬𑀤𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀪𑀕𑀯𑀢𑀸 𑀪𑀡𑀺𑀢𑀁 ‘𑀕𑀸𑀣𑀸𑀪𑀺𑀕𑀻𑀢𑀁 𑀫𑁂 𑀅𑀪𑁄𑀚𑀦𑁂𑀬𑁆𑀬’𑀦𑁆𑀢𑀺, 𑀢𑁂𑀦 𑀳𑀺 ‘𑀪𑀕𑀯𑀸 𑀤𑀸𑀦𑀓𑀣𑀁 𑀧𑀞𑀫𑀁 𑀓𑀣𑁂𑀢𑀻’𑀢𑀺 𑀬𑀁 𑀯𑀘𑀦𑀁, 𑀢𑀁 𑀫𑀺𑀘𑁆𑀙𑀸. 𑀬𑀤𑀺 𑀤𑀸𑀦𑀓𑀣𑀁 𑀧𑀞𑀫𑀁 𑀓𑀣𑁂𑀢𑀺, 𑀢𑁂𑀦 𑀳𑀺 ‘𑀕𑀸𑀣𑀸𑀪𑀺𑀕𑀻𑀢𑀁 𑀫𑁂 𑀅𑀪𑁄𑀚𑀦𑁂𑀬𑁆𑀬’𑀦𑁆𑀢𑀺 𑀢𑀫𑁆𑀧𑀺 𑀯𑀘𑀦𑀁 𑀫𑀺𑀘𑁆𑀙𑀸. 𑀓𑀺𑀁 𑀓𑀸𑀭𑀡𑀁? 𑀬𑁄 𑀲𑁄, 𑀪𑀦𑁆𑀢𑁂, 𑀤𑀓𑁆𑀔𑀺𑀡𑁂𑀬𑁆𑀬𑁄 𑀕𑀺𑀳𑀻𑀦𑀁 𑀧𑀺𑀡𑁆𑀟𑀧𑀸𑀢𑀤𑀸𑀦𑀲𑁆𑀲 𑀯𑀺𑀧𑀸𑀓𑀁 𑀓𑀣𑁂𑀢𑀺, 𑀢𑀲𑁆𑀲 𑀢𑁂 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑀸 𑀅𑀧𑀭𑀸𑀧𑀭𑀁 𑀤𑀸𑀦𑀁 𑀤𑁂𑀦𑁆𑀢𑀺, 𑀬𑁂 𑀢𑀁 𑀤𑀸𑀦𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀺, 𑀲𑀩𑁆𑀩𑁂 𑀢𑁂 𑀕𑀸𑀣𑀸𑀪𑀺𑀕𑀻𑀢𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀺. 𑀅𑀬𑀫𑁆𑀧𑀺 𑀉𑀪𑀢𑁄 𑀓𑁄𑀝𑀺𑀓𑁄 𑀧𑀜𑁆𑀳𑁄 𑀦𑀺𑀧𑀼𑀡𑁄 𑀕𑀫𑁆𑀪𑀻𑀭𑁄 𑀢𑀧𑀸𑀦𑀼𑀧𑁆𑀧𑀢𑁆𑀢𑁄, 𑀲𑁄 𑀢𑀬𑀸 𑀦𑀺𑀩𑁆𑀩𑀸𑀳𑀺𑀢𑀩𑁆𑀩𑁄’’𑀢𑀺.

‘‘𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 ‘𑀕𑀸𑀣𑀸𑀪𑀺𑀕𑀻𑀢𑀁 𑀫𑁂 𑀅𑀪𑁄𑀚𑀦𑁂𑀬𑁆𑀬𑀁, 𑀲𑀫𑁆𑀧𑀲𑁆𑀲𑀢𑀁 𑀩𑁆𑀭𑀸𑀳𑁆𑀫𑀡 𑀦𑁂𑀲 𑀥𑀫𑁆𑀫𑁄. 𑀕𑀸𑀣𑀸𑀪𑀺𑀕𑀻𑀢𑀁 𑀧𑀦𑀼𑀤𑀦𑁆𑀢𑀺 𑀩𑀼𑀤𑁆𑀥𑀸, 𑀥𑀫𑁆𑀫𑁂 𑀲𑀢𑀻 𑀩𑁆𑀭𑀸𑀳𑁆𑀫𑀡 𑀯𑀼𑀢𑁆𑀢𑀺𑀭𑁂𑀲𑀸’𑀢𑀺, 𑀓𑀣𑁂𑀢𑀺 𑀘 𑀪𑀕𑀯𑀸 𑀧𑀞𑀫𑀁 𑀤𑀸𑀦𑀓𑀣𑀁, 𑀢𑀜𑁆𑀘 𑀧𑀦 𑀓𑀺𑀭𑀺𑀬𑀁 𑀲𑀩𑁆𑀩𑁂𑀲𑀁 𑀢𑀣𑀸𑀕𑀢𑀸𑀦𑀁 𑀧𑀞𑀫𑀁 𑀤𑀸𑀦𑀓𑀣𑀸𑀬, 𑀢𑀢𑁆𑀣 𑀘𑀺𑀢𑁆𑀢𑀁 𑀅𑀪𑀺𑀭𑀫𑀸𑀧𑁂𑀢𑁆𑀯𑀸 𑀧𑀘𑁆𑀙𑀸 𑀲𑀻𑀮𑁂 𑀦𑀺𑀬𑁄𑀚𑁂𑀦𑁆𑀢𑀺. 𑀬𑀣𑀸, 𑀫𑀳𑀸𑀭𑀸𑀚, 𑀫𑀦𑀼𑀲𑁆𑀲𑀸 𑀢𑀭𑀼𑀡𑀤𑀸𑀭𑀓𑀸𑀦𑀁 𑀧𑀞𑀫𑀁 𑀢𑀸𑀯 𑀓𑀻𑀴𑀸𑀪𑀡𑁆𑀟𑀓𑀸𑀦𑀺 𑀤𑁂𑀦𑁆𑀢𑀺. 𑀲𑁂𑀬𑁆𑀬𑀣𑀺𑀤𑀁, 𑀯𑀗𑁆𑀓𑀓𑀁 𑀖𑀝𑀺𑀓𑀁 𑀘𑀺𑀗𑁆𑀕𑀼𑀮𑀓𑀁 𑀧𑀢𑁆𑀢𑀸𑀴𑁆𑀳𑀓𑀁 𑀭𑀣𑀓𑀁 𑀥𑀦𑀼𑀓𑀁, 𑀧𑀘𑁆𑀙𑀸 𑀢𑁂 𑀲𑀓𑁂 𑀲𑀓𑁂 𑀓𑀫𑁆𑀫𑁂 𑀦𑀺𑀬𑁄𑀚𑁂𑀦𑁆𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑁄 𑀧𑀞𑀫𑀁 𑀤𑀸𑀦𑀓𑀣𑀸𑀬 𑀘𑀺𑀢𑁆𑀢𑀁 𑀅𑀪𑀺𑀭𑀫𑀸𑀧𑁂𑀢𑁆𑀯𑀸 𑀧𑀘𑁆𑀙𑀸 𑀲𑀻𑀮𑁂 𑀦𑀺𑀬𑁄𑀚𑁂𑀢𑀺.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀪𑀺𑀲𑀓𑁆𑀓𑁄 𑀦𑀸𑀫 𑀆𑀢𑀼𑀭𑀸𑀦𑀁 𑀧𑀞𑀫𑀁 𑀢𑀸𑀯 𑀘𑀢𑀽𑀳𑀧𑀜𑁆𑀘𑀸𑀳𑀁 𑀢𑁂𑀮𑀁 𑀧𑀸𑀬𑁂𑀢𑀺 𑀩𑀮𑀓𑀭𑀡𑀸𑀬 𑀲𑀺𑀦𑁂𑀳𑀦𑀸𑀬, 𑀧𑀘𑁆𑀙𑀸 𑀯𑀺𑀭𑁂𑀘𑁂𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑁄 𑀧𑀞𑀫𑀁 𑀢𑀸𑀯 𑀤𑀸𑀦𑀓𑀣𑀸𑀬 𑀘𑀺𑀢𑁆𑀢𑀁 𑀅𑀪𑀺𑀭𑀫𑀸𑀧𑁂𑀢𑁆𑀯𑀸 𑀧𑀘𑁆𑀙𑀸 𑀲𑀻𑀮𑁂 𑀦𑀺𑀬𑁄𑀚𑁂𑀢𑀺. 𑀤𑀸𑀬𑀓𑀸𑀦𑀁, 𑀫𑀳𑀸𑀭𑀸𑀚, 𑀤𑀸𑀦𑀧𑀢𑀻𑀦𑀁 𑀘𑀺𑀢𑁆𑀢𑀁 𑀫𑀼𑀤𑀼𑀓𑀁 𑀳𑁄𑀢𑀺 𑀫𑀤𑁆𑀤𑀯𑀁 𑀲𑀺𑀦𑀺𑀤𑁆𑀥𑀁, 𑀢𑁂𑀦 𑀢𑁂 𑀤𑀸𑀦𑀲𑁂𑀢𑀼𑀲𑀗𑁆𑀓𑀫𑁂𑀦 𑀤𑀸𑀦𑀦𑀸𑀯𑀸𑀬 𑀲𑀁𑀲𑀸𑀭𑀲𑀸𑀕𑀭𑀧𑀸𑀭𑀫𑀦𑀼𑀕𑀘𑁆𑀙𑀦𑁆𑀢𑀺, 𑀢𑀲𑁆𑀫𑀸 𑀢𑁂𑀲𑀁 𑀧𑀞𑀫𑀁 𑀓𑀫𑁆𑀫𑀪𑀽𑀫𑀺𑀫𑀦𑀼𑀲𑀸𑀲𑀢𑀺, 𑀦 𑀘 𑀓𑁂𑀦𑀘𑀺 [𑀢𑁂𑀦 (𑀲𑀻. 𑀧𑀻.)] 𑀯𑀺𑀜𑁆𑀜𑀢𑁆𑀢𑀺𑀫𑀸𑀧𑀚𑁆𑀚𑀢𑀻’’𑀢𑀺.

‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, ‘𑀯𑀺𑀜𑁆𑀜𑀢𑁆𑀢𑀺’𑀦𑁆𑀢𑀺 𑀬𑀁 𑀯𑀤𑁂𑀲𑀺, 𑀓𑀢𑀺 𑀧𑀦 𑀢𑀸 𑀯𑀺𑀜𑁆𑀜𑀢𑁆𑀢𑀺𑀬𑁄’’𑀢𑀺? ‘‘𑀤𑁆𑀯𑁂𑀫𑀸, 𑀫𑀳𑀸𑀭𑀸𑀚, 𑀯𑀺𑀜𑁆𑀜𑀢𑁆𑀢𑀺𑀬𑁄 𑀓𑀸𑀬𑀯𑀺𑀜𑁆𑀜𑀢𑁆𑀢𑀺 𑀯𑀘𑀻𑀯𑀺𑀜𑁆𑀜𑀢𑁆𑀢𑀺 𑀘𑀸𑀢𑀺. 𑀢𑀢𑁆𑀣 𑀅𑀢𑁆𑀣𑀺 𑀓𑀸𑀬𑀯𑀺𑀜𑁆𑀜𑀢𑁆𑀢𑀺 𑀲𑀸𑀯𑀚𑁆𑀚𑀸, 𑀅𑀢𑁆𑀣𑀺 𑀅𑀦𑀯𑀚𑁆𑀚𑀸. 𑀅𑀢𑁆𑀣𑀺 𑀯𑀘𑀻𑀯𑀺𑀜𑁆𑀜𑀢𑁆𑀢𑀺 𑀲𑀸𑀯𑀚𑁆𑀚𑀸, 𑀅𑀢𑁆𑀣𑀺 𑀅𑀦𑀯𑀚𑁆𑀚𑀸.

‘‘𑀓𑀢𑀫𑀸 𑀓𑀸𑀬𑀯𑀺𑀜𑁆𑀜𑀢𑁆𑀢𑀺 𑀲𑀸𑀯𑀚𑁆𑀚𑀸? 𑀇𑀥𑁂𑀓𑀘𑁆𑀘𑁄 𑀪𑀺𑀓𑁆𑀔𑀼 𑀓𑀼𑀮𑀸𑀦𑀺 𑀉𑀧𑀕𑀦𑁆𑀢𑁆𑀯𑀸 𑀅𑀦𑁄𑀓𑀸𑀲𑁂 𑀞𑀺𑀢𑁄 𑀞𑀸𑀦𑀁 𑀪𑀜𑁆𑀚𑀢𑀺, 𑀅𑀬𑀁 𑀓𑀸𑀬𑀯𑀺𑀜𑁆𑀜𑀢𑁆𑀢𑀺 𑀲𑀸𑀯𑀚𑁆𑀚𑀸. 𑀢𑀸𑀬 𑀘 𑀯𑀺𑀜𑁆𑀜𑀸𑀧𑀺𑀢𑀁 𑀅𑀭𑀺𑀬𑀸 𑀦 𑀧𑀭𑀺𑀪𑀼𑀜𑁆𑀚𑀦𑁆𑀢𑀺, 𑀲𑁄 𑀘 𑀧𑀼𑀕𑁆𑀕𑀮𑁄 𑀅𑀭𑀺𑀬𑀸𑀦𑀁 𑀲𑀫𑀬𑁂 𑀑𑀜𑁆𑀜𑀸𑀢𑁄 𑀳𑁄𑀢𑀺 𑀳𑀻𑀴𑀺𑀢𑁄 𑀔𑀻𑀴𑀺𑀢𑁄 𑀕𑀭𑀳𑀺𑀢𑁄 𑀧𑀭𑀺𑀪𑀽𑀢𑁄 𑀅𑀘𑀺𑀢𑁆𑀢𑀻𑀓𑀢𑁄, 𑀪𑀺𑀦𑁆𑀦𑀸𑀚𑀻𑀯𑁄𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀇𑀥𑁂𑀓𑀘𑁆𑀘𑁄 𑀪𑀺𑀓𑁆𑀔𑀼 𑀓𑀼𑀮𑀸𑀦𑀺 𑀉𑀧𑀕𑀦𑁆𑀢𑁆𑀯𑀸 𑀅𑀦𑁄𑀓𑀸𑀲𑁂 𑀞𑀺𑀢𑁄 𑀕𑀮𑀁 𑀧𑀡𑀸𑀫𑁂𑀢𑁆𑀯𑀸 𑀫𑁄𑀭𑀧𑁂𑀓𑁆𑀔𑀺𑀢𑀁 𑀧𑁂𑀓𑁆𑀔𑀢𑀺 ‘𑀏𑀯𑀁 𑀇𑀫𑁂 𑀧𑀲𑁆𑀲𑀦𑁆𑀢𑀻’𑀢𑀺, 𑀢𑁂𑀦 𑀘 𑀢𑁂 𑀧𑀲𑁆𑀲𑀦𑁆𑀢𑀺. 𑀅𑀬𑀫𑁆𑀧𑀺 𑀓𑀸𑀬𑀯𑀺𑀜𑁆𑀜𑀢𑁆𑀢𑀺 𑀲𑀸𑀯𑀚𑁆𑀚𑀸. 𑀢𑀸𑀬 𑀘 𑀯𑀺𑀜𑁆𑀜𑀸𑀧𑀺𑀢𑀁 𑀅𑀭𑀺𑀬𑀸 𑀦 𑀧𑀭𑀺𑀪𑀼𑀜𑁆𑀚𑀦𑁆𑀢𑀺, 𑀲𑁄 𑀘 𑀧𑀼𑀕𑁆𑀕𑀮𑁄 𑀅𑀭𑀺𑀬𑀸𑀦𑀁 𑀲𑀫𑀬𑁂 𑀑𑀜𑁆𑀜𑀸𑀢𑁄 𑀳𑁄𑀢𑀺 𑀳𑀻𑀴𑀺𑀢𑁄 𑀔𑀻𑀴𑀺𑀢𑁄 𑀕𑀭𑀳𑀺𑀢𑁄 𑀧𑀭𑀺𑀪𑀽𑀢𑁄 𑀅𑀘𑀺𑀢𑁆𑀢𑀻𑀓𑀢𑁄, 𑀪𑀺𑀦𑁆𑀦𑀸𑀚𑀻𑀯𑁄𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀇𑀥𑁂𑀓𑀘𑁆𑀘𑁄 𑀪𑀺𑀓𑁆𑀔𑀼 𑀳𑀦𑀼𑀓𑀸𑀬 𑀯𑀸 𑀪𑀫𑀼𑀓𑀸𑀬 𑀯𑀸 𑀅𑀗𑁆𑀕𑀼𑀝𑁆𑀞𑁂𑀦 𑀯𑀸 𑀯𑀺𑀜𑁆𑀜𑀸𑀧𑁂𑀢𑀺, 𑀅𑀬𑀫𑁆𑀧𑀺 𑀓𑀸𑀬𑀯𑀺𑀜𑁆𑀜𑀢𑁆𑀢𑀺 𑀲𑀸𑀯𑀚𑁆𑀚𑀸, 𑀢𑀸𑀬 𑀘 𑀯𑀺𑀜𑁆𑀜𑀸𑀧𑀺𑀢𑀁 𑀅𑀭𑀺𑀬𑀸 𑀦 𑀧𑀭𑀺𑀪𑀼𑀜𑁆𑀚𑀦𑁆𑀢𑀺, 𑀲𑁄 𑀘 𑀧𑀼𑀕𑁆𑀕𑀮𑁄 𑀅𑀭𑀺𑀬𑀸𑀦𑀁 𑀲𑀫𑀬𑁂 𑀑𑀜𑁆𑀜𑀸𑀢𑁄 𑀳𑁄𑀢𑀺 𑀳𑀻𑀴𑀺𑀢𑁄 𑀔𑀻𑀴𑀺𑀢𑁄 𑀕𑀭𑀳𑀺𑀢𑁄 𑀧𑀭𑀺𑀪𑀽𑀢𑁄 𑀅𑀘𑀺𑀢𑁆𑀢𑀻𑀓𑀢𑁄, 𑀪𑀺𑀦𑁆𑀦𑀸𑀚𑀻𑀯𑁄𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺.

‘‘𑀓𑀢𑀫𑀸 𑀓𑀸𑀬𑀯𑀺𑀜𑁆𑀜𑀢𑁆𑀢𑀺 𑀅𑀦𑀯𑀚𑁆𑀚𑀸? 𑀇𑀥 𑀪𑀺𑀓𑁆𑀔𑀼 𑀓𑀼𑀮𑀸𑀦𑀺 𑀉𑀧𑀕𑀦𑁆𑀢𑁆𑀯𑀸 𑀲𑀢𑁄 𑀲𑀫𑀸𑀳𑀺𑀢𑁄 𑀲𑀫𑁆𑀧𑀚𑀸𑀦𑁄 𑀞𑀸𑀦𑁂𑀧𑀺 𑀅𑀝𑁆𑀞𑀸𑀦𑁂𑀧𑀺 𑀬𑀣𑀸𑀦𑀼𑀲𑀺𑀝𑁆𑀞𑀺𑀁 𑀕𑀦𑁆𑀢𑁆𑀯𑀸 𑀞𑀸𑀦𑁂 𑀢𑀺𑀝𑁆𑀞𑀢𑀺, 𑀤𑀸𑀢𑀼𑀓𑀸𑀫𑁂𑀲𑀼 𑀢𑀺𑀝𑁆𑀞𑀢𑀺, 𑀅𑀤𑀸𑀢𑀼𑀓𑀸𑀫𑁂𑀲𑀼 𑀧𑀓𑁆𑀓𑀫𑀢𑀺. 𑀅𑀬𑀁 𑀓𑀸𑀬𑀯𑀺𑀜𑁆𑀜𑀢𑁆𑀢𑀺 𑀅𑀦𑀯𑀚𑁆𑀚𑀸, 𑀢𑀸𑀬 𑀘 𑀯𑀺𑀜𑁆𑀜𑀸𑀧𑀺𑀢𑀁 𑀅𑀭𑀺𑀬𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀺, 𑀲𑁄 𑀘 𑀧𑀼𑀕𑁆𑀕𑀮𑁄 𑀅𑀭𑀺𑀬𑀸𑀦𑀁 𑀲𑀫𑀬𑁂 𑀯𑀡𑁆𑀡𑀺𑀢𑁄 𑀳𑁄𑀢𑀺 𑀣𑀼𑀢𑁄 𑀧𑀲𑀢𑁆𑀣𑁄 𑀲𑀮𑁆𑀮𑁂𑀔𑀺𑀢𑀸𑀘𑀸𑀭𑁄, 𑀧𑀭𑀺𑀲𑀼𑀤𑁆𑀥𑀸𑀚𑀻𑀯𑁄𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑀤𑁂𑀯𑀸𑀢𑀺𑀤𑁂𑀯𑁂𑀦 𑁋

‘𑀦 𑀯𑁂 𑀬𑀸𑀘𑀦𑁆𑀢𑀺 𑀲𑀧𑁆𑀧𑀜𑁆𑀜𑀸, 𑀥𑀻𑀭𑁄 𑀘 𑀯𑁂𑀤𑀺𑀢𑀼𑀫𑀭𑀳𑀢𑀺 [𑀅𑀭𑀺𑀬𑀸 𑀕𑀭𑀳𑀦𑁆𑀢𑀺 𑀬𑀸𑀘𑀦𑀁 (𑀲𑀻. 𑀧𑀻.)];

𑀉𑀤𑁆𑀤𑀺𑀲𑁆𑀲 𑀅𑀭𑀺𑀬𑀸 𑀢𑀺𑀝𑁆𑀞𑀦𑁆𑀢𑀺, 𑀏𑀲𑀸 𑀅𑀭𑀺𑀬𑀸𑀦 𑀬𑀸𑀘𑀦𑀸’𑀢𑀺.

