𑁫. 𑀫𑀗𑁆𑀕𑀮𑀩𑀼𑀤𑁆𑀥𑀯𑀁𑀲𑁄

𑁧. 𑀓𑁄𑀡𑁆𑀟𑀜𑁆𑀜𑀲𑁆𑀲 𑀅𑀧𑀭𑁂𑀦, 𑀫𑀗𑁆𑀕𑀮𑁄 𑀦𑀸𑀫 𑀦𑀸𑀬𑀓𑁄;

𑀢𑀫𑀁 𑀮𑁄𑀓𑁂 𑀦𑀺𑀳𑀦𑁆𑀢𑁆𑀯𑀸𑀦, 𑀥𑀫𑁆𑀫𑁄𑀓𑁆𑀓𑀫𑀪𑀺𑀥𑀸𑀭𑀬𑀺.

𑁨. 𑀅𑀢𑀼𑀮𑀸𑀲𑀺 𑀧𑀪𑀸 𑀢𑀲𑁆𑀲, 𑀚𑀺𑀦𑁂𑀳𑀜𑁆𑀜𑁂𑀳𑀺 𑀉𑀢𑁆𑀢𑀭𑀺𑀁;

𑀘𑀦𑁆𑀤𑀲𑀽𑀭𑀺𑀬𑀧𑀪𑀁 𑀳𑀦𑁆𑀢𑁆𑀯𑀸, 𑀤𑀲𑀲𑀳𑀲𑁆𑀲𑀻 𑀯𑀺𑀭𑁄𑀘𑀢𑀺.

𑁩. 𑀲𑁄𑀧𑀺 𑀩𑀼𑀤𑁆𑀥𑁄 𑀧𑀓𑀸𑀲𑁂𑀲𑀺, 𑀘𑀢𑀼𑀭𑁄 𑀲𑀘𑁆𑀘𑀯𑀭𑀼𑀢𑁆𑀢𑀫𑁂;

𑀢𑁂 𑀢𑁂 𑀲𑀘𑁆𑀘𑀭𑀲𑀁 𑀧𑀻𑀢𑁆𑀯𑀸, 𑀯𑀺𑀦𑁄𑀤𑁂𑀦𑁆𑀢𑀺 𑀫𑀳𑀸𑀢𑀫𑀁.

𑁪. 𑀧𑀢𑁆𑀯𑀸𑀦 𑀩𑁄𑀥𑀺𑀫𑀢𑀼𑀮𑀁, 𑀧𑀞𑀫𑁂 𑀥𑀫𑁆𑀫𑀤𑁂𑀲𑀦𑁂;

𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁, 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑀼.

𑁫. 𑀲𑀼𑀭𑀺𑀦𑁆𑀤𑀤𑁂𑀯𑀪𑀯𑀦𑁂, 𑀩𑀼𑀤𑁆𑀥𑁄 𑀥𑀫𑁆𑀫𑀫𑀤𑁂𑀲𑀬𑀺;

𑀢𑀤𑀸 𑀓𑁄𑀝𑀺𑀲𑀳𑀲𑁆𑀲𑀸𑀦𑀁 [𑀦𑀯𑀓𑁄𑀝𑀺𑀲𑀳𑀲𑁆𑀲𑀸𑀦𑀁 (𑀲𑀻.)], 𑀤𑀼𑀢𑀺𑀬𑁄 𑀲𑀫𑀬𑁄 𑀅𑀳𑀼.

𑁬. 𑀬𑀤𑀸 𑀲𑀼𑀦𑀦𑁆𑀤𑁄 𑀘𑀓𑁆𑀓𑀯𑀢𑁆𑀢𑀻, 𑀲𑀫𑁆𑀩𑀼𑀤𑁆𑀥𑀁 𑀉𑀧𑀲𑀗𑁆𑀓𑀫𑀺;

𑀢𑀤𑀸 𑀆𑀳𑀦𑀺 𑀲𑀫𑁆𑀩𑀼𑀤𑁆𑀥𑁄, 𑀥𑀫𑁆𑀫𑀪𑁂𑀭𑀺𑀁 𑀯𑀭𑀼𑀢𑁆𑀢𑀫𑀁.

