𑁧𑁦. 𑀧𑀤𑀼𑀫𑀩𑀼𑀤𑁆𑀥𑀯𑀁𑀲𑁄

𑁧. 𑀅𑀦𑁄𑀫𑀤𑀲𑁆𑀲𑀺𑀲𑁆𑀲 𑀅𑀧𑀭𑁂𑀦, 𑀲𑀫𑁆𑀩𑀼𑀤𑁆𑀥𑁄 𑀤𑁆𑀯𑀺𑀧𑀤𑀼𑀢𑁆𑀢𑀫𑁄;

𑀧𑀤𑀼𑀫𑁄 𑀦𑀸𑀫 𑀦𑀸𑀫𑁂𑀦, 𑀅𑀲𑀫𑁄 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄.

𑁨. 𑀢𑀲𑁆𑀲𑀸𑀧𑀺 𑀅𑀲𑀫𑀁 𑀲𑀻𑀮𑀁, 𑀲𑀫𑀸𑀥𑀺𑀧𑀺 𑀅𑀦𑀦𑁆𑀢𑀓𑁄;

𑀅𑀲𑀗𑁆𑀔𑁂𑀬𑁆𑀬𑀁 𑀜𑀸𑀡𑀯𑀭𑀁, 𑀯𑀺𑀫𑀼𑀢𑁆𑀢𑀺𑀧𑀺 𑀅𑀦𑀽𑀧𑀫𑀸.

𑁩. 𑀢𑀲𑁆𑀲𑀸𑀧𑀺 𑀅𑀢𑀼𑀮𑀢𑁂𑀚𑀲𑁆𑀲, 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑁂;

𑀅𑀪𑀺𑀲𑀫𑀬𑀸 𑀢𑀬𑁄 𑀆𑀲𑀼𑀁, 𑀫𑀳𑀸𑀢𑀫𑀧𑀯𑀸𑀳𑀦𑀸.

𑁪. 𑀧𑀞𑀫𑀸𑀪𑀺𑀲𑀫𑀬𑁂 𑀩𑀼𑀤𑁆𑀥𑁄, 𑀓𑁄𑀝𑀺𑀲𑀢𑀫𑀩𑁄𑀥𑀬𑀺;

𑀤𑀼𑀢𑀺𑀬𑀸𑀪𑀺𑀲𑀫𑀬𑁂 𑀥𑀻𑀭𑁄, 𑀦𑀯𑀼𑀢𑀺𑀓𑁄𑀝𑀺𑀫𑀩𑁄𑀥𑀬𑀺.

𑁫. 𑀬𑀤𑀸 𑀘 𑀧𑀤𑀼𑀫𑁄 𑀩𑀼𑀤𑁆𑀥𑁄, 𑀑𑀯𑀤𑀻 𑀲𑀓𑀫𑀢𑁆𑀭𑀚𑀁;

𑀢𑀤𑀸 𑀅𑀲𑀻𑀢𑀺𑀓𑁄𑀝𑀻𑀦𑀁, 𑀢𑀢𑀺𑀬𑀸𑀪𑀺𑀲𑀫𑀬𑁄 𑀅𑀳𑀼.

𑁬. 𑀲𑀦𑁆𑀦𑀺𑀧𑀸𑀢𑀸 𑀢𑀬𑁄 𑀆𑀲𑀼𑀁, 𑀧𑀤𑀼𑀫𑀲𑁆𑀲 𑀫𑀳𑁂𑀲𑀺𑀦𑁄;

𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁, 𑀧𑀞𑀫𑁄 𑀆𑀲𑀺 𑀲𑀫𑀸𑀕𑀫𑁄.

𑁭. 𑀓𑀣𑀺𑀦𑀢𑁆𑀣𑀸𑀭𑀲𑀫𑀬𑁂, 𑀉𑀧𑁆𑀧𑀦𑁆𑀦𑁂 𑀓𑀣𑀺𑀦𑀘𑀻𑀯𑀭𑁂;

𑀥𑀫𑁆𑀫𑀲𑁂𑀦𑀸𑀧𑀢𑀺𑀢𑁆𑀣𑀸𑀬, 𑀪𑀺𑀓𑁆𑀔𑀽 𑀲𑀺𑀩𑁆𑀩𑀺𑀁𑀲𑀼 [𑀬𑀸𑀘𑀺𑀁𑀲𑀼 (𑀓.)] 𑀘𑀻𑀯𑀭𑀁.

