𑁪. 𑀘𑀽𑀴𑀩𑁄𑀥𑀺𑀘𑀭𑀺𑀬𑀸

𑁨𑁬. ‘‘𑀧𑀼𑀦𑀸𑀧𑀭𑀁 𑀬𑀤𑀸 𑀳𑁄𑀫𑀺, 𑀘𑀽𑀴𑀩𑁄𑀥𑀺 𑀲𑀼𑀲𑀻𑀮𑀯𑀸;

𑀪𑀯𑀁 𑀤𑀺𑀲𑁆𑀯𑀸𑀦 𑀪𑀬𑀢𑁄, 𑀦𑁂𑀓𑁆𑀔𑀫𑁆𑀫𑀁 𑀅𑀪𑀺𑀦𑀺𑀓𑁆𑀔𑀫𑀺𑀁.

𑁨𑁭. ‘‘𑀬𑀸 𑀫𑁂 𑀤𑀼𑀢𑀺𑀬𑀺𑀓𑀸 𑀆𑀲𑀺, 𑀩𑁆𑀭𑀸𑀳𑁆𑀫𑀡𑀻 𑀓𑀦𑀓𑀲𑀦𑁆𑀦𑀺𑀪𑀸;

𑀲𑀸𑀧𑀺 𑀯𑀝𑁆𑀝𑁂 𑀅𑀦𑀧𑁂𑀓𑁆𑀔𑀸, 𑀦𑁂𑀓𑁆𑀔𑀫𑁆𑀫𑀁 𑀅𑀪𑀺𑀦𑀺𑀓𑁆𑀔𑀫𑀺.

𑁨𑁮. ‘‘𑀦𑀺𑀭𑀸𑀮𑀬𑀸 𑀙𑀺𑀦𑁆𑀦𑀩𑀦𑁆𑀥𑀽, 𑀅𑀦𑀧𑁂𑀓𑁆𑀔𑀸 𑀓𑀼𑀮𑁂 𑀕𑀡𑁂;

𑀘𑀭𑀦𑁆𑀢𑀸 𑀕𑀸𑀫𑀦𑀺𑀕𑀫𑀁, 𑀩𑀸𑀭𑀸𑀡𑀲𑀺𑀫𑀼𑀧𑀸𑀕𑀫𑀼𑀁.

𑁨𑁯. ‘‘𑀢𑀢𑁆𑀣 𑀯𑀲𑀸𑀫 𑀦𑀺𑀧𑀓𑀸, 𑀅𑀲𑀁𑀲𑀝𑁆𑀞𑀸 𑀓𑀼𑀮𑁂 𑀕𑀡𑁂;

𑀦𑀺𑀭𑀸𑀓𑀼𑀮𑁂 𑀅𑀧𑁆𑀧𑀲𑀤𑁆𑀤𑁂, 𑀭𑀸𑀚𑀼𑀬𑁆𑀬𑀸𑀦𑁂 𑀯𑀲𑀸𑀫𑀼𑀪𑁄.

𑁩𑁦. ‘‘𑀉𑀬𑁆𑀬𑀸𑀦𑀤𑀲𑁆𑀲𑀦𑀁 𑀕𑀦𑁆𑀢𑁆𑀯𑀸, 𑀭𑀸𑀚𑀸 𑀅𑀤𑁆𑀤𑀲 𑀩𑁆𑀭𑀸𑀳𑁆𑀫𑀡𑀺𑀁;

𑀉𑀧𑀕𑀫𑁆𑀫 𑀫𑀫𑀁 𑀧𑀼𑀘𑁆𑀙𑀺, ‘𑀢𑀼𑀬𑁆𑀳𑁂𑀲𑀸 𑀓𑀸 𑀓𑀲𑁆𑀲 𑀪𑀭𑀺𑀬𑀸’.

𑁩𑁧. ‘‘𑀏𑀯𑀁 𑀯𑀼𑀢𑁆𑀢𑁂 𑀅𑀳𑀁 𑀢𑀲𑁆𑀲, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺𑀁;

‘𑀦 𑀫𑀬𑁆𑀳𑀁 𑀪𑀭𑀺𑀬𑀸 𑀏𑀲𑀸, 𑀲𑀳𑀥𑀫𑁆𑀫𑀸 𑀏𑀓𑀲𑀸𑀲𑀦𑀻’.

