𑁪. 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀯𑀕𑁆𑀕𑁄

𑁧. 𑀇𑀤𑁆𑀥𑀺𑀓𑀫𑁆𑀫𑀯𑀺𑀧𑀸𑀓𑀧𑀜𑁆𑀳𑁄

𑁧. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀪𑀸𑀲𑀺𑀢𑀫𑁆𑀧𑁂𑀢𑀁 𑀪𑀕𑀯𑀢𑀸 ‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀇𑀤𑁆𑀥𑀺𑀫𑀦𑁆𑀢𑀸𑀦𑀁 𑀬𑀤𑀺𑀤𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄’𑀢𑀺. 𑀧𑀼𑀦 𑀘 𑀓𑀺𑀭 𑀲𑁄 𑀮𑀕𑀼𑀴𑁂𑀳𑀺 𑀧𑀭𑀺𑀧𑁄𑀣𑀺𑀢𑁄 𑀪𑀺𑀦𑁆𑀦𑀲𑀻𑀲𑁄 𑀲𑀜𑁆𑀘𑀼𑀡𑁆𑀡𑀺𑀢𑀝𑁆𑀞𑀺𑀫𑀁𑀲𑀥𑀫𑀦𑀺𑀙𑀺𑀦𑁆𑀦𑀧𑀭𑀺𑀕𑀢𑁆𑀢𑁄 𑀧𑀭𑀺𑀦𑀺𑀩𑁆𑀩𑀼𑀢𑁄 [𑀥𑀫𑀦𑀺𑀫𑀚𑁆𑀚𑀧𑀭𑀺𑀓𑀢𑁆𑀢𑁄 (𑀲𑀻. 𑀧𑀻.), 𑀥𑀫𑁆𑀫𑀦𑀺𑀫𑀺𑀜𑁆𑀚𑀧𑀭𑀺𑀕𑀢𑁆𑀢𑁄 (𑀲𑁆𑀬𑀸.)]. 𑀬𑀤𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀣𑁂𑀭𑁄 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀇𑀤𑁆𑀥𑀺𑀬𑀸 𑀓𑁄𑀝𑀺𑀁 𑀕𑀢𑁄, 𑀢𑁂𑀦 𑀳𑀺 𑀮𑀕𑀼𑀴𑁂𑀳𑀺 𑀧𑁄𑀣𑀺𑀢𑁄 𑀧𑀭𑀺𑀦𑀺𑀩𑁆𑀩𑀼𑀢𑁄𑀢𑀺 𑀬𑀁 𑀯𑀘𑀦𑀁, 𑀢𑀁 𑀫𑀺𑀘𑁆𑀙𑀸. 𑀬𑀤𑀺 𑀮𑀕𑀼𑀴𑁂𑀳𑀺 𑀧𑀭𑀺𑀧𑁄𑀣𑀺𑀢𑁄 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀢𑁂𑀦 𑀳𑀺 𑀇𑀤𑁆𑀥𑀺𑀬𑀸 𑀓𑁄𑀝𑀺𑀁 𑀕𑀢𑁄𑀢𑀺 𑀢𑀫𑁆𑀧𑀺 𑀯𑀘𑀦𑀁 𑀫𑀺𑀘𑁆𑀙𑀸. 𑀓𑀺𑀁 𑀦 𑀲𑀫𑀢𑁆𑀣𑁄 𑀇𑀤𑁆𑀥𑀺𑀬𑀸 𑀅𑀢𑁆𑀢𑀦𑁄 𑀉𑀧𑀖𑀸𑀢𑀁 𑀅𑀧𑀦𑀬𑀺𑀢𑀼𑀁, 𑀲𑀤𑁂𑀯𑀓𑀲𑁆𑀲𑀧𑀺 𑀮𑁄𑀓𑀲𑁆𑀲 𑀧𑀝𑀺𑀲𑀭𑀡𑀁 𑀪𑀯𑀺𑀢𑀼𑀁 𑀅𑀭𑀳𑁄𑀢𑀺? 𑀅𑀬𑀫𑁆𑀧𑀺 𑀉𑀪𑀢𑁄 𑀓𑁄𑀝𑀺𑀓𑁄 𑀧𑀜𑁆𑀳𑁄 𑀢𑀯𑀸𑀦𑀼𑀧𑁆𑀧𑀢𑁆𑀢𑁄, 𑀲𑁄 𑀢𑀬𑀸 𑀦𑀺𑀩𑁆𑀩𑀸𑀳𑀺𑀢𑀩𑁆𑀩𑁄’’𑀢𑀺.

‘‘𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 ‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀇𑀤𑁆𑀥𑀺𑀫𑀦𑁆𑀢𑀸𑀦𑀁 𑀬𑀤𑀺𑀤𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄’𑀢𑀺. 𑀆𑀬𑀲𑁆𑀫𑀸 𑀘 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀮𑀕𑀼𑀴𑀳𑀢𑁄 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀢𑀜𑁆𑀘 𑀧𑀦 𑀓𑀫𑁆𑀫𑀸𑀥𑀺𑀕𑁆𑀕𑀳𑀺𑀢𑁂𑀦𑀸’’𑀢𑀺.

‘‘𑀦𑀦𑀼, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀇𑀤𑁆𑀥𑀺𑀫𑀢𑁄 𑀇𑀤𑁆𑀥𑀺𑀯𑀺𑀲𑀬𑁄𑀧𑀺 𑀓𑀫𑁆𑀫𑀯𑀺𑀧𑀸𑀓𑁄𑀧𑀺 𑀤𑁆𑀯𑁂 𑀅𑀘𑀺𑀦𑁆𑀢𑀺𑀬𑀸, 𑀅𑀘𑀺𑀦𑁆𑀢𑀺𑀬𑁂𑀦 𑀅𑀘𑀺𑀦𑁆𑀢𑀺𑀬𑀁 𑀅𑀧𑀦𑀬𑀺𑀢𑀩𑁆𑀩𑀁. 𑀬𑀣𑀸 𑀦𑀸𑀫, 𑀪𑀦𑁆𑀢𑁂, 𑀓𑁂𑀘𑀺 𑀨𑀮𑀓𑀸𑀫𑀸 𑀓𑀧𑀺𑀢𑁆𑀣𑁂𑀦 𑀓𑀧𑀺𑀢𑁆𑀣𑀁 𑀧𑁄𑀣𑁂𑀦𑁆𑀢𑀺, 𑀅𑀫𑁆𑀩𑁂𑀦 𑀅𑀫𑁆𑀩𑀁 𑀧𑁄𑀣𑁂𑀦𑁆𑀢𑀺, 𑀏𑀯𑀫𑁂𑀯 𑀔𑁄, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀅𑀘𑀺𑀦𑁆𑀢𑀺𑀬𑁂𑀦 𑀅𑀘𑀺𑀦𑁆𑀢𑀺𑀬𑀁 𑀧𑁄𑀣𑀬𑀺𑀢𑁆𑀯𑀸 𑀅𑀧𑀦𑁂𑀢𑀩𑁆𑀩’’𑀦𑁆𑀢𑀺? ‘‘𑀅𑀘𑀺𑀦𑁆𑀢𑀺𑀬𑀸𑀦𑀫𑁆𑀧𑀺, 𑀫𑀳𑀸𑀭𑀸𑀚, 𑀏𑀓𑀁 𑀅𑀥𑀺𑀫𑀢𑁆𑀢𑀁 𑀩𑀮𑀯𑀢𑀭𑀁, 𑀬𑀣𑀸, 𑀫𑀳𑀸𑀭𑀸𑀚, 𑀫𑀳𑀺𑀬𑀸 𑀭𑀸𑀚𑀸𑀦𑁄 𑀳𑁄𑀦𑁆𑀢𑀺 𑀲𑀫𑀚𑀘𑁆𑀘𑀸, 𑀲𑀫𑀚𑀘𑁆𑀘𑀸𑀦𑀫𑁆𑀧𑀺 𑀢𑁂𑀲𑀁 𑀏𑀓𑁄 𑀲𑀩𑁆𑀩𑁂 𑀅𑀪𑀺𑀪𑀯𑀺𑀢𑁆𑀯𑀸 𑀆𑀡𑀁 𑀧𑀯𑀢𑁆𑀢𑁂𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀢𑁂𑀲𑀁 𑀅𑀘𑀺𑀦𑁆𑀢𑀺𑀬𑀸𑀦𑀁 𑀓𑀫𑁆𑀫𑀯𑀺𑀧𑀸𑀓𑀁 𑀬𑁂𑀯 𑀅𑀥𑀺𑀫𑀢𑁆𑀢𑀁 𑀩𑀮𑀯𑀢𑀭𑀁, 𑀓𑀫𑁆𑀫𑀯𑀺𑀧𑀸𑀓𑀁 𑀬𑁂𑀯 𑀲𑀩𑁆𑀩𑁂 𑀅𑀪𑀺𑀪𑀯𑀺𑀬 𑀆𑀡𑀁 𑀧𑀯𑀢𑁆𑀢𑁂𑀢𑀺, 𑀓𑀫𑁆𑀫𑀸𑀥𑀺𑀕𑁆𑀕𑀳𑀺𑀢𑀲𑁆𑀲 𑀅𑀯𑀲𑁂𑀲𑀸 𑀓𑀺𑀭𑀺𑀬𑀸 𑀑𑀓𑀸𑀲𑀁 𑀦 𑀮𑀪𑀦𑁆𑀢𑀺.

‘‘𑀇𑀥 𑀧𑀦, 𑀫𑀳𑀸𑀭𑀸𑀚, 𑀓𑁄𑀘𑀺 𑀧𑀼𑀭𑀺𑀲𑁄 𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯 𑀧𑀓𑀭𑀡𑁂 𑀅𑀧𑀭𑀚𑁆𑀛𑀢𑀺, 𑀦 𑀢𑀲𑁆𑀲 𑀫𑀸𑀢𑀸 𑀯𑀸 𑀧𑀺𑀢𑀸 𑀯𑀸 𑀪𑀕𑀺𑀦𑀻 𑀯𑀸 𑀪𑀸𑀢𑀭𑁄 𑀯𑀸 𑀲𑀔𑀻 𑀯𑀸 𑀲𑀳𑀸𑀬𑀓𑀸 𑀯𑀸 [𑀪𑀕𑀺𑀦𑀺𑀪𑀸𑀢𑀭𑁄 𑀯𑀸 𑀲𑀔𑀺𑀲𑀳𑀸𑀬𑀓𑀸 𑀯𑀸 (𑀲𑀻. 𑀧𑀻. 𑀓.)] 𑀢𑀸𑀬𑀦𑁆𑀢𑀺, 𑀅𑀣 𑀔𑁄 𑀭𑀸𑀚𑀸 𑀬𑁂𑀯 𑀢𑀢𑁆𑀣 𑀅𑀪𑀺𑀪𑀯𑀺𑀬 𑀆𑀡𑀁 𑀧𑀯𑀢𑁆𑀢𑁂𑀢𑀺. 𑀓𑀺𑀁 𑀢𑀢𑁆𑀣 𑀓𑀸𑀭𑀡𑀁? 𑀅𑀧𑀭𑀸𑀥𑀺𑀓𑀢𑀸. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀢𑁂𑀲𑀁 𑀅𑀘𑀺𑀦𑁆𑀢𑀺𑀬𑀸𑀦𑀁 𑀓𑀫𑁆𑀫𑀯𑀺𑀧𑀸𑀓𑀁 𑀬𑁂𑀯 𑀅𑀥𑀺𑀫𑀢𑁆𑀢𑀁 𑀩𑀮𑀯𑀢𑀭𑀁, 𑀓𑀫𑁆𑀫𑀯𑀺𑀧𑀸𑀓𑀁 𑀬𑁂𑀯 𑀲𑀩𑁆𑀩𑁂 𑀅𑀪𑀺𑀪𑀯𑀺𑀬 𑀆𑀡𑀁 𑀧𑀯𑀢𑁆𑀢𑁂𑀢𑀺, 𑀓𑀫𑁆𑀫𑀸𑀥𑀺𑀕𑁆𑀕𑀳𑀺𑀢𑀲𑁆𑀲 𑀅𑀯𑀲𑁂𑀲𑀸 𑀓𑀺𑀭𑀺𑀬𑀸 𑀑𑀓𑀸𑀲𑀁 𑀦 𑀮𑀪𑀦𑁆𑀢𑀺.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀫𑀳𑀺𑀬𑀸 𑀤𑀯𑀟𑀸𑀳𑁂 𑀲𑀫𑀼𑀝𑁆𑀞𑀺𑀢𑁂 𑀖𑀝𑀲𑀳𑀲𑁆𑀲𑀫𑁆𑀧𑀺 𑀉𑀤𑀓𑀁 𑀦 𑀲𑀓𑁆𑀓𑁄𑀢𑀺 𑀦𑀺𑀩𑁆𑀩𑀸𑀧𑁂𑀢𑀼𑀁, 𑀅𑀣 𑀔𑁄 𑀅𑀕𑁆𑀕𑀺 𑀬𑁂𑀯 𑀢𑀢𑁆𑀣 𑀅𑀪𑀺𑀪𑀯𑀺𑀬 𑀆𑀡𑀁 𑀧𑀯𑀢𑁆𑀢𑁂𑀢𑀺. 𑀓𑀺𑀁 𑀢𑀢𑁆𑀣 𑀓𑀸𑀭𑀡𑀁? 𑀩𑀮𑀯𑀢𑀸 𑀢𑁂𑀚𑀲𑁆𑀲. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀢𑁂𑀲𑀁 𑀅𑀘𑀺𑀦𑁆𑀢𑀺𑀬𑀸𑀦𑀁 𑀓𑀫𑁆𑀫𑀯𑀺𑀧𑀸𑀓𑀁 𑀬𑁂𑀯 𑀅𑀥𑀺𑀫𑀢𑁆𑀢𑀁 𑀩𑀮𑀯𑀢𑀭𑀁, 𑀓𑀫𑁆𑀫𑀯𑀺𑀧𑀸𑀓𑀁 𑀬𑁂𑀯 𑀲𑀩𑁆𑀩𑁂 𑀅𑀪𑀺𑀪𑀯𑀺𑀬 𑀆𑀡𑀁 𑀧𑀯𑀢𑁆𑀢𑁂𑀢𑀺, 𑀓𑀫𑁆𑀫𑀸𑀥𑀺𑀕𑁆𑀕𑀳𑀺𑀢𑀲𑁆𑀲 𑀅𑀯𑀲𑁂𑀲𑀸 𑀓𑀺𑀭𑀺𑀬𑀸 𑀑𑀓𑀸𑀲𑀁 𑀦 𑀮𑀪𑀦𑁆𑀢𑀺, 𑀢𑀲𑁆𑀫𑀸, 𑀫𑀳𑀸𑀭𑀸𑀚, 𑀆𑀬𑀲𑁆𑀫𑀢𑁄 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲 𑀓𑀫𑁆𑀫𑀸𑀥𑀺𑀕𑁆𑀕𑀳𑀺𑀢𑀲𑁆𑀲 𑀮𑀕𑀼𑀴𑁂𑀳𑀺 𑀧𑁄𑀣𑀺𑀬𑀫𑀸𑀦𑀲𑁆𑀲 𑀇𑀤𑁆𑀥𑀺𑀬𑀸 𑀲𑀫𑀦𑁆𑀦𑀸𑀳𑀸𑀭𑁄 𑀦𑀸𑀳𑁄𑀲𑀻’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀏𑀯𑀫𑁂𑀢𑀁 𑀢𑀣𑀸 𑀲𑀫𑁆𑀧𑀝𑀺𑀘𑁆𑀙𑀸𑀫𑀻’’𑀢𑀺.

𑀇𑀤𑁆𑀥𑀺𑀓𑀫𑁆𑀫𑀯𑀺𑀧𑀸𑀓𑀧𑀜𑁆𑀳𑁄 𑀧𑀞𑀫𑁄.

𑁨. 𑀥𑀫𑁆𑀫𑀯𑀺𑀦𑀬𑀧𑀝𑀺𑀘𑁆𑀙𑀦𑁆𑀦𑀸𑀧𑀝𑀺𑀘𑁆𑀙𑀦𑁆𑀦𑀧𑀜𑁆𑀳𑁄

𑁨. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀪𑀸𑀲𑀺𑀢𑀫𑁆𑀧𑁂𑀢𑀁 𑀪𑀕𑀯𑀢𑀸 ‘𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁄, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀯𑀺𑀦𑀬𑁄 𑀯𑀺𑀯𑀝𑁄 𑀯𑀺𑀭𑁄𑀘𑀢𑀺 𑀦𑁄 𑀧𑀝𑀺𑀘𑁆𑀙𑀦𑁆𑀦𑁄’𑀢𑀺. 𑀧𑀼𑀦 𑀘 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁄 𑀓𑁂𑀯𑀮𑀜𑁆𑀘 𑀯𑀺𑀦𑀬𑀧𑀺𑀝𑀓𑀁 𑀧𑀺𑀳𑀺𑀢𑀁 𑀧𑀝𑀺𑀘𑁆𑀙𑀦𑁆𑀦𑀁. 𑀬𑀤𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀚𑀺𑀦𑀲𑀸𑀲𑀦𑁂 𑀬𑀼𑀢𑁆𑀢𑀁 𑀯𑀸 𑀧𑀢𑁆𑀢𑀁 𑀯𑀸 𑀲𑀫𑀬𑀁 𑀮𑀪𑁂𑀣, 𑀯𑀺𑀦𑀬𑀧𑀡𑁆𑀡𑀢𑁆𑀢𑀺 𑀯𑀺𑀯𑀝𑀸 𑀲𑁄𑀪𑁂𑀬𑁆𑀬. 𑀓𑁂𑀦 𑀓𑀸𑀭𑀡𑁂𑀦? 𑀓𑁂𑀯𑀮𑀁 𑀢𑀢𑁆𑀣 𑀲𑀺𑀓𑁆𑀔𑀸 𑀲𑀁𑀬𑀫𑁄 𑀦𑀺𑀬𑀫𑁄 𑀲𑀻𑀮𑀕𑀼𑀡𑀆𑀘𑀸𑀭𑀧𑀡𑁆𑀡𑀢𑁆𑀢𑀺 𑀅𑀢𑁆𑀣𑀭𑀲𑁄 𑀥𑀫𑁆𑀫𑀭𑀲𑁄 𑀯𑀺𑀫𑀼𑀢𑁆𑀢𑀺𑀭𑀲𑁄. 𑀬𑀤𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀪𑀕𑀯𑀢𑀸 𑀪𑀡𑀺𑀢𑀁 ‘𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁄, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀯𑀺𑀦𑀬𑁄 𑀯𑀺𑀯𑀝𑁄 𑀯𑀺𑀭𑁄𑀘𑀢𑀺 𑀦𑁄 𑀧𑀝𑀺𑀘𑁆𑀙𑀦𑁆𑀦𑁄’𑀢𑀺, 𑀢𑁂𑀦 𑀳𑀺 ‘𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁄 𑀓𑁂𑀯𑀮𑀜𑁆𑀘 𑀯𑀺𑀦𑀬𑀧𑀺𑀝𑀓𑀁 𑀧𑀺𑀳𑀺𑀢𑀁 𑀧𑀝𑀺𑀘𑁆𑀙𑀦𑁆𑀦’𑀦𑁆𑀢𑀺 𑀬𑀁 𑀯𑀘𑀦𑀁, 𑀢𑀁 𑀫𑀺𑀘𑁆𑀙𑀸. 𑀬𑀤𑀺 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁄 𑀓𑁂𑀯𑀮𑀜𑁆𑀘 𑀯𑀺𑀦𑀬𑀧𑀺𑀝𑀓𑀁 𑀧𑀺𑀳𑀺𑀢𑀁 𑀧𑀝𑀺𑀘𑁆𑀙𑀦𑁆𑀦𑀁, 𑀢𑁂𑀦 𑀳𑀺 ‘𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁄, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀯𑀺𑀦𑀬𑁄 𑀯𑀺𑀯𑀝𑁄 𑀯𑀺𑀭𑁄𑀘𑀢𑀺 𑀦𑁄 𑀧𑀝𑀺𑀘𑁆𑀙𑀦𑁆𑀦𑁄’𑀢𑀺 𑀢𑀫𑁆𑀧𑀺 𑀯𑀘𑀦𑀁 𑀫𑀺𑀘𑁆𑀙𑀸. 𑀅𑀬𑀫𑁆𑀧𑀺 𑀉𑀪𑀢𑁄 𑀓𑁄𑀝𑀺𑀓𑁄 𑀧𑀜𑁆𑀳𑁄 𑀢𑀯𑀸𑀦𑀼𑀧𑁆𑀧𑀢𑁆𑀢𑁄, 𑀲𑁄 𑀢𑀬𑀸 𑀦𑀺𑀩𑁆𑀩𑀸𑀳𑀺𑀢𑀩𑁆𑀩𑁄’’𑀢𑀺.

‘‘𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 ‘𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁄, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀯𑀺𑀦𑀬𑁄 𑀯𑀺𑀯𑀝𑁄 𑀯𑀺𑀭𑁄𑀘𑀢𑀺 𑀦𑁄 𑀧𑀝𑀺𑀘𑁆𑀙𑀦𑁆𑀦𑁄’𑀢𑀺. 𑀧𑀼𑀦 𑀘 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁄 𑀓𑁂𑀯𑀮𑀜𑁆𑀘 𑀯𑀺𑀦𑀬𑀧𑀺𑀝𑀓𑀁 𑀧𑀺𑀳𑀺𑀢𑀁 𑀧𑀝𑀺𑀘𑁆𑀙𑀦𑁆𑀦𑀁, 𑀢𑀜𑁆𑀘 𑀧𑀦 𑀦 𑀲𑀩𑁆𑀩𑁂𑀲𑀁, 𑀲𑀻𑀫𑀁 𑀓𑀢𑁆𑀯𑀸 𑀧𑀺𑀳𑀺𑀢𑀁.

‘‘𑀢𑀺𑀯𑀺𑀥𑁂𑀦, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁄 𑀲𑀻𑀫𑀁 𑀓𑀢𑁆𑀯𑀸 𑀧𑀺𑀳𑀺𑀢𑁄, 𑀧𑀼𑀩𑁆𑀩𑀓𑀸𑀦𑀁 𑀢𑀣𑀸𑀕𑀢𑀸𑀦𑀁 𑀯𑀁𑀲𑀯𑀲𑁂𑀦 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁄 𑀲𑀻𑀫𑀁 𑀓𑀢𑁆𑀯𑀸 𑀧𑀺𑀳𑀺𑀢𑁄, 𑀥𑀫𑁆𑀫𑀲𑁆𑀲 𑀕𑀭𑀼𑀓𑀢𑁆𑀢𑀸 𑀧𑀺𑀳𑀺𑀢𑁄, 𑀪𑀺𑀓𑁆𑀔𑀼𑀪𑀽𑀫𑀺𑀬𑀸 𑀕𑀭𑀼𑀓𑀢𑁆𑀢𑀸 𑀧𑀺𑀳𑀺𑀢𑁄.

‘‘𑀓𑀣𑀁 𑀧𑀼𑀩𑁆𑀩𑀓𑀸𑀦𑀁 𑀢𑀣𑀸𑀕𑀢𑀸𑀦𑀁 𑀯𑀁𑀲𑀯𑀲𑁂𑀦 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁄 𑀲𑀻𑀫𑀁 𑀓𑀢𑁆𑀯𑀸 𑀧𑀺𑀳𑀺𑀢𑁄, 𑀏𑀲𑁄 𑀯𑀁𑀲𑁄, 𑀫𑀳𑀸𑀭𑀸𑀚, 𑀲𑀩𑁆𑀩𑁂𑀲𑀁 𑀧𑀼𑀩𑁆𑀩𑀓𑀸𑀦𑀁 𑀢𑀣𑀸𑀕𑀢𑀸𑀦𑀁 𑀬𑀤𑀺𑀤𑀁 𑀪𑀺𑀓𑁆𑀔𑀼𑀫𑀚𑁆𑀛𑁂 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁄 𑀅𑀯𑀲𑁂𑀲𑀸𑀦𑀁 𑀧𑀺𑀳𑀺𑀢𑁄. 𑀬𑀣𑀸, 𑀫𑀳𑀸𑀭𑀸𑀚, 𑀔𑀢𑁆𑀢𑀺𑀬𑀸𑀦𑀁 𑀔𑀢𑁆𑀢𑀺𑀬𑀫𑀸𑀬𑀸 𑀔𑀢𑁆𑀢𑀺𑀬𑁂𑀲𑀼 𑀬𑁂𑀯 𑀘𑀭𑀢𑀺, 𑀏𑀯𑀫𑁂𑀢𑀁 𑀔𑀢𑁆𑀢𑀺𑀬𑀸𑀦𑀁 𑀮𑁄𑀓𑀲𑁆𑀲 𑀧𑀯𑁂𑀡𑀻 𑀅𑀯𑀲𑁂𑀲𑀸𑀦𑀁 𑀧𑀺𑀳𑀺𑀢𑀸. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀏𑀲𑁄 𑀯𑀁𑀲𑁄 𑀲𑀩𑁆𑀩𑁂𑀲𑀁 𑀧𑀼𑀩𑁆𑀩𑀓𑀸𑀦𑀁 𑀢𑀣𑀸𑀕𑀢𑀸𑀦𑀁 𑀬𑀤𑀺𑀤𑀁 𑀪𑀺𑀓𑁆𑀔𑀼𑀫𑀚𑁆𑀛𑁂 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁄 𑀅𑀯𑀲𑁂𑀲𑀸𑀦𑀁 𑀧𑀺𑀳𑀺𑀢𑁄.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀫𑀳𑀺𑀬𑀸 𑀕𑀡𑀸 𑀯𑀢𑁆𑀢𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁, 𑀫𑀮𑁆𑀮𑀸 𑀅𑀢𑁄𑀡𑀸 𑀧𑀩𑁆𑀩𑀢𑀸 𑀥𑀫𑁆𑀫𑀕𑀺𑀭𑀺𑀬𑀸 𑀩𑁆𑀭𑀳𑁆𑀫𑀕𑀺𑀭𑀺𑀬𑀸 𑀦𑀝𑀓𑀸 𑀦𑀘𑁆𑀘𑀓𑀸 𑀮𑀗𑁆𑀖𑀓𑀸 𑀧𑀺𑀲𑀸𑀘𑀸 𑀫𑀡𑀺𑀪𑀤𑁆𑀤𑀸 𑀧𑀼𑀡𑁆𑀡𑀩𑀤𑁆𑀥𑀸 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀲𑀺𑀭𑀺𑀤𑁂𑀯𑀢𑀸 𑀓𑀸𑀮𑀺𑀤𑁂𑀯𑀢𑀸, 𑀲𑀺𑀯𑀸 𑀯𑀲𑀼𑀤𑁂𑀯𑀸 𑀖𑀦𑀺𑀓𑀸 𑀅𑀲𑀺𑀧𑀸𑀲𑀸 𑀪𑀤𑁆𑀤𑀺𑀧𑀼𑀢𑁆𑀢𑀸𑀢𑀺, 𑀢𑁂𑀲𑀁 𑀢𑁂𑀲𑀁 𑀭𑀳𑀲𑁆𑀲𑀁 𑀢𑁂𑀲𑀼 𑀢𑁂𑀲𑀼 𑀕𑀡𑁂𑀲𑀼 𑀬𑁂𑀯 𑀘𑀭𑀢𑀺, 𑀅𑀯𑀲𑁂𑀲𑀸𑀦𑀁 𑀧𑀺𑀳𑀺𑀢𑀁. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀏𑀲𑁄 𑀯𑀁𑀲𑁄 𑀲𑀩𑁆𑀩𑁂𑀲𑀁 𑀧𑀼𑀩𑁆𑀩𑀓𑀸𑀦𑀁 𑀢𑀣𑀸𑀕𑀢𑀸𑀦𑀁 𑀬𑀤𑀺𑀤𑀁 𑀪𑀺𑀓𑁆𑀔𑀼𑀫𑀚𑁆𑀛𑁂 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁄 𑀅𑀯𑀲𑁂𑀲𑀸𑀦𑀁 𑀧𑀺𑀳𑀺𑀢𑁄. 𑀏𑀯𑀁 𑀧𑀼𑀩𑁆𑀩𑀓𑀸𑀦𑀁 𑀢𑀣𑀸𑀕𑀢𑀸𑀦𑀁 𑀯𑀁𑀲𑀯𑀲𑁂𑀦 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁄 𑀲𑀻𑀫𑀁 𑀓𑀢𑁆𑀯𑀸 𑀧𑀺𑀳𑀺𑀢𑁄.

