𑁧𑁧. 𑀘𑀭𑀲𑀼𑀢𑁆𑀢𑀁

𑁧𑁧𑁦. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸, 𑀯𑀼𑀢𑁆𑀢𑀫𑀭𑀳𑀢𑀸𑀢𑀺 𑀫𑁂 𑀲𑀼𑀢𑀁 𑁋

‘‘𑀘𑀭𑀢𑁄 𑀘𑁂𑀧𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀉𑀧𑁆𑀧𑀚𑁆𑀚𑀢𑀺 𑀓𑀸𑀫𑀯𑀺𑀢𑀓𑁆𑀓𑁄 𑀯𑀸 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄 𑀯𑀸 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄 𑀯𑀸. 𑀢𑀜𑁆𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀥𑀺𑀯𑀸𑀲𑁂𑀢𑀺 𑀦𑀧𑁆𑀧𑀚𑀳𑀢𑀺 𑀦 𑀯𑀺𑀦𑁄𑀤𑁂𑀢𑀺 𑀦 𑀩𑁆𑀬𑀦𑁆𑀢𑀻𑀓𑀭𑁄𑀢𑀺 [𑀩𑁆𑀬𑀦𑁆𑀢𑀺𑀓𑀭𑁄𑀢𑀺 (𑀲𑀻. 𑀧𑀻.), 𑀩𑁆𑀬𑀦𑁆𑀢𑀁 𑀓𑀭𑁄𑀢𑀺 (𑀓.)] 𑀅𑀦𑀪𑀸𑀯𑀁 𑀕𑀫𑁂𑀢𑀺. 𑀘𑀭𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁𑀪𑀽𑀢𑁄 𑀅𑀦𑀸𑀢𑀸𑀧𑀻 𑀅𑀦𑁄𑀢𑁆𑀢𑀸𑀧𑀻 [𑀅𑀦𑁄𑀢𑁆𑀢𑀧𑁆𑀧𑀻 (𑀲𑀩𑁆𑀩𑀢𑁆𑀣) 𑀤𑀼𑀓𑀦𑀺𑀧𑀸𑀢𑁂, 𑀅𑀗𑁆𑀕𑀼𑀢𑁆𑀢𑀭𑁂 𑁧.𑁪.𑁧𑁧 𑀧𑀲𑁆𑀲𑀺𑀢𑀩𑁆𑀩𑀁] 𑀲𑀢𑀢𑀁 𑀲𑀫𑀺𑀢𑀁 𑀓𑀼𑀲𑀻𑀢𑁄 𑀳𑀻𑀦𑀯𑀻𑀭𑀺𑀬𑁄𑀢𑀺 𑀯𑀼𑀘𑁆𑀘𑀢𑀺.

‘‘𑀞𑀺𑀢𑀲𑁆𑀲 𑀘𑁂𑀧𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀉𑀧𑁆𑀧𑀚𑁆𑀚𑀢𑀺 𑀓𑀸𑀫𑀯𑀺𑀢𑀓𑁆𑀓𑁄 𑀯𑀸 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄 𑀯𑀸 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄 𑀯𑀸. 𑀢𑀜𑁆𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀥𑀺𑀯𑀸𑀲𑁂𑀢𑀺 𑀦𑀧𑁆𑀧𑀚𑀳𑀢𑀺 𑀦 𑀯𑀺𑀦𑁄𑀤𑁂𑀢𑀺 𑀦 𑀩𑁆𑀬𑀦𑁆𑀢𑀻𑀓𑀭𑁄𑀢𑀺 𑀦 𑀅𑀦𑀪𑀸𑀯𑀁 𑀕𑀫𑁂𑀢𑀺. 𑀞𑀺𑀢𑁄𑀧𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁𑀪𑀽𑀢𑁄 𑀅𑀦𑀸𑀢𑀸𑀧𑀻 𑀅𑀦𑁄𑀢𑁆𑀢𑀸𑀧𑀻 𑀲𑀢𑀢𑀁 𑀲𑀫𑀺𑀢𑀁 𑀓𑀼𑀲𑀻𑀢𑁄 𑀳𑀻𑀦𑀯𑀻𑀭𑀺𑀬𑁄𑀢𑀺 𑀯𑀼𑀘𑁆𑀘𑀢𑀺.

