𑁭. 𑀭𑁂𑀯𑀢𑀩𑀼𑀤𑁆𑀥𑀯𑀁𑀲𑁄

𑁧. 𑀲𑀼𑀫𑀦𑀲𑁆𑀲 𑀅𑀧𑀭𑁂𑀦, 𑀭𑁂𑀯𑀢𑁄 𑀦𑀸𑀫 𑀦𑀸𑀬𑀓𑁄;

𑀅𑀦𑀽𑀧𑀫𑁄 𑀅𑀲𑀤𑀺𑀲𑁄, 𑀅𑀢𑀼𑀮𑁄 𑀉𑀢𑁆𑀢𑀫𑁄 𑀚𑀺𑀦𑁄.

𑁨. 𑀲𑁄𑀧𑀺 𑀥𑀫𑁆𑀫𑀁 𑀧𑀓𑀸𑀲𑁂𑀲𑀺, 𑀩𑁆𑀭𑀳𑁆𑀫𑀼𑀦𑀸 𑀅𑀪𑀺𑀬𑀸𑀘𑀺𑀢𑁄;

𑀔𑀦𑁆𑀥𑀥𑀸𑀢𑀼𑀯𑀯𑀢𑁆𑀣𑀸𑀦𑀁, 𑀅𑀧𑁆𑀧𑀯𑀢𑁆𑀢𑀁 𑀪𑀯𑀸𑀪𑀯𑁂.

𑁩. 𑀢𑀲𑁆𑀲𑀸𑀪𑀺𑀲𑀫𑀬𑀸 𑀢𑀻𑀡𑀺, 𑀅𑀳𑁂𑀲𑀼𑀁 𑀥𑀫𑁆𑀫𑀤𑁂𑀲𑀦𑁂;

𑀕𑀡𑀦𑀸𑀬 𑀦 𑀯𑀢𑁆𑀢𑀩𑁆𑀩𑁄, 𑀧𑀞𑀫𑀸𑀪𑀺𑀲𑀫𑀬𑁄 𑀅𑀳𑀼.

𑁪. 𑀬𑀤𑀸 𑀅𑀭𑀺𑀦𑁆𑀤𑀫𑀁 𑀭𑀸𑀚𑀁 [𑀭𑀸𑀚𑀸𑀦𑀁 (𑀓.)], 𑀯𑀺𑀦𑁂𑀲𑀺 𑀭𑁂𑀯𑀢𑁄 𑀫𑀼𑀦𑀺;

𑀢𑀤𑀸 𑀓𑁄𑀝𑀺𑀲𑀳𑀲𑁆𑀲𑀸𑀦𑀁, 𑀤𑀼𑀢𑀺𑀬𑀸𑀪𑀺𑀲𑀫𑀬𑁄 𑀅𑀳𑀼.

𑁫. 𑀲𑀢𑁆𑀢𑀸𑀳𑀁 𑀧𑀝𑀺𑀲𑀮𑁆𑀮𑀸𑀦𑀸, 𑀯𑀼𑀝𑁆𑀞𑀳𑀺𑀢𑁆𑀯𑀸 𑀦𑀭𑀸𑀲𑀪𑁄;

𑀓𑁄𑀝𑀺𑀲𑀢𑀁 𑀦𑀭𑀫𑀭𑀽𑀦𑀁, 𑀯𑀺𑀦𑁂𑀲𑀺 𑀉𑀢𑁆𑀢𑀫𑁂 𑀨𑀮𑁂.

𑁬. 𑀲𑀦𑁆𑀦𑀺𑀧𑀸𑀢𑀸 𑀢𑀬𑁄 𑀆𑀲𑀼𑀁, 𑀭𑁂𑀯𑀢𑀲𑁆𑀲 𑀫𑀳𑁂𑀲𑀺𑀦𑁄;

𑀔𑀻𑀡𑀸𑀲𑀯𑀸𑀦𑀁 𑀯𑀺𑀫𑀮𑀸𑀦𑀁, 𑀲𑀼𑀯𑀺𑀫𑀼𑀢𑁆𑀢𑀸𑀦 𑀢𑀸𑀤𑀺𑀦𑀁.

