𑁫𑁩𑁦. 𑀲𑀁𑀓𑀺𑀘𑁆𑀘𑀚𑀸𑀢𑀓𑀁 (𑁨)

𑁬𑁯. ‘‘𑀤𑀺𑀲𑁆𑀯𑀸 𑀦𑀺𑀲𑀺𑀦𑁆𑀦𑀁 𑀭𑀸𑀚𑀸𑀦𑀁, 𑀩𑁆𑀭𑀳𑁆𑀫𑀤𑀢𑁆𑀢𑀁 𑀭𑀣𑁂𑀲𑀪𑀁;

𑀅𑀣𑀲𑁆𑀲 𑀧𑀝𑀺𑀯𑁂𑀤𑁂𑀲𑀺, 𑀬𑀲𑁆𑀲𑀸𑀲𑀺 𑀅𑀦𑀼𑀓𑀫𑁆𑀧𑀓𑁄.

𑁭𑁦. ‘‘𑀲𑀁𑀓𑀺𑀘𑁆𑀘𑀸𑀬𑀁 𑀅𑀦𑀼𑀧𑁆𑀧𑀢𑁆𑀢𑁄, 𑀇𑀲𑀻𑀦𑀁 𑀲𑀸𑀥𑀼𑀲𑀫𑁆𑀫𑀢𑁄;

𑀢𑀭𑀫𑀸𑀦𑀭𑀽𑀧𑁄 𑀦𑀺𑀬𑁆𑀬𑀸𑀳𑀺, 𑀔𑀺𑀧𑁆𑀧𑀁 𑀧𑀲𑁆𑀲 𑀫𑀳𑁂𑀲𑀺𑀦𑀁.

𑁭𑁧. ‘‘𑀢𑀢𑁄 𑀘 𑀭𑀸𑀚𑀸 𑀢𑀭𑀫𑀸𑀦𑁄, 𑀬𑀼𑀢𑁆𑀢𑀫𑀸𑀭𑀼𑀬𑁆𑀳 𑀲𑀦𑁆𑀤𑀦𑀁;

𑀫𑀺𑀢𑁆𑀢𑀸𑀫𑀘𑁆𑀘𑀧𑀭𑀺𑀩𑁆𑀬𑀽𑀴𑁆𑀳𑁄 [𑀧𑀭𑀺𑀩𑁆𑀩𑀽𑀴𑁆𑀳𑁄 (𑀲𑀻. 𑀧𑀻.)], 𑀅𑀕𑀫𑀸𑀲𑀺 𑀭𑀣𑁂𑀲𑀪𑁄.

𑁭𑁨. ‘‘𑀦𑀺𑀓𑁆𑀔𑀺𑀧𑁆𑀧 𑀧𑀜𑁆𑀘 𑀓𑀓𑀼𑀥𑀸𑀦𑀺, 𑀓𑀸𑀲𑀻𑀦𑀁 𑀭𑀝𑁆𑀞𑀯𑀟𑁆𑀠𑀦𑁄;

𑀯𑀸𑀴𑀩𑀻𑀚𑀦𑀺 [𑀯𑀸 𑀴𑀯𑀻𑀚𑀦𑀻 (𑀲𑀻. 𑀧𑀻.)] 𑀫𑀼𑀡𑁆𑀳𑀻𑀲𑀁, 𑀔𑀕𑁆𑀕𑀁 𑀙𑀢𑁆𑀢𑀜𑁆𑀘𑀼𑀧𑀸𑀳𑀦𑀁;

𑁭𑁩. ‘‘𑀑𑀭𑀼𑀬𑁆𑀳 𑀭𑀸𑀚𑀸 𑀬𑀸𑀦𑀫𑁆𑀳𑀸, 𑀞𑀧𑀬𑀺𑀢𑁆𑀯𑀸 𑀧𑀝𑀺𑀘𑁆𑀙𑀤𑀁;

𑀆𑀲𑀻𑀦𑀁 𑀤𑀸𑀬𑀧𑀲𑁆𑀲𑀲𑁆𑀫𑀺𑀁, 𑀲𑀁𑀓𑀺𑀘𑁆𑀘𑀫𑀼𑀧𑀲𑀗𑁆𑀓𑀫𑀺.

𑁭𑁪. ‘‘𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑁄 𑀭𑀸𑀚𑀸, 𑀲𑀫𑁆𑀫𑁄𑀤𑀺 𑀇𑀲𑀺𑀦𑀸 𑀲𑀳;

𑀢𑀁 𑀓𑀣𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸, 𑀏𑀓𑀫𑀦𑁆𑀢𑀁 𑀉𑀧𑀸𑀯𑀺𑀲𑀺.

𑁭𑁫. ‘‘𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄𑀯, 𑀅𑀣 𑀓𑀸𑀮𑀁 𑀅𑀫𑀜𑁆𑀜𑀣;

𑀢𑀢𑁄 𑀧𑀸𑀧𑀸𑀦𑀺 𑀓𑀫𑁆𑀫𑀸𑀦𑀺, 𑀧𑀼𑀘𑁆𑀙𑀺𑀢𑀼𑀁 𑀧𑀝𑀺𑀧𑀚𑁆𑀚𑀣.

𑁭𑁬. ‘‘𑀇𑀲𑀺𑀁 𑀧𑀼𑀘𑁆𑀙𑀸𑀫 [𑀧𑀼𑀘𑁆𑀙𑀸𑀫𑀺 (𑀲𑀻. 𑀧𑀻.)] 𑀲𑀁𑀓𑀺𑀘𑁆𑀘𑀁, 𑀇𑀲𑀻𑀦𑀁 𑀲𑀸𑀥𑀼𑀲𑀫𑁆𑀫𑀢𑀁;

𑀆𑀲𑀻𑀦𑀁 𑀤𑀸𑀬𑀧𑀲𑁆𑀲𑀲𑁆𑀫𑀺𑀁, 𑀇𑀲𑀺𑀲𑀗𑁆𑀖𑀧𑀼𑀭𑀓𑁆𑀔𑀢𑀁 [𑀧𑀼𑀭𑀓𑁆𑀔𑀺𑀢𑀁 (𑀓.)].

𑁭𑁭. ‘‘𑀓𑀁 𑀕𑀢𑀺𑀁 𑀧𑁂𑀘𑁆𑀘 𑀕𑀘𑁆𑀙𑀦𑁆𑀢𑀺, 𑀦𑀭𑀸 𑀥𑀫𑁆𑀫𑀸𑀢𑀺𑀘𑀸𑀭𑀺𑀦𑁄;

𑀅𑀢𑀺𑀘𑀺𑀡𑁆𑀡𑁄 𑀫𑀬𑀸 𑀥𑀫𑁆𑀫𑁄, 𑀢𑀁 𑀫𑁂 𑀅𑀓𑁆𑀔𑀸𑀳𑀺 𑀧𑀼𑀘𑁆𑀙𑀺𑀢𑁄.

