𑁫. 𑀧𑀜𑁆𑀘𑀫𑀯𑀕𑁆𑀕𑁄

𑁧. 𑀅𑀕𑁆𑀕𑀧𑁆𑀧𑀲𑀸𑀤𑀲𑀼𑀢𑁆𑀢𑀁

𑁯𑁦. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸, 𑀯𑀼𑀢𑁆𑀢𑀫𑀭𑀳𑀢𑀸𑀢𑀺 𑀫𑁂 𑀲𑀼𑀢𑀁 𑁋

‘‘𑀢𑀬𑁄𑀫𑁂, 𑀪𑀺𑀓𑁆𑀔𑀯𑁂, 𑀅𑀕𑁆𑀕𑀧𑁆𑀧𑀲𑀸𑀤𑀸. 𑀓𑀢𑀫𑁂 𑀢𑀬𑁄? 𑀬𑀸𑀯𑀢𑀸, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀅𑀧𑀤𑀸 𑀯𑀸 𑀤𑁆𑀯𑀺𑀧𑀤𑀸 𑀯𑀸 𑀘𑀢𑀼𑀧𑁆𑀧𑀤𑀸 𑀯𑀸 𑀩𑀳𑀼𑀧𑁆𑀧𑀤𑀸 [𑀩𑀳𑀼𑀧𑀤𑀸 (𑀓.)] 𑀯𑀸 𑀭𑀽𑀧𑀺𑀦𑁄 𑀯𑀸 𑀅𑀭𑀽𑀧𑀺𑀦𑁄 𑀯𑀸 𑀲𑀜𑁆𑀜𑀺𑀦𑁄 𑀯𑀸 𑀅𑀲𑀜𑁆𑀜𑀺𑀦𑁄 𑀯𑀸 𑀦𑁂𑀯𑀲𑀜𑁆𑀜𑀺𑀦𑀸𑀲𑀜𑁆𑀜𑀺𑀦𑁄 𑀯𑀸, 𑀢𑀣𑀸𑀕𑀢𑁄 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄. 𑀬𑁂, 𑀪𑀺𑀓𑁆𑀔𑀯𑁂, 𑀩𑀼𑀤𑁆𑀥𑁂 𑀧𑀲𑀦𑁆𑀦𑀸, 𑀅𑀕𑁆𑀕𑁂 𑀢𑁂 𑀧𑀲𑀦𑁆𑀦𑀸. 𑀅𑀕𑁆𑀕𑁂 𑀔𑁄 𑀧𑀦 𑀧𑀲𑀦𑁆𑀦𑀸𑀦𑀁 𑀅𑀕𑁆𑀕𑁄 𑀯𑀺𑀧𑀸𑀓𑁄 𑀳𑁄𑀢𑀺.

‘‘𑀬𑀸𑀯𑀢𑀸, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀲𑀗𑁆𑀔𑀢𑀸 𑀯𑀸 𑀅𑀲𑀗𑁆𑀔𑀢𑀸 𑀯𑀸, 𑀯𑀺𑀭𑀸𑀕𑁄 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺, 𑀬𑀤𑀺𑀤𑀁 𑀫𑀤𑀦𑀺𑀫𑁆𑀫𑀤𑀦𑁄 𑀧𑀺𑀧𑀸𑀲𑀯𑀺𑀦𑀬𑁄 𑀆𑀮𑀬𑀲𑀫𑀼𑀕𑁆𑀖𑀸𑀢𑁄 𑀯𑀝𑁆𑀝𑀼𑀧𑀘𑁆𑀙𑁂𑀤𑁄 𑀢𑀡𑁆𑀳𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁. 𑀬𑁂, 𑀪𑀺𑀓𑁆𑀔𑀯𑁂, 𑀯𑀺𑀭𑀸𑀕𑁂 𑀥𑀫𑁆𑀫𑁂 𑀧𑀲𑀦𑁆𑀦𑀸, 𑀅𑀕𑁆𑀕𑁂 𑀢𑁂 𑀧𑀲𑀦𑁆𑀦𑀸. 𑀅𑀕𑁆𑀕𑁂 𑀔𑁄 𑀧𑀦 𑀧𑀲𑀦𑁆𑀦𑀸𑀦𑀁 𑀅𑀕𑁆𑀕𑁄 𑀯𑀺𑀧𑀸𑀓𑁄 𑀳𑁄𑀢𑀺.

‘‘𑀬𑀸𑀯𑀢𑀸, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑀸 𑀯𑀸 𑀕𑀡𑀸 𑀯𑀸, 𑀢𑀣𑀸𑀕𑀢𑀲𑀸𑀯𑀓𑀲𑀗𑁆𑀖𑁄 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺, 𑀬𑀤𑀺𑀤𑀁 𑀘𑀢𑁆𑀢𑀸𑀭𑀺 𑀧𑀼𑀭𑀺𑀲𑀬𑀼𑀕𑀸𑀦𑀺 𑀅𑀝𑁆𑀞 𑀧𑀼𑀭𑀺𑀲𑀧𑀼𑀕𑁆𑀕𑀮𑀸 𑀏𑀲 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄 𑀆𑀳𑀼𑀦𑁂𑀬𑁆𑀬𑁄 𑀧𑀸𑀳𑀼𑀦𑁂𑀬𑁆𑀬𑁄 𑀤𑀓𑁆𑀔𑀺𑀡𑁂𑀬𑁆𑀬𑁄 𑀅𑀜𑁆𑀚𑀮𑀺𑀓𑀭𑀡𑀻𑀬𑁄 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲. 𑀬𑁂, 𑀪𑀺𑀓𑁆𑀔𑀯𑁂, 𑀲𑀗𑁆𑀖𑁂 𑀧𑀲𑀦𑁆𑀦𑀸, 𑀅𑀕𑁆𑀕𑁂 𑀢𑁂 𑀧𑀲𑀦𑁆𑀦𑀸. 𑀅𑀕𑁆𑀕𑁂 𑀔𑁄 𑀧𑀦 𑀧𑀲𑀦𑁆𑀦𑀸𑀦𑀁 𑀅𑀕𑁆𑀕𑁄 𑀯𑀺𑀧𑀸𑀓𑁄 𑀳𑁄𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀢𑀬𑁄 𑀅𑀕𑁆𑀕𑀧𑁆𑀧𑀲𑀸𑀤𑀸’’𑀢𑀺. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘. 𑀢𑀢𑁆𑀣𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺 𑁋

‘‘𑀅𑀕𑁆𑀕𑀢𑁄 𑀯𑁂 𑀧𑀲𑀦𑁆𑀦𑀸𑀦𑀁, 𑀅𑀕𑁆𑀕𑀁 𑀥𑀫𑁆𑀫𑀁 𑀯𑀺𑀚𑀸𑀦𑀢𑀁;

𑀅𑀕𑁆𑀕𑁂 𑀩𑀼𑀤𑁆𑀥𑁂 𑀧𑀲𑀦𑁆𑀦𑀸𑀦𑀁, 𑀤𑀓𑁆𑀔𑀺𑀡𑁂𑀬𑁆𑀬𑁂 𑀅𑀦𑀼𑀢𑁆𑀢𑀭𑁂.

‘‘𑀅𑀕𑁆𑀕𑁂 𑀥𑀫𑁆𑀫𑁂 𑀧𑀲𑀦𑁆𑀦𑀸𑀦𑀁, 𑀯𑀺𑀭𑀸𑀕𑀽𑀧𑀲𑀫𑁂 𑀲𑀼𑀔𑁂;

𑀅𑀕𑁆𑀕𑁂 𑀲𑀗𑁆𑀖𑁂 𑀧𑀲𑀦𑁆𑀦𑀸𑀦𑀁, 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑁂 𑀅𑀦𑀼𑀢𑁆𑀢𑀭𑁂.

‘‘𑀅𑀕𑁆𑀕𑀲𑁆𑀫𑀺𑀁 𑀤𑀸𑀦𑀁 𑀤𑀤𑀢𑀁, 𑀅𑀕𑁆𑀕𑀁 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀺;

𑀅𑀕𑁆𑀕𑀁 𑀆𑀬𑀼 𑀘 𑀯𑀡𑁆𑀡𑁄 𑀘, 𑀬𑀲𑁄 𑀓𑀺𑀢𑁆𑀢𑀺 𑀲𑀼𑀔𑀁 𑀩𑀮𑀁.

‘‘𑀅𑀕𑁆𑀕𑀲𑁆𑀲 𑀤𑀸𑀢𑀸 𑀫𑁂𑀥𑀸𑀯𑀻, 𑀅𑀕𑁆𑀕𑀥𑀫𑁆𑀫𑀲𑀫𑀸𑀳𑀺𑀢𑁄;

𑀤𑁂𑀯𑀪𑀽𑀢𑁄 𑀫𑀦𑀼𑀲𑁆𑀲𑁄 𑀯𑀸, 𑀅𑀕𑁆𑀕𑀧𑁆𑀧𑀢𑁆𑀢𑁄 𑀧𑀫𑁄𑀤𑀢𑀻’’𑀢𑀺.

𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀇𑀢𑀺 𑀫𑁂 𑀲𑀼𑀢𑀦𑁆𑀢𑀺. 𑀧𑀞𑀫𑀁.

𑁨. 𑀚𑀻𑀯𑀺𑀓𑀲𑀼𑀢𑁆𑀢𑀁

𑁯𑁧. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸, 𑀯𑀼𑀢𑁆𑀢𑀫𑀭𑀳𑀢𑀸𑀢𑀺 𑀫𑁂 𑀲𑀼𑀢𑀁 𑁋

‘‘𑀅𑀦𑁆𑀢𑀫𑀺𑀤𑀁, 𑀪𑀺𑀓𑁆𑀔𑀯𑁂, 𑀚𑀻𑀯𑀺𑀓𑀸𑀦𑀁 𑀬𑀤𑀺𑀤𑀁 𑀧𑀺𑀡𑁆𑀟𑁄𑀮𑁆𑀬𑀁. 𑀅𑀪𑀺𑀲𑀸𑀧𑁄𑀬𑀁 [𑀅𑀪𑀺𑀲𑀸𑀧𑀸𑀬𑀁 (𑀲𑀻.), 𑀅𑀪𑀺𑀮𑀸𑀧𑀸𑀬𑀁 (𑀲𑁆𑀬𑀸. 𑀧𑀻.), 𑀅𑀪𑀺𑀲𑀧𑀸𑀬𑀁 (𑀓.)], 𑀪𑀺𑀓𑁆𑀔𑀯𑁂, 𑀮𑁄𑀓𑀲𑁆𑀫𑀺𑀁 𑁋 ‘𑀧𑀺𑀡𑁆𑀟𑁄𑀮𑁄 𑀯𑀺𑀘𑀭𑀲𑀺 𑀧𑀢𑁆𑀢𑀧𑀸𑀡𑀻’𑀢𑀺. 𑀢𑀜𑁆𑀘 𑀔𑁄 𑀏𑀢𑀁, 𑀪𑀺𑀓𑁆𑀔𑀯𑁂, 𑀓𑀼𑀮𑀧𑀼𑀢𑁆𑀢𑀸 𑀉𑀧𑁂𑀦𑁆𑀢𑀺 𑀅𑀢𑁆𑀣𑀯𑀲𑀺𑀓𑀸, 𑀅𑀢𑁆𑀣𑀯𑀲𑀁 𑀧𑀝𑀺𑀘𑁆𑀘; 𑀦𑁂𑀯 𑀭𑀸𑀚𑀸𑀪𑀺𑀦𑀻𑀢𑀸, 𑀦 𑀘𑁄𑀭𑀸𑀪𑀺𑀦𑀻𑀢𑀸, 𑀦 𑀇𑀡𑀝𑁆𑀝𑀸, 𑀦 𑀪𑀬𑀝𑁆𑀝𑀸, 𑀦 𑀆𑀚𑀻𑀯𑀺𑀓𑀸𑀧𑀓𑀢𑀸. 𑀅𑀧𑀺 𑀘 𑀔𑁄 ‘𑀑𑀢𑀺𑀡𑁆𑀡𑀫𑁆𑀳𑀸 𑀚𑀸𑀢𑀺𑀬𑀸 𑀚𑀭𑀸𑀬 𑀫𑀭𑀡𑁂𑀦 𑀲𑁄𑀓𑁂𑀳𑀺 𑀧𑀭𑀺𑀤𑁂𑀯𑁂𑀳𑀺 𑀤𑀼𑀓𑁆𑀔𑁂𑀳𑀺 𑀤𑁄𑀫𑀦𑀲𑁆𑀲𑁂𑀳𑀺 𑀉𑀧𑀸𑀬𑀸𑀲𑁂𑀳𑀺 𑀤𑀼𑀓𑁆𑀔𑁄𑀢𑀺𑀡𑁆𑀡𑀸 𑀤𑀼𑀓𑁆𑀔𑀧𑀭𑁂𑀢𑀸, 𑀅𑀧𑁆𑀧𑁂𑀯 𑀦𑀸𑀫 𑀇𑀫𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀅𑀦𑁆𑀢𑀓𑀺𑀭𑀺𑀬𑀸 𑀧𑀜𑁆𑀜𑀸𑀬𑁂𑀣𑀸’𑀢𑀺. 𑀏𑀯𑀁 𑀧𑀩𑁆𑀩𑀚𑀺𑀢𑁄 𑀘𑀸𑀬𑀁, 𑀪𑀺𑀓𑁆𑀔𑀯𑁂, 𑀓𑀼𑀮𑀧𑀼𑀢𑁆𑀢𑁄 𑀲𑁄 𑀘 𑀳𑁄𑀢𑀺 𑀅𑀪𑀺𑀚𑁆𑀛𑀸𑀮𑀼 𑀓𑀸𑀫𑁂𑀲𑀼 𑀢𑀺𑀩𑁆𑀩𑀲𑀸𑀭𑀸𑀕𑁄, 𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑁄 𑀧𑀤𑀼𑀝𑁆𑀞𑀫𑀦𑀲𑀗𑁆𑀓𑀧𑁆𑀧𑁄, 𑀫𑀼𑀝𑁆𑀞𑀲𑁆𑀲𑀢𑀺 𑀅𑀲𑀫𑁆𑀧𑀚𑀸𑀦𑁄 𑀅𑀲𑀫𑀸𑀳𑀺𑀢𑁄 𑀯𑀺𑀩𑁆𑀪𑀦𑁆𑀢𑀘𑀺𑀢𑁆𑀢𑁄 𑀧𑀸𑀓𑀢𑀺𑀦𑁆𑀤𑁆𑀭𑀺𑀬𑁄. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀙𑀯𑀸𑀮𑀸𑀢𑀁 𑀉𑀪𑀢𑁄𑀧𑀤𑀺𑀢𑁆𑀢𑀁 𑀫𑀚𑁆𑀛𑁂 𑀕𑀽𑀣𑀕𑀢𑀁 𑀦𑁂𑀯 𑀕𑀸𑀫𑁂 𑀓𑀝𑁆𑀞𑀢𑁆𑀣𑀁 𑀨𑀭𑀢𑀺 𑀦 𑀅𑀭𑀜𑁆𑀜𑁂ः 𑀢𑀣𑀽𑀧𑀫𑀸𑀳𑀁, 𑀪𑀺𑀓𑁆𑀔𑀯𑁂, 𑀇𑀫𑀁 𑀧𑀼𑀕𑁆𑀕𑀮𑀁 𑀯𑀤𑀸𑀫𑀺 𑀕𑀺𑀳𑀺𑀪𑁄𑀕𑀸 𑀧𑀭𑀺𑀳𑀻𑀦𑁄 𑀲𑀸𑀫𑀜𑁆𑀜𑀢𑁆𑀣𑀜𑁆𑀘 𑀦 𑀧𑀭𑀺𑀧𑀽𑀭𑁂𑀢𑀻’’𑀢𑀺. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘. 𑀢𑀢𑁆𑀣𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺 𑁋

‘‘𑀕𑀺𑀳𑀺𑀪𑁄𑀕𑀸 𑀧𑀭𑀺𑀳𑀻𑀦𑁄, 𑀲𑀸𑀫𑀜𑁆𑀜𑀢𑁆𑀣𑀜𑁆𑀘 𑀤𑀼𑀩𑁆𑀪𑀕𑁄;

𑀧𑀭𑀺𑀥𑀁𑀲𑀫𑀸𑀦𑁄 𑀧𑀓𑀺𑀭𑁂𑀢𑀺, 𑀙𑀯𑀸𑀮𑀸𑀢𑀁𑀯 𑀦𑀲𑁆𑀲𑀢𑀺.

‘‘𑀓𑀸𑀲𑀸𑀯𑀓𑀡𑁆𑀞𑀸 𑀩𑀳𑀯𑁄, 𑀧𑀸𑀧𑀥𑀫𑁆𑀫𑀸 𑀅𑀲𑀜𑁆𑀜𑀢𑀸;

𑀧𑀸𑀧𑀸 𑀧𑀸𑀧𑁂𑀳𑀺 𑀓𑀫𑁆𑀫𑁂𑀳𑀺, 𑀦𑀺𑀭𑀬𑀁 𑀢𑁂 𑀉𑀧𑀧𑀚𑁆𑀚𑀭𑁂.

‘‘𑀲𑁂𑀬𑁆𑀬𑁄 𑀅𑀬𑁄𑀕𑀼𑀴𑁄 𑀪𑀼𑀢𑁆𑀢𑁄, 𑀢𑀢𑁆𑀢𑁄 𑀅𑀕𑁆𑀕𑀺𑀲𑀺𑀔𑀽𑀧𑀫𑁄;

𑀬𑀜𑁆𑀘𑁂 𑀪𑀼𑀜𑁆𑀚𑁂𑀬𑁆𑀬 𑀤𑀼𑀲𑁆𑀲𑀻𑀮𑁄, 𑀭𑀝𑁆𑀞𑀧𑀺𑀡𑁆𑀟𑀫𑀲𑀜𑁆𑀜𑀢𑁄’’𑀢𑀺.

𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀇𑀢𑀺 𑀫𑁂 𑀲𑀼𑀢𑀦𑁆𑀢𑀺. 𑀤𑀼𑀢𑀺𑀬𑀁.

𑁩. 𑀲𑀗𑁆𑀖𑀸𑀝𑀺𑀓𑀡𑁆𑀡𑀲𑀼𑀢𑁆𑀢𑀁

𑁯𑁨. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸, 𑀯𑀼𑀢𑁆𑀢𑀫𑀭𑀳𑀢𑀸𑀢𑀺 𑀫𑁂 𑀲𑀼𑀢𑀁 𑁋

‘‘𑀲𑀗𑁆𑀖𑀸𑀝𑀺𑀓𑀡𑁆𑀡𑁂 𑀘𑁂𑀧𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀕𑀳𑁂𑀢𑁆𑀯𑀸 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀅𑀦𑀼𑀩𑀦𑁆𑀥𑁄 𑀅𑀲𑁆𑀲 𑀧𑀸𑀤𑁂 𑀧𑀸𑀤𑀁 𑀦𑀺𑀓𑁆𑀔𑀺𑀧𑀦𑁆𑀢𑁄, 𑀲𑁄 𑀘 𑀳𑁄𑀢𑀺 𑀅𑀪𑀺𑀚𑁆𑀛𑀸𑀮𑀼 𑀓𑀸𑀫𑁂𑀲𑀼 𑀢𑀺𑀩𑁆𑀩𑀲𑀸𑀭𑀸𑀕𑁄 𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑁄 𑀧𑀤𑀼𑀝𑁆𑀞𑀫𑀦𑀲𑀗𑁆𑀓𑀧𑁆𑀧𑁄 𑀫𑀼𑀝𑁆𑀞𑀲𑁆𑀲𑀢𑀺 𑀅𑀲𑀫𑁆𑀧𑀚𑀸𑀦𑁄 𑀅𑀲𑀫𑀸𑀳𑀺𑀢𑁄 𑀯𑀺𑀩𑁆𑀪𑀦𑁆𑀢𑀘𑀺𑀢𑁆𑀢𑁄 𑀧𑀸𑀓𑀢𑀺𑀦𑁆𑀤𑁆𑀭𑀺𑀬𑁄; 𑀅𑀣 𑀔𑁄 𑀲𑁄 𑀆𑀭𑀓𑀸𑀯 𑀫𑀬𑁆𑀳𑀁, 𑀅𑀳𑀜𑁆𑀘 𑀢𑀲𑁆𑀲. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀥𑀫𑁆𑀫𑀜𑁆𑀳𑀺 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦 𑀧𑀲𑁆𑀲𑀢𑀺. 𑀥𑀫𑁆𑀫𑀁 𑀅𑀧𑀲𑁆𑀲𑀦𑁆𑀢𑁄 𑀦 𑀫𑀁 𑀧𑀲𑁆𑀲𑀢𑀺 [𑀫𑀁 𑀦 𑀧𑀲𑁆𑀲𑀢𑀺 (𑀲𑁆𑀬𑀸.)].

‘‘𑀬𑁄𑀚𑀦𑀲𑀢𑁂 𑀘𑁂𑀧𑀺 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀯𑀺𑀳𑀭𑁂𑀬𑁆𑀬. 𑀲𑁄 𑀘 𑀳𑁄𑀢𑀺 𑀅𑀦𑀪𑀺𑀚𑁆𑀛𑀸𑀮𑀼 𑀓𑀸𑀫𑁂𑀲𑀼 𑀦 𑀢𑀺𑀩𑁆𑀩𑀲𑀸𑀭𑀸𑀕𑁄 𑀅𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑁄 𑀅𑀧𑀤𑀼𑀝𑁆𑀞𑀫𑀦𑀲𑀗𑁆𑀓𑀧𑁆𑀧𑁄 𑀉𑀧𑀝𑁆𑀞𑀺𑀢𑀲𑁆𑀲𑀢𑀺 𑀲𑀫𑁆𑀧𑀚𑀸𑀦𑁄 𑀲𑀫𑀸𑀳𑀺𑀢𑁄 𑀏𑀓𑀕𑁆𑀕𑀘𑀺𑀢𑁆𑀢𑁄 𑀲𑀁𑀯𑀼𑀢𑀺𑀦𑁆𑀤𑁆𑀭𑀺𑀬𑁄; 𑀅𑀣 𑀔𑁄 𑀲𑁄 𑀲𑀦𑁆𑀢𑀺𑀓𑁂𑀯 𑀫𑀬𑁆𑀳𑀁, 𑀅𑀳𑀜𑁆𑀘 𑀢𑀲𑁆𑀲. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀥𑀫𑁆𑀫𑀁 𑀳𑀺 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀲𑁆𑀲𑀢𑀺; 𑀥𑀫𑁆𑀫𑀁 𑀧𑀲𑁆𑀲𑀦𑁆𑀢𑁄 𑀫𑀁 𑀧𑀲𑁆𑀲𑀢𑀻’’𑀢𑀺. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘. 𑀢𑀢𑁆𑀣𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺 𑁋

‘‘𑀅𑀦𑀼𑀩𑀦𑁆𑀥𑁄𑀧𑀺 𑀘𑁂 𑀅𑀲𑁆𑀲, 𑀫𑀳𑀺𑀘𑁆𑀙𑁄 𑀘 𑀯𑀺𑀖𑀸𑀢𑀯𑀸;

𑀏𑀚𑀸𑀦𑀼𑀕𑁄 𑀅𑀦𑁂𑀚𑀲𑁆𑀲, 𑀦𑀺𑀩𑁆𑀩𑀼𑀢𑀲𑁆𑀲 𑀅𑀦𑀺𑀩𑁆𑀩𑀼𑀢𑁄;

𑀕𑀺𑀤𑁆𑀥𑁄 𑀲𑁄 𑀯𑀻𑀢𑀕𑁂𑀥𑀲𑁆𑀲, 𑀧𑀲𑁆𑀲 𑀬𑀸𑀯𑀜𑁆𑀘 𑀆𑀭𑀓𑀸.

‘‘𑀬𑁄 𑀘 𑀥𑀫𑁆𑀫𑀫𑀪𑀺𑀜𑁆𑀜𑀸𑀬, 𑀥𑀫𑁆𑀫𑀫𑀜𑁆𑀜𑀸𑀬 𑀧𑀡𑁆𑀟𑀺𑀢𑁄;

𑀭𑀳𑀤𑁄𑀯 𑀦𑀺𑀯𑀸𑀢𑁂 𑀘, 𑀅𑀦𑁂𑀚𑁄 𑀯𑀽𑀧𑀲𑀫𑁆𑀫𑀢𑀺.

‘‘𑀅𑀦𑁂𑀚𑁄 𑀲𑁄 𑀅𑀦𑁂𑀚𑀲𑁆𑀲, 𑀦𑀺𑀩𑁆𑀩𑀼𑀢𑀲𑁆𑀲 𑀘 𑀦𑀺𑀩𑁆𑀩𑀼𑀢𑁄;

𑀅𑀕𑀺𑀤𑁆𑀥𑁄 𑀯𑀻𑀢𑀕𑁂𑀥𑀲𑁆𑀲, 𑀧𑀲𑁆𑀲 𑀬𑀸𑀯𑀜𑁆𑀘 𑀲𑀦𑁆𑀢𑀺𑀓𑁂’’𑀢𑀺.

𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀇𑀢𑀺 𑀫𑁂 𑀲𑀼𑀢𑀦𑁆𑀢𑀺. 𑀢𑀢𑀺𑀬𑀁.

𑁪. 𑀅𑀕𑁆𑀕𑀺𑀲𑀼𑀢𑁆𑀢𑀁

𑁯𑁩. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸, 𑀯𑀼𑀢𑁆𑀢𑀫𑀭𑀳𑀢𑀸𑀢𑀺 𑀫𑁂 𑀲𑀼𑀢𑀁 𑁋

‘‘𑀢𑀬𑁄𑀫𑁂, 𑀪𑀺𑀓𑁆𑀔𑀯𑁂, 𑀅𑀕𑁆𑀕𑀻. 𑀓𑀢𑀫𑁂 𑀢𑀬𑁄? 𑀭𑀸𑀕𑀕𑁆𑀕𑀺, 𑀤𑁄𑀲𑀕𑁆𑀕𑀺, 𑀫𑁄𑀳𑀕𑁆𑀕𑀺 𑁋 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀢𑀬𑁄 𑀅𑀕𑁆𑀕𑀻’’𑀢𑀺. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘. 𑀢𑀢𑁆𑀣𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺 𑁋

‘‘𑀭𑀸𑀕𑀕𑁆𑀕𑀺 𑀤𑀳𑀢𑀺 𑀫𑀘𑁆𑀘𑁂, 𑀭𑀢𑁆𑀢𑁂 𑀓𑀸𑀫𑁂𑀲𑀼 𑀫𑀼𑀘𑁆𑀙𑀺𑀢𑁂;

𑀤𑁄𑀲𑀕𑁆𑀕𑀺 𑀧𑀦 𑀩𑁆𑀬𑀸𑀧𑀦𑁆𑀦𑁂, 𑀦𑀭𑁂 𑀧𑀸𑀡𑀸𑀢𑀺𑀧𑀸𑀢𑀺𑀦𑁄.

