𑁨. 𑀤𑀼𑀢𑀺𑀬𑀯𑀕𑁆𑀕𑁄

𑁧. 𑀫𑁄𑀳𑀧𑀭𑀺𑀜𑁆𑀜𑀸𑀲𑀼𑀢𑁆𑀢𑀁

𑁧𑁧. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸, 𑀯𑀼𑀢𑁆𑀢𑀫𑀭𑀳𑀢𑀸𑀢𑀺 𑀫𑁂 𑀲𑀼𑀢𑀁 𑁋

‘‘𑀫𑁄𑀳𑀁, 𑀪𑀺𑀓𑁆𑀔𑀯𑁂, 𑀅𑀦𑀪𑀺𑀚𑀸𑀦𑀁 𑀅𑀧𑀭𑀺𑀚𑀸𑀦𑀁 𑀢𑀢𑁆𑀣 𑀘𑀺𑀢𑁆𑀢𑀁 𑀅𑀯𑀺𑀭𑀸𑀚𑀬𑀁 𑀅𑀧𑁆𑀧𑀚𑀳𑀁 𑀅𑀪𑀩𑁆𑀩𑁄 𑀤𑀼𑀓𑁆𑀔𑀓𑁆𑀔𑀬𑀸𑀬. 𑀫𑁄𑀳𑀜𑁆𑀘 𑀔𑁄, 𑀪𑀺𑀓𑁆𑀔𑀯𑁂, 𑀅𑀪𑀺𑀚𑀸𑀦𑀁 𑀧𑀭𑀺𑀚𑀸𑀦𑀁 𑀢𑀢𑁆𑀣 𑀘𑀺𑀢𑁆𑀢𑀁 𑀯𑀺𑀭𑀸𑀚𑀬𑀁 𑀧𑀚𑀳𑀁 𑀪𑀩𑁆𑀩𑁄 𑀤𑀼𑀓𑁆𑀔𑀓𑁆𑀔𑀬𑀸𑀬𑀸’’𑀢𑀺. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘. 𑀢𑀢𑁆𑀣𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺 𑁋

‘‘𑀬𑁂𑀦 𑀫𑁄𑀳𑁂𑀦 𑀫𑀽𑀴𑁆𑀳𑀸𑀲𑁂, 𑀲𑀢𑁆𑀢𑀸 𑀕𑀘𑁆𑀙𑀦𑁆𑀢𑀺 𑀤𑀼𑀕𑁆𑀕𑀢𑀺𑀁;

𑀢𑀁 𑀫𑁄𑀳𑀁 𑀲𑀫𑁆𑀫𑀤𑀜𑁆𑀜𑀸𑀬, 𑀧𑀚𑀳𑀦𑁆𑀢𑀺 𑀯𑀺𑀧𑀲𑁆𑀲𑀺𑀦𑁄;

𑀧𑀳𑀸𑀬 𑀦 𑀧𑀼𑀦𑀸𑀬𑀦𑁆𑀢𑀺, 𑀇𑀫𑀁 𑀮𑁄𑀓𑀁 𑀓𑀼𑀤𑀸𑀘𑀦’’𑀦𑁆𑀢𑀺.

𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀇𑀢𑀺 𑀫𑁂 𑀲𑀼𑀢𑀦𑁆𑀢𑀺. 𑀧𑀞𑀫𑀁.

𑁨. 𑀓𑁄𑀥𑀧𑀭𑀺𑀜𑁆𑀜𑀸𑀲𑀼𑀢𑁆𑀢𑀁

𑁧𑁨. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸, 𑀯𑀼𑀢𑁆𑀢𑀫𑀭𑀳𑀢𑀸𑀢𑀺 𑀫𑁂 𑀲𑀼𑀢𑀁 𑁋

‘‘𑀓𑁄𑀥𑀁, 𑀪𑀺𑀓𑁆𑀔𑀯𑁂, 𑀅𑀦𑀪𑀺𑀚𑀸𑀦𑀁 𑀅𑀧𑀭𑀺𑀚𑀸𑀦𑀁 𑀢𑀢𑁆𑀣 𑀘𑀺𑀢𑁆𑀢𑀁 𑀅𑀯𑀺𑀭𑀸𑀚𑀬𑀁 𑀅𑀧𑁆𑀧𑀚𑀳𑀁 𑀅𑀪𑀩𑁆𑀩𑁄 𑀤𑀼𑀓𑁆𑀔𑀓𑁆𑀔𑀬𑀸𑀬. 𑀓𑁄𑀥𑀜𑁆𑀘 𑀔𑁄, 𑀪𑀺𑀓𑁆𑀔𑀯𑁂, 𑀅𑀪𑀺𑀚𑀸𑀦𑀁 𑀧𑀭𑀺𑀚𑀸𑀦𑀁 𑀢𑀢𑁆𑀣 𑀘𑀺𑀢𑁆𑀢𑀁 𑀯𑀺𑀭𑀸𑀚𑀬𑀁 𑀧𑀚𑀳𑀁 𑀪𑀩𑁆𑀩𑁄 𑀤𑀼𑀓𑁆𑀔𑀓𑁆𑀔𑀬𑀸𑀬𑀸’’𑀢𑀺. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘. 𑀢𑀢𑁆𑀣𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺 𑁋