𑁭𑁮. ‘‘𑀇𑀲𑀻 𑀅𑀯𑀘 𑀲𑀁𑀓𑀺𑀘𑁆𑀘𑁄, 𑀓𑀸𑀲𑀻𑀦𑀁 𑀭𑀝𑁆𑀞𑀯𑀟𑁆𑀠𑀦𑀁;

𑀆𑀲𑀻𑀦𑀁 𑀤𑀸𑀬𑀧𑀲𑁆𑀲𑀲𑁆𑀫𑀺𑀁, 𑀫𑀳𑀸𑀭𑀸𑀚 𑀲𑀼𑀡𑁄𑀳𑀺 𑀫𑁂.

𑁭𑁯. ‘‘𑀉𑀧𑁆𑀧𑀣𑁂𑀦 𑀯𑀚𑀦𑁆𑀢𑀲𑁆𑀲, 𑀬𑁄 𑀫𑀕𑁆𑀕𑀫𑀦𑀼𑀲𑀸𑀲𑀢𑀺;

𑀢𑀲𑁆𑀲 𑀘𑁂 𑀯𑀘𑀦𑀁 𑀓𑀬𑀺𑀭𑀸, 𑀦𑀸𑀲𑁆𑀲 𑀫𑀕𑁆𑀕𑁂𑀬𑁆𑀬 𑀓𑀡𑁆𑀝𑀓𑁄.

𑁮𑁦. ‘‘𑀅𑀥𑀫𑁆𑀫𑀁 𑀧𑀝𑀺𑀧𑀦𑁆𑀦𑀲𑁆𑀲, 𑀬𑁄 𑀥𑀫𑁆𑀫𑀫𑀦𑀼𑀲𑀸𑀲𑀢𑀺;

𑀢𑀲𑁆𑀲 𑀘𑁂 𑀯𑀘𑀦𑀁 𑀓𑀬𑀺𑀭𑀸, 𑀦 𑀲𑁄 𑀕𑀘𑁆𑀙𑁂𑀬𑁆𑀬 𑀤𑀼𑀕𑁆𑀕𑀢𑀺𑀁.

𑁮𑁧. ‘‘𑀥𑀫𑁆𑀫𑁄 𑀧𑀣𑁄 𑀫𑀳𑀸𑀭𑀸𑀚, 𑀅𑀥𑀫𑁆𑀫𑁄 𑀧𑀦 𑀉𑀧𑁆𑀧𑀣𑁄;

𑀅𑀥𑀫𑁆𑀫𑁄 𑀦𑀺𑀭𑀬𑀁 𑀦𑁂𑀢𑀺, 𑀥𑀫𑁆𑀫𑁄 𑀧𑀸𑀧𑁂𑀢𑀺 𑀲𑀼𑀕𑁆𑀕𑀢𑀺𑀁.

𑁮𑁨. ‘‘𑀅𑀥𑀫𑁆𑀫𑀘𑀸𑀭𑀺𑀦𑁄 𑀭𑀸𑀚, 𑀦𑀭𑀸 𑀯𑀺𑀲𑀫𑀚𑀻𑀯𑀺𑀦𑁄;

𑀬𑀁 𑀕𑀢𑀺𑀁 𑀧𑁂𑀘𑁆𑀘 𑀕𑀘𑁆𑀙𑀦𑁆𑀢𑀺, 𑀦𑀺𑀭𑀬𑁂 𑀢𑁂 𑀲𑀼𑀡𑁄𑀳𑀺 𑀫𑁂.

𑁮𑁩. ‘‘𑀲𑀜𑁆𑀚𑀻𑀯𑁄 𑀓𑀸𑀴𑀲𑀼𑀢𑁆𑀢𑁄 𑀘, 𑀲𑀗𑁆𑀖𑀸𑀢𑁄 [𑀲𑀗𑁆𑀔𑀸𑀝𑁄 (𑀲𑁆𑀬𑀸. 𑀓.)] 𑀤𑁆𑀯𑁂 𑀘 𑀭𑁄𑀭𑀼𑀯𑀸;

𑀅𑀣𑀸𑀧𑀭𑁄 𑀫𑀳𑀸𑀯𑀻𑀘𑀺, 𑀢𑀸𑀧𑀦𑁄 [𑀢𑀧𑀦𑁄 (𑀲𑀻. 𑀧𑀻.)] 𑀘 𑀧𑀢𑀸𑀧𑀦𑁄.

𑁮𑁪. ‘‘𑀇𑀘𑁆𑀘𑁂𑀢𑁂 𑀅𑀝𑁆𑀞 𑀦𑀺𑀭𑀬𑀸, 𑀅𑀓𑁆𑀔𑀸𑀢𑀸 𑀤𑀼𑀭𑀢𑀺𑀓𑁆𑀓𑀫𑀸;

𑀆𑀓𑀺𑀡𑁆𑀡𑀸 𑀮𑀼𑀤𑁆𑀤𑀓𑀫𑁆𑀫𑁂𑀳𑀺, 𑀧𑀘𑁆𑀘𑁂𑀓𑀸 𑀲𑁄𑀴𑀲𑀼𑀲𑁆𑀲𑀤𑀸.

𑁮𑁫. ‘‘𑀓𑀤𑀭𑀺𑀬𑀢𑀸𑀧𑀦𑀸 [𑀓𑀤𑀭𑀺𑀬𑀢𑀧𑀦𑀸 (𑀲𑀻. 𑀧𑀻.)] 𑀖𑁄𑀭𑀸, 𑀅𑀘𑁆𑀘𑀺𑀫𑀦𑁆𑀢𑁄 [𑀅𑀘𑁆𑀘𑀺𑀫𑀦𑁆𑀢𑀸 (𑀧𑀻.)] 𑀫𑀳𑀩𑁆𑀪𑀬𑀸;

𑀮𑁄𑀫𑀳𑀁𑀲𑀦𑀭𑀽𑀧𑀸 𑀘, 𑀪𑁂𑀲𑁆𑀫𑀸 𑀧𑀝𑀺𑀪𑀬𑀸 𑀤𑀼𑀔𑀸.

𑁮𑁬. ‘‘𑀘𑀢𑀼𑀓𑁆𑀓𑀡𑁆𑀡𑀸 𑀘𑀢𑀼𑀤𑁆𑀯𑀸𑀭𑀸, 𑀯𑀺𑀪𑀢𑁆𑀢𑀸 𑀪𑀸𑀕𑀲𑁄 𑀫𑀺𑀢𑀸;

𑀅𑀬𑁄𑀧𑀸𑀓𑀸𑀭𑀧𑀭𑀺𑀬𑀦𑁆𑀢𑀸, 𑀅𑀬𑀲𑀸 𑀧𑀝𑀺𑀓𑀼𑀚𑁆𑀚𑀺𑀢𑀸.

𑁮𑁭. ‘‘𑀢𑁂𑀲𑀁 𑀅𑀬𑁄𑀫𑀬𑀸 𑀪𑀽𑀫𑀺, 𑀚𑀮𑀺𑀢𑀸 𑀢𑁂𑀚𑀲𑀸 𑀬𑀼𑀢𑀸;

𑀲𑀫𑀦𑁆𑀢𑀸 𑀬𑁄𑀚𑀦𑀲𑀢𑀁, 𑀨𑀼𑀝𑀸 [𑀨𑀭𑀺𑀢𑁆𑀯𑀸 (𑀅. 𑀦𑀺. 𑁩.𑁩𑁬; 𑀧𑁂. 𑀯. 𑁭𑁧)] 𑀢𑀺𑀝𑁆𑀞𑀦𑁆𑀢𑀺 𑀲𑀩𑁆𑀩𑀤𑀸.