𑁭. 𑀅𑀢𑀺𑀓𑁆𑀓𑀦𑁆𑀢𑀸 𑀕𑀡𑀦𑀧𑀣𑀁, 𑀧𑀞𑀫𑀁 𑀬𑁂 𑀲𑀫𑀸𑀕𑀢𑀸;

𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁, 𑀤𑀼𑀢𑀺𑀬𑁄 𑀆𑀲𑀺 𑀲𑀫𑀸𑀕𑀫𑁄.

𑁮. 𑀬𑁄𑀧𑀺 [𑀬𑁄 𑀲𑁄 (𑀲𑁆𑀬𑀸. 𑀓𑀁. 𑀓.)] 𑀧𑀜𑁆𑀜𑀸𑀬 𑀅𑀲𑀫𑁄, 𑀢𑀲𑁆𑀲 𑀘𑀓𑁆𑀓𑀸𑀦𑀼𑀯𑀢𑁆𑀢𑀓𑁄;

𑀲𑁄 𑀢𑀤𑀸 𑀩𑁆𑀬𑀸𑀥𑀺𑀢𑁄 𑀆𑀲𑀺, 𑀧𑀢𑁆𑀢𑁄 𑀚𑀻𑀯𑀺𑀢𑀲𑀁𑀲𑀬𑀁.

𑁯. 𑀢𑀲𑁆𑀲 𑀕𑀺𑀮𑀸𑀦𑀧𑀼𑀘𑁆𑀙𑀸𑀬, 𑀬𑁂 𑀢𑀤𑀸 𑀉𑀧𑀕𑀢𑀸 𑀫𑀼𑀦𑀻;

𑀓𑁄𑀝𑀺𑀲𑀳𑀲𑁆𑀲𑀸 𑀅𑀭𑀳𑀦𑁆𑀢𑁄, 𑀢𑀢𑀺𑀬𑁄 𑀆𑀲𑀺 𑀲𑀫𑀸𑀕𑀫𑁄.

𑁧𑁦. 𑀅𑀳𑀁 𑀢𑁂𑀦 𑀲𑀫𑀬𑁂𑀦, 𑀅𑀢𑀺𑀤𑁂𑀯𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄;

𑀉𑀧𑀕𑀦𑁆𑀢𑁆𑀯𑀸 𑀭𑁂𑀯𑀢𑀁 𑀩𑀼𑀤𑁆𑀥𑀁, 𑀲𑀭𑀡𑀁 𑀢𑀲𑁆𑀲 𑀕𑀜𑁆𑀙𑀳𑀁.

𑁧𑁧. 𑀢𑀲𑁆𑀲 𑀲𑀻𑀮𑀁 𑀲𑀫𑀸𑀥𑀺𑀜𑁆𑀘, 𑀧𑀜𑁆𑀜𑀸𑀕𑀼𑀡𑀫𑀦𑀼𑀢𑁆𑀢𑀫𑀁;

𑀣𑁄𑀫𑀬𑀺𑀢𑁆𑀯𑀸 𑀬𑀣𑀸𑀣𑀸𑀫𑀁, 𑀉𑀢𑁆𑀢𑀭𑀻𑀬𑀫𑀤𑀸𑀲𑀳𑀁.

𑁧𑁨. 𑀲𑁄𑀧𑀺 𑀫𑀁 𑀩𑀼𑀤𑁆𑀥𑁄 𑀩𑁆𑀬𑀸𑀓𑀸𑀲𑀺, 𑀭𑁂𑀯𑀢𑁄 𑀮𑁄𑀓𑀦𑀸𑀬𑀓𑁄;

‘‘𑀅𑀧𑀭𑀺𑀫𑁂𑀬𑁆𑀬𑀺𑀢𑁄 𑀓𑀧𑁆𑀧𑁂, 𑀅𑀬𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺.

