𑁭. 𑀆𑀢𑀸𑀧𑀻𑀲𑀼𑀢𑁆𑀢𑀁

𑁩𑁪. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸, 𑀯𑀼𑀢𑁆𑀢𑀫𑀭𑀳𑀢𑀸𑀢𑀺 𑀫𑁂 𑀲𑀼𑀢𑀁 𑁋

‘‘𑀅𑀦𑀸𑀢𑀸𑀧𑀻, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀦𑁄𑀢𑁆𑀢𑀸𑀧𑀻 [𑀅𑀦𑁄𑀢𑁆𑀢𑀧𑁆𑀧𑀻 (𑀩𑀳𑀽𑀲𑀼) 𑀅𑀝𑁆𑀞𑀓𑀣𑀸 𑀧𑀲𑁆𑀲𑀺𑀢𑀩𑁆𑀩𑀸] 𑀅𑀪𑀩𑁆𑀩𑁄 𑀲𑀫𑁆𑀩𑁄𑀥𑀸𑀬, 𑀅𑀪𑀩𑁆𑀩𑁄 𑀦𑀺𑀩𑁆𑀩𑀸𑀦𑀸𑀬, 𑀅𑀪𑀩𑁆𑀩𑁄 𑀅𑀦𑀼𑀢𑁆𑀢𑀭𑀲𑁆𑀲 𑀬𑁄𑀕𑀓𑁆𑀔𑁂𑀫𑀲𑁆𑀲 𑀅𑀥𑀺𑀕𑀫𑀸𑀬. 𑀆𑀢𑀸𑀧𑀻 𑀘 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀑𑀢𑁆𑀢𑀸𑀧𑀻 [𑀑𑀢𑁆𑀢𑀧𑁆𑀧𑀻 (𑀩𑀳𑀽𑀲𑀼)] 𑀪𑀩𑁆𑀩𑁄 𑀲𑀫𑁆𑀩𑁄𑀥𑀸𑀬, 𑀪𑀩𑁆𑀩𑁄 𑀦𑀺𑀩𑁆𑀩𑀸𑀦𑀸𑀬, 𑀪𑀩𑁆𑀩𑁄 𑀅𑀦𑀼𑀢𑁆𑀢𑀭𑀲𑁆𑀲 𑀬𑁄𑀕𑀓𑁆𑀔𑁂𑀫𑀲𑁆𑀲 𑀅𑀥𑀺𑀕𑀫𑀸𑀬𑀸’’𑀢𑀺. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘. 𑀢𑀢𑁆𑀣𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺 𑁋

‘‘𑀅𑀦𑀸𑀢𑀸𑀧𑀻 𑀅𑀦𑁄𑀢𑁆𑀢𑀸𑀧𑀻, 𑀓𑀼𑀲𑀻𑀢𑁄 𑀳𑀻𑀦𑀯𑀻𑀭𑀺𑀬𑁄;

𑀬𑁄 𑀣𑀻𑀦𑀫𑀺𑀤𑁆𑀥𑀩𑀳𑀼𑀮𑁄, 𑀅𑀳𑀺𑀭𑀻𑀓𑁄 𑀅𑀦𑀸𑀤𑀭𑁄;

𑀅𑀪𑀩𑁆𑀩𑁄 𑀢𑀸𑀤𑀺𑀲𑁄 𑀪𑀺𑀓𑁆𑀔𑀼, 𑀨𑀼𑀝𑁆𑀞𑀼𑀁 𑀲𑀫𑁆𑀩𑁄𑀥𑀺𑀫𑀼𑀢𑁆𑀢𑀫𑀁.

‘‘𑀬𑁄 𑀘 𑀲𑀢𑀺𑀫𑀸 𑀦𑀺𑀧𑀓𑁄 𑀛𑀸𑀬𑀻, 𑀆𑀢𑀸𑀧𑀻 𑀑𑀢𑁆𑀢𑀸𑀧𑀻 𑀘 𑀅𑀧𑁆𑀧𑀫𑀢𑁆𑀢𑁄;

𑀲𑀁𑀬𑁄𑀚𑀦𑀁 𑀚𑀸𑀢𑀺𑀚𑀭𑀸𑀬 𑀙𑁂𑀢𑁆𑀯𑀸, 𑀇𑀥𑁂𑀯 𑀲𑀫𑁆𑀩𑁄𑀥𑀺𑀫𑀦𑀼𑀢𑁆𑀢𑀭𑀁 𑀨𑀼𑀲𑁂’’𑀢𑀺.

𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀇𑀢𑀺 𑀫𑁂 𑀲𑀼𑀢𑀦𑁆𑀢𑀺. 𑀲𑀢𑁆𑀢𑀫𑀁.