𑁫𑁨𑁨. 𑀲𑀭𑀪𑀗𑁆𑀕𑀚𑀸𑀢𑀓𑀁 (𑁨)

𑁫𑁦. ‘‘𑀅𑀮𑀗𑁆𑀓𑀢𑀸 𑀓𑀼𑀡𑁆𑀟𑀮𑀺𑀦𑁄 𑀲𑀼𑀯𑀢𑁆𑀣𑀸, 𑀯𑁂𑀴𑀼𑀭𑀺𑀬𑀫𑀼𑀢𑁆𑀢𑀸𑀣𑀭𑀼𑀔𑀕𑁆𑀕𑀩𑀦𑁆𑀥𑀸 [𑀩𑀤𑁆𑀥𑀸 (𑀧𑀻.)];

𑀭𑀣𑁂𑀲𑀪𑀸 𑀢𑀺𑀝𑁆𑀞𑀣 𑀓𑁂 𑀦𑀼 𑀢𑀼𑀫𑁆𑀳𑁂, 𑀓𑀣𑀁 𑀯𑁄 𑀚𑀸𑀦𑀦𑁆𑀢𑀺 𑀫𑀦𑀼𑀲𑁆𑀲𑀮𑁄𑀓𑁂’’.

𑁫𑁧. ‘‘𑀅𑀳𑀫𑀝𑁆𑀞𑀓𑁄 𑀪𑀻𑀫𑀭𑀣𑁄 𑀧𑀦𑀸𑀬𑀁, 𑀓𑀸𑀮𑀺𑀗𑁆𑀕𑀭𑀸𑀚𑀸 𑀧𑀦 𑀉𑀕𑁆𑀕𑀢𑁄𑀬𑀁 [𑀉𑀕𑁆𑀕𑀢𑁄 𑀅𑀬𑀁 (𑀧𑀻.), 𑀉𑀕𑁆𑀕𑀢𑀸𑀬𑀁 (𑀓.)];

𑀲𑀼𑀲𑀜𑁆𑀜𑀢𑀸𑀦𑀁 𑀇𑀲𑀻𑀦𑀁 [𑀲𑀼𑀲𑀜𑁆𑀜𑀢𑀸𑀦𑀺𑀲𑀺𑀦𑀁 (𑀧𑀻.)] 𑀤𑀲𑁆𑀲𑀦𑀸𑀬, 𑀇𑀥𑀸𑀕𑀢𑀸 𑀧𑀼𑀘𑁆𑀙𑀺𑀢𑀸𑀬𑁂𑀫𑁆𑀳 𑀧𑀜𑁆𑀳𑁂’’.

𑁫𑁨. ‘‘𑀯𑁂𑀳𑀸𑀬𑀲𑀁 𑀢𑀺𑀝𑁆𑀞𑀲𑀺 [𑀢𑀺𑀝𑁆𑀞𑀢𑀺 (𑀧𑀻.)] 𑀅𑀦𑁆𑀢𑀮𑀺𑀓𑁆𑀔𑁂, 𑀧𑀣𑀤𑁆𑀥𑀼𑀦𑁄 𑀧𑀦𑁆𑀦𑀭𑀲𑁂𑀯 𑀘𑀦𑁆𑀤𑁄;

𑀧𑀼𑀘𑁆𑀙𑀸𑀫𑀺 𑀢𑀁 𑀬𑀓𑁆𑀔 𑀫𑀳𑀸𑀦𑀼𑀪𑀸𑀯, 𑀓𑀣𑀁 𑀢𑀁 𑀚𑀸𑀦𑀦𑁆𑀢𑀺 𑀫𑀦𑀼𑀲𑁆𑀲𑀮𑁄𑀓𑁂’’.

𑁫𑁩. ‘‘𑀬𑀫𑀸𑀳𑀼 𑀤𑁂𑀯𑁂𑀲𑀼 𑀲𑀼𑀚𑀫𑁆𑀧𑀢𑀻𑀢𑀺, 𑀫𑀖𑀯𑀸𑀢𑀺 𑀢𑀁 𑀆𑀳𑀼 𑀫𑀦𑀼𑀲𑁆𑀲𑀮𑁄𑀓𑁂;

𑀲 𑀤𑁂𑀯𑀭𑀸𑀚𑀸 𑀇𑀤𑀫𑀚𑁆𑀚 𑀧𑀢𑁆𑀢𑁄, 𑀲𑀼𑀲𑀜𑁆𑀜𑀢𑀸𑀦𑀁 𑀇𑀲𑀻𑀦𑀁 𑀤𑀲𑁆𑀲𑀦𑀸𑀬’’.

𑁫𑁪. ‘‘𑀤𑀽𑀭𑁂 𑀲𑀼𑀢𑀸 𑀦𑁄 𑀇𑀲𑀬𑁄 𑀲𑀫𑀸𑀕𑀢𑀸, 𑀫𑀳𑀺𑀤𑁆𑀥𑀺𑀓𑀸 𑀇𑀤𑁆𑀥𑀺𑀕𑀼𑀡𑀽𑀧𑀧𑀦𑁆𑀦𑀸;

𑀯𑀦𑁆𑀤𑀸𑀫𑀺 𑀢𑁂 𑀅𑀬𑀺𑀭𑁂 𑀧𑀲𑀦𑁆𑀦𑀘𑀺𑀢𑁆𑀢𑁄, 𑀬𑁂 𑀚𑀻𑀯𑀮𑁄𑀓𑁂𑀢𑁆𑀣 𑀫𑀦𑀼𑀲𑁆𑀲𑀲𑁂𑀝𑁆𑀞𑀸’’.

𑁫𑁫. 𑀕𑀦𑁆𑀥𑁄 𑀇𑀲𑀻𑀦𑀁 𑀘𑀺𑀭𑀤𑀺𑀓𑁆𑀔𑀺𑀢𑀸𑀦𑀁 [𑀤𑀓𑁆𑀔𑀺𑀢𑀸𑀦𑀁 (𑀲𑁆𑀬𑀸. 𑀧𑀻.)], 𑀓𑀸𑀬𑀸 𑀘𑀼𑀢𑁄 𑀕𑀘𑁆𑀙𑀢𑀺 𑀫𑀸𑀮𑀼𑀢𑁂𑀦;

𑀇𑀢𑁄 𑀧𑀝𑀺𑀓𑁆𑀓𑀫𑁆𑀫 𑀲𑀳𑀲𑁆𑀲𑀦𑁂𑀢𑁆𑀢, 𑀕𑀦𑁆𑀥𑁄 𑀇𑀲𑀻𑀦𑀁 𑀅𑀲𑀼𑀘𑀺 𑀤𑁂𑀯𑀭𑀸𑀚’’.