𑁭. 𑀲𑀼𑀦𑀦𑁆𑀤𑀲𑁆𑀲𑀸𑀦𑀼𑀘𑀭𑀸 𑀚𑀦𑀢𑀸, 𑀢𑀤𑀸𑀲𑀼𑀁 𑀦𑀯𑀼𑀢𑀺𑀓𑁄𑀝𑀺𑀬𑁄;

𑀲𑀩𑁆𑀩𑁂𑀧𑀺 𑀢𑁂 𑀦𑀺𑀭𑀯𑀲𑁂𑀲𑀸, 𑀅𑀳𑁂𑀲𑀼𑀁 𑀏𑀳𑀺 𑀪𑀺𑀓𑁆𑀔𑀼𑀓𑀸.

𑁮. 𑀲𑀦𑁆𑀦𑀺𑀧𑀸𑀢𑀸 𑀢𑀬𑁄 𑀆𑀲𑀼𑀁, 𑀫𑀗𑁆𑀕𑀮𑀲𑁆𑀲 𑀫𑀳𑁂𑀲𑀺𑀦𑁄;

𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁, 𑀧𑀞𑀫𑁄 𑀆𑀲𑀺 𑀲𑀫𑀸𑀕𑀫𑁄.

𑁯. 𑀤𑀼𑀢𑀺𑀬𑁄 𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁, 𑀢𑀢𑀺𑀬𑁄 𑀦𑀯𑀼𑀢𑀺𑀓𑁄𑀝𑀺𑀦𑀁;

𑀔𑀻𑀡𑀸𑀲𑀯𑀸𑀦𑀁 𑀯𑀺𑀫𑀮𑀸𑀦𑀁, 𑀢𑀤𑀸 𑀆𑀲𑀺 𑀲𑀫𑀸𑀕𑀫𑁄.

𑁧𑁦. 𑀅𑀳𑀁 𑀢𑁂𑀦 𑀲𑀫𑀬𑁂𑀦, 𑀲𑀼𑀭𑀼𑀘𑀻 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄;

𑀅𑀚𑁆𑀛𑀸𑀬𑀓𑁄 𑀫𑀦𑁆𑀢𑀥𑀭𑁄, 𑀢𑀺𑀡𑁆𑀡𑀁 𑀯𑁂𑀤𑀸𑀦 𑀧𑀸𑀭𑀕𑀽.

𑁧𑁧. 𑀢𑀫𑀳𑀁 𑀉𑀧𑀲𑀗𑁆𑀓𑀫𑁆𑀫, 𑀲𑀭𑀡𑀁 𑀕𑀦𑁆𑀢𑁆𑀯𑀸𑀦 𑀲𑀢𑁆𑀣𑀼𑀦𑁄;

𑀲𑀫𑁆𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀲𑀗𑁆𑀖𑀁, 𑀕𑀦𑁆𑀥𑀫𑀸𑀮𑁂𑀦 𑀧𑀽𑀚𑀬𑀺𑀁;

𑀧𑀽𑀚𑁂𑀢𑁆𑀯𑀸 𑀕𑀦𑁆𑀥𑀫𑀸𑀮𑁂𑀦, 𑀕𑀯𑀧𑀸𑀦𑁂𑀦 𑀢𑀧𑁆𑀧𑀬𑀺𑀁.

𑁧𑁨. 𑀲𑁄𑀧𑀺 𑀫𑀁 𑀩𑀼𑀤𑁆𑀥𑁄 𑀩𑁆𑀬𑀸𑀓𑀸𑀲𑀺, 𑀫𑀗𑁆𑀕𑀮𑁄 𑀤𑁆𑀯𑀺𑀧𑀤𑀼𑀢𑁆𑀢𑀫𑁄;

‘‘𑀅𑀧𑀭𑀺𑀫𑁂𑀬𑁆𑀬𑀺𑀢𑁄 𑀓𑀧𑁆𑀧𑁂, 𑀅𑀬𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺.

𑁧𑁩. ‘‘𑀧𑀥𑀸𑀦𑀁 𑀧𑀤𑀳𑀺𑀢𑁆𑀯𑀸𑀦…𑀧𑁂… 𑀳𑁂𑀲𑁆𑀲𑀸𑀫 𑀲𑀫𑁆𑀫𑀼𑀔𑀸 𑀇𑀫𑀁’’.