𑁧𑁩. ‘‘𑀧𑀥𑀸𑀦𑀁 𑀧𑀤𑀳𑀺𑀢𑁆𑀯𑀸𑀦…𑀧𑁂… 𑀳𑁂𑀲𑁆𑀲𑀸𑀫 𑀲𑀫𑁆𑀫𑀼𑀔𑀸 𑀇𑀫𑀁’’.

𑁧𑁪. 𑀢𑀲𑁆𑀲𑀸𑀧𑀺 𑀯𑀘𑀦𑀁 𑀲𑀼𑀢𑁆𑀯𑀸, 𑀪𑀺𑀬𑁆𑀬𑁄 𑀘𑀺𑀢𑁆𑀢𑀁 𑀧𑀲𑀸𑀤𑀬𑀺𑀁;

𑀉𑀢𑁆𑀢𑀭𑀺𑀁 𑀯𑀢𑀫𑀥𑀺𑀝𑁆𑀞𑀸𑀲𑀺𑀁, 𑀤𑀲𑀧𑀸𑀭𑀫𑀺𑀧𑀽𑀭𑀺𑀬𑀸.

𑁧𑁫. 𑀢𑀤𑀸𑀧𑀺 𑀢𑀁 𑀩𑀼𑀤𑁆𑀥𑀥𑀫𑁆𑀫𑀁, 𑀲𑀭𑀺𑀢𑁆𑀯𑀸 𑀅𑀦𑀼𑀩𑁆𑀭𑀽𑀳𑀬𑀺𑀁;

𑀆𑀳𑀭𑀺𑀲𑁆𑀲𑀸𑀫𑀺 𑀢𑀁 𑀥𑀫𑁆𑀫𑀁, 𑀬𑀁 𑀫𑀬𑁆𑀳𑀁 𑀅𑀪𑀺𑀧𑀢𑁆𑀣𑀺𑀢𑀁.

𑁧𑁬. 𑀦𑀕𑀭𑀁 𑀲𑀼𑀥𑀜𑁆𑀜𑀯𑀢𑀻 𑀦𑀸𑀫 [𑀲𑀼𑀥𑀫𑁆𑀫𑀓𑀁 𑀦𑀸𑀫 (𑀲𑀻.), 𑀲𑀼𑀥𑀜𑁆𑀜𑀓𑀁 𑀦𑀸𑀫 (𑀲𑁆𑀬𑀸.)], 𑀯𑀺𑀧𑀼𑀮𑁄 𑀦𑀸𑀫 𑀔𑀢𑁆𑀢𑀺𑀬𑁄;

𑀯𑀺𑀧𑀼𑀮𑀸 𑀦𑀸𑀫 𑀚𑀦𑀺𑀓𑀸, 𑀭𑁂𑀯𑀢𑀲𑁆𑀲 𑀫𑀳𑁂𑀲𑀺𑀦𑁄.

𑁧𑁭. 𑀙 𑀘 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 [𑀙𑀩𑁆𑀩𑀲𑁆𑀲𑀲𑀳𑀲𑁆𑀲𑀸𑀦𑀺 (𑀲𑀻. 𑀲𑁆𑀬𑀸.)], 𑀅𑀕𑀸𑀭𑀁 𑀅𑀚𑁆𑀛 𑀲𑁄 𑀯𑀲𑀺;

𑀲𑀼𑀤𑀲𑁆𑀲𑀦𑁄 𑀭𑀢𑀦𑀕𑁆𑀖𑀺, 𑀆𑀯𑁂𑀴𑁄 𑀘 𑀯𑀺𑀪𑀽𑀲𑀺𑀢𑁄;

𑀧𑀼𑀜𑁆𑀜𑀓𑀫𑁆𑀫𑀸𑀪𑀺𑀦𑀺𑀩𑁆𑀩𑀢𑁆𑀢𑀸, 𑀢𑀬𑁄 𑀧𑀸𑀲𑀸𑀤𑀫𑀼𑀢𑁆𑀢𑀫𑀸.

