𑁮. 𑀲𑁄𑀪𑀺𑀢𑀩𑀼𑀤𑁆𑀥𑀯𑀁𑀲𑁄

𑁧. 𑀭𑁂𑀯𑀢𑀲𑁆𑀲 𑀅𑀧𑀭𑁂𑀦, 𑀲𑁄𑀪𑀺𑀢𑁄 𑀦𑀸𑀫 𑀦𑀸𑀬𑀓𑁄;

𑀲𑀫𑀸𑀳𑀺𑀢𑁄 𑀲𑀦𑁆𑀢𑀘𑀺𑀢𑁆𑀢𑁄, 𑀅𑀲𑀫𑁄 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄.

𑁨. 𑀲𑁄 𑀚𑀺𑀦𑁄 𑀲𑀓𑀕𑁂𑀳𑀫𑁆𑀳𑀺, 𑀫𑀸𑀦𑀲𑀁 𑀯𑀺𑀦𑀺𑀯𑀢𑁆𑀢𑀬𑀺;

𑀧𑀢𑁆𑀯𑀸𑀦 𑀓𑁂𑀯𑀮𑀁 𑀩𑁄𑀥𑀺𑀁, 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑀬𑀺.

𑁩. 𑀬𑀸𑀯 𑀳𑁂𑀝𑁆𑀞𑀸 𑀅𑀯𑀻𑀘𑀺𑀢𑁄, 𑀪𑀯𑀕𑁆𑀕𑀸 𑀘𑀸𑀧𑀺 𑀉𑀤𑁆𑀥𑀢𑁄;

𑀏𑀢𑁆𑀣𑀦𑁆𑀢𑀭𑁂 𑀏𑀓𑀧𑀭𑀺𑀲𑀸, 𑀅𑀳𑁄𑀲𑀺 𑀥𑀫𑁆𑀫𑀤𑁂𑀲𑀦𑁂.

𑁪. 𑀢𑀸𑀬 𑀧𑀭𑀺𑀲𑀸𑀬 𑀲𑀫𑁆𑀩𑀼𑀤𑁆𑀥𑁄, 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑀬𑀺;

𑀕𑀡𑀦𑀸𑀬 𑀦 𑀯𑀢𑁆𑀢𑀩𑁆𑀩𑁄, 𑀧𑀞𑀫𑀸𑀪𑀺𑀲𑀫𑀬𑁄 𑀅𑀳𑀼.

𑁫. 𑀢𑀢𑁄 𑀧𑀭𑀫𑁆𑀧𑀺 𑀤𑁂𑀲𑁂𑀦𑁆𑀢𑁂, 𑀫𑀭𑀽𑀦𑀜𑁆𑀘 𑀲𑀫𑀸𑀕𑀫𑁂;

𑀦𑀯𑀼𑀢𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀁, 𑀤𑀼𑀢𑀺𑀬𑀸𑀪𑀺𑀲𑀫𑀬𑁄 𑀅𑀳𑀼.

𑁬. 𑀧𑀼𑀦𑀸𑀧𑀭𑀁 𑀭𑀸𑀚𑀧𑀼𑀢𑁆𑀢𑁄, 𑀚𑀬𑀲𑁂𑀦𑁄 𑀦𑀸𑀫 𑀔𑀢𑁆𑀢𑀺𑀬𑁄;

𑀆𑀭𑀸𑀫𑀁 𑀭𑁄𑀧𑀬𑀺𑀢𑁆𑀯𑀸𑀦, 𑀩𑀼𑀤𑁆𑀥𑁂 𑀦𑀺𑀬𑁆𑀬𑀸𑀤𑀬𑀻 𑀢𑀤𑀸.