‘‘𑀓𑀢𑀫𑀸 𑀯𑀘𑀻𑀯𑀺𑀜𑁆𑀜𑀢𑁆𑀢𑀺 𑀲𑀸𑀯𑀚𑁆𑀚𑀸? 𑀇𑀥, 𑀫𑀳𑀸𑀭𑀸𑀚, 𑀪𑀺𑀓𑁆𑀔𑀼 𑀯𑀸𑀘𑀸𑀬 𑀩𑀳𑀼𑀯𑀺𑀥𑀁 𑀯𑀺𑀜𑁆𑀜𑀸𑀧𑁂𑀢𑀺 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁, 𑀅𑀬𑀁 𑀯𑀘𑀻𑀯𑀺𑀜𑁆𑀜𑀢𑁆𑀢𑀺 𑀲𑀸𑀯𑀚𑁆𑀚𑀸, 𑀢𑀸𑀬 𑀘 𑀯𑀺𑀜𑁆𑀜𑀸𑀧𑀺𑀢𑀁 𑀅𑀭𑀺𑀬𑀸 𑀦 𑀧𑀭𑀺𑀪𑀼𑀜𑁆𑀚𑀦𑁆𑀢𑀺, 𑀲𑁄 𑀘 𑀧𑀼𑀕𑁆𑀕𑀮𑁄 𑀅𑀭𑀺𑀬𑀸𑀦𑀁 𑀲𑀫𑀬𑁂 𑀑𑀜𑁆𑀜𑀸𑀢𑁄 𑀳𑁄𑀢𑀺 𑀳𑀻𑀴𑀺𑀢𑁄 𑀔𑀻𑀴𑀺𑀢𑁄 𑀕𑀭𑀳𑀺𑀢𑁄 𑀧𑀭𑀺𑀪𑀽𑀢𑁄 𑀅𑀘𑀺𑀢𑁆𑀢𑀻𑀓𑀢𑁄, 𑀪𑀺𑀦𑁆𑀦𑀸𑀚𑀻𑀯𑁄𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀇𑀥𑁂𑀓𑀘𑁆𑀘𑁄 𑀪𑀺𑀓𑁆𑀔𑀼 𑀧𑀭𑁂𑀲𑀁 𑀲𑀸𑀯𑁂𑀦𑁆𑀢𑁄 𑀏𑀯𑀁 𑀪𑀡𑀢𑀺 ‘𑀇𑀫𑀺𑀦𑀸 𑀫𑁂 𑀅𑀢𑁆𑀣𑁄’𑀢𑀺, 𑀢𑀸𑀬 𑀘 𑀯𑀸𑀘𑀸𑀬 𑀧𑀭𑁂𑀲𑀁 𑀲𑀸𑀯𑀺𑀢𑀸𑀬 𑀢𑀲𑁆𑀲 𑀮𑀸𑀪𑁄 𑀉𑀧𑁆𑀧𑀚𑁆𑀚𑀢𑀺, 𑀅𑀬𑀫𑁆𑀧𑀺 𑀯𑀘𑀻𑀯𑀺𑀜𑁆𑀜𑀢𑁆𑀢𑀺 𑀲𑀸𑀯𑀚𑁆𑀚𑀸, 𑀢𑀸𑀬 𑀘 𑀯𑀺𑀜𑁆𑀜𑀸𑀧𑀺𑀢𑀁 𑀅𑀭𑀺𑀬𑀸 𑀦 𑀧𑀭𑀺𑀪𑀼𑀜𑁆𑀚𑀦𑁆𑀢𑀺, 𑀲𑁄 𑀘 𑀧𑀼𑀕𑁆𑀕𑀮𑁄 𑀅𑀭𑀺𑀬𑀸𑀦𑀁 𑀲𑀫𑀬𑁂 𑀑𑀜𑁆𑀜𑀸𑀢𑁄 𑀳𑁄𑀢𑀺 𑀳𑀻𑀴𑀺𑀢𑁄 𑀔𑀻𑀴𑀺𑀢𑁄 𑀕𑀭𑀳𑀺𑀢𑁄 𑀧𑀭𑀺𑀪𑀽𑀢𑁄 𑀅𑀘𑀺𑀢𑁆𑀢𑀻𑀓𑀢𑁄, 𑀪𑀺𑀦𑁆𑀦𑀸𑀚𑀻𑀯𑁄𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀇𑀥𑁂𑀓𑀘𑁆𑀘𑁄 𑀪𑀺𑀓𑁆𑀔𑀼 𑀯𑀘𑀻𑀯𑀺𑀧𑁆𑀨𑀸𑀭𑁂𑀦 𑀧𑀭𑀺𑀲𑀸𑀬 𑀲𑀸𑀯𑁂𑀢𑀺 ‘𑀏𑀯𑀜𑁆𑀘 𑀏𑀯𑀜𑁆𑀘 𑀪𑀺𑀓𑁆𑀔𑀽𑀦𑀁 𑀤𑀸𑀢𑀩𑁆𑀩’𑀦𑁆𑀢𑀺, 𑀢𑀜𑁆𑀘 𑀢𑁂 𑀯𑀘𑀦𑀁 𑀲𑀼𑀢𑁆𑀯𑀸 𑀧𑀭𑀺𑀓𑀺𑀢𑁆𑀢𑀺𑀢𑀁 𑀅𑀪𑀺𑀳𑀭𑀦𑁆𑀢𑀺, 𑀅𑀬𑀫𑁆𑀧𑀺 𑀯𑀘𑀻𑀯𑀺𑀜𑁆𑀜𑀢𑁆𑀢𑀺 𑀲𑀸𑀯𑀚𑁆𑀚𑀸, 𑀢𑀸𑀬 𑀘 𑀯𑀺𑀜𑁆𑀜𑀸𑀧𑀺𑀢𑀁 𑀅𑀭𑀺𑀬𑀸 𑀦 𑀧𑀭𑀺𑀪𑀼𑀜𑁆𑀚𑀦𑁆𑀢𑀺, 𑀲𑁄 𑀘 𑀧𑀼𑀕𑁆𑀕𑀮𑁄 𑀅𑀭𑀺𑀬𑀸𑀦𑀁 𑀲𑀫𑀬𑁂 𑀑𑀜𑁆𑀜𑀸𑀢𑁄 𑀳𑁄𑀢𑀺 𑀳𑀻𑀴𑀺𑀢𑁄 𑀔𑀻𑀴𑀺𑀢𑁄 𑀕𑀭𑀳𑀺𑀢𑁄 𑀧𑀭𑀺𑀪𑀽𑀢𑁄 𑀅𑀘𑀺𑀢𑁆𑀢𑀻𑀓𑀢𑁄, 𑀪𑀺𑀦𑁆𑀦𑀸𑀚𑀻𑀯𑁄𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺.

‘‘𑀦𑀦𑀼, 𑀫𑀳𑀸𑀭𑀸𑀚, 𑀣𑁂𑀭𑁄𑀧𑀺 𑀲𑀸𑀭𑀺𑀧𑀼𑀢𑁆𑀢𑁄 𑀅𑀢𑁆𑀣𑀗𑁆𑀕𑀢𑁂 𑀲𑀽𑀭𑀺𑀬𑁂 𑀭𑀢𑁆𑀢𑀺𑀪𑀸𑀕𑁂 𑀕𑀺𑀮𑀸𑀦𑁄 𑀲𑀫𑀸𑀦𑁄 𑀣𑁂𑀭𑁂𑀦 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁂𑀦 𑀪𑁂𑀲𑀚𑁆𑀚𑀁 𑀧𑀼𑀘𑁆𑀙𑀻𑀬𑀫𑀸𑀦𑁄 𑀯𑀸𑀘𑀁 𑀪𑀺𑀦𑁆𑀤𑀺, 𑀢𑀲𑁆𑀲 𑀢𑁂𑀦 𑀯𑀘𑀻𑀪𑁂𑀤𑁂𑀦 𑀪𑁂𑀲𑀚𑁆𑀚𑀁 𑀉𑀧𑁆𑀧𑀚𑁆𑀚𑀺. 𑀅𑀣 𑀣𑁂𑀭𑁄 𑀲𑀸𑀭𑀺𑀧𑀼𑀢𑁆𑀢𑁄 ‘𑀯𑀘𑀻𑀪𑁂𑀤𑁂𑀦 𑀫𑁂 𑀇𑀫𑀁 𑀪𑁂𑀲𑀚𑁆𑀚𑀁 𑀉𑀧𑁆𑀧𑀦𑁆𑀦𑀁, 𑀫𑀸 𑀫𑁂 𑀆𑀚𑀻𑀯𑁄 𑀪𑀺𑀚𑁆𑀚𑀻’𑀢𑀺 𑀆𑀚𑀻𑀯𑀪𑁂𑀤𑀪𑀬𑀸 𑀢𑀁 𑀪𑁂𑀲𑀚𑁆𑀚𑀁 𑀧𑀚𑀳𑀺 𑀦 𑀉𑀧𑀚𑀻𑀯𑀺. 𑀏𑀯𑀫𑁆𑀧𑀺 𑀯𑀘𑀻𑀯𑀺𑀜𑁆𑀜𑀢𑁆𑀢𑀺 𑀲𑀸𑀯𑀚𑁆𑀚𑀸, 𑀢𑀸𑀬 𑀘 𑀯𑀺𑀜𑁆𑀜𑀸𑀧𑀺𑀢𑀁 𑀅𑀭𑀺𑀬𑀸 𑀦 𑀧𑀭𑀺𑀪𑀼𑀜𑁆𑀚𑀦𑁆𑀢𑀺. 𑀲𑁄 𑀘 𑀧𑀼𑀕𑁆𑀕𑀮𑁄 𑀅𑀭𑀺𑀬𑀸𑀦𑀁 𑀲𑀫𑀬𑁂 𑀑𑀜𑁆𑀜𑀸𑀢𑁄 𑀳𑁄𑀢𑀺 𑀳𑀻𑀴𑀺𑀢𑁄 𑀔𑀻𑀴𑀺𑀢𑁄 𑀕𑀭𑀳𑀺𑀢𑁄 𑀧𑀭𑀺𑀪𑀽𑀢𑁄 𑀅𑀘𑀺𑀢𑁆𑀢𑀻𑀓𑀢𑁄, 𑀪𑀺𑀦𑁆𑀦𑀸𑀚𑀻𑀯𑁄𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺.