𑁮. 𑀢𑀤𑀸 𑀢𑁂 𑀯𑀺𑀫𑀮𑀸 𑀪𑀺𑀓𑁆𑀔𑀽, 𑀙𑀴𑀪𑀺𑀜𑁆𑀜𑀸 𑀫𑀳𑀺𑀤𑁆𑀥𑀺𑀓𑀸;

𑀢𑀻𑀡𑀺 𑀲𑀢𑀲𑀳𑀲𑁆𑀲𑀸𑀦𑀺, 𑀲𑀫𑀺𑀁𑀲𑀼 𑀅𑀧𑀭𑀸𑀚𑀺𑀢𑀸.

𑁯. 𑀧𑀼𑀦𑀸𑀧𑀭𑀁 𑀲𑁄 𑀦𑀭𑀸𑀲𑀪𑁄 [𑀦𑀭𑀯𑀼𑀲𑀪𑁄 (𑀲𑁆𑀬𑀸. 𑀓𑀁.)], 𑀧𑀯𑀦𑁂 𑀯𑀸𑀲𑀁 𑀉𑀧𑀸𑀕𑀫𑀺;

𑀢𑀤𑀸 𑀲𑀫𑀸𑀕𑀫𑁄 𑀆𑀲𑀺, 𑀤𑁆𑀯𑀺𑀦𑁆𑀦𑀁 𑀲𑀢𑀲𑀳𑀲𑁆𑀲𑀺𑀦𑀁.

𑁧𑁦. 𑀅𑀳𑀁 𑀢𑁂𑀦 𑀲𑀫𑀬𑁂𑀦, 𑀲𑀻𑀳𑁄 𑀆𑀲𑀺𑀁 𑀫𑀺𑀕𑀸𑀥𑀺𑀪𑀽;

𑀯𑀺𑀯𑁂𑀓𑀫𑀦𑀼𑀩𑁆𑀭𑀽𑀳𑀦𑁆𑀢𑀁, 𑀧𑀯𑀦𑁂 𑀅𑀤𑁆𑀤𑀲𑀁 𑀚𑀺𑀦𑀁.

𑁧𑁧. 𑀯𑀦𑁆𑀤𑀺𑀢𑁆𑀯𑀸 𑀲𑀺𑀭𑀲𑀸 𑀧𑀸𑀤𑁂, 𑀓𑀢𑁆𑀯𑀸𑀦 𑀢𑀁 𑀧𑀤𑀓𑁆𑀔𑀺𑀡𑀁;

𑀢𑀺𑀓𑁆𑀔𑀢𑁆𑀢𑀼𑀁 𑀅𑀪𑀺𑀦𑀸𑀤𑀺𑀢𑁆𑀯𑀸, 𑀲𑀢𑁆𑀢𑀸𑀳𑀁 𑀚𑀺𑀦𑀫𑀼𑀧𑀝𑁆𑀞𑀳𑀁.

𑁧𑁨. 𑀲𑀢𑁆𑀢𑀸𑀳𑀁 𑀯𑀭𑀲𑀫𑀸𑀧𑀢𑁆𑀢𑀺𑀬𑀸, 𑀯𑀼𑀝𑁆𑀞𑀳𑀺𑀢𑁆𑀯𑀸 𑀢𑀣𑀸𑀕𑀢𑁄;

𑀫𑀦𑀲𑀸 𑀘𑀺𑀦𑁆𑀢𑀬𑀺𑀢𑁆𑀯𑀸𑀦, 𑀓𑁄𑀝𑀺𑀪𑀺𑀓𑁆𑀔𑀽 𑀲𑀫𑀸𑀦𑀬𑀺.

𑁧𑁩. 𑀢𑀤𑀸𑀧𑀺 𑀲𑁄 𑀫𑀳𑀸𑀯𑀻𑀭𑁄, 𑀢𑁂𑀲𑀁 𑀫𑀚𑁆𑀛𑁂 𑀯𑀺𑀬𑀸𑀓𑀭𑀺;

‘‘𑀅𑀧𑀭𑀺𑀫𑁂𑀬𑁆𑀬𑀺𑀢𑁄 𑀓𑀧𑁆𑀧𑁂, 𑀅𑀬𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺.

𑁧𑁪. ‘‘𑀧𑀥𑀸𑀦𑀁 𑀧𑀤𑀳𑀺𑀢𑁆𑀯𑀸𑀦…𑀧𑁂… 𑀳𑁂𑀲𑁆𑀲𑀸𑀫 𑀲𑀫𑁆𑀫𑀼𑀔𑀸 𑀇𑀫𑀁’’.