‘‘𑀫𑁄𑀳𑀕𑁆𑀕𑀺 𑀧𑀦 𑀲𑀫𑁆𑀫𑀽𑀴𑁆𑀳𑁂, 𑀅𑀭𑀺𑀬𑀥𑀫𑁆𑀫𑁂 𑀅𑀓𑁄𑀯𑀺𑀤𑁂;

𑀏𑀢𑁂 𑀅𑀕𑁆𑀕𑀻 𑀅𑀚𑀸𑀦𑀦𑁆𑀢𑀸, 𑀲𑀓𑁆𑀓𑀸𑀬𑀸𑀪𑀺𑀭𑀢𑀸 𑀧𑀚𑀸.

‘‘𑀢𑁂 𑀯𑀟𑁆𑀠𑀬𑀦𑁆𑀢𑀺 𑀦𑀺𑀭𑀬𑀁, 𑀢𑀺𑀭𑀘𑁆𑀙𑀸𑀦𑀜𑁆𑀘 𑀬𑁄𑀦𑀺𑀬𑁄;

𑀅𑀲𑀼𑀭𑀁 𑀧𑁂𑀢𑁆𑀢𑀺𑀯𑀺𑀲𑀬𑀁, 𑀅𑀫𑀼𑀢𑁆𑀢𑀸 𑀫𑀸𑀭𑀩𑀦𑁆𑀥𑀦𑀸.

‘‘𑀬𑁂 𑀘 𑀭𑀢𑁆𑀢𑀺𑀦𑁆𑀤𑀺𑀯𑀸 𑀬𑀼𑀢𑁆𑀢𑀸, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑀸𑀲𑀦𑁂;

𑀢𑁂 𑀦𑀺𑀩𑁆𑀩𑀸𑀧𑁂𑀦𑁆𑀢𑀺 𑀭𑀸𑀕𑀕𑁆𑀕𑀺𑀁, 𑀦𑀺𑀘𑁆𑀘𑀁 𑀅𑀲𑀼𑀪𑀲𑀜𑁆𑀜𑀺𑀦𑁄.

‘‘𑀤𑁄𑀲𑀕𑁆𑀕𑀺𑀁 𑀧𑀦 𑀫𑁂𑀢𑁆𑀢𑀸𑀬, 𑀦𑀺𑀩𑁆𑀩𑀸𑀧𑁂𑀦𑁆𑀢𑀺 𑀦𑀭𑀼𑀢𑁆𑀢𑀫𑀸;

𑀫𑁄𑀳𑀕𑁆𑀕𑀺𑀁 𑀧𑀦 𑀧𑀜𑁆𑀜𑀸𑀬, 𑀬𑀸𑀬𑀁 𑀦𑀺𑀩𑁆𑀩𑁂𑀥𑀕𑀸𑀫𑀺𑀦𑀻.

‘‘𑀢𑁂 𑀦𑀺𑀩𑁆𑀩𑀸𑀧𑁂𑀢𑁆𑀯𑀸 𑀦𑀺𑀧𑀓𑀸, 𑀭𑀢𑁆𑀢𑀺𑀦𑁆𑀤𑀺𑀯𑀫𑀢𑀦𑁆𑀤𑀺𑀢𑀸;

𑀅𑀲𑁂𑀲𑀁 𑀧𑀭𑀺𑀦𑀺𑀩𑁆𑀩𑀦𑁆𑀢𑀺, 𑀅𑀲𑁂𑀲𑀁 𑀤𑀼𑀓𑁆𑀔𑀫𑀘𑁆𑀘𑀕𑀼𑀁.

‘‘𑀅𑀭𑀺𑀬𑀤𑁆𑀤𑀲𑀸 𑀯𑁂𑀤𑀕𑀼𑀦𑁄, 𑀲𑀫𑁆𑀫𑀤𑀜𑁆𑀜𑀸𑀬 𑀧𑀡𑁆𑀟𑀺𑀢𑀸;

𑀚𑀸𑀢𑀺𑀓𑁆𑀔𑀬𑀫𑀪𑀺𑀜𑁆𑀜𑀸𑀬, 𑀦𑀸𑀕𑀘𑁆𑀙𑀦𑁆𑀢𑀺 𑀧𑀼𑀦𑀩𑁆𑀪𑀯’’𑀦𑁆𑀢𑀺.

𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀇𑀢𑀺 𑀫𑁂 𑀲𑀼𑀢𑀦𑁆𑀢𑀺. 𑀘𑀢𑀼𑀢𑁆𑀣𑀁.

𑁫. 𑀉𑀧𑀧𑀭𑀺𑀓𑁆𑀔𑀲𑀼𑀢𑁆𑀢𑀁

𑁯𑁪. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸, 𑀯𑀼𑀢𑁆𑀢𑀫𑀭𑀳𑀢𑀸𑀢𑀺 𑀫𑁂 𑀲𑀼𑀢𑀁 𑁋

‘‘𑀢𑀣𑀸 𑀢𑀣𑀸, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀉𑀧𑀧𑀭𑀺𑀓𑁆𑀔𑁂𑀬𑁆𑀬 𑀬𑀣𑀸 𑀬𑀣𑀸𑀲𑁆𑀲 [𑀬𑀣𑀸 𑀬𑀣𑀸 (𑀩𑀳𑀽𑀲𑀼)] 𑀉𑀧𑀧𑀭𑀺𑀓𑁆𑀔𑀢𑁄 𑀩𑀳𑀺𑀤𑁆𑀥𑀸 𑀘𑀲𑁆𑀲 𑀯𑀺𑀜𑁆𑀜𑀸𑀡𑀁 𑀅𑀯𑀺𑀓𑁆𑀔𑀺𑀢𑁆𑀢𑀁 𑀅𑀯𑀺𑀲𑀝𑀁 𑀅𑀚𑁆𑀛𑀢𑁆𑀢𑀁 𑀅𑀲𑀡𑁆𑀞𑀺𑀢𑀁 𑀅𑀦𑀼𑀧𑀸𑀤𑀸𑀬 𑀦 𑀧𑀭𑀺𑀢𑀲𑁆𑀲𑁂𑀬𑁆𑀬. 𑀩𑀳𑀺𑀤𑁆𑀥𑀸, 𑀪𑀺𑀓𑁆𑀔𑀯𑁂, 𑀯𑀺𑀜𑁆𑀜𑀸𑀡𑁂 𑀅𑀯𑀺𑀓𑁆𑀔𑀺𑀢𑁆𑀢𑁂 𑀅𑀯𑀺𑀲𑀝𑁂 𑀲𑀢𑀺 𑀅𑀚𑁆𑀛𑀢𑁆𑀢𑀁 𑀅𑀲𑀡𑁆𑀞𑀺𑀢𑁂 𑀅𑀦𑀼𑀧𑀸𑀤𑀸𑀬 𑀅𑀧𑀭𑀺𑀢𑀲𑁆𑀲𑀢𑁄 𑀆𑀬𑀢𑀺𑀁 𑀚𑀸𑀢𑀺𑀚𑀭𑀸𑀫𑀭𑀡𑀤𑀼𑀓𑁆𑀔𑀲𑀫𑀼𑀤𑀬𑀲𑀫𑁆𑀪𑀯𑁄 𑀦 𑀳𑁄𑀢𑀻’’𑀢𑀺. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘. 𑀢𑀢𑁆𑀣𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺 𑁋

‘‘𑀲𑀢𑁆𑀢𑀲𑀗𑁆𑀕𑀧𑁆𑀧𑀳𑀻𑀦𑀲𑁆𑀲, 𑀦𑁂𑀢𑁆𑀢𑀺𑀘𑁆𑀙𑀺𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄;

𑀯𑀺𑀓𑁆𑀔𑀻𑀡𑁄 𑀚𑀸𑀢𑀺𑀲𑀁𑀲𑀸𑀭𑁄, 𑀦𑀢𑁆𑀣𑀺 𑀢𑀲𑁆𑀲 𑀧𑀼𑀦𑀩𑁆𑀪𑀯𑁄’’𑀢𑀺.

𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀇𑀢𑀺 𑀫𑁂 𑀲𑀼𑀢𑀦𑁆𑀢𑀺. 𑀧𑀜𑁆𑀘𑀫𑀁.

