𑁬. 𑀲𑀼𑀫𑀦𑀩𑀼𑀤𑁆𑀥𑀯𑀁𑀲𑁄

𑁧. 𑀫𑀗𑁆𑀕𑀮𑀲𑁆𑀲 𑀅𑀧𑀭𑁂𑀦, 𑀲𑀼𑀫𑀦𑁄 𑀦𑀸𑀫 𑀦𑀸𑀬𑀓𑁄;

𑀲𑀩𑁆𑀩𑀥𑀫𑁆𑀫𑁂𑀳𑀺 𑀅𑀲𑀫𑁄, 𑀲𑀩𑁆𑀩𑀲𑀢𑁆𑀢𑀸𑀦𑀫𑀼𑀢𑁆𑀢𑀫𑁄.

𑁨. 𑀢𑀤𑀸 𑀅𑀫𑀢𑀪𑁂𑀭𑀺𑀁 𑀲𑁄, 𑀆𑀳𑀦𑀻 𑀫𑁂𑀔𑀮𑁂 𑀧𑀼𑀭𑁂;

𑀥𑀫𑁆𑀫𑀲𑀗𑁆𑀔𑀲𑀫𑀸𑀬𑀼𑀢𑁆𑀢𑀁, 𑀦𑀯𑀗𑁆𑀕𑀁 𑀚𑀺𑀦𑀲𑀸𑀲𑀦𑀁.

𑁩. 𑀦𑀺𑀚𑁆𑀚𑀺𑀦𑀺𑀢𑁆𑀯𑀸 𑀓𑀺𑀮𑁂𑀲𑁂 𑀲𑁄, 𑀧𑀢𑁆𑀯𑀸 𑀲𑀫𑁆𑀩𑁄𑀥𑀺𑀫𑀼𑀢𑁆𑀢𑀫𑀁;

𑀫𑀸𑀧𑁂𑀲𑀺 𑀦𑀕𑀭𑀁 𑀲𑀢𑁆𑀣𑀸, 𑀲𑀤𑁆𑀥𑀫𑁆𑀫𑀧𑀼𑀭𑀯𑀭𑀼𑀢𑁆𑀢𑀫𑀁.

𑁪. 𑀦𑀺𑀭𑀦𑁆𑀢𑀭𑀁 𑀅𑀓𑀼𑀝𑀺𑀮𑀁, 𑀉𑀚𑀼𑀁 𑀯𑀺𑀧𑀼𑀮𑀯𑀺𑀢𑁆𑀣𑀢𑀁;

𑀫𑀸𑀧𑁂𑀲𑀺 𑀲𑁄 𑀫𑀳𑀸𑀯𑀻𑀣𑀺𑀁, 𑀲𑀢𑀺𑀧𑀝𑁆𑀞𑀸𑀦𑀯𑀭𑀼𑀢𑁆𑀢𑀫𑀁.

𑁫. 𑀨𑀮𑁂 𑀘𑀢𑁆𑀢𑀸𑀭𑀺 𑀲𑀸𑀫𑀜𑁆𑀜𑁂, 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸;

𑀙𑀴𑀪𑀺𑀜𑁆𑀜𑀸𑀝𑁆𑀞𑀲𑀫𑀸𑀧𑀢𑁆𑀢𑀻, 𑀧𑀲𑀸𑀭𑁂𑀲𑀺 𑀢𑀢𑁆𑀣 𑀯𑀻𑀣𑀺𑀬𑀁.

𑁬. 𑀬𑁂 𑀅𑀧𑁆𑀧𑀫𑀢𑁆𑀢𑀸 𑀅𑀔𑀺𑀮𑀸, 𑀳𑀺𑀭𑀺𑀯𑀻𑀭𑀺𑀬𑁂𑀳𑀼𑀧𑀸𑀕𑀢𑀸;

𑀢𑁂 𑀢𑁂 𑀇𑀫𑁂 𑀕𑀼𑀡𑀯𑀭𑁂, 𑀆𑀤𑀺𑀬𑀦𑁆𑀢𑀺 𑀬𑀣𑀸 𑀲𑀼𑀔𑀁.