𑁩𑁨. ‘‘𑀢𑀺𑀲𑁆𑀲𑀸 [𑀢𑀲𑁆𑀲𑀸 (𑀲𑀻.)] 𑀲𑀸𑀭𑀢𑁆𑀢𑀕𑀥𑀺𑀢𑁄, 𑀕𑀸𑀳𑀸𑀧𑁂𑀢𑁆𑀯𑀸𑀦 𑀘𑁂𑀝𑀓𑁂;

𑀦𑀺𑀧𑁆𑀧𑀻𑀴𑀬𑀦𑁆𑀢𑁄 𑀩𑀮𑀲𑀸, 𑀅𑀦𑁆𑀢𑁂𑀧𑀼𑀭𑀁 𑀧𑀯𑁂𑀲𑀬𑀺.

𑁩𑁩. ‘‘𑀑𑀤𑀧𑀢𑁆𑀢𑀓𑀺𑀬𑀸 𑀫𑀬𑁆𑀳𑀁, 𑀲𑀳𑀚𑀸 𑀏𑀓𑀲𑀸𑀲𑀦𑀻;

𑀆𑀓𑀟𑁆𑀠𑀺𑀢𑁆𑀯𑀸 𑀦𑀬𑀦𑁆𑀢𑀺𑀬𑀸, 𑀓𑁄𑀧𑁄 𑀫𑁂 𑀉𑀧𑀧𑀚𑁆𑀚𑀣.

𑁩𑁪. ‘‘𑀲𑀳 𑀓𑁄𑀧𑁂 𑀲𑀫𑀼𑀧𑁆𑀧𑀦𑁆𑀦𑁂, 𑀲𑀻𑀮𑀩𑁆𑀩𑀢𑀫𑀦𑀼𑀲𑁆𑀲𑀭𑀺𑀁;

𑀢𑀢𑁆𑀣𑁂𑀯 𑀓𑁄𑀧𑀁 𑀦𑀺𑀕𑁆𑀕𑀡𑁆𑀳𑀺𑀁, 𑀦𑀸𑀤𑀸𑀲𑀺𑀁 𑀯𑀟𑁆𑀠𑀺𑀢𑀽𑀧𑀭𑀺.

𑁩𑁫. ‘‘𑀬𑀤𑀺 𑀦𑀁 𑀩𑁆𑀭𑀸𑀳𑁆𑀫𑀡𑀺𑀁 𑀓𑁄𑀘𑀺, 𑀓𑁄𑀝𑁆𑀝𑁂𑀬𑁆𑀬 𑀢𑀺𑀡𑁆𑀳𑀲𑀢𑁆𑀢𑀺𑀬𑀸;

𑀦𑁂𑀯 𑀲𑀻𑀮𑀁 𑀧𑀪𑀺𑀦𑁆𑀤𑁂𑀬𑁆𑀬𑀁, 𑀩𑁄𑀥𑀺𑀬𑀸𑀬𑁂𑀯 𑀓𑀸𑀭𑀡𑀸.

𑁩𑁬. ‘‘𑀦 𑀫𑁂𑀲𑀸 𑀩𑁆𑀭𑀸𑀳𑁆𑀫𑀡𑀻 𑀤𑁂𑀲𑁆𑀲𑀸, 𑀦𑀧𑀺 𑀫𑁂 𑀩𑀮𑀁 𑀦 𑀯𑀺𑀚𑁆𑀚𑀢𑀺;

𑀲𑀩𑁆𑀩𑀜𑁆𑀜𑀼𑀢𑀁 𑀧𑀺𑀬𑀁 𑀫𑀬𑁆𑀳𑀁, 𑀢𑀲𑁆𑀫𑀸 𑀲𑀻𑀮𑀸𑀦𑀼𑀭𑀓𑁆𑀔𑀺𑀲’’𑀦𑁆𑀢𑀺.

𑀘𑀽𑀴𑀩𑁄𑀥𑀺𑀘𑀭𑀺𑀬𑀁 𑀘𑀢𑀼𑀢𑁆𑀣𑀁.