𑁧𑁧. 𑀦𑀸𑀭𑀤𑀩𑀼𑀤𑁆𑀥𑀯𑀁𑀲𑁄

𑁧. 𑀧𑀤𑀼𑀫𑀲𑁆𑀲 𑀅𑀧𑀭𑁂𑀦, 𑀲𑀫𑁆𑀩𑀼𑀤𑁆𑀥𑁄 𑀤𑁆𑀯𑀺𑀧𑀤𑀼𑀢𑁆𑀢𑀫𑁄;

𑀦𑀸𑀭𑀤𑁄 𑀦𑀸𑀫 𑀦𑀸𑀫𑁂𑀦, 𑀅𑀲𑀫𑁄 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄.

𑁨. 𑀲𑁄 𑀩𑀼𑀤𑁆𑀥𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲, 𑀚𑁂𑀝𑁆𑀞𑁄 𑀤𑀬𑀺𑀢𑀑𑀭𑀲𑁄;

𑀆𑀫𑀼𑀓𑁆𑀓𑀫𑀸𑀮𑀸𑀪𑀭𑀡𑁄, 𑀉𑀬𑁆𑀬𑀸𑀦𑀁 𑀉𑀧𑀲𑀗𑁆𑀓𑀫𑀺.

𑁩. 𑀢𑀢𑁆𑀣𑀸𑀲𑀺 𑀭𑀼𑀓𑁆𑀔𑁄 𑀬𑀲𑀯𑀺𑀧𑀼𑀮𑁄, 𑀅𑀪𑀺𑀭𑀽𑀧𑁄 𑀩𑁆𑀭𑀳𑀸 𑀲𑀼𑀘𑀺;

𑀢𑀫𑀚𑁆𑀛𑀧𑀢𑁆𑀯𑀸 𑀉𑀧𑀦𑀺𑀲𑀻𑀤𑀺, 𑀫𑀳𑀸𑀲𑁄𑀡𑀲𑁆𑀲 𑀳𑁂𑀝𑁆𑀞𑀢𑁄.

𑁪. 𑀢𑀢𑁆𑀣 𑀜𑀸𑀡𑀯𑀭𑀼𑀧𑁆𑀧𑀚𑁆𑀚𑀺, 𑀅𑀦𑀦𑁆𑀢𑀁 𑀯𑀚𑀺𑀭𑀽𑀧𑀫𑀁;

𑀢𑁂𑀦 𑀯𑀺𑀘𑀺𑀦𑀺 𑀲𑀗𑁆𑀔𑀸𑀭𑁂, 𑀉𑀓𑁆𑀓𑀼𑀚𑁆𑀚𑀫𑀯𑀓𑀼𑀚𑁆𑀚𑀓𑀁 [𑀓𑀼𑀚𑁆𑀚𑀢𑀁 (𑀲𑁆𑀬𑀸. 𑀓𑀁.)].

𑁫. 𑀢𑀢𑁆𑀣 𑀲𑀩𑁆𑀩𑀓𑀺𑀮𑁂𑀲𑀸𑀦𑀺, 𑀅𑀲𑁂𑀲𑀫𑀪𑀺𑀯𑀸𑀳𑀬𑀺;

𑀧𑀸𑀧𑀼𑀡𑀻 𑀓𑁂𑀯𑀮𑀁 𑀩𑁄𑀥𑀺𑀁, 𑀩𑀼𑀤𑁆𑀥𑀜𑀸𑀡𑁂 𑀘 𑀘𑀼𑀤𑁆𑀤𑀲.

𑁬. 𑀧𑀸𑀧𑀼𑀡𑀺𑀢𑁆𑀯𑀸𑀦 𑀲𑀫𑁆𑀩𑁄𑀥𑀺𑀁, 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑀬𑀺;

𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁, 𑀧𑀞𑀫𑀸𑀪𑀺𑀲𑀫𑀬𑁄 𑀅𑀳𑀼.