𑁮𑁮. ‘‘𑀏𑀢𑁂 𑀧𑀢𑀦𑁆𑀢𑀺 𑀦𑀺𑀭𑀬𑁂, 𑀉𑀤𑁆𑀥𑀁𑀧𑀸𑀤𑀸 𑀅𑀯𑀁𑀲𑀺𑀭𑀸;

𑀇𑀲𑀻𑀦𑀁 𑀅𑀢𑀺𑀯𑀢𑁆𑀢𑀸𑀭𑁄, 𑀲𑀜𑁆𑀜𑀢𑀸𑀦𑀁 𑀢𑀧𑀲𑁆𑀲𑀺𑀦𑀁.

𑁮𑁯. ‘‘𑀢𑁂 𑀪𑀽𑀦𑀳𑀼𑀦𑁄 𑀧𑀘𑁆𑀘𑀦𑁆𑀢𑀺, 𑀫𑀘𑁆𑀙𑀸 𑀩𑀺𑀮𑀓𑀢𑀸 𑀬𑀣𑀸;

𑀲𑀁𑀯𑀘𑁆𑀙𑀭𑁂 𑀅𑀲𑀗𑁆𑀔𑁂𑀬𑁆𑀬𑁂, 𑀦𑀭𑀸 𑀓𑀺𑀩𑁆𑀩𑀺𑀲𑀓𑀸𑀭𑀺𑀦𑁄.

𑁯𑁦. ‘‘𑀟𑀬𑁆𑀳𑀫𑀸𑀦𑁂𑀦 𑀕𑀢𑁆𑀢𑁂𑀦, 𑀦𑀺𑀘𑁆𑀘𑀁 𑀲𑀦𑁆𑀢𑀭𑀩𑀸𑀳𑀺𑀭𑀁;

𑀦𑀺𑀭𑀬𑀸 𑀦𑀸𑀥𑀺𑀕𑀘𑁆𑀙𑀦𑁆𑀢𑀺, 𑀤𑁆𑀯𑀸𑀭𑀁 𑀦𑀺𑀓𑁆𑀔𑀫𑀦𑁂𑀲𑀺𑀦𑁄.

𑁯𑁧. ‘‘𑀧𑀼𑀭𑀢𑁆𑀣𑀺𑀫𑁂𑀦 𑀥𑀸𑀯𑀦𑁆𑀢𑀺, 𑀢𑀢𑁄 𑀥𑀸𑀯𑀦𑁆𑀢𑀺 𑀧𑀘𑁆𑀙𑀢𑁄;

𑀉𑀢𑁆𑀢𑀭𑁂𑀦𑀧𑀺 𑀥𑀸𑀯𑀦𑁆𑀢𑀺, 𑀢𑀢𑁄 𑀥𑀸𑀯𑀦𑁆𑀢𑀺 𑀤𑀓𑁆𑀔𑀺𑀡𑀁;

𑀬𑀁 𑀬𑀜𑁆𑀳𑀺 𑀤𑁆𑀯𑀸𑀭𑀁 𑀕𑀘𑁆𑀙𑀦𑁆𑀢𑀺, 𑀢𑀁 𑀢𑀤𑁂𑀯 𑀧𑀺𑀥𑀻𑀬𑀭𑁂 [𑀧𑀺𑀣𑀺𑀬𑁆𑀬𑀢𑀺 (𑀲𑀻.), 𑀧𑀺𑀣𑀺𑀬𑁆𑀬𑀭𑁂 (𑀲𑁆𑀬𑀸.), 𑀧𑀺𑀣𑀻𑀬𑀭𑁂 (𑀧𑀻.)].

𑁯𑁨. ‘‘𑀩𑀳𑀽𑀦𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀚𑀦𑀸 𑀦𑀺𑀭𑀬𑀕𑀸𑀫𑀺𑀦𑁄;

𑀩𑀸𑀳𑀸 𑀧𑀕𑁆𑀕𑀬𑁆𑀳 𑀓𑀦𑁆𑀤𑀦𑁆𑀢𑀺, 𑀧𑀢𑁆𑀯𑀸 𑀤𑀼𑀓𑁆𑀔𑀁 𑀅𑀦𑀧𑁆𑀧𑀓𑀁.

𑁯𑁩. ‘‘𑀆𑀲𑀻𑀯𑀺𑀲𑀁𑀯 𑀓𑀼𑀧𑀺𑀢𑀁, 𑀢𑁂𑀚𑀲𑁆𑀲𑀺𑀁 𑀤𑀼𑀭𑀢𑀺𑀓𑁆𑀓𑀫𑀁;

𑀦 𑀲𑀸𑀥𑀼𑀭𑀽𑀧𑁂 𑀆𑀲𑀻𑀤𑁂, 𑀲𑀜𑁆𑀜𑀢𑀸𑀦𑀁 𑀢𑀧𑀲𑁆𑀲𑀺𑀦𑀁.

𑁯𑁪. ‘‘𑀅𑀢𑀺𑀓𑀸𑀬𑁄 𑀫𑀳𑀺𑀲𑁆𑀲𑀸𑀲𑁄, 𑀅𑀚𑁆𑀚𑀼𑀦𑁄 𑀓𑁂𑀓𑀓𑀸𑀥𑀺𑀧𑁄;

𑀲𑀳𑀲𑁆𑀲𑀩𑀸𑀳𑀼 𑀉𑀘𑁆𑀙𑀺𑀦𑁆𑀦𑁄, 𑀇𑀲𑀺𑀫𑀸𑀲𑀚𑁆𑀚 𑀕𑁄𑀢𑀫𑀁.

𑁯𑁫. ‘‘𑀅𑀭𑀚𑀁 𑀭𑀚𑀲𑀸 𑀯𑀘𑁆𑀙𑀁, 𑀓𑀺𑀲𑀁 𑀅𑀯𑀓𑀺𑀭𑀺𑀬 𑀤𑀡𑁆𑀟𑀓𑀻;

𑀢𑀸𑀮𑁄𑀯 𑀫𑀽𑀮𑀢𑁄 [𑀲𑀫𑀽𑀮𑁄 (𑀓.)] 𑀙𑀺𑀦𑁆𑀦𑁄, 𑀲 𑀭𑀸𑀚𑀸 𑀯𑀺𑀪𑀯𑀗𑁆𑀕𑀢𑁄.

𑁯𑁬. ‘‘𑀉𑀧𑀳𑀘𑁆𑀘 𑀫𑀦𑀁 𑀫𑀚𑁆𑀛𑁄 [𑀫𑁂𑀚𑁆𑀛𑁄 (𑀓.)], 𑀫𑀸𑀢𑀗𑁆𑀕𑀲𑁆𑀫𑀺𑀁 𑀬𑀲𑀲𑁆𑀲𑀺𑀦𑁂;

𑀲𑀧𑀸𑀭𑀺𑀲𑀚𑁆𑀚𑁄 𑀉𑀘𑁆𑀙𑀺𑀦𑁆𑀦𑁄, 𑀫𑀚𑁆𑀛𑀸𑀭𑀜𑁆𑀜𑀁 𑀢𑀤𑀸 𑀅𑀳𑀼.