‘‘𑀓𑀣𑀁 𑀥𑀫𑁆𑀫𑀲𑁆𑀲 𑀕𑀭𑀼𑀓𑀢𑁆𑀢𑀸 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁄 𑀲𑀻𑀫𑀁 𑀓𑀢𑁆𑀯𑀸 𑀧𑀺𑀳𑀺𑀢𑁄? 𑀥𑀫𑁆𑀫𑁄, 𑀫𑀳𑀸𑀭𑀸𑀚, 𑀕𑀭𑀼𑀓𑁄 𑀪𑀸𑀭𑀺𑀬𑁄, 𑀢𑀢𑁆𑀣 𑀲𑀫𑁆𑀫𑀢𑁆𑀢𑀓𑀸𑀭𑀻 𑀅𑀜𑁆𑀜𑀁 𑀆𑀭𑀸𑀥𑁂𑀢𑀺, 𑀢𑀁 𑀢𑀢𑁆𑀣 𑀧𑀭𑀫𑁆𑀧𑀭𑀸𑀲𑀫𑁆𑀫𑀢𑁆𑀢𑀓𑀸𑀭𑀺𑀢𑀸𑀬 𑀧𑀸𑀧𑀼𑀡𑀸𑀢𑀺, 𑀦 𑀢𑀁 𑀢𑀢𑁆𑀣 𑀧𑀭𑀫𑁆𑀧𑀭𑀸𑀲𑀫𑁆𑀫𑀢𑁆𑀢𑀓𑀸𑀭𑀺𑀢𑀸𑀬 𑀧𑀸𑀧𑀼𑀡𑀸𑀢𑀺, 𑀫𑀸 𑀘𑀸𑀬𑀁 𑀲𑀸𑀭𑀥𑀫𑁆𑀫𑁄 𑀯𑀭𑀥𑀫𑁆𑀫𑁄 𑀅𑀲𑀫𑁆𑀫𑀢𑁆𑀢𑀓𑀸𑀭𑀻𑀦𑀁 𑀳𑀢𑁆𑀣𑀕𑀢𑁄 𑀑𑀜𑁆𑀜𑀸𑀢𑁄 𑀅𑀯𑀜𑁆𑀜𑀸𑀢𑁄 𑀳𑀻𑀴𑀺𑀢𑁄 𑀔𑀻𑀴𑀺𑀢𑁄 𑀕𑀭𑀳𑀺𑀢𑁄 𑀪𑀯𑀢𑀼, 𑀫𑀸 𑀘𑀸𑀬𑀁 𑀲𑀸𑀭𑀥𑀫𑁆𑀫𑁄 𑀯𑀭𑀥𑀫𑁆𑀫𑁄 𑀤𑀼𑀚𑁆𑀚𑀦𑀕𑀢𑁄 𑀑𑀜𑁆𑀜𑀸𑀢𑁄 𑀅𑀯𑀜𑁆𑀜𑀸𑀢𑁄 𑀳𑀻𑀴𑀺𑀢𑁄 𑀔𑀻𑀴𑀺𑀢𑁄 𑀕𑀭𑀳𑀺𑀢𑁄 𑀪𑀯𑀢𑀽𑀢𑀺. 𑀏𑀯𑀁 𑀥𑀫𑁆𑀫𑀲𑁆𑀲 𑀕𑀭𑀼𑀓𑀢𑁆𑀢𑀸 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁄 𑀲𑀻𑀫𑀁 𑀓𑀢𑁆𑀯𑀸 𑀧𑀺𑀳𑀺𑀢𑁄.

‘‘𑀬𑀣𑀸, 𑀫𑀳𑀸𑀭𑀸𑀚, 𑀲𑀸𑀭𑀯𑀭𑀧𑀯𑀭𑀅𑀪𑀺𑀚𑀸𑀢𑀚𑀸𑀢𑀺𑀫𑀦𑁆𑀢𑀭𑀢𑁆𑀢𑀮𑁄𑀳𑀺𑀢𑀘𑀦𑁆𑀤𑀦𑀁 𑀦𑀸𑀫 𑀲𑀯𑀭𑀧𑀼𑀭𑀫𑀦𑀼𑀕𑀢𑀁 𑀑𑀜𑁆𑀜𑀸𑀢𑀁 𑀅𑀯𑀜𑁆𑀜𑀸𑀢𑀁 𑀳𑀻𑀴𑀺𑀢𑀁 𑀔𑀻𑀴𑀺𑀢𑀁 𑀕𑀭𑀳𑀺𑀢𑀁 𑀪𑀯𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀫𑀸 𑀘𑀸𑀬𑀁 𑀲𑀸𑀭𑀥𑀫𑁆𑀫𑁄 𑀯𑀭𑀥𑀫𑁆𑀫𑁄 𑀧𑀭𑀫𑁆𑀧𑀭𑀸𑀅𑀲𑀫𑁆𑀫𑀢𑁆𑀢𑀓𑀸𑀭𑀻𑀦𑀁 𑀳𑀢𑁆𑀣𑀕𑀢𑁄 𑀑𑀜𑁆𑀜𑀸𑀢𑁄 𑀅𑀯𑀜𑁆𑀜𑀸𑀢𑁄 𑀳𑀻𑀴𑀺𑀢𑁄 𑀔𑀻𑀴𑀺𑀢𑁄 𑀕𑀭𑀳𑀺𑀢𑁄 𑀪𑀯𑀢𑀼, 𑀫𑀸 𑀘𑀸𑀬𑀁 𑀲𑀸𑀭𑀥𑀫𑁆𑀫𑁄 𑀯𑀭𑀥𑀫𑁆𑀫𑁄 𑀤𑀼𑀚𑁆𑀚𑀦𑀕𑀢𑁄 𑀑𑀜𑁆𑀜𑀸𑀢𑁄 𑀅𑀯𑀜𑁆𑀜𑀸𑀢𑁄 𑀳𑀻𑀴𑀺𑀢𑁄 𑀔𑀻𑀴𑀺𑀢𑁄 𑀕𑀭𑀳𑀺𑀢𑁄 𑀪𑀯𑀢𑀽𑀢𑀺. 𑀏𑀯𑀁 𑀥𑀫𑁆𑀫𑀲𑁆𑀲 𑀕𑀭𑀼𑀓𑀢𑁆𑀢𑀸 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁄 𑀲𑀻𑀫𑀁 𑀓𑀢𑁆𑀯𑀸 𑀧𑀺𑀳𑀺𑀢𑁄.

‘‘𑀓𑀣𑀁 𑀪𑀺𑀓𑁆𑀔𑀼𑀪𑀽𑀫𑀺𑀬𑀸 𑀕𑀭𑀼𑀓𑀢𑁆𑀢𑀸 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁄 𑀲𑀻𑀫𑀁 𑀓𑀢𑁆𑀯𑀸 𑀧𑀺𑀳𑀺𑀢𑁄, 𑀪𑀺𑀓𑁆𑀔𑀼𑀪𑀸𑀯𑁄 𑀔𑁄, 𑀫𑀳𑀸𑀭𑀸𑀚, 𑀮𑁄𑀓𑁂 𑀅𑀢𑀼𑀮𑀺𑀬𑁄 𑀅𑀧𑁆𑀧𑀫𑀸𑀡𑁄 𑀅𑀦𑀕𑁆𑀖𑀺𑀬𑁄, 𑀦 𑀲𑀓𑁆𑀓𑀸 𑀓𑁂𑀦𑀘𑀺 𑀅𑀕𑁆𑀖𑀸𑀧𑁂𑀢𑀼𑀁 𑀢𑀼𑀮𑁂𑀢𑀼𑀁 𑀧𑀭𑀺𑀫𑁂𑀢𑀼𑀁, 𑀫𑀸𑀬𑀁 𑀏𑀯𑀭𑀽𑀧𑁂 𑀪𑀺𑀓𑁆𑀔𑀼𑀪𑀸𑀯𑁂 𑀞𑀺𑀢𑁄 𑀮𑁄𑀓𑁂𑀦 𑀲𑀫𑀲𑀫𑁄 𑀪𑀯𑀢𑀽𑀢𑀺 𑀪𑀺𑀓𑁆𑀔𑀽𑀦𑀁 𑀬𑁂𑀯 𑀅𑀦𑁆𑀢𑀭𑁂 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁄 𑀘𑀭𑀢𑀺. 𑀬𑀣𑀸, 𑀫𑀳𑀸𑀭𑀸𑀚, 𑀮𑁄𑀓𑁂 𑀯𑀭𑀧𑀯𑀭𑀪𑀡𑁆𑀟𑀁 𑀯𑀢𑁆𑀣𑀁 𑀯𑀸 𑀅𑀢𑁆𑀣𑀭𑀡𑀁 𑀯𑀸 𑀕𑀚𑀢𑀼𑀭𑀗𑁆𑀕𑀭𑀣𑀲𑀼𑀯𑀡𑁆𑀡𑀭𑀚𑀢𑀫𑀡𑀺𑀫𑀼𑀢𑁆𑀢𑀸𑀇𑀢𑁆𑀣𑀺𑀭𑀢𑀦𑀸𑀤𑀻𑀦𑀺 𑀯𑀸 𑀯𑀺𑀚𑀺𑀢𑀓𑀫𑁆𑀫𑀲𑀽𑀭𑀸 𑀯𑀸 [𑀦𑀺𑀚𑁆𑀚𑀺𑀢𑀓𑀫𑁆𑀫𑀲𑀽𑀭𑀸 𑀯𑀸 (𑀲𑀻. 𑀧𑀻.)] 𑀲𑀩𑁆𑀩𑁂 𑀢𑁂 𑀭𑀸𑀚𑀸𑀦𑀫𑀼𑀧𑀕𑀘𑁆𑀙𑀦𑁆𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑀸𑀯𑀢𑀸 𑀮𑁄𑀓𑁂 [𑀮𑁄𑀓𑁂 𑀲𑀺𑀓𑁆𑀔𑀸 (𑀲𑀻. 𑀧𑀻.)] 𑀲𑀼𑀕𑀢𑀸𑀕𑀫𑀧𑀭𑀺𑀬𑀢𑁆𑀢𑀺𑀆𑀘𑀸𑀭𑀲𑀁𑀬𑀫𑀲𑀻𑀮𑀲𑀁𑀯𑀭𑀕𑀼𑀡𑀸, 𑀲𑀩𑁆𑀩𑁂 𑀢𑁂 𑀪𑀺𑀓𑁆𑀔𑀼𑀲𑀗𑁆𑀖𑀫𑀼𑀧𑀕𑀢𑀸 𑀪𑀯𑀦𑁆𑀢𑀺. 𑀏𑀯𑀁 𑀪𑀺𑀓𑁆𑀔𑀼𑀪𑀽𑀫𑀺𑀬𑀸 𑀕𑀭𑀼𑀓𑀢𑁆𑀢𑀸 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁄 𑀲𑀻𑀫𑀁 𑀓𑀢𑁆𑀯𑀸 𑀧𑀺𑀳𑀺𑀢𑁄’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀏𑀯𑀫𑁂𑀢𑀁 𑀢𑀣𑀸 𑀲𑀫𑁆𑀧𑀺𑀝𑀺𑀘𑁆𑀙𑀸𑀫𑀻’’𑀢𑀺.

𑀥𑀫𑁆𑀫𑀯𑀺𑀦𑀬𑀧𑀝𑀺𑀘𑁆𑀙𑀦𑁆𑀦𑀸𑀧𑀝𑀺𑀘𑁆𑀙𑀦𑁆𑀦𑀧𑀜𑁆𑀳𑁄 𑀤𑀼𑀢𑀺𑀬𑁄.

𑁩. 𑀫𑀼𑀲𑀸𑀯𑀸𑀤𑀕𑀭𑀼𑀮𑀳𑀼𑀪𑀸𑀯𑀧𑀜𑁆𑀳𑁄

𑁩. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀪𑀸𑀲𑀺𑀢𑀫𑁆𑀧𑁂𑀢𑀁 𑀪𑀕𑀯𑀢𑀸 ‘𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑁂 𑀧𑀸𑀭𑀸𑀚𑀺𑀓𑁄 𑀳𑁄𑀢𑀻’𑀢𑀺. 𑀧𑀼𑀦 𑀘 𑀪𑀡𑀺𑀢𑀁 ‘𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑁂 𑀮𑀳𑀼𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺 𑀏𑀓𑀲𑁆𑀲 𑀲𑀦𑁆𑀢𑀺𑀓𑁂 𑀤𑁂𑀲𑀦𑀸𑀯𑀢𑁆𑀣𑀼𑀓’𑀦𑁆𑀢𑀺. 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀓𑁄 𑀧𑀦𑁂𑀢𑁆𑀣 𑀯𑀺𑀲𑁂𑀲𑁄, 𑀓𑀺𑀁 𑀓𑀸𑀭𑀡𑀁, 𑀬𑀜𑁆𑀘𑁂𑀓𑁂𑀦 𑀫𑀼𑀲𑀸𑀯𑀸𑀤𑁂𑀦 𑀉𑀘𑁆𑀙𑀺𑀚𑁆𑀚𑀢𑀺, 𑀬𑀜𑁆𑀘𑁂𑀓𑁂𑀦 𑀫𑀼𑀲𑀸𑀯𑀸𑀤𑁂𑀦 𑀲𑀢𑁂𑀓𑀺𑀘𑁆𑀙𑁄 𑀳𑁄𑀢𑀺? 𑀬𑀤𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀪𑀕𑀯𑀢𑀸 𑀪𑀡𑀺𑀢𑀁 ‘𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑁂 𑀧𑀸𑀭𑀸𑀚𑀺𑀓𑁄 𑀳𑁄𑀢𑀻’𑀢𑀺, 𑀢𑁂𑀦 𑀳𑀺 ‘𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑁂 𑀮𑀳𑀼𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺 𑀏𑀓𑀲𑁆𑀲 𑀲𑀦𑁆𑀢𑀺𑀓𑁂 𑀤𑁂𑀲𑀦𑀸𑀯𑀢𑁆𑀣𑀼𑀓’𑀦𑁆𑀢𑀺 𑀬𑀁 𑀯𑀘𑀦𑀁, 𑀢𑀁 𑀫𑀺𑀘𑁆𑀙𑀸. 𑀬𑀤𑀺 𑀢𑀣𑀸𑀕𑀢𑁂𑀦 𑀪𑀡𑀺𑀢𑀁 ‘𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑁂 𑀮𑀳𑀼𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺 𑀏𑀓𑀲𑁆𑀲 𑀲𑀦𑁆𑀢𑀺𑀓𑁂 𑀤𑁂𑀲𑀦𑀸𑀯𑀢𑁆𑀣𑀼𑀓’𑀦𑁆𑀢𑀺, 𑀢𑁂𑀦 𑀳𑀺 ‘𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑁂 𑀧𑀸𑀭𑀸𑀚𑀺𑀓𑁄 𑀳𑁄𑀢𑀻’𑀢𑀺 𑀢𑀫𑁆𑀧𑀺 𑀯𑀘𑀦𑀁 𑀫𑀺𑀘𑁆𑀙𑀸. 𑀅𑀬𑀫𑁆𑀧𑀺 𑀉𑀪𑀢𑁄 𑀓𑁄𑀝𑀺𑀓𑁄 𑀧𑀜𑁆𑀳𑁄 𑀢𑀯𑀸𑀦𑀼𑀧𑁆𑀧𑀢𑁆𑀢𑁄, 𑀲𑁄 𑀢𑀬𑀸 𑀦𑀺𑀩𑁆𑀩𑀸𑀳𑀺𑀢𑀩𑁆𑀩𑁄’’𑀢𑀺.

‘‘𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 ‘𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑁂 𑀧𑀸𑀭𑀸𑀚𑀺𑀓𑁄 𑀳𑁄𑀢𑀻’𑀢𑀺. 𑀪𑀡𑀺𑀢𑀜𑁆𑀘 ‘𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑁂 𑀮𑀳𑀼𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺 𑀏𑀓𑀲𑁆𑀲 𑀲𑀦𑁆𑀢𑀺𑀓𑁂 𑀤𑁂𑀲𑀦𑀸𑀯𑀢𑁆𑀣𑀼𑀓’𑀦𑁆𑀢𑀺, 𑀢𑀜𑁆𑀘 𑀧𑀦 𑀯𑀢𑁆𑀣𑀼𑀯𑀲𑁂𑀦 𑀕𑀭𑀼𑀓𑀮𑀳𑀼𑀓𑀁 𑀳𑁄𑀢𑀺. 𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀫𑀳𑀸𑀭𑀸𑀚, 𑀇𑀥 𑀓𑁄𑀘𑀺 𑀧𑀼𑀭𑀺𑀲𑁄 𑀧𑀭𑀲𑁆𑀲 𑀧𑀸𑀡𑀺𑀦𑀸 𑀧𑀳𑀸𑀭𑀁 𑀤𑀤𑁂𑀬𑁆𑀬, 𑀢𑀲𑁆𑀲 𑀢𑀼𑀫𑁆𑀳𑁂 𑀓𑀺𑀁 𑀤𑀡𑁆𑀟𑀁 𑀥𑀸𑀭𑁂𑀣𑀸’’𑀢𑀺? ‘‘𑀬𑀤𑀺 𑀲𑁄, 𑀪𑀦𑁆𑀢𑁂, 𑀆𑀳 ‘𑀦𑀓𑁆𑀔𑀫𑀸𑀫𑀻’𑀢𑀺, 𑀢𑀲𑁆𑀲 𑀫𑀬𑀁 𑀅𑀓𑁆𑀔𑀫𑀫𑀸𑀦𑁂 𑀓𑀳𑀸𑀧𑀡𑀁 𑀳𑀭𑀸𑀧𑁂𑀫𑀸’’𑀢𑀺 ‘‘𑀇𑀥 𑀧𑀦, 𑀫𑀳𑀸𑀭𑀸𑀚, 𑀲𑁄 𑀬𑁂𑀯 𑀧𑀼𑀭𑀺𑀲𑁄 𑀢𑀯 𑀧𑀸𑀡𑀺𑀦𑀸 𑀧𑀳𑀸𑀭𑀁 𑀤𑀤𑁂𑀬𑁆𑀬, 𑀢𑀲𑁆𑀲 𑀧𑀦 𑀓𑁄 𑀤𑀡𑁆𑀟𑁄’’𑀢𑀺? ‘‘𑀳𑀢𑁆𑀣𑀫𑁆𑀧𑀺𑀲𑁆𑀲, 𑀪𑀦𑁆𑀢𑁂, 𑀙𑁂𑀤𑀸𑀧𑁂𑀬𑁆𑀬𑀸𑀫, 𑀧𑀸𑀤𑀫𑁆𑀧𑀺 𑀙𑁂𑀤𑀸𑀧𑁂𑀬𑁆𑀬𑀸𑀫, 𑀬𑀸𑀯 𑀲𑀻𑀲𑀁 𑀓𑀴𑀻𑀭𑀘𑁆𑀙𑁂𑀚𑁆𑀚𑀁 𑀙𑁂𑀤𑀸𑀧𑁂𑀬𑁆𑀬𑀸𑀫, 𑀲𑀩𑁆𑀩𑀫𑁆𑀧𑀺 𑀢𑀁 𑀕𑁂𑀳𑀁 𑀯𑀺𑀮𑀼𑀫𑁆𑀧𑀸𑀧𑁂𑀬𑁆𑀬𑀸𑀫, 𑀉𑀪𑀢𑁄𑀧𑀓𑁆𑀔𑁂 [𑀉𑀪𑀢𑁄𑀧𑀲𑁆𑀲𑁂 (𑀲𑀻. 𑀧𑀻. 𑀓.)] 𑀬𑀸𑀯 𑀲𑀢𑁆𑀢𑀫𑀁 𑀓𑀼𑀮𑀁 𑀲𑀫𑀼𑀕𑁆𑀖𑀸𑀢𑀸𑀧𑁂𑀬𑁆𑀬𑀸𑀫𑀸’’𑀢𑀺. ‘‘𑀓𑁄 𑀧𑀦𑁂𑀢𑁆𑀣, 𑀫𑀳𑀸𑀭𑀸𑀚, 𑀯𑀺𑀲𑁂𑀲𑁄, 𑀓𑀺𑀁 𑀓𑀸𑀭𑀡𑀁, 𑀬𑀁 𑀏𑀓𑀲𑁆𑀲 𑀧𑀸𑀡𑀺𑀧𑁆𑀧𑀳𑀸𑀭𑁂 𑀲𑀼𑀔𑀼𑀫𑁄 𑀓𑀳𑀸𑀧𑀡𑁄 𑀤𑀡𑁆𑀟𑁄, 𑀬𑀁 𑀢𑀯 𑀧𑀸𑀡𑀺𑀧𑁆𑀧𑀳𑀸𑀭𑁂 𑀳𑀢𑁆𑀣𑀘𑁆𑀙𑁂𑀚𑁆𑀚𑀁 𑀧𑀸𑀤𑀘𑁆𑀙𑁂𑀚𑁆𑀚𑀁 𑀬𑀸𑀯 𑀓𑀴𑀻𑀭𑀘𑁆𑀙𑁂𑀚𑁆𑀚𑀁 𑀲𑀩𑁆𑀩𑀕𑁂𑀳𑀸𑀤𑀸𑀦𑀁 𑀉𑀪𑀢𑁄𑀧𑀓𑁆𑀔𑁂 𑀬𑀸𑀯 𑀲𑀢𑁆𑀢𑀫𑀓𑀼𑀮𑀸 𑀲𑀫𑀼𑀕𑁆𑀖𑀸𑀢𑁄’’𑀢𑀺? ‘‘𑀫𑀦𑀼𑀲𑁆𑀲𑀦𑁆𑀢𑀭𑁂𑀦, 𑀪𑀦𑁆𑀢𑁂’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑁄 𑀯𑀢𑁆𑀣𑀼𑀯𑀲𑁂𑀦 𑀕𑀭𑀼𑀓𑀮𑀳𑀼𑀓𑁄 𑀳𑁄𑀢𑀻’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀏𑀯𑀫𑁂𑀢𑀁 𑀢𑀣𑀸 𑀲𑀫𑁆𑀧𑀝𑀺𑀘𑁆𑀙𑀸𑀫𑀻’’𑀢𑀺.

𑀫𑀼𑀲𑀸𑀯𑀸𑀤𑀕𑀭𑀼𑀮𑀳𑀼𑀪𑀸𑀯𑀧𑀜𑁆𑀳𑁄 𑀢𑀢𑀺𑀬𑁄.

𑁪. 𑀩𑁄𑀥𑀺𑀲𑀢𑁆𑀢𑀥𑀫𑁆𑀫𑀢𑀸𑀧𑀜𑁆𑀳𑁄

𑁪. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀪𑀸𑀲𑀺𑀢𑀫𑁆𑀧𑁂𑀢𑀁 𑀪𑀕𑀯𑀢𑀸 𑀥𑀫𑁆𑀫𑀢𑀸𑀥𑀫𑁆𑀫𑀧𑀭𑀺𑀬𑀸𑀬𑁂 ‘𑀧𑀼𑀩𑁆𑀩𑁂𑀯 𑀩𑁄𑀥𑀺𑀲𑀢𑁆𑀢𑀸𑀦𑀁 𑀫𑀸𑀢𑀸𑀧𑀺𑀢𑀭𑁄 𑀦𑀺𑀬𑀢𑀸 𑀳𑁄𑀦𑁆𑀢𑀺, 𑀩𑁄𑀥𑀺 𑀦𑀺𑀬𑀢𑀸 𑀳𑁄𑀢𑀺, 𑀅𑀕𑁆𑀕𑀲𑀸𑀯𑀓𑀸 𑀦𑀺𑀬𑀢𑀸 𑀳𑁄𑀦𑁆𑀢𑀺, 𑀧𑀼𑀢𑁆𑀢𑁄 𑀦𑀺𑀬𑀢𑁄 𑀳𑁄𑀢𑀺, 𑀉𑀧𑀝𑁆𑀞𑀸𑀓𑁄 𑀦𑀺𑀬𑀢𑁄 𑀳𑁄𑀢𑀻’𑀢𑀺. 𑀧𑀼𑀦 𑀘 𑀢𑀼𑀫𑁆𑀳𑁂 𑀪𑀡𑀣 ‘𑀢𑀼𑀲𑀺𑀢𑁂 𑀓𑀸𑀬𑁂 𑀞𑀺𑀢𑁄 𑀩𑁄𑀥𑀺𑀲𑀢𑁆𑀢𑁄 𑀅𑀝𑁆𑀞 𑀫𑀳𑀸𑀯𑀺𑀮𑁄𑀓𑀦𑀸𑀦𑀺 𑀯𑀺𑀮𑁄𑀓𑁂𑀢𑀺, 𑀓𑀸𑀮𑀁 𑀯𑀺𑀮𑁄𑀓𑁂𑀢𑀺, 𑀤𑀻𑀧𑀁 𑀯𑀺𑀮𑁄𑀓𑁂𑀢𑀺, 𑀤𑁂𑀲𑀁 𑀯𑀺𑀮𑁄𑀓𑁂𑀢𑀺, 𑀓𑀼𑀮𑀁 𑀯𑀺𑀮𑁄𑀓𑁂𑀢𑀺, 𑀚𑀦𑁂𑀢𑁆𑀢𑀺𑀁 𑀯𑀺𑀮𑁄𑀓𑁂𑀢𑀺, 𑀆𑀬𑀼𑀁 𑀯𑀺𑀮𑁄𑀓𑁂𑀢𑀺, 𑀫𑀸𑀲𑀁 𑀯𑀺𑀮𑁄𑀓𑁂𑀢𑀺, 𑀦𑁂𑀓𑁆𑀔𑀫𑁆𑀫𑀁 𑀯𑀺𑀮𑁄𑀓𑁂𑀢𑀻’𑀢𑀺. 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀅𑀧𑀭𑀺𑀧𑀓𑁆𑀓𑁂 𑀜𑀸𑀡𑁂 𑀩𑀼𑀚𑁆𑀛𑀦𑀁 𑀦𑀢𑁆𑀣𑀺, 𑀧𑀭𑀺𑀧𑀓𑁆𑀓𑁂 𑀜𑀸𑀡𑁂 𑀦 𑀲𑀓𑁆𑀓𑀸 𑀦𑀺𑀫𑁂𑀲𑀦𑁆𑀢𑀭𑀫𑁆𑀧𑀺 𑀆𑀕𑀫𑁂𑀢𑀼𑀁, 𑀅𑀦𑀢𑀺𑀓𑁆𑀓𑀫𑀦𑀻𑀬𑀁 𑀧𑀭𑀺𑀧𑀓𑁆𑀓𑀫𑀸𑀦𑀲𑀁. 𑀓𑀲𑁆𑀫𑀸 𑀩𑁄𑀥𑀺𑀲𑀢𑁆𑀢𑁄 𑀓𑀸𑀮𑀁 𑀯𑀺𑀮𑁄𑀓𑁂𑀳𑀺 ‘𑀓𑀫𑁆𑀳𑀺 𑀓𑀸𑀮𑁂 𑀉𑀧𑁆𑀧𑀚𑁆𑀚𑀸𑀫𑀻’𑀢𑀺. 𑀅𑀧𑀭𑀺𑀧𑀓𑁆𑀓𑁂 𑀜𑀸𑀡𑁂 𑀩𑀼𑀚𑁆𑀛𑀦𑀁 𑀦𑀢𑁆𑀣𑀺, 𑀧𑀭𑀺𑀧𑀓𑁆𑀓𑁂 𑀜𑀸𑀡𑁂 𑀦 𑀲𑀓𑁆𑀓𑀸 𑀦𑀺𑀫𑁂𑀲𑀦𑁆𑀢𑀭𑀫𑁆𑀧𑀺 𑀆𑀕𑀫𑁂𑀢𑀼𑀁, 𑀓𑀲𑁆𑀫𑀸 𑀩𑁄𑀥𑀺𑀲𑀢𑁆𑀢𑁄 𑀓𑀼𑀮𑀁 𑀯𑀺𑀮𑁄𑀓𑁂𑀢𑀺 ‘𑀓𑀼𑀫𑁆𑀳𑀺 𑀓𑀼𑀮𑁂 𑀉𑀧𑁆𑀧𑀚𑁆𑀚𑀸𑀫𑀻’𑀢𑀺. 𑀬𑀤𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀧𑀼𑀩𑁆𑀩𑁂𑀯 𑀩𑁄𑀥𑀺𑀲𑀢𑁆𑀢𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀦𑀺𑀬𑀢𑀸, 𑀢𑁂𑀦 𑀳𑀺 ‘𑀓𑀼𑀮𑀁 𑀯𑀺𑀮𑁄𑀓𑁂𑀢𑀻’𑀢𑀺 𑀬𑀁 𑀯𑀘𑀦𑀁, 𑀢𑀁 𑀫𑀺𑀘𑁆𑀙𑀸. 𑀬𑀤𑀺 𑀓𑀼𑀮𑀁 𑀯𑀺𑀮𑁄𑀓𑁂𑀢𑀺, 𑀢𑁂𑀦 𑀳𑀺 ‘𑀧𑀼𑀩𑁆𑀩𑁂𑀯 𑀩𑁄𑀥𑀺𑀲𑀢𑁆𑀢𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀦𑀺𑀬𑀢𑀸’𑀢𑀺 𑀢𑀫𑁆𑀧𑀺 𑀯𑀘𑀦𑀁 𑀫𑀺𑀘𑁆𑀙𑀸. 𑀅𑀬𑀫𑁆𑀧𑀺 𑀉𑀪𑀢𑁄 𑀓𑁄𑀝𑀺𑀓𑁄 𑀧𑀜𑁆𑀳𑁄 𑀢𑀯𑀸𑀦𑀼𑀧𑁆𑀧𑀢𑁆𑀢𑁄, 𑀲𑁄 𑀢𑀬𑀸 𑀦𑀺𑀩𑁆𑀩𑀸𑀳𑀺𑀢𑀩𑁆𑀩𑁄’’𑀢𑀺.