𑁭. 𑀏𑀯𑀫𑁂𑀢𑁂𑀦 𑀬𑁄𑀕𑁂𑀦, 𑀉𑀤𑁆𑀥𑀭𑀦𑁆𑀢𑁄 𑀫𑀳𑀸𑀚𑀦𑀁;

𑀩𑁄𑀥𑁂𑀲𑀺 𑀧𑀞𑀫𑀁 𑀲𑀢𑁆𑀣𑀸, 𑀓𑁄𑀝𑀺𑀲𑀢𑀲𑀳𑀲𑁆𑀲𑀺𑀬𑁄.

𑁮. 𑀬𑀫𑁆𑀳𑀺 𑀓𑀸𑀮𑁂 𑀫𑀳𑀸𑀯𑀻𑀭𑁄, 𑀑𑀯𑀤𑀻 𑀢𑀺𑀢𑁆𑀣𑀺𑀬𑁂 𑀕𑀡𑁂;

𑀓𑁄𑀝𑀺𑀲𑀳𑀲𑁆𑀲𑀸𑀪𑀺𑀲𑀫𑀺𑀁𑀲𑀼 [𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀺 (𑀲𑁆𑀬𑀸. 𑀓𑀁.), 𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁 (𑀓.)], 𑀤𑀼𑀢𑀺𑀬𑁂 𑀥𑀫𑁆𑀫𑀤𑁂𑀲𑀦𑁂.

𑁯. 𑀬𑀤𑀸 𑀤𑁂𑀯𑀸 𑀫𑀦𑀼𑀲𑁆𑀲𑀸 𑀘, 𑀲𑀫𑀕𑁆𑀕𑀸 𑀏𑀓𑀫𑀸𑀦𑀲𑀸;

𑀦𑀺𑀭𑁄𑀥𑀧𑀜𑁆𑀳𑀁 𑀧𑀼𑀘𑁆𑀙𑀺𑀁𑀲𑀼, 𑀲𑀁𑀲𑀬𑀜𑁆𑀘𑀸𑀧𑀺 𑀫𑀸𑀦𑀲𑀁.

𑁧𑁦. 𑀢𑀤𑀸𑀧𑀺 𑀥𑀫𑁆𑀫𑀤𑁂𑀲𑀦𑁂, 𑀦𑀺𑀭𑁄𑀥𑀧𑀭𑀺𑀤𑀻𑀧𑀦𑁂;

𑀦𑀯𑀼𑀢𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀁, 𑀢𑀢𑀺𑀬𑀸𑀪𑀺𑀲𑀫𑀬𑁄 𑀅𑀳𑀼.

𑁧𑁧. 𑀲𑀦𑁆𑀦𑀺𑀧𑀸𑀢𑀸 𑀢𑀬𑁄 𑀆𑀲𑀼𑀁, 𑀲𑀼𑀫𑀦𑀲𑁆𑀲 𑀫𑀳𑁂𑀲𑀺𑀦𑁄;

𑀔𑀻𑀡𑀸𑀲𑀯𑀸𑀦𑀁 𑀯𑀺𑀫𑀮𑀸𑀦𑀁, 𑀲𑀦𑁆𑀢𑀘𑀺𑀢𑁆𑀢𑀸𑀦 𑀢𑀸𑀤𑀺𑀦𑀁.

𑁧𑁨. 𑀯𑀲𑁆𑀲𑀁𑀯𑀼𑀢𑁆𑀣𑀲𑁆𑀲 𑀪𑀕𑀯𑀢𑁄, 𑀅𑀪𑀺𑀖𑀼𑀝𑁆𑀞𑁂 𑀧𑀯𑀸𑀭𑀡𑁂;

𑀓𑁄𑀝𑀺𑀲𑀢𑀲𑀳𑀲𑁆𑀲𑁂𑀳𑀺, 𑀧𑀯𑀸𑀭𑁂𑀲𑀺 𑀢𑀣𑀸𑀕𑀢𑁄.

𑁧𑁩. 𑀢𑀢𑁄𑀧𑀭𑀁 𑀲𑀦𑁆𑀦𑀺𑀧𑀸𑀢𑁂, 𑀯𑀺𑀫𑀮𑁂 𑀓𑀜𑁆𑀘𑀦𑀧𑀩𑁆𑀩𑀢𑁂;

𑀦𑀯𑀼𑀢𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀁, 𑀤𑀼𑀢𑀺𑀬𑁄 𑀆𑀲𑀺 𑀲𑀫𑀸𑀕𑀫𑁄.