‘‘𑀓𑀢𑀫𑀸 𑀯𑀘𑀻𑀯𑀺𑀜𑁆𑀜𑀢𑁆𑀢𑀺 𑀅𑀦𑀯𑀚𑁆𑀚𑀸? 𑀇𑀥, 𑀫𑀳𑀸𑀭𑀸𑀚, 𑀪𑀺𑀓𑁆𑀔𑀼 𑀲𑀢𑀺 𑀧𑀘𑁆𑀘𑀬𑁂 𑀪𑁂𑀲𑀚𑁆𑀚𑀁 𑀯𑀺𑀜𑁆𑀜𑀸𑀧𑁂𑀢𑀺 𑀜𑀸𑀢𑀺𑀧𑀯𑀸𑀭𑀺𑀢𑁂𑀲𑀼 𑀓𑀼𑀮𑁂𑀲𑀼, 𑀅𑀬𑀁 𑀯𑀘𑀻𑀯𑀺𑀜𑁆𑀜𑀢𑁆𑀢𑀺 𑀅𑀦𑀯𑀚𑁆𑀚𑀸, 𑀢𑀸𑀬 𑀘 𑀯𑀺𑀜𑁆𑀜𑀸𑀧𑀺𑀢𑀁 𑀅𑀭𑀺𑀬𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀺, 𑀲𑁄 𑀘 𑀧𑀼𑀕𑁆𑀕𑀮𑁄 𑀅𑀭𑀺𑀬𑀸𑀦𑀁 𑀲𑀫𑀬𑁂 𑀯𑀡𑁆𑀡𑀺𑀢𑁄 𑀳𑁄𑀢𑀺 𑀣𑁄𑀫𑀺𑀢𑁄 𑀧𑀲𑀢𑁆𑀣𑁄, 𑀧𑀭𑀺𑀲𑀼𑀤𑁆𑀥𑀸𑀚𑀻𑀯𑁄𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺, 𑀅𑀦𑀼𑀫𑀢𑁄 𑀢𑀣𑀸𑀕𑀢𑁂𑀳𑀺 𑀅𑀭𑀳𑀦𑁆𑀢𑁂𑀳𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀳𑀺.

‘‘𑀬𑀁 𑀧𑀦, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑁄 𑀓𑀲𑀺𑀪𑀸𑀭𑀤𑁆𑀯𑀸𑀚𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀪𑁄𑀚𑀦𑀁 𑀧𑀚𑀳𑀺 [𑀧𑀚𑀳𑀢𑀺 (𑀓.)], 𑀢𑀁 𑀆𑀯𑁂𑀞𑀦𑀯𑀺𑀦𑀺𑀯𑁂𑀞𑀦𑀓𑀟𑁆𑀠𑀦𑀦𑀺𑀕𑁆𑀕𑀳𑀧𑁆𑀧𑀝𑀺𑀓𑀫𑁆𑀫𑁂𑀦 𑀦𑀺𑀩𑁆𑀩𑀢𑁆𑀢𑀺, 𑀢𑀲𑁆𑀫𑀸 𑀢𑀣𑀸𑀕𑀢𑁄 𑀢𑀁 𑀧𑀺𑀡𑁆𑀟𑀧𑀸𑀢𑀁 𑀧𑀝𑀺𑀓𑁆𑀔𑀺𑀧𑀺 𑀦 𑀉𑀧𑀚𑀻𑀯𑀻’’𑀢𑀺.

‘‘𑀲𑀩𑁆𑀩𑀓𑀸𑀮𑀁, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀢𑀣𑀸𑀕𑀢𑁂 𑀪𑀼𑀜𑁆𑀚𑀫𑀸𑀦𑁂 𑀤𑁂𑀯𑀢𑀸 𑀤𑀺𑀩𑁆𑀩𑀁 𑀑𑀚𑀁 𑀧𑀢𑁆𑀢𑁂 𑀆𑀓𑀺𑀭𑀦𑁆𑀢𑀺, 𑀉𑀤𑀸𑀳𑀼 ‘𑀲𑀽𑀓𑀭𑀫𑀤𑁆𑀤𑀯𑁂 𑀘 𑀫𑀥𑀼𑀧𑀸𑀬𑀸𑀲𑁂 𑀘𑀸’𑀢𑀺 𑀤𑁆𑀯𑀻𑀲𑀼 𑀬𑁂𑀯 𑀧𑀺𑀡𑁆𑀟𑀧𑀸𑀢𑁂𑀲𑀼 𑀆𑀓𑀺𑀭𑀺𑀁𑀲𑀽’’𑀢𑀺? ‘‘𑀲𑀩𑁆𑀩𑀓𑀸𑀮𑀁, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑁂 𑀪𑀼𑀜𑁆𑀚𑀫𑀸𑀦𑁂 𑀤𑁂𑀯𑀢𑀸 𑀤𑀺𑀩𑁆𑀩𑀁 𑀑𑀚𑀁 𑀕𑀳𑁂𑀢𑁆𑀯𑀸 𑀉𑀧𑀢𑀺𑀝𑁆𑀞𑀺𑀢𑁆𑀯𑀸 𑀉𑀤𑁆𑀥𑀝𑀼𑀤𑁆𑀥𑀝𑁂 𑀆𑀮𑁄𑀧𑁂 𑀆𑀓𑀺𑀭𑀦𑁆𑀢𑀺.

‘‘𑀬𑀣𑀸, 𑀫𑀳𑀸𑀭𑀸𑀚, 𑀭𑀜𑁆𑀜𑁄 𑀲𑀽𑀤𑁄 𑀭𑀜𑁆𑀜𑁄 𑀪𑀼𑀜𑁆𑀚𑀦𑁆𑀢𑀲𑁆𑀲 𑀲𑀽𑀧𑀁 𑀕𑀳𑁂𑀢𑁆𑀯𑀸 𑀉𑀧𑀢𑀺𑀝𑁆𑀞𑀺𑀢𑁆𑀯𑀸 𑀓𑀩𑀴𑁂 𑀓𑀩𑀴𑁂 𑀲𑀽𑀧𑀁 𑀆𑀓𑀺𑀭𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀲𑀩𑁆𑀩𑀓𑀸𑀮𑀁 𑀢𑀣𑀸𑀕𑀢𑁂 𑀪𑀼𑀜𑁆𑀚𑀫𑀸𑀦𑁂 𑀤𑁂𑀯𑀢𑀸 𑀤𑀺𑀩𑁆𑀩𑀁 𑀑𑀚𑀁 𑀕𑀳𑁂𑀢𑁆𑀯𑀸 𑀉𑀧𑀢𑀺𑀝𑁆𑀞𑀺𑀢𑁆𑀯𑀸 𑀉𑀤𑁆𑀥𑀝𑀼𑀤𑁆𑀥𑀝𑁂 𑀆𑀮𑁄𑀧𑁂 𑀤𑀺𑀩𑁆𑀩𑀁 𑀑𑀚𑀁 𑀆𑀓𑀺𑀭𑀦𑁆𑀢𑀺. 𑀯𑁂𑀭𑀜𑁆𑀚𑀸𑀬𑀫𑁆𑀧𑀺, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑀲𑁆𑀲 𑀲𑀼𑀓𑁆𑀔𑀬𑀯𑀧𑀼𑀮𑀓𑁂 [𑀲𑀼𑀓𑁆𑀔𑀬𑀯𑀫𑀽𑀮𑀓𑁂 (𑀓.)] 𑀪𑀼𑀜𑁆𑀚𑀫𑀸𑀦𑀲𑁆𑀲 𑀤𑁂𑀯𑀢𑀸 𑀤𑀺𑀩𑁆𑀩𑁂𑀦 𑀑𑀚𑁂𑀦 𑀢𑁂𑀫𑀬𑀺𑀢𑁆𑀯𑀸 𑀢𑁂𑀫𑀬𑀺𑀢𑁆𑀯𑀸 𑀉𑀧𑀲𑀁𑀳𑀭𑀺𑀁𑀲𑀼, 𑀢𑁂𑀦 𑀢𑀣𑀸𑀕𑀢𑀲𑁆𑀲 𑀓𑀸𑀬𑁄 𑀉𑀧𑀘𑀺𑀢𑁄 𑀅𑀳𑁄𑀲𑀻’’𑀢𑀺. ‘‘𑀮𑀸𑀪𑀸 𑀯𑀢, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀢𑀸𑀲𑀁 𑀤𑁂𑀯𑀢𑀸𑀦𑀁, 𑀬𑀸 𑀢𑀣𑀸𑀕𑀢𑀲𑁆𑀲 𑀲𑀭𑀻𑀭𑀧𑁆𑀧𑀝𑀺𑀚𑀕𑁆𑀕𑀦𑁂 𑀲𑀢𑀢𑀁 𑀲𑀫𑀺𑀢𑀁 𑀉𑀲𑁆𑀲𑀼𑀓𑁆𑀓𑀫𑀸𑀧𑀦𑁆𑀦𑀸. 𑀲𑀸𑀥𑀼, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀏𑀯𑀫𑁂𑀢𑀁 𑀢𑀣𑀸 𑀲𑀫𑁆𑀧𑀝𑀺𑀘𑁆𑀙𑀸𑀫𑀻’’𑀢𑀺.

𑀕𑀸𑀣𑀸𑀪𑀺𑀕𑀻𑀢𑀪𑁄𑀚𑀦𑀓𑀣𑀸𑀧𑀜𑁆𑀳𑁄 𑀦𑀯𑀫𑁄.

𑁧𑁦. 𑀥𑀫𑁆𑀫𑀤𑁂𑀲𑀦𑀸𑀬 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀧𑀜𑁆𑀳𑁄

𑁧𑁦. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀢𑀼𑀫𑁆𑀳𑁂 𑀪𑀡𑀣 ‘𑀢𑀣𑀸𑀕𑀢𑁂𑀦 𑀘𑀢𑀽𑀳𑀺 𑀘 𑀅𑀲𑀗𑁆𑀔𑁆𑀬𑁂𑀬𑁆𑀬𑁂𑀳𑀺 𑀓𑀧𑁆𑀧𑀸𑀦𑀁 𑀲𑀢𑀲𑀳𑀲𑁆𑀲𑁂𑀦 𑀘 𑀏𑀢𑁆𑀣𑀦𑁆𑀢𑀭𑁂 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁 𑀧𑀭𑀺𑀧𑀸𑀘𑀺𑀢𑀁 𑀫𑀳𑀢𑁄 𑀚𑀦𑀓𑀸𑀬𑀲𑁆𑀲 𑀲𑀫𑀼𑀤𑁆𑀥𑀭𑀡𑀸𑀬𑀸’𑀢𑀺. 𑀧𑀼𑀦 𑀘 ‘𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑀲𑁆𑀲 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀢𑀸𑀬 𑀘𑀺𑀢𑁆𑀢𑀁 𑀦𑀫𑀺, 𑀦𑁄 𑀥𑀫𑁆𑀫𑀤𑁂𑀲𑀦𑀸𑀬𑀸’𑀢𑀺.