‘‘𑀦𑀺𑀬𑀢𑀸, 𑀫𑀳𑀸𑀭𑀸𑀚, 𑀧𑀼𑀩𑁆𑀩𑁂𑀯 𑀩𑁄𑀥𑀺𑀲𑀢𑁆𑀢𑀲𑁆𑀲 𑀫𑀸𑀢𑀸𑀧𑀺𑀢𑀭𑁄, 𑀓𑀼𑀮𑀜𑁆𑀘 𑀩𑁄𑀥𑀺𑀲𑀢𑁆𑀢𑁄 𑀯𑀺𑀮𑁄𑀓𑁂𑀢𑀺. 𑀓𑀺𑀦𑁆𑀢𑀺 𑀧𑀦 𑀓𑀼𑀮𑀁 𑀯𑀺𑀮𑁄𑀓𑁂𑀢𑀺 ‘𑀬𑁂 𑀫𑁂 𑀫𑀸𑀢𑀸𑀧𑀺𑀢𑀭𑁄, 𑀢𑁂 𑀔𑀢𑁆𑀢𑀺𑀬𑀸 𑀉𑀤𑀸𑀳𑀼 𑀩𑁆𑀭𑀸𑀳𑁆𑀫𑀡𑀸’𑀢𑀺. 𑀏𑀯𑀁 𑀓𑀼𑀮𑀁 𑀯𑀺𑀮𑁄𑀓𑁂𑀢𑀺.

‘‘𑀅𑀝𑁆𑀞𑀦𑁆𑀦𑀁, 𑀫𑀳𑀸𑀭𑀸𑀚, 𑀧𑀼𑀩𑁆𑀩𑁂𑀯 𑀅𑀦𑀸𑀕𑀢𑀁 𑀑𑀮𑁄𑀓𑁂𑀢𑀩𑁆𑀩𑀁 𑀳𑁄𑀢𑀺. 𑀓𑀢𑀫𑁂𑀲𑀁 𑀅𑀝𑁆𑀞𑀦𑁆𑀦𑀁? 𑀯𑀸𑀡𑀺𑀚𑀲𑁆𑀲, 𑀫𑀳𑀸𑀭𑀸𑀚, 𑀧𑀼𑀩𑁆𑀩𑁂𑀯 𑀯𑀺𑀓𑁆𑀓𑀬𑀪𑀡𑁆𑀟𑀁 𑀑𑀮𑁄𑀓𑁂𑀢𑀩𑁆𑀩𑀁 𑀳𑁄𑀢𑀺, 𑀳𑀢𑁆𑀣𑀺𑀦𑀸𑀕𑀲𑁆𑀲 𑀧𑀼𑀩𑁆𑀩𑁂𑀯 𑀲𑁄𑀡𑁆𑀟𑀸𑀬 𑀅𑀦𑀸𑀕𑀢𑁄 𑀫𑀕𑁆𑀕𑁄 𑀑𑀮𑁄𑀓𑁂𑀢𑀩𑁆𑀩𑁄 𑀳𑁄𑀢𑀺, 𑀲𑀸𑀓𑀝𑀺𑀓𑀲𑁆𑀲 𑀧𑀼𑀩𑁆𑀩𑁂𑀯 𑀅𑀦𑀸𑀕𑀢𑀁 𑀢𑀺𑀢𑁆𑀣𑀁 𑀑𑀮𑁄𑀓𑁂𑀢𑀩𑁆𑀩𑀁 𑀳𑁄𑀢𑀺, 𑀦𑀺𑀬𑀸𑀫𑀓𑀲𑁆𑀲 𑀧𑀼𑀩𑁆𑀩𑁂𑀯 𑀅𑀦𑀸𑀕𑀢𑀁 𑀢𑀻𑀭𑀁 𑀑𑀮𑁄𑀓𑁂𑀢𑁆𑀯𑀸 𑀦𑀸𑀯𑀸 𑀧𑁂𑀲𑁂𑀢𑀩𑁆𑀩𑀸 𑀳𑁄𑀢𑀺, 𑀪𑀺𑀲𑀓𑁆𑀓𑀲𑁆𑀲 𑀧𑀼𑀩𑁆𑀩𑁂𑀯 𑀆𑀬𑀼𑀁 𑀑𑀮𑁄𑀓𑁂𑀢𑁆𑀯𑀸 𑀆𑀢𑀼𑀭𑁄 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑁄 𑀳𑁄𑀢𑀺, 𑀉𑀢𑁆𑀢𑀭𑀲𑁂𑀢𑀼𑀲𑁆𑀲 𑀧𑀼𑀩𑁆𑀩𑁂𑀯 𑀣𑀺𑀭𑀸𑀣𑀺𑀭𑀪𑀸𑀯𑀁 𑀚𑀸𑀦𑀺𑀢𑁆𑀯𑀸 𑀅𑀪𑀺𑀭𑀼𑀳𑀺𑀢𑀩𑁆𑀩𑀁 𑀳𑁄𑀢𑀺, 𑀪𑀺𑀓𑁆𑀔𑀼𑀲𑁆𑀲 𑀧𑀼𑀩𑁆𑀩𑁂𑀯 𑀅𑀦𑀸𑀕𑀢𑀁 𑀓𑀸𑀮𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑀩𑁆𑀩𑀁 𑀳𑁄𑀢𑀺, 𑀩𑁄𑀥𑀺𑀲𑀢𑁆𑀢𑀸𑀦𑀁 𑀧𑀼𑀩𑁆𑀩𑁂𑀯 𑀓𑀼𑀮𑀁 𑀑𑀮𑁄𑀓𑁂𑀢𑀩𑁆𑀩𑀁 𑀳𑁄𑀢𑀺 ‘𑀔𑀢𑁆𑀢𑀺𑀬𑀓𑀼𑀮𑀁 𑀯𑀸 𑀩𑁆𑀭𑀸𑀳𑁆𑀫𑀡𑀓𑀼𑀮𑀁 𑀯𑀸’𑀢𑀺. 𑀇𑀫𑁂𑀲𑀁 𑀔𑁄, 𑀫𑀳𑀸𑀭𑀸𑀚, 𑀅𑀝𑁆𑀞𑀦𑁆𑀦𑀁 𑀧𑀼𑀩𑁆𑀩𑁂𑀯 𑀅𑀦𑀸𑀕𑀢𑀁 𑀑𑀮𑁄𑀓𑁂𑀢𑀩𑁆𑀩𑀁 𑀳𑁄𑀢𑀻’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀏𑀯𑀫𑁂𑀢𑀁 𑀢𑀣𑀸 𑀲𑀫𑁆𑀧𑀝𑀺𑀘𑁆𑀙𑀸𑀫𑀻’’𑀢𑀺.

𑀩𑁄𑀥𑀺𑀲𑀢𑁆𑀢𑀥𑀫𑁆𑀫𑀢𑀸𑀧𑀜𑁆𑀳𑁄 𑀘𑀢𑀼𑀢𑁆𑀣𑁄.

𑁫. 𑀅𑀢𑁆𑀢𑀦𑀺𑀧𑀸𑀢𑀦𑀧𑀜𑁆𑀳𑁄

𑁫. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀪𑀸𑀲𑀺𑀢𑀫𑁆𑀧𑁂𑀢𑀁 𑀪𑀕𑀯𑀢𑀸 ‘𑀦, 𑀪𑀺𑀓𑁆𑀔𑀯𑁂, 𑀅𑀢𑁆𑀢𑀸𑀦𑀁 𑀧𑀸𑀢𑁂𑀢𑀩𑁆𑀩𑀁, 𑀬𑁄 𑀧𑀸𑀢𑁂𑀬𑁆𑀬, 𑀬𑀣𑀸𑀥𑀫𑁆𑀫𑁄 𑀓𑀸𑀭𑁂𑀢𑀩𑁆𑀩𑁄’𑀢𑀺. 𑀧𑀼𑀦 𑀘 𑀢𑀼𑀫𑁆𑀳𑁂 𑀪𑀡𑀣 ‘𑀬𑀢𑁆𑀣 𑀓𑀢𑁆𑀣𑀘𑀺 𑀪𑀕𑀯𑀸 𑀲𑀸𑀯𑀓𑀸𑀦𑀁 𑀥𑀫𑁆𑀫𑀁 𑀤𑁂𑀲𑀬𑀫𑀸𑀦𑁄 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀚𑀸𑀢𑀺𑀬𑀸 𑀚𑀭𑀸𑀬 𑀩𑁆𑀬𑀸𑀥𑀺𑀦𑁄 𑀫𑀭𑀡𑀲𑁆𑀲 𑀲𑀫𑀼𑀘𑁆𑀙𑁂𑀤𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀬𑁄 𑀳𑀺 𑀓𑁄𑀘𑀺 𑀚𑀸𑀢𑀺𑀚𑀭𑀸𑀩𑁆𑀬𑀸𑀥𑀺𑀫𑀭𑀡𑀁 𑀲𑀫𑀢𑀺𑀓𑁆𑀓𑀫𑀢𑀺, 𑀢𑀁 𑀧𑀭𑀫𑀸𑀬 𑀧𑀲𑀁𑀲𑀸𑀬 𑀧𑀲𑀁𑀲𑀢𑀻’𑀢𑀺. 𑀬𑀤𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀪𑀕𑀯𑀢𑀸 𑀪𑀡𑀺𑀢𑀁 ‘𑀦, 𑀪𑀺𑀓𑁆𑀔𑀯𑁂, 𑀅𑀢𑁆𑀢𑀸𑀦𑀁 𑀧𑀸𑀢𑁂𑀢𑀩𑁆𑀩𑀁, 𑀬𑁄 𑀧𑀸𑀢𑁂𑀬𑁆𑀬, 𑀬𑀣𑀸𑀥𑀫𑁆𑀫𑁄 𑀓𑀸𑀭𑁂𑀢𑀩𑁆𑀩𑁄’𑀢𑀺, 𑀢𑁂𑀦 𑀳𑀺 ‘𑀚𑀸𑀢𑀺𑀬𑀸 𑀚𑀭𑀸𑀬 𑀩𑁆𑀬𑀸𑀥𑀺𑀦𑁄 𑀫𑀭𑀡𑀲𑁆𑀲 𑀲𑀫𑀼𑀘𑁆𑀙𑁂𑀤𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀻’𑀢𑀺 𑀬𑀁 𑀯𑀘𑀦𑀁, 𑀢𑀁 𑀫𑀺𑀘𑁆𑀙𑀸. 𑀬𑀤𑀺 𑀚𑀸𑀢𑀺𑀬𑀸 𑀚𑀭𑀸𑀬 𑀩𑁆𑀬𑀸𑀥𑀺𑀦𑁄 𑀫𑀭𑀡𑀲𑁆𑀲 𑀲𑀫𑀼𑀘𑁆𑀙𑁂𑀤𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀢𑁂𑀦 𑀳𑀺 ‘𑀦, 𑀪𑀺𑀓𑁆𑀔𑀯𑁂, 𑀅𑀢𑁆𑀢𑀸𑀦𑀁 𑀧𑀸𑀢𑁂𑀢𑀩𑁆𑀩𑀁, 𑀬𑁄 𑀧𑀸𑀢𑁂𑀬𑁆𑀬, 𑀬𑀣𑀸𑀥𑀫𑁆𑀫𑁄 𑀓𑀸𑀭𑁂𑀢𑀩𑁆𑀩𑁄’’𑀢𑀺 𑀢𑀫𑁆𑀧𑀺 𑀯𑀘𑀦𑀁 𑀫𑀺𑀘𑁆𑀙𑀸. 𑀅𑀬𑀫𑁆𑀧𑀺 𑀉𑀪𑀢𑁄 𑀓𑁄𑀝𑀺𑀓𑁄 𑀧𑀜𑁆𑀳𑁄 𑀢𑀯𑀸𑀦𑀼𑀧𑁆𑀧𑀢𑁆𑀢𑁄, 𑀲𑁄 𑀢𑀬𑀸 𑀦𑀺𑀩𑁆𑀩𑀸𑀳𑀺𑀢𑀩𑁆𑀩𑁄’’𑀢𑀺.

‘‘𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 ‘𑀦, 𑀪𑀺𑀓𑁆𑀔𑀯𑁂, 𑀅𑀢𑁆𑀢𑀸𑀦𑀁 𑀧𑀸𑀢𑁂𑀢𑀩𑁆𑀩𑀁, 𑀬𑁄 𑀧𑀸𑀢𑁂𑀬𑁆𑀬, 𑀬𑀣𑀸𑀥𑀫𑁆𑀫𑁄 𑀓𑀸𑀭𑁂𑀢𑀩𑁆𑀩𑁄’𑀢𑀺. 𑀬𑀢𑁆𑀣 𑀓𑀢𑁆𑀣𑀘𑀺 𑀪𑀕𑀯𑀢𑀸 𑀲𑀸𑀯𑀓𑀸𑀦𑀁 𑀥𑀫𑁆𑀫𑀁 𑀤𑁂𑀲𑀬𑀸𑀫𑀸𑀦𑁂𑀦 𑀘 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀚𑀸𑀢𑀺𑀬𑀸 𑀚𑀭𑀸𑀬 𑀩𑁆𑀬𑀸𑀥𑀺𑀦𑁄 𑀫𑀭𑀡𑀲𑁆𑀲 𑀲𑀫𑀼𑀘𑁆𑀙𑁂𑀤𑀸𑀬 𑀥𑀫𑁆𑀫𑁄 𑀤𑁂𑀲𑀺𑀢𑁄, 𑀢𑀢𑁆𑀣 𑀧𑀦 𑀓𑀸𑀭𑀡𑀁 𑀅𑀢𑁆𑀣𑀺, 𑀬𑁂𑀦 𑀪𑀕𑀯𑀸 𑀓𑀸𑀭𑀡𑁂𑀦 𑀧𑀝𑀺𑀓𑁆𑀔𑀺𑀧𑀺 𑀲𑀫𑀸𑀤𑀧𑁂𑀲𑀺 𑀘𑀸’’𑀢𑀺.

‘‘𑀓𑀺𑀁 𑀧𑀦𑁂𑀢𑁆𑀣, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀓𑀸𑀭𑀡𑀁, 𑀬𑁂𑀦 𑀪𑀕𑀯𑀸 𑀓𑀸𑀭𑀡𑁂𑀦 𑀧𑀝𑀺𑀓𑁆𑀔𑀺𑀧𑀺 𑀲𑀫𑀸𑀤𑀧𑁂𑀲𑀺 𑀘𑀸’’𑀢𑀺? ‘‘𑀲𑀻𑀮𑀯𑀸, 𑀫𑀳𑀸𑀭𑀸𑀚, 𑀲𑀻𑀮𑀲𑀫𑁆𑀧𑀦𑁆𑀦𑁄 𑀅𑀕𑀤𑀲𑀫𑁄 𑀲𑀢𑁆𑀢𑀸𑀦𑀁 𑀓𑀺𑀮𑁂𑀲𑀯𑀺𑀲𑀯𑀺𑀦𑀸𑀲𑀦𑁂, 𑀑𑀲𑀥𑀲𑀫𑁄 𑀲𑀢𑁆𑀢𑀸𑀦𑀁 𑀓𑀺𑀮𑁂𑀲𑀩𑁆𑀬𑀸𑀥𑀺𑀯𑀽𑀧𑀲𑀫𑁂, 𑀉𑀤𑀓𑀲𑀫𑁄 𑀲𑀢𑁆𑀢𑀸𑀦𑀁 𑀓𑀺𑀮𑁂𑀲𑀭𑀚𑁄𑀚𑀮𑁆𑀮𑀸𑀧𑀳𑀭𑀡𑁂, 𑀫𑀡𑀺𑀭𑀢𑀦𑀲𑀫𑁄 𑀲𑀢𑁆𑀢𑀸𑀦𑀁 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀤𑀸𑀦𑁂, 𑀦𑀸𑀯𑀸𑀲𑀫𑁄 𑀲𑀢𑁆𑀢𑀸𑀦𑀁 𑀘𑀢𑀼𑀭𑁄𑀖𑀧𑀸𑀭𑀕𑀫𑀦𑁂, 𑀲𑀢𑁆𑀣𑀯𑀸𑀳𑀲𑀫𑁄 𑀲𑀢𑁆𑀢𑀸𑀦𑀁 𑀚𑀸𑀢𑀺𑀓𑀦𑁆𑀢𑀸𑀭𑀢𑀸𑀭𑀡𑁂, 𑀯𑀸𑀢𑀲𑀫𑁄 𑀲𑀢𑁆𑀢𑀸𑀦𑀁 𑀢𑀺𑀯𑀺𑀥𑀕𑁆𑀕𑀺𑀲𑀦𑁆𑀢𑀸𑀧𑀦𑀺𑀩𑁆𑀩𑀸𑀧𑀦𑁂, 𑀫𑀳𑀸𑀫𑁂𑀖𑀲𑀫𑁄 𑀲𑀢𑁆𑀢𑀸𑀦𑀁 𑀫𑀸𑀦𑀲𑀧𑀭𑀺𑀧𑀽𑀭𑀡𑁂, 𑀆𑀘𑀭𑀺𑀬𑀲𑀫𑁄 𑀲𑀢𑁆𑀢𑀸𑀦𑀁 𑀓𑀼𑀲𑀮𑀲𑀺𑀓𑁆𑀔𑀸𑀧𑀦𑁂, 𑀲𑀼𑀤𑁂𑀲𑀓𑀲𑀫𑁄 𑀲𑀢𑁆𑀢𑀸𑀦𑀁 𑀔𑁂𑀫𑀧𑀣𑀫𑀸𑀘𑀺𑀓𑁆𑀔𑀡𑁂. 𑀏𑀯𑀭𑀽𑀧𑁄, 𑀫𑀳𑀸𑀭𑀸𑀚, 𑀩𑀳𑀼𑀕𑀼𑀡𑁄 𑀅𑀦𑁂𑀓𑀕𑀼𑀡𑁄 𑀅𑀧𑁆𑀧𑀫𑀸𑀡𑀕𑀼𑀡𑁄 𑀕𑀼𑀡𑀭𑀸𑀲𑀺 𑀕𑀼𑀡𑀧𑀼𑀜𑁆𑀚𑁄 𑀲𑀢𑁆𑀢𑀸𑀦𑀁 𑀯𑀟𑁆𑀠𑀺𑀓𑀭𑁄 𑀲𑀻𑀮𑀯𑀸 ‘𑀫𑀸 𑀯𑀺𑀦𑀲𑁆𑀲𑀻’𑀢𑀺 𑀲𑀢𑁆𑀢𑀸𑀦𑀁 𑀅𑀦𑀼𑀓𑀫𑁆𑀧𑀸𑀬 𑀪𑀕𑀯𑀸 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀲𑀺 ‘𑀦, 𑀪𑀺𑀓𑁆𑀔𑀯𑁂, 𑀅𑀢𑁆𑀢𑀸𑀦𑀁 𑀧𑀸𑀢𑁂𑀢𑀩𑁆𑀩𑀁, 𑀬𑁄 𑀧𑀸𑀢𑁂𑀬𑁆𑀬, 𑀬𑀣𑀸𑀥𑀫𑁆𑀫𑁄 𑀓𑀸𑀭𑁂𑀢𑀩𑁆𑀩𑁄’𑀢𑀺. 𑀇𑀤𑀫𑁂𑀢𑁆𑀣, 𑀫𑀳𑀸𑀭𑀸𑀚, 𑀓𑀸𑀭𑀡𑀁, 𑀬𑁂𑀦 𑀓𑀸𑀭𑀡𑁂𑀦 𑀪𑀕𑀯𑀸 𑀧𑀝𑀺𑀓𑁆𑀔𑀺𑀧𑀺. 𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀣𑁂𑀭𑁂𑀦 𑀓𑀼𑀫𑀸𑀭𑀓𑀲𑁆𑀲𑀧𑁂𑀦 𑀯𑀺𑀘𑀺𑀢𑁆𑀭𑀓𑀣𑀺𑀓𑁂𑀦 𑀧𑀸𑀬𑀸𑀲𑀺𑀭𑀸𑀚𑀜𑁆𑀜𑀲𑁆𑀲 𑀧𑀭𑀮𑁄𑀓𑀁 𑀤𑀻𑀧𑀬𑀫𑀸𑀦𑁂𑀦 ‘𑀬𑀣𑀸 𑀬𑀣𑀸 𑀔𑁄 𑀭𑀸𑀚𑀜𑁆𑀜 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀻𑀮𑀯𑀦𑁆𑀢𑁄 𑀓𑀮𑁆𑀬𑀸𑀡𑀥𑀫𑁆𑀫𑀸 𑀘𑀺𑀭𑀁 𑀤𑀻𑀖𑀫𑀤𑁆𑀥𑀸𑀦𑀁 𑀢𑀺𑀝𑁆𑀞𑀦𑁆𑀢𑀺, 𑀢𑀣𑀸 𑀢𑀣𑀸 𑀩𑀳𑀼𑀁 𑀧𑀼𑀜𑁆𑀜𑀁 𑀧𑀲𑀯𑀦𑁆𑀢𑀺, 𑀩𑀳𑀼𑀚𑀦𑀳𑀺𑀢𑀸𑀬 𑀘 𑀧𑀝𑀺𑀧𑀚𑁆𑀚𑀦𑁆𑀢𑀺 𑀩𑀳𑀼𑀚𑀦𑀲𑀼𑀔𑀸𑀬 𑀮𑁄𑀓𑀸𑀦𑀼𑀓𑀫𑁆𑀧𑀸𑀬 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦’𑀦𑁆𑀢𑀺.