𑁭. 𑀢𑀲𑁆𑀲 𑀬𑀸𑀕𑀁 𑀧𑀓𑀺𑀢𑁆𑀢𑁂𑀦𑁆𑀢𑁄, 𑀥𑀫𑁆𑀫𑀁 𑀤𑁂𑀲𑁂𑀲𑀺 𑀘𑀓𑁆𑀔𑀼𑀫𑀸;

𑀢𑀤𑀸 𑀓𑁄𑀝𑀺𑀲𑀳𑀲𑁆𑀲𑀸𑀦𑀁, 𑀢𑀢𑀺𑀬𑀸𑀪𑀺𑀲𑀫𑀬𑁄 𑀅𑀳𑀼.

𑁮. 𑀲𑀦𑁆𑀦𑀺𑀧𑀸𑀢𑀸 𑀢𑀬𑁄 𑀆𑀲𑀼𑀁, 𑀲𑁄𑀪𑀺𑀢𑀲𑁆𑀲 𑀫𑀳𑁂𑀲𑀺𑀦𑁄;

𑀔𑀻𑀡𑀸𑀲𑀯𑀸𑀦𑀁 𑀯𑀺𑀫𑀮𑀸𑀦𑀁, 𑀲𑀦𑁆𑀢𑀘𑀺𑀢𑁆𑀢𑀸𑀦 𑀢𑀸𑀤𑀺𑀦𑀁.

𑁯. 𑀉𑀕𑁆𑀕𑀢𑁄 𑀦𑀸𑀫 𑀲𑁄 𑀭𑀸𑀚𑀸, 𑀤𑀸𑀦𑀁 𑀤𑁂𑀢𑀺 𑀦𑀭𑀼𑀢𑁆𑀢𑀫𑁂;

𑀢𑀫𑁆𑀳𑀺 𑀤𑀸𑀦𑁂 𑀲𑀫𑀸𑀕𑀜𑁆𑀙𑀼𑀁, 𑀅𑀭𑀳𑀦𑁆𑀢𑀸 [𑀅𑀭𑀳𑀢𑀁 (𑀓.)] 𑀲𑀢𑀓𑁄𑀝𑀺𑀬𑁄.

𑁧𑁦. 𑀧𑀼𑀦𑀸𑀧𑀭𑀁 𑀧𑀼𑀭𑀕𑀡𑁄 [𑀧𑀼𑀕𑀕𑀡𑁄 (𑀓.)], 𑀤𑁂𑀢𑀺 𑀤𑀸𑀦𑀁 𑀦𑀭𑀼𑀢𑁆𑀢𑀫𑁂;

𑀢𑀤𑀸 𑀦𑀯𑀼𑀢𑀺𑀓𑁄𑀝𑀻𑀦𑀁, 𑀤𑀼𑀢𑀺𑀬𑁄 𑀆𑀲𑀺 𑀲𑀫𑀸𑀕𑀫𑁄.

𑁧𑁧. 𑀤𑁂𑀯𑀮𑁄𑀓𑁂 𑀯𑀲𑀺𑀢𑁆𑀯𑀸𑀦, 𑀬𑀤𑀸 𑀑𑀭𑁄𑀳𑀢𑀻 𑀚𑀺𑀦𑁄;

𑀢𑀤𑀸 𑀅𑀲𑀻𑀢𑀺𑀓𑁄𑀝𑀻𑀦𑀁, 𑀢𑀢𑀺𑀬𑁄 𑀆𑀲𑀺 𑀲𑀫𑀸𑀕𑀫𑁄.

𑁧𑁨. 𑀅𑀳𑀁 𑀢𑁂𑀦 𑀲𑀫𑀬𑁂𑀦, 𑀲𑀼𑀚𑀸𑀢𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄;

𑀢𑀤𑀸 𑀲𑀲𑀸𑀯𑀓𑀁 𑀩𑀼𑀤𑁆𑀥𑀁, 𑀅𑀦𑁆𑀦𑀧𑀸𑀦𑁂𑀦 𑀢𑀧𑁆𑀧𑀬𑀺𑀁.