‘‘𑀬𑀣𑀸 𑀦𑀸𑀫, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀇𑀲𑁆𑀲𑀸𑀲𑁄 𑀯𑀸 𑀇𑀲𑁆𑀲𑀸𑀲𑀦𑁆𑀢𑁂𑀯𑀸𑀲𑀻 𑀯𑀸 𑀩𑀳𑀼𑀓𑁂 𑀤𑀺𑀯𑀲𑁂 𑀲𑀗𑁆𑀕𑀸𑀫𑀢𑁆𑀣𑀸𑀬 𑀉𑀧𑀸𑀲𑀦𑀁 𑀲𑀺𑀓𑁆𑀔𑀺𑀢𑁆𑀯𑀸 𑀲𑀫𑁆𑀧𑀢𑁆𑀢𑁂 𑀫𑀳𑀸𑀬𑀼𑀤𑁆𑀥𑁂 𑀑𑀲𑀓𑁆𑀓𑁂𑀬𑁆𑀬, 𑀏𑀯𑀫𑁂𑀯 𑀔𑁄, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀢𑀣𑀸𑀕𑀢𑁂𑀦 𑀘𑀢𑀽𑀳𑀺 𑀘 𑀅𑀲𑀗𑁆𑀔𑁆𑀬𑁂𑀬𑁆𑀬𑁂𑀳𑀺 𑀓𑀧𑁆𑀧𑀸𑀦𑀁 𑀲𑀢𑀲𑀳𑀲𑁆𑀲𑁂𑀦 𑀘 𑀏𑀢𑁆𑀣𑀦𑁆𑀢𑀭𑁂 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁 𑀧𑀭𑀺𑀧𑀸𑀘𑁂𑀢𑁆𑀯𑀸 𑀫𑀳𑀢𑁄 𑀚𑀦𑀓𑀸𑀬𑀲𑁆𑀲 𑀲𑀫𑀼𑀤𑁆𑀥𑀭𑀡𑀸𑀬 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑁂𑀦 𑀥𑀫𑁆𑀫𑀤𑁂𑀲𑀦𑀸𑀬 𑀑𑀲𑀓𑁆𑀓𑀺𑀢𑀁.

‘‘𑀬𑀣𑀸 𑀯𑀸 𑀧𑀦, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀫𑀮𑁆𑀮𑁄 𑀯𑀸 𑀫𑀮𑁆𑀮𑀦𑁆𑀢𑁂𑀯𑀸𑀲𑀻 𑀯𑀸 𑀩𑀳𑀼𑀓𑁂 𑀤𑀺𑀯𑀲𑁂 𑀦𑀺𑀩𑁆𑀩𑀼𑀤𑁆𑀥𑀁 𑀲𑀺𑀓𑁆𑀔𑀺𑀢𑁆𑀯𑀸 𑀲𑀫𑁆𑀧𑀢𑁆𑀢𑁂 𑀫𑀮𑁆𑀮𑀬𑀼𑀤𑁆𑀥𑁂 𑀑𑀲𑀓𑁆𑀓𑁂𑀬𑁆𑀬, 𑀏𑀯𑀫𑁂𑀯 𑀔𑁄, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀢𑀣𑀸𑀕𑀢𑁂𑀦 𑀘𑀢𑀽𑀳𑀺 𑀘 𑀅𑀲𑀗𑁆𑀔𑁆𑀬𑁂𑀬𑁆𑀬𑁂𑀳𑀺 𑀓𑀧𑁆𑀧𑀸𑀦𑀁 𑀲𑀢𑀲𑀳𑀲𑁆𑀲𑁂𑀦 𑀘 𑀏𑀢𑁆𑀣𑀦𑁆𑀢𑀭𑁂 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁 𑀧𑀭𑀺𑀧𑀸𑀘𑁂𑀢𑁆𑀯𑀸 𑀫𑀳𑀢𑁄 𑀚𑀦𑀓𑀸𑀬𑀲𑁆𑀲 𑀲𑀫𑀼𑀤𑁆𑀥𑀭𑀡𑀸𑀬 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑁂𑀦 𑀥𑀫𑁆𑀫𑀤𑁂𑀲𑀦𑀸𑀬 𑀑𑀲𑀓𑁆𑀓𑀺𑀢𑀁.

‘‘𑀓𑀺𑀁 𑀦𑀼 𑀔𑁄, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀢𑀣𑀸𑀕𑀢𑁂𑀦 𑀪𑀬𑀸 𑀑𑀲𑀓𑁆𑀓𑀺𑀢𑀁, 𑀉𑀤𑀸𑀳𑀼 𑀅𑀧𑀸𑀓𑀝𑀢𑀸𑀬 𑀑𑀲𑀓𑁆𑀓𑀺𑀢𑀁, 𑀉𑀤𑀸𑀳𑀼 𑀤𑀼𑀩𑁆𑀩𑀮𑀢𑀸𑀬 𑀑𑀲𑀓𑁆𑀓𑀺𑀢𑀁, 𑀉𑀤𑀸𑀳𑀼 𑀅𑀲𑀩𑁆𑀩𑀜𑁆𑀜𑀼𑀢𑀸𑀬 𑀑𑀲𑀓𑁆𑀓𑀺𑀢𑀁, 𑀓𑀺𑀁 𑀢𑀢𑁆𑀣 𑀓𑀸𑀭𑀡𑀁, 𑀇𑀗𑁆𑀖 𑀫𑁂 𑀢𑁆𑀯𑀁 𑀓𑀸𑀭𑀡𑀁 𑀩𑁆𑀭𑀽𑀳𑀺 𑀓𑀗𑁆𑀔𑀸𑀯𑀺𑀢𑀭𑀡𑀸𑀬. 𑀬𑀤𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀢𑀣𑀸𑀕𑀢𑁂𑀦 𑀘𑀢𑀽𑀳𑀺 𑀘 𑀅𑀲𑀗𑁆𑀔𑁆𑀬𑁂𑀬𑁆𑀬𑁂𑀳𑀺 𑀓𑀧𑁆𑀧𑀸𑀦𑀁 𑀲𑀢𑀲𑀳𑀲𑁆𑀲𑁂𑀦 𑀘 𑀏𑀢𑁆𑀣𑀦𑁆𑀢𑀭𑁂 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁 𑀧𑀭𑀺𑀧𑀸𑀘𑀺𑀢𑀁 𑀫𑀳𑀢𑁄 𑀚𑀦𑀓𑀸𑀬𑀲𑁆𑀲 𑀲𑀫𑀼𑀤𑁆𑀥𑀭𑀡𑀸𑀬, 𑀢𑁂𑀦 𑀳𑀺 ‘𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑀲𑁆𑀲 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀢𑀸𑀬 𑀘𑀺𑀢𑁆𑀢𑀁 𑀦𑀫𑀺, 𑀦𑁄 𑀥𑀫𑁆𑀫𑀤𑁂𑀲𑀦𑀸𑀬𑀸’𑀢𑀺 𑀬𑀁 𑀯𑀘𑀦𑀁, 𑀢𑀁 𑀫𑀺𑀘𑁆𑀙𑀸. 𑀬𑀤𑀺 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑀲𑁆𑀲 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀢𑀸𑀬 𑀘𑀺𑀢𑁆𑀢𑀁 𑀦𑀫𑀺 𑀦𑁄 𑀥𑀫𑁆𑀫𑀤𑁂𑀲𑀦𑀸𑀬, 𑀢𑁂𑀦 𑀳𑀺 ‘𑀢𑀣𑀸𑀕𑀢𑁂𑀦 𑀘𑀢𑀽𑀳𑀺 𑀘 𑀅𑀲𑀗𑁆𑀔𑁆𑀬𑁂𑀬𑁆𑀬𑁂𑀢𑀺 𑀓𑀧𑁆𑀧𑀸𑀦𑀁 𑀲𑀢𑀲𑀳𑀲𑁆𑀲𑁂𑀦 𑀘 𑀏𑀢𑁆𑀣𑀦𑁆𑀢𑀭𑁂 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁 𑀧𑀭𑀺𑀧𑀸𑀘𑀺𑀢𑀁 𑀫𑀳𑀢𑁄 𑀚𑀦𑀓𑀸𑀬𑀲𑁆𑀲 𑀲𑀫𑀼𑀤𑁆𑀥𑀭𑀡𑀸𑀬𑀸’𑀢𑀺 𑀢𑀫𑁆𑀧𑀺 𑀯𑀘𑀦𑀁 𑀫𑀺𑀘𑁆𑀙𑀸. 𑀅𑀬𑀫𑁆𑀧𑀺 𑀉𑀪𑀢𑁄 𑀓𑁄𑀝𑀺𑀓𑁄 𑀧𑀜𑁆𑀳𑁄 𑀕𑀫𑁆𑀪𑀻𑀭𑁄 𑀤𑀼𑀦𑁆𑀦𑀺𑀩𑁆𑀩𑁂𑀞𑁄 𑀢𑀯𑀸𑀦𑀼𑀧𑁆𑀧𑀢𑁆𑀢𑁄, 𑀲𑁄 𑀢𑀬𑀸 𑀦𑀺𑀩𑁆𑀩𑀸𑀳𑀺𑀢𑀩𑁆𑀩𑁄’’𑀢𑀺.

