𑁯. 𑀅𑀦𑁄𑀫𑀤𑀲𑁆𑀲𑀻𑀩𑀼𑀤𑁆𑀥𑀯𑀁𑀲𑁄

𑁧. 𑀲𑁄𑀪𑀺𑀢𑀲𑁆𑀲 𑀅𑀧𑀭𑁂𑀦, 𑀲𑀫𑁆𑀩𑀼𑀤𑁆𑀥𑁄 𑀤𑁆𑀯𑀺𑀧𑀤𑀼𑀢𑁆𑀢𑀫𑁄;

𑀅𑀦𑁄𑀫𑀤𑀲𑁆𑀲𑀻 𑀅𑀫𑀺𑀢𑀬𑀲𑁄, 𑀢𑁂𑀚𑀲𑁆𑀲𑀻 𑀤𑀼𑀭𑀢𑀺𑀓𑁆𑀓𑀫𑁄.

𑁨. 𑀲𑁄 𑀙𑁂𑀢𑁆𑀯𑀸 𑀩𑀦𑁆𑀥𑀦𑀁 𑀲𑀩𑁆𑀩𑀁, 𑀯𑀺𑀤𑁆𑀥𑀁𑀲𑁂𑀢𑁆𑀯𑀸 𑀢𑀬𑁄 𑀪𑀯𑁂;

𑀅𑀦𑀺𑀯𑀢𑁆𑀢𑀺𑀕𑀫𑀦𑀁 𑀫𑀕𑁆𑀕𑀁, 𑀤𑁂𑀲𑁂𑀲𑀺 𑀤𑁂𑀯𑀫𑀸𑀦𑀼𑀲𑁂.

𑁩. 𑀲𑀸𑀕𑀭𑁄𑀯 𑀅𑀲𑀗𑁆𑀔𑁄𑀪𑁄, 𑀧𑀩𑁆𑀩𑀢𑁄𑀯 𑀤𑀼𑀭𑀸𑀲𑀤𑁄;

𑀆𑀓𑀸𑀲𑁄𑀯 𑀅𑀦𑀦𑁆𑀢𑁄 𑀲𑁄, 𑀲𑀸𑀮𑀭𑀸𑀚𑀸𑀯 𑀨𑀼𑀮𑁆𑀮𑀺𑀢𑁄.

𑁪. 𑀤𑀲𑁆𑀲𑀦𑁂𑀦𑀧𑀺 𑀢𑀁 𑀩𑀼𑀤𑁆𑀥𑀁, 𑀢𑁄𑀲𑀺𑀢𑀸 𑀳𑁄𑀦𑁆𑀢𑀺 𑀧𑀸𑀡𑀺𑀦𑁄;

𑀩𑁆𑀬𑀸𑀳𑀭𑀦𑁆𑀢𑀁 𑀕𑀺𑀭𑀁 𑀲𑀼𑀢𑁆𑀯𑀸, 𑀅𑀫𑀢𑀁 𑀧𑀸𑀧𑀼𑀡𑀦𑁆𑀢𑀺 𑀢𑁂.

𑁫. 𑀥𑀫𑁆𑀫𑀸𑀪𑀺𑀲𑀫𑀬𑁄 𑀢𑀲𑁆𑀲, 𑀇𑀤𑁆𑀥𑁄 𑀨𑀻𑀢𑁄 𑀢𑀤𑀸 𑀅𑀳𑀼;

𑀓𑁄𑀝𑀺𑀲𑀢𑀸𑀦𑀺 𑀅𑀪𑀺𑀲𑀫𑀺𑀁𑀲𑀼, 𑀧𑀞𑀫𑁂 𑀥𑀫𑁆𑀫𑀤𑁂𑀲𑀦𑁂.