𑁯𑁭. ‘‘𑀓𑀡𑁆𑀳𑀤𑀻𑀧𑀸𑀬𑀦𑀸𑀲𑀚𑁆𑀚, 𑀇𑀲𑀺𑀁 𑀅𑀦𑁆𑀥𑀓𑀯𑁂𑀡𑁆𑀟𑀬𑁄 [𑀯𑁂𑀡𑁆𑀳𑀼𑀬𑁄 (𑀲𑀻. 𑀧𑀻.), 𑀧𑀺𑀡𑁆𑀳𑀬𑁄 (?)];

𑀅𑀜𑁆𑀜𑁄𑀜𑁆𑀜𑀁 [𑀅𑀜𑁆𑀜𑀫𑀜𑁆𑀜𑀁 (𑀲𑀻. 𑀧𑀻.)] 𑀫𑀼𑀲𑀮𑀸 [𑀫𑀼𑀲𑀮𑁂 (𑀲𑀻. 𑀲𑁆𑀬𑀸. 𑀧𑀻.)] 𑀳𑀦𑁆𑀢𑁆𑀯𑀸, 𑀲𑀫𑁆𑀧𑀢𑁆𑀢𑀸 𑀬𑀫𑀲𑀸𑀥𑀦𑀁 [𑀬𑀫𑀲𑀸𑀤𑀦𑀁 (𑀧𑀻.)].

𑁯𑁮. ‘‘𑀅𑀣𑀸𑀬𑀁 𑀇𑀲𑀺𑀦𑀸 𑀲𑀢𑁆𑀢𑁄, 𑀅𑀦𑁆𑀢𑀮𑀺𑀓𑁆𑀔𑀘𑀭𑁄 𑀧𑀼𑀭𑁂;

𑀧𑀸𑀯𑁂𑀓𑁆𑀔𑀺 𑀧𑀣𑀯𑀺𑀁 [𑀧𑀞𑀯𑀺𑀁 (𑀲𑀻. 𑀲𑁆𑀬𑀸. 𑀧𑀻.)] 𑀘𑁂𑀘𑁆𑀘𑁄, 𑀳𑀻𑀦𑀢𑁆𑀢𑁄 𑀧𑀢𑁆𑀢𑀧𑀭𑀺𑀬𑀸𑀬𑀁.

𑁯𑁯. ‘‘𑀢𑀲𑁆𑀫𑀸 𑀳𑀺 𑀙𑀦𑁆𑀤𑀸𑀕𑀫𑀦𑀁, 𑀦𑀧𑁆𑀧𑀲𑀁𑀲𑀦𑁆𑀢𑀺 𑀧𑀡𑁆𑀟𑀺𑀢𑀸;

𑀅𑀤𑀼𑀝𑁆𑀞𑀘𑀺𑀢𑁆𑀢𑁄 𑀪𑀸𑀲𑁂𑀬𑁆𑀬, 𑀕𑀺𑀭𑀁 𑀲𑀘𑁆𑀘𑀽𑀧𑀲𑀁𑀳𑀺𑀢𑀁.

𑁧𑁦𑁦. ‘‘𑀫𑀦𑀲𑀸 𑀘𑁂 𑀧𑀤𑀼𑀝𑁆𑀞𑁂𑀦, 𑀬𑁄 𑀦𑀭𑁄 𑀧𑁂𑀓𑁆𑀔𑀢𑁂 𑀫𑀼𑀦𑀺𑀁;

𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑀁, 𑀕𑀦𑁆𑀢𑀸 𑀲𑁄 𑀦𑀺𑀭𑀬𑀁 𑀅𑀥𑁄.

𑁧𑁦𑁧. ‘‘𑀬𑁂 𑀯𑀼𑀟𑁆𑀠𑁂 [𑀯𑀤𑁆𑀥𑁂 (𑀓.)] 𑀧𑀭𑀺𑀪𑀸𑀲𑀦𑁆𑀢𑀺, 𑀨𑀭𑀼𑀲𑀽𑀧𑀓𑁆𑀓𑀫𑀸 𑀚𑀦𑀸;

𑀅𑀦𑀧𑀘𑁆𑀘𑀸 𑀅𑀤𑀸𑀬𑀸𑀤𑀸, 𑀢𑀸𑀮𑀯𑀢𑁆𑀣𑀼 [𑀢𑀸𑀮𑀯𑀢𑁆𑀣𑀽 (𑀲𑁆𑀬𑀸.), 𑀢𑀸𑀮𑀸𑀯𑀢𑁆𑀣𑀼 (𑀧𑀻.)] 𑀪𑀯𑀦𑁆𑀢𑀺 𑀢𑁂.

𑁧𑁦𑁨. ‘‘𑀬𑁄 𑀘 𑀧𑀩𑁆𑀩𑀚𑀺𑀢𑀁 𑀳𑀦𑁆𑀢𑀺, 𑀓𑀢𑀓𑀺𑀘𑁆𑀘𑀁 𑀫𑀳𑁂𑀲𑀺𑀦𑀁;

𑀲 𑀓𑀸𑀴𑀲𑀼𑀢𑁆𑀢𑁂 𑀦𑀺𑀭𑀬𑁂, 𑀘𑀺𑀭𑀭𑀢𑁆𑀢𑀸𑀬 𑀧𑀘𑁆𑀘𑀢𑀺.

𑁧𑁦𑁩. ‘‘𑀬𑁄 𑀘 𑀭𑀸𑀚𑀸 𑀅𑀥𑀫𑁆𑀫𑀝𑁆𑀞𑁄, 𑀭𑀝𑁆𑀞𑀯𑀺𑀤𑁆𑀥𑀁𑀲𑀦𑁄 𑀫𑀕𑁄 [𑀘𑀼𑀢𑁄 (𑀲𑀻.)];

𑀢𑀸𑀧𑀬𑀺𑀢𑁆𑀯𑀸 𑀚𑀦𑀧𑀤𑀁, 𑀢𑀸𑀧𑀦𑁂 𑀧𑁂𑀘𑁆𑀘 𑀧𑀘𑁆𑀘𑀢𑀺.

𑁧𑁦𑁪. ‘‘𑀲𑁄 𑀘 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 [𑀯𑀲𑁆𑀲𑀲𑀳𑀲𑁆𑀲𑀸𑀦𑀁 (𑀲𑀻. 𑀲𑁆𑀬𑀸.)], 𑀲𑀢𑀁 𑀤𑀺𑀩𑁆𑀩𑀸𑀦𑀺 𑀧𑀘𑁆𑀘𑀢𑀺;

𑀅𑀘𑁆𑀘𑀺𑀲𑀗𑁆𑀖𑀧𑀭𑁂𑀢𑁄 𑀲𑁄, 𑀤𑀼𑀓𑁆𑀔𑀁 𑀯𑁂𑀤𑁂𑀢𑀺 𑀯𑁂𑀤𑀦𑀁.