𑁭. 𑀫𑀳𑀸𑀤𑁄𑀡𑀁 𑀦𑀸𑀕𑀭𑀸𑀚𑀁, 𑀯𑀺𑀦𑀬𑀦𑁆𑀢𑁄 𑀫𑀳𑀸𑀫𑀼𑀦𑀺;

𑀧𑀸𑀝𑀺𑀳𑁂𑀭𑀁 𑀢𑀤𑀸𑀓𑀸𑀲𑀺, 𑀤𑀲𑁆𑀲𑀬𑀦𑁆𑀢𑁄 𑀲𑀤𑁂𑀯𑀓𑁂.

𑁮. 𑀢𑀤𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁, 𑀢𑀫𑁆𑀳𑀺 𑀥𑀫𑁆𑀫𑀧𑁆𑀧𑀓𑀸𑀲𑀦𑁂;

𑀦𑀯𑀼𑀢𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀺, 𑀢𑀭𑀺𑀁𑀲𑀼 𑀲𑀩𑁆𑀩𑀲𑀁𑀲𑀬𑀁.

𑁯. 𑀬𑀫𑁆𑀳𑀺 𑀓𑀸𑀮𑁂 𑀫𑀳𑀸𑀯𑀻𑀭𑁄, 𑀑𑀯𑀤𑀻 𑀲𑀓𑀫𑀢𑁆𑀭𑀚𑀁;

𑀅𑀲𑀻𑀢𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀁, 𑀢𑀢𑀺𑀬𑀸𑀪𑀺𑀲𑀫𑀬𑁄 𑀅𑀳𑀼.

𑁧𑁦. 𑀲𑀦𑁆𑀦𑀺𑀧𑀸𑀢𑀸 𑀢𑀬𑁄 𑀆𑀲𑀼𑀁, 𑀦𑀸𑀭𑀤𑀲𑁆𑀲 𑀫𑀳𑁂𑀲𑀺𑀦𑁄;

𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁, 𑀧𑀞𑀫𑁄 𑀆𑀲𑀺 𑀲𑀫𑀸𑀕𑀫𑁄.

𑁧𑁧. 𑀬𑀤𑀸 𑀩𑀼𑀤𑁆𑀥𑁄 𑀩𑀼𑀤𑁆𑀥𑀕𑀼𑀡𑀁, 𑀲𑀦𑀺𑀤𑀸𑀦𑀁 𑀧𑀓𑀸𑀲𑀬𑀺;

𑀦𑀯𑀼𑀢𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀺, 𑀲𑀫𑀺𑀁𑀲𑀼 𑀯𑀺𑀫𑀮𑀸 𑀢𑀤𑀸.

𑁧𑁨. 𑀬𑀤𑀸 𑀯𑁂𑀭𑁄𑀘𑀦𑁄 𑀦𑀸𑀕𑁄, 𑀤𑀸𑀦𑀁 𑀤𑀤𑀸𑀢𑀺 𑀲𑀢𑁆𑀣𑀼𑀦𑁄;

𑀢𑀤𑀸 𑀲𑀫𑀺𑀁𑀲𑀼 𑀚𑀺𑀦𑀧𑀼𑀢𑁆𑀢𑀸, 𑀅𑀲𑀻𑀢𑀺𑀲𑀢𑀲𑀳𑀲𑁆𑀲𑀺𑀬𑁄.

𑁧𑁩. 𑀅𑀳𑀁 𑀢𑁂𑀦 𑀲𑀫𑀬𑁂𑀦, 𑀚𑀝𑀺𑀮𑁄 𑀉𑀕𑁆𑀕𑀢𑀸𑀧𑀦𑁄;

𑀅𑀦𑁆𑀢𑀮𑀺𑀓𑁆𑀔𑀘𑀭𑁄 𑀆𑀲𑀺𑀁, 𑀧𑀜𑁆𑀘𑀸𑀪𑀺𑀜𑁆𑀜𑀸𑀲𑀼 𑀧𑀸𑀭𑀕𑀽.

𑁧𑁪. 𑀢𑀤𑀸𑀧𑀸𑀳𑀁 𑀅𑀲𑀫𑀲𑀫𑀁, 𑀲𑀲𑀗𑁆𑀖𑀁 𑀲𑀧𑀭𑀺𑀚𑁆𑀚𑀦𑀁;

𑀅𑀦𑁆𑀦𑀧𑀸𑀦𑁂𑀦 𑀢𑀧𑁆𑀧𑁂𑀢𑁆𑀯𑀸, 𑀘𑀦𑁆𑀤𑀦𑁂𑀦𑀸𑀪𑀺𑀧𑀽𑀚𑀬𑀺𑀁.

𑁧𑁫. 𑀲𑁄𑀧𑀺 𑀫𑀁 𑀢𑀤𑀸 𑀩𑁆𑀬𑀸𑀓𑀸𑀲𑀺, 𑀦𑀸𑀭𑀤𑁄 𑀮𑁄𑀓𑀦𑀸𑀬𑀓𑁄;

‘‘𑀅𑀧𑀭𑀺𑀫𑁂𑀬𑁆𑀬𑀺𑀢𑁄 𑀓𑀧𑁆𑀧𑁂, 𑀅𑀬𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺.

𑁧𑁬. ‘‘𑀧𑀥𑀸𑀦𑀁 𑀧𑀤𑀳𑀺𑀢𑁆𑀯𑀸𑀦…𑀧𑁂… 𑀳𑁂𑀲𑁆𑀲𑀸𑀫 𑀲𑀫𑁆𑀫𑀼𑀔𑀸 𑀇𑀫𑀁’’.

𑁧𑁭. 𑀢𑀲𑁆𑀲𑀸𑀧𑀺 𑀯𑀘𑀦𑀁 𑀲𑀼𑀢𑁆𑀯𑀸, 𑀪𑀺𑀬𑁆𑀬𑁄 𑀳𑀸𑀲𑁂𑀢𑁆𑀯 𑀫𑀸𑀦𑀲𑀁;

𑀅𑀥𑀺𑀝𑁆𑀞𑀳𑀺𑀁 𑀯𑀢𑀁 𑀉𑀕𑁆𑀕𑀁, 𑀤𑀲𑀧𑀸𑀭𑀫𑀺𑀧𑀽𑀭𑀺𑀬𑀸.

𑁧𑁮. 𑀦𑀕𑀭𑀁 𑀥𑀜𑁆𑀜𑀯𑀢𑀻 𑀦𑀸𑀫, 𑀲𑀼𑀤𑁂𑀯𑁄 𑀦𑀸𑀫 𑀔𑀢𑁆𑀢𑀺𑀬𑁄;

𑀅𑀦𑁄𑀫𑀸 𑀦𑀸𑀫 𑀚𑀦𑀺𑀓𑀸, 𑀦𑀸𑀭𑀤𑀲𑁆𑀲 𑀫𑀳𑁂𑀲𑀺𑀦𑁄.

𑁧𑁯. 𑀦𑀯𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀅𑀕𑀸𑀭𑀁 𑀅𑀚𑁆𑀛 𑀲𑁄 𑀯𑀲𑀺;

𑀚𑀺𑀢𑁄 𑀯𑀺𑀚𑀺𑀢𑀸𑀪𑀺𑀭𑀸𑀫𑁄, 𑀢𑀬𑁄 𑀧𑀸𑀲𑀸𑀤𑀫𑀼𑀢𑁆𑀢𑀫𑀸.

𑁨𑁦. 𑀢𑀺𑀘𑀢𑁆𑀢𑀸𑀭𑀻𑀲𑀲𑀳𑀲𑁆𑀲𑀸𑀦𑀺, 𑀦𑀸𑀭𑀺𑀬𑁄 𑀲𑀫𑀮𑀗𑁆𑀓𑀢𑀸;

𑀯𑀺𑀚𑀺𑀢𑀲𑁂𑀦𑀸 𑀦𑀸𑀫 𑀦𑀸𑀭𑀻, 𑀦𑀦𑁆𑀤𑀼𑀢𑁆𑀢𑀭𑁄 𑀦𑀸𑀫 𑀅𑀢𑁆𑀭𑀚𑁄.

𑁨𑁧. 𑀦𑀺𑀫𑀺𑀢𑁆𑀢𑁂 𑀘𑀢𑀼𑀭𑁄 𑀤𑀺𑀲𑁆𑀯𑀸, 𑀧𑀤𑀲𑀸 𑀕𑀫𑀦𑁂𑀦 𑀦𑀺𑀓𑁆𑀔𑀫𑀺;

𑀲𑀢𑁆𑀢𑀸𑀳𑀁 𑀧𑀥𑀸𑀦𑀘𑀸𑀭𑀁, 𑀅𑀘𑀭𑀻 𑀧𑀼𑀭𑀺𑀲𑀼𑀢𑁆𑀢𑀫𑁄 [𑀮𑁄𑀓𑀦𑀸𑀬𑀓𑁄 (𑀲𑀻. 𑀓.)].

