𑁫. 𑀉𑀧𑀧𑀭𑀺𑀓𑁆𑀔𑀲𑀼𑀢𑁆𑀢𑀁

𑁯𑁪. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸, 𑀯𑀼𑀢𑁆𑀢𑀫𑀭𑀳𑀢𑀸𑀢𑀺 𑀫𑁂 𑀲𑀼𑀢𑀁 𑁋

‘‘𑀢𑀣𑀸 𑀢𑀣𑀸, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀉𑀧𑀧𑀭𑀺𑀓𑁆𑀔𑁂𑀬𑁆𑀬 𑀬𑀣𑀸 𑀬𑀣𑀸𑀲𑁆𑀲 [𑀬𑀣𑀸 𑀬𑀣𑀸 (𑀩𑀳𑀽𑀲𑀼)] 𑀉𑀧𑀧𑀭𑀺𑀓𑁆𑀔𑀢𑁄 𑀩𑀳𑀺𑀤𑁆𑀥𑀸 𑀘𑀲𑁆𑀲 𑀯𑀺𑀜𑁆𑀜𑀸𑀡𑀁 𑀅𑀯𑀺𑀓𑁆𑀔𑀺𑀢𑁆𑀢𑀁 𑀅𑀯𑀺𑀲𑀝𑀁 𑀅𑀚𑁆𑀛𑀢𑁆𑀢𑀁 𑀅𑀲𑀡𑁆𑀞𑀺𑀢𑀁 𑀅𑀦𑀼𑀧𑀸𑀤𑀸𑀬 𑀦 𑀧𑀭𑀺𑀢𑀲𑁆𑀲𑁂𑀬𑁆𑀬. 𑀩𑀳𑀺𑀤𑁆𑀥𑀸, 𑀪𑀺𑀓𑁆𑀔𑀯𑁂, 𑀯𑀺𑀜𑁆𑀜𑀸𑀡𑁂 𑀅𑀯𑀺𑀓𑁆𑀔𑀺𑀢𑁆𑀢𑁂 𑀅𑀯𑀺𑀲𑀝𑁂 𑀲𑀢𑀺 𑀅𑀚𑁆𑀛𑀢𑁆𑀢𑀁 𑀅𑀲𑀡𑁆𑀞𑀺𑀢𑁂 𑀅𑀦𑀼𑀧𑀸𑀤𑀸𑀬 𑀅𑀧𑀭𑀺𑀢𑀲𑁆𑀲𑀢𑁄 𑀆𑀬𑀢𑀺𑀁 𑀚𑀸𑀢𑀺𑀚𑀭𑀸𑀫𑀭𑀡𑀤𑀼𑀓𑁆𑀔𑀲𑀫𑀼𑀤𑀬𑀲𑀫𑁆𑀪𑀯𑁄 𑀦 𑀳𑁄𑀢𑀻’’𑀢𑀺. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘. 𑀢𑀢𑁆𑀣𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺 𑁋

‘‘𑀲𑀢𑁆𑀢𑀲𑀗𑁆𑀕𑀧𑁆𑀧𑀳𑀻𑀦𑀲𑁆𑀲, 𑀦𑁂𑀢𑁆𑀢𑀺𑀘𑁆𑀙𑀺𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄;

𑀯𑀺𑀓𑁆𑀔𑀻𑀡𑁄 𑀚𑀸𑀢𑀺𑀲𑀁𑀲𑀸𑀭𑁄, 𑀦𑀢𑁆𑀣𑀺 𑀢𑀲𑁆𑀲 𑀧𑀼𑀦𑀩𑁆𑀪𑀯𑁄’’𑀢𑀺.

𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀇𑀢𑀺 𑀫𑁂 𑀲𑀼𑀢𑀦𑁆𑀢𑀺. 𑀧𑀜𑁆𑀘𑀫𑀁.