‘‘𑀓𑁂𑀦 𑀧𑀦 𑀓𑀸𑀭𑀡𑁂𑀦 𑀪𑀕𑀯𑀸 𑀲𑀫𑀸𑀤𑀧𑁂𑀲𑀺? 𑀚𑀸𑀢𑀺𑀧𑀺, 𑀫𑀳𑀸𑀭𑀸𑀚, 𑀤𑀼𑀓𑁆𑀔𑀸, 𑀚𑀭𑀸𑀧𑀺 𑀤𑀼𑀓𑁆𑀔𑀸, 𑀩𑁆𑀬𑀸𑀥𑀺𑀧𑀺 𑀤𑀼𑀓𑁆𑀔𑁄, 𑀫𑀭𑀡𑀫𑁆𑀧𑀺 𑀤𑀼𑀓𑁆𑀔𑀁, 𑀲𑁄𑀓𑁄𑀧𑀺 𑀤𑀼𑀓𑁆𑀔𑁄, 𑀧𑀭𑀺𑀤𑁂𑀯𑁄𑀧𑀺 𑀤𑀼𑀓𑁆𑀔𑁄, 𑀤𑀼𑀓𑁆𑀔𑀫𑁆𑀧𑀺 𑀤𑀼𑀓𑁆𑀔𑀁, 𑀤𑁄𑀫𑀦𑀲𑁆𑀲𑀫𑁆𑀧𑀺 𑀤𑀼𑀓𑁆𑀔𑀁, 𑀉𑀧𑀸𑀬𑀸𑀲𑁄𑀧𑀺 𑀤𑀼𑀓𑁆𑀔𑁄, 𑀅𑀧𑁆𑀧𑀺𑀬𑁂𑀳𑀺 𑀲𑀫𑁆𑀧𑀬𑁄𑀕𑁄𑀧𑀺 𑀤𑀼𑀓𑁆𑀔𑁄, 𑀧𑀺𑀬𑁂𑀳𑀺 𑀯𑀺𑀧𑁆𑀧𑀬𑁄𑀕𑁄𑀧𑀺 𑀤𑀼𑀓𑁆𑀔𑁄, 𑀫𑀸𑀢𑀼𑀫𑀭𑀡𑀫𑁆𑀧𑀺 𑀤𑀼𑀓𑁆𑀔𑀁, 𑀧𑀺𑀢𑀼𑀫𑀭𑀡𑀫𑁆𑀧𑀺 𑀤𑀼𑀓𑁆𑀔𑀁, 𑀪𑀸𑀢𑀼𑀫𑀭𑀡𑀫𑁆𑀧𑀺 𑀤𑀼𑀓𑁆𑀔𑀁, 𑀪𑀕𑀺𑀦𑀺𑀫𑀭𑀡𑀫𑁆𑀧𑀺 𑀤𑀼𑀓𑁆𑀔𑀁, 𑀧𑀼𑀢𑁆𑀢𑀫𑀭𑀡𑀫𑁆𑀧𑀺 𑀤𑀼𑀓𑁆𑀔𑀁, 𑀤𑀸𑀭𑀫𑀭𑀡𑀫𑁆𑀧𑀺 𑀤𑀼𑀓𑁆𑀔𑀁, 𑀤𑀸𑀲𑀫𑀭𑀡𑀫𑁆𑀧𑀺 𑀤𑀼𑀓𑁆𑀔𑀁 [𑀇𑀤𑀁 𑀯𑀸𑀓𑁆𑀬𑀁 𑀲𑀻. 𑀧𑀻. 𑀧𑁄𑀢𑁆𑀣𑀓𑁂𑀲𑀼 𑀦𑀢𑁆𑀣𑀺], 𑀜𑀸𑀢𑀺𑀫𑀭𑀡𑀫𑁆𑀧𑀺 𑀤𑀼𑀓𑁆𑀔𑀁, 𑀜𑀸𑀢𑀺𑀩𑁆𑀬𑀲𑀦𑀫𑁆𑀧𑀺 𑀤𑀼𑀓𑁆𑀔𑀁, 𑀭𑁄𑀕𑀩𑁆𑀬𑀲𑀦𑀫𑁆𑀧𑀺 𑀤𑀼𑀓𑁆𑀔𑀁, 𑀪𑁄𑀕𑀩𑁆𑀬𑀲𑀦𑀫𑁆𑀧𑀺 𑀤𑀼𑀓𑁆𑀔𑀁, 𑀲𑀻𑀮𑀩𑁆𑀬𑀲𑀦𑀫𑁆𑀧𑀺 𑀤𑀼𑀓𑁆𑀔𑀁, 𑀤𑀺𑀝𑁆𑀞𑀺𑀩𑁆𑀬𑀲𑀦𑀫𑁆𑀧𑀺 𑀤𑀼𑀓𑁆𑀔𑀁, 𑀭𑀸𑀚𑀪𑀬𑀫𑁆𑀧𑀺 𑀤𑀼𑀓𑁆𑀔𑀁, 𑀘𑁄𑀭𑀪𑀬𑀫𑁆𑀧𑀺 𑀤𑀼𑀓𑁆𑀔𑀁, 𑀯𑁂𑀭𑀺𑀪𑀬𑀫𑁆𑀧𑀺 𑀤𑀼𑀓𑁆𑀔𑀁, 𑀤𑀼𑀩𑁆𑀪𑀺𑀓𑁆𑀔𑀪𑀬𑀫𑁆𑀧𑀺 𑀤𑀼𑀓𑁆𑀔𑀁, 𑀅𑀕𑁆𑀕𑀺𑀪𑀬𑀫𑁆𑀧𑀺 𑀤𑀼𑀓𑁆𑀔𑀁, 𑀉𑀤𑀓𑀪𑀬𑀫𑁆𑀧𑀺 𑀤𑀼𑀓𑁆𑀔𑀁, 𑀊𑀫𑀺𑀪𑀬𑀫𑁆𑀧𑀺 𑀤𑀼𑀓𑁆𑀔𑀁, 𑀆𑀯𑀝𑁆𑀝𑀪𑀬𑀫𑁆𑀧𑀺 𑀤𑀼𑀓𑁆𑀔𑀁, 𑀓𑀼𑀫𑁆𑀪𑀻𑀮𑀪𑀬𑀫𑁆𑀧𑀺 𑀤𑀼𑀓𑁆𑀔𑀁, 𑀲𑀼𑀲𑀼𑀓𑀸𑀪𑀬𑀫𑁆𑀧𑀺 𑀤𑀼𑀓𑁆𑀔𑀁, 𑀅𑀢𑁆𑀢𑀸𑀦𑀼𑀯𑀸𑀤𑀪𑀬𑀫𑁆𑀧𑀺 𑀤𑀼𑀓𑁆𑀔𑀁, 𑀧𑀭𑀸𑀦𑀼𑀯𑀸𑀤𑀪𑀬𑀫𑁆𑀧𑀺 𑀤𑀼𑀓𑁆𑀔𑀁, 𑀤𑀡𑁆𑀟𑀪𑀬𑀫𑁆𑀧𑀺 𑀤𑀼𑀓𑁆𑀔𑀁, 𑀤𑀼𑀕𑁆𑀕𑀢𑀺𑀪𑀬𑀫𑁆𑀧𑀺 𑀤𑀼𑀓𑁆𑀔𑀁, 𑀧𑀭𑀺𑀲𑀸𑀲𑀸𑀭𑀚𑁆𑀚𑀪𑀬𑀫𑁆𑀧𑀺 𑀤𑀼𑀓𑁆𑀔𑀁, 𑀆𑀚𑀻𑀯𑀓𑀪𑀬𑀫𑁆𑀧𑀺 𑀤𑀼𑀓𑁆𑀔𑀁, 𑀫𑀭𑀡𑀪𑀬𑀫𑁆𑀧𑀺 𑀤𑀼𑀓𑁆𑀔𑀁, 𑀯𑁂𑀢𑁆𑀢𑁂𑀳𑀺 𑀢𑀸𑀴𑀦𑀫𑁆𑀧𑀺 𑀤𑀼𑀓𑁆𑀔𑀁, 𑀓𑀲𑀸𑀳𑀺 𑀢𑀸𑀴𑀦𑀫𑁆𑀧𑀺 𑀤𑀼𑀓𑁆𑀔𑀁, 𑀅𑀤𑁆𑀥𑀤𑀡𑁆𑀟𑀓𑁂𑀳𑀺 𑀢𑀸𑀴𑀦𑀫𑁆𑀧𑀺 𑀤𑀼𑀓𑁆𑀔𑀁, 𑀳𑀢𑁆𑀣𑀘𑁆𑀙𑁂𑀤𑀦𑀫𑁆𑀧𑀺 𑀤𑀼𑀓𑁆𑀔𑀁, 𑀧𑀸𑀤𑀘𑁆𑀙𑁂𑀤𑀦𑀫𑁆𑀧𑀺 𑀤𑀼𑀓𑁆𑀔𑀁, 𑀳𑀢𑁆𑀣𑀧𑀸𑀤𑀘𑁆𑀙𑁂𑀤𑀦𑀫𑁆𑀧𑀺 𑀤𑀼𑀓𑁆𑀔𑀁, 𑀓𑀡𑁆𑀡𑀘𑁆𑀙𑁂𑀤𑀦𑀫𑁆𑀧𑀺 𑀤𑀼𑀓𑁆𑀔𑀁, 𑀦𑀸𑀲𑀘𑁆𑀙𑁂𑀤𑀦𑀫𑁆𑀧𑀺 𑀤𑀼𑀓𑁆𑀔𑀁, 𑀓𑀡𑁆𑀡𑀦𑀸𑀲𑀘𑁆𑀙𑁂𑀤𑀦𑀫𑁆𑀧𑀺 𑀤𑀼𑀓𑁆𑀔𑀁, 𑀩𑀺𑀮𑀗𑁆𑀕𑀣𑀸𑀮𑀺𑀓𑀫𑁆𑀧𑀺 𑀤𑀼𑀓𑁆𑀔𑀁, 𑀲𑀗𑁆𑀔𑀫𑀼𑀡𑁆𑀟𑀺𑀓𑀫𑁆𑀧𑀺 𑀤𑀼𑀓𑁆𑀔𑀁, 𑀭𑀸𑀳𑀼𑀫𑀼𑀔𑀫𑁆𑀧𑀺 𑀤𑀼𑀓𑁆𑀔𑀁, 𑀚𑁄𑀢𑀺𑀫𑀸𑀮𑀺𑀓𑀫𑁆𑀧𑀺 𑀤𑀼𑀓𑁆𑀔𑀁, 𑀳𑀢𑁆𑀣𑀧𑀚𑁆𑀚𑁄𑀢𑀺𑀓𑀫𑁆𑀧𑀺 𑀤𑀼𑀓𑁆𑀔𑀁, 𑀏𑀭𑀓𑀯𑀢𑁆𑀢𑀺𑀓𑀫𑁆𑀧𑀺 𑀤𑀼𑀓𑁆𑀔𑀁, 𑀘𑀻𑀭𑀓𑀯𑀸𑀲𑀺𑀓𑀫𑁆𑀧𑀺 𑀤𑀼𑀓𑁆𑀔𑀁, 𑀏𑀡𑁂𑀬𑁆𑀬𑀓𑀫𑁆𑀧𑀺 𑀤𑀼𑀓𑁆𑀔𑀁, 𑀩𑀴𑀺𑀲𑀫𑀁𑀲𑀺𑀓𑀫𑁆𑀧𑀺 𑀤𑀼𑀓𑁆𑀔𑀁, 𑀓𑀳𑀸𑀧𑀡𑀺𑀓𑀫𑁆𑀧𑀺 𑀤𑀼𑀓𑁆𑀔𑀁, 𑀔𑀸𑀭𑀸𑀧𑀢𑀘𑁆𑀙𑀺𑀓𑀫𑁆𑀧𑀺 𑀤𑀼𑀓𑁆𑀔𑀁, 𑀧𑀮𑀺𑀖𑀧𑀭𑀺𑀯𑀢𑁆𑀢𑀺𑀓𑀫𑁆𑀧𑀺 𑀤𑀼𑀓𑁆𑀔𑀁, 𑀧𑀮𑀸𑀮𑀧𑀻𑀞𑀓𑀫𑁆𑀧𑀺 𑀤𑀼𑀓𑁆𑀔𑀁, 𑀢𑀢𑁆𑀢𑁂𑀦 𑀢𑁂𑀮𑁂𑀦 𑀑𑀲𑀺𑀜𑁆𑀘𑀦𑀫𑁆𑀧𑀺 𑀤𑀼𑀓𑁆𑀔𑀁, 𑀲𑀼𑀦𑀔𑁂𑀳𑀺 𑀔𑀸𑀤𑀸𑀧𑀦𑀫𑁆𑀧𑀺 𑀤𑀼𑀓𑁆𑀔𑀁, 𑀚𑀻𑀯𑀲𑀽𑀮𑀸𑀭𑁄𑀧𑀦𑀫𑁆𑀧𑀺 𑀤𑀼𑀓𑁆𑀔𑀁, 𑀅𑀲𑀺𑀦𑀸 𑀲𑀻𑀲𑀘𑁆𑀙𑁂𑀤𑀦𑀫𑁆𑀧𑀺 𑀤𑀼𑀓𑁆𑀔𑀁, 𑀏𑀯𑀭𑀽𑀧𑀸𑀦𑀺, 𑀫𑀳𑀸𑀭𑀸𑀚, 𑀩𑀳𑀼𑀯𑀺𑀥𑀸𑀦𑀺 𑀅𑀦𑁂𑀓𑀯𑀺𑀥𑀸𑀦𑀺 𑀤𑀼𑀓𑁆𑀔𑀸𑀦𑀺 𑀲𑀁𑀲𑀸𑀭𑀕𑀢𑁄 𑀅𑀦𑀼𑀪𑀯𑀢𑀺.

‘‘𑀬𑀣𑀸, 𑀫𑀳𑀸𑀭𑀸𑀚, 𑀳𑀺𑀫𑀯𑀦𑁆𑀢𑀧𑀩𑁆𑀩𑀢𑁂 𑀅𑀪𑀺𑀯𑀼𑀝𑁆𑀞𑀁 𑀉𑀤𑀓𑀁 𑀕𑀗𑁆𑀕𑀸𑀬 𑀦𑀤𑀺𑀬𑀸 𑀧𑀸𑀲𑀸𑀡 𑀲𑀓𑁆𑀔𑀭 𑀔𑀭 𑀫𑀭𑀼𑀫𑁆𑀩 𑀆𑀯𑀝𑁆𑀝 𑀕𑀕𑁆𑀕𑀮𑀓 𑀊𑀫𑀺𑀓𑀯𑀗𑁆𑀓𑀘𑀤𑀺𑀓 𑀆𑀯𑀭𑀡𑀦𑀻𑀯𑀭𑀡𑀫𑀽𑀮𑀓𑀲𑀸𑀔𑀸𑀲𑀼 𑀧𑀭𑀺𑀬𑁄𑀢𑁆𑀣𑀭𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀏𑀯𑀭𑀽𑀧𑀸𑀦𑀺 𑀩𑀳𑀼𑀯𑀺𑀥𑀸𑀦𑀺 𑀅𑀦𑁂𑀓𑀯𑀺𑀥𑀸𑀦𑀺 𑀤𑀼𑀓𑁆𑀔𑀸𑀦𑀺 𑀲𑀁𑀲𑀸𑀭𑀕𑀢𑁄 𑀅𑀦𑀼𑀪𑀯𑀢𑀺. 𑀧𑀯𑀢𑁆𑀢𑀁, 𑀫𑀳𑀸𑀭𑀸𑀚, 𑀤𑀼𑀓𑁆𑀔𑀁, 𑀅𑀧𑁆𑀧𑀯𑀢𑁆𑀢𑀁 𑀲𑀼𑀔𑀁. 𑀅𑀧𑁆𑀧𑀯𑀢𑁆𑀢𑀲𑁆𑀲 𑀕𑀼𑀡𑀁 𑀧𑀯𑀢𑁆𑀢𑀲𑁆𑀲 [𑀧𑀯𑀢𑁆𑀢𑁂 (𑀲𑀻. 𑀧𑀻. 𑀓.)] 𑀘 𑀪𑀬𑀁 𑀤𑀻𑀧𑀬𑀫𑀸𑀦𑁄, 𑀫𑀳𑀸𑀭𑀸𑀚, 𑀪𑀕𑀯𑀸 𑀅𑀧𑁆𑀧𑀯𑀢𑁆𑀢𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀚𑀸𑀢𑀺𑀚𑀭𑀸𑀩𑁆𑀬𑀸𑀥𑀺𑀫𑀭𑀡𑀲𑀫𑀢𑀺𑀓𑁆𑀓𑀫𑀸𑀬 𑀲𑀫𑀸𑀤𑀧𑁂𑀲𑀺, 𑀇𑀤𑀫𑁂𑀢𑁆𑀣, 𑀫𑀳𑀸𑀭𑀸𑀚, 𑀓𑀸𑀭𑀡𑀁, 𑀬𑁂𑀦 𑀓𑀸𑀭𑀡𑁂𑀦 𑀪𑀕𑀯𑀸 𑀲𑀫𑀸𑀤𑀧𑁂𑀲𑀻’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀲𑀼𑀦𑀺𑀩𑁆𑀩𑁂𑀞𑀺𑀢𑁄 𑀧𑀜𑁆𑀳𑁄, 𑀲𑀼𑀓𑀣𑀺𑀢𑀁 𑀓𑀸𑀭𑀡𑀁, 𑀏𑀯𑀫𑁂𑀢𑀁 𑀢𑀣𑀸 𑀲𑀫𑁆𑀧𑀝𑀺𑀘𑁆𑀙𑀸𑀫𑀻’’𑀢𑀺.

𑀅𑀢𑁆𑀢𑀦𑀺𑀧𑀸𑀢𑀦𑀧𑀜𑁆𑀳𑁄 𑀧𑀜𑁆𑀘𑀫𑁄.

𑁬. 𑀫𑁂𑀢𑁆𑀢𑀸𑀪𑀸𑀯𑀦𑀸𑀦𑀺𑀲𑀁𑀲𑀧𑀜𑁆𑀳𑁄

𑁬. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀪𑀸𑀲𑀺𑀢𑀫𑁆𑀧𑁂𑀢𑀁 𑀪𑀕𑀯𑀢𑀸 ‘𑀫𑁂𑀢𑁆𑀢𑀸𑀬, 𑀪𑀺𑀓𑁆𑀔𑀯𑁂, 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀆𑀲𑁂𑀯𑀺𑀢𑀸𑀬 𑀪𑀸𑀯𑀺𑀢𑀸𑀬 𑀩𑀳𑀼𑀮𑀻𑀓𑀢𑀸𑀬 𑀬𑀸𑀦𑀻𑀓𑀢𑀸𑀬 𑀯𑀢𑁆𑀣𑀼𑀓𑀢𑀸𑀬 𑀅𑀦𑀼𑀝𑁆𑀞𑀺𑀢𑀸𑀬 𑀧𑀭𑀺𑀘𑀺𑀢𑀸𑀬 𑀲𑀼𑀲𑀫𑀸𑀭𑀤𑁆𑀥𑀸𑀬 𑀏𑀓𑀸𑀤𑀲𑀸𑀦𑀺𑀲𑀁𑀲𑀸 𑀧𑀸𑀝𑀺𑀓𑀗𑁆𑀔𑀸. 𑀓𑀢𑀫𑁂 𑀏𑀓𑀸𑀤𑀲? 𑀲𑀼𑀔𑀁 𑀲𑀼𑀧𑀢𑀺, 𑀲𑀼𑀔𑀁 𑀧𑀝𑀺𑀩𑀼𑀚𑁆𑀛𑀢𑀺, 𑀦 𑀧𑀸𑀧𑀓𑀁 𑀲𑀼𑀧𑀺𑀦𑀁 𑀧𑀲𑁆𑀲𑀢𑀺, 𑀫𑀦𑀼𑀲𑁆𑀲𑀸𑀦𑀁 𑀧𑀺𑀬𑁄 𑀳𑁄𑀢𑀺, 𑀅𑀫𑀦𑀼𑀲𑁆𑀲𑀸𑀦𑀁 𑀧𑀺𑀬𑁄 𑀳𑁄𑀢𑀺, 𑀤𑁂𑀯𑀢𑀸 𑀭𑀓𑁆𑀔𑀦𑁆𑀢𑀺, 𑀦𑀸𑀲𑁆𑀲 𑀅𑀕𑁆𑀕𑀺 𑀯𑀸 𑀯𑀺𑀲𑀁 𑀯𑀸 𑀲𑀢𑁆𑀣𑀁 𑀯𑀸 𑀓𑀫𑀢𑀺 [𑀲𑀢𑁆𑀣𑀁 𑀓𑀫𑀢𑀺 (𑀲𑁆𑀬𑀸.) 𑀅. 𑀦𑀺. 𑁧𑁧.𑁧𑁫 𑀧𑀲𑁆𑀲𑀺𑀢𑀩𑁆𑀩𑀁], 𑀢𑀼𑀯𑀝𑀁 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀺, 𑀫𑀼𑀔𑀯𑀡𑁆𑀡𑁄 𑀯𑀺𑀧𑁆𑀧𑀲𑀻𑀤𑀢𑀺, 𑀅𑀲𑀫𑁆𑀫𑀽𑀴𑁆𑀳𑁄 𑀓𑀸𑀮𑀁 𑀓𑀭𑁄𑀢𑀺, 𑀉𑀢𑁆𑀢𑀭𑀺𑀁 𑀅𑀧𑁆𑀧𑀝𑀺𑀯𑀺𑀚𑁆𑀛𑀦𑁆𑀢𑁄 𑀩𑁆𑀭𑀳𑁆𑀫𑀮𑁄𑀓𑀽𑀧𑀕𑁄 𑀳𑁄𑀢𑀻’𑀢𑀺. 𑀧𑀼𑀦 𑀘 𑀢𑀼𑀫𑁆𑀳𑁂 𑀪𑀡𑀣 ‘𑀲𑀸𑀫𑁄 𑀓𑀼𑀫𑀸𑀭𑁄 𑀫𑁂𑀢𑁆𑀢𑀸𑀯𑀺𑀳𑀸𑀭𑀻 𑀫𑀺𑀕𑀲𑀗𑁆𑀖𑁂𑀦 𑀧𑀭𑀺𑀯𑀼𑀢𑁄 𑀧𑀯𑀦𑁂 𑀯𑀺𑀘𑀭𑀦𑁆𑀢𑁄 𑀧𑀻𑀴𑀺𑀬𑀓𑁆𑀔𑁂𑀦 𑀭𑀜𑁆𑀜𑀸 𑀯𑀺𑀤𑁆𑀥𑁄 𑀯𑀺𑀲𑀧𑀻𑀢𑁂𑀦 𑀲𑀮𑁆𑀮𑁂𑀦 𑀢𑀢𑁆𑀣𑁂𑀯 𑀫𑀼𑀘𑁆𑀙𑀺𑀢𑁄 𑀧𑀢𑀺𑀢𑁄’𑀢𑀺.

‘‘𑀬𑀤𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀪𑀕𑀯𑀢𑀸 𑀪𑀡𑀺𑀢𑀁 ‘𑀫𑁂𑀢𑁆𑀢𑀸𑀬 𑀪𑀺𑀓𑁆𑀔𑀯𑁂…𑀧𑁂… 𑀩𑁆𑀭𑀳𑁆𑀫𑀮𑁄𑀓𑀽𑀧𑀕𑁄 𑀳𑁄𑀢𑀻’𑀢𑀺, 𑀢𑁂𑀦 𑀳𑀺 ‘‘𑀲𑀸𑀫𑁄 𑀓𑀼𑀫𑀸𑀭𑁄 𑀫𑁂𑀢𑁆𑀢𑀸𑀯𑀺𑀳𑀸𑀭𑀻 𑀫𑀺𑀕𑀲𑀗𑁆𑀖𑁂𑀦 𑀧𑀭𑀺𑀯𑀼𑀢𑁄 𑀧𑀯𑀦𑁂 𑀯𑀺𑀘𑀭𑀦𑁆𑀢𑁄 𑀧𑀻𑀴𑀺𑀬𑀓𑁆𑀔𑁂𑀦 𑀭𑀜𑁆𑀜𑀸 𑀯𑀺𑀤𑁆𑀥𑁄 𑀯𑀺𑀲𑀧𑀻𑀢𑁂𑀦 𑀲𑀮𑁆𑀮𑁂𑀦 𑀢𑀢𑁆𑀣𑁂𑀯 𑀫𑀼𑀘𑁆𑀙𑀺𑀢𑁄 𑀧𑀢𑀺𑀢𑁄’𑀢𑀺 𑀬𑀁 𑀯𑀘𑀦𑀁, 𑀢𑀁 𑀫𑀺𑀘𑁆𑀙𑀸. 𑀬𑀤𑀺 𑀲𑀸𑀫𑁄 𑀓𑀼𑀫𑀸𑀭𑁄 𑀫𑁂𑀢𑁆𑀢𑀸𑀯𑀺𑀳𑀸𑀭𑀻 𑀫𑀺𑀕𑀲𑀗𑁆𑀖𑁂𑀦 𑀧𑀭𑀺𑀯𑀼𑀢𑁄 𑀧𑀯𑀦𑁂 𑀯𑀺𑀘𑀭𑀦𑁆𑀢𑁄 𑀧𑀻𑀴𑀺𑀬𑀓𑁆𑀔𑁂𑀦 𑀭𑀜𑁆𑀜𑀸 𑀯𑀺𑀤𑁆𑀥𑁄 𑀯𑀺𑀲𑀧𑀻𑀢𑁂𑀦 𑀲𑀮𑁆𑀮𑁂𑀦 𑀢𑀢𑁆𑀣𑁂𑀯 𑀫𑀼𑀘𑁆𑀙𑀺𑀢𑁄 𑀧𑀢𑀺𑀢𑁄, 𑀢𑁂𑀦 𑀳𑀺 ‘𑀫𑁂𑀢𑁆𑀢𑀸𑀬, 𑀪𑀺𑀓𑁆𑀔𑀯𑁂…𑀧𑁂… 𑀲𑀢𑁆𑀣𑀁 𑀯𑀸 𑀓𑀫𑀢𑀻’𑀢𑀺 𑀢𑀫𑁆𑀧𑀺 𑀯𑀘𑀦𑀁 𑀫𑀺𑀘𑁆𑀙𑀸. 𑀅𑀬𑀫𑁆𑀧𑀺 𑀉𑀪𑀢𑁄 𑀓𑁄𑀝𑀺𑀓𑁄 𑀧𑀜𑁆𑀳𑁄 𑀲𑀼𑀦𑀺𑀧𑀼𑀡𑁄 𑀧𑀭𑀺𑀲𑀡𑁆𑀳𑁄 𑀲𑀼𑀔𑀼𑀫𑁄 𑀕𑀫𑁆𑀪𑀻𑀭𑁄, 𑀅𑀧𑀺 𑀲𑀼𑀦𑀺𑀧𑀼𑀡𑀸𑀦𑀁 𑀫𑀦𑀼𑀚𑀸𑀦𑀁 𑀕𑀢𑁆𑀢𑁂 𑀲𑁂𑀤𑀁 𑀫𑁄𑀘𑁂𑀬𑁆𑀬, 𑀲𑁄 𑀢𑀯𑀸𑀦𑀼𑀧𑁆𑀧𑀢𑁆𑀢𑁄, 𑀯𑀺𑀚𑀝𑁂𑀳𑀺 𑀢𑀁 𑀫𑀳𑀸𑀚𑀝𑀸𑀚𑀝𑀺𑀢𑀁, 𑀅𑀦𑀸𑀕𑀢𑀸𑀦𑀁 𑀚𑀺𑀦𑀧𑀼𑀢𑁆𑀢𑀸𑀦𑀁 𑀘𑀓𑁆𑀔𑀼𑀁 𑀤𑁂𑀳𑀺 𑀦𑀺𑀩𑁆𑀩𑀸𑀳𑀦𑀸𑀬𑀸’’𑀢𑀺.

‘‘𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 ‘𑀫𑁂𑀢𑁆𑀢𑀸𑀬 𑀪𑀺𑀓𑁆𑀔𑀯𑁂…𑀧𑁂... 𑀲𑀢𑁆𑀣𑀁 𑀯𑀸 𑀓𑀫𑀢𑀻’𑀢𑀺. 𑀲𑀸𑀫𑁄 𑀘 𑀓𑀼𑀫𑀸𑀭𑁄 𑀫𑁂𑀢𑁆𑀢𑀸𑀯𑀺𑀳𑀸𑀭𑀻 𑀫𑀺𑀕𑀲𑀗𑁆𑀖𑁂𑀦 𑀧𑀭𑀺𑀯𑀼𑀢𑁄 𑀧𑀯𑀦𑁂 𑀯𑀺𑀘𑀭𑀦𑁆𑀢𑁄 𑀧𑀻𑀴𑀺𑀬𑀓𑁆𑀔𑁂𑀦 𑀭𑀜𑁆𑀜𑀸 𑀯𑀺𑀤𑁆𑀥𑁄 𑀯𑀺𑀲𑀧𑀻𑀢𑁂𑀦 𑀲𑀮𑁆𑀮𑁂𑀦 𑀢𑀢𑁆𑀣𑁂𑀯 𑀫𑀼𑀘𑁆𑀙𑀺𑀢𑁄 𑀧𑀢𑀺𑀢𑁄, 𑀢𑀢𑁆𑀣 𑀧𑀦, 𑀫𑀳𑀸𑀭𑀸𑀚, 𑀓𑀸𑀭𑀡𑀁 𑀅𑀢𑁆𑀣𑀺. 𑀓𑀢𑀫𑀁 𑀢𑀢𑁆𑀣 𑀓𑀸𑀭𑀡𑀁? 𑀦𑁂𑀢𑁂, 𑀫𑀳𑀸𑀭𑀸𑀚, 𑀕𑀼𑀡𑀸 𑀧𑀼𑀕𑁆𑀕𑀮𑀲𑁆𑀲, 𑀫𑁂𑀢𑁆𑀢𑀸𑀪𑀸𑀯𑀦𑀸𑀬𑁂𑀢𑁂 𑀕𑀼𑀡𑀸, 𑀲𑀸𑀫𑁄, 𑀫𑀳𑀸𑀭𑀸𑀚, 𑀓𑀼𑀫𑀸𑀭𑁄 𑀖𑀝𑀁 𑀉𑀓𑁆𑀔𑀺𑀧𑀦𑁆𑀢𑁄 𑀢𑀲𑁆𑀫𑀺𑀁 𑀔𑀡𑁂 𑀫𑁂𑀢𑁆𑀢𑀸𑀪𑀸𑀯𑀦𑀸𑀬 𑀧𑀫𑀢𑁆𑀢𑁄 𑀅𑀳𑁄𑀲𑀺.

‘‘𑀬𑀲𑁆𑀫𑀺𑀁, 𑀫𑀳𑀸𑀭𑀸𑀚, 𑀔𑀡𑁂 𑀧𑀼𑀕𑁆𑀕𑀮𑁄 𑀫𑁂𑀢𑁆𑀢𑀁 𑀲𑀫𑀸𑀧𑀦𑁆𑀦𑁄 𑀳𑁄𑀢𑀺, 𑀦 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀢𑀲𑁆𑀫𑀺𑀁 𑀔𑀡𑁂 𑀅𑀕𑁆𑀕𑀺 𑀯𑀸 𑀯𑀺𑀲𑀁 𑀯𑀸 𑀲𑀢𑁆𑀣𑀁 𑀯𑀸 𑀓𑀫𑀢𑀺. 𑀢𑀲𑁆𑀲 𑀬𑁂 𑀓𑁂𑀘𑀺 𑀅𑀳𑀺𑀢𑀓𑀸𑀫𑀸 𑀉𑀧𑀕𑀦𑁆𑀢𑁆𑀯𑀸 𑀢𑀁 𑀦 𑀧𑀲𑁆𑀲𑀦𑁆𑀢𑀺, 𑀦 𑀢𑀲𑁆𑀫𑀺𑀁 𑀑𑀓𑀸𑀲𑀁 𑀮𑀪𑀦𑁆𑀢𑀺. 𑀦𑁂𑀢𑁂, 𑀫𑀳𑀸𑀭𑀸𑀚, 𑀕𑀼𑀡𑀸 𑀧𑀼𑀕𑁆𑀕𑀮𑀲𑁆𑀲, 𑀫𑁂𑀢𑁆𑀢𑀸𑀪𑀸𑀯𑀦𑀸𑀬𑁂𑀢𑁂 𑀕𑀼𑀡𑀸. 𑀇𑀥, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀲𑀗𑁆𑀕𑀸𑀫𑀲𑀽𑀭𑁄 𑀅𑀪𑁂𑀚𑁆𑀚𑀓𑀯𑀘𑀚𑀸𑀮𑀺𑀓𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀲𑀗𑁆𑀕𑀸𑀫𑀁 𑀑𑀢𑀭𑁂𑀬𑁆𑀬, 𑀢𑀲𑁆𑀲 𑀲𑀭𑀸 𑀔𑀺𑀢𑁆𑀢𑀸 𑀉𑀧𑀕𑀦𑁆𑀢𑁆𑀯𑀸 𑀧𑀢𑀦𑁆𑀢𑀺 𑀯𑀺𑀓𑀺𑀭𑀦𑁆𑀢𑀺, 𑀦 𑀢𑀲𑁆𑀫𑀺𑀁 𑀑𑀓𑀸𑀲𑀁 𑀮𑀪𑀦𑁆𑀢𑀺, 𑀦𑁂𑀲𑁄, 𑀫𑀳𑀸𑀭𑀸𑀚, 𑀕𑀼𑀡𑁄 𑀲𑀗𑁆𑀕𑀸𑀫𑀲𑀽𑀭𑀲𑁆𑀲, 𑀅𑀪𑁂𑀚𑁆𑀚𑀓𑀯𑀘𑀚𑀸𑀮𑀺𑀓𑀸𑀬𑁂𑀲𑁄 𑀕𑀼𑀡𑁄, 𑀬𑀲𑁆𑀲 𑀲𑀭𑀸 𑀔𑀺𑀢𑁆𑀢𑀸 𑀉𑀧𑀕𑀦𑁆𑀢𑁆𑀯𑀸 𑀧𑀢𑀦𑁆𑀢𑀺 𑀯𑀺𑀓𑀺𑀭𑀦𑁆𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀦𑁂𑀢𑁂 𑀕𑀼𑀡𑀸 𑀧𑀼𑀕𑁆𑀕𑀮𑀲𑁆𑀲, 𑀫𑁂𑀢𑁆𑀢𑀸𑀪𑀸𑀯𑀦𑀸𑀬𑁂𑀢𑁂 𑀕𑀼𑀡𑀸.