𑁫𑁬. ‘‘𑀕𑀦𑁆𑀥𑁄 𑀇𑀲𑀻𑀦𑀁 𑀘𑀺𑀭𑀤𑀺𑀓𑁆𑀔𑀺𑀢𑀸𑀦𑀁, 𑀓𑀸𑀬𑀸 𑀘𑀼𑀢𑁄 𑀕𑀘𑁆𑀙𑀢𑀼 𑀫𑀸𑀮𑀼𑀢𑁂𑀦;

𑀯𑀺𑀘𑀺𑀢𑁆𑀭𑀧𑀼𑀧𑁆𑀨𑀁 𑀲𑀼𑀭𑀪𑀺𑀁𑀯 𑀫𑀸𑀮𑀁, 𑀕𑀦𑁆𑀥𑀜𑁆𑀘 𑀏𑀢𑀁 𑀧𑀸𑀝𑀺𑀓𑀗𑁆𑀔𑀸𑀫 𑀪𑀦𑁆𑀢𑁂;

𑀦 𑀳𑁂𑀢𑁆𑀣 𑀤𑁂𑀯𑀸 𑀧𑀝𑀺𑀓𑁆𑀓𑀽𑀮𑀲𑀜𑁆𑀜𑀺𑀦𑁄’’.

𑁫𑁭. ‘‘𑀧𑀼𑀭𑀺𑀦𑁆𑀤𑀤𑁄 𑀪𑀽𑀢𑀧𑀢𑀻 𑀬𑀲𑀲𑁆𑀲𑀻, 𑀤𑁂𑀯𑀸𑀦𑀫𑀺𑀦𑁆𑀤𑁄 𑀲𑀓𑁆𑀓𑁄 [𑀇𑀤𑀁 𑀧𑀤𑀁 𑀦𑀢𑁆𑀣𑀺 (𑀲𑀻. 𑀲𑁆𑀬𑀸. 𑀧𑀻. 𑀧𑁄𑀢𑁆𑀣𑀓𑁂𑀲𑀼)] 𑀫𑀖𑀯𑀸 𑀲𑀼𑀚𑀫𑁆𑀧𑀢𑀺;

𑀲 𑀤𑁂𑀯𑀭𑀸𑀚𑀸 𑀅𑀲𑀼𑀭𑀕𑀡𑀧𑁆𑀧𑀫𑀤𑁆𑀤𑀦𑁄, 𑀑𑀓𑀸𑀲𑀫𑀸𑀓𑀗𑁆𑀔𑀢𑀺 𑀧𑀜𑁆𑀳 𑀧𑀼𑀘𑁆𑀙𑀺𑀢𑀼𑀁.

𑁫𑁮. ‘‘𑀓𑁄 𑀦𑁂𑀯𑀺𑀫𑁂𑀲𑀁 𑀇𑀥 𑀧𑀡𑁆𑀟𑀺𑀢𑀸𑀦𑀁, 𑀧𑀜𑁆𑀳𑁂 𑀧𑀼𑀝𑁆𑀞𑁄 𑀦𑀺𑀧𑀼𑀡𑁂 𑀩𑁆𑀬𑀸𑀓𑀭𑀺𑀲𑁆𑀲𑀢𑀺;

𑀢𑀺𑀡𑁆𑀡𑀜𑁆𑀘 𑀭𑀜𑁆𑀜𑀁 𑀫𑀦𑀼𑀚𑀸𑀥𑀺𑀧𑀸𑀦𑀁, 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀘 𑀯𑀸𑀲𑀯𑀲𑁆𑀲’’.

𑁫𑁯. ‘‘𑀅𑀬𑀁 𑀇𑀲𑀺 [𑀇𑀲𑀻 (𑀲𑀻. 𑀧𑀻.)] 𑀲𑀭𑀪𑀗𑁆𑀕𑁄 𑀢𑀧𑀲𑁆𑀲𑀻 [𑀬𑀲𑀲𑁆𑀲𑀻 (𑀲𑀻.)], 𑀬𑀢𑁄 𑀚𑀸𑀢𑁄 𑀯𑀺𑀭𑀢𑁄 𑀫𑁂𑀣𑀼𑀦𑀲𑁆𑀫𑀸;

𑀆𑀘𑁂𑀭𑀧𑀼𑀢𑁆𑀢𑁄 [𑀆𑀘𑀭𑀺𑀬𑀧𑀼𑀢𑁆𑀢𑁄 (𑀧𑀻. 𑀓.)] 𑀲𑀼𑀯𑀺𑀦𑀻𑀢𑀭𑀽𑀧𑁄, 𑀲𑁄 𑀦𑁂𑀲𑀁 𑀧𑀜𑁆𑀳𑀸𑀦𑀺 𑀯𑀺𑀬𑀸𑀓𑀭𑀺𑀲𑁆𑀲𑀢𑀺’’.

𑁬𑁦. ‘‘𑀓𑁄𑀡𑁆𑀟𑀜𑁆𑀜 𑀧𑀜𑁆𑀳𑀸𑀦𑀺 𑀯𑀺𑀬𑀸𑀓𑀭𑁄𑀳𑀺, 𑀬𑀸𑀘𑀦𑁆𑀢𑀺 𑀢𑀁 𑀇𑀲𑀬𑁄 𑀲𑀸𑀥𑀼𑀭𑀽𑀧𑀸;

𑀓𑁄𑀡𑁆𑀟𑀜𑁆𑀜 𑀏𑀲𑁄 𑀫𑀦𑀼𑀚𑁂𑀲𑀼 𑀥𑀫𑁆𑀫𑁄, 𑀬𑀁 𑀯𑀼𑀤𑁆𑀥 [𑀯𑀤𑁆𑀥 (𑀧𑀻.), 𑀩𑀼𑀤𑁆𑀥 (𑀓.)] 𑀫𑀸𑀕𑀘𑁆𑀙𑀢𑀺 𑀏𑀲 𑀪𑀸𑀭𑁄’’.