‘‘𑀬𑁂𑀦 𑀓𑁄𑀥𑁂𑀦 𑀓𑀼𑀤𑁆𑀥𑀸𑀲𑁂, 𑀲𑀢𑁆𑀢𑀸 𑀕𑀘𑁆𑀙𑀦𑁆𑀢𑀺 𑀤𑀼𑀕𑁆𑀕𑀢𑀺𑀁;

𑀢𑀁 𑀓𑁄𑀥𑀁 𑀲𑀫𑁆𑀫𑀤𑀜𑁆𑀜𑀸𑀬, 𑀧𑀚𑀳𑀦𑁆𑀢𑀺 𑀯𑀺𑀧𑀲𑁆𑀲𑀺𑀦𑁄;

𑀧𑀳𑀸𑀬 𑀦 𑀧𑀼𑀦𑀸𑀬𑀦𑁆𑀢𑀺, 𑀇𑀫𑀁 𑀮𑁄𑀓𑀁 𑀓𑀼𑀤𑀸𑀘𑀦’’𑀦𑁆𑀢𑀺.

𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀇𑀢𑀺 𑀫𑁂 𑀲𑀼𑀢𑀦𑁆𑀢𑀺. 𑀤𑀼𑀢𑀺𑀬𑀁.

𑁩.𑀫𑀓𑁆𑀔𑀧𑀭𑀺𑀜𑁆𑀜𑀸𑀲𑀼𑀢𑁆𑀢𑀁

𑁧𑁩. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸, 𑀯𑀼𑀢𑁆𑀢𑀫𑀭𑀳𑀢𑀸𑀢𑀺 𑀫𑁂 𑀲𑀼𑀢𑀁 𑁋

‘‘𑀫𑀓𑁆𑀔𑀁, 𑀪𑀺𑀓𑁆𑀔𑀯𑁂, 𑀅𑀦𑀪𑀺𑀚𑀸𑀦𑀁 𑀅𑀧𑀭𑀺𑀚𑀸𑀦𑀁 𑀢𑀢𑁆𑀣 𑀘𑀺𑀢𑁆𑀢𑀁 𑀅𑀯𑀺𑀭𑀸𑀚𑀬𑀁 𑀅𑀧𑁆𑀧𑀚𑀳𑀁 𑀅𑀪𑀩𑁆𑀩𑁄 𑀤𑀼𑀓𑁆𑀔𑀓𑁆𑀔𑀬𑀸𑀬. 𑀫𑀓𑁆𑀔𑀜𑁆𑀘 𑀔𑁄, 𑀪𑀺𑀓𑁆𑀔𑀯𑁂, 𑀅𑀪𑀺𑀚𑀸𑀦𑀁 𑀧𑀭𑀺𑀚𑀸𑀦𑀁 𑀢𑀢𑁆𑀣 𑀘𑀺𑀢𑁆𑀢𑀁 𑀯𑀺𑀭𑀸𑀚𑀬𑀁 𑀧𑀚𑀳𑀁 𑀪𑀩𑁆𑀩𑁄 𑀤𑀼𑀓𑁆𑀔𑀓𑁆𑀔𑀬𑀸𑀬𑀸’’𑀢𑀺. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘. 𑀢𑀢𑁆𑀣𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺 𑁋

‘‘𑀬𑁂𑀦 𑀫𑀓𑁆𑀔𑁂𑀦 𑀫𑀓𑁆𑀔𑀸𑀲𑁂, 𑀲𑀢𑁆𑀢𑀸 𑀕𑀘𑁆𑀙𑀦𑁆𑀢𑀺 𑀤𑀼𑀕𑁆𑀕𑀢𑀺𑀁;

𑀢𑀁 𑀫𑀓𑁆𑀔𑀁 𑀲𑀫𑁆𑀫𑀤𑀜𑁆𑀜𑀸𑀬, 𑀧𑀚𑀳𑀦𑁆𑀢𑀺 𑀯𑀺𑀧𑀲𑁆𑀲𑀺𑀦𑁄;

𑀧𑀳𑀸𑀬 𑀦 𑀧𑀼𑀦𑀸𑀬𑀦𑁆𑀢𑀺, 𑀇𑀫𑀁 𑀮𑁄𑀓𑀁 𑀓𑀼𑀤𑀸𑀘𑀦’’𑀦𑁆𑀢𑀺.

𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀇𑀢𑀺 𑀫𑁂 𑀲𑀼𑀢𑀦𑁆𑀢𑀺. 𑀢𑀢𑀺𑀬𑀁.