𑁬. 𑀢𑀢𑁄 𑀧𑀭𑀁 𑀅𑀪𑀺𑀲𑀫𑀬𑁂, 𑀯𑀲𑁆𑀲𑀦𑁆𑀢𑁂 𑀥𑀫𑁆𑀫𑀯𑀼𑀝𑁆𑀞𑀺𑀬𑁄;

𑀅𑀲𑀻𑀢𑀺𑀓𑁄𑀝𑀺𑀬𑁄𑀪𑀺𑀲𑀫𑀺𑀁𑀲𑀼, 𑀤𑀼𑀢𑀺𑀬𑁂 𑀥𑀫𑁆𑀫𑀤𑁂𑀲𑀦𑁂.

𑁭. 𑀢𑀢𑁄𑀧𑀭𑀜𑁆𑀳𑀺 𑀯𑀲𑁆𑀲𑀦𑁆𑀢𑁂, 𑀢𑀧𑁆𑀧𑀬𑀦𑁆𑀢𑁂 𑀘 𑀧𑀸𑀡𑀺𑀦𑀁;

𑀅𑀝𑁆𑀞𑀲𑀢𑁆𑀢𑀢𑀺𑀓𑁄𑀝𑀻𑀦𑀁, 𑀢𑀢𑀺𑀬𑀸𑀪𑀺𑀲𑀫𑀬𑁄 𑀅𑀳𑀼.

𑁮. 𑀲𑀦𑁆𑀦𑀺𑀧𑀸𑀢𑀸 𑀢𑀬𑁄 𑀆𑀲𑀼𑀁, 𑀢𑀲𑁆𑀲𑀸𑀧𑀺 𑀘 𑀫𑀳𑁂𑀲𑀺𑀦𑁄;

𑀅𑀪𑀺𑀜𑁆𑀜𑀸𑀩𑀮𑀧𑁆𑀧𑀢𑁆𑀢𑀸𑀦𑀁, 𑀧𑀼𑀧𑁆𑀨𑀺𑀢𑀸𑀦𑀁 𑀯𑀺𑀫𑀼𑀢𑁆𑀢𑀺𑀬𑀸.

𑁯. 𑀅𑀝𑁆𑀞𑀲𑀢𑀲𑀳𑀲𑁆𑀲𑀸𑀦𑀁, 𑀲𑀦𑁆𑀦𑀺𑀧𑀸𑀢𑁄 𑀢𑀤𑀸 𑀅𑀳𑀼;

𑀧𑀳𑀻𑀦𑀫𑀤𑀫𑁄𑀳𑀸𑀦𑀁, 𑀲𑀦𑁆𑀢𑀘𑀺𑀢𑁆𑀢𑀸𑀦 𑀢𑀸𑀤𑀺𑀦𑀁.

𑁧𑁦. 𑀲𑀢𑁆𑀢𑀲𑀢𑀲𑀳𑀲𑁆𑀲𑀸𑀦𑀁, 𑀤𑀼𑀢𑀺𑀬𑁄 𑀆𑀲𑀺 𑀲𑀫𑀸𑀕𑀫𑁄;

𑀅𑀦𑀗𑁆𑀕𑀡𑀸𑀦𑀁 𑀯𑀺𑀭𑀚𑀸𑀦𑀁, 𑀉𑀧𑀲𑀦𑁆𑀢𑀸𑀦 𑀢𑀸𑀤𑀺𑀦𑀁.

𑁧𑁧. 𑀙𑀦𑁆𑀦𑀁 𑀲𑀢𑀲𑀳𑀲𑁆𑀲𑀸𑀦𑀁, 𑀢𑀢𑀺𑀬𑁄 𑀆𑀲𑀺 𑀲𑀫𑀸𑀕𑀫𑁄;

𑀅𑀪𑀺𑀜𑁆𑀜𑀸𑀩𑀮𑀧𑁆𑀧𑀢𑁆𑀢𑀸𑀦𑀁, 𑀦𑀺𑀩𑁆𑀩𑀼𑀢𑀸𑀦𑀁 𑀢𑀧𑀲𑁆𑀲𑀺𑀦𑀁.