𑁬. 𑀓𑀸𑀫𑀽𑀧𑀧𑀢𑁆𑀢𑀺𑀲𑀼𑀢𑁆𑀢𑀁

𑁯𑁫. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸, 𑀯𑀼𑀢𑁆𑀢𑀫𑀭𑀳𑀢𑀸𑀢𑀺 𑀫𑁂 𑀲𑀼𑀢𑀁 𑁋

‘‘𑀢𑀺𑀲𑁆𑀲𑁄 𑀇𑀫𑀸, 𑀪𑀺𑀓𑁆𑀔𑀯𑁂, 𑀓𑀸𑀫𑀽𑀧𑀧𑀢𑁆𑀢𑀺𑀬𑁄 [𑀓𑀸𑀫𑀼𑀧𑁆𑀧𑀢𑁆𑀢𑀺𑀬𑁄 (𑀲𑀻.)]. 𑀓𑀢𑀫𑀸 𑀢𑀺𑀲𑁆𑀲𑁄? 𑀧𑀘𑁆𑀘𑀼𑀧𑀝𑁆𑀞𑀺𑀢𑀓𑀸𑀫𑀸, 𑀦𑀺𑀫𑁆𑀫𑀸𑀦𑀭𑀢𑀺𑀦𑁄, 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀺𑀦𑁄 𑁋 𑀇𑀫𑀸 𑀔𑁄, 𑀪𑀺𑀓𑁆𑀔𑀯𑁂, 𑀢𑀺𑀲𑁆𑀲𑁄 𑀓𑀸𑀫𑀽𑀧𑀧𑀢𑁆𑀢𑀺𑀬𑁄’’𑀢𑀺. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘. 𑀢𑀢𑁆𑀣𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺 𑁋

‘‘𑀧𑀘𑁆𑀘𑀼𑀧𑀝𑁆𑀞𑀺𑀢𑀓𑀸𑀫𑀸 𑀘, 𑀬𑁂 𑀤𑁂𑀯𑀸 𑀯𑀲𑀯𑀢𑁆𑀢𑀺𑀦𑁄;

𑀦𑀺𑀫𑁆𑀫𑀸𑀦𑀭𑀢𑀺𑀦𑁄 𑀤𑁂𑀯𑀸, 𑀬𑁂 𑀘𑀜𑁆𑀜𑁂 𑀓𑀸𑀫𑀪𑁄𑀕𑀺𑀦𑁄;

𑀇𑀢𑁆𑀣𑀪𑀸𑀯𑀜𑁆𑀜𑀣𑀸𑀪𑀸𑀯𑀁, 𑀲𑀁𑀲𑀸𑀭𑀁 𑀦𑀸𑀢𑀺𑀯𑀢𑁆𑀢𑀭𑁂.

‘‘𑀏𑀢𑀫𑀸𑀤𑀻𑀦𑀯𑀁 𑀜𑀢𑁆𑀯𑀸, 𑀓𑀸𑀫𑀪𑁄𑀕𑁂𑀲𑀼 𑀧𑀡𑁆𑀟𑀺𑀢𑁄;

𑀲𑀩𑁆𑀩𑁂 𑀧𑀭𑀺𑀘𑁆𑀘𑀚𑁂 𑀓𑀸𑀫𑁂, 𑀬𑁂 𑀤𑀺𑀩𑁆𑀩𑀸 𑀬𑁂 𑀘 𑀫𑀸𑀦𑀼𑀲𑀸.

‘‘𑀧𑀺𑀬𑀭𑀽𑀧𑀲𑀸𑀢𑀕𑀥𑀺𑀢𑀁, 𑀙𑁂𑀢𑁆𑀯𑀸 𑀲𑁄𑀢𑀁 𑀤𑀼𑀭𑀘𑁆𑀘𑀬𑀁;

𑀅𑀲𑁂𑀲𑀁 𑀧𑀭𑀺𑀦𑀺𑀩𑁆𑀩𑀦𑁆𑀢𑀺, 𑀅𑀲𑁂𑀲𑀁 𑀤𑀼𑀓𑁆𑀔𑀫𑀘𑁆𑀘𑀕𑀼𑀁.

‘‘𑀅𑀭𑀺𑀬𑀤𑁆𑀤𑀲𑀸 𑀯𑁂𑀤𑀕𑀼𑀦𑁄, 𑀲𑀫𑁆𑀫𑀤𑀜𑁆𑀜𑀸𑀬 𑀧𑀡𑁆𑀟𑀺𑀢𑀸;

𑀚𑀸𑀢𑀺𑀓𑁆𑀔𑀬𑀫𑀪𑀺𑀜𑁆𑀜𑀸𑀬, 𑀦𑀸𑀕𑀘𑁆𑀙𑀦𑁆𑀢𑀺 𑀧𑀼𑀦𑀩𑁆𑀪𑀯’’𑀦𑁆𑀢𑀺.

𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀇𑀢𑀺 𑀫𑁂 𑀲𑀼𑀢𑀦𑁆𑀢𑀺. 𑀙𑀝𑁆𑀞𑀁.

𑁭. 𑀓𑀸𑀫𑀬𑁄𑀕𑀲𑀼𑀢𑁆𑀢𑀁

𑁯𑁬. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸, 𑀯𑀼𑀢𑁆𑀢𑀫𑀭𑀳𑀢𑀸𑀢𑀺 𑀫𑁂 𑀲𑀼𑀢𑀁 𑁋

‘‘𑀓𑀸𑀫𑀬𑁄𑀕𑀬𑀼𑀢𑁆𑀢𑁄, 𑀪𑀺𑀓𑁆𑀔𑀯𑁂, 𑀪𑀯𑀬𑁄𑀕𑀬𑀼𑀢𑁆𑀢𑁄 𑀆𑀕𑀸𑀫𑀻 𑀳𑁄𑀢𑀺 𑀆𑀕𑀦𑁆𑀢𑀸 [𑀆𑀕𑀦𑁆𑀢𑁆𑀯𑀸 (𑀲𑁆𑀬𑀸. 𑀓.)] 𑀇𑀢𑁆𑀣𑀢𑁆𑀢𑀁. 𑀓𑀸𑀫𑀬𑁄𑀕𑀯𑀺𑀲𑀁𑀬𑀼𑀢𑁆𑀢𑁄, 𑀪𑀺𑀓𑁆𑀔𑀯𑁂, 𑀪𑀯𑀬𑁄𑀕𑀬𑀼𑀢𑁆𑀢𑁄 𑀅𑀦𑀸𑀕𑀸𑀫𑀻 𑀳𑁄𑀢𑀺 𑀅𑀦𑀸𑀕𑀦𑁆𑀢𑀸 𑀇𑀢𑁆𑀣𑀢𑁆𑀢𑀁. 𑀓𑀸𑀫𑀬𑁄𑀕𑀯𑀺𑀲𑀁𑀬𑀼𑀢𑁆𑀢𑁄, 𑀪𑀺𑀓𑁆𑀔𑀯𑁂, 𑀪𑀯𑀬𑁄𑀕𑀯𑀺𑀲𑀁𑀬𑀼𑀢𑁆𑀢𑁄 𑀅𑀭𑀳𑀸 𑀳𑁄𑀢𑀺, 𑀔𑀻𑀡𑀸𑀲𑀯𑁄’’𑀢𑀺. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘. 𑀢𑀢𑁆𑀣𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺 𑁋

‘‘𑀓𑀸𑀫𑀬𑁄𑀕𑁂𑀦 𑀲𑀁𑀬𑀼𑀢𑁆𑀢𑀸, 𑀪𑀯𑀬𑁄𑀕𑁂𑀦 𑀘𑀽𑀪𑀬𑀁;

𑀲𑀢𑁆𑀢𑀸 𑀕𑀘𑁆𑀙𑀦𑁆𑀢𑀺 𑀲𑀁𑀲𑀸𑀭𑀁, 𑀚𑀸𑀢𑀺𑀫𑀭𑀡𑀕𑀸𑀫𑀺𑀦𑁄.

‘‘𑀬𑁂 𑀘 𑀓𑀸𑀫𑁂 𑀧𑀳𑀦𑁆𑀢𑁆𑀯𑀸𑀦, 𑀅𑀧𑁆𑀧𑀢𑁆𑀢𑀸 𑀆𑀲𑀯𑀓𑁆𑀔𑀬𑀁;

𑀪𑀯𑀬𑁄𑀕𑁂𑀦 𑀲𑀁𑀬𑀼𑀢𑁆𑀢𑀸, 𑀅𑀦𑀸𑀕𑀸𑀫𑀻𑀢𑀺 𑀯𑀼𑀘𑁆𑀘𑀭𑁂.

‘‘𑀬𑁂 𑀘 𑀔𑁄 𑀙𑀺𑀦𑁆𑀦𑀲𑀁𑀲𑀬𑀸, 𑀔𑀻𑀡𑀫𑀸𑀦𑀧𑀼𑀦𑀩𑁆𑀪𑀯𑀸;

𑀢𑁂 𑀯𑁂 𑀧𑀸𑀭𑀗𑁆𑀕𑀢𑀸 𑀮𑁄𑀓𑁂, 𑀬𑁂 𑀧𑀢𑁆𑀢𑀸 𑀆𑀲𑀯𑀓𑁆𑀔𑀬’’𑀦𑁆𑀢𑀺.

𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀇𑀢𑀺 𑀫𑁂 𑀲𑀼𑀢𑀦𑁆𑀢𑀺. 𑀲𑀢𑁆𑀢𑀫𑀁.