𑁧𑁪. 𑀬𑀤𑀸 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸, 𑀩𑀼𑀤𑁆𑀥𑀤𑀲𑁆𑀲𑀦𑀼𑀧𑀸𑀕𑀫𑀺;

𑀅𑀲𑀻𑀢𑀺𑀓𑁄𑀝𑀺𑀲𑀳𑀲𑁆𑀲𑀸𑀦𑀁, 𑀢𑀢𑀺𑀬𑁄 𑀆𑀲𑀺 𑀲𑀫𑀸𑀕𑀫𑁄.

𑁧𑁫. 𑀅𑀳𑀁 𑀢𑁂𑀦 𑀲𑀫𑀬𑁂𑀦, 𑀦𑀸𑀕𑀭𑀸𑀚𑀸 𑀫𑀳𑀺𑀤𑁆𑀥𑀺𑀓𑁄;

𑀅𑀢𑀼𑀮𑁄 𑀦𑀸𑀫 𑀦𑀸𑀫𑁂𑀦, 𑀉𑀲𑁆𑀲𑀦𑁆𑀦𑀓𑀼𑀲𑀮𑀲𑀜𑁆𑀘𑀬𑁄.

𑁧𑁬. 𑀢𑀤𑀸𑀳𑀁 𑀦𑀸𑀕𑀪𑀸𑀯𑀦𑀸, 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀜𑀸𑀢𑀺𑀪𑀺;

𑀦𑀸𑀕𑀸𑀦𑀁 𑀤𑀺𑀩𑁆𑀩𑀢𑀼𑀭𑀺𑀬𑁂𑀳𑀺, 𑀲𑀲𑀗𑁆𑀖𑀁 𑀚𑀺𑀦𑀫𑀼𑀧𑀝𑁆𑀞𑀳𑀺𑀁.

𑁧𑁭. 𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁, 𑀅𑀦𑁆𑀦𑀧𑀸𑀦𑁂𑀦 𑀢𑀧𑁆𑀧𑀬𑀺𑀁;

𑀧𑀘𑁆𑀘𑁂𑀓𑀤𑀼𑀲𑁆𑀲𑀬𑀼𑀕𑀁 𑀤𑀢𑁆𑀯𑀸, 𑀲𑀭𑀡𑀁 𑀢𑀫𑀼𑀧𑀸𑀕𑀫𑀺𑀁.

𑁧𑁮. 𑀲𑁄𑀧𑀺 𑀫𑀁 𑀩𑀼𑀤𑁆𑀥𑁄 𑀩𑁆𑀬𑀸𑀓𑀸𑀲𑀺, 𑀲𑀼𑀫𑀦𑁄 𑀮𑁄𑀓𑀦𑀸𑀬𑀓𑁄;

‘‘𑀅𑀧𑀭𑀺𑀫𑁂𑀬𑁆𑀬𑀺𑀢𑁄 𑀓𑀧𑁆𑀧𑁂, 𑀅𑀬𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺.

𑁧𑁯. ‘‘𑀧𑀥𑀸𑀦𑀁 𑀧𑀤𑀳𑀺𑀢𑁆𑀯𑀸𑀦…𑀧𑁂… 𑀳𑁂𑀲𑁆𑀲𑀸𑀫 𑀲𑀫𑁆𑀫𑀼𑀔𑀸 𑀇𑀫𑀁’’.

𑁨𑁦. 𑀢𑀲𑁆𑀲𑀸𑀧𑀺 𑀯𑀘𑀦𑀁 𑀲𑀼𑀢𑁆𑀯𑀸, 𑀪𑀺𑀬𑁆𑀬𑁄 𑀘𑀺𑀢𑁆𑀢𑀁 𑀧𑀲𑀸𑀤𑀬𑀺𑀁;

𑀉𑀢𑁆𑀢𑀭𑀺𑀁 𑀯𑀢𑀫𑀥𑀺𑀝𑁆𑀞𑀸𑀲𑀺𑀁, 𑀤𑀲𑀧𑀸𑀭𑀫𑀺𑀧𑀽𑀭𑀺𑀬𑀸.

𑁨𑁧. 𑀦𑀕𑀭𑀁 𑀫𑁂𑀔𑀮𑀁 𑀦𑀸𑀫 [𑀫𑁂𑀔𑀮𑀁 𑀦𑀸𑀫 𑀦𑀕𑀭𑀁 (𑀲𑀻. 𑀲𑁆𑀬𑀸.)], 𑀲𑀼𑀤𑀢𑁆𑀢𑁄 𑀦𑀸𑀫 𑀔𑀢𑁆𑀢𑀺𑀬𑁄;

𑀲𑀺𑀭𑀺𑀫𑀸 𑀦𑀸𑀫 𑀚𑀦𑀺𑀓𑀸, 𑀲𑀼𑀫𑀦𑀲𑁆𑀲 𑀫𑀳𑁂𑀲𑀺𑀦𑁄.

