𑁧𑁦. 𑀤𑁄𑀲𑀧𑀭𑀺𑀜𑁆𑀜𑀸𑀲𑀼𑀢𑁆𑀢𑀁

𑁧𑁦. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸, 𑀯𑀼𑀢𑁆𑀢𑀫𑀭𑀳𑀢𑀸𑀢𑀺 𑀫𑁂 𑀲𑀼𑀢𑀁 𑁋

‘‘𑀤𑁄𑀲𑀁, 𑀪𑀺𑀓𑁆𑀔𑀯𑁂, 𑀅𑀦𑀪𑀺𑀚𑀸𑀦𑀁 𑀅𑀧𑀭𑀺𑀚𑀸𑀦𑀁 𑀢𑀢𑁆𑀣 𑀘𑀺𑀢𑁆𑀢𑀁 𑀅𑀯𑀺𑀭𑀸𑀚𑀬𑀁 𑀅𑀧𑁆𑀧𑀚𑀳𑀁 𑀅𑀪𑀩𑁆𑀩𑁄 𑀤𑀼𑀓𑁆𑀔𑀓𑁆𑀔𑀬𑀸𑀬. 𑀤𑁄𑀲𑀜𑁆𑀘 𑀔𑁄, 𑀪𑀺𑀓𑁆𑀔𑀯𑁂, 𑀅𑀪𑀺𑀚𑀸𑀦𑀁 𑀧𑀭𑀺𑀚𑀸𑀦𑀁 𑀢𑀢𑁆𑀣 𑀘𑀺𑀢𑁆𑀢𑀁 𑀯𑀺𑀭𑀸𑀚𑀬𑀁 𑀧𑀚𑀳𑀁 𑀪𑀩𑁆𑀩𑁄 𑀤𑀼𑀓𑁆𑀔𑀓𑁆𑀔𑀬𑀸𑀬𑀸’’𑀢𑀺. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘. 𑀢𑀢𑁆𑀣𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺 𑁋

‘‘𑀬𑁂𑀦 𑀤𑁄𑀲𑁂𑀦 𑀤𑀼𑀝𑁆𑀞𑀸𑀲𑁂, 𑀲𑀢𑁆𑀢𑀸 𑀕𑀘𑁆𑀙𑀦𑁆𑀢𑀺 𑀤𑀼𑀕𑁆𑀕𑀢𑀺𑀁;

𑀢𑀁 𑀤𑁄𑀲𑀁 𑀲𑀫𑁆𑀫𑀤𑀜𑁆𑀜𑀸𑀬, 𑀧𑀚𑀳𑀦𑁆𑀢𑀺 𑀯𑀺𑀧𑀲𑁆𑀲𑀺𑀦𑁄;

𑀧𑀳𑀸𑀬 𑀦 𑀧𑀼𑀦𑀸𑀬𑀦𑁆𑀢𑀺, 𑀇𑀫𑀁 𑀮𑁄𑀓𑀁 𑀓𑀼𑀤𑀸𑀘𑀦’’𑀦𑁆𑀢𑀺.

𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀇𑀢𑀺 𑀫𑁂 𑀲𑀼𑀢𑀦𑁆𑀢𑀺. 𑀤𑀲𑀫𑀁.

𑀧𑀞𑀫𑁄 𑀯𑀕𑁆𑀕𑁄 𑀦𑀺𑀝𑁆𑀞𑀺𑀢𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀭𑀸𑀕𑀤𑁄𑀲𑀸 𑀅𑀣 𑀫𑁄𑀳𑁄, 𑀓𑁄𑀥𑀫𑀓𑁆𑀔𑀸 𑀫𑀸𑀦𑀁 𑀲𑀩𑁆𑀩𑀁;

𑀫𑀸𑀦𑀢𑁄 𑀭𑀸𑀕𑀤𑁄𑀲𑀸 𑀧𑀼𑀦 𑀤𑁆𑀯𑁂, 𑀧𑀓𑀸𑀲𑀺𑀢𑀸 𑀯𑀕𑁆𑀕𑀫𑀸𑀳𑀼 𑀧𑀞𑀫𑀦𑁆𑀢𑀺.