𑁧𑁪. 𑀢𑀲𑁆𑀲𑀸𑀧𑀺 𑀯𑀘𑀦𑀁 𑀲𑀼𑀢𑁆𑀯𑀸, 𑀪𑀺𑀬𑁆𑀬𑁄 𑀘𑀺𑀢𑁆𑀢𑀁 𑀧𑀲𑀸𑀤𑀬𑀺𑀁;

𑀉𑀢𑁆𑀢𑀭𑀺𑀁 𑀯𑀢𑀫𑀥𑀺𑀝𑁆𑀞𑀸𑀲𑀺𑀁, 𑀤𑀲 𑀧𑀸𑀭𑀫𑀺𑀧𑀽𑀭𑀺𑀬𑀸.

𑁧𑁫. 𑀢𑀤𑀸 𑀧𑀻𑀢𑀺𑀫𑀦𑀼𑀩𑁆𑀭𑀽𑀳𑀦𑁆𑀢𑁄, 𑀲𑀫𑁆𑀩𑁄𑀥𑀺𑀯𑀭𑀧𑀢𑁆𑀢𑀺𑀬𑀸;

𑀩𑀼𑀤𑁆𑀥𑁂 𑀤𑀢𑁆𑀯𑀸𑀦 𑀫𑀁 𑀕𑁂𑀳𑀁, 𑀧𑀩𑁆𑀩𑀚𑀺𑀁 𑀢𑀲𑁆𑀲 𑀲𑀦𑁆𑀢𑀺𑀓𑁂.

𑁧𑁬. 𑀲𑀼𑀢𑁆𑀢𑀦𑁆𑀢𑀁 𑀯𑀺𑀦𑀬𑀜𑁆𑀘𑀸𑀧𑀺, 𑀦𑀯𑀗𑁆𑀕𑀁 𑀲𑀢𑁆𑀣𑀼𑀲𑀸𑀲𑀦𑀁;

𑀲𑀩𑁆𑀩𑀁 𑀧𑀭𑀺𑀬𑀸𑀧𑀼𑀡𑀺𑀢𑁆𑀯𑀸, 𑀲𑁄𑀪𑀬𑀺𑀁 𑀚𑀺𑀦𑀲𑀸𑀲𑀦𑀁.

𑁧𑁭. 𑀢𑀢𑁆𑀣𑀧𑁆𑀧𑀫𑀢𑁆𑀢𑁄 𑀯𑀺𑀳𑀭𑀦𑁆𑀢𑁄, 𑀩𑁆𑀭𑀳𑁆𑀫𑀁 𑀪𑀸𑀯𑁂𑀢𑁆𑀯 𑀪𑀸𑀯𑀦𑀁;

𑀅𑀪𑀺𑀜𑁆𑀜𑀸𑀧𑀸𑀭𑀫𑀺𑀁 𑀕𑀦𑁆𑀢𑁆𑀯𑀸, 𑀩𑁆𑀭𑀳𑁆𑀫𑀮𑁄𑀓𑀫𑀕𑀘𑁆𑀙𑀳𑀁.

𑁧𑁮. 𑀉𑀢𑁆𑀢𑀭𑀁 𑀦𑀸𑀫 𑀦𑀕𑀭𑀁, 𑀉𑀢𑁆𑀢𑀭𑁄 𑀦𑀸𑀫 𑀔𑀢𑁆𑀢𑀺𑀬𑁄;

𑀉𑀢𑁆𑀢𑀭𑀸 𑀦𑀸𑀫 𑀚𑀦𑀺𑀓𑀸, 𑀫𑀗𑁆𑀕𑀮𑀲𑁆𑀲 𑀫𑀳𑁂𑀲𑀺𑀦𑁄.

𑁧𑁯. 𑀦𑀯𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀅𑀕𑀸𑀭𑀁 𑀅𑀚𑁆𑀛 𑀲𑁄 𑀯𑀲𑀺;

𑀬𑀲𑀯𑀸 𑀲𑀼𑀘𑀺𑀫𑀸 𑀲𑀺𑀭𑀻𑀫𑀸, 𑀢𑀬𑁄 𑀧𑀸𑀲𑀸𑀤𑀫𑀼𑀢𑁆𑀢𑀫𑀸.