𑁬𑁧. ‘‘𑀓𑀢𑀸𑀯𑀓𑀸𑀲𑀸 𑀧𑀼𑀘𑁆𑀙𑀦𑁆𑀢𑀼 𑀪𑁄𑀦𑁆𑀢𑁄, 𑀬𑀁 𑀓𑀺𑀜𑁆𑀘𑀺 𑀧𑀜𑁆𑀳𑀁 𑀫𑀦𑀲𑀸𑀪𑀺𑀧𑀢𑁆𑀣𑀺𑀢𑀁;

𑀅𑀳𑀜𑁆𑀳𑀺 𑀢𑀁 𑀢𑀁 𑀯𑁄 𑀯𑀺𑀬𑀸𑀓𑀭𑀺𑀲𑁆𑀲𑀁, 𑀜𑀢𑁆𑀯𑀸 𑀲𑀬𑀁 𑀮𑁄𑀓𑀫𑀺𑀫𑀁 𑀧𑀭𑀜𑁆𑀘’’.

𑁬𑁨. ‘‘𑀢𑀢𑁄 𑀘 𑀫𑀖𑀯𑀸 𑀲𑀓𑁆𑀓𑁄, 𑀅𑀢𑁆𑀣𑀤𑀲𑁆𑀲𑀻 𑀧𑀼𑀭𑀺𑀦𑁆𑀤𑀤𑁄;

𑀅𑀧𑀼𑀘𑁆𑀙𑀺 𑀧𑀞𑀫𑀁 𑀧𑀜𑁆𑀳𑀁, 𑀬𑀜𑁆𑀘𑀸𑀲𑀺 𑀅𑀪𑀺𑀧𑀢𑁆𑀣𑀺𑀢𑀁’’.

𑁬𑁩. ‘‘𑀓𑀺𑀁 𑀲𑀽 𑀯𑀥𑀺𑀢𑁆𑀯𑀸 𑀦 𑀓𑀤𑀸𑀘𑀺 𑀲𑁄𑀘𑀢𑀺, 𑀓𑀺𑀲𑁆𑀲𑀧𑁆𑀧𑀳𑀸𑀦𑀁 𑀇𑀲𑀬𑁄 𑀯𑀡𑁆𑀡𑀬𑀦𑁆𑀢𑀺;

𑀓𑀲𑁆𑀲𑀻𑀥 𑀯𑀼𑀢𑁆𑀢𑀁 𑀨𑀭𑀼𑀲𑀁 𑀔𑀫𑁂𑀣, 𑀅𑀓𑁆𑀔𑀸𑀳𑀺 𑀫𑁂 𑀓𑁄𑀡𑁆𑀟𑀜𑁆𑀜 𑀏𑀢𑀫𑀢𑁆𑀣𑀁’’.

𑁬𑁪. ‘‘𑀓𑁄𑀥𑀁 𑀯𑀥𑀺𑀢𑁆𑀯𑀸 𑀦 𑀓𑀤𑀸𑀘𑀺 𑀲𑁄𑀘𑀢𑀺, 𑀫𑀓𑁆𑀔𑀧𑁆𑀧𑀳𑀸𑀦𑀁 𑀇𑀲𑀬𑁄 𑀯𑀡𑁆𑀡𑀬𑀦𑁆𑀢𑀺;

𑀲𑀩𑁆𑀩𑁂𑀲𑀁 𑀯𑀼𑀢𑁆𑀢𑀁 𑀨𑀭𑀼𑀲𑀁 𑀔𑀫𑁂𑀣, 𑀏𑀢𑀁 𑀔𑀦𑁆𑀢𑀺𑀁 𑀉𑀢𑁆𑀢𑀫𑀫𑀸𑀳𑀼 𑀲𑀦𑁆𑀢𑁄’’.

𑁬𑁫. ‘‘𑀲𑀓𑁆𑀓𑀸 𑀉𑀪𑀺𑀦𑁆𑀦𑀁 [𑀳𑀺 𑀤𑁆𑀯𑀺𑀦𑁆𑀦𑀁 (𑀧𑀻.)] 𑀯𑀘𑀦𑀁 𑀢𑀺𑀢𑀺𑀓𑁆𑀔𑀺𑀢𑀼𑀁, 𑀲𑀤𑀺𑀲𑀲𑁆𑀲 𑀯𑀸 𑀲𑁂𑀝𑁆𑀞𑀢𑀭𑀲𑁆𑀲 [𑀲𑁂𑀝𑁆𑀞𑀦𑀭𑀲𑁆𑀲 (𑀧𑀻.)] 𑀯𑀸𑀧𑀺;

𑀓𑀣𑀁 𑀦𑀼 𑀳𑀻𑀦𑀲𑁆𑀲 𑀯𑀘𑁄 𑀔𑀫𑁂𑀣, 𑀅𑀓𑁆𑀔𑀸𑀳𑀺 𑀫𑁂 𑀓𑁄𑀡𑁆𑀟𑀜𑁆𑀜 𑀏𑀢𑀫𑀢𑁆𑀣𑀁’’.

𑁬𑁬. ‘‘𑀪𑀬𑀸 𑀳𑀺 𑀲𑁂𑀝𑁆𑀞𑀲𑁆𑀲 𑀯𑀘𑁄 𑀔𑀫𑁂𑀣, 𑀲𑀸𑀭𑀫𑁆𑀪𑀳𑁂𑀢𑀽 𑀧𑀦 𑀲𑀸𑀤𑀺𑀲𑀲𑁆𑀲;

𑀬𑁄 𑀘𑀻𑀥 𑀳𑀻𑀦𑀲𑁆𑀲 𑀯𑀘𑁄 𑀔𑀫𑁂𑀣, 𑀏𑀢𑀁 𑀔𑀦𑁆𑀢𑀺𑀁 𑀉𑀢𑁆𑀢𑀫𑀫𑀸𑀳𑀼 𑀲𑀦𑁆𑀢𑁄’’.