‘‘𑀧𑀭𑀺𑀧𑀸𑀘𑀺𑀢𑀜𑁆𑀘, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑁂𑀦 𑀘𑀢𑀽𑀳𑀺 𑀘 𑀅𑀲𑀗𑁆𑀔𑁆𑀬𑁂𑀬𑁆𑀬𑁂𑀳𑀺 𑀓𑀧𑁆𑀧𑀸𑀦𑀁 𑀲𑀢𑀲𑀳𑀲𑁆𑀲𑁂𑀦 𑀘 𑀏𑀢𑁆𑀣𑀦𑁆𑀢𑀭𑁂 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁 𑀫𑀳𑀢𑁄 𑀚𑀦𑀓𑀸𑀬𑀲𑁆𑀲 𑀲𑀫𑀼𑀤𑁆𑀥𑀭𑀡𑀸𑀬, 𑀧𑀢𑁆𑀢𑀲𑀩𑁆𑀩𑀜𑁆𑀜𑀼𑀢𑀲𑁆𑀲 𑀘 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀢𑀸𑀬 𑀘𑀺𑀢𑁆𑀢𑀁 𑀦𑀫𑀺, 𑀦𑁄 𑀥𑀫𑁆𑀫𑀤𑁂𑀲𑀦𑀸𑀬. 𑀢𑀜𑁆𑀘 𑀧𑀦 𑀥𑀫𑁆𑀫𑀲𑁆𑀲 𑀕𑀫𑁆𑀪𑀻𑀭𑀦𑀺𑀧𑀼𑀡𑀤𑀼𑀤𑁆𑀤𑀲𑀤𑀼𑀭𑀦𑀼𑀩𑁄𑀥𑀲𑀼𑀔𑀼𑀫𑀤𑀼𑀧𑁆𑀧𑀝𑀺𑀯𑁂𑀥𑀢𑀁 𑀲𑀢𑁆𑀢𑀸𑀦𑀜𑁆𑀘 𑀆𑀮𑀬𑀸𑀭𑀸𑀫𑀢𑀁 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸 𑀤𑀴𑁆𑀳𑀲𑀼𑀕𑁆𑀕𑀳𑀺𑀢𑀢𑀜𑁆𑀘 𑀤𑀺𑀲𑁆𑀯𑀸 ‘𑀓𑀺𑀁 𑀦𑀼 𑀔𑁄, 𑀓𑀣𑀁 𑀦𑀼 𑀔𑁄’𑀢𑀺 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀢𑀸𑀬 𑀘𑀺𑀢𑁆𑀢𑀁 𑀦𑀫𑀺, 𑀦𑁄 𑀥𑀫𑁆𑀫𑀤𑁂𑀲𑀦𑀸𑀬, 𑀲𑀢𑁆𑀢𑀸𑀦𑀁 𑀧𑀝𑀺𑀯𑁂𑀥𑀘𑀺𑀦𑁆𑀢𑀦𑀫𑀸𑀦𑀲𑀁 𑀬𑁂𑀯𑁂𑀢𑀁.

‘‘𑀬𑀣𑀸, 𑀫𑀳𑀸𑀭𑀸𑀚, 𑀪𑀺𑀲𑀓𑁆𑀓𑁄 𑀲𑀮𑁆𑀮𑀓𑀢𑁆𑀢𑁄 𑀅𑀦𑁂𑀓𑀩𑁆𑀬𑀸𑀥𑀺𑀧𑀭𑀺𑀧𑀻𑀴𑀺𑀢𑀁 𑀦𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀁 𑀘𑀺𑀦𑁆𑀢𑀬𑀢𑀺 ‘𑀓𑁂𑀦 𑀦𑀼 𑀔𑁄 𑀉𑀧𑀓𑁆𑀓𑀫𑁂𑀦 𑀓𑀢𑀫𑁂𑀦 𑀯𑀸 𑀪𑁂𑀲𑀚𑁆𑀚𑁂𑀦 𑀇𑀫𑀲𑁆𑀲 𑀩𑁆𑀬𑀸𑀥𑀺 𑀯𑀽𑀧𑀲𑀫𑁂𑀬𑁆𑀬𑀸’𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑀲𑁆𑀲 𑀲𑀩𑁆𑀩𑀓𑀺𑀮𑁂𑀲𑀩𑁆𑀬𑀸𑀥𑀺𑀧𑀭𑀺𑀧𑀻𑀴𑀺𑀢𑀁 𑀚𑀦𑀁 𑀥𑀫𑁆𑀫𑀲𑁆𑀲 𑀘 𑀕𑀫𑁆𑀪𑀻𑀭𑀦𑀺𑀧𑀼𑀡𑀤𑀼𑀤𑁆𑀤𑀲𑀤𑀼𑀭𑀦𑀼𑀩𑁄𑀥𑀲𑀼𑀔𑀼𑀫𑀤𑀼𑀧𑁆𑀧𑀝𑀺𑀯𑁂𑀥𑀢𑀁 𑀤𑀺𑀲𑁆𑀯𑀸 ‘𑀓𑀺𑀁 𑀦𑀼 𑀔𑁄, 𑀓𑀣𑀁 𑀦𑀼 𑀔𑁄’𑀢𑀺 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀢𑀸𑀬 𑀘𑀺𑀢𑁆𑀢𑀁 𑀦𑀫𑀺, 𑀦𑁄 𑀥𑀫𑁆𑀫𑀤𑁂𑀲𑀦𑀸𑀬, 𑀲𑀢𑁆𑀢𑀸𑀦𑀁 𑀧𑀝𑀺𑀯𑁂𑀥𑀘𑀺𑀦𑁆𑀢𑀦𑀫𑀸𑀦𑀲𑀁 𑀬𑁂𑀯𑁂𑀢𑀁.

‘‘𑀬𑀣𑀸, 𑀫𑀳𑀸𑀭𑀸𑀚, 𑀭𑀜𑁆𑀜𑁄 𑀔𑀢𑁆𑀢𑀺𑀬𑀲𑁆𑀲 𑀫𑀼𑀤𑁆𑀥𑀸𑀯𑀲𑀺𑀢𑁆𑀢𑀲𑁆𑀲 𑀤𑁄𑀯𑀸𑀭𑀺𑀓𑀅𑀦𑀻𑀓𑀝𑁆𑀞𑀧𑀸𑀭𑀺𑀲𑀚𑁆𑀚𑀦𑁂𑀕𑀫𑀪𑀝𑀩𑀮 [𑀩𑀮𑀢𑁆𑀣 (𑀲𑀻. 𑀧𑀻.)] 𑀅𑀫𑀘𑁆𑀘𑀭𑀸𑀚𑀜𑁆𑀜𑀭𑀸𑀚𑀽𑀧𑀚𑀻𑀯𑀺𑀦𑁂 𑀚𑀦𑁂 𑀤𑀺𑀲𑁆𑀯𑀸 𑀏𑀯𑀁 𑀘𑀺𑀢𑁆𑀢𑀫𑀼𑀧𑁆𑀧𑀚𑁆𑀚𑁂𑀬𑁆𑀬 ‘𑀓𑀺𑀁 𑀦𑀼 𑀔𑁄, 𑀓𑀣𑀁 𑀦𑀼 𑀔𑁄 𑀇𑀫𑁂 𑀲𑀗𑁆𑀕𑀡𑁆𑀳𑀺𑀲𑁆𑀲𑀸𑀫𑀻’𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑀲𑁆𑀲 𑀥𑀫𑁆𑀫𑀲𑁆𑀲 𑀕𑀫𑁆𑀪𑀻𑀭𑀦𑀺𑀧𑀼𑀡𑀤𑀼𑀤𑁆𑀤𑀲𑀤𑀼𑀭𑀦𑀼𑀩𑁄𑀥𑀲𑀼𑀔𑀼𑀫𑀤𑀼𑀧𑁆𑀧𑀝𑀺𑀯𑁂𑀥𑀢𑀁 𑀲𑀢𑁆𑀢𑀸𑀦𑀜𑁆𑀘 𑀆𑀮𑀬𑀸𑀭𑀸𑀫𑀢𑀁 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸 𑀤𑀴𑁆𑀳𑀲𑀼𑀕𑁆𑀕𑀳𑀺𑀢𑀢𑀜𑁆𑀘 𑀤𑀺𑀲𑁆𑀯𑀸 ‘𑀓𑀺𑀁 𑀦𑀼 𑀔𑁄, 𑀓𑀣𑀁 𑀦𑀼 𑀔𑁄’𑀢𑀺 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀢𑀸𑀬 𑀘𑀺𑀢𑁆𑀢𑀁 𑀦𑀫𑀺, 𑀦𑁄 𑀥𑀫𑁆𑀫𑀤𑁂𑀲𑀦𑀸𑀬, 𑀲𑀢𑁆𑀢𑀸𑀦𑀁 𑀧𑀝𑀺𑀯𑁂𑀥𑀘𑀺𑀦𑁆𑀢𑀦𑀫𑀸𑀦𑀲𑀁 𑀬𑁂𑀯𑁂𑀢𑀁.

‘‘𑀅𑀧𑀺 𑀘, 𑀫𑀳𑀸𑀭𑀸𑀚, 𑀲𑀩𑁆𑀩𑁂𑀲𑀁 𑀢𑀣𑀸𑀕𑀢𑀸𑀦𑀁 𑀥𑀫𑁆𑀫𑀢𑀸 𑀏𑀲𑀸, 𑀬𑀁 𑀩𑁆𑀭𑀳𑁆𑀫𑀼𑀦𑀸 𑀆𑀬𑀸𑀘𑀺𑀢𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺. 𑀢𑀢𑁆𑀣 𑀧𑀦 𑀓𑀺𑀁 𑀓𑀸𑀭𑀡𑀁? 𑀬𑁂 𑀢𑁂𑀦 𑀲𑀫𑀬𑁂𑀦 𑀫𑀦𑀼𑀲𑁆𑀲𑀸 𑀢𑀸𑀧𑀲𑀧𑀭𑀺𑀩𑁆𑀩𑀸𑀚𑀓𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸, 𑀲𑀩𑁆𑀩𑁂𑀢𑁂 𑀩𑁆𑀭𑀳𑁆𑀫𑀤𑁂𑀯𑀢𑀸 𑀳𑁄𑀦𑁆𑀢𑀺 𑀩𑁆𑀭𑀳𑁆𑀫𑀕𑀭𑀼𑀓𑀸 𑀩𑁆𑀭𑀳𑁆𑀫𑀧𑀭𑀸𑀬𑀡𑀸, 𑀢𑀲𑁆𑀫𑀸 𑀢𑀲𑁆𑀲 𑀩𑀮𑀯𑀢𑁄 𑀬𑀲𑀯𑀢𑁄 𑀜𑀸𑀢𑀲𑁆𑀲 𑀧𑀜𑁆𑀜𑀸𑀢𑀲𑁆𑀲 𑀉𑀢𑁆𑀢𑀭𑀲𑁆𑀲 𑀅𑀘𑁆𑀘𑀼𑀕𑁆𑀕𑀢𑀲𑁆𑀲 𑀑𑀦𑀫𑀦𑁂𑀦 𑀲𑀤𑁂𑀯𑀓𑁄 𑀮𑁄𑀓𑁄 𑀑𑀦𑀫𑀺𑀲𑁆𑀲𑀢𑀺 𑀑𑀓𑀧𑁆𑀧𑁂𑀲𑁆𑀲𑀢𑀺 𑀅𑀥𑀺𑀫𑀼𑀘𑁆𑀘𑀺𑀲𑁆𑀲𑀢𑀻𑀢𑀺 𑀇𑀫𑀺𑀦𑀸 𑀘, 𑀫𑀳𑀸𑀭𑀸𑀚, 𑀓𑀸𑀭𑀡𑁂𑀦 𑀢𑀣𑀸𑀕𑀢𑀸 𑀩𑁆𑀭𑀳𑁆𑀫𑀼𑀦𑀸 𑀆𑀬𑀸𑀘𑀺𑀢𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺.

