𑁧. 𑀫𑀸𑀢𑀼𑀧𑁄𑀲𑀓𑀘𑀭𑀺𑀬𑀸

𑁧. ‘‘𑀬𑀤𑀸 𑀅𑀳𑁄𑀲𑀺𑀁 𑀧𑀯𑀦𑁂, 𑀓𑀼𑀜𑁆𑀚𑀭𑁄 𑀫𑀸𑀢𑀼𑀧𑁄𑀲𑀓𑁄;

𑀦 𑀢𑀤𑀸 𑀅𑀢𑁆𑀣𑀺 𑀫𑀳𑀺𑀬𑀸, 𑀕𑀼𑀡𑁂𑀦 𑀫𑀫 𑀲𑀸𑀤𑀺𑀲𑁄.

𑁨. ‘‘𑀧𑀯𑀦𑁂 𑀤𑀺𑀲𑁆𑀯𑀸 𑀯𑀦𑀘𑀭𑁄, 𑀭𑀜𑁆𑀜𑁄 𑀫𑀁 𑀧𑀝𑀺𑀯𑁂𑀤𑀬𑀺;

‘𑀢𑀯𑀸𑀦𑀼𑀘𑁆𑀙𑀯𑁄 𑀫𑀳𑀸𑀭𑀸𑀚, 𑀕𑀚𑁄 𑀯𑀲𑀢𑀺 𑀓𑀸𑀦𑀦𑁂.

𑁩. ‘‘‘𑀦 𑀢𑀲𑁆𑀲 𑀧𑀭𑀺𑀓𑁆𑀔𑀸𑀬𑀢𑁆𑀣𑁄, 𑀦𑀧𑀺 𑀆𑀴𑀓𑀓𑀸𑀲𑀼𑀬𑀸;

𑀲𑀳 𑀕𑀳𑀺𑀢𑁂 [𑀲𑀫𑀁 𑀕𑀳𑀺𑀢𑁂 (𑀲𑀻.)] 𑀲𑁄𑀡𑁆𑀟𑀸𑀬, 𑀲𑀬𑀫𑁂𑀯 𑀇𑀥𑁂𑀳𑀺’𑀢𑀺.

𑁪. ‘‘𑀢𑀲𑁆𑀲 𑀢𑀁 𑀯𑀘𑀦𑀁 𑀲𑀼𑀢𑁆𑀯𑀸, 𑀭𑀸𑀚𑀸𑀧𑀺 𑀢𑀼𑀝𑁆𑀞𑀫𑀸𑀦𑀲𑁄;

𑀧𑁂𑀲𑁂𑀲𑀺 𑀳𑀢𑁆𑀣𑀺𑀤𑀫𑀓𑀁, 𑀙𑁂𑀓𑀸𑀘𑀭𑀺𑀬𑀁 𑀲𑀼𑀲𑀺𑀓𑁆𑀔𑀺𑀢𑀁.

𑁫. ‘‘𑀕𑀦𑁆𑀢𑁆𑀯𑀸 𑀲𑁄 𑀳𑀢𑁆𑀣𑀺𑀤𑀫𑀓𑁄, 𑀅𑀤𑁆𑀤𑀲 𑀧𑀤𑀼𑀫𑀲𑁆𑀲𑀭𑁂;

𑀪𑀺𑀲𑀫𑀼𑀴𑀸𑀮𑀁 [𑀪𑀺𑀲𑀫𑀽𑀮𑀁 (𑀓.)] 𑀉𑀤𑁆𑀥𑀭𑀦𑁆𑀢𑀁, 𑀬𑀸𑀧𑀦𑀢𑁆𑀣𑀸𑀬 𑀫𑀸𑀢𑀼𑀬𑀸.

𑁬. ‘‘𑀯𑀺𑀜𑁆𑀜𑀸𑀬 𑀫𑁂 𑀲𑀻𑀮𑀕𑀼𑀡𑀁, 𑀮𑀓𑁆𑀔𑀡𑀁 𑀉𑀧𑀥𑀸𑀭𑀬𑀺;

‘𑀏𑀳𑀺 𑀧𑀼𑀢𑁆𑀢𑀸’𑀢𑀺 𑀧𑀢𑁆𑀯𑀸𑀦, 𑀫𑀫 𑀲𑁄𑀡𑁆𑀟𑀸𑀬 𑀅𑀕𑁆𑀕𑀳𑀺.

𑁭. ‘‘𑀬𑀁 𑀫𑁂 𑀢𑀤𑀸 𑀧𑀸𑀓𑀢𑀺𑀓𑀁, 𑀲𑀭𑀻𑀭𑀸𑀦𑀼𑀕𑀢𑀁 𑀩𑀮𑀁;

𑀅𑀚𑁆𑀚 𑀦𑀸𑀕𑀲𑀳𑀲𑁆𑀲𑀸𑀦𑀁, 𑀩𑀮𑁂𑀦 𑀲𑀫𑀲𑀸𑀤𑀺𑀲𑀁.

𑁮. ‘‘𑀬𑀤𑀺𑀳𑀁 𑀢𑁂𑀲𑀁 𑀧𑀓𑀼𑀧𑁆𑀧𑁂𑀬𑁆𑀬𑀁, 𑀉𑀧𑁂𑀢𑀸𑀦𑀁 𑀕𑀳𑀡𑀸𑀬 𑀫𑀁;

𑀧𑀝𑀺𑀩𑀮𑁄 𑀪𑀯𑁂 𑀢𑁂𑀲𑀁, 𑀬𑀸𑀯 𑀭𑀚𑁆𑀚𑀫𑁆𑀧𑀺 𑀫𑀸𑀦𑀼𑀲𑀁.

𑁯. ‘‘𑀅𑀧𑀺 𑀘𑀸𑀳𑀁 𑀲𑀻𑀮𑀭𑀓𑁆𑀔𑀸𑀬, 𑀲𑀻𑀮𑀧𑀸𑀭𑀫𑀺𑀧𑀽𑀭𑀺𑀬𑀸;

𑀦 𑀓𑀭𑁄𑀫𑀺 𑀘𑀺𑀢𑁆𑀢𑁂 𑀅𑀜𑁆𑀜𑀣𑀢𑁆𑀢𑀁, 𑀧𑀓𑁆𑀔𑀺𑀧𑀦𑁆𑀢𑀁 𑀫𑀫𑀸𑀴𑀓𑁂.

𑁧𑁦. ‘‘𑀬𑀤𑀺 𑀢𑁂 𑀫𑀁 𑀢𑀢𑁆𑀣 𑀓𑁄𑀝𑁆𑀝𑁂𑀬𑁆𑀬𑀼𑀁, 𑀨𑀭𑀲𑀽𑀳𑀺 𑀢𑁄𑀫𑀭𑁂𑀳𑀺 𑀘;

𑀦𑁂𑀯 𑀢𑁂𑀲𑀁 𑀧𑀓𑀼𑀧𑁆𑀧𑁂𑀬𑁆𑀬𑀁, 𑀲𑀻𑀮𑀔𑀡𑁆𑀟𑀪𑀬𑀸 𑀫𑀫𑀸’’𑀢𑀺.

𑀫𑀸𑀢𑀼𑀧𑁄𑀲𑀓𑀘𑀭𑀺𑀬𑀁 𑀧𑀞𑀫𑀁.