𑁧𑁨. 𑀅𑀳𑀁 𑀢𑁂𑀦 𑀲𑀫𑀬𑁂𑀦, 𑀬𑀓𑁆𑀔𑁄 𑀆𑀲𑀺𑀁 𑀫𑀳𑀺𑀤𑁆𑀥𑀺𑀓𑁄;

𑀦𑁂𑀓𑀸𑀦𑀁 𑀬𑀓𑁆𑀔𑀓𑁄𑀝𑀻𑀦𑀁, 𑀯𑀲𑀯𑀢𑁆𑀢𑀺𑀫𑁆𑀳𑀺 𑀇𑀲𑁆𑀲𑀭𑁄.

𑁧𑁩. 𑀢𑀤𑀸𑀧𑀺 𑀢𑀁 𑀩𑀼𑀤𑁆𑀥𑀯𑀭𑀁, 𑀉𑀧𑀕𑀦𑁆𑀢𑁆𑀯𑀸 𑀫𑀳𑁂𑀲𑀺𑀦𑀁;

𑀅𑀦𑁆𑀦𑀧𑀸𑀦𑁂𑀦 𑀢𑀧𑁆𑀧𑁂𑀲𑀺𑀁, 𑀲𑀲𑀗𑁆𑀖𑀁 𑀮𑁄𑀓𑀦𑀸𑀬𑀓𑀁.

𑁧𑁪. 𑀲𑁄𑀧𑀺 𑀫𑀁 𑀢𑀤𑀸 𑀩𑁆𑀬𑀸𑀓𑀸𑀲𑀺, 𑀯𑀺𑀲𑀼𑀤𑁆𑀥𑀦𑀬𑀦𑁄 𑀫𑀼𑀦𑀺;

‘‘𑀅𑀧𑀭𑀺𑀫𑁂𑀬𑁆𑀬𑀺𑀢𑁄 𑀓𑀧𑁆𑀧𑁂, 𑀅𑀬𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺.

𑁧𑁫. ‘‘𑀧𑀥𑀸𑀦𑀁 𑀧𑀤𑀳𑀺𑀢𑁆𑀯𑀸𑀦…𑀧𑁂… 𑀳𑁂𑀲𑁆𑀲𑀸𑀫 𑀲𑀫𑁆𑀫𑀼𑀔𑀸 𑀇𑀫𑀁’’.

𑁧𑁬. 𑀢𑀲𑁆𑀲𑀸𑀧𑀺 𑀯𑀘𑀦𑀁 𑀲𑀼𑀢𑁆𑀯𑀸, 𑀳𑀝𑁆𑀞𑁄 𑀲𑀁𑀯𑀺𑀕𑁆𑀕𑀫𑀸𑀦𑀲𑁄;

𑀉𑀢𑁆𑀢𑀭𑀺𑀁 𑀯𑀢𑀫𑀥𑀺𑀝𑁆𑀞𑀸𑀲𑀺𑀁, 𑀤𑀲𑀧𑀸𑀭𑀫𑀺𑀧𑀽𑀭𑀺𑀬𑀸.

𑁧𑁭. 𑀦𑀕𑀭𑀁 𑀘𑀦𑁆𑀤𑀯𑀢𑀻 𑀦𑀸𑀫, 𑀬𑀲𑀯𑀸 𑀦𑀸𑀫 𑀔𑀢𑁆𑀢𑀺𑀬𑁄;

𑀫𑀸𑀢𑀸 𑀬𑀲𑁄𑀥𑀭𑀸 𑀦𑀸𑀫, 𑀅𑀦𑁄𑀫𑀤𑀲𑁆𑀲𑀺𑀲𑁆𑀲 𑀲𑀢𑁆𑀣𑀼𑀦𑁄.