𑁨𑁨. 𑀦𑀯𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀅𑀕𑀸𑀭𑀁 𑀅𑀚𑁆𑀛 𑀲𑁄 𑀯𑀲𑀺;

𑀘𑀦𑁆𑀤𑁄 𑀲𑀼𑀘𑀦𑁆𑀤𑁄 𑀯𑀝𑀁𑀲𑁄 𑀘, 𑀢𑀬𑁄 𑀧𑀸𑀲𑀸𑀤𑀫𑀼𑀢𑁆𑀢𑀫𑀸.

𑁨𑁩. 𑀢𑁂𑀲𑀝𑁆𑀞𑀺𑀲𑀢𑀲𑀳𑀲𑁆𑀲𑀸𑀦𑀺, 𑀦𑀸𑀭𑀺𑀬𑁄 𑀲𑀫𑀮𑀗𑁆𑀓𑀢𑀸;

𑀯𑀝𑀁𑀲𑀺𑀓𑀸 𑀦𑀸𑀫 𑀦𑀸𑀭𑀻, 𑀅𑀦𑀽𑀧𑀫𑁄 𑀦𑀸𑀫 𑀅𑀢𑁆𑀭𑀚𑁄.

𑁨𑁪. 𑀦𑀺𑀫𑀺𑀢𑁆𑀢𑁂 𑀘𑀢𑀼𑀭𑁄 𑀤𑀺𑀲𑁆𑀯𑀸, 𑀳𑀢𑁆𑀣𑀺𑀬𑀸𑀦𑁂𑀦 𑀦𑀺𑀓𑁆𑀔𑀫𑀺;

𑀅𑀦𑀽𑀦𑀤𑀲𑀫𑀸𑀲𑀸𑀦𑀺, 𑀧𑀥𑀸𑀦𑀁 𑀧𑀤𑀳𑀻 𑀚𑀺𑀦𑁄.

𑁨𑁫. 𑀩𑁆𑀭𑀳𑁆𑀫𑀼𑀦𑀸 𑀬𑀸𑀘𑀺𑀢𑁄 𑀲𑀦𑁆𑀢𑁄, 𑀲𑀼𑀫𑀦𑁄 𑀮𑁄𑀓𑀦𑀸𑀬𑀓𑁄;

𑀯𑀢𑁆𑀢𑀺 𑀘𑀓𑁆𑀓𑀁 𑀫𑀳𑀸𑀯𑀻𑀭𑁄, 𑀫𑁂𑀔𑀮𑁂 𑀧𑀼𑀭𑀫𑀼𑀢𑁆𑀢𑀫𑁂.

𑁨𑁬. 𑀲𑀭𑀡𑁄 𑀪𑀸𑀯𑀺𑀢𑀢𑁆𑀢𑁄 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀓𑀸;

𑀉𑀤𑁂𑀦𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀲𑀼𑀫𑀦𑀲𑁆𑀲 𑀫𑀳𑁂𑀲𑀺𑀦𑁄.

𑁨𑁭. 𑀲𑁄𑀡𑀸 𑀘 𑀉𑀧𑀲𑁄𑀡𑀸 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀺𑀓𑀸;

𑀲𑁄𑀧𑀺 𑀩𑀼𑀤𑁆𑀥𑁄 𑀅𑀫𑀺𑀢𑀬𑀲𑁄, 𑀦𑀸𑀕𑀫𑀽𑀮𑁂 𑀅𑀩𑀼𑀚𑁆𑀛𑀣.

𑁨𑁮. 𑀯𑀭𑀼𑀡𑁄 𑀘𑁂𑀯 𑀲𑀭𑀡𑁄 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀼𑀧𑀝𑁆𑀞𑀓𑀸;

𑀘𑀸𑀮𑀸 𑀘 𑀉𑀧𑀘𑀸𑀮𑀸 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀼𑀧𑀝𑁆𑀞𑀺𑀓𑀸.