𑁧𑁮. 𑀢𑁂𑀢𑁆𑀢𑀺𑀁𑀲 𑀘 𑀲𑀳𑀲𑁆𑀲𑀸𑀦𑀺, 𑀦𑀸𑀭𑀺𑀬𑁄 𑀲𑀫𑀮𑀗𑁆𑀓𑀢𑀸;

𑀲𑀼𑀤𑀲𑁆𑀲𑀦𑀸 𑀦𑀸𑀫 𑀦𑀸𑀭𑀻, 𑀯𑀭𑀼𑀡𑁄 𑀦𑀸𑀫 𑀅𑀢𑁆𑀭𑀚𑁄.

𑁧𑁯. 𑀦𑀺𑀫𑀺𑀢𑁆𑀢𑁂 𑀘𑀢𑀼𑀭𑁄 𑀤𑀺𑀲𑁆𑀯𑀸, 𑀭𑀣𑀬𑀸𑀦𑁂𑀦 𑀦𑀺𑀓𑁆𑀔𑀫𑀺;

𑀅𑀦𑀽𑀦𑀲𑀢𑁆𑀢𑀫𑀸𑀲𑀸𑀦𑀺, 𑀧𑀥𑀸𑀦𑀁 𑀧𑀤𑀳𑀻 𑀚𑀺𑀦𑁄.

𑁨𑁦. 𑀩𑁆𑀭𑀳𑁆𑀫𑀼𑀦𑀸 𑀬𑀸𑀘𑀺𑀢𑁄 𑀲𑀦𑁆𑀢𑁄, 𑀭𑁂𑀯𑀢𑁄 𑀮𑁄𑀓𑀦𑀸𑀬𑀓𑁄;

𑀯𑀢𑁆𑀢𑀺 𑀘𑀓𑁆𑀓𑀁 𑀫𑀳𑀸𑀯𑀻𑀭𑁄, 𑀯𑀭𑀼𑀡𑀸𑀭𑀸𑀫𑁂 𑀲𑀺𑀭𑀻𑀖𑀭𑁂.

𑁨𑁧. 𑀯𑀭𑀼𑀡𑁄 𑀩𑁆𑀭𑀳𑁆𑀫𑀤𑁂𑀯𑁄 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀓𑀸;

𑀲𑀫𑁆𑀪𑀯𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀭𑁂𑀯𑀢𑀲𑁆𑀲 𑀫𑀳𑁂𑀲𑀺𑀦𑁄.

𑁨𑁨. 𑀪𑀤𑁆𑀤𑀸 𑀘𑁂𑀯 𑀲𑀼𑀪𑀤𑁆𑀤𑀸 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀺𑀓𑀸;

𑀲𑁄𑀧𑀺 𑀩𑀼𑀤𑁆𑀥𑁄 𑀅𑀲𑀫𑀲𑀫𑁄, 𑀦𑀸𑀕𑀫𑀽𑀮𑁂 𑀅𑀩𑀼𑀚𑁆𑀛𑀣.

𑁨𑁩. 𑀧𑀤𑀼𑀫𑁄 𑀓𑀼𑀜𑁆𑀚𑀭𑁄 𑀘𑁂𑀯, 𑀅𑀳𑁂𑀲𑀼𑀁 𑀅𑀕𑁆𑀕𑀼𑀧𑀝𑁆𑀞𑀺𑀓𑀸;

𑀲𑀺𑀭𑀻𑀫𑀸 𑀘𑁂𑀯 𑀬𑀲𑀯𑀢𑀻, 𑀅𑀳𑁂𑀲𑀼𑀁 𑀅𑀕𑁆𑀕𑀼𑀧𑀝𑁆𑀞𑀺𑀓𑀸.

𑁨𑁪. 𑀉𑀘𑁆𑀘𑀢𑁆𑀢𑀦𑁂𑀦 𑀲𑁄 𑀩𑀼𑀤𑁆𑀥𑁄, 𑀅𑀲𑀻𑀢𑀺𑀳𑀢𑁆𑀣𑀫𑀼𑀕𑁆𑀕𑀢𑁄;

𑀑𑀪𑀸𑀲𑁂𑀢𑀺 𑀤𑀺𑀲𑀸 𑀲𑀩𑁆𑀩𑀸, 𑀇𑀦𑁆𑀤𑀓𑁂𑀢𑀼𑀯 𑀉𑀕𑁆𑀕𑀢𑁄.

