𑁧𑁦. 𑀦𑀤𑀻𑀲𑁄𑀢𑀲𑀼𑀢𑁆𑀢𑀁

𑁧𑁦𑁯. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸, 𑀯𑀼𑀢𑁆𑀢𑀫𑀭𑀳𑀢𑀸𑀢𑀺 𑀫𑁂 𑀲𑀼𑀢𑀁 𑁋

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑁄 𑀦𑀤𑀺𑀬𑀸 𑀲𑁄𑀢𑁂𑀦 𑀑𑀯𑀼𑀬𑁆𑀳𑁂𑀬𑁆𑀬 𑀧𑀺𑀬𑀭𑀽𑀧𑀲𑀸𑀢𑀭𑀽𑀧𑁂𑀦. 𑀢𑀫𑁂𑀦𑀁 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄 𑀢𑀻𑀭𑁂 𑀞𑀺𑀢𑁄 𑀤𑀺𑀲𑁆𑀯𑀸 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀓𑀺𑀜𑁆𑀘𑀸𑀧𑀺 𑀔𑁄 𑀢𑁆𑀯𑀁, 𑀅𑀫𑁆𑀪𑁄 𑀧𑀼𑀭𑀺𑀲, 𑀦𑀤𑀺𑀬𑀸 𑀲𑁄𑀢𑁂𑀦 𑀑𑀯𑀼𑀬𑁆𑀳𑀲𑀺 𑀧𑀺𑀬𑀭𑀽𑀧𑀲𑀸𑀢𑀭𑀽𑀧𑁂𑀦, 𑀅𑀢𑁆𑀣𑀺 𑀘𑁂𑀢𑁆𑀣 𑀳𑁂𑀝𑁆𑀞𑀸 𑀭𑀳𑀤𑁄 𑀲𑀊𑀫𑀺 𑀲𑀸𑀯𑀝𑁆𑀝𑁄 𑀲𑀕𑀳𑁄 𑀲𑀭𑀓𑁆𑀔𑀲𑁄 𑀬𑀁 𑀢𑁆𑀯𑀁, 𑀅𑀫𑁆𑀪𑁄 𑀧𑀼𑀭𑀺𑀲, 𑀭𑀳𑀤𑀁 𑀧𑀸𑀧𑀼𑀡𑀺𑀢𑁆𑀯𑀸 𑀫𑀭𑀡𑀁 𑀯𑀸 𑀦𑀺𑀕𑀘𑁆𑀙𑀲𑀺 𑀫𑀭𑀡𑀫𑀢𑁆𑀢𑀁 𑀯𑀸 𑀤𑀼𑀓𑁆𑀔’𑀦𑁆𑀢𑀺. 𑀅𑀣 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑁄 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀳𑀢𑁆𑀣𑁂𑀳𑀺 𑀘 𑀧𑀸𑀤𑁂𑀳𑀺 𑀘 𑀧𑀝𑀺𑀲𑁄𑀢𑀁 𑀯𑀸𑀬𑀫𑁂𑀬𑁆𑀬.

‘‘𑀉𑀧𑀫𑀸 𑀔𑁄 𑀫𑁂 𑀅𑀬𑀁, 𑀪𑀺𑀓𑁆𑀔𑀯𑁂, 𑀓𑀢𑀸 𑀅𑀢𑁆𑀣𑀲𑁆𑀲 𑀯𑀺𑀜𑁆𑀜𑀸𑀧𑀦𑀸𑀬. 𑀅𑀬𑀁 𑀘𑁂𑀢𑁆𑀣 [𑀅𑀬𑀁 𑀘𑁂𑀯𑁂𑀢𑁆𑀣 (𑀲𑁆𑀬𑀸.)] 𑀅𑀢𑁆𑀣𑁄 𑁋 ‘𑀦𑀤𑀺𑀬𑀸 𑀲𑁄𑀢𑁄’𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀡𑁆𑀳𑀸𑀬𑁂𑀢𑀁 𑀅𑀥𑀺𑀯𑀘𑀦𑀁.

‘‘‘𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧’𑀦𑁆𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀙𑀦𑁆𑀦𑁂𑀢𑀁 𑀅𑀚𑁆𑀛𑀢𑁆𑀢𑀺𑀓𑀸𑀦𑀁 𑀆𑀬𑀢𑀦𑀸𑀦𑀁 𑀅𑀥𑀺𑀯𑀘𑀦𑀁.