𑁬𑁭. ‘‘𑀓𑀣𑀁 𑀯𑀺𑀚𑀜𑁆𑀜𑀸 𑀘𑀢𑀼𑀧𑀢𑁆𑀣𑀭𑀽𑀧𑀁 [𑀘𑀢𑀼𑀫𑀝𑁆𑀞𑀭𑀽𑀧𑀁 (𑀲𑁆𑀬𑀸. 𑀧𑀻.)], 𑀲𑁂𑀝𑁆𑀞𑀁 𑀲𑀭𑀺𑀓𑁆𑀔𑀁 𑀅𑀣𑀯𑀸𑀧𑀺 𑀳𑀻𑀦𑀁;

𑀯𑀺𑀭𑀽𑀧𑀭𑀽𑀧𑁂𑀦 𑀘𑀭𑀦𑁆𑀢𑀺 𑀲𑀦𑁆𑀢𑁄, 𑀢𑀲𑁆𑀫𑀸 𑀳𑀺 𑀲𑀩𑁆𑀩𑁂𑀲𑀁 𑀯𑀘𑁄 𑀔𑀫𑁂𑀣’’.

𑁬𑁮. ‘‘𑀦 𑀳𑁂𑀢𑀫𑀢𑁆𑀣𑀁 𑀫𑀳𑀢𑀻𑀧𑀺 𑀲𑁂𑀦𑀸, 𑀲𑀭𑀸𑀚𑀺𑀓𑀸 𑀬𑀼𑀚𑁆𑀛𑀫𑀸𑀦𑀸 𑀮𑀪𑁂𑀣;

𑀬𑀁 𑀔𑀦𑁆𑀢𑀺𑀫𑀸 𑀲𑀧𑁆𑀧𑀼𑀭𑀺𑀲𑁄 𑀮𑀪𑁂𑀣, 𑀔𑀦𑁆𑀢𑀻 𑀩𑀮𑀲𑁆𑀲𑀽𑀧𑀲𑀫𑀦𑁆𑀢𑀺 𑀯𑁂𑀭𑀸’’.

𑁬𑁯. ‘‘𑀲𑀼𑀪𑀸𑀲𑀺𑀢𑀁 𑀢𑁂 𑀅𑀦𑀼𑀫𑁄𑀤𑀺𑀬𑀸𑀦, 𑀅𑀜𑁆𑀜𑀁 𑀢𑀁 𑀧𑀼𑀘𑁆𑀙𑀸𑀫𑀺 𑀢𑀤𑀺𑀗𑁆𑀖 𑀩𑁆𑀭𑀽𑀳𑀺;

𑀬𑀣𑀸 𑀅𑀳𑀼𑀁 [𑀅𑀳𑀽 (𑀲𑀻. 𑀲𑁆𑀬𑀸. 𑀧𑀻.)] 𑀤𑀡𑁆𑀟𑀓𑀻 𑀦𑀸𑀴𑀺𑀓𑁂𑀭𑁄 [𑀦𑀸𑀴𑀺𑀓𑀻𑀭𑁄 (𑀲𑀻. 𑀲𑁆𑀬𑀸. 𑀧𑀻.)], 𑀅𑀣𑀚𑁆𑀚𑀼𑀦𑁄 𑀓𑀮𑀸𑀩𑀼 𑀘𑀸𑀧𑀺 𑀭𑀸𑀚𑀸;

𑀢𑁂𑀲𑀁 𑀕𑀢𑀺𑀁 𑀩𑁆𑀭𑀽𑀳𑀺 𑀲𑀼𑀧𑀸𑀧𑀓𑀫𑁆𑀫𑀺𑀦𑀁, 𑀓𑀢𑁆𑀣𑀽𑀧𑀧𑀦𑁆𑀦𑀸 𑀇𑀲𑀺𑀦𑀁 𑀯𑀺𑀳𑁂𑀞𑀓𑀸’’.

𑁭𑁦. ‘‘𑀓𑀺𑀲𑀜𑁆𑀳𑀺 [𑀓𑀺𑀲𑀁𑀧𑀺 (𑀧𑀻.)] 𑀯𑀘𑁆𑀙𑀁 𑀅𑀯𑀓𑀺𑀭𑀺𑀬 𑀤𑀡𑁆𑀟𑀓𑀻, 𑀉𑀘𑁆𑀙𑀺𑀦𑁆𑀦𑀫𑀽𑀮𑁄 𑀲𑀚𑀦𑁄 𑀲𑀭𑀝𑁆𑀞𑁄;

𑀓𑀼𑀓𑁆𑀓𑀼𑀴𑀦𑀸𑀫𑁂 𑀦𑀺𑀭𑀬𑀫𑁆𑀳𑀺 𑀧𑀘𑁆𑀘𑀢𑀺, 𑀢𑀲𑁆𑀲 𑀨𑀼𑀮𑀺𑀗𑁆𑀕𑀸𑀦𑀺 𑀧𑀢𑀦𑁆𑀢𑀺 𑀓𑀸𑀬𑁂.

𑁭𑁧. ‘‘𑀬𑁄 𑀲𑀜𑁆𑀜𑀢𑁂 𑀧𑀩𑁆𑀩𑀚𑀺𑀢𑁂 𑀅𑀳𑁂𑀞𑀬𑀺 [𑀅𑀯𑀜𑁆𑀘𑀲𑀺 (𑀧𑀻.)], 𑀥𑀫𑁆𑀫𑀁 𑀪𑀡𑀦𑁆𑀢𑁂 𑀲𑀫𑀡𑁂 𑀅𑀤𑀽𑀲𑀓𑁂;

𑀢𑀁 𑀦𑀸𑀴𑀺𑀓𑁂𑀭𑀁 𑀲𑀼𑀦𑀔𑀸 𑀧𑀭𑀢𑁆𑀣, 𑀲𑀗𑁆𑀕𑀫𑁆𑀫 𑀔𑀸𑀤𑀦𑁆𑀢𑀺 𑀯𑀺𑀨𑀦𑁆𑀤𑀫𑀸𑀦𑀁.

