𑁯. 𑀓𑀼𑀳𑀲𑀼𑀢𑁆𑀢𑀁

𑁧𑁦𑁮. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸, 𑀯𑀼𑀢𑁆𑀢𑀫𑀭𑀳𑀢𑀸𑀢𑀺 𑀫𑁂 𑀲𑀼𑀢𑀁 𑁋

‘‘𑀬𑁂 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀓𑀼𑀳𑀸 𑀣𑀤𑁆𑀥𑀸 𑀮𑀧𑀸 𑀲𑀺𑀗𑁆𑀕𑀻 𑀉𑀦𑁆𑀦𑀴𑀸 𑀅𑀲𑀫𑀸𑀳𑀺𑀢𑀸, 𑀦 𑀫𑁂 𑀢𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀫𑀸𑀫𑀓𑀸. 𑀅𑀧𑀕𑀢𑀸 𑀘 𑀢𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀇𑀫𑀲𑁆𑀫𑀸 𑀥𑀫𑁆𑀫𑀯𑀺𑀦𑀬𑀸; 𑀦 𑀘 𑀢𑁂 [𑀦 𑀘 𑀢𑁂 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀽 (𑀲𑀻. 𑀧𑀻. 𑀓.)] 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀦𑁆𑀢𑀺. 𑀬𑁂 𑀘 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀦𑀺𑀓𑁆𑀓𑀼𑀳𑀸 𑀦𑀺𑀮𑁆𑀮𑀧𑀸 𑀥𑀻𑀭𑀸 𑀅𑀢𑁆𑀣𑀤𑁆𑀥𑀸 𑀲𑀼𑀲𑀫𑀸𑀳𑀺𑀢𑀸, 𑀢𑁂 𑀔𑁄 𑀫𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀫𑀸𑀫𑀓𑀸. 𑀅𑀦𑀧𑀕𑀢𑀸 𑀘 𑀢𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀇𑀫𑀲𑁆𑀫𑀸 𑀥𑀫𑁆𑀫𑀯𑀺𑀦𑀬𑀸; 𑀢𑁂 𑀘 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 [𑀇𑀫𑀲𑁆𑀫𑀺𑀁 𑀘 𑀢𑁂 𑀥𑀫𑁆𑀫𑀯𑀺𑀦𑀬𑁂 (𑀲𑁆𑀬𑀸.), 𑀢𑁂 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀽 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 (𑀓.)] 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀦𑁆𑀢𑀻’’𑀢𑀺. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘. 𑀢𑀢𑁆𑀣𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺 𑁋

‘‘𑀓𑀼𑀳𑀸 𑀣𑀤𑁆𑀥𑀸 𑀮𑀧𑀸 𑀲𑀺𑀗𑁆𑀕𑀻, 𑀉𑀦𑁆𑀦𑀴𑀸 𑀅𑀲𑀫𑀸𑀳𑀺𑀢𑀸;

𑀦 𑀢𑁂 𑀥𑀫𑁆𑀫𑁂 𑀯𑀺𑀭𑀽𑀳𑀦𑁆𑀢𑀺, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀤𑁂𑀲𑀺𑀢𑁂.

‘‘𑀦𑀺𑀓𑁆𑀓𑀼𑀳𑀸 𑀦𑀺𑀮𑁆𑀮𑀧𑀸 𑀥𑀻𑀭𑀸, 𑀅𑀢𑁆𑀣𑀤𑁆𑀥𑀸 𑀲𑀼𑀲𑀫𑀸𑀳𑀺𑀢𑀸;

𑀢𑁂 𑀯𑁂 𑀥𑀫𑁆𑀫𑁂 𑀯𑀺𑀭𑀽𑀳𑀦𑁆𑀢𑀺, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀤𑁂𑀲𑀺𑀢𑁂’’𑀢𑀺.

𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀇𑀢𑀺 𑀫𑁂 𑀲𑀼𑀢𑀦𑁆𑀢𑀺. 𑀦𑀯𑀫𑀁.