𑁧𑁩. 𑀲𑁄𑀧𑀺 𑀫𑀁 𑀩𑀼𑀤𑁆𑀥𑁄 𑀩𑁆𑀬𑀸𑀓𑀸𑀲𑀺, 𑀲𑁄𑀪𑀺𑀢𑁄 𑀮𑁄𑀓𑀦𑀸𑀬𑀓𑁄;

‘‘𑀅𑀧𑀭𑀺𑀫𑁂𑀬𑁆𑀬𑀺𑀢𑁄 𑀓𑀧𑁆𑀧𑁂, 𑀅𑀬𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺.

𑁧𑁪. ‘‘𑀧𑀥𑀸𑀦𑀁 𑀧𑀤𑀳𑀺𑀢𑁆𑀯𑀸𑀦…𑀧𑁂… 𑀳𑁂𑀲𑁆𑀲𑀸𑀫 𑀲𑀫𑁆𑀫𑀼𑀔𑀸 𑀇𑀫𑀁’’.

𑁧𑁫. 𑀢𑀲𑁆𑀲𑀸𑀧𑀺 𑀯𑀘𑀦𑀁 𑀲𑀼𑀢𑁆𑀯𑀸, 𑀳𑀝𑁆𑀞𑁄 𑀲𑀁𑀯𑀺𑀕𑁆𑀕𑀫𑀸𑀦𑀲𑁄;

𑀢𑀫𑁂𑀯𑀢𑁆𑀣𑀫𑀦𑀼𑀧𑁆𑀧𑀢𑁆𑀢𑀺𑀬𑀸, 𑀉𑀕𑁆𑀕𑀁 𑀥𑀺𑀢𑀺𑀫𑀓𑀸𑀲𑀳𑀁.

𑁧𑁬. 𑀲𑀼𑀥𑀫𑁆𑀫𑀁 𑀦𑀸𑀫 𑀦𑀕𑀭𑀁, 𑀲𑀼𑀥𑀫𑁆𑀫𑁄 𑀦𑀸𑀫 𑀔𑀢𑁆𑀢𑀺𑀬𑁄;

𑀲𑀼𑀥𑀫𑁆𑀫𑀸 𑀦𑀸𑀫 𑀚𑀦𑀺𑀓𑀸, 𑀲𑁄𑀪𑀺𑀢𑀲𑁆𑀲 𑀫𑀳𑁂𑀲𑀺𑀦𑁄.

𑁧𑁭. 𑀦𑀯𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀅𑀕𑀸𑀭𑀁 𑀅𑀚𑁆𑀛 𑀲𑁄 𑀯𑀲𑀺;

𑀓𑀼𑀫𑀼𑀤𑁄 𑀦𑀸𑀴𑀺𑀦𑁄 𑀧𑀤𑀼𑀫𑁄, 𑀢𑀬𑁄 𑀧𑀸𑀲𑀸𑀤𑀫𑀼𑀢𑁆𑀢𑀫𑀸.

𑁧𑁮. 𑀲𑀢𑁆𑀢𑀢𑀺𑀁𑀲𑀲𑀳𑀲𑁆𑀲𑀸𑀦𑀺, 𑀦𑀸𑀭𑀺𑀬𑁄 𑀲𑀫𑀮𑀗𑁆𑀓𑀢𑀸;

𑀫𑀡𑀺𑀮𑀸 [𑀫𑀔𑀺𑀮𑀸 (𑀅𑀝𑁆𑀞.), 𑀲𑀫𑀗𑁆𑀕𑀻 (𑀲𑀻.), 𑀫𑀓𑀺𑀮𑀸 (𑀲𑁆𑀬𑀸. 𑀓𑀁.)] 𑀦𑀸𑀫 𑀲𑀸 𑀦𑀸𑀭𑀻, 𑀲𑀻𑀳𑁄 𑀦𑀸𑀫𑀸𑀲𑀺 𑀅𑀢𑁆𑀭𑀚𑁄.

