𑁮. 𑀚𑀸𑀦𑀦𑁆𑀢𑀸𑀚𑀸𑀦𑀦𑁆𑀢𑀧𑀸𑀧𑀓𑀭𑀡𑀧𑀜𑁆𑀳𑁄

𑁮. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀬𑁄 𑀚𑀸𑀦𑀦𑁆𑀢𑁄 𑀧𑀸𑀧𑀓𑀫𑁆𑀫𑀁 𑀓𑀭𑁄𑀢𑀺, 𑀬𑁄 𑀅𑀚𑀸𑀦𑀦𑁆𑀢𑁄 𑀧𑀸𑀧𑀓𑀫𑁆𑀫𑀁 𑀓𑀭𑁄𑀢𑀺, 𑀓𑀲𑁆𑀲 𑀩𑀳𑀼𑀢𑀭𑀁 𑀅𑀧𑀼𑀜𑁆𑀜’’𑀦𑁆𑀢𑀺? 𑀣𑁂𑀭𑁄 𑀆𑀳 ‘‘𑀬𑁄 𑀔𑁄, 𑀫𑀳𑀸𑀭𑀸𑀚, 𑀅𑀚𑀸𑀦𑀦𑁆𑀢𑁄 𑀧𑀸𑀧𑀓𑀫𑁆𑀫𑀁 𑀓𑀭𑁄𑀢𑀺, 𑀢𑀲𑁆𑀲 𑀩𑀳𑀼𑀢𑀭𑀁 𑀅𑀧𑀼𑀜𑁆𑀜’’𑀦𑁆𑀢𑀺. ‘‘𑀢𑁂𑀦 𑀳𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀬𑁄 𑀅𑀫𑁆𑀳𑀸𑀓𑀁 𑀭𑀸𑀚𑀧𑀼𑀢𑁆𑀢𑁄 𑀯𑀸 𑀭𑀸𑀚𑀫𑀳𑀸𑀫𑀢𑁆𑀢𑁄 𑀯𑀸 𑀅𑀚𑀸𑀦𑀦𑁆𑀢𑁄 𑀧𑀸𑀧𑀓𑀫𑁆𑀫𑀁 𑀓𑀭𑁄𑀢𑀺, 𑀢𑀁 𑀫𑀬𑀁 𑀤𑀺𑀕𑀼𑀡𑀁 𑀤𑀡𑁆𑀟𑁂𑀫𑀸’’𑀢𑀺? ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀫𑀳𑀸𑀭𑀸𑀚, 𑀢𑀢𑁆𑀢𑀁 𑀅𑀬𑁄𑀕𑀼𑀴𑀁 𑀆𑀤𑀺𑀢𑁆𑀢𑀁 𑀲𑀫𑁆𑀧𑀚𑁆𑀚𑀮𑀺𑀢𑀁 𑀲𑀚𑁄𑀢𑀺𑀪𑀽𑀢𑀁 𑀏𑀓𑁄 𑀚𑀸𑀦𑀦𑁆𑀢𑁄 𑀕𑀡𑁆𑀳𑁂𑀬𑁆𑀬, 𑀏𑀓𑁄 𑀅𑀚𑀸𑀦𑀦𑁆𑀢𑁄 𑀕𑀡𑁆𑀳𑁂𑀬𑁆𑀬, 𑀓𑀢𑀫𑁄 [𑀓𑀲𑁆𑀲 (𑀓.)] 𑀩𑀮𑀯𑀢𑀭𑀁 𑀟𑀬𑁆𑀳𑁂𑀬𑁆𑀬𑀸’’𑀢𑀺. ‘‘𑀬𑁄 𑀔𑁄, 𑀪𑀦𑁆𑀢𑁂, 𑀅𑀚𑀸𑀦𑀦𑁆𑀢𑁄 𑀕𑀡𑁆𑀳𑁂𑀬𑁆𑀬, 𑀲𑁄 [𑀢𑀲𑁆𑀲 (𑀧𑀻. 𑀓.)] 𑀩𑀮𑀯𑀢𑀭𑀁 𑀟𑀬𑁆𑀳𑁂𑀬𑁆𑀬𑀸’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑁄 𑀅𑀚𑀸𑀦𑀦𑁆𑀢𑁄 𑀧𑀸𑀧𑀓𑀫𑁆𑀫𑀁 𑀓𑀭𑁄𑀢𑀺, 𑀢𑀲𑁆𑀲 𑀩𑀳𑀼𑀢𑀭𑀁 𑀅𑀧𑀼𑀜𑁆𑀜’’𑀦𑁆𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀚𑀸𑀦𑀦𑁆𑀢𑀸𑀚𑀸𑀦𑀦𑁆𑀢𑀧𑀸𑀧𑀓𑀭𑀡𑀧𑀜𑁆𑀳𑁄 𑀅𑀝𑁆𑀞𑀫𑁄.