‘‘𑀦𑀺𑀲𑀺𑀦𑁆𑀦𑀲𑁆𑀲 𑀘𑁂𑀧𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀉𑀧𑁆𑀧𑀚𑁆𑀚𑀢𑀺 𑀓𑀸𑀫𑀯𑀺𑀢𑀓𑁆𑀓𑁄 𑀯𑀸 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄 𑀯𑀸 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄 𑀯𑀸. 𑀢𑀜𑁆𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀥𑀺𑀯𑀸𑀲𑁂𑀢𑀺 𑀦𑀧𑁆𑀧𑀚𑀳𑀢𑀺 𑀦 𑀯𑀺𑀦𑁄𑀤𑁂𑀢𑀺 𑀦 𑀩𑁆𑀬𑀦𑁆𑀢𑀻𑀓𑀭𑁄𑀢𑀺 𑀦 𑀅𑀦𑀪𑀸𑀯𑀁 𑀕𑀫𑁂𑀢𑀺. 𑀦𑀺𑀲𑀺𑀦𑁆𑀦𑁄𑀧𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁𑀪𑀽𑀢𑁄 𑀅𑀦𑀸𑀢𑀸𑀧𑀻 𑀅𑀦𑁄𑀢𑁆𑀢𑀸𑀧𑀻 𑀲𑀢𑀢𑀁 𑀲𑀫𑀺𑀢𑀁 𑀓𑀼𑀲𑀻𑀢𑁄 𑀳𑀻𑀦𑀯𑀻𑀭𑀺𑀬𑁄𑀢𑀺 𑀯𑀼𑀘𑁆𑀘𑀢𑀺.

‘‘𑀲𑀬𑀸𑀦𑀲𑁆𑀲 𑀘𑁂𑀧𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀚𑀸𑀕𑀭𑀲𑁆𑀲 𑀉𑀧𑁆𑀧𑀚𑁆𑀚𑀢𑀺 𑀓𑀸𑀫𑀯𑀺𑀢𑀓𑁆𑀓𑁄 𑀯𑀸 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄 𑀯𑀸 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄 𑀯𑀸. 𑀢𑀜𑁆𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀥𑀺𑀯𑀸𑀲𑁂𑀢𑀺 𑀦𑀧𑁆𑀧𑀚𑀳𑀢𑀺 𑀦 𑀯𑀺𑀦𑁄𑀤𑁂𑀢𑀺 𑀦 𑀩𑁆𑀬𑀦𑁆𑀢𑀻𑀓𑀭𑁄𑀢𑀺 𑀦 𑀅𑀦𑀪𑀸𑀯𑀁 𑀕𑀫𑁂𑀢𑀺. 𑀲𑀬𑀸𑀦𑁄𑀧𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀚𑀸𑀕𑀭𑁄 𑀏𑀯𑀁𑀪𑀽𑀢𑁄 𑀅𑀦𑀸𑀢𑀸𑀧𑀻 𑀅𑀦𑁄𑀢𑁆𑀢𑀸𑀧𑀻 𑀲𑀢𑀢𑀁 𑀲𑀫𑀺𑀢𑀁 𑀓𑀼𑀲𑀻𑀢𑁄 𑀳𑀻𑀦𑀯𑀻𑀭𑀺𑀬𑁄𑀢𑀺 𑀯𑀼𑀘𑁆𑀘𑀢𑀺.

‘‘𑀘𑀭𑀢𑁄 𑀘𑁂𑀧𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀉𑀧𑁆𑀧𑀚𑁆𑀚𑀢𑀺 𑀓𑀸𑀫𑀯𑀺𑀢𑀓𑁆𑀓𑁄 𑀯𑀸 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄 𑀯𑀸 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄 𑀯𑀸. 𑀢𑀜𑁆𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦𑀸𑀥𑀺𑀯𑀸𑀲𑁂𑀢𑀺 𑀧𑀚𑀳𑀢𑀺 𑀯𑀺𑀦𑁄𑀤𑁂𑀢𑀺 𑀩𑁆𑀬𑀦𑁆𑀢𑀻𑀓𑀭𑁄𑀢𑀺 𑀅𑀦𑀪𑀸𑀯𑀁 𑀕𑀫𑁂𑀢𑀺. 𑀘𑀭𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁𑀪𑀽𑀢𑁄 𑀆𑀢𑀸𑀧𑀻 𑀑𑀢𑁆𑀢𑀸𑀧𑀻 [𑀑𑀢𑁆𑀢𑀧𑁆𑀧𑀻 (𑀲𑀩𑁆𑀩𑀢𑁆𑀣)] 𑀲𑀢𑀢𑀁 𑀲𑀫𑀺𑀢𑀁 𑀆𑀭𑀤𑁆𑀥𑀯𑀻𑀭𑀺𑀬𑁄 𑀧𑀳𑀺𑀢𑀢𑁆𑀢𑁄𑀢𑀺 𑀯𑀼𑀘𑁆𑀘𑀢𑀺.