𑁨𑁦. 𑀲𑀫𑀢𑀺𑀁𑀲𑀲𑀳𑀲𑁆𑀲𑀸𑀦𑀺, 𑀦𑀸𑀭𑀺𑀬𑁄 𑀲𑀫𑀮𑀗𑁆𑀓𑀢𑀸;

𑀬𑀲𑀯𑀢𑀻 𑀦𑀸𑀫 𑀦𑀸𑀭𑀻, 𑀲𑀻𑀯𑀮𑁄 𑀦𑀸𑀫 𑀅𑀢𑁆𑀭𑀚𑁄.

𑁨𑁧. 𑀦𑀺𑀫𑀺𑀢𑁆𑀢𑁂 𑀘𑀢𑀼𑀭𑁄 𑀤𑀺𑀲𑁆𑀯𑀸, 𑀅𑀲𑁆𑀲𑀬𑀸𑀦𑁂𑀦 𑀦𑀺𑀓𑁆𑀔𑀫𑀺;

𑀅𑀦𑀽𑀦𑀅𑀝𑁆𑀞𑀫𑀸𑀲𑀸𑀦𑀺, 𑀧𑀥𑀸𑀦𑀁 𑀧𑀤𑀳𑀻 𑀚𑀺𑀦𑁄.

𑁨𑁨. 𑀩𑁆𑀭𑀳𑁆𑀫𑀼𑀦𑀸 𑀬𑀸𑀘𑀺𑀢𑁄 𑀲𑀦𑁆𑀢𑁄, 𑀫𑀗𑁆𑀕𑀮𑁄 𑀦𑀸𑀫 𑀦𑀸𑀬𑀓𑁄;

𑀯𑀢𑁆𑀢𑀺 𑀘𑀓𑁆𑀓𑀁 𑀫𑀳𑀸𑀯𑀻𑀭𑁄, 𑀯𑀦𑁂 𑀲𑀺𑀭𑀻𑀯𑀭𑀼𑀢𑁆𑀢𑀫𑁂.

𑁨𑁩. 𑀲𑀼𑀤𑁂𑀯𑁄 𑀥𑀫𑁆𑀫𑀲𑁂𑀦𑁄 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀓𑀸;

𑀧𑀸𑀮𑀺𑀢𑁄 𑀦𑀸𑀫𑀼𑀧𑀝𑁆𑀞𑀸𑀓𑁄, 𑀫𑀗𑁆𑀕𑀮𑀲𑁆𑀲 𑀫𑀳𑁂𑀲𑀺𑀦𑁄.

𑁨𑁪. 𑀲𑀻𑀯𑀮𑀸 𑀘 𑀅𑀲𑁄𑀓𑀸 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀲𑀸𑀯𑀺𑀓𑀸;

𑀩𑁄𑀥𑀺 𑀢𑀲𑁆𑀲 𑀪𑀕𑀯𑀢𑁄, 𑀦𑀸𑀕𑀭𑀼𑀓𑁆𑀔𑁄𑀢𑀺 𑀯𑀼𑀘𑁆𑀘𑀢𑀺.

𑁨𑁫. 𑀦𑀦𑁆𑀤𑁄 𑀘𑁂𑀯 𑀯𑀺𑀲𑀸𑀔𑁄 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀼𑀧𑀝𑁆𑀞𑀓𑀸;

𑀅𑀦𑀼𑀮𑀸 𑀘𑁂𑀯 𑀲𑀼𑀢𑀦𑀸 𑀘, 𑀅𑀳𑁂𑀲𑀼𑀁 𑀅𑀕𑁆𑀕𑀼𑀧𑀝𑁆𑀞𑀺𑀓𑀸.

𑁨𑁬. 𑀅𑀝𑁆𑀞𑀸𑀲𑀻𑀢𑀺 𑀭𑀢𑀦𑀸𑀦𑀺, 𑀅𑀘𑁆𑀘𑀼𑀕𑁆𑀕𑀢𑁄 𑀫𑀳𑀸𑀫𑀼𑀦𑀺;

𑀢𑀢𑁄 𑀦𑀺𑀤𑁆𑀥𑀸𑀯𑀢𑀻 𑀭𑀁𑀲𑀻, 𑀅𑀦𑁂𑀓𑀲𑀢𑀲𑀳𑀲𑁆𑀲𑀺𑀬𑁄.