𑁨𑁫. 𑀢𑀲𑁆𑀲 𑀲𑀭𑀻𑀭𑁂 𑀦𑀺𑀩𑁆𑀩𑀢𑁆𑀢𑀸, 𑀧𑀪𑀸𑀫𑀸𑀮𑀸 𑀅𑀦𑀼𑀢𑁆𑀢𑀭𑀸;

𑀤𑀺𑀯𑀸 𑀯𑀸 𑀬𑀤𑀺 𑀯𑀸 𑀭𑀢𑁆𑀢𑀺𑀁, 𑀲𑀫𑀦𑁆𑀢𑀸 𑀨𑀭𑀢𑀺 𑀬𑁄𑀚𑀦𑀁.

𑁨𑁬. 𑀲𑀝𑁆𑀞𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀆𑀬𑀼 𑀯𑀺𑀚𑁆𑀚𑀢𑀺 𑀢𑀸𑀯𑀤𑁂;

𑀢𑀸𑀯𑀢𑀸 𑀢𑀺𑀝𑁆𑀞𑀫𑀸𑀦𑁄 𑀲𑁄, 𑀢𑀸𑀭𑁂𑀲𑀺 𑀚𑀦𑀢𑀁 𑀩𑀳𑀼𑀁.

𑁨𑁭. 𑀤𑀲𑁆𑀲𑀬𑀺𑀢𑁆𑀯𑀸 𑀩𑀼𑀤𑁆𑀥𑀩𑀮𑀁, 𑀅𑀫𑀢𑀁 𑀮𑁄𑀓𑁂 𑀧𑀓𑀸𑀲𑀬𑀁;

𑀦𑀺𑀩𑁆𑀩𑀸𑀬𑀺 𑀅𑀦𑀼𑀧𑀸𑀤𑀸𑀦𑁄, 𑀬𑀣𑀕𑁆𑀕𑀼𑀧𑀸𑀤𑀸𑀦𑀲𑀗𑁆𑀔𑀬𑀸.

𑁨𑁮. 𑀲𑁄 𑀘 𑀓𑀸𑀬𑁄 𑀭𑀢𑀦𑀦𑀺𑀪𑁄, 𑀲𑁄 𑀘 𑀥𑀫𑁆𑀫𑁄 𑀅𑀲𑀸𑀤𑀺𑀲𑁄;

𑀲𑀩𑁆𑀩𑀁 𑀢𑀫𑀦𑁆𑀢𑀭𑀳𑀺𑀢𑀁, 𑀦𑀦𑀼 𑀭𑀺𑀢𑁆𑀢𑀸 𑀲𑀩𑁆𑀩𑀲𑀗𑁆𑀔𑀸𑀭𑀸.

𑁨𑁯. 𑀭𑁂𑀯𑀢𑁄 𑀬𑀲𑀥𑀭𑁄 𑀩𑀼𑀤𑁆𑀥𑁄, 𑀦𑀺𑀩𑁆𑀩𑀼𑀢𑁄 𑀲𑁄 𑀫𑀳𑀸𑀧𑀼𑀭𑁂;

𑀥𑀸𑀢𑀼𑀯𑀺𑀢𑁆𑀣𑀸𑀭𑀺𑀓𑀁 𑀆𑀲𑀺, 𑀢𑁂𑀲𑀼 𑀢𑁂𑀲𑀼 𑀧𑀤𑁂𑀲𑀢𑁄𑀢𑀺.

𑀭𑁂𑀯𑀢𑀲𑁆𑀲 𑀪𑀕𑀯𑀢𑁄 𑀯𑀁𑀲𑁄 𑀧𑀜𑁆𑀘𑀫𑁄.