‘‘𑀞𑀺𑀢𑀲𑁆𑀲 𑀘𑁂𑀧𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀉𑀧𑁆𑀧𑀚𑁆𑀚𑀢𑀺 𑀓𑀸𑀫𑀯𑀺𑀢𑀓𑁆𑀓𑁄 𑀯𑀸 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄 𑀯𑀸 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄 𑀯𑀸. 𑀢𑀜𑁆𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦𑀸𑀥𑀺𑀯𑀸𑀲𑁂𑀢𑀺 𑀧𑀚𑀳𑀢𑀺 𑀯𑀺𑀦𑁄𑀤𑁂𑀢𑀺 𑀩𑁆𑀬𑀦𑁆𑀢𑀻𑀓𑀭𑁄𑀢𑀺 𑀅𑀦𑀪𑀸𑀯𑀁 𑀕𑀫𑁂𑀢𑀺. 𑀞𑀺𑀢𑁄𑀧𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁𑀪𑀽𑀢𑁄 𑀆𑀢𑀸𑀧𑀻 𑀑𑀢𑁆𑀢𑀸𑀧𑀻 𑀲𑀢𑀢𑀁 𑀲𑀫𑀺𑀢𑀁 𑀆𑀭𑀤𑁆𑀥𑀯𑀻𑀭𑀺𑀬𑁄 𑀧𑀳𑀺𑀢𑀢𑁆𑀢𑁄𑀢𑀺 𑀯𑀼𑀘𑁆𑀘𑀢𑀺.

‘‘𑀦𑀺𑀲𑀺𑀦𑁆𑀦𑀲𑁆𑀲 𑀘𑁂𑀧𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀉𑀧𑁆𑀧𑀚𑁆𑀚𑀢𑀺 𑀓𑀸𑀫𑀯𑀺𑀢𑀓𑁆𑀓𑁄 𑀯𑀸 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄 𑀯𑀸 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄 𑀯𑀸. 𑀢𑀜𑁆𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦𑀸𑀥𑀺𑀯𑀸𑀲𑁂𑀢𑀺 𑀧𑀚𑀳𑀢𑀺 𑀯𑀺𑀦𑁄𑀤𑁂𑀢𑀺 𑀩𑁆𑀬𑀦𑁆𑀢𑀻𑀓𑀭𑁄𑀢𑀺 𑀅𑀦𑀪𑀸𑀯𑀁 𑀕𑀫𑁂𑀢𑀺. 𑀦𑀺𑀲𑀺𑀦𑁆𑀦𑁄𑀧𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁𑀪𑀽𑀢𑁄 𑀆𑀢𑀸𑀧𑀻 𑀑𑀢𑁆𑀢𑀸𑀧𑀻 𑀲𑀢𑀢𑀁 𑀲𑀫𑀺𑀢𑀁 𑀆𑀭𑀤𑁆𑀥𑀯𑀻𑀭𑀺𑀬𑁄 𑀧𑀳𑀺𑀢𑀢𑁆𑀢𑁄𑀢𑀺 𑀯𑀼𑀘𑁆𑀘𑀢𑀺.