𑁧𑁮. 𑀤𑀲𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀅𑀕𑀸𑀭𑀁 𑀅𑀚𑁆𑀛 𑀲𑁄 𑀯𑀲𑀺;

𑀲𑀺𑀭𑀻 𑀉𑀧𑀲𑀺𑀭𑀻 𑀯𑀟𑁆𑀠𑁄, 𑀢𑀬𑁄 𑀧𑀸𑀲𑀸𑀤𑀫𑀼𑀢𑁆𑀢𑀫𑀸.

𑁧𑁯. 𑀢𑁂𑀯𑀻𑀲𑀢𑀺𑀲𑀳𑀲𑁆𑀲𑀸𑀦𑀺, 𑀦𑀸𑀭𑀺𑀬𑁄 𑀲𑀫𑀮𑀗𑁆𑀓𑀢𑀸;

𑀲𑀺𑀭𑀺𑀫𑀸 𑀦𑀸𑀫 𑀲𑀸 𑀦𑀸𑀭𑀻, 𑀉𑀧𑀯𑀸𑀡𑁄 𑀦𑀸𑀫 𑀅𑀢𑁆𑀭𑀚𑁄.

𑁨𑁦. 𑀦𑀺𑀫𑀺𑀢𑁆𑀢𑁂 𑀘𑀢𑀼𑀭𑁄 𑀤𑀺𑀲𑁆𑀯𑀸, 𑀲𑀺𑀯𑀺𑀓𑀸𑀬𑀸𑀪𑀺𑀦𑀺𑀓𑁆𑀔𑀫𑀺;

𑀅𑀦𑀽𑀦𑀤𑀲𑀫𑀸𑀲𑀸𑀦𑀺, 𑀧𑀥𑀸𑀦𑀁 𑀧𑀤𑀳𑀻 𑀚𑀺𑀦𑁄.

𑁨𑁧. 𑀩𑁆𑀭𑀳𑁆𑀫𑀼𑀦𑀸 𑀬𑀸𑀘𑀺𑀢𑁄 𑀲𑀦𑁆𑀢𑁄, 𑀅𑀦𑁄𑀫𑀤𑀲𑁆𑀲𑀻 𑀫𑀳𑀸𑀫𑀼𑀦𑀺;

𑀯𑀢𑁆𑀢𑀺 𑀘𑀓𑁆𑀓𑀁 𑀫𑀳𑀸𑀯𑀻𑀭𑁄, 𑀉𑀬𑁆𑀬𑀸𑀦𑁂 𑀲𑁄 𑀲𑀼𑀤𑀲𑁆𑀲𑀦𑁂 [𑀲𑀼𑀤𑀲𑁆𑀲𑀦𑀼𑀬𑁆𑀬𑀸𑀦𑀫𑀼𑀢𑁆𑀢𑀫𑁂 (𑀲𑁆𑀬𑀸. 𑀓𑀁.)].

𑁨𑁨. 𑀦𑀺𑀲𑀪𑁄 𑀘 𑀅𑀦𑁄𑀫𑁄 𑀘 [𑀅𑀲𑁄𑀓𑁄 𑀘 (𑀲𑀻.)], 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀓𑀸;

𑀯𑀭𑀼𑀡𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀅𑀦𑁄𑀫𑀤𑀲𑁆𑀲𑀺𑀲𑁆𑀲 𑀲𑀢𑁆𑀣𑀼𑀦𑁄.

𑁨𑁩. 𑀲𑀼𑀦𑁆𑀤𑀭𑀻 𑀘 𑀲𑀼𑀫𑀦𑀸 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀺𑀓𑀸;

𑀩𑁄𑀥𑀺 𑀢𑀲𑁆𑀲 𑀪𑀕𑀯𑀢𑁄, 𑀅𑀚𑁆𑀚𑀼𑀦𑁄𑀢𑀺 𑀧𑀯𑀼𑀘𑁆𑀘𑀢𑀺.

