𑁬. 𑀩𑁄𑀚𑁆𑀛𑀗𑁆𑀕𑀧𑀜𑁆𑀳𑁄

𑁬. 𑀭𑀸𑀚𑀸 𑀆𑀳 ‘‘𑀓𑀢𑀺 𑀦𑀼 𑀔𑁄, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀩𑁄𑀚𑁆𑀛𑀗𑁆𑀕𑀸’’𑀢𑀺? ‘‘𑀲𑀢𑁆𑀢 𑀔𑁄, 𑀫𑀳𑀸𑀭𑀸𑀚, 𑀩𑁄𑀚𑁆𑀛𑀗𑁆𑀕𑀸’’𑀢𑀺. ‘‘𑀓𑀢𑀺𑀳𑀺 𑀧𑀦, 𑀪𑀦𑁆𑀢𑁂, 𑀩𑁄𑀚𑁆𑀛𑀗𑁆𑀕𑁂𑀳𑀺 𑀩𑀼𑀚𑁆𑀛𑀢𑀻’’𑀢𑀺? ‘‘𑀏𑀓𑁂𑀦 𑀔𑁄, 𑀫𑀳𑀸𑀭𑀸𑀚, 𑀩𑁄𑀚𑁆𑀛𑀗𑁆𑀕𑁂𑀦 𑀩𑀼𑀚𑁆𑀛𑀢𑀺 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁂𑀦𑀸’’𑀢𑀺. ‘‘𑀅𑀣 𑀓𑀺𑀲𑁆𑀲 𑀦𑀼 𑀔𑁄, 𑀪𑀦𑁆𑀢𑁂, 𑀯𑀼𑀘𑁆𑀘𑀦𑁆𑀢𑀺 ‘𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸’’’𑀢𑀺? ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀫𑀳𑀸𑀭𑀸𑀚, 𑀅𑀲𑀺 𑀓𑁄𑀲𑀺𑀬𑀸 𑀧𑀓𑁆𑀔𑀺𑀢𑁆𑀢𑁄 𑀅𑀕𑁆𑀕𑀳𑀺𑀢𑁄 𑀳𑀢𑁆𑀣𑁂𑀦 𑀉𑀲𑁆𑀲𑀳𑀢𑀺 𑀙𑁂𑀚𑁆𑀚𑀁 𑀙𑀺𑀦𑁆𑀤𑀺𑀢𑀼’’𑀦𑁆𑀢𑀺. ‘‘𑀦 𑀳𑀺, 𑀪𑀦𑁆𑀢𑁂’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁂𑀦 𑀯𑀺𑀦𑀸 𑀙𑀳𑀺 𑀩𑁄𑀚𑁆𑀛𑀗𑁆𑀕𑁂𑀳𑀺 𑀦 𑀩𑀼𑀚𑁆𑀛𑀢𑀻’’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀩𑁄𑀚𑁆𑀛𑀗𑁆𑀕𑀧𑀜𑁆𑀳𑁄 𑀙𑀝𑁆𑀞𑁄.