𑁨𑁨. 𑀩𑁆𑀭𑀳𑁆𑀫𑀼𑀦𑀸 𑀬𑀸𑀘𑀺𑀢𑁄 𑀲𑀦𑁆𑀢𑁄, 𑀦𑀸𑀭𑀤𑁄 𑀮𑁄𑀓𑀦𑀸𑀬𑀓𑁄;

𑀯𑀢𑁆𑀢𑀺 𑀘𑀓𑁆𑀓𑀁 𑀫𑀳𑀸𑀯𑀻𑀭𑁄, 𑀥𑀦𑀜𑁆𑀘𑀼𑀬𑁆𑀬𑀸𑀦𑀫𑀼𑀢𑁆𑀢𑀫𑁂.

𑁨𑁩. 𑀪𑀤𑁆𑀤𑀲𑀸𑀮𑁄 𑀚𑀺𑀢𑀫𑀺𑀢𑁆𑀢𑁄, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀓𑀸;

𑀯𑀸𑀲𑁂𑀝𑁆𑀞𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀦𑀸𑀭𑀤𑀲𑁆𑀲 𑀫𑀳𑁂𑀲𑀺𑀦𑁄.

𑁨𑁪. 𑀉𑀢𑁆𑀢𑀭𑀸 𑀨𑀕𑁆𑀕𑀼𑀦𑀻 𑀘𑁂𑀯, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀺𑀓𑀸;

𑀩𑁄𑀥𑀺 𑀢𑀲𑁆𑀲 𑀪𑀕𑀯𑀢𑁄, 𑀫𑀳𑀸𑀲𑁄𑀡𑁄𑀢𑀺 𑀯𑀼𑀘𑁆𑀘𑀢𑀺.

𑁨𑁫. 𑀉𑀕𑁆𑀕𑀭𑀺𑀦𑁆𑀤𑁄 𑀯𑀲𑀪𑁄 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀼𑀧𑀝𑁆𑀞𑀓𑀸;

𑀇𑀦𑁆𑀤𑀸𑀯𑀭𑀻 𑀘 𑀯𑀡𑁆𑀟𑀻 [𑀉𑀦𑁆𑀤𑀻 (𑀲𑀻.), 𑀕𑀡𑁆𑀟𑀻 (𑀲𑁆𑀬𑀸. 𑀓𑀁.)] 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀼𑀧𑀝𑁆𑀞𑀺𑀓𑀸.

𑁨𑁬. 𑀅𑀝𑁆𑀞𑀸𑀲𑀻𑀢𑀺𑀭𑀢𑀦𑀸𑀦𑀺, 𑀅𑀘𑁆𑀘𑀼𑀕𑁆𑀕𑀢𑁄 𑀫𑀳𑀸𑀫𑀼𑀦𑀺;

𑀓𑀜𑁆𑀘𑀦𑀕𑁆𑀖𑀺𑀬𑀲𑀗𑁆𑀓𑀸𑀲𑁄, 𑀤𑀲𑀲𑀳𑀲𑁆𑀲𑀻 𑀯𑀺𑀭𑁄𑀘𑀢𑀺.

𑁨𑁭. 𑀢𑀲𑁆𑀲 𑀩𑁆𑀬𑀸𑀫𑀧𑁆𑀧𑀪𑀸 𑀓𑀸𑀬𑀸, 𑀦𑀺𑀤𑁆𑀥𑀸𑀯𑀢𑀺 𑀤𑀺𑀲𑁄𑀤𑀺𑀲𑀁;

𑀦𑀺𑀭𑀦𑁆𑀢𑀭𑀁 𑀤𑀺𑀯𑀸𑀭𑀢𑁆𑀢𑀺𑀁, 𑀬𑁄𑀚𑀦𑀁 𑀨𑀭𑀢𑁂 𑀲𑀤𑀸.