‘‘𑀬𑀣𑀸, 𑀫𑀳𑀸𑀭𑀸𑀚, 𑀓𑁄𑀘𑀺 𑀭𑀸𑀚𑀸 𑀯𑀸 𑀭𑀸𑀚𑀫𑀳𑀸𑀫𑀢𑁆𑀢𑁄 𑀯𑀸 𑀬𑀲𑁆𑀲 𑀑𑀦𑀫𑀢𑀺 𑀅𑀧𑀘𑀺𑀢𑀺𑀁 𑀓𑀭𑁄𑀢𑀺, 𑀩𑀮𑀯𑀢𑀭𑀲𑁆𑀲 𑀢𑀲𑁆𑀲 𑀑𑀦𑀫𑀦𑁂𑀦 𑀅𑀯𑀲𑁂𑀲𑀸 𑀚𑀦𑀢𑀸 𑀑𑀦𑀫𑀢𑀺 𑀅𑀧𑀘𑀺𑀢𑀺𑀁 𑀓𑀭𑁄𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀩𑁆𑀭𑀳𑁆𑀫𑁂 𑀑𑀦𑀫𑀺𑀢𑁂 𑀢𑀣𑀸𑀕𑀢𑀸𑀦𑀁 𑀲𑀤𑁂𑀯𑀓𑁄 𑀮𑁄𑀓𑁄 𑀑𑀦𑀫𑀺𑀲𑁆𑀲𑀢𑀺, 𑀧𑀽𑀚𑀺𑀢𑀧𑀽𑀚𑀓𑁄 𑀫𑀳𑀸𑀭𑀸𑀚, 𑀮𑁄𑀓𑁄, 𑀢𑀲𑁆𑀫𑀸 𑀲𑁄 𑀩𑁆𑀭𑀳𑁆𑀫𑀸 𑀲𑀩𑁆𑀩𑁂𑀲𑀁 𑀢𑀣𑀸𑀕𑀢𑀸𑀦𑀁 𑀆𑀬𑀸𑀘𑀢𑀺 𑀥𑀫𑁆𑀫𑀤𑁂𑀲𑀦𑀸𑀬, 𑀢𑁂𑀦 𑀘 𑀓𑀸𑀭𑀡𑁂𑀦 𑀢𑀣𑀸𑀕𑀢𑀸 𑀩𑁆𑀭𑀳𑁆𑀫𑀼𑀦𑀸 𑀆𑀬𑀸𑀘𑀺𑀢𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀻’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀲𑀼𑀦𑀺𑀩𑁆𑀩𑁂𑀞𑀺𑀢𑁄 𑀧𑀜𑁆𑀳𑁄, 𑀅𑀢𑀺𑀪𑀤𑁆𑀭𑀓𑀁 𑀯𑁂𑀬𑁆𑀬𑀸𑀓𑀭𑀡𑀁, 𑀏𑀯𑀫𑁂𑀢𑀁 𑀢𑀣𑀸 𑀲𑀫𑁆𑀧𑀝𑀺𑀘𑁆𑀙𑀸𑀫𑀻’’𑀢𑀺.

𑀥𑀫𑁆𑀫𑀤𑁂𑀲𑀦𑀸𑀬 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀧𑀜𑁆𑀳𑁄 𑀤𑀲𑀫𑁄.

𑁧𑁧. 𑀆𑀘𑀭𑀺𑀬𑀸𑀦𑀸𑀘𑀭𑀺𑀬𑀧𑀜𑁆𑀳𑁄

𑁧𑁧. ‘‘𑀪𑀦𑁆𑀢𑁂, 𑀦𑀸𑀕𑀲𑁂𑀦, 𑀪𑀸𑀲𑀺𑀢𑀫𑁆𑀧𑁂𑀢𑀁 𑀪𑀕𑀯𑀢𑀸 𑁋

‘‘‘𑀦 𑀫𑁂 𑀆𑀘𑀭𑀺𑀬𑁄 𑀅𑀢𑁆𑀣𑀺, 𑀲𑀤𑀺𑀲𑁄 𑀫𑁂 𑀦 𑀯𑀺𑀚𑁆𑀚𑀢𑀺;

𑀲𑀤𑁂𑀯𑀓𑀲𑁆𑀫𑀺𑀁 𑀮𑁄𑀓𑀲𑁆𑀫𑀺𑀁, 𑀦𑀢𑁆𑀣𑀺 𑀫𑁂 𑀧𑀝𑀺𑀧𑀼𑀕𑁆𑀕𑀮𑁄’𑀢𑀺 [𑀫𑀳𑀸𑀯. 𑁧𑁧].

‘‘𑀧𑀼𑀦 𑀘 𑀪𑀡𑀺𑀢𑀁 ‘𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀆𑀴𑀸𑀭𑁄 𑀓𑀸𑀮𑀸𑀫𑁄 𑀆𑀘𑀭𑀺𑀬𑁄 𑀫𑁂 𑀲𑀫𑀸𑀦𑁄 𑀅𑀦𑁆𑀢𑁂𑀯𑀸𑀲𑀺𑀁 𑀫𑀁 𑀲𑀫𑀸𑀦𑀁 𑀅𑀢𑁆𑀢𑀦𑀸 𑀲𑀫𑀲𑀫𑀁 𑀞𑀧𑁂𑀲𑀺, 𑀉𑀴𑀸𑀭𑀸𑀬 𑀘 𑀫𑀁 𑀧𑀽𑀚𑀸𑀬 𑀧𑀽𑀚𑁂𑀲𑀻’𑀢𑀺. 𑀬𑀤𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀢𑀣𑀸𑀕𑀢𑁂𑀦 𑀪𑀡𑀺𑀢𑀁 ‘𑀦 𑀫𑁂 𑀆𑀘𑀭𑀺𑀬𑁄 𑀅𑀢𑁆𑀣𑀺, 𑀲𑀤𑀺𑀲𑁄 𑀫𑁂 𑀦 𑀯𑀺𑀚𑁆𑀚𑀢𑀺. 𑀲𑀤𑁂𑀯𑀓𑀲𑁆𑀫𑀺𑀁 𑀮𑁄𑀓𑀲𑁆𑀫𑀺𑀁, 𑀦𑀢𑁆𑀣𑀺 𑀫𑁂 𑀧𑀝𑀺𑀧𑀼𑀕𑁆𑀕𑀮𑁄’𑀢𑀺, 𑀢𑁂𑀦 𑀳𑀺 ‘𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀆𑀴𑀸𑀭𑁄 𑀓𑀸𑀮𑀸𑀫𑁄 𑀆𑀘𑀭𑀺𑀬𑁄 𑀫𑁂 𑀲𑀫𑀸𑀦𑁄 𑀅𑀦𑁆𑀢𑁂𑀯𑀸𑀲𑀺𑀁 𑀫𑀁 𑀲𑀫𑀸𑀦𑀁 𑀅𑀢𑁆𑀢𑀦𑀸 𑀲𑀫𑀲𑀫𑀁 𑀞𑀧𑁂𑀲𑀻’𑀢𑀺 𑀬𑀁 𑀯𑀘𑀦𑀁, 𑀢𑀁 𑀫𑀺𑀘𑁆𑀙𑀸. 𑀬𑀤𑀺 𑀢𑀣𑀸𑀕𑀢𑁂𑀦 𑀪𑀡𑀺𑀢𑀁 ‘𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀆𑀴𑀸𑀭𑁄 𑀓𑀸𑀮𑀸𑀫𑁄 𑀆𑀘𑀭𑀺𑀬𑁄 𑀫𑁂 𑀲𑀫𑀸𑀦𑁄 𑀅𑀦𑁆𑀢𑁂𑀯𑀸𑀲𑀺𑀁 𑀫𑀁 𑀲𑀫𑀸𑀦𑀁 𑀅𑀢𑁆𑀢𑀦𑀸 𑀲𑀫𑀲𑀫𑀁 𑀞𑀧𑁂𑀲𑀻’𑀢𑀺, 𑀢𑁂𑀦 𑀳𑀺 ‘𑀦 𑀫𑁂 𑀆𑀘𑀭𑀺𑀬𑁄 𑀅𑀢𑁆𑀣𑀺, 𑀲𑀤𑀺𑀲𑁄 𑀫𑁂 𑀦 𑀯𑀺𑀚𑁆𑀚𑀢𑀺. 𑀲𑀤𑁂𑀯𑀓𑀲𑁆𑀫𑀺𑀁 𑀮𑁄𑀓𑀲𑁆𑀫𑀺𑀁, 𑀦𑀢𑁆𑀣𑀺 𑀫𑁂 𑀧𑀝𑀺𑀧𑀼𑀕𑁆𑀕𑀮𑁄’𑀢𑀺 𑀢𑀫𑁆𑀧𑀺 𑀯𑀘𑀦𑀁 𑀫𑀺𑀘𑁆𑀙𑀸. 𑀅𑀬𑀫𑁆𑀧𑀺 𑀉𑀪𑀢𑁄 𑀓𑁄𑀝𑀺𑀓𑁄 𑀧𑀜𑁆𑀳𑁄 𑀢𑀯𑀸𑀦𑀼𑀧𑁆𑀧𑀢𑁆𑀢𑁄, 𑀲𑁄 𑀢𑀬𑀸 𑀦𑀺𑀩𑁆𑀩𑀸𑀳𑀺𑀢𑀩𑁆𑀩𑁄’’𑀢𑀺.

‘‘𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑁂𑀦 ‘𑀦 𑀫𑁂 𑀆𑀘𑀭𑀺𑀬𑁄 𑀅𑀢𑁆𑀣𑀺, 𑀲𑀤𑀺𑀲𑁄 𑀫𑁂 𑀦 𑀯𑀺𑀚𑁆𑀚𑀢𑀺. 𑀲𑀤𑁂𑀯𑀓𑀲𑁆𑀫𑀺𑀁 𑀮𑁄𑀓𑀲𑁆𑀫𑀺𑀁, 𑀦𑀢𑁆𑀣𑀺 𑀫𑁂 𑀧𑀝𑀺𑀧𑀼𑀕𑁆𑀕𑀮𑁄’𑀢𑀺, 𑀪𑀡𑀺𑀢𑀜𑁆𑀘 ‘𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀆𑀴𑀸𑀭𑁄 𑀓𑀸𑀮𑀸𑀫𑁄 𑀆𑀘𑀭𑀺𑀬𑁄 𑀫𑁂 𑀲𑀫𑀸𑀦𑁄 𑀅𑀦𑁆𑀢𑁂𑀯𑀸𑀲𑀺𑀁 𑀫𑀁 𑀲𑀫𑀸𑀦𑀁 𑀅𑀢𑁆𑀢𑀦𑀸 𑀲𑀫𑀲𑀫𑀁 𑀞𑀧𑁂𑀲𑀺, 𑀉𑀴𑀸𑀭𑀸𑀬 𑀘 𑀫𑀁 𑀧𑀽𑀚𑀸𑀬 𑀧𑀽𑀚𑁂𑀲𑀻’𑀢𑀺.