𑁨𑁪. 𑀦𑀦𑁆𑀤𑀺𑀯𑀟𑁆𑀠𑁄 𑀲𑀺𑀭𑀺𑀯𑀟𑁆𑀠𑁄, 𑀅𑀳𑁂𑀲𑀼𑀁 𑀅𑀕𑁆𑀕𑀼𑀧𑀝𑁆𑀞𑀓𑀸;

𑀉𑀧𑁆𑀧𑀮𑀸 𑀘𑁂𑀯 𑀧𑀤𑀼𑀫𑀸 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀼𑀧𑀝𑁆𑀞𑀺𑀓𑀸.

𑁨𑁫. 𑀅𑀝𑁆𑀞𑀧𑀡𑁆𑀡𑀸𑀲𑀭𑀢𑀦𑀁, 𑀅𑀘𑁆𑀘𑀼𑀕𑁆𑀕𑀢𑁄 𑀫𑀳𑀸𑀫𑀼𑀦𑀺;

𑀧𑀪𑀸 𑀦𑀺𑀤𑁆𑀥𑀸𑀯𑀢𑀻 𑀢𑀲𑁆𑀲, 𑀲𑀢𑀭𑀁𑀲𑀻𑀯 𑀉𑀕𑁆𑀕𑀢𑁄.

𑁨𑁬. 𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺, 𑀆𑀬𑀼 𑀯𑀺𑀚𑁆𑀚𑀢𑀺 𑀢𑀸𑀯𑀤𑁂;

𑀢𑀸𑀯𑀢𑀸 𑀢𑀺𑀝𑁆𑀞𑀫𑀸𑀦𑁄 𑀲𑁄, 𑀢𑀸𑀭𑁂𑀲𑀺 𑀚𑀦𑀢𑀁 𑀩𑀳𑀼𑀁.

𑁨𑁭. 𑀲𑀼𑀧𑀼𑀧𑁆𑀨𑀺𑀢𑀁 𑀧𑀸𑀯𑀘𑀦𑀁, 𑀅𑀭𑀳𑀦𑁆𑀢𑁂𑀳𑀺 𑀢𑀸𑀤𑀺𑀳𑀺;

𑀯𑀻𑀢𑀭𑀸𑀕𑁂𑀳𑀺 𑀯𑀺𑀫𑀮𑁂𑀳𑀺, 𑀲𑁄𑀪𑀺𑀢𑁆𑀣 𑀚𑀺𑀦𑀲𑀸𑀲𑀦𑀁.

𑁨𑁮. 𑀲𑁄 𑀘 𑀲𑀢𑁆𑀣𑀸 𑀅𑀫𑀺𑀢𑀬𑀲𑁄, 𑀬𑀼𑀕𑀸𑀦𑀺 𑀢𑀸𑀦𑀺 𑀅𑀢𑀼𑀮𑀺𑀬𑀸𑀦𑀺;

𑀲𑀩𑁆𑀩𑀁 𑀢𑀫𑀦𑁆𑀢𑀭𑀳𑀺𑀢𑀁, 𑀦𑀦𑀼 𑀭𑀺𑀢𑁆𑀢𑀸 𑀲𑀩𑁆𑀩𑀲𑀗𑁆𑀔𑀸𑀭𑀸.

𑁨𑁯. 𑀅𑀦𑁄𑀫𑀤𑀲𑁆𑀲𑀻 𑀚𑀺𑀦𑁄 𑀲𑀢𑁆𑀣𑀸, 𑀥𑀫𑁆𑀫𑀸𑀭𑀸𑀫𑀫𑁆𑀳𑀺 𑀦𑀺𑀩𑁆𑀩𑀼𑀢𑁄;

𑀢𑀢𑁆𑀣𑁂𑀯𑀲𑁆𑀲 𑀚𑀺𑀦𑀣𑀽𑀧𑁄, 𑀉𑀩𑁆𑀩𑁂𑀥𑁄 𑀧𑀜𑁆𑀘𑀯𑀻𑀲𑀢𑀻𑀢𑀺.

𑀅𑀦𑁄𑀫𑀤𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀯𑀁𑀲𑁄 𑀲𑀢𑁆𑀢𑀫𑁄.