𑁨𑁮. 𑀦 𑀓𑁂𑀘𑀺 𑀢𑁂𑀦 𑀲𑀫𑀬𑁂𑀦, 𑀲𑀫𑀦𑁆𑀢𑀸 𑀬𑁄𑀚𑀦𑁂 𑀚𑀦𑀸;

𑀉𑀓𑁆𑀓𑀸𑀧𑀤𑀻𑀧𑁂 𑀉𑀚𑁆𑀚𑀸𑀮𑁂𑀦𑁆𑀢𑀺, 𑀩𑀼𑀤𑁆𑀥𑀭𑀁𑀲𑀻𑀳𑀺 𑀑𑀢𑁆𑀣𑀝𑀸.

𑁨𑁯. 𑀦𑀯𑀼𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀆𑀬𑀼 𑀯𑀺𑀚𑁆𑀚𑀢𑀺 𑀢𑀸𑀯𑀤𑁂;

𑀢𑀸𑀯𑀢𑀸 𑀢𑀺𑀝𑁆𑀞𑀫𑀸𑀦𑁄 𑀲𑁄, 𑀢𑀸𑀭𑁂𑀲𑀺 𑀚𑀦𑀢𑀁 𑀩𑀳𑀼𑀁.

𑁩𑁦. 𑀬𑀣𑀸 𑀉𑀴𑀽𑀳𑀺 𑀕𑀕𑀦𑀁, 𑀯𑀺𑀘𑀺𑀢𑁆𑀢𑀁 𑀉𑀧𑀲𑁄𑀪𑀢𑀺;

𑀢𑀣𑁂𑀯 𑀲𑀸𑀲𑀦𑀁 𑀢𑀲𑁆𑀲, 𑀅𑀭𑀳𑀦𑁆𑀢𑁂𑀳𑀺 𑀲𑁄𑀪𑀢𑀺.

𑁩𑁧. 𑀲𑀁𑀲𑀸𑀭𑀲𑁄𑀢𑀁 𑀢𑀭𑀡𑀸𑀬, 𑀲𑁂𑀲𑀓𑁂 𑀧𑀝𑀺𑀧𑀦𑁆𑀦𑀓𑁂;

𑀥𑀫𑁆𑀫𑀲𑁂𑀢𑀼𑀁 𑀤𑀴𑁆𑀳𑀁 𑀓𑀢𑁆𑀯𑀸, 𑀦𑀺𑀩𑁆𑀩𑀼𑀢𑁄 𑀲𑁄 𑀦𑀭𑀸𑀲𑀪𑁄.

𑁩𑁨. 𑀲𑁄𑀧𑀺 𑀩𑀼𑀤𑁆𑀥𑁄 𑀅𑀲𑀫𑀲𑀫𑁄, 𑀢𑁂𑀧𑀺 𑀔𑀻𑀡𑀸𑀲𑀯𑀸 𑀅𑀢𑀼𑀮𑀢𑁂𑀚𑀸;

𑀲𑀩𑁆𑀩𑀁 𑀢𑀫𑀦𑁆𑀢𑀭𑀳𑀺𑀢𑀁, 𑀦𑀦𑀼 𑀭𑀺𑀢𑁆𑀢𑀸 𑀲𑀩𑁆𑀩𑀲𑀗𑁆𑀔𑀸𑀭𑀸.

𑁩𑁩. 𑀦𑀸𑀭𑀤𑁄 𑀚𑀺𑀦𑀯𑀲𑀪𑁄, 𑀦𑀺𑀩𑁆𑀩𑀼𑀢𑁄 𑀲𑀼𑀤𑀲𑁆𑀲𑀦𑁂 𑀧𑀼𑀭𑁂;

𑀢𑀢𑁆𑀣𑁂𑀯𑀲𑁆𑀲 𑀣𑀽𑀧𑀯𑀭𑁄, 𑀘𑀢𑀼𑀬𑁄𑀚𑀦𑀫𑀼𑀕𑁆𑀕𑀢𑁄𑀢𑀺.

𑀦𑀸𑀭𑀤𑀲𑁆𑀲 𑀪𑀕𑀯𑀢𑁄 𑀯𑀁𑀲𑁄 𑀦𑀯𑀫𑁄.