𑁪. 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀲𑀼𑀢𑁆𑀢𑀁

𑁧𑁪. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸, 𑀯𑀼𑀢𑁆𑀢𑀫𑀭𑀳𑀢𑀸𑀢𑀺 𑀫𑁂 𑀲𑀼𑀢𑀁 𑁋

‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀁 𑀏𑀓𑀦𑀻𑀯𑀭𑀡𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺 𑀬𑁂𑀦 [𑀬𑁂𑀦𑁂𑀯𑀁 (?)] 𑀦𑀻𑀯𑀭𑀡𑁂𑀦 𑀦𑀺𑀯𑀼𑀢𑀸 𑀧𑀚𑀸 𑀤𑀻𑀖𑀭𑀢𑁆𑀢𑀁 𑀲𑀦𑁆𑀥𑀸𑀯𑀦𑁆𑀢𑀺 𑀲𑀁𑀲𑀭𑀦𑁆𑀢𑀺 𑀬𑀣𑀬𑀺𑀤𑀁, 𑀪𑀺𑀓𑁆𑀔𑀯𑁂, 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀁 [𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑁂𑀦 (?)]. 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀦𑀺𑀯𑀼𑀢𑀸 𑀧𑀚𑀸 𑀤𑀻𑀖𑀭𑀢𑁆𑀢𑀁 𑀲𑀦𑁆𑀥𑀸𑀯𑀦𑁆𑀢𑀺 𑀲𑀁𑀲𑀭𑀦𑁆𑀢𑀻’’𑀢𑀺. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘. 𑀢𑀢𑁆𑀣𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺 𑁋

‘‘𑀦𑀢𑁆𑀣𑀜𑁆𑀜𑁄 𑀏𑀓𑀥𑀫𑁆𑀫𑁄𑀧𑀺, 𑀬𑁂𑀦𑁂𑀯𑀁 [𑀬𑁂𑀦𑁂𑀯 (𑀲𑀻. 𑀧𑀻. 𑀓.)] 𑀦𑀺𑀯𑀼𑀢𑀸 𑀧𑀚𑀸;

𑀲𑀁𑀲𑀭𑀦𑁆𑀢𑀺 𑀅𑀳𑁄𑀭𑀢𑁆𑀢𑀁, 𑀬𑀣𑀸 𑀫𑁄𑀳𑁂𑀦 𑀆𑀯𑀼𑀢𑀸.

‘‘𑀬𑁂 𑀘 𑀫𑁄𑀳𑀁 𑀧𑀳𑀦𑁆𑀢𑁆𑀯𑀸𑀦, 𑀢𑀫𑁄𑀔𑀦𑁆𑀥𑀁 [𑀢𑀫𑁄𑀓𑁆𑀔𑀦𑁆𑀥𑀁 (𑀲𑀻. 𑀲𑁆𑀬𑀸. 𑀧𑀻.)] 𑀧𑀤𑀸𑀮𑀬𑀼𑀁;

𑀦 𑀢𑁂 𑀧𑀼𑀦 𑀲𑀁𑀲𑀭𑀦𑁆𑀢𑀺, 𑀳𑁂𑀢𑀼 𑀢𑁂𑀲𑀁 𑀦 𑀯𑀺𑀚𑁆𑀚𑀢𑀻’’𑀢𑀺.

𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀇𑀢𑀺 𑀫𑁂 𑀲𑀼𑀢𑀦𑁆𑀢𑀺. 𑀘𑀢𑀼𑀢𑁆𑀣𑀁.

𑁫. 𑀢𑀡𑁆𑀳𑀸𑀲𑀁𑀬𑁄𑀚𑀦𑀲𑀼𑀢𑁆𑀢𑀁

𑁧𑁫. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸, 𑀯𑀼𑀢𑁆𑀢𑀫𑀭𑀳𑀢𑀸𑀢𑀺 𑀫𑁂 𑀲𑀼𑀢𑀁 𑁋

‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀁 𑀏𑀓𑀲𑀁𑀬𑁄𑀚𑀦𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺 𑀬𑁂𑀦 [𑀬𑁂𑀦𑁂𑀯𑀁 (𑀲𑁆𑀬𑀸.)] 𑀲𑀁𑀬𑁄𑀚𑀦𑁂𑀦 𑀲𑀁𑀬𑀼𑀢𑁆𑀢𑀸 𑀲𑀢𑁆𑀢𑀸 𑀤𑀻𑀖𑀭𑀢𑁆𑀢𑀁 𑀲𑀦𑁆𑀥𑀸𑀯𑀦𑁆𑀢𑀺 𑀲𑀁𑀲𑀭𑀦𑁆𑀢𑀺 𑀬𑀣𑀬𑀺𑀤𑀁, 𑀪𑀺𑀓𑁆𑀔𑀯𑁂, 𑀢𑀡𑁆𑀳𑀸𑀲𑀁𑀬𑁄𑀚𑀦𑀁 [𑀢𑀡𑁆𑀳𑀸𑀲𑀁𑀬𑁄𑀚𑀦𑁂𑀦 (?)]. 𑀢𑀡𑁆𑀳𑀸𑀲𑀁𑀬𑁄𑀚𑀦𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀲𑀁𑀬𑀼𑀢𑁆𑀢𑀸 𑀲𑀢𑁆𑀢𑀸 𑀤𑀻𑀖𑀭𑀢𑁆𑀢𑀁 𑀲𑀦𑁆𑀥𑀸𑀯𑀦𑁆𑀢𑀺 𑀲𑀁𑀲𑀭𑀦𑁆𑀢𑀻’’𑀢𑀺. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘. 𑀢𑀢𑁆𑀣𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺 𑁋