𑁭𑁨. ‘‘𑀅𑀣𑀚𑁆𑀚𑀼𑀦𑁄 𑀦𑀺𑀭𑀬𑁂 𑀲𑀢𑁆𑀢𑀺𑀲𑀽𑀮𑁂, 𑀅𑀯𑀁𑀲𑀺𑀭𑁄 𑀧𑀢𑀺𑀢𑁄 𑀉𑀤𑁆𑀥𑀁𑀧𑀸𑀤𑁄 [𑀉𑀤𑁆𑀥𑀧𑀸𑀤𑁄 (𑀲𑁆𑀬𑀸.), 𑀅𑀤𑁆𑀥𑀧𑀸𑀤𑁄 (𑀧𑀻.)];

𑀅𑀗𑁆𑀕𑀻𑀭𑀲𑀁 𑀕𑁄𑀢𑀫𑀁 𑀳𑁂𑀞𑀬𑀺𑀢𑁆𑀯𑀸, 𑀔𑀦𑁆𑀢𑀺𑀁 𑀢𑀧𑀲𑁆𑀲𑀺𑀁 𑀘𑀺𑀭𑀩𑁆𑀭𑀳𑁆𑀫𑀘𑀸𑀭𑀺𑀁.

𑁭𑁩. ‘‘𑀬𑁄 𑀔𑀡𑁆𑀟𑀲𑁄 𑀧𑀩𑁆𑀩𑀚𑀺𑀢𑀁 𑀅𑀙𑁂𑀤𑀬𑀺, 𑀔𑀦𑁆𑀢𑀺𑀁 𑀯𑀤𑀦𑁆𑀢𑀁 𑀲𑀫𑀡𑀁 𑀅𑀤𑀽𑀲𑀓𑀁;

𑀓𑀮𑀸𑀩𑀼𑀯𑀻𑀘𑀺𑀁 𑀉𑀧𑀧𑀚𑁆𑀚 𑀧𑀘𑁆𑀘𑀢𑀺, 𑀫𑀳𑀸𑀧𑀢𑀸𑀧𑀁 [𑀫𑀳𑀸𑀪𑀺𑀢𑀸𑀧𑀁 (𑀧𑀻.)] 𑀓𑀝𑀼𑀓𑀁 𑀪𑀬𑀸𑀦𑀓𑀁.

𑁭𑁪. ‘‘𑀏𑀢𑀸𑀦𑀺 𑀲𑀼𑀢𑁆𑀯𑀸 𑀦𑀺𑀭𑀬𑀸𑀦𑀺 𑀧𑀡𑁆𑀟𑀺𑀢𑁄, 𑀅𑀜𑁆𑀜𑀸𑀦𑀺 𑀧𑀸𑀧𑀺𑀝𑁆𑀞𑀢𑀭𑀸𑀦𑀺 𑀘𑁂𑀢𑁆𑀣;

𑀥𑀫𑁆𑀫𑀁 𑀘𑀭𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀲𑀼, 𑀏𑀯𑀗𑁆𑀓𑀭𑁄 𑀲𑀕𑁆𑀕𑀫𑀼𑀧𑁂𑀢𑀺 𑀞𑀸𑀦𑀁’’.

𑁭𑁫. ‘‘𑀲𑀼𑀪𑀸𑀲𑀺𑀢𑀁 𑀢𑁂 𑀅𑀦𑀼𑀫𑁄𑀤𑀺𑀬𑀸𑀦, 𑀅𑀜𑁆𑀜𑀁 𑀢𑀁 𑀧𑀼𑀘𑁆𑀙𑀸𑀫𑀺 𑀢𑀤𑀺𑀗𑁆𑀖 𑀩𑁆𑀭𑀽𑀳𑀺;

𑀓𑀣𑀁𑀯𑀺𑀥𑀁 𑀲𑀻𑀮𑀯𑀦𑁆𑀢𑀁 𑀯𑀤𑀦𑁆𑀢𑀺, 𑀓𑀣𑀁𑀯𑀺𑀥𑀁 𑀧𑀜𑁆𑀜𑀯𑀦𑁆𑀢𑀁 𑀯𑀤𑀦𑁆𑀢𑀺;

𑀓𑀣𑀁𑀯𑀺𑀥𑀁 𑀲𑀧𑁆𑀧𑀼𑀭𑀺𑀲𑀁 𑀯𑀤𑀦𑁆𑀢𑀺, 𑀓𑀣𑀁𑀯𑀺𑀥𑀁 𑀦𑁄 𑀲𑀺𑀭𑀺 𑀦𑁄 𑀚𑀳𑀸𑀢𑀺’’.

𑁭𑁬. ‘‘𑀓𑀸𑀬𑁂𑀦 𑀯𑀸𑀘𑀸𑀬 𑀘 𑀬𑁄’𑀥 [𑀬𑁄 𑀘 (𑀧𑀻.)] 𑀲𑀜𑁆𑀜𑀢𑁄, 𑀫𑀦𑀲𑀸 𑀘 𑀓𑀺𑀜𑁆𑀘𑀺 𑀦 𑀓𑀭𑁄𑀢𑀺 𑀧𑀸𑀧𑀁;

𑀦 𑀅𑀢𑁆𑀢𑀳𑁂𑀢𑀽 𑀅𑀮𑀺𑀓𑀁 𑀪𑀡𑁂𑀢𑀺 [𑀪𑀡𑀸𑀢𑀺 (𑀲𑀻. 𑀲𑁆𑀬𑀸. 𑀧𑀻.)], 𑀢𑀣𑀸𑀯𑀺𑀥𑀁 𑀲𑀻𑀮𑀯𑀦𑁆𑀢𑀁 𑀯𑀤𑀦𑁆𑀢𑀺.

𑁭𑁭. ‘‘𑀕𑀫𑁆𑀪𑀻𑀭𑀧𑀜𑁆𑀳𑀁 𑀫𑀦𑀲𑀸𑀪𑀺𑀘𑀺𑀦𑁆𑀢𑀬𑀁 [𑀫𑀦𑀲𑀸 𑀯𑀺𑀘𑀺𑀦𑁆𑀢𑀬𑀁 (𑀲𑀻.)], 𑀦𑀸𑀘𑁆𑀘𑀸𑀳𑀺𑀢𑀁 𑀓𑀫𑁆𑀫 𑀓𑀭𑁄𑀢𑀺 𑀮𑀼𑀤𑁆𑀤𑀁;

𑀓𑀸𑀮𑀸𑀕𑀢𑀁 [𑀓𑀸𑀮𑀸𑀪𑀢𑀁 (𑀧𑀻.)] 𑀅𑀢𑁆𑀣𑀧𑀤𑀁 𑀦 𑀭𑀺𑀜𑁆𑀘𑀢𑀺, 𑀢𑀣𑀸𑀯𑀺𑀥𑀁 𑀧𑀜𑁆𑀜𑀯𑀦𑁆𑀢𑀁 𑀯𑀤𑀦𑁆𑀢𑀺.

