𑁮. 𑀓𑀫𑁆𑀫𑀨𑀮𑀅𑀢𑁆𑀣𑀺𑀪𑀸𑀯𑀧𑀜𑁆𑀳𑁄

𑁮. 𑀭𑀸𑀚𑀸 𑀆𑀳 ‘‘𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀇𑀫𑀺𑀦𑀸 𑀦𑀸𑀫𑀭𑀽𑀧𑁂𑀦 𑀓𑀫𑁆𑀫𑀁 𑀓𑀢𑀁 𑀓𑀼𑀲𑀮𑀁 𑀯𑀸 𑀅𑀓𑀼𑀲𑀮𑀁 𑀯𑀸, 𑀓𑀼𑀳𑀺𑀁 𑀢𑀸𑀦𑀺 𑀓𑀫𑁆𑀫𑀸𑀦𑀺 𑀢𑀺𑀝𑁆𑀞𑀦𑁆𑀢𑀻’’𑀢𑀺? ‘‘𑀅𑀦𑀼𑀩𑀦𑁆𑀥𑁂𑀬𑁆𑀬𑀼𑀁 𑀔𑁄, 𑀫𑀳𑀸𑀭𑀸𑀚, 𑀢𑀸𑀦𑀺 𑀓𑀫𑁆𑀫𑀸𑀦𑀺 𑀙𑀸𑀬𑀸𑀯 𑀅𑀦𑀧𑀸𑀬𑀺𑀦𑀻’’𑀢𑀺 [𑀅𑀦𑀼𑀧𑀸𑀬𑀺𑀦𑀻𑀢𑀺 (𑀓.)]. ‘‘𑀲𑀓𑁆𑀓𑀸 𑀧𑀦, 𑀪𑀦𑁆𑀢𑁂, 𑀢𑀸𑀦𑀺 𑀓𑀫𑁆𑀫𑀸𑀦𑀺 𑀤𑀲𑁆𑀲𑁂𑀢𑀼𑀁 ‘𑀇𑀥 𑀯𑀸 𑀇𑀥 𑀯𑀸 𑀢𑀸𑀦𑀺 𑀓𑀫𑁆𑀫𑀸𑀦𑀺 𑀢𑀺𑀝𑁆𑀞𑀦𑁆𑀢𑀻’’’𑀢𑀺? ‘‘𑀦 𑀲𑀓𑁆𑀓𑀸, 𑀫𑀳𑀸𑀭𑀸𑀚, 𑀢𑀸𑀦𑀺 𑀓𑀫𑁆𑀫𑀸𑀦𑀺 𑀤𑀲𑁆𑀲𑁂𑀢𑀼𑀁 ‘𑀇𑀥 𑀯𑀸 𑀇𑀥 𑀯𑀸 𑀢𑀸𑀦𑀺 𑀓𑀫𑁆𑀫𑀸𑀦𑀺 𑀢𑀺𑀝𑁆𑀞𑀦𑁆𑀢𑀻’’’𑀢𑀺.

‘‘𑀑𑀧𑀫𑁆𑀫𑀁 𑀓𑀭𑁄𑀳𑀻’’𑀢𑀺. ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀫𑀳𑀸𑀭𑀸𑀚, 𑀬𑀸𑀦𑀺𑀫𑀸𑀦𑀺 𑀭𑀼𑀓𑁆𑀔𑀸𑀦𑀺 𑀅𑀦𑀺𑀩𑁆𑀩𑀢𑁆𑀢𑀨𑀮𑀸𑀦𑀺, 𑀲𑀓𑁆𑀓𑀸 𑀢𑁂𑀲𑀁 𑀨𑀮𑀸𑀦𑀺 𑀤𑀲𑁆𑀲𑁂𑀢𑀼𑀁 ‘𑀇𑀥 𑀯𑀸 𑀇𑀥 𑀯𑀸 𑀢𑀸𑀦𑀺 𑀨𑀮𑀸𑀦𑀺 𑀢𑀺𑀝𑁆𑀞𑀦𑁆𑀢𑀻’’’𑀢𑀺. ‘‘𑀦 𑀳𑀺, 𑀪𑀦𑁆𑀢𑁂’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑀸𑀬 𑀲𑀦𑁆𑀢𑀢𑀺𑀬𑀸 𑀦 𑀲𑀓𑁆𑀓𑀸 𑀢𑀸𑀦𑀺 𑀓𑀫𑁆𑀫𑀸𑀦𑀺 𑀤𑀲𑁆𑀲𑁂𑀢𑀼𑀁 ‘𑀇𑀥 𑀯𑀸 𑀇𑀥 𑀯𑀸 𑀢𑀸𑀦𑀺 𑀓𑀫𑁆𑀫𑀸𑀦𑀺 𑀢𑀺𑀝𑁆𑀞𑀦𑁆𑀢𑀻’𑀢𑀺.

‘‘𑀓𑀮𑁆𑀮𑁄𑀲𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦𑀸’’𑀢𑀺.

𑀓𑀫𑁆𑀫𑀨𑀮𑀅𑀢𑁆𑀣𑀺𑀪𑀸𑀯𑀧𑀜𑁆𑀳𑁄 𑀅𑀝𑁆𑀞𑀫𑁄.