‘‘𑀢𑀡𑁆𑀳𑀸𑀤𑀼𑀢𑀺𑀬𑁄 𑀧𑀼𑀭𑀺𑀲𑁄, 𑀤𑀻𑀖𑀫𑀤𑁆𑀥𑀸𑀦 𑀲𑀁𑀲𑀭𑀁;

𑀇𑀢𑁆𑀣𑀪𑀸𑀯𑀜𑁆𑀜𑀣𑀸𑀪𑀸𑀯𑀁 [𑀇𑀢𑁆𑀣𑀫𑁆𑀪𑀸𑀯𑀜𑁆𑀜𑀣𑀸𑀪𑀸𑀯𑀁 (𑀲𑁆𑀬𑀸.)], 𑀲𑀁𑀲𑀸𑀭𑀁 𑀦𑀸𑀢𑀺𑀯𑀢𑁆𑀢𑀢𑀺.

‘‘𑀏𑀢𑀫𑀸𑀤𑀻𑀦𑀯𑀁 [𑀏𑀯𑀫𑀸𑀤𑀻𑀦𑀯𑀁 (𑀲𑀻. 𑀧𑀻. 𑀓.)] 𑀜𑀢𑁆𑀯𑀸, 𑀢𑀡𑁆𑀳𑀁 [𑀢𑀡𑁆𑀳𑀸 (𑀲𑀻. 𑀓.)] 𑀤𑀼𑀓𑁆𑀔𑀲𑁆𑀲 𑀲𑀫𑁆𑀪𑀯𑀁;

𑀯𑀻𑀢𑀢𑀡𑁆𑀳𑁄 𑀅𑀦𑀸𑀤𑀸𑀦𑁄, 𑀲𑀢𑁄 𑀪𑀺𑀓𑁆𑀔𑀼 𑀧𑀭𑀺𑀩𑁆𑀩𑀚𑁂’’𑀢𑀺.

𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀇𑀢𑀺 𑀫𑁂 𑀲𑀼𑀢𑀦𑁆𑀢𑀺. 𑀧𑀜𑁆𑀘𑀫𑀁.

𑁬. 𑀧𑀞𑀫𑀲𑁂𑀔𑀲𑀼𑀢𑁆𑀢𑀁

𑁧𑁬. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸, 𑀯𑀼𑀢𑁆𑀢𑀫𑀭𑀳𑀢𑀸𑀢𑀺 𑀫𑁂 𑀲𑀼𑀢𑀁 𑁋

‘‘𑀲𑁂𑀔𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀅𑀧𑁆𑀧𑀢𑁆𑀢𑀫𑀸𑀦𑀲𑀲𑁆𑀲 𑀅𑀦𑀼𑀢𑁆𑀢𑀭𑀁 𑀬𑁄𑀕𑀓𑁆𑀔𑁂𑀫𑀁 𑀧𑀢𑁆𑀣𑀬𑀫𑀸𑀦𑀲𑁆𑀲 𑀯𑀺𑀳𑀭𑀢𑁄 𑀅𑀚𑁆𑀛𑀢𑁆𑀢𑀺𑀓𑀁 𑀅𑀗𑁆𑀕𑀦𑁆𑀢𑀺 𑀓𑀭𑀺𑀢𑁆𑀯𑀸 𑀦𑀸𑀜𑁆𑀜𑀁 𑀏𑀓𑀗𑁆𑀕𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺 𑀬𑀁 𑀏𑀯𑀁 𑀩𑀳𑀽𑀧𑀓𑀸𑀭𑀁 𑀬𑀣𑀬𑀺𑀤𑀁, 𑀪𑀺𑀓𑁆𑀔𑀯𑁂, 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁄. 𑀬𑁄𑀦𑀺𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀫𑀦𑀲𑀺 𑀓𑀭𑁄𑀦𑁆𑀢𑁄 𑀅𑀓𑀼𑀲𑀮𑀁 𑀧𑀚𑀳𑀢𑀺, 𑀓𑀼𑀲𑀮𑀁 𑀪𑀸𑀯𑁂𑀢𑀻’’𑀢𑀺. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘. 𑀢𑀢𑁆𑀣𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺 𑁋

‘‘𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁄, 𑀥𑀫𑁆𑀫𑁄 𑀲𑁂𑀔𑀲𑁆𑀲 𑀪𑀺𑀓𑁆𑀔𑀼𑀦𑁄;

𑀦𑀢𑁆𑀣𑀜𑁆𑀜𑁄 𑀏𑀯𑀁 𑀩𑀳𑀼𑀓𑀸𑀭𑁄, 𑀉𑀢𑁆𑀢𑀫𑀢𑁆𑀣𑀲𑁆𑀲 𑀧𑀢𑁆𑀢𑀺𑀬𑀸;

𑀬𑁄𑀦𑀺𑀲𑁄 𑀧𑀤𑀳𑀁 𑀪𑀺𑀓𑁆𑀔𑀼, 𑀔𑀬𑀁 𑀤𑀼𑀓𑁆𑀔𑀲𑁆𑀲 𑀧𑀸𑀧𑀼𑀡𑁂’’𑀢𑀺.

𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀇𑀢𑀺 𑀫𑁂 𑀲𑀼𑀢𑀦𑁆𑀢𑀺. 𑀙𑀝𑁆𑀞𑀁.

𑁭. 𑀤𑀼𑀢𑀺𑀬𑀲𑁂𑀔𑀲𑀼𑀢𑁆𑀢𑀁

𑁧𑁭. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸, 𑀯𑀼𑀢𑁆𑀢𑀫𑀭𑀳𑀢𑀸𑀢𑀺 𑀫𑁂 𑀲𑀼𑀢𑀁 𑁋

‘‘𑀲𑁂𑀔𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀅𑀧𑁆𑀧𑀢𑁆𑀢𑀫𑀸𑀦𑀲𑀲𑁆𑀲 𑀅𑀦𑀼𑀢𑁆𑀢𑀭𑀁 𑀬𑁄𑀕𑀓𑁆𑀔𑁂𑀫𑀁 𑀧𑀢𑁆𑀣𑀬𑀫𑀸𑀦𑀲𑁆𑀲 𑀯𑀺𑀳𑀭𑀢𑁄 𑀩𑀸𑀳𑀺𑀭𑀁 𑀅𑀗𑁆𑀕𑀦𑁆𑀢𑀺 𑀓𑀭𑀺𑀢𑁆𑀯𑀸 𑀦𑀸𑀜𑁆𑀜𑀁 𑀏𑀓𑀗𑁆𑀕𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺 𑀬𑀁 𑀏𑀯𑀁 𑀩𑀳𑀽𑀧𑀓𑀸𑀭𑀁 𑀬𑀣𑀬𑀺𑀤𑀁, 𑀪𑀺𑀓𑁆𑀔𑀯𑁂, 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸. 𑀓𑀮𑁆𑀬𑀸𑀡𑀫𑀺𑀢𑁆𑀢𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀓𑀼𑀲𑀮𑀁 𑀧𑀚𑀳𑀢𑀺, 𑀓𑀼𑀲𑀮𑀁 𑀪𑀸𑀯𑁂𑀢𑀻’’𑀢𑀺. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘. 𑀢𑀢𑁆𑀣𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺 𑁋

‘‘𑀓𑀮𑁆𑀬𑀸𑀡𑀫𑀺𑀢𑁆𑀢𑁄 𑀬𑁄 𑀪𑀺𑀓𑁆𑀔𑀼, 𑀲𑀧𑁆𑀧𑀢𑀺𑀲𑁆𑀲𑁄 𑀲𑀕𑀸𑀭𑀯𑁄;

𑀓𑀭𑀁 𑀫𑀺𑀢𑁆𑀢𑀸𑀦𑀁 𑀯𑀘𑀦𑀁, 𑀲𑀫𑁆𑀧𑀚𑀸𑀦𑁄 𑀧𑀢𑀺𑀲𑁆𑀲𑀢𑁄;

𑀧𑀸𑀧𑀼𑀡𑁂 𑀅𑀦𑀼𑀧𑀼𑀩𑁆𑀩𑁂𑀦, 𑀲𑀩𑁆𑀩𑀲𑀁𑀬𑁄𑀚𑀦𑀓𑁆𑀔𑀬’’𑀦𑁆𑀢𑀺.

𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀇𑀢𑀺 𑀫𑁂 𑀲𑀼𑀢𑀦𑁆𑀢𑀺. 𑀲𑀢𑁆𑀢𑀫𑀁.

𑁮. 𑀲𑀗𑁆𑀖𑀪𑁂𑀤𑀲𑀼𑀢𑁆𑀢𑀁

𑁧𑁮. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸, 𑀯𑀼𑀢𑁆𑀢𑀫𑀭𑀳𑀢𑀸𑀢𑀺 𑀫𑁂 𑀲𑀼𑀢𑀁 𑁋