𑁭𑁮. ‘‘𑀬𑁄 𑀯𑁂 𑀓𑀢𑀜𑁆𑀜𑀽 𑀓𑀢𑀯𑁂𑀤𑀺 𑀥𑀻𑀭𑁄, 𑀓𑀮𑁆𑀬𑀸𑀡𑀫𑀺𑀢𑁆𑀢𑁄 𑀤𑀴𑁆𑀳𑀪𑀢𑁆𑀢𑀺 𑀘 𑀳𑁄𑀢𑀺;

𑀤𑀼𑀔𑀺𑀢𑀲𑁆𑀲 𑀲𑀓𑁆𑀓𑀘𑁆𑀘 𑀓𑀭𑁄𑀢𑀺 𑀓𑀺𑀘𑁆𑀘𑀁, 𑀢𑀣𑀸𑀯𑀺𑀥𑀁 𑀲𑀧𑁆𑀧𑀼𑀭𑀺𑀲𑀁 𑀯𑀤𑀦𑁆𑀢𑀺.

𑁭𑁯. ‘‘𑀏𑀢𑁂𑀳𑀺 𑀲𑀩𑁆𑀩𑁂𑀳𑀺 𑀕𑀼𑀡𑁂𑀳𑀼𑀧𑁂𑀢𑁄, 𑀲𑀤𑁆𑀥𑁄 𑀫𑀼𑀤𑀽 𑀲𑀁𑀯𑀺𑀪𑀸𑀕𑀻 𑀯𑀤𑀜𑁆𑀜𑀽;

𑀲𑀗𑁆𑀕𑀸𑀳𑀓𑀁 𑀲𑀔𑀺𑀮𑀁 𑀲𑀡𑁆𑀳𑀯𑀸𑀘𑀁, 𑀢𑀣𑀸𑀯𑀺𑀥𑀁 𑀦𑁄 𑀲𑀺𑀭𑀺 𑀦𑁄 𑀚𑀳𑀸𑀢𑀺’’.

𑁮𑁦. ‘‘𑀲𑀼𑀪𑀸𑀲𑀺𑀢𑀁 𑀢𑁂 𑀅𑀦𑀼𑀫𑁄𑀤𑀺𑀬𑀸𑀦, 𑀅𑀜𑁆𑀜𑀁 𑀢𑀁 𑀧𑀼𑀘𑁆𑀙𑀸𑀫𑀺 𑀢𑀤𑀺𑀗𑁆𑀖 𑀩𑁆𑀭𑀽𑀳𑀺;

𑀲𑀻𑀮𑀁 𑀲𑀺𑀭𑀺𑀜𑁆𑀘𑀸𑀧𑀺 𑀲𑀢𑀜𑁆𑀘 𑀥𑀫𑁆𑀫𑀁, 𑀧𑀜𑁆𑀜𑀜𑁆𑀘 𑀓𑀁 𑀲𑁂𑀝𑁆𑀞𑀢𑀭𑀁 𑀯𑀤𑀦𑁆𑀢𑀺’’.

𑁮𑁧. ‘‘𑀧𑀜𑁆𑀜𑀸 𑀳𑀺 𑀲𑁂𑀝𑁆𑀞𑀸 𑀓𑀼𑀲𑀮𑀸 𑀯𑀤𑀦𑁆𑀢𑀺, 𑀦𑀓𑁆𑀔𑀢𑁆𑀢𑀭𑀸𑀚𑀸𑀭𑀺𑀯 𑀢𑀸𑀭𑀓𑀸𑀦𑀁;

𑀲𑀻𑀮𑀁 𑀲𑀻𑀭𑀻 𑀘𑀸𑀧𑀺 𑀲𑀢𑀜𑁆𑀘 𑀥𑀫𑁆𑀫𑁄 [𑀥𑀫𑁆𑀫𑀸 (𑀧𑀻.)], 𑀅𑀦𑁆𑀯𑀸𑀬𑀺𑀓𑀸 𑀧𑀜𑁆𑀜𑀯𑀢𑁄 𑀪𑀯𑀦𑁆𑀢𑀺’’.

𑁮𑁨. ‘‘𑀲𑀼𑀪𑀸𑀲𑀺𑀢𑀁 𑀢𑁂 𑀅𑀦𑀼𑀫𑁄𑀤𑀺𑀬𑀸𑀦, 𑀅𑀜𑁆𑀜𑀁 𑀢𑀁 𑀧𑀼𑀘𑁆𑀙𑀸𑀫𑀺 𑀢𑀤𑀺𑀗𑁆𑀖 𑀩𑁆𑀭𑀽𑀳𑀺;

𑀓𑀣𑀁𑀓𑀭𑁄 𑀓𑀺𑀦𑁆𑀢𑀺𑀓𑀭𑁄 𑀓𑀺𑀫𑀸𑀘𑀭𑀁, 𑀓𑀺𑀁 𑀲𑁂𑀯𑀫𑀸𑀦𑁄 𑀮𑀪𑀢𑀻𑀥 𑀧𑀜𑁆𑀜𑀁;

𑀧𑀜𑁆𑀜𑀸𑀬 𑀤𑀸𑀦𑀺𑀧𑁆𑀧𑀝𑀺𑀧𑀁 [𑀤𑀸𑀦𑀺 𑀧𑀝𑀺𑀧𑀤𑀁 (𑀲𑀻. 𑀲𑁆𑀬𑀸. 𑀧𑀻.)] 𑀯𑀤𑁂𑀳𑀺, 𑀓𑀣𑀁𑀓𑀭𑁄 𑀧𑀜𑁆𑀜𑀯𑀸 𑀳𑁄𑀢𑀺 𑀫𑀘𑁆𑀘𑁄’’.

𑁮𑁩. ‘‘𑀲𑁂𑀯𑁂𑀣 𑀯𑀼𑀤𑁆𑀥𑁂 𑀦𑀺𑀧𑀼𑀡𑁂 𑀩𑀳𑀼𑀲𑁆𑀲𑀼𑀢𑁂, 𑀉𑀕𑁆𑀕𑀸𑀳𑀓𑁄 𑀘 𑀧𑀭𑀺𑀧𑀼𑀘𑁆𑀙𑀓𑁄 𑀲𑀺𑀬𑀸;

𑀲𑀼𑀡𑁂𑀬𑁆𑀬 𑀲𑀓𑁆𑀓𑀘𑁆𑀘 𑀲𑀼𑀪𑀸𑀲𑀺𑀢𑀸𑀦𑀺, 𑀏𑀯𑀁𑀓𑀭𑁄 𑀧𑀜𑁆𑀜𑀯𑀸 𑀳𑁄𑀢𑀺 𑀫𑀘𑁆𑀘𑁄.