‘‘𑀢𑀜𑁆𑀘 𑀧𑀦 𑀯𑀘𑀦𑀁 𑀧𑀼𑀩𑁆𑀩𑁂𑀯 𑀲𑀫𑁆𑀩𑁄𑀥𑀸 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲𑁂𑀯 𑀲𑀢𑁄 𑀆𑀘𑀭𑀺𑀬𑀪𑀸𑀯𑀁 𑀲𑀦𑁆𑀥𑀸𑀬 𑀪𑀸𑀲𑀺𑀢𑀁.

‘𑀧𑀜𑁆𑀘𑀺𑀫𑁂, 𑀫𑀳𑀸𑀭𑀸𑀚, 𑀧𑀼𑀩𑁆𑀩𑁂𑀯 𑀲𑀫𑁆𑀩𑁄𑀥𑀸 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀢𑁄 𑀆𑀘𑀭𑀺𑀬𑀸, 𑀬𑁂𑀳𑀺 𑀅𑀦𑀼𑀲𑀺𑀝𑁆𑀞𑁄 𑀩𑁄𑀥𑀺𑀲𑀢𑁆𑀢𑁄 𑀢𑀢𑁆𑀣 𑀢𑀢𑁆𑀣 𑀤𑀺𑀯𑀲𑀁 𑀯𑀻𑀢𑀺𑀦𑀸𑀫𑁂𑀲𑀺. 𑀓𑀢𑀫𑁂 𑀧𑀜𑁆𑀘? 𑀬𑁂 𑀢𑁂, 𑀫𑀳𑀸𑀭𑀸𑀚, 𑀅𑀝𑁆𑀞 𑀩𑁆𑀭𑀸𑀳𑁆𑀫𑀡𑀸 𑀚𑀸𑀢𑀫𑀢𑁆𑀢𑁂 𑀩𑁄𑀥𑀺𑀲𑀢𑁆𑀢𑁂 𑀮𑀓𑁆𑀔𑀡𑀸𑀦𑀺 𑀧𑀭𑀺𑀕𑁆𑀕𑀡𑁆𑀳𑀺𑀁𑀲𑀼, 𑀲𑁂𑀬𑁆𑀬𑀣𑀻𑀤𑀁, 𑀭𑀸𑀫𑁄 𑀥𑀚𑁄 𑀮𑀓𑁆𑀔𑀡𑁄 𑀫𑀦𑁆𑀢𑀻 𑀬𑀜𑁆𑀜𑁄 𑀲𑀼𑀬𑀸𑀫𑁄 𑀲𑀼𑀪𑁄𑀚𑁄 𑀲𑀼𑀤𑀢𑁆𑀢𑁄𑀢𑀺. 𑀢𑁂 𑀢𑀲𑁆𑀲 𑀲𑁄𑀢𑁆𑀣𑀺𑀁 𑀧𑀯𑁂𑀤𑀬𑀺𑀢𑁆𑀯𑀸 𑀭𑀓𑁆𑀔𑀸𑀓𑀫𑁆𑀫𑀁 𑀅𑀓𑀁𑀲𑀼, 𑀢𑁂 𑀘 𑀧𑀞𑀫𑀁 𑀆𑀘𑀭𑀺𑀬𑀸.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀺𑀢𑀸 𑀲𑀼𑀤𑁆𑀥𑁄𑀤𑀦𑁄 𑀭𑀸𑀚𑀸 𑀬𑀁 𑀢𑁂𑀦 𑀲𑀫𑀬𑁂𑀦 𑀅𑀪𑀺𑀚𑀸𑀢𑀁 𑀉𑀤𑀺𑀘𑁆𑀘𑀚𑀸𑀢𑀺𑀫𑀦𑁆𑀢𑀁 𑀧𑀤𑀓𑀁 𑀯𑁂𑀬𑁆𑀬𑀸𑀓𑀭𑀡𑀁 𑀙𑀴𑀗𑁆𑀕𑀯𑀦𑁆𑀢𑀁 𑀲𑀩𑁆𑀩𑀫𑀺𑀢𑁆𑀢𑀁 𑀦𑀸𑀫 𑀩𑁆𑀭𑀸𑀳𑁆𑀫𑀡𑀁 𑀉𑀧𑀦𑁂𑀢𑁆𑀯𑀸 𑀲𑁄𑀯𑀡𑁆𑀡𑁂𑀦 𑀪𑀺𑀗𑁆𑀕𑀸𑀭𑁂𑀦 [𑀪𑀺𑀗𑁆𑀓𑀸𑀭𑁂𑀦 (𑀲𑀻. 𑀧𑀻.)] 𑀉𑀤𑀓𑀁 𑀑𑀡𑁄𑀚𑁂𑀢𑁆𑀯𑀸 ‘𑀇𑀫𑀁 𑀓𑀼𑀫𑀸𑀭𑀁 𑀲𑀺𑀓𑁆𑀔𑀸𑀧𑁂𑀳𑀻’𑀢𑀺 𑀅𑀤𑀸𑀲𑀺, 𑀅𑀬𑀁 𑀤𑀼𑀢𑀺𑀬𑁄 𑀆𑀘𑀭𑀺𑀬𑁄.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀬𑀸 𑀲𑀸 𑀤𑁂𑀯𑀢𑀸 𑀩𑁄𑀥𑀺𑀲𑀢𑁆𑀢𑀁 𑀲𑀁𑀯𑁂𑀚𑁂𑀲𑀻, 𑀬𑀲𑁆𑀲𑀸 𑀯𑀘𑀦𑀁 𑀲𑀼𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑁄 𑀲𑀁𑀯𑀺𑀕𑁆𑀕𑁄 𑀉𑀩𑁆𑀩𑀺𑀕𑁆𑀕𑁄 𑀢𑀲𑁆𑀫𑀺𑀁 𑀬𑁂𑀯 𑀔𑀡𑁂 𑀦𑁂𑀓𑁆𑀔𑀫𑁆𑀫𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺, 𑀅𑀬𑀁 𑀢𑀢𑀺𑀬𑁄 𑀆𑀘𑀭𑀺𑀬𑁄.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀆𑀴𑀸𑀭𑁄 𑀓𑀸𑀮𑀸𑀫𑁄 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑁆𑀲 𑀧𑀭𑀺𑀓𑀫𑁆𑀫𑀁 𑀆𑀘𑀺𑀓𑁆𑀔𑀺, 𑀅𑀬𑀁 𑀘𑀢𑀼𑀢𑁆𑀣𑁄 𑀆𑀘𑀭𑀺𑀬𑁄.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀉𑀤𑀓𑁄 𑀭𑀸𑀫𑀧𑀼𑀢𑁆𑀢𑁄 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑁆𑀲 𑀧𑀭𑀺𑀓𑀫𑁆𑀫𑀁 𑀆𑀘𑀺𑀓𑁆𑀔𑀺 [𑀆𑀘𑀺𑀓𑁆𑀔𑀢𑀺 (𑀓.)], 𑀅𑀬𑀁 𑀧𑀜𑁆𑀘𑀫𑁄 𑀆𑀘𑀭𑀺𑀬𑁄. 𑀇𑀫𑁂 𑀔𑁄, 𑀫𑀳𑀸𑀭𑀸𑀚, 𑀧𑀼𑀩𑁆𑀩𑁂𑀯 𑀲𑀫𑁆𑀩𑁄𑀥𑀸 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀢𑁄 𑀧𑀜𑁆𑀘 𑀆𑀘𑀭𑀺𑀬𑀸. 𑀢𑁂 𑀘 𑀧𑀦 𑀆𑀘𑀭𑀺𑀬𑀸 𑀮𑁄𑀓𑀺𑀬𑁂 𑀥𑀫𑁆𑀫𑁂. 𑀇𑀫𑀲𑁆𑀫𑀺𑀜𑁆𑀘 𑀧𑀦, 𑀫𑀳𑀸𑀭𑀸𑀚, 𑀮𑁄𑀓𑀼𑀢𑁆𑀢𑀭𑁂 𑀥𑀫𑁆𑀫𑁂 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀧𑁆𑀧𑀝𑀺𑀯𑁂𑀥𑀸𑀬 𑀦𑀢𑁆𑀣𑀺 𑀢𑀣𑀸𑀕𑀢𑀲𑁆𑀲 𑀅𑀦𑀼𑀢𑁆𑀢𑀭𑁄 𑀅𑀦𑀼𑀲𑀸𑀲𑀓𑁄, 𑀲𑀬𑀫𑁆𑀪𑀽, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑁄 𑀅𑀦𑀸𑀘𑀭𑀺𑀬𑀓𑁄, 𑀢𑀲𑁆𑀫𑀸 𑀓𑀸𑀭𑀡𑀸 𑀢𑀣𑀸𑀕𑀢𑁂𑀦 𑀪𑀡𑀺𑀢𑀁 ‘𑀦 𑀫𑁂 𑀆𑀘𑀭𑀺𑀬𑁄 𑀅𑀢𑁆𑀣𑀺, 𑀲𑀤𑀺𑀲𑁄 𑀫𑁂 𑀦 𑀯𑀺𑀚𑁆𑀚𑀢𑀺. 𑀲𑀤𑁂𑀯𑀓𑀲𑁆𑀫𑀺𑀁 𑀮𑁄𑀓𑀲𑁆𑀫𑀺𑀁, 𑀦𑀢𑁆𑀣𑀺 𑀫𑁂 𑀧𑀝𑀺𑀧𑀼𑀕𑁆𑀕𑀮𑁄’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀏𑀯𑀫𑁂𑀢𑀁 𑀢𑀣𑀸 𑀲𑀫𑁆𑀧𑀝𑀺𑀘𑁆𑀙𑀸𑀫𑀻’’𑀢𑀺.

𑀆𑀘𑀭𑀺𑀬𑀸𑀦𑀸𑀘𑀭𑀺𑀬𑀧𑀜𑁆𑀳𑁄 𑀏𑀓𑀸𑀤𑀲𑀫𑁄.

𑀲𑀦𑁆𑀣𑀯𑀯𑀕𑁆𑀕𑁄 𑀧𑀜𑁆𑀘𑀫𑁄.

𑀇𑀫𑀲𑁆𑀫𑀺𑀁 𑀯𑀕𑁆𑀕𑁂 𑀏𑀓𑀸𑀤𑀲 𑀧𑀜𑁆𑀳𑁄.

𑀫𑁂𑀡𑁆𑀟𑀓𑀧𑀜𑁆𑀳𑁄 𑀦𑀺𑀝𑁆𑀞𑀺𑀢𑁄.