𑁧𑁫. 𑀢𑀲𑁆𑀲𑀸𑀧𑀺 𑀯𑀘𑀦𑀁 𑀲𑀼𑀢𑁆𑀯𑀸, 𑀪𑀺𑀬𑁆𑀬𑁄 𑀘𑀺𑀢𑁆𑀢𑀁 𑀧𑀲𑀸𑀤𑀬𑀺𑀁;

𑀉𑀢𑁆𑀢𑀭𑀺𑀁 𑀯𑀢𑀫𑀥𑀺𑀝𑁆𑀞𑀸𑀲𑀺𑀁, 𑀤𑀲𑀧𑀸𑀭𑀫𑀺𑀧𑀽𑀭𑀺𑀬𑀸.

𑁧𑁬. 𑀘𑀫𑁆𑀧𑀓𑀁 𑀦𑀸𑀫 𑀦𑀕𑀭𑀁, 𑀅𑀲𑀫𑁄 𑀦𑀸𑀫 𑀔𑀢𑁆𑀢𑀺𑀬𑁄;

𑀅𑀲𑀫𑀸 𑀦𑀸𑀫 𑀚𑀦𑀺𑀓𑀸, 𑀧𑀤𑀼𑀫𑀲𑁆𑀲 𑀫𑀳𑁂𑀲𑀺𑀦𑁄.

𑁧𑁭. 𑀤𑀲𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀅𑀕𑀸𑀭𑀁 𑀅𑀚𑁆𑀛 𑀲𑁄 𑀯𑀲𑀺;

𑀦𑀦𑁆𑀤𑀸𑀯𑀲𑀼𑀬𑀲𑀼𑀢𑁆𑀢𑀭𑀸, 𑀢𑀬𑁄 𑀧𑀸𑀲𑀸𑀤𑀫𑀼𑀢𑁆𑀢𑀫𑀸.

𑁧𑁮. 𑀢𑁂𑀢𑁆𑀢𑀺𑀁𑀲 𑀘 𑀲𑀳𑀲𑁆𑀲𑀸𑀦𑀺, 𑀦𑀸𑀭𑀺𑀬𑁄 𑀲𑀫𑀮𑀗𑁆𑀓𑀢𑀸;

𑀉𑀢𑁆𑀢𑀭𑀸 𑀦𑀸𑀫 𑀲𑀸 𑀦𑀸𑀭𑀻, 𑀭𑀫𑁆𑀫𑁄 𑀦𑀸𑀫𑀸𑀲𑀺 𑀅𑀢𑁆𑀭𑀚𑁄.

𑁧𑁯. 𑀦𑀺𑀫𑀺𑀢𑁆𑀢𑁂 𑀘𑀢𑀼𑀭𑁄 𑀤𑀺𑀲𑁆𑀯𑀸, 𑀭𑀣𑀬𑀸𑀦𑁂𑀦 𑀦𑀺𑀓𑁆𑀔𑀫𑀺;

𑀅𑀦𑀽𑀦𑀅𑀝𑁆𑀞𑀫𑀸𑀲𑀸𑀦𑀺, 𑀧𑀥𑀸𑀦𑀁 𑀧𑀤𑀳𑀻 𑀚𑀺𑀦𑁄.

𑁨𑁦. 𑀩𑁆𑀭𑀳𑁆𑀫𑀼𑀦𑀸 𑀬𑀸𑀘𑀺𑀢𑁄 𑀲𑀦𑁆𑀢𑁄, 𑀧𑀤𑀼𑀫𑁄 𑀮𑁄𑀓𑀦𑀸𑀬𑀓𑁄;

𑀯𑀢𑁆𑀢𑀺 𑀘𑀓𑁆𑀓𑀁 𑀫𑀳𑀸𑀯𑀻𑀭𑁄, 𑀥𑀦𑀜𑁆𑀘𑀼𑀬𑁆𑀬𑀸𑀦𑀫𑀼𑀢𑁆𑀢𑀫𑁂.

𑁨𑁧. 𑀲𑀸𑀮𑁄 𑀘 𑀉𑀧𑀲𑀸𑀮𑁄 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀓𑀸;

𑀯𑀭𑀼𑀡𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀧𑀤𑀼𑀫𑀲𑁆𑀲 𑀫𑀳𑁂𑀲𑀺𑀦𑁄.

𑁨𑁨. 𑀭𑀸𑀥𑀸 𑀘𑁂𑀯 𑀲𑀼𑀭𑀸𑀥𑀸 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀺𑀓𑀸;

𑀩𑁄𑀥𑀺 𑀢𑀲𑁆𑀲 𑀪𑀕𑀯𑀢𑁄, 𑀫𑀳𑀸𑀲𑁄𑀡𑁄𑀢𑀺 𑀯𑀼𑀘𑁆𑀘𑀢𑀺.