‘‘𑀲𑀬𑀸𑀦𑀲𑁆𑀲 𑀘𑁂𑀧𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀚𑀸𑀕𑀭𑀲𑁆𑀲 𑀉𑀧𑁆𑀧𑀚𑁆𑀚𑀢𑀺 𑀓𑀸𑀫𑀯𑀺𑀢𑀓𑁆𑀓𑁄 𑀯𑀸 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄 𑀯𑀸 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄 𑀯𑀸. 𑀢𑀜𑁆𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦𑀸𑀥𑀺𑀯𑀸𑀲𑁂𑀢𑀺 𑀧𑀚𑀳𑀢𑀺 𑀯𑀺𑀦𑁄𑀤𑁂𑀢𑀺 𑀩𑁆𑀬𑀦𑁆𑀢𑀻𑀓𑀭𑁄𑀢𑀺 𑀅𑀦𑀪𑀸𑀯𑀁 𑀕𑀫𑁂𑀢𑀺. 𑀲𑀬𑀸𑀦𑁄𑀧𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀚𑀸𑀕𑀭𑁄 𑀏𑀯𑀁𑀪𑀽𑀢𑁄 𑀆𑀢𑀸𑀧𑀻 𑀑𑀢𑁆𑀢𑀸𑀧𑀻 𑀲𑀢𑀢𑀁 𑀲𑀫𑀺𑀢𑀁 𑀆𑀭𑀤𑁆𑀥𑀯𑀻𑀭𑀺𑀬𑁄 𑀧𑀳𑀺𑀢𑀢𑁆𑀢𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘. 𑀢𑀢𑁆𑀣𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺 𑁋

‘‘𑀘𑀭𑀁 𑀯𑀸 𑀬𑀤𑀺 𑀯𑀸 𑀢𑀺𑀝𑁆𑀞𑀁, 𑀦𑀺𑀲𑀺𑀦𑁆𑀦𑁄 𑀉𑀤 𑀯𑀸 𑀲𑀬𑀁;

𑀬𑁄 𑀯𑀺𑀢𑀓𑁆𑀓𑀁 𑀯𑀺𑀢𑀓𑁆𑀓𑁂𑀢𑀺, 𑀧𑀸𑀧𑀓𑀁 𑀕𑁂𑀳𑀦𑀺𑀲𑁆𑀲𑀺𑀢𑀁.

‘‘𑀓𑀼𑀫𑁆𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑁄 [𑀓𑀼𑀫𑁆𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑁄 (𑀅. 𑀦𑀺. 𑁪.𑁧𑁧)] 𑀲𑁄, 𑀫𑁄𑀳𑀦𑁂𑀬𑁆𑀬𑁂𑀲𑀼 𑀫𑀼𑀘𑁆𑀙𑀺𑀢𑁄;

𑀅𑀪𑀩𑁆𑀩𑁄 𑀢𑀸𑀤𑀺𑀲𑁄 𑀪𑀺𑀓𑁆𑀔𑀼, 𑀨𑀼𑀝𑁆𑀞𑀼𑀁 𑀲𑀫𑁆𑀩𑁄𑀥𑀺𑀫𑀼𑀢𑁆𑀢𑀫𑀁.

‘‘𑀬𑁄 𑀘 𑀘𑀭𑀁 𑀯𑀸 𑀢𑀺𑀝𑁆𑀞𑀁 𑀯𑀸 [𑀬𑁄 𑀘𑀭𑀁 𑀯𑀸 𑀬𑀤𑀺 𑀯𑀸 𑀢𑀺𑀝𑁆𑀞𑀁 (𑀲𑁆𑀬𑀸.), 𑀬𑁄 𑀘𑀭𑀁 𑀯𑀸𑀣 𑀢𑀺𑀝𑁆𑀞𑀁 𑀯𑀸 (𑀲𑀻. 𑀓.)], 𑀦𑀺𑀲𑀺𑀦𑁆𑀦𑁄 𑀉𑀤 𑀯𑀸 𑀲𑀬𑀁;

𑀯𑀺𑀢𑀓𑁆𑀓𑀁 𑀲𑀫𑀬𑀺𑀢𑁆𑀯𑀸𑀦, 𑀯𑀺𑀢𑀓𑁆𑀓𑀽𑀧𑀲𑀫𑁂 𑀭𑀢𑁄;

𑀪𑀩𑁆𑀩𑁄 𑀲𑁄 𑀢𑀸𑀤𑀺𑀲𑁄 𑀪𑀺𑀓𑁆𑀔𑀼, 𑀨𑀼𑀝𑁆𑀞𑀼𑀁 𑀲𑀫𑁆𑀩𑁄𑀥𑀺𑀫𑀼𑀢𑁆𑀢𑀫’’𑀦𑁆𑀢𑀺.

𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀇𑀢𑀺 𑀫𑁂 𑀲𑀼𑀢𑀦𑁆𑀢𑀺. 𑀏𑀓𑀸𑀤𑀲𑀫𑀁.