𑁧𑁯. 𑀦𑀺𑀫𑀺𑀢𑁆𑀢𑁂 𑀘𑀢𑀼𑀭𑁄 𑀤𑀺𑀲𑁆𑀯𑀸, 𑀧𑀸𑀲𑀸𑀤𑁂𑀦𑀸𑀪𑀺𑀦𑀺𑀓𑁆𑀔𑀫𑀺;

𑀲𑀢𑁆𑀢𑀸𑀳𑀁 𑀧𑀥𑀸𑀦𑀘𑀸𑀭𑀁, 𑀘𑀭𑀺𑀢𑁆𑀯𑀸 𑀧𑀼𑀭𑀺𑀲𑀼𑀢𑁆𑀢𑀫𑁄.

𑁨𑁦. 𑀩𑁆𑀭𑀳𑁆𑀫𑀼𑀦𑀸 𑀬𑀸𑀘𑀺𑀢𑁄 𑀲𑀦𑁆𑀢𑁄, 𑀲𑁄𑀪𑀺𑀢𑁄 𑀮𑁄𑀓𑀦𑀸𑀬𑀓𑁄;

𑀯𑀢𑁆𑀢𑀺 𑀘𑀓𑁆𑀓𑀁 𑀫𑀳𑀸𑀯𑀻𑀭𑁄, 𑀲𑀼𑀥𑀫𑁆𑀫𑀼𑀬𑁆𑀬𑀸𑀦𑀫𑀼𑀢𑁆𑀢𑀫𑁂.

𑁨𑁧. 𑀅𑀲𑀫𑁄 𑀘 𑀲𑀼𑀦𑁂𑀢𑁆𑀢𑁄 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀓𑀸;

𑀅𑀦𑁄𑀫𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀲𑁄𑀪𑀺𑀢𑀲𑁆𑀲 𑀫𑀳𑁂𑀲𑀺𑀦𑁄.

𑁨𑁨. 𑀦𑀓𑀼𑀮𑀸 𑀘 𑀲𑀼𑀚𑀸𑀢𑀸 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀺𑀓𑀸;

𑀩𑀼𑀚𑁆𑀛𑀫𑀸𑀦𑁄 𑀘 𑀲𑁄 𑀩𑀼𑀤𑁆𑀥𑁄, 𑀦𑀸𑀕𑀫𑀽𑀮𑁂 𑀅𑀩𑀼𑀚𑁆𑀛𑀣.

𑁨𑁩. 𑀭𑀫𑁆𑀫𑁄 𑀘𑁂𑀯 𑀲𑀼𑀤𑀢𑁆𑀢𑁄 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀼𑀧𑀝𑁆𑀞𑀓𑀸;

𑀦𑀓𑀼𑀮𑀸 𑀘𑁂𑀯 𑀘𑀺𑀢𑁆𑀢𑀸 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀼𑀧𑀝𑁆𑀞𑀺𑀓𑀸.

𑁨𑁪. 𑀅𑀝𑁆𑀞𑀧𑀡𑁆𑀡𑀸𑀲𑀭𑀢𑀦𑀁, 𑀅𑀘𑁆𑀘𑀼𑀕𑁆𑀕𑀢𑁄 𑀫𑀳𑀸𑀫𑀼𑀦𑀺;

𑀑𑀪𑀸𑀲𑁂𑀢𑀺 𑀤𑀺𑀲𑀸 𑀲𑀩𑁆𑀩𑀸, 𑀲𑀢𑀭𑀁𑀲𑀻𑀯 𑀉𑀕𑁆𑀕𑀢𑁄.

𑁨𑁫. 𑀬𑀣𑀸 𑀲𑀼𑀨𑀼𑀮𑁆𑀮𑀁 𑀧𑀯𑀦𑀁, 𑀦𑀸𑀦𑀸𑀕𑀦𑁆𑀥𑁂𑀳𑀺 𑀥𑀽𑀧𑀺𑀢𑀁;

𑀢𑀣𑁂𑀯 𑀢𑀲𑁆𑀲 𑀧𑀸𑀯𑀘𑀦𑀁, 𑀲𑀻𑀮𑀕𑀦𑁆𑀥𑁂𑀳𑀺 𑀥𑀽𑀧𑀺𑀢𑀁.