‘‘𑀏𑀓𑀥𑀫𑁆𑀫𑁄, 𑀪𑀺𑀓𑁆𑀔𑀯𑁂, 𑀮𑁄𑀓𑁂 𑀉𑀧𑁆𑀧𑀚𑁆𑀚𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀺 𑀩𑀳𑀼𑀚𑀦𑀸𑀳𑀺𑀢𑀸𑀬 𑀩𑀳𑀼𑀚𑀦𑀸𑀲𑀼𑀔𑀸𑀬 𑀩𑀳𑀼𑀦𑁄 𑀚𑀦𑀲𑁆𑀲 𑀅𑀦𑀢𑁆𑀣𑀸𑀬 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀁. 𑀓𑀢𑀫𑁄 𑀏𑀓𑀥𑀫𑁆𑀫𑁄? 𑀲𑀗𑁆𑀖𑀪𑁂𑀤𑁄. 𑀲𑀗𑁆𑀖𑁂 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀦𑁆𑀦𑁂 𑀅𑀜𑁆𑀜𑀫𑀜𑁆𑀜𑀁 𑀪𑀡𑁆𑀟𑀦𑀸𑀦𑀺 𑀘𑁂𑀯 𑀳𑁄𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀁 𑀧𑀭𑀺𑀪𑀸𑀲𑀸 𑀘 𑀳𑁄𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀁 𑀧𑀭𑀺𑀓𑁆𑀔𑁂𑀧𑀸 𑀘 𑀳𑁄𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀁 𑀧𑀭𑀺𑀘𑁆𑀘𑀚𑀦𑀸 𑀘 𑀳𑁄𑀦𑁆𑀢𑀺. 𑀢𑀢𑁆𑀣 𑀅𑀧𑁆𑀧𑀲𑀦𑁆𑀦𑀸 𑀘𑁂𑀯 𑀦𑀧𑁆𑀧𑀲𑀻𑀤𑀦𑁆𑀢𑀺, 𑀧𑀲𑀦𑁆𑀦𑀸𑀦𑀜𑁆𑀘 𑀏𑀓𑀘𑁆𑀘𑀸𑀦𑀁 𑀅𑀜𑁆𑀜𑀣𑀢𑁆𑀢𑀁 𑀳𑁄𑀢𑀻’’𑀢𑀺. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘. 𑀢𑀢𑁆𑀣𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺 𑁋

‘‘𑀆𑀧𑀸𑀬𑀺𑀓𑁄 𑀦𑁂𑀭𑀬𑀺𑀓𑁄, 𑀓𑀧𑁆𑀧𑀝𑁆𑀞𑁄 𑀲𑀗𑁆𑀖𑀪𑁂𑀤𑀓𑁄;

𑀯𑀕𑁆𑀕𑀸𑀭𑀸𑀫𑁄 𑀅𑀥𑀫𑁆𑀫𑀝𑁆𑀞𑁄, 𑀬𑁄𑀕𑀓𑁆𑀔𑁂𑀫𑀸 𑀧𑀥𑀁𑀲𑀢𑀺 [𑀬𑁄𑀕𑀓𑁆𑀔𑁂𑀫𑀢𑁄 𑀥𑀁𑀲𑀢𑀺 (𑀲𑁆𑀬𑀸. 𑀧𑀻.), 𑀬𑁄𑀕𑀓𑁆𑀔𑁂𑀫𑀸 𑀯𑀺𑀫𑀁𑀲𑀢𑀺 (𑀲𑀻. 𑀓.)];

𑀲𑀗𑁆𑀖𑀁 𑀲𑀫𑀕𑁆𑀕𑀁 𑀪𑁂𑀢𑁆𑀯𑀸𑀦 [𑀪𑀺𑀢𑁆𑀯𑀸𑀦 (𑀲𑀻. 𑀓.), 𑀪𑀺𑀦𑁆𑀤𑀺𑀢𑁆𑀯𑀸 (𑀘𑀽𑀴𑀯. 𑁩𑁫𑁪; 𑀅. 𑀦𑀺. 𑁧𑁦.𑁩𑁯)], 𑀓𑀧𑁆𑀧𑀁 𑀦𑀺𑀭𑀬𑀫𑁆𑀳𑀺 𑀧𑀘𑁆𑀘𑀢𑀻’’𑀢𑀺.

𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀇𑀢𑀺 𑀫𑁂 𑀲𑀼𑀢𑀦𑁆𑀢𑀺. 𑀅𑀝𑁆𑀞𑀫𑀁.

𑁯. 𑀲𑀗𑁆𑀖𑀲𑀸𑀫𑀕𑁆𑀕𑀻𑀲𑀼𑀢𑁆𑀢𑀁

𑁧𑁯. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸, 𑀯𑀼𑀢𑁆𑀢𑀫𑀭𑀳𑀢𑀸𑀢𑀺 𑀫𑁂 𑀲𑀼𑀢𑀁 𑁋