‘‘𑀬𑀲𑁆𑀫𑀺𑀁, 𑀫𑀳𑀸𑀭𑀸𑀚, 𑀔𑀡𑁂 𑀧𑀼𑀕𑁆𑀕𑀮𑁄 𑀫𑁂𑀢𑁆𑀢𑀁 𑀲𑀫𑀸𑀧𑀦𑁆𑀦𑁄 𑀳𑁄𑀢𑀺, 𑀦 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀢𑀲𑁆𑀫𑀺𑀁 𑀔𑀡𑁂 𑀅𑀕𑁆𑀕𑀺 𑀯𑀸 𑀯𑀺𑀲𑀁 𑀯𑀸 𑀲𑀢𑁆𑀣𑀁 𑀯𑀸 𑀓𑀫𑀢𑀺. 𑀢𑀲𑁆𑀲 𑀬𑁂 𑀓𑁂𑀘𑀺 𑀅𑀳𑀺𑀢𑀓𑀸𑀫𑀸 𑀉𑀧𑀕𑀦𑁆𑀢𑁆𑀯𑀸 𑀢𑀁 𑀦 𑀧𑀲𑁆𑀲𑀦𑁆𑀢𑀺, 𑀢𑀲𑁆𑀫𑀺𑀁 𑀑𑀓𑀸𑀲𑀁 𑀦 𑀮𑀪𑀦𑁆𑀢𑀺, 𑀦𑁂𑀢𑁂, 𑀫𑀳𑀸𑀭𑀸𑀚, 𑀕𑀼𑀡𑀸 𑀧𑀼𑀕𑁆𑀕𑀮𑀲𑁆𑀲, 𑀫𑁂𑀢𑁆𑀢𑀸𑀪𑀸𑀯𑀦𑀸𑀬𑁂𑀢𑁂 𑀕𑀼𑀡𑀸. 𑀇𑀥 𑀧𑀦, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀤𑀺𑀩𑁆𑀩𑀁 𑀅𑀦𑁆𑀢𑀭𑀥𑀸𑀦𑀁 𑀫𑀽𑀮𑀁 𑀳𑀢𑁆𑀣𑁂 𑀓𑀭𑁂𑀬𑁆𑀬, 𑀬𑀸𑀯 𑀢𑀁 𑀫𑀽𑀮𑀁 𑀢𑀲𑁆𑀲 𑀳𑀢𑁆𑀣𑀕𑀢𑀁 𑀳𑁄𑀢𑀺, 𑀢𑀸𑀯 𑀦 𑀅𑀜𑁆𑀜𑁄 𑀓𑁄𑀘𑀺 𑀧𑀓𑀢𑀺𑀫𑀦𑀼𑀲𑁆𑀲𑁄 𑀢𑀁 𑀧𑀼𑀭𑀺𑀲𑀁 𑀧𑀲𑁆𑀲𑀢𑀺. 𑀦𑁂𑀲𑁄, 𑀫𑀳𑀸𑀭𑀸𑀚, 𑀕𑀼𑀡𑁄 𑀧𑀼𑀭𑀺𑀲𑀲𑁆𑀲, 𑀫𑀽𑀮𑀲𑁆𑀲𑁂𑀲𑁄 𑀕𑀼𑀡𑁄 𑀅𑀦𑁆𑀢𑀭𑀥𑀸𑀦𑀲𑁆𑀲, 𑀬𑀁 𑀲𑁄 𑀧𑀓𑀢𑀺𑀫𑀦𑀼𑀲𑁆𑀲𑀸𑀦𑀁 𑀘𑀓𑁆𑀔𑀼𑀧𑀣𑁂 𑀦 𑀤𑀺𑀲𑁆𑀲𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀦𑁂𑀢𑁂 𑀕𑀼𑀡𑀸 𑀧𑀼𑀕𑁆𑀕𑀮𑀲𑁆𑀲, 𑀫𑁂𑀢𑁆𑀢𑀸𑀪𑀸𑀯𑀦𑀸𑀬𑁂𑀢𑁂 𑀕𑀼𑀡𑀸.

‘‘𑀬𑀲𑁆𑀫𑀺𑀁, 𑀫𑀳𑀸𑀭𑀸𑀚, 𑀔𑀡𑁂 𑀧𑀼𑀕𑁆𑀕𑀮𑁄 𑀫𑁂𑀢𑁆𑀢𑀁 𑀲𑀫𑀸𑀧𑀦𑁆𑀦𑁄 𑀳𑁄𑀢𑀺, 𑀦 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀢𑀲𑁆𑀫𑀺𑀁 𑀔𑀡𑁂 𑀅𑀕𑁆𑀕𑀺 𑀯𑀸 𑀯𑀺𑀲𑀁 𑀯𑀸 𑀲𑀢𑁆𑀣𑀁 𑀯𑀸 𑀓𑀫𑀢𑀺. 𑀢𑀲𑁆𑀲 𑀬𑁂 𑀓𑁂𑀘𑀺 𑀅𑀳𑀺𑀢𑀓𑀸𑀫𑀸 𑀉𑀧𑀕𑀦𑁆𑀢𑁆𑀯𑀸 𑀢𑀁 𑀦 𑀧𑀲𑁆𑀲𑀦𑁆𑀢𑀺, 𑀦 𑀢𑀲𑁆𑀫𑀺𑀁 𑀑𑀓𑀸𑀲𑀁 𑀮𑀪𑀦𑁆𑀢𑀺. 𑀦𑁂𑀢𑁂, 𑀫𑀳𑀸𑀭𑀸𑀚, 𑀕𑀼𑀡𑀸 𑀧𑀼𑀕𑁆𑀕𑀮𑀲𑁆𑀲, 𑀫𑁂𑀢𑁆𑀢𑀸𑀪𑀸𑀯𑀦𑀸𑀬𑁂𑀢𑁂 𑀕𑀼𑀡𑀸. 𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑀁 𑀲𑀼𑀓𑀢𑀁 𑀫𑀳𑀸𑀮𑁂𑀡𑀫𑀦𑀼𑀧𑁆𑀧𑀯𑀺𑀝𑁆𑀞𑀁 𑀫𑀳𑀢𑀺𑀫𑀳𑀸𑀫𑁂𑀖𑁄 𑀅𑀪𑀺𑀯𑀲𑁆𑀲𑀦𑁆𑀢𑁄 𑀦 𑀲𑀓𑁆𑀓𑁄𑀢𑀺 𑀢𑁂𑀫𑀬𑀺𑀢𑀼𑀁, 𑀦𑁂𑀲𑁄, 𑀫𑀳𑀸𑀭𑀸𑀚, 𑀕𑀼𑀡𑁄 𑀧𑀼𑀭𑀺𑀲𑀲𑁆𑀲, 𑀫𑀳𑀸𑀮𑁂𑀡𑀲𑁆𑀲𑁂𑀲𑁄 𑀕𑀼𑀡𑁄, 𑀬𑀁 𑀫𑀳𑀸𑀫𑁂𑀖𑁄 𑀅𑀪𑀺𑀯𑀲𑁆𑀲𑀫𑀸𑀦𑁄 𑀦 𑀢𑀁 𑀢𑁂𑀫𑁂𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀦𑁂𑀢𑁂 𑀕𑀼𑀡𑀸 𑀧𑀼𑀕𑁆𑀕𑀮𑀲𑁆𑀲, 𑀫𑁂𑀢𑁆𑀢𑀸𑀪𑀸𑀯𑀦𑀸𑀬𑁂𑀢𑁂 𑀕𑀼𑀡𑀸.

‘‘𑀬𑀲𑁆𑀫𑀺𑀁, 𑀫𑀳𑀸𑀭𑀸𑀚, 𑀔𑀡𑁂 𑀧𑀼𑀕𑁆𑀕𑀮𑁄 𑀫𑁂𑀢𑁆𑀢𑀁 𑀲𑀫𑀸𑀧𑀦𑁆𑀦𑁄 𑀳𑁄𑀢𑀺, 𑀦 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀢𑀲𑁆𑀫𑀺𑀁 𑀔𑀡𑁂 𑀅𑀕𑁆𑀕𑀺 𑀯𑀸 𑀯𑀺𑀲𑀁 𑀯𑀸 𑀲𑀢𑁆𑀣𑀁 𑀯𑀸 𑀓𑀫𑀢𑀺. 𑀢𑀲𑁆𑀲 𑀬𑁂 𑀓𑁂𑀘𑀺 𑀅𑀳𑀺𑀢𑀓𑀸𑀫𑀸 𑀉𑀧𑀕𑀦𑁆𑀢𑁆𑀯𑀸 𑀢𑀁 𑀦 𑀧𑀲𑁆𑀲𑀦𑁆𑀢𑀺, 𑀦 𑀢𑀲𑁆𑀲 𑀲𑀓𑁆𑀓𑁄𑀦𑁆𑀢𑀺 𑀅𑀳𑀺𑀢𑀁 𑀓𑀸𑀢𑀼𑀁 𑀦𑁂𑀢𑁂, 𑀫𑀳𑀸𑀭𑀸𑀚, 𑀕𑀼𑀡𑀸 𑀧𑀼𑀕𑁆𑀕𑀮𑀲𑁆𑀲, 𑀫𑁂𑀢𑁆𑀢𑀸𑀪𑀸𑀯𑀦𑀸𑀬𑁂𑀢𑁂 𑀕𑀼𑀡𑀸’’𑀢𑀺. ‘‘𑀅𑀘𑁆𑀙𑀭𑀺𑀬𑀁, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀅𑀩𑁆𑀪𑀼𑀢𑀁 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀲𑀩𑁆𑀩𑀧𑀸𑀧𑀦𑀺𑀯𑀸𑀭𑀡𑀸 𑀫𑁂𑀢𑁆𑀢𑀸𑀪𑀸𑀯𑀦𑀸’’𑀢𑀺. ‘‘𑀲𑀩𑁆𑀩𑀓𑀼𑀲𑀮𑀕𑀼𑀡𑀸𑀯𑀳𑀸, 𑀫𑀳𑀸𑀭𑀸𑀚, 𑀫𑁂𑀢𑁆𑀢𑀸𑀪𑀸𑀯𑀦𑀸 𑀳𑀺𑀢𑀸𑀦𑀫𑁆𑀧𑀺 𑀅𑀳𑀺𑀢𑀸𑀦𑀫𑁆𑀧𑀺, 𑀬𑁂 𑀢𑁂 𑀲𑀢𑁆𑀢𑀸 𑀯𑀺𑀜𑁆𑀜𑀸𑀡𑀩𑀤𑁆𑀥𑀸, 𑀲𑀩𑁆𑀩𑁂𑀲𑀁 𑀫𑀳𑀸𑀦𑀺𑀲𑀁𑀲𑀸 𑀫𑁂𑀢𑁆𑀢𑀸𑀪𑀸𑀯𑀦𑀸 𑀲𑀁𑀯𑀺𑀪𑀚𑀺𑀢𑀩𑁆𑀩𑀸’’𑀢𑀺.

𑀫𑁂𑀢𑁆𑀢𑀸𑀪𑀸𑀯𑀦𑀸𑀦𑀺𑀲𑀁𑀲𑀧𑀜𑁆𑀳𑁄 𑀙𑀝𑁆𑀞𑁄.

𑁭. 𑀓𑀼𑀲𑀮𑀸𑀓𑀼𑀲𑀮𑀲𑀫𑀯𑀺𑀲𑀫𑀧𑀜𑁆𑀳𑁄

𑁭. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦 ‘𑀓𑀼𑀲𑀮𑀓𑀸𑀭𑀺𑀲𑁆𑀲𑀧𑀺 𑀅𑀓𑀼𑀲𑀮𑀓𑀸𑀭𑀺𑀲𑁆𑀲𑀧𑀺 𑀯𑀺𑀧𑀸𑀓𑁄 𑀲𑀫𑀲𑀫𑁄, 𑀉𑀤𑀸𑀳𑀼 𑀓𑁄𑀘𑀺 𑀯𑀺𑀲𑁂𑀲𑁄 𑀅𑀢𑁆𑀣𑀻’𑀢𑀺? ‘‘𑀅𑀢𑁆𑀣𑀺, 𑀫𑀳𑀸𑀭𑀸𑀚, 𑀓𑀼𑀲𑀮𑀲𑁆𑀲 𑀘 𑀅𑀓𑀼𑀲𑀮𑀲𑁆𑀲 𑀘 𑀯𑀺𑀲𑁂𑀲𑁄, 𑀓𑀼𑀲𑀮𑀁, 𑀫𑀳𑀸𑀭𑀸𑀚, 𑀲𑀼𑀔𑀯𑀺𑀧𑀸𑀓𑀁 𑀲𑀕𑁆𑀕𑀲𑀁𑀯𑀢𑁆𑀢𑀦𑀺𑀓𑀁, 𑀅𑀓𑀼𑀲𑀮𑀁 𑀤𑀼𑀓𑁆𑀔𑀯𑀺𑀧𑀸𑀓𑀁 𑀦𑀺𑀭𑀬𑀲𑀁𑀯𑀢𑁆𑀢𑀦𑀺𑀓’’𑀦𑁆𑀢𑀺.

‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀢𑀼𑀫𑁆𑀳𑁂 𑀪𑀡𑀣 ‘𑀤𑁂𑀯𑀤𑀢𑁆𑀢𑁄 𑀏𑀓𑀦𑁆𑀢𑀓𑀡𑁆𑀳𑁄, 𑀏𑀓𑀦𑁆𑀢𑀓𑀡𑁆𑀳𑁂𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄, 𑀩𑁄𑀥𑀺𑀲𑀢𑁆𑀢𑁄 𑀏𑀓𑀦𑁆𑀢𑀲𑀼𑀓𑁆𑀓𑁄, 𑀏𑀓𑀦𑁆𑀢𑀲𑀼𑀓𑁆𑀓𑁂𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄’𑀢𑀺. 𑀧𑀼𑀦 𑀘 𑀤𑁂𑀯𑀤𑀢𑁆𑀢𑁄 𑀪𑀯𑁂 𑀪𑀯𑁂 𑀬𑀲𑁂𑀦 𑀘 𑀧𑀓𑁆𑀔𑁂𑀦 𑀘 𑀩𑁄𑀥𑀺𑀲𑀢𑁆𑀢𑁂𑀦 𑀲𑀫𑀲𑀫𑁄 𑀳𑁄𑀢𑀺, 𑀓𑀤𑀸𑀘𑀺 𑀅𑀥𑀺𑀓𑀢𑀭𑁄 𑀯𑀸. 𑀬𑀤𑀸 𑀤𑁂𑀯𑀤𑀢𑁆𑀢𑁄 𑀦𑀕𑀭𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀭𑀜𑁆𑀜𑁄 𑀧𑀼𑀭𑁄𑀳𑀺𑀢𑀧𑀼𑀢𑁆𑀢𑁄 𑀅𑀳𑁄𑀲𑀺, 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀙𑀯𑀓𑀘𑀡𑁆𑀟𑀸𑀮𑁄 𑀅𑀳𑁄𑀲𑀺 𑀯𑀺𑀚𑁆𑀚𑀸𑀥𑀭𑁄, 𑀯𑀺𑀚𑁆𑀚𑀁 𑀧𑀭𑀺𑀚𑀧𑁆𑀧𑀺𑀢𑁆𑀯𑀸 𑀅𑀓𑀸𑀮𑁂 𑀅𑀫𑁆𑀩𑀨𑀮𑀸𑀦𑀺 𑀦𑀺𑀩𑁆𑀩𑀢𑁆𑀢𑁂𑀲𑀺, 𑀏𑀢𑁆𑀣 𑀢𑀸𑀯 𑀩𑁄𑀥𑀺𑀲𑀢𑁆𑀢𑁄 𑀤𑁂𑀯𑀤𑀢𑁆𑀢𑀢𑁄 𑀚𑀸𑀢𑀺𑀬𑀸 𑀦𑀺𑀳𑀻𑀦𑁄 𑀬𑀲𑁂𑀦 𑀘 𑀦𑀺𑀳𑀻𑀦𑁄.

‘‘𑀧𑀼𑀦 𑀘𑀧𑀭𑀁 𑀬𑀤𑀸 𑀤𑁂𑀯𑀤𑀢𑁆𑀢𑁄 𑀭𑀸𑀚𑀸 𑀅𑀳𑁄𑀲𑀺 𑀫𑀳𑀸 𑀫𑀳𑀻𑀧𑀢𑀺 𑀲𑀩𑁆𑀩𑀓𑀸𑀫𑀲𑀫𑀗𑁆𑀕𑀻, 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲𑀽𑀧𑀪𑁄𑀕𑁄 𑀅𑀳𑁄𑀲𑀺 𑀳𑀢𑁆𑀣𑀺𑀦𑀸𑀕𑁄 𑀲𑀩𑁆𑀩𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑁄, 𑀢𑀲𑁆𑀲 𑀘𑀸𑀭𑀼𑀕𑀢𑀺𑀯𑀺𑀮𑀸𑀲𑀁 𑀅𑀲𑀳𑀫𑀸𑀦𑁄 𑀭𑀸𑀚𑀸 𑀯𑀥𑀫𑀺𑀘𑁆𑀙𑀦𑁆𑀢𑁄 𑀳𑀢𑁆𑀣𑀸𑀘𑀭𑀺𑀬𑀁 𑀏𑀯𑀫𑀯𑁄𑀘 ‘𑀅𑀲𑀺𑀓𑁆𑀔𑀺𑀢𑁄 𑀢𑁂, 𑀆𑀘𑀭𑀺𑀬, 𑀳𑀢𑁆𑀣𑀺𑀦𑀸𑀕𑁄, 𑀢𑀲𑁆𑀲 𑀆𑀓𑀸𑀲𑀕𑀫𑀦𑀁 𑀦𑀸𑀫 𑀓𑀸𑀭𑀡𑀁 𑀓𑀭𑁄𑀳𑀻’𑀢𑀺, 𑀢𑀢𑁆𑀣𑀧𑀺 𑀢𑀸𑀯 𑀩𑁄𑀥𑀺𑀲𑀢𑁆𑀢𑁄 𑀤𑁂𑀯𑀤𑀢𑁆𑀢𑀢𑁄 𑀚𑀸𑀢𑀺𑀬𑀸 𑀦𑀺𑀳𑀻𑀦𑁄 𑀮𑀸𑀫𑀓𑁄 𑀢𑀺𑀭𑀘𑁆𑀙𑀸𑀦𑀕𑀢𑁄.

‘‘𑀧𑀼𑀦 𑀘𑀧𑀭𑀁 𑀬𑀤𑀸 𑀤𑁂𑀯𑀤𑀢𑁆𑀢𑁄 𑀫𑀦𑀼𑀲𑁆𑀲𑁄 𑀅𑀳𑁄𑀲𑀺 𑀧𑀯𑀦𑁂 𑀦𑀝𑁆𑀞𑀸𑀬𑀺𑀓𑁄, 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀫𑀳𑀸𑀧𑀣𑀯𑀻 𑀦𑀸𑀫 𑀫𑀓𑁆𑀓𑀝𑁄 𑀅𑀳𑁄𑀲𑀺, 𑀏𑀢𑁆𑀣𑀧𑀺 𑀢𑀸𑀯 𑀤𑀺𑀲𑁆𑀲𑀢𑀺 𑀯𑀺𑀲𑁂𑀲𑁄 𑀫𑀦𑀼𑀲𑁆𑀲𑀲𑁆𑀲 𑀘 𑀢𑀺𑀭𑀘𑁆𑀙𑀸𑀦𑀕𑀢𑀲𑁆𑀲 𑀘, 𑀢𑀢𑁆𑀣𑀧𑀺 𑀢𑀸𑀯 𑀩𑁄𑀥𑀺𑀲𑀢𑁆𑀢𑁄 𑀤𑁂𑀯𑀤𑀢𑁆𑀢𑀢𑁄 𑀚𑀸𑀢𑀺𑀬𑀸 𑀦𑀺𑀳𑀻𑀦𑁄.

‘‘𑀧𑀼𑀦 𑀘𑀧𑀭𑀁 𑀬𑀤𑀸 𑀤𑁂𑀯𑀤𑀢𑁆𑀢𑁄 𑀫𑀦𑀼𑀲𑁆𑀲𑁄 𑀅𑀳𑁄𑀲𑀺 𑀲𑁄𑀡𑀼𑀢𑁆𑀢𑀭𑁄 𑀦𑀸𑀫 𑀦𑁂𑀲𑀸𑀤𑁄 𑀩𑀮𑀯𑀸 𑀩𑀮𑀯𑀢𑀭𑁄 𑀦𑀸𑀕𑀩𑀮𑁄, 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀙𑀤𑁆𑀤𑀦𑁆𑀢𑁄 𑀦𑀸𑀫 𑀦𑀸𑀕𑀭𑀸𑀚𑀸 𑀅𑀳𑁄𑀲𑀺. 𑀢𑀤𑀸 𑀲𑁄 𑀮𑀼𑀤𑁆𑀤𑀓𑁄 𑀢𑀁 𑀳𑀢𑁆𑀣𑀺𑀦𑀸𑀕𑀁 𑀖𑀸𑀢𑁂𑀲𑀺, 𑀢𑀢𑁆𑀣𑀧𑀺 𑀢𑀸𑀯 𑀤𑁂𑀯𑀤𑀢𑁆𑀢𑁄𑀯 𑀅𑀥𑀺𑀓𑀢𑀭𑁄.

‘‘𑀧𑀼𑀦 𑀘𑀧𑀭𑀁 𑀬𑀤𑀸 𑀤𑁂𑀯𑀤𑀢𑁆𑀢𑁄 𑀫𑀦𑀼𑀲𑁆𑀲𑁄 𑀅𑀳𑁄𑀲𑀺 𑀯𑀦𑀘𑀭𑀓𑁄 𑀅𑀦𑀺𑀓𑁂𑀢𑀯𑀸𑀲𑀻, 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀲𑀓𑀼𑀡𑁄 𑀅𑀳𑁄𑀲𑀺 𑀢𑀺𑀢𑁆𑀢𑀺𑀭𑁄 𑀫𑀦𑁆𑀢𑀚𑁆𑀛𑀸𑀬𑀻, 𑀢𑀤𑀸𑀧𑀺 𑀲𑁄 𑀯𑀦𑀘𑀭𑀓𑁄 𑀢𑀁 𑀲𑀓𑀼𑀡𑀁 𑀖𑀸𑀢𑁂𑀲𑀺, 𑀢𑀢𑁆𑀣𑀧𑀺 𑀢𑀸𑀯 𑀤𑁂𑀯𑀤𑀢𑁆𑀢𑁄𑀯 𑀚𑀸𑀢𑀺𑀬𑀸 𑀅𑀥𑀺𑀓𑀢𑀭𑁄.

‘‘𑀧𑀼𑀦 𑀘𑀧𑀭𑀁 𑀬𑀤𑀸 𑀤𑁂𑀯𑀤𑀢𑁆𑀢𑁄 𑀓𑀮𑀸𑀩𑀼 𑀦𑀸𑀫 𑀓𑀸𑀲𑀺𑀭𑀸𑀚𑀸 [𑀓𑀸𑀲𑀺𑀓𑀭𑀸𑀚𑀸 (𑀓.)] 𑀅𑀳𑁄𑀲𑀺, 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀢𑀸𑀧𑀲𑁄 𑀅𑀳𑁄𑀲𑀺 𑀔𑀦𑁆𑀢𑀺𑀯𑀸𑀤𑀻. 𑀢𑀤𑀸 𑀲𑁄 𑀭𑀸𑀚𑀸 𑀢𑀲𑁆𑀲 𑀢𑀸𑀧𑀲𑀲𑁆𑀲 𑀓𑀼𑀤𑁆𑀥𑁄 𑀳𑀢𑁆𑀣𑀧𑀸𑀤𑁂 𑀯𑀁𑀲𑀓𑀴𑀻𑀭𑁂 𑀯𑀺𑀬 𑀙𑁂𑀤𑀸𑀧𑁂𑀲𑀺, 𑀢𑀢𑁆𑀣𑀧𑀺 𑀢𑀸𑀯 𑀤𑁂𑀯𑀤𑀢𑁆𑀢𑁄 𑀬𑁂𑀯 𑀅𑀥𑀺𑀓𑀢𑀭𑁄 𑀚𑀸𑀢𑀺𑀬𑀸 𑀘 𑀬𑀲𑁂𑀦 𑀘.

‘‘𑀧𑀼𑀦 𑀘𑀧𑀭𑀁 𑀬𑀤𑀸 𑀤𑁂𑀯𑀤𑀢𑁆𑀢𑁄 𑀫𑀦𑀼𑀲𑁆𑀲𑁄 𑀅𑀳𑁄𑀲𑀺 𑀯𑀦𑀘𑀭𑁄, 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀦𑀦𑁆𑀤𑀺𑀬𑁄 𑀦𑀸𑀫 𑀯𑀸𑀦𑀭𑀺𑀦𑁆𑀤𑁄 𑀅𑀳𑁄𑀲𑀺, 𑀢𑀤𑀸𑀧𑀺 𑀲𑁄 𑀯𑀦𑀘𑀭𑁄 𑀢𑀁 𑀯𑀸𑀦𑀭𑀺𑀦𑁆𑀤𑀁 𑀖𑀸𑀢𑁂𑀲𑀺 𑀲𑀤𑁆𑀥𑀺𑀁 𑀫𑀸𑀢𑀭𑀸 𑀓𑀦𑀺𑀝𑁆𑀞𑀪𑀸𑀢𑀺𑀓𑁂𑀦 𑀘, 𑀢𑀢𑁆𑀣𑀧𑀺 𑀢𑀸𑀯 𑀤𑁂𑀯𑀤𑀢𑁆𑀢𑁄 𑀬𑁂𑀯 𑀅𑀥𑀺𑀓𑀢𑀭𑁄 𑀚𑀸𑀢𑀺𑀬𑀸.

‘‘𑀧𑀼𑀦 𑀘𑀧𑀭𑀁 𑀬𑀤𑀸 𑀤𑁂𑀯𑀤𑀢𑁆𑀢𑁄 𑀫𑀦𑀼𑀲𑁆𑀲𑁄 𑀅𑀳𑁄𑀲𑀺 𑀅𑀘𑁂𑀮𑀓𑁄 𑀓𑀸𑀭𑀫𑁆𑀪𑀺𑀬𑁄 𑀦𑀸𑀫, 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀧𑀡𑁆𑀟𑀭𑀓𑁄 𑀦𑀸𑀫 𑀦𑀸𑀕𑀭𑀸𑀚𑀸 𑀅𑀳𑁄𑀲𑀺, 𑀢𑀢𑁆𑀣𑀧𑀺 𑀢𑀸𑀯 𑀤𑁂𑀯𑀤𑀢𑁆𑀢𑁄 𑀬𑁂𑀯 𑀅𑀥𑀺𑀓𑀢𑀭𑁄 𑀚𑀸𑀢𑀺𑀬𑀸.