𑁨𑁭. 𑀦𑀯𑀼𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀆𑀬𑀼 𑀯𑀺𑀚𑁆𑀚𑀢𑀺 𑀢𑀸𑀯𑀤𑁂;

𑀢𑀸𑀯𑀢𑀸 𑀢𑀺𑀝𑁆𑀞𑀫𑀸𑀦𑁄 𑀲𑁄, 𑀢𑀸𑀭𑁂𑀲𑀺 𑀚𑀦𑀢𑀁 𑀩𑀳𑀼𑀁.

𑁨𑁮. 𑀬𑀣𑀸𑀧𑀺 𑀲𑀸𑀕𑀭𑁂 𑀊𑀫𑀻, 𑀦 𑀲𑀓𑁆𑀓𑀸 𑀢𑀸 𑀕𑀡𑁂𑀢𑀼𑀬𑁂;

𑀢𑀣𑁂𑀯 𑀲𑀸𑀯𑀓𑀸 𑀢𑀲𑁆𑀲, 𑀦 𑀲𑀓𑁆𑀓𑀸 𑀢𑁂 𑀕𑀡𑁂𑀢𑀼𑀬𑁂.

𑁨𑁯. 𑀬𑀸𑀯 𑀅𑀝𑁆𑀞𑀸𑀲𑀺 𑀲𑀫𑁆𑀩𑀼𑀤𑁆𑀥𑁄, 𑀫𑀗𑁆𑀕𑀮𑁄 𑀮𑁄𑀓𑀦𑀸𑀬𑀓𑁄;

𑀦 𑀢𑀲𑁆𑀲 𑀲𑀸𑀲𑀦𑁂 𑀅𑀢𑁆𑀣𑀺, 𑀲𑀓𑀺𑀮𑁂𑀲𑀫𑀭𑀡𑀁 [𑀲𑀁𑀓𑀺𑀮𑁂𑀲𑀫𑀭𑀡𑀁 (𑀲𑀻.)] 𑀢𑀤𑀸.

𑁩𑁦. 𑀥𑀫𑁆𑀫𑁄𑀓𑁆𑀓𑀁 𑀥𑀸𑀭𑀬𑀺𑀢𑁆𑀯𑀸𑀦, 𑀲𑀦𑁆𑀢𑀸𑀭𑁂𑀢𑁆𑀯𑀸 𑀫𑀳𑀸𑀚𑀦𑀁;

𑀚𑀮𑀺𑀢𑁆𑀯𑀸 𑀥𑀽𑀫𑀓𑁂𑀢𑀽𑀯, 𑀦𑀺𑀩𑁆𑀩𑀼𑀢𑁄 𑀲𑁄 𑀫𑀳𑀸𑀬𑀲𑁄.

𑁩𑁧. 𑀲𑀗𑁆𑀔𑀸𑀭𑀸𑀦𑀁 𑀲𑀪𑀸𑀯𑀢𑁆𑀣𑀁, 𑀤𑀲𑁆𑀲𑀬𑀺𑀢𑁆𑀯𑀸 𑀲𑀤𑁂𑀯𑀓𑁂;

𑀚𑀮𑀺𑀢𑁆𑀯𑀸 𑀅𑀕𑁆𑀕𑀺𑀓𑁆𑀔𑀦𑁆𑀥𑁄𑀯, 𑀲𑀽𑀭𑀺𑀬𑁄 𑀅𑀢𑁆𑀣𑀗𑁆𑀕𑀢𑁄 𑀬𑀣𑀸.

𑁩𑁨. 𑀉𑀬𑁆𑀬𑀸𑀦𑁂 𑀯𑀲𑁆𑀲𑀭𑁂 𑀦𑀸𑀫, 𑀩𑀼𑀤𑁆𑀥𑁄 𑀦𑀺𑀩𑁆𑀩𑀸𑀬𑀺 𑀫𑀗𑁆𑀕𑀮𑁄;

𑀢𑀢𑁆𑀣𑁂𑀯𑀲𑁆𑀲 𑀚𑀺𑀦𑀣𑀽𑀧𑁄, 𑀢𑀺𑀁𑀲𑀬𑁄𑀚𑀦𑀫𑀼𑀕𑁆𑀕𑀢𑁄𑀢𑀺.

𑀫𑀗𑁆𑀕𑀮𑀲𑁆𑀲 𑀪𑀕𑀯𑀢𑁄 𑀯𑀁𑀲𑁄 𑀢𑀢𑀺𑀬𑁄.