𑁨𑁯. 𑀉𑀘𑁆𑀘𑀢𑁆𑀢𑀦𑁂𑀦 [𑀉𑀘𑁆𑀘𑀢𑀭𑁂𑀦 (𑀓.)] 𑀲𑁄 𑀩𑀼𑀤𑁆𑀥𑁄, 𑀦𑀯𑀼𑀢𑀺𑀳𑀢𑁆𑀣𑀫𑀼𑀕𑁆𑀕𑀢𑁄;

𑀓𑀜𑁆𑀘𑀦𑀕𑁆𑀖𑀺𑀬𑀲𑀗𑁆𑀓𑀸𑀲𑁄, 𑀤𑀲𑀲𑀳𑀲𑁆𑀲𑀻 𑀯𑀺𑀭𑁄𑀘𑀢𑀺.

𑁩𑁦. 𑀦𑀯𑀼𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀆𑀬𑀼 𑀯𑀺𑀚𑁆𑀚𑀢𑀺 𑀢𑀸𑀯𑀤𑁂;

𑀢𑀸𑀯𑀢𑀸 𑀢𑀺𑀝𑁆𑀞𑀫𑀸𑀦𑁄 𑀲𑁄, 𑀢𑀸𑀭𑁂𑀲𑀺 𑀚𑀦𑀢𑀁 𑀩𑀳𑀼𑀁.

𑁩𑁧. 𑀢𑀸𑀭𑀡𑀻𑀬𑁂 𑀢𑀸𑀭𑀬𑀺𑀢𑁆𑀯𑀸, 𑀩𑁄𑀥𑀦𑀻𑀬𑁂 𑀘 𑀩𑁄𑀥𑀬𑀺;

𑀧𑀭𑀺𑀦𑀺𑀩𑁆𑀩𑀸𑀬𑀺 𑀲𑀫𑁆𑀩𑀼𑀤𑁆𑀥𑁄, 𑀉𑀴𑀼𑀭𑀸𑀚𑀸𑀯 𑀅𑀢𑁆𑀣𑀫𑀺.

𑁩𑁨. 𑀢𑁂 𑀘 𑀔𑀻𑀡𑀸𑀲𑀯𑀸 𑀪𑀺𑀓𑁆𑀔𑀽, 𑀲𑁄 𑀘 𑀩𑀼𑀤𑁆𑀥𑁄 𑀅𑀲𑀸𑀤𑀺𑀲𑁄;

𑀅𑀢𑀼𑀮𑀧𑁆𑀧𑀪𑀁 𑀤𑀲𑁆𑀲𑀬𑀺𑀢𑁆𑀯𑀸, 𑀦𑀺𑀩𑁆𑀩𑀼𑀢𑀸 𑀬𑁂 𑀫𑀳𑀸𑀬𑀲𑀸.

𑁩𑁩. 𑀢𑀜𑁆𑀘 𑀜𑀸𑀡𑀁 𑀅𑀢𑀼𑀮𑀺𑀬𑀁, 𑀢𑀸𑀦𑀺 𑀘 𑀅𑀢𑀼𑀮𑀸𑀦𑀺 𑀭𑀢𑀦𑀸𑀦𑀺;

𑀲𑀩𑁆𑀩𑀁 𑀢𑀫𑀦𑁆𑀢𑀭𑀳𑀺𑀢𑀁, 𑀦𑀦𑀼 𑀭𑀺𑀢𑁆𑀢𑀸 𑀲𑀩𑁆𑀩𑀲𑀗𑁆𑀔𑀸𑀭𑀸.

𑁩𑁪. 𑀲𑀼𑀫𑀦𑁄 𑀬𑀲𑀥𑀭𑁄 𑀩𑀼𑀤𑁆𑀥𑁄, 𑀅𑀗𑁆𑀕𑀸𑀭𑀸𑀫𑀫𑁆𑀳𑀺 𑀦𑀺𑀩𑁆𑀩𑀼𑀢𑁄;

𑀢𑀢𑁆𑀣𑁂𑀯 𑀢𑀲𑁆𑀲 𑀚𑀺𑀦𑀣𑀽𑀧𑁄, 𑀘𑀢𑀼𑀬𑁄𑀚𑀦𑀫𑀼𑀕𑁆𑀕𑀢𑁄𑀢𑀺.

𑀲𑀼𑀫𑀦𑀲𑁆𑀲 𑀪𑀕𑀯𑀢𑁄 𑀯𑀁𑀲𑁄 𑀘𑀢𑀼𑀢𑁆𑀣𑁄.