‘‘𑀧𑀼𑀦 𑀘𑀧𑀭𑀁 𑀬𑀤𑀸 𑀤𑁂𑀯𑀤𑀢𑁆𑀢𑁄 𑀫𑀦𑀼𑀲𑁆𑀲𑁄 𑀅𑀳𑁄𑀲𑀺 𑀧𑀯𑀦𑁂 𑀚𑀝𑀺𑀮𑀓𑁄, 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀢𑀘𑁆𑀙𑀓𑁄 𑀦𑀸𑀫 𑀫𑀳𑀸𑀲𑀽𑀓𑀭𑁄 𑀅𑀳𑁄𑀲𑀺, 𑀢𑀢𑁆𑀣𑀧𑀺 𑀢𑀸𑀯 𑀤𑁂𑀯𑀤𑀢𑁆𑀢𑁄 𑀬𑁂𑀯 𑀚𑀸𑀢𑀺𑀬𑀸 𑀅𑀥𑀺𑀓𑀢𑀭𑁄.

‘‘𑀧𑀼𑀦 𑀘𑀧𑀭𑀁 𑀬𑀤𑀸 𑀤𑁂𑀯𑀤𑀢𑁆𑀢𑁄 𑀘𑁂𑀢𑀻𑀲𑀼 𑀲𑀽𑀭𑀧𑀭𑀺𑀘𑀭𑁄 𑀦𑀸𑀫 𑀭𑀸𑀚𑀸 𑀅𑀳𑁄𑀲𑀺 𑀉𑀧𑀭𑀺 𑀧𑀼𑀭𑀺𑀲𑀫𑀢𑁆𑀢𑁂 𑀕𑀕𑀦𑁂 𑀯𑁂𑀳𑀸𑀲𑀗𑁆𑀕𑀫𑁄, 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀓𑀧𑀺𑀮𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄 𑀅𑀳𑁄𑀲𑀺, 𑀢𑀢𑁆𑀣𑀧𑀺 𑀢𑀸𑀯 𑀤𑁂𑀯𑀤𑀢𑁆𑀢𑁄 𑀬𑁂𑀯 𑀅𑀥𑀺𑀓𑀢𑀭𑁄 𑀚𑀸𑀢𑀺𑀬𑀸 𑀘 𑀬𑀲𑁂𑀦 𑀘.

‘‘𑀧𑀼𑀦 𑀘𑀧𑀭𑀁 𑀬𑀤𑀸 𑀤𑁂𑀯𑀤𑀢𑁆𑀢𑁄 𑀫𑀦𑀼𑀲𑁆𑀲𑁄 𑀅𑀳𑁄𑀲𑀺 𑀲𑀸𑀫𑁄 𑀦𑀸𑀫, 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀭𑀼𑀭𑀼 𑀦𑀸𑀫 𑀫𑀺𑀕𑀭𑀸𑀚𑀸 𑀅𑀳𑁄𑀲𑀺, 𑀢𑀢𑁆𑀣𑀧𑀺 𑀢𑀸𑀯 𑀤𑁂𑀯𑀤𑀢𑁆𑀢𑁄 𑀬𑁂𑀯 𑀚𑀸𑀢𑀺𑀬𑀸 𑀅𑀥𑀺𑀓𑀢𑀭𑁄.

‘‘𑀧𑀼𑀦 𑀘𑀧𑀭𑀁 𑀬𑀤𑀸 𑀤𑁂𑀯𑀤𑀢𑁆𑀢𑁄 𑀫𑀦𑀼𑀲𑁆𑀲𑁄 𑀅𑀳𑁄𑀲𑀺 𑀮𑀼𑀤𑁆𑀤𑀓𑁄 𑀧𑀯𑀦𑀘𑀭𑁄, 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀳𑀢𑁆𑀣𑀺𑀦𑀸𑀕𑁄 𑀅𑀳𑁄𑀲𑀺, 𑀲𑁄 𑀮𑀼𑀤𑁆𑀤𑀓𑁄 𑀢𑀲𑁆𑀲 𑀳𑀢𑁆𑀣𑀺𑀦𑀸𑀕𑀲𑁆𑀲 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀤𑀦𑁆𑀢𑁂 𑀙𑀺𑀦𑁆𑀤𑀺𑀢𑁆𑀯𑀸 𑀳𑀭𑀺, 𑀢𑀢𑁆𑀣𑀧𑀺 𑀢𑀸𑀯 𑀤𑁂𑀯𑀤𑀢𑁆𑀢𑁄 𑀬𑁂𑀯 𑀬𑁄𑀦𑀺𑀬𑀸 𑀅𑀥𑀺𑀓𑀢𑀭𑁄.

‘‘𑀧𑀼𑀦 𑀘𑀧𑀭𑀁 𑀬𑀤𑀸 𑀤𑁂𑀯𑀤𑀢𑁆𑀢𑁄 𑀲𑀺𑀗𑁆𑀕𑀸𑀮𑁄 𑀅𑀳𑁄𑀲𑀺 𑀔𑀢𑁆𑀢𑀺𑀬𑀥𑀫𑁆𑀫𑁄, 𑀲𑁄 𑀬𑀸𑀯𑀢𑀸 𑀚𑀫𑁆𑀩𑀼𑀤𑀻𑀧𑁂 𑀧𑀤𑁂𑀲𑀭𑀸𑀚𑀸𑀦𑁄 𑀢𑁂 𑀲𑀩𑁆𑀩𑁂 𑀅𑀦𑀼𑀬𑀼𑀢𑁆𑀢𑁂 𑀅𑀓𑀸𑀲𑀺, 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀯𑀺𑀥𑀼𑀭𑁄 𑀦𑀸𑀫 𑀧𑀡𑁆𑀟𑀺𑀢𑁄 𑀅𑀳𑁄𑀲𑀺, 𑀢𑀢𑁆𑀣𑀧𑀺 𑀢𑀸𑀯 𑀤𑁂𑀯𑀤𑀢𑁆𑀢𑁄 𑀬𑁂𑀯 𑀬𑀲𑁂𑀦 𑀅𑀥𑀺𑀓𑀢𑀭𑁄.

‘‘𑀧𑀼𑀦 𑀘𑀧𑀭𑀁 𑀬𑀤𑀸 𑀤𑁂𑀯𑀤𑀢𑁆𑀢𑁄 𑀳𑀢𑁆𑀣𑀺𑀦𑀸𑀕𑁄 𑀳𑀼𑀢𑁆𑀯𑀸 𑀮𑀝𑀼𑀓𑀺𑀓𑀸𑀬 𑀲𑀓𑀼𑀡𑀺𑀓𑀸𑀬 𑀧𑀼𑀢𑁆𑀢𑀓𑁂 𑀖𑀸𑀢𑁂𑀲𑀺, 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄𑀧𑀺 𑀳𑀢𑁆𑀣𑀺𑀦𑀸𑀕𑁄 𑀅𑀳𑁄𑀲𑀺 𑀬𑀽𑀣𑀧𑀢𑀺, 𑀢𑀢𑁆𑀣 𑀢𑀸𑀯 𑀉𑀪𑁄𑀧𑀺 𑀢𑁂 𑀲𑀫𑀲𑀫𑀸 𑀅𑀳𑁂𑀲𑀼𑀁.

‘‘𑀧𑀼𑀦 𑀘𑀧𑀭𑀁 𑀬𑀤𑀸 𑀤𑁂𑀯𑀤𑀢𑁆𑀢𑁄 𑀬𑀓𑁆𑀔𑁄 𑀅𑀳𑁄𑀲𑀺 𑀅𑀥𑀫𑁆𑀫𑁄 𑀦𑀸𑀫, 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄𑀧𑀺 𑀬𑀓𑁆𑀔𑁄 𑀅𑀳𑁄𑀲𑀺 𑀥𑀫𑁆𑀫𑁄 𑀦𑀸𑀫, 𑀢𑀢𑁆𑀣𑀧𑀺 𑀢𑀸𑀯 𑀉𑀪𑁄𑀧𑀺 𑀲𑀫𑀲𑀫𑀸 𑀅𑀳𑁂𑀲𑀼𑀁.

‘‘𑀧𑀼𑀦 𑀘𑀧𑀭𑀁 𑀬𑀤𑀸 𑀤𑁂𑀯𑀤𑀢𑁆𑀢𑁄 𑀦𑀸𑀯𑀺𑀓𑁄 𑀅𑀳𑁄𑀲𑀺 𑀧𑀜𑁆𑀘𑀦𑁆𑀦𑀁 𑀓𑀼𑀮𑀲𑀢𑀸𑀦𑀁 𑀇𑀲𑁆𑀲𑀭𑁄, 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄𑀧𑀺 𑀦𑀸𑀯𑀺𑀓𑁄 𑀅𑀳𑁄𑀲𑀺 𑀧𑀜𑁆𑀘𑀦𑁆𑀦𑀁 𑀓𑀼𑀮𑀲𑀢𑀸𑀦𑀁 𑀇𑀲𑁆𑀲𑀭𑁄, 𑀢𑀢𑁆𑀣𑀧𑀺 𑀢𑀸𑀯 𑀉𑀪𑁄𑀧𑀺 𑀲𑀫𑀲𑀫𑀸 𑀅𑀳𑁂𑀲𑀼𑀁.

‘‘𑀧𑀼𑀦 𑀘𑀧𑀭𑀁 𑀬𑀤𑀸 𑀤𑁂𑀯𑀤𑀢𑁆𑀢𑁄 𑀲𑀢𑁆𑀣𑀯𑀸𑀳𑁄 𑀅𑀳𑁄𑀲𑀺 𑀧𑀜𑁆𑀘𑀦𑁆𑀦𑀁 𑀲𑀓𑀝𑀲𑀢𑀸𑀦𑀁 𑀇𑀲𑁆𑀲𑀭𑁄, 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄𑀧𑀺 𑀲𑀢𑁆𑀣𑀯𑀸𑀳𑁄 𑀅𑀳𑁄𑀲𑀺 𑀧𑀜𑁆𑀘𑀦𑁆𑀦𑀁 𑀲𑀓𑀝𑀲𑀢𑀸𑀦𑀁 𑀇𑀲𑁆𑀲𑀭𑁄, 𑀢𑀢𑁆𑀣𑀧𑀺 𑀢𑀸𑀯 𑀉𑀪𑁄𑀧𑀺 𑀲𑀫𑀲𑀫𑀸 𑀅𑀳𑁂𑀲𑀼𑀁.

‘‘𑀧𑀼𑀦 𑀘𑀧𑀭𑀁 𑀬𑀤𑀸 𑀤𑁂𑀯𑀤𑀢𑁆𑀢𑁄 𑀲𑀸𑀔𑁄 𑀦𑀸𑀫 𑀫𑀺𑀕𑀭𑀸𑀚𑀸 𑀅𑀳𑁄𑀲𑀺, 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄𑀧𑀺 𑀦𑀺𑀕𑁆𑀭𑁄𑀥𑁄 𑀦𑀸𑀫 𑀫𑀺𑀕𑀭𑀸𑀚𑀸 𑀅𑀳𑁄𑀲𑀺, 𑀢𑀢𑁆𑀣𑀧𑀺 𑀢𑀸𑀯 𑀉𑀪𑁄𑀧𑀺 𑀲𑀫𑀲𑀫𑀸 𑀅𑀳𑁂𑀲𑀼𑀁.

‘‘𑀧𑀼𑀦 𑀘𑀧𑀭𑀁 𑀬𑀤𑀸 𑀤𑁂𑀯𑀤𑀢𑁆𑀢𑁄 𑀲𑀸𑀔𑁄 𑀦𑀸𑀫 𑀲𑁂𑀦𑀸𑀧𑀢𑀺 𑀅𑀳𑁄𑀲𑀺, 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄𑀧𑀺 𑀦𑀺𑀕𑁆𑀭𑁄𑀥𑁄 𑀦𑀸𑀫 𑀭𑀸𑀚𑀸 𑀅𑀳𑁄𑀲𑀺, 𑀢𑀢𑁆𑀣𑀧𑀺 𑀢𑀸𑀯 𑀉𑀪𑁄𑀧𑀺 𑀲𑀫𑀲𑀫𑀸 𑀅𑀳𑁂𑀲𑀼𑀁.

‘‘𑀧𑀼𑀦 𑀘𑀧𑀭𑀁 𑀬𑀤𑀸 𑀤𑁂𑀯𑀤𑀢𑁆𑀢𑁄 𑀔𑀡𑁆𑀟𑀳𑀸𑀮𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄 𑀅𑀳𑁄𑀲𑀺, 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀘𑀦𑁆𑀤𑁄 𑀦𑀸𑀫 𑀭𑀸𑀚𑀓𑀼𑀫𑀸𑀭𑁄 𑀅𑀳𑁄𑀲𑀺, 𑀢𑀤𑀸 𑀲𑁄 𑀔𑀡𑁆𑀟𑀳𑀸𑀮𑁄 𑀬𑁂𑀯 𑀅𑀥𑀺𑀓𑀢𑀭𑁄.

‘‘𑀧𑀼𑀦 𑀘𑀧𑀭𑀁 𑀬𑀤𑀸 𑀤𑁂𑀯𑀤𑀢𑁆𑀢𑁄 𑀩𑁆𑀭𑀳𑁆𑀫𑀤𑀢𑁆𑀢𑁄 𑀦𑀸𑀫 𑀭𑀸𑀚𑀸 𑀅𑀳𑁄𑀲𑀺, 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀧𑀼𑀢𑁆𑀢𑁄 𑀫𑀳𑀸𑀧𑀤𑀼𑀫𑁄 𑀦𑀸𑀫 𑀓𑀼𑀫𑀸𑀭𑁄 𑀅𑀳𑁄𑀲𑀺, 𑀢𑀤𑀸 𑀲𑁄 𑀭𑀸𑀚𑀸 𑀲𑀓𑀧𑀼𑀢𑁆𑀢𑀁 𑀘𑁄𑀭𑀧𑀧𑀸𑀢𑁂 𑀔𑀺𑀧𑀸𑀧𑁂𑀲𑀺, 𑀬𑀢𑁄 𑀓𑀼𑀢𑁄𑀘𑀺 𑀧𑀺𑀢𑀸𑀯 𑀧𑀼𑀢𑁆𑀢𑀸𑀦𑀁 𑀅𑀥𑀺𑀓𑀢𑀭𑁄 𑀳𑁄𑀢𑀺 𑀯𑀺𑀲𑀺𑀝𑁆𑀞𑁄𑀢𑀺, 𑀢𑀢𑁆𑀣𑀧𑀺 𑀢𑀸𑀯 𑀤𑁂𑀯𑀤𑀢𑁆𑀢𑁄 𑀬𑁂𑀯 𑀅𑀥𑀺𑀓𑀢𑀭𑁄.

‘‘𑀧𑀼𑀦 𑀘𑀧𑀭𑀁 𑀬𑀤𑀸 𑀤𑁂𑀯𑀤𑀢𑁆𑀢𑁄 𑀫𑀳𑀸𑀧𑀢𑀸𑀧𑁄 𑀦𑀸𑀫 𑀭𑀸𑀚𑀸 𑀅𑀳𑁄𑀲𑀺, 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀢𑀲𑁆𑀲 𑀧𑀼𑀢𑁆𑀢𑁄 𑀥𑀫𑁆𑀫𑀧𑀸𑀮𑁄 𑀦𑀸𑀫 𑀓𑀼𑀫𑀸𑀭𑁄 𑀅𑀳𑁄𑀲𑀺, 𑀢𑀤𑀸 𑀲𑁄 𑀭𑀸𑀚𑀸 𑀲𑀓𑀧𑀼𑀢𑁆𑀢𑀲𑁆𑀲 𑀳𑀢𑁆𑀣𑀧𑀸𑀤𑁂 𑀲𑀻𑀲𑀜𑁆𑀘 𑀙𑁂𑀤𑀸𑀧𑁂𑀲𑀺, 𑀢𑀢𑁆𑀣𑀧𑀺 𑀢𑀸𑀯 𑀤𑁂𑀯𑀤𑀢𑁆𑀢𑁄 𑀬𑁂𑀯 𑀉𑀢𑁆𑀢𑀭𑁄 𑀅𑀥𑀺𑀓𑀢𑀭𑁄.

𑀅𑀚𑁆𑀚𑁂𑀢𑀭𑀳𑀺 𑀉𑀪𑁄𑀧𑀺 𑀲𑀓𑁆𑀬𑀓𑀼𑀮𑁂 𑀚𑀸𑀬𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄 𑀩𑀼𑀤𑁆𑀥𑁄 𑀅𑀳𑁄𑀲𑀺 𑀲𑀩𑁆𑀩𑀜𑁆𑀜𑀽 𑀮𑁄𑀓𑀦𑀸𑀬𑀓𑁄, 𑀤𑁂𑀯𑀤𑀢𑁆𑀢𑁄 𑀢𑀲𑁆𑀲 𑀤𑁂𑀯𑀸𑀢𑀺𑀤𑁂𑀯𑀲𑁆𑀲 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀇𑀤𑁆𑀥𑀺𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀩𑀼𑀤𑁆𑀥𑀸𑀮𑀬𑀁 𑀅𑀓𑀸𑀲𑀺. 𑀓𑀺𑀁 𑀦𑀼 𑀔𑁄, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀬𑀁 𑀫𑀬𑀸 𑀪𑀡𑀺𑀢𑀁, 𑀢𑀁 𑀲𑀩𑁆𑀩𑀁 𑀢𑀣𑀁 𑀉𑀤𑀸𑀳𑀼 𑀯𑀺𑀢𑀣’’𑀦𑁆𑀢𑀺?

‘‘𑀬𑀁 𑀢𑁆𑀯𑀁, 𑀫𑀳𑀸𑀭𑀸𑀚, 𑀩𑀳𑀼𑀯𑀺𑀥𑀁 𑀓𑀸𑀭𑀡𑀁 𑀑𑀲𑀸𑀭𑁂𑀲𑀺, 𑀲𑀩𑁆𑀩𑀁 𑀢𑀁 𑀢𑀣𑁂𑀯, 𑀦𑁄 𑀅𑀜𑁆𑀜𑀣𑀸’’𑀢𑀺. ‘‘𑀬𑀤𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀓𑀡𑁆𑀳𑁄𑀧𑀺 𑀲𑀼𑀓𑁆𑀓𑁄𑀧𑀺 𑀲𑀫𑀲𑀫𑀕𑀢𑀺𑀓𑀸 𑀳𑁄𑀦𑁆𑀢𑀺, 𑀢𑁂𑀦 𑀳𑀺 𑀓𑀼𑀲𑀮𑀫𑁆𑀧𑀺 𑀅𑀓𑀼𑀲𑀮𑀫𑁆𑀧𑀺 𑀲𑀫𑀲𑀫𑀯𑀺𑀧𑀸𑀓𑀁 𑀳𑁄𑀢𑀻’’𑀢𑀺? ‘‘𑀦 𑀳𑀺, 𑀫𑀳𑀸𑀭𑀸𑀚, 𑀓𑀼𑀲𑀮𑀫𑁆𑀧𑀺 𑀅𑀓𑀼𑀲𑀮𑀫𑁆𑀧𑀺 𑀲𑀫𑀲𑀫𑀯𑀺𑀧𑀸𑀓𑀁 𑀳𑁄𑀢𑀺, 𑀦 𑀳𑀺, 𑀫𑀳𑀸𑀭𑀸𑀚, 𑀤𑁂𑀯𑀤𑀢𑁆𑀢𑁄 𑀲𑀩𑁆𑀩𑀚𑀦𑁂𑀳𑀺 𑀧𑀝𑀺𑀯𑀺𑀭𑀼𑀤𑁆𑀥𑁄, 𑀩𑁄𑀥𑀺𑀲𑀢𑁆𑀢𑁂𑀦𑁂𑀯 𑀧𑀝𑀺𑀯𑀺𑀭𑀼𑀤𑁆𑀥𑁄. 𑀬𑁄 𑀢𑀲𑁆𑀲 𑀩𑁄𑀥𑀺𑀲𑀢𑁆𑀢𑁂𑀦 𑀧𑀝𑀺𑀯𑀺𑀭𑀼𑀤𑁆𑀥𑁄, 𑀲𑁄 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀬𑁂𑀯 𑀪𑀯𑁂 𑀧𑀘𑁆𑀘𑀢𑀺 𑀨𑀮𑀁 𑀤𑁂𑀢𑀺. 𑀤𑁂𑀯𑀤𑀢𑁆𑀢𑁄𑀧𑀺, 𑀫𑀳𑀸𑀭𑀸𑀚, 𑀇𑀲𑁆𑀲𑀭𑀺𑀬𑁂 𑀞𑀺𑀢𑁄 𑀚𑀦𑀧𑀤𑁂𑀲𑀼 𑀆𑀭𑀓𑁆𑀔𑀁 𑀤𑁂𑀢𑀺, 𑀲𑁂𑀢𑀼𑀁 𑀲𑀪𑀁 𑀧𑀼𑀜𑁆𑀜𑀲𑀸𑀮𑀁 𑀓𑀸𑀭𑁂𑀢𑀺, 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀓𑀧𑀡𑀤𑁆𑀥𑀺𑀓𑀯𑀡𑀺𑀩𑁆𑀩𑀓𑀸𑀦𑀁 𑀦𑀸𑀣𑀸𑀦𑀸𑀣𑀸𑀦𑀁 𑀬𑀣𑀸𑀧𑀡𑀺𑀳𑀺𑀢𑀁 𑀤𑀸𑀦𑀁 𑀤𑁂𑀢𑀺. 𑀢𑀲𑁆𑀲 𑀲𑁄 𑀯𑀺𑀧𑀸𑀓𑁂𑀦 𑀪𑀯𑁂 𑀪𑀯𑁂 𑀲𑀫𑁆𑀧𑀢𑁆𑀢𑀺𑀬𑁄 𑀧𑀝𑀺𑀮𑀪𑀢𑀺. 𑀓𑀲𑁆𑀲𑁂𑀢𑀁, 𑀫𑀳𑀸𑀭𑀸𑀚, 𑀲𑀓𑁆𑀓𑀸 𑀯𑀢𑁆𑀢𑀼𑀁 𑀯𑀺𑀦𑀸 𑀤𑀸𑀦𑁂𑀦 𑀤𑀫𑁂𑀦 𑀲𑀁𑀬𑀫𑁂𑀦 𑀉𑀧𑁄𑀲𑀣𑀓𑀫𑁆𑀫𑁂𑀦 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀲𑁆𑀲𑀢𑀻𑀢𑀺?

‘‘𑀬𑀁 𑀧𑀦 𑀢𑁆𑀯𑀁, 𑀫𑀳𑀸𑀭𑀸𑀚, 𑀏𑀯𑀁 𑀯𑀤𑁂𑀲𑀺 ‘𑀤𑁂𑀯𑀤𑀢𑁆𑀢𑁄 𑀘 𑀩𑁄𑀥𑀺𑀲𑀢𑁆𑀢𑁄 𑀘 𑀏𑀓𑀢𑁄 𑀅𑀦𑀼𑀧𑀭𑀺𑀯𑀢𑁆𑀢𑀦𑁆𑀢𑀻’𑀢𑀺, 𑀲𑁄 𑀦 𑀚𑀸𑀢𑀺𑀲𑀢𑀲𑁆𑀲 𑀅𑀘𑁆𑀘𑀬𑁂𑀦 𑀲𑀫𑀸𑀕𑀫𑁄 𑀅𑀳𑁄𑀲𑀺, 𑀦 𑀚𑀸𑀢𑀺𑀲𑀳𑀲𑁆𑀲𑀲𑁆𑀲 𑀅𑀘𑁆𑀘𑀬𑁂𑀦, 𑀦 𑀚𑀸𑀢𑀺𑀲𑀢𑀲𑀳𑀲𑁆𑀲𑀲𑁆𑀲 𑀅𑀘𑁆𑀘𑀬𑁂𑀦, 𑀓𑀤𑀸𑀘𑀺 𑀓𑀭𑀳𑀘𑀺 𑀩𑀳𑀽𑀦𑀁 𑀅𑀳𑁄𑀭𑀢𑁆𑀢𑀸𑀦𑀁 𑀅𑀘𑁆𑀘𑀬𑁂𑀦 𑀲𑀫𑀸𑀕𑀫𑁄 𑀅𑀳𑁄𑀲𑀺. 𑀬𑀁 𑀧𑀦𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑀓𑀸𑀡𑀓𑀘𑁆𑀙𑀧𑁄𑀧𑀫𑀁 𑀉𑀧𑀤𑀲𑁆𑀲𑀺𑀢𑀁 𑀫𑀦𑀼𑀲𑁆𑀲𑀢𑁆𑀢𑀧𑁆𑀧𑀝𑀺𑀮𑀸𑀪𑀸𑀬, 𑀢𑀣𑀽𑀧𑀫𑀁, 𑀫𑀳𑀸𑀭𑀸𑀚, 𑀇𑀫𑁂𑀲𑀁 𑀲𑀫𑀸𑀕𑀫𑀁 𑀥𑀸𑀭𑁂𑀳𑀺.

‘‘𑀦, 𑀫𑀳𑀸𑀭𑀸𑀚, 𑀩𑁄𑀥𑀺𑀲𑀢𑁆𑀢𑀲𑁆𑀲 𑀤𑁂𑀯𑀤𑀢𑁆𑀢𑁂𑀦𑁂𑀯 𑀲𑀤𑁆𑀥𑀺𑀁 𑀲𑀫𑀸𑀕𑀫𑁄 𑀅𑀳𑁄𑀲𑀺, 𑀣𑁂𑀭𑁄𑀧𑀺, 𑀫𑀳𑀸𑀭𑀸𑀚, 𑀲𑀸𑀭𑀺𑀧𑀼𑀢𑁆𑀢𑁄 𑀅𑀦𑁂𑀓𑁂𑀲𑀼 𑀚𑀸𑀢𑀺𑀲𑀢𑀲𑀳𑀲𑁆𑀲𑁂𑀲𑀼 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀺𑀢𑀸 𑀅𑀳𑁄𑀲𑀺, 𑀫𑀳𑀸𑀧𑀺𑀢𑀸 𑀅𑀳𑁄𑀲𑀺, 𑀘𑀽𑀴𑀧𑀺𑀢𑀸 𑀅𑀳𑁄𑀲𑀺, 𑀪𑀸𑀢𑀸 𑀅𑀳𑁄𑀲𑀺, 𑀧𑀼𑀢𑁆𑀢𑁄 𑀅𑀳𑁄𑀲𑀺, 𑀪𑀸𑀕𑀺𑀦𑁂𑀬𑁆𑀬𑁄 𑀅𑀳𑁄𑀲𑀺, 𑀫𑀺𑀢𑁆𑀢𑁄 𑀅𑀳𑁄𑀲𑀺.