‘‘‘𑀳𑁂𑀝𑁆𑀞𑀸 𑀭𑀳𑀤𑁄’𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀦𑁆𑀦𑀁 𑀑𑀭𑀫𑁆𑀪𑀸𑀕𑀺𑀬𑀸𑀦𑀁 𑀲𑀁𑀬𑁄𑀚𑀦𑀸𑀦𑀁 𑀅𑀥𑀺𑀯𑀘𑀦𑀁;

‘‘‘𑀊𑀫𑀺𑀪𑀬’𑀦𑁆𑀢𑀺 𑀔𑁄 [𑀲𑀜𑀻𑀫𑀻𑀢𑀺 𑀔𑁄 (𑀩𑀳𑀽𑀲𑀼)], 𑀪𑀺𑀓𑁆𑀔𑀯𑁂, 𑀓𑁄𑀥𑀼𑀧𑀸𑀬𑀸𑀲𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁;

‘‘‘𑀆𑀯𑀝𑁆𑀝’𑀦𑁆𑀢𑀺 𑀔𑁄 [𑀲𑀸𑀯𑀝𑁆𑀝𑁄𑀢𑀺 𑀔𑁄 (𑀩𑀳𑀽𑀲𑀼)], 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀦𑁆𑀦𑁂𑀢𑀁 𑀓𑀸𑀫𑀕𑀼𑀡𑀸𑀦𑀁 𑀅𑀥𑀺𑀯𑀘𑀦𑀁;

‘‘‘𑀕𑀳𑀭𑀓𑁆𑀔𑀲𑁄’𑀢𑀺 𑀔𑁄 [𑀲𑀕𑀳𑁄 𑀲𑀭𑀓𑁆𑀔𑀲𑁄𑀢𑀺 𑀔𑁄 (𑀩𑀳𑀽𑀲𑀼)], 𑀪𑀺𑀓𑁆𑀔𑀯𑁂, 𑀫𑀸𑀢𑀼𑀕𑀸𑀫𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁;

‘‘‘𑀧𑀝𑀺𑀲𑁄𑀢𑁄’𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀦𑁂𑀓𑁆𑀔𑀫𑁆𑀫𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁;

‘‘‘𑀳𑀢𑁆𑀣𑁂𑀳𑀺 𑀘 𑀧𑀸𑀤𑁂𑀳𑀺 𑀘 𑀯𑀸𑀬𑀸𑀫𑁄’𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀯𑀻𑀭𑀺𑀬𑀸𑀭𑀫𑁆𑀪𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁;

‘‘‘𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄 𑀢𑀻𑀭𑁂 𑀞𑀺𑀢𑁄𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲𑀸’’𑀢𑀺. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘. 𑀢𑀢𑁆𑀣𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺 𑁋

‘‘𑀲𑀳𑀸𑀧𑀺 𑀤𑀼𑀓𑁆𑀔𑁂𑀦 𑀚𑀳𑁂𑀬𑁆𑀬 𑀓𑀸𑀫𑁂, 𑀬𑁄𑀕𑀓𑁆𑀔𑁂𑀫𑀁 𑀆𑀬𑀢𑀺𑀁 𑀧𑀢𑁆𑀣𑀬𑀸𑀦𑁄;

𑀲𑀫𑁆𑀫𑀧𑁆𑀧𑀚𑀸𑀦𑁄 𑀲𑀼𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄, 𑀯𑀺𑀫𑀼𑀢𑁆𑀢𑀺𑀬𑀸 𑀨𑀲𑁆𑀲𑀬𑁂 𑀢𑀢𑁆𑀣 𑀢𑀢𑁆𑀣;

𑀲 𑀯𑁂𑀤𑀕𑀽 𑀯𑀽𑀲𑀺𑀢𑀩𑁆𑀭𑀳𑁆𑀫𑀘𑀭𑀺𑀬𑁄, 𑀮𑁄𑀓𑀦𑁆𑀢𑀕𑀽 𑀧𑀸𑀭𑀕𑀢𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺.

𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀇𑀢𑀺 𑀫𑁂 𑀲𑀼𑀢𑀦𑁆𑀢𑀺. 𑀤𑀲𑀫𑀁.