𑀓𑀮𑁆𑀬𑀸𑀡𑀲𑀻𑀮𑀲𑀼𑀢𑁆𑀢𑀁

𑁯𑁭. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸, 𑀯𑀼𑀢𑁆𑀢𑀫𑀭𑀳𑀢𑀸𑀢𑀺 𑀫𑁂 𑀲𑀼𑀢𑀁 𑁋

‘‘𑀓𑀮𑁆𑀬𑀸𑀡𑀲𑀻𑀮𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀮𑁆𑀬𑀸𑀡𑀥𑀫𑁆𑀫𑁄 𑀓𑀮𑁆𑀬𑀸𑀡𑀧𑀜𑁆𑀜𑁄 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 ‘𑀓𑁂𑀯𑀮𑀻 𑀯𑀼𑀲𑀺𑀢𑀯𑀸 𑀉𑀢𑁆𑀢𑀫𑀧𑀼𑀭𑀺𑀲𑁄’𑀢𑀺 𑀯𑀼𑀘𑁆𑀘𑀢𑀺 𑁋

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀮𑁆𑀬𑀸𑀡𑀲𑀻𑀮𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀻𑀮𑀯𑀸 𑀳𑁄𑀢𑀺, 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄 𑀯𑀺𑀳𑀭𑀢𑀺, 𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄 𑀅𑀡𑀼𑀫𑀢𑁆𑀢𑁂𑀲𑀼 𑀯𑀚𑁆𑀚𑁂𑀲𑀼 𑀪𑀬𑀤𑀲𑁆𑀲𑀸𑀯𑀻, 𑀲𑀫𑀸𑀤𑀸𑀬 𑀲𑀺𑀓𑁆𑀔𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀼. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀮𑁆𑀬𑀸𑀡𑀲𑀻𑀮𑁄 𑀳𑁄𑀢𑀺. 𑀇𑀢𑀺 𑀓𑀮𑁆𑀬𑀸𑀡𑀲𑀻𑀮𑁄.

‘‘𑀓𑀮𑁆𑀬𑀸𑀡𑀥𑀫𑁆𑀫𑁄 𑀘 𑀓𑀣𑀁 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀢𑁆𑀢𑀦𑁆𑀦𑀁 𑀩𑁄𑀥𑀺𑀧𑀓𑁆𑀔𑀺𑀬𑀸𑀦𑀁 𑀥𑀫𑁆𑀫𑀸𑀦𑀁 𑀪𑀸𑀯𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀮𑁆𑀬𑀸𑀡𑀥𑀫𑁆𑀫𑁄 𑀳𑁄𑀢𑀺. 𑀇𑀢𑀺 𑀓𑀮𑁆𑀬𑀸𑀡𑀲𑀻𑀮𑁄, 𑀓𑀮𑁆𑀬𑀸𑀡𑀥𑀫𑁆𑀫𑁄.

‘‘𑀓𑀮𑁆𑀬𑀸𑀡𑀧𑀜𑁆𑀜𑁄 𑀘 𑀓𑀣𑀁 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀮𑁆𑀬𑀸𑀡𑀧𑀜𑁆𑀜𑁄 𑀳𑁄𑀢𑀺.

‘‘𑀇𑀢𑀺 𑀓𑀮𑁆𑀬𑀸𑀡𑀲𑀻𑀮𑁄 𑀓𑀮𑁆𑀬𑀸𑀡𑀥𑀫𑁆𑀫𑁄 𑀓𑀮𑁆𑀬𑀸𑀡𑀧𑀜𑁆𑀜𑁄 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 ‘𑀓𑁂𑀯𑀮𑀻 𑀯𑀼𑀲𑀺𑀢𑀯𑀸 𑀉𑀢𑁆𑀢𑀫𑀧𑀼𑀭𑀺𑀲𑁄’𑀢𑀺 𑀯𑀼𑀘𑁆𑀘𑀢𑀻’’𑀢𑀺. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘. 𑀢𑀢𑁆𑀣𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺 𑁋

‘‘𑀬𑀲𑁆𑀲 𑀓𑀸𑀬𑁂𑀦 𑀯𑀸𑀘𑀸𑀬, 𑀫𑀦𑀲𑀸 𑀦𑀢𑁆𑀣𑀺 𑀤𑀼𑀓𑁆𑀓𑀝𑀁;

𑀢𑀁 𑀯𑁂 𑀓𑀮𑁆𑀬𑀸𑀡𑀲𑀻𑀮𑁄𑀢𑀺, 𑀆𑀳𑀼 𑀪𑀺𑀓𑁆𑀔𑀼𑀁 𑀳𑀺𑀭𑀻𑀫𑀦𑀁 [𑀳𑀺𑀭𑀻𑀫𑀢𑀁 (𑀲𑁆𑀬𑀸. 𑀓.)].

‘‘𑀬𑀲𑁆𑀲 𑀥𑀫𑁆𑀫𑀸 𑀲𑀼𑀪𑀸𑀯𑀺𑀢𑀸, 𑀲𑀢𑁆𑀢 [𑀧𑀢𑁆𑀢 (𑀲𑀩𑁆𑀩𑀢𑁆𑀣)] 𑀲𑀫𑁆𑀩𑁄𑀥𑀺𑀕𑀸𑀫𑀺𑀦𑁄;

𑀢𑀁 𑀯𑁂 𑀓𑀮𑁆𑀬𑀸𑀡𑀥𑀫𑁆𑀫𑁄𑀢𑀺, 𑀆𑀳𑀼 𑀪𑀺𑀓𑁆𑀔𑀼𑀁 𑀅𑀦𑀼𑀲𑁆𑀲𑀤𑀁.

‘‘𑀬𑁄 𑀤𑀼𑀓𑁆𑀔𑀲𑁆𑀲 𑀧𑀚𑀸𑀦𑀸𑀢𑀺, 𑀇𑀥𑁂𑀯 𑀔𑀬𑀫𑀢𑁆𑀢𑀦𑁄;

𑀢𑀁 𑀯𑁂 𑀓𑀮𑁆𑀬𑀸𑀡𑀧𑀜𑁆𑀜𑁄𑀢𑀺, 𑀆𑀳𑀼 𑀪𑀺𑀓𑁆𑀔𑀼𑀁 𑀅𑀦𑀸𑀲𑀯𑀁.

‘‘𑀢𑁂𑀳𑀺 𑀥𑀫𑁆𑀫𑁂𑀳𑀺 𑀲𑀫𑁆𑀧𑀦𑁆𑀦𑀁, 𑀅𑀦𑀻𑀖𑀁 𑀙𑀺𑀦𑁆𑀦𑀲𑀁𑀲𑀬𑀁;

𑀅𑀲𑀺𑀢𑀁 𑀲𑀩𑁆𑀩𑀮𑁄𑀓𑀲𑁆𑀲, 𑀆𑀳𑀼 𑀲𑀩𑁆𑀩𑀧𑀳𑀸𑀬𑀺𑀦’’𑀦𑁆𑀢𑀺.

𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀇𑀢𑀺 𑀫𑁂 𑀲𑀼𑀢𑀦𑁆𑀢𑀺. 𑀅𑀝𑁆𑀞𑀫𑀁.

𑁯. 𑀤𑀸𑀦𑀲𑀼𑀢𑁆𑀢𑀁

𑁯𑁮. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸, 𑀯𑀼𑀢𑁆𑀢𑀫𑀭𑀳𑀢𑀸𑀢𑀺 𑀫𑁂 𑀲𑀼𑀢𑀁 𑁋

‘‘𑀤𑁆𑀯𑁂𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀤𑀸𑀦𑀸𑀦𑀺 𑁋 𑀆𑀫𑀺𑀲𑀤𑀸𑀦𑀜𑁆𑀘 𑀥𑀫𑁆𑀫𑀤𑀸𑀦𑀜𑁆𑀘. 𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀤𑀸𑀦𑀸𑀦𑀁 𑀬𑀤𑀺𑀤𑀁 𑁋 𑀥𑀫𑁆𑀫𑀤𑀸𑀦𑀁.

‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀲𑀁𑀯𑀺𑀪𑀸𑀕𑀸 𑁋 𑀆𑀫𑀺𑀲𑀲𑀁𑀯𑀺𑀪𑀸𑀕𑁄 𑀘 𑀥𑀫𑁆𑀫𑀲𑀁𑀯𑀺𑀪𑀸𑀕𑁄 𑀘. 𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀲𑀁𑀯𑀺𑀪𑀸𑀕𑀸𑀦𑀁 𑀬𑀤𑀺𑀤𑀁 𑁋 𑀥𑀫𑁆𑀫𑀲𑀁𑀯𑀺𑀪𑀸𑀕𑁄.

‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀅𑀦𑀼𑀕𑁆𑀕𑀳𑀸 𑁋 𑀆𑀫𑀺𑀲𑀸𑀦𑀼𑀕𑁆𑀕𑀳𑁄 𑀘 𑀥𑀫𑁆𑀫𑀸𑀦𑀼𑀕𑁆𑀕𑀳𑁄 𑀘. 𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀅𑀦𑀼𑀕𑁆𑀕𑀳𑀸𑀦𑀁 𑀬𑀤𑀺𑀤𑀁 𑁋 𑀥𑀫𑁆𑀫𑀸𑀦𑀼𑀕𑁆𑀕𑀳𑁄’’𑀢𑀺. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘. 𑀢𑀢𑁆𑀣𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺 𑁋

‘‘𑀬𑀫𑀸𑀳𑀼 𑀤𑀸𑀦𑀁 𑀧𑀭𑀫𑀁 𑀅𑀦𑀼𑀢𑁆𑀢𑀭𑀁, 𑀬𑀁 𑀲𑀁𑀯𑀺𑀪𑀸𑀕𑀁 𑀪𑀕𑀯𑀸 𑀅𑀯𑀡𑁆𑀡𑀬𑀺 [𑀅𑀯𑀡𑁆𑀡𑀬𑀻 (𑀲𑀻.)];

𑀅𑀕𑁆𑀕𑀫𑁆𑀳𑀺 𑀔𑁂𑀢𑁆𑀢𑀫𑁆𑀳𑀺 𑀧𑀲𑀦𑁆𑀦𑀘𑀺𑀢𑁆𑀢𑁄, 𑀯𑀺𑀜𑁆𑀜𑀽 𑀧𑀚𑀸𑀦𑀁 𑀓𑁄 𑀦 𑀬𑀚𑁂𑀣 𑀓𑀸𑀮𑁂.

‘‘𑀬𑁂 𑀘𑁂𑀯 𑀪𑀸𑀲𑀦𑁆𑀢𑀺 𑀲𑀼𑀡𑀦𑁆𑀢𑀺 𑀘𑀽𑀪𑀬𑀁, 𑀧𑀲𑀦𑁆𑀦𑀘𑀺𑀢𑁆𑀢𑀸 𑀲𑀼𑀕𑀢𑀲𑁆𑀲 𑀲𑀸𑀲𑀦𑁂;

𑀢𑁂𑀲𑀁 𑀲𑁄 𑀅𑀢𑁆𑀣𑁄 𑀧𑀭𑀫𑁄 𑀯𑀺𑀲𑀼𑀚𑁆𑀛𑀢𑀺, 𑀬𑁂 𑀅𑀧𑁆𑀧𑀫𑀢𑁆𑀢𑀸 𑀲𑀼𑀕𑀢𑀲𑁆𑀲 𑀲𑀸𑀲𑀦𑁂’’𑀢𑀺.

𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀇𑀢𑀺 𑀫𑁂 𑀲𑀼𑀢𑀦𑁆𑀢𑀺. 𑀦𑀯𑀫𑀁.

𑁧𑁦. 𑀢𑁂𑀯𑀺𑀚𑁆𑀚𑀲𑀼𑀢𑁆𑀢𑀁

𑁯𑁯. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸, 𑀯𑀼𑀢𑁆𑀢𑀫𑀭𑀳𑀢𑀸𑀢𑀺 𑀫𑁂 𑀲𑀼𑀢𑀁 𑁋

‘‘𑀥𑀫𑁆𑀫𑁂𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀢𑁂𑀯𑀺𑀚𑁆𑀚𑀁 𑀩𑁆𑀭𑀸𑀳𑁆𑀫𑀡𑀁 𑀧𑀜𑁆𑀜𑀸𑀧𑁂𑀫𑀺, 𑀦𑀸𑀜𑁆𑀜𑀁 𑀮𑀧𑀺𑀢𑀮𑀸𑀧𑀦𑀫𑀢𑁆𑀢𑁂𑀦.