‘‘𑀏𑀓𑀥𑀫𑁆𑀫𑁄, 𑀪𑀺𑀓𑁆𑀔𑀯𑁂, 𑀮𑁄𑀓𑁂 𑀉𑀧𑁆𑀧𑀚𑁆𑀚𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀺 𑀩𑀳𑀼𑀚𑀦𑀳𑀺𑀢𑀸𑀬 𑀩𑀳𑀼𑀚𑀦𑀲𑀼𑀔𑀸𑀬 𑀩𑀳𑀼𑀦𑁄 𑀚𑀦𑀲𑁆𑀲 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀁. 𑀓𑀢𑀫𑁄 𑀏𑀓𑀥𑀫𑁆𑀫𑁄? 𑀲𑀗𑁆𑀖𑀲𑀸𑀫𑀕𑁆𑀕𑀻. 𑀲𑀗𑁆𑀖𑁂 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀲𑀫𑀕𑁆𑀕𑁂 𑀦 𑀘𑁂𑀯 𑀅𑀜𑁆𑀜𑀫𑀜𑁆𑀜𑀁 𑀪𑀡𑁆𑀟𑀦𑀸𑀦𑀺 𑀳𑁄𑀦𑁆𑀢𑀺, 𑀦 𑀘 𑀅𑀜𑁆𑀜𑀫𑀜𑁆𑀜𑀁 𑀧𑀭𑀺𑀪𑀸𑀲𑀸 𑀳𑁄𑀦𑁆𑀢𑀺, 𑀦 𑀘 𑀅𑀜𑁆𑀜𑀫𑀜𑁆𑀜𑀁 𑀧𑀭𑀺𑀓𑁆𑀔𑁂𑀧𑀸 𑀳𑁄𑀦𑁆𑀢𑀺, 𑀦 𑀘 𑀅𑀜𑁆𑀜𑀫𑀜𑁆𑀜𑀁 𑀧𑀭𑀺𑀘𑁆𑀘𑀚𑀦𑀸 𑀳𑁄𑀦𑁆𑀢𑀺. 𑀢𑀢𑁆𑀣 𑀅𑀧𑁆𑀧𑀲𑀦𑁆𑀦𑀸 𑀘𑁂𑀯 𑀧𑀲𑀻𑀤𑀦𑁆𑀢𑀺, 𑀧𑀲𑀦𑁆𑀦𑀸𑀦𑀜𑁆𑀘 𑀪𑀺𑀬𑁆𑀬𑁄𑀪𑀸𑀯𑁄 𑀳𑁄𑀢𑀻’’𑀢𑀺. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘. 𑀢𑀢𑁆𑀣𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺 𑁋

‘‘𑀲𑀼𑀔𑀸 𑀲𑀗𑁆𑀖𑀲𑁆𑀲 𑀲𑀸𑀫𑀕𑁆𑀕𑀻, 𑀲𑀫𑀕𑁆𑀕𑀸𑀦𑀜𑁆𑀘𑀦𑀼𑀕𑁆𑀕𑀳𑁄;

𑀲𑀫𑀕𑁆𑀕𑀭𑀢𑁄 𑀥𑀫𑁆𑀫𑀝𑁆𑀞𑁄, 𑀬𑁄𑀕𑀓𑁆𑀔𑁂𑀫𑀸 𑀦 𑀥𑀁𑀲𑀢𑀺;

𑀲𑀗𑁆𑀖𑀁 𑀲𑀫𑀕𑁆𑀕𑀁 𑀓𑀢𑁆𑀯𑀸𑀦, 𑀓𑀧𑁆𑀧𑀁 𑀲𑀕𑁆𑀕𑀫𑁆𑀳𑀺 𑀫𑁄𑀤𑀢𑀻’’𑀢𑀺.

𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀇𑀢𑀺 𑀫𑁂 𑀲𑀼𑀢𑀦𑁆𑀢𑀺. 𑀦𑀯𑀫𑀁.

𑁧𑁦. 𑀧𑀤𑀼𑀝𑁆𑀞𑀘𑀺𑀢𑁆𑀢𑀲𑀼𑀢𑁆𑀢𑀁

𑁨𑁦. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸, 𑀯𑀼𑀢𑁆𑀢𑀫𑀭𑀳𑀢𑀸𑀢𑀺 𑀫𑁂 𑀲𑀼𑀢𑀁 𑁋

‘‘𑀇𑀥𑀸𑀳𑀁, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑀁 𑀧𑀼𑀕𑁆𑀕𑀮𑀁 𑀧𑀤𑀼𑀝𑁆𑀞𑀘𑀺𑀢𑁆𑀢𑀁 𑀏𑀯𑀁 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀧𑀚𑀸𑀦𑀸𑀫𑀺 𑁋 ‘𑀇𑀫𑀫𑁆𑀳𑀺 𑀘𑀸𑀬𑀁 𑀲𑀫𑀬𑁂 𑀧𑀼𑀕𑁆𑀕𑀮𑁄 𑀓𑀸𑀮𑀗𑁆𑀓𑀭𑁂𑀬𑁆𑀬 𑀬𑀣𑀸𑀪𑀢𑀁 𑀦𑀺𑀓𑁆𑀔𑀺𑀢𑁆𑀢𑁄 𑀏𑀯𑀁 𑀦𑀺𑀭𑀬𑁂’. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀘𑀺𑀢𑁆𑀢𑀁 𑀳𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀧𑀤𑀼𑀝𑁆𑀞𑀁. 𑀘𑁂𑀢𑁄𑀧𑀤𑁄𑀲𑀳𑁂𑀢𑀼 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀏𑀯𑀫𑀺𑀥𑁂𑀓𑀘𑁆𑀘𑁂 𑀲𑀢𑁆𑀢𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀦𑁆𑀢𑀻’’𑀢𑀺. 𑀏𑀢𑀫𑀢𑁆𑀣𑀁 𑀪𑀕𑀯𑀸 𑀅𑀯𑁄𑀘. 𑀢𑀢𑁆𑀣𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺 𑁋