𑁧𑁦𑁫. ‘‘𑀢𑀲𑁆𑀲 𑀅𑀕𑁆𑀕𑀺𑀲𑀺𑀔𑀸 𑀓𑀸𑀬𑀸, 𑀦𑀺𑀘𑁆𑀙𑀭𑀦𑁆𑀢𑀺 𑀧𑀪𑀲𑁆𑀲𑀭𑀸;

𑀢𑁂𑀚𑁄𑀪𑀓𑁆𑀔𑀲𑁆𑀲 𑀕𑀢𑁆𑀢𑀸𑀦𑀺, 𑀮𑁄𑀫𑁂𑀳𑀺 𑀘 [𑀮𑁄𑀫𑀕𑁆𑀕𑁂𑀳𑀺 𑀘 (𑀲𑀻. 𑀲𑁆𑀬𑀸. 𑀧𑀻.)] 𑀦𑀔𑁂𑀳𑀺 𑀘.

𑁧𑁦𑁬. ‘‘𑀟𑀬𑁆𑀳𑀫𑀸𑀦𑁂𑀦 𑀕𑀢𑁆𑀢𑁂𑀦, 𑀦𑀺𑀘𑁆𑀘𑀁 𑀲𑀦𑁆𑀢𑀭𑀩𑀸𑀳𑀺𑀭𑀁;

𑀤𑀼𑀓𑁆𑀔𑀸𑀪𑀺𑀢𑀼𑀦𑁆𑀦𑁄 𑀦𑀤𑀢𑀺, 𑀦𑀸𑀕𑁄 𑀢𑀼𑀢𑁆𑀢𑀝𑁆𑀝𑀺𑀢𑁄 [𑀢𑀼𑀢𑁆𑀢𑀤𑁆𑀤𑀺𑀢𑁄 (𑀲𑀻.)] 𑀬𑀣𑀸.

𑁧𑁦𑁭. ‘‘𑀬𑁄 𑀮𑁄𑀪𑀸 𑀧𑀺𑀢𑀭𑀁 𑀳𑀦𑁆𑀢𑀺, 𑀤𑁄𑀲𑀸 𑀯𑀸 𑀧𑀼𑀭𑀺𑀲𑀸𑀥𑀫𑁄;

𑀲 𑀓𑀸𑀴𑀲𑀼𑀢𑁆𑀢𑁂 𑀦𑀺𑀭𑀬𑁂, 𑀘𑀺𑀭𑀭𑀢𑁆𑀢𑀸𑀬 𑀧𑀘𑁆𑀘𑀢𑀺.

𑁧𑁦𑁮. ‘‘𑀲 𑀢𑀸𑀤𑀺𑀲𑁄 𑀧𑀘𑁆𑀘𑀢𑀺 𑀮𑁄𑀳𑀓𑀼𑀫𑁆𑀪𑀺𑀬𑀁, 𑀧𑀓𑁆𑀓𑀜𑁆𑀘 𑀲𑀢𑁆𑀢𑀻𑀳𑀺 𑀳𑀦𑀦𑁆𑀢𑀺 𑀦𑀺𑀢𑁆𑀢𑀘𑀁;

𑀅𑀦𑁆𑀥𑀁 𑀓𑀭𑀺𑀢𑁆𑀯𑀸 𑀫𑀼𑀢𑁆𑀢𑀓𑀭𑀻𑀲𑀪𑀓𑁆𑀔𑀁, 𑀔𑀸𑀭𑁂 𑀦𑀺𑀫𑀼𑀚𑁆𑀚𑀦𑁆𑀢𑀺 𑀢𑀣𑀸𑀯𑀺𑀥𑀁 𑀦𑀭𑀁.

𑁧𑁦𑁯. ‘‘𑀢𑀢𑁆𑀢𑀁 𑀧𑀓𑁆𑀓𑀼𑀣𑀺𑀢𑀫𑀬𑁄𑀕𑀼𑀴𑀜𑁆𑀘 [𑀧𑀓𑁆𑀓𑀼𑀥𑀺𑀢𑀫𑀬𑁄𑀕𑀼𑀴𑀜𑁆𑀘 (𑀓.)], 𑀤𑀻𑀖𑁂 𑀘 𑀨𑀸𑀮𑁂 𑀘𑀺𑀭𑀭𑀢𑁆𑀢𑀢𑀸𑀧𑀺𑀢𑁂;

𑀯𑀺𑀓𑁆𑀔𑀫𑁆𑀪𑀫𑀸𑀤𑀸𑀬 𑀯𑀺𑀩𑀦𑁆𑀥 [𑀯𑀺𑀩𑀤𑁆𑀥 (𑀲𑀻.), 𑀯𑀺𑀪𑀚𑁆𑀚 (𑀲𑁆𑀬𑀸. 𑀧𑀻.)] 𑀭𑀚𑁆𑀚𑀼𑀪𑀺, 𑀯𑀺𑀯𑀝𑁂 𑀫𑀼𑀔𑁂 𑀲𑀫𑁆𑀧𑀯𑀺𑀲𑀦𑁆𑀢𑀺 [𑀲𑀁𑀘𑀯𑀦𑁆𑀢𑀺 (𑀲𑀻. 𑀲𑁆𑀬𑀸. 𑀧𑀻.)] 𑀭𑀓𑁆𑀔𑀲𑀸.

𑁧𑁧𑁦. ‘‘𑀲𑀸𑀫𑀸 𑀘 𑀲𑁄𑀡𑀸 𑀲𑀩𑀮𑀸 𑀘 𑀕𑀺𑀚𑁆𑀛𑀸, 𑀓𑀸𑀓𑁄𑀴𑀲𑀗𑁆𑀖𑀸 𑀘 𑀤𑀺𑀚𑀸 𑀅𑀬𑁄𑀫𑀼𑀔𑀸;

𑀲𑀗𑁆𑀕𑀫𑁆𑀫 𑀔𑀸𑀤𑀦𑁆𑀢𑀺 𑀯𑀺𑀧𑁆𑀨𑀦𑁆𑀤𑀫𑀸𑀦𑀁, 𑀚𑀺𑀯𑁆𑀳𑀁 𑀯𑀺𑀪𑀚𑁆𑀚 𑀯𑀺𑀖𑀸𑀲𑀁 𑀲𑀮𑁄𑀳𑀺𑀢𑀁.

𑁧𑁧𑁧. ‘‘𑀢𑀁 𑀤𑀟𑁆𑀠𑀢𑀸𑀮𑀁 𑀧𑀭𑀺𑀪𑀺𑀦𑁆𑀦𑀕𑀢𑁆𑀢𑀁, 𑀦𑀺𑀧𑁆𑀧𑁄𑀣𑀬𑀦𑁆𑀢𑀸 𑀅𑀦𑀼𑀯𑀺𑀘𑀭𑀦𑁆𑀢𑀺 𑀭𑀓𑁆𑀔𑀲𑀸;

𑀭𑀢𑀻 𑀳𑀺 𑀦𑁂𑀲𑀁 𑀤𑀼𑀔𑀺𑀦𑁄 𑀧𑀦𑀻𑀢𑀭𑁂, 𑀏𑀢𑀸𑀤𑀺𑀲𑀲𑁆𑀫𑀺𑀁 𑀦𑀺𑀭𑀬𑁂 𑀯𑀲𑀦𑁆𑀢𑀺;

𑀬𑁂 𑀓𑁂𑀘𑀺 𑀮𑁄𑀓𑁂 𑀇𑀥 𑀧𑁂𑀢𑁆𑀢𑀺𑀖𑀸𑀢𑀺𑀦𑁄.

𑁧𑁧𑁨. ‘‘𑀧𑀼𑀢𑁆𑀢𑁄 𑀘 𑀫𑀸𑀢𑀭𑀁 𑀳𑀦𑁆𑀢𑁆𑀯𑀸, 𑀇𑀢𑁄 𑀕𑀦𑁆𑀢𑁆𑀯𑀸 𑀬𑀫𑀓𑁆𑀔𑀬𑀁;

𑀪𑀼𑀲𑀫𑀸𑀧𑀚𑁆𑀚𑀢𑁂 𑀤𑀼𑀓𑁆𑀔𑀁, 𑀅𑀢𑁆𑀢𑀓𑀫𑁆𑀫𑀨𑀮𑀽𑀧𑀕𑁄.

𑁧𑁧𑁩. ‘‘𑀅𑀫𑀦𑀼𑀲𑁆𑀲𑀸 𑀅𑀢𑀺𑀩𑀮𑀸, 𑀳𑀦𑁆𑀢𑀸𑀭𑀁 𑀚𑀦𑀬𑀦𑁆𑀢𑀺𑀬𑀸;

𑀅𑀬𑁄𑀫𑀬𑁂𑀳𑀺 𑀯𑀸𑀴𑁂𑀳𑀺 [𑀨𑀸𑀮𑁂𑀳𑀺 (𑀧𑀻.)], 𑀧𑀻𑀴𑀬𑀦𑁆𑀢𑀺 𑀧𑀼𑀦𑀧𑁆𑀧𑀼𑀦𑀁.

𑁧𑁧𑁪. ‘‘𑀢𑀫𑀲𑁆𑀲𑀯𑀁 [𑀢𑀁 𑀧𑀲𑁆𑀲𑀯𑀁 (𑀲𑀻. 𑀲𑁆𑀬𑀸.), 𑀢𑀁 𑀧𑀲𑁆𑀲𑀼𑀢𑀁 (𑀧𑀻.)] 𑀲𑀓𑀸 𑀕𑀢𑁆𑀢𑀸, 𑀭𑀼𑀳𑀺𑀭𑀁 [𑀭𑀼𑀥𑀺𑀭𑀁 (𑀲𑀻. 𑀲𑁆𑀬𑀸.)] 𑀅𑀢𑁆𑀢𑀲𑀫𑁆𑀪𑀯𑀁;

𑀢𑀫𑁆𑀩𑀮𑁄𑀳𑀯𑀺𑀮𑀻𑀦𑀁𑀯, 𑀢𑀢𑁆𑀢𑀁 𑀧𑀸𑀬𑁂𑀦𑁆𑀢𑀺 𑀫𑀢𑁆𑀢𑀺𑀖𑀁 [𑀫𑀢𑁆𑀢𑀺𑀬𑀁 (𑀲𑀻.)].

𑁧𑁧𑁫. ‘‘𑀚𑀺𑀕𑀼𑀘𑁆𑀙𑀁 𑀓𑀼𑀡𑀧𑀁 𑀧𑀽𑀢𑀺𑀁, 𑀤𑀼𑀕𑁆𑀕𑀦𑁆𑀥𑀁 𑀕𑀽𑀣𑀓𑀤𑁆𑀤𑀫𑀁;

𑀧𑀼𑀩𑁆𑀩𑀮𑁄𑀳𑀺𑀢𑀲𑀗𑁆𑀓𑀸𑀲𑀁, 𑀭𑀳𑀤𑀫𑁄𑀕𑀬𑁆𑀳 [𑀭𑀳𑀤𑁄𑀕𑁆𑀕𑀬𑁆𑀳 (𑀓.)] 𑀢𑀺𑀝𑁆𑀞𑀢𑀺.

𑁧𑁧𑁬. ‘‘𑀢𑀫𑁂𑀦𑀁 𑀓𑀺𑀫𑀬𑁄 𑀢𑀢𑁆𑀣, 𑀅𑀢𑀺𑀓𑀸𑀬𑀸 𑀅𑀬𑁄𑀫𑀼𑀔𑀸;

𑀙𑀯𑀺𑀁 𑀪𑁂𑀢𑁆𑀯𑀸𑀦 [𑀙𑁂𑀢𑁆𑀯𑀸𑀦 (𑀲𑀻. 𑀧𑀻.)] 𑀔𑀸𑀤𑀦𑁆𑀢𑀺, 𑀲𑀁𑀕𑀺𑀤𑁆𑀥𑀸 [𑀧𑀕𑀺𑀤𑁆𑀥𑀸 (𑀲𑀻. 𑀲𑁆𑀬𑀸. 𑀧𑀻.)] 𑀫𑀁𑀲𑀮𑁄𑀳𑀺𑀢𑁂.

𑁧𑁧𑁭. ‘‘𑀲𑁄 𑀘 𑀢𑀁 𑀦𑀺𑀭𑀬𑀁 𑀧𑀢𑁆𑀢𑁄, 𑀦𑀺𑀫𑀼𑀕𑁆𑀕𑁄 𑀲𑀢𑀧𑁄𑀭𑀺𑀲𑀁;

𑀧𑀽𑀢𑀺𑀓𑀁 𑀓𑀼𑀡𑀧𑀁 𑀯𑀸𑀢𑀺, 𑀲𑀫𑀦𑁆𑀢𑀸 𑀲𑀢𑀬𑁄𑀚𑀦𑀁.

𑁧𑁧𑁮. ‘‘𑀘𑀓𑁆𑀔𑀼𑀫𑀸𑀧𑀺 𑀳𑀺 𑀘𑀓𑁆𑀔𑀽𑀳𑀺, 𑀢𑁂𑀦 𑀕𑀦𑁆𑀥𑁂𑀦 𑀚𑀻𑀬𑀢𑀺;

𑀏𑀢𑀸𑀤𑀺𑀲𑀁 𑀩𑁆𑀭𑀳𑁆𑀫𑀤𑀢𑁆𑀢, 𑀫𑀸𑀢𑀼𑀖𑁄 𑀮𑀪𑀢𑁂 𑀤𑀼𑀔𑀁.

𑁧𑁧𑁯. ‘‘𑀔𑀼𑀭𑀥𑀸𑀭𑀫𑀦𑀼𑀓𑁆𑀓𑀫𑁆𑀫, 𑀢𑀺𑀓𑁆𑀔𑀁 𑀤𑀼𑀭𑀪𑀺𑀲𑀫𑁆𑀪𑀯𑀁;

𑀧𑀢𑀦𑁆𑀢𑀺 𑀕𑀩𑁆𑀪𑀧𑀸𑀢𑀺𑀬𑁄 [𑀕𑀩𑁆𑀪𑀧𑀸𑀢𑀺𑀦𑀺𑀬𑁄 (𑀲𑀻. 𑀲𑁆𑀬𑀸. 𑀧𑀻.)], 𑀤𑀼𑀕𑁆𑀕𑀁 𑀯𑁂𑀢𑀭𑀡𑀺𑀁 [𑀯𑁂𑀢𑁆𑀢𑀭𑀡𑀺𑀁 (𑀲𑁆𑀬𑀸. 𑀓.)] 𑀦𑀤𑀺𑀁.

𑁧𑁨𑁦. ‘‘𑀅𑀬𑁄𑀫𑀬𑀸 𑀲𑀺𑀫𑁆𑀩𑀮𑀺𑀬𑁄, 𑀲𑁄𑀴𑀲𑀗𑁆𑀕𑀼𑀮𑀓𑀡𑁆𑀝𑀓𑀸;

𑀉𑀪𑀢𑁄 𑀅𑀪𑀺𑀮𑀫𑁆𑀩𑀦𑁆𑀢𑀺, 𑀤𑀼𑀕𑁆𑀕𑀁 𑀯𑁂𑀢𑀭𑀡𑀺𑀁 [𑀯𑁂𑀢𑁆𑀢𑀭𑀡𑀺𑀁 (𑀲𑁆𑀬𑀸. 𑀓.)] 𑀦𑀤𑀺𑀁.

𑁧𑁨𑁧. ‘‘𑀢𑁂 𑀅𑀘𑁆𑀘𑀺𑀫𑀦𑁆𑀢𑁄 𑀢𑀺𑀝𑁆𑀞𑀦𑁆𑀢𑀺, 𑀅𑀕𑁆𑀕𑀺𑀓𑁆𑀔𑀦𑁆𑀥𑀸𑀯 𑀆𑀭𑀓𑀸;

𑀆𑀤𑀺𑀢𑁆𑀢𑀸 𑀚𑀸𑀢𑀯𑁂𑀤𑁂𑀦, 𑀉𑀤𑁆𑀥𑀁 𑀬𑁄𑀚𑀦𑀫𑀼𑀕𑁆𑀕𑀢𑀸.

𑁧𑁨𑁨. ‘‘𑀏𑀢𑁂 𑀯𑀚𑀦𑁆𑀢𑀺 [𑀲𑀚𑀦𑁆𑀢𑀺 (𑀲𑀻. 𑀧𑀻.), 𑀧𑀚𑁆𑀚𑀦𑁆𑀢𑀺 (𑀲𑁆𑀬𑀸.)] 𑀦𑀺𑀭𑀬𑁂, 𑀢𑀢𑁆𑀢𑁂 𑀢𑀺𑀔𑀺𑀡𑀓𑀡𑁆𑀝𑀓𑁂;

𑀦𑀸𑀭𑀺𑀬𑁄 𑀘 𑀅𑀢𑀺𑀘𑀸𑀭𑀸 [𑀅𑀢𑀺𑀘𑀸𑀭𑀺𑀦𑀺𑀬𑁄 (𑀲𑀻. 𑀲𑁆𑀬𑀸. 𑀧𑀻.)], 𑀦𑀭𑀸 𑀘 𑀧𑀭𑀤𑀸𑀭𑀕𑀽.

𑁧𑁨𑁩. ‘‘𑀢𑁂 𑀧𑀢𑀦𑁆𑀢𑀺 𑀅𑀥𑁄𑀓𑁆𑀔𑀦𑁆𑀥𑀸, 𑀯𑀺𑀯𑀢𑁆𑀢𑀸 𑀯𑀺𑀳𑀢𑀸 𑀧𑀼𑀣𑀽;

𑀲𑀬𑀦𑁆𑀢𑀺 𑀯𑀺𑀦𑀺𑀯𑀺𑀤𑁆𑀥𑀗𑁆𑀕𑀸, 𑀤𑀻𑀖𑀁 𑀚𑀕𑁆𑀕𑀦𑁆𑀢𑀺 𑀲𑀩𑁆𑀩𑀤𑀸 [𑀲𑀁𑀯𑀭𑀺𑀁 (𑀲𑀻. 𑀧𑀻.)].

𑁧𑁨𑁪. ‘‘𑀢𑀢𑁄 𑀭𑀢𑁆𑀬𑀸 𑀯𑀺𑀯𑀲𑀸𑀦𑁂 [𑀯𑀺𑀯𑀲𑀦𑁂 (𑀲𑀻. 𑀲𑁆𑀬𑀸. 𑀧𑀻.)], 𑀫𑀳𑀢𑀺𑀁 𑀧𑀩𑁆𑀩𑀢𑀽𑀧𑀫𑀁;

𑀮𑁄𑀳𑀓𑀼𑀫𑁆𑀪𑀺𑀁 𑀧𑀯𑀚𑁆𑀚𑀦𑁆𑀢𑀺, 𑀢𑀢𑁆𑀢𑀁 𑀅𑀕𑁆𑀕𑀺𑀲𑀫𑀽𑀤𑀓𑀁.

𑁧𑁨𑁫. ‘‘𑀏𑀯𑀁 𑀤𑀺𑀯𑀸 𑀘 𑀭𑀢𑁆𑀢𑁄 𑀘, 𑀤𑀼𑀲𑁆𑀲𑀻𑀮𑀸 𑀫𑁄𑀳𑀧𑀸𑀭𑀼𑀢𑀸;

𑀅𑀦𑀼𑀪𑁄𑀦𑁆𑀢𑀺 𑀲𑀓𑀁 𑀓𑀫𑁆𑀫𑀁, 𑀧𑀼𑀩𑁆𑀩𑁂 𑀤𑀼𑀓𑁆𑀓𑀝𑀫𑀢𑁆𑀢𑀦𑁄.

𑁧𑁨𑁬. ‘‘𑀬𑀸 𑀘 𑀪𑀭𑀺𑀬𑀸 𑀥𑀦𑀓𑁆𑀓𑀻𑀢𑀸, 𑀲𑀸𑀫𑀺𑀓𑀁 𑀅𑀢𑀺𑀫𑀜𑁆𑀜𑀢𑀺;

𑀲𑀲𑁆𑀲𑀼𑀁 𑀯𑀸 𑀲𑀲𑀼𑀭𑀁 𑀯𑀸𑀧𑀺, 𑀚𑁂𑀝𑁆𑀞𑀁 𑀯𑀸𑀧𑀺 𑀦𑀦𑀦𑁆𑀤𑀭𑀁 [𑀦𑀦𑀦𑁆𑀤𑀦𑀁 (𑀲𑁆𑀬𑀸. 𑀓.)].

𑁧𑁨𑁭. ‘‘𑀢𑀲𑁆𑀲𑀸 𑀯𑀗𑁆𑀓𑁂𑀦 𑀚𑀺𑀯𑁆𑀳𑀕𑁆𑀕𑀁, 𑀦𑀺𑀩𑁆𑀩𑀳𑀦𑁆𑀢𑀺 𑀲𑀩𑀦𑁆𑀥𑀦𑀁;

𑀲 𑀩𑁆𑀬𑀸𑀫𑀫𑀢𑁆𑀢𑀁 𑀓𑀺𑀫𑀺𑀦𑀁, 𑀚𑀺𑀯𑁆𑀳𑀁 𑀧𑀲𑁆𑀲𑀢𑀺 𑀅𑀢𑁆𑀢𑀦𑀺 [𑀅𑀢𑁆𑀢𑀦𑁄 (𑀲𑀻. 𑀲𑁆𑀬𑀸.)];

𑀯𑀺𑀜𑁆𑀜𑀸𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑀸𑀧𑀦𑁂 𑀧𑁂𑀘𑁆𑀘 𑀧𑀘𑁆𑀘𑀢𑀺.

𑁧𑁨𑁮. ‘‘𑀑𑀭𑀩𑁆𑀪𑀺𑀓𑀸 𑀲𑀽𑀓𑀭𑀺𑀓𑀸, 𑀫𑀘𑁆𑀙𑀺𑀓𑀸 𑀫𑀺𑀕𑀩𑀦𑁆𑀥𑀓𑀸;

𑀘𑁄𑀭𑀸 𑀕𑁄𑀖𑀸𑀢𑀓𑀸 𑀮𑀼𑀤𑁆𑀤𑀸, 𑀅𑀯𑀡𑁆𑀡𑁂 𑀯𑀡𑁆𑀡𑀓𑀸𑀭𑀓𑀸.

𑁧𑁨𑁯. ‘‘𑀲𑀢𑁆𑀢𑀻𑀳𑀺 𑀮𑁄𑀳𑀓𑀽𑀝𑁂𑀳𑀺, 𑀦𑁂𑀢𑁆𑀢𑀺𑀁𑀲𑁂𑀳𑀺 𑀉𑀲𑀽𑀳𑀺 𑀘;

𑀳𑀜𑁆𑀜𑀫𑀸𑀦𑀸 𑀔𑀸𑀭𑀦𑀤𑀺𑀁, 𑀧𑀧𑀢𑀦𑁆𑀢𑀺 [𑀲𑀫𑁆𑀧𑀢𑀦𑁆𑀢𑀺 (𑀓.)] 𑀅𑀯𑀁𑀲𑀺𑀭𑀸.

𑁧𑁩𑁦. ‘‘𑀲𑀸𑀬𑀁 𑀧𑀸𑀢𑁄 𑀓𑀽𑀝𑀓𑀸𑀭𑀻, 𑀅𑀬𑁄𑀓𑀽𑀝𑁂𑀳𑀺 𑀳𑀜𑁆𑀜𑀢𑀺;

𑀢𑀢𑁄 𑀯𑀦𑁆𑀢𑀁 𑀤𑀼𑀭𑀢𑁆𑀢𑀸𑀦𑀁, 𑀧𑀭𑁂𑀲𑀁 𑀪𑀼𑀜𑁆𑀚𑀭𑁂 [𑀪𑀼𑀜𑁆𑀚𑀢𑁂 (𑀲𑀻. 𑀲𑁆𑀬𑀸. 𑀧𑀻.)] 𑀲𑀤𑀸.

𑁧𑁩𑁧. ‘‘𑀥𑀗𑁆𑀓𑀸 𑀪𑁂𑀭𑀡𑁆𑀟𑀓𑀸 [𑀪𑁂𑀤𑀡𑁆𑀟𑀓𑀸 (𑀓.)] 𑀕𑀺𑀚𑁆𑀛𑀸, 𑀓𑀸𑀓𑁄𑀴𑀸 𑀘 𑀅𑀬𑁄𑀫𑀼𑀔𑀸;

𑀯𑀺𑀧𑁆𑀨𑀦𑁆𑀤𑀫𑀸𑀦𑀁 𑀔𑀸𑀤𑀦𑁆𑀢𑀺, 𑀦𑀭𑀁 𑀓𑀺𑀩𑁆𑀩𑀺𑀲𑀓𑀸𑀭𑀓𑀁 [𑀓𑀺𑀩𑁆𑀩𑀺𑀲𑀓𑀸𑀭𑀺𑀦𑀁 (𑀧𑀻.)].

𑁧𑁩𑁨. ‘‘𑀬𑁂 𑀫𑀺𑀕𑁂𑀦 𑀫𑀺𑀕𑀁 𑀳𑀦𑁆𑀢𑀺, 𑀧𑀓𑁆𑀔𑀺𑀁 𑀯𑀸 𑀧𑀦 𑀧𑀓𑁆𑀔𑀺𑀦𑀸;

𑀅𑀲𑀦𑁆𑀢𑁄 𑀭𑀚𑀲𑀸 𑀙𑀦𑁆𑀦𑀸, 𑀕𑀦𑁆𑀢𑀸 [𑀕𑀢𑀸 (𑀓.)] 𑀢𑁂 𑀦𑀺𑀭𑀬𑀼𑀲𑁆𑀲𑀤𑀁 [𑀦𑀺𑀭𑀬𑀁 𑀅𑀥𑁄 (𑀧𑀻.)].

𑁧𑁩𑁩. ‘‘𑀲𑀦𑁆𑀢𑁄 𑀘 [𑀲𑀦𑁆𑀢𑁄𑀯 (𑀲𑁆𑀬𑀸.)] 𑀉𑀤𑁆𑀥𑀁 𑀕𑀘𑁆𑀙𑀦𑁆𑀢𑀺, 𑀲𑀼𑀘𑀺𑀡𑁆𑀡𑁂𑀦𑀺𑀥 𑀓𑀫𑁆𑀫𑀼𑀦𑀸;

𑀲𑀼𑀘𑀺𑀡𑁆𑀡𑀲𑁆𑀲 𑀨𑀮𑀁 𑀧𑀲𑁆𑀲, 𑀲𑀇𑀦𑁆𑀤𑀸 [𑀲𑀳𑀺𑀦𑁆𑀤𑀸 (𑀲𑀻.)] 𑀤𑁂𑀯𑀸 𑀲𑀩𑁆𑀭𑀳𑁆𑀫𑀓𑀸.

𑁧𑁩𑁪. ‘‘𑀢𑀁 𑀢𑀁 𑀩𑁆𑀭𑀽𑀫𑀺 𑀫𑀳𑀸𑀭𑀸𑀚, 𑀥𑀫𑁆𑀫𑀁 𑀭𑀝𑁆𑀞𑀧𑀢𑀻 𑀘𑀭;

𑀢𑀣𑀸 [𑀢𑀣𑀸 𑀢𑀣𑀸 (𑀲𑀻. 𑀲𑁆𑀬𑀸. 𑀧𑀻.)] 𑀭𑀸𑀚 𑀘𑀭𑀸𑀳𑀺 𑀥𑀫𑁆𑀫𑀁, 𑀬𑀣𑀸 𑀢𑀁 𑀲𑀼𑀘𑀺𑀡𑁆𑀡𑀁 𑀦𑀸𑀦𑀼𑀢𑀧𑁆𑀧𑁂𑀬𑁆𑀬 𑀧𑀘𑁆𑀙𑀸’’𑀢𑀺.

𑀲𑀁𑀓𑀺𑀘𑁆𑀘𑀚𑀸𑀢𑀓𑀁 𑀤𑀼𑀢𑀺𑀬𑀁.

𑀲𑀝𑁆𑀞𑀺𑀦𑀺𑀧𑀸𑀢𑀁 𑀦𑀺𑀝𑁆𑀞𑀺𑀢𑀁.