‘‘𑀓𑀣𑀜𑁆𑀘𑀸𑀳𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀦 𑀢𑁂𑀯𑀺𑀚𑁆𑀚𑀁 𑀩𑁆𑀭𑀸𑀳𑁆𑀫𑀡𑀁 𑀧𑀜𑁆𑀜𑀸𑀧𑁂𑀫𑀺, 𑀦𑀸𑀜𑁆𑀜𑀁 𑀮𑀧𑀺𑀢𑀮𑀸𑀧𑀦𑀫𑀢𑁆𑀢𑁂𑀦? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀏𑀓𑀫𑁆𑀧𑀺 𑀚𑀸𑀢𑀺𑀁 𑀤𑁆𑀯𑁂𑀧𑀺 𑀚𑀸𑀢𑀺𑀬𑁄 𑀢𑀺𑀲𑁆𑀲𑁄𑀧𑀺 𑀚𑀸𑀢𑀺𑀬𑁄 𑀘𑀢𑀲𑁆𑀲𑁄𑀧𑀺 𑀚𑀸𑀢𑀺𑀬𑁄 𑀧𑀜𑁆𑀘𑀧𑀺 𑀚𑀸𑀢𑀺𑀬𑁄 𑀤𑀲𑀧𑀺 𑀚𑀸𑀢𑀺𑀬𑁄 𑀯𑀻𑀲𑀫𑁆𑀧𑀺 𑀚𑀸𑀢𑀺𑀬𑁄 𑀢𑀺𑀁𑀲𑀫𑁆𑀧𑀺 𑀚𑀸𑀢𑀺𑀬𑁄 𑀘𑀢𑁆𑀢𑀸𑀮𑀻𑀲𑀫𑁆𑀧𑀺 𑀚𑀸𑀢𑀺𑀬𑁄 𑀧𑀜𑁆𑀜𑀸𑀲𑀫𑁆𑀧𑀺 𑀚𑀸𑀢𑀺𑀬𑁄 𑀚𑀸𑀢𑀺𑀲𑀢𑀫𑁆𑀧𑀺 𑀚𑀸𑀢𑀺𑀲𑀳𑀲𑁆𑀲𑀫𑁆𑀧𑀺 𑀚𑀸𑀢𑀺𑀲𑀢𑀲𑀳𑀲𑁆𑀲𑀫𑁆𑀧𑀺 𑀅𑀦𑁂𑀓𑁂𑀧𑀺 𑀲𑀁𑀯𑀝𑁆𑀝𑀓𑀧𑁆𑀧𑁂 𑀅𑀦𑁂𑀓𑁂𑀧𑀺 𑀯𑀺𑀯𑀝𑁆𑀝𑀓𑀧𑁆𑀧𑁂 𑀅𑀦𑁂𑀓𑁂𑀧𑀺 𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑀓𑀧𑁆𑀧𑁂 𑁋 ‘𑀅𑀫𑀼𑀢𑁆𑀭𑀸𑀲𑀺𑀁 𑀏𑀯𑀁𑀦𑀸𑀫𑁄 𑀏𑀯𑀁𑀕𑁄𑀢𑁆𑀢𑁄 𑀏𑀯𑀁𑀯𑀡𑁆𑀡𑁄 𑀏𑀯𑀫𑀸𑀳𑀸𑀭𑁄 𑀏𑀯𑀁𑀲𑀼𑀔𑀤𑀼𑀓𑁆𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀏𑀯𑀫𑀸𑀬𑀼𑀧𑀭𑀺𑀬𑀦𑁆𑀢𑁄. 𑀲𑁄 𑀢𑀢𑁄 𑀘𑀼𑀢𑁄 𑀅𑀫𑀼𑀢𑁆𑀭 𑀉𑀤𑀧𑀸𑀤𑀺𑀁. 𑀢𑀢𑁆𑀭𑀸𑀧𑀸𑀲𑀺𑀁 𑀏𑀯𑀁𑀦𑀸𑀫𑁄 𑀏𑀯𑀁𑀕𑁄𑀢𑁆𑀢𑁄 𑀏𑀯𑀁𑀯𑀡𑁆𑀡𑁄 𑀏𑀯𑀫𑀸𑀳𑀸𑀭𑁄 𑀏𑀯𑀁𑀲𑀼𑀔𑀤𑀼𑀓𑁆𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀏𑀯𑀫𑀸𑀬𑀼𑀧𑀭𑀺𑀬𑀦𑁆𑀢𑁄. 𑀲𑁄 𑀢𑀢𑁄 𑀘𑀼𑀢𑁄 𑀇𑀥𑀽𑀧𑀧𑀦𑁆𑀦𑁄’𑀢𑀺. 𑀇𑀢𑀺 𑀲𑀸𑀓𑀸𑀭𑀁 𑀲𑀉𑀤𑁆𑀤𑁂𑀲𑀁 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺. 𑀅𑀬𑀫𑀲𑁆𑀲 𑀧𑀞𑀫𑀸 𑀯𑀺𑀚𑁆𑀚𑀸 𑀅𑀥𑀺𑀕𑀢𑀸 𑀳𑁄𑀢𑀺, 𑀅𑀯𑀺𑀚𑁆𑀚𑀸 𑀯𑀺𑀳𑀢𑀸, 𑀯𑀺𑀚𑁆𑀚𑀸 𑀉𑀧𑁆𑀧𑀦𑁆𑀦𑀸, 𑀢𑀫𑁄 𑀯𑀺𑀳𑀢𑁄, 𑀆𑀮𑁄𑀓𑁄 𑀉𑀧𑁆𑀧𑀦𑁆𑀦𑁄, 𑀬𑀣𑀸 𑀢𑀁 𑀅𑀧𑁆𑀧𑀫𑀢𑁆𑀢𑀲𑁆𑀲 𑀆𑀢𑀸𑀧𑀺𑀦𑁄 𑀧𑀳𑀺𑀢𑀢𑁆𑀢𑀲𑁆𑀲 𑀯𑀺𑀳𑀭𑀢𑁄.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀲𑀢𑁆𑀢𑁂 𑀧𑀲𑁆𑀲𑀢𑀺 𑀘𑀯𑀫𑀸𑀦𑁂 𑀉𑀧𑀧𑀚𑁆𑀚𑀫𑀸𑀦𑁂 𑀳𑀻𑀦𑁂 𑀧𑀡𑀻𑀢𑁂 𑀲𑀼𑀯𑀡𑁆𑀡𑁂 𑀤𑀼𑀩𑁆𑀩𑀡𑁆𑀡𑁂, 𑀲𑀼𑀕𑀢𑁂 𑀤𑀼𑀕𑁆𑀕𑀢𑁂 𑀬𑀣𑀸𑀓𑀫𑁆𑀫𑀽𑀧𑀕𑁂 𑀲𑀢𑁆𑀢𑁂 𑀧𑀚𑀸𑀦𑀸𑀢𑀺 𑁋 ‘𑀇𑀫𑁂 𑀯𑀢 𑀪𑁄𑀦𑁆𑀢𑁄 𑀲𑀢𑁆𑀢𑀸 𑀓𑀸𑀬𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀯𑀘𑀻𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀫𑀦𑁄𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀅𑀭𑀺𑀬𑀸𑀦𑀁 𑀉𑀧𑀯𑀸𑀤𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀸. 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀦𑁆𑀦𑀸. 𑀇𑀫𑁂 𑀯𑀸 𑀧𑀦 𑀪𑁄𑀦𑁆𑀢𑁄 𑀲𑀢𑁆𑀢𑀸 𑀓𑀸𑀬𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀯𑀘𑀻𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀫𑀦𑁄𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀅𑀭𑀺𑀬𑀸𑀦𑀁 𑀅𑀦𑀼𑀧𑀯𑀸𑀤𑀓𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀸. 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀦𑁆𑀦𑀸’𑀢𑀺. 𑀇𑀢𑀺 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀲𑀢𑁆𑀢𑁂 𑀧𑀲𑁆𑀲𑀢𑀺 𑀘𑀯𑀫𑀸𑀦𑁂 𑀉𑀧𑀧𑀚𑁆𑀚𑀫𑀸𑀦𑁂 𑀳𑀻𑀦𑁂 𑀧𑀡𑀻𑀢𑁂 𑀲𑀼𑀯𑀡𑁆𑀡𑁂 𑀤𑀼𑀩𑁆𑀩𑀡𑁆𑀡𑁂, 𑀲𑀼𑀕𑀢𑁂 𑀤𑀼𑀕𑁆𑀕𑀢𑁂 𑀬𑀣𑀸𑀓𑀫𑁆𑀫𑀽𑀧𑀕𑁂 𑀲𑀢𑁆𑀢𑁂 𑀧𑀚𑀸𑀦𑀸𑀢𑀺. 𑀅𑀬𑀫𑀲𑁆𑀲 𑀤𑀼𑀢𑀺𑀬𑀸 𑀯𑀺𑀚𑁆𑀚𑀸 𑀅𑀥𑀺𑀕𑀢𑀸 𑀳𑁄𑀢𑀺, 𑀅𑀯𑀺𑀚𑁆𑀚𑀸 𑀯𑀺𑀳𑀢𑀸, 𑀯𑀺𑀚𑁆𑀚𑀸 𑀉𑀧𑁆𑀧𑀦𑁆𑀦𑀸, 𑀢𑀫𑁄 𑀯𑀺𑀳𑀢𑁄, 𑀆𑀮𑁄𑀓𑁄 𑀉𑀧𑁆𑀧𑀦𑁆𑀦𑁄, 𑀬𑀣𑀸 𑀢𑀁 𑀅𑀧𑁆𑀧𑀫𑀢𑁆𑀢𑀲𑁆𑀲 𑀆𑀢𑀸𑀧𑀺𑀦𑁄 𑀧𑀳𑀺𑀢𑀢𑁆𑀢𑀲𑁆𑀲 𑀯𑀺𑀳𑀭𑀢𑁄.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀅𑀬𑀫𑀲𑁆𑀲 𑀢𑀢𑀺𑀬𑀸 𑀯𑀺𑀚𑁆𑀚𑀸 𑀅𑀥𑀺𑀕𑀢𑀸 𑀳𑁄𑀢𑀺, 𑀅𑀯𑀺𑀚𑁆𑀚𑀸 𑀯𑀺𑀳𑀢𑀸, 𑀯𑀺𑀚𑁆𑀚𑀸 𑀉𑀧𑁆𑀧𑀦𑁆𑀦𑀸, 𑀢𑀫𑁄 𑀯𑀺𑀳𑀢𑁄, 𑀆𑀮𑁄𑀓𑁄 𑀉𑀧𑁆𑀧𑀦𑁆𑀦𑁄, 𑀬𑀣𑀸 𑀢𑀁 𑀅𑀧𑁆𑀧𑀫𑀢𑁆𑀢𑀲𑁆𑀲 𑀆𑀢𑀸𑀧𑀺𑀦𑁄 𑀧𑀳𑀺𑀢𑀢𑁆𑀢𑀲𑁆𑀲 𑀯𑀺𑀳𑀭𑀢𑁄. 𑀏𑀯𑀁 𑀔𑁄 𑀅𑀳𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀦 𑀢𑁂𑀯𑀺𑀚𑁆𑀚𑀁 𑀩𑁆𑀭𑀸𑀳𑁆𑀫𑀡𑀁 𑀧𑀜𑁆𑀜𑀸𑀧𑁂𑀫𑀺, 𑀦𑀸𑀜𑁆𑀜𑀁 𑀮𑀧𑀺𑀢𑀮𑀸𑀧𑀦𑀫𑀢𑁆𑀢𑁂𑀦𑀸’’𑀢𑀺. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘. 𑀢𑀢𑁆𑀣𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺 𑁋

‘‘𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀬𑁄𑀯𑁂𑀤𑀺 [𑀬𑁄𑀯𑁂𑀤𑀺 (𑀲𑀩𑁆𑀩𑀢𑁆𑀣)], 𑀲𑀕𑁆𑀕𑀸𑀧𑀸𑀬𑀜𑁆𑀘 𑀧𑀲𑁆𑀲𑀢𑀺;

𑀅𑀣𑁄 [𑀅𑀣 (𑀲𑁆𑀬𑀸. 𑀓.)] 𑀚𑀸𑀢𑀺𑀓𑁆𑀔𑀬𑀁 𑀧𑀢𑁆𑀢𑁄, 𑀅𑀪𑀺𑀜𑁆𑀜𑀸𑀯𑁄𑀲𑀺𑀢𑁄 𑀫𑀼𑀦𑀺.

‘‘𑀏𑀢𑀸𑀳𑀺 𑀢𑀻𑀳𑀺 𑀯𑀺𑀚𑁆𑀚𑀸𑀳𑀺, 𑀢𑁂𑀯𑀺𑀚𑁆𑀚𑁄 𑀳𑁄𑀢𑀺 𑀩𑁆𑀭𑀸𑀳𑁆𑀫𑀡𑁄;

𑀢𑀫𑀳𑀁 𑀯𑀤𑀸𑀫𑀺 𑀢𑁂𑀯𑀺𑀚𑁆𑀚𑀁, 𑀦𑀸𑀜𑁆𑀜𑀁 𑀮𑀧𑀺𑀢𑀮𑀸𑀧𑀦’’𑀦𑁆𑀢𑀺.

𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀇𑀢𑀺 𑀫𑁂 𑀲𑀼𑀢𑀦𑁆𑀢𑀺. 𑀤𑀲𑀫𑀁.

𑀧𑀜𑁆𑀘𑀫𑁄 𑀯𑀕𑁆𑀕𑁄 𑀦𑀺𑀝𑁆𑀞𑀺𑀢𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀧𑀲𑀸𑀤 𑀚𑀻𑀯𑀺𑀢 𑀲𑀗𑁆𑀖𑀸𑀝𑀺, 𑀅𑀕𑁆𑀕𑀺 𑀉𑀧𑀧𑀭𑀺𑀓𑁆𑀔𑀬𑀸;

𑀉𑀧𑀧𑀢𑁆𑀢𑀺 [𑀉𑀧𑁆𑀧𑀢𑁆𑀢𑀺 (𑀲𑀻.)] 𑀓𑀸𑀫 𑀓𑀮𑁆𑀬𑀸𑀡𑀁, 𑀤𑀸𑀦𑀁 𑀥𑀫𑁆𑀫𑁂𑀦 𑀢𑁂 𑀤𑀲𑀸𑀢𑀺.

𑀢𑀺𑀓𑀦𑀺𑀧𑀸𑀢𑁄 𑀦𑀺𑀝𑁆𑀞𑀺𑀢𑁄.