𑁮𑁪. ‘‘ 𑀧𑀜𑁆𑀜𑀯𑀸 𑀓𑀸𑀫𑀕𑀼𑀡𑁂 𑀅𑀯𑁂𑀓𑁆𑀔𑀢𑀺, 𑀅𑀦𑀺𑀘𑁆𑀘𑀢𑁄 𑀤𑀼𑀓𑁆𑀔𑀢𑁄 𑀭𑁄𑀕𑀢𑁄 𑀘;

𑀏𑀯𑀁 𑀯𑀺𑀧𑀲𑁆𑀲𑀻 𑀧𑀚𑀳𑀸𑀢𑀺 𑀙𑀦𑁆𑀤𑀁, 𑀤𑀼𑀓𑁆𑀔𑁂𑀲𑀼 𑀓𑀸𑀫𑁂𑀲𑀼 𑀫𑀳𑀩𑁆𑀪𑀬𑁂𑀲𑀼.

𑁮𑁫. ‘‘𑀲 𑀯𑀻𑀢𑀭𑀸𑀕𑁄 𑀧𑀯𑀺𑀦𑁂𑀬𑁆𑀬 𑀤𑁄𑀲𑀁, 𑀫𑁂𑀢𑁆𑀢𑀁 [𑀫𑁂𑀢𑁆𑀢 (𑀲𑁆𑀬𑀸. 𑀓.)] 𑀘𑀺𑀢𑁆𑀢𑀁 𑀪𑀸𑀯𑀬𑁂 [𑀪𑀸𑀯𑁂𑀬𑁆𑀬 (𑀲𑀻. 𑀲𑁆𑀬𑀸. 𑀓.)] 𑀅𑀧𑁆𑀧𑀫𑀸𑀡𑀁;

𑀲𑀩𑁆𑀩𑁂𑀲𑀼 𑀪𑀽𑀢𑁂𑀲𑀼 𑀦𑀺𑀥𑀸𑀬 𑀤𑀡𑁆𑀟𑀁, 𑀅𑀦𑀺𑀦𑁆𑀤𑀺𑀢𑁄 𑀩𑁆𑀭𑀳𑁆𑀫𑀫𑀼𑀧𑁂𑀢𑀺 𑀞𑀸𑀦𑀁’’.

𑁮𑁬. ‘‘𑀫𑀳𑀢𑁆𑀣𑀺𑀬𑀁 [𑀫𑀳𑀺𑀤𑁆𑀥𑀺𑀬𑀁 (𑀲𑀻. 𑀲𑁆𑀬𑀸. 𑀧𑀻.)] 𑀆𑀕𑀫𑀦𑀁 𑀅𑀳𑁄𑀲𑀺, 𑀢𑀯𑀫𑀝𑁆𑀞𑀓𑀸 [𑀫𑀝𑁆𑀞𑀓 (𑀲𑀻. 𑀲𑁆𑀬𑀸. 𑀓.)] 𑀪𑀻𑀫𑀭𑀣𑀲𑁆𑀲 𑀘𑀸𑀧𑀺;

𑀓𑀸𑀮𑀺𑀗𑁆𑀕𑀭𑀸𑀚𑀲𑁆𑀲 𑀘 𑀉𑀕𑁆𑀕𑀢𑀲𑁆𑀲, 𑀲𑀩𑁆𑀩𑁂𑀲 𑀯𑁄 𑀓𑀸𑀫𑀭𑀸𑀕𑁄 𑀧𑀳𑀻𑀦𑁄’’.

𑁮𑁭. ‘‘𑀏𑀯𑀫𑁂𑀢𑀁 𑀧𑀭𑀘𑀺𑀢𑁆𑀢𑀯𑁂𑀤𑀺, 𑀲𑀩𑁆𑀩𑁂𑀲 𑀦𑁄 𑀓𑀸𑀫𑀭𑀸𑀕𑁄 𑀧𑀳𑀻𑀦𑁄;

𑀓𑀭𑁄𑀳𑀺 𑀑𑀓𑀸𑀲𑀫𑀦𑀼𑀕𑁆𑀕𑀳𑀸𑀬, 𑀬𑀣𑀸 𑀕𑀢𑀺𑀁 𑀢𑁂 𑀅𑀪𑀺𑀲𑀫𑁆𑀪𑀯𑁂𑀫’’.

𑁮𑁮. ‘‘𑀓𑀭𑁄𑀫𑀺 𑀑𑀓𑀸𑀲𑀫𑀦𑀼𑀕𑁆𑀕𑀳𑀸𑀬, 𑀢𑀣𑀸 𑀳𑀺 𑀯𑁄 𑀓𑀸𑀫𑀭𑀸𑀕𑁄 𑀧𑀳𑀻𑀦𑁄;

𑀨𑀭𑀸𑀣 𑀓𑀸𑀬𑀁 𑀯𑀺𑀧𑀼𑀮𑀸𑀬 𑀧𑀻𑀢𑀺𑀬𑀸, 𑀬𑀣𑀸 𑀕𑀢𑀺𑀁 𑀫𑁂 𑀅𑀪𑀺𑀲𑀫𑁆𑀪𑀯𑁂𑀣’’.

𑁮𑁯. ‘‘𑀲𑀩𑁆𑀩𑀁 𑀓𑀭𑀺𑀲𑁆𑀲𑀸𑀫 𑀢𑀯𑀸𑀦𑀼𑀲𑀸𑀲𑀦𑀺𑀁, 𑀬𑀁 𑀬𑀁 𑀢𑀼𑀯𑀁 𑀯𑀓𑁆𑀔𑀲𑀺 𑀪𑀽𑀭𑀺𑀧𑀜𑁆𑀜;

𑀨𑀭𑀸𑀫 𑀓𑀸𑀬𑀁 𑀯𑀺𑀧𑀼𑀮𑀸𑀬 𑀧𑀻𑀢𑀺𑀬𑀸, 𑀬𑀣𑀸 𑀕𑀢𑀺𑀁 𑀢𑁂 𑀅𑀪𑀺𑀲𑀫𑁆𑀪𑀯𑁂𑀫’’.

