𑁭. 𑀅𑀜𑁆𑀜𑀓𑀸𑀬𑀲𑀗𑁆𑀓𑀫𑀦𑀧𑀜𑁆𑀳𑁄

𑁭. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀅𑀢𑁆𑀣𑀺 𑀓𑁄𑀘𑀺 𑀲𑀢𑁆𑀢𑁄 𑀬𑁄 𑀇𑀫𑀫𑁆𑀳𑀸 𑀓𑀸𑀬𑀸 𑀅𑀜𑁆𑀜𑀁 𑀓𑀸𑀬𑀁 𑀲𑀗𑁆𑀓𑀫𑀢𑀻’’𑀢𑀺? ‘‘𑀦 𑀳𑀺, 𑀫𑀳𑀸𑀭𑀸𑀚𑀸’’𑀢𑀺. ‘‘𑀬𑀤𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀇𑀫𑀫𑁆𑀳𑀸 𑀓𑀸𑀬𑀸 𑀅𑀜𑁆𑀜𑀁 𑀓𑀸𑀬𑀁 𑀲𑀗𑁆𑀓𑀫𑀦𑁆𑀢𑁄 𑀦𑀢𑁆𑀣𑀺, 𑀦𑀦𑀼 𑀫𑀼𑀢𑁆𑀢𑁄 𑀪𑀯𑀺𑀲𑁆𑀲𑀢𑀺 𑀧𑀸𑀧𑀓𑁂𑀳𑀺 𑀓𑀫𑁆𑀫𑁂𑀳𑀻’’𑀢𑀺? ‘‘𑀆𑀫, 𑀫𑀳𑀸𑀭𑀸𑀚, 𑀬𑀤𑀺 𑀦 𑀧𑀝𑀺𑀲𑀦𑁆𑀤𑀳𑁂𑀬𑁆𑀬, 𑀫𑀼𑀢𑁆𑀢𑁄 𑀪𑀯𑀺𑀲𑁆𑀲𑀢𑀺 𑀧𑀸𑀧𑀓𑁂𑀳𑀺 𑀓𑀫𑁆𑀫𑁂𑀳𑀻𑀢𑀺, 𑀬𑀲𑁆𑀫𑀸 𑀘 𑀔𑁄, 𑀫𑀳𑀸𑀭𑀸𑀚, 𑀧𑀝𑀺𑀲𑀦𑁆𑀤𑀳𑀢𑀺, 𑀢𑀲𑁆𑀫𑀸 𑀦 𑀧𑀭𑀺𑀫𑀼𑀢𑁆𑀢𑁄 𑀧𑀸𑀧𑀓𑁂𑀳𑀺 𑀓𑀫𑁆𑀫𑁂𑀳𑀻’’𑀢𑀺.

‘‘𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀬𑀣𑀸, 𑀫𑀳𑀸𑀭𑀸𑀚, 𑀓𑁄𑀘𑀺𑀤𑁂𑀯 𑀧𑀼𑀭𑀺𑀲𑁄 𑀅𑀜𑁆𑀜𑀢𑀭𑀲𑁆𑀲 𑀧𑀼𑀭𑀺𑀲𑀲𑁆𑀲 𑀅𑀫𑁆𑀩𑀁 𑀅𑀯𑀳𑀭𑁂𑀬𑁆𑀬, 𑀓𑀺𑀁 𑀲𑁄 𑀤𑀡𑁆𑀟𑀧𑁆𑀧𑀢𑁆𑀢𑁄 𑀪𑀯𑁂𑀬𑁆𑀬𑀸’’𑀢𑀺? ‘‘𑀆𑀫, 𑀪𑀦𑁆𑀢𑁂, 𑀤𑀡𑁆𑀟𑀧𑁆𑀧𑀢𑁆𑀢𑁄 𑀪𑀯𑁂𑀬𑁆𑀬𑀸’’𑀢𑀺. ‘‘𑀦 𑀔𑁄 𑀲𑁄, 𑀫𑀳𑀸𑀭𑀸𑀚, 𑀢𑀸𑀦𑀺 𑀅𑀫𑁆𑀩𑀸𑀦𑀺 𑀅𑀯𑀳𑀭𑀺, 𑀬𑀸𑀦𑀺 𑀢𑁂𑀦 𑀭𑁄𑀧𑀺𑀢𑀸𑀦𑀺, 𑀓𑀲𑁆𑀫𑀸 𑀤𑀡𑁆𑀟𑀧𑁆𑀧𑀢𑁆𑀢𑁄 𑀪𑀯𑁂𑀬𑁆𑀬𑀸’’𑀢𑀺? ‘‘𑀢𑀸𑀦𑀺, 𑀪𑀦𑁆𑀢𑁂, 𑀅𑀫𑁆𑀩𑀸𑀦𑀺 𑀦𑀺𑀲𑁆𑀲𑀸𑀬 𑀚𑀸𑀢𑀸𑀦𑀺, 𑀢𑀲𑁆𑀫𑀸 𑀤𑀡𑁆𑀟𑀧𑁆𑀧𑀢𑁆𑀢𑁄 𑀪𑀯𑁂𑀬𑁆𑀬𑀸’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀇𑀫𑀺𑀦𑀸 𑀦𑀸𑀫𑀭𑀽𑀧𑁂𑀦 𑀓𑀫𑁆𑀫𑀁 𑀓𑀭𑁄𑀢𑀺 𑀲𑁄𑀪𑀦𑀁 𑀯𑀸 𑀅𑀲𑁄𑀪𑀦𑀁 𑀯𑀸, 𑀢𑁂𑀦 𑀓𑀫𑁆𑀫𑁂𑀦 𑀅𑀜𑁆𑀜𑀁 𑀦𑀸𑀫𑀭𑀽𑀧𑀁 𑀧𑀝𑀺𑀲𑀦𑁆𑀤𑀳𑀢𑀺, 𑀢𑀲𑁆𑀫𑀸 𑀦 𑀧𑀭𑀺𑀫𑀼𑀢𑁆𑀢𑁄 𑀧𑀸𑀧𑀓𑁂𑀳𑀺 𑀓𑀫𑁆𑀫𑁂𑀳𑀻’’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀅𑀜𑁆𑀜𑀓𑀸𑀬𑀲𑀗𑁆𑀓𑀫𑀦𑀧𑀜𑁆𑀳𑁄 𑀲𑀢𑁆𑀢𑀫𑁄.