𑁨. 𑀤𑁂𑀲𑀦𑀸𑀲𑀼𑀢𑁆𑀢𑀁

𑁩𑁯. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸, 𑀯𑀼𑀢𑁆𑀢𑀫𑀭𑀳𑀢𑀸𑀢𑀺 𑀫𑁂 𑀲𑀼𑀢𑀁 𑁋

‘‘𑀢𑀣𑀸𑀕𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀤𑁆𑀯𑁂 𑀥𑀫𑁆𑀫𑀤𑁂𑀲𑀦𑀸 𑀧𑀭𑀺𑀬𑀸𑀬𑁂𑀦 𑀪𑀯𑀦𑁆𑀢𑀺. 𑀓𑀢𑀫𑀸 𑀤𑁆𑀯𑁂? ‘𑀧𑀸𑀧𑀁 𑀧𑀸𑀧𑀓𑀢𑁄 𑀧𑀲𑁆𑀲𑀣𑀸’𑀢𑀺 𑁋 𑀅𑀬𑀁 𑀧𑀞𑀫𑀸 𑀥𑀫𑁆𑀫𑀤𑁂𑀲𑀦𑀸; ‘𑀧𑀸𑀧𑀁 𑀧𑀸𑀧𑀓𑀢𑁄 𑀤𑀺𑀲𑁆𑀯𑀸 𑀢𑀢𑁆𑀣 𑀦𑀺𑀩𑁆𑀩𑀺𑀦𑁆𑀤𑀣 𑀯𑀺𑀭𑀚𑁆𑀚𑀣 𑀯𑀺𑀫𑀼𑀘𑁆𑀘𑀣𑀸’𑀢𑀺 𑁋 𑀅𑀬𑀁 𑀤𑀼𑀢𑀺𑀬𑀸 𑀥𑀫𑁆𑀫𑀤𑁂𑀲𑀦𑀸. 𑀢𑀣𑀸𑀕𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀇𑀫𑀸 𑀤𑁆𑀯𑁂 𑀥𑀫𑁆𑀫𑀤𑁂𑀲𑀦𑀸 𑀧𑀭𑀺𑀬𑀸𑀬𑁂𑀦 𑀪𑀯𑀦𑁆𑀢𑀻’’𑀢𑀺. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘. 𑀢𑀢𑁆𑀣𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺 𑁋

‘‘𑀢𑀣𑀸𑀕𑀢𑀲𑁆𑀲 𑀩𑀼𑀤𑁆𑀥𑀲𑁆𑀲, 𑀲𑀩𑁆𑀩𑀪𑀽𑀢𑀸𑀦𑀼𑀓𑀫𑁆𑀧𑀺𑀦𑁄;

𑀧𑀭𑀺𑀬𑀸𑀬𑀯𑀘𑀦𑀁 𑀧𑀲𑁆𑀲, 𑀤𑁆𑀯𑁂 𑀘 𑀥𑀫𑁆𑀫𑀸 𑀧𑀓𑀸𑀲𑀺𑀢𑀸.

‘‘𑀧𑀸𑀧𑀓𑀁 𑀧𑀲𑁆𑀲𑀣 𑀘𑁂𑀢𑀁 [𑀘𑁂𑀓𑀁 (𑀲𑀻. 𑀧𑀻.), 𑀙𑁂𑀓𑀸 (𑀲𑁆𑀬𑀸.)], 𑀢𑀢𑁆𑀣 𑀘𑀸𑀧𑀺 𑀯𑀺𑀭𑀚𑁆𑀚𑀣;

𑀢𑀢𑁄 𑀯𑀺𑀭𑀢𑁆𑀢𑀘𑀺𑀢𑁆𑀢𑀸𑀲𑁂, 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀣𑀸’’𑀢𑀺.

𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀇𑀢𑀺 𑀫𑁂 𑀲𑀼𑀢𑀦𑁆𑀢𑀺. 𑀤𑀼𑀢𑀺𑀬𑀁.