𑁨𑁩. 𑀪𑀺𑀬𑁆𑀬𑁄 𑀘𑁂𑀯 𑀅𑀲𑀫𑁄 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀼𑀧𑀝𑁆𑀞𑀓𑀸;

𑀭𑀼𑀘𑀻 𑀘 𑀦𑀦𑁆𑀤𑀭𑀸𑀫𑀸 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀼𑀧𑀝𑁆𑀞𑀺𑀓𑀸.

𑁨𑁪. 𑀅𑀝𑁆𑀞𑀧𑀡𑁆𑀡𑀸𑀲𑀭𑀢𑀦𑀁, 𑀅𑀘𑁆𑀘𑀼𑀕𑁆𑀕𑀢𑁄 𑀫𑀳𑀸𑀫𑀼𑀦𑀺;

𑀧𑀪𑀸 𑀦𑀺𑀤𑁆𑀥𑀸𑀯𑀢𑀻 𑀢𑀲𑁆𑀲, 𑀅𑀲𑀫𑀸 𑀲𑀩𑁆𑀩𑀲𑁄 𑀤𑀺𑀲𑀸.

𑁨𑁫. 𑀘𑀦𑁆𑀤𑀧𑁆𑀧𑀪𑀸 𑀲𑀽𑀭𑀺𑀬𑀧𑁆𑀧𑀪𑀸, 𑀭𑀢𑀦𑀕𑁆𑀕𑀺𑀫𑀡𑀺𑀧𑁆𑀧𑀪𑀸;

𑀲𑀩𑁆𑀩𑀸𑀧𑀺 𑀢𑀸 𑀳𑀢𑀸 𑀳𑁄𑀦𑁆𑀢𑀺, 𑀧𑀢𑁆𑀯𑀸 𑀚𑀺𑀦𑀧𑀪𑀼𑀢𑁆𑀢𑀫𑀁.

𑁨𑁬. 𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺, 𑀆𑀬𑀼 𑀯𑀺𑀚𑁆𑀚𑀢𑀺 𑀢𑀸𑀯𑀤𑁂;

𑀢𑀸𑀯𑀢𑀸 𑀢𑀺𑀝𑁆𑀞𑀫𑀸𑀦𑁄 𑀲𑁄, 𑀢𑀸𑀭𑁂𑀲𑀺 𑀚𑀦𑀢𑀁 𑀩𑀳𑀼𑀁.

𑁨𑁭. 𑀧𑀭𑀺𑀧𑀓𑁆𑀓𑀫𑀸𑀦𑀲𑁂 𑀲𑀢𑁆𑀢𑁂, 𑀩𑁄𑀥𑀬𑀺𑀢𑁆𑀯𑀸 𑀅𑀲𑁂𑀲𑀢𑁄;

𑀲𑁂𑀲𑀓𑁂 𑀅𑀦𑀼𑀲𑀸𑀲𑀺𑀢𑁆𑀯𑀸, 𑀦𑀺𑀩𑁆𑀩𑀼𑀢𑁄 𑀲𑁄 𑀲𑀲𑀸𑀯𑀓𑁄.

𑁨𑁮. 𑀉𑀭𑀕𑁄𑀯 𑀢𑀘𑀁 𑀚𑀺𑀡𑁆𑀡𑀁, 𑀯𑀤𑁆𑀥𑀧𑀢𑁆𑀢𑀁𑀯 𑀧𑀸𑀤𑀧𑁄;

𑀚𑀳𑀺𑀢𑁆𑀯𑀸 𑀲𑀩𑁆𑀩𑀲𑀗𑁆𑀔𑀸𑀭𑁂, 𑀦𑀺𑀩𑁆𑀩𑀼𑀢𑁄 𑀲𑁄 𑀬𑀣𑀸 𑀲𑀺𑀔𑀻.

𑁨𑁯. 𑀧𑀤𑀼𑀫𑁄 𑀚𑀺𑀦𑀯𑀭𑁄 𑀲𑀢𑁆𑀣𑀸, 𑀥𑀫𑁆𑀫𑀸𑀭𑀸𑀫𑀫𑁆𑀳𑀺 𑀦𑀺𑀩𑁆𑀩𑀼𑀢𑁄;

𑀥𑀸𑀢𑀼𑀯𑀺𑀢𑁆𑀣𑀸𑀭𑀺𑀓𑀁 𑀆𑀲𑀺, 𑀢𑁂𑀲𑀼 𑀢𑁂𑀲𑀼 𑀧𑀤𑁂𑀲𑀢𑁄𑀢𑀺.

𑀧𑀤𑀼𑀫𑀲𑁆𑀲 𑀪𑀕𑀯𑀢𑁄 𑀯𑀁𑀲𑁄 𑀅𑀝𑁆𑀞𑀫𑁄.