𑁨𑁬. 𑀬𑀣𑀸𑀧𑀺 𑀲𑀸𑀕𑀭𑁄 𑀦𑀸𑀫, 𑀤𑀲𑁆𑀲𑀦𑁂𑀦 𑀅𑀢𑀧𑁆𑀧𑀺𑀬𑁄;

𑀢𑀣𑁂𑀯 𑀢𑀲𑁆𑀲 𑀧𑀸𑀯𑀘𑀦𑀁, 𑀲𑀯𑀡𑁂𑀦 𑀅𑀢𑀧𑁆𑀧𑀺𑀬𑀁.

𑁨𑁭. 𑀦𑀯𑀼𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀆𑀬𑀼 𑀯𑀺𑀚𑁆𑀚𑀢𑀺 𑀢𑀸𑀯𑀤𑁂;

𑀢𑀸𑀯𑀢𑀸 𑀢𑀺𑀝𑁆𑀞𑀫𑀸𑀦𑁄 𑀲𑁄, 𑀢𑀸𑀭𑁂𑀲𑀺 𑀚𑀦𑀢𑀁 𑀩𑀳𑀼𑀁.

𑁨𑁮. 𑀑𑀯𑀸𑀤𑀁 𑀅𑀦𑀼𑀲𑀺𑀝𑁆𑀞𑀺𑀜𑁆𑀘, 𑀤𑀢𑁆𑀯𑀸𑀦 𑀲𑁂𑀲𑀓𑁂 𑀚𑀦𑁂;

𑀳𑀼𑀢𑀸𑀲𑀦𑁄𑀯 𑀢𑀸𑀧𑁂𑀢𑁆𑀯𑀸, 𑀦𑀺𑀩𑁆𑀩𑀼𑀢𑁄 𑀲𑁄 𑀲𑀲𑀸𑀯𑀓𑁄.

𑁨𑁯. 𑀲𑁄 𑀘 𑀩𑀼𑀤𑁆𑀥𑁄 𑀅𑀲𑀫𑀲𑀫𑁄, 𑀢𑁂𑀧𑀺 𑀲𑀸𑀯𑀓𑀸 𑀩𑀮𑀧𑁆𑀧𑀢𑁆𑀢𑀸;

𑀲𑀩𑁆𑀩𑀁 𑀢𑀫𑀦𑁆𑀢𑀭𑀳𑀺𑀢𑀁, 𑀦𑀦𑀼 𑀭𑀺𑀢𑁆𑀢𑀸 𑀲𑀩𑁆𑀩𑀲𑀗𑁆𑀔𑀸𑀭𑀸.

𑁩𑁦. 𑀲𑁄𑀪𑀺𑀢𑁄 𑀯𑀭𑀲𑀫𑁆𑀩𑀼𑀤𑁆𑀥𑁄, 𑀲𑀻𑀳𑀸𑀭𑀸𑀫𑀫𑁆𑀳𑀺 𑀦𑀺𑀩𑁆𑀩𑀼𑀢𑁄;

𑀥𑀸𑀢𑀼𑀯𑀺𑀢𑁆𑀣𑀸𑀭𑀺𑀓𑀁 𑀆𑀲𑀺, 𑀢𑁂𑀲𑀼 𑀢𑁂𑀲𑀼 𑀧𑀤𑁂𑀲𑀢𑁄𑀢𑀺.

𑀲𑁄𑀪𑀺𑀢𑀲𑁆𑀲 𑀪𑀕𑀯𑀢𑁄 𑀯𑀁𑀲𑁄 𑀙𑀝𑁆𑀞𑁄.