‘‘𑀩𑁄𑀥𑀺𑀲𑀢𑁆𑀢𑁄𑀧𑀺, 𑀫𑀳𑀸𑀭𑀸𑀚, 𑀅𑀦𑁂𑀓𑁂𑀲𑀼 𑀚𑀸𑀢𑀺𑀲𑀢𑀲𑀳𑀲𑁆𑀲𑁂𑀲𑀼 𑀣𑁂𑀭𑀲𑁆𑀲 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀧𑀺𑀢𑀸 𑀅𑀳𑁄𑀲𑀺, 𑀫𑀳𑀸𑀧𑀺𑀢𑀸 𑀅𑀳𑁄𑀲𑀺, 𑀘𑀽𑀴𑀧𑀺𑀢𑀸 𑀅𑀳𑁄𑀲𑀺, 𑀪𑀸𑀢𑀸 𑀅𑀳𑁄𑀲𑀺, 𑀧𑀼𑀢𑁆𑀢𑁄 𑀅𑀳𑁄𑀲𑀺, 𑀪𑀸𑀕𑀺𑀦𑁂𑀬𑁆𑀬𑁄 𑀅𑀳𑁄𑀲𑀺, 𑀫𑀺𑀢𑁆𑀢𑁄 𑀅𑀳𑁄𑀲𑀺, 𑀲𑀩𑁆𑀩𑁂𑀧𑀺, 𑀫𑀳𑀸𑀭𑀸𑀚, 𑀲𑀢𑁆𑀢𑀦𑀺𑀓𑀸𑀬𑀧𑀭𑀺𑀬𑀸𑀧𑀦𑁆𑀦𑀸 𑀲𑀁𑀲𑀸𑀭𑀲𑁄𑀢𑀫𑀦𑀼𑀕𑀢𑀸 𑀲𑀁𑀲𑀸𑀭𑀲𑁄𑀢𑁂𑀦 𑀯𑀼𑀬𑁆𑀳𑀦𑁆𑀢𑀸 𑀅𑀧𑁆𑀧𑀺𑀬𑁂𑀳𑀺𑀧𑀺 𑀧𑀺𑀬𑁂𑀳𑀺𑀧𑀺 𑀲𑀫𑀸𑀕𑀘𑁆𑀙𑀦𑁆𑀢𑀺. 𑀬𑀣𑀸, 𑀫𑀳𑀸𑀭𑀸𑀚, 𑀉𑀤𑀓𑀁 𑀲𑁄𑀢𑁂𑀦 𑀯𑀼𑀬𑁆𑀳𑀫𑀸𑀦𑀁 𑀲𑀼𑀘𑀺𑀅𑀲𑀼𑀘𑀺𑀓𑀮𑁆𑀬𑀸𑀡𑀧𑀸𑀧𑀓𑁂𑀦 𑀲𑀫𑀸𑀕𑀘𑁆𑀙𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀲𑀩𑁆𑀩𑁂𑀧𑀺 𑀲𑀢𑁆𑀢𑀦𑀺𑀓𑀸𑀬𑀧𑀭𑀺𑀬𑀸𑀧𑀦𑁆𑀦𑀸 𑀲𑀁𑀲𑀸𑀭𑀲𑁄𑀢𑀫𑀦𑀼𑀕𑀢𑀸 𑀲𑀁𑀲𑀸𑀭𑀲𑁄𑀢𑁂𑀦 𑀯𑀼𑀬𑁆𑀳𑀦𑁆𑀢𑀸 𑀅𑀧𑁆𑀧𑀺𑀬𑁂𑀳𑀺𑀧𑀺 𑀧𑀺𑀬𑁂𑀳𑀺𑀧𑀺 𑀲𑀫𑀸𑀕𑀘𑁆𑀙𑀦𑁆𑀢𑀺. 𑀤𑁂𑀯𑀤𑀢𑁆𑀢𑁄, 𑀫𑀳𑀸𑀭𑀸𑀚, 𑀬𑀓𑁆𑀔𑁄 𑀲𑀫𑀸𑀦𑁄 𑀅𑀢𑁆𑀢𑀦𑀸 𑀅𑀥𑀫𑁆𑀫𑁄 𑀧𑀭𑁂 𑀅𑀥𑀫𑁆𑀫𑁂 𑀦𑀺𑀬𑁄𑀚𑁂𑀢𑁆𑀯𑀸 𑀲𑀢𑁆𑀢𑀧𑀜𑁆𑀜𑀸𑀲𑀯𑀲𑁆𑀲𑀓𑁄𑀝𑀺𑀬𑁄 𑀲𑀝𑁆𑀞𑀺 𑀘 𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺 𑀫𑀳𑀸𑀦𑀺𑀭𑀬𑁂 𑀧𑀘𑁆𑀘𑀺, 𑀩𑁄𑀥𑀺𑀲𑀢𑁆𑀢𑁄𑀧𑀺, 𑀫𑀳𑀸𑀭𑀸𑀚, 𑀬𑀓𑁆𑀔𑁄 𑀲𑀫𑀸𑀦𑁄 𑀅𑀢𑁆𑀢𑀦𑀸 𑀥𑀫𑁆𑀫𑁄 𑀧𑀭𑁂 𑀥𑀫𑁆𑀫𑁂 𑀦𑀺𑀬𑁄𑀚𑁂𑀢𑁆𑀯𑀸 𑀲𑀢𑁆𑀢𑀧𑀜𑁆𑀜𑀸𑀲𑀯𑀲𑁆𑀲𑀓𑁄𑀝𑀺𑀬𑁄 𑀲𑀝𑁆𑀞𑀺 𑀘 𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺 𑀲𑀕𑁆𑀕𑁂 𑀫𑁄𑀤𑀺 𑀲𑀩𑁆𑀩𑀓𑀸𑀫𑀲𑀫𑀗𑁆𑀕𑀻, 𑀅𑀧𑀺 𑀘, 𑀫𑀳𑀸𑀭𑀸𑀚, 𑀤𑁂𑀯𑀤𑀢𑁆𑀢𑁄 𑀇𑀫𑀲𑁆𑀫𑀺𑀁 𑀪𑀯𑁂 𑀩𑀼𑀤𑁆𑀥𑀁 𑀅𑀦𑀸𑀲𑀸𑀤𑀦𑀻𑀬𑀫𑀸𑀲𑀸𑀤𑀬𑀺𑀢𑁆𑀯𑀸 𑀲𑀫𑀕𑁆𑀕𑀜𑁆𑀘 𑀲𑀗𑁆𑀖𑀁 𑀪𑀺𑀦𑁆𑀤𑀺𑀢𑁆𑀯𑀸 𑀧𑀣𑀯𑀺𑀁 𑀧𑀸𑀯𑀺𑀲𑀺, 𑀢𑀣𑀸𑀕𑀢𑁄 𑀩𑀼𑀚𑁆𑀛𑀺𑀢𑁆𑀯𑀸 𑀲𑀩𑁆𑀩𑀥𑀫𑁆𑀫𑁂 𑀧𑀭𑀺𑀦𑀺𑀩𑁆𑀩𑀼𑀢𑁄 𑀉𑀧𑀥𑀺𑀲𑀗𑁆𑀔𑀬𑁂’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀏𑀯𑀫𑁂𑀢𑀁 𑀢𑀣𑀸 𑀲𑀫𑁆𑀧𑀝𑀺𑀘𑁆𑀙𑀸𑀫𑀻’’𑀢𑀺.

𑀓𑀼𑀲𑀮𑀸𑀓𑀼𑀲𑀮𑀲𑀫𑀯𑀺𑀲𑀫𑀧𑀜𑁆𑀳𑁄 𑀲𑀢𑁆𑀢𑀫𑁄.

𑁮. 𑀅𑀫𑀭𑀸𑀤𑁂𑀯𑀻𑀧𑀜𑁆𑀳𑁄

𑁮. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀪𑀸𑀲𑀺𑀢𑀫𑁆𑀧𑁂𑀢𑀁 𑀪𑀕𑀯𑀢𑀸 𑁋

‘‘‘𑀲𑀘𑁂 𑀮𑀪𑁂𑀣 𑀔𑀡𑀁 𑀯𑀸 𑀭𑀳𑁄 𑀯𑀸, 𑀦𑀺𑀫𑀦𑁆𑀢𑀓𑀁 [𑀦𑀺𑀯𑀸𑀢𑀓𑀁 (𑀓𑀼𑀡𑀸𑀮𑀚𑀸𑀢𑀓𑁂)] 𑀯𑀸𑀧𑀺 𑀮𑀪𑁂𑀣 𑀢𑀸𑀤𑀺𑀲𑀁;

𑀲𑀩𑁆𑀩𑀸𑀯 [𑀲𑀩𑁆𑀩𑀸𑀧𑀺 (𑀲𑀻. 𑀧𑀻.)] 𑀇𑀢𑁆𑀣𑀻 𑀓𑀬𑀺𑀭𑀼𑀁 [𑀓𑀭𑁂𑀬𑁆𑀬𑀼𑀁 (𑀲𑀻. 𑀧𑀻. 𑀓.)] 𑀦𑀼 𑀧𑀸𑀧𑀁, 𑀅𑀜𑁆𑀜𑀁 𑀅𑀮𑀤𑁆𑀥𑀸 𑀧𑀻𑀞𑀲𑀧𑁆𑀧𑀺𑀦𑀸 𑀲𑀤𑁆𑀥𑀺’𑀦𑁆𑀢𑀺.

‘‘𑀧𑀼𑀦 𑀘 𑀓𑀣𑀻𑀬𑀢𑀺 ‘𑀫𑀳𑁄𑀲𑀥𑀲𑁆𑀲 𑀪𑀭𑀺𑀬𑀸 𑀅𑀫𑀭𑀸 𑀦𑀸𑀫 𑀇𑀢𑁆𑀣𑀻 𑀕𑀸𑀫𑀓𑁂 𑀞𑀧𑀺𑀢𑀸 𑀧𑀯𑀼𑀢𑁆𑀣𑀧𑀢𑀺𑀓𑀸 𑀭𑀳𑁄 𑀦𑀺𑀲𑀺𑀦𑁆𑀦𑀸 𑀯𑀺𑀯𑀺𑀢𑁆𑀢𑀸 𑀭𑀸𑀚𑀧𑁆𑀧𑀝𑀺𑀲𑀫𑀁 𑀲𑀸𑀫𑀺𑀓𑀁 𑀓𑀭𑀺𑀢𑁆𑀯𑀸 𑀲𑀳𑀲𑁆𑀲𑁂𑀦 𑀦𑀺𑀫𑀦𑁆𑀢𑀻𑀬𑀫𑀸𑀦𑀸 𑀧𑀸𑀧𑀁 𑀦𑀸𑀓𑀸𑀲𑀻’𑀢𑀺. 𑀬𑀤𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀪𑀕𑀯𑀢𑀸 𑀪𑀡𑀺𑀢𑀁 ‘𑀲𑀘𑁂…𑀧𑁂… 𑀲𑀤𑁆𑀥𑀺’𑀦𑁆𑀢𑀺 𑀢𑁂𑀦 𑀳𑀺 ‘𑀫𑀳𑁄𑀲𑀥𑀲𑁆𑀲 𑀪𑀭𑀺𑀬𑀸…𑀧𑁂… 𑀦𑀸𑀓𑀸𑀲𑀻’𑀢𑀺 𑀬𑀁 𑀯𑀘𑀦𑀁, 𑀢𑀁 𑀫𑀺𑀘𑁆𑀙𑀸. 𑀬𑀤𑀺 𑀫𑀳𑁄𑀲𑀥𑀲𑁆𑀲 𑀪𑀭𑀺𑀬𑀸…𑀧𑁂… 𑀦𑀸𑀓𑀸𑀲𑀺, 𑀢𑁂𑀦 𑀳𑀺 ‘𑀲𑀘𑁂…𑀧𑁂… 𑀲𑀤𑁆𑀥𑀺’𑀦𑁆𑀢𑀺 𑀢𑀫𑁆𑀧𑀺 𑀯𑀘𑀦𑀁 𑀫𑀺𑀘𑁆𑀙𑀸. 𑀅𑀬𑀫𑁆𑀧𑀺 𑀉𑀪𑀢𑁄 𑀓𑁄𑀝𑀺𑀓𑁄 𑀧𑀜𑁆𑀳𑁄 𑀢𑀯𑀸𑀦𑀼𑀧𑁆𑀧𑀢𑁆𑀢𑁄, 𑀲𑁄 𑀢𑀬𑀸 𑀦𑀺𑀩𑁆𑀩𑀸𑀳𑀺𑀢𑀩𑁆𑀩𑁄’’𑀢𑀺.

‘‘𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 ‘𑀲𑀘𑁂…𑀧𑁂… 𑀲𑀤𑁆𑀥𑀺’𑀦𑁆𑀢𑀺. 𑀓𑀣𑀻𑀬𑀢𑀺 𑀘 ‘𑀫𑀳𑁄𑀲𑀥𑀲𑁆𑀲 𑀪𑀭𑀺𑀬𑀸 …𑀧𑁂… 𑀦𑀸𑀓𑀸𑀲𑀻’𑀢𑀺. 𑀓𑀭𑁂𑀬𑁆𑀬 𑀲𑀸, 𑀫𑀳𑀸𑀭𑀸𑀚, 𑀇𑀢𑁆𑀣𑀻 𑀲𑀳𑀲𑁆𑀲𑀁 𑀮𑀪𑀫𑀸𑀦𑀸 𑀢𑀸𑀤𑀺𑀲𑁂𑀦 𑀧𑀼𑀭𑀺𑀲𑁂𑀦 𑀲𑀤𑁆𑀥𑀺𑀁 𑀧𑀸𑀧𑀓𑀫𑁆𑀫𑀁, 𑀦 𑀲𑀸 𑀓𑀭𑁂𑀬𑁆𑀬 𑀲𑀘𑁂 𑀔𑀡𑀁 𑀯𑀸 𑀭𑀳𑁄 𑀯𑀸 𑀦𑀺𑀫𑀦𑁆𑀢𑀓𑀁 𑀯𑀸𑀧𑀺 𑀢𑀸𑀤𑀺𑀲𑀁 𑀮𑀪𑁂𑀬𑁆𑀬, 𑀯𑀺𑀘𑀺𑀦𑀦𑁆𑀢𑀻 𑀲𑀸, 𑀫𑀳𑀸𑀭𑀸𑀚, 𑀅𑀫𑀭𑀸 𑀇𑀢𑁆𑀣𑀻 𑀦 𑀅𑀤𑁆𑀤𑀲 𑀔𑀡𑀁 𑀯𑀸 𑀭𑀳𑁄 𑀯𑀸 𑀦𑀺𑀫𑀦𑁆𑀢𑀓𑀁 𑀯𑀸𑀧𑀺 𑀢𑀸𑀤𑀺𑀲𑀁.

‘‘𑀇𑀥 𑀮𑁄𑀓𑁂 𑀕𑀭𑀳𑀪𑀬𑀸 𑀔𑀡𑀁 𑀦 𑀧𑀲𑁆𑀲𑀺, 𑀧𑀭𑀮𑁄𑀓𑁂 𑀦𑀺𑀭𑀬𑀪𑀬𑀸 𑀔𑀡𑀁 𑀦 𑀧𑀲𑁆𑀲𑀺, 𑀓𑀝𑀼𑀓𑀯𑀺𑀧𑀸𑀓𑀁 𑀧𑀸𑀧𑀦𑁆𑀢𑀺 𑀔𑀡𑀁 𑀦 𑀧𑀲𑁆𑀲𑀺, 𑀧𑀺𑀬𑀁 𑀅𑀫𑀼𑀜𑁆𑀘𑀺𑀢𑀼𑀓𑀸𑀫𑀸 𑀔𑀡𑀁 𑀦 𑀧𑀲𑁆𑀲𑀺, 𑀲𑀸𑀫𑀺𑀓𑀲𑁆𑀲 𑀕𑀭𑀼𑀓𑀢𑀸𑀬 𑀔𑀡𑀁 𑀦 𑀧𑀲𑁆𑀲𑀺, 𑀥𑀫𑁆𑀫𑀁 𑀅𑀧𑀘𑀸𑀬𑀦𑁆𑀢𑀻 𑀔𑀡𑀁 𑀦 𑀧𑀲𑁆𑀲𑀺, 𑀅𑀦𑀭𑀺𑀬𑀁 𑀕𑀭𑀳𑀦𑁆𑀢𑀻 𑀔𑀡𑀁 𑀦 𑀧𑀲𑁆𑀲𑀺, 𑀓𑀺𑀭𑀺𑀬𑀁 𑀅𑀪𑀺𑀦𑁆𑀤𑀺𑀢𑀼𑀓𑀸𑀫𑀸 𑀔𑀡𑀁 𑀦 𑀧𑀲𑁆𑀲𑀺. 𑀏𑀯𑀭𑀽𑀧𑁂𑀳𑀺 𑀩𑀳𑀽𑀳𑀺 𑀓𑀸𑀭𑀡𑁂𑀳𑀺 𑀔𑀡𑀁 𑀦 𑀧𑀲𑁆𑀲𑀺.

‘‘𑀭𑀳𑁄𑀧𑀺 𑀲𑀸 𑀮𑁄𑀓𑁂 𑀯𑀺𑀘𑀺𑀦𑀺𑀢𑁆𑀯𑀸 𑀅𑀧𑀲𑁆𑀲𑀦𑁆𑀢𑀻 𑀧𑀸𑀧𑀁 𑀦𑀸𑀓𑀸𑀲𑀺. 𑀲𑀘𑁂 𑀲𑀸 𑀫𑀦𑀼𑀲𑁆𑀲𑁂𑀳𑀺 𑀭𑀳𑁄 𑀮𑀪𑁂𑀬𑁆𑀬, 𑀅𑀣 𑀅𑀫𑀦𑀼𑀲𑁆𑀲𑁂𑀳𑀺 𑀭𑀳𑁄 𑀦 𑀮𑀪𑁂𑀬𑁆𑀬. 𑀲𑀘𑁂 𑀅𑀫𑀦𑀼𑀲𑁆𑀲𑁂𑀳𑀺 𑀭𑀳𑁄 𑀮𑀪𑁂𑀬𑁆𑀬, 𑀅𑀣 𑀧𑀭𑀘𑀺𑀢𑁆𑀢𑀯𑀺𑀤𑀽𑀳𑀺 𑀧𑀩𑁆𑀩𑀚𑀺𑀢𑁂𑀳𑀺 𑀭𑀳𑁄 𑀦 𑀮𑀪𑁂𑀬𑁆𑀬. 𑀲𑀘𑁂 𑀧𑀭𑀘𑀺𑀢𑁆𑀢𑀯𑀺𑀤𑀽𑀳𑀺 𑀧𑀩𑁆𑀩𑀚𑀺𑀢𑁂𑀳𑀺 𑀭𑀳𑁄 𑀮𑀪𑁂𑀬𑁆𑀬, 𑀅𑀣 𑀧𑀭𑀘𑀺𑀢𑁆𑀢𑀯𑀺𑀤𑀽𑀦𑀻𑀳𑀺 𑀤𑁂𑀯𑀢𑀸𑀳𑀺 𑀭𑀳𑁄 𑀦 𑀮𑀪𑁂𑀬𑁆𑀬. 𑀲𑀘𑁂 𑀧𑀭𑀘𑀺𑀢𑁆𑀢𑀯𑀺𑀤𑀽𑀦𑀻𑀳𑀺 𑀤𑁂𑀯𑀢𑀸𑀳𑀺 𑀭𑀳𑁄 𑀮𑀪𑁂𑀬𑁆𑀬, 𑀅𑀢𑁆𑀢𑀦𑀸𑀯 𑀧𑀸𑀧𑁂𑀳𑀺 𑀭𑀳𑁄 𑀦 𑀮𑀪𑁂𑀬𑁆𑀬. 𑀲𑀘𑁂 𑀅𑀢𑁆𑀢𑀦𑀸𑀯 𑀧𑀸𑀧𑁂𑀳𑀺 𑀭𑀳𑁄 𑀮𑀪𑁂𑀬𑁆𑀬, 𑀅𑀣 𑀅𑀥𑀫𑁆𑀫𑁂𑀦 𑀭𑀳𑁄 𑀦 𑀮𑀪𑁂𑀬𑁆𑀬. 𑀏𑀯𑀭𑀽𑀧𑁂𑀳𑀺 𑀩𑀳𑀼𑀯𑀺𑀥𑁂𑀳𑀺 𑀓𑀸𑀭𑀡𑁂𑀳𑀺 𑀭𑀳𑁄 𑀅𑀮𑀪𑀺𑀢𑁆𑀯𑀸 𑀧𑀸𑀧𑀁 𑀦𑀸𑀓𑀸𑀲𑀺.

‘‘𑀦𑀺𑀫𑀦𑁆𑀢𑀓𑀫𑁆𑀧𑀺 𑀲𑀸 𑀮𑁄𑀓𑁂 𑀯𑀺𑀘𑀺𑀦𑀺𑀢𑁆𑀯𑀸 𑀢𑀸𑀤𑀺𑀲𑀁 𑀅𑀮𑀪𑀦𑁆𑀢𑀻 𑀧𑀸𑀧𑀁 𑀦𑀸𑀓𑀸𑀲𑀺. 𑀫𑀳𑁄𑀲𑀥𑁄, 𑀫𑀳𑀸𑀭𑀸𑀚, 𑀧𑀡𑁆𑀟𑀺𑀢𑁄 𑀅𑀝𑁆𑀞𑀯𑀻𑀲𑀢𑀺𑀬𑀸 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄. 𑀓𑀢𑀫𑁂𑀳𑀺 𑀅𑀝𑁆𑀞𑀯𑀻𑀲𑀢𑀺𑀬𑀸 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄? 𑀫𑀳𑁄𑀲𑀥𑁄, 𑀫𑀳𑀸𑀭𑀸𑀚, 𑀲𑀽𑀭𑁄 𑀳𑀺𑀭𑀺𑀫𑀸 𑀑𑀢𑁆𑀢𑀧𑁆𑀧𑀻 𑀲𑀧𑀓𑁆𑀔𑁄 𑀫𑀺𑀢𑁆𑀢𑀲𑀫𑁆𑀧𑀦𑁆𑀦𑁄 𑀔𑀫𑁄 𑀲𑀻𑀮𑀯𑀸 𑀲𑀘𑁆𑀘𑀯𑀸𑀤𑀻 𑀲𑁄𑀘𑁂𑀬𑁆𑀬𑀲𑀫𑁆𑀧𑀦𑁆𑀦𑁄 𑀅𑀓𑁆𑀓𑁄𑀥𑀦𑁄 𑀅𑀦𑀢𑀺𑀫𑀸𑀦𑀻 𑀅𑀦𑀼𑀲𑀽𑀬𑀓𑁄 𑀯𑀻𑀭𑀺𑀬𑀯𑀸 𑀆𑀬𑀽𑀳𑀓𑁄 𑀲𑀗𑁆𑀕𑀸𑀳𑀓𑁄 𑀲𑀁𑀯𑀺𑀪𑀸𑀕𑀻 𑀲𑀔𑀺𑀮𑁄 𑀦𑀺𑀯𑀸𑀢𑀯𑀼𑀢𑁆𑀢𑀺 𑀲𑀡𑁆𑀳𑁄 𑀅𑀲𑀞𑁄 𑀅𑀫𑀸𑀬𑀸𑀯𑀻 𑀅𑀢𑀺𑀩𑀼𑀤𑁆𑀥𑀺𑀲𑀫𑁆𑀧𑀦𑁆𑀦𑁄 𑀓𑀺𑀢𑁆𑀢𑀺𑀫𑀸 𑀯𑀺𑀚𑁆𑀚𑀸𑀲𑀫𑁆𑀧𑀦𑁆𑀦𑁄 𑀳𑀺𑀢𑁂𑀲𑀻 𑀉𑀧𑀦𑀺𑀲𑁆𑀲𑀺𑀢𑀸𑀦𑀁 𑀧𑀢𑁆𑀣𑀺𑀢𑁄 𑀲𑀩𑁆𑀩𑀚𑀦𑀲𑁆𑀲 𑀥𑀦𑀯𑀸 𑀬𑀲𑀯𑀸. 𑀫𑀳𑁄𑀲𑀥𑁄, 𑀫𑀳𑀸𑀭𑀸𑀚, 𑀧𑀡𑁆𑀟𑀺𑀢𑁄 𑀇𑀫𑁂𑀳𑀺 𑀅𑀝𑁆𑀞𑀯𑀻𑀲𑀢𑀺𑀬𑀸 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄. 𑀲𑀸 𑀅𑀜𑁆𑀜𑀁 𑀢𑀸𑀤𑀺𑀲𑀁 𑀦𑀺𑀫𑀦𑁆𑀢𑀓𑀁 𑀅𑀮𑀪𑀺𑀢𑁆𑀯𑀸 𑀧𑀸𑀧𑀁 𑀦𑀸𑀓𑀸𑀲𑀻’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀏𑀯𑀫𑁂𑀢𑀁 𑀢𑀣𑀸 𑀲𑀫𑁆𑀧𑀝𑀺𑀘𑁆𑀙𑀸𑀫𑀻’’𑀢𑀺.

𑀅𑀫𑀭𑀸𑀤𑁂𑀯𑀻𑀧𑀜𑁆𑀳𑁄 𑀅𑀝𑁆𑀞𑀫𑁄.

𑁯. 𑀅𑀭𑀳𑀦𑁆𑀢𑀅𑀪𑀸𑀬𑀦𑀧𑀜𑁆𑀳𑁄

𑁯. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀪𑀸𑀲𑀺𑀢𑀫𑁆𑀧𑁂𑀢𑀁 𑀪𑀕𑀯𑀢𑀸 ‘𑀯𑀺𑀕𑀢𑀪𑀬𑀲𑀦𑁆𑀢𑀸𑀲𑀸 𑀅𑀭𑀳𑀦𑁆𑀢𑁄’𑀢𑀺. 𑀧𑀼𑀦 𑀘 𑀦𑀕𑀭𑁂 𑀭𑀸𑀚𑀕𑀳𑁂 𑀥𑀦𑀧𑀸𑀮𑀓𑀁 𑀳𑀢𑁆𑀣𑀺𑀁 𑀪𑀕𑀯𑀢𑀺 𑀑𑀧𑀢𑀦𑁆𑀢𑀁 𑀤𑀺𑀲𑁆𑀯𑀸 𑀧𑀜𑁆𑀘 𑀔𑀻𑀡𑀸𑀲𑀯𑀲𑀢𑀸𑀦𑀺 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀚𑀺𑀦𑀯𑀭𑀁 𑀧𑀓𑁆𑀓𑀦𑁆𑀢𑀸𑀦𑀺 𑀤𑀺𑀲𑀸𑀯𑀺𑀤𑀺𑀲𑀁 𑀏𑀓𑀁 𑀞𑀧𑁂𑀢𑁆𑀯𑀸 𑀣𑁂𑀭𑀁 𑀆𑀦𑀦𑁆𑀤𑀁. 𑀓𑀺𑀁 𑀦𑀼 𑀔𑁄, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀢𑁂 𑀅𑀭𑀳𑀦𑁆𑀢𑁄 𑀪𑀬𑀸 𑀧𑀓𑁆𑀓𑀦𑁆𑀢𑀸, 𑀧𑀜𑁆𑀜𑀸𑀬𑀺𑀲𑁆𑀲𑀢𑀺 𑀲𑀓𑁂𑀦 𑀓𑀫𑁆𑀫𑁂𑀦𑀸𑀢𑀺 𑀤𑀲𑀩𑀮𑀁 𑀧𑀸𑀢𑁂𑀢𑀼𑀓𑀸𑀫𑀸 𑀧𑀓𑁆𑀓𑀦𑁆𑀢𑀸, 𑀉𑀤𑀸𑀳𑀼 𑀢𑀣𑀸𑀕𑀢𑀲𑁆𑀲 𑀅𑀢𑀼𑀮𑀁 𑀯𑀺𑀧𑀼𑀮𑀫𑀲𑀫𑀁 𑀧𑀸𑀝𑀺𑀳𑀸𑀭𑀺𑀬𑀁 𑀤𑀝𑁆𑀞𑀼𑀓𑀸𑀫𑀸 𑀧𑀓𑁆𑀓𑀦𑁆𑀢𑀸? 𑀬𑀤𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀪𑀕𑀯𑀢𑀸 𑀪𑀡𑀺𑀢𑀁 ‘𑀯𑀺𑀕𑀢𑀪𑀬𑀲𑀦𑁆𑀢𑀸𑀲𑀸 𑀅𑀭𑀳𑀦𑁆𑀢𑁄’𑀢𑀺, 𑀢𑁂𑀦 𑀳𑀺 ‘𑀦𑀕𑀭𑁂…𑀧𑁂… 𑀆𑀦𑀦𑁆𑀤’𑀦𑁆𑀢𑀺 𑀬𑀁 𑀯𑀘𑀦𑀁 𑀢𑀁 𑀫𑀺𑀘𑁆𑀙𑀸. 𑀬𑀤𑀺 𑀦𑀕𑀭𑁂 𑀭𑀸𑀚𑀕𑀳𑁂 𑀥𑀦𑀧𑀸𑀮𑀓𑀁 𑀳𑀢𑁆𑀣𑀺𑀁 𑀪𑀕𑀯𑀢𑀺 𑀑𑀧𑀢𑀦𑁆𑀢𑀁 𑀤𑀺𑀲𑁆𑀯𑀸 𑀧𑀜𑁆𑀘 𑀔𑀻𑀡𑀸𑀲𑀯𑀲𑀢𑀸𑀦𑀺 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀚𑀺𑀦𑀯𑀭𑀁 𑀧𑀓𑁆𑀓𑀦𑁆𑀢𑀸𑀦𑀺 𑀤𑀺𑀲𑀸𑀯𑀺𑀤𑀺𑀲𑀁 𑀏𑀓𑀁 𑀞𑀧𑁂𑀢𑁆𑀯𑀸 𑀣𑁂𑀭𑀁 𑀆𑀦𑀦𑁆𑀤𑀁, 𑀢𑁂𑀦 𑀳𑀺 ‘𑀯𑀺𑀕𑀢𑀪𑀬𑀲𑀦𑁆𑀢𑀸𑀲𑀸 𑀅𑀭𑀳𑀦𑁆𑀢𑁄’𑀢𑀺 𑀢𑀫𑁆𑀧𑀺 𑀯𑀘𑀦𑀁 𑀫𑀺𑀘𑁆𑀙𑀸. 𑀅𑀬𑀫𑁆𑀧𑀺 𑀉𑀪𑀢𑁄 𑀓𑁄𑀝𑀺𑀓𑁄 𑀧𑀜𑁆𑀳𑁄 𑀢𑀯𑀸𑀦𑀼𑀧𑁆𑀧𑀢𑁆𑀢𑁄, 𑀲𑁄 𑀢𑀬𑀸 𑀦𑀺𑀩𑁆𑀩𑀸𑀳𑀺𑀢𑀩𑁆𑀩𑁄’’𑀢𑀺.

‘‘𑀪𑀸𑀲𑀺𑀢𑀫𑁆𑀧𑁂𑀢𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 ‘𑀯𑀺𑀕𑀢𑀪𑀬𑀲𑀦𑁆𑀢𑀸𑀲𑀸 𑀅𑀭𑀳𑀦𑁆𑀢𑁄’𑀢𑀺, 𑀦𑀕𑀭𑁂 𑀭𑀸𑀚𑀕𑀳𑁂 𑀥𑀦𑀧𑀸𑀮𑀓𑀁 𑀳𑀢𑁆𑀣𑀺𑀁 𑀪𑀕𑀯𑀢𑀺 𑀑𑀧𑀢𑀦𑁆𑀢𑀁 𑀤𑀺𑀲𑁆𑀯𑀸 𑀧𑀜𑁆𑀘 𑀔𑀻𑀡𑀸𑀲𑀯𑀲𑀢𑀸𑀦𑀺 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀚𑀺𑀦𑀯𑀭𑀁 𑀧𑀓𑁆𑀓𑀦𑁆𑀢𑀸𑀦𑀺 𑀤𑀺𑀲𑀸𑀯𑀺𑀤𑀺𑀲𑀁 𑀏𑀓𑀁 𑀞𑀧𑁂𑀢𑁆𑀯𑀸 𑀣𑁂𑀭𑀁 𑀆𑀦𑀦𑁆𑀤𑀁, 𑀢𑀜𑁆𑀘 𑀧𑀦 𑀦 𑀪𑀬𑀸, 𑀦𑀸𑀧𑀺 𑀪𑀕𑀯𑀦𑁆𑀢𑀁 𑀧𑀸𑀢𑁂𑀢𑀼𑀓𑀸𑀫𑀢𑀸𑀬.

‘‘𑀬𑁂𑀦 𑀧𑀦, 𑀫𑀳𑀸𑀭𑀸𑀚, 𑀳𑁂𑀢𑀼𑀦𑀸 𑀅𑀭𑀳𑀦𑁆𑀢𑁄 𑀪𑀸𑀬𑁂𑀬𑁆𑀬𑀼𑀁 𑀯𑀸 𑀢𑀸𑀲𑁂𑀬𑁆𑀬𑀼𑀁 𑀯𑀸, 𑀲𑁄 𑀳𑁂𑀢𑀼 𑀅𑀭𑀳𑀦𑁆𑀢𑀸𑀦𑀁 𑀲𑀫𑀼𑀘𑁆𑀙𑀺𑀦𑁆𑀦𑁄, 𑀢𑀲𑁆𑀫𑀸 𑀯𑀺𑀕𑀢𑀪𑀬𑀲𑀦𑁆𑀢𑀸𑀲𑀸 𑀅𑀭𑀳𑀦𑁆𑀢𑁄, 𑀪𑀸𑀬𑀢𑀺 𑀦𑀼, 𑀫𑀳𑀸𑀭𑀸𑀚, 𑀫𑀳𑀸𑀧𑀣𑀯𑀻 𑀔𑀡𑀦𑁆𑀢𑁂𑀧𑀺 𑀪𑀺𑀦𑁆𑀤𑀦𑁆𑀢𑁂𑀧𑀺 𑀥𑀸𑀭𑁂𑀦𑁆𑀢𑁂𑀧𑀺 𑀲𑀫𑀼𑀤𑁆𑀤𑀧𑀩𑁆𑀩𑀢𑀕𑀺𑀭𑀺𑀲𑀺𑀔𑀭𑁂𑀢𑀺? ‘‘𑀦 𑀳𑀺, 𑀪𑀦𑁆𑀢𑁂’’𑀢𑀺. ‘‘𑀓𑁂𑀦 𑀓𑀸𑀭𑀡𑁂𑀦 𑀫𑀳𑀸𑀭𑀸𑀚𑀸’’𑀢𑀺? ‘‘𑀦𑀢𑁆𑀣𑀺, 𑀪𑀦𑁆𑀢𑁂, 𑀫𑀳𑀸𑀧𑀣𑀯𑀺𑀬𑀸 𑀲𑁄 𑀳𑁂𑀢𑀼, 𑀬𑁂𑀦 𑀳𑁂𑀢𑀼𑀦𑀸 𑀫𑀳𑀸𑀧𑀣𑀯𑀻 𑀪𑀸𑀬𑁂𑀬𑁆𑀬 𑀯𑀸 𑀢𑀸𑀲𑁂𑀬𑁆𑀬 𑀯𑀸’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀦𑀢𑁆𑀣𑀺 𑀅𑀭𑀳𑀦𑁆𑀢𑀸𑀦𑀁 𑀲𑁄 𑀳𑁂𑀢𑀼, 𑀬𑁂𑀦 𑀳𑁂𑀢𑀼𑀦𑀸 𑀅𑀭𑀳𑀦𑁆𑀢𑁄 𑀪𑀸𑀬𑁂𑀬𑁆𑀬𑀼𑀁 𑀯𑀸 𑀢𑀸𑀲𑁂𑀬𑁆𑀬𑀼𑀁 𑀯𑀸.

‘‘𑀪𑀸𑀬𑀢𑀺 𑀦𑀼, 𑀫𑀳𑀸𑀭𑀸𑀚, 𑀕𑀺𑀭𑀺𑀲𑀺𑀔𑀭𑀁 𑀙𑀺𑀦𑁆𑀤𑀦𑁆𑀢𑁂 𑀯𑀸 𑀪𑀺𑀦𑁆𑀤𑀦𑁆𑀢𑁂 𑀯𑀸 𑀧𑀢𑀦𑁆𑀢𑁂 𑀯𑀸 𑀅𑀕𑁆𑀕𑀺𑀦𑀸 𑀤𑀳𑀦𑁆𑀢𑁂 𑀯𑀸’’𑀢𑀺? ‘‘𑀦 𑀳𑀺, 𑀪𑀦𑁆𑀢𑁂’’𑀢𑀺. ‘‘𑀓𑁂𑀦 𑀓𑀸𑀭𑀡𑁂𑀦 𑀫𑀳𑀸𑀭𑀸𑀚𑀸’’𑀢𑀺? ‘‘𑀦𑀢𑁆𑀣𑀺, 𑀪𑀦𑁆𑀢𑁂, 𑀕𑀺𑀭𑀺𑀲𑀺𑀔𑀭𑀲𑁆𑀲 𑀲𑁄 𑀳𑁂𑀢𑀼, 𑀬𑁂𑀦 𑀳𑁂𑀢𑀼𑀦𑀸 𑀕𑀺𑀭𑀺𑀲𑀺𑀔𑀭𑀁 𑀪𑀸𑀬𑁂𑀬𑁆𑀬 𑀯𑀸 𑀢𑀸𑀲𑁂𑀬𑁆𑀬 𑀯𑀸’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀦𑀢𑁆𑀣𑀺 𑀅𑀭𑀳𑀦𑁆𑀢𑀸𑀦𑀁 𑀲𑁄 𑀳𑁂𑀢𑀼, 𑀬𑁂𑀦 𑀳𑁂𑀢𑀼𑀦𑀸 𑀅𑀭𑀳𑀦𑁆𑀢𑁄 𑀪𑀸𑀬𑁂𑀬𑁆𑀬𑀼𑀁 𑀯𑀸 𑀢𑀸𑀲𑁂𑀬𑁆𑀬𑀼𑀁 𑀯𑀸.

‘‘𑀬𑀤𑀺𑀧𑀺, 𑀫𑀳𑀸𑀭𑀸𑀚, 𑀮𑁄𑀓𑀥𑀸𑀢𑀼𑀲𑀢𑀲𑀳𑀲𑁆𑀲𑁂𑀲𑀼 𑀬𑁂 𑀓𑁂𑀘𑀺 𑀲𑀢𑁆𑀢𑀦𑀺𑀓𑀸𑀬𑀧𑀭𑀺𑀬𑀸𑀧𑀦𑁆𑀦𑀸 𑀲𑀩𑁆𑀩𑁂𑀧𑀺 𑀢𑁂 𑀲𑀢𑁆𑀢𑀺𑀳𑀢𑁆𑀣𑀸 𑀏𑀓𑀁 𑀅𑀭𑀳𑀦𑁆𑀢𑀁 𑀉𑀧𑀥𑀸𑀯𑀺𑀢𑁆𑀯𑀸 𑀢𑀸𑀲𑁂𑀬𑁆𑀬𑀼𑀁, 𑀦 𑀪𑀯𑁂𑀬𑁆𑀬 𑀅𑀭𑀳𑀢𑁄 𑀘𑀺𑀢𑁆𑀢𑀲𑁆𑀲 𑀓𑀺𑀜𑁆𑀘𑀺 𑀅𑀜𑁆𑀜𑀣𑀢𑁆𑀢𑀁. 𑀓𑀺𑀁 𑀓𑀸𑀭𑀡𑀁? 𑀅𑀝𑁆𑀞𑀸𑀦𑀫𑀦𑀯𑀓𑀸𑀲𑀢𑀸𑀬.

‘‘𑀅𑀧𑀺 𑀘, 𑀫𑀳𑀸𑀭𑀸𑀚, 𑀢𑁂𑀲𑀁 𑀔𑀻𑀡𑀸𑀲𑀯𑀸𑀦𑀁 𑀏𑀯𑀁 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑁄 𑀅𑀳𑁄𑀲𑀺 ‘𑀅𑀚𑁆𑀚 𑀦𑀭𑀯𑀭𑀧𑀯𑀭𑁂 𑀚𑀺𑀦𑀯𑀭𑀯𑀲𑀪𑁂 𑀦𑀕𑀭𑀯𑀭𑀫𑀦𑀼𑀧𑁆𑀧𑀯𑀺𑀝𑁆𑀞𑁂 𑀯𑀻𑀣𑀺𑀬𑀸 𑀥𑀦𑀧𑀸𑀮𑀓𑁄 𑀳𑀢𑁆𑀣𑀻 𑀆𑀧𑀢𑀺𑀲𑁆𑀲𑀢𑀺, 𑀅𑀲𑀁𑀲𑀬𑀫𑀢𑀺𑀤𑁂𑀯𑀤𑁂𑀯𑀁 𑀉𑀧𑀝𑁆𑀞𑀸𑀓𑁄 𑀦 𑀧𑀭𑀺𑀘𑁆𑀘𑀚𑀺𑀲𑁆𑀲𑀢𑀺, 𑀬𑀤𑀺 𑀫𑀬𑀁 𑀲𑀩𑁆𑀩𑁂𑀧𑀺 𑀪𑀕𑀯𑀦𑁆𑀢𑀁 𑀦 𑀧𑀭𑀺𑀘𑁆𑀘𑀚𑀺𑀲𑁆𑀲𑀸𑀫, 𑀆𑀦𑀦𑁆𑀤𑀲𑁆𑀲 𑀕𑀼𑀡𑁄 𑀧𑀸𑀓𑀝𑁄 𑀦 𑀪𑀯𑀺𑀲𑁆𑀲𑀢𑀺, 𑀦 𑀳𑁂𑀯 𑀘 𑀢𑀣𑀸𑀕𑀢𑀁 𑀲𑀫𑀼𑀧𑀕𑀫𑀺𑀲𑁆𑀲𑀢𑀺 𑀳𑀢𑁆𑀣𑀺𑀦𑀸𑀕𑁄, 𑀳𑀦𑁆𑀤 𑀫𑀬𑀁 𑀅𑀧𑀕𑀘𑁆𑀙𑀸𑀫, 𑀏𑀯𑀫𑀺𑀤𑀁 𑀫𑀳𑀢𑁄 𑀚𑀦𑀓𑀸𑀬𑀲𑁆𑀲 𑀓𑀺𑀮𑁂𑀲𑀩𑀦𑁆𑀥𑀦𑀫𑁄𑀓𑁆𑀔𑁄 𑀪𑀯𑀺𑀲𑁆𑀲𑀢𑀺, 𑀆𑀦𑀦𑁆𑀤𑀲𑁆𑀲 𑀘 𑀕𑀼𑀡𑁄 𑀧𑀸𑀓𑀝𑁄 𑀪𑀯𑀺𑀲𑁆𑀲𑀢𑀻’𑀢𑀺. 𑀏𑀯𑀁 𑀢𑁂 𑀅𑀭𑀳𑀦𑁆𑀢𑁄 𑀆𑀦𑀺𑀲𑀁𑀲𑀁 𑀤𑀺𑀲𑁆𑀯𑀸 𑀤𑀺𑀲𑀸𑀯𑀺𑀤𑀺𑀲𑀁 𑀧𑀓𑁆𑀓𑀦𑁆𑀢𑀸’’𑀢𑀺. ‘‘𑀲𑀼𑀯𑀺𑀪𑀢𑁆𑀢𑁄, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀧𑀜𑁆𑀳𑁄, 𑀏𑀯𑀫𑁂𑀢𑀁 𑀦𑀢𑁆𑀣𑀺 𑀅𑀭𑀳𑀦𑁆𑀢𑀸𑀦𑀁 𑀪𑀬𑀁 𑀯𑀸 𑀲𑀦𑁆𑀢𑀸𑀲𑁄 𑀯𑀸, 𑀆𑀦𑀺𑀲𑀁𑀲𑀁 𑀤𑀺𑀲𑁆𑀯𑀸 𑀅𑀭𑀳𑀦𑁆𑀢𑁄 𑀧𑀓𑁆𑀓𑀦𑁆𑀢𑀸 𑀤𑀺𑀲𑀸𑀯𑀺𑀤𑀺𑀲’’𑀦𑁆𑀢𑀺.

𑀅𑀭𑀳𑀦𑁆𑀢𑀅𑀪𑀸𑀬𑀦𑀧𑀜𑁆𑀳𑁄 𑀦𑀯𑀫𑁄.

𑁧𑁦. 𑀩𑀼𑀤𑁆𑀥𑀲𑀩𑁆𑀩𑀜𑁆𑀜𑀼𑀪𑀸𑀯𑀧𑀜𑁆𑀳𑁄

𑁧𑁦. ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀢𑀼𑀫𑁆𑀳𑁂 𑀪𑀡𑀣 ‘𑀢𑀣𑀸𑀕𑀢𑁄 𑀲𑀩𑁆𑀩𑀜𑁆𑀜𑀽’𑀢𑀺. 𑀧𑀼𑀦 𑀘 𑀪𑀡𑀣 ‘𑀢𑀣𑀸𑀕𑀢𑁂𑀦 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀧𑁆𑀧𑀫𑀼𑀔𑁂 𑀪𑀺𑀓𑁆𑀔𑀼𑀲𑀗𑁆𑀖𑁂 𑀧𑀡𑀸𑀫𑀺𑀢𑁂 𑀘𑀸𑀢𑀼𑀫𑁂𑀬𑁆𑀬𑀓𑀸 𑀘 𑀲𑀓𑁆𑀬𑀸 𑀩𑁆𑀭𑀳𑁆𑀫𑀸 𑀘 𑀲𑀳𑀫𑁆𑀧𑀢𑀺 𑀩𑀻𑀚𑀽𑀧𑀫𑀜𑁆𑀘 𑀯𑀘𑁆𑀙𑀢𑀭𑀼𑀡𑀽𑀧𑀫𑀜𑁆𑀘 𑀉𑀧𑀤𑀲𑁆𑀲𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀧𑀲𑀸𑀤𑁂𑀲𑀼𑀁 𑀔𑀫𑀸𑀧𑁂𑀲𑀼𑀁 𑀦𑀺𑀚𑁆𑀛𑀢𑁆𑀢𑀁 𑀅𑀓𑀁𑀲𑀽’𑀢𑀺. 𑀓𑀺𑀁 𑀦𑀼 𑀔𑁄, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀅𑀜𑁆𑀜𑀸𑀢𑀸 𑀢𑀸 𑀉𑀧𑀫𑀸 𑀢𑀣𑀸𑀕𑀢𑀲𑁆𑀲, 𑀬𑀸𑀳𑀺 𑀢𑀣𑀸𑀕𑀢𑁄 𑀉𑀧𑀫𑀸𑀳𑀺 𑀑𑀭𑀢𑁄 𑀔𑀫𑀺𑀢𑁄 𑀉𑀧𑀲𑀦𑁆𑀢𑁄 𑀦𑀺𑀚𑁆𑀛𑀢𑁆𑀢𑀁 𑀕𑀢𑁄? 𑀬𑀤𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀢𑀣𑀸𑀕𑀢𑀲𑁆𑀲 𑀢𑀸 𑀉𑀧𑀫𑀸 𑀅𑀜𑁆𑀜𑀸𑀢𑀸, 𑀢𑁂𑀦 𑀳𑀺 𑀩𑀼𑀤𑁆𑀥𑁄 𑀅𑀲𑀩𑁆𑀩𑀜𑁆𑀜𑀽, 𑀬𑀤𑀺 𑀜𑀸𑀢𑀸, 𑀢𑁂𑀦 𑀳𑀺 𑀑𑀓𑀲𑁆𑀲 𑀧𑀲𑀬𑁆𑀳 𑀯𑀻𑀫𑀁𑀲𑀸𑀧𑁂𑀓𑁆𑀔𑁄 𑀧𑀡𑀸𑀫𑁂𑀲𑀺, 𑀢𑁂𑀦 𑀳𑀺 𑀢𑀲𑁆𑀲 𑀅𑀓𑀸𑀭𑀼𑀜𑁆𑀜𑀢𑀸 𑀲𑀫𑁆𑀪𑀯𑀢𑀺. 𑀅𑀬𑀫𑁆𑀧𑀺 𑀉𑀪𑀢𑁄 𑀓𑁄𑀝𑀺𑀓𑁄 𑀧𑀜𑁆𑀳𑁄 𑀢𑀯𑀸𑀦𑀼𑀧𑁆𑀧𑀢𑁆𑀢𑁄, 𑀲𑁄 𑀢𑀬𑀸 𑀦𑀺𑀩𑁆𑀩𑀸𑀳𑀺𑀢𑀩𑁆𑀩𑁄’’𑀢𑀺.

‘‘𑀲𑀩𑁆𑀩𑀜𑁆𑀜𑀽, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑁄, 𑀢𑀸𑀳𑀺 𑀘 𑀉𑀧𑀫𑀸𑀳𑀺 𑀪𑀕𑀯𑀸 𑀧𑀲𑀦𑁆𑀦𑁄 𑀑𑀭𑀢𑁄 𑀔𑀫𑀺𑀢𑁄 𑀉𑀧𑀲𑀦𑁆𑀢𑁄 𑀦𑀺𑀚𑁆𑀛𑀢𑁆𑀢𑀁 𑀕𑀢𑁄. 𑀥𑀫𑁆𑀫𑀲𑁆𑀲𑀸𑀫𑀻, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑁄, 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂𑀳𑁂𑀯 𑀢𑁂 𑀑𑀧𑀫𑁆𑀫𑁂𑀳𑀺 𑀢𑀣𑀸𑀕𑀢𑀁 𑀆𑀭𑀸𑀥𑁂𑀲𑀼𑀁 𑀢𑁄𑀲𑁂𑀲𑀼𑀁 𑀧𑀲𑀸𑀤𑁂𑀲𑀼𑀁, 𑀢𑁂𑀲𑀜𑁆𑀘 𑀢𑀣𑀸𑀕𑀢𑁄 𑀧𑀲𑀦𑁆𑀦𑁄 ‘𑀲𑀸𑀥𑀽’𑀢𑀺 𑀅𑀩𑁆𑀪𑀸𑀦𑀼𑀫𑁄𑀤𑀺.

‘‘𑀬𑀣𑀸, 𑀫𑀳𑀸𑀭𑀸𑀚, 𑀇𑀢𑁆𑀣𑀻 𑀲𑀸𑀫𑀺𑀓𑀲𑁆𑀲 𑀲𑀦𑁆𑀢𑀓𑁂𑀦𑁂𑀯 𑀥𑀦𑁂𑀦 𑀲𑀸𑀫𑀺𑀓𑀁 𑀆𑀭𑀸𑀥𑁂𑀢𑀺 𑀢𑁄𑀲𑁂𑀢𑀺 𑀧𑀲𑀸𑀤𑁂𑀢𑀺, 𑀢𑀜𑁆𑀘 𑀲𑀸𑀫𑀺𑀓𑁄 ‘𑀲𑀸𑀥𑀽’𑀢𑀺 𑀅𑀩𑁆𑀪𑀸𑀦𑀼𑀫𑁄𑀤𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀘𑀸𑀢𑀼𑀫𑁂𑀬𑁆𑀬𑀓𑀸 𑀘 𑀲𑀓𑁆𑀬𑀸 𑀩𑁆𑀭𑀳𑁆𑀫𑀸 𑀘 𑀲𑀳𑀫𑁆𑀧𑀢𑀺 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂𑀳𑁂𑀯 𑀑𑀧𑀫𑁆𑀫𑁂𑀳𑀺 𑀢𑀣𑀸𑀕𑀢𑀁 𑀆𑀭𑀸𑀥𑁂𑀲𑀼𑀁 𑀢𑁄𑀲𑁂𑀲𑀼𑀁 𑀧𑀲𑀸𑀤𑁂𑀲𑀼𑀁, 𑀢𑁂𑀲𑀜𑁆𑀘 𑀢𑀣𑀸𑀕𑀢𑁄 𑀧𑀲𑀦𑁆𑀦𑁄 ‘𑀲𑀸𑀥𑀽’𑀢𑀺 𑀅𑀩𑁆𑀪𑀸𑀦𑀼𑀫𑁄𑀤𑀺.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀓𑀧𑁆𑀧𑀓𑁄 𑀭𑀜𑁆𑀜𑁄 𑀲𑀦𑁆𑀢𑀓𑁂𑀦𑁂𑀯 𑀲𑀼𑀯𑀡𑁆𑀡𑀨𑀡𑀓𑁂𑀦 𑀭𑀜𑁆𑀜𑁄 𑀉𑀢𑁆𑀢𑀫𑀗𑁆𑀕𑀁 𑀧𑀲𑀸𑀥𑀬𑀫𑀸𑀦𑁄 𑀭𑀸𑀚𑀸𑀦𑀁 𑀆𑀭𑀸𑀥𑁂𑀢𑀺 𑀢𑁄𑀲𑁂𑀢𑀺 𑀧𑀲𑀸𑀤𑁂𑀢𑀺, 𑀢𑀲𑁆𑀲 𑀘 𑀭𑀸𑀚𑀸 𑀧𑀲𑀦𑁆𑀦𑁄 ‘𑀲𑀸𑀥𑀽’𑀢𑀺 𑀅𑀩𑁆𑀪𑀸𑀦𑀼𑀫𑁄𑀤𑀢𑀺, 𑀬𑀣𑀺𑀘𑁆𑀙𑀺𑀢𑀫𑀦𑀼𑀧𑁆𑀧𑀤𑁂𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀘𑀸𑀢𑀼𑀫𑁂𑀬𑁆𑀬𑀓𑀸 𑀘 𑀲𑀓𑁆𑀬𑀸 𑀩𑁆𑀭𑀳𑁆𑀫𑀸 𑀘 𑀲𑀳𑀫𑁆𑀧𑀢𑀺 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂𑀳𑁂𑀯 𑀑𑀧𑀫𑁆𑀫𑁂𑀳𑀺 𑀢𑀣𑀸𑀕𑀢𑀁 𑀆𑀭𑀸𑀥𑁂𑀲𑀼𑀁 𑀢𑁄𑀲𑁂𑀲𑀼𑀁 𑀧𑀲𑀸𑀤𑁂𑀲𑀼𑀁, 𑀢𑁂𑀲𑀜𑁆𑀘 𑀢𑀣𑀸𑀕𑀢𑁄 𑀧𑀲𑀦𑁆𑀦𑁄 ‘𑀲𑀸𑀥𑀽’𑀢𑀺 𑀅𑀩𑁆𑀪𑀸𑀦𑀼𑀫𑁄𑀤𑀺.

‘‘𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀉𑀧𑀚𑁆𑀛𑀸𑀬𑀸𑀪𑀢𑀁 𑀧𑀺𑀡𑁆𑀟𑀧𑀸𑀢𑀁 𑀕𑀳𑁂𑀢𑁆𑀯𑀸 𑀉𑀧𑀚𑁆𑀛𑀸𑀬𑀲𑁆𑀲 𑀉𑀧𑀦𑀸𑀫𑁂𑀦𑁆𑀢𑁄 𑀉𑀧𑀚𑁆𑀛𑀸𑀬𑀁 𑀆𑀭𑀸𑀥𑁂𑀢𑀺 𑀢𑁄𑀲𑁂𑀢𑀺 𑀧𑀲𑀸𑀤𑁂𑀢𑀺, 𑀢𑀜𑁆𑀘 𑀉𑀧𑀚𑁆𑀛𑀸𑀬𑁄 𑀧𑀲𑀦𑁆𑀦𑁄 ‘𑀲𑀸𑀥𑀽’𑀢𑀺 𑀅𑀩𑁆𑀪𑀸𑀦𑀼𑀫𑁄𑀤𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀘𑀸𑀢𑀼𑀫𑁂𑀬𑁆𑀬𑀓𑀸 𑀘 𑀲𑀓𑁆𑀬𑀸 𑀩𑁆𑀭𑀳𑁆𑀫𑀸 𑀘 𑀲𑀳𑀫𑁆𑀧𑀢𑀺 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂𑀳𑁂𑀯 𑀑𑀧𑀫𑁆𑀫𑁂𑀳𑀺 𑀢𑀣𑀸𑀕𑀢𑀁 𑀆𑀭𑀸𑀥𑁂𑀲𑀼𑀁 𑀢𑁄𑀲𑁂𑀲𑀼𑀁 𑀧𑀲𑀸𑀤𑁂𑀲𑀼𑀁, 𑀢𑁂𑀲𑀜𑁆𑀘 𑀢𑀣𑀸𑀕𑀢𑁄 𑀧𑀲𑀦𑁆𑀦𑁄 ‘𑀲𑀸𑀥𑀽’𑀢𑀺 𑀅𑀩𑁆𑀪𑀸𑀦𑀼𑀫𑁄𑀤𑀺𑀢𑁆𑀯𑀸 𑀲𑀩𑁆𑀩𑀤𑀼𑀓𑁆𑀔𑀧𑀭𑀺𑀫𑀼𑀢𑁆𑀢𑀺𑀬𑀸 𑀥𑀫𑁆𑀫𑀁 𑀤𑁂𑀲𑁂𑀲𑀻’’𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀏𑀯𑀫𑁂𑀢𑀁 𑀢𑀣𑀸 𑀲𑀫𑁆𑀧𑀝𑀺𑀘𑁆𑀙𑀸𑀫𑀻𑀢𑀺.

𑀩𑀼𑀤𑁆𑀥𑀲𑀩𑁆𑀩𑀜𑁆𑀜𑀼𑀪𑀸𑀯𑀧𑀜𑁆𑀳𑁄 𑀤𑀲𑀫𑁄.

𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀯𑀕𑁆𑀕𑁄 𑀘𑀢𑀼𑀢𑁆𑀣𑁄.

𑀇𑀫𑀲𑁆𑀫𑀺𑀁 𑀯𑀕𑁆𑀕𑁂 𑀤𑀲 𑀧𑀜𑁆𑀳𑀸.