𑁯𑁦. ‘‘𑀓𑀢𑀸𑀬 [𑀓𑀢𑀸𑀬𑀁 (𑀲𑀻. 𑀧𑀻.)] 𑀯𑀘𑁆𑀙𑀲𑁆𑀲 𑀓𑀺𑀲𑀲𑁆𑀲 𑀧𑀽𑀚𑀸, 𑀕𑀘𑁆𑀙𑀦𑁆𑀢𑀼 𑀪𑁄𑀦𑁆𑀢𑁄 𑀇𑀲𑀬𑁄 𑀲𑀸𑀥𑀼𑀭𑀽𑀧𑀸;

𑀛𑀸𑀦𑁂 𑀭𑀢𑀸 𑀳𑁄𑀣 𑀲𑀤𑀸 𑀲𑀫𑀸𑀳𑀺𑀢𑀸, 𑀏𑀲𑀸 𑀭𑀢𑀻 𑀧𑀩𑁆𑀩𑀚𑀺𑀢𑀲𑁆𑀲 𑀲𑁂𑀝𑁆𑀞𑀸’’.

𑁯𑁧. ‘‘𑀲𑀼𑀢𑁆𑀯𑀸𑀦 𑀕𑀸𑀣𑀸 𑀧𑀭𑀫𑀢𑁆𑀣𑀲𑀁𑀳𑀺𑀢𑀸, 𑀲𑀼𑀪𑀸𑀲𑀺𑀢𑀸 𑀇𑀲𑀺𑀦𑀸 𑀧𑀡𑁆𑀟𑀺𑀢𑁂𑀦;

𑀢𑁂 𑀯𑁂𑀤𑀚𑀸𑀢𑀸 𑀅𑀦𑀼𑀫𑁄𑀤𑀫𑀸𑀦𑀸, 𑀧𑀓𑁆𑀓𑀸𑀫𑀼 [𑀧𑀓𑁆𑀓𑀫𑀼 (𑀓.)] 𑀤𑁂𑀯𑀸 𑀤𑁂𑀯𑀧𑀼𑀭𑀁 𑀬𑀲𑀲𑁆𑀲𑀺𑀦𑁄.

𑁯𑁨. ‘‘𑀕𑀸𑀣𑀸 𑀇𑀫𑀸 𑀅𑀢𑁆𑀣𑀯𑀢𑀻 𑀲𑀼𑀩𑁆𑀬𑀜𑁆𑀚𑀦𑀸, 𑀲𑀼𑀪𑀸𑀲𑀺𑀢𑀸 𑀇𑀲𑀺𑀦𑀸 𑀧𑀡𑁆𑀟𑀺𑀢𑁂𑀦;

𑀬𑁄 𑀓𑁄𑀘𑀺𑀫𑀸 𑀅𑀝𑁆𑀞𑀺𑀓𑀢𑁆𑀯𑀸 [𑀅𑀝𑁆𑀞𑀺𑀁 𑀓𑀢𑁆𑀯𑀸 (𑀓.)] 𑀲𑀼𑀡𑁂𑀬𑁆𑀬, 𑀮𑀪𑁂𑀣 𑀧𑀼𑀩𑁆𑀩𑀸𑀧𑀭𑀺𑀬𑀁 𑀯𑀺𑀲𑁂𑀲𑀁;

𑀮𑀤𑁆𑀥𑀸𑀦 𑀧𑀼𑀩𑁆𑀩𑀸𑀧𑀭𑀺𑀬𑀁 𑀯𑀺𑀲𑁂𑀲𑀁, 𑀅𑀤𑀲𑁆𑀲𑀦𑀁 𑀫𑀘𑁆𑀘𑀼𑀭𑀸𑀚𑀲𑁆𑀲 𑀕𑀘𑁆𑀙𑁂’’.

𑁯𑁩. ‘‘𑀲𑀸𑀮𑀺𑀲𑁆𑀲𑀭𑁄 𑀲𑀸𑀭𑀺𑀧𑀼𑀢𑁆𑀢𑁄, 𑀫𑁂𑀡𑁆𑀟𑀺𑀲𑁆𑀲𑀭𑁄 𑀘 𑀓𑀲𑁆𑀲𑀧𑁄;

𑀧𑀩𑁆𑀩𑀢𑁄 𑀅𑀦𑀼𑀭𑀼𑀤𑁆𑀥𑁄 𑀘, 𑀓𑀘𑁆𑀘𑀸𑀬𑀦𑁄 𑀘 𑀤𑁂𑀯𑀮𑁄 [𑀤𑁂𑀯𑀺𑀮𑁄 (𑀲𑁆𑀬𑀸. 𑀓.)].

𑁯𑁪. ‘‘𑀅𑀦𑀼𑀲𑀺𑀲𑁆𑀲𑁄 𑀘 𑀆𑀦𑀦𑁆𑀤𑁄, 𑀓𑀺𑀲𑀯𑀘𑁆𑀙𑁄 𑀘 𑀓𑁄𑀮𑀺𑀢𑁄;

𑀦𑀸𑀭𑀤𑁄 𑀉𑀤𑀸𑀬𑀻 𑀣𑁂𑀭𑁄 [𑀦𑀸𑀭𑀤𑁄 𑀧𑀼𑀡𑁆𑀡𑁄 𑀫𑀦𑁆𑀢𑀸𑀦𑀻𑀧𑀼𑀢𑁆𑀢𑁄 (𑀲𑀻.)], 𑀧𑀭𑀺𑀲𑀸 𑀩𑀼𑀤𑁆𑀥𑀧𑀭𑀺𑀲𑀸;

𑀲𑀭𑀪𑀗𑁆𑀕𑁄 𑀮𑁄𑀓𑀦𑀸𑀣𑁄, 𑀏𑀯𑀁 𑀥𑀸𑀭𑁂𑀣 𑀚𑀸𑀢𑀓’’𑀦𑁆𑀢𑀺.

𑀲𑀭𑀪𑀗𑁆𑀕𑀚𑀸𑀢𑀓𑀁 𑀤𑀼𑀢𑀺𑀬𑀁.