𑁭. 𑀧𑀸𑀧𑀧𑀼𑀜𑁆𑀜𑀸𑀦𑀁 𑀅𑀧𑁆𑀧𑀸𑀦𑀧𑁆𑀧𑀪𑀸𑀯𑀧𑀜𑁆𑀳𑁄

𑁭. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀓𑀢𑀭𑀁 𑀦𑀼 𑀔𑁄 𑀩𑀳𑀼𑀢𑀭𑀁 𑀧𑀼𑀜𑁆𑀜𑀁 𑀯𑀸 𑀅𑀧𑀼𑀜𑁆𑀜𑀁 𑀯𑀸’’𑀢𑀺? ‘‘𑀧𑀼𑀜𑁆𑀜𑀁 𑀔𑁄, 𑀫𑀳𑀸𑀭𑀸𑀚, 𑀩𑀳𑀼𑀢𑀭𑀁, 𑀅𑀧𑀼𑀜𑁆𑀜𑀁 𑀣𑁄𑀓’’𑀦𑁆𑀢𑀺. ‘‘𑀓𑁂𑀦 𑀓𑀸𑀭𑀡𑁂𑀦𑀸’’𑀢𑀺? ‘‘𑀅𑀧𑀼𑀜𑁆𑀜𑀁 𑀔𑁄, 𑀫𑀳𑀸𑀭𑀸𑀚, 𑀓𑀭𑁄𑀦𑁆𑀢𑁄 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑁄𑀢𑀺 ‘𑀧𑀸𑀧𑀓𑀫𑁆𑀫𑀁 𑀫𑀬𑀸 𑀓𑀢’𑀦𑁆𑀢𑀺, 𑀢𑁂𑀦 𑀧𑀸𑀧𑀁 𑀦 𑀯𑀟𑁆𑀠𑀢𑀺. 𑀧𑀼𑀜𑁆𑀜𑀁 𑀔𑁄, 𑀫𑀳𑀸𑀭𑀸𑀚, 𑀓𑀭𑁄𑀦𑁆𑀢𑁄 𑀅𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑁄𑀢𑀺, 𑀅𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑁄 𑀧𑀸𑀫𑁄𑀚𑁆𑀚𑀁 𑀚𑀸𑀬𑀢𑀺, 𑀧𑀫𑀼𑀤𑀺𑀢𑀲𑁆𑀲 𑀧𑀻𑀢𑀺 𑀚𑀸𑀬𑀢𑀺, 𑀧𑀻𑀢𑀺𑀫𑀦𑀲𑁆𑀲 𑀓𑀸𑀬𑁄 𑀧𑀲𑁆𑀲𑀫𑁆𑀪𑀢𑀺, 𑀧𑀲𑁆𑀲𑀤𑁆𑀥𑀓𑀸𑀬𑁄 𑀲𑀼𑀔𑀁 𑀯𑁂𑀤𑁂𑀢𑀺, 𑀲𑀼𑀔𑀺𑀦𑁄 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀺, 𑀲𑀫𑀸𑀳𑀺𑀢𑁄 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀢𑁂𑀦 𑀓𑀸𑀭𑀡𑁂𑀦 𑀧𑀼𑀜𑁆𑀜𑀁 𑀯𑀟𑁆𑀠𑀢𑀺. 𑀧𑀼𑀭𑀺𑀲𑁄 𑀔𑁄, 𑀫𑀳𑀸𑀭𑀸𑀚, 𑀙𑀺𑀦𑁆𑀦𑀳𑀢𑁆𑀣𑀧𑀸𑀤𑁄 𑀪𑀕𑀯𑀢𑁄 𑀏𑀓𑀁 𑀉𑀧𑁆𑀧𑀮𑀳𑀢𑁆𑀣𑀁 𑀤𑀢𑁆𑀯𑀸 𑀏𑀓𑀦𑀯𑀼𑀢𑀺𑀓𑀧𑁆𑀧𑀸𑀦𑀺 𑀯𑀺𑀦𑀺𑀧𑀸𑀢𑀁 𑀦 𑀕𑀘𑁆𑀙𑀺𑀲𑁆𑀲𑀢𑀺. 𑀇𑀫𑀺𑀦𑀸𑀧𑀺, 𑀫𑀳𑀸𑀭𑀸𑀚, 𑀓𑀸𑀭𑀡𑁂𑀦 𑀪𑀡𑀸𑀫𑀺 ‘𑀧𑀼𑀜𑁆𑀜𑀁 𑀩𑀳𑀼𑀢𑀭𑀁, 𑀅𑀧𑀼𑀜𑁆𑀜𑀁 𑀣𑁄𑀓’’’𑀦𑁆𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀧𑀸𑀧𑀧𑀼𑀜𑁆𑀜𑀸𑀦𑀁 𑀅𑀧𑁆𑀧𑀸𑀦𑀧𑁆𑀧𑀪𑀸𑀯𑀧𑀜𑁆𑀳𑁄 𑀲𑀢𑁆𑀢𑀫𑁄.