‘‘𑀧𑀤𑀼𑀝𑁆𑀞𑀘𑀺𑀢𑁆𑀢𑀁 𑀜𑀢𑁆𑀯𑀸𑀦, 𑀏𑀓𑀘𑁆𑀘𑀁 𑀇𑀥 𑀧𑀼𑀕𑁆𑀕𑀮𑀁;

𑀏𑀢𑀫𑀢𑁆𑀣𑀜𑁆𑀘 𑀩𑁆𑀬𑀸𑀓𑀸𑀲𑀺, 𑀩𑀼𑀤𑁆𑀥𑁄 𑀪𑀺𑀓𑁆𑀔𑀽𑀦 𑀲𑀦𑁆𑀢𑀺𑀓𑁂.

‘‘𑀇𑀫𑀫𑁆𑀳𑀺 𑀘𑀸𑀬𑀁 𑀲𑀫𑀬𑁂, 𑀓𑀸𑀮𑀁 𑀓𑀬𑀺𑀭𑀸𑀣 𑀧𑀼𑀕𑁆𑀕𑀮𑁄;

𑀦𑀺𑀭𑀬𑀁 𑀉𑀧𑀧𑀚𑁆𑀚𑁂𑀬𑁆𑀬, 𑀘𑀺𑀢𑁆𑀢𑀁 𑀳𑀺𑀲𑁆𑀲 𑀧𑀤𑀽𑀲𑀺𑀢𑀁.

‘‘𑀬𑀣𑀸 𑀳𑀭𑀺𑀢𑁆𑀯𑀸 𑀦𑀺𑀓𑁆𑀔𑀺𑀧𑁂𑀬𑁆𑀬, 𑀏𑀯𑀫𑁂𑀯 𑀢𑀣𑀸𑀯𑀺𑀥𑁄;

𑀘𑁂𑀢𑁄𑀧𑀤𑁄𑀲𑀳𑁂𑀢𑀼 𑀳𑀺, 𑀲𑀢𑁆𑀢𑀸 𑀕𑀘𑁆𑀙𑀦𑁆𑀢𑀺 𑀤𑀼𑀕𑁆𑀕𑀢𑀺’’𑀦𑁆𑀢𑀺.

𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀇𑀢𑀺 𑀫𑁂 𑀲𑀼𑀢𑀦𑁆𑀢𑀺. 𑀤𑀲𑀫𑀁.

𑀤𑀼𑀢𑀺𑀬𑁄 𑀯𑀕𑁆𑀕𑁄 𑀦𑀺𑀝𑁆𑀞𑀺𑀢𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀫𑁄𑀳𑁄 𑀓𑁄𑀥𑁄 𑀅𑀣 𑀫𑀓𑁆𑀔𑁄, 𑀯𑀺𑀚𑁆𑀚𑀸 𑀢𑀡𑁆𑀳𑀸 𑀲𑁂𑀔𑀤𑀼𑀯𑁂 𑀘;

𑀪𑁂𑀤𑁄 𑀲𑀸𑀫𑀕𑁆𑀕𑀺𑀧𑀼𑀕𑁆𑀕𑀮𑁄 [𑀫𑁄𑀳𑀓𑁄𑀥 𑀅𑀣 𑀫𑀓𑁆𑀔𑀸𑀕𑀢𑁄, 𑀫𑀽𑀳𑀸 𑀓𑀸𑀫𑀲𑁂𑀓𑁆𑀔𑀤𑀼𑀯𑁂; 𑀪𑁂𑀤𑀲𑀸𑀫𑀕𑁆𑀕𑀧𑀼𑀕𑁆𑀕𑀮𑁄 𑀘 (𑀲𑀻. 𑀓.) 𑀫𑁄𑀳𑀓𑁄𑀥𑀸 𑀅𑀣 𑀫𑀓𑁆𑀔𑁄 𑀫𑁄𑀳𑀓𑀸𑀫𑀸 𑀲𑁂𑀓𑁆𑀔𑀸 𑀤𑀼𑀯𑁂; 𑀪𑁂𑀤𑀫𑁄𑀤𑀸 𑀧𑀼𑀕𑁆𑀕𑀮𑁄 𑀘 (𑀲𑁆𑀬𑀸. 𑀧𑀻.)], 𑀯𑀕𑁆𑀕𑀫𑀸𑀳𑀼 𑀤𑀼𑀢𑀺𑀬𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺.